Ndiéjunʼ esngúlú gaʼyee ga̱jma̱a̱ numuu Dios rá.

Nákha wájyúuʼ Dios nijmiuu gaʼyee mu maʼthúún xa̱bu̱ rí gíʼdoo wéñuʼ numuu. Lá náa ajngáa rúʼko̱ naʼthúlú ndiéjunʼ rí eyoo Dios mu̱ʼni̱ mu maʼni tsajkurámáanʼ xáʼ. Xúʼko̱, guʼyáá ndiéjunʼ ejmañuluʼ rí nithi ajtsíin gaʼyee bi̱ niguájun jmbu.

ABRAHÁN

Dios tséraʼwíin xa̱bu̱ ga̱jma̱a̱ nandoo maʼni tsajkurámiinʼ mbá xúgínʼ.

Dios nikudaminaʼ náa gaʼyee Abrahán: “Xúgínʼ xa̱bu̱ bi̱ kuwa náa tsu̱du̱u̱ ku̱ba̱ʼ maguma tsajkurámiinʼ ga̱jma̱a̱ numaʼ” (Génesis 12:3).

Ndiéjunʼ ejmañuluʼ rá. Rí Dios nandoo kaʼyulú wéñuʼ ga̱jma̱a̱ nandoo rí maʼni tsajkurámiinʼ mbá xúgínʼ bi̱ kúwi̱i̱n mbá guʼwíin (xa̱bekha, gu̱ʼu̱ ga̱jma̱a̱ e̱ji̱n) bi̱ nunimbu̱u̱n.

MOISÉS

Dios nagáwiinʼ a̱jkiu̱u̱n ga̱jma̱a̱ naʼni tsajkurámiinʼ bi̱ nunimíjna̱ muniʼniiʼ.

Bi̱ gíʼdoo xúgíʼ tsiakii nixnúu tsiakii gaʼyee Moisés mu maʼni milagro. Maski ajndu xúʼko̱, Moisés nindo̱ʼo̱o̱ Dios: “Arasngóʼ mba̱yo̱o̱ xú káʼnii nindxu̱u̱ kamba̱a̱ʼ mu ma̱ndoo maniʼníínʼ ga̱jma̱a̱ ma̱ta̱ya̱a̱ rí nani dí májánʼ má xúʼko̱” (Éxodo 33:13). Dios ninigu̱u̱ʼ wéñuʼ rí ninda̱ʼa̱ Moisés ga̱jma̱a̱ niʼni tsajkurámaaʼ, nixnúu ku̱ma̱ ga̱jma̱a̱ nimbáyúu mu maninuuʼ xóo nindxu̱u̱ ga̱jma̱a̱ rí naʼni. Mbá xkri̱da, Moisés nijmañuu rí bi̱ Niʼniáanʼ nindxu̱u̱ “mbáa Dios bi̱ naʼni mba̱a̱ a̱jkiu̱u̱n, ga̱jma̱a̱ nagáwiinʼ a̱jkiu̱u̱n” (Éxodo 34:6, 7).

Ndiéjunʼ ejmañuluʼ rá. Rí Dios ma’ni tsajkurámáanʼlu mbá xúgiáánʼ; xa̱bekha, gu̱ʼu̱ ga̱jma̱a̱ e̱ji̱n á mu nuʼnimíjna̱ muniʼniiʼlu itháan májánʼ. Náa Ajngá rawunʼ naʼthúlú xú káʼnii gíʼmaa mbuʼyamajkuíí ga̱jma̱a̱ dí ra̱ʼkhá tháán eyoo maʼni tsajkurámáanʼlu.

JESÚS

Dios maʼni tsajkurámáanʼ kámuu á mu najmañulú rí niʼni Jesús ga̱jma̱a̱ rí niʼsngáa.

Náa Ajngá rawunʼ Dios na̱ʼkha̱ raʼthí wéñuʼ xóo kaʼnii nixtáa Jesús ga̱jma̱a̱ rí niʼsngáa. Dios nixnúu tsiakii Jesús mu maʼni mbaʼa milagros, mu maʼni thanún xúgínʼ bi̱ tsíkrui̱gu̱u̱n, bi̱ tsédxawíín ga̱jma̱a̱ bi̱ tsíyoo gágún. Asndu niʼnigabi̱ín tikhun xa̱bu̱ bi̱ nikháñun. Xúʼko̱ kaʼnii Jesús nisngájma rí Dios gáʼni ga̱jma̱á ni̱ndxu̱lú nda̱wa̱á. Ikhaa niʼthí ndiéjunʼ gíʼmaa mu̱ʼni̱ mu maguma tsajkurámáanʼlu: “Rígi̱ eyoo gáʼthúu̱n rí makuwá kámuu mbiʼi, bi̱ muninuwínʼ ikháán, mbáwiin ikháán bi̱ ni̱ndxa̱ʼ Dios gajkhun, ga̱jma̱a̱ Jesucristo bi̱ nitaxúnguanʼ” (Juan 17:3).

Jesús nigáwiinʼ a̱jkiu̱u̱n, nigiʼdoo ngajua ga̱jma̱a̱ májánʼ a̱jkiu̱u̱n. Ikha jngó xa̱bekha ga̱jma̱a̱ gu̱ʼu̱ bi̱ mixtiʼkhu tsiguúnʼ nidxawíín ajngáa rí niʼthí: “Gajmañala rí nani ikhúúnʼ, numuu rí ni̱ndxu̱ʼ mbáa xa̱bu̱ bi̱ tsékiʼnáa ga̱jma̱a̱ gua̱ba̱ʼ a̱jkiu̱u̱nʼ. Náa ikhúúnʼ gúxkamaa rí maʼni̱i̱ a̱jkia̱la” (Mateo 11:29). Tikhun xa̱bu̱ bi̱ nikúwá nákha ikhú nuni̱ gíníi gu̱ʼu̱, mú Jesús niʼñúún rí májánʼ, ga̱jma̱a̱ ndiʼyamajkhún.

Ndiéjunʼ ejmañuluʼ rá. Rí Jesús nindoo kaʼñún wéñuʼ xa̱bu̱ ga̱jma̱a̱ niniñuuʼ mbá májánʼ xkri̱da rí xú káʼnii gíʼmáanʼ maʼndulú kuʼyamijná.

JESÚS NA̱NGUÁ NINDXU̱U̱ DIOS

Náa Ajngá rawunʼ Dios naʼsngúlú rí “xtáa mbáwíi Dios” ga̱jma̱a̱ rí Jesucristo ninindxu̱u̱ bi̱ nijngruigo̱o̱ kayóo ajngóo (1 Corintios 8:6). Jesús niʼthí kaʼwu rí Dios itháan mba̱a̱ ki xóo ikhaa ga̱jma̱a̱ rí Dios nikunguaanʼ ma̱ʼkha̱ náa tsu̱du̱u̱ Ku̱ba̱ʼ (Juan 11:41, 42; 14:28).a

a Á mu nandaaʼ ma̱ta̱ya̱a̱ itháan ga̱jma̱a̱ numuu Jesucristo, atayáá náa sección 8 ga̱jma̱a̱ 9 ndrígóo folleto La fe verdadera, la puerta a una vida feliz, dí rígá náa www.jw.org.