RÍ MAMBÁYULÚ MU XÁWIYULÚ KUʼÑÚÚN EʼWÍINʼ

3 | Atani̱ gámbáa dí nawiya̱a̱ʼ xtañún eʼwíinʼ

Náa Biblia naʼthí:

“Guriʼkumijnáala mu muriʼkui̱i̱ ku̱ma̱ ndrígála, mu ikháanʼ mínanʼ mbu̱ya̱a̱la xú káʼnii dí májánʼ nanigu̱u̱ʼ ga̱jma̱a̱ xúgíʼ dí Dios nandoo maguma” (ROMANOS 12:2).

Ndiéjunʼ eyoo gáʼthúu̱n rá.

Gíʼdoo numuu dí nundxaʼwamíjná eʼyoo Dios (Jeremías 17:10). Gajkhun má dí ndayóoʼ muñeʼwa̱a̱n dí nuʼthá ga̱jma̱a̱ rí nu̱ʼni̱, mú raʼkháa i̱ndó rígi̱ eyóoʼ muʼnilú. Numuu dí nawiyulú kuʼyáá mbáa nagi̱ʼdu̱u̱ náa edxu̱lú ga̱jma̱a̱ náa a̱jkiu̱lú, ikha jngóo ndayóoʼ muʼnigámbáa náa edxu̱lú ga̱jma̱a̱ náa a̱jkiu̱lú dí nawiyulú kuʼñúún eʼwíinʼ. Numuu dí i̱ndó xúʼko̱ ma̱ndoo “muriʼkumijnáanʼlú” ga̱jma̱a̱ xárígá itháan dí nawiyulú kuʼyamijná.

Ataniminaʼ matani̱ rígi̱:

Arathá dí gajkhun ga̱jma̱a̱ atayáá xú káʼni ku̱ma̱a̱ʼ ma̱ngaa ndiéjunʼ tatsaʼwáminaʼ ga̱jma̱a̱ numún eʼwíinʼ, itháán á mu nindxu̱ún imbo̱o̱ʼ raza o naguwáʼ imbo̱o̱ʼ xuajen. Atrajxi̱mínáʼ rígi̱: “Xú káʼnii eñu̱u̱n xá. Lá dí nandxa̱ʼwa̱mínáʼ ga̱jma̱a̱ numún ikhiin nindxu̱u̱ ga̱jma̱a̱ numuu rí nda̱yo̱o̱ ráʼ. O nindxu̱u̱ ga̱jma̱a̱ numuu dí naguwáʼ náa imbo̱o̱ʼ xuajen o raza ndrígu̱ún che̱ʼ”. Xáta̱ya̱a̱ ináa ndrígóo Internet, películas o i̱ʼwáʼ dí maʼni mawiya̱a̱ʼ xtañún eʼwíinʼ ga̱jma̱a̱ maʼni matagiʼda̱a̱ʼ gajmiáanʼ.

Ajngá rawuunʼ Dios ma̱ndoo mambáyulú muʼnigámbáa náa edxu̱lú ga̱jma̱a̱ náa a̱jkiu̱lú dí nawiyulú kuʼñúún eʼwíinʼ.

Gajkhun má dí xáʼngulú gúʼyáá xóo phú kaʼnii e̱ndxa̱ʼwa̱míjna̱ ga̱jma̱a̱ xú káʼnii kumulú. Mú Ajngá rawuunʼ Dios ma̱ndoo mambáyulú, numuu dí “naʼngo̱o̱ nasngájma ku̱ma̱ ga̱jma̱a̱ rí nandoo maʼni a̱jkiu̱lú” (Hebreos 4:12). Ikha jngóo atanigajma̱a̱ dí naʼthí náa Biblia ma̱ngaa atanimbríguii ga̱jma̱a̱ dí natatsaʼwáminaʼ. Atani̱ mbá tsiakii matatsaʼwamínáʼ xóo nanigu̱u̱ʼ Dios. Ajngá rawuunʼ Dios ma̱ndoo “maʼni gámbáa” dí rígá náa edxu̱lú ga̱jma̱a̱ náa a̱jkiu̱lú, xóo rí nawiyulú kuʼñúún eʼwíinʼ (2 Corintios 10:4, 5).

Xkri̱da ndrígu̱ún xa̱bu̱ bi̱ kúwíin rí mbiʼi xúgi̱: STEPHEN

Niriʼkhu̱u̱ xóo endxa̱ʼwáminaʼ

Stephen gajmíi̱n bi̱ kúwíin náa goʼwóo nimíniiʼ numuu dí xa̱bu̱ bi̱ miʼxíin niwiñu̱u̱nʼ kuñún. Ikha jngóo ma̱ngaa nikudaminaʼ náa política náa kúwíin bi̱ nduyáʼ dí xúgíinʼ xa̱bu̱ maguaʼdáá numún. Dí niwiñu̱u̱nʼ kuñún eʼwíinʼ niʼni rí maʼni dí ra̱májánʼ. Ikhaa naʼthí: “Na̱jkhá gajmíʼ bi̱ nambájxuʼ náa cine mu mbu̱ya̱a̱ películas náa na̱ʼkha̱ dí naguma gíníi bi̱ skuniúnʼ náa Estados Unidos. Ga̱jma̱a̱ numuu dí ra̱ʼkhá tháán nikásngañuxu xóo eguma gíníi bi̱ skuniúnʼ, niʼni dí muxnu̱u̱n jiámá miʼxíin bi̱ tri̱ʼi̱i̱n náa cine ga̱jma̱a̱ na̱jkuá náa kúwíin xa̱bu̱ miʼxíin mu muxpamídíinxu”.

Stephen niʼngo̱o̱ niriʼkhuu xóo endxa̱ʼwáminaʼ índo̱ nigíʼduu̱ niʼnigajma̱a̱ Biblia gajmíi̱n Testigos de Jeobá. Ikhaa naʼthí: “Numuu rí nixtáá náa nawiñu̱u̱nʼ kuyamijná ga̱jma̱a̱ numuu raza ndrígu̱ún, ikha jngóo ra̱ʼkhá tháán niʼñuʼ tsiánguá índo̱ ndi̱ñu̱u̱n xóo eni̱ Testigos. Mbá xkri̱da, índo̱ mbáa Testigos de Jeobá ndiyóoʼ maʼga náa i̱mba̱ ríʼkhá xuajen, niniñúúnʼ e̱ji̱i̱n náa mbáa xa̱bu̱ skuniiʼ. Ma̱ngaa xa̱bu̱ miʼxíin nindriguíi mbáa dxámá skuniiʼ náa guʼwún numuu rí nda̱a̱ náa maxtáa”. Stephen ni̱jkha̱nú ndiʼyoo dí Testigos de Jeobá nandún kuyamijná gajkhun xóo bi̱ kanikhiín, xó má niʼthí Jesús dí marigá náa bi̱ nindxu̱ún cristianos gajkhun (Juan 13:35).

Ndiéjunʼ niʼni Stephen mu maniñuuʼ dí nawiyu̱u̱ʼ kaʼñún eʼwíinʼ ga̱jma̱a̱ dí najmangu̱u̱ʼ xá. Ikhaa nimbáyúu wéñuʼ dí na̱ʼkha̱ raʼthí náa Romanos 12:2. Ikhaa niʼthí: “Ni̱jkhánú ndi̱yo̱o̱ rí ndayóoʼ mariʼkumina̱a̱ʼ. Ni̱ni̱ mbá tsiakii mu xági̱ʼdu̱ʼ gajmíʼ eʼwíinʼ ga̱jma̱a̱ mani̱ndxu̱ʼ májáanʼ xa̱bu̱”. Naʼni má 40 tsiguʼ dí Stephen xtáa tsímáá ga̱jma̱a̱ nánguá wi̱yu̱u̱ʼ kaʼñún eʼwíinʼ.