Gumbáñún bi̱ numíniiʼ

1. Xóo eʼni Jeobá mu mariʼña̱a̱ rí nutajkháan xa̱bi̱i̱ rá.

LÁ NATAYÁÁ ikháán dí Jeobá ma̱ndoo majmiuu ga̱jma̱á nindxa̱a̱ʼ mu mariʼña̱a̱ dí niʼtájkháan mbáa ndxájulú ráʼ. Tséʼniuu á mu nindxu̱lú mbáa bi̱ kayá edxu̱u̱, siervo ministerial, precursor, publicador, jiámá, xabuanii, gu̱ʼu̱ ga̱jma̱a̱ xa̱bekha. Índo̱ mbáa bi̱ nandoo kaʼyoo Jeobá na̱ndo̱ʼo̱o̱ rí mambáyúu, A̱nu̱lú Dios mbaʼa nuthu najmiuu bi̱ kuya̱ edxu̱u̱ o eʼwíinʼ xa̱bi̱i̱ mu muni̱ “maʼni̱i̱ a̱jkiu̱u̱n” (Col. 4:11). Ra̱ʼkhá tháán mitsaanʼ dí mu̱ʼni̱ ñajuunʼ Jeobá gajmiúlú a̱ngiu̱lú. Ma̱ndoo mu̱ʼni̱ rígi̱ índo̱ naku̱mu̱u̱ mbá nandii, o narígá mbá dí tséguaʼthi̱i̱n o índo̱ naguma gínánʼlú.

ÍNDO̱ NAKU̱MU̱U̱ NANDII

2. Náá numuu rí naʼni mingíjyúuʼ mumbañún a̱ngiu̱lú índo̱ naku̱mu̱u̱ mbá nandii rá.

² Índo̱ narígá nandii asndu náá má, mbáa maʼñulú miʼskhaa mumbáñún eʼwíinʼ. Mbá xkri̱da, mbáa nandulú muʼgua̱ gúʼñún a̱ngiu̱lú náa guʼwún, mú na̱nguá xóo mu̱ʼni̱. Mbáa nanigu̱lú muʼthún a̱ngiu̱lú mu mupiʼtsu gajmiúlú bi̱ na̱nguá guáʼdáá, mú tsíyoo gúʼnilú rúʼko̱. Mbáa nanigulúʼ dí mumbaʼñún eʼwíinʼ, mú náa familia ndrígu̱lú mangíin numíniiʼ. Maski ajndu xúʼko̱ nandulú dí muruguambañún a̱ngiu̱lú, ga̱jma̱a̱ Jeobá naxtáa gagi ga̱jma̱a̱ rí naʼngo̱o̱ nu̱ʼni̱ (Prov. 3:27; 19:17). Xú gándoo gúʼni̱lú rá.

3. Ndiéjunʼ esngájmulú xkri̱da ndrígu̱ún bi̱ kuya̱ edxu̱u̱ náa congregación ndrígóo Desi rá. (Jeremías 23:4.)

³ Rí ma̱ndoo muni̱ bi̱ kuya̱ edxu̱u̱. Á mu rí ikháán nindxa̱a̱ʼ mbáa bi̱ kayá edxu̱u̱ náa congregación, atatsinúnʼ májánʼ a̱ngiu̱lú bi̱ kúwá ikhí (atraxnuu Jeremías 23:4).b Desi, bi̱ niʼthá ga̱jma̱a̱ numuu náa artículo rí ninújngoo, naʼthí rí: “Bi̱ kuya̱ edxu̱u̱ náa grupo rí nutaráʼaxu̱ nigúʼwún dí mataráʼa gajmíʼ xúʼko̱ má eʼwíinʼ a̱ngiu̱lú ma̱ngaa, nu̱ni̱ gagimijnáxu̱ mbá xúgiáanʼ”.c Núma̱a̱ má ga̱jma̱a̱ numuu rí nini̱, a̱ngiu̱lú bugi̱ na̱nguá niʼñún miʼskhaa mumbayíí Desi índo̱ nirígá nandii COVID-19, ndxájulú bugi̱ nikháñún tikhun bi̱ kaʼñún ga̱jma̱a̱ numuu virus.

4. Náá numuu rí nindoo nimbayíí Desi bi̱ kuya̱ edxu̱u̱, ga̱jma̱a̱ ndiéjunʼ eʼsngúún bi̱ kuya̱ edxu̱u̱ rá.

⁴ Desi naʼthí: “Nambájxu̱ʼ má gajmíʼ bi̱ kuya̱ edxu̱u̱ ikha jngóo na̱nguá niʼñuʼ miʼskhaa mu mathu̱u̱n rí naku̱mu̱ʼ ga̱jma̱a̱ dí naxmiéjunʼ”. Ndiéjunʼ eʼsngúún bi̱ kuya̱ edxu̱u̱ rá. Rí gíʼmaa muñewu̱u̱n mugu̱ ga̱jma̱a̱ rí mambajxúun gajmiún nákhá xóó tsérígá mbóoʼ gamiéjunʼ. Á mu dí ga̱jma̱a̱ numuu rí naku̱mu̱u̱ mbá nandii na̱nguá eyoo mu̱ʼgua̱ gúʼñún a̱ngiu̱lú, guʼyáʼ imbo̱o̱ʼ xú káʼnii ma̱ndoo muʼtámijná gajmiúlú ikhiin. Desi narmáʼáan a̱jkiu̱u̱n: “Nguáná mbaʼin bi̱ kuya̱ edxu̱u̱ nutaroʼoʼ o nuxungua̱nʼ mbá mensaje ikháá má mbiʼi. Textos dí na̱ʼkha̱ náa Biblia dí nuxuʼma náa inuʼ na̱jkha̱nú asndu náa a̱jkiu̱nʼ maski ajndu yáá naniʼnuuʼ má májánʼ”.

5. Xú káʼnii gándoo gúyáá a̱ngiu̱lú bi̱ kuya̱ edxu̱u̱ ndiéjunʼ eñúu̱nʼ a̱ngiu̱lú ga̱jma̱a̱ xú káʼnii gándoo gúmbáñún xá.

⁵ Mbá dí xóo ma̱ndoo ma̱ta̱ya̱a̱ xú káʼnii kúwá a̱ngiu̱lú nindxu̱u̱ dí matrajxu̱u̱n ga̱jma̱a̱ tsu̱ma̱á (Prov. 20:5). Lá guáʼdáá xúgíʼ rí ndañúu̱nʼ, xóo rí mu̱phu̱ ga̱jma̱a̱ thana xáʼ. Lá ma̱ndoo munimbatíga̱a̱ ñajúúnʼ o náa kúwá xáʼ. Lá mbaʼyooʼ muruguambañún mu munda̱ʼa̱ apoyo náa Gobierno xáʼ. Desi nimbayíí tikhun a̱ngiu̱lú ga̱jma̱a̱ nixnáá rí ndayóoʼ. Mú rí tháán dí nimbáyúu nindxu̱u̱ rí mumbayíí a̱ngiu̱lú bi̱ kuya̱ edxu̱u̱ xóo rí nakumu̱u̱ ga̱jma̱a̱ rí mambajxúu májánʼ ga̱jma̱a̱ Jeobá. Ikhaa naʼthí: “Bi̱ kuya̱ edxu̱u̱ nitajkháan ga̱jma̱á nindxu̱ʼ. Na̱nguá ermáʼáan a̱jkiu̱nʼ xú káʼnii nithi, mú narmáʼáan a̱jkiu̱nʼ xú káʼnii niku̱mu̱ʼ. Ninindxu̱u̱ xóo rí Jeobá xtáa raʼthún ‹Na̱nguá xtaa mbáwíín›” (Is. 41:10, 13).

6. Xú káʼnii gándoo gúmbáyumijnálú mámbáa dí ikháánʼlú rá.

⁶ Dí ma̱ndoo mu̱ʼni̱ mbá xúgiáanʼ. Nduʼyáá dí a̱ngiu̱lú bi̱ kuya̱ edxu̱u̱ nindxu̱ún bi̱ ginii gíʼmaa mbuyáá rí ndañúu̱nʼ a̱ngiu̱lú. Mú Jeobá naʼthúlú dí mbá xúgiáanʼ ma̱ndoo muxnamijnálú tsiakii ga̱jma̱a̱ mumbáñún eʼwíinʼ (Gál. 6:10). Maski ajndu chíʼgíiʼ dí kuaʼdáá guxnáá bi̱ nandoo káñuu, rúʼko̱ gásngájma dí nandulú kuʼyáá, ikhaa maʼdxuu wéñuʼ. E̱ji̱n chíjkhíinʼ ma̱ndoo muni̱ mbá tarjeta o mbá dibujo dí ma̱ndoo muxnáá mbá ndxájulú. Jiámá ga̱jma̱a̱ wa̱ʼxa̱ʼ ma̱ndoo munda̱ʼa̱a̱ ndxájulú rí magún gútsi̱ rí gáʼyóoʼ, ma̱ndoo muni̱ májáánʼ ganitsu magún kuñu̱u̱n náa goʼwóo mbáa bi̱ nandoo káñuu. Índo̱ kúwíin mbaʼin bi̱ nandoo káñún xúgiáanʼ ndayúlú tsiaki̱i̱. Mbáa itháan májánʼ maguanúlú índo̱ najngoo reunión mu muʼtámijná gajmiúlú a̱ngiu̱lú, tséʼñuu á mu mbuʼyamijná xígi̱ ga̱jmiúlú o náa videollamada. Ma̱ngaa bi̱ kuya̱ edxu̱u̱ ndañúu̱nʼ tsiaki̱i̱. Tikhuin a̱ngiu̱lú nuniraʼmáʼ ajngáa náa inún a̱ngiu̱lú bi̱ kuya̱ edxu̱u̱ mu muxniín núma̱aʼ, itháan índo̱ nagadráʼa mbá nandii rí asndu tséwaphiin. Ra̱ʼkhá tháán májánʼ dí mu̱ʼni̱ tsiakimíjna̱ muʼnimbulú ikha rí na̱ʼkha̱ náa Biblia: “Guxnamíjnálá tsiakii, gumbáyumijnála” (1 Tes. 5:11).

ÍNDO̱ NARÍGÁ MBÁ DÍ TSÉGUAʼTHI̱I̱N

7. Ndiéjunʼ ma̱ndoo marigá índo̱ narígá mbá dí tséguaʼthi̱i̱n rá.

⁷ Índo̱ narígá mbá dí tséguaʼthi̱i̱n mbégúuʼ xúgi̱ naxtiʼkhu̱u̱ xóo kuwáánʼlú. Mbáa matanimbatíga̱ rí xtaʼdáá, guʼwáaʼ o mbáa bi̱ nandaaʼ xtayáá. Ga̱jma̱a̱ rúʼko̱ má eguáʼníí a̱ngiu̱lú ma̱ngaa. Xú káʼnii gándoo mumbáñún xá.

8. Ndiéjunʼ gíʼmaa muni̱ bi̱ kuya̱ edxu̱u̱ ga̱jma̱a̱ xabuanii nákhá xóó tsérígá dí tséguaʼthi̱i̱n xá.

⁸ Rí ma̱ndoo muni̱ bi̱ kuya̱ edxu̱u̱. Mumbañún a̱ngiu̱lú mu muniratamijná índo̱ naguáʼníí mbá dí tséguaʼthi̱i̱n. Guya̱a̱la á mu dí xúgíinʼ a̱ngiu̱lú bi̱ kúwá náa congregación nduyáá má xóo gúni̱ káwumijná índo̱ narígá mbá dí tséguaʼthi̱i̱n ga̱jma̱a̱ xóo gándoo gútamijnála gajmiála. Margaret, bi̱ niʼthá náa artículo rí ninújngoo, naʼthí: “Náa mbá discurso rí niʼthí ga̱jma̱a̱ numuu rí ndayóoʼ náa congregación, bi̱ kuya̱ edxu̱u̱ nini marmáʼáan a̱jkiu̱xu̱ xí á mú xóó tséguji̱i̱ rakriyáaʼ agu̱ʼ ga̱jma̱a̱ nu̱thu̱xu xa̱bu̱ ñajunʼ magajnúxu̱ o xi naʼni itháan gamíi núkhu má gágajnújxu̱”. Discurso rúʼko̱ nigiʼdoo wéñuʼ numuu, numuu rí witsu xmáná nda̱wa̱á nikríya̱a̱ʼ aguʼ, dí ra̱ʼkhá tháán migamíi niʼni. Xabuanii, índo̱ nuniga̱jma̱a̱ mbá guʼwáanʼ, gu̱tha̱ ga̱jma̱a̱ numuu ndiéjunʼ gándoo gúni̱ índo̱ narígá mbá dí tséguaʼthi̱i̱n. Á mu rí ikháanʼ gajmiála ejña̱la kuwáanʼ xawii, mbáa rúʼko̱ gáʼni dí xámíñala wéñuʼ.

9. Ndiéjunʼ eyóoʼ muni̱ a̱ngiu̱lú bi̱ kuya̱ edxu̱u̱ nákha xóó tsérígá ga̱jma̱a̱ índo̱ gájngoo mbá gamiéjunʼ rá.

⁹ Á mu rí ikháán nindxa̱a̱ʼ bi̱ nañewu̱u̱n náa mámbá grupo xáraʼti̱i̱n marigá mbá gamiéjunʼ rí tséguaʼthi̱i̱n mu matanda̱ʼa̱ número ndrígu̱ún mu maratamíjná gajmiáanʼ. Atani̱ mbá lista ga̱jma̱a̱ número nuxi̱ʼ ndrígu̱ún. Mu índo̱ gárígá mbá dí tséguaʼthi̱i̱n, ma̱ndoo maratamíjná gajmiáanʼ mámbáa rí ikhiin ga̱jma̱a̱ ma̱ta̱ya̱a̱ ndiéjunʼ gaʼñúuʼ. Ga̱jma̱a̱ araxnáá xúgíʼ rígi̱ bi̱ naríyaʼ awan náa eʼwíinʼ bi̱ kuya̱ edxu̱u̱, mu xúʼko̱ ikhaa maʼthúu̱n circuito. Á mu nuñajunʼ kambájxu̱u̱n magajnúu májánʼ. Nda̱wa̱á rí nikha, circuito ndrígóo ndxájulú Margaret tígú mbá 36 horas numuu rí ikhaa nindxu̱u̱ bi̱ niʼtáñajúúnʼ bi̱ kuya̱ edxu̱u̱ mu mbuñíinʼ ga̱jma̱a̱ muñewu̱u̱n bi̱ mbá 450 a̱ngiu̱lú bi̱ nigájnún náa guʼwún (2 Cor. 11:27). Núma̱a̱ má ga̱jma̱a̱ ñajunʼ rí nini̱ nindoo nixkamaa náa ma̱ndoo maguanún bi̱ nda̱ñúunʼ.

10. Ndíjkha rí gíʼdoo numuu eyáá bi̱ kuya̱ edxu̱u̱ rí muñewu̱u̱n a̱ngiu̱lú rá. (Juan 21:15.)

¹⁰ A̱ngiu̱lú bi̱ kuya̱ edxu̱u̱ guáʼdáá ñajunʼ dí muñewu̱u̱n a̱ngiu̱lú, mbuyáá rí ndañúu̱nʼ ga̱jma̱a̱ mambajxúu̱n májánʼ gajmiún Jeobá (1 Ped. 5:2). Índo̱ narígá mbá gamiéjunʼ, ginii rí ndayóoʼ muni̱, mbuyáá á mu xtáa májánʼ ndxájulú ga̱jma̱a̱ rí gíʼdoo dí mi̱khu̱, xtíin ga̱jma̱a̱ guʼwá náa rí maxtáa. Manújngoo mba̱yu̱u̱ʼ igu̱nʼ rí mbáa bi̱ nigíʼnuu gamiéjunʼ rígi̱ mbaʼyóoʼ mixtambáyíí mu magruigú má xúʼko̱ ganitsu rí na̱ʼkha̱ náa Jeobá ga̱jma̱a̱ i̱ʼwáʼ rí ndayóoʼ (atraxnuu Juan 21:15). Ndxájulú Harold, bi̱ nindxu̱u̱ Comité ndrígóo Sucursal niʼtámijná gajmíi̱n mbaʼin a̱ngiu̱lú bi̱ niraʼníí gamiéjunʼ, ikhaa naʼthí: “Ndajyúuʼ mba̱yu̱u̱ʼ mu maʼni̱i̱ a̱jkiu̱ún, mbáa a̱ngiu̱lú ma̱ndoo matangi̱ín makuwá xó má nákhá ginii, mú naʼni marmáʼáan a̱jkiu̱ún tsejtsi ga̱jma̱a̱ numuu rí nikháñúu mbáa bi̱ nandún kuyáá, o nindáti̱gu̱u̱n mbá rí gíʼdoo numuu dí rígá náa famíliu̱ún o ga̱jma̱a̱ numuu dí niguáʼníí. Dí marmáʼáan a̱jkiu̱ún rúʼko̱ naʼni rí makuwá ngíná mbujuáaʼ, mú raʼkháa rúʼko̱ eyoo gáʼthí dí raguáʼdáá mba̱a̱ fe, nindxu̱u̱ dí niguáʼníí má xúgíinʼ”.

11. Ndiéjunʼ gáʼyóoʼ mumbañún bi̱ nuraʼníí gamiéjunʼ rá.

¹¹ Gíʼdoo wéñuʼ numuu rí bi̱ kuya̱ edxu̱u̱ mugíʼ muni̱ consejo rígi̱: “Gumbi̱ya̱ʼ gajmiála bi̱ numbi̱ya̱ʼ” (Rom. 12:15). Bi̱ nikáwíin náa gamiéjunʼ rúʼko̱, ndayóoʼ rí muʼnikumi̱ín dí Jeobá nandoo kaʼñún ma̱ngaa ikháánʼlú. A̱ngiu̱lú bi̱ kuya̱ edxu̱u̱ ma̱ndoo mumbañún familia mu muni̱ má xúʼko̱ ñajunʼ Jeobá, xóo muni̱ oración, munigajma̱a̱, magún náa reunión ga̱jma̱a̱ mutaraʼa má xúʼko̱. Ma̱ngaa ma̱ndoo muʼthúún xabuanii rí muthún e̱jñu̱ún rí gamiéjunʼ marigá mbaʼa rí xáʼngo̱o̱ gáʼni gámbóo. Xabuanii, gu̱ni̱ marmáʼáan a̱jkiu̱ún e̱jña̱la dí Jeobá nindxu̱u̱ bi̱ mambájxu̱u̱ gajmíi̱n ga̱jma̱a̱ maxtáa ga̱jma̱á nindxu̱ún. Guthu̱u̱n dí kúwíin mbaʼin a̱ngiu̱lú náa xúgíʼ numbaaʼ bi̱ kúwá xawii mumbayúlú (1 Ped. 2:17).

12. Ndiéjunʼ gándoo gúni̱ xúgíinʼ mu muñambáá náa narígá gamiéjunʼ rá.

¹² Dí ma̱ndoo mu̱ʼni̱ mbá xúgiáanʼ. Á mu mijngii náa xtaa ikháán narígá mbá gamiéjunʼ, atrajxu̱u̱n bi̱ kuya̱ edxu̱u̱ ndiéjunʼ gándoo matiambáá, mbáa ma̱ndoo marathu̱u̱n dí rígá guʼwáaʼ mu mawanún a̱ngiu̱lú bi̱ nigájnún náa guʼwún, o a̱ngiu̱lú bi̱ nuñambáá náa narígá gamiéjunʼ. Mbáa ma̱ndoo matruguambáá mu maraxnajxí ganitsu ga̱jma̱a̱ i̱ʼwáʼ dí majmaa o i̱ʼwáʼ rí gáʼyóoʼ á mu mitsínguánʼ nirígá gamiéjunʼ rígi̱ náa xtaa ikháán, ma̱ndoo matiambáá. Dí maratajkáan ga̱jma̱a̱ numún bi̱ nimíniiʼ ga̱jma̱a̱ matruguambáá náa narígá gamiéjunʼ ma̱ngaa ma̱ndoo muxná mbújkha̱a̱ náa obra mundial (2 Cor. 1:8-11; 8:2-5). Á mu naʼngo̱o̱ na̱dxu̱ʼ náa xuajen dí nirígá gamiéjunʼ ma̱ndoo matrajxi̱i̱ bi̱ kayá edxu̱u̱ xóo gándoo gátiembáá. Á mu nitsaʼwaaʼ mi̱dxu̱ʼ mawiʼthaanʼ xú káʼnii gándoo gátani̱, náá mbiʼi ga̱jma̱a̱ náá xuajen rí itháan ndayóoʼ mi̱dxu̱ʼ.

ÍNDO̱ NAGUMA GÍNÁÁNʼLÚ

13. Ndiéjunʼ xkujndu eraʼníí a̱ngiu̱lú bi̱ kúwíin náa tséniñu̱u̱nʼ mutaraʼa xá.

¹³ Índo̱ a̱ngiu̱lú naguma gíníi naʼniún itháan mingíjyúuʼ xóo makuwá. Bi̱ kúwá náa rí tséniñu̱u̱nʼ mutaraʼa naguáʼdáá mbaʼa xkujndu, xóo dí na̱nguá guáʼdáá mbújkha̱a̱, naʼniún nandii ga̱jma̱a̱ nunimbatígi̱i̱n bi̱ kuñúún. Numuu rí tséniñu̱u̱nʼ mutaraʼa, a̱ngiu̱lú bi̱ kuya̱ edxu̱u̱ na̱nguá xóo muni̱ xó má kaʼyoo ga̱jma̱a̱ na̱nguá eyoo mutamijná gajmiún bi̱ nda̱ñúunʼ tsiaki̱i̱. Rígi̱ rí nigíʼnuu Andréi bi̱ niʼthá náa artículo rí ninújngoo. Mbáa ndxájulú bi̱ xtáa náa grupo ndrígóo Andréi niʼñuu miʼskhaa magiʼdoo mbújkha̱a̱, ga̱jma̱a̱ nda̱wa̱á nikámbiyu̱u̱ʼ ga̱jma̱a̱ kárriu̱u̱. Nigumaa operar mbaʼa nuthu ga̱jma̱a̱ nánguá xóo mañajunʼ. Maski ajndu nini̱ gakhi̱i̱ xa̱bu̱ ñajunʼ ga̱jma̱a̱ numuu nandii, a̱ngiu̱lú nini̱ asndu xó má eʼngo̱o̱ mu mumbayíí, Jeobá nixtáa má xúʼko̱ xawii mu mbaʼyoo rí eyóoʼ.

14. Xú káʼnii esngajma a̱ngiu̱lú bi̱ kuya̱ edxu̱u̱ rí naku̱mu̱ún kuyáá Jeobá rá.

¹⁴ Rí ma̱ndoo muni̱ bi̱ kuya̱ edxu̱u̱. Andréi niʼtákáñuu Jeobá ga̱jma̱a̱ niʼni xó má eʼngo̱o̱. Xú káʼnii niriʼñuu Jeobá xá. Nijmiuu eʼwíinʼ a̱ngiu̱lú bi̱ maʼngo̱o̱ muni̱ rí gáʼyóoʼ. Tikhun nagún kuya̱a̱ ndxájulú índo̱ nagiʼdoo cita ga̱jma̱a̱ eʼwíinʼ nuruguambayíí ga̱jma̱a̱ mbújkha̱a̱. Jeobá niʼni tsajkurámiinʼ dí nikúwá mbá kambájxu̱u̱n xúgíʼ dí nini̱ nisngajmá rí támiñún (Heb. 13:16). Bi̱ kuya̱ edxu̱u̱, índo̱ tséniñala mutaraʼa, guthu̱u̱n eʼwíinʼ rí mumbayala (Jer. 36:5, 6). Mú rí itháan gíʼdoo numuu munila, gumbáyumijnála náa Jeobá. Ikhaa ma̱ndoo mambáyala mu mumbáñún a̱ngiu̱lú bi̱ ndañúuʼ.

15. Ndiéjunʼ gándoo mu̱ʼni̱ mu makuwáánʼ mbá kambájxu̱lú índo̱ gáguma gínánʼlú rá.

¹⁵ Dí ma̱ndoo mu̱ʼni̱ mbá xúgiáanʼ. Índo̱ gáguma gínánʼ mbáa káaʼ nguéjmánʼ gágimbáánʼlú. Ikha jngóo gíʼdoo wéñuʼ numuu dí makuwáánʼ tsímáá gajmiúlú eʼwíinʼ. Guʼnimijna̱ gajmiúlú Gixa̱a̱ raʼkháa dí magiʼdulú kaníkháánʼ. Gu̱ʼni̱ mba̱a̱ a̱jkiu̱lú kuʼñúún a̱ngiu̱lú índo̱ nakiéʼkúún ga̱jma̱a̱ guʼnimbáníí mbá nacha̱ xkujndu dí narígá (Prov. 19:11; Efes. 4:26). Ga̱jma̱a̱ ganindxu̱lú giniánʼ bi̱ mugíʼdi̱i̱ mumbáñún a̱ngiu̱lú bi̱ ndañúu̱ʼ (Tito 3:14). Rí xóo nimbayíí ndxájulú a̱ʼgu̱ bi̱ xtáa náa grupo ndrígóo Andréi ninindxu̱u̱ ra̱ʼkhá tháán májánʼ numuu dí rúʼko̱ niyambáá mu makuwá itháan kambájxu̱u̱n xóo mbá familia (Sal. 133:1).

16. Xó má eʼthí náa Colosenses 4:3, 18, xú káʼnii gándoo gúmbáñún a̱ngiu̱lú bi̱ naguma gíníi rá.

¹⁶ Ra̱ʼkhá tháán mbaʼin a̱ngiu̱lú nuni̱ ñajunʼ Jeobá maski ajndu xa̱bu̱ ñajunʼ tséniñu̱u̱nʼ mutaraʼa. Mbaʼin kúwá náa guʼwá ejua̱a̱nʼ ga̱jma̱a̱ numuu rí nunimbu̱ún. Ikha jngóo guʼtájkáan ga̱jma̱a̱ numún ikhiin, xúʼko̱ má bi̱ kúwá náa guʼwún, ma̱ngaa ga̱jma̱a̱ numún bi̱ nuni̱ gínámijná mu muxnún ganitsu rí na̱ʼkha̱ náa Jeobá, xóo rí ndañúuʼ o rí mixtambáñún o rí miʼtámbáñúnd (atraxnuu Colosenses 4:3, 18). Xúʼyáá dí ragíʼdoo numuu rí muʼtájkháan, ra̱ʼkhá tháán gíʼdoo tsiakii rí muʼtájkháan (2 Tes. 3:1, 2; 1 Tim. 2:1, 2).

17. Xú káʼnii gándoo gúʼniratamijná índo̱ gáguma gínánʼlú rá.

¹⁷ Ikháán gajmiáanʼ bi̱ kúwá náa guʼwáaʼ ma̱ndoo matani̱ rataminaʼ xúgi̱ mu maraxtaa xawii índo̱ gáguma gínáanʼla (Hech. 14:22). Xatatsaʼwamínáʼ xúgíʼ dí ra̱májánʼ dí gamíi marigá. Itháan májánʼ dí matani̱ tsiakiminaʼ mambajxáaʼ itháan májánʼ ga̱jma̱a̱ʼ Jeobá ga̱jma̱a̱ atambáñún e̱jña̱a̱nʼ muni̱ ikháá kayuuʼ. Á mu na̱jkha̱nú mbiʼi rí naxmiéjuanʼ wéñuʼ aratakáñíí Jeobá xúgíʼ dí gíwánʼ náa a̱jkia̱a̱nʼ (Sal. 62:7, 8). Aratámijná gajmiáanʼ bi̱ kúwá náa guʼwáaʼ náá numuu rí gíʼmaa muʼnimbulú kuʼyáá ikhaa.e Giʼdoo numuu dí matani̱ rathin ejña̱nʼ índo̱ narígá mbá gamiéjunʼ dí tséraʼthi̱i̱n, xúʼko̱ má gíʼdoo numuu mangaa dí matanirathiin índo̱ gáʼganú mbiʼi dí maguma gínánʼlú, ga̱jma̱a̱ arasngúún rí makumu̱ún kuyáá Jeobá, mu xúʼko̱ maguajún jmbu ga̱jma̱a̱ xámíñún.

18. Ndiéjunʼ rí kuaʼti̱i̱nlú rá.

¹⁸ Tsímáá ndrígóo Dios nambáyúlú mu xámíñulú índo̱ naku̱mu̱u̱ mbá nandii o índo̱ narígá mbá gamiéjunʼ dí tséguaʼthi̱i̱nlú o índo̱ naguma gínánʼlú (Filip. 4:6, 7). Jeobá najmuu tsímáá ndrígóo mu maʼni dí xámíñulú índo̱ naku̱mu̱u̱ mbá nandii o índo̱ narígá mbá gamiéjunʼ dí tséguaʼthi̱i̱nlú o índo̱ naguma gínánʼlú. Najmiuu bi̱ kuya̱ edxu̱u̱ mu muñewu̱u̱n mugiu̱u̱ ga̱jma̱a̱ naniñuuʼ náa ñawúnlú ñajunʼ dí mumbáyumijná kaníkháanʼ. Tsímáá rígi̱ naʼniratháánʼ mu muraʼníí tsáʼkhá dí gáʼkha̱ nda̱wa̱á, xó má “ga̱ʼkhu̱ dí phú mba̱a̱” (Mat. 24:21). Mbiʼi rúʼko̱ mbaʼyóoʼ rí xámíñúlú ga̱jma̱a̱ mumbáñún eʼwíinʼ mu xúʼko̱ xámiñún. Mú nda̱wa̱á rí gájngoo majphú mba̱a̱ ga̱ʼkhu̱ nánguá makuwáánʼlú náa numbaaʼ rí maʼni maxmiéjunlú. Nda̱ʼkhúun makuwáánʼ tsímáá xóo phú nindoo Jeobá makuwáánʼ, dí makuwáanʼlu tsímáá kámuu (Is. 26:3, 4).