3 | Xú káʼnii gándoo gámbáyala xkri̱da rí na̱ʼkha̱ náa Biblia

NÁA BIBLIA NA’THÍ GAJMAA NUMÚN: Xa̱bu̱ míjínʼ bi̱ ‹nikumu̱ún xó má ikháánʼlú› (SANTIAGO 5:17).

Ndiéjunʼ eyoo gáʼthúu̱n rá.

Náa Biblia na̱ʼkha̱ raʼthí ga̱jma̱a̱ numún xa̱bu̱ ga̱jma̱a̱ gu̱ʼu̱ bi̱ nikumu̱ún mbaʼa eʼni. Á mu nuraxnuu xóo nikúwi̱i̱n, ma̱ndoo muxkamaa mbáa bi̱ nikumu̱u̱ xó má ikháánʼlú.

Xú káʼnii embáyulú rá.

Xúgíanʼ ndaʼyulúʼ dí makrúʼún kuyulú, itháan índo̱ nuraʼníí mbá nandii dí naku̱mu̱u̱ náa ngáñulú. Índo̱ nuraxnuu Biblia majmañulú ga̱jma̱a̱ numún bi̱ na̱ʼkha̱ raʼthí ikhí bi̱ nindxaʼwamíjna̱ ga̱jma̱a̱ nikumu̱ún xó má ikháanʼlu. Rígi̱ gámbáyulú mbuʼyáá dí na̱nguá kuwáánʼ ndajkuánʼ, eʼwíinʼ ma̱ngaa nimíniiʼ xó má numíniiʼ ikháánʼlú ga̱jma̱a̱ numuu dí nixmiéjúúnʼ ma̱ngaa ndiyóoʼ munimíjna̱ gajmiún ku̱ma̱ dí raʼkhí dí niguaʼdáá.

Biblia naʼthúlú ndiéjunʼ nithi tikhuin xa̱bu̱ índo̱ nixmiéjunʼ ga̱jma̱a̱ nikumu̱ún dí nánguá eʼngu̱u̱n itháán. Lá mbá miʼtsu nitatsaʼwáminaʼ: “Ní xáʼngo̱ʼ rá. Xájmúún maxtáá xígi̱ kaʼnii”. Xúʼko̱ kayuuʼ nikumu̱u̱ Moisés, Elías ga̱jma̱a̱ David (Números 11:14; 1 Reyes 19:4; Salmo 55:4).
Biblia naʼthúlú ga̱jma̱a̱ numuu Ana, mbáa a̱ʼgu̱ bi̱ nijmáa wéñuuʼ a̱jkiu̱u̱n numuu dí na̱nguá egiʼdiin e̱ji̱n ma̱ngaa i̱mba̱ a̱ʼgu̱ ga̱jma̱a̱ i̱ndó natsíjmaa (1 Samuel 1:6, 10).
Mbáa ikháán naku̱ma̱a̱ʼ xó má Job, mbáa xa̱bu̱ bi̱ naʼthí numuu náa Biblia. Maski ajndu nigiʼdoo mbá fe gujkhuʼ náa Jeobá, nixtáá ngíná wéñuuʼ dí asndu niʼthí: ‹Nawiyuʼ kayamínaʼ, nánguá eyoo maxtáá itháan› (Job 7:16).

Xúgíinʼ ikhiin niʼngu̱u̱n niriʼkui̱i̱ dí ra̱májánʼ xóo nikumu̱ún. Mangáán ma̱ndoo muʼni gajmiúlú xóo kumulú á mu nduʼyaridáá xkridún.

Xkáʼnii embáyúu Biblia Kevin

Xkáʼnii eyóoʼ maniminaʼ gajmúʼ xóo ku̱mu̱ʼ rá.

“Índo̱ inu maʼni 50 tsiguʼ nithu̱nʼ dí gúʼdoo trastorno bipolar xó muʼthá dí mbájkhu nacha̱ extiʼkhuu xóo ku̱mu̱ʼ. Nguáná naku̱mu̱ʼ dí ma̱ndoo mani xúgíʼ dí nandoʼ mu nguáná naku̱mu̱ʼ dí nda̱a̱ numuu maxtáá”.

Xú káʼnii embáyuʼ Biblia rá.

“Naku̱mu̱ʼ xó má nikumu̱u̱ apóstol Pablo. Ikhaa nguáná nikumu̱u̱ dí nda̱a̱ numuu índo̱ narmáʼáan a̱jkiu̱u̱n aʼkhá dí niʼni. Raʼkháa i̱ndó nigi̱ʼi̱ nindxaʼwamína̱ʼ ga̱jma̱a̱ numuu aʼkhá dí niʼni, niʼthún dí mumbayíí bi̱ nambájxu gajmíin bi̱ gajkhun naxmiéjuunʼ kuyáá. Ga̱jma̱a̱ numuu trastorno bipolar dí gúʼdoʼ naʼni maku̱mu̱ʼ dí nda̱a̱ numuu xtaa. Mú, xó má Pedro, nijmañuʼ mañu mañúú dí mambáyuminaʼ náa bi̱ nambájxu májánʼ gajmíʼ. Ikhiin numbayúʼ mu xákaguabúnʼ”.

“Ma̱ngaa naʼgúnʼ nandxa̱ʼwáminaʼ xóo nikumu̱u̱ rey David. Mbaʼa nuthu ikhaa ra̱ʼkhá tháán nixmiéjuunʼ numuu xóo nixtáa ma̱ngaa ga̱jma̱a̱ numuu aʼkhá dí niʼni. Nguáná ikhúún naku̱mu̱ʼ xúʼko̱ kaʼnii: Nagáwi̱i̱nʼ a̱jkiu̱u̱n ga̱jma̱a̱ numuu dí nini o nitha̱ nákha ginii. Ikha jngóo naʼni̱i̱ a̱jkiu̱u̱n dí niʼnirámáʼ David náa Salmo 51. Náa versículo 3 ikhaa niʼthí: ‹Naniʼnuuʼ májánʼ aʼkhá ndrígóʼ, ga̱jma̱a̱ aʼkhá ndrígóʼ rígá má xúʼko̱ náa ikhúún›. Xúʼko̱ kayuuʼ ku̱mu̱ʼ mángún índo̱ naxtáá ngíná wéñuuʼ, naʼñuʼ wéñuuʼ miʼskhaa mba̱yo̱o̱ dí májánʼ nini. Mú, ikhú nandxa̱ʼwáminaʼ ajngáa dí niʼthí David náa versículo 10: ‹Atani̱ magúʼdoo mbóo a̱jkiu̱nʼ rí mikaʼwu, Dios ndrígóʼ, ga̱jma̱a̱ atagíwánʼ náa ikhúún i̱mba̱ xi̱ʼ rí nuxi̱ʼ ga̱jma̱a̱ rí jmbu›. Na̱ndo̱ʼo̱o̱ Dios ikháá má kayuʼ: Dí mambáyuʼ maʼdxuʼ ga̱jma̱a̱ numuʼ. Dí iwáá kayuuʼ, versículo 17 naʼni maʼni̱i̱ a̱jkiu̱u̱n. Ikhí naʼthí: ‹Índo̱ a̱jkiu̱u̱n xtáa gíná ga̱jma̱a̱ namínuʼ, Dios ndrígóʼ, xátatsínguminaʼ›. Mámbá índo̱ naguxnuu, narmáʼáan a̱jkiu̱u̱n dí Jeobá nandoo kaʼyoʼ”.

“Índo̱ nandxa̱ʼwáminaʼ ga̱jma̱a̱ numún xa̱bu̱ bi̱ naʼthí náa Biblia ma̱ngaa xúgíʼ dí Dios naxnúʼ, fe ndrígóʼ naʼni itháan gujkhuʼ. Núma̱aʼ má dí nda̱yo̱o̱ gajkhun dí marígá nda̱wa̱á dí na̱ʼkha̱ náa Biblia, naʼngo̱ʼ ga̱jma̱a̱ na̱nguá niʼñáminaʼ”.