Jeobá “naʼni thanún bi̱ kúwá ngíná”

1. Xú káʼnii eʼñún Jeobá xa̱bi̱i̱ rá.

JEOBÁ ndaʼyoo xúgíʼ rí nuguaʼníílú. Ndaʼyoo índo̱ kuwáánʼ gagi ga̱jma̱a̱ índo̱ kuwáánʼ ngíná (Sal. 37:18). Índo̱ ndaʼyoo dí nuʼnimíjna̱ mbuʼyamajkuíí asndu náa mbiʼi dí na̱nguá kuwáánʼ májánʼ, ikhaa ra̱ʼkhá tháán edxuu kaʼyulú. Ga̱jma̱a̱ nandoo mambáyúlú ma̱ngaa dí maʼni̱i̱ a̱jkiu̱lú.

2. Ndiéjunʼ eʼni Jeobá ga̱jma̱a̱ numún bi̱ kúwá ngíná, ga̱jma̱a̱ ndiéjunʼ gíʼmaa mu̱ʼni̱ ikháánʼ mu mambáyulú xá.

² Náa Salmo 147:3 naʼthí dí Jeobá “naruʼwáaʼ náa nagawúúnʼ bi̱ kúwá ngíná”. Náa texto rígi̱ naʼthí xú káʼnii Jeobá nañewu̱nlú tsu̱ma̱á índo̱ numíniiʼ, ikháá má xóo eʼni mbáa médico índo̱ nañewu̱u̱n bi̱ nigawúunʼ. Mú xa̱bu̱ bi̱ nigawúunʼ ndayóoʼ dí maʼnimbo̱o̱ xúgíʼ dí naʼthúu̱n médico mu xúʼko̱ maʼni̱i̱ a̱jkiu̱u̱n. Ikháánʼ mangáánʼ ndayóoʼ muʼnimbulú ikha ndrígóo Jeobá mu makuwáánʼ májánʼ. Náa artículo rígi̱ mbuʼyáá ndiéjunʼ eʼthúún Jeobá náa Ajngá rawuunʼ bi̱ kúwá ngíná ga̱jma̱a̱ xú káʼnii gándoo gúʼnimbáníí consejo dí ikhaa naxnúlú numuu dí nandoo kaʼyulú.

JEOBÁ NAʼTHÚLÚʼ DÍ KUAʼDÁÁ NUMULU

3. Náá numuu dí tikhuun naku̱mu̱ún dí raguáʼdáá numún rá.

³ Ra̱ʼkhá tháán ngíná dí kuwáánʼ náa mbá numbaaʼ náa dí xa̱bu̱ nánguá eñún kuyamijná. Mbaʼin xa̱bu̱ nuni̱ ngíníi eʼwíinʼ ga̱jma̱a̱ nuni̱ maku̱mu̱ún dí raguáʼdáá numún. Mbáa ndxájulú bi̱ mbiʼyuu Helena naʼthí: “Ndi̱ju̱u̱n náa mbá familia náa na̱nguá esngajma ngajua. Anu̱ʼ ra̱ʼkhá tháán ejmangu̱u̱ʼ ga̱jma̱a̱ xúgíʼ mbiʼi naʼthúxu dí nda̱a̱ numuxu”. Lá nitagíʼníí ikháán xígi̱ kaʼnii ráʼ. Mbáa niniaanʼ dí raʼkhí, nitha numaaʼ ga̱jma̱a̱ nangí eʼni nuni̱ rí maku̱ma̱a̱ʼ dí na̱nguá xtaʼdáá numaaʼ. Á mu xúʼko̱, mbáa maʼniaaʼ mingíjyúuʼ maku̱ma̱a̱ʼ dí xtáa mbáa bi̱ gajkhun naxmiéjuunʼ kaʼyaaʼ.

4. Ndiéjunʼ eʼthúlú Jeobá náa Salmo 34:18 rá.

⁴ Maski ajndu eʼwíinʼ nunia̱a̱n dí ra̱májánʼ, ma̱ndoo ma̱ta̱ya̱a̱ dí Jeobá gajkhun nandoo kaʼyaaʼ ga̱jma̱a̱ ndaʼyoo dí xtaʼdáá numaaʼ. Ikhaa “xtáa mijngii náa xa̱bu̱ bi̱ nagawúunʼ a̱jkiu̱ún” (atraxnuu Salmo 34:18).b Á mu nakáguabáánʼ garmáʼáan a̱jkia̱a̱nʼ dí Jeobá ndiʼyoo dí májánʼ náa ikháán ga̱jma̱a̱ nindoo dí ikháán mani̱ndxa̱a̱ʼ xa̱bi̱i̱ (Juan 6:44). Ikhaa maxtáa má xúʼko̱ mu mambáyáaʼ, numuu dí ra̱ʼkhá tháán eyoo kaʼyaaʼ.

5. Ndiéjunʼ eʼsngúlú índo̱ Jesús niʼniún dí májánʼ xa̱bu̱ bi̱ eʼwíinʼ táʼndún gúñún rá.

⁵ Xkri̱doo Jesús nambáyulú makru̱ʼu̱lú itháan májánʼ xóo eku̱mu̱u̱ Jeobá. Índo̱ Jesús nixtáa náa tsu̱du̱u̱ Ku̱ba̱ʼ niʼniún dí májánʼ xa̱bu̱ bi̱ eʼwíinʼ táʼndún gúñún ga̱jma̱a̱ nigáwíinʼ a̱jkiu̱u̱n kaʼñún (Mat. 9:​9-12). Índo̱ mbáa a̱ʼgu̱ bi̱ gíʼdoo mbá nandii mbiiʼ niguajtuun xtíñuu Jesús mu maʼni thanuu, ikhaa niʼni̱i̱ a̱jkiu̱u̱n ga̱jma̱a̱ niʼthúu̱n rí májánʼ eʼni dí ikhaa gíʼdoo fe (Mar. 5:​25-34). Rí xóo niʼni Jesús nasngájma xóo phú nindxu̱u̱ Anu̱u̱ (Juan 14:9). Ikha jngóo ma̱ndoo ma̱ta̱ya̱a̱ dí Jeobá gajkhun nandoo kaʼyaaʼ ga̱jma̱a̱ rí ikhaa ndaʼyoo náa dí májánʼ natani̱, xóo fe rí xtaʼdáá ga̱jma̱a̱ dí nandaaʼ xtayáá.

6. Ndiéjunʼ gándoo gátani̱ á mu naku̱ma̱a̱ʼ dí na̱nguá xtaʼdáá numaaʼ rá.

⁶ Ndiéjunʼ gándoo gátani̱ á mu naku̱ma̱a̱ʼ má xúʼko̱ dí nda̱a̱ numaaʼ rá. Atraxnuu textos ndrígóo Biblia náa naʼtháanʼ rí Jeobá ndaʼyoo dí xtaʼdáá numaaʼ, ga̱jma̱a̱ atatsaʼwáminaʼ dí naʼthí ikhí (Sal. 94:19).c Á mu rígá mbá dí táʼnga̱a̱ʼ gátanimbaníí o tséʼnga̱a̱ʼ gátani̱ xó má eni̱ eʼwíinʼ, xákáguabáánʼ ma̱ngaa xátani̱ mbríguminaʼ gajmiáanʼ eʼwíinʼ. Jeobá nakro̱ʼo̱o̱ kaʼyaaʼ ga̱jma̱a̱ ikhaa tségiʼthu̱u̱n matani̱ dí xáʼnga̱a̱ʼ gátani̱ (Sal. 103:​13, 14). Á mu nákha niʼníí nini̱ ngínáá, ikháán na̱nguá xtaʼdáá aʼkháanʼ. Garmáʼáan a̱jkia̱a̱nʼ dí Jeobá mandi̱ʼi̱i̱n cuenta bi̱ nuni̱ dí ra̱májánʼ, raʼkháa bi̱ nimíniiʼ (1 Ped. 3:12). Sandra bi̱ nimínuuʼ nákha nindxu̱u̱ ada̱, naʼthí: “Na̱ndo̱ʼo̱o̱ má xúʼko̱ Jeobá dí mambáyuʼ mba̱yo̱o̱ dí májánʼ náa ikhúún xó má eʼyoʼ ikhaa”.

7. Xú káʼnii gámbáyulú dí niguáʼníí nákha niʼníí mu mu̱ʼni̱ ñajuunʼ Jeobá rá.

⁷ Maski ajndu naʼniaaʼ mingíjyúuʼ matanimba̱a̱ʼ, mú Jeobá ma̱ndoo maxnáa ñajunʼ dí matambáñún eʼwíinʼ. Ikhaa naniñuuʼ dí mumbáyíí náa najuiʼtáraʼa (1 Cor. 3:9). Mbáa ga̱jma̱a̱ numuu xóo niraxtaa nákha niʼníí, rí xúgi̱ makrua̱ʼa̱a̱ʼ xtañún itháan xa̱bu̱ ga̱jma̱a̱ ma̱ndoo matambáñún wéñuuʼ. Helen, bi̱ niʼthá ga̱jma̱a̱ numuu náa kutriga̱ 3 nigruigú dí mixtambáyíí ga̱jma̱a̱ dí xúgi̱ ikhaa nandoo nambáñúún eʼwíinʼ. Ikhaa naʼthí: “Nákha niʼníí naku̱mu̱ʼ rí nditháan ragúʼdoo numuʼ, mú Jeobá niʼni mba̱yo̱o̱ dí ikhaa nandoo kaʼyoʼ ga̱jma̱a̱ dí gúʼdoo numuʼ”. Helen nindxu̱u̱ precursora regular ga̱jma̱a̱ ra̱ʼkhá tháán gagi xtáa.

JEOBÁ NANDOO MA̱TA̱YA̱A̱ DÍ NAʼNI MBA̱A̱ A̱JKIU̱U̱N KAʼYAAʼ

8. Ndiéjunʼ eʼthúlú Jeobá náa Isaías 1:18 rá.

⁸ Tikhuun xa̱bi̱i̱ Jeobá kaʼníí nakúwá ngíná ga̱jma̱a̱ numuu aʼkhá dí nixudamíjna̱ nákha xóó tséjngúún iyááʼ o nda̱wa̱á má dí nijngún iyááʼ. Mú garmáʼáan a̱jkiu̱lú dí Jeobá nixnájxi̱ má a̱ʼdióo makhañúu ga̱jma̱a̱ numulú numuu rí nandoo kaʼyulú. Ikha jngóo ma̱ndoo mbuʼyáá gajkhun rí ikhaa nandoo mundrígú dí nimínáanʼlu. Jeobá naʼthúlúʼ: “Aguwaʼla ga̱jma̱a̱ guʼnimbáníí numulú”.d Ga̱jma̱a̱ ikhaa naʼthúlúʼ dí índo̱ nu̱ʼni̱ rígi̱, naʼni mba̱a̱ a̱jkiu̱u̱n kaʼyulú mbá kayuuʼ (atraxnuu Isaías 1:18). Ra̱ʼkhá tháán exnáaʼ núma̱aʼ Anu̱lú bi̱ nandoo kaʼyulú ga̱jma̱a̱ numuu dí nambumuu xúgíʼ dí ra̱májánʼ dí ni̱ʼni̱ nákha niʼníí, mú nditháan tsémbumuu rí májánʼ dí ni̱ʼni̱ (Sal. 103:​9, 12; Heb. 6:10).

9. Náá numuu rí májánʼ mundxaʼwamíjna̱ náa dí nu̱ʼni̱ rí mbiʼi xúgi̱ ga̱jma̱a̱ dí mu̱ʼni̱ nda̱wa̱á raʼkháa náa dí ni̱ʼni̱ nákha ginii rá.

⁹ Á mu xtaa ngíná ga̱jma̱a̱ numuu aʼkhá dí nitaxúdaminaʼ nákha niʼníí, ataniminaʼ dí matatsaʼwamínáʼ náa dí xtaa ratani̱ xúgi̱ ga̱jma̱a̱ rí maʼnga̱a̱ʼ matani̱ nda̱wa̱á. Atatsaʼwáminaʼ náa xkri̱da ndrígóo apóstol Pablo. Ikhaa ra̱ʼkhá tháán nigáwíinʼ a̱jkiu̱u̱n ga̱jma̱a̱ numuu rí nixkúún xa̱bi̱i̱ Cristo, mú ikhaa ndiʼyoo dí Jeobá niʼni mba̱a̱ a̱jkiu̱u̱n kaʼyoo (1 Tim. 1:​12-15). Ikha jngóo niniñuuʼ randxa̱ʼwáminaʼ náa aʼkhá dí nikudaminaʼ nákha niʼníí, xúʼko̱ má dí niʼni nákha xóó tséjkha̱nú mani̱ndxu̱u̱ xa̱bi̱i̱ Jesús (Filip. 3:​4-8, 13-15). Rí ikhaa nimbáyúu nindxu̱u̱ dí niʼtáráʼa ga̱jma̱a̱ gagi ma̱ngaa nindxa̱ʼwáminaʼ náa dí wíji̱ ma̱ʼkha̱ nda̱wa̱á. Ikháá má xóo Pablo, xándoo matriʼkui̱i̱ dí nirígá nákha niʼníí. Mú dí mbiʼi xúgi̱ ma̱ndoo mataniminaʼ dí matayamajkuíí Jeobá xó má eʼnga̱a̱ʼ ga̱jma̱a̱ rí matatsaʼwamínáʼ náa dí marigá nda̱wa̱á.

10. Ndiéjunʼ gúʼni̱ á mu ni̱ʼni̱ gawúúnʼ eʼwíinʼ rá.

¹⁰ Mbáa xtaa ngíná ga̱jma̱a̱ numuu rí nitani̱ nákha niʼníí, itháan á mu nitani̱ gawúúnʼ eʼwíinʼ. Ndiéjunʼ gándoo gátani̱ rá. Arathún muni̱ mba̱a̱ a̱jkiu̱ún kuyaaʼ (2 Cor. 7:11). Atanda̱ʼa̱a̱ Jeobá dí mambáñún bi̱ nitani̱ gawúúnʼ. Ikhaa ma̱ndoo mambáyáaʼ ikháán ma̱ngaa mambáñún ikhiin mu mu̱nila má xúʼko̱ ñajuunʼ ga̱jma̱a̱ mu makuwáanʼla tsímáá.

11. Ndiéjunʼ eʼsngúlú xkridoo Jonás rá. (Atayáá ma̱ngaa xtiʼkhuu dí na̱ʼkha̱ .)

¹¹ Gajmañaaʼ náa aʼkhá rí nitani̱ ga̱jma̱a̱ atatsíñááʼ dí Jeobá majmiuu jma̱á nindxa̱a̱ʼ. Garmáʼáan a̱jkia̱a̱nʼ xtayáá profeta Jonás. Ikhaa na̱nguá ni̱jkha̱ náa Nínive xó má niʼthúu̱n Dios, Jonás ni̱jkha̱ i̱mba̱ níʼkhá xuajin. Jeobá nixprígúu ga̱jma̱a̱ Jonás ni̱jkha̱nú nikro̱ʼo̱o̱ (Jon. 1:​1-4, 15-17; 2:​7-10). Jeobá nijmiuu má xúʼko̱ Jonás xóo profeta, ikha jngóo nikuʼmaa maʼga mbu̱júu̱ Nínive, rí xúgi̱ Jonás niʼnimbo̱o̱. Maski ajndu nigáwíinʼ a̱jkiu̱u̱n ga̱jma̱a̱ numuu dí niʼni, mú tániñuuʼ dí rígi̱ marikhoo mu xágruigú ñajunʼ dí Jeobá nixnúu (Jon. 3:​1-3).

JEOBÁ NAʼNI̱I̱ A̱JKIU̱LÚ GA̱JMA̱A̱ ESPÍRITU SANTO NDRÍGÓO

12. Xú káʼnii eʼni makuwáánʼ tsímáá Jeobá índo̱ nuguáʼníí mbá dí ra̱májánʼ rá. (Filipenses 4:​6, 7.)

¹² Índo̱ naguáʼníí mbá dí naʼni mumíniiʼ, Jeobá najmuu espíritu santo ndrígóo mu maʼni̱i̱ a̱jkiu̱lú. Rígi̱ nigíʼnuu Ron ga̱jma̱a̱ Carol índo̱ mbáa aʼdiún bi̱ nikhi̱i̱ má nixíyaminaʼ. Ikhiin nuthi: “Na̱nguá nindxu̱u̱ timbá aʼphu̱ dí nuguáʼníí xóo rígi̱, mú rígi̱ dí itháan niʼni magawúnxu. Numuu rí na̱nguá eyoo gúnuʼxu, ikha jngóo nutakáñííxu Jeobá ga̱jma̱a̱ ikhú nakuwáanʼxu tsímáá xó má eʼthí náa Filipenses 4:​6, 7” (atraxnuu). Á mu ikháán xtaa ngíná ga̱jma̱a̱ nagáwíinʼ a̱jkia̱a̱nʼ ga̱jma̱a̱ numuu dí nitagíʼníí mbá dí ra̱májánʼ, aratháán mbájmbu Jeobá xóo ku̱ma̱a̱. Ma̱ndoo maratha̱a̱n asndu nguáthá má nuthu eyaaʼ ikháán ga̱jma̱a̱ asndu náá má mbi̱ʼi̱i̱ (Sal. 86:3; 88:1). Xákánajkáa dí matanda̱ʼa̱a̱ espíritu santo ndrígóo Jeobá. Atayáá rí ikhaa gajkhun ma̱ndoo maʼdxawuun dí naratájkáan (Luc. 11:​9-13).

13. Xú káʼnii embáyulú espíritu santo mu mu̱ʼni̱ má xúʼko̱ ñajuunʼ Jeobá rá. (Efesios 3:16.)

¹³ Lá nitraʼníí mbá tsáʼkhá dí ra̱ʼkhá tháán gakhi̱i̱ ga̱jma̱a̱ dí xúgi̱ naku̱ma̱a̱ʼ dí nánguá eʼnga̱a̱ʼ itháan ráʼ. Espíritu santo ma̱ndoo mambáyáaʼ mu matani̱ má xúʼko̱ ñajuunʼ Jeobá (atraxnuu Efesios 3:16). Guʼyáá dí nigíʼnuu mbáa ndxájulú bi̱ mbiʼyuu Flora. Ikhaa ga̱jma̱a̱ jmba̱yii nindxu̱ún misioneros, mú jmba̱yii niʼni nduwaaʼ ga̱jma̱a̱ niguánú niniñami̱jna̱a̱. Flora naʼthí: “Rí niʼni nduwúúnʼ niʼni dí maxtáá ngíná wéñuuʼ. Ikha jngóo nindo̱ʼo̱o̱ Jeobá dí maxnúʼ espíritu santo ndrígóo mu maʼngo̱ʼ maraʼnuu xkujndu rígi̱. Jeobá niʼni thanuʼ ga̱jma̱a̱ nimbáyúʼ, maski ajndu ikhúún niku̱mu̱ʼ dí xáʼngo̱ʼ”. Ikhaa naʼthí rí Dios nimbáyúu mu maku̱mu̱u̱ kaʼyoo itháan ga̱jma̱a̱ dí ikhaa má gámbáyúu asndu ndiéjunʼ má dí gárígá. Flora naʼthí: “Ajngáa dí na̱ʼkha̱ náa Salmo 119:32 nasngájma májánʼ xóo Jeobá nimbáyúʼ, náa versículo naʼthí: ‹Maʼgá má xúʼko̱ náa kambo̱o̱ kiʼtáñajunʼ ndrígáaʼ, numuu rí ikháán natani̱ dí náa a̱jkiu̱nʼ maʼni gáʼchú marigá rúʼko̱›”.

14. Ndiéjunʼ gíʼmaa mu̱ʼni̱ mu mundrígú espíritu santo ndrígóo Dios rá.

¹⁴ Nda̱wa̱á dí nitanda̱ʼa̱a̱ Jeobá maxnáaʼ espíritu santo ndrígóo, ndiéjunʼ gáʼyóoʼ matani̱ rá. Atani̱ ñajunʼ dí mambáyáaʼ matadrígú espíritu santo, xóo mi̱dxu̱ʼ reunión ga̱jma̱a̱ marataráʼa. Atraxnuu Biblia xúgíʼ mbiʼi, mu xúʼko̱ matatsaʼwamínáʼ xóo endxa̱ʼwáminaʼ Jeobá (Filip. 4:​8, 9). Índo̱ gátra̱xnuu atayáá xú káʼnii Jeobá nimbáñún muraʼníí xkujndu xa̱bi̱i̱ bi̱ na̱ʼkha̱ raʼthí ga̱jma̱a̱ numún náa Biblia. Sandra, bi̱ niʼthá ga̱jma̱a̱ numuu náa kutriga̱ majun niraʼnuu mbaʼa xkujndu, ikhaa naʼthí: “Rí nigíʼnuu José naxnúʼ tsiaki̱i̱. Ikhaa tániñuuʼ dí tsáʼkhá ga̱jma̱a̱ rí nini̱ ngínáa maʼni dí ni xámbájxu̱u̱ ga̱jma̱a̱ Jeobá” (Gén. 39:​21-23).

JEOBÁ NAJMIUU A̱NGIU̱LÚ MU MAʼNI̱I̱ A̱JKIU̱LÚ

15. Tsíin gándoo gúmbayúlú ga̱jma̱a̱ xú káʼnii rá. (Atayáá ma̱ngaa xtiʼkhuu.)

¹⁵ Índo̱ numíniiʼ, a̱ngiu̱lú nindxu̱ún bi̱ ‹nuni̱ dí maʼni̱i̱ a̱jkiu̱lú› (Col. 4:11). Jeobá najmiuu a̱ngiu̱lú mu masngájmulú dí ra̱ʼkhá tháán eyoo kaʼyúlú. Ikhiin nuni̱ maʼni̱i̱ a̱jkiu̱lú índo̱ nakúwíin ga̱jma̱á nindxu̱lú, ma̱ngaa índo̱ nudxawunlú rí nuʼthúún xóo kumulúʼ. Mbáa nuxnulúʼ tsiaki̱i̱ índo̱ nuraxnuu mbá texto ndrígóo Biblia o índo̱ nutajkháan ga̱jma̱á nindxu̱lú (Rom. 15:4).e Nguáná mbáa ndxájulú ma̱ndoo maʼni marmáʼáan a̱jkiu̱lú xóo endxa̱ʼwáminaʼ Jeobá, ga̱jma̱a̱ mambáyúlú mu xáxmiéjunlú wéñuuʼ. Ma̱ngaa a̱ngiu̱lú ma̱ndoo mumbayulúʼ índo̱ nuxnulúʼ mbá ganitsu.

16. Ndiéjunʼ gáʼyóoʼ mu̱ʼni̱ mu eʼwíinʼ mumbayulúʼ rá.

¹⁶ Mbáa nguáná mbaʼyóoʼ dí matandu̱ʼu̱u̱n eʼwíinʼ mu mumbayáaʼ. A̱ngiu̱lú nandún kuyaaʼ ga̱jma̱a̱ nandún mumbayáaʼ (Prov. 17:17). Mú mbáa tséyáá xóo ku̱ma̱a̱ʼ ga̱jma̱a̱ tséyáá dí ndayáaʼ (Prov. 14:10). Á mu xtaa ngíná arathún xóo ku̱ma̱a̱ bi̱ nambájxa̱a̱ʼ májánʼ gajmiáanʼ, májánʼ gáʼni dí marathu̱u̱n xóo ma̱ndoo mumbayáaʼ. Ma̱ndoo maratamíjná ga̱jma̱a̱ʼ mbáa o a̱jmi̱i̱n a̱ngiu̱lú bi̱ kuya̱ edxu̱u̱ bi̱ naku̱ma̱a̱ʼ xtañún. Tikhuun a̱ngiu̱lú gu̱ʼu̱ tséʼniún miʼskhaa muthán xóo ekumu̱ún i̱mba̱a̱ ndxájulú a̱ʼgu̱ bi̱ nambájxúuʼ májánʼ ga̱jma̱a̱ Jeobá.

17. Ndiéjunʼ xkujndu ma̱ndoo maʼni dí xúndrigú tsiaki̱i̱, ga̱jma̱a̱ xú káʼnii gúraʼníí rígi̱ rá.

¹⁷ Xátani̱ tsínguminaʼ náa a̱ngiu̱lú. Á mu xtaa ngíná mbá tsíyaaʼ gáratamíjná ga̱jma̱a̱ʼ nimbáa. Mbáa nguáná a̱ngiu̱lú xáʼngu̱u̱n gákru̱ʼu̱u̱n kuyaaʼ o mutha mbá dí maʼni magawáanʼ (Sant. 3:2). Mú xátani̱ tsínguminaʼ náa a̱ngiu̱lú, numuu rí Jeobá ma̱ndoo majmiuu mu muni̱i̱ a̱jkia̱a̱nʼ. Mbáa ndxájulú bi̱ kayá edxu̱u̱ bi̱ mbiʼyuu Gavin, bi̱ namínúuʼ ga̱jma̱a̱ numuu dí najmúu wéñuʼ, naʼthí: “Nguáná tsíyóʼ gátamíjná ga̱jmu̱ʼ nimbáa, ni má tsíyóʼ gáxtáá gajmíʼ bi̱ nambájxu̱ʼ gajmíʼ”. Maski ajndu xúʼko̱, ikhaa naʼniminaʼ maxtáa gajmíi̱n eʼwíinʼ ga̱jma̱a̱ rígi̱ naʼni maʼni̱i̱ a̱jkiu̱u̱n. Mbáa ndxájulú bi̱ mbiʼyuu Amy naʼthí: “Ga̱jma̱a̱ numuu rí nigíʼnuʼ nákha niʼníí naʼniuʼ miʼskhaa maku̱mu̱ʼ ka̱ñu̱u̱n xa̱bu̱. Mú naniminaʼ dí maʼndoʼ ka̱ñu̱u̱n a̱ngiu̱lú ga̱jma̱a̱ dí maku̱mu̱ʼ ka̱ñu̱u̱n xó má eʼni Jeobá. Rígi̱ naʼni dí ikhaa maxtáa gagi ga̱jma̱a̱ xúʼko̱ má mangúún”.

RÍ NAKUDAMINAʼ MAʼNI JEOBÁ NAʼNI̱I̱ A̱JKIU̱LÚ

18. Ndiéjunʼ dí mitsaanʼ kua̱ʼthi̱i̱n marigá nda̱wa̱á ga̱jma̱a̱ ndiéjunʼ gándoo gúʼni̱ xúgi̱ rá.

¹⁸ Inu má Jeobá maʼni gámbáa mbá xúgíʼ dí naʼni maxmiéjunlú ga̱jma̱a̱ rí naʼni magawúnlú (Apoc. 21:​3, 4). Náa numbaaʼ nuxi̱ʼ xúgíʼ rí naʼni mumíniiʼ ni “xáʼni gawúunʼ a̱jkiu̱lú” (Is. 65:17). Mú asndu dí mbiʼi xúgi̱ Jeobá nañewu̱nlú índo̱ numíniiʼ. Naxnúlú mbaʼa enii dí naʼni̱i̱ a̱jkiu̱lú. ¡Ikha jngóo atatsíñáminaʼ dí ikhaa mambáyáaʼ! Xátani̱ a̱jma̱ a̱jkia̱a̱nʼ: Jeobá ra̱ʼkhá tháán nandoo kaʼyaaʼ (1 Ped. 5:7).