Dí ma̱ndoo matani̱ mu xátatsiʼñááʼ ratanigajma̱a̱
LÁ NA’NIAA’ gakhi̱i̱ matanigajma̱a̱ mámbá xmáná ráʼ. Naskaaʼ dí matanigajma̱a̱ ráʼ. Xúgiáánʼ má nagíʼnulú rúʼko̱ nguáná. Rígá mbaʼa dí naguʼunlú nu̱ʼni̱ tsejtsíí mbiʼi náa dí ndayóoʼ mbiʼi ga̱jma̱a̱ tsiaki̱i̱, xóo dí muʼna̱. ¡Ra̱ʼkhá tháán mitsaanʼ eʼni̱i̱ a̱jkiu̱lú nda̱wa̱á dí niʼna! Xúʼko̱ má kayuuʼ nindxu̱u̱ ma̱ngaa índo̱ nuʼnigajma̱a̱ Biblia rí asndu xóo naʼni “kaʼwi̱ín ga̱jma̱a̱ iyaʼ ndrígóo ajngáa rí gajkhun” (Efes. 5:26). Ma̱ndoo mambáyáaʼ rígi̱:
Atani̱ mbá programa. Mbáa cristiano gíʼmaa maʼniga̱jma̱a̱ numuu dí rúʼko̱ “itháan gíʼdoo numuu” (Filip. 1:10). Mú xámbumaaʼ eʼni programa rí nitani̱, ma̱ndoo matagíʼma náa nakujmaa ma̱ta̱ya̱a̱, xóo náa refri o náa níjñúu xiewaaʼ o asndu ma̱ndoo matatsiji mbá alarma náa celular ndrígáaʼ xóo mbá hora wapháá mu maʼni marmáʼáan a̱jkia̱a̱nʼ.
Atani̱ mbá rí xáʼniaaʼ gakhi̱i̱. Tikhuun naʼngu̱u̱n nuniga̱jma̱a̱ mba̱a̱, mú eʼwíinʼ nuniga̱jma̱a̱ chíʼgíiʼ. Ikháán rá. Índo̱ gátani̱ programa atayáá xóo maʼnga̱a̱ʼ matanimbáníí. Á mu natayáá dí naskaaʼ matanigajma̱a̱ índo̱ na̱jkha̱nú hora, májánʼ gáʼni dí matanigajma̱a̱ maski ajndu káaʼ mbá gu̱wa̱ʼ minuto, gajkhun má dí na̱nguá mba̱yu̱u̱ʼ, mú itháán májánʼ dí matanigajma̱a̱ maski ajndu mbá chíʼgíiʼ ki xóo dí xátanigajma̱a̱ mbá kayuuʼ. Mbáa índo̱ xtaa ratanigajma̱a̱ maʼndaaʼ matanigajma̱a̱ xóo itháán (Filip. 2:13).
Atraʼwíí wapháá rí matanigajma̱a̱. Á mu asndu índo̱ na̱jkha̱nú mbiʼi rí matanigajma̱a̱ ndiʼkhún etayáʼ rí ma̱ta̱ya̱a̱, matasnga̱jmá rí tséjmaaʼ “májánʼ mbiʼi rí naguanúu” (Efes. 5:16). Náá numuu rí tsétani̱ mbá lista rí nanigua̱a̱ʼ matanigajma̱a̱ rá. Mámbá índo̱ gáraʼdáá grajxe̱, ataniraʼmáʼ. Ma̱ngaa índo̱ natanigajma̱a̱, á mu na̱ʼkha̱ imbo̱o̱ náa edxa̱a̱ʼ rí nandaaʼ mataʼyáʼ, ataniraʼmáʼ ma̱ngaa náa lista.
Atani̱ guʼuminaʼ. Atagíminaʼ matanigajma̱a̱ mámbá xmáná. Mu matani̱ rígi̱, mbáa mbaʼyóoʼ asndu matríya̱ʼ mbá mbiʼi kiejuunʼ, hora, nguáthá mba̱yu̱u̱ʼ gájyáaʼ ma̱ngaa rí nandaaʼ matanigajma̱a̱.
Á mu tsétatsíñáánʼ ratanigajma̱a̱ Biblia mambáyáaʼ maraxtaa mijngii náa Jeobá, matraʼwíí májánʼ dí matani̱ ma̱ngaa maʼni̱i̱ a̱jkia̱a̱nʼ (Jos. 1:8).