Gakuwáánʼlú tsímáá maski ajndu rígá guerra ga̱jma̱a̱ nuxmijná xa̱bu̱
Gary bi̱ nákhá niʼníí ninindxu̱u̱ soldado naʼthí: “Nákhá xóó tsénigajmaa Biblia, na̱nguá eyoo náá numuu dí náa numbaaʼ rígá wéñuuʼ xkujndu, dí ra̱májánʼ ga̱jma̱a̱ dí xa̱bu̱ nuni̱ dí raʼkhí. Mú rí xúgi̱ nánguá exmiéjunʼ ga̱jma̱a̱ nda̱yo̱o̱ dí Jeobá maʼni dí náa tsu̱du̱u̱ Ku̱ba̱ʼ makuwáanʼ tsímáá”.
Raʼkháa i̱ndó Gary naku̱mu̱u̱ xúʼko̱. Guʼyáá xú káʼnii eʼwíinʼ xa̱bu̱ nimbáñún dí eʼthí náa Biblia.
DÍ NAʼTHÍ NÁA BIBLIA: “Numuu dí ikháán ra̱ʼkhá tháán májáanʼ a̱jkia̱a̱nʼ Jeobá ga̱jma̱a̱ xtaa xawii matani̱ mba̱a̱ a̱jkia̱a̱nʼ, ra̱ʼkhá tháán mba̱a̱ ngajua rí tsétumuu rí xtaʼdáá náa xúgíinʼ bi̱ nutakáñaaʼ” (Salmo 86:5).
XÓO EMBÁYULÚ. “Ajngáa rígi̱ nambáyúʼ numuu rí naʼni mba̱yo̱o̱ dí Jeobá nagáwíinʼ a̱jkiu̱u̱n ma̱ngaa xtáa xawii maʼni mba̱a̱ a̱jkiu̱u̱n kaʼyoʼ ga̱jma̱a̱ numuu rí ni̱ni̱ índo̱ ni̱jkhá náa guerra” (Wilmar, Colombia).
DÍ NAʼTHÍ NÁA BIBLIA: “Ma̱ni̱ nuxi̱ʼ mekhu ga̱jma̱a̱ mbá nuxi̱ʼ ku̱ba̱ʼ, ga̱jma̱a̱ xúgíʼ dí nirígá nákha ginii ni xármáʼáan a̱jkia̱la ga̱jma̱a̱ ni xáʼni gawúunʼ a̱jkia̱la” (Isaías 65:17).
XÓO EMBÁYULÚ. “Asndu dí mbiʼi xúgi̱ namínúuʼ ga̱jma̱a̱ numuu xóo nixtáá índo̱ ni̱jkhá náa guerra. Mú texto rígi̱ naʼni marmáʼáan a̱jkiu̱nʼ dí ginuu má Jeobá maʼni dí mambumuʼ xúgíʼ dí ra̱májánʼ dí naʼni mamínúuʼ, nditháan ní xármáʼáan a̱jkiu̱nʼ. ¡Tsímáá gáxtáá!” (Zafirah, Estados Unidos).
DÍ NAʼTHÍ NÁA BIBLIA: “Índo̱ gáʼtañajunʼ bi̱ naʼni rí jmbu maxtáa májánʼ, ga̱jma̱a̱ tsímáá mbajyúuʼ asndu kámuu xó má kámuu xtáa gu̱nʼ” (Salmo 72:7).
XÓO EMBÁYULÚ. “Mbaʼa nuthu nandxa̱ʼwa̱mínáʼ ga̱jma̱a̱ numuu ajngáa rígi̱. Ginuu má ni xármáʼáan a̱jkiu̱lú xúgíʼ xkawiʼ dí nirígá náa guerra ni má xáxmiéjunlú ga̱jma̱a̱ numuu gamíi dí maguáʼníí bi̱ kuʼñúún” (Olexandra, Ucrania).
DÍ NAʼTHÍ NÁA BIBLIA: “Xa̱bia̱a̱ʼ bi̱ nikháñún, makuwá […]. ¡Guguajxu̱u̱nʼ, asndu nadxa̱la gúndxa̱ʼwa̱, ikháanʼ bi̱ kuwáanʼla náa yujndaʼ!” (Isaías 26:19).
XÓO EMBÁYULÚ. “Índo̱ niradíin xa̱bu̱ tutsis, niradíin xúgíinʼ bi̱ ka̱ñu̱u̱n. Mú ajngáa rígi̱ naʼni marmáʼáan a̱jkiu̱nʼ dí matangi̱ín mba̱ñu̱u̱n mbu̱júu̱. Ra̱ʼkhá tháán nandoʼ madxawun aʼwún índo̱ gátujxi̱ín” (Marie, Ruanda).
DÍ NAʼTHÍ NÁA BIBLIA: “Gítháán má tígo̱o̱ dí xa̱bu̱ ra̱míjíinʼ ní xákúwá, ikháán matiejxi̱ náa nikúwá mú ní xátañu̱u̱n ikhí […]. Xa̱bu̱ guabiinʼ makána̱án ku̱ba̱ʼ ga̱jma̱a̱ ra̱ʼkhá tháán tsímáá gákuwá” (Salmo 37:10, 11).
XÓO EMBÁYULÚ. “Maski ajndu gi̱i̱ nánguá má rígá guerra, mú kaʼníí rígá dí ra̱májánʼ ga̱jma̱a̱ kúwíin xa̱bu̱ ra̱míjíinʼ. Texto rígi̱ naxnáa wéñuuʼ tsiaki̱i̱. Jeobá nda̱yo̱o̱ xúgíʼ dí erígá ga̱jma̱a̱ nakro̱ʼo̱o̱ káʼnii xtáá ma̱ngaa nakudaminaʼ dí gítháán má maʼni gámbáa dí naʼni mumíníiʼlú ga̱jma̱a̱ ní xármáʼáan a̱jkiu̱lú xúgíʼ rígi̱” (Daler, Tayikistán).
Xa̱bu̱ bi̱ najuiʼthá ga̱jma̱a̱ numún náa revista rígi̱, nindxu̱ún kááʼ tikhuun testigos de Jeobá bi̱ nimbáñún dí naʼthí náa Biblia mu makuwá tsímáá. Mbáa nákhá niʼníí nawiñu̱u̱nʼ kuñúún xa̱bu̱ bi̱ naguwáʼ i̱mba̱ níʼkhá xuajin, bi̱ nindxu̱ún i̱mba̱ raza o bi̱ niniu̱u̱n dí raʼkhí, mú dí xúgi̱ niriʼkumijnáa (Efesios 4:31, 32). Bi̱ nindxu̱xu̱ testigos de Jeobá na̱nguá exuʼdamijnáxú náa política ní má náa nuxmijná xa̱bu̱ (Juan 18:36).
Bi̱ nindxu̱xu̱ testigos de Jeobá numbáyumijnáxu numuu dí nindxu̱xu̱ xóo mbá familia bi̱ kúwá náa xúgíʼ numbaaʼ (Juan 13:35). Xóo Olexandra, bi̱ niʼthá ga̱jma̱a̱ numuu nákhá ginii, ikhaa ndiyóoʼ magajnúu náa xuajñuu ga̱jma̱a̱ ndxájuu ga̱jma̱a̱ numuu guerra. Ikhaa naʼthí: “Índo̱ nijkuánuxu náa i̱mba̱ xuajin, ndi̱ñu̱u̱nxu testigos de Jeobá bi̱ kúwá ikhí, kuáʼthu̱u̱nxu mu mudriguáanʼ. Ikhiin nimbayúxu mu xáʼniuxu gakhi̱i̱ makuwáánʼ ikhí”.
Nutha̱a̱nʼxu dí mi̱dxu̱ʼ náa reunión dí guáʼdááxu, ikhí majmañaaʼ xóo gáraxtaa tsímáá dí mbiʼi xúgi̱, ga̱jma̱a̱ matayaa ndiéjunʼ eʼthí náa Biblia ga̱jma̱a̱ numuu dí makuwáánʼ tsímáá nda̱wa̱á. Ata̱ʼa̱a̱ʼ náa jw.org ga̱jma̱a̱ atayáʼ náa mijngii ma̱ndoo mi̱dxu̱ʼ reunión o atanda̱ʼa̱ dí miʼsngáa ga̱jma̱a̱ numuu Biblia, xáxtumáán. Mbáa testigos de Jeobá maʼsngáa ga̱jma̱a̱ folleto ¡Araxtaa gagi kámuu mbiʼi!