Mo Inpomeisin
1. Paindaut uda i Big Siti Babilon
Wiskain yumi sabe dat “Big Siti Babilon” i min ebri laia rilizan? (Rebaleisan 17:5) Tingbaut wanem i prubem ya:
Em gad paua ebriwea raun da wold. Baibol i spik da Big Siti Babilon sidaun antap “ebridem kantri ane ebri langus.” Em i “ruloba dem king blo dis wold.”—Rebaleisan 17:15, 18.
Em kan bi gabman o big biznisman. “Ebridem king lo dis wold” ane “dem biznisman” stil laip apta em i ded.—Rebaleisan 18:9, 15.
Em lai baut God. Baibol i kolem wan oman uda slip wea olkain man po mani, bikoz em meke ol klostupren wea ol gabman po gedi mani o yuze dempla. (Rebaleisan 17:1, 2) Em trike pipol blo ebri kantri. Ane i polt blo em dat nadakain plenti pipol bi ded.—Rebaleisan 18:23, 24.
2. Wen da Masaia Go Kam?
Da Baibol pinis spik de gobi 69 wik bipo da Masaia i go kam.—Rid Daniel 9:25.
Wen dem 69 wik bin stat? Iya 455 Bipo Kraist. Lo dat taim, Gabana Niamaia bin de lo Zarusalem “po piksemap ane bildem gen” da siti.—Daniel 9:25; Niamaia 2:1, 5-8.
Dem 69 wik bin gopo aulong? Sam Baibol skripsa spik, wan dei i min wan iya. (Ol Namba 14:34; Ezikiel 4:6) So ebridem wik, min 7 iya. Wen yu kaunte dem 69 wik, i meke 483 iya (69 wik x 7 dei).
Wen dem 69 wik bin pinis? Ip yu stat prom iya 455 Bipo Kraist, ane kaunte 483 iya apta dat taim, i go kese iya 29 Apta Kraist.a Dis iya nau, i wen Zizas bin baptaiz ane em bi kam da Masaia!—Luk 3:1, 2, 21, 22.
3. Diprenkain Tritment Wea I Yuze Blad
I gad sam tritment dokta mekem, wea pipol yuze blad blo demplaselp. Sam dem tritment, ol Kristian mas no yuzem. Wase wen sam pipol gibe blad blo dempla po blad baingk, o i wen pipol tekemaut blad blo demplaselp bipo wan operation ane kipem wansaid po yuzem tru dat operation. Bat, ol Kristian mas no meke demkainting.—Dutaronami 15:23.
Bat, sam nada tritment maitbi orait po yuzem. Demkain wan i blad test, hemodialysis, hemodilution, o cell-salvage o heart-lung bypass machine. Ebri Kristian mas suz po emselp, wiskain ol go yuze blad blo em tru dat tritment, medical test o therapy. Ebri dokta i dipren prom wananada baut wiskain ol go gibe tritment. So, bipo ol Kristian gri po gede eni tritment, medical test, o therapy, ol mas paindaut prom dokta, wanem ol go mekem wea blad blo em. Trai tingbaut dem kwestin ya:
Wotip ol go yuze tube po sane blad blo mi ausaid, po kambaigen insaid mai bodi, ane da blad wea tube no ran po lelbet taim? Wiswei, mai tingking laue mi, po pil dis blad i stil pat blo bodi blo mi a? O, wea mai tingking, ai go pil da blad mas “gobaigen po graun”?—Dutaronami 12:23, 24.
Wotip sam tritment prom dokta, tekemaut sam blad blo mi, seinzem, ane putem gobaigen insaid mai bodi (o antap mai bodi)? Prom wanem ai bin lan prom Baibol baut blad, mai tingking go boda mi o ai go pil orait po suze da tritment?
4. Maretmet Libe Wananada
Wod blo God inkariz maret pipol po no separeit, o libe wananada, ane i spik kliawan dat ip diskainting i apen, i no gibe demtu da rait po maret nada sambodi. (1 Korint 7:10, 11) Bat samtaim, wan Kristian mait libe maretmet blo dempla.
Maretman no wande lugaut em pamle: Wan maretman stap prom lugaut em pamle, sole pamle blo em misaut prom gede nap kaikai ane klos, o wanem ol nidem.—1 Timoti 5:8.
Wan prom demtu ite maretmet mina nadakain bad: Diskain rap tritment ken damiz elt blo em met, o dempla woribaut laip blo dempla i wea deinza.—Galasia 5:19-21.
Maretmet prapa stape em prom wosip Zeoba: Wan maretmet mina stape met blo em prom serbe Zeoba.—Pas Misnare Wok 5:29.
5. Ol Holiday, Pati ane Pestabol
Ol Kristian no zoine eni holiday, o eni dei pipol mak em, wea i no plize Zeoba. Bat ebri Kristian mas yuze wanem ol sabe prom Baibol, po suz wanem ol go mekem wen demkainting i kamap. Trai tingbaut wanem yu ken mekem.
Ip samwan spik yu, api Christmas, New Year, Birthday o samting wase laidat. Yu ken spik, “Eso.” Ip sambodi wande paindaut mo, yu ken eksplein po dempla aukam yu no zoin wea ebribodi po da dei.
Ip maretmet blo yu no wan Zeoba Witnis, ane em inbait yu po kaikai wea pamle po wan pati. Ip yu tingk i orait po go de, den bipo yu go, eksplein po met blo yu, dat yu nogo zoine eni kastam dat mait kamap wea Baibol no laue em.
Ip bos blo yu wande gibe yu ekstra pei wea Christmas taim. Yu go spik no po da mani? Wel, tingbaut aukam em wande gibem. Wotip bos blo yu gibem po yu bikoz i Christmas taim, o wotip em gibem po soe eso gobaigen po adwok blo yu?
Ip samwan wande gibe yu gipt po Christmas o nada dei wase laidat. Da wan uda gibe da gipt mait spik: “Ai sabe yu no meke pati wea dis dei, bat ai wande gibem po yu.” Mait em soe nais pasin. O, mait yu tingk, aukam em gibem? Em trai po trike yu po test bilib blo yu, o gede yu po zoine dat pati? Apta yu tingbaut dis, i aptu yu, ip yu go suz po teke da gipt. Wa, so wea ebriting yumi suz po mekem, we wande meikso tingking nogo boda yumi, sole yumi no erte God ane serbe em prapawei.—Pas Misnare Wok 23:1.
6. Sik o Diziz i Izi po Spredem
Yumi labe pipol, so ip wi kare nugud sik o diziz, wi trai mina ad po no pasem po nada pipol. Nomata mipla sabe wi olredi gad nugud sik o iben ip wi tingk samwan bin pasem po mipla, wi meikso wi nogo pasem po nada pipol. Mipla wande mekem diswei, bikoz da Baibol spik: “Yupla i mas labe ebri pipol seimkain wase yupla labe yuplaselp.”—Rom 13:8-10.
Wiskain wi ken pole dis skripsa wea yumi laip? Sambodi uda kare sik wea i ken spredem o pasem, mas no trai po labap o kise nada pipol. Ane ip wan pamle pil ol wande protekt demplaselp, ane ol no inbait em po kam aus blo dempla, em mas no pil apset o gede wail. Ane bipo samwan i baptaiz, em mas tok po da elda uda i coordinator blo da kongrigeisin, baut nugud diziz em gad, so dem bala ken setemap samting sole enibodi uda go baptaiz seimtaim wea em nogo kese da sik. Ane wen tu pipol laik, bipo ol stat po sabe wananada mo, ane ip wan prom demtu tingk ol bin klosap po wan nugud diziz, den ol go wande gede blad test. Wen yu mekem diswei, yu soe yu kea baut nada pipol “wa, yupla mas elp lugaut ol nada pipol ane no mata lugaut yuplaselp.”—Pilipi 2:4.
7. Yuze Lo po Strete Biznis
Wen i kam po biznis o mani, yumi ken stape plenti problem wen wi raitemdaun wea wan griment—iben ip da biznis i wea wan nada Kristian bala o sisi. (Zeramaia 32:9-12) Samtaim, wan Kristian mait gad smol problem wea sambodi baut mani o nada samting. Dempla mas trai strete dat problem kuikwan ane wea pis ane sotemaut datting mata lo dempla.
Wanem yumi mas mekem po sotemaut eni trabol wase ip samwan stile mani prom yu, o samwan min po spoile gudneim blo yu? (Rid Matiu 18:15-17 NWT.) Zizas gibe yumi 3 ting po polem:
Trai po sotemaut dat problem mata lo yu ane dempla.—Rid Matiu 18:15.
Ip da problem i stil de, aske 1 o 2 Kristian prom da kongrigeisin, uda nogo tekesaid, po go wea yu.—Rid Matiu 18:16.
Ip da problem stil kipgo, mata den tok po dem elda.—Rid Matiu 18:17 NWT.
Yumi mas no teke ol bala o amenpamle gopo kot, bikoz bambai i go spoile neim blo Zeoba ane pipol go tingk nugudwei baut da kongrigeisin. (1 Korint 6:1-8) Bat i gad sam taim, wea wi mait nid po sotemaut lo kotaus—wase dibos, o uda prom mam ane dad go gede da pikinini o aumas mani ol mas peiem po da pikinini, o po gede insurance mani, o ip biznis kan pei det, o meke wil stret apta samwan pasawei. Eni Kristian uda gopo kot wea gudpasinwei po sotemaut demkainting, no broke Baibol lo.
Ip eniting mina nugud apen po broke lo—wase rape o wen samwan pose sambodi po seks, o tase pikinini nugud sekswei, o ite samwan rapwei, stile samting, o kile samwan—den eni Kristian uda go ripot em po polisman o gabman opisa, nogo broke Baibol lo tu.
a Prom iya 455 Bipo Kraist, gopo iya 1 Bipo Kraist, i 454 iya. Prom iya 1 Bipo Kraist gopo iya 1 Apta Kraist, i 1 iya (i nogad da iya 0). Ane prom iya 1 Apta Kraist gopo iya 29 Apta Kraist, i 28 iya. So, 454 + 1 + 28 iya =483 iya.