Isaias

20 Iha tinan neʼebé Liurai Sargão husi rai-Asíria haruka Tartan* ba Asdod,+ nia halo funu hasoru Asdod no manán sidade neʼe.+ 2 Iha tempu neʼebá, Jeová koʼalia liuhusi Isaias,+ Amoz nia oan-mane, hodi dehan: “Bá, hasai hena karón* husi ó-nia knotak, no hasai sandálias husi ó-nia ain.” Nia halo tuir duni ida-neʼe, hodi laʼo ho isin-tanan* no ain-tanan.

3 Tuirmai Jeová hatete: “Hanesan haʼu-nia atan Isaias laʼo ho isin-tanan no ain-tanan durante tinan tolu nuʼudar sinál+ no avizu ba rai-Ejitu+ no rai-Etiópia,+ 4 nuneʼe mós liurai Asíria sei lori dadur husi rai-Ejitu+ no husi rai-Etiópia, labarik-mane no katuas sira neʼebé sai dadur sei laʼo ho isin-tanan no ain-tanan no ema bele haree-hetan sira-nia kidun. Sin, rai-Ejitu sei sai moe. 5 Sira neʼebé tau esperansa ba rai-Etiópia no gaba rai-Ejitu* sei sai taʼuk no moe. 6 Iha loron neʼebá, povu sira neʼebé hela iha tasi ninin neʼe sei dehan: ‘Haree toʼok ba buat neʼebé akontese ba ita-nia esperansa! Uluk ita halai ba rai-Ejitu no rai-Etiópia hodi husu ajuda atu salva ita husi liurai Asíria. Agora, sé mak sei salva ita?’”