Isaias
21 Tuirmai neʼe mak liafuan kastigu nian kona-ba rai-fuik husi tasi:*+
Susar sei mai hanesan anin-fuik neʼebé mai husi parte súl,
Husi rai-fuik, husi rai neʼebé hamosu taʼuk.+
2 Vizaun ida neʼebé halo ema taʼuk fó sai ona ba haʼu:
Ema neʼebé laran-makerek mak hatudu daudaun hahalok laran-makerek,
No ema neʼebé estraga mak estraga daudaun.
Oh Elam, saʼe bá! Oh Média, halo serku bá!*+
Haʼu sei hapara terus neʼebé nia hamosu ona ba ema.+
3 Tan neʼe mak haʼu-nia laran-susar tebes.+
Haʼu sente moras makaʼas,
Hanesan feto neʼebé atu tuur-ahi.
Haʼu neon-susar tebes toʼo labele rona;
Haʼu hanoin barak toʼo labele haree.
4 Haʼu-nia laran sai fraku; haʼu nakdedar ho taʼuk.
Rai-nakaras neʼebé haʼu hein mós halo haʼu nakdedar.
5 Tau meza bá no prepara tuur-fatin sira!
Han no hemu bá!+
Oh imi ulun-naʼin sira, hamriik bá, kose mina ba imi-nia eskudu!
6 Tanba Jeová dehan ona nuneʼe ba haʼu:
“Bá, haruka ema ida atu hafuhu no fó sai buat neʼebé nia haree.”
7 No nia haree karreta funu nian neʼebé kuda sira mak dada,
Karreta funu nian neʼebé kuda-burru sira mak dada,
Karreta funu nian neʼebé kuda-kamelu sira mak dada.
Nia hateke ho didiʼak, nia tau atensaun ho didiʼak.
8 Tuirmai nia hakilar hanesan leaun, hodi dehan:
“Oh Jeová, iha fatin aas* mak haʼu kontinua hamriik durante loron,
No haʼu hamriik iha haʼu-nia postu nuʼudar guarda kalan-kalan.+
9 Haree bá buat neʼebé mai daudaun:
Mane sira hamriik iha karreta funu nian neʼebé kuda sira mak dada!”+
Tuirmai nia dehan:
“Nia monu ona! Babilónia monu tiha ona!+
Kona-ba Babilónia nia maromak sira-nia estátua hotu, nia harahun ona ba rai!”+
10 Oh haʼu-nia povu neʼebé ema sama hanesan trigu,
Sin, trigu* husi haʼu-nia fatin sama trigu nian,+
Haʼu fó sai ona ba imi buat neʼebé haʼu rona ona husi Jeová neʼebé ukun tropa lalehan nian, Izraél nia Maromak.
11 Tuirmai neʼe mak liafuan kastigu nian kona-ba Duma:*
Ema ida bolu haʼu husi Seir+ dehan:
“Guarda, besik dadeer ona ka lae?
Guarda, besik dadeer ona ka lae?”
12 Guarda dehan:
“Dadeer mai daudaun, kalan mós mai daudaun ona.
Se imi hakarak husu, husu bá.
Mai fali bá!”
13 Tuirmai neʼe mak liafuan kastigu nian kona-ba rai-tetuk maran:
Oh ema Dedan+ neʼebé laʼo rai hamutuk ho imi-nia kuda-kamelu,
Imi sei toba iha ai-laran iha rai-tetuk maran.
14 Oh imi neʼebé hela iha rai-Tema,+
Lori bee atu hasoru ema sira neʼebé hamrook,
No lori paun atu fó ba sira neʼebé halai.
15 Tanba sira halai husi surik, husi surik neʼebé losu sai ona,
Husi rama neʼebé ema prontu ona atu hana, no husi funu neʼebé aat tebes.
16 Tanba Jeová dehan nuneʼe ba haʼu: “Iha tinan ida nia laran, tuir tinan ba serbisu-naʼin ida,* Kedar+ nia glória hotu sei remata. 17 Kedar nia funu-naʼin sira neʼebé hana rama sei hela uitoan deʼit, tanba Jeová, Izraél nia Maromak, mak dehan ona ida-neʼe.”