Primeiru Korinto

10 Agora maun-alin sira, haʼu hakarak imi atu hatene katak ita-nia beiʼala sira hotu laʼo iha kalohan nia okos+ no sira hotu laʼo liuhusi tasi,+ 2 no sira hotu hetan batizmu hodi sai Moisés nia dixípulu bainhira sira iha kalohan okos no laʼo liu tasi, 3 no Maromak fó ba sira hotu ai-han neʼebé hanesan atu sira han+ 4 no Maromak mós fó ba sira hotu bee neʼebé hanesan atu sira hemu.+ Tanba sira hemu bee husi fatuk boot neʼebé hamutuk ho sira. Fatuk neʼe reprezenta* Kristu.+ 5 Maski nuneʼe, Maromak la simu sira, no prova mak Maromak oho sira barak iha rai-fuik.+

6 Buat sira-neʼe sai lisaun ba ita, atu ita labele sai hanesan sira hodi kaan buat neʼebé aat.+ 7 Keta adora estátua* hanesan sira balu halo. Neʼe hanesan hakerek nanis ona: “Povu sira tuur atu han no hemu. Tuirmai sira hamriik hodi halo festa boot.”+ 8 Keta halo sala seksuál* hanesan sira balu halo, no iha loron ida deʼit ema naʼin-23.000 mate.+ 9 Ita mós keta koko Jeová*+ hanesan sira balu neʼebé koko nia, no sira mate tanba samea.+ 10 Keta muramura hanesan sira balu muramura,+ no sira mate tanba anju ida* oho sira.+ 11 Buat sira-neʼe akontese ba sira hodi sai nuʼudar lisaun ba ita, no neʼe hakerek hodi fó avizu ba ita+ neʼebé moris iha tempu* neʼe nia rohan.

12 Tan neʼe, ema neʼebé hanoin katak nia hamriik hela, kuidadu bá atu la monu.+ 13 Imi hetan tentasaun* neʼebé baibain ema seluk mós hetan.+ Maibé Maromak mak laran-metin, no nia sei nunka husik imi atu hetan tentasaun neʼebé liu fali imi-nia kbiit,+ maibé kuandu imi hasoru tentasaun ruma, nia mós sei hatudu dalan ba imi atu sai, atu nuneʼe imi bele tahan.+

14 Tan neʼe, maluk doben sira, halai sees husi adora estátua.*+ 15 Haʼu koʼalia ba imi hanesan ema neʼebé iha kbiit atu tetu didiʼak. Entaun deside ba imi-nia an rasik se buat neʼebé haʼu dehan mak loos ka lae. 16 Kopu bensaun nian neʼebé Ita hatoʼo ona agradese, neʼe reprezenta* Kristu nia raan,+ loos ka lae? Paun neʼebé ita silu, neʼe reprezenta* Kristu nia isin,+ loos ka lae? 17 Tanba iha paun ida deʼit, entaun maski ita barak, maibé ita isin ida deʼit,+ tanba ita hotu han paun ida deʼit.

18 Hanoin toʼok kona-ba ema Izraél: Kuandu sira han sakrifísiu, sira hola parte iha altár,+ loos ka lae? 19 Entaun, haʼu-nia liafuan neʼe katak sá? Neʼe katak buat neʼebé ema hasaʼe ba estátua mak iha folin ka? Ka estátua sira mak iha folin? 20 Lae. Maibé haʼu dehan katak buat neʼebé nasaun sira hasaʼe nuʼudar sakrifísiu, sira hasaʼe neʼe ba anju aat, laʼós ba Maromak,+ no haʼu lakohi imi atu hola parte ho anju aat sira.+ 21 Imi labele hemu husi Jeová* nia kopu no mós anju aat nia kopu; imi labele han husi “Jeová*+ nia meza” no mós anju aat nia meza. 22 Entaun, ‘Ita koko atu halo Jeová* sente laran-moras ka’?+ Ita la forsa liu fali nia, loos ka lae?

23 Buat hotu bele deʼit, maibé laʼós buat hotu lori diʼak. Maski buat hotu bele deʼit, maibé laʼós buat hotu hametin ema.+ 24 Ema ida-idak tenke kontinua buka uluk ema seluk nia diʼak, laʼós buka diʼak deʼit ba ninia an.+

25 Imi bele han naʼan neʼebé faʼan iha merkadu, no lalika husu atu halo imi-nia konxiénsia sente hakmatek, 26 tanba “mundu no buat hotu neʼebé iha mundu mak Jeová* nian”.+ 27 Se ema neʼebé laʼós fiar-naʼin konvida imi no imi hakarak atu bá, han buat naran deʼit neʼebé sira tau iha imi-nia oin, lalika husu atu halo imi-nia konxiénsia sente hakmatek. 28 Maibé se ema ruma dehan ba imi: “Neʼe mak sakrifísiu neʼebé hasaʼe ona ba estátua”, keta han ida-neʼe tanba ema neʼebé fó-hatene ba imi no mós tanba ema nia konxiénsia.+ 29 Haʼu la koʼalia kona-ba imi-nia konxiénsia, maibé ema seluk nia konxiénsia. Tanba haʼu lakohi atu ema seluk nia konxiénsia tesi-lia mai haʼu kuandu haʼu uza haʼu-nia liberdade.+ 30 Maski haʼu han no fó ona agradese ba Maromak kona-ba neʼe, maibé se ema koʼalia aat kona-ba haʼu kuandu haʼu han ida-neʼe, entaun diʼak ba haʼu atu la han.+

31 Tan neʼe, se imi han, hemu, ka halo buat seluk, halo buat hotu-hotu ba Maromak nia glória.+ 32 Kuidadu bá atu la halo sidi ema Judeu, ema Gregu no mós Maromak nia kongregasaun,+ 33 hanesan haʼu mós hakaʼas an atu halo kontente ema hotu iha buat hotu, no la buka haʼu-nia diʼak+ maibé ema barak nia diʼak, atu nuneʼe sira bele hetan salvasaun.+