ÉXODO

1 Izraél nia oan-mane sira bá rai-Ejitu hamutuk ho Jacob. Sira ida-idak bá hamutuk ho sira-nia umakain rasik.+ Sira-nia naran mak tuirmai neʼe: 2 Ruben, Simeão, Levi no Judá;+ 3 Issacar, Zebulão no Benjamim; 4 Dan no Naftali; Gad no Aser.+ 5 Ema* hotu husi Jacob nia jerasaun hamutuk naʼin-70, maibé José hela ona iha rai-Ejitu.+ 6 Ikusmai José mate,+ no ninia maun-alin hotu no ema hotu husi jerasaun neʼe mós mate. 7 Ema Izraél iha oan barak no aumenta barak tebes, no sira sai forte liután no sai barak lalais loos, toʼo rai neʼe sai nakonu ho sira.+

8 Liutiha tempu balu, liurai foun ida ukun rai-Ejitu, liurai neʼe la koñese José. 9 Liurai neʼe dehan ba ninia povu: “Ema Izraél sira barak liu no forte liu fali ita.+ 10 Mai ita halo buat ruma ba sira atu sira labele sai barak, se lae, sira sei aumenta ba beibeik, no se funu ruma mosu, sira sei apoia ita-nia inimigu hodi halo funu hasoru ita no husik rai neʼe.”

11 Tan neʼe, ema Ejitu hili xefe sira atu bele hanehan ema Izraél sira hodi obriga sira halo serbisu makaʼas+ no harii sidade sira atu rai Faraó* nia sasán oioin, sidade sira-neʼe naran Pitom no Ramsés.+ 12 Maski sira kontinua hanehan ema Izraél, maibé ema Izraél aumenta barak liután no namkari ba fatin oioin, entaun ema Ejitu sente taʼuk tebes tanba ema Izraél.+ 13 Tan neʼe, ema Ejitu obriga ema Izraél halo serbisu makaʼas nuʼudar atan.+ 14 Sira halo susar ba ema Izraél nia moris, hodi haruka sira atu halo simente husi rai-mean no halo bloku,* no mós serbisu makaʼas iha toʼos. Sin, ema Ejitu obriga sira halo serbisu todan iha situasaun neʼebé aat no halo serbisu oioin nuʼudar atan.+

15 Liutiha tempu balu, liurai Ejitu koʼalia ba ema Ebreu nia parteira neʼebé naran Sifrá no Puá, 16 hodi dehan: “Kuandu imi ajuda feto Ebreu sira tuur-ahi,+ imi tenke haree oan neʼebé moris. Se bebé neʼe mak mane, imi tenke oho nia. Maibé se bebé neʼe mak feto, imi bele husik nia moris.” 17 Maibé parteira sira-neʼe hamtaʼuk Maromak loos, no sira la halo tuir buat neʼebé liurai Ejitu dehan ba sira. No sira husik oan-mane sira moris.+ 18 Liutiha tempu balu, liurai Ejitu bolu parteira sira-neʼe no husu: “Tanbasá mak imi husik oan-mane sira moris?” 19 Parteira sira-neʼe dehan ba Faraó, liurai Ejitu: “Feto Ebreu sira la hanesan ho feto Ejitu nian. Sira forte no sira tuur-ahi ona antes parteira sira toʼo.”

20 Nuneʼe Maromak haraik bensaun ba parteira sira-neʼe, no povu neʼe aumenta ba beibeik no sai forte liután. 21 Tanba parteira sira-neʼe hamtaʼuk Maromak loos, ikusmai nia fó bensaun ba sira hodi sira iha oan rasik. 22 Depois neʼe, Faraó fó mandamentu ba ninia povu hotu, hodi dehan: “Ema Ebreu nia oan-mane hotu neʼebé foin moris, imi tenke soe ba Mota Nilo, maibé imi tenke husik sira-nia oan-feto moris.”+

2 Iha tempu neʼebá mane ida husi umakain Levi nian kaben ho feto ida husi suku Levi.+ 2 Feto neʼe sai isin-rua no tuur-ahi oan-mane ida. Feto neʼe haree katak nia oan neʼe bonitu loos, nuneʼe nia subar oan neʼe ba fulan tolu.+ 3 Bainhira nia labele ona subar oan neʼe,+ nia foti raga* husi duʼut-papiru no taka ho alkatraun no tau bebé neʼe iha laran, tuirmai nia tau raga neʼe iha duʼut leet iha Mota Nilo ninin. 4 Maibé bebé neʼe nia biin+ hamriik dook uitoan hodi haree saida mak sei akontese ba bebé neʼe.

5 Bainhira Faraó nia oan-feto tun ba Mota Nilo hodi hariis, ninia atan-feto sira laʼo besik Mota Nilo nia ninin. No nia haree raga neʼebé iha duʼut nia leet. Entaun nia haruka kedas ninia atan-feto ida atu foti raga neʼe.+ 6 Bainhira nia loke raga, nia haree bebé neʼe, no bebé neʼe tanis hela. Entaun, nia hanoin loos bebé neʼe, maibé nia dehan: “Neʼe mak ema Ebreu nia oan-mane.” 7 Tuirmai bebé neʼe nia biin dehan ba Faraó nia oan-feto: “Ita hakarak haʼu bá bolu feto Ebreu ida mai atu fó-susu ba bebé neʼe ka?” 8 Faraó nia oan-feto dehan ba nia: “Bá!” Ho ida-neʼe, labarik-feto neʼe bá kedas no bolu bebé neʼe nia inan.+ 9 Tuirmai Faraó nia oan-feto dehan ba feto neʼe: “Lori bebé neʼe ho ó no fó-susu ba nia, haʼu sei selu ó-nia kolen.” Entaun feto neʼe foti bebé neʼe no fó-susu ba nia. 10 Bainhira bebé neʼe boot ona, feto neʼe lori nia ba Faraó nia oan-feto, no nia sai Faraó nia oan-feto nia oan.+ Faraó nia oan-feto hanaran nia Moisés* no dehan: “Neʼe tanba haʼu foti nia husi bee.”+

11 Iha tempu neʼebá bainhira Moisés boot ona,* nia bá hodi haree ninia maluk Ebreu sira halo serbisu todan,+ no nia haree ema Ejitu ida baku ninia maluk Ebreu ida. 12 Nia hateke bá-mai no tanba nia la haree ema ida, nia oho tiha ema Ejitu neʼe no subar ninia mate-isin iha rai-henek laran.+

13 Maibé loron tuirmai Moisés sai, no nia haree mane Ebreu naʼin-rua baku malu. Entaun nia dehan ba ida neʼebé halo sala: “Tanbasá mak ó baku ó-nia maluk?”+ 14 Ho ida-neʼe, mane neʼe dehan ba nia: “Sé mak hili ó nuʼudar ulun-naʼin no juís ba ami? Ó mós planu atu oho haʼu hanesan ó oho ema Ejitu neʼe ka?”+ Agora Moisés sai taʼuk no dehan: “Karik ema barak hatene ona kona-ba neʼe!”

15 Tuirmai Faraó rona kona-ba neʼe, no nia koko atu oho Moisés, maibé Moisés halai husi Faraó no bá hela iha rai-Midian.+ Bainhira nia toʼo fatin neʼe, nia tuur besik bee-posu ida. 16 Amlulik Midian nian+ iha oan-feto naʼin-hitu, no oan-feto sira-neʼe mai hodi kuru bee no enxe bee ba animál nia hemu-fatin hodi fó-hemu ba sira-nia aman nia bibi-lubun. 17 Maibé hanesan baibain, bibi-atan sira mai no duni sira sai. Ho ida-neʼe, Moisés hamriik no ajuda* feto sira-neʼe no fó-hemu ba sira-nia bibi-lubun. 18 Bainhira sira fila ba uma, sira-nia aman Ruel*+ hakfodak, hodi dehan: “Oinsá mak imi fila uma sedu hanesan neʼe ohin?” 19 Sira hatán: “Mane Ejitu ida+ salva ami husi bibi-atan sira. Nia mós kuru bee ba ami no fó-hemu ba bibi-lubun.” 20 Entaun nia dehan ba ninia oan-feto sira: “Maibé nia iha neʼebé? Tanbasá mak imi husik hela nia? Bolu nia mai atu nuneʼe nia bele han ho ita.” 21 Depois neʼe, Moisés konkorda atu hela ho Ruel, no Ruel fó ninia oan-feto Zípora+ atu kaben ho Moisés. 22 Liutiha tempu balu, feto neʼe tuur-ahi oan-mane ida, no Moisés hanaran nia Gerson,*+ tanba nia dehan: “Haʼu sai ona nuʼudar ema estranjeiru iha rai seluk.”+

23 Liutiha tempu kleur, liurai Ejitu mate,+ maibé ema Izraél halerik nafatin tanba sira-nia serbisu todan nuʼudar atan no sira tanis ho triste tanba sira-nia susar. Sira kontinua husu ajuda husi Maromak loos.+ 24 Ikusmai Maromak rona sira-nia halerik,+ no Maromak hanoin-hetan ninia aliansa ho Abraão, Isaac no Jacob.+ 25 Tan neʼe, Maromak tau atensaun ba ema Izraél; no haree sira-nia terus.

3 Moisés sai bibi-atan hodi tau matan ba ninia banin-mane Jetro nia bibi.+ Jetro mak amlulik Midian nian. Loron ida Moisés lori daudaun bibi ba parte oeste iha rai-fuik, ikusmai nia toʼo iha Maromak loos nia foho naran Horeb.+ 2 Tuirmai Jeová nia anju mosu ba Moisés iha ahi-lakan neʼebé iha ai-hun tarak ida nia leet.+ Nuʼudar nia kontinua hateke, nia haree katak maski ahi-lakan iha ai-hun neʼe, maibé ahi la han ai-hun neʼe. 3 Entaun Moisés dehan: “Neʼe la hanesan baibain! Haʼu sei bá neʼebá atu buka-hatene no haree tanbasá mak ahi la han ai-hun neʼe.” 4 Bainhira Jeová haree katak Moisés bá atu buka-hatene, Maromak bolu nia husi ai-hun tarak nia leet, hodi dehan: “Moisés! Moisés!” Nia hatán: “Haʼu mak neʼe.” 5 Tuirmai Maromak dehan: “Keta hakbesik liután. Hasai tiha ó-nia sandálias husi ó-nia ain, tanba rai neʼebé ó hamriik daudaun mak fatin santu.”

6 Maromak hatutan tan: “Haʼu mak ó-nia aman nia Maromak, Abraão nia Maromak,+ Isaac nia Maromak+ no Jacob nia Maromak.”+ Rona tiha neʼe, Moisés taka ninia oin tanba nia taʼuk atu haree ba Maromak loos. 7 Jeová hatutan tan: “Haʼu haree duni haʼu-nia povu nia terus iha rai-Ejitu, no haʼu rona ona sira-nia halerik tanba ema obriga sira halo serbisu. Haʼu hatene didiʼak kona-ba terus neʼebé sira hasoru.+ 8 Haʼu sei tun bá neʼebá hodi salva sira husi ema Ejitu nia liman+ no lori sira sai husi rai neʼebá hodi bá rai neʼebé diʼak no luan, rai neʼebé iha susubeen no bani-been barak,+ ema Kanaan nia rai, ema Hetes nia rai, ema Amoreu nia rai, ema Perizeu nia rai, ema Heveu nia rai no ema Jebus nia rai.+ 9 Agora, haʼu rona ona povu Izraél nia halerik no haʼu mós haree ona oinsá ema Ejitu halo aat hodi hanehan sira.+ 10 Entaun agora haʼu sei haruka ó bá hasoru Faraó, no ó sei lori haʼu-nia povu Izraél sai husi rai-Ejitu.”+

11 Maibé Moisés dehan ba Maromak loos: “Haʼu neʼe sé? Haʼu labele bá hasoru Faraó no lori ema Izraél sai husi rai-Ejitu.” 12 Ho ida-neʼe, Maromak dehan: “Haʼu sei hamutuk ho ó.+ Ó sei lori povu neʼe sai husi rai-Ejitu, no imi sei adora haʼu, Maromak loos, iha foho neʼe.+ Neʼe mak haʼu-nia promesa no ho ida-neʼe mak ó sei hatene katak haʼu mak haruka ó.”

13 Maibé Moisés dehan ba Maromak loos: “Se karik haʼu bá hasoru ema Izraél no dehan ba sira: ‘Imi-nia beiʼala nia Maromak mak haruka haʼu ba imi’, no se sira husu ba haʼu: ‘Ninia naran mak saida?’+ entaun saida mak haʼu tenke hatán ba sira?” 14 Maromak dehan ba Moisés: “Haʼu Sei Sai Buat Neʼebé Haʼu Hakarak.”*+ Nia hatutan tan: “Neʼe mak buat neʼebé ó tenke hatoʼo ba ema Izraél: ‘Haʼu Sei Sai mak haruka haʼu ba imi.’”+ 15 Tuirmai Maromak dehan ba Moisés dala ida tan:

“Ó tenke hatete ba ema Izraél: ‘Jeová, imi-nia beiʼala nia Maromak, Abraão nia Maromak,+ Isaac nia Maromak+ no Jacob nia Maromak+ mak haruka haʼu ba imi.’ Neʼe mak haʼu-nia naran ba nafatin.+ Liuhusi naran neʼe mak ema sei hanoin-hetan haʼu husi jerasaun ba jerasaun. 16 Agora bá halibur Izraél nia katuas sira no dehan ba sira: ‘Jeová, imi-nia beiʼala nia Maromak, mosu ona ba haʼu, nia mak Abraão nia Maromak, Isaac nia Maromak no Jacob nia Maromak. Nia dehan: “Haʼu haree duni imi+ no haree buat neʼebé ema halo ba imi iha rai-Ejitu. 17 Tan neʼe, haʼu promete ba imi, haʼu sei lori imi sai husi susar+ neʼebé ema Ejitu halo ba imi. Haʼu sei lori imi bá ema Kanaan nia rai, ema Hetes nia rai, ema Amoreu nia rai,+ ema Perizeu nia rai, ema Heveu nia rai no ema Jebus nia rai,+ rai neʼebé iha susubeen no bani-been barak.”’+

18 “Katuas sira sei rona duni ba ó-nia liafuan.+ Tuirmai ó no Izraél nia katuas sira sei bá hasoru liurai Ejitu, no imi tenke dehan ba nia: ‘Jeová, ema Ebreu nia Maromak,+ koʼalia ona ba ami. Entaun, favór ida, husik ami halo viajen loron tolu hodi bá rai-fuik atu nuneʼe ami bele hasaʼe sakrifísiu ba Jeová, ami-nia Maromak.’+ 19 Maibé haʼu rasik hatene ho didiʼak katak liurai Ejitu sei la fó lisensa ba imi atu bá, só deʼit ho liman neʼebé forte mak bele obriga nia.+ 20 Tan neʼe, haʼu sei foti haʼu-nia liman hodi ataka rai-Ejitu ho milagre barak. Depois neʼe, nia sei haruka imi sai husi neʼebá.+ 21 Haʼu sei halo ema Ejitu hatudu laran-diʼak ba imi, atu nuneʼe bainhira imi sai, imi la sai ho liman-mamuk.+ 22 Feto ida-idak tenke husu ba ninia viziñu no ba feto neʼebé hela iha ninia uma atu fó sasán neʼebé halo husi osan-mutin no osan-mean no mós roupa oioin, no imi sei tau sasán sira-neʼe ba imi-nia oan-mane ho imi-nia oan-feto sira. Imi sei foti ema Ejitu nia rikusoin hotu.”+

4 Moisés hatán: “Maibé oinsá se sira la fiar haʼu no la rona ba haʼu-nia liafuan,+ tanba sira sei dehan: ‘Jeová la mosu ba ó.’” 2 Tuirmai Jeová husu nia: “Saida mak ó kaer hela iha ó-nia liman?” Nia hatán: “Ai-tonka ida.” 3 Maromak dehan: “Soe ida-neʼe ba rai.” Entaun nia soe ba rai, no ai-tonka neʼe sai samea ida.+ Haree tiha ida-neʼe, Moisés halai kedas. 4 Jeová dehan ba Moisés: “Lolo ó-nia liman no kaer nia ikun.” Entaun Moisés lolo liman hodi kaer samea nia ikun, no samea neʼe sai fali ai-tonka ida iha ninia liman. 5 Tuirmai Maromak dehan: “Ó tenke halo ida-neʼe hodi sira bele fiar katak Jeová, sira-nia beiʼala nia Maromak, Abraão nia Maromak, Isaac nia Maromak no Jacob nia Maromak,+ mosu ona ba ó.”+

6 Jeová koʼalia ba Moisés dala ida tan, hodi dehan: “Favór ida, hatama liman ba ó-nia roupa.” Entaun nia hatama ninia liman ba ninia roupa. Bainhira nia dada sai ninia liman, nia haree ninia liman kona moras-lepra neʼebé mutin hanesan jelu-rahun!+ 7 Tuirmai Maromak dehan: “Hatama fali liman ba ó-nia roupa.” Entaun nia hatama fali ninia liman ba ninia roupa. Bainhira nia dada sai fali ninia liman, nia haree ninia liman sai diʼak ona! 8 Maromak dehan ba nia: “Se sira la fiar ó ka la simu sinál primeiru, entaun sira sei fiar duni ó ho sinál segundu neʼe.+ 9 Maibé se sira la fiar sinál rua neʼe no lakohi rona ba ó-nia liafuan, ó tenke foti bee uitoan husi Mota Nilo no fakar neʼe ba rai maran, no bee neʼebé ó foti husi Mota Nilo sei sai raan iha rai maran neʼe.”+

10 Moisés dehan ba Jeová: “Deskulpa, Jeová, maibé haʼu laʼós ema neʼebé koʼalia moos, husi tempu uluk kedas no mós husi tempu neʼebé Ita-Boot koʼalia ba Ita-nia atan, tanba haʼu ibun-toos* no nanál-toos.”+ 11 Jeová dehan ba nia: “Sé mak kria ibun ba ema? Sé mak halo ema monok, tilun-diuk, haree moos ka matan-delek? Haʼu, Jeová, mak halo nuneʼe, loos ka lae? 12 Entaun bá, haʼu sei hamutuk ho ó bainhira ó koʼalia,* no haʼu sei hanorin ó buat neʼebé ó tenke koʼalia.”+ 13 Maibé nia dehan: “Deskulpa Jeová, favór ida, haruka fali ema seluk neʼebé Ita-Boot hakarak.” 14 Ho ida-neʼe, Jeová sai hirus tebes ba Moisés, no dehan: “Ó iha maun ida naran Arão,+ ema Levi. Haʼu hatene katak nia bele koʼalia ho moos. Agora nia mai daudaun atu hasoru ó. Bainhira nia haree ó, ninia laran sei haksolok.+ 15 Entaun ó tenke koʼalia ba nia no fó-hatene haʼu-nia liafuan ba nia.+ Haʼu sei hamutuk ho imi naʼin-rua bainhira imi koʼalia,+ no haʼu sei hanorin imi buat neʼebé imi tenke halo. 16 Nia sei reprezenta ó hodi koʼalia ba povu no nia sei hatoʼo ó-nia liafuan, no ó sei sai hanesan Maromak ba nia.*+ 17 Ó tenke lori ai-tonka neʼe iha ó-nia liman no uza atu halo milagre oioin.”+

18 Entaun Moisés fila ba ninia banin-mane Jetro+ no dehan: “Favór ida, husik haʼu fila fali ba haʼu-nia maluk sira neʼebé iha rai-Ejitu hodi haree se sira sei moris hela ka lae.” Jetro dehan ba Moisés: “Laʼo bá ho dame.” 19 Depois neʼe, Jeová dehan ba Moisés iha rai-Midian: “Bá, fila fali ba rai-Ejitu, tanba ema hotu neʼebé buka atu oho ó* mate tiha ona.”+

20 Tuirmai Moisés tula ninia feen no oan-mane sira iha kuda-burru leten, no lori sira fila fali ba rai-Ejitu. Moisés mós lori Maromak loos nia ai-tonka iha ninia liman. 21 Tuirmai Jeová dehan ba Moisés: “Bainhira ó fila ona ba rai-Ejitu, ó tenke halo milagre hotu neʼebé haʼu fó kbiit ba ó atu halo iha Faraó nia oin.+ Maibé haʼu sei husik nia sai ulun-toos,*+ no nia sei la haruka povu neʼe sai.+ 22 Ó tenke dehan ba Faraó: ‘Jeová dehan nuneʼe: “Izraél mak haʼu-nia oan-mane, haʼu-nia oan primeiru.+ 23 Haʼu dehan ba ó: Haruka haʼu-nia oan-mane sai hodi nia bele serbí haʼu. Maibé se ó lakohi haruka nia sai, haʼu sei oho ó-nia oan-mane primeiru.”’”+

24 Bainhira sira halo viajen no toʼo ona iha fatin deskansa nian ida, Jeová*+ hasoru nia no buka atu oho nia.+ 25 Ikusmai Zípora+ foti fatuk kroʼat* hodi halo sirkunsizaun* ba ninia oan-mane no soe kulit rohan neʼe iha ninia ain* no dehan: “Haʼu halo nuneʼe tanba Ita mak haʼu-nia noivu raan nian.” 26 Entaun Maromak husik nia bá. Iha tempu neʼebá, tanba sirkunsizaun neʼe mak Zípora dehan: “Noivu raan nian.”

27 Tuirmai Jeová dehan ba Arão: “Laʼo bá rai-fuik hodi hasoru Moisés.”+ Entaun nia bá hodi hasoru Moisés iha Maromak loos nia foho+ no nia kumprimenta Moisés ho reʼi. 28 Depois neʼe, Moisés fó sai ba Arão liafuan hotu husi Jeová+ no konta mós kona-ba sinál hotu neʼebé Maromak haruka nia atu halo.+ 29 Depois neʼe, Moisés no Arão bá halibur Izraél nia katuas hotu.+ 30 Arão fó-hatene ba sira liafuan hotu neʼebé Jeová fó sai ona ba Moisés, no Moisés halo milagre sira-neʼe+ iha povu nia oin. 31 Ho ida-neʼe, povu fiar Moisés.+ Bainhira sira rona katak Jeová tau atensaun ona ba ema Izraél+ no haree ona sira-nia terus,+ sira hakneʼak no hakruʼuk ho oin ba rai.

5 Tuirmai, Moisés no Arão bá hasoru Faraó no hatete: “Jeová, Izraél nia Maromak, dehan nuneʼe: ‘Haruka haʼu-nia povu sai, atu nuneʼe sira bele selebra festa ba haʼu iha rai-fuik.’” 2 Maibé Faraó hatán: “Sé mak Jeová?+ Tanbasá mak haʼu tenke halo tuir ninia liafuan hodi haruka ema Izraél sai?+ Haʼu la hatene Jeová. Liután neʼe, haʼu sei la haruka ema Izraél sai.”+ 3 Maibé sira dehan: “Ema Ebreu nia Maromak koʼalia ona ba ami. Favór ida, husik ami halo viajen loron tolu ba rai-fuik atu hasaʼe sakrifísiu ba Jeová, ami-nia Maromak.+ Se lae, nia sei kastigu ami ho moras ka ho surik.” 4 Liurai Ejitu dehan: “Moisés no Arão, tanbasá mak imi halo povu husik sira-nia serbisu? Fila fali, bá halo imi-nia serbisu!”+ 5 Faraó hatutan tan: “Imi-nia ema sai barak tebes iha rai neʼe, no imi hakarak halo sira deskansa husi sira-nia serbisu ka?”

6 Iha loron neʼe duni mak Faraó fó mandamentu ba xefe sira no sira-nia asistente sira, dehan: 7 “Imi labele tan fó duʼut-maran ba povu neʼe atu halo bloku.*+ Husik sira mak bá buka rasik duʼut-maran. 8 Maibé imi tenke obriga sira atu halo bloku barak hanesan sira halo uluk. Keta hamenus bloku neʼebé sira tenke halo, tanba sira baruk-teen. Tan neʼe mak sira muramura, hodi dehan: ‘Ami hakarak bá, ami hakarak hasaʼe sakrifísiu ba ami-nia Maromak!’ 9 Fó serbisu barak tan ba sira atu halo, atu nuneʼe sira halo serbisu duké rona ba lia-bosok.”

10 Entaun xefe sira+ no sira-nia asistente bá no hatete ba povu: “Faraó dehan nuneʼe: ‘Haʼu sei la fó tan duʼut-maran ba imi. 11 Imi rasik tenke bá foti duʼut-maran iha fatin naran deʼit neʼebé imi bele hetan ida-neʼe, maibé imi-nia serbisu sei la hamenus.’” 12 Tuirmai povu laʼo ba fatin hotu iha rai-Ejitu hodi halibur duʼut-kain matak iha rai-luan atu habai maran. 13 Xefe sira kontinua obriga sira, hodi dehan: “Imi tenke halo hotu imi-nia serbisu ba loron ida-idak, hanesan uluk bainhira ami sei fó duʼut-maran ba imi.” 14 No mós Faraó nia xefe sira hili ona asistente husi ema Izraél atu tau matan ba serbisu neʼe, no xefe sira baku asistente sira-neʼe.+ Xefe sira husu ba sira: “Tanbasá mak imi la halo bloku barak hanesan uluk? Ida-neʼe akontese horiseik no ohin.”

15 Entaun asistente sira neʼebé hili husi ema Izraél kesar ba Faraó, hodi dehan: “Tanbasá mak Ita-Boot halo hanesan neʼe ba Ita-nia atan sira? 16 Ita-nia atan sira la simu tan duʼut-maran, maibé xefe sira dehan ba ami: ‘Halo bloku bá!’ Sira baku ami, maibé loloos Ita-nia povu rasik mak sala.” 17 Maibé nia dehan: “Imi baruk-teen, imi baruk tebes!+ Tan neʼe mak imi dehan: ‘Ami hakarak bá, ami hakarak bá atu hasaʼe sakrifísiu ba Jeová.’+ 18 Entaun fila ona, fila fali ba serbisu! Haʼu sei la fó duʼut-maran ba imi, maibé imi tenke halo bloku barak hanesan uluk.”

19 Tuirmai asistente sira neʼebé hili husi ema Izraél haree katak sira hasoru problema boot tanba orden neʼebé dehan: “Imi labele hamenus bloku loroloron nian neʼebé imi tenke halo.” 20 Depois neʼe, sira sai husi Faraó nia oin no hasoru Moisés ho Arão neʼebé hamriik iha neʼebá. 21 Ho ida-neʼe, sira dehan kedas ba Moisés no Arão: “Jeová sei haree no tesi-lia ba imi, tanba imi halo Faraó no ninia atan sira odi ami* no imi tau surik iha sira-nia liman atu oho ami.”+ 22 Tuirmai Moisés husu ba Jeová, hodi dehan: “Jeová, tanbasá mak Ita-Boot fó-terus ba povu neʼe? Tanbasá mak Ita haruka haʼu mai? 23 Husi tempu neʼebé haʼu koʼalia ho Faraó hodi Ita-nia naran,+ nia halo aat liután ba povu neʼe,+ no Ita seidauk salva Ita-nia povu.”+

6 Entaun Jeová dehan ba Moisés: “Agora ó sei haree saida mak haʼu sei halo ba Faraó.+ Ho haʼu-nia liman neʼebé forte haʼu sei halo nia haruka haʼu-nia povu sai husi ninia rai, no laʼós deʼit haruka sira sai, maibé nia sei duni sai sira husi rai neʼe.”+

2 Tuirmai Maromak dehan ba Moisés: “Haʼu mak Jeová. 3 Uluk haʼu mosu beibeik ba Abraão, Isaac no Jacob nuʼudar Maromak neʼebé Kbiit Boot Liu Hotu,+ maibé haʼu la hatudu sai buat hotu kona-ba haʼu-nia naran Jeová ba sira.+ 4 Haʼu mós halo ona haʼu-nia aliansa ho sira atu fó rai-Kanaan ba sira, rai neʼebé uluk sira hela nuʼudar ema estranjeiru.+ 5 Agora haʼu rasik rona ona povu Izraél nia halerik, povu neʼebé sai atan ba ema Ejitu, no haʼu hanoin-hetan haʼu-nia aliansa.+

6 “Tan neʼe, dehan ba ema Izraél: ‘Haʼu mak Jeová, no haʼu sei lori imi sai husi susar neʼebé imi hetan husi ema Ejitu no salva imi hodi imi labele sai atan tan ba sira.+ Haʼu sei salva imi ho liman neʼebé forte no fó kastigu neʼebé boot ba ema Ejitu.+ 7 No haʼu sei foti imi nuʼudar haʼu-nia povu, no haʼu sei sai imi-nia Maromak,+ no imi sei hatene duni katak haʼu mak Jeová, imi-nia Maromak, neʼebé sei lori imi sai husi Ejitu no hasai susar neʼebé sira fó ba imi. 8 No haʼu sei lori imi tama ba rai neʼebé haʼu jura ona* atu fó ba Abraão, Isaac no Jacob. Haʼu sei fó rai neʼe ba imi nuʼudar liman-rohan.+ Haʼu mak Jeová.’”+

9 Depois neʼe, Moisés fó sai liafuan sira-neʼe ba ema Izraél, maibé sira lakohi rona ba nia tanba sira laran-triste ona no tanba sira-nia situasaun neʼebé aat loos nuʼudar atan.+

10 Tuirmai Jeová dehan ba Moisés: 11 “Bá hasoru Faraó, liurai Ejitu, no hatete ba nia katak nia tenke haruka ema Izraél sai husi ninia rai.” 12 Maibé Moisés hatán ba Jeová: “Ema Izraél deʼit la rona haʼu,+ sá tan ho Faraó? Nia sei la rona mai haʼu tanba haʼu koʼalia la moos.”*+ 13 Maibé dala ida tan Jeová dehan ba Moisés no Arão kona-ba mandamentu neʼebé sira tenke fó sai ba ema Izraél no ba Faraó, liurai Ejitu, atu nuneʼe bele lori ema Izraél sai husi rai-Ejitu.

14 Tuirmai neʼe mak ulun-naʼin sira ba ema Izraél nia umakain: Izraél nia oan-mane primeiru Ruben+ nia oan-mane sira mak Hanok, Palu, Hezron no Karmi.+ Sira mak Ruben nia família.

15 Simeão nia oan-mane sira mak Jemuel, Jamin, Oad, Jakin, Zoar no Saul, feto Kanaan nia oan-mane.+ Sira mak Simeão nia família.

16 Tuirmai neʼe mak Levi+ nia oan-mane sira-nia naran tuir sira-nia liña família nian: Gerson, Kohat no Merari.+ Levi moris toʼo tinan 137.

17 Gerson nia oan-mane sira mak Libni no Simei tuir sira-nia liña família nian.+

18 Kohat nia oan-mane sira mak Amram, Izar, Hebron no Uziel.+ Kohat moris toʼo tinan 133.

19 Merari nia oan-mane sira mak Mali no Musi.

Neʼe mak Levi nia família tuir sira-nia liña família nian.+

20 Amram hola Jokebed, ninia aman nia feton, nuʼudar feen.+ Jokebed tuur-ahi Arão no Moisés.+ Amram moris toʼo tinan 137.

21 Izar nia oan-mane sira mak Kora,+ Nefeg no Zikri.

22 Uziel nia oan-mane sira mak Misael, Elzafan+ no Sitri.

23 Arão hola Eliseba nuʼudar feen. Eliseba mak Aminadab nia oan-feto, Nasson+ nia feton. Eliseba tuur-ahi Nadab, Abiú, Eleazar no Itamar.+

24 Kora nia oan-mane sira mak Asir, Elkana, no Abiasaf.+ Sira mak Kora nia família.+

25 Arão nia oan-mane Eleazar+ hola Putiel nia oan-feto nuʼudar feen. Feto neʼe tuur-ahi Fineias.+

Sira mak ulun-naʼin ba umakain sira husi ema Levi tuir sira-nia liña família nian.+

26 Sira mak beiʼala husi Arão no Moisés neʼebé Jeová haruka, hodi dehan: “Lori povu Izraél sai husi rai-Ejitu, tuir sira-nia grupu sira.”*+ 27 Sira mak koʼalia ho Faraó, liurai Ejitu, atu lori povu Izraél sai husi rai-Ejitu. Sira mak Moisés no Arão.+

28 Iha loron neʼebá bainhira Jeová koʼalia ho Moisés iha rai-Ejitu, 29 Jeová hatete ba Moisés: “Haʼu mak Jeová. Ó tenke koʼalia ba Faraó, liurai Ejitu, kona-ba buat hotu neʼebé haʼu fó sai ba ó.” 30 Tuirmai Moisés dehan ba Jeová: “Haʼu koʼalia la moos,* entaun oinsá mak Faraó sei rona mai haʼu?”+

7 Tuirmai Jeová dehan ba Moisés: “Haʼu halo ona ó hanesan Maromak* ba Faraó, no ó-nia maun Arão sei sai nuʼudar ó-nia profeta.+ 2 Ó tenke fó sai fali buat hotu neʼebé haʼu sei dehan ba ó, no ó-nia maun Arão sei koʼalia ba Faraó, no Faraó sei haruka ema Izraél sai husi ninia rai. 3 Kona-ba haʼu, haʼu sei husik Faraó sai ulun-toos,*+ no haʼu sei aumenta haʼu-nia sinál no haʼu-nia milagre sira iha rai-Ejitu.+ 4 Maibé Faraó sei la rona ba imi, no haʼu sei foti haʼu-nia liman kontra rai-Ejitu no lori haʼu-nia ema-lubun,* katak haʼu-nia povu Izraél, sai husi rai-Ejitu hodi fó kastigu neʼebé boot ba ema Ejitu.+ 5 No ema Ejitu sei hatene duni katak haʼu mak Jeová+ bainhira haʼu lolo liman kontra sira no lori ema Izraél sai husi sira-nia leet.” 6 Moisés no Arão halo tuir buat hotu neʼebé Jeová haruka sira atu halo. Sira halo nuneʼe duni. 7 Moisés tinan 80 no Arão tinan 83 bainhira sira koʼalia ba Faraó.+

8 Tuirmai Jeová dehan ba Moisés no Arão: 9 “Se Faraó dehan ba imi: ‘Halo milagre ida’, ó tenke hatete ba Arão: ‘Foti ó-nia ai-tonka no soe ba rai iha Faraó nia oin.’ Ai-tonka neʼe sei sai samea boot ida.”+ 10 Entaun Moisés no Arão bá hasoru Faraó no sira halo tuir duni Jeová nia mandamentu ba sira. Arão soe ninia ai-tonka ba rai iha Faraó no ninia atan sira-nia oin, no ai-tonka neʼe sai samea boot ida. 11 Maibé Faraó bolu ninia matenek-naʼin no matan-dook sira, no ema Ejitu nia amlulik sira neʼebé halo masonik+ mós halo buat neʼebé hanesan hodi uza sira-nia kbiit masonik nian.+ 12 Sira ida-idak soe sira-nia ai-tonka, no ai-tonka sira-neʼe sai samea boot. Maibé Arão nia ai-tonka tolan sira-nia ai-tonka hotu. 13 Maski nuneʼe, Faraó ulun-toos nafatin,+ no nia la rona ba sira, hanesan Jeová hatete nanis ona.

14 Tuirmai Jeová dehan ba Moisés: “Faraó ulun-toos nafatin,+ tan neʼe nia lakohi husik povu neʼe sai. 15 Bá hasoru Faraó aban dadeer. Bainhira nia toʼo iha Mota Nilo, ó tenke hamriik hodi hasoru nia iha mota ninin, no ó tenke kaer ai-tonka neʼebé uluk sai samea.+ 16 Ó tenke dehan ba nia: ‘Jeová, ema Ebreu nia Maromak, mak haruka haʼu ba Ita-Boot,+ no nia dehan: “Haruka haʼu-nia povu sai hodi nuneʼe sira bele serbí haʼu iha rai-fuik”, maibé toʼo agora Ita la halo tuir. 17 Jeová dehan nuneʼe: “Ho ida-neʼe mak ó sei hatene katak haʼu mak Jeová.+ Agora haʼu sei baku bee iha Mota Nilo ho ai-tonka neʼebé iha haʼu-nia liman, no bee neʼe sei sai raan. 18 Ikan sira iha Mota Nilo sei mate, no Mota Nilo sei sai dois, no ema Ejitu lakohi duni atu hemu bee husi Mota Nilo.”’”

19 Tuirmai Jeová dehan ba Moisés: “Hatete ba Arão: ‘Foti ó-nia ai-tonka no lolo ó-nia liman ba bee hotu iha rai-Ejitu,+ ba ninia mota boot sira, ba ninia mota kiʼik sira,* ba ninia kolan+ no ba ninia fatin rai bee nian, atu nuneʼe sira hotu sai raan.’ No sei mosu raan iha rai-Ejitu tomak, maski bee neʼe rai hela iha fatin neʼebé halo husi ai ka fatuk.” 20 Entaun Moisés no Arão halo tuir kedas Jeová nia mandamentu. Arão foti ninia ai-tonka no baku bee iha Mota Nilo iha Faraó no ninia atan sira-nia oin, no bee hotu neʼebé iha mota neʼe sai raan.+ 21 No ikan sira iha Mota Nilo mate,+ no mota neʼe sai dois, no ema Ejitu labele ona atu hemu bee husi mota neʼe,+ no bee hotu iha rai-Ejitu tomak sai raan.

22 Maski nuneʼe, ema Ejitu nia amlulik sira neʼebé halo masonik mós halo buat neʼebé hanesan hodi uza sira-nia segredu masonik nian,+ tan neʼe Faraó ulun-toos nafatin, no nia la rona ba sira, hanesan Jeová hatete nanis ona.+ 23 Tuirmai Faraó fila fali ba ninia uma, no buat neʼebé nia foin haree la book ninia laran. 24 Entaun ema Ejitu hotu keʼe rai besik Mota Nilo hodi buka bee atu hemu, tanba sira labele hemu bee husi Mota Nilo. 25 No Jeová halo bee iha Mota Nilo sai raan ba loron hitu.

8 Tuirmai Jeová hatete ba Moisés: “Bá hasoru Faraó no dehan ba nia: ‘Jeová dehan nuneʼe: “Haruka haʼu-nia povu sai hodi sira bele serbí haʼu.+ 2 Se ó lakohi nafatin haruka sira sai, haʼu sei fó susar ba ó-nia rai tomak ho manduku.+ 3 No Mota Nilo sei nakonu ho manduku, no sira sei sai husi mota hodi tama ba ó-nia uma, ó-nia kuartu, ó-nia kama, ó-nia atan no ó-nia povu nia uma, ó-nia fornu no ó-nia fatin* deʼut trigu.+ 4 Manduku sira-neʼe sei hobur ó, no ó-nia atan sira no ó-nia povu hotu.”’”

5 Tuirmai Jeová dehan ba Moisés: “Hatete ba Arão: ‘Lolo ai-tonka iha ó-nia liman ba mota sira, Mota Nilo nia mota kiʼik sira, no ba kolan sira, no halo manduku sai ba rai-Ejitu tomak.’” 6 Entaun Arão lolo liman ba bee hotu iha Ejitu, no manduku sira komesa sai no halo nakonu rai-Ejitu. 7 Maibé amlulik sira neʼebé halo masonik mós halo buat neʼebé hanesan hodi uza sira-nia segredu masonik nian, no sira mós halo manduku sai hodi halo nakonu rai-Ejitu.+ 8 Tuirmai Faraó bolu Moisés ho Arão no dehan: “Harohan ba Jeová atu hasai manduku sira-neʼe husi haʼu no haʼu-nia povu,+ tanba haʼu hakarak atu haruka povu neʼe sai hodi sira bele hasaʼe sakrifísiu ba Jeová.” 9 Moisés dehan ba Faraó: “Ita-Boot rasik mak bele deside bainhira mak haʼu tenke harohan ba Maromak atu hasai tiha manduku sira-neʼe husi Ita, Ita-nia atan, Ita-nia povu no Ita-nia uma. Só Mota Nilo deʼit mak sei iha manduku sira.” 10 Ho ida-neʼe, Faraó dehan: “Aban.” Entaun Moisés hatete: “Ida-neʼe sei akontese duni tuir Ita-nia liafuan hodi Ita bele hatene katak la iha Maromak ida neʼebé hanesan Jeová, ami-nia Maromak.+ 11 Manduku sira sei lakon husi Ita, Ita-nia uma, no husi Ita-nia atan sira no Ita-nia povu. Só Mota Nilo deʼit mak sei iha manduku sira.”+

12 Entaun Moisés ho Arão sai husi Faraó nia oin, no Moisés harohan ba Maromak Jeová kona-ba manduku neʼebé Maromak hamosu ba Faraó.+ 13 Tuirmai Jeová halo duni buat neʼebé Moisés husu, no manduku komesa mate iha uma sira, pátiu* sira no toʼos sira. 14 Sira bou manduku sira-neʼe hamutuk toʼo sai butuk barak, no rai neʼe hahú sai dois. 15 Bainhira Faraó haree katak manduku sira la iha ona, nia sai ulun-toos*+ no lakohi rona ba sira, hanesan Jeová hatete nanis ona.

16 Jeová dehan ba Moisés: “Hatete ba Arão: ‘Lolo ó-nia ai-tonka no baku rai-rahun, no rai-rahun sei sai susuk* iha rai-Ejitu tomak.’” 17 No sira halo nuneʼe duni. Arão lolo ai-tonka iha ninia liman no baku rai-rahun, no rai-rahun hotu iha rai-Ejitu tomak sai susuk neʼebé haterus ema no animál sira.+ 18 Amlulik sira neʼebé halo masonik mós koko atu halo buat neʼebé hanesan hodi uza sira-nia segredu masonik nian atu hamosu susuk,+ maibé sira labele. Entaun susuk sira haterus ema no animál sira. 19 Ho ida-neʼe, amlulik sira neʼebé halo masonik dehan ba Faraó: “Neʼe mosu tanba Maromak nia kbiit!”*+ Maibé Faraó kontinua ulun-toos, no nia lakohi rona ba sira, hanesan Jeová hatete nanis ona.

20 Tuirmai Jeová dehan ba Moisés: “Hadeer sedu iha dadeer. Bainhira Faraó laʼo daudaun ba Mota Nilo, ó tenke hasoru nia no dehan: ‘Jeová dehan nuneʼe: “Haruka haʼu-nia povu sai atu sira bele serbí haʼu. 21 Maibé se ó la haruka haʼu-nia povu sai, haʼu sei haruka lalar boot* ba ó, ó-nia atan sira no ó-nia povu, no sira sei tama ba ó-nia uma laran. Ema Ejitu nia uma hotu sei nakonu ho lalar boot, no lalar boot sira-neʼe mós sei taka rai neʼebé ema Ejitu hela bá. 22 Iha loron neʼebá haʼu sei haketak duni rai-Gosen, rai neʼebé haʼu-nia povu hela bá. Lalar boot sei la mosu iha rai-Gosen,+ ho ida-neʼe mak ó sei hatene katak haʼu mak Jeová, haʼu iha kbiit iha rai neʼe.+ 23 No haʼu sei haketak duni haʼu-nia povu husi ó-nia povu. Aban sinál neʼe sei mosu.”’”

24 Jeová halo nuneʼe duni, no lalar boot barak tebes hahú tama Faraó nia uma no ninia atan sira-nia uma no rai-Ejitu tomak.+ Lalar boot sira-neʼe estraga rai neʼe.+ 25 Ikusmai Faraó bolu Moisés ho Arão no dehan: “Bá, hasaʼe sakrifísiu ba imi-nia Maromak iha rai neʼe.” 26 Maibé Moisés dehan: “Ami labele halo ida-neʼe, tanba buat neʼebé ami hasaʼe ba Jeová nuʼudar sakrifísiu mak buat neʼebé ema Ejitu hakribi.+ Entaun se ami hasaʼe sakrifísiu neʼebé ema Ejitu hakribi iha sira-nia oin, sira sei tuda mate ami, loos ka lae? 27 Ami sei halo viajen ba loron tolu hodi bá rai-fuik, no iha neʼebá mak ami sei hasaʼe sakrifísiu ba Jeová, ami-nia Maromak, hodi tuir buat neʼebé nia hatete ba ami.”+

28 Faraó dehan: “Haʼu sei haruka imi bá atu hasaʼe sakrifísiu ba Jeová, imi-nia Maromak, iha rai-fuik. Maibé imi keta laʼo dook liu. Imi tenke harohan kona-ba haʼu.”+ 29 Tuirmai Moisés dehan: “Agora haʼu sei sai husi Ita-nia oin, no haʼu sei harohan ba Jeová, no aban lalar boot sira-neʼe sei lakon husi Faraó nia uma, husi ninia atan no ninia povu sira-nia uma. Maibé Ita-Boot labele bosok tan* ami hodi la haruka povu neʼe sai atu hasaʼe sakrifísiu ba Jeová.”+ 30 Tuirmai Moisés sai husi Faraó nia oin no harohan ba Jeová.+ 31 Entaun Jeová halo tuir Moisés nia liafuan, no lalar boot sira-neʼe lakon husi Faraó nia uma, no husi ninia atan no ninia povu sira-nia uma. La iha lalar ida mak hela. 32 Maibé dala ida tan, Faraó sai ulun-toos nafatin no nia la haruka povu neʼe sai.

9 Tan neʼe, Jeová dehan ba Moisés: “Bá hasoru Faraó no hatete ba nia: ‘Jeová, ema Ebreu nia Maromak, dehan nuneʼe: “Haruka haʼu-nia povu sai hodi sira bele serbí haʼu.+ 2 Maibé se ó lakohi haruka sira sai no kontinua hanetik sira, 3 Jeová sei foti nia liman+ kontra ó-nia animál-hakiak sira iha rai-luan, ó-nia kuda, kuda-burru, kuda-kamelu, karau no bibi, sira hotu sei hetan moras neʼebé aat loos.+ 4 No Jeová sei haketak duni ema Izraél nia animál-hakiak husi ema Ejitu nia animál-hakiak, no ema Izraél nia animál ida mós sei la mate.”’”+ 5 Liután neʼe, Jeová hili ona tempu ida, hodi dehan: “Aban Jeová sei halo ida-neʼe iha rai neʼe.”

6 Iha loron tuirmai Jeová halo nuneʼe duni, no ema Ejitu nia animál-hakiak oioin hahú mate,+ maibé ema Izraél nia animál-hakiak ida mós la mate. 7 Bainhira Faraó haruka nia atan sira bá buka-hatene, sira haree katak ema Izraél nia animál ida mós la mate. Maski nuneʼe, Faraó kontinua ulun-toos,* no nia la haruka povu neʼe sai.+

8 Tuirmai Jeová dehan ba Moisés no Arão: “Halo nakonu imi-nia liman rua ho ahi-kadesan husi ahi-matan, no Moisés tenke soe neʼe ba anin iha Faraó nia oin. 9 Ahi-kadesan neʼe sei sai rai-uut neʼebé namkari iha rai-Ejitu tomak, no rai-uut neʼe sei sai fisur dodok iha ema nia isin no animál nia isin iha rai-Ejitu tomak.”

10 Entaun sira foti ahi-kadesan husi fornu no hamriik iha Faraó nia oin, no Moisés soe neʼe ba anin, no ida-neʼe sai fisur dodok iha ema nia isin no animál nia isin. 11 No fisur neʼe kona amlulik sira neʼebé halo masonik no mós ema Ejitu hotu, tan neʼe mak amlulik sira-neʼe labele mai hasoru Moisés.+ 12 Maibé Jeová husik Faraó sai ulun-toos, no nia la rona ba sira, hanesan Jeová hatete nanis ona ba Moisés.+

13 Tuirmai Jeová hatete ba Moisés: “Hadeer sedu iha dadeer no ó tenke hamriik iha Faraó nia oin no dehan ba nia: ‘Jeová, ema Ebreu nia Maromak, dehan nuneʼe: “Haruka haʼu-nia povu sai hodi sira bele serbí haʼu. 14 Tanba agora haʼu sei fó kastigu hotu hasoru ó no ó-nia atan sira no ó-nia povu, atu nuneʼe ó bele hatene katak la iha Maromak ida neʼebé hanesan haʼu iha mundu tomak.+ 15 Toʼo agora haʼu seidauk lolo haʼu-nia liman hodi fó kastigu aat ba ó no ó-nia povu, se lae, karik ó lakon ona husi mundu neʼe. 16 Maibé tan razaun tuirmai neʼe mak haʼu husik ó moris: atu hatudu haʼu-nia kbiit no atu haʼu-nia naran bele fó sai iha mundu tomak.+ 17 Entaun ó sei hatudu nafatin hahalok foti an hasoru haʼu-nia povu hodi la haruka sira sai ka? 18 Aban, iha oras neʼe haʼu sei halo udan ho jelu-fatuk tun makaʼas. Toʼo agora buat ida hanesan neʼe seidauk mosu iha rai-Ejitu hahú husi loron neʼebé rai neʼe iha. 19 Tan neʼe, haruka lia-menon atu lori ó-nia animál-hakiak hotu no buat hotu neʼebé iha ó-nia toʼos hodi tau iha mahon. Ema no animál hotu neʼebé sei iha hela toʼos no la tama ba uma laran sei mate bainhira udan ho jelu-fatuk tun ba sira.”’”

20 Faraó nia atan sira neʼebé hamtaʼuk Jeová nia liafuan lori kedas sira-nia atan rasik no sira-nia animál-hakiak ba uma laran, 21 maibé ema neʼebé la simu Jeová nia liafuan husik deʼit sira-nia atan no sira-nia animál iha toʼos.

22 Jeová dehan ba Moisés: “Foti ó-nia liman ba lalehan, hodi nuneʼe udan ho jelu-fatuk bele tun ba rai-Ejitu tomak,+ ba ema no animál no ai-horis hotu neʼebé iha toʼos laran iha rai-Ejitu.”+ 23 Entaun Moisés lolo nia ai-tonka ba lalehan, no Jeová halo rai-tarutu no udan ho jelu-fatuk, no ahi* tun ba rai, no Jeová kontinua halo udan ho jelu-fatuk tun ba rai-Ejitu. 24 Nuneʼe udan ho jelu-fatuk tun makaʼas, no mós iha ahi-lakan nabilan iha udan ho jelu-fatuk nia klaran. No buat ida hanesan neʼe seidauk mosu iha rai-Ejitu hahú husi tempu neʼebé rai neʼe sai nasaun ida.+ 25 Udan ho jelu-fatuk neʼe hamate buat hotu iha toʼos laran neʼebé iha rai-Ejitu tomak, husi ema toʼo animál sira, no hamate ai-horis hotu no mós estraga ai-hun hotu iha rai-luan.+ 26 Só deʼit iha rai-Gosen, rai neʼebé ema Izraél hela bá, mak la iha udan ho jelu-fatuk.+

27 Entaun Faraó bolu Moisés no Arão mai no nia dehan ba sira: “Agora haʼu halo ona sala. Jeová mak laran-loos, haʼu no haʼu-nia povu mak sala. 28 Harohan ba Jeová, atu nuneʼe rai-tarutu no udan ho jelu-fatuk bele para. Tuirmai haʼu sei prontu atu haruka imi sai, no imi sei la hela tan iha neʼe.” 29 Entaun Moisés dehan ba nia: “Bainhira haʼu sai husi sidade neʼe, haʼu sei loke haʼu-nia liman hodi harohan ba Jeová. No rai-tarutu sei para no udan ho jelu-fatuk sei la tun tan, atu nuneʼe Ita bele hatene katak mundu tomak mak Jeová nian.+ 30 Maibé kona-ba Ita no Ita-nia atan sira, haʼu hatene ona katak maski imi haree ida-neʼe, imi sei la hamtaʼuk Maromak Jeová.”

31 Iha tempu neʼebá jelu-fatuk estraga duʼut-liñu* no sevada, tanba sevada iha fulin ona no duʼut-liñu iha funan ona. 32 Maibé trigu no espelta* la sai aat, tanba seidauk tempu atu sai tasak. 33 Moisés sai husi sidade neʼe husi Faraó nia oin, no nia loke nia liman hodi harohan ba Jeová, no rai-tarutu no udan ho jelu-fatuk para, no udan la tun tan ba rai.+ 34 Bainhira Faraó haree katak udan ho jelu-fatuk no rai-tarutu para ona, nia no ninia atan sira kontinua halo sala hodi ulun-toos nafatin.+ 35 No Faraó ulun-toos nafatin, no nia la haruka ema Izraél sai, hanesan Jeová fó-hatene nanis ona liuhusi Moisés.+

10 Tuirmai Jeová dehan ba Moisés: “Bá hasoru Faraó, tanba haʼu husik nia no ninia atan sira sai ulun-toos,*+ atu nuneʼe haʼu bele hatudu sinál sira-neʼe iha ninia oin.+ 2 Haʼu mós halo nuneʼe atu ó bele konta fali ba ó-nia oan no ó-nia bei-oan sira kona-ba oinsá haʼu fó kastigu makaʼas ba ema Ejitu no kona-ba sinál neʼebé haʼu hatudu iha sira-nia leet,+ nuneʼe imi sei hatene duni katak haʼu mak Jeová.”

3 Entaun Moisés no Arão bá hasoru Faraó no dehan: “Jeová, ema Ebreu nia Maromak, dehan nuneʼe: ‘Toʼo bainhira tan mak ó lakohi halo tuir haʼu?+ Haruka haʼu-nia povu sai atu sira bele serbí haʼu. 4 No se ó lakohi nafatin atu haruka haʼu-nia povu sai, aban haʼu sei lori gafañotu ba ó-nia rai tomak. 5 Sira sei taka rai tomak, toʼo labele haree rai. Sira sei han buat neʼebé udan ho jelu-fatuk la estraga no buat neʼebé restu ba imi, no sira sei han ai-horis hotu neʼebé moris iha toʼos.+ 6 Sira sei halo nakonu ó-nia uma, ó-nia atan sira-nia uma no ema Ejitu hotu nia uma. Gafañotu sira-neʼe sei sai barak tebes. Ó-nia aman no ó-nia avó sira mós nunka haree buat ida hanesan neʼe iha sira-nia tempu toʼo agora.’”+ Ho ida-neʼe, nia fila no sai husi Faraó nia oin.

7 Tuirmai Faraó nia atan sira dehan ba nia: “Toʼo bainhira tan mak mane sira-neʼe kontinua ameasa* ita? Haruka sira sai atu sira bele serbí Jeová sira-nia Maromak. Ita-Boot la haree katak rai-Ejitu estraga hotu ona ka?” 8 Entaun sira lori fali Moisés no Arão ba Faraó, no Faraó dehan ba sira: “Bá, serbí Jeová, imi-nia Maromak. Maibé sé-sé deʼit mak sei bá?” 9 Tuirmai Moisés dehan: “Ami sei bá ho ami-nia oan joven, ferik-katuas, oan-mane no oan-feto sira, ami-nia bibi-malae no karau sira,+ tanba ami sei halo festa ba Jeová.”+ 10 Nia dehan ba sira: “Se haʼu haruka imi no imi-nia oan sira sai, neʼe hatudu katak Jeová hamutuk duni ho imi!+ Tuir loloos imi hanoin atu halo buat neʼebé aat. 11 Lae duni! Só mane sira deʼit mak bele bá serbí Jeová, tanba ida-neʼe mak imi husu.” Ho ida-neʼe, Faraó duni sira sai husi ninia oin.

12 Tuirmai Jeová dehan ba Moisés: “Lolo ó-nia liman ba rai-Ejitu, hodi nuneʼe gafañotu sira bele mosu iha rai-Ejitu tomak no han ai-horis hotu iha rai neʼe, sira sei han buat hotu neʼebé udan ho jelu-fatuk la estraga.” 13 Ho ida-neʼe, Moisés lolo kedas ninia ai-tonka ba rai-Ejitu, no Jeová halo anin husi parte leste huu ba rai neʼe iha loron neʼe tomak no kalan tomak. Bainhira dadeer ona, anin husi parte leste lori gafañotu ba rai neʼe. 14 Gafañotu sira-neʼe mai no taka rai-Ejitu tomak.+ No ida-neʼe aat tebes.+ Horiuluk kedas ema seidauk haree gafañotu barak hanesan neʼe, no sei nunka haree fali gafañotu barak hanesan neʼe. 15 Sira taka rai tomak toʼo rai neʼe sai nakukun. Sira han ai-horis hotu iha rai neʼe no ai-fuan hotu iha ai-hun neʼebé udan ho jelu-fatuk la estraga. La iha ai-tahan matak ida mak hela iha ai-hun no mós ai-horis sira iha rai-luan iha rai-Ejitu tomak.

16 Entaun Faraó bolu kedas Moisés no Arão no dehan: “Haʼu halo ona sala hasoru Jeová, imi-nia Maromak, no hasoru imi. 17 Agora, favór ida, perdua haʼu-nia sala dala ida-neʼe deʼit, no harohan ba Jeová, imi-nia Maromak, hodi nia bele hasai tiha susar makaʼas neʼe husi haʼu.” 18 Entaun nia* sai husi Faraó nia oin no harohan ba Jeová.+ 19 Tuirmai Jeová halo anin makaʼas huu husi parte oeste, no ida-neʼe lori sai gafañotu husi rai-Ejitu hodi tama ba Tasi Mean. Nuneʼe la iha gafañotu ida mak hela iha rai-Ejitu tomak. 20 Maibé Jeová husik Faraó sai ulun-toos nafatin,+ no nia la haruka ema Izraél sai.

21 Tuirmai Jeová dehan ba Moisés: “Lolo ó-nia liman ba lalehan atu nuneʼe bele hamosu nakukun iha rai-Ejitu, nakukun neʼebé metan tebes.” 22 Moisés lolo kedas ninia liman ba lalehan, no rai-Ejitu tomak sai nakukun tebetebes ba loron tolu.+ 23 Sira labele haree malu, no la iha ema ida mak sai husi sira-nia fatin ba loron tolu. Maibé iha naroman iha fatin neʼebé ema Izraél hotu hela bá.+ 24 Tuirmai Faraó bolu Moisés no dehan: “Bá hodi serbí Jeová.+ Imi-nia oan sira mós bele bá hamutuk ho imi. Só deʼit imi-nia bibi-malae no karau mak hela.” 25 Maibé Moisés dehan: “Ita-Boot rasik mak sei fó ba ami* animál hodi hasaʼe nuʼudar sakrifísiu sira no sakrifísiu sunu nian, no ami sei hasaʼe buat sira-neʼe ba Jeová, ami-nia Maromak.+ 26 Ami mós sei lori ami-nia animál-hakiak hamutuk ho ami. Animál ida* mós sei la hela, tanba ami sei uza animál balu atu adora Jeová, ami-nia Maromak, no ami mós la hatene saida mak ami sei hasaʼe ba Jeová toʼo ami bá iha fatin neʼebá.” 27 Entaun Jeová husik Faraó sai ulun-toos nafatin, no nia lakohi haruka sira sai.+ 28 Faraó dehan ba nia: “Sai husi haʼu-nia oin! Keta koko atu haree fali haʼu-nia oin, tanba iha loron neʼebé ó haree haʼu-nia oin, ó sei mate.” 29 Ho ida-neʼe, Moisés dehan: “Haʼu sei la koko atu haree tan Ita-nia oin hanesan Ita hatete ona.”

11 Tuirmai Jeová dehan ba Moisés: “Haʼu sei fó susar ida tan ba Faraó no mós ema Ejitu. Depois neʼe, nia sei haruka imi sai husi fatin neʼe.+ Bainhira nia haruka imi sai, tuir loloos nia sei duni sai imi.+ 2 Agora dehan ba mane ho feto hotu iha povu nia leet katak sira tenke husu ba sira-nia viziñu atu fó sasán neʼebé halo husi osan-mutin no husi osan-mean.”+ 3 No Jeová hatudu laran-diʼak ba ninia povu liuhusi ema Ejitu. Liután neʼe, Moisés rasik mós sai naran-boot iha rai-Ejitu, iha Faraó nia atan sira no povu neʼe nia leet.

4 Tuirmai Moisés hatete ba Faraó: “Jeová dehan nuneʼe: ‘Maizumenus bainhira kalan fahe-rua, haʼu sei laʼo liu rai-Ejitu tomak,+ 5 no oan primeiru hotu iha rai-Ejitu sei mate,+ hahú husi Faraó neʼebé tuur iha kadunan nia oan primeiru toʼo atan-feto neʼebé kiʼik liu* nia oan primeiru, no mós animál hotu nia oan primeiru.+ 6 Iha rai-Ejitu tomak, ema sei tanis hodi hakilar makaʼas, no buat ida hanesan neʼe seidauk mosu no sei nunka mosu tan.+ 7 Maibé asu ida mós sei la hatenu ba mane Izraél sira ka ba sira-nia animál-hakiak, hodi nuneʼe imi sei hatene katak Jeová bele haketak ema Ejitu husi ema Izraél.’+ 8 No Ita-nia atan hotu sei mai hasoru haʼu no hakneʼak no hakruʼuk ho oin ba rai, hodi dehan: ‘Sai bá, Ita no Ita-nia povu hotu neʼebé tuir Ita.’+ Depois neʼe, haʼu sei sai.” Ho ida-neʼe, nia sai husi Faraó nia oin ho hirus makaʼas.

9 Tuirmai Jeová dehan ba Moisés: “Faraó sei la rona ba imi,+ atu nuneʼe haʼu bele aumenta haʼu-nia milagre barak iha rai-Ejitu.”+ 10 Moisés no Arão halo duni milagre sira-neʼe hotu iha Faraó nia oin,+ maibé Jeová husik Faraó sai ulun-toos* nafatin, atu nuneʼe nia la haruka ema Izraél sai husi ninia rai.+

12 Tuirmai Jeová dehan ba Moisés no Arão iha rai-Ejitu: 2 “Fulan neʼe sei sai nuʼudar fulan primeiru ba imi iha tinan ida nia laran.+ 3 Koʼalia ba ema Izraél hotu, hodi dehan: ‘Iha loron sanulu fulan neʼe, sira ida-idak tenke foti bibi-malae ida+ ba família ida,* bibi-malae ida ba uma ida. 4 Maibé se umakain ida mak kiʼik liu atu han bibi-malae ida, sira no sira-nia* viziñu neʼebé besik tenke fahe naʼan-bibi ba malu iha sira-nia uma laran hodi tuir númeru ba ema* iha uma neʼe. Bainhira sira sura, hanoin nanis kona-ba naʼan-bibi hira mak ema ida-idak bele han. 5 Imi tenke hili bibi-malae neʼebé la iha moras ida,+ no bibi-malae aman neʼe tenke tinan ida. Imi bele hili bibi-malae aman ka bibi-timur aman. 6 Imi tenke tau matan ba bibi neʼe toʼo loron 14 iha fulan neʼe,+ no kongregasaun* Izraél tomak tenke oho bibi neʼe iha rai-nakaras.*+ 7 Sira tenke foti raan balu no hisik ba odamatan nia arus parte sorin loos no sorin karuk no parte leten iha uma neʼebé sira han naʼan-bibi neʼe.+

8 “‘Sira tenke han naʼan iha kalan neʼe kedas.+ Sira tenke tunu naʼan neʼe no han ida-neʼe hamutuk ho paun neʼebé la iha fermentu+ no ho modo-tahan neʼebé moruk.+ 9 Keta han naʼan neʼe matak deʼit ka daʼan, maibé tenke tunu bibi neʼe hamutuk ho ninia ulun, ninia ain no ninia parte iha laran. 10 Imi labele rai naʼan balu toʼo dadeer, maibé se iha naʼan restu iha dadeer, imi tenke sunu tiha.+ 11 Iha kalan neʼe, imi tenke han naʼan neʼe iha dalan tuirmai neʼe: Imi-nia sintu tenke kesi ona iha imi-nia knotak, sandálias iha ain, no kaer ai-tonka iha imi-nia liman, no imi tenke han ho ansi. Neʼe mak Páskua* hodi hahiʼi Jeová. 12 Tanba haʼu sei laʼo liu rai-Ejitu iha kalan neʼe no oho oan primeiru hotu iha rai-Ejitu, husi ema toʼo animál.+ Haʼu sei tesi-lia no fó kastigu ba maromak hotu iha rai-Ejitu.+ Haʼu mak Jeová. 13 Raan neʼe sei sai nuʼudar imi-nia sinál iha uma neʼebé imi hela bá. Kuandu haʼu haree raan neʼe, haʼu sei hakat liu deʼit imi. Susar sei la kona imi no haʼu sei la halakon imi bainhira haʼu fó kastigu ba rai-Ejitu.+

14 “‘Imi tenke hanoin-hetan loron neʼe, no imi tenke selebra loron neʼe nuʼudar festa ba Jeová iha imi-nia jerasaun hotu. Imi tenke halo selebrasaun neʼe tanba neʼe mak ukun-fuan ba nafatin. 15 Durante loron hitu imi tenke han paun neʼebé la iha fermentu.+ Sin, iha loron primeiru imi tenke hasai fermentu* hotu husi imi-nia uma, tanba ema naran deʼit neʼebé han buat neʼebé iha fermentu hahú husi loron primeiru toʼo loron hitu, ema* neʼe tenke mate hodi halakon husi Izraél nia leet. 16 Iha loron primeiru imi tenke halaʼo reuniaun boot santu, no iha loron hitu, imi tenke halaʼo reuniaun boot santu ida tan. Imi labele halo serbisu iha loron sira-neʼe.+ Buat ida deʼit neʼebé imi bele halo mak prepara hahán neʼebé ema* ida-idak presiza atu han.

17 “‘Imi tenke selebra Festa Paun Fermentu-Laek nian neʼe,+ tanba iha loron neʼe duni mak haʼu sei lori imi-nia grupu boot* sai husi rai-Ejitu. No imi tenke selebra loron neʼe iha imi-nia jerasaun hotu tanba neʼe mak ukun-fuan ba nafatin. 18 Iha loron 14 fulan-primeiru, iha kalan, imi tenke han paun neʼebé la iha fermentu toʼo loron 21 husi fulan neʼe iha kalan.+ 19 Labele iha fermentu* iha imi-nia uma ba loron hitu, tanba ema naran deʼit neʼebé han buat neʼebé iha fermentu, maski nia mak ema estranjeiru ka ema Izraél,+ ema* neʼe tenke mate hodi halakon husi povu Izraél nia leet.+ 20 Imi labele han buat naran deʼit neʼebé iha fermentu. Iha imi-nia uma hotu, imi tenke han paun neʼebé la iha fermentu.’”

21 Moisés bolu kedas Izraél nia katuas hotu+ no dehan ba sira: “Bá hili animál oan* ida ba imi-nia família ida-idak, no oho animál neʼe nuʼudar sakrifísiu Páskua nian. 22 Tuirmai imi tenke hoban ai-isopu futun ida ba raan neʼebé iha basia laran no hisik raan neʼe iha odamatan nia arus parte leten no parte sorin loos no sorin karuk. Imi ida mós labele sai husi uma toʼo dadeer. 23 Depois neʼe, bainhira Jeová liu rai neʼe hodi fó susar ba ema Ejitu no haree raan iha odamatan nia arus parte leten no parte sorin loos no sorin karuk, Jeová sei hakat liu duni odamatan neʼe, no nia sei la husik susar mate nian* tama ba imi-nia uma sira.+

24 “Imi tenke halo selebrasaun neʼe tanba neʼe mak lei ba nafatin ba imi no imi-nia oan sira.+ 25 Bainhira imi tama ona ba rai neʼebé Jeová sei fó ba imi hanesan nia fó sai ona, imi tenke kontinua halaʼo selebrasaun neʼe.+ 26 No bainhira imi-nia oan sira husu imi: ‘Selebrasaun neʼe katak sá?’+ 27 Imi tenke dehan: ‘Neʼe mak sakrifísiu Páskua* nian ba Jeová, Maromak neʼebé hakat liu deʼit ema Izraél nia uma sira iha rai-Ejitu bainhira nia fó susar ba ema Ejitu, maibé nia salva ita-nia umakain sira.’”

Tuirmai povu hakneʼak no hakruʼuk ho oin ba rai. 28 Entaun ema Izraél sira bá no halo tuir duni mandamentu neʼebé Jeová fó sai ona ba Moisés no Arão.+ Sira halo nuneʼe duni.

29 Tuirmai iha kalan fahe-rua, Jeová oho oan primeiru hotu iha rai-Ejitu,+ hahú husi Faraó neʼebé tuur iha kadunan nia oan-mane primeiru toʼo ema dadur sira iha komarka* nia oan-mane primeiru, no mós animál hotu nia oan primeiru.+ 30 Faraó hadeer iha kalan neʼe hamutuk ho ninia atan no ema Ejitu hotu, no ema Ejitu sira tanis no hakilar makaʼas, tanba iha uma ida-idak iha ema ida neʼebé mate.+ 31 Faraó bolu kedas Moisés no Arão+ iha kalan neʼe no dehan: “Bá, imi no ema Izraél seluk sai husi haʼu-nia povu nia leet. Bá serbí Jeová hodi tuir buat neʼebé imi dehan ona.+ 32 Lori mós imi-nia bibi-lubun no karau-lubun no bá, hodi tuir buat neʼebé imi dehan.+ Maibé imi tenke haraik bensaun ba haʼu.”

33 Ema Ejitu sira mós hahú obriga povu Izraél atu sai lalais+ husi sira-nia rai, no sira dehan: “Se imi la bá, ami hotu sei mate!”+ 34 Entaun povu neʼe lori sira-nia trigu neʼebé sira masa ona neʼebé la iha fermentu, hamutuk ho fatin* deʼut trigu nian no falun ho hena no tau iha sira-nia kabaas. 35 Ema Izraél halo tuir duni buat neʼebé Moisés hatete ba sira no sira husu ema Ejitu atu fó sasán neʼebé halo husi osan-mutin no osan-mean, no mós roupa oioin.+ 36 Jeová halo ema Ejitu hatudu laran-diʼak ba ninia povu, nuneʼe ema Ejitu fó duni buat naran deʼit neʼebé sira husu, no sira foti ema Ejitu nia rikusoin hotu.+

37 Tuirmai ema Izraél sai husi Ramesés+ hodi bá Sukot,+ maizumenus iha mane naʼin-600.000 neʼebé laʼo ain, neʼe la sura ho labarik sira.+ 38 No ema barak+ neʼebé laʼós ema Izraél mós bá hamutuk ho sira, no sira mós lori bibi-lubun, karau-lubun no animál-hakiak neʼebé barak tebes. 39 Iha dalan sira hahú tunu paun kabuar neʼebé la iha fermentu neʼebé sira lori husi Ejitu. Paun neʼe la iha fermentu tanba ema duni sai sira husi Ejitu derrepente deʼit tan neʼe sira la prepara ai-han ruma ba sira-nia an rasik.+

40 Ema Izraél neʼebé uluk hela iha rai-Ejitu,+ sira moris nuʼudar ema laʼo-rai ba tinan 430.+ 41 Iha tinan 430 nia rohan, iha loron neʼe duni, Jeová nia grupu boot* sai husi rai-Ejitu. 42 Iha kalan neʼe mak sira sei selebra tempu neʼebé Jeová lori sira sai husi rai-Ejitu. Ema Izraél nia jerasaun sira hotu tenke selebra kalan neʼe ba Jeová.+

43 Tuirmai Jeová dehan ba Moisés no Arão: “Neʼe mak ukun-fuan kona-ba Páskua: Ema estranjeiru* labele han sakrifísiu Páskua nian.+ 44 Maibé se ema ida iha atan-mane neʼebé nia sosa ho osan, nia tenke halo sirkunsizaun* ba atan neʼe.+ Ho ida-neʼe deʼit mak atan neʼe bele han. 45 Ema estranjeiru no ema neʼebé imi selu atu halo serbisu labele han ida-neʼe. 46 Imi tenke han naʼan neʼe iha uma ida deʼit. Imi keta lori naʼan balu sai ba uma nia liʼur, no imi keta halo tohar bibi nia ruin ida.+ 47 Ema Izraél hotu tenke selebra Páskua. 48 Se ema estranjeiru ida neʼebé hela ho imi hakarak atu selebra Páskua ba Jeová, entaun mane hotu iha ninia umakain tenke hetan sirkunsizaun. Tuirmai mak nia bele halo selebrasaun neʼe, no nia sei sai hanesan ema rai-naʼin. Maibé ema neʼebé la hetan sirkunsizaun labele han ida-neʼe.+ 49 Iha ukun-fuan ida deʼit ba ema rai-naʼin no ema estranjeiru neʼebé hela iha imi-nia leet.”+

50 Entaun ema Izraél hotu halo tuir duni mandamentu neʼebé Jeová fó sai ona ba Moisés no Arão. Sira halo nuneʼe duni. 51 Iha loron neʼe duni mak Jeová lori ema Izraél nia grupu boot* hodi sai husi rai-Ejitu.

13 Jeová koʼalia tan ba Moisés, hodi dehan: 2 “Halo santu* ema Izraél nia oan-mane primeiru hotu* ba haʼu. Ema nia oan-mane primeiru, no mós animál aman neʼebé moris primeiru mak haʼu-nian.”+

3 Tuirmai Moisés dehan ba povu: “Imi tenke hanoin-hetan loron neʼe neʼebé imi sai husi Ejitu,+ husi uma atan nian, tanba Jeová lori imi sai husi neʼe ho liman neʼebé forte.+ Entaun imi labele han buat neʼebé iha fermentu. 4 Imi sai iha loron neʼe, iha fulan-Abib.*+ 5 Bainhira Jeová lori ona imi tama ba ema Kanaan nia rai, ema Hetes nia rai, ema Amoreu nia rai, ema Heveu nia rai, no ema Jebus nia rai,+ rai neʼebé nia jura ona ba imi-nia beiʼala sira atu fó ba imi,+ rai neʼebé iha susubeen no bani-been barak,+ entaun imi tenke selebra festa neʼe iha fulan neʼe. 6 Ba loron hitu imi tenke han paun neʼebé la iha fermentu,+ no iha loron ikus husi loron hitu neʼe, imi sei halo festa ba Jeová. 7 Imi tenke han paun neʼebé la iha fermentu ba loron hitu;+ no imi keta rai buat naran deʼit neʼebé iha fermentu,+ no imi labele iha fermentu* iha imi-nia rai tomak.* 8 Iha loron neʼebá imi tenke fó-hatene ba imi-nia oan sira, hodi dehan: ‘Haʼu halo ida-neʼe tanba buat neʼebé Jeová halo ba haʼu bainhira haʼu sai husi rai-Ejitu.’+ 9 No festa neʼe sei halo imi hanoin-hetan buat neʼebé akontese no sei sai hanesan sinál neʼebé hakerek iha imi-nia liman no iha imi-nia reen-toos,+ atu nuneʼe imi bele konta kona-ba Jeová nia ukun-fuan, tanba ho liman neʼebé forte mak Jeová lori imi sai husi rai-Ejitu. 10 Tinan-tinan imi tenke halo tuir ukun-fuan neʼe tuir ninia tempu neʼebé deside ona.+

11 “Bainhira Jeová lori imi tama ba ema Kanaan nia rai neʼebé nia jura ona ba imi no ba imi-nia beiʼala sira atu fó ba imi,+ 12 imi tenke haketak oan-mane primeiru hotu* ba Jeová, no mós imi-nia animál aman neʼebé moris primeiru. Sira mak Jeová nian.+ 13 Imi tenke sosa fali kuda-burru oan primeiru ho bibi-malae ida. Se imi la sosa fali kuda-burru neʼe, imi tenke halo tohar ninia kakorok. No imi tenke sosa fali imi-nia oan-mane primeiru hotu.+

14 “Se aban-bainrua imi-nia oan-mane husu ba imi: ‘Neʼe katak sá?’, imi tenke dehan ba nia: ‘Ho liman neʼebé forte mak Jeová lori ami sai husi Ejitu, husi uma atan nian.+ 15 Bainhira Faraó ho ulun-toos lakohi husik ami sai,+ Jeová oho oan-mane primeiru hotu iha rai-Ejitu, ema nia oan-mane primeiru no mós animál nia oan primeiru.+ Tan neʼe mak haʼu hasaʼe oan-mane primeiru ba Jeová nuʼudar sakrifísiu, no haʼu sosa fali haʼu-nia oan-mane primeiru hotu.’* 16 Festa neʼe tenke sai hanesan sinál neʼebé hakerek iha ó-nia liman no hanesan hena neʼebé kesi iha ó-nia reen-toos,+ tanba ho liman neʼebé forte mak Jeová lori ami sai husi rai-Ejitu.”

17 Iha tempu neʼebá bainhira Faraó haruka povu sira sai, Maromak la lori sira liuhusi ema Filístia nia rai maski neʼe besik. Tanba Maromak dehan: “Povu neʼe karik sei troka sira-nia hanoin bainhira sira hasoru funu no sei fila fali ba rai-Ejitu.” 18 Entaun Maromak lori povu neʼe laʼo haleʼu liuhusi rai-fuik besik Tasi Mean.+ Ema Izraél laʼo sai husi rai-Ejitu la ho runguranga, maibé hanesan tropa. 19 Moisés mós lori José nia ruin hamutuk ho nia, tanba uluk José haruka ema Izraél jura ba nia ho laran, hodi dehan: “Maromak sei tau atensaun ba imi, no imi tenke lori haʼu-nia ruin sai husi neʼe ho imi.”+ 20 Sira sai husi Sukot no hela iha tenda iha Etam, iha rai-fuik neʼe nia ninin.

21 Jeová dirije sira hodi laʼo iha sira-nia oin. Iha loron nia dirije sira liuhusi kalohan,*+ no iha kalan nia dirije sira liuhusi ahi* hodi fó naroman ba sira, atu nuneʼe sira bele laʼo iha loron no kalan.+ 22 Kalohan* neʼe la muda husi povu neʼe nia oin durante loron, nuneʼe mós ho ahi* durante kalan.+

14 Jeová dehan ba Moisés: 2 “Hatete ba ema Izraél katak sira tenke fila fali no hela iha Pihairot nia oin, entre Migdol no tasi, la dook husi Baal-Zefon.+ Imi tenke harii tenda besik tasi iha Baal-Zefon nia oin. 3 Tuirmai Faraó sei koʼalia kona-ba ema Izraél, hodi dehan: ‘Sira laʼo bilán deʼit. La iha dalan ba sira atu sai husi rai-fuik neʼe.’ 4 Haʼu sei husik Faraó sai ulun-toos* nafatin.+ Nia sei duni tuir sira, no haʼu sei fó glória ba haʼu-nia an liuhusi Faraó no ninia tropa hotu.+ Ho ida-neʼe, ema Ejitu sei hatene duni katak haʼu mak Jeová.”+ Entaun ema Izraél halo nuneʼe duni.

5 Ikusmai ema fó-hatene ba liurai Ejitu katak povu neʼe halai sai tiha ona. Faraó no ninia atan sira troka kedas sira-nia hanoin kona-ba povu neʼe,+ no sira dehan: “Tanbasá mak ita halo nuneʼe no husik ema Izraél livre husi sira-nia serbisu nuʼudar atan ba ita?” 6 Entaun nia halo prontu ninia kuda-karreta funu nian no lori ninia tropa sira hamutuk ho nia.+ 7 Nia lori kuda-karreta neʼebé diʼak liu hamutuk 600 no mós kuda-karreta seluk hotu iha Ejitu, no tropa sira mak lori kuda-karreta sira-neʼe hotu. 8 Ho ida-neʼe, Jeová husik Faraó, liurai Ejitu, sai ulun-toos nafatin. Nia duni tuir ema Izraél bainhira ema Izraél sai daudaun husi rai-Ejitu ho fiar an.*+ 9 Entaun Faraó nia kuda-karreta hotu no ninia tropa neʼebé saʼe kuda no ninia tropa sira duni tuir ema Izraél no besik atu toman ema Izraél+ neʼebé hela besik tasi, besik Pihairot iha Baal-Zefon nia oin.

10 Bainhira Faraó sai besik daudaun, ema Izraél foti matan no haree ema Ejitu duni tuir sira. Ho ida-neʼe, ema Izraél sai taʼuk no hahú bolu Jeová.+ 11 Sira dehan ba Moisés: “La iha rate iha rai-Ejitu ka? Tanbasá mak ó lori ami sai hodi mate iha rai-fuik neʼe?+ Tanbasá mak ó lori ami sai husi Ejitu? 12 Neʼe mak liafuan neʼebé ami hatete ona ba ó iha rai-Ejitu: ‘Husik ami, hodi nuneʼe ami bele serbí ema Ejitu.’ Tanba diʼak liu ba ami atu serbí ema Ejitu duké mate iha rai-fuik neʼe.”+ 13 Tuirmai Moisés dehan ba povu neʼe: “Keta taʼuk.+ Hamriik metin, no haree oinsá Jeová sei salva imi ohin.+ Tanba ema Ejitu neʼebé imi haree ohin, imi sei nunka haree fali sira.+ 14 Jeová rasik mak sei halo funu ba imi,+ no imi sei hamriik nonook deʼit.”

15 Jeová dehan ba Moisés: “Tanbasá mak ó nafatin bolu haʼu? Fó-hatene ba ema Izraél katak sira tenke sobu tenda no laʼo bá. 16 Kona-ba ó, foti ó-nia ai-tonka no lolo ó-nia liman ba tasi no fahe tasi neʼe, atu nuneʼe ema Izraél bele laʼo liuhusi tasi neʼe iha rai maran. 17 Kona-ba haʼu, haʼu sei husik ema Ejitu nafatin ulun-toos, atu nuneʼe sira sei duni tuir ema Izraél. Ho ida-neʼe mak haʼu sei fó glória ba haʼu-nia an rasik liuhusi Faraó no ninia tropa hotu, ninia kuda-karreta funu nian, no ninia tropa neʼebé saʼe kuda.+ 18 No ema Ejitu sei hatene duni katak haʼu mak Jeová bainhira haʼu fó glória ba haʼu-nia an rasik liuhusi Faraó, ninia kuda-karreta funu nian no ninia tropa sira neʼebé saʼe kuda.”+

19 Tuirmai Maromak loos nia anju+ neʼebé laʼo iha ema Izraél nia oin fila no laʼo iha sira-nia kotuk, no kalohan* neʼebé iha sira-nia oin muda ba sira-nia kotuk.+ 20 Entaun kalohan neʼe iha entre ema Ejitu no ema Izraél.+ Iha sorin ida, kalohan neʼe nakukun. No iha sorin seluk, kalohan neʼe fó naroman iha kalan.+ Nuneʼe, grupu rua neʼe labele besik malu durante kalan tomak.

21 Moisés lolo ninia liman ba tasi,+ no Jeová halo anin husi parte leste huu makaʼas kalan tomak, no tasi hahú fahe ba rua,+ no rai iha tasi okos sai maran.+ 22 Entaun ema Izraél laʼo iha rai maran iha tasi klaran,+ no bee sai hanesan moru iha sira-nia liman-loos no liman-karuk.+ 23 Ema Ejitu duni tuir sira. Faraó nia kuda hotu, kuda-karreta funu nian no ninia tropa neʼebé saʼe kuda hahú duni tuir ema Izraél ba tasi klaran.+ 24 Durante madrugada,* Jeová hateke ba tropa Ejitu husi ahi no kalohan,*+ no nia halo tropa Ejitu sai runguranga. 25 Nia kontinua hasai kuda-karreta nia roda no ida-neʼe halo susar ba sira atu halai, no ema Ejitu dehan: “Mai ita halai sees husi ema Izraél, tanba Jeová mak halo funu ba sira hodi hasoru ema Ejitu.”+

26 Tuirmai Jeová dehan ba Moisés: “Lolo ó-nia liman ba tasi hodi nuneʼe bee bele taka ema Ejitu, sira-nia kuda-karreta funu nian no sira-nia tropa neʼebé saʼe kuda.” 27 Entaun Moisés lolo kedas ninia liman ba tasi, no nuʼudar rai besik naroman ona, tasi nakonu fali hanesan uluk. Bainhira ema Ejitu halai, Jeová soe sira ba tasi klaran.+ 28 Bee neʼe taka kuda-karreta funu nian no tropa neʼebé saʼe kuda no Faraó nia tropa hotu neʼebé duni tuir ema Izraél toʼo tasi laran.+ No la iha ema ida mak moris.+

29 Maibé ema Izraél laʼo iha rai maran iha tasi klaran,+ no bee sai hanesan moru iha sira-nia liman-loos no liman-karuk.+ 30 Ho ida-neʼe mak Jeová salva ema Izraél iha loron neʼe husi ema Ejitu nia liman,+ no ema Izraél haree ema Ejitu sira-nia mate-isin iha tasi-ibun. 31 Ema Izraél mós haree Jeová nia kbiit boot* neʼebé nia uza hodi kontra hasoru ema Ejitu, no povu neʼe hahú hamtaʼuk Jeová no tau fiar ba Jeová no ba ninia atan Moisés.+

15 Iha tempu neʼebá, Moisés no ema Izraél kanta knananuk tuirmai neʼe ba Jeová:+

“Haʼu sei kanta ba Jeová, tanba ninia glória mak boot tebes.+

Nia soe tiha kuda no tropa neʼebé saʼe kuda ba tasi kleʼan.+

 2 Jah* mak haʼu-nia forsa no kbiit, tanba nia salva haʼu.+

Nia mak haʼu-nia Maromak, haʼu sei hahiʼi nia,+ haʼu sei fó glória ba haʼu-nia aman nia Maromak.+

 3 Jeová mak funu-naʼin neʼebé kbiit boot.+ Ninia naran mak Jeová.+

 5 Tasi nia laloran taka sira, sira mout hanesan fatuk ida iha bee kleʼan.+

 9 Inimigu dehan: ‘Haʼu sei duni tuir sira! Haʼu sei toman sira!

Haʼu sei fahe sasán neʼebé haʼu hadau husi sira toʼo haʼu kontente!

Haʼu sei losu haʼu-nia surik! Ho haʼu-nia liman haʼu sei domina sira!’+

11 Oh Jeová, husi maromak sira hotu, sé mak hanesan ho Ita?+

Sé mak hanesan ho Ita neʼebé santu liu hotu?+

Ita mak Maromak neʼebé ema tenke hamtaʼuk ho knananuk hahiʼi nian, Maromak neʼebé halo buat kmanek sira.+

12 Ita lolo Ita-nia liman-loos, no rai tolan sira hotu.+

Ema Kanaan hotu sei lakon aten-brani.+

16 Oh Jeová, sira sei sai taʼuk no nakdedar.+

18 Jeová sei ukun nuʼudar liurai tinan ba tinan ba nafatin.+

20 Tuirmai Arão nia biin, profeta Miriam, foti tamborín, no feto hotu laʼo tuir nia ho tamborín no dansa. 21 Miriam kanta hodi hatán ba mane sira:

“Kanta ba Jeová, tanba ninia glória mak boot tebes.+

Nia soe kuda no tropa neʼebé saʼe kuda ba tasi kleʼan.”+

22 Depois neʼe, Moisés lori ema Izraél sai husi Tasi Mean, no sira laʼo ba rai-fuik Sur no sira laʼo loron tolu iha rai-fuik, maibé sira la hetan bee. 23 Tuirmai sira toʼo iha Mara,*+ maibé sira labele hemu bee iha Mara tanba bee neʼe moruk. Tan neʼe mak nia hanaran fatin neʼe Mara. 24 Entaun povu hahú muramura hasoru Moisés+ no dehan: “Ami sei hemu saida?” 25 Moisés bolu Jeová,+ no Jeová hatudu ba nia ai-hun ida. No bainhira nia soe ai neʼe ba bee, bee neʼe sai midar.

Maromak halo buat neʼebé akontese neʼe sai nuʼudar ezemplu atu nuneʼe povu bele hatene Maromak nia tesi-lia. Maromak koko sira atu haree se sira halo tuir nia ka lae.+ 26 Nia dehan ba sira: “Se imi rona didiʼak ba haʼu, Jeová, imi-nia Maromak, nia lian no halo buat neʼebé loos tuir haʼu-nia haree no halo tuir haʼu-nia mandamentu sira no ukun-fuan hotu,+ haʼu sei la lori ba imi moras sira neʼebé haʼu lori ba ema Ejitu,+ tanba haʼu Jeová mak kura imi.”+

27 Depois neʼe, sira toʼo iha Elim, no fatin neʼe iha bee-matan 12 no iha ai-palmeira hun 70. Entaun sira hela iha neʼebá besik bee.

16 Depois neʼe, sira sai husi Elim, no ikusmai ema Izraél tomak toʼo iha rai-fuik Sim,+ neʼebé iha entre Elim no Sinai, sira toʼo fatin neʼe iha loron 15 fulan-segundu husi tempu neʼebé sira sai husi rai-Ejitu.

2 Ema Izraél tomak hahú muramura hasoru Moisés no Arão iha rai-fuik.+ 3 Ema Izraél hatete beibeik: “Diʼak se Jeová nia liman rasik mak oho ami iha rai-Ejitu bainhira ami han hela naʼan+ no paun toʼo bosu. Agora imi lori ami mai iha rai-fuik neʼe hodi halo povu* tomak mate hamlaha.”+

4 Tuirmai Jeová dehan ba Moisés: “Agora haʼu sei halo ai-han tun husi lalehan hanesan udan ba imi.+ Ema ida-idak tenke sai bá no halibur ai-han neʼebé natoon ba nia loroloron,+ atu nuneʼe haʼu bele koko sira hodi haree se sira laʼo tuir haʼu-nia ukun-fuan ka lae.+ 5 Maibé iha loron neen,+ sira tenke halibur ai-han dala rua barak liu fali ai-han neʼebé sira halibur iha loron sira seluk no sira tenke teʼin ida-neʼe atu han.”+

6 Entaun Moisés no Arão dehan ba ema Izraél hotu: “Iha kalan neʼe imi sei hatene duni katak Jeová mak lori imi sai husi rai-Ejitu.+ 7 Iha dadeer imi sei haree Jeová nia glória, tanba Jeová rona ona imi-nia muramura hasoru nia. Sé mak ami hodi imi tenke muramura hasoru ami?” 8 Moisés hatutan tan: “Bainhira Jeová fó naʼan ba imi iha kalan, no iha dadeer nia fó ai-han ba imi hodi imi han toʼo bosu, imi sei hatene duni katak Jeová rona ona imi-nia muramura neʼebé imi hasaʼe hasoru nia. Maibé sé mak ami? Imi-nia muramura laʼós hasoru ami, maibé hasoru Jeová.”+

9 Tuirmai Moisés dehan ba Arão: “Fó-hatene ba ema Izraél tomak: ‘Mai iha Jeová nia oin, tanba nia rona ona imi-nia muramura.’”+ 10 Bainhira Arão remata koʼalia ba ema Izraél tomak, sira fila oin kedas ba rai-fuik, no haree Jeová nia glória mosu iha kalohan.*+

11 Jeová koʼalia tan ba Moisés, hodi dehan: 12 “Haʼu rona ona ema Izraél nia muramura.+ Hatete ba sira: ‘Iha rai-nakaras* imi sei han naʼan, no iha dadeer imi sei han ai-han toʼo bosu,+ ho ida-neʼe mak imi sei hatene duni katak haʼu mak Jeová, imi-nia Maromak.’”+

13 Entaun iha kalan neʼe manu-kiukae sira mai no halo nakonu ema Izraél nia hela-fatin,+ no iha dadeer-saan mahobeen taka rai neʼebé haleʼu sira-nia hela-fatin. 14 Bainhira mahobeen maran ona, iha buat uut neʼebé haree lotuk hanesan masin-midar mutin iha rai-fuik leten,+ no uut hanesan jelu-rahun. 15 Bainhira ema Izraél haree ida-neʼe, sira hahú husu ba malu: “Saida mak neʼe?” tanba sira la hatene ida-neʼe. Moisés dehan ba sira: “Neʼe mak ai-han neʼebé Jeová fó ona ba imi atu han.+ 16 Neʼe mak Jeová nia mandamentu ba imi: ‘Ema ida-idak tenke halibur tuir buat neʼebé nia bele han. Imi tenke halibur gomor isin ida*+ ba ema* ida-idak tuir númeru ba ema neʼebé iha imi-nia tenda.’” 17 Ema Izraél halo nuneʼe duni. Balu halibur barak no balu halibur uitoan. 18 Bainhira sira sukat ho fatin sukat gomor nian, ema neʼebé halibur barak la iha resin no ema neʼebé halibur uitoan la falta.+ Sira ida-idak halibur tuir buat neʼebé sira bele han.

19 Tuirmai Moisés dehan ba sira: “Ema hotu keta rai hela hahán neʼe toʼo dadeer.”+ 20 Maibé sira la rona ba Moisés. Bainhira ema balu husik hela ai-han uitoan toʼo dadeer, ida-neʼe hamosu ular no dois, no Moisés sai hirus ba sira. 21 Sira halibur ai-han neʼe dadeer-dadeer, ema ida-idak halibur tuir buat neʼebé nia bele han. Bainhira loro-matan manas ona, hahán neʼe nabeen tiha.

22 Iha loron neen, sira halibur ai-han dala rua barak liu fali loron seluk,+ sira halibur gomor isin rua* ba ema ida-idak. Entaun povu nia xefe hotu mai no fó-hatene ba Moisés. 23 Ho ida-neʼe, Moisés dehan ba sira: “Jeová hatete ona: Aban imi tenke deskansa deʼit,* aban mak loron Sábadu santu ba Jeová.+ Tunu buat neʼebé imi presiza tunu, no daʼan buat neʼebé imi presiza daʼan,+ tuirmai rai hela buat neʼebé restu toʼo dadeer.” 24 Nuneʼe sira rai hela hahán neʼe toʼo dadeer hodi tuir Moisés nia liafuan, no hahán neʼe la dois no la iha ular ida. 25 Tuirmai Moisés hatete: “Ohin imi bele han ai-han neʼe, tanba loron neʼe mak loron Sábadu ba Jeová. Ohin imi sei la hetan ai-han neʼe iha rai leten. 26 Imi sei halibur ai-han neʼe ba loron neen, maibé iha loron hitu, katak loron Sábadu,+ sei la iha buat ida.” 27 Maski nuneʼe, iha ema balu neʼebé sai atu halibur ai-han neʼe iha loron hitu, maibé sira la hetan buat ida.

28 Entaun Jeová dehan ba Moisés: “Toʼo bainhira tan mak imi lakohi halo tuir haʼu-nia mandamentu no ukun-fuan sira?+ 29 Hanoin-hetan bá katak Jeová mak fó imi loron Sábadu.+ Tan neʼe mak nia fó imi ai-han loron rua nian iha loron neen. Entaun iha loron hitu, ema hotu tenke hela iha ninia fatin no labele sai husi ninia fatin.” 30 Entaun iha loron hitu povu selebra loron Sábadu.*+

31 Umakain Izraél hanaran ai-han neʼe “maná”.* Maná neʼe mutin hanesan koentru-musan, no gostu hanesan paun belar neʼebé tau ho bani-been.+ 32 Tuirmai Moisés dehan: “Neʼe mak Jeová nia mandamentu ba imi: ‘Sukat maná gomor isin ida no imi tenke rai neʼe, atu nuneʼe imi-nia jerasaun sira tuirmai+ bele haree ai-han neʼebé haʼu fó ba imi atu han iha rai-fuik bainhira haʼu lori imi sai husi rai-Ejitu.’” 33 Entaun Moisés hatete ba Arão: “Foti sanan-rai kiʼik ida no enxe nakonu neʼe ho maná gomor isin ida no tau neʼe iha Jeová nia oin nuʼudar buat neʼebé tenke rai ba imi-nia jerasaun sira.”+ 34 Arão halo tuir Jeová nia mandamentu neʼebé fó sai liuhusi Moisés, no nia tau sanan-rai neʼe iha Kaixote Sasin* nia oin+ hodi bele rai maná neʼe ba nafatin. 35 Ema Izraél han maná ba tinan 40,+ toʼo sira tama iha rai neʼebé ema seluk sei hela daudaun.+ Sira han maná toʼo sira tama ba fronteira husi rai-Kanaan.+ 36 Gomor sanulu mak efa isin ida.*

17 Ema Izraél tomak sai husi rai-fuik Sim+ hodi tuir orden neʼebé Jeová fó ba sira no sira laʼo husi fatin ida ba fatin seluk,+ no sira harii tenda iha Refidim.+ Maibé iha fatin neʼe la iha bee ba povu atu hemu.

2 Entaun povu hahú haksesuk malu ho Moisés,+ hodi dehan: “Fó bee mai ami atu hemu.” Maibé Moisés dehan ba sira: “Tanbasá mak imi haksesuk malu ho haʼu? Tanbasá mak imi kontinua koko Jeová?”+ 3 Maibé povu neʼe hamrook loos no hakarak hemu bee, no sira kontinua muramura hasoru Moisés,+ hodi dehan: “Tanbasá mak ó lori ami sai husi rai-Ejitu? Ó hakarak halo mate ami, ami-nia oan sira, no ami-nia animál-hakiak sira tanba hamrook ka?” 4 Ikusmai Moisés husu ba Jeová: “Saida mak haʼu tenke halo ba povu sira-neʼe? Lakleur tan sira sei tuda mate haʼu!”

5 Tuirmai Jeová hatete ba Moisés: “Laʼo iha povu nia oin, no lori Izraél nia katuas balu no mós lori ó-nia ai-tonka neʼebé ó uza atu baku Mota Nilo.+ Kaer ai-tonka neʼe iha ó-nia liman no bá. 6 Haʼu sei hamriik iha ó-nia oin iha fatuk boot ida nia leten iha Horeb.* Ó tenke baku fatuk boot neʼe, no bee sei sai husi fatuk neʼe, no povu sei hemu bee neʼe.”+ Moisés halo nuneʼe duni iha Izraél nia katuas sira-nia oin. 7 Entaun nia hanaran fatin neʼe Massá*+ no Meribá*+ tanba ema Izraél haksesuk malu iha fatin neʼe no tanba sira koko Jeová,+ hodi dehan: “Jeová iha ita-nia leet ka lae?”

8 Depois neʼe, ema Amalec+ mai no halo funu hasoru ema Izraél iha Refidim.+ 9 Ho ida-neʼe, Moisés dehan ba Josué:+ “Hili mane sira atu bá halo funu hasoru ema Amalec. Aban haʼu sei hamriik iha foho-oan nia tutun ho Maromak loos nia ai-tonka iha haʼu-nia liman.” 10 Tuirmai Josué halo tuir duni buat neʼebé Moisés hatete ba nia,+ no nia halo funu hasoru ema Amalec. Moisés hamutuk ho Arão no Hur+ saʼe ba foho-oan nia tutun.

11 Bainhira Moisés nafatin foti saʼe nia liman, ema Izraél mak domina funu neʼe, maibé se nia hatún nia liman, ema Amalec mak domina fali. 12 Bainhira Moisés nia liman sai kole ona, sira foti fatuk ida ba nia atu tuur no nia tuur iha leten. Tuirmai Arão no Hur foti Moisés nia liman husi sorin-sorin atu nuneʼe ninia liman foti saʼe nafatin toʼo loro-matan monu. 13 Ho ida-neʼe, Josué manán ema Amalec no sira-nia maluk ho surik.+

14 Jeová dehan ba Moisés: “Hakerek liafuan tuirmai neʼe iha livru ida atu ema bele hanoin-hetan no konta fali ba Josué: ‘Haʼu sei halakon hotu ema Amalec husi mundu* no ema sei haluha sira.’”+ 15 Tuirmai Moisés harii altár ida no hanaran altár neʼe Jeová-Nisi,* 16 hodi dehan: “Tanba ema Amalec kontra Jah nia kadunan,+ entaun Jeová sei halo funu hasoru sira husi jerasaun ba jerasaun.”+

18 Amlulik Midian nian naran Jetro, Moisés nia banin-mane,+ rona kona-ba buat hotu neʼebé Maromak halo ona ba Moisés no ba ninia povu Izraél, no mós rona kona-ba oinsá Jeová lori ona ema Izraél sai husi rai-Ejitu.+ 2 Moisés haruka nia feen fila fali ba ninia aman nia uma. Entaun Moisés nia banin-mane Jetro mak tau matan ba Moisés nia feen Zípora, 3 hamutuk ho ninia oan-mane naʼin-rua.+ Moisés hanaran ninia oan-mane ida Gerson,*+ tanba Moisés dehan: “Haʼu sai ona ema estranjeiru iha rai seluk”, 4 no nia hanaran oan ida seluk Eliezer,* tanba nia dehan: “Haʼu-nia aman nia Maromak mak haʼu-nia ajuda-naʼin, nia mak salva haʼu husi Faraó nia surik.”+

5 Entaun Moisés nia banin-mane Jetro hamutuk ho Moisés nia oan-mane sira no ninia feen, mai atu hasoru Moisés iha rai-fuik iha fatin neʼebé nia hela bá iha Maromak loos nia foho.+ 6 Tuirmai Jetro+ haruka lia-menon ba Moisés, dehan: “Haʼu mai atu hasoru ó hamutuk ho ó-nia feen no ninia oan-mane naʼin-rua.” 7 Moisés sai kedas bá hasoru ninia banin-mane, no Moisés hakruʼuk ba nia no reʼi nia. Sira ida-idak husu ba malu kona-ba sira-nia situasaun, no tuirmai sira tama ba tenda laran.

8 Moisés konta ba ninia banin-mane kona-ba buat hotu neʼebé Jeová halo ona ba Faraó no ba rai-Ejitu hodi ajuda ema Izraél,+ no mós konta kona-ba susar hotu neʼebé sira hasoru bainhira sira halo viajen,+ no kona-ba oinsá Jeová salva ona sira. 9 Jetro haksolok tanba buat diʼak hotu neʼebé Jeová halo ona ba ema Izraél hodi salva sira husi Ejitu.* 10 Tuirmai Jetro dehan: “Fó hahiʼi ba Jeová, neʼebé salva imi husi Ejitu no husi Faraó nia liman, no salva ninia povu husi Ejitu nia ukun. 11 Agora haʼu hatene katak Jeová mak boot liu fali maromak sira seluk hotu+ tanba buat neʼebé nia halo ona ba sira neʼebé kontra ninia povu ho foti an.” 12 Tuirmai Moisés nia banin-mane Jetro lori sakrifísiu sunu nian no hasaʼe sakrifísiu ba Maromak. Depois neʼe, Arão no Izraél nia katuas hotu mai no han hamutuk ho Moisés nia banin-mane iha Maromak loos nia oin.

13 Iha loron tuirmai, hodi tuir Moisés nia toman, nia tuur atu serbí povu neʼe nuʼudar juís, no povu kontinua hamriik iha Moisés nia oin husi dadeer toʼo kalan. 14 Bainhira Moisés nia banin-mane haree buat hotu neʼebé Moisés halo ba povu neʼe, nia dehan: “Tanbasá mak ó halo hanesan neʼe? Tanbasá ó mesak deʼit mak tuur iha neʼe hodi tesi-lia ba povu hotu neʼebé hamriik iha ó-nia oin husi dadeer toʼo kalan?” 15 Moisés dehan ba ninia banin-mane: “Neʼe tanba povu kontinua mai hasoru haʼu hodi husu matadalan husi Maromak. 16 Kuandu iha kazu ruma, sira lori mai haʼu no haʼu tenke tesi-lia entre sira, no haʼu tenke fó sai desizaun husi Maromak loos no fó sai ninia ukun-fuan ba sira.”+

17 Moisés nia banin-mane hatete ba nia: “Dalan neʼebé ó halaʼo knaar neʼe mak ladún diʼak. 18 Ó no mós povu neʼebé hamutuk ho ó sei sai kole loos, tanba knaar neʼe mak todan tebes ba ó. Ó labele halo ida-neʼe mesak. 19 Agora rona mai haʼu. Haʼu sei fó konsellu ba ó, no Maromak sei hamutuk ho ó.+ Ó tenke reprezenta povu neʼe iha Maromak loos nia oin,+ no ó tenke lori kazu sira-neʼe ba Maromak loos.+ 20 Ó tenke fó avizu ba sira kona-ba Maromak nia ukun-fuan no lei,+ no ajuda sira hatene dalan neʼebé sira tenke laʼo no serbisu neʼebé sira tenke halo. 21 Maibé ó tenke hili husi povu nia leet mane sira neʼebé matenek+ no hamtaʼuk Maromak, mane neʼebé ó bele tau fiar no la buka atu manán buat ruma ho laran-makerek,+ no ó tenke foti sira nuʼudar xefe ba ema naʼin-1.000, xefe ba ema naʼin-100, xefe ba ema naʼin-50, no xefe ba ema naʼin-10.+ 22 Sira tenke tesi-lia ba povu neʼe kuandu kazu ruma mosu,* no sira sei lori ba ó kazu neʼebé susar,+ maibé sira bele tesi-lia ba kazu kiʼik sira. Husik sira lori todan neʼe hamutuk ho ó tanba neʼe sei halo kmaan ba ó.+ 23 Se ó halo nuneʼe no neʼe tuir Maromak nia mandamentu, ó sei bele lori todan neʼe, no ema hotu sei fila fali ba uma ho kontente.”

24 Moisés rona ba ninia banin-mane nia liafuan no halo tuir kedas buat hotu neʼebé nia dehan. 25 Moisés hili mane sira neʼebé matenek iha ema Izraél hotu nia leet no foti sira nuʼudar ulun-naʼin ba povu neʼe hodi sai nuʼudar xefe ba ema naʼin-1.000, xefe ba ema naʼin-100, xefe ba ema naʼin-50, no xefe ba ema naʼin-10. 26 Entaun sira tesi-lia ba povu neʼe kuandu kazu ruma mosu. Xefe sira-neʼe lori kazu neʼebé susar ba Moisés,+ maibé sira tesi-lia ba kazu kiʼik hotu. 27 Depois neʼe, Moisés fó adeus ba ninia banin-mane,+ no ninia banin fila fali ba ninia rai rasik.

19 Iha loron neʼebé hanesan, iha fulan-terseiru bainhira ema Izraél sai tiha husi rai-Ejitu, sira toʼo iha rai-fuik Sinai. 2 Ema Izraél sai husi Refidim+ no toʼo iha rai-fuik Sinai no sira hela iha rai-fuik neʼe. Sira hela iha foho neʼe nia oin.+

3 Tuirmai Moisés saʼe ba foho hodi hamriik iha Maromak loos nia oin, no Jeová bolu nia husi foho neʼe,+ hodi dehan: “Ó tenke fó sai liafuan tuirmai neʼe ba Jacob nia umakain no ba ema Izraél: 4 ‘Imi rasik haree ona buat neʼebé haʼu halo ba ema Ejitu,+ atu nuneʼe haʼu bele lori imi iha haʼu-nia liras hanesan manu-makikit no lori imi ba haʼu.+ 5 Agora se imi halo tuir ho didiʼak haʼu-nia liafuan no halo tuir haʼu-nia aliansa, imi sei sai haʼu-nia povu neʼebé espesiál* husi nasaun hotu,+ tanba mundu tomak mak haʼu-nian.+ 6 Imi sei sai amlulik neʼebé ukun nuʼudar liurai no sai nasaun santu ida ba haʼu.’+ Ó tenke fó sai liafuan sira-neʼe ba ema Izraél.”

7 Entaun Moisés bá bolu povu nia katuas sira no fó sai liafuan hotu neʼebé Jeová hatete ba nia.+ 8 Depois neʼe, povu hotu hatán ho lian ida deʼit, hodi dehan: “Buat hotu neʼebé Jeová koʼalia ona, ami prontu atu halo tuir.”+ No Moisés lori fali kedas povu neʼe nia resposta ba Jeová. 9 Jeová dehan ba Moisés: “Haree bá! Haʼu sei tun ba ó iha kalohan metan no koʼalia ba ó, atu nuneʼe povu bele rona no sira sei tau fiar nafatin ba ó.” Tuirmai Moisés konta fali povu neʼe nia liafuan ba Jeová.

10 Jeová dehan ba Moisés: “Bá hasoru povu neʼe no halo sira santu* ohin no aban, no sira tenke fase sira-nia roupa. 11 No sira tenke sai prontu ba loron terseiru, tanba iha loron neʼe Jeová sei tun ba Foho Sinai iha povu hotu nia oin. 12 No ó tenke halo lei kona-ba foho neʼe no dehan ba povu neʼe: ‘Kuidadu atu labele saʼe ba foho neʼe ka kona foho neʼe nia ninin. Ema naran deʼit neʼebé kona foho neʼe tenke mate. 13 Povu nia liman labele kona ema neʼebé kontra lei neʼe, maibé tenke tuda nia ka sona borus nia.* Maski nia mak animál ka ema, nia tenke mate.’+ Maibé sira bele hakbesik ba foho neʼe bainhira sira rona lian husi bibi-malae aman nia dikur.”+

14 Tuirmai Moisés tun husi foho hodi hasoru povu, no nia hahú halo povu neʼe santu, no sira fase sira-nia roupa.+ 15 Nia dehan ba povu neʼe: “Prepara an ba loron terseiru. Labele halo relasaun seksuál.”*

16 Iha dadeer iha loron terseiru, povu rona rai-tarutu no haree rai-lakan, no kalohan boot+ iha foho no rona dikur ida nia lian neʼebé makaʼas, no povu hotu hahú nakdedar.+ 17 Moisés lori povu neʼe sai husi sira-nia hela-fatin hodi hasoru Maromak loos, no sira hamriik iha foho hun. 18 Foho Sinai sai nakonu ho suar, tanba Jeová tun ba foho neʼe nia leten iha ahi,+ no suar neʼe saʼe hanesan suar husi fornu, no foho tomak nakdoko makaʼas.+ 19 Nuʼudar dikur nia lian sai boot no boot liután, Moisés hahú koʼalia, no Maromak loos hatán ba nia.

20 Entaun Jeová tun ba Foho Sinai nia tutun. Tuirmai Jeová bolu Moisés atu saʼe ba foho-tutun, no Moisés saʼe ba foho neʼe.+ 21 Jeová dehan ba Moisés: “Tun bá, fó avizu ba povu neʼe atu labele koko hakbesik atu haree Jeová, se lae, sira barak sei mate. 22 No amlulik sira neʼebé hakbesik beibeik ba Jeová presiza halo sira-nia an santu, atu nuneʼe Jeová labele oho sira.”+ 23 Moisés dehan ba Jeová: “Povu neʼe labele saʼe ba Foho Sinai nia leten tanba Ita fó ona avizu ba sira dehan: ‘Halo lei kona-ba foho neʼe, no halo foho neʼe sai sagradu.’”+ 24 Maski nuneʼe, Jeová dehan ba nia: “Tun bá, depois neʼe, ó no Arão tenke saʼe fali mai, maibé amlulik sira no povu keta koko atu saʼe mai hodi hakbesik ba Jeová, atu nuneʼe haʼu labele oho sira.”+ 25 Ho ida-neʼe, Moisés tun bá hasoru povu neʼe no fó-hatene ba sira.

20 Maromak fó sai mandamentu hotu tuirmai neʼe,+ hodi dehan:

2 “Haʼu mak Jeová, imi-nia Maromak, neʼebé lori imi sai husi rai-Ejitu, husi uma atan nian.+ 3 Imi labele adora maromak seluk, só adora haʼu mesak deʼit.*+

4 “Imi labele halo estátua ba imi-nia an ka halo buat naran deʼit* atu reprezenta buat neʼebé iha lalehan ka iha rai ka iha bee laran.+ 5 Imi labele hakruʼuk ba sira ka serbí sira,+ tanba haʼu, Jeová, imi-nia Maromak, mak Maromak neʼebé hakarak ema atu adora haʼu mesak deʼit,+ Maromak neʼebé fó kastigu ba oan sira tanba aman nia sala, ba jerasaun tolu no ba jerasaun haat husi ema neʼebé odi haʼu, 6 maibé kona-ba ema sira neʼebé hadomi haʼu no halo tuir haʼu-nia mandamentu sira,+ haʼu sei hatudu domin neʼebé laran-metin ba sira toʼo sira-nia jerasaun rihun ba rihun.

7 “Imi labele temi* imi-nia Maromak Jeová nia naran iha dalan neʼebé la respeitu,+ tanba Jeová sei fó kastigu duni ba ema neʼebé temi ninia naran la ho respeitu.+

8 “Hanoin-hetan loron Sábadu* hodi halo loron neʼe sagradu.+ 9 Imi tenke halo imi-nia serbisu hotu durante loron neen,+ 10 maibé loron hitu mak loron Sábadu ba Jeová, imi-nia Maromak. Imi labele halo serbisu ida, katak imi no imi-nia oan-mane no oan-feto, imi-nia atan-mane no atan-feto, imi-nia animál-hakiak, no mós ema estranjeiru neʼebé hela iha imi-nia sidade laran.*+ 11 Tanba durante loron neen Jeová kria lalehan, rai, tasi no buat hotu neʼebé iha laran, no nia hahú deskansa iha loron hitu.+ Tan neʼe mak Jeová haraik bensaun ba loron Sábadu no halo loron neʼe sagradu.

12 “Hatudu respeitu ba imi-nia inan-aman,+ atu nuneʼe imi bele moris naruk iha rai neʼebé Jeová, imi-nia Maromak, sei fó ba imi.+

13 “Imi labele oho ema.+

14 “Imi labele halo sala seksuál ho ema neʼebé laʼós imi-nia kaben.*+

15 “Imi labele naʼok.+

16 “Imi labele fó sasin falsu kona-ba imi-nia maluk.+

17 “Imi labele kaan imi-nia maluk nia uma. Imi labele kaan imi-nia maluk nia feen,+ ninia atan-mane ka atan-feto, ninia karau ka kuda-burru, ka buat naran deʼit neʼebé imi-nia maluk nian.”+

18 Povu hotu rona rai-tarutu no lian husi dikur, no haree rai-lakan no suar iha foho. Bainhira sira haree buat sira-neʼe, sira sai nakdedar no hamriik dook.+ 19 Entaun sira dehan ba Moisés: “Ó mak koʼalia ba ami, no ami sei rona, maibé keta husik Maromak mak koʼalia ba ami, tanba ami taʼuk katak ami sei mate.”+ 20 Ho ida-neʼe, Moisés hatete ba povu neʼe: “Keta taʼuk, tanba Maromak loos mai atu koko imi,+ hodi nuneʼe imi bele kontinua hamtaʼuk nia atu imi labele halo sala.”+ 21 Entaun povu kontinua hamriik dook, maibé Moisés hakbesik ba kalohan metan neʼebé Maromak loos iha bá.+

22 Tuirmai Jeová dehan ba Moisés: “Ó tenke fó sai ba ema Izraél, hodi dehan: ‘Imi rasik haree ona katak haʼu koʼalia ba imi husi lalehan.+ 23 Imi labele halo maromak husi osan-mutin ka osan-mean, tanba imi labele adora maromak seluk, só haʼu deʼit.*+ 24 Imi tenke halo altár husi rai, no imi sei hasaʼe sakrifísiu sunu nian, sakrifísiu dame nian, imi-nia bibi no karau iha altár leten. Iha fatin naran deʼit neʼebé haʼu hili atu ema hanoin-hetan haʼu-nia naran,+ haʼu sei tun ba imi no haraik bensaun ba imi. 25 Se imi halo altár husi fatuk, imi labele harii altár neʼe hodi uza fatuk neʼebé fera ona ho besi sira.+ Tanba se imi halo nuneʼe, haʼu sei la simu altár neʼe. 26 Imi labele halo eskada hodi saʼe ba haʼu-nia altár, atu nuneʼe imi labele hatudu sai imi-nia isin-tanan* iha altár neʼe.’

21 “Ó tenke fó sai lei sira tuirmai neʼe ba sira:+

2 “Se imi sosa ema Ebreu ida nuʼudar atan,+ nia sei sai atan ba imi durante tinan neen, maibé iha tinan hitu nia sei sai livre hodi la selu buat ida.+ 3 Se nia mai mesak, nia sei sai livre mesak. Se nia mai ho ninia feen, entaun nia tenke sai livre ho ninia feen. 4 Se ninia naʼi mak fó feen ba nia no ninia feen neʼe iha oan-mane no oan-feto sira, ninia feen no ninia oan sira sei sai nia naʼi nian, no nia sei sai livre mesak.+ 5 Maibé se atan neʼe deside ona, hodi dehan: ‘Haʼu hadomi haʼu-nia naʼi, haʼu-nia feen no haʼu-nia oan sira, no haʼu lakohi sai livre’,+ 6 entaun ninia naʼi tenke lori nia ba Maromak loos nia oin. Tuirmai nia sei lori atan neʼe ba odamatan ka ba odamatan nia arus, no ninia naʼi sei tuʼu nia tilun ho daun, no nia sei sai atan ba ninia naʼi durante ninia moris tomak.

7 “Se mane ida faʼan ninia oan-feto nuʼudar atan, feto neʼe sei la sai livre iha dalan neʼebé hanesan atan-mane ida sai livre. 8 Se feto neʼe nia naʼi lakohi ona nia no la hola nia nuʼudar feen-kiʼik hodi husik ema seluk atu sosa feto neʼe, ninia naʼi labele faʼan nia ba ema estranjeiru, tanba ninia naʼi hatudu ona laran-makerek ba nia. 9 Se ninia naʼi hili atan-feto neʼe atu sai nuʼudar ninia oan-mane nia feen, ninia naʼi tenke fó direitu hanesan oan-feto ida ba atan-feto neʼe. 10 Se nia* hola feto seluk, entaun nia labele hamenus ai-han, roupa, no direitu kaben nian*+ ba ninia feen primeiru. 11 Se nia la fó buat tolu neʼe ba feto neʼe, entaun feto neʼe bele sai livre hodi la selu osan ida.

12 “Ema naran deʼit neʼebé baku ema ida toʼo mate, ema neʼe mós tenke mate.+ 13 Maibé se nia oho ema la ho neon no Maromak loos husik ida-neʼe akontese, haʼu sei hili fatin ida atu nia bele halai bá.+ 14 Se ema ida sai hirus loos ba ninia maluk no nia oho ninia maluk ho neon,+ ema neʼe tenke mate maski nia buka protesaun iha haʼu-nia altár.+ 15 Ema neʼebé baku ninia inan ka aman, ema neʼe tenke mate.+

16 “Se ema ruma naʼok ema ida+ hodi faʼan ka ema kaer toman naʼok-teen neʼe bainhira nia kaer hela ema neʼe,+ nia tenke mate.+

17 “Ema naran deʼit neʼebé fó-malisan ba* ninia inan ka aman tenke mate.+

18 “Se ema naʼin-rua haksesuk malu no sira ida baku ninia maluk hodi uza fatuk ka uza liman* no ninia maluk la mate maibé latan deʼit iha kama leten, entaun nia tenke halo tuir ukun-fuan tuirmai neʼe: 19 Se ninia maluk neʼe bele hamriik no laʼo sai ba uma liʼur hodi uza ai-tonka, entaun ema neʼebé baku nia sei sai livre husi kastigu. Nia sei fó deʼit osan ba ema kanek neʼe durante tempu neʼebé ema neʼe labele serbisu toʼo nia sai diʼak fali.

20 “Se mane ida baku nia atan-mane ka atan-feto ho ai no atan neʼe mate iha ninia liman, nia tenke hetan kastigu.+ 21 Maibé, se atan neʼe moris hela ba loron ida ka rua, ninia naʼi la presiza hetan kastigu, tanba nia sosa atan neʼe ho ninia osan rasik.

22 “Se mane sira baku malu no hakanek feto ida neʼebé isin-rua no nia tuur-ahi sedu*+ maibé se feto neʼe no ninia bebé la mate,* ema neʼebé halo sala neʼe tenke selu multa neʼebé feto neʼe nia laʼen dehan ba nia; ema neʼe tenke selu multa liuhusi juís sira.+ 23 Maibé se sira ida* mate, entaun ema neʼebé halo ida-neʼe tenke mate, tanba moris tenke troka moris,*+ 24 matan troka matan, nehan troka nehan, liman troka liman, no ain troka ain.+ 25 Se ema ida sunu ninia maluk, hakanek ninia maluk, ka tuku ninia maluk, imi mós tenke halo hanesan ba nia.

26 “Se mane ida tuku ninia atan-mane ka atan-feto nia matan no estraga ninia matan, mane neʼe tenke husik ninia atan neʼe sai livre, no neʼe sei sai hanesan multa ba ninia matan.+ 27 Se mane neʼe tuku monu ninia atan-mane ka atan-feto nia nehan, mane neʼe tenke husik ninia atan neʼe sai livre, no neʼe sai hanesan multa ba ninia nehan.

28 “Se karau ida tuku mate mane ka feto ida, imi tenke tuda mate karau neʼe+ no ema labele han ninia naʼan. Maibé karau nia naʼin sei sai livre husi kastigu. 29 Maibé se karau ida iha toman atu tuku ema no ninia naʼin hetan avizu ona maibé nia la kontrola karau neʼe no karau neʼe oho mane ka feto ida, imi tenke tuda mate karau neʼe no ninia naʼin mós tenke mate. 30 Se ema husu karau nia naʼin neʼe atu selu folin hodi sosa fali nia moris, entaun nia tenke selu folin hotu neʼebé ema husu ba nia atu nia labele mate. 31 Maski karau neʼe tuku labarik-mane ka feto, maibé karau neʼe nia naʼin tenke hetan kastigu tuir lei neʼe. 32 Se karau neʼe tuku atan-mane ka atan-feto, karau nia naʼin tenke fó folin osan-mutin 30* ba atan neʼe nia naʼi, no imi tenke tuda mate tiha karau neʼe.

33 “Se mane ida keʼe ka loke rai-kuak no la taka fali no karau ka kuda-burru ida monu iha laran, 34 ema neʼebé keʼe rai-kuak neʼe tenke selu multa.+ Nia tenke selu ba animál neʼe nia naʼin, no animál neʼebé mate sei sai ninian. 35 Se ema ida nia karau hakanek karau seluk no karau neʼe mate, entaun sira tenke faʼan karau neʼebé moris no fahe osan neʼe. Sira mós tenke fahe karau neʼebé mate nia naʼan. 36 Ka se ema hatene katak karau neʼe iha toman atu tuku maibé ninia naʼin la kontrola, nia naʼin tenke selu multa karau troka karau, no karau neʼebé mate sei sai ninian.

22 “Se mane ida naʼok karau ka bibi-malae no oho ka faʼan ida-neʼe, mane neʼe tenke selu fali karau lima hodi troka fali karau ida no bibi-malae haat hodi troka fali bibi-malae ida.+

2 “Se ema kaer toman naʼok-teen ida+ kuandu nia naʼok hela no ema baku nia toʼo mate, entaun ema neʼebé baku nia sei la hetan sala kona-ba ninia raan. 3 Maibé se ida-neʼe akontese kuandu loro-matan saʼe ona, ema neʼebé baku tenke hetan sala kona-ba ninia raan.

“Naʼok-teen neʼe tenke selu fali buat neʼebé nia naʼok. No se nia la iha buat ida, entaun nia tenke faʼan nia moris nuʼudar atan hodi selu fali sasán neʼebé nia naʼok. 4 Se ema kaer toman naʼok-teen ida no animál neʼebé nia naʼok sei moris hela, maski nia naʼok karau, kuda-burru, ka bibi-malae, nia tenke selu dala rua husi buat neʼebé nia naʼok.

5 “Se ema ruma lori ninia animál atu han iha toʼos ka iha toʼos-uvas no husik animál sira-neʼe han iha ema seluk nia toʼos, nia tenke selu multa ho buat diʼak liu husi ninia toʼos rasik ka ho buat diʼak liu husi ninia toʼos-uvas.

6 “Se ema sunu ahi no ahi neʼe daʼet ba ai-hun tarak sira no tuirmai han trigu* neʼebé futu hamutuk ona ka trigu neʼebé iha toʼos laran ka toʼos tomak, ema neʼebé sunu ahi neʼe tenke selu fali buat neʼebé ahi han ona.

7 “Se mane ida fó osan ka sasán ba nia maluk atu rai no ema naʼok buat sira-neʼe iha ninia maluk nia uma, no se sira hetan naʼok-teen neʼe, nia tenke selu fali ida-neʼe ba dala rua.+ 8 Maibé se la hetan naʼok-teen neʼe, imi tenke lori uma-naʼin ba iha Maromak loos nia oin+ hodi bele hatene se nia mak naʼok* ninia maluk nia sasán ka lae. 9 Kuandu ema ida duun ninia maluk katak nia rai hela buat neʼebé laʼós ninian, hanesan karau, kuda-burru, bibi-malae, roupa ruma ka buat naran deʼit neʼebé lakon no sira naʼin-rua dehan: ‘Neʼe mak haʼu-nian!’ entaun sira ida-idak tenke lori sira-nia kazu ba Maromak loos nia oin.+ No ema neʼebé Maromak fó sai katak sala, nia tenke selu fali buat sira-neʼe nia folin ba dala rua ba ninia maluk neʼe.+

10 “Se mane ida fó kuda-burru ka karau ka bibi-malae ka animál-hakiak sira ba ninia maluk atu tau matan no animál neʼe mate ka hetan kanek ka ema foti animál neʼe no la iha sasin, 11 entaun ninia maluk neʼe tenke jura iha Jeová nia oin, katak nia la halo buat ida ba ninia maluk nia sasán, no animál nia naʼin tenke simu ida-neʼe. No ninia maluk neʼe la presiza selu multa.+ 12 Maibé se ema naʼok animál husi nia, nia tenke selu multa ba animál neʼe nia naʼin. 13 Se animál fuik mak lees animál neʼe, nia tenke lori neʼe nuʼudar prova. Nia la presiza selu multa ba animál neʼebé animál fuik mak lees.

14 “Maibé se ema ruma husu atu empresta animál ida husi ninia maluk no animál neʼe hetan kanek ka mate bainhira la hamutuk ho ninia naʼin, ema neʼebé husu empresta tenke selu multa. 15 Se ninia naʼin hamutuk ho animál neʼe, ema neʼe la presiza selu multa. Se ema neʼe aluga animál neʼe, entaun osan neʼebé nia selu atu aluga taka ona multa neʼebé nia tenke fó.

16 “Se mane ida lohi feto virjen neʼebé seidauk troka prenda no mane neʼe toba* ho nia, mane neʼe tenke selu barlake ba nia hodi sai ninia feen.+ 17 Se feto neʼe nia aman lakohi duni atu fó ninia oan-feto ba mane neʼe, mane neʼe tenke selu nafatin barlake ho folin hanesan ho feto neʼebé sei virjen.

18 “Imi labele husik feto matan-dook ida moris.+

19 “Ema neʼebé halo relasaun seksuál ho animál tenke hetan kastigu-mate.+

20 “Ema neʼebé hasaʼe sakrifísiu ba maromak sira seluk no laʼós ba Jeová mesak deʼit tenke hetan kastigu-mate.+

21 “Imi labele halo aat ka hanehan ema estranjeiru neʼebé hela iha imi-nia leet,+ tanba uluk imi mós hela iha rai-Ejitu nuʼudar ema estranjeiru.+

22 “Imi labele fó-terus ba feto-faluk ka oan-kiak.*+ 23 Se imi fó-terus ba sira, no sira halerik ba haʼu, haʼu sei rona duni sira-nia halerik neʼe.+ 24 Haʼu sei sai hirus tebes no oho imi ho surik. Imi-nia feen sei sai feto-faluk no imi-nia oan sei sai oan-kiak.

25 “Se imi fó-empresta osan ba ema kiak* husi haʼu-nia povu neʼebé hela iha imi-nia leet, imi labele halo ida-neʼe hodi manán osan-funan husi nia. Imi labele husu osan-funan ba nia.+

26 “Se imi foti imi-nia maluk nia roupa nuʼudar garantia ba buat neʼebé nia debe,*+ imi tenke fó fali roupa neʼe ba nia antes loro-matan monu. 27 Tanba nia iha deʼit roupa neʼe atu taka ninia isin.* Se lae, nia sei uza saida kuandu nia toba?+ Bainhira nia halerik ba haʼu, haʼu sei rona duni ninia lian, tanba haʼu mak Maromak neʼebé laran-sadiʼa.+

28 “Imi labele koʼalia aat imi-nia Maromak+ ka xefe* iha imi-nia povu nia leet.+

29 “Imi labele dada an atu hasaʼe sakrifísiu husi buat barak neʼebé imi hetan husi toʼos no husi tua-uvas no mina neʼebé barak.*+ Imi tenke fó imi-nia oan-mane primeiru ba haʼu.+ 30 Imi tenke halo buat tuirmai neʼe ho imi-nia karau no bibi-malae oan primeiru neʼebé aman:+ Ba loron hitu nia tenke kontinua hamutuk ho ninia inan. No iha loron ualu, imi tenke fó animál neʼe ba haʼu.+

31 “Imi tenke hatudu imi-nia an nuʼudar povu neʼebé santu ba haʼu,+ no imi labele han naʼan husi animál neʼebé animál fuik mak lees mate iha rai-luan.+ Imi tenke soe animál neʼe ba asu.

23 “Imi labele habelar istória neʼebé la loos.+ Labele apoia ema aat hodi fó sasin ho laran-aat.+ 2 Imi labele tuir deʼit ema-lubun hodi halo aat, no imi labele bobar lia-loos hodi fó sasin tuir deʼit ema-lubun nia hanoin. 3 Imi labele todan ba sorin iha ema kiak nia kazu.+

4 “Se imi hetan imi-nia inimigu nia karau ka kuda-burru neʼebé lakon, imi tenke fó fali ba nia.+ 5 Se imi haree katak ema neʼebé odi imi, ninia kuda-burru monu no sasán todan hanehan kuda-burru neʼe, imi labele husik deʼit ida-neʼe no bá. Imi tenke ajuda ema neʼe atu hasai sasán todan husi animál neʼe.+

6 “Imi labele bobar lia-loos bainhira tesi-lia kona-ba ema kiak nia kazu.+

7 “Imi labele envolve an hodi apoia lia falsu,* no keta oho ema neʼebé la iha sala no ema laran-loos, tanba haʼu sei la simu ema neʼebé halo hahalok aat hanesan neʼe.*+

8 “Bainhira tesi-lia, imi labele simu prezente atu apoia ema ruma iha kazu ida, tanba simu prezente bele halo juís husik buat neʼebé loos no mós halo ema laran-loos troka ninia liafuan.+

9 “Imi labele hanehan ema estranjeiru neʼebé hela iha imi-nia leet. Imi hatene ona ema estranjeiru nia moris, tanba uluk imi mós hela iha rai-Ejitu nuʼudar ema estranjeiru.+

10 “Ba tinan neen imi tenke kuda fini iha imi-nia rai no halibur nia fuan sira.+ 11 Maibé iha tinan hitu imi labele kuda fini iha rai neʼe. Imi tenke husik deʼit rai neʼe, atu ema kiak iha imi-nia leet bele han buat neʼebé moris iha rai neʼe, no animál fuik sira iha rai-luan sei han buat restu iha rai neʼe neʼebé ema kiak sira la foti. Imi tenke halo nuneʼe ho imi-nia toʼos-uvas no imi-nia toʼos-oliveira.

12 “Durante loron neen imi tenke halo serbisu, maibé iha loron hitu, imi tenke deskansa husi imi-nia serbisu, atu nuneʼe imi-nia karau no kuda-burru bele deskansa no imi-nia atan sira no ema estranjeiru sira bele deskansa.+

13 “Imi tenke halo tuir ho didiʼak buat hotu neʼebé haʼu dehan ba imi,+ no imi labele temi maromak sira seluk nia naran. Neʼe labele sai husi imi-nia ibun.+

14 “Imi tenke selebra festa ba haʼu dala tolu iha tinan ida nia laran.+ 15 Imi tenke selebra Festa Paun Fermentu-Laek nian.+ Durante loron hitu imi tenke han paun neʼebé la iha fermentu hodi tuir haʼu-nia mandamentu ba imi, tuir tempu neʼebé deside tiha ona iha fulan-Abib,*+ tanba iha fulan neʼe mak imi sai husi rai-Ejitu. Ema ida labele hamriik iha haʼu-nia oin ho liman-mamuk.+ 16 No mós imi tenke selebra Festa Koʼa Ai-Han Primeiru nian* bainhira imi komesa halibur ai-han primeiru husi imi-nia toʼos.+ Imi mós tenke selebra Festa Halibur Ai-Han nian* iha tinan nia rohan, bainhira imi halibur ona ai-han neʼebé imi hetan iha toʼos tanba imi-nia serbisu.+ 17 Dala tolu iha tinan ida nia laran, mane hotu iha imi-nia leet tenke hamriik iha Jeová, Naʼi neʼebé loos, nia oin.+

18 “Imi labele hasaʼe raan husi haʼu-nia sakrifísiu hamutuk ho buat naran deʼit neʼebé iha fermentu. No animál nia bokur neʼebé imi hasaʼe ba haʼu iha festa sira-neʼe, imi labele rai toʼo dadeer.

19 “Imi tenke lori ai-han primeiru neʼebé diʼak liu hotu husi imi-nia toʼos, imi tenke lori neʼe ba Jeová, imi-nia Maromak, nia uma.+

“Imi labele daʼan bibi-timur oan iha ninia inan nia susubeen.+

20 “Haʼu haruka anju ida uluk liu imi+ hodi proteje imi iha dalan no lori imi tama ba fatin neʼebé haʼu prepara ona.+ 21 Rona didiʼak ba nia, no halo tuir ninia liafuan. Keta kontra hasoru nia, tanba nia sei la fó perdua ba imi-nia sala,+ tanba nia lori haʼu-nia naran. 22 Maibé se imi halo tuir didiʼak ninia liafuan no halo buat hotu neʼebé haʼu dehan, haʼu sei odi imi-nia inimigu no kontra sira neʼebé kontra imi. 23 Kona-ba haʼu-nia anju, nia sei laʼo uluk liu imi no sei lori imi ba ema Amoreu, ema Hetes, ema Perizeu, ema Kanaan, ema Heveu no ema Jebus, no haʼu sei halakon sira.+ 24 Imi labele hakruʼuk ka hakarak atu serbí sira-nia maromak sira, no imi keta halo tuir sira-nia hahalok.+ Maibé imi tenke harahun maromak sira-neʼe no baku rahun sira-nia fatuk lulik sira.*+ 25 Imi tenke serbí Jeová, imi-nia Maromak,+ no haʼu sei haraik bensaun ba imi hodi fó paun no bee.+ Haʼu sei hasai moras husi imi-nia leet.+ 26 Feto sira iha imi-nia rai sei la abortu no sira sei iha duni oan,+ no haʼu sei fó imi moris naruk.*

27 “Antes ema haree imi, sira sei rona uluk kona-ba haʼu no nakdedar,+ no haʼu sei halo runguranga ema hotu neʼebé imi hasoru, haʼu sei halo imi manán imi-nia inimigu hotu hodi sira halai husi imi.*+ 28 Antes imi toʼo, haʼu sei halo imi-nia inimigu lakon aten-brani,*+ no haʼu sei duni sai ema Heveu, ema Kanaan, no ema Hetes husi imi-nia oin.+ 29 Haʼu sei la hasai sira husi imi-nia oin iha tinan ida deʼit, atu nuneʼe rai neʼe labele sai mamuk no animál fuik sira iha rai-luan labele sai barak no ataka imi.+ 30 Neineik-neineik haʼu sei hasai sira husi imi-nia oin, toʼo imi sai barak no domina hotu rai neʼe.+

31 “Haʼu sei tau imi-nia fronteira husi Tasi Mean toʼo tasi Filístia nian no husi rai-fuik toʼo Mota Eufrates,*+ tanba haʼu sei entrega ema husi rai neʼe ba imi-nia liman, no imi sei hasai sira husi imi-nia oin.+ 32 Imi labele halo aliansa ho sira ka ho sira-nia maromak sira.+ 33 Sira labele hela iha imi-nia rai, atu nuneʼe sira labele halo imi monu ba sala hodi kontra haʼu. Se imi serbí sira-nia maromak sira, neʼe sei sai duni lasu ba imi.”+

24 Tuirmai Jeová dehan ba Moisés: “Saʼe ba foho neʼe, ó hamutuk ho Arão, Nadab, Abiú,+ no Izraél nia katuas naʼin-70, no imi tenke hamriik dook uitoan no hakruʼuk hodi adora haʼu. 2 Só Moisés mesak mak tenke hakbesik ba Jeová, maibé mane sira seluk labele hakbesik no povu labele saʼe ba foho hamutuk ho Moisés.”+

3 Depois neʼe, Moisés mai no konta Jeová nia liafuan no ninia desizaun* hotu ba povu,+ no povu hotu hatán ho lian ida deʼit, hodi dehan: “Liafuan hotu neʼebé Jeová hatete, ami prontu atu halo tuir.”+ 4 Entaun Moisés hakerek Jeová nia liafuan hotu.+ Tuirmai nia hadeer sedu iha dadeer no harii altár ida no harii fatuk 12 iha foho neʼe nia hun hodi tuir Izraél nia suku 12. 5 Depois neʼe, nia haruka mane joven Izraél sira, no sira hasaʼe sakrifísiu sunu nian no hasaʼe karau-aman nuʼudar sakrifísiu dame nian+ ba Jeová. 6 Tuirmai Moisés foti raan sorin no tau neʼe iha basia sira-nia laran, no nia hisik raan sorin seluk ba altár. 7 Depois neʼe, Moisés foti livru aliansa nian* no lee ho lian makaʼas ba povu neʼe.+ No sira dehan: “Liafuan hotu neʼebé Jeová hatete, ami prontu atu halo tuir, no ami sei kumpre duni.”+ 8 Entaun Moisés foti raan neʼe no hisik ba povu+ no dehan: “Neʼe mak raan aliansa nian, husi aliansa neʼebé Jeová halo ona ho imi hodi tuir liafuan sira-neʼe hotu.”+

9 Moisés hamutuk ho Arão, Nadab, Abiú no Izraél nia katuas naʼin-70 saʼe ba foho neʼe, 10 no sira haree Izraél nia Maromak.+ Iha Maromak nia ain okos haree hanesan rai neʼebé nahe ho fatuk-safira, no ida-neʼe moos hanesan lalehan.+ 11 Maromak la foti liman kontra Izraél nia ulun-naʼin sira-neʼe.+ Sira haree Maromak loos iha vizaun ida no sira han no hemu.

12 Jeová hatete ba Moisés: “Saʼe mai iha foho neʼe no hela iha neʼe. Haʼu sei hakerek ukun-fuan no mandamentu sira iha fatuk-belar no fó ba ó, no haʼu fó buat sira-neʼe atu hanorin povu neʼe.”+ 13 Ho ida-neʼe, Moisés hamriik hodi bá hamutuk ho ninia ajudante Josué,+ no Moisés saʼe ba Maromak loos nia foho.+ 14 Maibé nia dehan ba Izraél nia katuas sira: “Hein ami iha neʼe toʼo ami fila ba imi.+ Arão no Hur+ mak sei hela ho imi. Se imi ida iha kazu ruma imi tenke lori ba sira.”+ 15 Entaun Moisés saʼe ba foho nuʼudar kalohan taka hela foho neʼe.+

16 Jeová nia glória+ nafatin hela iha Foho Sinai,+ no kalohan taka foho neʼe durante loron neen. No iha loron hitu Maromak bolu Moisés husi kalohan neʼe nia klaran. 17 Ba ema Izraél sira neʼebé haree Jeová nia glória, glória neʼe mak hanesan ahi boot iha foho-tutun. 18 Tuirmai Moisés tama ba kalohan no saʼe ba foho neʼe.+ Moisés hela iha foho neʼe durante loron 40 no kalan 40.+

25 Tuirmai Jeová dehan ba Moisés: 2 “Fó-hatene ba povu Izraél atu fó kontribuisaun ba haʼu. Imi tenke halibur kontribuisaun ba haʼu husi ema hotu neʼebé hakarak atu fó ida-neʼe ho laran.+ 3 Imi tenke simu kontribuisaun husi sira hanesan tuirmai neʼe: osan-mean,+ osan-mutin,+ riti,+ 4 kabas kór-azúl, kabas kór-violeta husi bibi-malae fulun,* kabas kór-mean,* kabas-liñu neʼebé diʼak, bibi-timur nia fulun, 5 bibi-malae aman nia kulit neʼebé tau kór-mean, asu-tasi* nia kulit, ai-akásia,+ 6 mina ba ahi-oan sira,+ bálsamu ba mina santu*+ no insensu morin,+ 7 no fatuk-oniks no fatuk-murak sira seluk atu monta iha efod*+ no bornál kiʼik* neʼebé tara iha hirus-matan.+ 8 Sira tenke halo fatin sagradu ida ba haʼu, no haʼu sei hela iha sira-nia leet.+ 9 Imi tenke halo tenda santu* no ninia sasán hotu neʼebé iha laran, hodi halo tuir ho didiʼak modelu* neʼebé haʼu hatudu ba ó.+

10 “Ó* tenke halo arka* ida husi ai-akásia, naruk metru 1 ho sentímetru 11,* luan sentímetru 67* no aas sentímetru 67.+ 11 Ó tenke taka ninia laran no liʼur ho osan-mean neʼebé moos.+ Ó tenke enfeita haleʼu nia ninin ho osan-mean.+ 12 Ó tenke halo argola haat husi osan-mean no tau argola sira-neʼe iha ninia ain haat nia leten, argola rua iha sorin ida no argola rua iha sorin seluk. 13 Ó tenke halo ai-loos sira husi ai-akásia no taka ho osan-mean.+ 14 Ó tenke hatama ai-loos sira-neʼe liuhusi argola sira neʼebé iha Arka nia sorin-sorin hodi bele hulan Arka neʼe. 15 Ó tenke husik nafatin ai-loos sira-neʼe iha Arka nia argola sira. Keta hasai husi Arka neʼe.+ 16 Ó tenke tau iha Arka laran fatuk-belar* neʼebé haʼu sei fó ba ó.+

17 “Ó tenke halo Arka nia matan husi osan-mean neʼebé moos, naruk metru 1 ho sentímetru 11 no luan sentímetru 67.+ 18 Ó tenke halo kerubín rua husi osan-mean hodi uza martelu no tau iha Arka matan nia leten iha sorin-sorin.+ 19 Ó* tenke halo kerubín rua iha Arka matan nia sorin-sorin; kerubín ida iha sorin ida no kerubín seluk iha sorin seluk. 20 Kerubín sira-neʼe nia liras rua tenke loke ba leten hodi taka Arka nia matan ho sira-nia liras,+ no sira sei fila oin ba malu. No kerubín sira-neʼe nia oin sei hakruʼuk ba Arka nia matan. 21 Ó tenke taka Arka nia matan+ ba Arka leten, no ó tenke tau iha Arka laran fatuk-belar* neʼebé haʼu sei fó ba ó. 22 Haʼu sei mosu ba ó iha neʼebá no koʼalia ho ó husi Arka nia matan leten.+ Haʼu sei koʼalia husi kerubín rua nia leet neʼebé iha Arka Aliansa* nia leten, haʼu sei fó sai ba ó mandamentu hotu neʼebé ó tenke fó sai fali ba ema Izraél.

23 “Ó mós tenke halo meza ida+ husi ai-akásia, naruk sentímetru 89* no luan sentímetru 45* no aas sentímetru 67.+ 24 Ó tenke taka meza neʼe ho osan-mean neʼebé moos no ó tenke enfeita haleʼu nia ninin ho osan-mean. 25 Ó tenke halo meza nia ninin luan maizumenus sentímetru 7* no enfeita haleʼu meza ninin neʼe ho osan-mean. 26 Ó tenke halo argola haat husi osan-mean no tau argola sira-neʼe iha meza nia sikun haat iha fatin neʼebé meza nia ain haat liga ho meza neʼe. 27 Argola sira-neʼe tenke tau besik iha ninin hodi bele hatama ai-loos sira atu hiʼit meza neʼe. 28 Ó tenke halo ai-loos sira husi ai-akásia no taka ho osan-mean no uza ai-loos sira-neʼe atu hiʼit meza neʼe.

29 “Ó mós tenke halo bikan, kopu, buli no manko neʼebé sei tau iha meza neʼe no uza atu fui sakrifísiu hemu nian. Ó tenke halo buat sira-neʼe ho osan-mean neʼebé moos.+ 30 No ó tenke kontinua tau paun santu iha meza neʼe nia leten iha haʼu-nia oin.+

31 “Ó tenke halo ahi-oan fatin+ husi osan-mean neʼebé moos. Ó tenke halo ahi-oan fatin neʼe hodi tuku ho martelu. Ó tenke uza osan-mean tomak ida hodi halo ahi-oan fatin neʼe nia hun, kain, sanak, tahan,* kafuʼak no funan.+ 32 No ó tenke halo sanak neen sai husi ahi-oan fatin neʼe nia kain. Sanak tolu iha sorin ida no sanak tolu iha sorin seluk. 33 Ahi-oan fatin nia tahan tolu iha ninia sanak sira iha sorin ida halo hanesan ai-amendueira funan, no ninia kafuʼak ho ninia funan sira halo tuituir malu; no iha ahi-oan fatin nia tahan iha ninia sanak sira iha sorin seluk mós halo hanesan ai-amendueira funan, no ninia kafuʼak ho ninia funan sira halo tuituir malu. Neʼe mak dalan neʼebé ó halo sanak neen neʼebé sai husi ahi-oan fatin nia kain. 34 No ahi-oan fatin nia kain iha tahan haat neʼebé halo hanesan ai-amendueira nia funan, hamutuk ho ninia kafuʼak no ninia funan halo tuituir malu. 35 No ahi-oan fatin nia sanak rua primeiru neʼebé sai husi ninia kain, iha kafuʼak ida iha sira-nia okos, no ahi-oan fatin nia sanak rua tan iha kafuʼak ida iha sira-nia okos, nuneʼe mós ho ahi-oan fatin nia sanak rua seluk tan iha kafuʼak ida iha sira-nia okos. Neʼe mak kafuʼak sira iha sanak neen nia okos neʼebé sai husi ahi-oan fatin nia kain. 36 Ó tenke uza osan-mean tomak ida neʼebé moos atu halo kafuʼak sira-neʼe no mós sanak sira no ahi-oan fatin tomak, no ó tenke halo hodi tuku ho martelu.+ 37 Ó tenke halo ahi-oan hitu atu tau iha ahi-oan fatin neʼe, no kuandu sunu ahi-oan sira-neʼe, sira sei fó naroman ba fatin neʼebé iha sira-nia oin.+ 38 Ó tenke uza osan-mean neʼebé moos atu halo ahi-oan fatin nia besi-habit no mós fatin ba ahi-oan nia kabas.+ 39 Ó tenke uza osan-mean neʼebé moos kilograma 34 ho grama 200* atu halo ahi-oan fatin hamutuk ho ninia sasán sira-neʼe. 40 Ó tenke halo buat hotu tuir modelu* neʼebé haʼu hatudu ba ó iha foho neʼe.+

26 “Ó tenke halo tenda santu+ ho hena tenda nian sanulu neʼebé suku ho kabas-liñu neʼebé diʼak, ho kabas kór-azúl, kabas kór-violeta husi bibi-malae fulun no kabas kór-mean. Ó tenke borda mós dezeñu kerubín iha hena sira-neʼe.+ 2 Hena tenda nian ida-idak naruk metru 12 ho sentímetru 46* no luan metru 1 ho sentímetru 78.* Hena tenda nian ida-idak tenke boot hanesan.+ 3 Hena tenda nian lima tenke tutan malu hodi sai hena boot ida, no hena lima seluk mós tenke tutan malu hodi sai hena boot ida. 4 Iha hena boot ida-idak nia ninin, ó tenke suku fatin atu kaʼit hodi uza kabas kór-azúl, atu nuneʼe hena boot rua neʼe bele tutan malu. 5 Ó tenke suku fatin atu kaʼit hamutuk 50 iha hena boot ida nia ninin no fatin atu kaʼit hamutuk 50 iha hena boot ida seluk nia ninin atu nuneʼe hena rua neʼe bele tutan malu. 6 Ó tenke halo besi-kaʼit 50 husi osan-mean no uza besi-kaʼit sira-neʼe atu tutan hena boot sira-neʼe hamutuk, no neʼe sei sai hena ida deʼit hodi taka tenda santu neʼe.+

7 “Ó mós tenke halo hena husi bibi-timur nia fulun+ atu taka tenda santu. Ó tenke halo hena tenda nian hamutuk 11.+ 8 Hena tenda nian ida-idak naruk metru 13* no luan metru 1 ho sentímetru 78. Hena tenda nian 11 tenke boot hanesan. 9 Ó tenke tutan hena tenda nian lima hamutuk hodi sai hena boot ida, no tutan hena neen seluk hamutuk hodi sai hena boot ida. Kona-ba hena boot neʼebé iha parte neen, ó tenke lulun hena ida ikus nia rohan neʼebé taka tenda oin. 10 Ó tenke suku fatin atu kaʼit hamutuk 50 iha hena boot ida nia ninin no fatin atu kaʼit hamutuk 50 iha hena boot ida seluk nia ninin atu nuneʼe hena rua neʼe bele tutan malu. 11 Ó tenke halo besi-kaʼit 50 husi riti no kaʼit besi sira-neʼe iha hena boot nia ninin hodi tutan hena sira-neʼe hamutuk, no neʼe sei sai hena ida deʼit hodi taka tenda santu. 12 Hena tenda nian sei naruk liu tenda santu. Sentímetru 89* husi hena tenda nian ida ikus sei husik tabele iha tenda santu nia kotuk. 13 Hena tenda nian neʼe nia rohan neʼebé tabele iha sorin ida-idak, luan sentímetru 45* no hena neʼe naruk liu fali hena ida primeiru, atu nuneʼe bele taka tenda santu.

14 “Ó mós tenke suku bibi-malae aman nia kulit neʼebé tau kór-mean atu taka tenda santu no ó tenke suku asu-tasi* nia kulit atu taka tan iha leten.+

15 “Ó tenke uza ai-akásia hodi halo arus sira+ neʼebé hamriik loos iha tenda santu nia sorin-sorin.+ 16 Arus ida-idak aas metru 4 ho sentímetru 45* no luan sentímetru 67.* 17 Arus ida-idak iha junta* rua neʼebé liga malu. Neʼe mak dalan neʼebé ó tenke halo arus hotu ba tenda santu neʼe. 18 Ó tenke halo arus 20 atu tau iha tenda santu nia parte súl.

19 “Ó tenke halo arus hun 40 husi osan-mutin+ no tau iha arus 20 nia okos: arus hun rua tau iha arus ida nia junta rua nia okos. Ó tenke tau arus hun rua ba arus ida-idak nia okos.+ 20 Ó tenke halo arus 20 ba tenda santu nia sorin seluk neʼebé iha parte norte, 21 no mós halo arus hun hamutuk 40 husi osan-mutin, arus hun rua tau iha arus primeiru nia okos no arus hun rua ba arus ida-idak nia okos. 22 Ó tenke halo arus neen ba tenda santu nia parte kotuk neʼebé iha parte oeste.+ 23 Ó tenke halo arus rua hodi sai nuʼudar riin ba lidun rua iha tenda santu neʼe nia kotuk. 24 Arus ida-idak tenke halo husi ai-kabelak tomak rua husi okos toʼo tutun, no ai-kabelak sira-neʼe tutan malu iha argola primeiru. Ó tenke halo nuneʼe ba arus neʼebé iha lidun rua. 25 Ó tenke halo arus ualu hamutuk ho sira-nia arus hun 16 husi osan-mutin. Ó tenke tau arus hun rua ba arus ida-idak nia okos.

26 “Ó tenke halo ai-akásia lolon lima atu bele liga arus sira neʼebé iha tenda santu nia sorin ida,+ 27 no ai-lolon lima ba arus sira neʼebé iha sorin seluk husi tenda santu neʼe, no ai-lolon lima tan ba arus sira neʼebé iha tenda santu nia parte oeste, katak tenda santu nia kotuk. 28 Kona-ba ai-lolon neʼebé tau iha arus sira-nia klaran tenke naruk husi rohan ida toʼo rohan seluk.

29 “Ó tenke taka arus sira ho osan-mean,+ ó tenke halo sira-nia argola husi osan-mean hodi tahan ai-lolon sira, no ó tenke taka ai-lolon sira-neʼe ho osan-mean. 30 Ó tenke harii tenda santu neʼe tuir planu neʼebé haʼu hatudu ona ba ó iha foho neʼe.+

31 “Ó tenke halo kortina ida+ ho kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak. Ó tenke borda mós dezeñu kerubín iha kortina neʼe. 32 Ó tenke tara kortina neʼe iha ai-riin haat neʼebé halo husi ai-akásia no taka ho osan-mean. Besi-kaʼit sira iha ai-riin sira-neʼe tenke halo husi osan-mean. No ai-riin sira-neʼe tenke tau iha riin hun haat neʼebé halo husi osan-mutin. 33 Ó tenke tara kortina neʼe iha ai-riin haat no lori tama Arka Aliansa nian*+ ba kortina nia laran. Kortina neʼe sei haketak Fatin Santu+ ho Fatin Santu Liu Hotu.+ 34 Ó tenke taka Arka Aliansa* nia matan no tau Arka neʼe iha Fatin Santu Liu Hotu.

35 “Ó tenke tau meza iha kortina nia liʼur, no tau ahi-oan fatin+ iha meza nia oin iha tenda santu neʼe nia parte súl. Ó tenke tau meza neʼe iha parte norte. 36 Ó tenke halo kortina ba tenda nia odamatan hodi uza kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak neʼebé soru hamutuk.+ 37 Ó tenke halo ai-riin lima husi ai-akásia hodi tara kortina neʼe no ó tenke taka ai-riin sira-neʼe ho osan-mean. Besi-kaʼit iha ai-riin sira-neʼe tenke halo husi osan-mean. Ó mós tenke halo riin hun lima husi riti ba ai-riin sira-neʼe.

27 “Ó tenke halo altár ida husi ai-akásia.+ Ninia naruk metru 2 ho sentímetru 22* no luan metru 2 ho sentímetru 22. Altár neʼe tenke kuadradu no aas metru 1 ho sentímetru 34.*+ 2 Ó tenke halo dikur sira+ iha altár neʼe nia sikun haat, no dikur sira-neʼe mak parte ida deʼit ho altár neʼe, no ó tenke taka altár neʼe ho riti.+ 3 Ó tenke halo balde atu tau ahi-kadesan,* no halo mós kanuru boot, manko, garfu no ahi-anar fatin, no ó tenke halo sasán sira-neʼe hotu husi riti.+ 4 Ó tenke halo rede husi riti ba altár neʼe, no halo argola haat husi riti iha rede neʼe nia sikun haat. 5 Ó tenke hatama rede neʼe iha altár nia klaran, iha altár neʼe nia ninin okos. 6 Ó tenke halo ai-loos sira husi ai-akásia ba altár neʼe no ó tenke taka ho riti. 7 No ó tenke hatama ai-loos sira-neʼe liuhusi argola neʼebé iha altár nia sorin-sorin hodi bele hiʼit altár neʼe.+ 8 Ó tenke halo altár neʼe husi ai-kabelak hanesan kaixote ida neʼebé mamuk iha klaran. Ó tenke halo ida-neʼe hodi tuir duni buat neʼebé haʼu hatudu ba ó iha foho.+

9 “Ó tenke halo pátiu*+ ba tenda santu neʼe. Iha pátiu neʼe nia parte súl, ó tenke tara hena neʼebé halo husi kabas-liñu neʼebé diʼak hodi sai hanesan didin, ho luan metru 44 ho balu* iha sorin ida.+ 10 Parte neʼe sei iha ai-riin 20 no riin hun 20 neʼebé halo husi riti. Ai-riin sira-neʼe nia besi-kaʼit no argola sira mak halo husi osan-mutin. 11 Hena neʼebé tara iha parte norte mós naruk metru 44 ho balu, no parte norte neʼe iha ai-riin 20 no riin hun 20 neʼebé halo husi riti, no mós ai-riin sira-neʼe nia besi-kaʼit no argola sira halo husi osan-mutin. 12 No mós hena neʼebé tara iha pátiu nia parte oeste luan metru 22,* no parte neʼe iha ai-riin sanulu no riin hun sanulu. 13 Pátiu iha parte leste* nia luan metru 22. 14 Iha odamatan nia sorin ida, ó tenke tara hena neʼebé luan metru 6 ho balu,* no iha parte neʼe iha ai-riin tolu no riin hun tolu.+ 15 No iha odamatan nia sorin seluk, ó tenke tara hena neʼebé luan metru 6 ho balu, no iha parte neʼe iha ai-riin tolu no riin hun tolu.

16 “Iha odamatan ba pátiu neʼe, ó tenke halo kortina ho naruk metru 9* no kortina neʼe halo husi kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak neʼebé soru hamutuk,+ no mós fatin neʼe iha ai-riin haat no riin hun haat.+ 17 Besi-kaʼit no argola ba ai-riin hotu neʼebé haleʼu pátiu neʼe tenke halo husi osan-mutin, maibé riin nia hun sira tenke halo husi riti.+ 18 Pátiu neʼe nia naruk mak metru 44 ho balu,+ luan metru 22, no aas metru 2 ho sentímetru 22, no haleʼu ho hena-liñu neʼebé diʼak, no riin nia hun sira tenke halo husi riti. 19 Sasán hotu neʼebé uza atu halaʼo serbisu iha tenda santu, no mós pregu tenda nian no pregu ba pátiu, tenke halo husi riti.+

20 “Ó tenke haruka ema Izraél atu lori mina-oliveira neʼebé moos ba ó atu uza ba ahi-oan sira, hodi ahi-oan sira bele kontinua lakan nafatin.+ 21 Arão no ninia oan-mane sira sei halo serbisu atu tau matan ba ahi-oan sira iha tenda reuniaun nian, iha kortina liʼur, katak kortina neʼebé besik Arka Aliansa nian,*+ atu nuneʼe ahi-oan sira kontinua lakan husi kalan toʼo dadeer iha Jeová nia oin.+ Neʼe mak ukun-fuan ba nafatin ba ema Izraél nia jerasaun hotu atu halo tuir.+

28 “Ó tenke bolu ó-nia maun Arão+ husi ema Izraél nia leet, no bolu mós ninia oan-mane+ Nadab, Abiú,+ Eleazar no Itamar,+ atu nuneʼe sira bele serbí nuʼudar amlulik ba haʼu.+ 2 Ó tenke halo roupa santu ba ó-nia maun Arão, atu hafurak no fó glória ba nia.+ 3 Ó tenke koʼalia ba ema hotu neʼebé iha matenek,* katak sira neʼebé haʼu fó ona espíritu* matenek,+ no sira sei halo Arão nia roupa atu halo nia santu* ba haʼu, hodi nuneʼe nia bele serbí nuʼudar amlulik ba haʼu.

4 “Sira tenke halo roupa sira tuirmai neʼe: bornál kiʼik* neʼebé tara iha hirus-matan,+ efod,*+ roupa neʼebé la iha liman,+ unuk neʼebé suku ho modelu kuadradu-kuadradu, turbante*+ no sintu husi hena;+ sira tenke halo roupa santu sira-neʼe ba ó-nia maun Arão no ninia oan-mane sira, atu nuneʼe sira bele serbí nuʼudar amlulik ba haʼu. 5 Serbisu-naʼin neʼebé iha matenek sei halo serbisu hodi uza kabas osan-mean, kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak.

6 “Sira tenke halo efod hodi uza kabas osan-mean, kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak, no tenke borda ho didiʼak.+ 7 Efod neʼe iha parte rua iha kabaas neʼebé tutan iha ninin rua iha leten. 8 Sintu hena neʼebé sira soru+ no suku hamutuk ho efod hodi kesi metin efod neʼe, tenke uza buat neʼebé hanesan, neʼe katak uza kabas osan-mean, kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak.

9 “Ó tenke foti fatuk-oniks rua+ no bahat Izraél nia oan-mane sira-nia naran+ iha fatuk sira-neʼe, 10 naran neen iha fatuk ida no naran neen seluk iha fatuk ida tan, no hakerek neʼe tuir sira-nia idade. 11 Badaen-fatuk ida sei bahat Izraél nia oan-mane sira-nia naran iha fatuk rua neʼe hanesan bahat selus* ida.+ Tuirmai ó tenke tau osan-mean haleʼu fatuk ida-idak hodi hametin fatuk sira-neʼe. 12 Ó tenke tau fatuk rua neʼe iha efod nia parte neʼebé iha kabaas rua nia leten, nuʼudar fatuk atu hanoin-hetan Izraél nia oan-mane sira.+ Arão tenke lori Izraél nia oan-mane sira-nia naran iha ninia kabaas rua bainhira nia mai iha Jeová nia oin. 13 Ó tenke halo fatin husi osan-mean atu monta fatuk sira-neʼe 14 no halo korrente rua husi osan-mean neʼebé moos no korrente ida-idak bobar hanesan tali ida,+ no ó tenke tutan korrente ba osan-mean neʼebé haleʼu fatuk sira-neʼe.+

15 “Ó tenke husu ema neʼebé matenek atu suku bornál kiʼik tesi-lia nian neʼebé tara iha hirus-matan.+ Nia tenke suku neʼe hanesan efod, hodi uza kabas osan-mean, kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak.+ 16 Bornál neʼe kuadradu kuandu lulun hamutuk, no ninia naruk sentímetru 22* no luan sentímetru 22. 17 Ó tenke monta fatuk-murak sira hamutuk liña haat iha bornál neʼe. Liña primeiru mak fatuk-rubi, fatuk-topáziu no fatuk-ezmeralda. 18 Liña segundu mak fatuk-turkeza, fatuk-safira no fatuk-jaspe. 19 Liña terseiru mak fatuk-lesem,* fatuk-agata no fatuk-ametista. 20 Liña haat mak fatuk-krizólitu, fatuk-oniks no fatuk-jade. No ó tenke monta fatuk sira-neʼe iha fatin neʼebé halo husi osan-mean. 21 Fatuk sira-neʼe tenke tuir Izraél nia oan-mane naʼin-12 nia naran. No naran ida tenke bahat iha fatuk ida hanesan bahat selus ida, naran ida-idak reprezenta suku ida-idak husi Izraél nia suku 12.

22 “Ó tenke halo korrente neʼebé bobar hanesan tali hodi kesi iha bornál kiʼik neʼebé tara iha hirus-matan, no korrente neʼe halo husi osan-mean neʼebé moos.+ 23 Ó tenke halo kadeli rua husi osan-mean ba bornál neʼe no tau kadeli rua neʼe ba bornál nia sikun rua iha leten. 24 Ó tenke hatama korrente osan-mean rua liuhusi kadeli rua neʼebé iha bornál nia sikun sira. 25 Ó tenke hatama korrente rua nia rohan liuhusi fatin osan-mean neʼebé haleʼu fatuk sira iha efod nia parte neʼebé iha kabaas leten, atu nuneʼe bornál neʼe tara iha efod nia oin. 26 Ó tenke halo kadeli rua husi osan-mean no tau neʼe iha bornál nia sikun rua neʼebé iha kraik, no tenke tau kadeli sira-neʼe iha laran, katak parte neʼebé kona efod.+ 27 Ó tenke halo kadeli rua tan husi osan-mean hodi tau iha efod nia oin, katak besik efod nia parte rua neʼebé iha kabaas leten, besik fatin neʼebé tutan malu iha efod nia sintu leten.+ 28 Ó tenke kesi metin bornál kiʼik neʼebé taka hirus-matan hodi uza tali kór-azúl, no kesi tali neʼe ba bornál nia kadeli no ba kadeli neʼebé iha efod, atu nuneʼe bele kesi metin bornál ba efod iha sintu nia leten.

29 “Arão tenke lori Izraél nia oan-mane sira-nia naran iha bornál kiʼik tesi-lia nian, no tara neʼe iha ninia hirus-matan kuandu nia tama ba Fatin Santu, atu nuneʼe Jeová sei hanoin-hetan nafatin Izraél nia oan sira.* 30 Ó tenke tau Urim no Tumim*+ iha bornál kiʼik tesi-lia nian neʼebé tara iha hirus-matan, no bornál neʼe tenke iha Arão nia hirus-matan bainhira nia tama ba Jeová nia oin, no Arão tenke lori nafatin buat sira-neʼe iha ninia hirus-matan, iha Jeová nia oin, hodi uza atu halo desizaun kona-ba ema Izraél.

31 “Ó tenke uza deʼit kabas kór-azúl atu halo roupa neʼebé la iha liman hodi hatais iha efod nia okos.+ 32 Roupa neʼe tenke iha kuak iha ninia leten atu hatama ulun. No ema neʼebé matenek atu suku mak tenke suku haleʼu kuak neʼe nia ninin hotu. Nia tenke suku neʼe metin hanesan roupa funu nian atu labele lees. 33 Ó tenke halo romaun-fuan no halo sinu husi osan-mean hodi tau haleʼu roupa neʼe nia ninin iha okos. Ó tenke halo romaun-fuan sira-neʼe hodi uza kabas kór-azúl, kabas kór-violeta husi bibi-malae fulun no kabas kór-mean. 34 Ó tenke tau sinu husi osan-mean no romaun-fuan tuituir malu, katak sinu ida no romaun-fuan ida, no tau haleʼu roupa neʼe nia ninin iha okos. 35 Arão tenke hatais roupa neʼe kuandu nia halo serbisu, no sinu sira sei lian bainhira nia laʼo tama ba fatin sagradu iha Jeová nia oin no bainhira nia sai, atu nuneʼe nia labele mate.+

36 “Ó tenke halo sinál belar ida neʼebé nabilan husi osan-mean neʼebé moos no bahat letra sira iha sinál neʼe hanesan bahat selus ida, neʼebé dehan: ‘Jeová mak santu.’+ 37 Ó tenke uza tali kór-azúl hodi kesi metin sinál neʼe ba turbante.+ Sinál neʼe tenke iha nafatin turbante neʼe nia oin. 38 Sinál neʼe sei tau iha Arão nia reen-toos, no Arão sei lori todan kuandu ema ida halo sala hasoru sasán santu sira,+ katak sasán sira neʼebé ema Izraél entrega nuʼudar prezente santu. No sinál neʼe tenke tau nafatin iha Arão nia reen-toos, atu nuneʼe Jeová bele simu ema Izraél sira.

39 “Ó tenke uza hena-liñu neʼebé diʼak atu halo unuk neʼebé suku ho modelu kuadradu-kuadradu, no halo turbante husi hena-liñu neʼebé diʼak, no mós soru sintu.+

40 “Ó mós tenke halo unuk, sintu no xapeu husi hena ba Arão nia oan-mane sira,+ atu hafurak no fó glória ba sira.+ 41 Ó tenke fó-hatais roupa sira-neʼe ba ó-nia maun Arão no ninia oan-mane sira, no ó tenke fui mina* ba sira-nia ulun+ no ordena sira*+ no halo sira santu, no sira sei serbí nuʼudar amlulik ba haʼu. 42 No mós halo kalsa badak* husi hena-liñu ba sira atu taka sira-nia isin-tanan.+ Kalsa neʼe tenke taka husi knotak toʼo kelen. 43 Arão no ninia oan-mane sira tenke uza roupa sira-neʼe bainhira sira tama ba tenda reuniaun nian ka bainhira sira hakbesik ba altár atu halo serbisu iha fatin santu, hodi nuneʼe sira labele hetan sala no mate. Neʼe mak ukun-fuan ba nafatin ba Arão no ninia oan ho bei-oan sira.

29 “Ó tenke halo buat tuirmai neʼe hodi halo sira santu* atu serbí nuʼudar amlulik ba haʼu: Ó tenke foti karau-aman* ida, no bibi-malae aman rua neʼebé la iha moras ida,+ 2 paun neʼebé la iha fermentu, paun hanesan kelu neʼebé la iha fermentu no kahur ho mina, no paun mihis neʼebé la iha fermentu no kose ho mina.+ Ó tenke halo paun sira-neʼe ho trigu uut neʼebé diʼak, 3 no tau paun sira-neʼe iha raga ida hodi hasaʼe nuʼudar sakrifísiu,+ hamutuk ho karau-aman no bibi-malae aman rua neʼe.

4 “Ó tenke lori Arão no ninia oan-mane sira iha odamatan ba tenda reuniaun nian+ no fase sira ho bee.+ 5 Tuirmai ó tenke foti roupa sira+ no fó-hatais Arão ho unuk neʼebé suku ho modelu kuadradu-kuadradu, roupa neʼebé la iha liman,* efod,* no bornál kiʼik* neʼebé tara iha hirus-matan, no ó tenke kesi metin sintu efod nian haleʼu ninia knotak.+ 6 Ó tenke tau turbante* ba ninia ulun no tau sinál santu dedikasaun nian* iha turbante neʼe nia oin.+ 7 Tuirmai foti mina santu*+ no fui iha ninia ulun hodi fó knaar ba nia nuʼudar amlulik.+

8 “Tuirmai ó tenke lori besik Arão nia oan-mane sira no fó-hatais roupa ba sira+ 9 no ó tenke kesi sintu husi hena haleʼu Arão no ninia oan-mane sira-nia knotak, no tau xapeu husi hena ba sira. Knaar amlulik nian sei sai sira-nian, no neʼe mak haʼu-nia ukun-fuan ba nafatin.+ Iha dalan neʼe mak ó tenke ordena Arão no ninia oan-mane sira atu serbí nuʼudar amlulik.*+

10 “Ó tenke lori karau-aman neʼe mai iha tenda reuniaun nia oin, no Arão no ninia oan-mane sira sei tau sira-nia liman iha karau-aman nia ulun.+ 11 Ó tenke oho karau-aman neʼe iha Jeová nia oin, iha odamatan ba tenda reuniaun nian.+ 12 Foti karau-aman nia raan balu ho ó-nia liman-fuan no kose iha altár nia dikur sira,+ no fakar raan restu hotu iha altár nia hun.+ 13 Tuirmai foti bokur hotu+ neʼebé taka tee-oan, bokur neʼebé taka aten, no rins rua no bokur neʼebé taka rins sira-neʼe. Depois neʼe, sunu buat sira-neʼe hodi bele halo suar iha altár leten.+ 14 Maibé kona-ba karau-aman neʼe nia isin, kulit no teen, ó tenke sunu iha liʼur dook husi povu nia hela-fatin. Neʼe mak sakrifísiu sala nian.

15 “Tuirmai ó tenke foti bibi-malae aman ida, no Arão no ninia oan-mane sira tenke tau liman iha bibi-malae aman neʼe nia ulun.+ 16 Oho bibi-malae aman neʼe no foti ninia raan no hisik iha altár nia sorin hotu.+ 17 Koʼa bibi-malae aman neʼe, fase ninia tee-oan+ no ninia ain, no tau ninia isin parte ida-idak tuituir malu hamutuk ho nia ulun. 18 Ó tenke sunu bibi-malae aman tomak neʼe hodi halo suar iha altár leten. Neʼe mak sakrifísiu sunu nian ba Maromak Jeová, no ninia morin halo Maromak kontente.*+ Neʼe mak sakrifísiu neʼebé sunu iha ahi hodi hasaʼe ba Jeová.

19 “Tuirmai ó tenke foti bibi-malae aman ida seluk, no Arão no ninia oan-mane sira tenke tau liman iha bibi-malae aman neʼe nia ulun.+ 20 Oho bibi-malae aman neʼe no foti raan balu no kose iha Arão nia tilun-tahan loos nia parte kraik no mós iha ninia oan-mane sira-nia tilun-tahan loos nia parte kraik no iha sira-nia liman-fuan boot iha liman-loos no iha ain-fuan boot iha ain-loos, no mós hisik raan iha altár nia sorin hotu. 21 Tuirmai foti raan balu neʼebé iha altár no mina santu balu+ no hisik ba Arão no ninia roupa no ba ninia oan-mane sira no ba sira-nia roupa, atu nuneʼe Arão no ninia oan-mane sira no mós sira-nia roupa bele sai santu.+

22 “Tuirmai foti bibi-malae aman nia bokur, ninia ikun neʼebé bokur, bokur neʼebé taka tee-oan, bokur neʼebé taka aten, rins rua no mós bokur neʼebé taka rins sira-neʼe,+ kelen sorin loos, tanba neʼe mak bibi-malae aman ordenasaun nian.+ 23 Foti mós paun kabuar ida no paun hanesan kelu neʼebé kose ho mina no foti paun mihis ida husi raga neʼebé uza atu tau paun neʼebé la iha fermentu iha Jeová nia oin. 24 Ó tenke tau buat hotu neʼe iha Arão nia liman no ninia oan-mane sira-nia liman, no ó tenke book sira-nia liman bá-mai nuʼudar sakrifísiu doko bá-mai nian iha Jeová nia oin. 25 Tuirmai ó tenke foti buat sira-neʼe husi sira-nia liman no sunu iha altár leten hamutuk ho sakrifísiu sunu nian iha Jeová nia oin, no ninia morin sei halo nia kontente.* Neʼe mak sakrifísiu neʼebé sunu iha ahi hodi hasaʼe ba Jeová.

26 “Tuirmai foti bibi-malae aman nia hirus-matan, katak bibi-malae neʼebé hasaʼe ona nuʼudar sakrifísiu atu ordena Arão nuʼudar amlulik,+ no book naʼan-bibi neʼe bá-mai nuʼudar sakrifísiu doko bá-mai nian iha Jeová nia oin, no naʼan neʼe sei sai ó-nian. 27 Kona-ba bibi-malae aman neʼebé hasaʼe ona atu ordena Arão no ninia oan-mane sira,+ ó tenke halo santu bibi-malae neʼe nia hirus-matan, no mós nia ain neʼebé nuʼudar parte sagradu. Neʼe mak sakrifísiu neʼebé doko bá-mai ona. 28 Naʼan sira-neʼe sei sai Arão no ninia oan-mane sira-nian, no neʼe mak ukun-fuan ba nafatin neʼebé ema Izraél tenke halo tuir, tanba neʼe mak parte sagradu neʼebé ema Izraél sira tenke fó.+ Neʼe mak ema Izraél sira-nia parte sagradu ba Jeová husi sira-nia sakrifísiu dame nian.+

29 “Bainhira fui tiha mina ba Arão nia oan-mane sira-nia ulun no ordena sira nuʼudar amlulik hodi troka nia, sira sei uza Arão nia roupa santu.+ 30 Ninia oan-mane neʼebé troka nia nuʼudar amlulik no tama ba tenda reuniaun nian atu serbí iha fatin santu, nia tenke uza roupa sira-neʼe ba loron hitu.+

31 “Ó tenke foti bibi-malae aman ordenasaun nian no daʼan ninia naʼan iha área santu ida.+ 32 Arão no ninia oan-mane tenke han+ bibi-malae aman nia naʼan neʼe no mós han paun neʼebé iha raga laran, no sira sei han neʼe iha odamatan ba tenda reuniaun nian. 33 Sira tenke han buat sira neʼebé hasaʼe nuʼudar sakrifísiu atu hamoos sira-nia sala bainhira ordena sira nuʼudar amlulik* no halo sira santu. Maibé ema baibain* labele han buat sira-neʼe, tanba neʼe mak buat neʼebé santu.+ 34 Se naʼan husi sakrifísiu ordenasaun nian no paun sei restu toʼo dadeer, entaun ó tenke sunu buat restu neʼe ho ahi.+ Labele han ida-neʼe, tanba neʼe mak buat santu.

35 “Ó tenke halo ida-neʼe ba Arão no ninia oan-mane sira, hodi tuir mandamentu hotu neʼebé haʼu fó sai ba ó. Ó tenke halaʼo serimónia ba loron hitu atu ordena sira nuʼudar amlulik.*+ 36 Loron ida-idak ó tenke hasaʼe karau-aman ida nuʼudar sakrifísiu sala nian atu hamoos sala, no ó tenke halo santu altár ho sakrifísiu neʼe atu hamoos sala, no ó tenke fui mina ba altár hodi haketak altár neʼe nuʼudar buat santu.+ 37 Ó tenke uza loron hitu atu halo altár neʼe santu, hodi nuneʼe altár neʼe sei sai altár santu liu hotu.+ Ema neʼebé serbí iha altár neʼe tenkesér santu.

38 “Ó tenke hasaʼe buat tuirmai neʼe iha altár: loroloron ó tenke hasaʼe bibi-malae aman rua neʼebé tinan ida, no tenke halo ida-neʼe nafatin.+ 39 Ó tenke hasaʼe bibi-malae aman* ida iha dadeer no bibi-malae aman seluk iha rai-nakaras.*+ 40 Ó tenke hasaʼe trigu uut neʼebé diʼak gomor isin ida* kahur ho mina diʼak litru ida,* no tua-uvas litru ida nuʼudar sakrifísiu hemu nian, hamutuk ho bibi-malae aman* ida neʼebé primeiru. 41 Ó tenke hasaʼe bibi-malae aman* segundu iha rai-nakaras,* hamutuk ho sakrifísiu trigu* nian no sakrifísiu hemu nian hanesan ida neʼebé hasaʼe iha dadeer. Ó tenke hasaʼe ida-neʼe nuʼudar buat morin neʼebé halo Maromak kontente,* no neʼe mak sakrifísiu neʼebé sunu iha ahi hodi hasaʼe ba Jeová. 42 Neʼe sei sai nuʼudar sakrifísiu sunu nian neʼebé hasaʼe loroloron iha imi-nia jerasaun hotu iha Jeová nia oin, katak iha odamatan ba tenda reuniaun nian, iha fatin neʼebé haʼu sei hasoru ó atu koʼalia ho ó.+

43 “Haʼu sei mosu ba ema Izraél iha neʼebá, no fatin neʼe sei sai santu tanba haʼu-nia glória.+ 44 Haʼu sei halo santu tenda reuniaun nian no altár neʼe, no haʼu sei halo santu Arão no ninia oan-mane sira+ atu nuneʼe sira bele serbí nuʼudar amlulik ba haʼu. 45 Haʼu sei hela iha povu Izraél nia leet, no haʼu sei sai sira-nia Maromak.+ 46 Ho ida-neʼe, sira sei hatene duni katak haʼu mak Jeová, sira-nia Maromak, neʼebé lori sira sai husi rai-Ejitu, no haʼu hela iha sira-nia leet.+ Haʼu mak Jeová, sira-nia Maromak.

30 “Ó tenke halo altár ida nuʼudar fatin atu sunu insensu.+ Ó tenke halo ida-neʼe husi ai-akásia.+ 2 Altár neʼe tenke kuadradu, no nia naruk mak sentímetru 45,* luan sentímetru 45, no aas sentímetru 89.* Altár no ninia dikur sira tenke halo husi ai ida deʼit.+ 3 Ó tenke taka altár neʼe ho osan-mean neʼebé moos: taka osan-mean iha altár neʼe nia leten, nia sorin hotu, no ninia dikur sira; no ó tenke enfeita haleʼu altár neʼe nia ninin ho osan-mean. 4 Ó mós tenke halo argola rua husi osan-mean no tau iha altár nia sorin rua, iha altár nia ninin neʼebé enfeita ona nia okos, no argola sira-neʼe mak fatin atu hatama ai-loos sira hodi hiʼit altár neʼe. 5 Ó tenke halo ai-loos sira husi ai-akásia no taka ho osan-mean. 6 Ó tenke tau altár neʼe iha kortina nia oin, katak kortina neʼebé besik Arka Aliansa nian*+ no ninia matan,* fatin neʼebé haʼu sei mosu ba ó.+

7 “Arão+ tenke sunu insensu morin+ iha altár leten,+ nia tenke halo insensu suar iha altár leten bainhira nia prepara ahi-oan sira+ dadeer-dadeer. 8 No mós bainhira Arão sunu lakan ahi-oan sira iha rai-nakaras,* nia mós sei sunu insensu. Neʼe mak sakrifísiu insensu nian neʼebé hasaʼe beibeik iha Jeová nia oin iha imi-nia jerasaun hotu. 9 Imi labele hasaʼe insensu neʼebé la tuir ukun-fuan+ iha altár neʼe nia leten ka labele hasaʼe sakrifísiu sunu nian ka sakrifísiu trigu* nian iha altár neʼe nia leten, no imi labele fui sakrifísiu hemu nian iha nia leten. 10 Arão tenke tau animál nia raan husi sakrifísiu sala nian+ iha altár neʼe nia dikur sira hodi halo santu altár neʼe. Nia tenke halo ida-neʼe tinan ida dala ida+ atu bele halo santu altár neʼe iha imi-nia jerasaun hotu. Neʼe mak buat neʼebé santu liu hotu ba Jeová.”

11 Tuirmai Jeová dehan ba Moisés: 12 “Bainhira ó halo sensus ida no sura Izraél nia oan-mane sira,+ mane ida-idak tenke selu hodi sosa fali ninia moris* husi Jeová iha tempu sensus nian. Sira tenke halo ida-neʼe hodi susar labele kona sira bainhira rejistu. 13 Ema hotu neʼebé rejistu tenke fó buat tuirmai neʼe: osan-mutin grama 6* neʼebé tetu tuir dasin-fuan husi fatin santu.*+ Dasin-fuan ida nia todan mak gera 20.* Entaun, kontribuisaun neʼebé imi fó ba Jeová+ mak osan-mutin grama 6. 14 Ema hotu neʼebé rejistu ona neʼebé tinan 20 ba leten tenke fó kontribuisaun ba Jeová.+ 15 Ema neʼebé riku labele fó barak liu no ema neʼebé kiak labele fó menus liu fali osan-mutin grama 6* hodi sai nuʼudar kontribuisaun ba Jeová atu sosa fali* sira-nia moris. 16 Ó tenke foti osan-mutin neʼe husi ema Izraél no entrega neʼe atu uza ba serbisu iha tenda reuniaun nian, atu nuneʼe Jeová bele hanoin-hetan ema Izraél, no sosa fali* sira-nia moris.”

17 Jeová koʼalia tan ba Moisés, hodi dehan: 18 “Halo basia boot husi riti no fatin atu hatuur basia neʼe.+ Tuirmai tau basia neʼe entre tenda reuniaun nian no altár, no enxe bee iha basia neʼe.+ 19 Arão no ninia oan-mane sira tenke fase sira-nia liman no ain ho bee neʼe.+ 20 Bainhira sira tama ba tenda reuniaun nian ka bainhira sira hakbesik ba altár atu halo serbisu no atu hasaʼe sakrifísiu ho ahi no sunu sakrifísiu atu halo suar ba Jeová, sira tenke fase sira-nia an ho bee atu nuneʼe sira labele mate. 21 Sira tenke fase sira-nia liman no ain atu sira labele mate, no neʼe tenke sai nuʼudar ukun-fuan ba nafatin, ba Arão no ninia bei-oan sira iha sira-nia jerasaun hotu.”+

22 Jeová koʼalia tan ba Moisés, hodi dehan: 23 “Agora, foti buat morin neʼebé diʼak liu hanesan tuirmai neʼe: mirra* neʼebé maran hamutuk kilograma neen, ai-kanela kilograma tolu, ai-kalamo kilograma tolu, 24 no ai-kásia kilograma neen, neʼebé tetu tuir dasin-fuan husi fatin santu,*+ no mós ho mina-oliveira litru tolu ho balu.* 25 Tuirmai kahur buat sira-neʼe sai mina santu;* no tenke kahur hamutuk ho didiʼak.+ Neʼe sei sai mina santu.

26 “Ó tenke fui mina neʼe ba tenda reuniaun nian+ no Arka Aliansa nian,* 27 no mós ba meza ho ninia sasán hotu, ahi-oan fatin no ninia sasán sira, no ba altár insensu nian, 28 no fui mina neʼe ba altár atu hasaʼe sakrifísiu sunu nian no ninia sasán hotu, no ba basia no ninia fatin atu hatuur basia neʼe. 29 Ó tenke halo buat sira-neʼe santu atu sira bele sai santu liu hotu.+ Ema neʼebé santu mak bele kaer buat sira-neʼe.+ 30 Ó tenke fui mina ba Arão+ no ninia oan-mane sira+ no halo sira santu* atu serbí nuʼudar amlulik ba haʼu.+

31 “Ó tenke koʼalia ba ema Izraél, dehan: ‘Mina neʼe tenke kontinua sai nuʼudar haʼu-nia mina santu iha imi-nia jerasaun hotu.+ 32 No imi labele kose mina neʼe ba imi-nia isin, no imi labele kahur mina tuir ida-neʼe. Neʼe mak buat neʼebé santu. No neʼe sei kontinua sai nuʼudar buat santu ba imi. 33 Ema naran deʼit neʼebé halo buat morin hanesan neʼe no ema neʼebé kose mina neʼe ba ema baibain,* nia tenke mate hodi halakon husi povu nia leet.’”+

34 Tuirmai Jeová dehan ba Moisés: “Foti buat morin tuirmai neʼe ho sukat neʼebé hanesan:+ estorak, onika, galbanu no olíbanu* neʼebé moos. 35 Kahur buat sira-neʼe hodi sai insensu;+ kahur buat sira-neʼe ho didiʼak no ho matenek, kahur ho masin,+ no neʼe tenke moos no santu. 36 Ó tenke deʼut balu hodi sai uut loos no tau balu iha Arka Aliansa* nia oin neʼebé iha tenda reuniaun nia laran, iha fatin neʼebé haʼu sei mosu ba ó. Neʼe tenke sai santu liu ba imi. 37 Imi labele kahur buat morin hanesan neʼe ba imi atu uza.+ Imi tenke hafolin ida-neʼe nuʼudar buat santu ba Jeová. 38 Ema naran deʼit neʼebé halo buat ida hanesan neʼe atu horon ninia morin, ema neʼe tenke mate hodi halakon husi povu nia leet.”

31 Jeová koʼalia tan ba Moisés, hodi dehan: 2 “Haʼu hili* Bezalel+ husi suku Judá. Bezalel mak Uri nia oan-mane no Hur nia bei-oan.+ 3 Haʼu sei halo nia nakonu ho haʼu-nia* espíritu, fó nia matenek, kbiit atu komprende, no koñesimentu kona-ba serbisu badaen nian oioin, 4 atu halo dezeñu furak oioin, atu halo serbisu ho osan-mean, osan-mutin no riti, 5 atu tesi no monta fatuk-murak sira,+ no atu halo sasán oioin husi ai.+ 6 Liután neʼe, haʼu hili ona Ahisamak nia oan-mane Oholiab+ husi suku Dan atu ajuda nia, no haʼu halo serbisu-naʼin hotu neʼebé matenek* sai matenek liután, atu nuneʼe sira bele halo buat hotu neʼebé haʼu hatete ba ó hanesan tuirmai neʼe:+ 7 tenda reuniaun nian,+ Arka Aliansa nian*+ no ninia matan,+ no sasán hotu ba tenda neʼe, 8 meza+ no ninia sasán hotu, ahi-oan fatin husi osan-mean neʼebé moos no ninia sasán hotu,+ altár insensu nian,+ 9 altár atu hasaʼe sakrifísiu sunu nian+ no ninia sasán hotu, basia boot no fatin atu hatuur basia neʼe,+ 10 roupa neʼebé soru ho didiʼak, roupa santu ba amlulik Arão, roupa ba ninia oan-mane sira hodi bele serbí nuʼudar amlulik,+ 11 mina santu* no insensu morin neʼebé uza iha fatin sagradu.+ Sira sei halo buat hotu neʼebé haʼu hatete ba ó.”

12 Jeová dehan tan ba Moisés: 13 “Koʼalia ba ema Izraél no hatete ba sira, ‘Imi labele falta atu halaʼo haʼu-nia Sábadu,+ tanba ida-neʼe mak sinál entre haʼu ho imi iha imi-nia jerasaun hotu hodi imi bele hatene katak haʼu, Jeová, mak halo imi santu.* 14 Imi tenke halaʼo Sábadu, tanba neʼe mak buat santu ba imi.+ Ema naran deʼit neʼebé kontra ukun-fuan kona-ba Sábadu tenke hetan kastigu-mate. Se ema ruma halo serbisu iha loron neʼe, ema* neʼe tenke mate hodi halakon husi povu nia leet.+ 15 Imi bele halo serbisu durante loron neen, maibé iha loron hitu mak loron Sábadu atu deskansa husi serbisu hotu.+ Loron neʼe mak loron neʼebé santu ba Jeová. Ema naran deʼit neʼebé halo serbisu iha loron Sábadu tenke hetan kastigu-mate. 16 Ema Izraél tenke halo tuir ukun-fuan kona-ba Sábadu. Sira tenke halaʼo Sábadu iha sira-nia jerasaun hotu. Neʼe mak aliansa ba nafatin. 17 Neʼe mak sinál ba nafatin entre haʼu ho povu Izraél,+ tanba durante loron neen Jeová kria lalehan no rai no iha loron hitu nia para ninia serbisu no deskansa.’”+

18 Bainhira Maromak koʼalia hotu ona ho Moisés iha Foho Sinai, nia fó ba Moisés fatuk-belar rua Aliansa nian,*+ neʼebé Maromak nia liman-fuan rasik mak hakerek.+

32 Liutiha tempu balu, povu neʼe haree katak maski tempu kleur ona, maibé Moisés seidauk tun husi foho neʼe.+ Entaun povu halibur hamutuk haleʼu Arão no dehan ba nia: “Halo maromak ida ba ami atu laʼo uluk liu ami,+ tanba ami la hatene saida mak akontese ona ba Moisés, mane neʼebé lori ami sai husi rai-Ejitu.” 2 Ho ida-neʼe, Arão dehan ba sira: “Foti brinkus osan-mean+ husi imi-nia feen nia tilun, husi imi-nia oan-mane, no husi imi-nia oan-feto, no lori buat sira-neʼe mai haʼu.” 3 Entaun ema hotu hasai sira-nia brinkus osan-mean husi sira-nia tilun no lori buat sira-neʼe ba Arão. 4 Tuirmai nia foti osan-mean husi sira, no nia uza bahat hodi halo sai estátua karau-oan ida.+ No sira hahú dehan: “Oh ema Izraél, neʼe mak ita-nia Maromak, ida neʼebé lori ita sai husi rai-Ejitu.”+

5 Bainhira Arão haree ida-neʼe, nia harii altár ida iha estátua neʼe nia oin. Tuirmai Arão koʼalia ho lian makaʼas dehan: “Aban sei iha festa ba Jeová.” 6 Entaun iha loron tuirmai sira hadeer sedu iha dadeer no hahú hasaʼe sakrifísiu sunu nian no sakrifísiu dame nian. Depois neʼe, povu sira tuur atu han no hemu. Tuirmai sira hamriik hodi halo festa boot.+

7 Jeová dehan ba Moisés: “Tun bá, tanba ó-nia povu neʼebé ó lori sai husi rai-Ejitu halo ona hahalok neʼebé foʼer.+ 8 Sira lalais atu sees husi dalan neʼebé haʼu haruka sira atu laʼo tuir.+ Sira halo ona estátua karau-oan nian ba sira-nia an rasik, no sira kontinua hakruʼuk no hasaʼe sakrifísiu ba estátua neʼe no dehan: ‘Oh ema Izraél, neʼe mak ita-nia Maromak, ida neʼebé lori ita sai husi rai-Ejitu.’” 9 Jeová dehan tan ba Moisés: “Haʼu haree ona katak povu neʼe mak ulun-toos duni.+ 10 Entaun agora husik haʼu atu haʼu bele halakon sira ho haʼu-nia hirus makaʼas, no haʼu sei halo nasaun boot ida husi ó.”+

11 Tuirmai Moisés husu ho laran ba Jeová,*+ ninia Maromak, hodi dehan: “Oh Jeová, tanbasá mak Ita-Boot tenke sai hirus makaʼas ba Ita-nia povu bainhira Ita lori ona sira sai husi rai-Ejitu ho kbiit boot no ho liman neʼebé forte?+ 12 Se Ita halo ida-neʼe, ema Ejitu sei dehan: ‘Nia iha ona hanoin aat ba sira bainhira nia lori sira sai. Nia hakarak oho sira iha área foho nian no halakon sira husi rai leten.’+ Entaun, favór ida tahan netik Ita-nia hirus makaʼas no hanoin fali* kona-ba Ita-nia desizaun atu lori susar ba Ita-nia povu. 13 Hanoin-hetan Ita-nia atan Abraão, Isaac, no Izraél, Ita jura ba sira hodi Ita-nia an rasik no dehan: ‘Haʼu sei halo imi-nia bei-oan sai barak hanesan fitun iha lalehan,+ no haʼu sei fó rai hotu neʼe neʼebé haʼu hili ona ba imi-nia bei-oan sira, atu nuneʼe sira bele foti rai neʼe nuʼudar sira-nian ba nafatin.’”+

14 Entaun Jeová hahú hanoin fali* kona-ba ninia desizaun atu lori susar ba ninia povu hanesan nia fó sai ona.+

15 Tuirmai Moisés tun husi foho neʼe no lori mós iha ninia liman fatuk-belar rua Aliansa nian.*+ Fatuk-belar sira-neʼe iha letra neʼebé bahat iha sorin rua. Letra sira-neʼe iha oin no kotuk. 16 Maromak mak halo fatuk-belar sira-neʼe, no Maromak rasik mak bahat letra neʼebé iha fatuk sira-neʼe.+ 17 Bainhira Josué rona barullu husi povu tanba sira hakilar, nia dehan ba Moisés: “Neʼe mak hakilar funu nian iha povu sira-nia hela-fatin.” 18 Maibé Moisés dehan:

19 Bainhira Moisés hakbesik ba povu nia hela-fatin no haree estátua karau-oan+ no ema neʼebé dansa, nia sai hirus tebes, no nia soe fatuk-belar sira neʼebé iha ninia liman no halo rahun neʼe iha foho nia hun.+ 20 Nia foti karau-oan neʼebé sira halo ona no sunu estátua neʼe no harahun toʼo uut.+ Tuirmai nia lekar neʼe iha bee no haruka ema Izraél hemu bee neʼe.+ 21 No Moisés husu ba Arão: “Povu neʼe halo saida ba ó hodi ó lori sala boot neʼe ba sira-nia leten?” 22 Arão hatán: “Haʼu-nia naʼi, keta sai hirus makaʼas. Ita rasik hatene didiʼak katak povu neʼe hakarak deʼit atu halo aat.+ 23 No sira dehan ba haʼu: ‘Halo maromak ida ba ami atu laʼo uluk liu ami, tanba ami la hatene saida mak akontese ona ba Moisés, mane neʼebé lori ami sai husi rai-Ejitu.’+ 24 Entaun haʼu dehan ba sira: ‘Ema neʼebé iha osan-mean tenke hasai ida-neʼe no fó mai haʼu.’ Tuirmai haʼu soe osan-mean neʼe ba ahi no karau-oan neʼe mosu.”

25 Moisés haree katak Arão husik povu neʼe la kontrola an, entaun sira hamoe an iha sira-nia inimigu nia oin. 26 Tuirmai Moisés hamriik iha portaun atu tama ba ema Izraél nia hela-fatin no dehan: “Sé mak apoia Jeová? Mai besik haʼu!”+ No ema Levi hotu halibur hamutuk haleʼu nia. 27 Depois neʼe, Moisés dehan ba sira: “Jeová, Izraél nia Maromak, dehan nuneʼe: ‘Imi ida-idak tenke tau surik iha imi-nia knotak no laʼo haleʼu hela-fatin hotu husi portaun ida ba portaun seluk, oho imi-nia maluk, imi-nia viziñu, no imi-nia belun diʼak.’”+ 28 Ema Levi sira halo tuir Moisés nia liafuan. Entaun iha loron neʼe maizumenus mane naʼin-3.000 mate. 29 Tuirmai Moisés dehan: “Haketak imi-nia an* ba Jeová ohin. Nia sei fó bensaun ba imi,+ tanba imi ida-idak kontra ona imi-nia oan rasik no imi-nia maun-alin rasik.”+

30 Iha loron tuirmai, Moisés dehan ba povu: “Imi halo ona sala boot, no agora haʼu sei saʼe bá hasoru Jeová no haree se haʼu bele halo buat ruma atu nia perdua imi-nia sala.”+ 31 Entaun Moisés fila fali bá hasoru Jeová no dehan: “Povu neʼe halo ona sala boot! Sira halo ona maromak ba sira-nia an rasik husi osan-mean!+ 32 Maibé agora, se Ita hakarak, favór ida perdua sira-nia sala bá;+ se lae, hamoos haʼu-nia naran husi Ita-nia livru neʼebé Ita hakerek ona.”+ 33 Maski nuneʼe, Jeová dehan ba Moisés: “Ema neʼebé halo sala hasoru haʼu, haʼu sei hamoos ninia naran husi haʼu-nia livru. 34 Agora bá, lori povu neʼe ba fatin neʼebé haʼu fó sai ona ba ó. Haʼu-nia anju sei laʼo uluk liu ó,+ no iha loron neʼebé haʼu tesi-lia, haʼu sei fó kastigu ba sira tanba sira-nia sala.” 35 Tuirmai Jeová hahú lori susar ba povu neʼe tanba sira halo ona estátua karau-oan, katak estátua neʼebé Arão halo ba sira.

33 Jeová dehan tan ba Moisés: “Sai husi fatin neʼe hamutuk ho povu neʼebé ó lori sai husi rai-Ejitu. Laʼo ba rai neʼebé haʼu jura ona ba Abraão, Isaac no Jacob, hodi dehan: ‘Haʼu sei fó rai neʼe ba ó-nia bei-oan.’+ 2 Haʼu sei haruka anju ida laʼo uluk liu imi+ no duni sai ema Kanaan, ema Amoreu, ema Hetes, ema Perizeu, ema Heveu no ema Jebus.+ 3 Laʼo ba rai neʼebé iha susubeen no bani-been barak.+ Maibé haʼu sei la laʼo iha imi-nia leet, tanba imi mak povu neʼebé ulun-toos,+ no karik haʼu sei halakon imi iha dalan.”+

4 Bainhira povu neʼe rona liafuan makaʼas sira-neʼe, sira hahú sai triste, no sira ida mós lakohi hafurak an. 5 Jeová dehan ba Moisés: “Hatete ba ema Izraél: ‘Imi mak povu neʼebé ulun-toos.+ Agora kedas haʼu bele laʼo iha imi-nia leet no halakon imi.+ Entaun keta hafurak imi-nia an, haʼu sei hanoin kona-ba kastigu neʼebé haʼu atu fó ba imi.’” 6 Tan neʼe, hahú husi Foho Horeb, ema Izraél la uza tan* buat oioin hodi hafurak an.

7 Moisés foti ninia tenda no harii iha liʼur, dook uitoan husi ema Izraél nia hela-fatin, no nia bolu neʼe nuʼudar tenda reuniaun nian. Ema hotu neʼebé hakarak husu matadalan husi Jeová+ sei bá tenda reuniaun nian neʼe, neʼebé iha povu nia hela-fatin nia liʼur. 8 Baibain bainhira Moisés laʼo ba tenda neʼe, povu hotu hamriik kedas iha sira-nia tenda nia odamatan, no sira hateke ba Moisés toʼo nia tama ba tenda neʼe. 9 Bainhira Moisés tama ona ba tenda neʼe, kalohan*+ tun kedas no para iha odamatan tenda nian iha tempu neʼebé Maromak koʼalia ho Moisés.+ 10 Bainhira povu hotu haree kalohan* neʼe iha tenda neʼe nia odamatan, sira ida-idak hakruʼuk iha sira rasik nia odamatan tenda nian. 11 Jeová koʼalia ba Moisés oin ba oin,+ hanesan ema ida koʼalia ho ema seluk. Kuandu Moisés fila fali ba povu sira-nia hela-fatin, Nun nia oan-mane Josué,+ neʼebé serbí nuʼudar Moisés nia ajudante no atan,+ la husik tenda neʼe.

12 Moisés koʼalia ba Jeová, hodi dehan: “Ita hatete mai haʼu: ‘Lori povu neʼe no bá’, maibé Ita la fó-hatene mai haʼu kona-ba sé mak Ita sei haruka atu bá hamutuk ho haʼu. Liután neʼe, Ita dehan: ‘Haʼu hatene didiʼak kona-ba ó,* no ó monu loos ba haʼu-nia laran.’ 13 Entaun favór ida, se haʼu monu loos ba Ita-nia laran, halo haʼu hatene Ita-nia dalan sira,+ atu nuneʼe haʼu bele hatene Ita no Ita nafatin simu haʼu. No mós hanoin-hetan bá katak nasaun neʼe mak Ita-nia povu.”+ 14 Entaun Maromak dehan: “Haʼu rasik* mak sei laʼo ho ó,+ no haʼu sei husik ó deskansa.”+ 15 Tuirmai Moisés dehan ba nia: “Se Ita rasik* la laʼo hamutuk ho ami, keta lori ami sai husi fatin neʼe. 16 Se Ita la laʼo hamutuk ho ami, oinsá mak ema bele hatene katak Ita kontente ho haʼu no Ita-nia povu? Maibé se Ita laʼo hamutuk ho ami,+ haʼu no Ita-nia povu sei sai buat espesiál iha povu sira seluk nia leet iha rai leten.”+

17 Jeová dehan tan ba Moisés: “Haʼu mós sei halo buat neʼebé ó husu, tanba ó monu loos ba haʼu-nia laran no haʼu hatene didiʼak kona-ba ó.”* 18 Tuirmai Moisés dehan: “Favór ida hatudu Ita-nia glória ba haʼu.” 19 Maibé nia dehan: “Haʼu sei halo ó haree haʼu-nia hahalok diʼak hotu, no haʼu sei fó sai haʼu-nia naran Jeová iha ó-nia oin.+ Haʼu sei simu ema neʼebé haʼu gosta, haʼu sei hatudu laran-sadiʼa ba ema neʼebé haʼu hakarak hatudu laran-sadiʼa.”+ 20 Maibé nia hatutan tan: “Ó labele haree haʼu-nia oin, tanba ema neʼebé haree haʼu-nia oin sei la kontinua moris.”

21 Jeová hatutan tan: “Iha neʼe iha fatin ida besik haʼu. Ó tenke hamriik iha fatuk nia leten. 22 Bainhira haʼu-nia glória liu iha ó-nia oin, haʼu sei hatama ó iha fatuk-kuak, haʼu sei proteje ó ho haʼu-nia liman toʼo haʼu liu tiha. 23 Depois neʼe, haʼu sei hasai haʼu-nia liman, no ó sei haree haʼu-nia kotuk. Maibé ó labele haree haʼu-nia oin.”+

34 Tuirmai Jeová dehan ba Moisés: “Ó rasik bahat fatuk-belar rua hanesan fatuk-belar uluk nian,+ no haʼu sei hakerek iha fatuk-belar sira-neʼe liafuan hotu neʼebé iha fatuk-belar uluk nian+ neʼebé ó harahun ona.+ 2 Ó tenke sai prontu iha dadeer, tanba ó sei saʼe ba Foho Sinai iha dadeer no hamriik iha haʼu-nia oin iha foho-tutun.+ 3 Maibé ema ida labele saʼe ba foho neʼe hamutuk ho ó, no ema ida labele laʼo iha foho neʼe. Bibi ka karau ida mós labele han duʼut iha foho neʼe nia oin.”+

4 Entaun Moisés bahat fatuk-belar rua hanesan fatuk-belar uluk nian no nia hadeer sedu iha dadeer no saʼe ba Foho Sinai, hodi tuir mandamentu neʼebé Jeová fó sai ona ba nia, no nia lori fatuk-belar rua neʼe iha ninia liman. 5 Tuirmai, Jeová tun+ iha kalohan laran no hamriik besik Moisés iha foho neʼe no fó sai ninia naran Jeová.+ 6 Jeová liu iha Moisés nia oin no dehan: “Jeová, Jeová, Maromak neʼebé laran-sadiʼa+ no laran-diʼak,+ la hirus lalais+ no nakonu ho domin neʼebé laran-metin*+ no lia-loos,*+ 7 Maromak neʼebé hatudu domin neʼebé laran-metin ba ema rihun ba rihun,+ fó perdua ba sala sira no ba hahalok kontra lei no hahalok aat,+ maibé nia sei fó duni kastigu ba ema neʼebé halo sala,+ ba oan no bei-oan tanba aman nia sala, ba jerasaun tolu no ba jerasaun haat.”+

8 Moisés hakneʼak kedas no hakruʼuk ho oin ba rai. 9 Tuirmai Moisés dehan: “Oh Jeová, se haʼu monu loos ba Ita-nia laran, entaun favór ida, oh Jeová, laʼo hamutuk ho ami iha ami-nia leet,+ maski ami mak povu neʼebé ulun-toos,+ no perdua ami-nia hahalok kontra lei no ami-nia sala,+ no simu ami nuʼudar Ita-nia povu.” 10 Ho ida-neʼe, Maromak hatán: “Agora haʼu halo aliansa ida: Iha ó-nia povu hotu nia oin, haʼu sei halo buat furak sira neʼebé nunka akontese* iha mundu tomak ka iha nasaun hotu nia leet,+ no nasaun hotu neʼebé haleʼu imi sei haree Jeová nia serbisu, tanba haʼu sei halo buat kmanek liu hotu ba imi.+

11 “Rona didiʼak ba mandamentu neʼebé haʼu fó sai ba imi ohin.+ Agora haʼu duni sai ema Amoreu, ema Kanaan, ema Hetes, ema Perizeu, ema Heveu no ema Jebus+ husi imi-nia oin. 12 Kuidadu bá atu imi la halo aliansa ho ema iha rai neʼebé imi sei bá,+ se lae, ida-neʼe sei sai nuʼudar lasu ba imi.+ 13 Maibé imi tenke harahun sira-nia altár, baku rahun sira-nia fatuk lulik sira,* no tesi sira-nia ai-riin lulik.*+ 14 Imi labele hakneʼak no hakruʼuk ba maromak seluk,+ tanba Jeová mak Maromak neʼebé hakarak ema atu adora nia mesak deʼit.* Sin, nia mak Maromak neʼebé hakarak simu adorasaun ba nia an deʼit.+ 15 Kuidadu bá atu imi la halo aliansa ida ho ema iha rai neʼe, tanba bainhira sira adora* sira-nia maromak sira no hasaʼe sakrifísiu ba sira-nia maromak sira,+ karik sira sei konvida imi no imi sei han ai-han husi sakrifísiu neʼebé sira hasaʼe.+ 16 Tuirmai imi sei hili sira-nia oan-feto balu hodi sai imi-nia oan-mane sira-nia feen,+ no sira-nia oan-feto sira sei adora* sira-nia maromak sira no dada mós imi-nia oan-mane sira hodi adora* sira-nia maromak.+

17 “Imi labele halo maromak sira husi besi.+

18 “Imi tenke selebra Festa Paun Fermentu-Laek nian.+ Imi tenke han paun neʼebé la iha fermentu hodi tuir haʼu-nia mandamentu ba imi. Halo ida-neʼe durante loron hitu hodi tuir tempu neʼebé deside tiha ona iha fulan-Abib,*+ tanba iha fulan-Abib mak imi sai husi rai-Ejitu.

19 “Oan-mane primeiru* hotu mak haʼu-nian,+ neʼe inklui imi-nia animál-hakiak hotu, maski karau-aman ka bibi-malae aman neʼebé moris primeiru.+ 20 Imi tenke sosa fali kuda-burru oan primeiru ho bibi-malae ida. Maibé se imi la sosa fali kuda-burru neʼe, imi tenke halo tohar ninia kakorok. Imi tenke sosa fali imi-nia oan-mane primeiru hotu.+ Ema ida labele hamriik iha haʼu-nia oin ho liman-mamuk.

21 “Durante loron neen imi sei halo serbisu, maibé iha loron hitu imi tenke deskansa.*+ Maski durante tempu fila rai nian no iha tempu koʼa nian, imi tenke deskansa.

22 Imi tenke uza trigu primeiru husi imi-nia toʼos hodi selebra Festa Semana nian, no mós selebra Festa Halibur Ai-Han nian* iha tinan nia rohan.+

23 “Dala tolu iha tinan ida nia laran, mane hotu iha imi-nia leet tenke hamriik iha Jeová, Naʼi neʼebé loos, Izraél nia Maromak nia oin.+ 24 Tanba haʼu sei duni sai nasaun sira husi imi-nia oin,+ no haʼu sei halo luan liután imi-nia rai, no ema ida sei la hadau imi-nia rai bainhira imi bá hodi hamriik iha Jeová, imi-nia Maromak, nia oin dala tolu iha tinan ida.

25 “Imi labele hasaʼe raan husi haʼu-nia sakrifísiu hamutuk ho buat naran deʼit neʼebé iha fermentu.+ No imi labele rai sakrifísiu husi Festa Páskua* toʼo dadeer.+

26 “Imi tenke lori ai-han primeiru neʼebé diʼak liu hotu husi imi-nia toʼos, imi tenke lori neʼe ba Jeová, imi-nia Maromak, nia uma.+

“Imi labele daʼan bibi-timur oan iha ninia inan nia susubeen.”+

27 Jeová koʼalia tan ba Moisés: “Ó tenke hakerek liafuan sira-neʼe,+ tanba haʼu halo aliansa ho ó no ho ema Izraél hodi tuir liafuan sira-neʼe.”+ 28 Moisés hela iha neʼebá ho Jeová ba loron 40 no kalan 40. Nia la han paun ida no la hemu bee.+ No Maromak hakerek liafuan aliansa nian, katak Ukun-Fuan Sanulu,* iha fatuk-belar.+

29 Tuirmai Moisés tun husi Foho Sinai, no nia lori iha nia liman fatuk-belar rua Aliansa nian.*+ Bainhira Moisés tun husi foho neʼe, nia la hatene katak ninia oin naroman tanba nia foin koʼalia ho Maromak. 30 Bainhira Arão no ema Izraél hotu haree Moisés, sira haree katak ninia oin naroman no sira sai taʼuk atu hakbesik ba nia.+

31 Maibé Moisés bolu sira, entaun Arão no povu nia xefe hotu hakbesik ba nia, no nia koʼalia ho sira. 32 Depois neʼe, ema Izraél hotu hakbesik ba nia, no nia hatoʼo ba sira ukun-fuan hotu neʼebé Jeová fó ba nia iha Foho Sinai.+ 33 Bainhira Moisés koʼalia tiha ho sira, nia taka ninia oin ho hena.+ 34 Maibé bainhira Moisés tama ba tenda hodi hamriik iha Jeová nia oin atu koʼalia ho nia, Moisés hasai hena neʼe toʼo nia sai fali ba liʼur.+ Tuirmai nia sai no fó-hatene ba ema Izraél kona-ba ukun-fuan neʼebé nia simu ona.+ 35 No ema Izraél haree katak Moisés nia oin naroman. Entaun Moisés taka fali hena ba ninia oin toʼo nia tama fali atu koʼalia ho Maromak.*+

35 Liutiha tempu balu Moisés halibur ema Izraél tomak no dehan ba sira: “Jeová fó mandamentu tuirmai neʼe ba imi:+ 2 Imi bele halo serbisu durante loron neen, maibé iha loron hitu sei sai nuʼudar buat neʼebé santu ba imi, neʼe mak loron Sábadu ba Jeová hodi deskansa husi serbisu hotu.+ Ema naran deʼit neʼebé halo serbisu iha loron neʼe tenke hetan kastigu-mate.+ 3 Imi labele sunu ahi iha loron Sábadu iha imi-nia hela-fatin sira.”

4 Moisés dehan tan ba ema Izraél tomak: “Neʼe mak Jeová nia mandamentu ba imi: 5 ‘Fó kontribuisaun ba Jeová husi buat neʼebé imi iha.+ Ema ida-idak neʼebé sira-nia laran book sira+ atu fó kontribuisaun ba Jeová sei fó buat sira tuirmai neʼe: osan-mean, osan-mutin, riti, 6 kabas kór-azúl, kabas kór-violeta husi bibi-malae fulun, kabas kór-mean, kabas-liñu neʼebé diʼak, bibi-timur nia fulun,+ 7 bibi-malae aman nia kulit neʼebé tau kór-mean, asu-tasi* nia kulit, ai-akásia, 8 mina ba ahi-oan sira, bálsamu ba mina santu* no mós ba insensu morin,+ 9 fatuk-oniks, no fatuk-murak sira seluk atu monta iha efod*+ no bornál kiʼik* neʼebé tara iha hirus-matan.+

10 “‘Ema hotu neʼebé matenek*+ iha imi-nia leet tenke mai no halo buat hotu neʼebé Jeová haruka atu halo, 11 neʼe mak, halo tenda santu no ninia parte hotu no nia hena sira atu taka, no ninia besi-kaʼit sira no ninia arus sira, ai-lolon sira, ai-riin sira, no ninia hun sira; 12 Arka+ no ninia ai-loos sira,+ ninia matan,+ no kortina+ neʼebé tara iha Arka nia oin; 13 meza+ no ninia ai-loos sira no ninia sasán hotu no paun santu;+ 14 ahi-oan fatin+ atu fó naroman no ninia sasán hotu, no ahi-oan sira no mina atu halo lakan ahi-oan;+ 15 altár ba insensu+ no ninia ai-loos sira; mina santu no insensu neʼebé morin;+ kortina ba tenda santu nia odamatan; 16 altár ba sakrifísiu sunu nian+ no ninia rede husi riti, ninia ai-loos sira no ninia sasán hotu; basia boot no fatin atu hatuur basia neʼe;+ 17 pátiu* nia hena sira,+ ninia riin sira no ninia hun sira; kortina ba pátiu nia odamatan; 18 pregu ba tenda santu no pregu ba pátiu no sira-nia tali sira;+ 19 roupa neʼebé soru ho didiʼak+ atu uza hodi serbí iha fatin sagradu, roupa santu ba amlulik Arão,+ no roupa ba ninia oan-mane sira hodi bele serbí nuʼudar amlulik.’”

20 Entaun ema Izraél tomak sai husi Moisés nia oin. 21 Depois neʼe, ema hotu neʼebé sira-nia laran book sira+ no mós ema hotu neʼebé hakarak tebes atu fó kontribuisaun, sira lori sira-nia kontribuisaun ba Jeová atu bele uza ba tenda reuniaun nian, ba serbisu hotu neʼebé halaʼo iha tenda neʼe, no ba roupa santu sira. 22 Mane no mós feto sira kontinua mai, no sira ida-idak ho hakarak rasik lori alfinete osan-mean, brinkus, kadeli, no buat murak seluk, no mós lori sasán hotu husi osan-mean. Sira hotu entrega sira-nia osan-mean ba Jeová nuʼudar prezente.*+ 23 No ema hotu neʼebé iha kabas kór-azúl, kabas kór-violeta husi bibi-malae fulun, kabas kór-mean, kabas-liñu neʼebé diʼak, bibi-timur nia fulun, bibi-malae aman nia kulit neʼebé tau kór-mean, no asu-tasi nia kulit, sira lori buat sira-neʼe mai. 24 Ema hotu neʼebé hakarak fó osan-mutin no riti, sira lori kontribuisaun ba Jeová, no ema hotu neʼebé iha ai-akásia atu uza iha serbisu neʼe, sira lori ai neʼe mai.

25 Feto hotu neʼebé matenek+ atu halo kabas ho liman, sira lori mai buat neʼebé sira halo ona hanesan tuirmai neʼe: kabas kór-azúl, kabas kór-violeta husi bibi-malae fulun, kabas kór-mean, no kabas-liñu neʼebé diʼak. 26 Kona-ba feto hotu neʼebé matenek, sira-nia laran book sira atu halo kabas husi bibi-timur nia fulun.

27 No povu nia xefe sira lori fatuk-oniks no fatuk-murak sira seluk atu monta iha efod no bornál kiʼik neʼebé tara iha hirus-matan,+ 28 no xefe sira mós lori bálsamu no mina ba ahi-oan no ba mina santu+ no mós ba insensu morin.+ 29 Mane no feto hotu ho hakarak rasik lori buat ruma ba Jeová atu uza iha serbisu neʼebé Maromak haruka Moisés atu halo. Ema Izraél lori prezente sira-neʼe nuʼudar sakrifísiu neʼebé sira fó ba Jeová ho hakarak rasik.+

30 Tuirmai Moisés dehan ba ema Izraél: “Jeová hili ona Bezalel husi suku Judá. Bezalel mak Uri nia oan-mane no Hur nia bei-oan.+ 31 Maromak sei halo nia nakonu ho Maromak nia espíritu, fó nia matenek, kbiit atu komprende, no koñesimentu kona-ba serbisu badaen nian oioin 32 atu halo dezeñu furak oioin, atu halo serbisu ho osan-mean, osan-mutin no riti, 33 atu tesi no monta fatuk-murak sira, no atu halo sasán furak oioin husi ai. 34 No Maromak fó kbiit atu hanorin ba Bezalel, no mós ba Ahisamak nia oan-mane Oholiab+ husi suku Dan. 35 Nia halo sira nakonu ho matenek*+ atu halo serbisu badaen nian oioin, suku buat oioin, no mós soru buat oioin hodi uza kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak. Mane sira-neʼe sei halo serbisu oioin no prepara dezeñu oioin.

36 “Bezalel sei halo serbisu hamutuk ho Oholiab no mós ema matenek* hotu neʼebé Jeová fó ona kbiit atu komprende no matenek atu nuneʼe sira bele hatene oinsá atu halo serbisu santu hotu hodi tuir Jeová nia mandamentu.”+

2 Tuirmai Moisés bolu Bezalel no Oholiab no ema matenek hotu neʼebé Jeová fó ona kbiit atu komprende,+ sira hotu neʼebé sira-nia laran book sira atu halo serbisu neʼe ho hakarak rasik.+ 3 Tuirmai sira foti husi Moisés kontribuisaun hotu+ neʼebé ema Izraél fó atu apoia serbisu santu. Maibé dadeer-dadeer, ema Izraél kontinua lori kontribuisaun neʼebé sira fó ho hakarak rasik.

4 Bainhira sira hahú ona halo serbisu santu, badaen hotu neʼebé matenek komesa mai tuituir malu, 5 no sira dehan ba Moisés: “Povu neʼe lori barak liu fali buat neʼebé presiza ba serbisu neʼebé Jeová haruka atu halo.” 6 Entaun Moisés haruka atu fó avizu iha ema Izraél nia hela-fatin hotu, hodi dehan: “Imi la presiza lori tan sasán ba tenda santu.” Ho ida-neʼe, povu la lori tan buat seluk. 7 Sasán sira toʼo ona atu halo serbisu hotu neʼe, no loloos sasán sira barak liu fali buat neʼebé presiza.

8 Entaun, badaen hotu neʼebé iha matenek+ komesa halo tenda santu+ no sira halo tenda neʼe hodi uza hena tenda nian sanulu neʼebé halo husi kabas-liñu neʼebé diʼak, kabas kór-azúl, kabas kór-violeta husi bibi-malae fulun no kabas kór-mean. Nia* halo buat sira-neʼe hodi suku mós dezeñu kerubín iha hena sira-neʼe.+ 9 No hena tenda nian ida-idak nia naruk mak metru 12 ho sentímetru 46* no luan metru 1 ho sentímetru 78.* Hena tenda nian ida-idak boot hanesan. 10 Tuirmai nia tutan hena tenda nian lima hamutuk hodi sai hena boot ida, no nia tutan hena lima seluk hodi sai hena boot ida. 11 Depois neʼe, iha hena boot ida-idak nia ninin, nia suku fatin atu kaʼit hodi uza kabas kór-azúl, atu nuneʼe hena boot rua neʼe bele tutan malu. 12 Nia suku fatin atu kaʼit hamutuk 50 iha hena boot ida nia ninin no fatin atu kaʼit hamutuk 50 iha hena boot ida seluk nia ninin, atu nuneʼe bele tutan hena sira-neʼe hamutuk. 13 Ikusmai, nia halo besi-kaʼit 50 husi osan-mean no uza besi-kaʼit sira-neʼe atu tutan hena boot sira-neʼe hamutuk, no neʼe sai hena ida deʼit hodi taka tenda santu.

14 Tuirmai nia halo hena husi bibi-timur nia fulun atu taka tenda santu. Nia halo hena tenda nian hamutuk 11.+ 15 Hena tenda nian ida-idak nia naruk mak metru 13* no luan metru 1 ho sentímetru 78. Hena tenda nian 11 boot hanesan. 16 Tuirmai nia tutan hena tenda nian lima hamutuk hodi sai hena boot ida, no nia tutan hena neen seluk hodi sai hena boot ida. 17 Depois neʼe, nia halo fatin atu kaʼit hamutuk 50 iha hena boot ida nia ninin iha fatin neʼebé tutan malu, no nia halo fatin atu kaʼit hamutuk 50 iha hena boot ida seluk nia ninin hodi hena sira-neʼe bele tutan malu. 18 No nia halo besi-kaʼit 50 husi riti atu uza hodi tutan hena sira-neʼe hamutuk hodi sai hena ida deʼit.

19 Nia suku bibi-malae aman nia kulit neʼebé tau kór-mean atu taka tenda santu no mós suku asu-tasi* nia kulit atu taka tan iha leten.+

20 Tuirmai nia uza ai-akásia+ hodi halo arus sira neʼebé hamriik loos iha tenda santu.+ 21 Arus ida-idak aas metru 4 ho sentímetru 45* no luan sentímetru 67.* 22 Arus ida-idak iha junta* rua neʼebé liga malu. Neʼe mak dalan neʼebé nia halo arus hotu ba tenda santu neʼe. 23 Ho ida-neʼe, nia halo arus 20 atu tau iha tenda santu nia parte súl. 24 Tuirmai nia halo arus hun 40 husi osan-mutin atu tau iha arus 20 nia okos, arus hun rua tau iha arus ida nia junta rua nia okos, no nia tau arus hun rua ba arus ida-idak nia okos.+ 25 Nia halo arus 20 ba tenda santu neʼe nia sorin seluk neʼebé iha parte norte, 26 no nia mós halo arus hun hamutuk 40 husi osan-mutin, arus hun rua tau iha arus primeiru nia okos no arus hun rua ba arus ida-idak nia okos.

27 Nia halo arus neen ba tenda santu nia parte kotuk neʼebé iha parte oeste.+ 28 Nia halo arus rua hodi sai nuʼudar riin ba lidun rua iha tenda santu neʼe nia kotuk. 29 Arus ida-idak halo husi ai-kabelak tomak rua husi okos toʼo tutun, no ai-kabelak sira-neʼe tutan malu iha argola primeiru. Nia halo nuneʼe ba arus neʼebé iha lidun rua. 30 Entaun arus sira hamutuk ualu no mós arus hun hamutuk 16 husi osan-mutin, no arus hun rua iha arus ida-idak nia okos.

31 Tuirmai nia halo ai-akásia lolon lima atu bele liga arus sira neʼebé iha tenda santu nia sorin ida,+ 32 no ai-lolon lima ba arus sira neʼebé iha sorin seluk husi tenda santu neʼe, no ai-lolon lima tan ba arus sira neʼebé iha tenda santu nia parte oeste, katak tenda santu nia kotuk. 33 Nia halo ai-lolon neʼebé tau iha arus sira-nia klaran, no neʼe naruk husi rohan ida ba rohan seluk. 34 Nia taka arus sira ho osan-mean, no nia halo sira-nia argola husi osan-mean hodi tahan ai-lolon sira, no nia taka ai-lolon sira-neʼe ho osan-mean.+

35 Tuirmai nia halo kortina ida+ ho kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak. Nia borda mós dezeñu kerubín iha kortina neʼe.+ 36 Tuirmai nia halo ai-riin haat husi ai-akásia ba kortina neʼe no taka ho osan-mean, hamutuk ho sira-nia besi-kaʼit sira husi osan-mean, no nia halo riin hun haat ba ai-riin sira-neʼe husi osan-mutin. 37 Depois neʼe, nia halo kortina ba tenda nia odamatan hodi uza kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak neʼebé soru hamutuk,+ 38 nia mós halo ai-riin lima no sira-nia besi-kaʼit sira. Nia taka ai-riin sira-neʼe nia tutun no sira-nia argola ho osan-mean, maibé riin hun lima mak husi riti.

37 Tuirmai Bezalel+ halo Arka+ husi ai-akásia, naruk metru 1 ho sentímetru 11,* luan sentímetru 67* no aas sentímetru 67.+ 2 Nia taka Arka neʼe ho osan-mean neʼebé moos. Nia taka Arka nia laran no liʼur ho osan-mean, no enfeita haleʼu Arka neʼe nia ninin ho osan-mean.+ 3 Depois neʼe, nia halo argola haat husi osan-mean ba Arka neʼe, no tau neʼe iha Arka nia ain haat nia leten, argola rua iha sorin ida no argola rua iha sorin seluk. 4 Tuirmai nia halo ai-loos sira husi ai-akásia no taka ho osan-mean.+ 5 No nia hatama ai-loos sira-neʼe liuhusi argola sira neʼebé iha Arka nia sorin-sorin hodi bele hulan Arka neʼe.+

6 Nia halo Arka nia matan husi osan-mean neʼebé moos,+ naruk metru 1 ho sentímetru 11 no luan sentímetru 67.+ 7 Tuirmai nia halo kerubín rua+ husi osan-mean hodi uza martelu no tau iha Arka matan nia leten iha sorin-sorin.+ 8 Nia tau kerubín ida iha sorin ida no kerubín seluk iha sorin seluk. Nia tau kerubín iha Arka matan nia leten iha sorin-sorin. 9 Kerubín rua neʼe nia liras loke ba leten hodi taka Arka nia matan ho sira-nia liras.+ Sira fila oin ba malu, no sira-nia oin hakruʼuk ba Arka nia matan.+

10 Tuirmai nia halo meza ida husi ai-akásia.+ Meza neʼe nia naruk mak sentímetru 89,* luan sentímetru 45* no aas sentímetru 67.+ 11 No nia taka meza neʼe ho osan-mean neʼebé moos no enfeita haleʼu nia ninin ho osan-mean. 12 Nia halo meza nia ninin luan maizumenus sentímetru 7* no enfeita haleʼu meza ninin neʼe ho osan-mean. 13 Depois neʼe, nia halo argola haat husi osan-mean no tau argola sira-neʼe iha meza nia sikun haat iha fatin neʼebé meza nia ain haat liga ho meza neʼe. 14 Argola sira-neʼe besik meza ninin hodi bele hatama ai-loos sira atu hiʼit meza neʼe. 15 Tuirmai nia halo ai-loos sira husi ai-akásia no taka ho osan-mean no uza ai-loos sira-neʼe atu hiʼit meza neʼe. 16 Depois neʼe, nia halo sasán oioin husi osan-mean neʼebé moos hodi tau iha meza leten. Sasán sira-neʼe mak bikan, kopu, no mós manko ho buli neʼebé uza atu fui sakrifísiu hemu nian.+

17 Tuirmai nia halo ahi-oan fatin+ husi osan-mean neʼebé moos hodi tuku ho martelu. No nia uza osan-mean tomak ida hodi halo ahi-oan fatin neʼe nia hun, kain, tahan,* kafuʼak no funan.+ 18 Sanak neen sai husi ahi-oan fatin neʼe nia kain, sanak tolu iha sorin ida no sanak tolu iha sorin seluk. 19 Ahi-oan fatin nia tahan tolu iha ninia sanak sira iha sorin ida halo hanesan ai-amendueira funan, no ninia kafuʼak ho ninia funan sira halo tuituir malu; no iha ahi-oan fatin nia tahan iha ninia sanak sira iha sorin seluk mós halo hanesan ai-amendueira funan, no ninia kafuʼak ho ninia funan sira halo tuituir malu. Neʼe mak dalan neʼebé nia halo sanak neen neʼebé sai husi ahi-oan fatin nia kain. 20 No ahi-oan fatin nia kain iha tahan haat neʼebé halo hanesan ai-amendueira nia funan, hamutuk ho ninia kafuʼak no ninia funan halo tuituir malu. 21 No ahi-oan fatin nia sanak rua primeiru neʼebé sai husi ninia kain, iha kafuʼak ida iha sira-nia okos, no ahi-oan fatin nia sanak rua tan iha kafuʼak ida iha sira-nia okos, nuneʼe mós ho ahi-oan fatin nia sanak rua seluk tan iha kafuʼak ida iha sira-nia okos. Neʼe mak kafuʼak sira iha sanak neen nia okos neʼebé sai husi ahi-oan fatin nia kain. 22 Nia uza osan-mean tomak ida neʼebé moos atu halo kafuʼak sira-neʼe no mós sanak sira no ahi-oan fatin tomak, no nia halo neʼe hodi tuku ho martelu. 23 Tuirmai nia halo ahi-oan hitu+ no halo ahi-oan fatin nia besi-habit no mós fatin ba ahi-oan nia kabas, no nia halo buat sira-neʼe husi osan-mean neʼebé moos. 24 Nia halo ahi-oan fatin neʼe hamutuk ho ninia sasán hotu hodi uza osan-mean neʼebé moos kilograma 34 ho grama 200.*

25 Tuirmai nia halo altár insensu nian+ husi ai-akásia. Altár neʼe kuadradu, no ninia naruk sentímetru 45, luan sentímetru 45 no aas sentímetru 89. Altár no ninia dikur sira halo husi ai ida deʼit.+ 26 No nia taka altár neʼe ho osan-mean neʼebé moos. Nia taka osan-mean iha altár neʼe nia leten, nia sorin hotu no ninia dikur sira, no nia enfeita haleʼu altár neʼe nia ninin ho osan-mean. 27 No nia halo argola rua husi osan-mean no tau iha altár nia sorin rua, iha altár nia ninin neʼebé enfeita ona nia okos, no argola sira-neʼe mak fatin atu hatama ai-loos sira hodi hiʼit altár neʼe. 28 Depois neʼe, nia halo ai-loos sira husi ai-akásia no taka ho osan-mean. 29 Nia mós halo mina santu*+ no insensu morin neʼebé moos,+ hodi kahur hamutuk ho didiʼak.

38 Bezalel halo altár ba sakrifísiu sunu nian husi ai-akásia. Altár neʼe kuadradu, no ninia naruk metru 2 ho sentímetru 22,* luan metru 2 ho sentímetru 22 no aas metru 1 ho sentímetru 34.*+ 2 Tuirmai nia halo dikur sira iha altár nia sikun haat. No dikur sira-neʼe mak parte ida deʼit ho altár neʼe. Depois neʼe, nia taka altár neʼe ho riti.+ 3 Nia halo sasán hotu ba altár neʼe, altár nia balde, kanuru boot, manko, garfu no ahi-anar fatin. Nia halo sasán hotu neʼe husi riti. 4 Nia halo rede husi riti ba altár neʼe, no tau rede neʼe iha altár klaran, iha altár neʼe nia ninin okos. 5 Nia halo argola haat iha sikun haat besik rede husi riti, no argola sira-neʼe sai nuʼudar fatin atu hatama ai-loos sira. 6 Tuirmai nia halo ai-loos sira husi ai-akásia no taka ho riti. 7 Nia hatama ai-loos sira-neʼe iha argola sira neʼebé iha altár nia sorin-sorin hodi bele hiʼit altár neʼe. No nia halo altár neʼe husi ai-kabelak hanesan kaixote ida neʼebé mamuk iha klaran.

8 Tuirmai nia halo basia boot no fatin atu hatuur basia neʼe husi riti.+ Nia halo neʼe hodi uza espellu* sira neʼebé feto sira fó, katak feto sira neʼebé iha knaar atu serbí iha odamatan ba tenda reuniaun nian.

9 Depois neʼe, nia halo pátiu.*+ No iha pátiu neʼe nia parte súl, nia halo hena husi kabas-liñu neʼebé diʼak atu tara hanesan didin, ho luan metru 44 ho balu.*+ 10 Nia halo ai-riin 20 no riin hun 20 husi riti, no ai-riin sira-neʼe nia besi-kaʼit no argola sira mak halo husi osan-mutin. 11 No mós, hena neʼebé tara iha parte norte, luan metru 44 ho balu. No iha parte neʼe iha ai-riin 20 no hun 20 neʼebé halo husi riti. Ai-riin sira-neʼe nia besi-kaʼit no sira-nia argola sira halo husi osan-mutin. 12 Maibé hena neʼebé tara iha parte oeste luan metru 22.* No parte neʼe iha ai-riin sanulu no riin hun sanulu, no ninia besi-kaʼit sira no argola sira halo husi osan-mutin. 13 Pátiu iha parte leste* nia luan metru 22. 14 Iha odamatan nia sorin ida, nia tara hena neʼebé luan metru 6 ho balu,* no iha parte neʼe iha ai-riin tolu no riin hun tolu. 15 No iha odamatan nia sorin seluk iha pátiu neʼe, nia tara hena neʼebé luan metru 6 ho balu, no iha parte neʼe iha ai-riin tolu no riin hun tolu. 16 Hena hotu neʼebé tara haleʼu pátiu mak halo husi kabas-liñu neʼebé diʼak. 17 Ai-riin sira-neʼe nia hun hotu mak husi riti, ninia besi-kaʼit no argola sira mak husi osan-mutin, no iha ai-riin sira-neʼe nia tutun taka ho osan-mutin, no mós buat neʼebé uza atu tutan ai-riin hotu neʼebé iha pátiu neʼe mak husi osan-mutin.+

18 Kortina ba odamatan iha pátiu neʼe mak halo husi kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak. Kortina neʼe naruk metru 9* no aas metru 2 ho sentímetru 22, no neʼe aas hanesan ho hena sira seluk neʼebé tara iha pátiu neʼe.+ 19 Kortina nia ai-riin haat no ninia hun haat halo husi riti. Ninia besi-kaʼit no argola sira halo husi osan-mutin, no riin sira-neʼe nia tutun taka ho osan-mutin. 20 Pregu hotu ba tenda santu neʼe no ba pátiu mak halo husi riti.+

21 Tuirmai neʼe mak lista kona-ba sasán sira neʼebé Moisés haruka atu halo ba tenda santu neʼebé iha Arka Aliansa nian,*+ no ema Levi halaʼo knaar neʼe+ hodi tuir matadalan husi amlulik Arão nia oan-mane Itamar.+ 22 Bezalel+ husi suku Judá halo buat hotu hodi tuir mandamentu neʼebé Jeová fó sai ona ba Moisés. Bezalel mak Uri nia oan-mane no Hur nia bei-oan. 23 No Oholiab+ mak ajuda Bezalel. Oholiab mak Ahisamak nia oan-mane husi suku Dan, nia mak badaen ida no nia matenek atu suku no soru buat oioin hodi uza kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak.

24 Osan-mean hotu neʼebé uza ba serbisu hotu iha fatin santu hamutuk kilograma 1.000* neʼebé tetu tuir dasin-fuan husi fatin santu,* osan-mean hotu neʼe fó nuʼudar sakrifísiu doko bá-mai nian.+ 25 No mane sira neʼebé rejistu ona fó osan-mutin kilograma 3.440* neʼebé tetu tuir dasin-fuan husi fatin santu.* 26 Mane neʼebé rejistu ona husi tinan 20 ba leten, sira ida-idak lori osan-mutin grama neen* neʼebé tetu tuir dasin-fuan husi fatin santu.*+ Mane hotu neʼe hamutuk naʼin-603.550.+

27 Osan-mutin neʼebé uza atu halo arus hun sira ba fatin santu neʼe no riin hun sira ba kortina hamutuk kilograma 3.420;* osan-mutin atu halo hun 100 mak kilograma 3.420, neʼe katak uza osan-mutin kilograma 34 ho grama 200* atu halo hun ida-idak.+ 28 Nia uza osan-mutin kilograma 20* hodi halo besi-kaʼit ba ai-riin sira no taka iha riin sira-nia tutun no nia mós tutan ai-riin sira hamutuk.

29 Riti husi sakrifísiu* hamutuk kilograma 2.420.* 30 Nia uza riti neʼe atu halo hun sira ba odamatan tenda reuniaun nian, no halo altár no ninia rede, no mós altár nia sasán hotu. 31 Nia mós uza riti neʼe atu halo hun sira ba pátiu, hun ba odamatan ba pátiu, no tenda santu nia pregu sira hotu no pátiu nia pregu sira hotu.+

39 Sira soru didiʼak roupa neʼebé sei uza atu serbí iha fatin santu hodi uza kabas kór-azúl, kabas kór-violeta husi bibi-malae fulun no kabas kór-mean.+ No mós sira halo roupa santu ba Arão+ hodi tuir mandamentu neʼebé Jeová fó sai ona ba Moisés.

2 Nia* halo efod*+ hodi uza kabas osan-mean, kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak. 3 Sira uza martelu atu tuku osan-mean neʼebé belar hodi sai mihis, no Bezalel tesi neʼe hodi sai kabas atu bele suku hamutuk ho kabas kór-azúl, kabas kór-violeta husi bibi-malae fulun, kabas kór-mean no hena-liñu neʼebé diʼak. 4 Sira halo efod nia parte rua ba kabaas. Parte sira-neʼe tutan iha ninin rua iha leten. 5 Sira halo sintu ho buat neʼebé hanesan, sira uza kabas osan-mean, kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak atu soru no suku hamutuk ho efod hodi kesi metin efod neʼe,+ hodi tuir mandamentu neʼebé Jeová fó sai ona ba Moisés.

6 Tuirmai sira monta fatuk-oniks sira iha fatin neʼebé halo husi osan-mean, no sira bahat Izraél nia oan-mane sira-nia naran iha fatuk sira-neʼe, hanesan sira bahat selus* ida.+ 7 Bezalel tau fatuk sira-neʼe iha efod nia parte neʼebé iha kabaas rua nia leten, nuʼudar fatuk atu hanoin-hetan Izraél nia oan-mane sira,+ hodi tuir mandamentu neʼebé Jeová fó sai ona ba Moisés. 8 Tuirmai nia halo bornál kiʼik* neʼebé tara iha hirus-matan,+ no nia soru ho didiʼak iha dalan neʼebé hanesan efod, hodi uza kabas osan-mean, kabas kór-azúl, kabas kór-violeta husi bibi-malae fulun, kabas kór-mean no kabas-liñu neʼebé diʼak.+ 9 Sira halo bornál neʼe kuadradu kuandu lulun hamutuk. No kuandu lulun hamutuk, ninia naruk no luan sentímetru 22.* 10 Sira monta fatuk-murak sira hamutuk liña haat iha bornál neʼe. Liña primeiru mak fatuk-rubi, fatuk-topáziu no fatuk-ezmeralda. 11 Liña segundu mak fatuk-turkeza, fatuk-safira no fatuk-jaspe. 12 Liña terseiru mak fatuk-lesem,* fatuk-agata no fatuk-ametista. 13 No liña haat mak fatuk-krizólitu, fatuk-oniks no fatuk-jade. Fatuk sira-neʼe monta iha fatin neʼebé halo husi osan-mean. 14 Fatuk sira-neʼe tuir Izraél nia oan-mane naʼin-12 nia naran, no naran sira-neʼe bahat hanesan selus ida, naran ida-idak reprezenta suku ida-idak husi Izraél nia suku 12.

15 Tuirmai sira halo korrente neʼebé bobar hanesan tali hodi kesi iha bornál kiʼik neʼebé tara iha hirus-matan, no korrente neʼe halo husi osan-mean neʼebé moos.+ 16 No sira halo fatin osan-mean nian rua no kadeli rua husi osan-mean no tau kadeli rua neʼe ba bornál nia sikun rua iha leten. 17 Depois neʼe, sira hatama korrente osan-mean rua liuhusi kadeli rua neʼebé iha bornál nia sikun sira. 18 Tuirmai sira hatama korrente rua nia rohan liuhusi fatin osan-mean neʼebé haleʼu fatuk sira iha efod nia parte neʼebé iha kabaas leten, atu nuneʼe bornál neʼe tara iha efod nia oin. 19 Tuirmai sira halo kadeli rua husi osan-mean no tau neʼe iha bornál nia sikun rua neʼebé iha kraik. Sira tau kadeli sira-neʼe iha laran, katak parte neʼebé kona efod.+ 20 No sira halo kadeli rua tan husi osan-mean hodi tau iha efod nia oin, katak besik efod nia parte rua neʼebé iha kabaas leten, besik fatin neʼebé tutan malu iha efod nia sintu leten. 21 Ikusmai, sira kesi metin bornál kiʼik neʼebé taka hirus-matan hodi uza tali kór-azúl no kesi tali neʼe ba bornál nia kadeli no ba kadeli neʼebé iha efod, atu nuneʼe bele kesi metin bornál neʼe ba efod iha sintu nia leten, hodi tuir mandamentu neʼebé Jeová fó sai ona ba Moisés.

22 Tuirmai Bezalel uza deʼit kabas kór-azúl atu soru roupa neʼebé la iha liman hodi hatais iha efod nia okos.+ 23 Nia halo kuak iha roupa neʼe nia leten atu hatama ulun, no kuak neʼe halo hanesan kuak iha roupa funu nian. No nia suku haleʼu kuak neʼe nia ninin hotu atu labele lees. 24 Tuirmai sira halo romaun-fuan hodi tau haleʼu roupa neʼe nia ninin iha okos. Sira halo romaun-fuan sira-neʼe hodi uza kabas kór-azúl, kabas kór-violeta husi bibi-malae fulun no kabas kór-mean. 25 Sira mós halo sinu husi osan-mean neʼebé moos no tau sinu sira-neʼe entre romaun-fuan sira haleʼu roupa neʼe nia ninin iha okos. 26 Sira tau sinu no romaun-fuan tuituir malu, katak sinu ida no romaun-fuan ida, no tau haleʼu roupa nia ninin iha okos. Ema uza roupa neʼe bainhira halo serbisu, hodi tuir mandamentu neʼebé Jeová fó sai ona ba Moisés.

27 No sira halo unuk husi hena-liñu neʼebé diʼak ba Arão no ninia oan-mane sira, no ema neʼebé matenek mak soru unuk sira-neʼe,+ 28 no sira mós halo turbante*+ husi hena-liñu neʼebé diʼak, halo xapeu furak+ husi hena-liñu neʼebé diʼak ba Arão nia oan-mane sira, no halo kalsa badak*+ husi kabas-liñu neʼebé diʼak, 29 no sira halo sintu husi kabas-liñu neʼebé diʼak, kabas kór-azúl, kabas kór-violeta husi bibi-malae fulun no kabas kór-mean neʼebé soru hamutuk, hodi tuir mandamentu neʼebé Jeová fó sai ona ba Moisés.

30 Ikusmai, sira halo sinál belar ida neʼebé nabilan husi osan-mean neʼebé moos, neʼe mak sinál santu dedikasaun nian,* no sira bahat letra sira iha sinál neʼe hanesan bahat selus ida, neʼebé dehan: “Jeová mak santu.”+ 31 Tuirmai sira uza tali kór-azúl hodi kesi metin sinál neʼe ba turbante no sinál neʼe mak iha oin, hodi tuir mandamentu neʼebé Jeová fó sai ona ba Moisés.

32 Entaun sira halo hotu serbisu ba tenda santu neʼe, katak tenda reuniaun nian, no ema Izraél halo tuir mandamentu hotu neʼebé Jeová fó ba Moisés.+ Sira halo nuneʼe duni.

33 Tuirmai sira lori tenda santu neʼe+ ba Moisés, tenda neʼe+ no ninia ekipamentu hotu: ninia besi-kaʼit,+ arus,+ ai-lolon,+ riin no ninia hun sira;+ 34 ninia hena atu taka neʼebé halo husi bibi-malae aman nia kulit neʼebé tau kór-mean+ no mós husi asu-tasi* nia kulit, no ninia kortina neʼebé tara iha Arka nia oin;+ 35 Arka Aliansa nian* no ninia ai-loos sira+ no ninia matan;+ 36 meza no ninia sasán hotu+ no paun santu; 37 ahi-oan fatin husi osan-mean neʼebé moos, no ninia ahi-oan sira+ neʼebé tau tuituir malu, ninia sasán hotu+ no mós mina ba ahi-oan sira-neʼe;+ 38 altár+ husi osan-mean, mina santu,*+ insensu morin,+ kortina+ ba odamatan iha tenda neʼe; 39 altár husi riti+ no ninia rede husi riti, ninia ai-loos sira+ no ninia sasán hotu,+ basia boot no fatin atu hatuur basia neʼe;+ 40 hena neʼebé tara iha pátiu,* ninia ai-riin sira no ninia hun sira,+ kortina+ ba odamatan ba pátiu neʼe, ninia tali tenda nian no ninia pregu sira+ no mós ninia sasán hotu neʼebé uza ba serbisu iha tenda santu neʼe, katak tenda reuniaun nian; 41 roupa neʼebé soru ho didiʼak atu uza hodi serbí iha fatin sagradu, roupa santu ba amlulik Arão,+ no roupa ba ninia oan-mane sira hodi serbí nuʼudar amlulik.

42 Ema Izraél halo serbisu hotu hodi tuir mandamentu hotu neʼebé Jeová fó sai ba Moisés.+ 43 Bainhira Moisés haree ba serbisu hotu neʼebé sira halo, nia haree katak sira halo duni buat hotu hodi tuir mandamentu neʼebé Jeová fó sai ona, no Moisés haraik bensaun ba sira.

40 Tuirmai Jeová dehan ba Moisés: 2 “Iha loron primeiru fulan-primeiru, ó tenke harii tenda santu neʼe, katak tenda reuniaun nian.+ 3 Ó tenke tau Arka Aliansa nian* iha laran,+ no haketak Arka neʼe ho kortina.+ 4 Ó tenke lori meza+ ba laran no tau meza nia sasán hotu iha leten no lori mós ahi-oan fatin,+ no sunu lakan ahi-oan neʼe.+ 5 Tuirmai lori tama altár insensu nian husi osan-mean+ no tau iha Arka Aliansa* nia oin no tara kortina iha odamatan ba tenda santu neʼe.+

6 “Ó tenke tau altár ba sakrifísiu sunu nian+ iha tenda santu nia odamatan oin, katak tenda reuniaun nian, 7 no tau basia boot entre tenda reuniaun nian ho altár neʼe, no enxe bee iha basia neʼe.+ 8 Tuirmai, halo pátiu*+ haleʼu tenda neʼe no tau kortina+ iha odamatan ba pátiu neʼe. 9 Depois neʼe, ó tenke foti mina santu*+ no fui mina ba tenda santu neʼe no buat hotu neʼebé iha laran,+ no halo santu tenda neʼe no ninia sasán hotu, hodi nuneʼe buat sira-neʼe sei sai nuʼudar buat neʼebé santu. 10 Ó tenke fui mina iha altár ba sakrifísiu sunu nian no ninia sasán hotu no halo santu altár neʼe, atu nuneʼe bele sai nuʼudar altár neʼebé santu liu hotu.+ 11 No ó tenke fui mina ba basia boot no fatin atu hatuur basia neʼe no halo santu ida-neʼe.

12 “Tuirmai ó tenke lori Arão no ninia oan-mane sira besik odamatan ba tenda reuniaun nian, no fase sira ho bee.+ 13 No ó tenke fó-hatais roupa santu ba Arão+ no fui mina ba nia+ no halo nia santu,* no nia sei serbí nuʼudar amlulik ba haʼu. 14 Tuirmai ó tenke lori ninia oan-mane sira besik mai, no fó-hatais roupa ba sira.+ 15 Ó tenke fui mina ba sira hanesan ó halo ba sira-nia aman,+ atu nuneʼe sira bele serbí nuʼudar amlulik ba haʼu. Ho ida-neʼe, sira sei kontinua sai nuʼudar amlulik ba nafatin durante sira-nia jerasaun.”+

16 Moisés halo tuir mandamentu hotu neʼebé Jeová fó sai ba nia.+ Nia halo nuneʼe duni.

17 Iha loron primeiru fulan-primeiru tinan segundu, sira harii hotu tenda santu neʼe.+ 18 Bainhira Moisés harii tenda santu neʼe, nia tau ninia arus hun sira,+ monta ninia arus sira,+ tau ninia ai-lolon sira,+ no harii ninia riin sira. 19 Nia nahe hena tenda nian+ hodi taka tenda santu neʼe no nia mós taka hena seluk iha leten,+ hodi tuir mandamentu neʼebé Jeová fó sai ona ba Moisés.

20 Depois neʼe, Moisés foti fatuk-belar*+ no tau iha Arka laran+ no hatama mós ai-lolon sira+ ba Arka neʼe no taka Arka nia matan.+ 21 Nia lori Arka neʼe ba tenda santu laran no tara kortina+ iha ninia fatin hodi haketak Arka Aliansa nian,*+ hodi tuir mandamentu neʼebé Jeová fó sai ona ba Moisés.

22 Tuirmai Moisés tau meza+ iha tenda reuniaun nia laran, katak iha tenda santu neʼe nia parte norte, iha kortina neʼe nia liʼur, 23 no nia tau paun+ iha meza leten iha Jeová nia oin, hodi tuir mandamentu neʼebé Jeová fó sai ona ba Moisés.

24 Moisés tau ahi-oan fatin+ iha tenda reuniaun nian iha meza nia oin, iha tenda santu neʼe nia parte súl. 25 Nia sunu ahi-oan+ iha Jeová nia oin, hodi tuir mandamentu neʼebé Jeová fó sai ona ba Moisés.

26 Tuirmai Moisés tau altár osan-mean+ iha kortina nia oin iha tenda reuniaun nia laran, 27 atu bele sunu insensu morin+ hodi halo suar iha altár leten,+ hodi tuir mandamentu neʼebé Jeová fó sai ona ba Moisés.

28 Tuirmai Moisés tara kortina+ ba odamatan ba tenda santu.

29 Moisés tau altár ba sakrifísiu sunu nian+ iha odamatan ba tenda santu, katak tenda reuniaun nian, atu nuneʼe nia bele hasaʼe sakrifísiu sunu nian+ no sakrifísiu trigu* nian iha altár neʼe nia leten, hodi tuir mandamentu neʼebé Jeová fó sai ona ba Moisés.

30 Tuirmai Moisés tau basia boot entre tenda reuniaun nian ho altár neʼe no nia enxe bee iha basia neʼe hodi uza atu fase liman no ain.+ 31 Moisés, Arão no Arão nia oan-mane sira fase sira-nia liman no ain ho bee neʼe. 32 Bainhira sira tama ba tenda reuniaun nian ka hakbesik ba altár neʼe, sira fase sira-nia liman no ain,+ hodi tuir mandamentu neʼebé Jeová fó sai ona ba Moisés.

33 Ikusmai Moisés halo pátiu+ haleʼu tenda santu no altár neʼe, no nia tara kortina iha odamatan ba pátiu.+

Ho ida-neʼe, Moisés halo hotu serbisu neʼe. 34 Tuirmai kalohan hahú taka tenda reuniaun nian, no tenda santu neʼe nakonu ho Jeová nia glória.+ 35 Moisés labele tama ba tenda reuniaun nian tanba kalohan kontinua taka tenda neʼe, no tenda santu neʼe nakonu ho Jeová nia glória.+

36 Kuandu kalohan hiʼit saʼe tiha husi tenda santu neʼe, ema Izraél sobu sira-nia tenda husi fatin ida-idak neʼebé sira hela durante sira-nia viajen iha rai-fuik.+ 37 Maibé se kalohan la hiʼit saʼe, sira labele sobu sira-nia tenda toʼo loron neʼebé kalohan neʼe hiʼit saʼe tiha.+ 38 Tanba Jeová nia kalohan iha tenda santu nia leten durante loron no ahi iha tenda nia leten durante kalan no umakain Izraél tomak bele haree ida-neʼe iha fatin hotu durante sira-nia viajen tomak.+