SEGUNDU KRÓNIKAS

1 David nia oan-mane Salomão nia ukun sai metin liután no ninia Maromak Jeová hamutuk ho nia, no halo nia iha kbiit boot liután.+

2 Salomão bolu ema Izraél hotu, xefe ba tropa naʼin-1.000 no xefe ba tropa naʼin-100, juís sira no Izraél nia xefe hotu, katak ulun-naʼin ba sira-nia aman nia umakain. 3 Tuirmai Salomão no kongregasaun* hotu bá fatin aas iha Gibeão,+ tanba Maromak loos nia tenda reuniaun nian iha neʼebá, tenda neʼebé Jeová nia atan Moisés halo iha rai-fuik. 4 Maibé antes neʼe David lori ona Maromak loos nia Arka husi Kiriat-Jearim+ ba fatin neʼebé David prepara ona atu tau Arka neʼe. Nia harii tenda ba Arka neʼe iha Jeruzalein.+ 5 No altár riti+ neʼebé Uri nia oan-mane Bezalel,+ Hur nia bei-oan, halo ona, neʼe tau ona iha Jeová nia tenda santu* nia oin, no Salomão ho kongregasaun halo orasaun iha altár neʼe nia oin.* 6 Salomão hasaʼe sakrifísiu iha Jeová nia oin, no nia hasaʼe sakrifísiu sunu nian hamutuk 1.000 iha altár riti+ nia leten iha tenda reuniaun nian.

7 Iha kalan neʼe Maromak mosu ba Salomão no dehan ba nia: “Husu bá, saida mak ó hakarak haʼu atu fó ba ó.”+ 8 Salomão dehan ba Maromak: “Ita-Boot hatudu ona domin boot ho laran-metin ba haʼu-nia aman David,+ no Ita hili ona haʼu nuʼudar liurai hodi troka nia.+ 9 Agora, oh Maromak Jeová, favór ida kumpre promesa neʼebé Ita-Boot halo ba haʼu-nia aman David,+ tanba Ita hili ona haʼu nuʼudar liurai atu ukun povu neʼebé barak tebes hanesan rai-rahun iha rai.+ 10 Fó matenek no koñesimentu+ mai haʼu atu bele dirije povu neʼe,* tanba sé mak bele tesi-lia ba Ita-nia povu neʼebé barak tebes?”+

11 Tuirmai Maromak hatete ba Salomão: “Tanba ó-nia hakarak mak hanesan neʼe, no ó la husu sasán, rikusoin, glória, no ó la husu atu oho ema* sira neʼebé odi ó, ó mós la husu moris naruk, maibé ó husu matenek no koñesimentu atu tesi-lia ba haʼu-nia povu neʼebé haʼu foti ó atu ukun nuʼudar liurai,+ 12 haʼu sei fó matenek no koñesimentu ba ó, maibé haʼu mós sei fó sasán, rikusoin no glória ba ó barak liu fali liurai sira antes ó no depois ó.”+

13 Entaun Salomão sai husi fatin aas iha Gibeão,+ husi tenda reuniaun nia oin, no fila fali ba Jeruzalein. Nia ukun ema Izraél tomak husi Jeruzalein. 14 Salomão kontinua halibur kuda* no kuda-karreta sira. Nia iha kuda* 12.000 no kuda-karreta 1.400,+ no rai buat sira-neʼe iha sidade ba kuda-karreta nian+ no mós besik liurai nia hela-fatin iha Jeruzalein.+ 15 Liurai halibur osan-mutin no osan-mean barak tebes iha Jeruzalein toʼo hanesan deʼit ho fatuk barak,+ no halibur ai-sedru barak tebes hanesan ai-sikómoru* iha área Sefela.+ 16 Salomão nia kuda sira sosa husi rai-Ejitu,+ no liurai nia negósiu-naʼin barak sosa kuda-lubun sira* tuir folin neʼebé loloos.+ 17 Kuda-karreta ida-idak neʼebé sosa husi rai-Ejitu, folin osan-mutin 600, no kuda ida folin osan-mutin 150. Tuirmai, sira faʼan fali ba ema Hetes nia liurai sira hotu no ba liurai sira husi rai-Síria.

2 Salomão fó orden atu harii uma ida ba Jeová nia naran+ no palásiu ida ba ninia ukun.+ 2 Salomão fó knaar ba mane naʼin-70.000 atu halo serbisu baibain,* mane naʼin-80.000 atu fera fatuk iha foho sira,+ no ba mane naʼin-3.600 atu serbí nuʼudar ulun-naʼin ba serbisu-naʼin sira.+ 3 Salomão mós haruka ema lori lia-menon ba Liurai Hirão+ husi Tiro, hodi dehan: “Favór ida, ajuda haʼu hanesan Ita-Boot ajuda ona haʼu-nia aman David bainhira Ita haruka ai-sedru ba nia atu harii palásiu ida atu hela.+ 4 Agora haʼu harii daudaun uma ida ba haʼu-nia Maromak Jeová nia naran, atu halo uma neʼe santu ba nia, atu sunu insensu morin+ iha ninia oin, no mós nuʼudar fatin atu tau paun santu+ no hasaʼe sakrifísiu sunu nian, iha dadeer no kalan,+ iha loron Sábadu,+ fulan-foun,+ no durante tempu festa sira+ ba Jeová, ami-nia Maromak. Neʼe mak ema Izraél nia obrigasaun ba nafatin. 5 Uma neʼebé haʼu harii daudaun mak kmanek tebes, tanba ami-nia Maromak mak kmanek liu fali maromak sira seluk hotu. 6 Agora sé mak bele harii uma ida ba nia? Tanba lalehan neʼebé aas liu mós la toʼo atu sai ninia hela-fatin,+ entaun haʼu neʼe sé hodi haʼu bele harii uma ida ba nia? Haʼu bele harii deʼit uma ida nuʼudar fatin atu sunu sakrifísiu* iha ninia oin. 7 Agora haruka mai haʼu badaen ida neʼebé matenek atu halo serbisu ho osan-mean, osan-mutin, riti,+ besi, kabas kór-violeta husi bibi-malae fulun, kabas kór-mean no kór-azúl, no hatene oinsá atu bahat. Nia sei halo serbisu iha Judá no iha Jeruzalein hamutuk ho haʼu-nia badaen sira neʼebé iha esperiénsia, neʼebé haʼu-nia aman David hili ona.+ 8 Favór ida, haruka mai haʼu ai-sedru, ai-juníperu+ no ai-kameli+ husi Líbanu, tanba haʼu hatene ho didiʼak katak Ita-nia atan sira iha esperiénsia atu tesi ai-hun sira iha Líbanu.+ Haʼu-nia atan sira sei serbisu hamutuk ho Ita-nia atan sira+ 9 atu prepara ai barak, tanba uma neʼebé haʼu harii sei boot no kmanek tebes. 10 Haʼu sei fó ai-han ba Ita-nia atan sira+ neʼebé tesi ai. Ai-han sira-neʼe mak trigu koro* isin 20.000, sevada koro isin 20.000, tua-uvas litru 440.000* no mina litru 440.000.”

11 Ho ida-neʼe, Liurai Hirão husi Tiro haruka karta tuirmai neʼe ba Salomão: “Tanba Jeová hadomi ninia povu mak nia halo Ita sai sira-nia liurai.” 12 Hirão hatutan tan: “Fó hahiʼi ba Jeová, Izraél nia Maromak, neʼebé kria lalehan no rai, tanba nia fó oan-mane neʼebé matenek ba Liurai David,+ oan neʼebé iha kbiit atu komprende,+ neʼebé sei harii uma ida ba Jeová no palásiu ida ba ninia ukun. 13 Agora haʼu haruka badaen ida neʼebé matenek ba Ita, nia iha kbiit atu komprende, ninia naran mak Hirão-Abi,+ 14 ninia inan mak ema Dan maibé ninia aman husi Tiro. Nia iha esperiénsia atu halo serbisu ho osan-mean, osan-mutin, riti, besi, fatuk, ai, kabas kór-violeta husi bibi-malae fulun, kabas kór-azúl no kór-mean, no hena diʼak.+ Nia bele bahat buat oioin no halo tuir dezeñu naran deʼit neʼebé fó ba nia.+ Nia sei serbisu hamutuk ho Ita-nia badaen sira neʼebé iha esperiénsia no mós ho haʼu-nia naʼi David, Ita-Boot nia aman, nia badaen sira neʼebé iha esperiénsia. 15 Agora favór ida, haʼu-nia naʼi, haruka mai trigu, sevada, mina no tua-uvas hanesan Ita promete ona ba Ita-nia atan sira.+ 16 Ami sei tesi ai-hun sira husi Líbanu,+ tuir Ita-nia presiza, no ami sei kesi ai sira-neʼe hamutuk hodi haruka liuhusi tasi toʼo Jope,+ no Ita sei foti ai sira-neʼe hodi lori ba Jeruzalein.”+

17 Tuirmai Salomão rejistu mane hotu neʼebé hela iha rai-Izraél nuʼudar estranjeiru,+ hanesan ninia aman David halo ona,+ no mane sira-neʼe hamutuk naʼin-153.600. 18 Entaun nia fó knaar ba mane naʼin-70.000 atu halo serbisu baibain,* mane naʼin-80.000 atu fera fatuk+ iha foho sira, no ba mane naʼin-3.600 atu serbí nuʼudar ulun-naʼin hodi tau matan ba serbisu-naʼin sira.+

3 Tuirmai Salomão komesa harii Jeová nia uma+ iha Jeruzalein iha Foho Moria,+ foho neʼebé uluk Jeová mosu ba ninia aman David.+ Salomão harii uma neʼe iha fatin neʼebé uluk David prepara ona iha Ornan+ ema Jebus nia fatin sama trigu nian. 2 Salomão komesa harii uma neʼe iha loron segundu fulan-segundu, tinan haat husi ninia ukun. 3 Fundasaun ba Maromak loos nia uma neʼebé Salomão tau, ninia naruk metru 27* no luan metru 9,*+ hodi tuir sukat tempu uluk nian.* 4 Varanda iha templu oin luan metru 9, hanesan ho uma nia luan,* no varanda neʼe aas metru 9* no nia taka varanda laran ho osan-mean neʼebé moos.+ 5 Nia harii kuartu boot* hodi uza ai-juníperu, depois neʼe, nia taka ho osan-mean neʼebé diʼak,+ no nia bahat dezeñu ai-palmeira+ no enfeita kuartu neʼe ho korrente.+ 6 Liután neʼe, nia hafurak uma neʼe ho fatuk folin-boot sira,+ no osan-mean+ neʼebé nia uza mak husi Parvaim. 7 Nia taka uma neʼe ho osan-mean, no mós taka ninia foru, odamatan sira, odamatan hun no didin sira ho osan-mean,+ no nia bahat kerubín iha didin sira.+

8 Tuirmai nia halo kuartu* Santu Liu Hotu.+ Kuartu neʼe nia naruk hanesan ho uma nia luan, naruk metru 9 no luan metru 9. Nia taka uma neʼe ho osan-mean neʼebé diʼak+ kilograma 20.520.* 9 Osan-mean neʼebé uza hodi halo pregu, nia todan mak grama 570.* Nia mós taka kuartu neʼebé iha leten ho osan-mean.

10 Tuirmai nia halo estátua kerubín rua iha kuartu* Santu Liu Hotu, no nia taka kerubín sira-neʼe ho osan-mean.+ 11 Kerubín rua+ nia liras naruk hamutuk metru 9. Kerubín primeiru nia liras ida naruk metru 2 ho sentímetru 22* no liras neʼe kona uma nia didin, no ninia liras seluk naruk metru 2 ho sentímetru 22 no liras neʼe kona kerubín ida seluk nia liras ida. 12 Kerubín segundu nia liras ida naruk metru 2 ho sentímetru 22 no liras neʼe kona uma nia didin seluk, no ninia liras seluk naruk metru 2 ho sentímetru 22 no liras neʼe kona kerubín primeiru nia liras ida. 13 Kerubín sira-neʼe nia liras neʼebé nakloke naruk metru 9. Sira hamriik loos no hateke ba kuartu boot.*

14 Nia mós halo kortina+ hodi uza kabas kór-azúl no kór-mean, bibi-malae fulun kór-violeta no hena diʼak, no borda dezeñu kerubín iha kortina neʼe.+

15 Tuirmai nia halo riin rua iha uma oin,+ aas metru 15 ho balu,* no riin ida-idak iha riin ulun neʼebé aas metru 2 ho sentímetru 22.+ 16 Nia halo korrente no tara iha riin nia ulun sira, no nia mós halo romaun-fuan 100 no enfeita iha korrente sira. 17 Nia harii riin sira-neʼe iha templu oin, riin ida iha liman-loos* no ida iha liman-karuk.* Nia hanaran riin iha liman-loos nuʼudar Jakin* no riin iha liman-karuk nuʼudar Boaz.*

4 Tuirmai nia halo altár husi riti,+ naruk metru 8 ho sentímetru 90,* luan metru 8 ho sentímetru 90, no aas metru 4 ho sentímetru 45.*

2 Tuirmai nia fui riti hodi halo tanke neʼebé hanaran Tasi.*+ Tanke neʼe kabuar, ninia luan husi sorin ida toʼo sorin seluk mak metru 4 ho sentímetru 45, aas metru 2 ho sentímetru 22,* no bainhira sukat haleʼu tanke neʼe ho tali, tanke neʼe boot metru 13.*+ 3 No iha tanke neʼe nia ibun okos enfeita haleʼu ho ai-fuan kabuar.+ Kada sentímetru 45* iha ai-fuan sanulu, no ai-fuan sira-neʼe haleʼu tanke ho liña rua. Nia fui riti iha ninia fatin hodi halo tanke neʼe ho dezeñu ai-fuan kabuar. 4 Tanke neʼe tula iha karau-aman riti 12 nia leten,+ karau 3 hateke ba parte norte, karau 3 hateke ba parte oeste, karau 3 hateke ba parte súl, no karau 3 hateke ba parte leste. Tanke neʼe tula iha karau sira-nia leten, no karau hotu nia ikun see ba klaran. 5 Tanke neʼe nia mahar maizumenus sentímetru 7;* no tanke ibun halo hanesan kopu nian, hanesan ai-funan líriu. Tanke neʼe bele rai bee litru 66.000.*

6 Nia mós halo tanke sanulu. Nia tau tanke lima iha liman-loos no lima iha liman-karuk.+ Amlulik sira fase sasán neʼebé uza ba sakrifísiu sunu nian+ iha tanke sira-neʼe nia laran. Maibé tanke neʼebé hanaran Tasi mak ba amlulik sira atu fase liman ho ain.+

7 Tuirmai nia halo ahi-oan fatin sanulu husi osan-mean+ hodi tuir dezeñu,+ no tau iha templu laran, lima iha liman-loos no lima iha liman-karuk.+

8 Nia mós halo meza sanulu no tau iha templu laran, lima iha liman-loos no lima iha liman-karuk.+ No nia mós halo manko 100 husi osan-mean.

9 Tuirmai nia halo pátiu*+ amlulik nian+ no pátiu boot+ ho ninia odamatan sira, no taka odamatan sira-neʼe ho riti. 10 Nia tau tanke neʼebé hanaran Tasi iha sorin loos, iha parte súl.*+

11 Hirão mós halo ahi-kadesan fatin, kanuru boot no manko sira.+

Ho ida-neʼe, Hirão remata halo serbisu neʼebé Liurai Salomão husu nia atu halo iha Maromak loos nia uma. Sasán neʼebé nia halo mak:+ 12 riin rua+ no riin nia ulun neʼebé kabuar neʼebé iha riin rua nia leten; rede rua hodi enfeita riin nia ulun;+ 13 romaun-fuan+ 400 ba rede rua neʼe, romaun-fuan liña rua ba rede ida-idak, atu enfeita riin nia ulun neʼebé kabuar neʼebé iha riin sira-nia leten;+ 14 karrosa sanulu no tanke sanulu iha karrosa sira-nia leten;+ 15 tanke neʼebé hanaran Tasi no karau-aman riti 12 iha tanke neʼe nia okos;+ 16 no ahi-kadesan fatin, kanuru boot, garfu+ no sasán seluk hotu. Hirão-Abi*+ halo buat sira-neʼe hodi uza riti neʼebé nabilan no fó ba Liurai Salomão atu tau iha Jeová nia uma. 17 Liurai fui buat sira-neʼe iha área Mota Jordaun, entre Sukot+ ho Zereda, neʼebé iha rai-mean barak. 18 Salomão halo sasán sira-neʼe barak tebes. Sira la hatene riti nia todan neʼebé uza atu halo sasán hotu neʼe.+

19 Salomão halo sasán sira hotu+ ba Maromak loos nia uma, hanesan tuirmai neʼe: altár husi osan-mean;+ meza+ neʼebé uza atu tau paun santu;+ 20 ahi-oan fatin sira ho ahi-oan husi osan-mean neʼebé moos,+ atu sunu iha Fatin Santu Liu Hotu* nia oin hodi tuir ukun-fuan; 21 ai-funan sira, ahi-oan sira no besi-habit neʼebé halo husi osan-mean neʼebé moos liu; 22 besi atu hamate ahi, manko, kopu no ahi-anar fatin, buat hotu neʼe halo husi osan-mean neʼebé moos; nia taka Fatin Santu Liu Hotu+ nia odamatan no odamatan sira iha templu nia oin ho osan-mean.+

5 Ho ida-neʼe, Salomão remata halo serbisu hotu ba Jeová nia uma.+ Tuirmai Salomão hatama buat sira neʼebé ninia aman David halo santu ona,+ no nia tau osan-mutin, osan-mean no sasán hotu ba osan-fatin iha Maromak loos nia uma.+ 2 Iha tempu neʼebá Salomão halibur Izraél nia katuas sira, neʼe katak ulun-naʼin hotu husi suku sira no xefe sira husi ema Izraél nia umakain. Sira mai iha Jeruzalein atu muda Jeová nia Arka Aliansa nian husi David nia Sidade,+ neʼe katak Siaun,+ hodi saʼe ba templu. 3 Mane Izraél hotu halibur hamutuk iha liurai nia oin iha loron festa* nian neʼebé halaʼo iha fulan-hitu.+

4 Nuneʼe Izraél nia katuas hotu mai, no ema Levi komesa hulan Arka.+ 5 Sira muda Arka, tenda reuniaun nian+ no sasán santu hotu iha tenda neʼe hodi lori ba templu. Amlulik no ema Levi* sira mak lori buat sira-neʼe. 6 Liurai Salomão no povu Izraél tomak, neʼebé liurai bolu mai atu hasoru nia, sira hamriik iha Arka nia oin. Sira hasaʼe bibi-malae no karau barak nuʼudar sakrifísiu+ toʼo labele sura. 7 Tuirmai amlulik sira lori Jeová nia Arka Aliansa nian hodi tau iha ninia fatin iha kerubín nia liras okos, iha kuartu iha templu nia laran liu, neʼe katak Fatin Santu Liu Hotu.+ 8 Nuneʼe kerubín sira-nia liras nakloke iha fatin neʼebé tau Arka bá, kerubín nia liras hamahon Arka no Arka nia ai-loos sira+ atu hiʼit. 9 Ai-loos sira-neʼe naruk tebes toʼo ninia tutun bele haree-hetan husi Fatin Santu neʼebé iha Fatin Santu Liu Hotu nia oin, maibé labele haree-hetan husi liʼur. Arka no ninia ai-loos sira sei iha neʼebá toʼo ohin loron. 10 Iha Arka laran iha deʼit fatuk-belar rua neʼebé Moisés tau iha Horeb,+ iha tempu neʼebé Jeová halo aliansa+ ho povu Izraél bainhira sira sai tiha husi rai-Ejitu.+

11 Amlulik sira hotu husi grupu ida-idak neʼebé mai iha neʼebá, sira halo santu* ona sira-nia an.+ Tuirmai amlulik sira sai husi fatin santu neʼe,+ 12 no kantadór Levi+ hotu neʼebé hatais roupa husi hena diʼak, sira kaer simbala, instrumentu neʼebé iha talin, ho arpa, no sira hamriik iha altár nia sorin parte leste, hamutuk ho amlulik naʼin-120 neʼebé huu trombeta.+ Asaf,+ Heman,+ Jedutum,+ no sira-nia oan-mane sira no sira-nia família seluk mak dirije kantadór sira. 13 Amlulik sira huu trombeta no kantadór sira fó hahiʼi no fó agradese ba Jeová ho lian ida deʼit. Bainhira sira huu trombeta, baku simbala, no toka instrumentu múzika seluk kuandu sira fó hahiʼi ba Jeová, “tanba nia mak diʼak; ninia domin neʼebé laran-metin iha ba nafatin”,+ iha momentu neʼebá Jeová nia uma sai nakonu ho kalohan.+ 14 Amlulik sira labele kontinua halo serbisu tanba kalohan neʼe, tanba Jeová, Maromak neʼebé loos, nia glória nakonu iha uma neʼe.+

6 Iha tempu neʼebá Salomão hatete: “Oh Jeová, uluk Ita-Boot dehan katak Ita hela iha kalohan metan.+ 2 Maibé agora haʼu harii ona uma kmanek ida ba Ita, neʼe mak fatin ba Ita atu hela ba nafatin.”+

3 Tuirmai liurai fila oin no komesa haraik bensaun ba kongregasaun Izraél tomak neʼebé hamriik hela.+ 4 Salomão dehan: “Fó hahiʼi ba Jeová, Izraél nia Maromak, tanba nia promete ho nia ibun rasik ba haʼu-nia aman David, no nia kumpre ona ho ninia liman rasik. Nia dehan: 5 ‘Husi loron neʼebé haʼu lori haʼu-nia povu sai husi rai-Ejitu, haʼu seidauk hili sidade ida iha Izraél nia suku sira-nia leet hodi harii uma ida atu lori haʼu-nia naran,+ no haʼu seidauk hili ema ida atu sai ulun-naʼin ba haʼu-nia povu Izraél. 6 Maibé haʼu hili ona Jeruzalein+ atu lori haʼu-nia naran, no haʼu hili ona David atu tau matan ba haʼu-nia povu Izraél.’+ 7 Uluk haʼu-nia aman David hakarak tebes atu harii uma ida ba Izraél nia Maromak Jeová nia naran.+ 8 Maibé Jeová hatete ba haʼu-nia aman David: ‘Ó hakarak tebes atu harii uma ida ba haʼu-nia naran, no neʼe mak hakarak neʼebé diʼak loos. 9 Maibé ó sei la harii uma neʼe, ó-nia oan-mane neʼebé sei moris mak sei harii uma ida ba haʼu-nia naran.’+ 10 Jeová kumpre ninia promesa, tanba haʼu mak troka ona haʼu-nia aman David no haʼu tuur iha kadunan nuʼudar liurai iha Izraél,+ hanesan Jeová promete ona.+ Haʼu mós harii ona uma ida atu fó glória ba Izraél nia Maromak Jeová nia naran, 11 no iha neʼebá mak haʼu tau Arka neʼebé iha fatuk-belar rua iha laran, katak aliansa+ neʼebé Jeová halo ona ho povu Izraél.”

12 Tuirmai Salomão hamriik iha Jeová nia altár oin neʼebé iha kongregasaun Izraél hotu nia oin, no nia loke ninia liman ba lalehan.+ 13 Salomão halo ona palku ida husi riti no tau iha pátiu klaran.+ Palku neʼe naruk metru 2 ho sentímetru 22,* luan metru 2 ho sentímetru 22, no aas metru 1 ho sentímetru 34.* Nia hamriik iha palku neʼe nia leten. Tuirmai nia hakneʼak iha kongregasaun Izraél hotu nia oin no loke ninia liman ba lalehan,+ 14 hodi dehan: “Oh Jeová, Izraél nia Maromak, la iha Maromak ida mak hanesan Ita-Boot iha lalehan no iha rai, Ita kumpre aliansa no hatudu domin neʼebé laran-metin ba Ita-nia atan sira neʼebé adora Ita ho laran tomak.+ 15 Ita kumpre ona promesa neʼebé Ita halo ho Ita-nia atan David, haʼu-nia aman.+ Ita promete ho Ita-nia ibun rasik, no ohin Ita kumpre ona ida-neʼe ho Ita-nia liman rasik.+ 16 Agora, oh Jeová, Izraél nia Maromak, favór ida, kumpre promesa neʼebé Ita halo ona ho Ita-nia atan David, haʼu-nia aman. Uluk Ita-Boot dehan: ‘Se ó-nia oan-mane sira kuidadu didiʼak hodi halo tuir haʼu-nia ukun-fuan,+ hanesan ó halo ona iha haʼu-nia oin,+ entaun sei iha nafatin mane ida husi ó-nia jerasaun neʼebé sei tuur iha kadunan atu ukun Izraél.’ 17 Agora, oh Jeová, Izraél nia Maromak, favór ida, halo tuir Ita-nia promesa neʼebé Ita halo ona ho Ita-nia atan David.

18 “Maibé, Maromak sei hela duni iha rai hamutuk ho ema ka lae?+ Lalehan, sin, lalehan neʼebé aas liu mós la toʼo atu sai Ita-nia hela-fatin,+ sá tan ho uma neʼebé haʼu harii ona ba Ita!+ 19 Agora, oh Jeová haʼu-nia Maromak, favór ida rona Ita-nia atan nia orasaun atu husu laran-sadiʼa, no rona Ita-nia atan nia halerik atu husu ajuda, no orasaun neʼebé Ita-nia atan hasaʼe daudaun ba Ita. 20 Haʼu hein katak Ita-nia matan sei hateke ba uma neʼe loron no kalan, ba fatin neʼebé Ita dehan katak sei lori Ita-nia naran,+ no rona orasaun neʼebé Ita-nia atan halo hodi hateke ba fatin neʼe. 21 Favór ida, rona ba Ita-nia atan neʼebé husu ajuda, no mós rona ba Ita-nia povu Izraél bainhira sira halo orasaun hodi hateke ba fatin neʼe,+ no favór ida, rona sira husi Ita-nia hela-fatin iha lalehan.+ Sin, rona sira no fó perdua ba sira.+

22 “Se mane ida halo sala kontra ninia maluk no mane neʼe tenke halo juramentu* no bainhira nia sei iha hela juramentu* neʼe nia okos, no nia mai iha Ita-nia altár oin iha uma neʼe hodi harohan,+ 23 favór ida rona husi lalehan no tesi-lia ba Ita-nia atan sira hodi kastigu ema aat no halo nia lori todan ba ninia sala rasik,+ no hodi fó sai katak ema laran-loos mak la halo sala* no fó kolen ba nia tuir ninia hahalok loos.+

24 “Se inimigu manán Ita-nia povu Izraél tanba sira kontinua halo sala kontra Ita,+ maibé sira fila fali no fó glória ba Ita-nia naran+ no halo orasaun+ iha Ita-nia oin iha uma neʼe hodi husu laran-sadiʼa,+ 25 favór ida rona ba sira husi lalehan+ no perdua Ita-nia povu Izraél nia sala no lori sira fila fali ba rai neʼebé Ita fó ona ba sira no ba sira-nia beiʼala.+

26 “Se lalehan mak taka tiha no la iha udan+ tanba sira kontinua halo sala kontra Ita,+ maibé sira halo orasaun hodi hateke ba fatin neʼe no fó glória ba Ita-nia naran no husik tiha sira-nia sala tanba Ita kastigu* ona sira,+ 27 favór ida rona ba sira husi lalehan no perdua Ita-nia atan sira-nia sala, Ita-nia povu Izraél nia sala, tanba Ita sei hanorin sira kona-ba dalan neʼebé diʼak atu sira tenke laʼo tuir.+ Favór ida halo udan tun+ ba Ita-nia rai neʼebé Ita fó ona nuʼudar liman-rohan ba Ita-nia povu.

28 “Se mosu hamlaha boot iha rai neʼe,+ ka moras-peste,*+ anin neʼebé manas, kulapur,+ gafañotu lubun boot, ka gafañotu neʼebé estraga buat barak,+ ka se sira-nia inimigu halo serku ba sira-nia sidade ida iha rai neʼe+ ka se susar no moras naran deʼit mosu,+ 29 ka se Ita-nia povu Izraél tomak ka ema ida-idak halo orasaun+ atu husu Ita-nia laran-sadiʼa,+ ka orasaun hotu neʼebé sira hasaʼe, tanba sira ida-idak hatene sira-nia terus no susar neʼebé iha sira-nia laran,+ no kuandu sira loke sira-nia liman ba uma neʼe,+ 30 favór ida rona husi Ita-nia hela-fatin iha lalehan,+ no fó perdua ba sira-nia sala.+ Fó kolen ba ema ida-idak tuir sira-nia hahalok hotu, tanba Ita hatene sira-nia laran. Ita mesak deʼit mak hatene ho loloos ema nia laran.+ 31 Hodi nuneʼe, sira sei hamtaʼuk Ita hodi laʼo tuir Ita-nia dalan sira durante tempu hotu neʼebé sira moris iha rai neʼebé Ita fó ona ba ami-nia beiʼala sira.

32 “No mós se ema estranjeiru neʼebé laʼós parte ba Ita-nia povu Izraél mai husi rai dook tanba Ita-nia naran neʼebé boot*+ no Ita-nia liman neʼebé forte no liman neʼebé iha kbiit no sira mai halo orasaun hodi hateke ba uma neʼe,+ 33 favór ida rona husi Ita-nia hela-fatin iha lalehan, no kumpre buat hotu neʼebé ema estranjeiru husu ba Ita, atu nuneʼe ema hotu iha mundu bele hatene Ita-nia naran+ no hamtaʼuk Ita, hanesan ho Ita-nia povu Izraél, no atu sira bele hatene katak uma neʼe neʼebé haʼu harii ona mak lori Ita-nia naran.

34 “Se Ita-Boot haruka Ita-nia povu atu bá fatin ruma atu halo funu hasoru sira-nia inimigu,+ no sira halo orasaun+ ba Ita hodi hateke ba sidade neʼe, neʼebé Ita hili ona no ba uma neʼebé haʼu harii ona ba Ita-nia naran,+ 35 favór ida rona ba sira-nia orasaun husi lalehan no rona ba sira-nia liafuan atu husu laran-sadiʼa no lori justisa ba sira.+

36 “Se sira halo sala hasoru Ita, tanba la iha ema ida mak la halo sala,+ no Ita sai hirus hasoru sira no husik inimigu manán sira, no inimigu kaer sira no lori sira ba dadur iha rai neʼebé dook ka besik,+ 37 no sira arrepende an iha rai neʼebé sira sai nuʼudar dadur, no sira fila fali ba Ita hodi husu Ita-nia laran-sadiʼa iha inimigu nia rai, hodi dehan: ‘Ami halo ona sala, ami halo buat neʼebé la loos no hatudu ona hahalok aat’,+ 38 no sira fila fali ba Ita ho sira-nia laran tomak+ no ho sira-nia moris tomak iha rai neʼebé sira-nia inimigu lori sira bá nuʼudar dadur,+ no sira halo orasaun ba Ita hodi hateke ba sira-nia rai neʼebé Ita fó ona ba sira-nia beiʼala no hateke ba sidade neʼebé Ita hili ona+ no ba uma neʼebé haʼu harii ona ba Ita-nia naran, 39 favór ida rona sira-nia orasaun husi Ita-nia hela-fatin iha lalehan, no rona ba sira-nia liafuan atu husu laran-sadiʼa no lori justisa ba sira+ no perdua Ita-nia povu neʼebé halo ona sala hasoru Ita.

40 “Oh haʼu-nia Maromak, agora favór ida, loke Ita-nia matan no rona ba orasaun hotu neʼebé ema hasaʼe iha* fatin neʼe.+ 41 Oh Maromak Jeová, agora Ita-Boot ho Ita-nia Arka neʼebé hatudu Ita-nia kbiit, tama ba Ita-nia hela-fatin.+ Oh Maromak Jeová, husik Ita-nia amlulik sira fó sai katak Ita mak salva ema,* no husik Ita-nia ema sira neʼebé laran-metin haksolok tanba Ita-nia laran-diʼak.+ 42 Oh Maromak Jeová, keta fila kotuk ba ema neʼebé Ita hili* ona.+ Haʼu hein katak Ita sei hanoin-hetan Ita-nia domin neʼebé laran-metin ba Ita-nia atan David.”+

7 Bainhira Salomão remata halo orasaun,+ ahi tun kedas husi lalehan+ no han sakrifísiu sunu nian no sakrifísiu sira seluk, no Jeová nia glória nakonu iha uma neʼe.+ 2 Amlulik sira labele tama ba Jeová nia uma tanba Jeová nia glória nakonu iha Jeová nia uma.+ 3 Povu Izraél hotu hateke daudaun bainhira ahi tun no Jeová nia glória mosu iha uma leten. Ho ida-neʼe, sira hakneʼak no hakruʼuk ho oin ba rai no fó agradese ba Jeová, “tanba nia mak diʼak; ninia domin neʼebé laran-metin iha ba nafatin”.

4 Iha tempu neʼebá liurai ho povu hotu hasaʼe sakrifísiu ba Jeová.+ 5 Liurai Salomão hasaʼe karau 22.000 no bibi-malae 120.000 nuʼudar sakrifísiu. Ho ida-neʼe, liurai no povu hotu inaugura Maromak loos nia uma.+ 6 Amlulik sira hamriik iha sira-nia fatin hodi halaʼo sira-nia knaar, no ema Levi sira mós hamriik iha sira-nia fatin, sira toka instrumentu múzika hodi akompaña bainhira kanta knananuk ba Jeová.+ Uluk Liurai David halo instrumentu sira-neʼe hodi uza bainhira nia fó agradese ba Jeová no fó hahiʼi hamutuk ho sira,* “tanba ninia domin neʼebé laran-metin iha ba nafatin”. Amlulik sira hamriik iha ema Levi sira-nia oin hodi huu trombeta ho lian makaʼas,+ bainhira ema Izraél hotu hamriik hela.

7 Tuirmai Salomão halo santu pátiu* nia klaran neʼebé iha Jeová nia uma oin, tanba nia hasaʼe sakrifísiu sunu nian+ no naʼan bokur husi sakrifísiu dame nian iha neʼebá tanba altár riti+ neʼebé Salomão halo mak kiʼik liu atu uza hodi hasaʼe sakrifísiu sunu nian, sakrifísiu trigu* nian+ no naʼan bokur.+ 8 Iha tempu neʼebá Salomão hamutuk ho ema Izraél hotu halo festa neʼe* ba loron hitu.+ Kongregasaun boot husi Lebo-Hamat* toʼo Uádi* Ejitu+ mai selebra festa neʼe. 9 Maibé iha loron ualu* sira halo reuniaun espesiál,+ tanba sira inaugura ona altár ba loron hitu no halo festa ba loron hitu. 10 Tuirmai iha loron 23 fulan-hitu, Salomão haruka povu sira fila ba sira-nia uma. Povu sira fila ho haksolok+ no laran-kontente tanba Jeová hatudu ona laran-diʼak ba David, ba Salomão, no ba ninia povu Izraél.+

11 Ho ida-neʼe, Salomão harii hotu Jeová nia uma no liurai nia palásiu.+ Buat hotu neʼebé Salomão hakarak atu halo ba Jeová nia uma no ninia palásiu rasik, nia halo duni ho susesu.+ 12 Jeová mosu ba Salomão+ iha kalan neʼe no dehan ba nia: “Haʼu rona ona ó-nia orasaun, no haʼu hili ona fatin neʼe ba haʼu-nia an rasik nuʼudar uma atu hasaʼe sakrifísiu.+ 13 Se haʼu taka lalehan no udan la tun no se haʼu haruka gafañotu sira atu han buat hotu iha rai neʼe no se haʼu lori moras-peste* ba haʼu-nia povu nia leet, 14 entaun se haʼu-nia povu neʼebé lori haʼu-nia naran+ hatudu haraik an+ hodi halo orasaun no buka haʼu* no husik tiha sira-nia hahalok aat sira,+ haʼu mós sei rona husi lalehan no fó perdua ba sira-nia sala no hadiʼa fali sira-nia rai.+ 15 Agora haʼu sei loke matan nafatin no see tilun didiʼak ba orasaun neʼebé ema hasaʼe iha fatin neʼe.+ 16 Agora haʼu hili no halo santu ona uma neʼe, atu nuneʼe uma neʼe bele lori haʼu-nia naran ba nafatin.+ Haʼu-nia matan sei hateke ba fatin neʼe no haʼu sei nafatin hanoin fatin neʼe.+

17 “Se ó laʼo iha haʼu-nia oin hanesan ó-nia aman David, hodi halo tuir haʼu-nia mandamentu hotu neʼebé haʼu fó ba ó, no se ó halo tuir haʼu-nia ukun-fuan no desizaun sira,+ 18 haʼu sei hametin ó-nia kadunan nuʼudar liurai,+ hanesan aliansa neʼebé haʼu halo ona ho ó-nia aman David,+ hodi dehan: ‘Sei iha nafatin mane ida husi ó-nia jerasaun neʼebé sei ukun Izraél.’+ 19 Maibé se imi fila kotuk hodi la halo tuir haʼu-nia ukun-fuan no mandamentu sira neʼebé haʼu fó ona ba imi, no imi bá serbí fali maromak sira seluk hodi hakruʼuk ba sira,+ 20 haʼu sei halakon ema Izraél husi haʼu-nia rai neʼebé haʼu fó ona ba sira,+ no haʼu sei soe tiha uma neʼebé haʼu halo santu ona ba haʼu-nia naran. Haʼu sei husik ema goza* no hatún ema Izraél iha nasaun hotu nia leet.+ 21 Uma neʼe sei rahun. Ema hotu neʼebé laʼo liu sei hateke ho hakfodak,+ hodi dehan: ‘Tanbasá mak Jeová halo nuneʼe ba rai neʼe no uma neʼe?’+ 22 Tuirmai sira sei dehan: ‘Neʼe tanba sira husik tiha ona Jeová,+ sira-nia beiʼala nia Maromak, neʼebé lori sira sai husi rai-Ejitu,+ no sira adora fali maromak sira seluk no hakruʼuk hodi serbí sira.+ Tan neʼe mak nia lori susar hotu neʼe ba sira.’”+

8 Iha tinan 20 nia laran, Salomão harii Jeová nia uma no ninia palásiu rasik.+ 2 Depois neʼe, Salomão harii fali sidade sira neʼebé Hirão+ fó ona ba Salomão no haruka ema Izraél hela iha sidade sira-neʼe. 3 No Salomão mós bá halo funu hasoru Hamat-Zoba no manán fatin neʼe. 4 Tuirmai nia hametin* Tadmor neʼebé iha rai-fuik no mós sidade hotu neʼebé nia harii ona nuʼudar armazén+ sira iha Hamat.+ 5 Nia mós hametin Bet-Horom Leten+ no Bet-Horom Kraik,+ sidade sira neʼebé seguru ho moru aas, portaun no ai-lolon neʼebé uza atu xave portaun, 6 no mós Baalat.+ Salomão mós hametin sidade hotu neʼebé sai nuʼudar armazén, sidade hotu atu tau kuda-karreta sira,+ sidade ba tropa neʼebé saʼe kuda, no harii buat hotu neʼebé Salomão hakarak atu harii iha Jeruzalein, iha Líbanu no iha rai hotu neʼebé nia ukun.

7 Kona-ba povu restu hotu husi ema Hetes, ema Amoreu, ema Perizeu, ema Heveu no ema Jebus,+ neʼebé laʼós parte ba povu Izraél,+ 8 ema sira-neʼe nia bei-oan neʼebé moris hela, katak sira neʼebé ema Izraél la halakon husi rai neʼe,+ Salomão haruka sira atu halo serbisu ba nia toʼo ohin loron.+ 9 Maibé Salomão la halo ema Izraél ida sai atan atu halo ninia serbisu,+ tanba sira sai ninia funu-naʼin, xefe ba ajudante sira, no xefe ba ninia tropa neʼebé lori kuda-karreta no tropa neʼebé saʼe kuda.+ 10 Iha xefe naʼin-250 ba ulun-naʼin sira neʼebé halo serbisu ba Liurai Salomão. Sira mak tau matan ba serbisu-naʼin sira.+

11 Salomão mós lori Faraó* nia oan-feto+ sai husi David nia Sidade hodi bá uma neʼebé Salomão harii ona ba nia,+ tanba Salomão dehan: “Maski nia mak haʼu-nia feen, maibé nia labele hela iha Liurai David husi Izraél nia uma, tanba fatin neʼebé tau ona Jeová nia Arka mak fatin santu.”+

12 Tuirmai Salomão hasaʼe sakrifísiu sunu nian+ ba Jeová iha Jeová nia altár+ neʼebé Salomão harii ona iha varanda oin.+ 13 Salomão halo tuir toman loroloron nian kona-ba sakrifísiu sira. Nia hasaʼe sakrifísiu tuir Moisés nia mandamentu kona-ba loron Sábadu,+ fulan-foun,+ no festa sira neʼebé halaʼo tinan ida dala tolu.+ Festa sira-neʼe mak Festa Paun Fermentu-Laek nian,+ Festa Semana nian,+ no Festa Barraka nian.*+ 14 Liután neʼe, nia fó knaar ba grupu amlulik sira+ atu halo sira-nia serbisu hodi tuir ninia aman David nia ukun-fuan, no fó knaar ba ema Levi sira atu fó hahiʼi+ ba Maromak no halo serbisu iha amlulik sira-nia oin hodi tuir toman loroloron nian, no nia mós fó knaar ba grupu guarda sira atu hein portaun hotu,+ tanba neʼe mak Maromak loos nia atan David nia mandamentu. 15 Sira halo tuir ho didiʼak liurai nia mandamentu ba amlulik no ema Levi sira kona-ba buat hotu no kona-ba armazén sira. 16 Entaun Salomão organiza didiʼak ninia serbisu husi loron neʼebé nia tau Jeová nia uma nia fundasaun+ toʼo halo hotu uma neʼe. Nuneʼe, nia remata halo Jeová nia uma.+

17 Tuirmai Salomão bá Ezion-Geber+ no Elot+ neʼebé besik tasi-ibun iha rai-Edom.+ 18 Hirão+ haruka ninia atan sira lori ró sira ba Salomão no mós lori ema neʼebé iha esperiénsia atu halo serbisu iha ró. Sira bá Ofir+ hamutuk ho Salomão nia atan sira no foti osan-mean+ kilograma 15.390* husi fatin neʼe no lori ba Liurai Salomão.+

9 Liurai-feto husi Sabá+ rona istória kona-ba Salomão, tan neʼe nia mai toʼo Jeruzalein hodi koko Salomão ho pergunta sira neʼebé susar.* Nia mai hamutuk ho ninia atan barak. Nia mós lori kuda-kamelu neʼebé tula mina-bálsamu, osan-mean+ barak tebes no fatuk-murak oioin. Nia bá hasoru Salomão no koʼalia ho Salomão hodi husu buat hotu neʼebé nia hakarak hatene.+ 2 Salomão hatán ninia pergunta hotu. La iha pergunta ida mak susar demais ba Salomão* atu esplika ba nia.

3 Bainhira liurai-feto husi Sabá rona ona Salomão nia matenek,+ no haree uma neʼebé Salomão harii,+ 4 ai-han iha ninia meza,+ oinsá ninia ema-boot sira tuur, atan sira neʼebé serbí iha meza no atan neʼebé tau matan ba liurai nia hemu no mós dalan neʼebé atan sira-neʼe hatais, no mós sakrifísiu sunu nian neʼebé Salomão hasaʼe beibeik iha Jeová nia uma,+ buat sira-neʼe halo liurai-feto neʼe hakfodak toʼo lakon ninia forsa.* 5 Ho ida-neʼe, nia hatete ba liurai: “Istória neʼebé haʼu rona iha haʼu-nia rai rasik kona-ba buat hotu neʼebé Ita-Boot halo ona* no kona-ba Ita-nia matenek mak loos duni. 6 Maibé haʼu la fiar istória sira-neʼe toʼo haʼu mai no haree ho haʼu-nia matan rasik.+ Tuir loloos, sira konta mai haʼu buat uitoan deʼit kona-ba Ita-nia matenek neʼebé boot.+ Ita kmanek liu fali istória neʼebé haʼu rona ona kona-ba Ita.+ 7 Ksolok ba Ita-nia povu, no ksolok ba Ita-nia atan sira neʼebé kontinua hamriik iha Ita-nia oin, tanba sira rona ba Ita-nia matenek! 8 Fó hahiʼi ba Jeová, Ita-Boot nia Maromak, neʼebé simu ona Ita hodi hili Ita tuur iha kadunan nuʼudar liurai atu reprezenta Jeová, Ita-nia Maromak. Ita-nia Maromak hili Ita nuʼudar liurai atu tesi-lia ho justisa no ukun ho hahalok loos tanba nia hadomi Izraél,+ atu halo Izraél iha ba nafatin.”

9 Tuirmai liurai-feto fó osan-mean+ kilograma 4.100* no mina-bálsamu barak tebes no fatuk-murak oioin ba liurai. Ema ida nunka lori tan mina-bálsamu barak hanesan ho mina neʼebé liurai-feto husi Sabá fó ba Liurai Salomão.+

10 Hirão nia atan sira ho Salomão nia atan sira neʼebé lori osan-mean husi Ofir,+ sira lori mós ai-kameli no fatuk-murak oioin+ atu fó ba Salomão. 11 Liurai uza ai-kameli atu halo eskada iha Jeová nia uma+ no iha liurai nia palásiu+ no mós atu halo arpa no instrumentu neʼebé iha talin ba kantadór sira.+ Uluk ema nunka haree ai sira hanesan neʼe iha rai-Judá.

12 Liurai Salomão mós fó buat naran deʼit neʼebé liurai-feto husi Sabá hakarak no husu. Sasán sira-neʼe barak liu fali sasán neʼebé liurai-feto neʼe lori ba nia.* Depois neʼe, liurai-feto neʼe fila fali ba ninia rai hamutuk ho ninia atan sira.+

13 Osan-mean neʼebé Salomão simu iha tinan ida nia laran hamutuk kilograma 22.780,*+ 14 laʼós neʼe deʼit, ema neʼebé laʼo-rai hodi fila liman, negósiu-naʼin sira, ema Arábia nia liurai sira hotu no mós governadór sira iha rai neʼe lori osan-mean no osan-mutin ba Salomão.+

15 Liurai Salomão halo eskudu boot 200. Nia uza osan-mean+ neʼebé kahur ona ho besi kilograma 6 ho grama 800* hodi halo eskudu ida-idak.+ 16 No nia mós halo eskudu kiʼik* 300 hodi uza osan-mean neʼebé kahur ona ho besi. Nia uza osan-mean kilograma 1 ho grama 700* ba eskudu kiʼik ida-idak. Tuirmai liurai tau buat sira-neʼe iha uma ida naran Uma Ai-Laran Líbanu.+

17 Liurai mós halo kadunan boot ida hodi uza marfín* no taka ho osan-mean neʼebé moos.+ 18 Iha eskada hakat neen atu saʼe ba kadunan neʼe, no iha fatin atu tau ain neʼebé halo husi osan-mean neʼebé tutan ho kadunan neʼe, no iha fatin atu tula liman iha kadunan nia sorin-sorin, no iha estátua leaun rua+ iha kadunan nia sorin-sorin. 19 No iha estátua leaun+ hamutuk 12 neʼebé hamriik iha eskada neen, leaun ida iha eskada ida-idak nia ninin iha sorin-sorin. La iha nasaun ida mak halo kadunan hanesan neʼe. 20 Liurai Salomão nia kopu hotu halo husi osan-mean, no sasán hotu neʼebé rai iha Uma Ai-Laran Líbanu halo husi osan-mean neʼebé moos. La iha sasán ida mak halo husi osan-mutin, tanba iha Salomão nia tempu osan-mutin la iha folin.+ 21 Tanba Hirão nia atan sira+ lori Liurai Salomão nia ró sira bá Tarsis.+ Tinan tolu dala ida, ró Tarsis* sira-neʼe lori osan-mean, osan-mutin, marfín,+ lekirauk no manu-pavaun ba Salomão.

22 Nuneʼe Liurai Salomão sai naran-boot liu fali liurai sira hotu iha mundu kona-ba rikusoin no matenek.+ 23 No liurai sira husi mundu tomak buka atu hasoru Salomão* hodi rona ninia matenek neʼebé Maromak loos fó ona ba nia.+ 24 Tinan-tinan, ema neʼebé vizita liurai, sira ida-idak lori prezente ida. Prezente sira-neʼe mak hanesan sasán husi osan-mutin, sasán husi osan-mean, roupa,+ armas funu nian, mina-bálsamu, kuda no kuda-mula.* 25 Salomão iha kuda* hamutuk 12.000 no luhan 4.000 ba ninia kuda no kuda-karreta sira.+ Nia rai buat sira-neʼe iha sidade ba kuda-karreta nian no mós besik liurai nia hela-fatin iha Jeruzalein.+ 26 Salomão ukun liurai hotu hahú husi Mota Eufrates* toʼo ema Filístia nia rai no toʼo rai-Ejitu nia fronteira.+ 27 Liurai halibur osan-mutin barak tebes iha Jeruzalein toʼo hanesan deʼit ho fatuk barak, no halibur ai-sedru barak tebes hanesan ai-sikómoru* iha área Sefela.+ 28 Sira sosa kuda husi rai-Ejitu+ no husi rai seluk hotu hodi lori ba Salomão.

29 Kona-ba Salomão nia istória sira seluk,+ husi primeiru toʼo ikus, neʼe hakerek ona iha profeta Natan+ nia livru, iha Ahias+ ema Silo nia profesia, no iha profeta Ido+ nia livru neʼebé fó sai vizaun husi Maromak kona-ba Nebat nia oan-mane Jeroboão.+ 30 Salomão ukun Izraél tomak husi Jeruzalein ba tinan 40. 31 Ikusmai Salomão mate* no sira hakoi nia iha ninia aman David nia Sidade;+ no ninia oan-mane Roboão mak sai liurai hodi troka nia.+

10 Roboão bá Siquém,+ tanba ema Izraél hotu bá ona Siquém atu foti nia sai liurai.+ 2 Iha tempu neʼebá Nebat nia oan-mane Jeroboão+ sei hela iha rai-Ejitu tanba uluk nia halai husi Liurai Salomão.+ Bainhira Jeroboão rona kona-ba neʼe, nia fila kedas husi rai-Ejitu. 3 Tuirmai povu sira bolu Jeroboão. Depois neʼe, Jeroboão no povu Izraél hotu mai hasoru Roboão, hodi dehan: 4 “Ita-Boot nia aman fó naha* todan ba ami.+ Maibé se Ita halo kmaan ami-nia naha todan no serbisu todan neʼebé Ita-nia aman haruka ami atu halo, entaun ami sei serbí Ita.”

5 Ho ida-neʼe, Roboão dehan ba sira: “Liutiha loron tolu mak mai fali hasoru haʼu.” Entaun povu sira fila.+ 6 Tuirmai Liurai Roboão koʼalia ho katuas sira neʼebé serbí ona ninia aman Salomão bainhira nia moris hela, hodi dehan: “Imi fó toʼok konsellu mai haʼu. Oinsá mak haʼu sei hatán ba povu neʼe?” 7 Sira hatán ba nia: “Se Ita-Boot halo diʼak ba povu sira-neʼe no halo sira kontente hodi hatán ba sira ho laran-diʼak, sira sei sai Ita-nia atan ba nafatin.”

8 Maibé Roboão la simu konsellu neʼebé katuas sira fó ba nia, no nia husu fali ba mane joven sira neʼebé boot hamutuk ho nia no agora halo serbisu ba nia.+ 9 Nia husu sira: “Imi fó toʼok konsellu mai haʼu. Oinsá mak ita sei hatán ba povu neʼebé dehan: ‘Halo kmaan naha todan neʼebé Ita-Boot nia aman fó ba ami’?” 10 Mane joven sira neʼebé boot hamutuk ho nia, dehan ba nia: “Kona-ba povu neʼebé dehan ba ó: ‘Ita-Boot nia aman fó naha todan ba ami, maibé favór ida, Ita tenke halo kmaan fali ba ami’, ó tenke hatete: ‘Haʼu-nia liman-fuan kiʼik sei boot liu fali haʼu-nia aman nia knotak. 11 Haʼu-nia aman fó ona naha todan ba imi, maibé haʼu sei aumenta liután ninia todan. Haʼu-nia aman kastigu imi ho xikote baibain, maibé haʼu sei kastigu imi ho xikote neʼebé tutun tarak.’”

12 Jeroboão no povu hotu mai hasoru Roboão iha loron terseiru hodi tuir liurai nia liafuan neʼebé dehan: “Liutiha loron tolu mak mai fali hasoru haʼu.”+ 13 Maibé Liurai Roboão hatán ba sira ho siʼak, no liurai la halo tuir konsellu neʼebé katuas sira fó ona ba nia. 14 Nia koʼalia ba povu tuir mane joven sira-nia konsellu, hodi dehan: “Haʼu sei halo imi-nia naha sai todan, no haʼu sei aumenta ninia todan. Haʼu-nia aman kastigu imi ho xikote baibain, maibé haʼu sei kastigu imi ho xikote neʼebé tutun tarak.” 15 Nuneʼe liurai lakohi rona ba povu. Neʼe akontese tanba Maromak neʼebé loos mak halo situasaun neʼe mosu+ atu bele kumpre Jeová nia liafuan neʼebé nia fó sai ona liuhusi Ahias,+ ema Silo, ba Nebat nia oan-mane Jeroboão.

16 Tanba liurai lakohi rona ba ema Izraél hotu, sira hatán ba liurai: “Ami la iha ligasaun ho David. Ami la hetan liman-rohan husi Jessé nia oan-mane. Oh ema Izraél, imi ida-idak fila fali ba adora imi-nia maromak sira. Oh David+ nia bei-oan, tau matan ba ó-nia umakain rasik!” Depois neʼe, ema Izraél hotu fila fali ba sira-nia uma.*+

17 Maibé Roboão kontinua ukun ema Izraél sira neʼebé hela iha sidade sira iha Judá.+

18 Tuirmai Liurai Roboão haruka Hadoram,+ neʼebé tau matan ba liurai nia serbisu-naʼin sira, atu bá koʼalia ho ema Izraél, maibé ema Izraél tuda nia toʼo mate. Liurai Roboão konsege saʼe ninia kuda-karreta hodi halai ba Jeruzalein.+ 19 No ema Izraél kontinua kontra hasoru umakain David toʼo ohin loron.

11 Bainhira Roboão toʼo iha Jeruzalein, nia halibur kedas funu-naʼin hamutuk naʼin-180.000 husi umakain Judá no Benjamim+ neʼebé hetan ona treinu,* atu halo funu hasoru Izraél hodi Roboão+ bele ukun fali sira. 2 Tuirmai Jeová koʼalia ba Semaias,+ Maromak loos nia atan, hodi dehan: 3 “Koʼalia ba Salomão nia oan-mane Roboão, liurai Judá, no ba ema Izraél hotu neʼebé hela iha Judá no Benjamim: 4 ‘Jeová dehan nuneʼe: “Imi labele bá funu hasoru imi-nia maun-alin sira. Imi ida-idak tenke fila fali ba imi-nia uma rasik, tanba haʼu mak hamosu situasaun neʼe.”’”+ Entaun sira halo tuir Jeová nia liafuan no fila, no la bá funu hasoru Jeroboão.

5 Roboão hela iha Jeruzalein no harii Judá nia sidade sira neʼebé seguru. 6 Nia hametin Belein,+ Etam, Tekoa,+ 7 Bet-Zur, Soko,+ Adulam,+ 8 Gat,+ Maresa, Zif,+ 9 Adoraim, Lakis,+ Azeka,+ 10 Zora, Aijalon+ no Hebron.+ Sidade sira-neʼe mak sidade neʼebé seguru iha Judá no Benjamim. 11 Nia mós hametin liután fatin sira neʼebé seguru. Nia tau komandante sira iha fatin sira-neʼe no fó ai-han, mina no tua-uvas ba sira, 12 no nia mós tau eskudu boot no diman iha sidade hotu. Nia hakaʼas an halo sidade sira-neʼe seguru tebes. No nia kontinua ukun Judá ho Benjamim.

13 Amlulik no ema Levi neʼebé iha rai-Izraél tomak muda husi sira-nia área no apoia Roboão. 14 Ema Levi sira husik sira-nia rai no sira-nia liman-rohan+ no mai hela iha Judá no Jeruzalein, tanba Jeroboão ho ninia oan-mane sira hasai sira husi sira-nia knaar nuʼudar amlulik ba Jeová.+ 15 Tuirmai Jeroboão hili ninia amlulik rasik atu serbí iha fatin aas* sira+ no atu serbí maromak sira neʼebé halo hanesan bibi-timur*+ no mós atu serbí estátua karau-oan neʼebé nia halo ona.+ 16 No ema husi Izraél nia suku sira hotu neʼebé laran-metin hodi buka Jeová, Izraél nia Maromak, sira mós tuir amlulik no ema Levi sira hodi bá Jeruzalein atu hasaʼe sakrifísiu ba Jeová, sira-nia beiʼala nia Maromak.+ 17 Ba tinan tolu sira hametin liurai Judá nia pozisaun no apoia Salomão nia oan-mane Roboão, tanba ba tinan tolu sira laʼo tuir David no Salomão nia dalan.

18 Tuirmai Roboão kaben ho Maalat. Maalat nia aman mak Jerimot. Jerimot mak David nia oan-mane. Maalat nia inan mak Abihail. Abihail mak Eliab nia oan-feto. Eliab+ mak Jessé nia oan-mane. 19 Ikusmai Maalat tuur-ahi oan-mane sira: Jeus, Semarias no Zaham. 20 Depois neʼe, Roboão kaben ho Maaka, Absalão+ nia bei-oan. Ikusmai Maaka tuur-ahi Abias,+ Atai, Ziza no Selomit. 21 Roboão hadomi Maaka, Absalão nia bei-oan, liu fali ninia feen sira seluk no feen-kiʼik sira.+ Nia iha feen naʼin-18 no feen-kiʼik naʼin-60, no nia iha oan-mane naʼin-28 no oan-feto naʼin-60. 22 Roboão hili Maaka nia oan-mane Abias nuʼudar ulun-naʼin no xefe iha ninia maun-alin sira-nia leet, tanba Roboão hanoin atu foti Abias nuʼudar liurai. 23 Maibé, nia uza ninia matenek no haruka ninia oan-mane balu ba* área hotu iha Judá no Benjamim, ba sidade hotu neʼebé iha moru aas,+ no nia fó sira ai-han barak no fó sira feen barak.

12 Bainhira Roboão nia ukun metin ona+ no nia sai forte ona, nia la halo tuir tan Jeová nia Ukun-Fuan,+ no ema Izraél hotu mós halo tuir nia. 2 Iha tinan lima husi Liurai Roboão nia ukun, Liurai Sisac+ husi rai-Ejitu mai ataka Jeruzalein, tanba ema Izraél la hatudu laran-metin ba Jeová. 3 Sisac iha kuda-karreta 1.200, tropa naʼin-60.000 neʼebé saʼe kuda, no tropa barak tebes mai husi Ejitu hamutuk ho nia. Tropa sira-neʼe mak ema Líbia, ema Sukim no ema Etiópia.+ 4 Sisac manán Judá nia sidade sira neʼebé iha moru aas. Ikusmai nia mós mai iha Jeruzalein.

5 Profeta Semaias+ bá hasoru Roboão ho ulun-naʼin sira iha Judá neʼebé halibur ona iha Jeruzalein tanba taʼuk Sisac, no Semaias dehan ba sira: “Jeová dehan nuneʼe: ‘Imi husik ona haʼu, entaun haʼu mós husik imi+ hodi entrega imi ba Sisac nia liman.’” 6 Ho ida-neʼe, Izraél nia ulun-naʼin sira no mós liurai haraik an+ no dehan: “Jeová nia hahalok mak loos.” 7 Bainhira Jeová haree katak sira haraik an ona, Jeová dehan ba Semaias: “Sira haraik an ona. Haʼu sei la halakon sira,+ no lakleur tan haʼu sei salva sira. Haʼu sei la fakar sai haʼu-nia hirus ba Jeruzalein liuhusi Sisac. 8 Maibé sira sei sai Sisac nia atan, atu nuneʼe sira bele hatene ida-neʼebé mak diʼak liu, serbí haʼu ka serbí liurai sira husi rai seluk.”

9 Entaun Liurai Sisac husi rai-Ejitu mai ataka Jeruzalein. Nia foti rikusoin husi Jeová nia uma+ no husi liurai nia palásiu. Nia foti buat hotu, inklui mós eskudu osan-mean neʼebé Salomão halo.+ 10 Tan neʼe, Liurai Roboão halo fali eskudu husi riti atu troka eskudu sira-neʼe, no nia entrega eskudu sira-neʼe ba xefe guarda sira,* neʼebé hein iha liurai nia palásiu oin. 11 Bainhira liurai mai iha Jeová nia uma, guarda sira mai hamutuk ho liurai hodi kaer eskudu sira-neʼe, no depois neʼe, sira tau fali iha guarda nia kuartu. 12 Jeová la hirus tan ho liurai tanba liurai haraik an,+ no Nia la halakon sidade tomak.+ Liután neʼe, iha mós ema Judá balu neʼebé halo hahalok diʼak.+

13 Liurai Roboão hametin ninia pozisaun iha Jeruzalein no kontinua ukun nuʼudar liurai. Roboão tinan 41 bainhira nia sai liurai, no nia ukun durante tinan 17 iha sidade Jeruzalein, neʼebé Jeová hili ona husi Izraél nia suku hotu nia leet nuʼudar fatin atu lori ninia naran. Roboão nia inan naran Naamá ema Ammon.+ 14 Roboão halo hahalok aat, tanba nia lakohi* buka Jeová.+

15 Kona-ba Roboão nia istória sira seluk, husi primeiru toʼo ikus, neʼe iha ona iha lista naran nian tuir ninia liña jerasaun neʼebé hakerek husi profeta Semaias+ no Ido neʼebé haree vizaun husi Maromak.+ Iha tempu neʼebá sempre iha funu entre Roboão ho Jeroboão.+ 16 Ikusmai Roboão mate* no sira hakoi nia iha David nia Sidade;+ no ninia oan-mane Abias+ mak sai liurai hodi troka nia.

13 Iha tinan 18 husi Liurai Jeroboão nia ukun, Abias sai liurai hodi ukun Judá.+ 2 Nia ukun ba tinan tolu iha Jeruzalein. Ninia inan naran Micaias,*+ Uriel husi Gibea+ nia oan-feto. Iha tempu neʼebá, iha funu entre Abias ho Jeroboão.+

3 Tan neʼe, Abias bá halo funu ho ninia funu-naʼin neʼebé kbiit boot hamutuk naʼin-400.000, neʼebé hetan ona treinu.*+ Jeroboão mós halibur ninia funu-naʼin neʼebé kbiit boot hamutuk naʼin-800.000 neʼebé hetan ona treinu,* hodi halo funu hasoru Abias. 4 Abias hamriik iha Foho Zemaraim, iha área foho nian iha Efraim, no dehan: “Oh Jeroboão no ema Izraél hotu, rona mai haʼu. 5 Imi hatene ona katak Jeová, Izraél nia Maromak, mak fó pozisaun nuʼudar liurai ba David no ninia oan-mane sira+ atu ukun Izraél ba nafatin+ liuhusi aliansa masin nian.*+ 6 Maibé Nebat nia oan-mane Jeroboão,+ neʼebé mak David nia oan-mane Salomão nia atan, hamriik hodi kontra ninia naʼi.+ 7 Mane sira neʼebé la iha serbisu no folin-laek kontinua bá hamutuk ho nia. No sira sai forte liu Salomão nia oan-mane Roboão bainhira Roboão sei joven hela no taʼuk-teen, no Roboão labele kontra sira.

8 “Agora imi mak ema-lubun boot no imi iha estátua karau-oan osan-mean neʼebé Jeroboão halo ona nuʼudar maromak ba imi, tan neʼe imi hanoin katak imi bele kontra hasoru Jeová nia ukun neʼebé entrega ona ba David nia oan-mane sira.+ 9 Imi duni sai ona Jeová nia amlulik sira+ neʼebé husi Arão nia jerasaun no duni sai ona ema Levi sira. Imi mós hili ona imi-nia amlulik hanesan povu iha rai seluk halo.+ Bainhira ema lori mai* karau-aman* ida no bibi-malae aman hitu, imi foti ema neʼe nuʼudar amlulik hodi serbí buat neʼebé laʼós maromak. 10 Kona-ba ami, Jeová mak ami-nia Maromak,+ no ami la fila kotuk ba nia. Ami-nia amlulik husi Arão nia jerasaun mak serbí Jeová, no ema Levi sira mak halo serbisu hodi apoia amlulik sira. 11 Sira sunu sakrifísiu hodi halo suar ba Jeová dadeer no kalan+ no mós sunu insensu morin.+ No sira tau paun santu+ iha meza neʼebé halo husi osan-mean neʼebé moos, no kalan-kalan sira sunu lakan ahi-oan+ iha ahi-oan fatin neʼebé halo husi osan-mean,+ hodi nuneʼe ami kumpre ami-nia obrigasaun ba Jeová, ami-nia Maromak, maibé imi fila kotuk ona ba nia. 12 Maromak loos hamutuk ho ami, nia dirije ami, no ninia amlulik sira atu huu trombeta hodi fó sinál funu nian hasoru imi. Oh ema Izraél, keta halo funu hasoru Jeová, imi-nia beiʼala nia Maromak, tanba imi sei la hetan susesu.”+

13 Maibé Jeroboão haruka tropa balu subar hodi ataka tropa Judá husi kotuk. Nuneʼe ninia tropa sira iha tropa Judá nia oin no kotuk. 14 Bainhira tropa Judá hateke haleʼu, sira haree katak inimigu ataka sira husi oin no kotuk. Entaun sira komesa halerik ba Jeová,+ no amlulik sira huu trombeta ho lian makaʼas. 15 Tropa Judá sira hakilar lian funu nian, no bainhira sira hakilar, Maromak loos halo Jeroboão ho tropa Izraél hotu lakon funu hasoru Abias no mós tropa Judá. 16 Tropa Izraél halai husi tropa Judá nia oin, no Maromak entrega tropa Izraél ba sira-nia liman. 17 Abias no ninia tropa oho tropa Izraél barak, no sira oho tropa Izraél naʼin-500.000 neʼebé hetan ona treinu.* 18 Ho ida-neʼe, tropa Izraél sira sai moe, maibé tropa Judá manán tanba sira sadere ba Jeová, sira-nia beiʼala nia Maromak.+ 19 Abias kontinua duni tuir Jeroboão no hadau sidade sira husi nia. Sidade sira-neʼe mak Betel+ no mós ninia sidade kiʼik sira,* Jesana no mós ninia sidade kiʼik sira, no Efrom+ no mós ninia sidade kiʼik sira. 20 Durante Abias nia tempu, Jeroboão la iha tan kbiit hanesan uluk. Ikusmai Jeová kastigu nia no nia mate.+

21 Maibé Abias kontinua sai forte liután. Nia iha feen naʼin-14,+ no iha oan-mane naʼin-22 no oan-feto naʼin-16. 22 Kona-ba Abias nia istória sira seluk, no kona-ba ninia hahalok no liafuan, neʼe hakerek ona iha profeta Ido+ nia livru.

14 Ikusmai Abias mate* no sira hakoi nia iha David nia Sidade;+ no ninia oan-mane Asa mak sai liurai hodi troka nia. Iha Asa nia tempu, rai neʼe hakmatek ba tinan sanulu.

2 Asa halo buat neʼebé diʼak no loos tuir ninia Maromak Jeová nia haree. 3 Nia hasai altár ba maromak rai seluk nian+ no harahun fatin aas sira, baku rahun fatuk lulik*+ no tesi ai-riin lulik sira.*+ 4 Liután neʼe, nia haruka ema Judá atu buka Jeová, sira-nia beiʼala nia Maromak, no halo tuir Ukun-Fuan no mandamentu sira. 5 Ho ida-neʼe, nia hasai tiha fatin aas sira iha Judá nia sidade hotu no halakon tiha altár insensu nian.+ Durante ninia ukun, ema iha rai-Judá moris hakmatek. 6 Nia harii sidade sira neʼebé seguru iha Judá,+ tanba rai neʼe hakmatek no la iha funu durante tempu neʼe, tanba Jeová halo nia moris hakmatek.+ 7 Nia hatete ba ema Judá: “Mai ita harii sidade sira-neʼe no halo moru haleʼu, halo uma aas* sira,+ portaun* no ai-lolon neʼebé uza atu xave portaun. Rai neʼe hotu mak Ita-nian, tanba Ita buka ona Jeová, ita-nia Maromak. Ita buka nia, no nia halo ona ita moris hakmatek husi ita-nia inimigu sira hotu neʼebé haleʼu ita.” Ho ida-neʼe, sira hetan susesu ho sira-nia serbisu.+

8 Asa iha tropa naʼin-300.000 husi Judá, neʼebé kaer eskudu boot no diman. Ninia tropa husi Benjamim hamutuk naʼin-280.000, sira mak funu-naʼin neʼebé kbiit boot no lori eskudu kiʼik* no kaer rama.*+

9 Ikusmai Zerá ema Etiópia, mai hamutuk ho tropa naʼin-1.000.000 no kuda-karreta+ 300 hodi halo funu hasoru sira. Bainhira Zerá toʼo iha Maresa,+ 10 Asa sai hodi kontra nia, no sira forma hodi prontu atu halo funu iha Rai-Tetuk Zefata iha Maresa. 11 Tuirmai Asa harohan ba ninia Maromak Jeová,+ hodi dehan: “Oh Jeová, Ita-Boot la haree se ema neʼebé Ita ajuda mak forte* ka fraku.+ Oh Jeová, ami-nia Maromak, favór ida ajuda ami, tanba ami sadere ba Ita,+ no ami mai kontra ema-lubun neʼe hodi Ita-nia naran.+ Oh Jeová, Ita mak ami-nia Maromak. Keta husik ema mak manán funu hasoru Ita.”+

12 Entaun, Jeová halo ema Etiópia lakon funu hasoru Asa no mós tropa Judá. Depois neʼe, ema Etiópia halai.+ 13 Asa ho tropa neʼebé hamutuk ho nia, duni tuir ema Etiópia toʼo Gerar,+ no sira oho ema Etiópia toʼo la iha ema ida mak moris, tanba Jeová no ninia tropa halakon ema sira-neʼe. Depois neʼe, Asa ho ninia tropa foti sasán barak. 14 Liután neʼe, sira manán sidade hotu neʼebé haleʼu Gerar, tanba Jeová halo ema sira-neʼe sai taʼuk. Sira foti sasán husi sidade sira-neʼe hotu, tanba iha sasán barak iha sidade laran. 15 Sira mós ataka ema sira neʼebé hela iha tenda hodi hein animál, no sira mós foti bibi no kuda-kamelu barak, depois neʼe sira fila fali ba Jeruzalein.

15 Maromak haraik ninia espíritu ba Oded nia oan-mane Azarias. 2 Ho ida-neʼe, nia bá hasoru Asa no dehan: “Oh Asa ho ema Judá no Benjamim tomak, rona mai haʼu! Jeová sei kontinua hamutuk ho imi se imi hamutuk ho nia.+ Se imi buka nia, nia sei husik imi hetan nia,+ maibé se imi husik nia, nia mós sei husik imi.+ 3 Ba tempu kleur ona ema Izraél la adora Maromak loos, la iha amlulik ida atu hanorin sira, no la iha ukun-fuan.+ 4 Maibé bainhira sira hetan susar no sira fila fali ba Jeová, Izraél nia Maromak, no sira buka nia, nia husik sira hetan nia.+ 5 Iha tempu neʼebá ema neʼebé halo viajen la sente seguru,* tanba sempre iha problema entre ema hotu iha rai neʼe. 6 Nasaun* ida harahun nasaun seluk, sidade ida harahun sidade seluk, Maromak halo sira-nia moris la hakmatek tanba susar oioin kona sira.+ 7 Maibé kona-ba imi, sai forte bá no keta laran-triste,*+ tanba imi sei simu kolen ba imi-nia serbisu hotu.”

8 Bainhira Asa rona liafuan sira-neʼe no rona Maromak nia liafuan neʼebé profeta Oded fó sai, nia sai aten-brani kedas no hasai estátua sira neʼebé Maromak hakribi* husi rai-Judá+ no Benjamim tomak, no mós husi sidade sira neʼebé nia manán ona iha área foho nian iha Efraim, no nia hadiʼa fali Jeová nia altár neʼebé iha varanda oin iha Jeová nia uma.+ 9 Nia halibur hamutuk ema hotu husi Judá, Benjamim, no mós ema sira husi Efraim, Manasés no Simeão+ neʼebé hela iha sira-nia leet, tanba uluk sira barak sai husi Izraél hodi mai apoia nia tanba sira haree katak Jeová, ninia Maromak, hamutuk ho nia. 10 Ho ida-neʼe, sira halibur hamutuk iha Jeruzalein iha fulan-tolu tinan 15 husi Asa nia ukun. 11 Iha loron neʼe sira foti animál balu neʼebé sira lori husi funu, karau 700 no bibi-malae 7.000 no sira hasaʼe nuʼudar sakrifísiu ba Jeová. 12 Liután neʼe, sira halo aliansa ida atu buka Jeová, sira-nia beiʼala nia Maromak, ho sira-nia laran tomak no ho sira-nia moris tomak.+ 13 Se ema ruma lakohi buka Jeová, Izraél nia Maromak, ema neʼe tenke mate, maski nia mak labarik kiʼik ka ema boot, mane ka feto.+ 14 Ho ida-neʼe, sira jura ba Jeová ho lian makaʼas, sira haklalak ho haksolok, huu trombeta no dikur. 15 Ema Judá hotu kontente ho juramentu neʼe, tanba sira jura ho sira-nia laran tomak no sira laran-manas atu buka Jeová, no nia husik sira hetan nia,+ no kontinua halo sira moris hakmatek husi sira-nia inimigu iha sira-nia sorin-sorin.+

16 Liurai Asa mós hasai ninia avó-feto Maaka+ nia pozisaun nuʼudar liurai-feto, tanba ninia avó-feto halo ona estátua ida neʼebé Maromak hakribi hodi uza atu adora ai-riin lulik.*+ Asa halo rahun ninia avó-feto nia estátua toʼo uut no sunu iha Foho-Leet Sedron.+ 17 Maibé fatin aas sira iha nafatin+ iha Izraél.+ Maski nuneʼe, Asa serbí* Maromak ho laran tomak durante ninia moris.+ 18 Nia lori sasán sira neʼebé nia no ninia aman halo santu ona hodi tau iha Maromak loos nia uma. Neʼe mak osan-mutin, osan-mean no sasán oioin.+ 19 La mosu tan funu toʼo tinan 35 husi Asa nia ukun.+

16 Iha tinan 36 husi Liurai Asa nia ukun iha rai-Judá, Liurai Baasa+ husi Izraél mai hodi halo funu hasoru Judá no komesa hametin* sidade Ramá+ atu bele hanetik ema neʼebé tama-sai Liurai Asa nia rai.+ 2 Ho ida-neʼe, Asa hasai osan-mutin no osan-mean husi osan-fatin iha Jeová nia uma+ no iha liurai nia palásiu, no nia haruka rikusoin sira-neʼe ba Liurai Ben-Hadad husi Síria,+ neʼebé hela iha Damasku, hodi dehan: 3 “Iha akordu* entre haʼu ho Ita, no entre haʼu-nia aman ho Ita-nia aman. Agora haʼu haruka osan-mutin no osan-mean ba Ita. Favór ida, hakotu Ita-nia akordu* ho Liurai Baasa husi Izraél, atu nuneʼe nia bele sai husi haʼu-nia rai.”

4 Ben-Hadad rona ba Liurai Asa nia liafuan no haruka ninia xefe tropa nian sira bá ataka Izraél nia sidade sira, no sira manán sidade Ijon,+ Dan+ no Abel-Maim, no sira mós hadau armazén hotu neʼebé iha sidade sira iha rai-Naftali.+ 5 Bainhira Baasa rona kona-ba neʼe, nia para kedas hodi la hametin* sidade Ramá no husik hela ninia serbisu. 6 Liurai Asa bá hamutuk ho ema Judá hotu, no sira lori fatuk ho ai sira husi Ramá+ neʼebé uluk Baasa uza atu hametin* Ramá,+ no Asa uza buat sira-neʼe atu hametin* sidade Geba+ no Mizpa.+

7 Iha tempu neʼebá konsellu-naʼin* Hanani+ mai hasoru Liurai Asa husi Judá no dehan ba nia: “Ó sadere ba liurai Síria no la sadere ba Jeová, ó-nia Maromak, tan neʼe liurai Síria nia tropa sira sai livre ona husi ó-nia liman.+ 8 Uluk tropa Etiópia no Líbia barak tebes no iha kuda-karreta no tropa barak neʼebé saʼe kuda, maibé tanba ó sadere ba Jeová, nia entrega ema sira-neʼe ba ó-nia liman.+ 9 Tanba Jeová nia matan hateke didiʼak ba mundu tomak+ atu hatudu ninia kbiit hodi salva ninia atan sira neʼebé laran-metin ba nia.*+ Maibé ó hatudu ona hahalok beik iha situasaun neʼe. Entaun husi ohin ba oin sei mosu funu kontra ó.”+

10 Asa sai hirus ba konsellu-naʼin* neʼe. Asa laran-nakali toʼo hatama nia ba komarka tanba liafuan sira-neʼe. Iha tempu neʼebá Asa mós komesa hanehan povu balu. 11 Kona-ba Asa nia istória sira seluk, husi primeiru toʼo ikus, neʼe hakerek ona iha Livru Istória kona-ba Judá no Izraél nia Liurai sira.+

12 Iha tinan 39 husi Asa nia ukun, nia hetan moras ida iha ninia ain toʼo nia sai moras tebetebes. Maski nia hetan moras neʼe, maibé nia la buka ajuda husi Jeová, nia buka fali ajuda husi doutór sira. 13 Ikusmai Asa mate;*+ nia mate iha tinan 41 husi ninia ukun. 14 Entaun sira hakoi nia iha rate boot neʼebé nia rasik keʼe ona iha David nia Sidade,+ no sira hatoba ninia mate-isin iha toba-fatin neʼebé nakonu ona ho mina-bálsamu no buat morin oioin neʼebé kahur ona.+ Liután neʼe, sira sunu lakan ahi boot hodi hatudu respeitu ba nia.*

17 Asa nia oan-mane Jeosafát+ mak sai liurai hodi troka nia, no Jeosafát hametin ninia pozisaun atu ukun Izraél. 2 Nia tau tropa sira iha Judá nia sidade hotu neʼebé iha moru aas no tau tropa lubun sira iha rai-Judá no iha Efraim nia sidade sira neʼebé ninia aman Asa manán ona.+ 3 Jeová kontinua hamutuk ho Jeosafát tanba nia laʼo tuir ninia beiʼala David nia dalan+ no la adora* Baal. 4 Tanba nia adora* ninia aman nia Maromak+ no halo tuir Ninia mandamentu, no la halo tuir ema Izraél nia hahalok.+ 5 Jeová kontinua hametin ninia ukun,+ no ema Judá tomak kontinua lori prezente ba Jeosafát. Nia iha rikusoin barak no hetan glória boot.+ 6 Nia sai aten-brani atu laʼo tuir Jeová nia dalan sira, no nia mós hasai fatin aas sira+ no tesi ai-riin lulik* sira+ husi Judá.

7 Iha tinan terseiru husi Jeosafát nia ukun, nia bolu ninia ulun-naʼin sira tuirmai neʼe: Ben-Hail, Obadias, Zacarias, Netanel no Micaias. Nia haruka sira bá hanorin ema iha Judá nia sidade sira. 8 Ema Levi mós bá hamutuk ho sira: Semaias, Netanias, Zebadias, Asael, Semiramot, Jeonatan, Adonias, Tobias no Tobe-Adonias, hamutuk ho amlulik Elisama no amlulik Jeorão.+ 9 Sira lori livru kona-ba Jeová nia Ukun-Fuan no komesa hanorin iha rai-Judá.+ Sira laʼo haleʼu Judá nia sidade hotu hodi hanorin povu.

10 Nasaun hotu neʼebé haleʼu Judá la halo funu hasoru Jeosafát tanba Jeová halo sira sai taʼuk. 11 Ema Filístia mós lori prezente no osan hodi selu impostu ba Jeosafát. Ema Arábia fó bibi-malae aman 7.700 no bibi-timur aman 7.700 husi sira-nia animál-lubun.

12 Jeosafát sai kbiit boot no boot liután,+ no nia kontinua harii sidade sira neʼebé seguru+ no mós sidade sira neʼebé nuʼudar armazén+ iha Judá. 13 Nia halo serbisu barak tebes iha Judá nia sidade sira. Nia iha tropa iha Jeruzalein, sira mak funu-naʼin neʼebé kbiit boot. 14 Tuirmai neʼe mak grupu tropa sira tuir sira-nia aman nia umakain: xefe sira ba tropa naʼin-1.000 husi suku Judá mak xefe Adná, no funu-naʼin neʼebé kbiit boot+ naʼin-300.000 hamutuk ho nia. 15 Adná dirije xefe Jeoanan, no mane naʼin-280.000 hamutuk ho Jeoanan. 16 Adná mós dirije Zikri nia oan-mane Amasias, neʼebé sempre prontu atu halo Jeová nia serbisu, no funu-naʼin neʼebé kbiit boot naʼin-200.000 hamutuk ho Amasias. 17 No husi suku Benjamim+ mak Eliada, nia mak funu-naʼin neʼebé kbiit boot, no tropa naʼin-200.000 neʼebé kaer rama no eskudu hamutuk ho nia.+ 18 Eliada mak dirije Jeozabad, no tropa naʼin-180.000 neʼebé prontu atu bá funu mak hamutuk ho nia. 19 Tropa sira-neʼe halo serbisu ba liurai hamutuk ho tropa sira neʼebé liurai tau iha Judá nia sidade hotu neʼebé iha moru aas.+

18 Jeosafát iha rikusoin barak no hetan glória boot,+ maibé nia sai família ho Acab liuhusi aliansa kaben nian.+ 2 Tinan balu liutiha, Jeosafát tun ba Samaria hodi hasoru Acab,+ no Acab oho* bibi-malae no karau barak ba nia no ba ema sira neʼebé hamutuk ho nia. Acab husu* nia atu bá funu hasoru Ramot-Gilead.+ 3 Tuirmai Liurai Acab husi Izraél husu ba Liurai Jeosafát iha rai-Judá, hodi dehan: “Ó bele bá Ramot-Gilead hamutuk ho haʼu ka lae?” Nia hatán: “Ita-Boot ho haʼu mak ida deʼit. Ita-nia povu ho haʼu-nia povu mak ida deʼit, no haʼu sei apoia Ita-Boot hodi halo funu.”

4 Maibé Jeosafát hatete ba liurai Izraél: “Favór ida, husu uluk Jeová nia matadalan kona-ba neʼe.”+ 5 Entaun liurai Izraél halibur profeta naʼin-400, no husu ba sira: “Ami bele bá halo funu hasoru Ramot-Gilead ka labele?” Sira hatán: “Bá deʼit, Maromak loos sei entrega sidade neʼe ba liurai nia liman.”

6 Tuirmai Jeosafát dehan: “Iha rai neʼe, sei iha Jeová nia profeta ka lae?+ Mai ita husu nia.”+ 7 Liurai Izraél hatete ba Jeosafát: “Sei iha mane ida tan+ neʼebé Ita bele husu kona-ba Jeová nia hanoin, maibé haʼu odi nia, tanba nia nunka fó sai profesia neʼebé diʼak kona-ba haʼu, só aat deʼit.+ Nia mak Imla nia oan-mane Micaias.” Maibé Jeosafát hatete: “Liurai labele koʼalia hanesan neʼe.”

8 Entaun liurai Izraél bolu ema-boot ida neʼebé serbisu iha palásiu no dehan: “Lori Imla nia oan-mane Micaias mai lalais.”+ 9 Iha tempu neʼe liurai Izraél no Jeosafát, liurai husi Judá, tuur hela iha sira ida-idak nia kadunan, sira hatais roupa liurai nian, sira tuur iha fatin sama trigu nian besik sidade Samaria nia portaun, no profeta hotu koʼalia sai liafuan iha sira-nia oin. 10 Tuirmai Kenana nia oan-mane Zedequias halo dikur sira husi besi no dehan: “Jeová dehan nuneʼe: ‘Ho dikur sira-neʼe mak Ita sei tuku* ema Síria toʼo halakon sira hotu.’” 11 Profeta sira seluk hotu fó sai liafuan neʼebé hanesan, hodi dehan: “Saʼe ba Ramot-Gilead no Ita-Boot sei hetan susesu.+ Jeová sei entrega sidade neʼe ba liurai nia liman.”

12 Entaun ema neʼebé liurai haruka atu bolu Micaias hatete ba Micaias: “Profeta hotu koʼalia diʼak deʼit ba liurai. Favór ida, koʼalia liafuan neʼebé hanesan sira-nian,+ no koʼalia liafuan neʼebé diʼak.”+ 13 Maibé Micaias hatete: “Haʼu jura hodi Jeová, Maromak neʼebé moris, katak haʼu sei koʼalia deʼit liafuan hotu neʼebé haʼu-nia Maromak fó sai ba haʼu.”+ 14 Tuirmai Micaias bá hasoru liurai, no liurai husu ba nia: “Micaias, ami bele bá halo funu hasoru Ramot-Gilead ka lae?” Micaias hatán kedas: “Bá deʼit, Ita-Boot sei hetan susesu, Maromak sei entrega sira ba Ita-nia liman.” 15 Rona tiha neʼe, liurai dehan ba nia: “Dala hira tan mak haʼu tenke haruka ó atu jura hodi Jeová nia naran atu koʼalia deʼit buat loos ba haʼu?” 16 Entaun nia dehan: “Haʼu haree ema Izraél hotu halai namkari iha foho sira, hanesan bibi neʼebé bibi-atan la iha.+ Jeová hatete ona: ‘Sira la iha naʼin. Husik sira ida-idak fila fali ba sira-nia uma ho dame.’”

17 Tuirmai liurai Izraél hatete ba Jeosafát: “Haʼu dehan ona ba ó: ‘Nia nunka fó sai profesia neʼebé diʼak kona-ba haʼu, só aat deʼit.’”+

18 Entaun Micaias dehan: “Tan neʼe, rona Jeová nia liafuan bá. Haʼu haree Jeová tuur iha ninia kadunan+ no tropa lalehan nian hotu+ hamriik iha ninia sorin loos no sorin karuk.+ 19 No Jeová hatete: ‘Sé mak sei lohi Liurai Acab husi Izraél atu nuneʼe nia bele bá no mate iha Ramot-Gilead?’ Anju ida dehan buat ida no anju seluk dehan buat seluk. 20 Tuirmai anju*+ ida hakat ba oin no hamriik iha Jeová nia oin, hodi dehan: ‘Haʼu mak sei lohi nia.’ Jeová husu nia: ‘Oinsá mak ó sei lohi nia?’ 21 Nia hatán: ‘Haʼu sei bá tau lia-bosok iha ninia profeta hotu nia ibun.’* Maromak dehan: ‘Ó sei lohi duni nia, liután neʼe, ó sei hetan susesu. Bá, halo tuir ó-nia liafuan.’ 22 Agora Jeová tau ona lia-bosok* iha profeta sira-neʼe nia ibun,+ maibé Jeová fó sai ona katak ó sei hetan susar.”

23 Entaun Kenana nia oan-mane Zedequias+ hakbesik no basa Micaias+ nia hasan,+ no dehan: “Jeová nia espíritu husik tiha haʼu hodi koʼalia fali ho ó ka?”+ 24 Micaias hatán: “Ó sei hatene kona-ba neʼe iha loron neʼebé ó tama ba fatin segredu iha uma laran atu subar.” 25 Tuirmai liurai Izraél dehan: “Lori Micaias no entrega ba Amon, xefe ba sidade neʼe, no ba liurai nia oan-mane Joas. 26 Hatete ba sira: ‘Liurai hatete nuneʼe: “Hatama mane neʼe ba komarka+ no fó paun ho bee uitoan deʼit ba nia toʼo haʼu fila fali mai ho dame.”’” 27 Maibé Micaias dehan: “Se Ita-Boot fila fali mai ho dame, neʼe katak Jeová la koʼalia ho haʼu.”+ Nia hatutan tan: “Oh imi povu hotu, hanoin-hetan haʼu-nia liafuan.”

28 Nuneʼe liurai Izraél no Jeosafát, liurai Judá, saʼe ba Ramot-Gilead.+ 29 Liurai Izraél hatete ba Jeosafát: “Haʼu sei uza roupa neʼebé halo ema la koñese haʼu no bá halo funu, maibé ó tenke hatais ó-nia roupa liurai nian.” Entaun liurai Izraél uza roupa neʼebé halo ema la koñese nia no sira bá halo funu. 30 Iha tempu neʼebá, liurai Síria hatete ona ba ninia komandante sira neʼebé dirije kuda-karreta funu nian, hodi dehan: “Keta halo funu ho ema seluk maski xefe ka tropa baibain, imi tenke ataka deʼit liurai Izraél.” 31 Bainhira komandante sira-neʼe haree Jeosafát, sira hatete ba malu: “Nia mak liurai Izraél.” Entaun sira fila hodi ataka Jeosafát, no nia komesa hakilar atu husu ajuda,+ no Maromak Jeová ajuda nia, no hasees kedas ema sira-neʼe husi nia. 32 Bainhira komandante sira-neʼe haree katak nia laʼós liurai Izraél, sira para kedas no la duni tuir tan nia.

33 Mane ida hana ninia rama, maibé rama-oan neʼe kona liurai Izraél nia isin neʼebé la taka ho roupa funu nian. Entaun liurai hatete ba tropa neʼebé lori liurai nia kuda-karreta: “Fila fali no lori haʼu sai husi funu neʼe,* tanba haʼu kanek todan.”+ 34 Funu sai makaʼas liu iha loron neʼe, no tropa sira tenke ajuda liurai Izraél atu hamriik nafatin iha ninia kuda-karreta no ninia oin hateke ba ema Síria toʼo lokraik, no nia mate bainhira loro-matan monu.+

19 Liurai Jeosafát fila fali ho seguru*+ ba ninia palásiu iha Jeruzalein. 2 Tuirmai Hanani,+ neʼebé fó sai vizaun husi Maromak, nia oan-mane Jeú+ bá hasoru Liurai Jeosafát no dehan: “Tanbasá mak ó ajuda ema aat+ no hadomi ema neʼebé odi Jeová?+ Tan neʼe mak Jeová sai hirus hasoru ó. 3 Maski nuneʼe, Maromak haree ona buat diʼak iha ó,+ tanba ó halakon ona ai-riin lulik* sira husi rai neʼe no ó deside metin* ona iha ó-nia laran hodi buka Maromak neʼebé loos.”+

4 Jeosafát kontinua hela iha Jeruzalein. Nia vizita povu sira husi Beer-Seba toʼo área foho nian iha Efraim,+ atu ajuda sira fila fali ba Jeová, sira-nia beiʼala nia Maromak.+ 5 Nia mós hili juís sira iha rai tomak, iha Judá nia sidade sira hotu neʼebé iha moru aas.+ 6 Nia hatete ba juís sira: “Haree didiʼak buat neʼebé imi halo, tanba imi tesi-lia hodi Jeová nia naran, laʼós ema nia naran, no nia hamutuk ho imi bainhira imi tesi-lia.+ 7 Agora imi tenke hamtaʼuk Jeová.+ Haree didiʼak buat neʼebé imi halo, tanba Jeová, ita-nia Maromak, sempre halo buat neʼebé loos,+ nia la todan ba sorin,+ no la simu prezente atu bobar lia-loos.”+

8 Iha Jeruzalein, Jeosafát mós hili ema Levi no amlulik no ulun-naʼin balu ba Izraél nia umakain sira atu sai nuʼudar juís atu tesi-lia hodi Jeová nia naran no rezolve ema Jeruzalein nia kazu sira.+ 9 Nia fó mandamentu ba sira, hodi dehan: “Imi tenke halaʼo imi-nia knaar hodi hamtaʼuk Jeová, ho laran-metin no ho laran tomak:* 10 Kuandu imi-nia maun-alin sira neʼebé hela iha sira-nia sidade, lori kazu ida kona-ba oho ema,+ ka husu pergunta kona-ba ukun-fuan, mandamentu, lei, ka desizaun ruma, imi tenke fó avizu ba sira atu nuneʼe sira labele halo sala iha Jeová nia oin. Se lae, nia sei hirus imi no imi-nia maun-alin sira. Imi tenke halo ida-neʼe, atu nuneʼe imi labele hetan sala. 11 Amlulik boot Amarias mak imi-nia ulun-naʼin, nia sei ajuda imi atu hatene Jeová nia hakarak kona-ba buat hotu.+ Ismael nia oan-mane Zebadias mak ulun-naʼin ba umakain Judá no tau matan ba liurai nia serbisu. No ema Levi sira mak sei tau matan ba imi. Sai forte bá no halo serbisu, haʼu hein katak Jeová sei hamutuk ho ema neʼebé halo buat neʼebé diʼak.”*+

20 Liutiha tempu balu, ema Moab+ no ema Ammon,+ hamutuk ho ema Amonim* balu, mai halo funu hasoru Jeosafát. 2 Ema fó-hatene ba Jeosafát, hodi dehan: “Tropa lubun boot mai ona husi área tasi nian,* husi Edom,+ atu funu hasoru Ita-Boot, no agora sira iha ona Hazazon-Tamar, neʼe katak, En-Gedi.”+ 3 Rona tiha neʼe, Jeosafát sai taʼuk, no nia deside atu buka Jeová.+ Entaun nia fó sai avizu iha Judá tomak atu povu hotu halo jejún. 4 Tuirmai povu Judá halibur hamutuk atu husu Jeová nia ajuda.+ Sira mai husi Judá nia sidade hotu atu husu matadalan husi Jeová.

5 Depois neʼe, Jeosafát hamriik hamutuk ho kongregasaun Judá no Jeruzalein iha Jeová nia uma iha pátiu* foun nia oin, 6 no nia dehan:

“Oh Jeová, ami-nia beiʼala nia Maromak, Ita-Boot mak Maromak iha lalehan,+ Ita mak domina nasaun sira hotu.+ Ita-nia liman forte no iha kbiit, no la iha ema ida mak bele kontra Ita.+ 7 Oh ami-nia Maromak, uluk Ita mak duni sai ema sira neʼebé hela iha rai neʼe husi Ita-nia povu Izraél nia oin no tuirmai fó rai neʼe nuʼudar liman-rohan ba Ita-nia belun Abraão nia bei-oan sira ba nafatin.+ 8 No sira hela iha rai neʼe, sira harii fatin sagradu ida ba Ita-nia naran,+ no dehan: 9 ‘Se susar ruma kona ami, maski susar neʼe mak tanba surik, kastigu neʼebé makaʼas, moras-peste,* ka hamlaha boot, ami sei hamriik iha Ita-Boot nia oin no iha uma neʼe nia oin, tanba uma neʼe lori Ita-nia naran,+ no ami sei harohan ba Ita hodi husu Ita-nia ajuda atu hasai ami husi ami-nia susar, favór ida rona no salva ami.’+ 10 Agora ema Ammon, ema Moab, no ema husi área foho nian iha Seir,+ neʼebé Ita la husik ema Izraél atu halakon bainhira ema Izraél sai husi rai-Ejitu, sira mai ona iha neʼe. Uluk ema Izraél sees husi sira no la halakon sira.+ 11 Agora sira halo aat fali ba ami hodi mai atu duni sai ami husi rai neʼebé Ita fó ona ba ami nuʼudar liman-rohan.+ 12 Oh ami-nia Maromak, Ita sei la kastigu sira ka?+ Tanba ami la iha kbiit atu kontra tropa lubun boot neʼebé mai hasoru ami. Ami la hatene atu halo saida,+ maibé ami-nia matan hateke ba Ita.”+

13 Iha tempu neʼe, ema Judá hotu hamriik iha Jeová nia oin, hamutuk ho sira-nia feen, sira-nia oan,* inklui mós labarik sira neʼebé kiʼikoan.

14 Tuirmai Jeová haraik ninia espíritu ba Jaaziel iha kongregasaun nia leet. Jaaziel nia aman mak Zacarias; Zacarias nia aman mak Benaias; Benaias nia aman mak Jeiel; Jeiel nia aman mak Matanias, ema Levi, husi Asaf nia umakain. 15 Jaaziel dehan: “Oh ema Judá hotu no imi neʼebé hela iha Jeruzalein no mós Liurai Jeosafát, rona bá! Jeová dehan nuneʼe: ‘Labele sai taʼuk ka nakdedar ba tropa lubun boot neʼe, tanba funu neʼe laʼós imi-nian maibé Maromak nian.+ 16 Tun bá hasoru sira aban. Sira sei saʼe mai husi dalan Ziz nian, no imi sei hetan sira iha mota* nia rohan iha rai-fuik Jeruel nia oin. 17 Imi la presiza luta iha funu neʼe. Hamriik iha imi-nia fatin, hamriik metin+ no haree oinsá Jeová salva imi.+ Oh ema Judá no Jeruzalein, labele sai taʼuk ka nakdedar.+ Sai bá hasoru sira aban, no Jeová sei hamutuk ho imi.’”+

18 Ho ida-neʼe, Jeosafát no ema Judá hotu no ema Jeruzalein hakneʼak kedas no hakruʼuk ho oin ba rai iha Jeová nia oin hodi adora Jeová. 19 Tuirmai ema Levi sira husi Kohat nia umakain+ no mós Kora nia umakain hamriik atu hahiʼi Jeová, Izraél nia Maromak, ho lian makaʼas tebes.+

20 Dadeer tuirmai sira hadeer sedu no sai ba rai-fuik Tekoa.+ Bainhira sira sai daudaun, Jeosafát hamriik no dehan: “Oh ema Judá no imi neʼebé hela iha Jeruzalein, rona mai haʼu! Tau fiar ba Jeová, imi-nia Maromak, atu nuneʼe imi bele hamriik metin.* Tau fiar ba ninia profeta sira,+ no imi sei hetan susesu.”

21 Bainhira Jeosafát koʼalia tiha ho povu, nia hili mane balu atu kanta+ knananuk hahiʼi nian ba Jeová. Sira hatais roupa santu hodi laʼo uluk iha tropa sira-nia oin, hodi kanta: “Fó agradese ba Jeová, tanba ninia domin neʼebé laran-metin iha ba nafatin.”+

22 Bainhira sira komesa kanta ho haksolok hodi fó hahiʼi, Jeová haruka ema balu atu ataka ema Ammon, ema Moab, no ema sira husi área foho nian iha Seir neʼebé mai ataka Judá, no inimigu sira-neʼe ida-idak oho malu.+ 23 No ema Ammon ho ema Moab oho ema sira neʼebé hela iha área foho nian iha Seir,+ no bainhira sira oho hotu ona ema sira-neʼe, sira rasik oho malu.+

24 Bainhira ema Judá toʼo iha uma aas* iha rai-fuik+ no hateke ba tropa lubun neʼe, sira haree ema sira-neʼe nia mate-isin latan hela iha rai,+ la iha ema ida mak moris. 25 Entaun Jeosafát no ninia povu sira bá foti ema sira-neʼe nia sasán, no sira hetan sasán barak, roupa no sasán sira neʼebé folin-boot. Sira foti buat sira-neʼe toʼo lori labele.+ Ba loron tolu sira foti sasán sira-neʼe, tanba barak tebes. 26 Iha loron haat sira halibur hamutuk iha Rai-Tetuk Beraka, tanba sira fó hahiʼi* ba Jeová iha fatin neʼe. Tan neʼe mak sira hanaran fatin neʼe Rai-Tetuk Beraka*+ toʼo ohin loron.

27 Tuirmai ema Judá no Jeruzalein hotu hamutuk ho Jeosafát neʼebé dirije sira, fila fali ba Jeruzalein ho haksolok, tanba Jeová halo sira manán sira-nia inimigu.+ 28 Entaun sira tama ba Jeruzalein. Sira toka instrumentu neʼebé iha talin, arpa,+ no huu trombeta.+ Sira laʼo ba Jeová nia uma.+ 29 Maromak Jeová halo nasaun hotu sai taʼuk bainhira sira rona katak Maromak halo funu ona kontra Izraél nia inimigu sira.+ 30 Ho ida-neʼe, Jeosafát nia ukun laʼo ho dame, no ninia Maromak kontinua halo nia moris hakmatek husi inimigu iha ninia sorin-sorin.+

31 Jeosafát kontinua ukun Judá. Nia tinan 35 bainhira nia sai liurai, no nia ukun iha Jeruzalein durante tinan 25. Ninia inan naran Azuba, Sili nia oan-feto.+ 32 Jeosafát kontinua laʼo tuir ninia aman Asa nia dalan.+ Nia la hasees an husi dalan sira-neʼe, no nia halo buat neʼebé loos tuir Jeová nia haree.+ 33 Maibé, fatin aas sira iha nafatin,+ no povu seidauk deside metin* iha sira-nia laran atu adora sira-nia beiʼala nia Maromak.+

34 Kona-ba Jeosafát nia istória sira seluk, husi primeiru toʼo ikus, neʼe hakerek ona iha Hanani+ nia oan-mane Jeú+ nia livru no tau hamutuk ho Livru Istória kona-ba Izraél nia Liurai sira. 35 Depois neʼe, Liurai Jeosafát husi Judá halo aliansa ho Liurai Acazias husi Izraél neʼebé halo hahalok aat.+ 36 Entaun, Jeosafát serbisu hamutuk ho Acazias hodi halo ró sira atu bá Tarsis,+ no sira halo ró sira-neʼe iha Ezion-Geber.+ 37 Maibé Dodavau, husi Maresa, nia oan-mane Eliezer fó sai profesia kontra Jeosafát, hodi dehan: “Tanba ó halo ona aliansa ho Acazias, Jeová sei estraga ó-nia serbisu sira.”+ Ho ida-neʼe, ró sira-neʼe sai aat+ no labele bá Tarsis.

21 Ikusmai Jeosafát mate* no sira hakoi nia hamutuk ho ninia beiʼala sira iha David nia Sidade, no ninia oan-mane Jeorão mak sai liurai hodi troka nia.+ 2 Jeosafát nia oan-mane sira, Jeorão nia alin sira, mak tuirmai neʼe: Azarias, Jeiel, Zacarias, Azarias, Micael no Sefatias. Sira hotu mak Liurai Jeosafát husi Izraél nia oan-mane. 3 Sira-nia aman fó prezente barak ba sira hanesan osan-mutin, osan-mean, sasán folin-boot, no Judá nia sidade sira neʼebé iha moru aas,+ maibé sira-nia aman entrega pozisaun nuʼudar liurai ba Jeorão+ tanba nia mak oan-mane primeiru.

4 Bainhira Jeorão kaer ona ninia aman nia pozisaun nuʼudar liurai, nia hametin ninia pozisaun neʼe hodi oho ninia alin sira hotu+ ho surik, no mós oho ulun-naʼin balu iha Izraél. 5 Jeorão tinan 32 bainhira nia sai liurai, no nia ukun iha Jeruzalein durante tinan ualu.+ 6 Nia laʼo tuir liurai Izraél sira-nia dalan,+ hanesan ema sira husi Acab nia umakain, tanba nia hola Acab nia oan-feto nuʼudar ninia feen,+ no nia kontinua halo buat neʼebé aat tuir Jeová nia haree. 7 Maibé Jeová lakohi halakon David nia umakain tanba aliansa neʼebé nia halo ona ho David.+ Uluk nia promete ona atu fó ahi-oan* ida ba David no ba ninia oan-mane sira ba nafatin.+

8 Iha Jeorão nia tempu, ema Edom kontra hasoru Judá nia ukun+ no tuirmai ema Edom hili sira-nia liurai rasik.+ 9 Entaun Jeorão hamutuk ho ninia komandante sira bá Edom no lori ninia kuda-karreta hotu. No ema Edom haleʼu nia ho ninia komandante sira neʼebé dirije kuda-karreta funu nian, maibé nia hamriik durante kalan hodi halakon ema Edom. 10 Maibé ema Edom nafatin kontra hasoru Judá toʼo ohin loron. Iha tempu neʼebá ema Libna+ mós kontra hasoru Jeorão nia ukun, tanba nia fila kotuk ona ba Jeová, ninia beiʼala nia Maromak.+ 11 Nia mós harii fatin aas+ iha Judá nia foho sira hodi dada ema Jeruzalein atu la hatudu laran-metin ba Maromak,* no lori ema Judá laʼo sala dalan.

12 Ikusmai profeta Elias+ hakerek lia-menon no haruka ba Jeorão, hodi dehan: “Jeová, ó-nia beiʼala David nia Maromak, dehan nuneʼe: ‘Ó la laʼo tuir ó-nia aman Jeosafát nia dalan+ no la laʼo tuir Liurai Asa husi Judá nia dalan.+ 13 Maibé ó laʼo tuir liurai Izraél sira-nia dalan+ no dada ema Judá ho Jeruzalein atu la hatudu laran-metin ba Maromak*+ hanesan Acab nia umakain,+ no ó mós oho ó-nia alin sira,+ husi ó-nia aman nia umakain, sira neʼebé diʼak liu fali ó. 14 Tan neʼe, Jeová sei fó kastigu makaʼas ba ó-nia povu, ó-nia oan-mane sira, ó-nia feen sira, no ba ó-nia rikusoin hotu. 15 Loron ba loron, ó sei hetan moras barak, inklui moras iha ó-nia tee-oan, toʼo ó-nia tee-oan sai tanba moras neʼe.’”

16 Tuirmai Jeová book+ ema Filístia+ no ema Arábia+ neʼebé hela besik ema Etiópia hodi mai kontra Jeorão. 17 Ho ida-neʼe, sira mai ataka Judá, sira tama rai neʼe, no foti rikusoin hotu neʼebé iha liurai nia palásiu,+ no sira mós kaer Jeorão nia oan-mane sira no ninia feen sira. Sira husik deʼit Jeoacaz,*+ ninia oan-mane ikun. 18 Depois neʼe, Jeová halo Jeorão hetan moras ida iha ninia tee-oan neʼebé labele kura.+ 19 Liutiha tinan rua, Jeorão nia tee-oan sai tanba ninia moras, no nia mate ho terus tanba ninia moras neʼe. No ninia povu sira la sunu lakan ahi boot atu hatudu respeitu ba nia hanesan sira halo ba ninia beiʼala sira.+ 20 Jeorão tinan 32 bainhira nia sai liurai, no nia ukun ba tinan ualu iha Jeruzalein. Bainhira nia mate, la iha ema ida mak hanoin nia. Entaun sira hakoi nia iha David nia Sidade,+ maibé la hakoi iha fatin neʼebé liurai sira hakoi bá.+

22 Tuirmai ema neʼebé hela iha Jeruzalein foti Acazias, Jeorão nia oan-mane ikun, nuʼudar liurai hodi troka nia, tanba grupu naʼok-teen neʼebé mai hamutuk ho ema Arábia sira oho hotu ona Jeorão nia oan-mane boot sira iha rai-Judá.+ Ho ida-neʼe, Jeorão nia oan-mane Acazias komesa ukun nuʼudar liurai ba rai-Judá.+ 2 Acazias tinan 22 bainhira nia sai liurai, no nia ukun iha Jeruzalein ba tinan ida. Ninia inan naran Atalia.+ Atalia mak Onri nia bei-oan.*+

3 Acazias mós laʼo tuir Acab nia umakain nia dalan sira,+ tanba ninia inan rasik mak sai nuʼudar ninia konsellu-naʼin neʼebé book nia atu halo hahalok aat. 4 Nia kontinua halo buat neʼebé aat tuir Jeová nia haree hanesan Acab nia umakain, tanba sira mak sai ninia konsellu-naʼin bainhira ninia aman mate ona, no neʼe lori nia ba mate. 5 Acazias halo tuir sira-nia konsellu no nia bá ho Jeorão, Liurai Acab husi Izraél nia oan-mane, hodi halo funu iha Ramot-Gilead+ hasoru Liurai Hazael+ husi Síria, maibé iha neʼebá, hanadór sira hakanek Jeorão. 6 Entaun Jeorão fila fali ba Jezreel+ atu bele sai diʼak fali husi ninia kanek neʼebé nia hetan husi tropa Síria iha Ramá bainhira nia halo funu hasoru Liurai Hazael husi Síria.+

Jeorão+ nia oan-mane Acazias,* liurai Judá, tun ba Jezreel atu vizita Acab nia oan-mane Jeorão,+ tanba Jeorão hetan kanek.*+ 7 Maibé Maromak uza oportunidade neʼebé Acazias mai hasoru Jeorão atu halakon Acazias. Bainhira nia mai, nia sai hamutuk ho Jeorão hodi bá hasoru Ninsi nia bei-oan* Jeú,+ neʼebé Jeová hili* ona atu halakon Acab nia umakain.+ 8 Bainhira Jeú komesa oho ema husi Acab nia umakain,+ nia mós oho ulun-naʼin sira husi Judá no Acazias nia sobriñu* sira neʼebé halo serbisu ba Acazias. 9 Tuirmai nia buka Acazias. Sira kaer Acazias iha fatin neʼebé nia subar iha Samaria, no sira lori nia ba Jeú. Depois neʼe, sira oho Acazias no hakoi nia,+ tanba sira dehan: “Nia mak Jeosafát nia bei-oan. Uluk Jeosafát adora* Jeová ho ninia laran tomak.”+ Ho ida-neʼe, la iha tan ema ida iha Acazias nia umakain neʼebé iha kbiit atu ukun nuʼudar liurai.

10 Bainhira Acazias nia inan Atalia+ haree katak ninia oan-mane mate ona, nia hamriik no buka atu oho liurai nia jerasaun hotu husi Judá nia umakain.+ 11 Maibé liurai nia oan-feto Jeosabeat foti Acazias nia oan-mane Jeoas+ husi liurai nia oan-mane sira-nia leet neʼebé Atalia atu oho. Jeosabeat subar Jeoas ho feto neʼebé tau matan ba Jeoas iha kuartu ida. Liurai Jeorão+ nia oan-feto Jeosabeat konsege subar Jeoas husi Atalia, tan neʼe Atalia la oho nia.+ Jeosabeat mak amlulik Jeoada nia feen+ no Acazias nia feton. 12 Jeoas hela ho sira ba tinan neen, sira subar nia iha Maromak loos nia uma, bainhira Atalia ukun hela rai neʼe.

23 Iha tinan hitu, Jeoada hatudu aten-brani no halo akordu* ho xefe sira ba tropa naʼin-100,+ no xefe sira mak tuirmai neʼe: Jeroam nia oan-mane Azarias, Jeoanan nia oan-mane Ismael, Obed nia oan-mane Azarias, Adaias nia oan-mane Maseias, no Zikri nia oan-mane Elisafat. 2 Tuirmai sira laʼo haleʼu rai-Judá tomak no halibur ema Levi sira+ husi Judá nia sidade sira hotu, no mós halibur ulun-naʼin ba Izraél nia umakain sira. Bainhira sira mai toʼo Jeruzalein, 3 kongregasaun tomak halo aliansa ida+ ho liurai iha Maromak loos nia uma, depois neʼe, Jeoada dehan ba sira:

“Liurai nia oan-mane sei ukun, hanesan Jeová promete ona kona-ba David nia oan-mane sira.+ 4 Imi tenke halo buat tuirmai neʼe: Imi tenke fahe amlulik no ema Levi sira neʼebé halaʼo knaar+ iha loron Sábadu ba grupu tolu, grupu ida hein odamatan,+ 5 grupu ida seluk hein liurai nia palásiu,+ no grupu seluk tan hein Portaun Fundasaun, no povu hotu hamriik iha pátiu* sira iha Jeová nia uma.+ 6 Keta husik ema ida tama ba Jeová nia uma, só deʼit amlulik no ema Levi sira neʼebé halo serbisu mak bele tama+ tanba sira mak grupu neʼebé santu, no povu hotu sei kumpre sira-nia obrigasaun ba Jeová. 7 Imi ema Levi sira tenke haleʼu liurai iha ninia sorin-sorin. Imi ida-idak tenke kaer imi-nia armas. Ema seluk neʼebé tama ba uma neʼe tenke mate. Imi tenke hamutuk nafatin ho liurai iha fatin hotu neʼebé nia bá.”*

8 Ema Levi no ema Judá hotu halo tuir amlulik Jeoada nia liafuan. Tan neʼe, sira ida-idak lori ninia ema sira neʼebé halaʼo knaar iha loron Sábadu, hamutuk ho ema sira neʼebé la halaʼo knaar iha loron Sábadu,+ tanba amlulik Jeoada la fó lisensa ba grupu sira-neʼe+ atu husik sira-nia serbisu. 9 Tuirmai amlulik Jeoada foti Liurai David nia diman, eskudu kiʼik* no eskudu kabuar sira+ neʼebé iha Maromak loos nia uma+ no fó ba xefe sira.*+ 10 Jeoada haruka ema hotu hamriik iha uma neʼe nia sorin loos toʼo sorin karuk, besik altár no besik uma neʼe. Sira hamriik haleʼu liurai no kaer hela sira-nia armas. 11 Tuirmai sira lori liurai nia oan-mane+ sai mai no tau koroa no surat-tahan lulun neʼebé iha Maromak nia Ukun-Fuan*+ iha ninia ulun hodi foti nia nuʼudar liurai, no Jeoada ho ninia oan-mane sira fui mina* ba ninia ulun. Depois neʼe, sira dehan: “Viva liurai!”+

12 Bainhira Atalia rona lian barullu tanba povu halai hodi fó hahiʼi ba liurai, nia mai kedas atu hasoru povu sira iha Jeová nia uma.+ 13 Atalia haree liurai hamriik daudaun besik uma neʼe nia riin iha fatin atu tama ba uma neʼe. Ulun-naʼin sira+ no ema neʼebé huu trombeta hamriik hamutuk ho liurai, no povu hotu iha rai neʼe haksolok+ no huu trombeta, no kantadór sira neʼebé toka instrumentu mak dirije ema* atu fó hahiʼi. Ho ida-neʼe, Atalia lees ninia roupa no hakilar dehan: “Traidór! Traidór!” 14 Maibé amlulik Jeoada haruka xefe sira ba tropa naʼin-100, neʼebé simu knaar atu dirije tropa, hodi dehan: “Lori sai tiha feto neʼe husi imi-nia leet, no se ema ruma laʼo tuir nia, oho ema neʼe ho surik!” Tanba amlulik dehan ona: “Keta oho feto neʼe iha Jeová nia uma.” 15 Entaun sira kaer Atalia, no bainhira sira toʼo iha fatin atu tama ba portaun neʼebé hanaran Portaun Kuda iha liurai nia palásiu, sira oho kedas nia iha neʼebá.

16 Tuirmai Jeoada halo aliansa entre nia ho povu hotu no ho liurai, katak sira sei kontinua sai Jeová nia povu.+ 17 Depois neʼe, povu hotu bá Baal nia templu no harahun templu neʼe.+ Sira baku rahun Baal nia altár sira no ninia estátua sira,+ no sira oho Matão, amlulik Baal nian,+ iha altár sira-nia oin. 18 Tuirmai Jeoada fó knaar ba amlulik no ema Levi sira atu tau matan ba Jeová nia uma. Uluk David haketak sira tuir grupu atu serbí iha Jeová nia uma hodi sunu sakrifísiu ba Jeová+ tuir Moisés nia Ukun-Fuan,+ sira serbí ho haksolok no kanta knananuk, hodi tuir David nia matadalan. 19 Jeoada mós haruka guarda sira atu hein portaun+ iha Jeová nia uma, atu nuneʼe ema hotu neʼebé la moos labele tama. 20 Tuirmai Jeoada lori xefe ba tropa naʼin-100,+ ema-boot sira, povu nia ukun-naʼin sira no povu hotu iha rai neʼe, hodi laʼo tuir liurai husi Jeová nia uma. Depois neʼe, sira laʼo liu portaun leten nian hodi tama iha liurai nia palásiu no haruka liurai tuur iha kadunan+ atu ukun.+ 21 No povu hotu iha rai neʼe haksolok no sidade tomak hakmatek, tanba sira oho ona Atalia ho surik.

24 Jeoas tinan hitu bainhira nia sai liurai,+ no nia ukun iha Jeruzalein durante tinan 40. Ninia inan naran Zibia husi Beer-Seba.+ 2 Jeoas kontinua halo buat neʼebé loos tuir Jeová nia haree durante amlulik Jeoada nia moris tomak.+ 3 Jeoada fó feto naʼin-rua nuʼudar feen ba nia, no nia iha oan-mane no oan-feto sira.

4 Ikusmai Jeoas hakarak tebes atu hadiʼa Jeová nia uma.+ 5 Tan neʼe, nia halibur amlulik no ema Levi sira, no dehan ba sira: “Imi tenke laʼo ba Judá nia sidade sira no halibur osan husi ema Izraél hotu atu hadiʼa imi-nia Maromak nia uma+ tinan-tinan. Imi tenke halo neʼe lalais.” Maibé ema Levi la halo lalais.+ 6 Entaun, liurai bolu amlulik boot Jeoada no dehan ba nia:+ “Tanbasá mak Ita-Boot la haruka ema Levi atu husu impostu sagradu husi ema Judá no Jeruzalein hodi tuir Jeová nia atan Moisés nia mandamentu?+ Impostu neʼe mak impostu sagradu husi kongregasaun Izraél ba tenda neʼebé iha Arka Aliansa nian.*+ 7 Tanba uluk Atalia+ nia oan-mane sira tama ba Maromak loos nia uma,+ no sira uza sasán santu hotu iha Jeová nia uma hodi adora Baal. Atalia mak feto neʼebé halo hahalok aat tebes.” 8 Tuirmai sira halo kaixote ida+ hodi tuir liurai nia mandamentu no tau kaixote neʼe iha liʼur besik portaun iha Jeová nia uma.+ 9 Depois neʼe, ema fó avizu iha Judá no Jeruzalein tomak atu selu impostu sagradu ba Jeová+ hodi tuir mandamentu neʼebé Maromak loos nia atan Moisés fó sai ona ba ema Izraél iha rai-fuik. 10 Ulun-naʼin hotu no povu hotu haksolok,+ no sira kontinua lori kontribuisaun hodi hatama iha kaixote laran toʼo nakonu.*

11 Bainhira ema Levi haree katak osan barak ona iha kaixote laran, sira lori neʼe ba liurai. Tuirmai liurai nia sekretáriu no ulun-naʼin neʼebé ajuda amlulik boot mai no hasai osan husi kaixote neʼe,+ depois neʼe, sira tau fali kaixote neʼe iha ninia fatin. Sira halo nuneʼe loron ba loron, no sira halibur osan barak tebes. 12 Depois neʼe, liurai no Jeoada entrega osan sira-neʼe ba ema neʼebé tau matan ba serbisu iha Jeová nia uma, no sira selu badaen neʼebé fera fatuk no badaen seluk atu hadiʼa Jeová nia uma,+ no mós selu badaen-besi no badaen-riti atu hadiʼa Jeová nia uma. 13 Ho ida-neʼe, ema neʼebé tau matan ba serbisu haruka ema komesa serbisu, no serbisu neʼe kontinua laʼo bá oin tanba sira tau matan. Sira hadiʼa Maromak loos nia uma hodi sai fali hanesan uluk no hametin tan uma neʼe. 14 Bainhira sira hadiʼa hotu ona uma neʼe, sira lori osan restu ba liurai no Jeoada, no sira uza osan neʼe atu halo sasán sira ba Jeová nia uma, sasán neʼebé uza ba serbisu iha templu no hasaʼe sakrifísiu, no sira mós uza osan neʼe atu halo kopu sira, no sasán sira husi osan-mean no osan-mutin.+ Sira hasaʼe beibeik sakrifísiu+ iha Jeová nia uma durante Jeoada nia moris tomak.

15 Jeoada moris naruk no kontente ho ninia moris. Ikusmai nia mate ho tinan 130. 16 Entaun sira hakoi nia iha David nia Sidade hamutuk ho liurai sira,+ tanba buat diʼak hotu neʼebé nia halo ona ba povu Izraél,+ ba Maromak neʼebé loos no ba Ninia uma.

17 Depois Jeoada mate ona, ulun-naʼin sira husi Judá mai no hakruʼuk ba liurai hodi koʼalia ho liurai, no liurai rona ba sira. 18 Sira husik Jeová, sira-nia beiʼala nia Maromak nia uma, no komesa serbí fali ai-riin lulik* no estátua sira, entaun Maromak sai hirus hasoru ema Judá no Jeruzalein tanba sira-nia sala. 19 Jeová kontinua haruka profeta sira atu ajuda sira fila fali ba nia, no profeta sira kontinua fó avizu,* maibé sira lakohi rona.+

20 Maromak haraik ninia espíritu ba amlulik Jeoada+ nia oan-mane Zacarias, no nia hamriik iha povu nia oin no hatete ba sira: “Maromak loos dehan nuneʼe: ‘Tanbasá mak imi kontra Jeová nia mandamentu? Imi sei la hetan susesu! Imi husik ona Jeová, tan neʼe nia mós sei husik imi.’”+ 21 Maibé sira halo planu aat ba nia+ no liurai haruka sira tuda mate nia iha pátiu* laran iha Jeová nia uma.+ 22 Entaun, Liurai Jeoas la hanoin-hetan domin ho laran-metin neʼebé Zacarias nia aman Jeoada hatudu ona ba nia. Jeoas oho Jeoada nia oan-mane neʼe. Bainhira Zacarias atu mate, nia dehan: “Haʼu hein katak Jeová sei haree ida-neʼe no fó kastigu ba Ita-Boot.”+

23 Bainhira tinan foin komesa, tropa Síria mai kontra Jeoas, no sira ataka Judá no Jeruzalein.+ Tuirmai sira oho povu nia ulun-naʼin hotu,+ no sira haruka sasán hotu neʼebé sira hadau ba liurai Damasku. 24 Maski tropa Síria neʼebé mai atu ataka mak uitoan deʼit, maibé Jeová entrega tropa Judá neʼebé barak tebes ba sira,+ tanba ema Judá husik ona Jeová, sira-nia beiʼala nia Maromak. Ho ida-neʼe, tropa Síria lori Maromak nia kastigu ba Jeoas. 25 Bainhira tropa Síria halo tiha Jeoas hetan kanek todan,* sira sai husi rai neʼe. Tuirmai Jeoas nia atan sira rasik halo planu aat ba nia tanba nia oho ona amlulik Jeoada+ nia oan-mane sira.* Sira oho Jeoas iha ninia kama leten.+ Ho ida-neʼe, nia mate no sira hakoi nia iha David nia Sidade,+ maibé sira la hakoi nia iha fatin neʼebé liurai sira hakoi bá.+

26 Tuirmai neʼe mak ema sira neʼebé halo planu aat+ ba Jeoas: feto Ammon naran Simeat nia oan-mane Zabad, no feto Moab naran Simrit nia oan-mane Jeozabad. 27 Kona-ba Jeoas nia oan-mane sira, no kona-ba avizu barak neʼebé fó sai ona ba nia,+ no kona-ba hadiʼa* Maromak loos nia uma,+ buat hotu neʼe hakerek ona iha Livru Istória kona-ba Liurai sira. No ninia oan-mane Amazias mak sai liurai hodi troka nia.

25 Amazias tinan 25 bainhira nia sai liurai, no nia ukun iha Jeruzalein durante tinan 29. Ninia inan naran Jeoadan husi Jeruzalein.+ 2 Nia kontinua halo buat neʼebé loos tuir Jeová nia haree, maibé la halo ho laran tomak. 3 Bainhira ninia pozisaun nuʼudar liurai metin ona, nia oho kedas atan sira neʼebé uluk oho ninia aman Liurai Jeoas.+ 4 Maibé nia la halakon sira-nia oan-mane sira, tanba nia halo tuir Jeová nia Ukun-Fuan neʼebé hakerek ona iha Moisés nia livru, neʼebé dehan: “Aman labele mate tanba sala neʼebé ninia oan halo, no oan labele mate tanba sala neʼebé ninia aman halo. Ema ida-idak tenke mate tanba ninia sala rasik.”+

5 Amazias halibur ema Judá hamutuk no haruka sira hamriik tuir sira-nia umakain, sira hamriik ho xefe sira ba tropa naʼin-1.000 no xefe sira ba tropa naʼin-100 husi suku Judá no Benjamim tomak.+ Nia rejistu sira neʼebé tinan 20 ba leten+ no iha funu-naʼin neʼebé hetan ona treinu* hamutuk naʼin-300.000 hodi sai nuʼudar tropa no bele kaer diman no eskudu boot. 6 Nia mós selu funu-naʼin neʼebé kbiit boot naʼin-100.000 husi Izraél ho osan-mutin kilograma 3.420.* 7 Maibé Maromak loos nia atan ida mai hasoru nia no dehan: “Oh liurai, keta husik tropa Izraél bá ho Ita, tanba Jeová la hamutuk tan ho ema Izraél+ ka ema Efraim. 8 Maibé Ita-Boot tenke bá mesak, bá halo funu ho aten-brani. Se lae, Maromak neʼebé loos sei halo Ita sidi iha Ita-nia inimigu nia oin, tanba Maromak iha kbiit atu ajuda Ita+ no atu halo Ita sidi.” 9 Ho ida-neʼe, Amazias hatete ba Maromak loos nia atan: “Maibé oinsá ho osan-mutin kilograma 3.420 neʼebé haʼu fó ona ba tropa Izraél?” Maromak loos nia atan hatán: “Jeová iha kbiit atu fó fali ba Ita barak liu fali ida-neʼe.”+ 10 Entaun Amazias haruka tropa sira neʼebé mai husi Efraim atu fila fali ba sira-nia uma. Maibé sira sai hirus tebes ba ema Judá, nuneʼe sira fila fali ba sira-nia uma ho hirus makaʼas.

11 Tuirmai Amazias hatudu aten-brani no dirije ninia tropa rasik hodi bá Foho-Leet Masin,+ no nia oho ema Seir naʼin-10.000.+ 12 Tropa Judá mós kaer moris ema naʼin-10.000. Ho ida-neʼe, sira lori ema sira-neʼe ba fatuk boot leten no soe tun sira hotu no sira-nia isin nakfera ba pedasuk. 13 Maibé tropa sira neʼebé Amazias haruka fila hodi la tuir nia bá funu,+ tropa sira-neʼe ataka Judá nia sidade sira, husi Samaria+ toʼo Bet-Horom.+ Sira oho ema naʼin-3.000 no foti sasán barak.

14 Maibé bainhira Amazias fila fali husi funu hasoru ema Edom, nia mós lori ema Seir nia maromak sira no halo sira nuʼudar ninia maromak rasik,+ no nia komesa hakruʼuk iha sira-nia oin no hasaʼe sakrifísiu* ba sira. 15 Tan neʼe, Jeová sai hirus tebes ba Amazias, no nia haruka ninia profeta hodi dehan ba Amazias: “Tanbasá mak ó adora fali ema sira-neʼe nia maromak sira neʼebé labele salva ninia povu husi ó-nia liman?”+ 16 Bainhira profeta neʼe koʼalia hela, liurai dehan: “Ami seidauk hili ó nuʼudar liurai nia konsellu-naʼin, loos ka lae?+ Nonook tiha!+ Se lae, sira sei oho ó.” Profeta neʼe dehan: “Haʼu hatene katak Maromak deside ona atu halakon Ita-Boot, tanba Ita halo ona ida-neʼe, no Ita la rona ba haʼu-nia konsellu.”+ Tuirmai profeta neʼe nonook.

17 Depois Liurai Amazias husi Judá koʼalia tiha ho ninia konsellu-naʼin sira, nia haruka lia-menon ba Jeoacaz nia oan-mane Jeoas, Jeú nia bei-oan, neʼebé mak liurai Izraél, hodi dehan: “Mai toʼok, mai ita halo funu.”*+ 18 Liurai Jeoas husi Izraél haruka lia-menon tuirmai neʼe ba Liurai Amazias husi Judá: “Ai-tarak iha Líbanu haruka lia-menon ba ai-sedru iha Líbanu, hodi dehan: ‘Entrega ó-nia oan-feto mai atu sai haʼu-nia oan-mane nia feen.’ Maibé animál fuik iha Líbanu laʼo liu no sama tun tiha ai-tarak neʼe. 19 Ó hatete: ‘Haʼu* oho ona ema Edom.’+ Tan neʼe ó sai foti an, no hakarak simu glória. Maibé agora tuur hakmatek deʼit iha ó-nia palásiu. Tanbasá mak ó buka susar no mate, no halakon nasaun Judá hamutuk ho ó?”

20 Maibé Amazias lakohi rona.+ Situasaun neʼe mosu tanba Maromak loos mak hakarak entrega sira ba inimigu nia liman,+ tanba sira adora ema Edom nia maromak sira.+ 21 Tan neʼe, Liurai Jeoas husi Izraél bá halo funu hasoru Liurai Amazias husi Judá iha Bet-Semes,+ neʼebé iha rai-Judá. 22 Tropa Judá lakon funu hasoru tropa Izraél, tan neʼe sira ida-idak halai fila ba sira-nia uma.* 23 Liurai Jeoas husi Izraél kaer tiha Liurai Amazias, Jeoas nia oan-mane, Jeoacaz* nia bei-oan, iha Bet-Semes. Tuirmai Liurai Jeoas mai ho Liurai Amazias husi Judá hodi toʼo iha Jeruzalein, no Jeoas halo rahun moru Jeruzalein husi Portaun Efraim+ toʼo Portaun Sikun,+ neʼe naruk maizumenus metru 180.* 24 Nia foti osan-mean, osan-mutin no sasán hotu iha Maromak loos nia uma neʼebé Obed-Edom tau matan no iha osan-fatin iha liurai nia palásiu,+ no lori mós dadur sira. Tuirmai nia fila fali ba Samaria.

25 Depois Jeoacaz+ nia oan-mane Liurai Jeoas+ husi Izraél mate tiha, Jeoas nia oan-mane Amazias,+ liurai Judá, moris tan tinan 15. 26 Kona-ba Amazias nia istória sira seluk, husi primeiru toʼo ikus, neʼe hakerek ona iha Livru Istória kona-ba Judá no Izraél nia Liurai sira. 27 Husi tempu neʼebé Amazias fila kotuk ba Jeová, sira halo planu aat+ ba nia iha Jeruzalein, tan neʼe nia halai ba Lakis, maibé sira haruka ema bá tuir nia toʼo Lakis no oho nia iha neʼebá. 28 Sira tula fila ninia mate-isin iha kuda sira-nia leten, no sira hakoi nia hamutuk ho ninia beiʼala sira iha sidade ida iha Judá.

26 Tuirmai povu Judá hotu hili Uzias+ neʼebé tinan 16, no foti nia sai liurai hodi troka ninia aman Amazias.+ 2 Uzias manán fali Elot+ no harii fali sidade neʼe hodi sai Judá nian bainhira Liurai Amazias mate ona.*+ 3 Uzias+ tinan 16 bainhira nia sai liurai, no nia ukun iha Jeruzalein durante tinan 52. Ninia inan naran Jecolia husi Jeruzalein.+ 4 Nia kontinua halo buat neʼebé loos tuir Jeová nia haree, hanesan ninia aman Amazias halo ona.+ 5 Nia kontinua buka Maromak durante Zacarias nia moris. Zacarias mak hanorin nia atu hamtaʼuk Maromak loos. Durante tempu neʼebé nia buka Maromak loos Jeová, Maromak fó bensaun ba nia.+

6 Uzias halo funu hasoru ema Filístia+ no harahun Gat+ nia moru, Jabne+ nia moru no Asdod+ nia moru. Tuirmai nia harii sidade sira iha área Asdod no iha ema Filístia nia área sira seluk. 7 Maromak loos kontinua ajuda nia atu funu hasoru ema Filístia, ema Arábia+ neʼebé hela iha Gurbaal, no ema Meunim. 8 Ema Ammon+ komesa selu impostu* ba Uzias. Ikusmai ninia naran-boot habelar toʼo rai-Ejitu, tanba nia sai forte tebes. 9 Liután neʼe, Uzias harii uma aas* sira+ iha Jeruzalein besik portaun sira neʼebé hanaran Portaun Sikun,+ Portaun Foho-Leet,+ no besik parte ida neʼebé hanaran Riin Apoia nian, no nia hametin uma sira-neʼe. 10 Nia mós harii uma aas* sira+ iha rai-fuik no keʼe tanke* barak, tanba nia iha animál-hakiak barak. Nia mós halo nuneʼe iha área Sefela no iha rai-tetuk. Nia iha atan sira neʼebé halo toʼos no tau matan ba toʼos-uvas iha foho sira no iha Karmel, tanba nia gosta agrikultura.

11 Liután neʼe, Uzias iha tropa neʼebé prontu atu bá funu. Sira mak tropa neʼebé baibain bá atu halo funu ho inimigu, sira fahe ba grupu-grupu. Sekretáriu Jeiel+ no ema-boot naran Maseias mak sura no rejistu tropa sira-neʼe,+ no Hananias mak sira-nia xefe. Hananias mós ulun-naʼin ida neʼebé halo serbisu ba liurai. 12 Ulun-naʼin família nian sira neʼebé tau matan ba funu-naʼin kbiit boot sira-neʼe, hamutuk naʼin-2.600. 13 Sira tau matan ba tropa neʼebé kbiit boot hamutuk naʼin-307.500 neʼebé kaer armas no prontu bá funu, sira apoia liurai hodi funu hasoru inimigu.+ 14 Uzias fó eskudu, diman,+ kapasete, roupa funu nian,+ rama no fatuk* ba tropa hotu.+ 15 Liután neʼe, iha Jeruzalein nia halo ekipamentu funu nian oioin tuir modelu neʼebé matenek-naʼin sira halo. Sira tau ekipamentu sira-neʼe iha uma aas* leten+ no iha moru sikun hotu, no sira uza ekipamentu sira-neʼe atu hana rama no atu tiru fatuk boot. Ho ida-neʼe, ninia naran-boot habelar ba fatin hotu, tanba nia simu ajuda barak no sai forte.

16 Maibé bainhira nia forte ona, nia laran sai loko an no neʼe lori susar ba nia. Nia la hatudu laran-metin ba Jeová, ninia Maromak, hodi tama ba Jeová nia templu atu sunu insensu iha altár insensu nian.+ 17 Amlulik Azarias no Jeová nia amlulik naʼin-80 neʼebé aten-brani tama tuir kedas nia. 18 Sira kontra Liurai Uzias no dehan ba nia: “Uzias, Ita-Boot la iha direitu atu sunu insensu ba Jeová!+ Amlulik sira deʼit mak bele sunu insensu, tanba sira mak Arão+ nia jerasaun neʼebé Maromak halo santu* ona. Entaun sai husi fatin sagradu neʼe, Ita la hatudu ona laran-metin no Maromak Jeová sei la hafolin Ita tanba Ita-nia hahalok neʼe.”

19 Maibé Uzias, neʼebé kaer hela insensu-fatin atu sunu, sai hirus tebes,+ no bainhira nia hirus hasoru amlulik sira, moras-lepra+ kona ninia reen-toos iha Jeová nia uma laran besik altár insensu nian. 20 Bainhira amlulik boot Azarias no amlulik sira seluk hotu fila oin ba nia, sira haree katak ninia reen-toos kona ona moras-lepra! Tan neʼe sira haruka nia sai lalais husi fatin neʼe, no nia rasik laʼo sai lalais, tanba Jeová fó ona kastigu ba nia.

21 Liurai Uzias nafatin iha moras-lepra toʼo loron neʼebé nia mate. Nia hela ketak iha uma ida nuʼudar ema moras-lepra.+ Nia labele bá tan Jeová nia uma. No ninia oan-mane Jotão mak halaʼo knaar iha palásiu hodi tesi-lia ba povu iha rai neʼe.+

22 Kona-ba Uzias nia istória sira seluk, husi primeiru toʼo ikus, neʼe hakerek ona iha profeta Isaias nia livru.+ Isaias mak Amoz nia oan-mane. 23 Ikusmai Uzias mate,* no sira hakoi nia hamutuk ho ninia beiʼala sira. Sira hakoi nia iha rai-luan liurai sira-nian tanba sira dehan: “Nia moras-lepra.” No ninia oan-mane Jotão+ mak sai liurai hodi troka nia.

27 Jotão+ tinan 25 bainhira nia sai liurai, no nia ukun iha Jeruzalein durante tinan 16. Ninia inan naran Jerusa, Zadoc nia oan-feto.+ 2 Nia kontinua halo buat neʼebé loos tuir Jeová nia haree, hanesan ninia aman Uzias halo ona.+ Maibé nia la tama ba fatin iha Jeová nia templu neʼebé bandu ba nia atu tama.+ Maski nuneʼe, povu sira sei kontinua halo hahalok aat. 3 Nia harii portaun leten nian iha Jeová nia uma,+ no nia mós hametin moru iha Ofel.+ 4 Nia mós harii sidade sira+ iha área foho nian iha Judá,+ no nia harii uma neʼebé metin+ no uma aas* sira+ iha área neʼebé iha ai-hun barak. 5 Nia halo funu hasoru ema Ammon nia liurai+ no manán sira. Ho ida-neʼe, ema Ammon fó osan-mutin kilograma 3.420,* trigu koro isin 10.000,* no sevada koro isin 10.000 ba nia iha tinan neʼe. Ema Ammon mós selu buat neʼebé hanesan iha tinan segundu no tinan terseiru.+ 6 Nuneʼe Jotão kontinua sai forte liután, tanba nia deside atu laʼo iha ninia Maromak Jeová nia dalan sira.*

7 Kona-ba Jotão nia istória sira seluk, no kona-ba buat neʼebé nia halo no funu hotu neʼebé nia halo, neʼe hakerek ona iha Livru Istória kona-ba Izraél no Judá nia Liurai sira.+ 8 Jotão tinan 25 bainhira nia sai liurai, no nia ukun iha Jeruzalein durante tinan 16.+ 9 Ikusmai Jotão mate* no sira hakoi nia iha David nia Sidade.+ No ninia oan-mane Acaz mak sai liurai hodi troka nia.+

28 Acaz+ tinan 20 bainhira nia sai liurai, no nia ukun iha Jeruzalein durante tinan 16. Nia la halo buat neʼebé loos tuir Jeová nia haree, nia la halo tuir ninia beiʼala David nia hahalok.+ 2 Nia laʼo tuir fali liurai Izraél sira-nia dalan,+ no nia mós halo estátua Baal husi besi.+ 3 Liután neʼe, nia hasaʼe sakrifísiu* iha Foho-Leet Hinom,* no nia mós sunu ninia oan-mane sira iha ahi,+ hodi tuir nasaun sira-nia hahalok neʼebé Jeová hakribi,+ katak nasaun sira neʼebé Nia hasai ona husi ema Izraél nia oin. 4 Acaz mós kontinua hasaʼe sakrifísiu no sunu sakrifísiu hodi halo suar iha fatin aas sira,+ iha foho-oan sira, no iha ai-hun buras hotu nia okos.+

5 Tan neʼe, Acaz nia Maromak Jeová entrega Acaz ba liurai Síria nia liman,+ nuneʼe tropa Síria manán nia no lori ema barak ba Damasku+ nuʼudar dadur. Maromak mós entrega Acaz ba liurai Izraél nia liman, no liurai Izraél oho ninia ema barak. 6 Iha loron ida nia laran, Remalias nia oan-mane Peca+ oho mane aten-brani naʼin-120.000 iha Judá, tanba ema Judá fila kotuk ona ba Jeová, sira-nia beiʼala nia Maromak.+ 7 No funu-naʼin ida husi Efraim naran Zikri oho liurai nia oan-mane Maseias no Azrikam, neʼebé tau matan ba liurai nia palásiu, no mós oho Elkana, neʼebé tuur iha pozisaun segundu depois liurai. 8 Liután neʼe, ema Izraél kaer feto no labarik sira hamutuk naʼin-200.000 husi Judá. Sira mós hadau sasán barak, no lori sasán sira-neʼe ba Samaria.+

9 Maibé Jeová nia profeta ida naran Oded mós iha neʼebá. Nia bá hasoru tropa Izraél neʼebé mai daudaun Samaria no dehan ba sira: “Tuir loloos, Jeová, imi-nia beiʼala nia Maromak, sai hirus hasoru ema Judá, tan neʼe mak nia entrega sira ba imi-nia liman,+ no imi oho sira ho imi-nia hirus makaʼas toʼo Maromak mós hatene. 10 Agora imi hanoin atu halo ema Judá no Jeruzalein sai imi-nia atan-mane no atan-feto.+ Maski nuneʼe, imi rasik mós halo sala hasoru Jeová, imi-nia Maromak, loos ka lae? 11 Favór ida, rona mai haʼu! Entrega fali dadur sira neʼebé imi lori husi imi-nia maun-alin sira-nia leet, tanba Jeová sai hirus makaʼas hasoru imi.”

12 Ho ida-neʼe, ema Efraim nia xefe balu, Jeoanan nia oan-mane Azarias, Mesilemot nia oan-mane Berekias, Salum nia oan-mane Jeizkias, no Hadlai nia oan-mane Amasa, kontra tropa sira neʼebé foin fila husi funu, 13 no sira hatete ba tropa sira-neʼe: “Keta lori ema dadur sira-neʼe mai iha neʼe, tanba neʼe sei halo ita hetan sala iha Jeová nia oin. Buat neʼebé imi hanoin atu halo neʼe sei aumenta tan ita-nia sala sira, tanba ita halo ona sala barak no Maromak hirus daudaun ema Izraél.” 14 Entaun tropa sira neʼebé kaer armas entrega ema dadur sira-neʼe no entrega sasán sira+ ba ulun-naʼin no kongregasaun tomak. 15 Tuirmai mane sira neʼebé simu ona knaar, hamriik no lori ema dadur sira-neʼe, no foti roupa balu husi buat neʼebé sira hadau husi funu no fó ba ema dadur sira neʼebé isin-tanan atu sira bele hatais. Sira mós fó sandálias, ai-han no hemu, no fó mina ba ema dadur sira atu kose ba sira-nia isin. Liután neʼe, sira tula ema neʼebé fraku iha kuda-burru leten no lori sira fila ba sira-nia maun-alin sira iha sidade Jerikó, sidade ai-palmeira nian. Depois neʼe, sira fila fali ba Samaria.

16 Iha tempu neʼebá Liurai Acaz husu liurai sira husi Asíria atu ajuda nia.+ 17 Dala ida tan ema Edom ataka Judá no lori ema nuʼudar dadur. 18 Ema Filístia+ mós ataka sidade sira iha área Sefela+ no área Negeb neʼebé iha rai-Judá no sira manán Bet-Semes,+ Aijalon,+ Gederot, Soko ho ninia sidade kiʼik sira,* Timna+ ho ninia sidade kiʼik sira, no Ginzo ho ninia sidade kiʼik sira, no ema Filístia hela fali iha sidade sira-neʼe. 19 Jeová fó susar ba ema Judá tanba Liurai Acaz husi Izraél halo ema Judá kontra Maromak nia ukun-fuan, no rezultadu mak ema Judá la hatudu laran-metin ba Jeová.

20 Ikusmai Liurai Tilgat-Pilneser*+ husi Asíria mai ataka Acaz no halo nia neon-susar tebes+ no la ajuda nia. 21 Uluk Acaz foti sasán hotu husi Jeová nia uma, husi liurai nia palásiu+ no husi ulun-naʼin sira-nia uma hodi fó nuʼudar prezente ba liurai Asíria, maibé sasán sira-neʼe la salva nia. 22 Durante Liurai Acaz nia tempu susar, nia halo hahalok neʼebé aat liután ba Jeová. 23 Nia komesa hasaʼe sakrifísiu ba maromak sira husi ema Damasku+ neʼebé manán ona nia,+ no nia dehan: “Liurai Síria sira-nia maromak ajuda ona sira, entaun haʼu mós sei hasaʼe sakrifísiu ba maromak sira-neʼe atu sira bele ajuda haʼu.”+ Maibé maromak sira-neʼe halo nia no ema Izraél tomak sidi. 24 No Acaz mós halibur sasán sira iha Maromak loos nia uma.+ Tuirmai nia baku rahun sasán sira-neʼe, nia taka odamatan sira iha Jeová nia uma,+ no halo altár sira ba ninia an rasik iha sidade Jeruzalein nia dalan sikun hotu. 25 Nia harii fatin aas sira iha Judá nia sidade sira hotu atu hasaʼe sakrifísiu* ba maromak sira seluk,+ no nia hakanek Jeová, ninia beiʼala nia Maromak, nia laran.

26 Kona-ba Acaz nia istória sira seluk, no kona-ba buat hotu neʼebé nia halo, husi primeiru toʼo ikus, neʼe hakerek ona iha Livru Istória kona-ba Judá no Izraél nia Liurai sira.+ 27 Ikusmai Acaz mate,* no sira hakoi nia iha sidade Jeruzalein, tanba sira la lori nia atu hakoi iha fatin neʼebé liurai Izraél sira hakoi bá.+ No ninia oan-mane Ezequias mak sai liurai hodi troka nia.

29 Ezequias+ tinan 25 bainhira nia sai liurai, no nia ukun iha Jeruzalein durante tinan 29. Ninia inan naran Abias, Zacarias nia oan-feto.+ 2 Nia kontinua halo buat neʼebé loos tuir Jeová nia haree,+ hanesan ninia beiʼala David.+ 3 Iha fulan-primeiru tinan primeiru husi ninia ukun, nia loke odamatan sira iha Jeová nia uma no hadiʼa odamatan sira-neʼe.+ 4 Tuirmai nia halibur amlulik no ema Levi sira iha fatin públiku iha parte leste. 5 Nia hatete ba sira: “Imi ema Levi sira, rona mai haʼu. Agora imi tenke halo santu* imi-nia an+ no halo santu Jeová, imi-nia beiʼala nia Maromak nia uma no hasai tiha buat neʼebé la moos husi fatin santu neʼe.+ 6 Tanba ita-nia aman sira la hatudu laran-metin no halo hahalok neʼebé aat tuir Jeová, ita-nia Maromak, nia haree.+ Sira husik tiha Jeová no fila kotuk ba ninia hela-fatin, no mós fila kotuk ba nia.+ 7 Sira mós taka odamatan iha uma neʼe nia varanda+ no hamate ahi-oan sira.+ Sira para hodi sunu insensu+ no la hasaʼe tan sakrifísiu sunu nian+ ba Izraél nia Maromak iha ninia fatin santu. 8 Tan neʼe, Jeová sai hirus hasoru ema Judá no Jeruzalein,+ no nia halo sira sai buat neʼebé halo ema taʼuk no hakfodak, no mós halo ema goza* sira, hanesan imi bele haree ho imi-nia matan rasik.+ 9 Tan neʼe mak ita-nia beiʼala sira mate ho surik,+ no ema lori ona ita-nia oan-mane, oan-feto no ita-nia feen sira nuʼudar dadur.+ 10 Agora haʼu hakarak tebes atu halo aliansa ida ho Jeová, Izraél nia Maromak,+ hodi nuneʼe nia bele hatún ninia hirus neʼebé lakan makaʼas hasoru ita. 11 Haʼu-nia oan-mane sira, agora laʼós tempu atu sai baruk,* tanba Jeová hili ona imi atu hamriik iha ninia oin, atu serbí nia nuʼudar ninia atan,+ no atu hasaʼe sakrifísiu* ba nia.”+

12 Ho ida-neʼe, ema Levi sira tuirmai neʼe hamriik: Husi família Kohat+ mak Amasai nia oan-mane Mahat, no Azarias nia oan-mane Joel; no husi família Merari+ mak Abdi nia oan-mane Kis, no Jealelel nia oan-mane Azarias; husi família Gerson+ mak Zima nia oan-mane Joá, no Joá nia oan-mane Eden; 13 husi família Elizafan mak Sinri no Jeuel; husi família Asaf+ mak Zacarias no Matanias; 14 husi família Heman+ mak Jeiel no Simei; husi família Jedutum+ mak Semaias no Uziel. 15 Tuirmai sira halibur sira-nia maun-alin sira hamutuk no halo sira-nia an santu, no sira mai atu hamoos Jeová nia uma hodi halo tuir liurai nia mandamentu neʼebé tuir Jeová nia liafuan.+ 16 Amlulik sira tama ba Jeová nia uma atu hamoos. Sira lori sai buat foʼer hotu neʼebé sira hetan iha Jeová nia uma laran no lori ba pátiu*+ iha Jeová nia uma. Tuirmai ema Levi sira foti buat sira-neʼe no lori ba soe iha Foho-Leet Sedron.+ 17 Entaun, sira komesa halo santu uma neʼe iha loron primeiru fulan-primeiru, no iha loron ualu fulan-primeiru, sira hamoos toʼo iha varanda iha Jeová nia uma.+ Sira halo santu Jeová nia uma ba loron ualu, no remata iha loron 16 fulan-primeiru.

18 Depois neʼe, sira bá hasoru Liurai Ezequias no dehan: “Ami hamoos hotu ona Jeová nia uma tomak, no mós altár atu sunu sakrifísiu+ no ninia sasán sira hotu,+ no ami hamoos ona meza neʼebé uza atu tau paun santu+ no ninia sasán sira hotu. 19 Ami halo prontu ona no hamoos ona sasán hotu+ neʼebé Liurai Acaz hasai tiha durante ninia ukun bainhira nia la hatudu laran-metin ba Maromak,+ no ami tau ona sasán sira-neʼe iha Jeová nia altár oin.”

20 Liurai Ezequias hadeer sedu no halibur sidade nia ulun-naʼin sira, no sira saʼe ba Jeová nia uma. 21 Sira lori karau-aman hitu, bibi-malae aman hitu, bibi-malae oan* hitu, no bibi-timur aman hitu nuʼudar sakrifísiu sala nian ba liurai nia umakain, ba fatin sagradu, no ba povu Judá.+ Nuneʼe liurai haruka amlulik sira husi Arão nia jerasaun atu hasaʼe animál sira-neʼe nuʼudar sakrifísiu iha Jeová nia altár leten. 22 Tuirmai sira oho karau-aman,+ no amlulik foti karau neʼe nia raan no hisik iha altár leten.+ Depois neʼe, sira oho bibi-malae aman no hisik ninia raan iha altár leten, no sira oho bibi-malae oan no hisik ninia raan iha altár leten. 23 Tuirmai sira lori bibi-timur aman sira neʼebé atu hasaʼe nuʼudar sakrifísiu sala nian ba liurai nia oin no kongregasaun nia oin no sira tau liman ba bibi sira-neʼe. 24 Amlulik oho bibi sira-neʼe no hasaʼe nuʼudar sakrifísiu sala nian. Sira tau bibi sira-neʼe nia raan iha altár leten atu hamoos ema Izraél hotu nia sala, tanba liurai hatete katak sira tenke hasaʼe sakrifísiu sunu nian no sakrifísiu sala nian ba povu Izraél tomak.

25 Iha tempu neʼe, liurai haruka ema Levi sira hamriik iha Jeová nia uma hodi kaer simbala, instrumentu neʼebé iha talin no arpa,+ hodi tuir mandamentu husi David+ no husi Gad+ neʼebé fó sai vizaun ba liurai no husi profeta Natan,+ tanba Jeová mak fó sai mandamentu neʼe liuhusi ninia profeta sira. 26 Ho ida-neʼe, ema Levi sira hamriik hodi kaer David nia instrumentu múzika nian, no amlulik sira kaer trombeta.+

27 Tuirmai Ezequias haruka sira atu hasaʼe sakrifísiu sunu nian iha altár leten.+ Bainhira sira komesa hasaʼe sakrifísiu sunu nian, ema Levi mós komesa kanta knananuk ba Jeová no mós huu trombeta, hodi tuir instrumentu husi Liurai David husi Izraél. 28 No kongregasaun tomak hakruʼuk nuʼudar sira kanta knananuk no huu trombeta. Sira kontinua halo nuneʼe toʼo hasaʼe hotu ona sakrifísiu sunu nian. 29 Bainhira sira hasaʼe hotu ona sakrifísiu, liurai no ema hotu neʼebé hamutuk ho nia hakneʼak no hakruʼuk kedas ho oin ba rai. 30 Liurai Ezequias no ulun-naʼin sira hatete ba ema Levi sira atu fó hahiʼi ba Jeová ho liafuan husi David+ no Asaf+ neʼebé fó sai vizaun. Nuneʼe sira fó hahiʼi ba Maromak ho haksolok boot, no sira hakneʼak no hakruʼuk ho oin ba rai.

31 Tuirmai Ezequias hatete: “Agora imi haketak tiha ona* atu halo serbisu ba Jeová. Entaun mai iha Jeová nia uma hodi lori sakrifísiu sira no sakrifísiu agradese nian.” Nuneʼe kongregasaun komesa lori sakrifísiu sira no sakrifísiu agradese nian, no ema hotu lori sakrifísiu sunu nian ho hakarak rasik.+ 32 Animál neʼebé kongregasaun lori mai nuʼudar sakrifísiu sunu nian mak karau 70, bibi-malae aman 100, no bibi-malae oan* 200. Sira hasaʼe animál hotu neʼe nuʼudar sakrifísiu sunu nian ba Jeová.+ 33 No povu sira mós lori karau 600 no bibi-malae 3.000 nuʼudar sakrifísiu santu. 34 Maibé amlulik la toʼo atu oho no hasai animál hotu nia kulit atu bele hasaʼe nuʼudar sakrifísiu sunu nian, entaun sira-nia maun-alin ema Levi mós ajuda+ toʼo halo hotu sira-nia serbisu no toʼo amlulik sira halo santu ona sira-nia an rasik,+ tanba ema Levi badinas* liu atu halo sira-nia an santu duké amlulik sira. 35 No iha animál barak ba sakrifísiu sunu nian,+ no iha mós naʼan bokur ba sakrifísiu dame nian+ no sakrifísiu hemu nian neʼebé hasaʼe hamutuk ho sakrifísiu sunu nian.+ Ho ida-neʼe, serbisu neʼebé halaʼo iha Jeová nia uma komesa fali.* 36 Nuneʼe Ezequias no povu hotu haksolok ho buat neʼebé Maromak loos halo ona ba ninia povu,+ tanba buat sira-neʼe halo ho lalais loos.

30 Ezequias haruka lia-menon ba ema Izraél+ no Judá tomak, no nia mós hakerek karta ba ema Efraim no ema Manasés,+ atu bolu sira mai iha Jeová nia uma iha Jeruzalein atu selebra Páskua* ba Jeová, Izraél nia Maromak.+ 2 Maibé liurai, ninia ulun-naʼin sira no kongregasaun tomak iha Jeruzalein deside atu selebra Páskua iha fulan-segundu,+ 3 tanba sira labele halaʼo selebrasaun neʼe tuir tempu baibain nian,+ tanba amlulik uitoan deʼit mak halo santu* ona sira-nia an+ no povu barak mós seidauk halibur iha Jeruzalein. 4 Liurai no kongregasaun tomak konkorda ho planu neʼe. 5 Entaun sira deside atu fó sai avizu iha Izraél tomak, husi Beer-Seba toʼo Dan,+ atu povu sira tenke mai iha Jeruzalein no selebra Páskua ba Jeová, Izraél nia Maromak, tanba nuʼudar grupu boot, sira seidauk halaʼo selebrasaun neʼe tuir ukun-fuan.+

6 Tuirmai liurai haruka ninia atan* sira laʼo haleʼu rai-Izraél no rai-Judá tomak hodi lori karta husi liurai no ulun-naʼin sira, no dehan: “Oh povu Izraél, fila fali ba Jeová, Abraão nia Maromak, Isaac nia Maromak no Izraél nia Maromak, atu nuneʼe nia bele simu fali povu restu neʼebé livre ona husi liurai Asíria sira-nia liman.+ 7 Keta sai hanesan imi-nia beiʼala sira no imi-nia maun-alin sira neʼebé la hatudu laran-metin ba Jeová, sira-nia beiʼala nia Maromak, nuneʼe nia halo sira sai buat neʼebé halo ema taʼuk, hanesan imi haree agora.+ 8 Keta sai ulun-toos hanesan imi-nia beiʼala sira.+ Haraik an ba Jeová no mai iha ninia fatin sagradu+ neʼebé nia halo santu ona ba nafatin no serbí Jeová, imi-nia Maromak, atu nuneʼe nia bele hatún ninia hirus neʼebé lakan makaʼas hasoru imi.+ 9 Bainhira imi fila fali ba Jeová, inimigu neʼebé kaer ona imi-nia maun-alin no imi-nia oan-mane sira sei hatudu laran-diʼak+ no husik sira fila fali mai rai neʼe,+ tanba Jeová, imi-nia Maromak mak laran-diʼak no laran-sadiʼa,+ no se imi fila fali ba nia, nia sei la fila kotuk tan ba imi.”+

10 Entaun liurai nia atan* sira hatoʼo lia-menon neʼe husi sidade ida ba sidade seluk iha rai-Efraim no Manasés tomak,+ sira mós bá Zebulão, maibé povu iha rai sira-neʼe goza sira.+ 11 Maski nuneʼe, ema balu husi suku Aser, suku Manasés no suku Zebulão hatudu haraik an no mai iha Jeruzalein.+ 12 Maromak loos mós haraik bensaun ba ema Judá hodi halo sira iha hanoin ida deʼit* atu halo tuir liurai no ulun-naʼin sira-nia mandamentu neʼebé tuir Jeová nia liafuan.

13 Povu barak halibur hamutuk iha Jeruzalein atu selebra Festa Paun Fermentu-Laek nian+ iha fulan-segundu.+ Sira hotu mak kongregasaun neʼebé boot tebes. 14 Sira hamriik no hasai maromak falsu nia altár sira neʼebé iha Jeruzalein,+ no sira hasai altár insensu nian hotu+ no soe iha Foho-Leet Sedron. 15 Iha loron 14 fulan-segundu, sira oho animál atu hasaʼe nuʼudar sakrifísiu Páskua nian. Amlulik no ema Levi sira sente moe, entaun sira halo sira-nia an santu no lori sakrifísiu sunu nian ba Jeová nia uma. 16 Sira hamriik iha sira-nia fatin tuir Ukun-Fuan husi Maromak loos nia atan Moisés. Tuirmai amlulik sira hisik raan+ neʼebé sira simu husi ema Levi. 17 Ema barak iha kongregasaun seidauk halo sira-nia an santu, nuneʼe ema Levi sira iha knaar atu oho animál neʼebé hasaʼe nuʼudar sakrifísiu Páskua nian ba ema hotu neʼebé la moos,+ hodi halo sira santu iha Jeová nia oin. 18 Maski povu barak seidauk halo sira-nia an santu, liuliu povu sira husi suku Efraim, Manasés,+ Issacar no Zebulão, maibé sira han ai-han Páskua nian, no neʼe kontra ukun-fuan neʼebé hakerek ona. Entaun Ezequias harohan kona-ba sira, hodi dehan: “Oh Jeová, Maromak neʼebé laran-diʼak,+ favór ida fó perdua ba 19 ema hotu neʼebé deside ona atu buka Maromak loos+ Jeová, sira-nia beiʼala nia Maromak, maski ema sira-neʼe seidauk halo sira-nia an santu tuir ukun-fuan kona-ba buat santu.”+ 20 Ho ida-neʼe, Jeová rona ba Ezequias no fó perdua* ba povu sira-neʼe.

21 Entaun ema Izraél neʼebé iha Jeruzalein selebra Festa Paun Fermentu-Laek nian+ ba loron hitu ho haksolok boot,+ no ema Levi sira ho amlulik sira fó hahiʼi ba Jeová loroloron, sira toka instrumentu múzika ba Jeová ho lian makaʼas.+ 22 Liután neʼe, Ezequias koʼalia ba ema Levi hotu neʼebé serbí Jeová ho matenek no fó aten-brani ba sira.* Nuneʼe sira han ai-han festa nian durante loron hitu,+ sira hasaʼe sakrifísiu dame nian+ no fó agradese ba Jeová, sira-nia beiʼala nia Maromak.

23 Tuirmai kongregasaun tomak deside atu kontinua selebra festa neʼe ba loron hitu tan. Ho ida-neʼe, sira selebra festa neʼe ba loron hitu tan ho haksolok.+ 24 Liurai Ezequias husi Judá fó karau-aman 1.000 no bibi-malae 7.000 ba povu, no ulun-naʼin sira mós fó karau-aman 1.000 no bibi-malae 10.000 ba kongregasaun,+ no amlulik barak tan halo sira-nia an santu.+ 25 Kongregasaun Judá hotu, amlulik sira, ema Levi sira, kongregasaun hotu neʼebé mai husi Izraél,+ no ema estranjeiru sira+ neʼebé mai husi rai-Izraél no mós sira neʼebé hela iha Judá kontinua haksolok. 26 Sira haksolok tebes iha Jeruzalein, tanba husi Liurai David husi Izraél nia oan-mane Salomão nia tempu, seidauk akontese buat ida hanesan neʼe iha Jeruzalein.+ 27 Ikusmai amlulik Levi sira hamriik no haraik bensaun ba povu.+ No Maromak rona sira-nia lian, no sira-nia orasaun toʼo iha Maromak nia hela-fatin neʼebé santu, iha lalehan.

31 Bainhira festa hotu ona, ema Izraél hotu neʼebé tuir festa neʼe laʼo ba Judá nia sidade sira, no baku rahun fatuk lulik,*+ tesi ai-riin lulik,*+ no harahun fatin aas sira+ no altár sira+ neʼebé iha rai-Judá no Benjamim, no mós iha Efraim ho Manasés.+ Sira halo nuneʼe toʼo halakon buat sira-neʼe hotu. Depois neʼe, ema Izraél hotu fila fali ba sira ida-idak nia uma iha sira-nia sidade rasik.

2 Tuirmai Ezequias organiza amlulik no ema Levi sira tuir sira-nia grupu,+ atu nuneʼe sira bele halaʼo sira-nia knaar.+ Sira hasaʼe sakrifísiu sunu nian no sakrifísiu dame nian. Sira serbí, fó agradese no fó hahiʼi ba Maromak iha portaun sira neʼebé haleʼu pátiu* sira iha Jeová nia templu.+ 3 Liurai fó animál balu husi ninia rikusoin rasik nuʼudar sakrifísiu sunu nian+ neʼebé hasaʼe iha dadeer no kalan,+ no mós sakrifísiu sunu nian neʼebé hasaʼe iha loron Sábadu,+ fulan-foun+ no tempu festa sira,+ hodi tuir Jeová nia Ukun-Fuan neʼebé hakerek ona.

4 Liután neʼe, Ezequias haruka povu sira neʼebé hela iha Jeruzalein atu fó buat neʼebé amlulik no ema Levi sira+ iha direitu atu simu, atu nuneʼe sira bele halo tuir Jeová nia ukun-fuan ho didiʼak.* 5 Bainhira Ezequias fó sai orden neʼe, ema Izraél fó kedas buat barak tebes, hanesan trigu* primeiru neʼebé sira koʼa ona, tua-uvas foun, mina,+ bani-been no ai-han husi sira-nia toʼos.+ Sira lori porsentu sanulu husi buat oioin, no lori barak tebes.+ 6 Ema Izraél no ema Judá neʼebé hela iha Judá nia sidade sira mós lori porsentu sanulu husi karau ho bibi-malae, no mós porsentu sanulu husi buat santu sira+ neʼebé halo santu ona ba Jeová, sira-nia Maromak. Sira halibur kontribuisaun barak tebes. 7 Iha fulan-terseiru,+ sira komesa tau sira-nia kontribuisaun hotu iha fatin ida, no sira remata iha fulan-hitu.+ 8 Bainhira Ezequias no ulun-naʼin sira mai haree kontribuisaun barak tebes neʼebé povu lori mai, sira fó hahiʼi ba Maromak Jeová no haraik bensaun ba Maromak nia povu.

9 Ezequias husu amlulik no ema Levi sira kona-ba kontribuisaun sira-neʼe. 10 No amlulik boot Azarias neʼebé husi Zadoc nia umakain, hatete ba Ezequias: “Husi tempu neʼebé povu komesa lori kontribuisaun mai iha Jeová nia uma,+ povu hotu kontinua han toʼo bosu no sei iha ai-han resin tanba Jeová haraik bensaun ba ninia povu, no ai-han barak neʼe mak ai-han resin.”+

11 Entaun Ezequias hatete ba sira atu prepara armazén*+ iha Jeová nia uma, no sira prepara armazén sira. 12 Sira kontinua laran-metin hodi hatama kontribuisaun, porsentu sanulu husi sira-nia sasán,+ no mós buat santu sira. Ema Levi naran Konanias mak simu knaar nuʼudar xefe atu tau matan ba buat hotu neʼe, no ninia alin* Simei mak iha pozisaun segundu. 13 Ulun-naʼin sira neʼebé ajuda Konanias ho ninia alin Simei mak Jeiel, Azazias, Nahat, Asael, Jerimot, Jozabad, Eliel, Ismakias, Mahat no Benaias, hodi tuir Liurai Ezequias nia orden. No Azarias mak tau matan ba Maromak loos nia uma. 14 Imná nia oan-mane naran Kori neʼebé hein portaun iha parte leste,+ nia mak ema Levi neʼebé tau matan ba sakrifísiu neʼebé ema fó ho hakarak rasik+ ba Maromak loos, no fahe kontribuisaun neʼebé ema fó ba Jeová+ no mós sasán sira neʼebé santu liu hotu.+ 15 Kori mak ulun-naʼin iha amlulik nia sidade sira. Nia dirije Eden, Miniamim, Jesua, Semaias, Amarias no Sekanias.+ Tanba ema tau fiar ba mane sira-neʼe, entaun sira simu knaar atu fahe sasán sira ho loloos ba sira-nia maun-alin sira tuir sira-nia grupu,+ maski boot ka kiʼik, sira simu sasán hanesan deʼit. 16 Mane sira seluk mós simu ai-han. Loroloron sira halo serbisu iha Jeová nia uma no kumpre sira-nia knaar tuir sira-nia grupu sira. Sira-nia naran hakerek iha lista naran nian tuir sira-nia liña jerasaun husi tinan tolu ba leten.

17 Lista naran nian ba amlulik nia liña jerasaun, hakerek tuir sira-nia aman nia umakain,+ nuneʼe mós ho ema Levi sira husi tinan 20 ba leten+ tuir sira-nia grupu.+ 18 Lista naran neʼe inklui sira-nia feen, sira-nia oan-mane no oan-feto, no mós sira-nia oan neʼebé kiʼik, neʼe katak sira-nia umakain* tomak. Sira kontinua halo sira-nia an santu* hodi halo serbisu santu tanba ema tau fiar ba sira atu halaʼo sira-nia serbisu. 19 Lista naran neʼe mós inklui Arão nia bei-oan sira, neʼe katak amlulik sira neʼebé hela iha área sira neʼebé haleʼu sira-nia sidade.+ Iha sidade sira-neʼe hotu, iha mane balu neʼebé simu knaar atu fahe ai-han ba amlulik hotu no ba ema Levi hotu neʼebé naran hakerek ona iha lista neʼe.

20 Ezequias halo nuneʼe iha rai-Judá tomak, no nia kontinua halo buat neʼebé diʼak no loos, no hatudu laran-metin ba Jeová, ninia Maromak. 21 Serbisu hotu neʼebé Ezequias halo atu adora* ninia Maromak, maski neʼe liga ho serbisu iha Maromak loos nia uma+ ka liga ho Ukun-Fuan no mandamentu sira, Ezequias halo neʼe ho laran tomak, no nia hetan susesu.

32 Bainhira Ezequias halo hotu serbisu sira-neʼe ho laran-metin,+ Liurai Senaquerib husi rai-Asíria mai ataka Judá. Nia halo serku ba sidade sira neʼebé iha moru aas, no hanoin atu tama hodi manán sidade sira-neʼe.+

2 Bainhira Ezequias haree katak Senaquerib mai ona ho hakarak atu halo funu hasoru Jeruzalein, 3 nia koʼalia ho ninia ulun-naʼin sira no funu-naʼin sira, tuirmai nia deside atu taka bee-matan sira neʼebé suli iha sidade nia liʼur,+ no sira apoia nia. 4 Povu barak halibur hamutuk, no sira taka bee-matan hotu no bee-dalan neʼebé suli iha rai neʼe, tanba sira dehan: “Tanbasá mak ita tenke husik liurai sira husi Asíria hetan bee barak bainhira sira mai?”

5 Liután neʼe, Ezequias deside metin atu hadiʼa fali moru hotu neʼebé aat ona no harii uma aas* sira iha moru leten, no nia harii moru ida tan iha liʼur. Nia mós hadiʼa Millo*+ iha David nia Sidade, no nia halo eskudu no armas barak. 6 Tuirmai nia hili xefe tropa nian atu dirije povu sira no halibur sira iha fatin públiku besik sidade nia portaun no nia fó aten-brani ba sira,* hodi dehan: 7 “Sai aten-brani no sai forte bá. Labele sai taʼuk ka nakdedar ba liurai Asíria+ no tropa lubun neʼebé hamutuk ho nia, tanba tropa barak liu mak hamutuk ho ita duké ho nia.+ 8 Ema deʼit* mak hamutuk ho nia, maibé Jeová, ita-nia Maromak, mak hamutuk ho ita hodi ajuda ita no halo funu hodi defende ita.”+ Nuneʼe povu sira sai aten-brani tanba Ezequias, liurai Judá, nia liafuan sira-neʼe.+

9 Depois neʼe, bainhira Liurai Senaquerib husi Asíria iha hela sidade Lakis+ hamutuk ho ninia ema-boot no ninia tropa kbiit boot hotu, nia haruka ninia atan sira ba Jeruzalein atu koʼalia ba Liurai Ezequias husi Judá no povu Judá hotu neʼebé hela iha Jeruzalein,+ hodi dehan:

10 “Liurai Senaquerib husi Asíria dehan nuneʼe: ‘Imi tau fiar ba saida hodi imi tuur hakmatek iha Jeruzalein bainhira ami halo serku hela ba sidade neʼe?+ 11 Tuir loloos Ezequias lohi ona imi. Nia sei halo imi mate ho hamlaha no hamrook. Nia dehan: “Jeová, ita-nia Maromak, sei salva ita husi liurai Asíria nia liman.”+ 12 Maibé Ezequias mak halakon ona imi-nia Maromak nia fatin aas+ no altár sira,+ loos ka lae? Tuirmai nia dehan ba ema Judá no Jeruzalein: “Imi tenke hakruʼuk deʼit iha altár ida nia oin no imi tenke hasaʼe sakrifísiu* iha altár neʼe nia leten.”+ 13 Imi hatene ka lae, buat neʼebé haʼu ho haʼu-nia beiʼala sira halo ona ba povu hotu iha rai seluk?+ Nasaun seluk nia maromak sira bele salva sira-nia rai husi haʼu-nia liman ka lae?+ 14 Husi nasaun hotu neʼebé haʼu-nia beiʼala halakon ona, sira-nia maromak ida-neʼebé mak salva ona ninia povu husi haʼu-nia liman? Entaun imi-nia Maromak bele salva imi husi haʼu-nia liman ka?+ 15 Agora keta husik Ezequias bosok ka lohi imi hanesan neʼe!+ Keta fiar nia, tanba nasaun sira-nia maromak ida mós labele salva ninia povu husi haʼu-nia liman no husi haʼu-nia beiʼala nia liman. Entaun imi-nia Maromak mós labele salva imi husi haʼu-nia liman!’”+

16 Senaquerib nia atan sira koʼalia tan kontra Jeová, Maromak neʼebé loos, no kontra Maromak nia atan Ezequias. 17 Senaquerib mós hakerek karta+ atu hatún Jeová, Izraél nia Maromak,+ no koʼalia kontra Maromak, hodi dehan: “Hanesan nasaun sira seluk nia maromak labele salva sira-nia povu husi haʼu-nia liman,+ nuneʼe mós Ezequias nia Maromak sei la salva Ninia povu husi haʼu-nia liman.” 18 Sira koʼalia ho lian makaʼas iha ema Judeu nia língua. Sira koʼalia ba povu Jeruzalein neʼebé iha moru leten atu halo sira taʼuk no nakdedar, hodi nuneʼe sira bele manán sidade neʼe.+ 19 Sira koʼalia kontra ema Jeruzalein nia Maromak hanesan sira koʼalia kontra nasaun seluk nia maromak sira neʼebé ema nia liman mak halo. 20 Maibé Liurai Ezequias no profeta Isaias,+ Amoz nia oan-mane, kontinua harohan kona-ba neʼe no halerik atu husu ajuda ba Maromak iha lalehan.+

21 Tuirmai Jeová haruka ninia anju ida, no anju neʼe halakon liurai Asíria nia funu-naʼin neʼebé kbiit boot,+ ulun-naʼin no xefe hotu iha tropa Asíria nia hela-fatin. Ho ida-neʼe, nia fila fali ba ninia rai ho moe boot. Ikusmai nia tama ba ninia maromak nia templu, no ninia oan-mane balu oho nia ho surik.+ 22 Nuneʼe Jeová salva Ezequias no ema Jeruzalein husi Liurai Senaquerib husi Asíria nia liman no husi inimigu hotu nia liman, no halo sira moris hakmatek husi sira-nia inimigu iha sorin-sorin. 23 Ema barak lori prezente ba Jeová iha Jeruzalein no lori sasán neʼebé diʼak liu ba Liurai Ezequias husi Judá.+ Depois neʼe, nasaun hotu respeitu tebes Ezequias.

24 Loron ida, Ezequias sai moras todan toʼo besik atu mate. Nuneʼe nia harohan ba Maromak Jeová,+ no Maromak hatán ba ninia orasaun no fó sinál ida ba nia.+ 25 Maibé Ezequias la hafolin buat diʼak neʼebé nia hetan ona, tanba ninia laran sai loko an, no neʼe halo Maromak sai hirus ba nia no ba ema Judá no Jeruzalein. 26 Ikusmai Ezequias sai haraik an no la loko an tan,+ nia no ema Jeruzalein sai haraik an, no Jeová la fakar sai ninia hirus ba sira durante Ezequias nia tempu.+

27 Ezequias iha rikusoin barak no iha glória.+ Nia harii armazén sira+ atu tau osan-mutin, osan-mean, fatuk-murak oioin, mina-bálsamu, eskudu no sasán folin-boot hotu. 28 Nia mós harii armazén atu tau ai-han, tua-uvas foun no mina, no mós halo luhan sira ba animál-hakiak oioin no bibi-malae lubun. 29 Nia mós harii sidade sira, no nia iha animál-hakiak barak, bibi-malae no karau, tanba Maromak fó rikusoin barak tebes ba nia. 30 Ezequias mak taka fatin neʼebé bee suli sai+ iha Jion+ no loke bee-dalan ba parte oeste hodi suli ba David nia Sidade,+ no Ezequias hetan susesu iha buat hotu neʼebé nia halo. 31 Maibé bainhira ulun-naʼin sira iha Babilónia haruka sira-nia atan mai atu husu Ezequias kona-ba sinál+ neʼebé akontese ona iha rai neʼe,+ Maromak loos husik nia halo desizaun mesak atu bele koko nia,+ hodi bele hatene saida mak iha ninia laran.+

32 Kona-ba Ezequias nia istória sira seluk no kona-ba oinsá nia hatudu domin ho laran-metin,+ neʼe hakerek ona hamutuk ho profeta Isaias nia vizaun,+ iha Livru Istória kona-ba Judá no Izraél nia Liurai sira.+ Isaias mak Amoz nia oan-mane. 33 Ikusmai Ezequias mate,* no sira hakoi nia iha foho-lolon besik David nia oan-mane sira-nia rate.+ Ema Judá no Jeruzalein hotu hatudu respeitu ba nia bainhira nia mate. No ninia oan-mane Manasés mak sai liurai hodi troka nia.

33 Manasés+ tinan 12 bainhira nia sai liurai, no nia ukun iha Jeruzalein durante tinan 55.+

2 Nia halo buat neʼebé aat tuir Jeová nia haree, hodi halo tuir nasaun sira seluk nia hahalok neʼebé Jeová hakribi, katak nasaun sira neʼebé Nia hasai ona husi ema Izraél nia oin.+ 3 Manasés harii fali fatin aas sira neʼebé ninia aman Ezequias harahun ona,+ no nia harii altár sira ba Baal no halo ai-riin lulik sira,* no nia hakruʼuk ba tropa lalehan nian hotu no serbí sira.+ 4 Nia mós harii altár sira iha Jeová nia uma,+ neʼebé Jeová rasik dehan: “Haʼu-nia naran sei iha Jeruzalein ba nafatin.”+ 5 No nia harii altár sira ba tropa lalehan nian hotu iha pátiu* rua neʼebé iha Jeová nia uma.+ 6 Nia sunu ninia oan-mane sira rasik iha ahi*+ iha Foho-Leet Hinom.*+ Nia mós halo masonik,+ siʼik futuru, halo hahalok matan-dook nian, no hili ema neʼebé koko atu koʼalia ho ema mate no mós ema neʼebé siʼik futuru+ atu serbí nia. Nia halo hahalok aat barak tebes tuir Jeová nia haree hodi hakanek Ninia laran.

7 Manasés tau estátua iha Maromak loos nia uma.+ Uluk Maromak fó sai ona ba David no ninia oan-mane Salomão kona-ba uma neʼe, hodi dehan: “Haʼu sei tau haʼu-nia naran iha uma neʼe no iha Jeruzalein ba nafatin, tanba neʼe mak sidade neʼebé haʼu hili ona husi Izraél nia suku sira hotu nia leet.+ 8 No se ema Izraél halo tuir ho didiʼak haʼu-nia mandamentu hotu, Ukun-Fuan hotu, lei no desizaun sira neʼebé haʼu fó sai ona liuhusi Moisés, haʼu mós sei nunka halo tan sira laʼo sai husi rai neʼebé haʼu fó ona ba sira-nia beiʼala sira.” 9 Maibé Manasés kontinua lori ema Judá no Jeruzalein laʼo sala dalan, hodi dada sira halo hahalok neʼebé aat liu fali nasaun sira neʼebé Jeová halakon ona husi ema Izraél nia oin.+

10 Jeová kontinua koʼalia ba Manasés no ninia povu, maibé sira la rona.+ 11 Entaun Jeová lori liurai Asíria nia xefe tropa nian hodi halo funu hasoru sira, no xefe sira-neʼe kaer Manasés ho besi-kaʼit* no kesi nia ho korrente rua neʼebé halo husi riti no lori nia ba Babilónia. 12 Bainhira nia iha susar laran, nia husu Jeová, ninia Maromak, atu hatudu laran-sadiʼa ba nia* no nia hatudu haraik an tebes ba ninia beiʼala nia Maromak. 13 Nia kontinua halo orasaun ba Maromak, no Maromak rona ninia orasaun no ninia harohan atu husu laran-sadiʼa, no Maromak husik nia fila fali ba Jeruzalein atu ukun nuʼudar liurai.+ Ho ida-neʼe, Manasés hatene katak Jeová mak Maromak neʼebé loos.+

14 Depois neʼe, nia harii moru iha David nia Sidade+ nia liʼur iha Jion nia parte oeste+ neʼebé iha foho-leet* no moru neʼe toʼo portaun neʼebé hanaran Portaun Ikan,+ no nia kontinua harii moru neʼe toʼo Ofel,+ no nia halo moru sira-neʼe aas tebes. Liután neʼe, nia hili xefe tropa nian sira atu tau matan ba Judá nia sidade hotu neʼebé iha moru aas. 15 Tuirmai nia hasai tiha maromak falsu* no hasai estátua* husi Jeová nia uma+ no mós hasai altár hotu neʼebé uluk nia harii iha foho neʼebé Jeová nia uma+ harii bá no iha Jeruzalein. Nia soe buat hotu neʼe iha sidade nia liʼur. 16 Nia mós hadiʼa Jeová nia altár+ no komesa hasaʼe sakrifísiu dame nian+ no sakrifísiu agradese nian+ iha altár leten, no nia haruka ema Judá atu serbí Jeová, Izraél nia Maromak. 17 Maski nuneʼe, povu sira hasaʼe nafatin sakrifísiu iha fatin aas sira, maibé sira halo nuneʼe ba sira-nia Maromak Jeová deʼit.

18 Kona-ba Manasés nia istória sira seluk, no kona-ba ninia orasaun ba ninia Maromak, no liafuan husi ema neʼebé haree vizaun fó sai ba nia hodi Jeová, Izraél nia Maromak nia naran, neʼe hakerek ona iha livru istória kona-ba Izraél nia liurai sira. 19 No mós kona-ba ninia orasaun+ no oinsá ninia Maromak hatudu laran-sadiʼa ba nia kuandu nia husu, no kona-ba ninia sala hotu no ninia hahalok la hatudu laran-metin+ antes nia haraik an, kona-ba fatin hotu neʼebé nia halo ai-riin lulik,*+ harii fatin aas no tau estátua sira, neʼe hotu hakerek ona iha livru husi ema neʼebé fó sai vizaun ba liurai. 20 Ikusmai Manasés mate,* no sira hakoi nia iha ninia uma; no ninia oan-mane Amon mak sai liurai hodi troka nia.+

21 Amon+ tinan 22 bainhira nia sai liurai, no nia ukun iha Jeruzalein durante tinan rua.+ 22 Nia kontinua halo buat neʼebé aat tuir Jeová nia haree, hanesan ninia aman Manasés halo ona.+ Amon hasaʼe sakrifísiu ba estátua hotu neʼebé ninia aman Manasés halo ona,+ no nia kontinua serbí sira. 23 Maibé Amon la haraik an ba Jeová+ hanesan ninia aman Manasés.+ Duké haraik an, Amon aumenta tan ninia sala. 24 Ikusmai ninia atan sira halo planu aat ba nia+ no oho nia iha ninia uma rasik. 25 Maibé povu sira iha rai neʼe oho ema hotu neʼebé halo planu aat ba Liurai Amon,+ no sira hili Amon nia oan-mane Josias+ sai liurai hodi troka nia.

34 Josias+ tinan ualu bainhira nia sai liurai, no nia ukun iha Jeruzalein durante tinan 31.+ 2 Nia halo buat neʼebé loos tuir Jeová nia haree no laʼo tuir ninia beiʼala David nia dalan. Nia la laʼo sees ba liman-loos ka ba liman-karuk.

3 Iha tinan 8 husi Josias nia ukun, bainhira nia sei joven hela, nia komesa buka ninia beiʼala David nia Maromak.+ No iha tinan 12 husi ninia ukun, nia komesa halakon fatin aas,+ ai-riin lulik,* estátua neʼebé bahat ona+ no estátua besi husi Judá no Jeruzalein.+ 4 Liután neʼe, nia haruka ema harahun Baal nia altár iha ninia oin, no nia halo tohar altár insensu nian neʼebé iha leten. Nia mós harahun ai-riin lulik,* estátua neʼebé bahat ona no estátua husi besi ba pedasuk. Nia harahun buat sira-neʼe toʼo uut loos no lekar iha ema sira neʼebé uluk hasaʼe sakrifísiu ba estátua sira-neʼe nia rate leten.+ 5 Nia sunu amlulik sira-nia ruin iha sira-nia altár leten.+ Ho ida-neʼe, nia hamoos Judá no Jeruzalein.

6 Tuirmai Josias bá Manasés no Efraim nia sidade sira,+ no Simeão nia sidade sira, toʼo Naftali nia sidade sira, no mós área sira neʼebé haleʼu sidade sira-neʼe, 7 nia harahun altár sira, ai-riin lulik sira* no estátua sira,+ nia harahun buat sira-neʼe toʼo uut loos; nia halo tohar altár insensu nian hotu iha rai-Izraél tomak,+ depois neʼe nia fila fali ba Jeruzalein.

8 Iha tinan 18 husi Josias nia ukun, bainhira nia hamoos tiha rai neʼe no mós templu,* nia haruka Azalias nia oan-mane Safan,+ Maseias neʼebé serbí nuʼudar xefe sidade nian, no Joakaz nia oan-mane Joá neʼebé serbí nuʼudar hakerek-naʼin atu hadiʼa ninia Maromak Jeová nia uma.+ 9 Sira bá hasoru amlulik boot Hilquias no entrega osan neʼebé povu lori ona ba Maromak nia uma; ema Levi sira neʼebé hein odamatan mak halibur ona osan sira-neʼe husi ema Manasés, ema Efraim, no ema Izraél sira seluk hotu,+ no mós husi ema Judá, ema Benjamim, no ema sira neʼebé hela iha Jeruzalein. 10 Tuirmai sira entrega osan neʼe ba mane sira neʼebé simu knaar atu tau matan ba serbisu iha Jeová nia uma. Depois neʼe, serbisu-naʼin sira iha Jeová nia uma uza osan neʼe atu hadiʼa uma neʼe. 11 Sira entrega osan neʼe ba badaen sira atu sosa fatuk neʼebé fera ona no sosa ai atu hametin uma no mós atu troka ai-lolon iha uma sira neʼebé liurai Judá sira husik deʼit toʼo sai aat.+

12 Mane sira-neʼe halo serbisu ho laran-metin.+ Ema Levi neʼebé simu knaar nuʼudar ulun-naʼin atu tau matan ba sira mak Jaat ho Obadias husi família Merari,+ no mós Zacarias ho Mesulam husi família Kohat.+ Ema Levi hotu iha matenek atu toka instrumentu múzika nian.+ 13 Sira simu knaar atu tau matan ba serbisu-naʼin sira neʼebé halo serbisu baibain* no mós nuʼudar ulun-naʼin ba ema hotu neʼebé halo serbisu sira seluk, no ema Levi balu serbí nuʼudar sekretáriu, ulun-naʼin, no guarda neʼebé hein portaun.+

14 Bainhira sira hasai osan neʼebé ema lori ona ba Jeová nia uma,+ amlulik Hilquias mós hetan livru Ukun-Fuan+ neʼebé Jeová fó sai liuhusi Moisés.*+ 15 Entaun Hilquias hatete ba sekretáriu Safan: “Haʼu hetan ona livru Ukun-Fuan iha Jeová nia uma.” Ho ida-neʼe, Hilquias fó livru neʼe ba Safan. 16 Tuirmai Safan lori livru neʼe ba liurai no dehan: “Ita-nia atan sira halo daudaun buat hotu neʼebé Ita haruka sira atu halo. 17 Sira hasai ona osan neʼebé sira hetan iha Jeová nia uma, no sira entrega ona osan neʼe ba mane sira neʼebé tau matan ba serbisu no ba sira neʼebé halo serbisu.” 18 Sekretáriu Safan mós hatete ba liurai: “Iha mós livru ida neʼebé amlulik Hilquias fó ona ba haʼu.”+ Tuirmai Safan komesa lee livru neʼe ba liurai.+

19 Bainhira liurai rona liafuan sira husi Ukun-Fuan neʼe, nia lees kedas ninia roupa.+ 20 Tuirmai liurai fó mandamentu ba Hilquias, ba Safan nia oan-mane Ahikam,+ Miqueias nia oan-mane Abdon, sekretáriu Safan, no mós ba liurai nia atan Asaias, hodi dehan: 21 “Bá husu Jeová hodi reprezenta haʼu, no reprezenta povu restu husi Izraél no Judá. Husu kona-ba liafuan husi livru neʼebé foin hetan, tanba Jeová sei fakar sai ninia hirus makaʼas ba ita. Neʼe akontese tanba ita-nia beiʼala sira la kumpre Jeová nia liafuan no la halo tuir liafuan hotu neʼebé hakerek ona iha livru neʼe.”+

22 Entaun Hilquias, hamutuk ho ema hotu neʼebé liurai haruka, bá hasoru profeta feto ida naran Hulda.+ Feto neʼe mak Salum nia feen. Salum mak Tikva nia oan-mane, Haras nia bei-oan, no Salum mak tau matan ba roupa sira. Hulda hela iha área foun iha sidade Jeruzalein, no sira koʼalia ho nia iha neʼebá.+ 23 Hulda hatete ba sira: “Jeová, Izraél nia Maromak, dehan nuneʼe: ‘Hatete ba mane neʼebé haruka imi mai hasoru haʼu: 24 “Jeová dehan nuneʼe: ‘Haʼu sei lori susar ba rai neʼe no ba ninia ema sira,+ hodi tuir malisan hotu neʼebé hakerek ona iha livru+ neʼebé sira lee ona ba liurai Judá. 25 Sira husik ona haʼu+ no hasaʼe sakrifísiu* ba maromak sira seluk hodi hakanek haʼu-nia laran+ ho buat hotu neʼebé sira halo ho sira-nia liman rasik, tan neʼe haʼu sei fakar sai haʼu-nia hirus ba fatin neʼe no haʼu-nia hirus neʼe sei la lakon.’”+ 26 Maibé imi tenke hatete ba liurai Judá neʼebé haruka imi mai atu husu Jeová: “Jeová, Izraél nia Maromak, dehan nuneʼe: ‘Kona-ba liafuan sira neʼebé ó rona ona,+ 27 neʼebé Maromak fó sai kona-ba fatin neʼe no ema neʼebé hela iha fatin neʼe, bainhira ó rona ida-neʼe ó simu,* ó haraik an iha haʼu-nia oin, ó lees ó-nia roupa no tanis iha haʼu-nia oin, haʼu mós rona ona ó’,+ Jeová mak dehan. 28 ‘Tan neʼe mak ó-nia matan sei la haree susar hotu neʼebé haʼu sei lori ba rai neʼe no ninia ema sira, no ó sei mate* ho dame no hakoi iha ó-nia rate rasik.’”’”+

Tuirmai sira lori fali liafuan sira-neʼe ba liurai. 29 Entaun liurai haruka lia-menon hodi bolu katuas sira hotu husi Judá no Jeruzalein.+ 30 Depois neʼe, liurai saʼe ba Jeová nia uma hamutuk ho mane Judá hotu, ema Jeruzalein, amlulik sira, ema Levi sira, no povu hotu husi kiʼik toʼo boot. Nia lee ba sira liafuan hotu husi livru aliansa nian neʼebé hetan ona iha Jeová nia uma.+ 31 Liurai hamriik iha ninia fatin no halo aliansa*+ iha Jeová nia oin, katak nia sei halo tuir Jeová no kumpre Ninia mandamentu, avizu no ukun-fuan hotu ho ninia laran tomak no moris tomak,+ no mós kumpre liafuan aliansa nian hotu neʼebé hakerek ona iha livru neʼe.+ 32 Liután neʼe, nia haruka ema hotu iha Jeruzalein no ema Benjamim atu apoia aliansa neʼe. Nuneʼe ema Jeruzalein halo tuir aliansa husi sira-nia beiʼala nia Maromak.+ 33 Tuirmai Josias hasai buat hotu* neʼebé Maromak hakribi husi rai-Izraél tomak,+ no nia haruka ema hotu iha Izraél atu serbí Jeová, sira-nia Maromak. Sira la hasees an husi Jeová, sira-nia beiʼala nia Maromak, durante Josias nia moris tomak.

35 Iha loron 14 fulan-primeiru,+ Josias selebra Páskua*+ ba Jeová iha Jeruzalein, no sira oho animál sira+ ba selebrasaun neʼe. 2 Josias haruka amlulik sira atu halaʼo sira-nia knaar no anima sira atu halo sira-nia serbisu iha Jeová nia uma.+ 3 Tuirmai nia hatete ba ema Levi sira neʼebé hanorin iha Izraél tomak,+ sira neʼebé sai santu ona ba Jeová, hodi dehan: “Tau Arka santu iha uma neʼebé David nia oan-mane Salomão, liurai Izraél, harii ona.+ Imi la presiza tan hulan Arka iha imi-nia kabaas.+ Agora serbí Jeová, imi-nia Maromak no serbí ninia povu Izraél. 4 Imi tenke prepara an atu halo serbisu tuir imi-nia aman nia umakain no imi-nia grupu, hodi halo tuir matadalan neʼebé Liurai David+ husi Izraél no ninia oan-mane Salomão hakerek ona.+ 5 Tama ba fatin santu no hamriik tuir imi-nia grupu, atu nuneʼe imi bele serbí povu no halo serbisu neʼebé fó ona ba ema Levi tuir imi-nia aman nia umakain. 6 Imi tenke oho animál ba sakrifísiu Páskua nian+ no halo santu* imi-nia an no prepara ba imi-nia maun-alin sira atu bele kumpre Jeová nia liafuan neʼebé fó sai ona liuhusi Moisés.”

7 Josias fó bibi-malae oan* no bibi-timur oan* ba ema hotu neʼebé tuir selebrasaun neʼe nuʼudar sakrifísiu Páskua nian. Animál sira-neʼe hamutuk 30.000, no mós karau 3.000. Liurai fó animál hotu neʼe husi ninia rikusoin rasik.+ 8 Josias nia ulun-naʼin sira mós fó kontribuisaun ho hakarak rasik ba povu neʼe, ba amlulik, no ema Levi sira. Ulun-naʼin sira iha Maromak loos nia uma mak Hilquias,+ Zacarias no Jeiel. Sira fó bibi-malae no bibi-timur hamutuk 2.600 no karau 300 ba amlulik sira nuʼudar sakrifísiu Páskua nian. 9 Ema Levi nia xefe sira mak Konanias ho ninia alin Semaias no Netanel, hamutuk ho Hasabias, Jeiel no Jozabad. Sira fó bibi-malae no bibi-timur hamutuk 5.000 no karau 500 ba ema Levi sira nuʼudar sakrifísiu Páskua nian.

10 Ho ida-neʼe, sira prepara hotu ona ba selebrasaun neʼe, no amlulik sira hamriik iha sira-nia fatin no ema Levi sira hamriik tuir sira-nia grupu,+ hodi tuir liurai nia mandamentu. 11 Ema Levi oho animál sira nuʼudar sakrifísiu Páskua nian,+ no amlulik sira hisik raan neʼebé sira simu husi ema Levi+ nuʼudar ema Levi sira hasai animál nia kulit.+ 12 Tuirmai sira prepara animál ba sakrifísiu sunu nian hodi fahe ba povu neʼebé hamriik tuir sira-nia aman nia umakain, atu nuneʼe sira bele hasaʼe ba Jeová hodi tuir ukun-fuan neʼebé hakerek ona iha Moisés nia livru, no sira halo nuneʼe mós ho karau. 13 Sira teʼin* naʼan husi sakrifísiu Páskua nian hodi tuir toman neʼebé iha.+ Sira teʼin naʼan husi sakrifísiu santu iha sanan kiʼik, sanan boot no taxu, depois neʼe, sira lori lalais atu fó ba povu sira. 14 Tuirmai sira prepara naʼan Páskua nian ba sira-nia an rasik no mós ba amlulik sira, tanba amlulik sira neʼebé husi Arão nia umakain hasaʼe sakrifísiu sunu nian no naʼan bokur toʼo kalan. Tan neʼe, ema Levi prepara naʼan ba sira-nia an no ba amlulik sira husi Arão nia umakain.

15 Kantadór sira husi Asaf nia umakain+ hamriik iha sira-nia fatin hodi tuir mandamentu husi David,+ Asaf,+ Heman, no Jedutum+ neʼebé fó sai vizaun ba liurai, no guarda sira hamriik hodi hein portaun oioin.+ Sira la presiza husik sira-nia serbisu tanba sira-nia maun-alin ema Levi prepara ona hahán Páskua nian ba sira. 16 Iha loron neʼe, sira prepara buat hotu atu bele selebra Páskua+ atu adora Jeová no atu hasaʼe sakrifísiu sunu nian iha Jeová nia altár leten hodi tuir Liurai Josias nia orden.+

17 Iha tempu neʼebá ema Izraél hotu neʼebé iha neʼebá, sira selebra Páskua no Festa Paun Fermentu-Laek nian ba loron hitu.+ 18 Ema Izraél seidauk selebra Páskua hanesan neʼe husi profeta Samuel nia tempu, no Izraél nia liurai sira seluk seidauk selebra Páskua hanesan ho Páskua neʼebé Josias halaʼo+ hamutuk ho amlulik sira, ema Levi, ema Judá no Izraél tomak, no mós ema Jeruzalein. 19 Páskua neʼe halaʼo iha tinan 18 husi Josias nia ukun.

20 Depois neʼe, bainhira Josias hadiʼa ona templu,* Liurai Neco+ husi rai-Ejitu mai halo funu iha Karkemis besik Mota Eufrates. Tuirmai Josias bá halo funu hasoru Neco.+ 21 Ho ida-neʼe, Neco haruka ema lori lia-menon ba Josias, hodi dehan: “Oh liurai Judá, ó hakarak saida? Ohin haʼu mai laʼós atu halo funu hasoru ó, maibé atu funu hasoru nasaun seluk, no Maromak dehan katak haʼu tenke bá lalais. Tan neʼe, keta kontra Maromak neʼebé hamutuk ho haʼu tanba neʼe ba ó-nia diʼak rasik, se lae nia sei oho ó.” 22 Maibé Josias lakohi hakiduk, no nia halo nia an atu ema la koñese nia+ hodi bele halo funu hasoru Neco. Nia la rona ba Neco nia liafuan, neʼebé husi Maromak nia ibun. Ho ida-neʼe, Josias bá halo funu iha Rai-Tetuk Megido.+

23 Tropa sira neʼebé kaer rama, hana Liurai Josias, entaun liurai hatete ba ninia atan sira: “Lori haʼu sai husi neʼe, tanba haʼu hetan kanek todan.” 24 Entaun Josias nia atan sira hiʼit sai nia husi kuda-karreta funu nian no tula nia iha ninia kuda-karreta segundu no lori nia ba Jeruzalein. Nuneʼe nia mate no sira hakoi nia iha ninia beiʼala nia rate,+ no ema Judá ho Jeruzalein tomak tanis ba nia. 25 No Jeremias+ mós lelir ba Josias, no kantadór mane ho feto hotu+ kontinua kanta knananuk triste nian* kona-ba Josias toʼo ohin loron. Ikusmai knananuk triste nian neʼe sai ona toman* ba ema Izraél atu kanta, no sira hakerek neʼe iha livru hamutuk ho knananuk triste nian seluk.

26 Kona-ba Josias nia istória sira seluk no kona-ba oinsá nia hatudu domin ho laran-metin hodi kumpre buat neʼebé hakerek iha Jeová nia Ukun-Fuan, 27 no kona-ba buat neʼebé nia halo, husi primeiru toʼo ikus, neʼe hakerek ona iha Livru Istória kona-ba Izraél no Judá nia Liurai sira.+

36 Tuirmai povu iha rai neʼe hili Josias nia oan-mane Jeoacaz+ nuʼudar liurai iha Jeruzalein hodi troka ninia aman.+ 2 Jeoacaz tinan 23 bainhira nia sai liurai, no nia ukun iha Jeruzalein durante fulan tolu. 3 Maibé, liurai Ejitu hasai nia husi ninia pozisaun nuʼudar liurai iha Jeruzalein no haruka povu iha rai neʼe selu impostu osan-mutin kilograma 3.420* no mós osan-mean kilograma 34 ho grama 200.*+ 4 Liután neʼe, liurai Ejitu hili Jeoacaz nia maun Eliaquim nuʼudar liurai hodi ukun Judá no Jeruzalein, no liurai Ejitu troka ninia naran ba Jeoquim. Maibé Liurai Neco+ lori Jeoquim nia alin Jeoacaz ba rai-Ejitu.+

5 Jeoquim+ tinan 25 bainhira nia sai liurai, no nia ukun iha Jeruzalein durante tinan 11. Nia kontinua halo buat neʼebé aat tuir ninia Maromak Jeová nia haree.+ 6 Liurai Nabukodonozór+ husi Babilónia mai funu hasoru nia no kesi nia ho korrente rua neʼebé halo husi riti no lori nia ba Babilónia.+ 7 Nabukodonozór foti sasán balu husi Jeová nia uma hodi lori ba Babilónia no tau sasán sira-neʼe iha ninia palásiu iha Babilónia.+ 8 Kona-ba Jeoquim nia istória sira seluk, no kona-ba ninia hahalok aat sira, neʼe hakerek ona iha Livru Istória kona-ba Izraél no Judá nia Liurai sira; no ninia oan-mane Joaquim mak sai liurai hodi troka nia.+

9 Joaquim+ tinan 18 bainhira nia sai liurai, no nia ukun iha Jeruzalein durante fulan tolu ho loron sanulu. Nia kontinua halo buat neʼebé aat tuir Jeová nia haree.+ 10 Bainhira tinan foin komesa,* Liurai Nabukodonozór haruka ema atu lori Joaquim ba Babilónia,+ no lori mós sasán folin-boot sira husi Jeová nia uma.+ No Nabukodonozór hili Joaquim nia tiu* Zedequias nuʼudar liurai ba Judá no Jeruzalein.+

11 Zedequias+ tinan 21 bainhira nia sai liurai, no nia ukun iha Jeruzalein durante tinan 11.+ 12 Zedequias kontinua halo buat neʼebé aat tuir ninia Maromak Jeová nia haree. Nia la hatudu haraik an ba profeta Jeremias+ neʼebé Jeová haruka atu koʼalia ho nia. 13 Nia mós kontra Liurai Nabukodonozór+ maski liurai haruka nia atu jura hodi Maromak nia naran, no nia nafatin ulun-toos no halo toos ninia laran hodi lakohi halo tuir Jeová, Izraél nia Maromak. 14 Amlulik nia ulun-naʼin sira no povu hotu la hatudu duni laran-metin, no sira halo tuir nasaun sira-nia hahalok aat hotu neʼebé Maromak hakribi, no sira hafoʼer Jeová nia uma+ neʼebé nia halo santu ona iha Jeruzalein.

15 Jeová, sira-nia beiʼala nia Maromak, kontinua fó avizu ba sira liuhusi ninia atan sira. Nia fó avizu fila-fila ba sira, tanba nia hanoin tebes ninia povu no hanoin ninia templu.* 16 Maibé sira kontinua goza Maromak loos nia atan+ no profeta sira,+ no hakribi ninia liafuan,+ toʼo la iha tan esperansa atu troka sira-nia hahalok no Jeová fakar sai ninia hirus ba ninia povu.+

17 Tan neʼe Nia lori ema Kaldeia+ nia liurai atu kontra sira, no oho sira-nia mane joven ho surik+ iha sira-nia fatin sagradu.+ Liurai neʼe la hanoin sira-nia mane joven, feto virjen, ferik-katuas sira, ka ema neʼebé moras.+ Maromak entrega buat hotu ba liurai Kaldeia nia liman.+ 18 Liurai neʼe lori buat hotu ba Babilónia, nia lori sasán hotu husi Maromak loos nia uma, sasán boot no kiʼik, no mós lori rikusoin husi Jeová nia uma no liurai nia rikusoin no mós ninia ulun-naʼin hotu nia rikusoin.+ 19 Nia sunu Maromak loos nia uma,+ harahun Jeruzalein nia moru,+ sunu uma aas* hotu neʼebé seguru, no harahun buat folin-boot hotu.+ 20 Nia lori ema neʼebé la mate ho surik hodi bá Babilónia nuʼudar dadur,+ no sira sai nuʼudar atan ba nia+ no mós ninia oan-mane toʼo nasaun* Pérsia komesa ukun.+ 21 Neʼe akontese atu kumpre Jeová nia liafuan neʼebé fó sai ona liuhusi Jeremias,+ toʼo rai neʼe selu hotu ninia Sábadu.+ Durante tempu hotu neʼebé rai neʼe mamuk, rai neʼe halaʼo Sábadu toʼo kumpre tiha tinan 70.+

22 Iha tinan primeiru husi liurai Pérsia naran Ciro+ nia ukun, Jeová book Liurai Ciro nia laran atu fó sai avizu ida iha ninia nasaun tomak, hodi bele kumpre Jeová nia liafuan neʼebé fó sai ona liuhusi Jeremias,+ no liurai mós hakerek avizu neʼe:+ 23 “Liurai Ciro husi Pérsia dehan nuneʼe: ‘Jeová, Maromak lalehan nian fó ona nasaun hotu iha mundu neʼe mai haʼu,+ no nia rasik haruka ona haʼu atu harii uma ida ba nia iha sidade Jeruzalein iha rai-Judá.+ Ema hotu iha imi-nia leet, neʼebé mak Maromak neʼe nia povu, haʼu hein katak Jeová, sira-nia Maromak, sei hamutuk ho sira, no sira bele fila fali ba Jeruzalein.’”+