OSEIAS
1 Jeová fó sai liafuan ba Beeri nia oan-mane Oseias,* iha tempu neʼebé Liurai Uzias,+ Jotão,+ Acaz+ no Ezequias+ mak ukun rai-Judá,+ no iha tempu neʼebé Joas+ nia oan-mane Liurai Jeroboão+ mak ukun rai-Izraél. 2 Jeová komesa fó sai ninia liafuan liuhusi Oseias. Jeová hatete: “Bá kaben ho feto ida neʼebé sei sai feto-aat.* Nia sei iha oan tanba nia faʼan an,* tanba ema sira iha rai neʼe fila kotuk ba Jeová hodi faʼan an hanesan feto-aat.”+
3 Entaun nia bá kaben ho Diblaim nia oan-feto Gomer, no feto neʼe sai isin-rua no tuur-ahi oan-mane ida ba nia.
4 Tuirmai Jeová dehan ba nia: “Hanaran oan neʼe Jezreel,* tanba lakleur tan haʼu sei tesi-lia ba Jeú+ nia umakain tanba raan neʼebé fakar iha Jezreel, no haʼu sei hakotu liurai nia ukun husi umakain Izraél.+ 5 Iha loron neʼebá, haʼu sei halo tohar Izraél nia rama iha Rai-Tetuk Jezreel.”
6 Gomer sai isin-rua dala ida tan no tuur-ahi oan-feto ida. Maromak hatete ba Oseias: “Hanaran labarik-feto neʼe Lo-Ruama,* tanba haʼu sei la hatudu tan laran-sadiʼa+ ba umakain Izraél, no haʼu sei duni sai sira.+ 7 Maibé haʼu sei hatudu laran-sadiʼa ba umakain Judá,+ haʼu Jeová mak sira-nia Maromak+ no haʼu sei salva sira. Haʼu sei la salva sira liuhusi rama, surik, funu, kuda sira, ka liuhusi tropa neʼebé saʼe kuda.”+
8 Bainhira Lo-Ruama haketak ona susu, ninia inan sai isin-rua tan no tuur-ahi oan-mane ida. 9 Tuirmai Maromak hatete: “Hanaran labarik neʼe Lo-Ami,* tanba imi laʼós haʼu-nia povu no haʼu sei la sai imi-nia Maromak.
10 “Maibé povu Izraél sei sai barak hanesan rai-henek iha tasi, neʼebé labele sukat ka sura.+ No iha fatin neʼebé uluk haʼu dehan ba sira: ‘Imi laʼós haʼu-nia povu’,+ mak haʼu sei dehan fali: ‘Imi mak oan husi Maromak neʼebé moris.’+ 11 Povu husi Judá no Izraél sei halibur hamutuk ho unidade+ no sira sei hili ulun-naʼin ida no sira sei sai husi rai neʼe, tanba loron neʼe sei kmanek tebes ba Jezreel.+
2 “Hatete ba imi-nia maun-alin sira: ‘Haʼu-nia povu!’*+
No hatete ba imi-nia feton sira: ‘Oh feto neʼebé simu laran-sadiʼa!’*+
2 Foti kazu hasoru imi-nia inan. Foti kazu hasoru nia.
Tanba nia laʼós haʼu-nia feen+ no haʼu laʼós ninia laʼen.
Nia tenke husik tiha ninia hahalok nuʼudar feto-aat,*
No nia tenke husik tiha ninia adultériu,*
3 Se lae, haʼu sei kolu ninia roupa no halo nia molik hanesan loron neʼebé nia moris mai,
Halo nia sai hanesan rai-fuik
No hanesan rai neʼebé la iha bee,
No nia sei mate hamrook.
4 Ninia oan sira moris mai tanba nia faʼan an,*
Entaun haʼu sei la hatudu laran-sadiʼa ba ninia oan sira-neʼe.
5 Tanba sira-nia inan faʼan an.+
Nia sai isin-rua ba oan sira-neʼe ho hahalok neʼebé la iha moe,+ tanba nia dehan:
‘Haʼu sei duni tuir haʼu-nia doben sira neʼebé kaan haʼu,+
Sira neʼebé fó ai-han no bee ba haʼu,
Fó bibi-malae fulun no hena-liñu, mina no tua-uvas ba haʼu.’
6 Entaun haʼu sei taka ninia dalan ho lutu husi ai-tarak.
No haʼu sei harii moru fatuk,
Atu nuneʼe nia labele hetan ninia dalan sira.
7 Nia sei duni tuir ninia doben sira neʼebé uluk kaan nia, maibé nia sei la toman sira.+
Nia sei buka sira, maibé nia la hetan sira.
Tuirmai nia sei dehan: ‘Haʼu sei fila fali ba haʼu-nia laʼen ida primeiru,+
Tanba haʼu-nia moris diʼak liu iha tempu neʼebá duké agora.’+
8 Nia la rekoñese katak haʼu mak ida neʼebé fó trigu,*+ tua-uvas foun no mina ba nia,
No haʼu mak fó osan-mutin barak ba nia
No mós osan-mean neʼebé ema uza atu adora Baal.+
9 ‘Tan neʼe, haʼu sei fila no foti fali haʼu-nia ai-han sira iha tempu koʼa nian
No foti haʼu-nia tua-uvas foun iha tempu tua-uvas nian.+
No haʼu sei hadau haʼu-nia bibi-malae fulun no haʼu-nia hena-liñu neʼebé taka ninia isin-tanan.
10 Agora haʼu sei hatudu sai ninia oin-lulik ba ninia doben sira neʼebé uluk kaan nia,
No la iha mane ida mak sei salva nia husi haʼu-nia liman.+
11 Haʼu sei hapara ninia ksolok hotu,
No haʼu sei hapara ninia festa sira,+ ninia festa fulan-foun nian, ninia loron Sábadu no ninia tempu festa nian hotu.
12 No haʼu sei estraga ninia uvas-hun no ai-figeira sira, neʼebé uluk nia dehan:
“Buat sira-neʼe mak kolen neʼebé haʼu simu husi haʼu-nia doben sira neʼebé kaan haʼu”,
Haʼu sei halo buat sira-neʼe sai fali ai-laran,
No animál fuik sira husi rai-luan sei tolan tiha buat sira-neʼe.
13 Haʼu sei tesi-lia ba nia kona-ba loron sira neʼebé nia hasaʼe sakrifísiu ba estátua Baal sira,+
Tempu neʼebé nia hafurak an ho kadeli no buat murak sira no duni tuir ninia doben sira neʼebé kaan nia,
No nia haluha tiha haʼu’,+ Jeová mak dehan.
14 ‘Entaun haʼu sei book nia atu rona haʼu,
No haʼu sei lori nia ba rai-fuik,
No haʼu sei koʼalia hodi book fali ninia laran.
15 Husi tempu neʼe ba oin, haʼu sei fó fali ninia toʼos-uvas,+
No Rai-Tetuk Akor+ sei sai nuʼudar portaun ba esperansa.
Iha neʼebá mak nia sei hatán ba haʼu hanesan iha ninia tempu joven,
Hanesan tempu neʼebé nia sai husi rai-Ejitu.+
16 Iha loron neʼebá’, Jeová dehan,
‘Ó sei bolu haʼu nuʼudar “Haʼu-nia laʼen”, no ó sei la bolu tan haʼu nuʼudar “Haʼu-nia naʼi”’.*
17 ‘Haʼu sei la husik nia atu temi tan estátua Baal sira-nia naran+
No nia sei la hanoin-hetan tan sira-nia naran.+
18 Iha loron neʼebá, haʼu sei halo aliansa ho animál fuik sira iha rai-luan,+
Ho manu sira iha lalehan no ho animál sira neʼebé dolar iha rai,+ ba haʼu-nia povu sira-nia diʼak.
Haʼu sei hasai tiha rama, surik no funu husi rai neʼe,+
19 Haʼu sei hili ó nuʼudar haʼu-nia noiva ba nafatin,
No haʼu sei hili ó nuʼudar haʼu-nia noiva ho haʼu-nia hahalok loos no justisa,
No ho haʼu-nia domin neʼebé laran-metin no laran-sadiʼa.+
20 Ho laran-metin, haʼu sei hili ó nuʼudar haʼu-nia noiva,
No ó sei hatene duni Jeová.’+
21 Jeová dehan: ‘Iha loron neʼebá, haʼu sei hatán,
Haʼu sei hatán ba lalehan,
No lalehan sei hatán ba rai.+
22 Rai sei hatán ba trigu, tua-uvas foun no mina,
23 Haʼu sei kuda nia hanesan kuda fini iha rai ba haʼu-nia an rasik,+
No haʼu sei hatudu laran-sadiʼa ba nia neʼebé uluk la hetan laran-sadiʼa.*
Haʼu sei hatete ba sira neʼebé laʼós haʼu-nia povu:* “Imi mak haʼu-nia povu”,+
No sira sei dehan: “Ita mak ami-nia Maromak.”’”+
3 Tuirmai Jeová hatete ba haʼu: “Dala ida tan, bá, hadomi fali feto neʼebé mane seluk hadomi ona no neʼebé halo daudaun adultériu,*+ hanesan Jeová mós hadomi ninia povu Izraél+ maski sira adora fali maromak sira seluk+ no gosta tebes dose husi uvas-maran.”*
2 Entaun haʼu sosa nia ho osan-mutin 15 no ho sevada omer isin ida ho balu.* 3 Tuirmai haʼu hatete ba nia: “Ó sei kontinua sai haʼu-nian ba tempu naruk. Ó labele hatudu hahalok nuʼudar feto-aat,* no ó labele halo relasaun seksuál ho mane seluk. Haʼu mós sei la halo relasaun seksuál ho ó.”*
4 Tanba durante tempu naruk, povu Izraél sei moris la ho liurai ida+ no la iha ulun-naʼin ida, la iha sakrifísiu, la iha fatuk lulik, la iha efod*+ no la iha estátua terafín.*+ 5 Depois neʼe, iha loron sira-neʼe nia rohan,+ povu Izraél sei fila fali no buka Jeová, sira-nia Maromak,+ no buka David, sira-nia liurai,+ no sira sei mai iha Jeová nia oin ho nakdedar,* atu sira bele simu ninia laran-diʼak.
4 Oh povu Izraél, rona ba Jeová nia liafuan,
Tanba Jeová iha kazu hasoru ema iha rai neʼe,+
Nia halo neʼe tanba la iha lia-loos no la iha domin neʼebé laran-metin no ema la iha koñesimentu kona-ba Maromak iha rai neʼe.+
2 Jura falsu, bosok,+ oho ema,+
Naʼok no adultériu*+ mak sai barak loos,
No ema toman fakar ema seluk nia raan.+
3 Tan neʼe mak rai neʼe sei lelir+
No ema hotu neʼebé hela iha rai neʼe sei lakon mohu;
Animál fuik sira iha rai-luan no manu sira iha lalehan,
No mós ikan sira iha tasi sei lakon mohu.
4 “Maibé, ema ida labele fó konsellu ba imi,+
Tanba imi ulun-toos hanesan sira neʼebé kontra hasoru amlulik ida.+
5 Tan neʼe mak imi sei sidi maski iha loron,
No profeta sira sei sidi hamutuk ho imi, hanesan iha kalan.
No haʼu sei halakon* imi-nia inan.
6 Haʼu-nia povu sei lakon,* tanba la iha koñesimentu.
Haʼu sei la simu tan imi atu serbí nuʼudar haʼu-nia amlulik,
Tanba imi lakohi simu koñesimentu.+
Haʼu sei haluha imi-nia oan-mane sira
7 Bainhira amlulik sira sai barak, sira mós halo sala barak liután hasoru haʼu.+
Haʼu sei troka sira-nia glória sai fali buat neʼebé lori moe.*
8 Sira-nia ai-han mak haʼu-nia povu nia sala,
No sira kaan haʼu-nia povu nia hahalok aat.
9 Haʼu sei halo buat neʼebé hanesan ba povu no amlulik sira.
Haʼu sei tesi-lia ba sira hotu tuir sira-nia hahalok,
No haʼu sei lori kastigu ba sira tanba buat neʼebé sira halo.+
10 Sira sei han maibé la sai bosu.+
11 Hahalok hanesan feto-aat,* tua-uvas no tua-uvas foun
Mak halakon ema nia hakarak atu halo buat neʼebé loos.+
12 Haʼu-nia povu buka matadalan husi sira-nia estátua* sira neʼebé halo husi ai,
No sira halo tuir buat neʼebé sira-nia ai-tonka* hatudu ba sira.
Tanba hakarak faʼan an,* neʼe halo sira laʼo sala dalan,
No tanba sira-nia hahalok hanesan feto-aat mak sira lakohi hakruʼuk ba sira-nia Maromak.
13 Sira hasaʼe sakrifísiu iha foho-tutun sira,+
No sira mós sunu sira-nia sakrifísiu hodi halo suar iha foho-oan sira-nia leten,
Sira hasaʼe sakrifísiu iha ai-karvallu hun, ai-estorak hun no ai-hun boot hotu nia okos,+
Tanba ai-hun sira-neʼe nia mahon mak diʼak.
Tan neʼe mak imi-nia oan-feto sira hatudu hahalok nuʼudar feto-aat
No imi-nia feto-foun sira halo adultériu.*
14 Haʼu sei la fó kastigu ba imi-nia oan-feto sira tanba sira-nia hahalok nuʼudar feto-aat,
No la kastigu imi-nia feto-foun tanba sira halo adultériu.*
Tanba mane sira mós bá ona hamutuk ho feto-aat
No hasaʼe sakrifísiu hamutuk ho feto-aat templu nian.*
Povu sira hanesan neʼe, neʼebé la iha kbiit atu komprende,+ sei lakon tiha.
16 Tanba hanesan karau-inan neʼebé ulun-toos, Izraél sai ulun-toos ona.+
Entaun Jeová sei tau matan ba nia hanesan bibi-atan tau matan ba bibi-malae aman iha rai-luan ka lae?
17 Efraim entrega ona ninia an ba estátua sira.+
Husik nia halo nuneʼe bá!
No ninia ukun-naʼin* sira gosta tebes buat neʼebé lori moe.+
19 Anin sei lori sai tiha nia,*
No nia sei sai moe kona-ba ninia sakrifísiu sira.”
5 “Oh amlulik sira, rona ida-neʼe bá.+
Oh umakain Izraél, see tilun didiʼak bá.
Oh liurai nia umakain, rona bá;
Tanba imi sei hetan tesi-lia.
Tanba imi mak lasu ba Mizpa
No rede neʼebé soe ba Tabor nia leten.+
3 Haʼu hatene Efraim,
No Izraél labele subar husi haʼu.
4 Sira-nia hahalok la husik sira atu fila fali ba sira-nia Maromak,
Tanba sira hakarak faʼan an,*+
No sira la rekoñese Jeová.
5 Izraél nia hahalok foti an mak fó sasin hasoru nia.+
Izraél no Efraim sidi ona tanba sira-nia sala rasik,
No Judá mós sidi ona hamutuk ho sira.+
6 Sira lori sira-nia bibi-lubun no karau-lubun atu bá buka Jeová,
Maibé sira la hetan nia.
Nia hadook an ona husi sira.+
Agora sira no sira-nia rai sei lakon iha fulan ida deʼit nia laran.*
8 Huu dikur bá+ iha Gibea, huu trombeta bá iha Ramá!+
Hakilar lian funu nian bá iha Bet-Aven!+ Oh Benjamim, ami sei laʼo tuir ó!
9 Oh Efraim, iha loron kastigu nian, ó sei sai hanesan buat neʼebé halo ema taʼuk.+
Haʼu fó sai ona kona-ba buat neʼebé sei akontese duni iha Izraél nia suku sira-nia leet.
10 Judá nia ulun-naʼin sira mak hanesan ema neʼebé muda rai nia baliza.+
Haʼu sei fakar sai haʼu-nia hirus ba sira hanesan fakar bee.
11 Efraim iha terus laran, no nia rahun ona tuir justisa,
Neʼe tanba nia deside ona atu laʼo tuir ninia inimigu.+
12 Entaun haʼu sai hanesan kukulai* ba Efraim
No hanesan buat neʼebé dodok ba umakain Judá.
13 Bainhira Efraim haree ninia moras, no Judá haree ninia kanek,
Efraim laʼo ba rai-Asíria,+ no haruka ema atu lori lia-menon ba liurai boot ida.
Maibé nia labele kura imi,
Nia la iha kbiit atu kura imi-nia kanek.
14 Tanba haʼu sei sai hanesan leaun ida ba Efraim,
No hanesan leaun-aman neʼebé forte ba umakain Judá.
Haʼu rasik sei lees sira ba pedasuk no tuirmai haʼu bá.+
Haʼu sei lori sira, no la iha ema ida mak sei salva sira.+
15 Haʼu sei bá no fila fali ba haʼu-nia fatin toʼo sira simu tiha kastigu tanba sira-nia sala,*
No tuirmai sira sei buka atu haʼu simu fali sira.+
Sin, bainhira sira iha terus laran, sira sei buka fali haʼu.”+
6 “Mai, mai ita fila fali ba Jeová,
Tanba nia lees ona ita ba pedasuk,+ maibé nia sei kura fali ita.
Nia baku ona ita, maibé nia sei falun ita-nia kanek.
2 Liutiha loron rua, nia sei halo ita moris fali.
Iha loron terseiru, nia sei halo ita hamriik fali,
No ita sei moris iha ninia oin.
3 Ita sei hatene, no ita sei hakaʼas an atu buka-hatene kona-ba Jeová.
Nia sei mai hanesan rai naroman neʼebé sempre mosu.
Nia sei toʼo mai ita hanesan udan,
Hanesan udan ikus* neʼebé habokon rai.”
4 “Oh Efraim, haʼu tenke halo saida ba imi?
Oh Judá, haʼu tenke halo saida ba imi?
Tanba imi-nia domin ho laran-metin mak hanesan kalohan iha dadeer,
Hanesan mahobeen neʼebé lakon lalais deʼit.
5 Tan neʼe mak liuhusi haʼu-nia profeta sira, haʼu sei tesi sai imi.+
Haʼu sei oho imi ho liafuan husi haʼu-nia ibun.+
No haʼu-nia tesi-lia ba imi sei sai hanesan naroman neʼebé nabilan.+
6 Tanba haʼu haksolok ho domin neʼebé laran-metin,* laʼós ho sakrifísiu,
No haʼu haksolok ho koñesimentu kona-ba Maromak, laʼós ho sakrifísiu sunu nian neʼebé hasaʼe tomak.+
7 Maibé haʼu-nia povu, sira hanesan ema sala-naʼin, sira kontra ona haʼu-nia aliansa.+
Sira la hatudu laran-metin ba haʼu* iha sira-nia rai.
9 Grupu amlulik nian mak hanesan grupu naʼok-teen neʼebé subar an atu ataka ema ida.
Sira oho ema iha dalan Siquém,+
Tanba sira-nia hahalok rasik mak lori moe boot.
10 Haʼu haree ona buat aat tebes iha umakain Izraél.
11 Oh Judá, haʼu hili ona tempu koʼa nian ba imi,
Tempu atu halibur fali haʼu-nia povu neʼebé sai dadur.”+
7 “Iha tempu neʼebé haʼu hakarak kura Izraél,
Haʼu mós haree Efraim nia sala seluk tan+
No Samaria nia hahalok aat.+
2 Maibé sira haluha katak haʼu sei hanoin-hetan sira-nia hahalok aat hotu.+
Agora sira-nia hahalok aat haleʼu sira.
Buat sira-neʼe iha kedas haʼu-nia oin.
3 Sira halo liurai haksolok ho sira-nia hahalok aat,
No halo ulun-naʼin sira haksolok ho sira-nia lia-bosok.
4 Sira hotu halo adultériu,*
Sira-nia laran lakan makaʼas hanesan fornu neʼebé ema halakan ona atu tunu paun,
Fornu neʼebé kontinua manas iha tempu neʼebé ema deʼut hela trigu no hein toʼo masa neʼe saʼe.
5 Iha ita-nia liurai nia loron festa nian, ulun-naʼin sira sai moras ona,
Sira sai hirus tanba tua-uvas.+
Liurai lolo ona ninia liman ba ema gozadór sira.
6 Tanba sira-nia laran lakan hanesan fornu.*
Kalan tomak ema neʼebé tunu paun toba tiha,
Iha dadeer fornu neʼe sei lakan makaʼas.
7 Sira hotu mak manas hanesan fornu,
No sira tolan tiha sira-nia ukun-naʼin.*
8 Efraim ransu ona ho nasaun seluk.+
Efraim hanesan dose kabuar neʼebé ema tunu maibé la fila ninia sorin.
9 Ema estranjeiru tolan ona ninia kbiit,+ maibé nia la hatene ida-neʼe.
Ninia fuuk sai mutin ona, maibé nia la haree.
10 Izraél nia hahalok foti an mak fó sasin hasoru nia.+
Maibé sira seidauk fila fali ba Jeová, sira-nia Maromak,+
No sira mós seidauk buka nia maski buat hotu neʼe akontese ona ba sira.
11 Efraim mak hanesan manu-pombu neʼebé beik, la iha kbiit atu tetu didiʼak.+
Sira husu ajuda ba Ejitu,+ no buka ona ajuda husi Asíria.+
12 Fatin naran deʼit neʼebé sira bá, haʼu sei soe haʼu-nia rede ba sira-nia leten.
Haʼu sei halo sira monu tun hanesan ema uza rede hodi halo manu sira monu husi lalehan.
Haʼu sei fó dixiplina ba sira tuir avizu neʼebé haʼu fó sai ona ba povu neʼe.+
13 Susar ba sira, tanba sira halai ona husi haʼu!
Terus ba sira, tanba sira halo ona sala kontra haʼu!
Haʼu prontu atu sosa fali sira, maibé sira koʼalia ona lia-bosok kontra haʼu.+
14 Maski sira kontinua tanis iha sira-nia toba-fatin,
Maibé sira la husu ajuda ba haʼu ho sira-nia laran.+
Sira koʼa kanek sira-nia an hodi husu hahán no tua-uvas foun.
Sira kontra ona haʼu.
15 Maski haʼu fó dixiplina ba sira no hametin sira-nia liman,
Maibé sira kontra haʼu no halo planu neʼebé aat.
16 Sira troka sira-nia dalan, maibé laʼós ba dalan neʼebé kmanek liu.*
Sira la iha folin tanba sira hanesan rama-inan neʼebé ninia talin la metin.+
Sira-nia ulun-naʼin sira sei monu ho surik tanba sira-nia nanál neʼebé kontra.
Tan neʼe mak ema sei goza sira iha rai-Ejitu.”+
8 “Huu dikur bá!+
Inimigu mai hanesan manu-makikit hodi kontra Jeová nia umakain,*+
Tanba sira kontra ona haʼu-nia aliansa+ no kontra haʼu-nia ukun-fuan.+
2 Sira bolu haʼu, hodi dehan: ‘Oh ami-nia Maromak, ami ema Izraél hatene Ita!’+
3 Ema Izraél lakohi simu buat neʼebé diʼak.+
Husik inimigu ida duni tuir sira.
4 Sira foti ona liurai, maibé la liuhusi haʼu.
Sira foti ona ulun-naʼin, maibé haʼu la hatene ulun-naʼin sira-neʼe.
Sira halo estátua hodi uza sira-nia osan-mutin no osan-mean,+
No buat sira-neʼe sei lori sira ba mate.+
5 Oh Samaria, haʼu la simu ó-nia estátua karau-oan.+
Haʼu-nia hirus lakan makaʼas hasoru sira.+
Toʼo bainhira mak sira la hatene hamoos an husi sala neʼe?
6 Estátua neʼe mai husi Izraél.
Badaen ida mak halo, no neʼe laʼós Maromak;
Samaria nia estátua karau-oan sei harahun tiha toʼo sai uut.
7 Tanba sira kontinua kuda anin,
No sira sei koʼa anin-fuik.+
La iha trigu-kain ida mak sei fó trigu-musan neʼebé tasak.+
Buat neʼebé buras sei la fó ai-han.
Maski iha ai-han, ema estranjeiru* mak sei tolan tiha ida-neʼe.+
8 Inimigu sei tolan ema Izraél.+
No ema Izraél sei hela iha nasaun sira-nia leet,+
Hanesan manko neʼebé ema la gosta ona.
9 Tanba sira laʼo ona ba rai-Asíria,+ hanesan kuda-burru fuik ida neʼebé mesak deʼit.
Efraim selu ona feto-aat* sira atu sai sira-nia doben.+
10 Maski Efraim selu feto-aat husi nasaun sira,
Maibé haʼu sei halibur fali sira.
Sira sei hetan terus+ tanba naha todan neʼebé liurai no ulun-naʼin sira tau iha sira-nia leten.
11 Tanba Efraim aumenta ona altár sira atu halo sala.+
Nia uza ninia altár sira-neʼe atu halo sala.+
13 Sira hasaʼe sakrifísiu animál nuʼudar prezente ba haʼu, no sira han naʼan neʼe,
Maibé Jeová la kontente ho buat sira-neʼe.+
Agora nia sei hanoin-hetan sira-nia sala no fó kastigu ba sira tanba sira-nia sala.+
Sira fila fali ona* ba rai-Ejitu.+
14 Izraél haluha ona ninia Kriadór+ no harii ona templu sira,+
No Judá aumenta ona ninia sidade sira neʼebé iha moru aas.+
Maibé haʼu sei haruka ahi ba sidade sira-neʼe,
9 “Oh ema Izraél, keta sai kontente.+
Keta haksolok hanesan nasaun sira seluk.
Tanba imi sees ona husi imi-nia Maromak hodi halo hahalok hanesan feto-aat.*+
Imi hadomi kolen neʼebé imi hetan tanba faʼan an* iha fatin sama trigu nian hotu.+
2 Maibé fatin sama trigu nian no fatin sama uvas nian sei la halo imi sai bosu,
No tua-uvas foun sei la iha tan.+
3 Sira sei la hela tan iha Jeová nia rai.+
Efraim sei fila fali ba rai-Ejitu,
Sira sei han buat neʼebé la moos iha rai-Asíria.+
4 Sira sei la fui tan tua-uvas hodi hasaʼe nuʼudar sakrifísiu ba Jeová.+
Sira-nia sakrifísiu sei la halo nia kontente.+
Sira-nia sakrifísiu mak hanesan paun neʼebé ema han kuandu ema ida mate.
Ema hotu neʼebé han ida-neʼe sei sai la moos.
Tanba paun neʼe mak ba sira deʼit.
Paun neʼe sei la lori tama ba Jeová nia uma.
5 Saida mak imi sei halo bainhira loron toʼo ona atu halibur hamutuk
Ka atu selebra festa ba Jeová?
6 Sira tenke halai tanba inimigu sei mai halakon sira.+
Ejitu sei halibur sira hamutuk,+ no Menfis sei hakoi sira.+
Duʼut aat sei hadau sira-nia sasán folin-boot neʼebé halo husi osan-mutin,
No ai-tarak sei moris iha sira-nia tenda laran.
7 Loron kastigu nian sei toʼo mai,+
Tempu atu selu fali hahalok aat sei toʼo mai,
No ema Izraél sei hatene kona-ba neʼe.
Sira-nia profeta sei sai beik, no ema neʼebé dehan katak nia koʼalia hodi reprezenta Maromak sei sai bulak.
Tanba imi-nia sala mak barak tebes, Maromak odi tebes imi.”
8 Uluk Efraim nia guarda+ laran-metin ba haʼu-nia Maromak.+
Maibé agora ninia profeta sira-nia hahalok hotu+ mak hanesan lasu husi ema neʼebé kasa manu.*
Iha hahalok odi malu iha ninia Maromak nia uma.
9 Sira envolve an makaʼas iha buat neʼebé lori susar hanesan tempu uluk iha Gibea.+
Nia sei hanoin-hetan sira-nia sala no fó kastigu ba sira-nia sala.+
10 “Uluk haʼu hetan Izraél hanesan hetan uvas-fuan iha rai-fuik.+
Haʼu haree imi-nia beiʼala hanesan figeira-fuan neʼebé tasak uluk iha ninia hun.
Maibé sira laʼo ba Baal husi Peor.+
Sira dedika an ba buat neʼebé halo moe deʼit,*+
No sira sai foʼer tebes hanesan buat neʼebé sira hadomi.
11 Efraim nia glória semo lakon tiha hanesan manu ida.
Sira la sai isin-rua no la iha oan.+
12 Maski sira haboot oan,
Maibé haʼu sei halakon sira-nia oan toʼo la iha mane ida mak moris;+
Sin, susar ba sira bainhira haʼu fila kotuk ba sira!+
13 Ba haʼu, Efraim mak hanesan Tiro,+ no Efraim kuda tiha iha fatin neʼebé kapás.
Maibé agora Efraim tenke lori sai ninia oan atu inimigu sira oho.”
14 Oh Jeová, fó ba sira buat neʼebé Ita tenke fó ba sira.
Fó ba sira oan-fatin neʼebé halo abortu oan no susun neʼebé maran.
15 “Sira halo hahalok aat hotu iha Gilgal,+ no iha neʼebá mak haʼu odi sira.
Haʼu sei duni sai sira husi haʼu-nia uma tanba sira-nia hahalok aat.+
Haʼu sei la hadomi tan sira.+
Sira-nia ulun-naʼin hotu mak ulun-toos duni.
16 Haʼu sei baku monu Efraim.+
Sira-nia abut sei maran, no sira sei la fó fuan.
Maski sira iha oan, haʼu sei oho sira-nia oan neʼebé sira hadomi.”
17 Haʼu-nia Maromak sei la simu sira,
Tanba sira la rona ba nia,+
No sira sei sai refujiadu iha nasaun sira-nia leet.+
10 “Izraél mak uvas-hun aat* neʼebé fó fuan.+
Bainhira ninia fuan aumenta liután, ninia altár sira mós aumenta.+
Bainhira ninia rai fó fuan diʼak liután, ninia fatuk lulik* sira mós sai furak liu.+
2 Sira laran-makerek;*
Agora sira tenke hatán ba sira-nia sala.
Iha ida neʼebé sei harahun sira-nia altár no halo tohar sira-nia fatuk lulik.
3 Agora sira sei dehan: ‘Ami la iha liurai,+ tanba ami la hamtaʼuk Jeová.
Buat diʼak saida mak liurai ida bele halo ba ami?’
4 Sira koʼalia liafuan mamuk, jura falsu,+ no halo aliansa sira;
Tan neʼe sira-nia tesi-lia sai hanesan duʼut neʼebé iha venenu, neʼebé buras iha toʼos laran.+
5 Ema neʼebé hela iha Samaria sei sai taʼuk tanba buat neʼebé atu akontese ba estátua karau-oan iha Bet-Aven,+
Povu sei triste tanba estátua neʼe,
Nuneʼe mós ho maromak falsu nia amlulik sira neʼebé uluk haksolok tanba estátua neʼe no ninia glória,
Tanba ema sei lori estátua neʼe nuʼudar dadur hodi dook husi sira.
6 Ema sei lori estátua neʼe ba rai-Asíria nuʼudar prezente ba liurai boot.+
Efraim sei hetan moe,
No ema Izraél sei sente moe tanba konsellu neʼebé sira halo tuir ona.+
7 Samaria no ninia liurai sei lakon tiha,*+
Hanesan ai-sanak neʼebé ema silu ona no soe iha bee leten.
8 Fatin aas* sira iha Bet-Aven,+ neʼebé halo ema Izraél monu ba sala,+ sei lakon tiha.+
Ai-tarak no duʼut aat sei moris iha sira-nia altár leten.+
Ema sei dehan ba foho sira: ‘Taka ami bá!’
No dehan ba foho-oan sira: ‘Monu ba ami-nia leten!’+
9 Oh ema Izraél, husi tempu neʼebé imi halo sala iha Gibea, imi kontinua halo sala.+
Povu nafatin halo sala neʼebé hanesan.
Funu iha Gibea la halakon ema laran-aat hotu.
10 Haʼu mós sei fó dixiplina ba sira kuandu haʼu hakarak.
Haʼu sei halo sira lori todan ba sira-nia sala rua neʼe,*
No ema sei halibur hamutuk atu kontra sira.
11 Efraim mak karau-inan neʼebé treinu ona no gosta sama trigu,
Entaun haʼu la tau naha todan ba ninia kanuruk neʼebé furak.
Maibé agora, haʼu sei halo ema ida kontrola Efraim atu fila rai.+
Judá sei fila rai, no Jacob mós sei serbisu ba nia iha toʼos.
12 Agora sei iha tempu atu buka Jeová,+
Tan neʼe, fila rai bá iha fatin neʼebé diʼak,+
Kuda fini bá ho hahalok loos no koʼa domin neʼebé laran-metin,
Toʼo tempu neʼebé nia mai no hanorin imi ho hahalok loos.+
13 Maibé imi kuda ona hahalok aat,
Imi koʼa ona hahalok la loos,+
No imi han ona fuan husi lia-bosok neʼebé imi kuda;
Tanba imi tau fiar ba imi-nia dalan rasik,
No ba imi-nia funu-naʼin sira neʼebé barak.
14 Lian funu nian sei mosu hasoru ó-nia nasaun,
No ó-nia sidade hotu neʼebé iha moru aas sei rahun,+
Hanesan Salman harahun Bet-Arbel,*
Iha loron funu nian bainhira nia harahun inan hamutuk ho oan sira ba pedasuk.
15 Oh Betel,+ neʼe mak buat neʼebé ema sei halo ba imi tanba imi-nia hahalok aat tebes.
Bainhira rai naroman, ema sei halakon tiha* liurai Izraél nian.”+
11 “Bainhira Izraél sei labarik hela, haʼu hadomi nia,+
No haʼu bolu haʼu-nia oan-mane sai husi rai-Ejitu.+
3 Maibé haʼu mak hanorin Efraim atu laʼo,+ haʼu koʼus sira ho haʼu-nia liman.+
No sira la rekoñese katak haʼu mak kura ona sira.
4 Haʼu uza tali laran-diʼak nian* no tali domin nian hodi dada sira ba haʼu;+
No ba sira, haʼu mak hanesan ida neʼebé hiʼit sai tiha ai-leba husi sira-nia kabaas,*
Haʼu lori ai-han ba sira ida-idak ho laran-diʼak.
5 Sira sei la fila fali ba rai-Ejitu, maibé Asíria mak sei sai sira-nia liurai,+
Tanba sira lakohi fila fali ba haʼu.+
6 Surik ida sei tun hasoru ninia sidade sira+
No harahun ai-lolon neʼebé xave sidade nia portaun no tolan sira tanba sira-nia planu aat.+
7 Haʼu-nia povu lakohi hatudu laran-metin ba haʼu.+
Maski sira bolu povu neʼe atu fila,* maibé la iha ema ida mak hamriik.
8 Oh Efraim, oinsá mak haʼu bele entrega ó ba inimigu?+
Oh Izraél, oinsá mak haʼu bele entrega ó ba inimigu?
Oinsá mak haʼu bele halo ba ó hanesan Adma?
Oinsá mak haʼu bele halo ba ó hanesan Zeboim?+
Haʼu troka ona haʼu-nia hanoin;
No iha tempu hanesan, haʼu-nia laran-sadiʼa book ona haʼu.+
9 Haʼu sei la hatudu sai haʼu-nia hirus makaʼas.
Haʼu sei la halakon fali Efraim,+
Tanba haʼu mak Maromak, laʼós ema,
Haʼu mak Maromak neʼebé Santu iha imi-nia leet.
Haʼu sei la mai kontra imi ho laran-nakali.
10 Sira sei laʼo tuir Jeová, no nia sei hasai lian hanesan leaun ida.+
Bainhira nia hasai lian, ninia oan-mane sira sei mai husi parte oeste ho nakdedar.+
11 Bainhira sira sai husi rai-Ejitu, sira sei nakdedar hanesan manu ida,
No bainhira sira sai husi rai-Asíria,+ sira sei nakdedar hanesan manu-pombu ida.
Haʼu sei lori sira hodi hela iha sira-nia uma”, Jeová mak dehan.+
12 “Efraim haleʼu haʼu ho lia-bosok,
No umakain Izraél haleʼu haʼu ho lohi.+
Maibé Judá kontinua laʼo ho Maromak,
No nia laran-metin ba Maromak neʼebé Santu Liu Hotu.”+
12 “Efraim han deʼit anin.
Loron tomak nia duni tuir anin husi parte leste.
Nia aumenta ninia lia-bosok no violénsia.
Nia halo aliansa ho rai-Asíria+ no lori mina ba rai-Ejitu.+
2 Jeová iha kazu hasoru Judá.+
Nia sei tesi-lia ba Jacob tuir Jacob nia hahalok sira,
No nia sei selu fali Jacob tuir Jacob nia hahalok sira.+
3 Iha ninia inan nia kabun, Jacob kaer metin ninia maun nia ain-tuban,+
No ho ninia kbiit tomak, nia luta ho Maromak.+
4 Nia kontinua luta ho anju ida no manán.
Nia tanis no husu ho laran atu Maromak fó bensaun ba nia.”+
Maromak hetan nia iha Betel, no iha neʼebá Maromak koʼalia kona-ba ita,*+
5 Jeová, Maromak neʼebé ukun tropa lalehan nian,+
Povu tenke hanoin-hetan katak ninia naran mak Jeová.+
6 “Entaun fila fali ba imi-nia Maromak,+
Hatudu nafatin domin neʼebé laran-metin no justisa,+
No tau esperansa nafatin ba imi-nia Maromak.
7 Maibé ema neʼebé halo negósiu lori dasin neʼebé la loos iha ninia liman.
Nia gosta tebes atu lohi hodi hamatak ema.+
Iha haʼu-nia serbisu makaʼas hotu, sira labele hetan sala neʼebé boot.’
9 Maibé haʼu mak Jeová, imi-nia Maromak, husi tempu neʼebé imi hela iha rai-Ejitu.+
Haʼu sei halo imi hela fali iha tenda sira
Hanesan loron sira iha tempu festa nian.*
10 Haʼu koʼalia ona ba profeta sira,+
Haʼu aumenta sira-nia vizaun,
No haʼu koʼalia ona ai-knanoik liuhusi profeta sira.
11 Sira lohi* no koʼalia ona lia-bosok iha Gilead.+
Sira hasaʼe karau-aman nuʼudar sakrifísiu iha Gilgal,+
Sira-nia altár mak hanesan fatuk butuk iha toʼos laran neʼebé ninia rai fila tiha ona.+
12 Jacob halai tiha ba área Aram.*+
Izraél+ halo serbisu iha neʼebá hodi hola feto ida,+
No nia tau matan ba bibi-malae sira hodi hola feto ida.+
13 Liuhusi profeta ida mak Jeová lori Izraél sai husi rai-Ejitu,+
No liuhusi profeta ida mak nia proteje Izraél.+
14 Efraim hakanek duni Maromak nia laran.+
Ninia hahalok neʼebé fakar raan sei nafatin iha ninia leten.
Ninia Naʼi sei selu fali ba nia tanba moe neʼebé nia lori ba ninia Naʼi.”+
13 “Bainhira Efraim koʼalia, ema sai nakdedar.
Nia naran-boot iha Izraél.+
Maibé nia halo sala tanba adora Baal+ no mate ona.
2 Agora sira aumenta tan sira-nia sala
No halo estátua besi sira hodi uza sira-nia osan-mutin.+
Sira-nia badaen halo estátua ho matenek.
Sira dehan: ‘Ema neʼebé hasaʼe sakrifísiu, reʼi estátua karau-oan bá.’+
3 Tan neʼe, sira sei sai hanesan kalohan iha dadeer,
Hanesan mahobeen neʼebé lakon lalais deʼit,
Hanesan trigu-kulit husi fatin sama trigu nian neʼebé anin-fuik huu sai tiha,
No hanesan suar neʼebé sai husi kuak iha uma-kakuluk.
4 Maibé haʼu mak Jeová, ó-nia Maromak, husi tempu neʼebé ó hela iha rai-Ejitu.+
Ó la hatene Maromak seluk, só haʼu mesak deʼit,
No la iha salvadór seluk, só haʼu mesak deʼit.+
5 Haʼu koñese ó iha rai-fuik,+ iha rai neʼebé maran-dekor.
6 Sira han ho kontente iha sira-nia rai-luan.+
Sira sai bosu no sira-nia laran sai foti an.
Tan neʼe mak sira haluha haʼu.+
7 Haʼu sei sai hanesan leaun ida ba sira,+
Hanesan leopardu neʼebé hein iha dalan atu ataka sira.
8 Haʼu sei ataka sira hanesan ursu neʼebé lakon ninia oan,
No haʼu sei lees sira-nia hirus-matan.
Iha neʼebá mak haʼu sei tolan sira hanesan leaun ida;
Animál fuik ida husi rai-luan sei lees tiha sira ba pedasuk.
9 Oh Izraél, neʼe sei halakon ó,
Tanba ó kontra hasoru haʼu, sin, ó kontra ó-nia ajuda-naʼin.
10 Entaun, ó-nia liurai iha neʼebé, atu nuneʼe nia bele salva ó iha ó-nia sidade sira hotu?+
No ó-nia ukun-naʼin* sira iha neʼebé? Tanba ó dehan:
‘Fó ba haʼu liurai ida no ulun-naʼin sira.’+
12 Efraim nia sala falun metin ona;
Ninia sala rai didiʼak ona.
13 Nia sei sente moras hanesan feto neʼebé atu tuur-ahi.
Maibé nia mak oan neʼebé beik.
Nia lakohi sai husi ninia inan nia knotak kuandu tempu toʼo ona atu nia moris.
Oh Mate, ó-nia venenu iha neʼebé?+
Oh Rate, ó-nia kbiit atu halakon ema iha neʼebé?+
Haʼu sei la hatudu laran-sadiʼa.
15 Maski nia sai buras hanesan duʼut iha mota ninin,
Maibé anin husi parte leste sei mai, neʼe mak anin husi Jeová.
Anin neʼe sei mai husi rai-fuik maran, atu halo maran ninia bee-posu no ninia bee-matan.
Ema ida sei hadau tiha ninia sasán folin-boot sira hotu.+
16 Samaria sei hatán ba ninia sala,+ tanba nia kontra ona ninia Maromak.+
Sira sei monu tanba surik,+
Inimigu sei harahun tiha sira-nia oan sira ba pedasuk,
No lees feto sira neʼebé isin-rua.”
14 “Oh ema Izraél, fila fali ba Jeová, imi-nia Maromak,+
Tanba imi-nia sala halo ona imi sidi.
2 Fila fali ba Jeová, no dehan ba nia:
‘Favór ida, perdua ami-nia sala+ no simu buat neʼebé diʼak husi ami.
Ami sei hasaʼe sakrifísiu hahiʼi nian ho ami-nia ibun+ hanesan ami hasaʼe karau-aman* nuʼudar sakrifísiu.
3 Asíria sei la salva ami.+
Ami sei la saʼe kuda,+
No ami sei la temi tan liafuan: “Oh ami-nia Maromak!” ba buat neʼebé ami halo ho ami-nia liman,
4 Haʼu sei kura sira husi sira-nia hahalok la laran-metin,+
Haʼu sei hadomi sira ho haʼu-nia hakarak rasik,+
Tanba haʼu hadook tiha ona haʼu-nia hirus husi sira.+
5 Haʼu sei sai hanesan mahobeen ba Izraél.
Nia sei buras hanesan ai-funan líriu
No ninia abut sei naruk hanesan ai-hun sira iha Líbanu.
6 Ninia sanak sira sei sai boot,
Ninia furak sei sai hanesan ai-oliveira hun,
No ninia morin sei sai hanesan ai sira iha Líbanu.
7 Sira sei hela fali iha ninia mahon okos.
Sira sei kuda fini no sai buras hanesan uvas-hun.+
Ninia naran-boot sei sai hanesan tua-uvas husi Líbanu.
8 Efraim sei dehan: ‘Haʼu la iha tan ligasaun ho estátua sira.’+
Haʼu sei rona no tau matan ba nia.+
Haʼu sei sai hanesan ai-juníperu hun neʼebé buras.
Haʼu mak ida neʼebé sei fó ai-fuan ba nia.”
9 Sé mak matenek? Husik nia komprende buat sira-neʼe bá.
Sé mak iha kbiit atu komprende? Husik nia hatene buat sira-neʼe bá.
Tanba Jeová nia dalan sira mak loos,+
No ema laran-loos sei laʼo iha dalan sira-neʼe.
Maibé ema kontradór sira sei sidi iha dalan sira-neʼe.
Ninia naran seluk mak Osaias. Naran neʼe katak “Salvasaun husi Jah; Jah salva ona”.
Ka “prostituta”.
Ka “liuhusi hahalok prostituisaun”.
Naran neʼe katak “Maromak sei kari fini”.
Naran neʼe katak “La hetan laran-sadiʼa”.
Naran neʼe katak “Laʼós haʼu-nia povu”.
Haree nota iha Os 1:9.
Haree nota iha Os 1:6.
Ka “hahalok prostituisaun”.
Orj., “ninia adultériu entre ninia susun”. Haree “Adultériu” iha Glosáriu.
Ka “tanba hahalok prostituisaun”.
Neʼe bele refere mós ba sevada.
Ka “Haʼu-nia Baal”.
Ka “toba”.
Naran neʼe katak “Maromak sei kari fini”.
Haree nota iha Os 1:6.
Haree nota iha Os 1:9.
Haree Glosáriu.
Neʼe katak dose neʼebé uza atu halo adorasaun falsu.
Ka “litru 330”. Haree Ap. B14.
Ka “hahalok prostituisaun”.
Ka “haʼu mós sei la halo hanesan neʼe ba ó”.
Haree Glosáriu.
Ka “família nia maromak sira”. Haree “Terafín” iha Glosáriu.
Ka “tanba hamtaʼuk”.
Haree Glosáriu.
Orj., “halo nonook”.
Orj., “nonook tiha”.
Ka “hanorin”.
Ka karik “Sira troka haʼu-nia glória ho buat neʼebé lori moe”.
Ka “halo prostituisaun”.
Ka “sira sei la sai barak”.
Ka “Hahalok prostituisaun”.
Ka “ídolu”. Haree Glosáriu.
Ka “matan-dook nia ai-tonka”.
Ka “hakarak halo prostituisaun”.
Haree Glosáriu.
Haree Glosáriu.
Ka “prostituta templu nian”. Neʼe katak feto neʼebé halo prostituisaun neʼebé liga ho adorasaun falsu.
Ka “serveja neʼebé halo husi trigu”.
Orj., “eskudu”. Karik neʼe refere ba Efraim.
Ka “Anin nia liras sei falun nia”.
Ka “husik”.
Ka “oho animál barak”.
Ka “haʼu sei fó dixiplina”.
Ka “halo prostituisaun”.
Ka “hakarak halo prostituisaun”.
Ka “Sira sai traidór ba Jeová”.
Karik oan sira-neʼe moris husi feto estranjeiru no tan neʼe dook husi Maromak.
Ka karik “sei lakon iha fulan ida tan”.
Neʼe mak ular-oan ida ho liras, neʼebé hanesan ho borboleta. Bainhira seidauk iha liras, ular-oan neʼe han hena.
Ka “toʼo sira simu tiha konsekuénsia husi sira-nia sala”.
Udan neʼe komesa maizumenus fulan-Abríl nia klaran. Haree Ap. B15.
Ka “ho laran-sadiʼa”.
Ka “Sira sai traidór ba haʼu”.
Ka “hahalok prostituisaun”.
Haree Glosáriu.
Ka karik “Tanba sira-nia laran mak hanesan fornu ida bainhira sira hakbesik ho sira-nia planu aat”.
Orj., “juís”.
Neʼe katak laʼós dalan neʼebé diʼak liu atu halaʼo adorasaun.
Ka “templu”.
Ka “ema oin-foun”.
Ka “prostituta”.
Ka “hanorin”.
Ka karik “Sira sei fila fali”.
Ka “torre”. Haree Glosáriu.
Ka “hahalok prostituisaun”.
Ka “halo prostituisaun”.
Ka “agora lasu husi ema neʼebé kasa manu tau ona iha profeta nia dalan hotu”.
Ka “maromak neʼebé halo moe”.
Ka karik “uvas-hun neʼebé buras”.
Haree “Fatuk lulik” iha Glosáriu.
Ka “laran namdoras; kabeer”.
Orj., “halo nonook”.
Haree “Fatin aas” iha Glosáriu.
Neʼe katak bainhira sira lori sira-nia kastigu hanesan lori ai-leba.
Ka “Arbel nia uma”.
Orj., “halo nonook”.
Neʼe katak profeta no ema seluk neʼebé Maromak haruka atu hanorin ema Izraél.
Ka “uza ema nia tali”. Karik neʼe refere ba tali neʼebé inan-aman sira uza atu hanorin oan oinsá atu laʼo.
Orj., “hasan-ruin”.
Neʼe katak atu fila ba adorasaun neʼebé aas.
Ka “ho ita”.
Orj., “loron sira husi tempu neʼebé deside ona”.
Ka “halo buat matan-dook nian”.
Ka “Síria”.
Orj., “juís”.
Haree “Siol” iha Glosáriu.
Ka “karau-oan neʼebé aman”.
Ka “labarik sira neʼebé la iha aman”.