Hatais no hadiʼa an halo haʼu sidi

ESPERIÉNSIA HUSI EILEEN BRUMBAUGH

HAʼU sai boot nuʼudar membru ida ba relijiaun naran Old Order German Baptist Brethren (Irmaun Batista Alemaña orden antigu), neʼebé atu hanesan ho grupu Amish no Mennon. Movimentu Brethren komesa iha Alemaña iha tinan 1708, nuʼudar parte atu harii fali espiritualidade neʼebé hanaran Pietismu. The Encyclopedia of Religion hatete katak Pietismu nia hanorin importante mak “ema presiza Kristu nia evanjellu”. Hanorin neʼe motiva sira atu halaʼo kampaña misionáriu neʼebé hetan susesu iha rai oioin.

Iha tinan 1719 mane ida naran Alexander Mack dirije ninia grupu kiʼik ba Estadus Unidus nia área ida neʼebé ohin loron bolu Pennsylvania. Husi tempu neʼebá, grupu neʼe nia membru sira haketak malu no forma tan grupu kiʼik barak. Grupu ida-idak iha hanoin la hanesan kona-ba Alexander Mack nia doutrina. Ami-nia igreja kiʼik iha membru maizumenus naʼin-50. Buat neʼebé importante tebes mai ami mak lee Bíblia no halo tuir didiʼak igreja nia desizaun sira.

Maizumenus ba jerasaun tolu ona, haʼu-nia família tuir relijiaun neʼe no moris tuir ninia doutrina sira. Bainhira haʼu tinan 13, haʼu hetan batizmu no sai membru ba igreja neʼe. Husi kiʼik kedas haʼu aprende katak sala atu iha ka uza karreta, tratór, telefone, rádiu ka sasán eletróniku sira seluk. Feto hotu iha ami-nia igreja hatais deʼit roupa simples, sempre taka ulun, no labele tesi fuuk. Mane hotu iha hasarahun boot. Tuir ami-nia hanoin ema neʼebé hatais roupa modernu, pinta oin ka hafurak an hatudu hahalok foti an, no sira sai parte husi mundu neʼe.

Ami aprende atu hatudu respeitu kleʼan ba Bíblia nuʼudar ami-nia ai-han espirituál. Dadeer-dadeer antes matabixu, ami halibur hamutuk no rona ba ami-nia apá lee kapítulu ida husi Bíblia mai ami no fó komentáriu balu kona-ba buat neʼebé nia lee. Depois neʼe ami hakneʼak nuʼudar nia halo orasaun. Tuirmai amá halo orasaun Ami Aman. Haʼu sempre hein namanas ba ami-nia adorasaun dadeer nian, tanba ami-nia família tomak tuur hamutuk no fokus deʼit ba buat espirituál nian.

Iha tempu neʼebá ami halo toʼos hodi kuda modo no ai-fuan oioin besik sidade Delphi, Indiana, Estadu Unidus. Ami uza karrosa neʼebé kuda mak dada atu lori ami-nia produtu sira ba sidade hodi faʼan iha dalan no mós husi uma ba uma. Ami sente katak serbisu makaʼas mak parte husi ami-nia adorasaun ba Maromak. Entaun loroloron ami fokus ba serbisu, só domingu deʼit mak ami labele “halo serbisu todan”. Maibé, dala ruma ami-nia família sai okupadu liu ho serbisu iha toʼos, toʼo susar mai ami atu fokus ba buat espirituál.

Moris kaben no família

Iha tinan 1963, bainhira haʼu tinan 17, haʼu kaben ho James neʼebé mós tuir igreja Old Brethren. Ninia família tuir ona igreja neʼe husi ninia bizavó sira-nia tempu. Ami rua iha hakarak neʼebé makaʼas atu serbí Maromak no fiar duni katak só ami-nia igreja deʼit mak halaʼo adorasaun loos.

Iha tinan 1975 ami iha ona oan naʼin-neen, no iha tinan 1983 ami-nia oan-ikun moris. Ami-nia oan segundu Rebecca mak feto mesak. Ami serbisu makaʼas, la gasta osan, no halaʼo moris simples. Ami hakaʼas an atu hanorin Bíblia nia prinsípiu sira ba ami-nia oan, hanesan uluk ami mós aprende prinsípiu sira-neʼe husi ami-nia inan-aman no igreja nia membru seluk.

Buat importante ba ema Old Brethren mak sira-nia dalan atu hatais no hadiʼa an. Ami sente tanba la iha ema ida mak bele haree ema nia laran, tan neʼe ema ida nia dalan hatais no hadiʼa an mak hatudu sai ema neʼe mak oinsá. Tan neʼe se feto ida husi ami-nia igreja halo ninia fuuk modelu oioin, ema seluk hanoin katak nia foti an. Ka se ami-nia roupa mak simples maibé ho hena nia modelu mak dada ema nia atensaun, neʼe mós hatudu hahalok foti an. Dala ruma buat hanesan neʼe mak sai importante liu fali Bíblia nia hanorin.

Esperiénsia kona-ba tama komarka

Tinan balu depois ami kaben, haʼu-nia laʼen nia alin-mane Jesse, neʼebé mós tuir relijiaun Old Brethren tama komarka tanba lakohi hola parte iha militár. Nia hasoru Testemuña ba Jeová iha komarka laran tanba sira mós lakohi hola parte iha funu tanba halo tuir Bíblia nia prinsípiu sira. (Isaias 2:4; Mateus 26:52) Jesse gosta loos atu koʼalia kona-ba Bíblia hamutuk ho Testemuña sira no nia haree sira-nia hahalok diʼak ho matan rasik. Depois nia estuda Bíblia ho Testemuña sira ba tempu kleur, nia hetan batizmu. Neʼe halo ami la kontente.

Jesse koʼalia ba haʼu-nia laʼen James kona-ba buat neʼebé nia aprende ona. Nia mós arranju atu James simu beibeik Livru Haklaken no Matan-moris bá! Revista sira-neʼe halo James interese liután kona-ba Bíblia. Husi uluk kedas James hakarak duni atu serbí Maromak maibé dala barak nia sente dook husi Maromak, tan neʼe nia kontente atu simu informasaun naran deʼit neʼebé bele ajuda nia atu hakbesik liután ba Maromak.

Maski ami haree grupu Amish, Mennon no mós Old Brethren seluseluk nuʼudar parte husi mundu neʼe, maibé igreja nia katuas sira nafatin enkoraja ami atu lee sira-nia publikasaun. Maibé haʼu-nia apá diskrimina Testemuña sira. Nia hanoin diʼak liu ami nunka lee Livru Haklaken ka Matan moris bá! Tan neʼe haʼu la gosta tebes atu haree James lee publikasaun sira-neʼe. Haʼu taʼuk nia sei simu hanorin falsu.

Ba tempu kleur ona James iha dúvida kona-ba Old Brethren nia hanorin balu neʼebé nia sente kontra Bíblia. Nia duvida liu kona-ba hanorin katak sala atu “halo serbisu todan” iha loron-domingu. Porezemplu, Old Brethren hanorin katak la sala atu fó bee ba animál sira iha loron-domingu, maibé sala duni atu fokit duʼut iha loron neʼe. Katuas sira la hatene atu esplika husi Bíblia kona-ba lei neʼe. Neineik-neineik haʼu mós komesa duvida kona-ba hanorin sira-neʼe.

Ba tempu kleur ona ami fiar katak ami-nia igreja mak halo Maromak kontente, no ami mós hatene konsekuénsia neʼebé sei mosu se ami husik igreja neʼe. Tan neʼe susar tebes ba ami atu sai husi Old Brethren. Maibé ami-nia konxiénsia la husik ona ami atu kontinua tuir relijiaun neʼebé ami sente la halo tuir kompletu Bíblia nia hanorin. Entaun, iha tinan 1983 ami hakerek karta neʼebé esplika razaun tanbasá ami sei sai husi Old Brethren no husu atu lee ami-nia karta neʼe ba membru sira hotu. Ikusmai igreja neʼe hasai tiha ami.

Ami buka relijiaun neʼebé loos

Husi tempu neʼebá ami komesa buka relijiaun neʼebé loos. Ami buka relijiaun neʼebé halo tuir buat neʼebé sira hanorin ba ema seluk. Ulukliu ami deside atu la tuir relijiaun neʼebé hola parte iha funu. Ami interese liu kona-ba relijiaun sira neʼebé ninia membru sira halaʼo moris neʼebé simples tanba tuir ami-nia haree relijiaun sira-neʼe hatudu sai katak sira laʼós parte husi mundu neʼe. Husi tinan 1983 toʼo 1985 ami uza tempu atu laʼo ba fatin oioin atu buka-hatene didiʼak kona-ba relijiaun ida-idak, inklui grupu Mennon, Quaker no mós grupu seluk neʼebé halaʼo moris simples.

Durante tempu neʼebá, Testemuña ba Jeová mai vizita ami iha ami-nia toʼos, besik sidade Camden, Indiana. Ami rona ba sira, maibé ami husu sira atu uza deʼit Bíblia King James Version. Haʼu respeita Testemuña sira-nia haree kona-ba funu. Maibé susar ba haʼu atu simu sira, tanba sira la hanoin katak importante atu hatais no hadiʼa an iha dalan neʼebé simples hodi la sai parte husi mundu neʼe, tan neʼe haʼu sente katak Testemuña sira laʼós relijiaun neʼebé loos. Haʼu hanoin katak foti an mak halo ema atu hatais la hanesan ho ami. Haʼu fiar katak rikusoin halo ema sai foti an.

James komesa tuir Testemuña ba Jeová nia reuniaun sira, no lori mós ami-nia oan-mane balu. Haʼu hirus tebes. James husu beibeik haʼu atu bá ho nia, maibé haʼu lakohi. Maibé loron ida nia dehan ba haʼu: “Maski ó la konkorda ho sira-nia hanorin balu, bá deʼit no haree rasik sira-nia hahalok neʼebé sira hatudu ba malu.” Testemuña sira-nia hahalok mak kona tebes ninia laran.

Ikusmai haʼu deside atu bá hamutuk ho nia, maibé haʼu kuidadu tebetebes. Haʼu tama ba Reuniaun-Fatin, hatais roupa neʼebé simples no taka xapeu. Ami-nia oan-mane balu ain-tanan deʼit no sira mós hatais roupa simples. Maski nuneʼe, Testemuña sira mai hasé ami no hatudu domin mai ami. Neʼe halo haʼu hanoin, ‘Ami la hanesan ho sira, maibé sira nafatin simu ami’.

Sira-nia domin book duni haʼu, maibé haʼu deside ona atu haree liu deʼit. Bainhira sira kanta, haʼu tuur deʼit no la kanta. Depois reuniaun hotu tiha, haʼu husu pergunta barak ba sira kona-ba buat oioin neʼebé haʼu sente sira la halo ho loloos ka kona-ba eskritura balu nia signifikadu. Maski haʼu nia dalan atu koʼalia ladún diʼak, ema ida-idak neʼebé haʼu husu hatudu interese mai haʼu. Haʼu mós hakfodak tanba haʼu husu pergunta neʼebé hanesan ba ema oioin no sira hotu nia resposta mak hanesan deʼit. Dala ruma sira hakerek sira-nia resposta iha surat-tahan no neʼe ajuda tebes haʼu tanba haʼu bele aprende rasik iha tempu seluk.

Iha tempu veraun iha tinan 1985, ami-nia família bá tuir reuniaun boot husi Testemuña ba Jeová iha sidade Memphis, Tennessee. Ami bá atu haree deʼit. James seidauk koi ninia hasarahun, no ami hotu sei uza nafatin roupa simples. Durante tempu deskansa, sempre iha ema neʼebé mai atu koʼalia ho ami. Sira-nia domin no dalan atu simu ami book duni ami-nia laran. Ami mós admira ho Testemuña sira-nia unidade, tanba iha fatin neʼebé deʼit ami tuir sira-nia reuniaun, sira hotu hanorin buat neʼebé hanesan deʼit.

Tanba Testemuña sira hatudu interese no domin mai ami, neʼe book tebes James nia laran toʼo ikusmai nia hahú estuda Bíblia ho Testemuña sira. Nia buka-hatene didiʼak buat hotu atu bele haree katak buat neʼebé nia aprende mak loos. (Apóstolu 17:11; 1 Tesalónika 5:21) Ikusmai James komesa sente katak nia hetan ona lia-loos. Maibé haʼu laran-rua hela. Haʼu hakarak atu halo buat neʼebé loos, maibé haʼu lakohi sai “ema modernu” no lakohi ema haree haʼu hanesan “parte ba mundu neʼe”. Bainhira dala primeiru haʼu konkorda atu tuir estuda Bíblia, haʼu tau Bíblia King James Version iha hitin sorin no Tradusaun Mundu Foun iha sorin seluk. Haʼu kompara versíkulu ida-idak husi Bíblia rua neʼe atu nuneʼe ema la bosok haʼu.

Buat neʼebé book haʼu atu halo desizaun

Nuʼudar ami estuda hela ho Testemuña sira, ami aprende katak ita-nia aman iha lalehan mak Maromak mesak ida deʼit laʼós trindade, no katak ema la iha klamar. (Génesis 2:7; Deuteronómio 6:4; Ezequiel 18:4; 1 Korinto 8:5, 6) Ami mós aprende katak “infernu” neʼebé temi iha tradusaun Bíblia balu mak refere ba rate, laʼós fatin neʼebé Maromak fó kastigu ba ema neʼebé mate ona. (Job 14:13; Salmo 16:10; Eclesiastes 9:5, 10; Apóstolu 2:31) Lia-loos kona-ba infernu mak halo ami hakarak tebes atu aprende Bíblia liután, tanba ba tempu kleur ema iha grupu Old Brethren iha hanoin neʼebé kontra malu kona-ba pontu neʼe.

Maibé haʼu nafatin iha pergunta, oinsá mak bele dehan Testemuña ba Jeová mak relijiaun loos, tanba haʼu kontinua haree sira nuʼudar parte husi mundu neʼe. Ba haʼu importante tebes atu halaʼo moris simples, maibé tuir haʼu-nia haree Testemuña sira la halo ida-neʼe. Maibé haʼu mós rekoñese katak sira kumpre Jesus nia mandamentu atu haklaken liafuan diʼak kona-ba Maromak nia Ukun ba ema hotu. Haʼu konfuzaun tebes!​—Mateus 24:14; 28:19, 20.

Durante tempu susar neʼe, Testemuña sira-nia domin book haʼu atu kontinua buka lia-loos. Kongregasaun tomak hatudu interese mai ami. Dala barak ema oioin iha kongregasaun mai ami-nia fatin, dala ruma sira mai ho razaun atu sosa ami-nia susubeen no manu-tolun. Ami komesa haree sira nuʼudar ema neʼebé diʼak loos. Maski ami estuda ona ho Testemuña ida, maibé neʼe la halo sira seluk dada an atu mai vizita ami. Loloos, kuandu ema ruma husi kongregasaun laʼo iha ami-nia área, sira gosta atu mai hasé ami. Ami presiza duni oportunidade hanesan neʼe atu koñese diʼak liután Testemuña sira, no ami hafolin liután domin no interese neʼebé sira hatudu husi laran.

Domin neʼe la mai deʼit husi kongregasaun neʼebé besik liu ba ami-nia hela-fatin. Nuʼudar haʼu nafatin hanoin barak kona-ba hatais no hadiʼa an, irmán ida naran Kay Briggs husi kongregasaun seluk mai vizita haʼu. Nia mak ema neʼebé gosta hatais roupa simples no la pinta an, tan neʼe haʼu sente kmaan atu tuur no koʼalia nakloke ho nia. Depois neʼe, irmaun Lewis Flora neʼebé mós sai boot iha relijiaun “simples” mai vizita haʼu. Husi haʼu-nia oin nia bele haree kedas katak haʼu la sente diʼak kona-ba buat balu, no nia hakerek karta pájina sanulu hodi fó kmaan mai haʼu. Ninia laran-diʼak neʼe halo haʼu-nia matan-been nakonu, no haʼu lee ninia karta neʼe fila-fila.

Haʼu husu katuas área, irmaun O’Dell, atu esplika mai haʼu eskritura iha Isaias 3:18-23 no 1 Pedro 3:3, 4. Haʼu husu ba nia: “Versíkulu sira-neʼe hatudu katak ita tenke hatais simples hodi bele halo Maromak kontente, loos ka lae?” Nia esplika hodi dehan “Sala ka lae atu uza xapeu? Sala ka lae atu sasin fuuk?” Iha Old Brethren, ami feto sira uza xapeu, no ami sempre sasin ami-nia oan-feto sira-nia fuuk. Haʼu foin rekoñese katak hanorin sira neʼebé haʼu aprende husi Old Brethren loloos ladún tuir Bíblia, no haʼu sente kontente tebes ho katuas área nia pasiénsia no laran-maus.

Neineik-neineik haʼu mós komesa iha fiar, maibé iha buat ida tan mak halo haʼu sente la diʼak; Feto sira tesi fuuk. Katuas Kristaun sira esplika ba haʼu katak feto balu nia fuuk sai naruk liu fali feto seluk nian. Entaun neʼe katak feto ida nia fuuk mak diʼak liu fali feto seluk nia fuuk ka lae? Sira mós ajuda haʼu atu komprende katak ema ida-idak nia konxiénsia mak ajuda sira atu halo desizaun kona-ba hatais no hadiʼa an, no sira fó informasaun balu ba haʼu atu lee iha uma.

Aplika buat neʼebé ami aprende

Ami buka ema neʼebé hatudu hahalok loos no ami hetan duni ida-neʼe. Jesus dehan: “Se imi hadomi malu, ema hotu sei hatene katak imi mak haʼu-nia dixípulu.” (João 13:35) Ami-nia fiar metin duni katak Testemuña ba Jeová mak ema neʼebé hatudu domin neʼebé loos. Maski nuneʼe ami-nia oan boot naʼin-rua, Nathan no Rebecca, sente konfuzaun tebes tanba antes neʼe sira mós simu ona hanorin husi Old Brethren no hetan batizmu. Ikusmai, Bíblia nia hanorin neʼebé ami fahe ba sira no mós Testemuña sira-nia domin book sira-nia laran.

Porezemplu Rebecca hakarak atu iha relasaun besik ho Maromak husi uluk kedas. Kuandu nia aprende katak Maromak la deside nanis kona-ba ema ida-idak nia moris, neʼe halo fasil liu ba nia atu halo orasaun. Nia mós hakbesik liután ba Maromak kuandu nia aprende katak Maromak laʼós parte ida husi Trindade, maibé Nia mak Maromak ida deʼit neʼebé iha hahalok furak oioin no Rebecca bele halo tuir ninia ezemplu. (Éfeso 5:1) Rebecca mós kontente tanba nia la presiza uza liafuan antigu husi Bíblia King James Version atu koʼalia ba Maromak. Hodi aprende Maromak nia matadalan sira kona-ba orasaun, no mós Maromak nia planu ba ema atu moris ba nafatin iha mundu paraízu, neʼe ajuda nia atu sente besik liután ba ninia Kriadór.​—Salmo 37:29; Apokalipse 21:3, 4.

Bensaun sira neʼebé ami simu

James, haʼu no ami-nia oan boot naʼin-lima, Nathan, Rebecca, George, Daniel no John, hetan batizmu nuʼudar Testemuña ba Jeová iha tinan 1987. Harley hetan batizmu iha tinan 1989, no Simon iha tinan 1994. Ami-nia família tomak hakaʼas an nafatin atu halaʼo serbisu neʼebé Jesus Kristu fó mai ita, neʼe mak haklaken liafuan diʼak kona-ba Maromak nia Ukun.

Ami-nia oan-mane boot naʼin-lima, Nathan, George, Daniel, John no Harley no mós ami-nia oan-feto Rebecca, serbí ona iha sukursál husi Testemuña ba Jeová iha Estadus Unidus. George nafatin serbí iha neʼebá ba tinan 14 ona, no ami-nia oan-mane Simon neʼebé remata eskola iha 2001 foin komesa serbí iha sukursál. Ami-nia oan-mane hotu sai ona katuas ka atan ba kongregasaun. Haʼu-nia laʼen serbí nuʼudar katuas iha kongregasaun Thayer, iha Missouri, no haʼu nafatin okupadu ho serbisu haklaken.

Ami iha ona bei-oan naʼin-tolu, Jessica, Latisha no Caleb, no ami kontente atu haree sira-nia inan-aman hanorin sira atu hadomi Jeová husi kiʼik kedas. Ami-nia família tomak sente kontente tebes tanba Jeová dada ona ami, no ajuda ami atu koñese didiʼak ninia povu liuhusi sira-nia hahalok domin.

Ami hanoin tebes kona-ba ema neʼebé hakarak atu halo Maromak kontente, maibé sira-nia konxiénsia karik hetan ona treinu husi situasaun neʼebé haleʼu sira duké husi Bíblia. Ami hein katak ema sira-neʼe sei hetan ksolok neʼebé ami mós hetan laʼós hodi faʼan produtu ruma, maibé hodi laʼo husi uma ba uma atu fahe mensajen kona-ba Maromak nia Ukun no buat furak sira neʼebé Ukun neʼe sei lori mai. Haʼu sente agradese tebes toʼo haʼu-nia matan-been tun kuandu hanoin kona-ba pasiénsia no domin neʼebé ami simu husi ema sira neʼebé lori Jeová nia naran!

[Dezeñu]

Kuandu haʼu maizumenus tinan hitu, no mós kuandu haʼu boot ona

[Dezeñu]

James, George, Harley no Simon, hatais hela roupa simples

[Dezeñu]

Foto neʼebé hatudu haʼu lori hela modo ba merkadu fó sai iha jornál lokál

[Credit Line]

Journal and Courier, Lafayette, Indiana

[Dezeñu]

Hamutuk ho ami-nia família ohin loron