Karta husi Grupu Administradór

Ba imi hotu neʼebé hadomi Maromak Jeová:

Jesus hatete: “Imi sei hatene lia-loos, no lia-loos sei halo imi la atan ona.” (Joao 8:32) Liafuan neʼe halo ita sente kmaan tebes! Sin, ita bele hatene lia-loos, maski ita moris iha “loron ikus” neʼebé nakonu ho susar no lia-­bosok neʼebé namkari iha fatin barak. (2 Timoteo 3:1) Ita hanoin-hetan ka lae, kuandu Ita foin estuda no komprende katak buat neʼebé Ita aprende mak lia-loos husi Maromak nia Liafuan? Ita kontente tebes iha tempu neʼebá!

Maski importante atu iha koñesimentu neʼebé loos kona-ba lia-loos no fó-hatene beibeik ba ema seluk, ita-nia hahalok rasik mós tenke tuir lia-loos neʼe. Atu halo ida-neʼe, ita presiza hela nafatin iha Maromak nia domin. Ida-neʼe katak sá? Buat neʼebé Jesus hatete iha kalan antes nia mate, fó resposta ba pergunta ida-neʼe. Ba nia apóstolu sira neʼebé laran-metin, Jesus hatete: “Imi halo tuir haʼu-nia ukun-fuan sira karik, imi sei hela iha haʼu-nia domin; nuʼudar haʼu mós halo tuir haʼu Aman nia ukun-fuan sira no hela iha nia domin.”​—Joao 15:10.

Ita haree ona katak Jesus hela nafatin iha Maromak nia domin hodi halo tuir nia Aman nia ukun-fuan sira. Ohin loron ita mós bele halo ida-neʼe. Atu hela nafatin iha Maromak nia domin, ita presiza hatudu katak ita-nia moris loron-loron nian tuir lia-loos. Iha kalan neʼebá mós, Jesus hatete: “Imi komprende buat neʼe karik, ksolok ba imi wainhira imi halo tuir.”​—Joao 13:17.

Ho ami-nia laran tomak, ami hein katak livru ida-neʼe sei ajuda imi atu kontinua halaʼo imi-nia moris tuir lia-loos no hodi nuneʼe hela nafatin “iha Maromak nia domin hodi hein . . . moris rohan-laek”.​—Judas 21.