Lia-loos nafatin importante ka lae?

Karik Ita mós bele haree katak ohin loron, susar atu hatene saida mak loos no saida mak la loos. Ema gosta fiar buat ruma bazeia ba sira-nia sentimentu no opiniaun rasik, duké bazeia ba lia-loos no faktu sira. Iha mundu tomak, ema barak fiar katak la iha lia-loos.

Hanoin hanesan neʼe laʼós buat neʼebé foun. Tinan 2.000 liubá, Roma nia governadór Pónsio Pilatos goza Jesus hodi husu nia: “Saida mak lia-loos?” (João 18:38) Maski Pilatos la hein atu Jesus hatán, maibé pergunta neʼe importante duni. Bíblia fó resposta ba pergunta neʼe no ajuda ita hatene saida mak loos no saida mak falsu iha mundu neʼebé nakonu ho lia-bosok oioin.

Lia-loos iha duni ka lae?

Sin, iha duni. Bíblia uza liafuan “lia-loos” atu koʼalia kona-ba buat neʼebé tuir faktu no tuir morál neʼebé loos. Bíblia hanorin katak Maromak Jeováa mak hun ba lia-loos, hodi bolu nia nuʼudar “Maromak lia-loos nian”. (Salmo 31:5) Iha Bíblia laran, ita bele hetan lia-loos husi Maromak, no Bíblia kompara lia-loos hanesan naroman, tanba bele dirije ita iha mundu neʼebé ema barak konfuzaun tanba iha ideia oioin.—Salmo 43:3; João 17:17.

Oinsá mak Ita bele hetan lia-loos?

Maromak lakohi ita atu simu deʼit lia-loos husi Bíblia. Nia hakarak ita uza ita-nia kbiit atu hanoin hodi buka-hatene didiʼak Bíblia duké sadere deʼit ba ita-nia sentimentu. (Roma 12:1) Nia hakarak ita atu koñese no hadomi nia hodi uza ita-nia “neon tomak”, no nia anima ita atu prova ba ita-nia an katak buat neʼebé ita aprende husi Bíblia mak loos duni.—Mateus 22:37, 38; Apóstolu 17:11.

Lia-bosok mai husi neʼebé?

Bíblia dehan katak lia-bosok hahú husi Maromak nia inimigu, Diabu Satanás, neʼebé Bíblia bolu nuʼudar “lia-bosok nia aman”. (João 8:44) Nia koʼalia bosok kona-ba Maromak ba ema primeiru. (Génesis 3:1-6, 13, 17-19; 5:5) Husi tempu neʼebá, Satanás kontinua atu habelar lia-bosok no subar lia-loos kona-ba Maromak.—Apokalipse 12:9.

Tanbasá ohin loron ema barak koʼalia bosok?

Bíblia bolu ita-nia tempu nuʼudar “loron ikus sira”, no durante tempu neʼe, Satanás fó influénsia no lohi ema barak tebes. Ema barak koʼalia bosok hodi lohi no aproveita ema seluk. (2 Timóteo 3:1, 13) Relijiaun sira ohin loron mós iha lia-bosok barak. Bíblia dehan katak ema iha ita-nia tempu sei “halibur mestre sira neʼebé koʼalia deʼit buat neʼebé sira hakarak atu rona hodi tuir sira-nia hakarak rasik”, no sira sei “fila kotuk hodi la rona tan lia-loos”.—2 Timóteo 4:3, 4.

Tanbasá mak lia-loos importante?

Lia-loos importante tebes atu ema bele tau fiar ba malu. Se ema la tau fiar ba malu, relasaun belun sei la metin no ita-nia komunidade sei runguranga. Bíblia fó sai katak Maromak hakarak ita-nia adorasaun bazeia ba lia-loos, hodi dehan: “Sira neʼebé adora [Maromak] tenke adora tuir espíritu no lia-loos.” (João 4:24) Lia-loos husi Bíblia bele ajuda Ita hatene lia-bosok oioin neʼebé relijiaun sira hanorin, no ajuda ita atu la husik lia-bosok kontrola ita-nia moris. Atu aprende kona-ba neʼe, lee informasaun “Lia-bosok neʼebé hadook ema husi Maromak.”

Tanbasá mak Maromak hakarak haʼu atu hatene lia-loos?

Maromak hakarak Ita atu hetan salvasaun, maibé atu hetan ida-neʼe, Ita presiza aprende lia-loos kona-ba nia. (1 Timóteo 2:4) Se Ita aprende buat neʼebé loos no sala tuir Maromak nia haree no moris tuir ida-neʼe, Ita sei haburas relasaun diʼak ho nia. (Salmo 15:1, 2) Atu ajuda ema aprende lia-loos, Maromak haruka Jesus mai mundu. Maromak hakarak ita atu rona ba Jesus nia hanorin sira.—Mateus 17:5; João 18:37.

Maromak sei halakon lia-bosok ka lae?

Sin. Maromak odi bainhira ema aproveita ema seluk liuhusi lia-bosok. Nia promete atu halakon ema neʼebé kontinua koʼalia lia-bosok. (Salmo 5:6) Bainhira Maromak halo ida-neʼe, nia mós sei kumpre promesa tuirmai neʼe: “Ibun neʼebé koʼalia lia-loos sei hela ba nafatin.”—Provérbios 12:19.