Karta husi Grupu Administradór

Maluk doben sira neʼebé haklaken liafuan diʼak:

Ita iha priviléjiu furak atu adora Jeová nuʼudar Maromak loos mesak deʼit ho unidade! Ita mak ninia “maluk serbisu-naʼin”, no nia fó mai ita serbisu santu atu haklaken no hanorin liafuan diʼak kona-ba ninia Ukun. Serbisu neʼe salva ema nia moris. (1 Kor 3:9; Mt 28:19, 20) Atu kumpre serbisu neʼe iha mundu tomak ho dame no unidade, ita presiza organiza buat hotu ho didiʼak.—1 Kor 14:40.

Livru neʼe sei esplika oinsá kongregasaun Kristaun ohin loron halaʼo atividade oioin. Livru neʼe mós esplika kona-ba priviléjiu no responsabilidade oioin neʼebé Ita iha nuʼudar Testemuña ba Jeová. Se Ita hafolin Ita-nia priviléjiu no kumpre Ita-nia responsabilidade sira, Ita-nia fiar sei sai “metin liután”.—Após 16:4, 5; Gal 6:5.

Tan neʼe, ami anima Ita atu estuda didiʼak livru neʼe. Hakaʼas an atu aplika informasaun sira-neʼe iha Ita-nia moris. Porezemplu, se Ita foin sai haklaken-naʼin, hakat saida deʼit mak Ita presiza halo atu bele hetan batizmu nuʼudar Testemuña ba Jeová? Ka se Ita hetan ona batizmu, saida deʼit mak Ita bele halo atu bele hakbesik liután ba Jeová no aumenta Ita-nia serbisu ba nia? (1 Tim 4:15) Oinsá mak Ita bele haburas dame iha kongregasaun? (2 Kor 13:11) Livru neʼe sei hatán ba pergunta sira-neʼe.

Se Ita mak irmaun neʼebé hetan ona batizmu, saida deʼit mak Ita bele halo hodi bele kumpre kritéria atu serbí nuʼudar atan ba kongregasaun, no tuirmai nuʼudar katuas iha kongregasaun? Ema rihun ba rihun kontinua tama ba Maromak nia organizasaun, tan neʼe presiza tebes irmaun sira neʼebé kumpre kritéria atu tau matan ba kongregasaun. Livru neʼe sei esplika buat neʼebé Ita presiza halo atu kumpre planu espirituál sira-neʼe.—1 Tim 3:1.

Ami halo orasaun ho laran katak livru neʼe sei ajuda Ita atu komprende Ita-nia knaar iha Jeová nia organizasaun no hafolin ida-neʼe. Ami hadomi tebes imi hotu no ami sempre harohan atu imi bele kontinua adora ita-nia Aman Jeová iha lalehan ho haksolok.—Sal 37:10, 11; Isa 65:21-25.