Agostu

Maski iha buat kiʼik, Abraão mós iha toman atu halo tuir Jeová. Tan neʼe mak ninia relasaun ho Jeová sai metin ba beibeik. Nia sente livre atu fakar sai ninia hanoin ba Jeová, no husu Jeová nia ajuda bainhira nia la komprende pergunta susar balu. Porezemplu, bainhira nia hatene katak Jeová atu halakon sidade Sodoma no Gomorra, nia hanoin barak kona-ba karik ema diʼak sira mós sei mate hamutuk ho ema aat sira iha sidade rua neʼe. Karik mós tanba nia hanoin kona-ba ninia sobriñu Lot ho Lot nia família sira neʼebé hela iha Sodoma. Maibé Abraão mós iha fiar ba Jeová, “Juis ba raiklaran tomak”, tan neʼe nia koʼalia ba Jeová ho haraik an kona-ba ninia laran-susar neʼe. Jeová hanorin nia ho pasiénsia atu hatene katak Jeová mak Maromak neʼebé laran-sadiʼa. Nia bele haree ema hotu nia laran no nia mós buka atu salva ema laran-loos hotu antes nia atu tesi lia ba ema sira-neʼe. (Gên 18:22-33) Ita bele fiar katak koñesimentu no esperiénsia neʼebé Abraão hetan, neʼe ajuda nia hodi hametin ninia relasaun ho Jeová. w16.02 1:11, 12

Baibain, ita gaba tebes ema neʼebé hatudu laran-metin ba malu. Maibé ita gaba Jónatas laʼós tan deʼit ninia laran-metin ba David. Ninia laran-metin ba David mai husi ninia laran-metin ba Maromak. Ba nia, laran-metin ba Jeová mak buat neʼebé importante liu hotu. Sira naʼin-rua halo tuir duni sira-nia juramentu hodi hatudu laran-metin ba malu. Ita mós tenkesér hatudu laran-metin ba ita-nia família, belun, no irmaun-irmán sira. (1 Tes 2:10, 11) Maibé importante liu atu hatudu laran-metin ba sé? Ba Jeová, tanba nia mak Ida neʼebé fó moris ba ita! (Apok 4:11) Bainhira ita hatudu laran-metin ba Jeová, neʼe halo ita sente kontente no solok. No maski iha situasaun neʼebé susar tebes, ita mós tenke hatudu laran-metin nafatin ba nia. w16.02 3:3, 4

Ema neʼebé maduru sei laran-metin ba ninia fiar. Nia sei la finje sai Maromak nia belun bainhira tuir reuniaun, no iha eskola, nia sai fali mundu nia belun. Maibé, nia mak ema neʼebé laran-metin maski hasoru tentasaun oioin. (Éf 4:14, 15) Loos duni, ita hotu hatene katak laiha ema ida mak perfeitu. Ema idade ka joven mós dala ruma halo sala. (Ecle 7:20) Maibé se Ita hakarak hetan batizmu, diʼak atu buka-hatene uluk Ita iha duni hakarak neʼebé metin ka lae atu halo tuir Jeová nia mandamentu sira. Husu ba Ita-nia an, ‘Haʼu iha toman atu halo tuir beibeik Jeová ka lae?’ Hanoin fali toʼok foin daudauk Ita hasoru tentasaun ruma, Ita halo duni buat neʼebé loos iha situasaun neʼe ka lae? Ita mós hasoru ona situasaun hanesan Daniel nian ka lae, neʼebé ema balu hakarak Ita atu uza Ita-nia matenek ba Satanás nia mundu neʼe? Bainhira Ita hasoru tentasaun sira hanesan neʼe, Ita sempre hanoin uluk kona-ba Jeová nia hakarak ka lae?—Éf 5:17. w16.03 1:7-9

Ita moris daudaun iha tempu neʼebé Bíblia bolu nuʼudar “loron ikus sira”, no lakleur tan terus boot neʼebé nunka akontese sei mosu mai. (2 Tim 3:1) Satanás ho ninia anju aat sira mós duni sai ona husi lalehan hodi tun mai rai, no neʼe hamosu problema barak tebes ba ema iha rai. (Apok 12:9, 12) Ita simu ona knaar ida husi Jesus atu haklaken ba ema ho língua oioin iha mundu tomak! Atu hetan bensaun husi Jeová, ita presiza duni atu fó atensaun didiʼak ba matadalan sira neʼebé Jeová fó ba ita liuhusi kongregasaun kristaun. Se ita mak halo tuir matadalan sira-neʼe ohin loron, neʼe mós sei ajuda ita atu halo tuir matadalan neʼebé ita sei simu iha tempu “terus boot” nian, tempu neʼebé Maromak atu halakon hotu Satanás nia mundu aat neʼe. (Mt 24:21) Tuirmai, ita mós sei simu tan matadalan foun atu moris iha mundu foun. w16.03 4:16, 18

Iha tempu uluk, apóstolu João haree vizaun ida kona-ba anju naʼin-hitu neʼebé huu trombeta. Bainhira anju ba dala lima huu ninia trombeta, João “haree fitun ida monu husi lalehan ba rai”. No “fitun” neʼe uza xave atu loke rai-kuak kleʼan neʼebé nakukun, no suar sai husi rai-kuak neʼe, tuirmai gafañotu barak sai husi suar neʼe. Sira la halo aat ba ai-horis, maibé halo aat deʼit ba ema sira neʼebé “la iha marka husi Maromak iha sira-nia reen-toos”. (Apok 9:1-4) João hatene katak gafañotu lubun ida bele duni estraga buat barak hanesan sira estraga ona buat barak iha rai-Ejitu iha Moisés nia tempu. (Êx 10:12-15) Gafañotu sira neʼebé João haree reprezenta ema kose-mina neʼebé fó sai Maromak nia tesi-lia hasoru relijiaun falsu. No ema barak neʼebé iha esperansa atu moris ba nafatin iha rai mós apoia ema kose-mina sira-neʼe. Sira hotu hamutuk halo serbisu haklaken ho unidade. Serbisu haklaken neʼe ajuda ona ema barak atu haketak an husi relijiaun falsu no livre husi Satanás nia ukun. w16.03 3:3

Atu bele hatene oinsá mak lia-loos book irmaun ida neʼebé seidauk iha esperiénsia barak nia hanoin ka moris, karik katuas ida bele husu ba nia hanesan neʼe, ‘Iha dalan saida mak Ita-nia dedikasaun ba Jeová troka ona Ita-nia moris?’ Pergunta hanesan neʼe bele fó oportunidade ba katuas atu koʼalia kona-ba oinsá mak ita bele serbí Jeová ho laran tomak. (Mc 12:29, 30) Koʼalia tiha ho nia, karik katuas bele halo orasaun hamutuk ho irmaun neʼe atu husu Jeová fó espíritu santu ba nia hodi bele simu treinu ho didiʼak. Bainhira irmaun neʼe rona katuas halo orasaun ba Jeová kona-ba nia, karik neʼe bele book irmaun neʼe hakaʼas an liután atu halo ninia knaar sira. Bainhira fó treinu, diʼak ba katuas atu hanoin kona-ba ezemplu husi Bíblia sira neʼebé bele ajuda irmaun neʼe iha hahalok hanesan haraik-an, prontu atu fó ajuda no halo buat ida ho laran rasik. (1 Reis 19:19-21; Neem 7:2; 13:13; Após 18:24-26) Hahalok sira-neʼe importante ba irmaun neʼebé simu treinu hanesan adubu ba rai. Neʼe bele ajuda nia sai buras lalais iha dalan espirituál nian atu loke ninia matan ba ‘buat furak’ sira husi Maromak nia Liafuan. w15 15/4 2:3, 4

Se ita hakarak hakbesik liután ba Maromak Jeová, ita ho nia tenke ‘koʼalia ba malu’. Maibé oinsá? Atu koʼalia ba Jeová, ita presiza halo orasaun beibeik ba nia. (Sal 142:2) No liuhusi lee ninia Liafuan, Bíblia, neʼe hanesan ita rona Jeová koʼalia fali mai ita. Ita presiza lee Bíblia beibeik no hanoin kleʼan kona-ba buat neʼebé ita lee. (Isa 30:20, 21) Dala ruma, susar ba ita atu haree ho momoos oinsá Maromak Jeová hatán duni ita-nia orasaun. Maibé bainhira ita halo orasaun, ita tenke husu ho klaru saida loos mak ita hakarak iha laran. Hodi halo nuneʼe, ita bele hatene ho momoos oinsá Jeová hatán duni ita-nia orasaun, no neʼe sei ajuda ita hakbesik liután ba nia. Se ita koʼalia nakloke ba Jeová hodi fó-hatene buat hotu neʼebé halo ita laran-susar, Jeová mós sei hakbesik ba ita. Atu hakbesik liután ba Maromak Jeová, neʼe mak buat neʼebé la iha rohan. Tan neʼe, mai ita kontinua rona ba Jeová hodi estuda Bíblia beibeik no mai ita koʼalia nafatin ba nia liuhusi orasaun. Se ita halo buat hirak-neʼe, ita-nia relasaun diʼak ho Jeová sei sai metin liután ba beibeik, no ho ninia ajuda ita bele tahan hasoru susar naran deʼit. w15 15/4 3:3, 14, 16

Eskritura neʼe hatudu duni Satanás nia hahalok siʼak. Maski nia kontrola tiha ona mundu tomak, maibé neʼe seidauk toʼo ba nia, Satanás hakarak atu han tan ema balu hanesan leaun hamlaha ida. Ita bele hatene ida-neʼe liuhusi terus neʼebé Jeová nia ema hetan husi apóstolu sira-nia tempu toʼo agora. Ida-neʼe hatudu duni katak Satanás siʼak no laran-aat tebes. Kuandu leaun ida hamlaha tebes, nia la hanoin ba buat neʼebé nia atu oho, no han hotu tiha mós nia la tanis hanoin ba buat neʼe. Satanás mós hanesan neʼe, nia la iha hanoin ba ema sira neʼebé nia koko atu han. Porezemplu, bainhira ema Izraél sira monu ba sala-foʼer hanesan buat neʼebé Zimri halo ka balu hatudu hahalok kaan-teen hanesan Geazi nian, neʼe halo Diabu Satanás sente kontente tebes.—Núm 25:6-8, 14, 15; 2 Reis 5:20-27. w15 15/5 1:8, 9

Oinsá mak ita bele luta manán hasoru Satanás? Jesus dehan: “Hodi tahan nafatin mak imi sei hetan imi-nia moris.” (Lc 21:19) Loos duni, la iha buat ida neʼebé ema halo ba ita mak bele hakanek ita ba nafatin no la iha ema ida mak bele estraga ita-nia relasaun diʼak ho Jeová só ita rasik mak husik sira atu halo nuneʼe mai ita. (Rom 8:38, 39) Se Jeová nia atan ida mak mate, ita la bele hanoin katak Satanás manán ona, tanba aban-bainrua Jeová sei fó moris hiʼas fali ba ema neʼe! (João 5:28, 29) Maibé aban-bainrua Satanás mak sei hetan susar fali. Bainhira Jesus halakon tiha mundu aat neʼe, nia sei sulan Satanás ba tinan 1.000. (Apok 20:1-3) Jesus nia ukun toʼo tiha tinan rihun ida nia rohan, nia sei husik Satanás livre ba tempu uitoan atu tenta ema perfeitu sira. Hotu tiha, Diabu sei lakon ka mate ba nafatin. (Apok 20:7-10) Satanás nia futuru mak nakukun tebes. Neʼe la hanesan duni ho Ita-nian! Tan neʼe, Ita tenke hamriik metin iha fiar hodi kontra hasoru Satanás. (1 Ped 5:9) Ita bele duni luta manán hasoru nia! w15 15/5 2:1, 18

Ema neʼebé matenek rekoñese katak kbiit atu hanoin bele ajuda ita ka estraga ita hanesan ahi. Ita bele uza ahi atu teʼin hahán. Maibé se ita la kuidadu, ahi bele han ita-nia uma tomak no bele oho ita. Hanesan neʼe mós bainhira ita uza kbiit hanoin nian atu banati-tuir Jeová, neʼe buat neʼebé diʼak. Maibé se ita uza kbiit neʼe atu hanoin fali ba buat la morál nian, neʼe sei estraga ita. Porezemplu, se ita mak hanoin beibeik kona-ba hakarak seksuál nian, hanoin neʼe bele sai makaʼas toʼo halo ita monu ba hahalok sala-foʼer. Hanoin foʼer bele duni estraga ita-nia relasaun ho Jeová. (Tgo 1:14, 15) Jesus hatete: “Ema neʼebé hateke beibeik ba feto ida toʼo kaan nia, ema neʼe halo ona sala-foʼer ho feto neʼe iha ninia laran.”—Mt 5:28. w15 15/5 4:11, 12, 14

Bainhira haklaken, Jesus mós halo milagre oioin hodi hatudu katak nia hanoin tebes ema hotu nia moris. Porezemplu, Jesus hasoru mane ida neʼebé kona moras aat ida naran lepra. (Mc 1:39, 40) Ema neʼe moras todan tebes toʼo doutór Lucas hatete katak ninia “isin nakonu ho moras-lepra”. (Lc 5:12) Bíblia hatete katak bainhira haree Jesus, “mane neʼe hakneʼak ho oin ba rai no husu Jesus dehan: ‘Naʼi, haʼu hatene katak se Ita-Boot hakarak, Ita bele halo haʼu sai moos.’” Mane lepra neʼe hatene katak Jesus iha kbiit atu kura ninia moras neʼe, maibé nia hanoin: ‘Jesus hakarak kura haʼu ka lae?’ Jesus sei halo saida? Jesus lolo ninia liman hodi book ema lepra neʼe, no ho laran-diʼak hatete ba nia: “Haʼu hakarak. Sai moos bá.” No ninia “moras-lepra lakon kedas”. (Lc 5:13) Jesus hatudu katak nia hadomi duni ema.—Lc 5:17. w15 15/6 2:3-5

Dala ruma susar tebes atu koʼalia ba ema seluk kona-ba problema sira, maibé diʼak atu husu ajuda husi sira. (Ebr 3:12, 13) Koʼalia kona-ba ita-nia problema ho ema maduru, ka ema neʼebé iha esperiénsia barak iha lia-loos, tanba neʼe bele ajuda ita atu buka-hatene ita-nia fraku iha neʼebé. Halo nuneʼe bele ajuda ita troka ita-nia hahalok hodi bele hela nafatin iha Jeová nia domin. Katuas sira iha kongregasaun hatene duni oinsá atu ajuda ita. (Tgo 5:13-15) Se Ita mak iha toman atu haree pornografia, labele demora atu husu ajuda kedas. Tanba se Ita husik deʼit, toman neʼe bele lori Ita monu ba halo hahalok sala-foʼer. Hahalok neʼe bele hakanek ema seluk no hafoʼer Jeová nia naran. Ema barak neʼebé uluk iha toman hanesan neʼe, bá buka ona ajuda husi katuas no halo tuir konsellu neʼebé katuas sira fó. Sira buka ajuda tanba hakarak halo buat neʼebé Jeová gosta no atu hela nafatin iha kongregasaun.—Tgo 1:15; Sal 141:5; Ebr 12:5, 6. w15 15/6 3:15-17

Bainhira Babilónia Boot lakon ona, neʼe katak ema hotu neʼebé mai husi relijiaun falsu mós sei mate dala ida deʼit ka lae? Lae. Relijiaun nia ulun-naʼin balu mós sei finje katak sira la iha relijiaun no nega sira la mai husi relijiaun falsu. (Zac 13:5, 6) Entaun saida mak sei akontese ba Maromak nia povu iha tempu neʼebá? Jesus esplika katak: “Tuir loloos, se Maromak la habadak loron sira-neʼe, sei la iha ema ida neʼebé hetan salvasaun; maibé tanba sira neʼebé Maromak hili ona, entaun loron sira-neʼe sei habadak duni.” (Mt 24:22) Ida-neʼe mak buat neʼebé akontese iha tinan 66. Tempu terus iha Jeruzalein tenke habadak hodi ema neʼebé Maromak hili ona bele halai sai. Hanesan neʼe mós ho faze primeiru husi tempu terus boot nian, tempu neʼe tenke habadak atu “dikur sanulu” la bele halakon ema neʼebé Maromak hili ona. (Apok 17:16) Bainhira faze primeiru hahú tiha, iha tempu badak uitoan neʼebé situasaun sei sai kalma fali. w15 15/7 2:5, 6

Ita ida-idak bele deside rasik atu husik nia ka la husik nia atu tenta ita. (Mt 6:13; Tgo 1:13-15) Ba Jesus, bainhira Satanás tenta nia, nia uza kedas Maromak nia Liafuan hodi kontra hasoru Satanás. Hodi nuneʼe mak Jesus bele iha laran-metin ba Jeová. Maibé Satanás mós la rende an atu tenta Jesus. Nia hein Jesus “toʼo tempu seluk”. (Lc 4:13) Maski Satanás koko beibeik Jesus, maibé Jesus nunka husik Diabu atu sobu ninia laran-metin ba Jeová. Satanás laʼós hakarak tenta Jesus deʼit, nia mós hakarak tenta Jesus nia dixípulu hotu atu kontra Jeová, inklui mós Ita. Tanba pergunta kona-ba Jeová nia direitu atu ukun seidauk rezolve hotu, tan neʼe nia husik Diabu uza mundu neʼe atu tenta ita. Entaun tentasaun sira laʼós mai husi Maromak. Tuir loloos Jeová mak ida neʼebé hakarak ajuda ita no nia mak ida neʼebé hatudu fiar mai ita katak ita bele manán hasoru tentasaun sira. Jeová husik Satanás tenta ita tanba ita ema iha kbiit atu hili halo tuir nia ka kontra nia. Atu la bele monu ba tentasaun, ita presiza halo buat rua, neʼe mak: hakbesik nafatin ba Jeová no halo orasaun beibeik atu husu ninia ajuda. w15 15/6 5:13, 14

Ita ema kristaun tenkesér treinu makaʼas ita-nia hanoin no konxiénsia atu bainhira problema ida mosu iha komunidade, ita bele neutrál nafatin hodi la mete ba problema sira-neʼe. (Rom 14:19) Haree toʼok ezemplu ida kona-ba Mireta. Nia moris iha rai ida neʼebé uluk ema bolu Jugoslávia. Nia moris mai ema odi ona ema husi rai-Sérvia sira. Bainhira nia aprende katak Jeová nunka fihir ema no Satanás mak halo ema fahe malu, nia hakaʼas an tebes atu halakon sentimentu nasionalizmu nian. Maibé bainhira ema oho malu iha ninia área tanba rasa la hanesan, ninia sentimentu uluk nian mosu fali, no neʼe halo susar tebes ba nia atu bele haklaken ba ema Sérvia. Maibé irmán neʼe rekoñese katak sentimentu neʼe sei la lakon derrepente deʼit se nia tuur hodi hein no la halo buat ida. Nia husu makaʼas ba Jeová atu ajuda nia atu nia la bele iha sentimentu hanesan neʼe. Ikusmai Mireta hatete: “Haʼu sente katak fó atensaun tomak ba serbisu haklaken mak ajuda boot tebes mai haʼu. Tanba husi haklaken mak haʼu bele halo tuir Jeová nia hahalok domin, no husi neʼe haʼu bele sente katak haʼu-nia sentimentu ladiʼak ba ema mós la iha tan.” w15 15/7 3:11-13

Haree toʼok Liurai Jeosafát husi Judá nia ezemplu. Iha loron ida Jeosafát halo desizaun la matenek hodi bá hamutuk ho Liurai Akabe husi Izraél atu halo funu. Iha profeta falsu naʼin-400 mak hatete ba liurai aat Akabe katak sira sei manán funu neʼe, maibé Jeová nia profeta neʼebé loos, Mikaías, hatete katak sira sei lakon. Akabe mate duni iha funu neʼe, no Jeosafát mós besik mate. Funu hotu tiha Jeosafát fila fali ba Jeruzalein. No Jeová uza Jeú bá hodi fó konsellu ba desizaun sala neʼebé nia halo, no maski nia halo sala, Jeú hatete ba nia: “Ó mós iha buat diʼak barak.” (2 Crôn 18:4, 5, 18-22, 33, 34; 19:1-3) Maski ikusmai Jeosafát halo desizaun neʼebé ladún diʼak, maibé Jeová la taka matan ba buat diʼak neʼebé uluk Jeosafát halo ona. (2 Crôn 17:3-10) Husi ezemplu neʼe ita bele aprende katak, maski ita ema sala-naʼin, maibé se ita hakaʼas an atu buka nafatin Jeová, nia sei hatudu domin neʼebé hela ba nafatin mai ita, tanba nia nunka haluha kona-ba buat diʼak neʼebé uluk ita halo. w15 15/8 1:8, 9

Oinsá mak ita bele prepara agora atu moris iha Maromak nia mundu foun? Hanoin toʼok se ita hakarak atu muda bá hela iha rai seluk, ita presiza halo saida deʼit? Karik ita komesa ona atu aprende sira-nia lian, kultura, no koko atu han sira-nia hahán hodi ita sai toman ho hahán sira-neʼe. Karik iha moris loroloron, ita mós halo tuir moris hanesan ema iha rai neʼe nian. Hanesan neʼe mós, ohin loron ita tenke hakaʼas an atu moris tuir dalan neʼebé ita atu moris iha mundu foun. Ohin loron Satanás nia mundu book ema atu moris tuir sira rasik nia hakarak deʼit. Ema barak hili atu moris livre husi Maromak nia Ukun, maibé rezultadu aat saida mak sira hetan? Terus, susar, no la iha solok. (Jer 10:23) Tan neʼe mak ita hakarak tebes atu haree loron ida, ema iha mundu tomak halo tuir deʼit Jeová, Ukun-Naʼin neʼebé hadomi tebes ita. w15 15/8 3:4, 5

Ema kristaun sira neʼebé hakarak kaben presiza kuidadu tebes kona-ba ema neʼebé sira ransu. Bíblia hatete atu kaben deʼit “iha Naʼi”. Neʼe dehan katak ema neʼebé dedika ona ninia moris ba Jeová, hetan ona batizmu, no moris tuir Jeová nia matadalan sira. (1 Kor 7:39) Kaben ho ema hanesan neʼe sei ajuda ita atu laran-metin nafatin ba Jeová. Jeová hatene buat neʼebé diʼak ba ita. Ninia mandamentu kona-ba kaben neʼe, laʼós buat foun ida. Haree toʼok ninia liafuan ba ema Izraél kona-ba ema neʼebé la serbí nia. Liuhusi Moisés, nia hatete: “Ó labele halo aliansa kaben nian ho sira. . . . Tanba nia sei halo ó-nia oan-mane atu la tuir haʼu, no sira sei serbí maromak seluk.”—Deut 7:3, 4. w15 15/8 4:12, 13

Oinsá mak ita bele treinu ita-nia konxiénsia? Liuhusi estuda beibeik Bíblia, medita ka hanoin didiʼak buat neʼebé ita estuda, no husu Jeová ajuda ita atu aplika husi buat neʼebé ita foin aprende. Bainhira ita estuda, ita lakohi buka-hatene matenek deʼit ka aprende kona-ba ukun-fuan deʼit. Ita-nia estuda tenkesér ajuda ita atu koñese liután Jeová, nia mak Maromak hanesan saida, nia iha hahalok saida deʼit, no saida mak nia gosta ka la gosta. Hodi nuneʼe, ita bele afina ita-nia konxiénsia hodi iha hanoin neʼebé hanesan ho Maromak nian no halo tuir ninia dalan sira. Maibé, se ita la komprende tansá mak irmaun ka irmán ida nia konxiénsia husik nia atu foti desizaun ruma, ita nunka bele iha hanoin aat kona-ba ninia desizaun ka obriga nia atu troka ninia desizaun neʼe. Nia foti desizaun neʼe tanba karik ninia konxiénsia sei fraku no presiza treinu tan, ka tanba ninia konxiénsia mak makaʼas liu.—1 Kor 8:11, 12. w15 15/9 2:4, 8, 10

Mundu mak planeta neʼebé úniku tebes, tanba husi planeta hotu neʼebé Jeová kria, só mundu deʼit mak Jeová kria iha dalan neʼebé furak neʼebé ema bele hela! (Isa 45:18) Se ita mak tuur hodi hanoin didiʼak ba buat hotu neʼebé Jeová kria fó ba ita, ita bele sente duni Jeová nia domin.(Jó 38:4, 7; Sal 8:3-5) Maski Jeová kria ona mundu neʼebé furak ba ita, maibé nia hatene katak atu ita bele moris diʼak no kontente, kria deʼit presiza isin nian ba ita seidauk toʼo. Nia mós kria ita ema tuir ninia ilas atu ita bele sente ninia domin no hadomi fali nia. Neʼe hanesan ho oan sira, sira sente kontente se sira hatene katak sira-nia inan-aman hadomi sira. (Gên 1:27) Tan neʼe mak Jesus hatete: “Kontente ba sira neʼebé hatene katak sira presiza Maromak nia matadalan.” (Mt 5:3) Nuʼudar Aman neʼebé iha domin, Jeová “fó ho laran-luak buat hotu neʼebé halo ita kontente”, presiza isin nian no mós presiza espirituál nian.—1 Tim 6:17; Sal 145:16. w15 15/9 4:6, 7

Ema neʼebé hakerek salmu hatete: “Hein ba Maromak, tanba haʼu sei hahiʼi tan nia nuʼudar haʼu-nia salvadór neʼebé boot. Haʼu-nia Maromak, haʼu iha susar laran. Tan neʼe mak haʼu hanoin-hetan Ita.” (Sal 42:5, 6) Neʼe mak sentimentu no domin neʼebé kleʼan tebes ba Jeová! Ita mós iha domin no fiar hanesan neʼe ba Jeová ka lae? Karik ita rasik sente katak ita iha duni domin no fiar ba Jeová, maibé Bíblia dehan katak ita sei bele tau fiar liután ba Jeová. Eskritura hatete: “Tau fiar ba Jeová ho ó-nia laran tomak no labele sadere ba ó-nia matenek rasik. Iha ó-nia dalan hotu tau atensaun ba nia, no nia rasik sei halo ó-nia dalan sai loos.” (Prov 3:5, 6) Hodi hatudu uluk ninia domin mai ita, Jeová hanorin ita oinsá atu hatudu fali ita-nia domin ba nia. (1 João 4:19) Mai ita hotu hanoin nafatin kona-ba Jeová nia ezemplu diʼak neʼe. Mai ita hatudu ita-nia domin liután ba nia ‘ho ita-nia laran tomak, ho ita-nia moris tomak, ho ita-nia neon tomak, no ho ita-nia kbiit tomak.’—Mc 12:30. w15 15/9 5:17-19

Bainhira ita bá haklaken, ita ajuda ema atu iha fiar, maibé ita mós haburas ita rasik nia fiar. Tanba iha haklaken ita aprende oinsá atu tau fiar tomak ba Jeová hodi koʼalia ho aten-brani. Neʼe mak buat neʼebé ema iha apóstolu sira-nia tempu halo. (Após 4:17-20; 13:46) Bainhira ita haree oinsá mak Jeová ajuda ita iha moris no hatán ita-nia orasaun, ita-nia fiar mós sai boot liután. Neʼe mak buat neʼebé akontese ba Josué no Caleb. Sira hatudu fiar ba Jeová bainhira sira bá hafuhu rai neʼebé Maromak promete. Ikusmai iha sira-nia moris, sira mós haree oinsá Jeová ajuda sira, neʼe halo sira-nia fiar sai boot liután. Tan neʼe mak Josué koʼalia ba ema Izraél sira katak: “Husi liafuan diʼak hotu neʼebé Jeová imi-nia Maromak promete ba imi, la iha ida mak la sai loos.” No nia hatutan tan: “Taʼuk ba Jeová no serbí nia ho laran-metin no lia-loos.” (Jos 23:14; 24:14) Bainhira ita haree oinsá Jeová ajuda ita iha moris, ita-nia fiar mós sei sai boot liután.—Sal 34:8. w15 15/10 2:10, 11

Bainhira rona diskursu públiku iha reuniaun no tuir reuniaun boot sira, ita hakerek nota ka lae? Haree fali ba nota sira-neʼe bele fó oportunidade ba ita atu medita kona-ba saida mak ita aprende ona husi Maromak nia Liafuan no husi ninia organizasaun. No ita mós bele lee Livru Haklaken no Matan-moris bá! neʼebé foun ka diʼak mós atu lee no hanoin didiʼak ba livru sira neʼebé ita simu husi reuniaun boot ba loron tolu nian. Bainhira lee livru tinan nian, karik diʼak atu hanoin fali ba esperiénsia neʼebé ita foin lee, atu medita no halo ita-nia laran hafolin liután esperiénsia sira-neʼe. Bainhira lee, karik diʼak atu riska liafuan importante sira ka hakerek pontu diʼak sira iha parágrafu ninin hodi aban-bainrua ita bele uza ba halo vizita fali, halo vizita katuas nian, ka hatoʼo diskursu. Importante tebes mak, bainhira lee ita-nia livru sira, diʼak atu para uitoan no medita hodi ita bele iha oportunidade atu hafolin buat neʼebé ita lee no halo orasaun atu fó agradese ba Jeová ba buat diʼak sira neʼebé ita aprende daudaun. w15 15/10 4:9, 10

Ba inan-aman kristaun sira, buat neʼebé lori solok boot mak bainhira sira-nia oan hetan batizmu. Irmán Berenice iha oan naʼin-haat, sira hotu hetan batizmu bainhira sira seidauk toʼo tinan 14. Nia dehan: “Iha tempu neʼe ami iha emosaun oioin. Ami kontente tebes katak ami-nia oan sira hakarak serbí Jeová, maibé ami mós hatene katak sira sei hasoru susar barak.” Matenek-naʼin ida neʼebé estuda kona-ba foin-saʼe sira dehan katak tempu joven nian bele fó susar ba inan-aman no joven sira rasik. Maibé nia mós hatete katak inan-aman la presiza hanoin sira-nia oan joven mak hanesan malandru ka sei hanesan labarik. Tuir loloos tempu joven nian bele sai tempu neʼebé diʼak tebes. Tanbasá? Matenek-naʼin neʼe dehan katak tempu joven nian mak tempu neʼebé joven sira hatudu sira-nia kreativu, bele sente emosaun oioin, no iha presiza atu ransu ho belun sira. Neʼe hatudu katak, bainhira Ita-nia oan sei joven, neʼe mak tempu kapás ba sira atu haburas relasaun kleʼan ho Jeová, hanesan Jesus halo bainhira nia sei joven. w15 15/11 2:1, 2

Maromak hatudu ninia domin ba ema liuhusi ninia Ukun. Jeová hili ona Jesus Kristu, ninia Oan-Mane mak sai nuʼudar Liurai ba ninia governu neʼe, tanba Jesus serve duni atu kaer ukun neʼe. (Prov 8:31) No mós, ema naʼin–144.000 neʼebé mai husi rai sei ukun hamutuk ho Jesus iha lalehan. Maski ema sira-neʼe atu moris hiʼas ba lalehan, maibé sira sei hatene nafatin sentimentu moris iha rai nuʼudar ema. (Apok 14:1) Bainhira Jesus haklaken iha rai, tópiku importante neʼebé nia sempre koʼalia ba ema mak kona-ba Maromak nia Ukun, no nia mós hanorin ninia dixípulu atu harohan kona-ba neʼe no sei simu duni bensaun. Bíblia nia profesia hatudu katak Maromak nia Ukun harii tiha ona iha lalehan iha tinan 1914. Hahú husi tempu neʼebá, komesa ona halibur ema restu neʼebé mak atu ukun hamutuk ho Jesus iha lalehan no mós “ema-lubun boot” neʼebé sei moris liu mundu aat neʼe hodi tama ba mundu foun.—Apok 7:9, 13, 14. w15 15/11 3:16, 18

Kriasaun primeiru neʼebé Jeová kria mak ida neʼebé apóstolu João bolu nuʼudar “Liafuan”. (João 1:1; Apok 3:14) Maromak Jeová sempre koʼalia ho ninia Oan-Mane primeiru neʼe, Nia fahe Ninia hanoin no sentimentu ba nia. (João 1:14, 17; Kol 1:15) Anju sira iha lalehan mós koʼalia ba malu, no lian neʼebé sira uza mak apóstolu Paulo bolu nuʼudar “anju nia lian”, lian neʼebé aas liu ema nia língua. (1 Kor 13:1) Jeová koñese didiʼak anju no ema hotu. Tan neʼe mak bainhira ema rihun ba rihun halo orasaun ba nia ho língua oioin no iha tempu neʼebé hanesan, nia bele komprende no rona hotu orasaun sira-neʼe. Laʼós neʼe deʼit, iha tempu neʼebé hanesan mós nia koʼalia no fó matadalan daudauk ba anju sira iha lalehan. Jeová nia hanoin, kbiit língua nian, no kbiit koʼalia nian aas tebes, tan neʼe nia bele halo buat sira neʼebé ema nunka bele halo. (Isa 55:8, 9) Ita bele fiar katak bainhira Jeová atu koʼalia ba ema, nia uza dalan koʼalia neʼebé simples hodi ema bele komprende ninia liafuan sira. w15 15/12 1:1, 2

Iha rai balun, Bíblia karun no la fasil mós atu hetan Bíblia ida. Se ema ida mak simu Bíblia ida, neʼe hanesan bensaun boot tebes ba nia. Relatóriu ida husi rai-Ruanda hatete katak: “Kleur ona ema neʼebé estuda ho ita-nia irmaun sira la bele laʼo ba oin tanba sira laiha Bíblia. Igreja faʼan, maibé karun, sira laiha osan atu sosa. No dala ruma sira mós la komprende versíkulu balu, neʼe mak buat neʼebé hanetik sira atu laʼo ba oin.” Maibé iha mudansa boot iha neʼebá bainhira Tradusaun Mundu Foun sai iha sira-nia língua. Família ida iha oan naʼin-haat, sira dehan: “Ami agradese tebes ba Jeová no ba atan laran-metin no matenek hodi fó Bíblia ba ami. Ami ema kiak no laiha osan atu hola Bíblia ba ema ida-idak iha ami-nia família laran. Maibé agora ami ida-idak iha ona ami-nia Bíblia rasik. Ami-nia família lee Bíblia neʼe hamutuk loroloron hodi hatudu katak ami agradese duni ba Jeová.” w15 15/12 2:15, 16

Karik David hakerek liafuan sira-neʼe kona-ba tempu neʼebé ninia oan Absalão koko atu hadau ninia ukun. David moras todan no la bele halo buat ida atu hapara Absalão. Nia mós la haluha ninia sala rasik neʼebé nia halo ho Batseba no rezultadu husi sala neʼe. (2 Sam 12:7-14) Maski nuneʼe, David hatene katak Jeová fó ona perdua ba ninia sala neʼe no nia sadere ba Jeová durante tempu nia moras. David la hein Jeová atu halo milagre ida ba nia. Tuir loloos, nia hakarak Jeová atu ajuda nia hanesan Jeová mós sei ajuda “ema neʼebé hatudu laran-diʼak ba ema kiʼik”. David nia relasaun ho Jeová metin, tan neʼe nia bele husu Jeová atu fó kmaan ba nia no apoia nia durante nia moras. (Sal 41:3) Nia mós husu Jeová atu ajuda nia hodi nia isin bele sai diʼak rasik fali. Ita mós bele husu Jeová hanesan neʼe.—Sal 103:3. w15 15/12 4:8, 9

Ema kose-mina la presiza ema seluk mak fó-hatene sira katak sira hetan ona kose-mina. Jeová mak ida neʼebé book sira-nia neon no laran hodi hatene katak sira mak ema kose-mina duni. Hodi nuneʼe mak apóstolu João hatete ba ema kose-mina sira: “Maromak neʼebé santu hili ona imi no imi hotu hatene lia-loos. No kona-ba imi, tanba Maromak hili ona imi liuhusi espíritu santu no espíritu neʼe nafatin hela iha imi, entaun imi la presiza tan atu ema ida hanorin imi; maibé Maromak uza espíritu neʼe atu hanorin imi kona-ba buat hotu, no neʼe loos no la bosok. Entaun kontinua sai ida deʼit ho nia hanesan espíritu hanorin ona imi atu halo.” (1 João 2:20, 27) Ema kose-mina sira hanesan ho ita hotu, sira mós presiza simu hanorin husi Jeová. Maibé kona-ba hetan kose-mina, sira la presiza ema seluk mak fó-hatene sira katak sira hetan ona kose-mina, tanba buat neʼebé halo sira fiar ho laran tomak katak sira hetan ona kose-mina mak Jeová nia forsa neʼebé makaʼas liu hotu, ninia espíritu santu! w16.01 3:9, 10

Laran kontente neʼebé loos mai husi ita-nia fiar ba Jeová katak nia sei tau matan ba ita-nia presiza sira. Neʼe halo ita la hanoin demais liu kona-ba sasán. (1 Tim 6:6-8) Kontente neʼebé mai husi laran bele ajuda ita atu hanoin nafatin katak ita-nia relasaun diʼak ho Jeová no ho irmaun-irmán sira mak importante liu fali osan ka sasán. Ema neʼebé kontente, nia nunka muramura, ibun-ibun, ka buka ema seluk nia sala, no nia la laran-moras ba ema ka la hatudu hahalok kaan ka karak ba ema seluk. Ema hanesan neʼe sempre hatudu laran-luak ba ema seluk tanba nia iha domin ba malu nuʼudar maun-alin. (1 Tim 6:17-19) Fiar ba Jeová bele ajuda ita atu tahan hasoru susar naran deʼit ho aten-brani liután. (Ebr 13:6) Aten-brani mak halo ita sempre iha hanoin neʼebé pozitivu no book ita atu fó anima no konsola ita-nia irmaun-irmán sira. (1 Tes 5:14, 15) No tanba ita-nia aten-brani neʼe mak bainhira terus boot mai iha futuru, ita mós sei la taʼuk atu “hamriik loos” no foti ita-nia ulun nafatin tanba ita hatene katak ita-nia salvasaun besik ona.—Lc 21:25-28. w16.01 1:16, 17

Uluk ita haree ema neʼebé han paun no hemu tua iha Memoriál menus ba beibeik, maibé iha tinan hirak-neʼe, ema sira-neʼe aumenta barak fali. Ita presiza preokupa ho ida-neʼe ka lae? Lalika. Mai ita koʼalia kona-ba buat balu atu fó-hanoin ita. Irmaun sira neʼebé sura ema iha Memoriál mós la hatene ho loloos sé mak ema kose-mina ida. Tanba dala ruma ema neʼebé hanoin sala mós bele han paun no hemu tua iha Memoriál. Ema sira-neʼe ikusmai foin hatene katak sira la hetan kose-mina no para husi han paun no hemu tua iha Memoriál. Balu tan, tanba sira iha moras mentál ka problema ho emosaun mak halo sira fiar katak sira mós sei ukun hamutuk ho Kristu iha lalehan. Tan neʼe, ita la bele hatene ho loloos ema kose-mina naʼin-hira mak sei moris hela iha rai. No mós Bíblia la hatete katak iha tempu terus boot hahú, hela deʼit ema naʼin-hira. w16.01 4:12-14