Setembru

Antes Abraão no Isaac saʼe ba foho, Abraão hatete ba ninia atan sira: “Imi hein lai iha neʼe ho kuda-burru, maibé haʼu no haʼu-nia oan-mane neʼe sei bá neʼebá hodi halo adorasaun depois fila fali mai imi.” (Gên 22:5) Tanbasá mak Abraão koʼalia hanesan neʼe? Nia bosok ka lae bainhira nia hatete ba ninia atan sira katak nia ho Isaac sei fila fali mai, maibé tuir loloos nia hatene ona katak nia sei hasaʼe Isaac nuʼudar sakrifísiu? Lae, nia la koʼalia bosok, tanba eskritura esplika tanbasá mak Abraão koʼalia hanesan neʼe. (Ebr 11:19) Abraão hatene katak “Maromak bele halo Isaac moris fali husi mate”. Nia fiar katak Maromak bele halo moris-hiʼas tanba uluk nia ho Sara kiuk, maibé ikusmai Jeová halo sira bele iha oan fali, maski sira idade loos ona. (Ebr 11:11, 12, 18) Nia fiar katak laiha buat ida mak Jeová la bele halo. Tan neʼe mak nia fiar ho laran tomak katak saida deʼit sei akontese iha foho leten, ninia oan-mane neʼe sei moris fali, hodi nuneʼe Jeová nia promesa sira bele sai loos. Iha fatin, Bíblia bolu Abraão nuʼudar “aman ba sira hotu neʼebé iha fiar”!—Rom 4:11. w16.02 1:3, 13

Maski Jeová mak foti Saul hodi sai liurai, maibé ikusmai tanba nia la halo tuir Jeová, Jeová lakohi tan nia atu sai liurai. (1 Sam 15:17-23) Bainhira neʼe akontese, Jeová la hasai kedas Saul husi ninia kadunan. Tan neʼe ninia hahalok ladiʼak sira koko tebes povu nia laran-metin ba Jeová, tanba liurai neʼebé tuur iha “Jeová nia kadunan” mak halo hela hahalok aat sira. (1 Crôn 29:23) Maski nuneʼe, Saul nia oan Jónatas laran-metin nafatin ba Jeová. Ita mós bele halo tuir Jónatas nia ezemplu hodi laran-metin ba Jeová liuhusi hatudu respeitu ba governu sira. Jeová hakarak ita atu halo nuneʼe, maski ita sente ema balu la merese atu hetan respeitu. Porezemplu, karik iha ema ida husi governu halo korrupsaun, maski nuneʼe, ita hakarak hatudu respeitu nafatin ba ninia pozisaun, tanba Jeová hakarak ita “tenke hakruʼuk ba ukun-naʼin sira”. (Rom 13:1, 2) Loos duni, ho Jeová nia lisensa mak ukun-naʼin sira bele ukun ita, tan neʼe ita tenke hatudu respeitu ba sira.—1 Kor 11:3; Ebr 13:17. w16.02 3:5, 6, 8

Bíblia dehan katak Maromak Jeová nia povu hotu, inklui mós joven sira “sei fó sira-nia an ho hakarak rasik” atu serbí nia. Tan neʼe ema neʼebé hakarak hetan batizmu presiza hatene katak neʼe mak ninia hakarak rasik. Tanbasá? Tanba karik Ita moris mai iha lia-loos ona, tan neʼe Ita presiza hatene didiʼak desizaun neʼebé Ita halo mak Ita rasik nian duni. Nuʼudar Ita sai boot daudaun, karik Ita mós haree ona ema barak mak hetan batizmu, karik husi ema sira-neʼe balu mak Ita-nia belun ka maun-alin rasik. Maibé Ita tenke kuidadu atu la hanoin katak Ita hakarak hetan batizmu tan deʼit haree ema seluk hetan batizmu, ka tanba Ita sente katak Ita-nia tinan toʼo ona atu hetan batizmu. Oinsá mak Ita bele hatene katak Ita-nia haree kona-ba batizmu hanesan ho Jeová nia haree? Uza tempu atu hanoin didiʼak tanbasá mak batizmu importante tebes. w16.03 1:11, 12

Ita tenke konvida ema neʼebé “hamrook” atu hemu “bee moris nian” liuhusi hanorin lia-loos ba sira neʼebé hakarak tebes atu aprende. Maibé dalan ida deʼit neʼebé bele ajuda ita atu halo ida-neʼe mak serbisu hamutuk no “apoia malu” iha kongregasaun laran. (Éf 4:16) Atubele haklaken ba ema hotu, ita presiza organiza didiʼak ita-nia serbisu haklaken. Matadalan neʼebé ita hetan husi kongregasaun, hanesan husi grupu haklaken, ajuda ita atu halo knaar neʼe ho diʼak liután. Ita haklaken ba ema liafuan diʼak kona-ba Maromak nia Ukun no mós fahe ona livru rihun ba rihun iha mundu tomak. Dala ruma ita mós hetan knaar atu hola parte iha kampaña espesiál hodi haklaken. Bainhira ita halo serbisu haklaken hanesan neʼe, ita iha unidade ho irmán-irmaun hotu iha mundu tomak neʼebé halo mós nuneʼe. Liután neʼe ita mós serbisu hamutuk ho anju sira neʼebé dirije Maromak nia povu ohin loron atu haklaken liafuan diʼak ba ema.—Apok 14:6. w16.03 3:4, 5

Bíblia mós fó-hatene ita katak iha mundu foun, livru balu sei loke hodi fó matadalan ba ita atu moris iha tempu neʼebá. Ema hotu, inklui mós ema neʼebé atu hetan moris-hiʼas, sei estuda livru sira-neʼe hodi hatene ho loloos kona-ba Jeová nia hakarak sira. Livru sira-neʼe mós sei ajuda ita hatene liután kona-ba Jeová nia hanoin. Iha tempu neʼebá ema hotu sei komprende diʼak liután kona-ba Bíblia no buat sira neʼebé mak hakerek iha livru foun sira, tan neʼe ema hotu neʼebé moris iha Paraízu sei haree malu ho domin, respeitu, no ho dignidade. (Isa 26:9) Imajina toʼok buat foun hira mak ita sei aprende no hanorin fali ba ema seluk iha Liurai, Jesus Kristu nia ukun! Se ita mak halo tuir “buat sira neʼebé hakerek iha livru sira-neʼe nia laran”, no hatudu laran-metin toʼo Jesus nia Ukun ba tinan rihun ida liutiha, Jeová sei hakerek metin ita-nia naran iha “livru moris nian”. Neʼe mak moris neʼebé rohan-laek! w16.03 4:19, 20

Katuas ho esperiénsia sira hatete katak importante tebes atu treinu irmaun sira sedu kedas iha sira-nia moris. Fó knaar tuir sira-nia idade ba sira hodi halo iha kongregasaun. Fó treinu husi sedu kedas bele proteje irmaun joven sira-neʼe husi mundu nia tentasaun no ajuda sira tau fokus ba sira-nia planu espirituál nian. (Sal 71:17) Katuas mós bele book irmaun joven nia laran hodi serbí Jeová ho ninia kongregasaun, la toʼo atu hatete deʼit ba nia hodi halo buat ruma. Katuas tenkesér mós esplika ba nia tansá mak importante atu halo buat neʼe. Jesus, Mestre Boot liu hotu mós halo hanesan neʼe. Nia sempre esplika razaun ba ninia apóstolu sira. Porezemplu, antes haruka ninia apóstolu sira sai bá haklaken, Jesus esplika razaun ba sira tansá mak sira tenkesér halo tuir nia. Nia dehan ba sira: “Kbiit tomak iha lalehan no rai fó tiha ona mai haʼu.” Depois mak nia haruka sira: “Neʼe duni, laʼo bá no hanorin ema husi nasaun hotu atu sai haʼu-nia dixípulu.”—Mt 28:18, 19. w15 15/4 2:5, 6

Moris nuʼudar ema kristaun iha apóstolu sira-nia tempu iha sidade Roma mak perigu tebes. Iha tinan 64 bainhira ahi han sidade Roma, ema Roma duun katak ema kristaun sira mak sunu sidade neʼe. Tan neʼe, ema fó terus oioin ba sira. Durante tempu neʼe mak apóstolu Paulo sai dadur iha Roma ba dala segundu. Iha dadur laran, karik nia hanoin: ‘Haʼu-nia maluk sira sei mai ajuda haʼu ka lae?’ Nia hanoin hanesan neʼe tanba uluk bainhira nia iha susar laran, la iha ema ida mak ajuda nia. (2 Tim 4:16) Maski nuneʼe, iha tempu neʼebá, Paulo la mesak. Nia fiar metin katak Jeová sei fó forsa ba nia atubele tahan susar neʼebé nia hasoru daudauk no mós susar naran deʼit neʼebé sei kona nia iha futuru. Nia hakerek: “Naʼi sei salva haʼu husi buat aat hotu.” (2 Tim 4:18) Loos duni, liuhusi ninia esperiénsia rasik, Paulo hatene ona katak maski la iha ema ida mak bele ajuda nia, maibé sei iha Jeová ho Jesus neʼebé sempre ajuda nia. w15 15/4 4:1-3

Bainhira Jesus foin moris mai, Satanás hatene katak bebé neʼe mak aban-bainrua boot mai atu sai Mesias. Satanás iha hanoin ka lae katak atu oho bebé ida mak hahalok aat tebes? Lae, tanba nia lakohi hatene saida mak diʼak ka aat. Ninia hakarak mak atu oho lalais kedas labarik neʼe. Sei hanoin-hetan Liurai Herodes bainhira nia rona husi ema siʼikdór sira katak “liurai judeu” nian moris ona, nia raan nakali tebes toʼo nia hakarak oho tiha bebé neʼe. (Mt 2:1-3, 13) Tuirmai nia hasai orden ida hodi oho hotu labarik-mane sira husi tinan rua ba kraik iha distritu hotu iha Belein laran. (Mt 2:13-18) Ikusmai, ema la konsege oho Jesus, maibé ita bele aprende saida kona-ba Satanás husi neʼe? Ita aprende katak Diabu la hafolin ema nia vida. Labarik nia moris mós nia la hanoin. Satanás mak “leaun” neʼebé siʼak no laran-aat tebes, keta hanoin katak nia mak anju laran-diʼak ida!—1 Ped 5:8. w15 15/5 1:10, 12, 13

Jeová kria ita ho kbiit atu bele imajina kona-ba buat neʼebé ita seidauk haree. Ho kbiit neʼe ita bele halo planu ba futuru no oinsá bele halo desizaun neʼebé matenek. Jeová iha kbiit atu bele hatene kona-ba futuru, no nia sempre uza Eskritura sira atu fó-hatene ita kona-ba saida mak atu akontese iha futuru. Bainhira ita imajina buat neʼebé Jeová promete, neʼe ajuda ita atu tau fiar katak buat sira neʼebé Jeová hatete sei akontese duni. (2 Kor 4:18) Se ita haree fali ba Ana, Samuel nia inan husi Bíblia, nia mós hanoin ka imajina katak loron ida nia sei lori Samuel bá serbisu ho amlulik sira iha Jeová nia templu. Ba nia, ida-neʼe laʼós mehi deʼit, tanba nia sei halo duni hanesan neʼe. Hodi imajina kona-ba ninia promete neʼe ajuda nia tau fokus atu kumpre ninia objetivu. (1 Sam 1:22) Hanesan neʼe mós se ita imajina kona-ba buat neʼebé Jeová promete mai ita, ita bele dehan katak ita imajina kona-ba buat neʼebé mak sei akontese duni iha futuru. (2 Ped 1:19-21) Iha tempu uluk, Jeová nia atan balu mós hanoin ka imajina beibeik kona-ba ninia promesa sira. w15 15/5 3:1-3

Perigu ida mak kona-ba hanoin beibeik atu sai riku duké halo buat neʼebé Jeová gosta. Jesus hatete katak se ema ida mak halibur rikusoin barak ba ninia an maibé la tau Jeová uluk iha ninia moris, ema neʼe beik, tanba nia “la sai riku ba Maromak”. (Lc 12:16-21) Bainhira ita halibur “rikusoin iha lalehan” no halo buat neʼebé Jeová gosta, ita halo kontente nia no ita mós kontente. (Mt 6:20; Prov 27:11) Ita-nia relasaun diʼak ho Jeová mak folin boot liu sasán hotu. Imajina beibeik atu sai riku iha mundu neʼe bele halo ita hanoin resin. (Mt 6:19) Jesus hatete katak susar tebes ba ema ida atu buka uluk Maromak nia Ukun se nia mak sempre hanoin kona-ba osan.—Mt 13:18, 19, 22. w15 15/5 4:15, 16

Ho Jeová nia kbiit, Jesus bele halo milagre furak oioin. Jesus laʼós kura moras-lepra deʼit, nia mós kura ona moras oioin. Bainhira Jesus kura ema ida, nia la presiza opera atu halo ema neʼe diʼak fali. Nia iha kbiit atu halo ema nia moras diʼak kedas. Dala ruma husi dook deʼit nia bele kura ema ona. (João 4:46-54) Jesus nia kbiit neʼe hatudu saida mai ita? Neʼe hatudu katak ita-nia Liurai Jesus hakarak no iha kbiit atu kura ema hodi sai diʼak ba nafatin. Bainhira ita hatene kona-ba dalan neʼebé Jesus trata ema ho diʼak, neʼe halo ita tau fiar ba Bíblia nia profesia neʼebé hatete katak iha mundu foun, “nia sei sente kasian ba ema kiʼik no ema kiak”. (Sal 72:13) Iha tempu neʼebá Jesus sei kura ema hotu tanba ninia laran mak book nia atu halo nuneʼe. w15 15/6 2:6

Ema barak bele taka matan hodi dekór orasaun Ami Aman. Bainhira bá haklaken, dala barak ita uza orasaun neʼe atu ajuda ema komprende katak Maromak nia Reinu mak governu ida neʼebé atu halo mudansa furak iha futuru ba rai. Ita mós uza liafuan “ami hakarak atu Ita-nia naran sai santu” hodi hatudu ba ema katak Maromak iha ninia naran rasik neʼebé nia hakarak ita atu uza iha dalan neʼebé santu. (Mt 6:9) Jesus hakarak ita repete liafuan ida-idak husi orasaun Ami Aman hanesan ema halo baibain ka lae? Lae, tanba Jesus hatete: “Kuandu halo orasaun, keta dehan beibeik liafuan neʼebé hanesan.” (Mt 6:7) Hanesan neʼe mak iha tempu seluk bainhira Jesus hanorin ninia dixípulu oinsá atu halo orasaun, nia la repete fali liafuan ida-idak husi orasaun Ami Aman nian. (Lc 11:1-4) Tuir loloos Jesus atu ajuda ita hodi haree katak bainhira halo orasaun, saida mak importante atu ita koʼalia uluk. w15 15/6 4:1, 2

Jeová fó ninia espíritu santu ajuda ita hodi ita bele iha kbiit atu la monu ba Satanás nia tentasaun sira. Jeová fó avizu ita kona-ba perigu sira liuhusi ninia Liafuan no kongregasaun. Porezemplu, nia fó avizu ita atu la bele uza demais tempu, osan, no forsa ba buka sasán neʼebé ita la presiza. Espen no Janne neʼebé uluk serbí nuʼudar pioneiru regulár iha oan naʼin-rua neʼebé sira presiza tau matan. Espen hatete: “Ami halo orasaun beibeik ba Jeová atu ami la bele monu ba tentasaun tanba agora ami ladún iha ona tempu barak hanesan uluk hodi halo Maromak nia serbisu. Ami husu beibeik ba Jeová atu ajuda ami laran-manas nafatin ba lia-loos no haklaken.” Tentasaun ida seluk neʼebé tenta makaʼas ema ohin loron mak haree pornografia. Ema balu monu ba tentasaun neʼe tanba sira rasik mak husik sira-nia neon hanoin kona-ba buat aat neʼe. Maibé ita bele manán hasoru tentasaun neʼe hanesan irmaun-irmán barak hatudu ona.—1 Kor 10:13. w15 15/6 5:15, 16

Saida mak sei akontese bainhira relijiaun falsu lakon ona? Neʼe mak tempu neʼebé atu koko ita-nia laran. Iha tempu neʼebá, ema barak sei bá buka protesaun husi ema nia organizasaun neʼebé Bíblia kompara hanesan foho nia fatuk boot sira. Maibé Jeová nia povu sei buka protesaun husi nia. Buat ida tan mak, hanesan iha tempu apóstolu sira-nian, bainhira situasaun sai kalma, neʼe laʼós tempu atu fó oportunidade ba ema judeu seluk hodi tama nadodon ba atu sai ema kristaun. Maibé neʼe mak tempu ba ema kristaun sira atu foti desizaun no halo tuir Jesus nia orden atu sai husi Jeruzalein. Hanesan neʼe mós iha futuru, bainhira Babilónia Boot lakon, ita fiar katak neʼe laʼós tempu atu fó oportunidade ba ema seluk atu sai ema kristaun neʼebé loos. Maibé neʼe mak tempu neʼebé fó oportunidade ba ema kristaun neʼebé loos atu prova katak sira hadomi duni Jeová no atu apoia ema kose-mina sira.—Mt 25:34-40. w15 15/7 2:7

Ita hatene katak nuʼudar Jeová nia atan, ita mak povu ida deʼit, tan neʼe ita lakohi sente katak rai ida ka nasaun ida mak diʼak liu fali ida seluk. Maibé karik tanba ita moris no boot mai ita-nia família ka ema seluk book ita haburas ona sentimentu nasionalizmu nian. Tan neʼe, dala ruma ita bele iha hanoin negativu kona-ba ema husi nasaun seluk, sira-nia kultura, lian, ka sira-nia rasa. Se hanesan neʼe, saida mak bele ajuda ita atu troka? Hanoin didiʼak kona-ba oinsá mak Jeová haree nasionalizmu ka ema neʼebé gosta diskrimina ema seluk. Halo riset kona-ba tópiku neʼe. Tuirmai halo orasaun husu Jeová atu ajuda ita hodi la bele iha sentimentu sira-neʼe. (Rom 12:2) Ita presiza halo hanesan neʼe tanba ita hotu hakarak serbí Jeová ho konxiénsia neʼebé moos. Tan neʼe situasaun ida bele mosu neʼebé sei hatudu sai katak ita mak la hanesan ho ita-nia maluk serbisu-naʼin seluk, kolega eskola sira, viziñu, ka família seluk. w15 15/7 3:14, 15

Jeová rona bainhira ita husu buat ruma ba nia no nia komprende ita, maski susar ba ema atu komprende ita-nia sentimentu neʼe. Dalan neʼebé nia hatán ba ita-nia orasaun hatudu duni katak ninia domin mai ita sei nunka mohu. Ita bele aprende buat barak husi orasaun sira neʼebé hakerek iha Bíblia laran. Dala ruma, diʼak atu estuda ka koʼalia kona-ba orasaun sira-neʼe iha tempu halaʼo adorasaun família nian. Husi orasaun sira-neʼe, ita bele aprende oinsá mak Maromak nia atan sira fakar sai sira-nia sentimentu ba Jeová, no ida-neʼe bele ajuda ita atu hatene oinsá ita bele hadiʼa ita rasik nia orasaun. Porezemplu, ita bele estuda kona-ba Jonas nia orasaun neʼebé nia halo bainhira nia iha hela ikan nia kabun. (Jonas 1:17–2:10) Salomão nia orasaun neʼebé nia halo ho sentimentu bainhira inaugura Jeová nia templu. (1 Reis 8:22-53) Hanoin kleʼan kona-ba orasaun neʼebé Jesus hanorin ema atu halo mós bele duni ajuda ita. (Mt 6:9-13) Ita rasik mós presiza hatoʼo beibeik ita-nia laran-susar ba Maromak liuhusi orasaun no harohan, hodi nuneʼe mak ‘Maromak nia dame neʼebé aas liu ema nia hanoin hotu sei proteje ita-nia laran no ita-nia kbiit atu hanoin’.—Flp 4:6, 7. w15 15/8 1:11, 12

Iha mundu foun ita hakarak atu halo tuir Jeová nia arranju sira hodi halo furak mundu tomak, no hanorin ema neʼebé hetan moris-hiʼas. Maibé, oinsá se ita simu knaar ida neʼebé ita la gosta atu halo iha tempu neʼebá? Ita sei hakaʼas an atu hakarak halo tuir ka lae? Ita hotu sei hatán, hakarak! Se nuneʼe, oinsá ho ohin loron, ita hakarak halo tuir Jeová nia organizasaun ka lae? Se ita halo tuir, neʼe hatudu katak ita prepara an hela ba moris rohan-laek atu husik Jeová ukun ita iha futuru. Atu prepara an ba moris iha mundu foun, importante atu halo tuir arranju husi Jeová nia organizasaun ohin loron, maibé halo tuir deʼit seidauk toʼo, ita mós tenke prontu atu simu ho laran no rona malu. Se ita ohin loron mak rona ba ema sira neʼebé dirije ita no simu ho laran knaar neʼebé mak sira fó ba ita, iha mundu foun ita mós sei hatudu toman diʼak sira-neʼe. w15 15/8 3:6, 7

Tanba Salomão sempre hamutuk ho ema neʼebé la adora Jeová, neʼe halo nia mós fila kotuk ba Jeová hodi adora fali maromak sira seluk. (1 Reis 11:1-6) Se neʼe akontese ba Salomão, neʼe mós bele akontese ba ita hotu. Tan neʼe, keta hanoin atu kaben ho ema neʼebé la hadomi Jeová. Maibé oinsá se kaben-naʼin ida tama lia-loos maibé ninia feen ka laʼen seidauk? Bíblia hatete: “Imi feen sira, hakruʼuk an ba imi-nia laʼen, atu nuneʼe, se sira la halo tuir Maromak nia liafuan, imi bele lori sira ba fiar laʼós liuhusi imi-nia liafuan maibé liuhusi imi-nia hahalok.” (1 Ped 3:1) Liafuan sira-neʼe mós aplika ba laʼen sira neʼebé ninia feen la adora Jeová. Bíblia nia konsellu mak klaru no simples: Sai laʼen ka feen neʼebé diʼak no halo tuir Maromak nia matadalan kona-ba moris kaben nian. Ema barak simu lia-loos tanba haree sira-nia feen ka laʼen halo mudansa diʼak barak iha sira-nia hahalok. w15 15/8 4:15, 16

Iha moras balu mak toʼo agora laiha ai-moruk bele kura. Tan neʼe mak ita tenkesér kuidadu tebes atu la buka tratamentu neʼebé ita rona deʼit katak neʼe bele kura moras, maibé seidauk iha prova. Apóstolu Paulo hatete: “Halo ema hotu haree imi-nia haraik-an.” (Flp 4:5) Se ita haraik-an, ita sei la uza hotu ita-nia tempu atu tau matan ba saúde deʼit hodi haluha tiha ita-nia adorasaun ba Jeová. Se ita hanoin demais liu kona-ba saúde, ita bele sai ema neʼebé mak hanoin an deʼit. (Flp 2:4) Ita tenke haraik-an no rekoñese katak ita la bele iha saúde neʼebé perfeitu iha mundu neʼe. Tan neʼe mak ita lakohi uza hotu ita-nia tempu ba saúde, maibé diʼak atu tau uluk Jeová iha ita-nia moris. (Flp 1:10) Kona-ba tau matan ba saúde, ita mak tenke halo desizaun rasik no lori todan husi desizaun neʼebé ita rasik halo. w15 15/9 2:8, 10

Jeová mak “Maromak lia-loos nian”. (Sal 31:5) Nia hadomi tebes ninia oan hotu no nia sempre kontente atu uza lia-loos hodi hanorin sira oinsá atu halaʼo moris, liuliu dalan atu adora nia. Entaun, Jeová hanorin lia-loos saida ba ita, no oinsá mak ida-neʼe hatudu katak nia hadomi tebes ita? Primeiru Jeová hanorin lia-loos kona-ba ninia an rasik. Nia fó-hatene ita kona-ba ninia naran rasik, naran neʼebé mosu iha Bíblia barak liu fali naran sira seluk. Liuhusi dalan neʼe mak Jeová fó koñese ninia an no hakbesik ita. (Tgo 4:8) Jeová mós hanorin ita kona-ba ninia hahalok sira hodi ita bele hatene nia mak Maromak hanesan saida. Porezemplu, liuhusi buat hotu neʼebé nia kria, ita bele haree katak nia mak Maromak neʼebé forsa no matenek tebes. No liuhusi Bíblia, nia hanorin ita katak nia mak Maromak neʼebé hadomi justisa no iha domin. (Rom 1:20) Bainhira ita lee Bíblia kona-ba ninia hahalok diʼak sira, neʼe halo fasil ba ita atu hakbesik nia no iha relasaun neʼebé diʼak ho nia. w15 15/9 4:8, 9

Ema barak sente katak buat neʼebé ita halo la iha ligasaun ho Maromak. Sira sente katak Maromak la iha interese ba buat neʼebé akontese iha ema nia moris. Porezemplu, bainhira anin-fuik Haiyan estraga rai ida iha rai-Filipinas iha Novembru 2013, xefe husi sidade boot ida dehan: “Karik Maromak haluha ona ita.” Ema balu fali hanoin katak Maromak la bele haree buat neʼebé sira halo daudaun. (Isa 26:10, 11; 3 João 11) Kona-ba ema sira-neʼe mak apóstolu Paulo hatete: “Sira lakohi atu hatene Maromak ho didiʼak, . . . sira nakonu ho buat hotu neʼebé la loos, buat aat, kaan-teen, hahalok aat.” (Rom 1:28, 29) Oinsá ho ita? Ita-nia hanoin la hanesan ho ema sira-neʼe. Tanba ita hatene katak Maromak hatene buat hotu neʼebé ita halo daudaun. Maibé ita mós fiar katak Jeová iha interese ba buat neʼebé ita halo daudaun. w15 15/10 1:1-3

Haklaken mak dalan neʼebé diʼak tebes atu hatudu sai ita-nia fiar. Tanbasá? Tanba bainhira ita bá haklaken, ita hatudu katak ita fiar mundu nia rohan besik ona no “nia sei la tarde!” (Hab 2:3) Atu hatene ita iha fiar neʼebé metin ka lae, diʼak atu husu ba ita-nia an, ‘Ba haʼu, haklaken mak importante ka lae? Haʼu hakaʼas an ka lae atu buka dalan hodi ajuda ema seluk hatene kona-ba Maromak? Haʼu buka oportunidade atu aumenta liután haʼu-nia serbisu haklaken ka lae?’ (2 Kor 13:5) Loos duni, liuhusi haklaken mak dalan neʼebé importante tebes atu hatudu katak ita-nia fiar mai husi laran. (Rom 10:10) Ita mós bele hatudu katak ita iha fiar liuhusi tahan hasoru problema loroloron nian. Bainhira ita hasoru susar hanesan moras, laran-tun, depresaun, kiak, ka problema boot seluk, ita fiar katak Jeová no Jesus sei fó “ajuda iha tempu neʼebé loos”. (Ebr 4:16) Bainhira ita halo orasaun no husu Jeová atu ajuda ita, neʼe hatudu katak ita iha fiar. w15 15/10 2:12-14

Dala ruma ema bandu ita atu la bele lee tan Bíblia. Maski nuneʼe, ita bele medita kona-ba buat neʼebé ita sei hanoin-hetan iha ita-nia kakutak, buat hanesan eskritura favoritu ruma ka liafuan husi ita-nia livru knananuk nian. (Após 16:25) Iha tempu hanesan neʼe, Maromak nia espíritu santu sei ajuda ita hanoin-hetan fali buat diʼak sira neʼebé uluk ita aprende. Entaun, agora daudauk hili tempu hodi lee no medita kona-ba eskritura sira tuir programa lee Bíblia semana-semana nian. Tenke mós hili tempu atu medita didiʼak kona-ba saida mak Jesus halo no hanorin iha evanjellu haat. (Rom 10:17; Ebr 12:2; 1 Ped 2:21) Jeová nia organizasaun halo ona livru ida neʼebé konta kona-ba Jesus nia moris tuir tempu ida-idak. Livru neʼe kapás tebes atu lee no uza ba medita, liuliu bainhira ita kompara evanjellu haat hamutuk kona-ba buat neʼebé Jesus halo.—João 14:6. w15 15/10 4:11, 12

Jesus laʼós deʼit apóstolu sira-nia Naʼi, maibé nia mós sai sira-nia belun. Iha Bíblia nia tempu, baibain ema la fahe sira-nia sentimentu ho ninia atan sira. Maibé Jesus la haree ninia apóstolu sira hanesan atan. Nia hadomi sira no gasta tempu ho sira. Nia kontente atu fó-hatene saida mak nia hanoin no sente iha laran, no nia mós rona didiʼak bainhira sira fó sai sira-nia sentimentu. (Mc 6:30-32) Neʼe halo sira sai belun neʼebé diʼak no prepara apóstolu sira ba serbisu neʼebé sira sei halo iha futuru. Jesus hatene katak, se ninia dixípulu sira laran-manas atu serbí Jeová no badinas haklaken, sira sei hetan kontente neʼebé loos. Tan neʼe nia hakarak sira atu hakaʼas an iha serbisu haklaken. Nia mós promete katak nia sei ajuda sira.—Mt 28:19, 20. w15 15/11 2:3, 5

Domin mak Maromak Jeová nia hahalok neʼebé furak liu hotu. (1 João 4:16) Ninia kriasaun primeiru mak Jesus, no Jesus hela hamutuk ho nia iha lalehan ba tinan barak tebes. Tan neʼe Jesus mós aprende dalan neʼebé Jeová hatudu domin. (Kol 1:15) Dalan neʼebé Jesus halaʼo ninia moris iha lalehan no rai, nia hatudu duni katak nia komprende domin neʼebé Jeová iha mak hanesan saida no nia mós banati-tuir Jeová nia domin neʼe. Hodi nuneʼe mak ita bele fiar ho laran tomak katak dalan neʼebé Jeová no Jesus Kristu halaʼo sira-nia ukun sempre liuhusi domin. Bainhira ema husu Jesus mandamentu ida-neʼebé mak boot liu hotu husi Moisés nia Ukun-Fuan, Jesus dehan: “‘Ó tenke hadomi Jeová ó-nia Maromak ho ó-nia laran tomak, ho ó-nia moris tomak, no ho ó-nia neon tomak.’ Neʼe mak mandamentu neʼebé boot liu no uluk liu. Ida tuirmai neʼebé hanesan nia mak: ‘Ó tenke hadomi ó-nia maluk hanesan ó-nia an rasik.’” (Mt 22:37-39) Ita nota ka lae Jesus hatete katak hadomi Jeová mak uluk liu hotu no tuirmai ita tenkesér hadomi ita-nia maluk. w15 15/11 4:1-3

Jeová mós sempre uza língua neʼebé tuir tempu ida-idak hodi koʼalia ba ema, laʼós ho lia-ebraiku deʼit. Porezemplu, bainhira ema Izraél livre ona husi Babilónia, língua neʼebé ema barak uza loroloron mak lia-aramaiku. Karik tanba razaun neʼe mak Jeová leno profeta Daniel, Jeremias, no amlulik Esdras hodi uza lia-aramaiku atu hakerek parte balu husi eskritura sira. Iha tempu neʼebé Alexandre Boot mak domina hela mundu tomak, lia-gregu koine mak língua internasionál nian. Ema judeu barak mós aprende koʼalia língua neʼe, no ikusmai ema judeu naʼin-72 tradús fali Eskritura Lia-Ebraiku ba lia-gregu nian. Tradusaun neʼe mak bolu naran Septuajinta. Neʼe tradusaun Bíblia primeiru no tradusaun neʼe importante tebes. Tanba ema barak mak tradús, neʼe mós hamosu jeitu tradusaun oioin kona-ba tradusaun neʼe. Ema balu gosta tradús liafuan ida-idak, balu lakohi halo hanesan neʼe. Maski nuneʼe, ema judeu neʼebé koʼalia lia-gregu no ema kristaun sira fiar nafatin katak tradusaun Septuajinta mak Maromak nia Liafuan nafatin. w15 15/12 1:4-6

Ita bele haree razaun ba Tiago nia ai-knanoik neʼe iha versíkulu 6, neʼebé dehan: “Nanál mak hanesan ahi ida.” Nanál reprezenta ita-nia kbiit koʼalia nian. Buat neʼebé ita koʼalia bele hanesan ho ahi, nia bele hamosu problema boot. Bíblia mós hatete katak “nanál iha kbiit atu lori mate no moris”. (Prov 18:21) Maibé, laʼós tan deʼit ita taʼuk atu koʼalia buat ruma neʼebé bele hamosu problema, entaun ita lakohi koʼalia. Hanoin toʼok kona-ba ahi. Ahi bele estraga sasán barak, maibé neʼe la dehan katak ita lakohi ona atu uza ahi, loos ka lae? Importante mak ita hakarak hatene oinsá atu kontrola ahi neʼe. Porezemplu, ita bele uza didiʼak ahi hodi teʼin, haneruk, no halo naroman. Hanesan neʼe mós ho nanál, se ita mak uza didiʼak nia, ita mós bele uza ba atu hahiʼi Maromak no ajuda ema seluk. (Sal 19:14) Jeová kria ita ho prezente furak ida, neʼe mak kbiit neʼebé ita bele uza ita-nia ibun ka book an ho liman deʼit atu hatoʼo ita-nia hanoin ka sentimentu ba ema seluk. Ita bele uza didiʼak prezente furak neʼe atu anima ema, laʼós atu hatún ema.—Tgo 3:9, 10 w15 15/12 3:1-3

Karik Lucas fó ajuda ba Paulo no ema seluk se sira sai moras bainhira halaʼo hela viajen ida. (Gal 4:13) Hanesan Jesus hatete, “ema neʼebé moras” presiza doutór ida. (Lc 5:31) Bíblia la hatete iha neʼebé ka bainhira mak Lucas simu treinu atu sai doutór. Karik nia tuir eskola ida iha Laodiseia, sidade ida besik Koloso tanba Paulo dehan katak Lucas fó kumprimentus ba ema iha Koloso. Maski ita la hatene kona-ba neʼe, maibé buat neʼebé ita hatene kona-ba Lucas mak nia doutór ida. Nia mak doutór neʼebé tuir ona eskola, laʼós ema neʼebé naran fó konsellu deʼit kona-ba saúde. Ita hatene ida-neʼe tanba bainhira nia hakerek Evanjellu Lucas no livru Apóstolu, nia uza liafuan médiku nian barak no nia mós koʼalia barak kona-ba Jesus kura ema nia moras. w15 15/12 4:11, 12

Jeová fó mai ita prezente domin neʼebé boot liu hotu bainhira nia haruka ninia Oan-Mane mesak Jesus mai iha rai. (João 3:16; 1 João 4:9, 10) Apóstolu Paulo bolu prezente neʼe nuʼudar Maromak nia “prezente boot liu”. Apóstolu Paulo hatene katak liuhusi Jesus nia sakrifísiu neʼe mak Maromak fó garantia katak ninia promesa hotu sei sai loos. (2 Kor 1:20) Tan neʼe, “prezente boot liu” inklui mós Jesus nia sakrifísiu, Jeová nia laran-diʼak hotu no ninia domin neʼebé ho laran-metin neʼebé nia hatudu mai ita. Se atu esplika didiʼak kona-ba prezente furak neʼe, karik ita ema sala-naʼin nia kakutak la bele komprende hotu, tanba signifika ba prezente neʼe kleʼan tebes. Ita tenkesér sente oinsá kona-ba prezente neʼe? Oinsá mak prezente neʼe bele book ita? Simu prezente hanesan neʼe book ita atu troka ita-nia hahalok no halo mudansa ba dalan neʼebé ita halaʼo ita-nia moris ka lae? Karik neʼe mós sei book ita atu hatudu laran-luak liután ba ema seluk, no fó perdua ema bainhira sira halo sala kontra ita ka lae? La haluha katak prezente neʼebé Jeová fó liuhusi Jesus mak boot liu fali prezente seluk.—1 Ped 3:18. w16.01 2:1, 2, 4, 5

Ema sira neʼebé hetan kose-mina karik bele hanoin hanesan neʼe: ‘Tanbasá mak hili haʼu? Tanbasá la hili ema seluk?’ Karik sira bele hanoin katak sira la serve atu hetan priviléjiu neʼe. Maibé sira rasik fiar katak Jeová hili ona sira. Neʼe halo sira-nia laran sente agradese tebes no nakonu ho solok. Ema sira-neʼe nia sentimentu mak hanesan ho buat neʼebé Pedro dehan: “Hahiʼi bá Maromak no Aman husi ita Naʼi Jesus Kristu, tanba tuir ninia laran-sadiʼa neʼebé boot mak nia halo ita moris mai dala ida tan ho esperansa rohan-laek nian liuhusi Jesus Kristu nia moris-hiʼas husi mate. Nia halo ita moris mai fali atu simu liman-rohan neʼebé la sai dodok, santu, no sei tahan ba nafatin. Maromak rai hela liman-rohan neʼe ba imi iha lalehan.” (1 Ped 1:3, 4) Bainhira ema kose-mina ida lee liafuan sira-neʼe, sira fiar ho laran tomak katak Jeová mak koʼalia rasik ho sira. w16.01 3:11, 12