Outubru

Iha tempu neʼebé Jesus mate no moris-hiʼas fali mak Jeová komesa hili ema kose-mina. Karik ema husi kongregasaun hotu iha apóstolu sira-nia tempu mós ema kose-mina. Liutiha husi sira-nia tempu toʼo loron ikus hahú, ema barak bolu sira-nia an kristaun, maibé Jesus kompara sira hanesan “duʼut aat”. Maski nuneʼe, Jeová hili nafatin ema balu husi tempu neʼebá, sira mak ema neʼebé Jesus kompara hanesan “trigu”. (Mt 13:24-30) Durante loron ikus sira-neʼe Jeová mós kontinua hili ema kose-mina sira. Se Jeová mak deside atu hein toʼo mundu besik remata ona mak foin hili tan ema balu, sé mak bele dehan katak Jeová halo buat neʼebé la loos? (Isa 45:9; Dan 4:35; Rom 9:11, 16) Ita tenke kuidadu atu la sai hanesan serbisu-naʼin iha Jesus nia ai-knanoik, neʼebé muramura kona-ba sira-nia naʼi, tanba nia fó kolen neʼebé hanesan ba sira neʼebé tama serbisu ikus.—Mt 20:8-15. w16.01 4:15

Ohin loron Maromak la husu ita atu hasaʼe ita-nia oan nuʼudar sakrifísiu ba nia, maibé nia husu deʼit atu ita halo tuir ninia mandamentu sira. Dala ruma mandamentu sira-neʼe todan no karik ita la komprende tansá mak ita tenke halo tuir. Ita mós sente hanesan neʼe ka lae? Ba ema balu, karik haklaken mak buat neʼebé difisil tebes ba sira. Karik tanba moe ka haklaken ba ema neʼebé sira la koñese, neʼe buat susar ida ba sira. Balu tan sira sente susar tebes atu la sai hanesan ema sira neʼebé iha eskola ka serbisu fatin. (Êx 23:2; 1 Tes 2:2) Iha situasaun hanesan neʼe, ita sente hanesan Abraão ka lae neʼebé laʼo neineik saʼe ba foho Moriá leten? Se ita mak sente nuneʼe, lalika laran-tun, halo tuir Abraão ho ninia fiar! Ita mós bele banati-tuir fiar-naʼin sira husi tempu uluk, tanba neʼe bele ajuda ita atu hakbesik liután ba ita-nia Belun, Jeová.—Ebr 12:1, 2. w16.02 1:3, 14

Saul hakarak tebes atu oho David, neʼe koko tebes Jónatas nia laran-metin, tanba nia halo ona juramentu ho David, no nia mós lakohi kontra ninia aman. Maibé Jónatas hatene katak Maromak apoia David, laʼós Saul, tan neʼe nia hili atu laran-metin ba David, laʼós ba ninia aman. Nia fó avizu ba David atu David bele subar an no depois koʼalia buat diʼak kona-ba David ba Saul. (1 Sam 19:2, 4) Se ita la kuidadu, ita bele laran-metin ba nasaun, eskola, ka ekipa desportu liu fali laran-metin ba Jeová. Porezemplu, irmaun Henry gosta halimar catur. Ninia eskola sempre manán kuandu tuir kompetisaun catur, tan neʼe nia hakarak hakaʼas an atu manán ba ninia eskola. Maibé nia dehan: “Neineik-neineik haʼu fó haʼu-nia laran ba eskola liu fali ba Maromak. Kada findesemana haʼu halimar deʼit catur toʼo laiha tempu atu bá haklaken ka tuir reuniaun sira. Tan neʼe haʼu foti desizaun ida atu sai husi ami-nia ekipa catur neʼe.”—Mt 6:33. w16.02 3:10, 12

Nuʼudar joven ida, dalan neʼebé Ita bele hatene katak desizaun atu hetan batizmu mai duni husi Ita-nia laran mak liuhusi dalan neʼebé ita halo orasaun. Porezemplu, Ita bele husu ba Ita-nia an, ‘Haʼu halo orasaun beibeik ka lae? Haʼu halo orasaun kona-ba buat espesífiku ba Jeová ka lae?’ Resposta ba pergunta sira-neʼe sei ajuda Ita atu hatene Ita iha relasaun neʼebé besik ho Jeová ka lae. (Sal 25:4) Dala barak Jeová hatán ba ita-nia orasaun sira liuhusi ninia Liafuan Bíblia. Tan neʼe dalan seluk atu hatene katak Ita hakarak tebes atu hakbesik ba Jeová no serbí nia husi Ita-nia laran mak hodi haree didiʼak kona-ba Ita-nia estuda mesak. (Jos 1:8) Husu ba Ita-nia an: ‘Haʼu estuda beibeik Bíblia ka lae? Haʼu apoia haʼu-nia adorasaun família nian ho laran ka lae?’ Resposta ba pergunta sira-neʼe sei ajuda Ita atu hatene katak desizaun atu hetan batizmu mak Ita rasik nia hakarak duni. w16.03 1:11, 13

Ita hotu haksolok tebes atu lee Buku Tahunan kona-ba rezultadu husi ita-nia serbisu haklaken iha mundu tomak. Hanoin kona-ba oinsá ita iha unidade iha mundu tomak bainhira ita asiste ita-nia reuniaun boot sira. Diskursu no drama sira iha reuniaun boot fó laran-manas tebes ba ita atu fó buat neʼebé diʼak liu ba Jeová. Ita mós iha unidade ho ita-nia irmaun-irmán sira iha mundu tomak bainhira ita tuir Memoriál tinan-tinan. (1 Kor 11:23-26) Ita hotu halibur hamutuk iha data no tempu hanesan bainhira loro-matan tun iha loron 14 Nisan. Ita halo nuneʼe atu hatudu agradese ba Jeová ba buat neʼebé nia halo ona ba ita ema no mós hodi halo tuir Jesus nia mandamentu. Iha semana balu antes Memoriál, ita hotu serbisu hamutuk hodi fahe konvite ba ema barak atu sira mós bele mai asiste loron importante neʼe. Se mesak deʼit, ita labele haklaken ba ema hotu. Maibé tanba ita hotu serbisu hamutuk ho unidade nuʼudar Maromak nia povu, ita bele fó-hatene ba ema rihun ba rihun iha mundu tomak kona-ba Jeová no ajuda sira atu fó hahiʼi no adora nia mesak deʼit. w16.03 3:4, 6, 7

Irmaun sira neʼebé simu treinu atu serbí iha kongregasaun, importante ba sira atu hanoin tuir Bíblia nia matadalan bainhira atu halo buat ruma, laʼós tanba lei ruma mak nia hakarak halo knaar neʼe. Porezemplu, se katuas husu irmaun ida atu hamoos varanda tama ba Reuniaun-Fatin hodi haree moos no ema la bele monu, karik katuas bele uza eskritura husi Tito 2:10 hodi esplika ba nia katak ninia knaar neʼe “bele lori hahiʼi ba hanorin neʼebé mai husi Maromak, ita-nia Salvadór”. Katuas mós bele husu irmaun neʼe hodi hanoin kona-ba oinsá mak ninia knaar neʼe bele ajuda irmaun-irmán idade boot sira husi ita-nia kongregasaun. Koʼalia hanesan neʼe ba irmaun neʼe bele ajuda nia hanoin kona-ba ema, laʼós lei sira. Bainhira nia rasik haree katak ninia knaar neʼe lori diʼak ba irmaun-irmán sira iha kongregasaun laran, nia rasik mós sei sente haksolok ho ninia knaar neʼe. No mós, keta haluha atu gaba irmaun kona-ba ninia hakaʼas-an hodi halo tuir sujestaun sira. Liafuan gaba neʼebé ema koʼalia husi laran hanesan ho rega bee ba ai, neʼe sei halo irmaun neʼe laʼo ba oin hodi serbí Jeová. w15 15/4 2:7, 8

Ita hasoru ona susar ruma neʼebé halo ita sente mesamesak ka lae? Karik ita balu lakon serbisu, hasoru susar iha eskola, iha moras boot, ka hasoru situasaun seluk neʼebé susar tebes atu tahan. Karik ita mós husu ona ajuda husi ema seluk, maibé halo ita sai laran-tun tanba la bele hetan ajuda tuir ita-nia presiza. Tuir loloos, dala ruma problema balu neʼebé ita hasoru la iha ema ida mak bele rezolve. Se nuneʼe, ita bele halo saida? Bíblia hatete mai ita atu “tau fiar ba Jeová”. (Prov 3:5, 6) Maibé, ita bele fiar duni katak Jeová sei ajuda ita ka lae? Sin, bele! Husi istória oioin neʼebé hakerek ona iha Bíblia laran, hatudu momoos katak Maromak Jeová ajuda duni ninia povu. Keta sai hirus ba ema seluk se sira la ajuda ita bainhira ita hasoru susar. Diʼak liu halo tuir apóstolu Paulo nia ezemplu hodi haree situasaun susar neʼe nuʼudar oportunidade ba ita atu tau fiar tomak ba Maromak Jeová deʼit no haree oinsá mak Nia sei tau matan ita. Hodi halo nuneʼe, ita bele hametin liután ita-nia fiar no hakbesik liután ba Jeová nuʼudar ita-nia Belun. w15 15/4 4:3-5

Hodi lohi mak Satanás bele halo ema kontra hasoru Maromak neʼebé domin, Jeová. (1 João 4:8) Satanás mós uza lohi hodi halo ema la fó atensaun ba “Maromak nia matadalan” sira. (Mt 5:3) Hodi nuneʼe mak nia bele taka ema fiar-laek sira-nia neon atu “sira labele haree nabilan glória nian husi liafuan diʼak kona-ba Kristu, ida neʼebé Maromak nia ilas”. Satanás nia lohi boot liu hotu neʼebé nia uza hodi bosok ema mak relijiaun falsu. Diabu hatene katak Maromak hakarak ema adora nia mesak deʼit. (Êx 20:5) Karik nia sente kontente tebes bainhira nia haree ema la adora Jeová, maibé fila kotuk bá adora fali beiʼala, ai, fatuk, ka animál sira. Triste mós ema barak hanoin katak sira-nia adorasaun mak loos maibé tuir loloos lae, tanba dalan neʼebé sira adora mak tuir hanorin neʼebé falsu. Sira halo daudauk buat neʼebé hanesan ema Izraél iha tempu uluk halo. Jeová hatete ba sira: “Tanbasá imi halo serbisu ba buat neʼebé la halo kontente? Rona didiʼak ba haʼu, no . . . hetan ksolok boot ho buat neʼebé bokur.”—Isa 55:2. w15 15/5 1:14, 15

Maski Abel hatene liafuan sira-neʼe no iha fiar ba Jeová nia promete, maibé nia la hatene oinsá mak buat sira-neʼe atu sai loos. Tanba Abel iha fiar katak Jeová nia promete sei sai loos, neʼe book nia hodi hasaʼe sakrifísiu ida ba Jeová no Jeová simu buat neʼebé nia halo. (Gên 4:3-5; Ebr 11:4) Tanba fiar mak Noé hetan salvasaun husi Rai-Nabeen. (Ebr 11:7) No Rai-Nabeen liutiha, ninia fiar neʼe book nia hodi hasaʼe animál nuʼudar sakrifísiu ba Jeová. (Gên 8:20) Hanesan Abel, Noé mós fiar katak iha futuru ema sei livre husi sala no mate. Maibé Rai-Nabeen liutiha, ema sai aat fali. Iha Nimrod nia ukun, nia halo ema kontra hasoru Jeová. Maski nuneʼe, Noé iha fiar neʼebé metin nafatin. (Gên 10:8-12) Karik buat neʼebé fó konsola ba Noé mak nia imajina ka hanoin kona-ba loron sei toʼo mai bainhira mundu tomak la iha tan ukun-naʼin laran-aat sira, ema la iha sala tan, no mate mós sei la iha tan. Ita mós bele imajina kona-ba tempu furak hanesan neʼe iha futuru no lakleur tan tempu neʼe sei toʼo mai!—Rom 6:23. w15 15/5 3:4, 6

Hanoin resin ba buat ruma bele halo moras no bele mós halo lakon ita-nia fiar ba Jeová. Ita tenke tau fiar ba Jeová no hanoin-hetan liafuan iha eskritura ba ohin. Tan neʼe, se ita laran-taridu ba buat ruma, koʼalia ba irmaun ka irmán ida neʼebé hatene didiʼak ita. Hanesan ita-nia inan-aman, kaben, ka belun neʼebé diʼak sei anima ita atu tau fiar ba Jeová hodi ita bele hamenus ita-nia laran-taridu. La iha ema ida mak bele komprende ita diʼak liu fali Jeová. Tan neʼe apóstolu Paulo hatete: “Keta laran-taridu kona-ba buat ida, maibé iha buat hotu hatoʼo imi-nia laran-susar ba Maromak liuhusi orasaun no harohan no mós fó-agradese; no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin liuhusi Kristu Jesus.” (Flp 4:6, 7) Nuneʼe mak bainhira ita sente laran-taridu, diʼak atu hanoin kona-ba ajuda neʼebé ita bele hetan husi Jeová atu ajuda ita iha relasaun neʼebé metin nafatin ho nia. Ajuda sira-neʼe bele mai husi irmaun-irmán sira, katuas sira, atan laran-metin no matenek, anju sira, no Jesus. w15 15/5 4:16, 17

Husi templu nia sorin, parte norte nian, iha pixina ida naran Betesda. Ema moras lubun-boot ida mak mai hobur iha pixina neʼe atu hetan isin-diʼak fali. Tanba domin Jesus hasoru malu ho mane neʼebé moras kleur liu fali Jesus moris iha rai. (João 5:6-9) Jesus husu ba mane neʼe: “Ó hakarak hetan isin-diʼak?” Mane neʼe laran-tun tebes tanba la iha ema ida mak hakarak ajuda nia atu tun ba pixina neʼe. Maibé Jesus haruka nia halo buat neʼebé ema seidauk hanoin nia bele halo. Jesus haruka nia foti ninia toba-fatin no hamriik laʼo. Nia halo tuir duni Jesus nia liafuan no laʼo duni. Milagre neʼe hatudu saida mak sei akontese iha mundu foun. Milagre neʼe mós hatudu duni Jesus nia domin ba ema. Nia bá buka ema sira neʼebé presiza ajuda no nia ajuda sira. Jesus nia ezemplu neʼe book tebes ita atu bá buka nafatin ema iha ita-nia haklaken fatin neʼebé hasoru susar no terus husi mundu aat neʼe. w15 15/6 2:8-10

Jesus uza liafuan “ami Aman”, laʼós “haʼu-nia Aman”, neʼe atu hatudu katak ita mak família ida deʼit ho “maluk fiar-naʼin hotu”. (1 Ped 2:17) Ba ema kose-mina sira, Jeová hili ona sira sai ninia oan, tan neʼe sira sai ona oan loloos ba “Aman” Jeová. (Rom 8:15-17) Maibé ba ema sira neʼebé iha esperansa atu moris ba nafatin iha rai, sira seidauk sai oan loloos ba Jeová. Maski nuneʼe, sira bele bolu Jeová nuʼudar Aman tanba Jeová mak moris nia hun, nia mak fó buat hotu neʼebé sira presiza atu bele moris. Maibé, bainhira sira sai perfeitu no liu tiha koko ikus nian mak sira foin sai Maromak nia oan loloos. (Rom 8:21; Apok 20:7, 8) Buat diʼak neʼebé inan-aman bele fó ba oan mak hanorin sira oinsá atu halo orasaun hodi sira rasik bele sente Jeová hanesan sira-nia Aman. Husi neʼe ita bele haree katak la iha buat seluk neʼebé inan-aman bele fó ba oan mak diʼak liu fali ajuda oan atu iha relasaun neʼebé diʼak no besik ho Jeová. w15 15/6 4:4-6

Se ita hakarak Jeová atu salva ita husi aat-naʼin, ita tenkesér la hola parte iha Satanás nia mundu no la hadomi ninia mundu ka sasán iha Satanás nia mundu. (João 15:19; 1 João 2:15-17) Maski la fasil atu halo nuneʼe, maibé tempu sei toʼo mai bainhira Jeová sei halakon Satanás ho ninia mundu aat neʼe! Tanba Satanás hatene katak ninia tempu la barak ona, tan neʼe mak husi tempu Jesus soe nia tun mai rai, nia ho “hirus makaʼas” atu sobu ita-nia laran-metin ba Maromak. Tan neʼe mak ita tenke harohan beibeik atu Jeová proteje ita no salva ita husi Satanás. (Apok 12:12, 17) Ita kontente atu moris iha mundu neʼebé la iha tan Satanás. Tan neʼe mak ita presiza halo orasaun beibeik atu husu Maromak nia Ukun toʼo mai no halo ninia naran sai santu, no halo ninia hakarak sai loos iha rai. Husu beibeik ba Jeová atu tau matan ba ita-nia presiza no ajuda ita laran-metin nafatin ba nia. Hakaʼas an liután atu moris hodi halo tuir orasaun Ami Aman.—Mt 6:9-13. w15 15/6 5:12, 17, 18

Maski ita seidauk hatene buat hotu neʼebé sei akontese durante tempu susar neʼe, maibé ita fiar katak ita sei halo sakrifísiu ba buat barak. Iha apóstolu sira-nia tempu, sira presiza husik hotu sira-nia sasán no uma hodi moris susar atu bele salva sira-nia vida. (Mc 13:15-18) Karik bele husu ba ita-nia an: ‘Atu hetan salvasaun, haʼu prontu atu husik hotu buat materiál nian ka lae? Haʼu prontu atu halo buat naran deʼit hodi hatudu katak haʼu iha laran-metin ba Jeová?’ Hanoin didiʼak toʼok! Iha tempu neʼebá, maski saida deʼit mak atu akontese ba ita mós, ita mak ema mesak deʼit neʼebé sei halo tuir profeta Daniel nia ezemplu hodi nafatin la husik atu adora Jeová. (Dan 6:10, 11) Tempu neʼe laʼós tempu atu haklaken “liafuan diʼak kona-ba Maromak nia Ukun” tanba tempu haklaken nian remata ona. Ida-neʼe mak tempu atu hein ba “mundu nia rohan” toʼo mai! (Mt 24:14) Maibé ita fiar katak iha tempu neʼe, Maromak nia povu sei fó sai mensajen moruk ida ba ema hotu atu rona, karik neʼe mak kona-ba Satanás nia mundu aat neʼe toʼo ona ninia rohan. w15 15/7 2:3, 8, 9

Ita la bele taʼuk tanba Jesus fó-hatene nanis katak ema sei odi ita tan deʼit ita la hanesan ho sira. Tenke hanoin-hetan katak ema sira neʼebé kontra ita, sira la hatene kona-ba Maromak nia Ukun, tan neʼe sira la hatene tansá mak ita hakarak laran-metin ba Maromak nia Ukun. Maibé ba ita, laran-metin ba Maromak nia Ukun mak buat neʼebé importante tebes iha ita-nia moris. Atu hatudu katak ita iha laran-metin ba Jeová, ita presiza hamriik metin maski ema kontra ka ameasa ita. (Dan 3:16-18) Taʼuk ba ema mak problema neʼebé susar tebes ba ita-nia oan sira atu hasoru tanba sira hakarak ema seluk simu sira. Se ita-nia oan mak hasoru daudaun problema iha eskola kona-ba onra ba bandeira ka hola parte iha atividade nasionalizmu ruma, nuʼudar inan-aman ita hakarak fó ajuda ba sira. Uza tempu Adorasaun Família nian atu ajuda sira komprende tansá mak ita la halo buat sira-neʼe. Hanorin sira oinsá sira bele hatán ho laran no ho respeitu. (Rom 1:16) Se presiza, antes tama eskola, ita bele bá koʼalia ho profesora sira kona-ba ita-nia fiar neʼe. w15 15/7 3:15, 16

Jesus nia sakrifísiu mak hanesan prezente ida husi Jeová “atu ita bele hetan moris”. (1 João 4:9) Bainhira koʼalia kona-ba Jeová nia domin boot neʼe, apóstolu Paulo hatete: “Kristu mate ba ema sala-naʼin hodi tuir tempu neʼebé Maromak hili ona. Tuir loloos, karik la iha ema ida neʼebé sei mate ba ema laran-loos; no kona-ba ema diʼak, karik sei iha ema ida neʼebé brani atu mate ba nia. Maibé Maromak hatudu nia domin ba ita nuneʼe: Kristu mate ba ita kuandu ita sei sala-naʼin hela.” (Rom 5:6-8) Maromak nia domin neʼebé boot liu hotu neʼe loke dalan ba ema atu bele iha relasaun neʼebé diʼak ho nia. Liuhusi Jesus nia sakrifísiu duni mak Jeová hatudu ninia domin ba ema. Se ita-nia esperansa mak atu moris ba nafatin iha rai, ita sei fiar katak Jeová sei halo moris iha mundu foun sai kapás tebes ba ita. Tan neʼe mak ita hakarak hafolin Jesus nia sakrifísiu, tanba liuhusi ida-neʼe mak Jeová hatudu ninia domin neʼebé hela ba nafatin mai ita! w15 15/8 1:13, 15

Serbí Maromak no halaʼo knaar sira iha mundu foun mak moris neʼebé espesiál tebes. Tan neʼe mak ita hakarak halo tuir Jeová nia organizasaun ohin loron no kaer didiʼak knaar saida deʼit mak ita simu ohin loron. Dala ruma ita-nia situasaun bele troka. Porezemplu, iha Betel Estadus Unidus irmaun-irmán balu simu knaar foun atu la serbí tan iha Betel, maibé bá fali atu haklaken ba tempu-tomak. No tanba idade no razaun seluk, sira neʼebé iha knaar atu vizita kongregasaun, agora simu fali knaar hodi sai pioneiru tempu-tomak. Irmaun-irmán sira-neʼe agora haksolok tebes ho sira-nia knaar foun neʼe, no Jeová mós fó bensaun barak ba sira. Tan neʼe mak, se ita halo orasaun atu husu Jeová nia ajuda, hakaʼas an hodi serbí nia, no haburas hahalok simu ho laran, neʼe sei lori solok ba ita no Jeová sei fó bensaun barak ba ita. (Prov 10:22) Oinsá ho moris iha mundu foun? Karik ita hanoin diʼak tiha ona katak ita gosta atu hela iha neʼebé, maibé oinsá se Jeová nia organizasaun husu ita atu muda fali ba fatin seluk? Ita bele fiar katak iha tempu neʼebá, atu hela iha neʼebé no halo knaar saida deʼit mós sei fó solok neʼebé kleʼan ba ita, no ita sei hatoʼo agradese ba buat hotu neʼebé ita simu iha tempu neʼebá. w15 15/8 3:8

Noé la ransu hamutuk ho ema neʼebé la hadomi Jeová. Nia ransu hamutuk ho ninia feen, oan-mane naʼin-tolu no ninia feto-foun sira. Bíblia bolu Noé nuʼudar “haklaken-naʼin kona-ba buat loos”. (2 Ped 2:5) Nia sai okupadu hodi harii arka no haklaken ba ema seluk. Tanba Noé ho ninia família halo buat neʼebé halo kontente Maromak, sira hetan salvasaun husi Rai-Nabeen. Ita hotu, nuʼudar sira-nia bei-oan, agradese tebes tanba sira rona ba Maromak hodi la ransu ho ema neʼebé la hadomi Maromak. Iha apóstolu sira-nia tempu mós, ema kristaun sira la ransu ho ema neʼebé la adora Jeová. Tanba sira rona ba Jeová, sira la mate bainhira Jeruzalein naksobu iha tinan 70.—Lc 21:20-22. w15 15/8 4:17, 18

Laʼós atividade halimar nian hotu diʼak ba ita, ka bele halo ita sente kmaan ka halo ita fresku fali. Ita halimar demais liu ka halimar beibeik mós ladiʼak. Se nuneʼe, oinsá mak ita-nia konxiénsia bele ajuda ita atu bele uza tempu halimar ho didiʼak no halo ita kontente? Bíblia fó avizu kona-ba isin nia hahalok sira. Hahalok sira-neʼe mak hanesan “sala-foʼer, hahalok la moos, hahalok neʼebé la iha moe, adora estátua, envolve an ho anju aat, odi malu, istori malu, laran-moras ba malu, sai hirus, buka atu manán deʼit, haketak malu, tuir deʼit ema nia hanorin, kaan-teen, lanu-teen, festa arbiru, no buat sira seluk neʼebé hanesan neʼe”. Apóstolu Paulo hatete katak “sira neʼebé halo buat sira-neʼe sei la simu Maromak nia Ukun nuʼudar liman-rohan”. (Gal 5:19-21) Tan neʼe mak diʼak atu husu ba ita-nia an: ‘Haʼu-nia konxiénsia bandu haʼu ka lae atu halimar desportu neʼebé bele hakanek malu, buka manán malu deʼit, nasionalizmu, ka desportu violénsia seluk? Bainhira haʼu-nia laran tenta haʼu atu haree filme neʼebé lori pornografia ka filme neʼebé hatudu hahalok la morál, book ema atu sai lanu, ka matan-dook nia atividade, haʼu-nia konxiénsia fó avizu haʼu ka lae? w15 15/9 2:11, 12

Bíblia hatete katak Maromak nunka kria ita atubele ukun an no livre husi nia hodi halo desizaun rasik. Hatene lia-loos ida-neʼe importante tebes ba ita-nia moris. Tanba hodi halo tuir deʼit Jeová mak ita bele iha dame no unidade. Jeová hanorin lia-loos sira-neʼe ba ita tanba nia hadomi tebes ita hotu. Aman neʼebé hadomi ninia oan sempre hanoin kona-ba oan sira-nia futuru, nia hakarak sira atu iha moris neʼebé diʼak. Maibé ita sente triste tanba ema barak ohin loron la hatene saida mak sei akontese iha futuru, sira uza sira-nia tempu atu duni buat neʼebé mak lori diʼak ba temporáriu deʼit. (Sal 90:10) Nuʼudar Maromak nia oan, ita bele sente katak Jeová hadomi duni ita tanba nia promete futuru furak ida mai ita. Neʼe halo ita sente katak ita-nia moris iha folin boot duni. w15 15/9 4:10, 11

Iha tempu uluk, ema barak rona no bele haree oinsá mak Maromak uza ninia liman hodi ajuda ema Izraél. Porezemplu, Jeová uza milagre hodi lori ema Izraél sai husi Ejitu, no nia mós halakon liurai barak hodi proteje nasaun Izraél. (Jos 9:3, 9, 10) Sira lakohi rekoñese katak Jeová mak hamutuk ho Izraél, tan neʼe inimigu hotu lakon funu hasoru ema Izraél. Ezemplu ida tan mak kona-ba liurai aat Akabe. Nia mós iha oportunidade barak hodi haree forsa husi Maromak nia liman. Akabe haree ahi tun husi lalehan hodi han buat neʼebé Elias hasaʼe. Depois, Elias hatete ba nia katak Jeová sei halo udan tun fali, no nia hatete ba Akabe: “Bá ona, nuneʼe udan boot labele hanetik ó!” (1 Reis 18:22-45) Maski Akabe haree hotu milagre sira-neʼe, maibé nia nafatin lakohi rekoñese katak forsa sira-neʼe mai husi Maromak. Ezemplu sira-neʼe hanorin ita lisaun importante ida, neʼe mak, bainhira ita haree Jeová ajuda daudaun ita, ita tenke rekoñese katak neʼe husi Jeová nia forsa duni. w15 15/10 1:4, 5

Ita fiar katak halo tuir Jeová nia matadalan mak diʼak ba ita. Ita tenke tau fiar ba Jeová tanba nia bele duni ajuda ita. Apóstolu Paulo hatete katak “Maromak nia kbiit neʼebé book an iha ita-nia laran, Maromak bele halo barak liu fali buat hotu neʼebé ita husu no hanoin”. (Éf 3:20) Jeová nia atan sira sempre hakaʼas an atu halo ninia hakarak, maibé sira mós rekoñese katak sira iha fraku, tan neʼe sira tau fiar ba Jeová mak atu fó bensaun ba sira-nia hakaʼas an hotu. Ita kontente tebes tanba Maromak hamutuk ho ita loos ka lae? Ohin loron, Jeová sei hatán ita ka lae se ita husu fiar husi nia? Bíblia promete ba ita katak nia sei hatán duni se buat neʼebé ita husu mak “tuir ninia hakarak.” (1 João 5:14) Jeová kontente tebes ho ema neʼebé tau fiar tomak ba nia. Se ita husu fiar husi Jeová, nia sei hatán ita-nia orasaun, no ita-nia fiar sei sai buras liután. Fiar bele halo ita sai ema neʼebé “merese atu simu Maromak nia ukun”.—2 Tes 1:3, 5. w15 15/10 2:16-18

Medita kona-ba buat espirituál nian bele ajuda ema sai kristaun maduru ida. (Ebr 5:14; 6:1) Ema neʼebé ladún gasta tempu atu hanoin kona-ba Maromak no Jesus, ninia fiar sei sai fraku lalais. Ema hanesan neʼe neineik-neineik bele hadook an husi Jeová no lia-loos. (Ebr 3:12) Jesus fó avizu katak se ita la rona, ka la simu Maromak nia Liafuan “ho laran neʼebé diʼak”, ita sei la rai metin liafuan sira-neʼe. Se nuneʼe “hanoin resin, no rikusoin nia lasu, no mós ksolok moris nian” bele hanehan ita hodi ita la bele “fó fuan neʼebé tasak”. (Lc 8:14, 15) Tan neʼe mak ita tenke medita beibeik kona-ba Maromak nia Liafuan. Neʼe sei book ita atu banati-tuir Jeová no haleno ninia hahalok diʼak sira. (2 Kor 3:18) Se ita hanoin didiʼak katak ita bele kontinua aprende kona-ba Jeová no haleno ninia hahalok sira ba nafatin, neʼe mak priviléjiu neʼebé boot tebes.—Ecle 3:11. w15 15/10 4:13, 14

Nuʼudar inan-aman, Ita hakarak Ita-nia oan atu besik nafatin ba Jeová. No Jeová fó responsabilidade ba Ita atu “fó dixiplina no matadalan neʼebé tuir Jeová nia hakarak”. (Éf 6:4) Tan neʼe, Ita presiza hakaʼas an atu halaʼo programa adorasaun nian ho Ita-nia oan. Hanoin toʼok kona-ba neʼe: Ita hatene katak importante ba oan atu bá eskola no hetan edukasaun, tanba Ita hakarak sira atu laran-manas aprende buat oioin. Maibé sá tan ho edukasaun husi Jeová? Ita hakarak sira atu tuir reuniaun, reuniaun boot sira no adorasaun família nian. Edukasaun neʼebé sira simu husi Jeová bele salva sira-nia moris. Tan neʼe, ajuda sira atu haburas domin atu aprende kona-ba Jeová no hafolin matenek neʼebé loos. Importante mós atu treinu Ita-nia oan atu bá haklaken beibeik. Banati-tuir Jesus nia ezemplu hodi ajuda sira sai laran-manas kona-ba haklaken Maromak nia Liafuan ba ema seluk. w15 15/11 2:6

Maromak arranja buat hotu tuir arranju ulun nian, tan neʼe mak importante tebes atu iha domin. Maibé arranju ulun nian laʼós atu domina malu. Maski laʼen mak feen nia ulun, maibé Bíblia haruka laʼen atu “hatudu respeitu ba feen”. (1 Ped 3:7) Dalan ida neʼebé laʼen hatudu respeitu ba feen mak hanoin kona-ba feen nia presiza no respeitu ninia hakarak kona-ba buat balu. No mós Maromak nia Liafuan hatete: “Laʼen sira, kontinua hadomi imi-nia feen, hanesan Kristu mós hadomi kongregasaun no fó nia moris ba kongregasaun.” (Éf 5:25) Loos, Jesus fó duni ninia moris ba ninia dixípulu sira. Se laʼen mak banati-tuir Jesus nia domin hodi halaʼo ninia knaar nuʼudar ulun, neʼe fasil ba feen atu hadomi, respeitu, no hakruʼuk ba nia.—Tito 2:3-5. w15 15/11 4:6, 7

Iha tempu neʼebé haklaken habelar daudauk ba fatin oioin, ema kristaun sira iha tempu neʼebá uza lia-gregu. Tan neʼe mak Evanjellu husi Mateus, Marcos, Lucas, no João neʼebé ema hetan iha tempu neʼebá, hakerek ho lia-gregu. Nuneʼe mós eskritura seluk no karta sira neʼebé apóstolu Paulo hakerek, hakerek ho lia-gregu. Bainhira hakerek-naʼin Bíblia sira atu hakerek Eskritura Lia-Gregu nian no se sira presiza temi eskritura husi Eskritura Lia-Ebraiku ruma, baibain sira foti husi Septuajinta. Maski liafuan sira husi Septuajinta la hanesan uitoan ho liafuan orijinál husi lia-ebraiku nian, maibé Jeová simu nafatin liafuan sira-neʼe hodi sai parte ida ba Bíblia. Tan neʼe mak, maski ema la perfeitu mak tradús eskritura sira-neʼe, maibé Maromak simu nuʼudar ninia Liafuan. Ida-neʼe hatudu duni katak Jeová nunka haree katak língua ida ka kultura ida mak diʼak liu fali seluk.—Após 10:34. w15 15/12 1:8, 9

Loroloron ita presiza koʼalia, maibé neʼe la dehan katak iha loron ida tomak ita presiza koʼalia la para hela deʼit. Bíblia hatete katak iha mós “tempu neʼebé loos atu nonook”. (Ecle 3:7) Porezemplu, ita nonook bainhira ema ida koʼalia hela, neʼe hatudu katak ita iha respeitu. (Jó 6:24) Ita mós kontrola an atu la sobu ema seluk nia segredu. (Prov 20:19) No bainhira ema ida provoka ita no ita nonook deʼit, neʼe hatudu katak ita iha matenek. (Sal 4:4) Maibé, Bíblia hatete katak iha mós “tempu neʼebé loos atu koʼalia”. (Ecle 3:7) Se ita-nia kolega ida fó prezente furak ida ba ita, ita hakarak hatudu agradese ba nia hodi tau matan didiʼak ba prezente neʼe. Ita mós hakarak hatudu ita-nia agradese ba Jeová nia prezente furak hodi uza didiʼak kbiit atu koʼalia nian ho matenek. Porezemplu, ita bele uza didiʼak prezente neʼe liuhusi koʼalia sai ita-nia sentimentu, fó anima ema seluk, koʼalia sai saida mak ita hakarak, no hahiʼi Maromak. w15 15/12 3:4, 5

Ohin loron, ita-nia maluk kristaun sira la bele halo milagre atu kura ita. (1 Kor 12:9) Maibé ema balu tanba hakarak ajuda, fó konsellu ba ita, maski ita la husu. Sujestaun balu bele ajuda duni ita. Porezemplu, apóstolu Paulo fó sujestaun ba Timóteo atu hemu tua-uvas uitoan. Neʼe tanba Timóteo moras iha kabun, karik tanba nia hemu bee neʼebé la moos. Maibé ita mós presiza kuidadu. Karik ita-nia maluk obriga ita hemu ai-moruk ruma, ai-tahan ka ai-abut ruma, ka atu han ka la bele han hahán ruma. Dala ruma ema fó sujestaun hanesan neʼe tanba sira dehan neʼe ajuda ona ema ruma iha sira-nia família neʼebé moras hanesan ita-nian. Maibé neʼe la dehan katak ida-neʼe mós sei ajuda ita. Ita presiza kuidadu tanba karik ai-moruk ka tratamentu neʼebé ema barak uza mós bele lori rezultadu neʼebé ladiʼak ba ita-nia saúde.—Prov 27:12. w15 15/12 4:13

Ita hotu ema sala-naʼin, no ita hotu sei simu kastigu-mate. (Rom 5:12) Maibé tanba domin mak Jeová haruka Jesus mai toʼo iha rai atu “koko mate ba ema hotu”. (Ebr 2:9) Liuhusi arranju neʼe mak Jeová sei salva ita-nia moris no nia mós sei halakon mate ba nafatin iha futuru. (Isa 25: 7, 8; 1 Kor 15:22, 26) Ema hotu neʼebé tau fiar ba Jesus sei moris iha dame no solok ba nafatin iha rai. No ema kose-mina sira sei simu liman-rohan atu ukun hamutuk ho Jesus iha lalehan. (Rom 6:23; Apok 5:9, 10) Jeová nia prezente furak mós inklui saida tan? Liuhusi Jeová nia prezente neʼe, nia sei halakon moras hotu husi mundu neʼe, mundu tomak sei sai paraízu ida, no ema neʼebé mate ona sei hetan moris-hiʼas fali. (Isa 33:24; 35:5, 6; João 5:28, 29) Ita hadomi duni Jeová no Jesus tanba fó ita “prezente boot liu” neʼe.—2 Kor 9:15. w16.01 2:5, 6

Antes ema kristaun ida hetan kose-mina, sira mós hafolin tebes sira-nia esperansa atu moris ba nafatin iha rai. Sira mós hakarak tebes atu hein ba tempu neʼebé Jeová atu halakon hotu buat aat sira husi mundu neʼe no halo mundu sai fali paraízu. Karik sira mós hanoin hela oinsá atu simu fali sira-nia família ka belun sira neʼebé sei hetan moris-hiʼas iha mundu foun. Sira mós hein atu harii rasik sira-nia uma no han husi sira rasik nia toʼos. (Isa 65:21-23) Maibé agora sira la hanoin ona atu halo buat sira-neʼe, tanbasá? Neʼe laʼós tanba sira la hafolin ona esperansa sira-neʼe, ka tanba sira estrese hela ho susar ruma mak sira troka sira-nia hanoin neʼe. Sira laiha ona esperansa atu moris iha rai laʼós tanba sira sente katak moris ba nafatin iha rai sei halo sira sente baruk, ka tanba sira hakarak hatene moris iha lalehan sente oinsá. Lae, sira-nia esperansa troka tanba espíritu santu. Iha tempu neʼebé sira hetan kose-mina, espíritu santu mós halo sira-nia hanoin no esperansa troka hotu. w16.01 3:11, 13

Jeová mak Aas Liu Hotu iha lalehan no rai, nia mak kria buat hotu, no ninia matenek no forsa laiha rohan. Job rekoñese katak Jeová mak Maromak hanesan neʼe duni. Bainhira Jeová esplika tiha ba Job kona-ba ninia kbiit, Job hatete: “Haʼu hatene ona katak Ita bele halo buat hotu-hotu. No la iha buat ida mak bele hanetik Ita atu halo buat neʼebé Ita hakarak.” (Jó 42:2) Jeová rasik bele duni atu halo buat hotu-hotu neʼebé nia hakarak atu halo, nia la presiza ajuda. Maibé tanba domin, nia konvida kriatura seluk atu serbisu hamutuk ho nia hodi kumpre ninia hakarak sira. Maromak nia kriasaun primeiru mak ninia Oan-Mane mesak Jesus. Bainhira nia kria tiha Jesus, nia mós konvida Jesus atu kria fali buat seluk. (João 1:1-3, 18) Ita bele haree katak Jeová laʼós konvida deʼit Jesus atu serbisu hamutuk ho nia, maibé Jeová mós fó sai ba kriatura seluk kona-ba Jesus nia knaar importante sira. Priviléjiu neʼe folin boot tebes ba Jesus.—Kol 1:15-17. w16.01 5:1, 2