Marsu

Tanba Jefté nia maun-alin sira laran-moras no odi nia, sira duni no hadau ninia rai. (Juíz 11:1-3) Maski nuneʼe, bainhira katuas husi nasaun Izraél bá husu ninia ajuda, nia bá kedas hodi ajuda sira. (Juíz 11:4-11) Jefté hanoin katak funu atu defende Jeová nia naran mak importante liu fali ninia sentimentu. Ninia hakarak mak atu hatudu laran-metin ba Jeová, tan neʼe Jeová fó bensaun ba nia no ba ema Izraél sira seluk. (Ebr 11:32, 33) Saida mak ita bele aprende husi Jefté nia ezemplu? Se iha irmaun ka irmán ida hakanek ita-nia laran ka trata ita iha dalan neʼebé ladiʼak, ita sei halo saida? Ita lakohi husik ita-nia sentimentu atu hanetik ita hodi serbí Jeová. Ita la bele para hodi la tuir tan reuniaun sira ka para atu la ransu tan ho ita-nia kongregasaun. Diʼak atu halo tuir Jefté nia ezemplu hodi laran-metin nafatin ba Jeová. Halo hanesan neʼe bele ajuda ita tahan hasoru situasaun susar sira no ita mós bele sai fali ezemplu diʼak ba ema seluk.—Rom 12:20, 21; Kol 3:13. w16.04 1:7, 9, 10

Ita tenke duni atu tahan, laʼós ba tempu uitoan deʼit, maibé toʼo rohan. Hanoin toʼok kona-ba ró neʼebé baku-fila. Atu bele salva moris, pasajeiru sira tenke nani toʼo rai-maran. Se ema ida mak nani besik toʼo ona maibé rende an deʼit, ninia rezultadu mak hanesan deʼit ho ema neʼebé foin nani sai husi ró maibé rende an ona, sira hotu sei mout, loos ka lae? Hanesan neʼe mós ho ita, se ita hakarak atu moris iha mundu foun, ita tenke tahan. Ita hakarak iha hahalok hanesan apóstolu Paulo nian neʼebé dehan: “Ami la rende an.” (2 Kor 4:16) Ita bele fiar ho laran tomak katak Jeová sei ajuda ita atu tahan toʼo rohan. Apóstolu Paulo hatete: “Iha buat sira-neʼe hotu, ami sei manán liuhusi nia neʼebé hadomi ami. Tanba haʼu fiar duni katak mate ka moris ka anju ka governu sira ka buat neʼebé iha agora ka buat neʼebé atu mai ka kbiit ka aas ka kleʼan ka kriasaun sira seluk sei la bele haketak ita husi Maromak nia domin neʼebé liuhusi ita Naʼi Kristu Jesus.”—Rom 8:37-39. w16.04 2:17, 18

Husu matenek husi Jeová atu ajuda ita tetu situasaun ho didiʼak hodi ita la halo buat neʼebé kontra ita-nia pozisaun atu bele neutrál nafatin. Se tanba ita-nia adorasaun mak ema kaer ita ba komarka ka fó kastigu ita, halo orasaun atu husu kbiit husi Jeová hodi ajuda ita esplika ita-nia fiar ho aten-brani. Ita bele fiar katak Jeová sei ajuda duni ita. (Após 4:27-31) Jeová mós bele hametin ita liuhusi ninia Liafuan. Medita didiʼak kona-ba eskritura sira neʼebé ajuda ita atu bele mantein neutrál. Hanoin didiʼak kona-ba eskritura sira-neʼe, no koko atu dekór, tanba se loron ida mak ita laiha Bíblia, eskritura sira-neʼe sei ajuda ita. Bíblia mós bele hametin ita-nia esperansa kona-ba futuru. Ita presiza duni esperansa neʼe atu bele tahan hasoru terus sira. (Rom 8:25) Hili eskritura sira neʼebé mak koʼalia kona-ba buat neʼebé ita gosta atu halo iha mundu foun no imajina katak ita halo hela buat sira-neʼe iha neʼebá. w16.04 4:14, 15

Ulun-naʼin relijiaun kristaun sira la haklaken kona-ba Maromak nia Ukun ka Reinu. Se sira mak koʼalia kona-ba Maromak nia Ukun, sira hatete deʼit katak Reinu neʼe mak iha ita-nia laran deʼit. (Lc 17:21) Sira nunka ajuda ema atu komprende katak Maromak nia Ukun mak governu lalehan nian, no Liurai ba Ukun neʼe mak Jesus Kristu. Sira nunka esplika katak Ukun neʼe mak solusaun ba ema nia problema hotu, no katak lakleur tan ukun neʼe sei halakon hotu buat aat husi mundu neʼe. (Apok 19:11-21) Buat neʼebé sira halo mak koʼalia kona-ba Jesus iha tempu Natál ka Páskua deʼit. Ulun-naʼin sira-neʼe la hatene Jesus halo daudaun saida nuʼudar Liurai ba Maromak nia Ukun. Sira mós la komprende tanbasá mak ita tenke haklaken mensajen neʼe. Bainhira ita haklaken ita la simu osan no mós ita la labele faʼan Maromak nia Liafuan. (2 Kor 2:17) Ema neʼebé haklaken la bele buka atu manán buat ruma ka hein ema atu selu ninia serbisu.—Após 20:33-35. w16.05 2:7, 8

Karik ita gosta tebes roupa nia modelu ida, no Bíblia mós la fó ukun-fuan katak modelu neʼe ladiʼak. Maibé ita hatene katak ema balu husi ita-nia kongregasaun sei sente ladún diʼak se ita hatais roupa neʼe. Entaun, oinsá mak ita bele hatene Jeová nia hanoin? Bíblia dehan feto sira tenke “hatais ho loloos, ho respeitu no ho hanoin loos, laʼós hodi halo fuuk ho modelu oioin ka tau osan-mean ka fatuk-murak ka roupa neʼebé karun loos. Maibé sira tenke halo furak sira-nia an ho hahalok diʼak, katak hatais iha dalan neʼebé loos ba feto sira neʼebé adora Maromak”. (1 Tim 2:9, 10) Ita hatene katak konsellu neʼe ba feto no mane hotu. Tan neʼe, ita tenke hatais ho respeitu, ita la hanoin deʼit kona-ba ita rasik nia hakarak, maibé ita tenke hanoin kona-ba ema seluk nia sentimentu. No tanba domin, ita lakohi halo irmaun-irmán sira sidi ka sente an ho ita-nia hatais.—1 Kor 10:23; Flp 3:17. w16.05 3:14

Bainhira Adão halo sala kontra ninia Kriadór, nia la sai tan Maromak nia oan. Maski nuneʼe, Adão nia oan no bei-oan barak hili nafatin Jeová atu sai sira-nia Ukun-Naʼin. (Ebr 12:1) Sira haraik-an tebes ba sira-nia Kriadór, hodi nuneʼe mak sira hatudu katak sira hakarak Maromak mak sai sira-nia Aman ka Badain Sanan-Rai nian, laʼós Satanás. (João 8:44) Sira-nia laran-metin ba Maromak halo ita hanoin fali liafuan husi eskritura ba ohin. Ohin loron, ema neʼebé adora Jeová iha dalan neʼebé loos mós hakaʼas an atu hatudu haraik-an no halo tuir Jeová. Sira sente katak bolu Jeová nuʼudar Aman mak priviléjiu boot ida ba sira, no sira hakarak nia mak sai sira-nia Badain Sanan-Rai nian. Ita sente ita mak rai-mean neʼebé mamar hodi Maromak bele halo ita sai vazu neʼebé folin-boot tebes ba nia ka lae? Ita iha pasiénsia atu haree irmaun-irmán sira nuʼudar buat neʼebé Jeová forma hela no seidauk kompletu ka lae? w16.06 1:2, 3

Ohin loron, ita mós besik ona atu tama mundu foun, no ita-nia fiar mós hetan daudauk koko. Tan neʼe mak diʼak atu buka-hatene beibeik ita-nia fiar metin ka lae. Porezemplu, buka-hatene toʼok ita-nia fiar kona-ba Jesus nia liafuan neʼebé hakerek iha Mateus 6:33. Husu ba ita-nia an: ‘Planu no desizaun sira neʼebé haʼu halo hatudu katak haʼu tau fiar duni ba Jesus nia liafuan neʼe ka lae? Tan deʼit atu hetan tan osan, haʼu falta reuniaun no la bá haklaken ka lae? Se haʼu-nia serbisu mak aumenta barak liután, haʼu sei halo saida? Haʼu husik deʼit mundu neʼe mak atu kontrola haʼu-nia moris ka hanetik haʼu atu serbí Jeová ka lae?’ Se ita mak la rona ba Bíblia nia avizu kona-ba hasees an husi ransu neʼebé ladiʼak, ransu ho ema neʼebé kongregasaun hasai, ka kona-ba atividade halimar nian, neʼe bele halo toos ita-nia laran. Se ida-neʼe mak akontese daudauk iha ita-nia moris, ita tenke halo saida? Urjente tebes atu buka-hatene ita-nia fiar! Uza Bíblia atu korrije beibeik ita-nia hanoin no simu konsellu neʼe ho laran. w16.06 2:8, 9

Iha mundu tomak, iha organizasaun ida neʼebé ema hotu hadomi no serbí Maromak Jeová, ema sira-neʼe mak Testemuña ba Jeová. Maski sira hotu ema sala-naʼin, maibé Jeová uza nafatin ninia espíritu santu hodi dirije sira. Mai ita haree toʼok ezemplu balu neʼebé hatudu katak Jeová haraik daudaun bensaun ba ema sira-neʼe. Iha tinan 1914, ema neʼebé adora Jeová uitoan deʼit. Maibé Jeová haraik bensaun ba sira-nia serbisu haklaken. Tan neʼe, iha tinan sira tuirmai ema neʼebé aprende kona-ba lia-loos husi Bíblia mós aumenta toʼo rihun ba rihun no ikusmai sai Jeová nia Testemuña sira. Tuir loloos Jeová fó-hatene nanis ona katak buat sira-neʼe sei akontese, hodi temi liafuan iha eskritura ba ohin no dehan tan: “Haʼu, Jeová, haʼu rasik mak sei halo neʼe sai lalais liu tuir ninia tempu.” Ohin loron ita bele haree profesia neʼe sai loos daudaun. Jeová nia povu iha mundu tomak sai hanesan nasaun boot ida. Se ita haree iha mundu tomak, iha nasaun barak neʼebé sira-nia populasaun mak menus liu fali Testemuña ba Jeová iha mundu tomak. w16.06 4:1, 2

Ba Jesus, nia hatene katak, se ninia Aman iha lalehan mak tau matan ba manu nia hahán sira, nia fiar katak Jeová mós sei tau matan ba ema nia presiza loroloron nian. (1 Ped 5:6, 7) Ita hatene katak Jeová sei la lori hahán toʼo ita-nia oin, maibé nia sei fó bensaun ba ita-nia hakaʼas an atu kuda ai-han ka buka osan atu tau matan ba ita-nia presiza loroloron nian. Karik nia mós bele book ema seluk atu fahe buat neʼebé sira iha ho ita. Maski Jesus la temi katak Jeová mós fó fatin ba manu sira atu hela, maibé Jeová kria sira ho kbiit neʼebé ajuda sira atu halo knuuk, no nia mós kria buat oioin neʼebé manu presiza hodi halo knuuk. Ho ida-neʼe ita mós bele fiar katak Jeová sei ajuda ita atu buka fatin ba ita no ita-nia família atu hela. Bainhira Jesus koʼalia liafuan sira iha eskritura ba ohin, nia hatene katak lakleur tan nia sei mate ba ema hotu. (Kompara Lucas 12:6, 7.) Ninia mate neʼe laʼós atu fó ba manu ka animál seluk, maibé ba deʼit ita hodi ita bele moris ba nafatin.—Mt 20:28. w16.07 1:11-13

Sala mai husi neʼebé? No tanbasá mak ita mate? Bíblia hatete: “Liuhusi ema ida nia sala mak mate ukun nuʼudar liurai.” Loos duni, ita mate tanba ita hotu mai husi Adão. (Rom 5:12, 14, 17) Maski nuneʼe, ita bele hili atu la husik sala ukun ka kontrola ita. Oinsá mak ita bele halo nuneʼe? Tau fiar ba Jesus nia sakrifísiu. Bainhira ita halo nuneʼe, tuir loloos ita husik Jeová nia laran-diʼak neʼebé boot mak ukun fali ita. (Rom 5:20, 21) Maski ita sei sala-naʼin nafatin, maibé ita la presiza atu husik sala domina ita-nia moris. Se ita mak halo sala ruma, husu Jeová atu fó perdua ba ita. Maibé, oinsá mak Jeová nia laran-diʼak neʼebé boot bele ajuda ita? Paulo esplika: “Maromak hatudu sai ona ninia laran-diʼak neʼebé boot, . . . No ninia laran-diʼak neʼe hanorin ita atu la simu hahalok neʼebé la tuir ninia hakarak, no atu la simu hakarak mundu nian, maibé atu moris ho hanoin neʼebé loos no hahalok loos no serbí Maromak ho laran-metin iha mundu ohin neʼe nian.”—Tito 2:11, 12. w16.07 3:5, 6

Bainhira Adão no Eva hili atu kontra Jeová, neʼe lori dezastre boot ba moris kaben primeiru neʼe. Diabu Satanás, “samea uluk nian” lohi Eva hodi fiar katak, han ai-fuan husi “ai-hun koñesimentu nian kona-ba diʼak no aat” bele fó matenek espesiál ida ba nia. Satanás hatete ba nia katak, se nia mak han husi ai-hun neʼe, nia bele iha matenek atu deside rasik saida mak diʼak no aat. Hodi deside rasik atu han ai-fuan neʼe, Eva la hatudu respeitu ba Adão nuʼudar ulun ba família. No bainhira nia fó ai-fuan neʼe ba Adão atu han, Adão mós simu deʼit duké rona ba Maromak. (Apok 12:9; Gên 2:9, 16, 17; 3:1-6) Kuandu Jeová atu buka-hatene sé mak sala, Adão duun ba ninia feen. No Eva duun fali samea tanba lohi nia. (Gên 3:12, 13) Adão no Eva fó razaun beik hodi defende an, maibé ba Jeová, sira mak ema neʼebé kontra ona nia. Sira-nia ezemplu sai avizu ida ba ita! Se hakarak atu iha moris kaben neʼebé susesu, feen no laʼen tenkesér rona ba Jeová no simu responsabilidade ba sira ida-idak nia hahalok. w16.08 1:1, 4, 5

Saida mak baibain hamosu problema iha moris kaben nian? Ba ema balu, sira-nia moris kaben nian la sai tuir sira-nia hakarak, tan neʼe sira sai laran-tun ka hirus. Bele mós tanba ema naʼin-rua nia emosaun la hanesan, mai husi situasaun moris nian neʼebé la hanesan, problema ho osan, problema ho banin no problema kona-ba tau matan ba oan. Maibé diʼak tebes hodi haree katak iha kaben-naʼin kristaun barak uza Maromak nia matadalan hodi rezolve sira-nia problema ho didiʼak. Bainhira problema boot ruma mosu, kaben-naʼin tenke husu ajuda husi katuas sira. Irmaun sira-neʼe iha ona esperiénsia barak no bele ajuda ita buka matadalan husi Maromak nia Liafuan. Diʼak mós atu halo orasaun hodi husu Jeová nia espíritu santu, neʼe sei ajuda ita oinsá atu uza Bíblia nia prinsípiu no oinsá atu hatudu hahalok kristaun nian.—Gal 5:22, 23. w16.08 2:11-13

Jesus okupadu tebes iha serbisu haklaken. Maibé bainhira ema hakarak rona ba nia, nia gasta tempu ho sira hodi hanorin sira kona-ba buat barak. Porezemplu, loron ida ema-lubun boot halibur hamutuk iha tasi-ibun atu rona ba Jesus. Tan neʼe Jesus saʼe ba ró hamutuk ho Pedro hodi hanorin sira husi ró leten. Hotu tiha, nia halo milagre ida hodi halo Pedro kail ikan barak tebes no hatete liafuan iha eskritura ba ohin. Hahú husi tempu neʼebá, Pedro no ema sira neʼebé hamutuk ho nia “husik tiha buat hotu, sira laʼo tuir [Jesus].” (Lc 5:1-11) Nicodemos mós hakarak aprende kona-ba buat neʼebé Jesus hanorin. Maibé tanba nia mak membru ida husi Sinédriu, nia taʼuk ema atu koʼalia kona-ba nia se ema seluk haree nia koʼalia ho Jesus. Tan neʼe nia bá buka Jesus iha kalan. Jesus simu nia no gasta tempu barak hodi esplika lia-loos importante sira ba nia. (João 3:1, 2) Jesus sempre prontu atu uza ninia tempu hodi hanorin ema kona-ba lia-loos no hametin sira-nia fiar. Ita mós hakarak vizita ema iha tempu neʼebé diʼak ba sira, no gasta tempu atu hanorin sira komprende kona-ba lia-loos. w16.08 4:10, 11

Ho haraik-an, ita rekoñese duni katak Jeová mak moos no santu, no ninia ukun-fuan sira mak matadalan neʼebé diʼak ba ita, tan neʼe ita hakarak moris tuir ninia matadalan sira. Haraik-an mós bele ajuda ita atu hatudu respeitu ba ema seluk nia sentimentu no hanoin. Ita-nia hatais tenkesér hatudu katak ita mak Jeová nia atan. Jeová nia matadalan hotu santu, no nia hakarak ita atu halo tuir matadalan sira-neʼe. Ita gaba duni irmaun-irmán kona-ba sira-nia hatais no hahalok diʼak. Sira-nia ezemplu dada duni ema laran-loos no lori mós glória no ksolok ba Jeová. w16.09 3:18-20

Jacob hakarak nafatin luta makaʼas atu hetan bensaun husi Maromak. (Gên 32:24-26) Tanba ninia hakaʼas-an neʼe, Jeová fó duni bensaun ba nia hodi troka ninia naran ba fali Izraél. Naran neʼe signifika katak “Ida neʼebé Luta Hasoru Maromak” ka “Maromak Luta Hasoru Nia”. Jacob hetan duni kolen neʼebé ita hotu buka, neʼe mak Jeová simu nia no fó bensaun ba nia. Jacob nia feen Rakel hein atu haree oinsá mak Jeová sei haraik bensaun ba ninia laʼen nia oan sira. Maibé Rakel seidauk iha oan, no iha tempu neʼebá, se feto mak la bele iha oan, neʼe halo sira sente laran-susar tebes. Entaun, oinsá mak Rakel kontinua luta hasoru situasaun neʼebé halo nia laran-tun neʼe? Nia nunka lakon ninia esperansa. Nia luta nafatin hodi halo orasaun beibeik ba Jeová. Jeová rona duni Rakel nia orasaun sira, tanba ikusmai Jeová haraik bensaun ba nia hodi iha oan.—Gên 30:8, 20-24. w16.09 2:6, 7

Importante atu hanorin oan katak moris tuir Bíblia nia prinsípiu sira sei halo sira kontente. (Sal 1:1-3) Iha dalan oioin ita bele halo nuneʼe. Dalan ida mak husu oan atu imajina katak sira hakarak bá moris iha fatin dook ida, no sira presiza hili ema balu atu bá hela hamutuk ho sira. Karik bele husu, “Se imi hakarak moris dame iha neʼebá, ema hanesan saida mak imi hakarak hili?” Tuirmai, ita mós bele lee ba sira Galásia 5:19-23 kona-ba ema hanesan saida mak Jeová hakarak atu moris iha mundu foun. Tuir loloos, liuhusi dalan neʼe ita hanorin ita-nia oan lisaun importante rua. Primeiru, Jeová hanorin daudauk ita kona-ba oinsá atu bele moris kontente no iha dame ho ema seluk ohin loron. Segundu, nia hanorin daudauk ita kona-ba oinsá atu moris iha mundu foun. (Isa 54:13; João 17:3) Ita mós bele ajuda oan atu haree katak Bíblia ajuda ona irmaun-irmán barak. Porezemplu, buka esperiénsia ida husi ita-nia livru, karik série “Bíblia troka ema nia moris”, husi Livru Haklaken. w16.09 5:13, 14

Karik ita iha responsabilidade barak, maibé ita presiza buka tempu atu halaʼo estuda mesak no halaʼo adorasaun família nian. (Éf 5:15) Ita-nia hakarak laʼós deʼit atu lee livru ka prepara hodi bele hatoʼo komentáriu iha reuniaun, maibé importante atu husik Maromak nia Liafuan book ita-nia laran no hametin ita-nia fiar. Bainhira ita estuda, la hanoin deʼit kona-ba ema seluk nia presiza, maibé hanoin mós ita rasik nian. (Flp 1:9, 10) Ita rekoñese katak bainhira ita prepara informasaun kona-ba haklaken, ba reuniaun, ka atu hatoʼo diskursu, dala ruma ita la hanoin oinsá mak ita rasik mós bele uza informasaun sira-neʼe. Porezemplu, ema neʼebé teʼin, ka koziñeiru, nia sei koko uluk ai-han sira antes nia fó ba ema atu han. Maibé se nia mak hakarak moris ho saúde neʼebé diʼak, nia presiza teʼin hahán neʼebé diʼak ba ninia an, koko deʼit hahán sira neʼebé nia teʼin la bele fó saúde diʼak ba nia. Hanesan neʼe mós se ita mak hakarak atu iha relasaun neʼebé diʼak ho Jeová, ita rasik presiza han ai-han espirituál hodi estuda beibeik Bíblia. w16.10 2:10, 11

Atu komprende fiar mak saida, haree Ebreu 11:1. Eskritura neʼe esplika katak, se ita iha fiar, (1) ita sei “laran-metin katak ita-nia esperansa sei sai loos”. Ita-nia esperansa neʼe inklui mós buat sira neʼebé Jeová promete kona-ba futuru. Porezemplu, ita fiar katak iha futuru buat aat hotu sei la iha tan no Jeová sei lori mundu foun. (2) Ita mós sei “la duvida katak buat neʼebé ita fiar mak loos, maski neʼe la bele haree”. Buat neʼebé ita la bele haree mak kona-ba Maromak Jeová, Jesus Kristu, anju, no Maromak nia Ukun iha lalehan, maibé ita fiar katak sira iha. Oinsá mak ita hatudu katak ita iha fiar ba Maromak nia promesa no ba buat sira neʼebé ita-nia matan la bele haree? Liuhusi dalan neʼebé ita moris no liuhusi ita-nia koʼalia no hahalok. w16.10 4:6

Jeová no Jesus hafolin tebes buat hotu neʼebé ita halo hodi fó apoia ba Maromak nia Ukun, maski ita bele halo deʼit buat neʼebé tuir ita-nia kbiit. (Lc 21:1-4; 2 Kor 8:12) Porezemplu, ita hatene katak irmaun-irmán balu neʼebé idade ona hakaʼas an tebes hodi bele tuir beibeik reuniaun no bá haklaken. Ita fó laran-manas no gaba sira kona-ba buat sira neʼebé sira halo ka lae? Sin, buka oportunidade atu fó laran-manas ba ema seluk. Bainhira ita haree ema ida halo buat neʼebé diʼak, gaba sira. Neʼe mak buat neʼebé akontese ba apóstolu Paulo ho ninia belun Barnabé bainhira sira iha sidade Antiokia, iha Pisídia. Sinagoga nia ulun-naʼin hatete ba sira: “Maluk sira, se imi iha liafuan ruma atu fó laran-manas ba povu, bele fó-hatene bá.” Apóstolu Paulo aproveita duni oportunidade neʼe atu fó laran-manas ba ema hodi hatoʼo diskursu ida. (Após 13:13-16, 42-44) Se ita mak uza oportunidade sira atu fó laran-manas ba ema, sira mós sei fó fali laran-manas ba ita.—Lc 6:38. w16.11 1:3, 15, 16

Hodi hola parte iha Jeová nia organizasaun no hatene saida mak nia hakarak ita atu halo mak priviléjiu boot ida. Maibé ita iha responsabilidade atu halo tuir nia no halo buat neʼebé loos. Maski iha mundu neʼe iha ema barak gosta halo buat neʼebé la loos, maibé ba ita, ita tenke banati-tuir Jeová atu “odi buat neʼebé aat”. (Sal 97:10) Ita lakohi halo tuir ema neʼebé “dehan katak diʼak mak aat no aat mak diʼak”. (Isa 5:20) Ita-nia hakarak mak atu halo Jeová kontente, tan neʼe ita hakaʼas an atu iha moris neʼebé moos iha dalan hotu. (1 Kor 6:9-11) Tanba Jeová hadomi ita mak nia hakarak ita atu halo tuir Bíblia. Ita hadomi no laran-metin ba Jeová, tan neʼe mak ita hakarak halo tuir ninia matadalan iha uma, iha kongregasaun, serbisu-fatin, eskola, ka fatin naran deʼit. w16.11 3:13

Iha buat ida mak Estudante Bíblia sira presiza hadiʼa entre tinan 1914 no 1919. Sira seidauk hatene didiʼak Jeová nia hanoin kona-ba hakruʼuk ba governu katak sá. Tan neʼe mak nuʼudar grupu ida, sira la hatudu hahalok neutrál iha tempu hotu. Porezemplu, bainhira prezidente Estadus Unidus haruka ema atu reza kona-ba dame iha loron 30 Maiu 1918, Livru Haklaken mós fó laran-manas ba Estudante Bíblia sira atu halo orasaun kona-ba neʼe. Irmaun balu fó osan hodi apoia funu, no balu tan foti kilat hodi tuir funu. Maski sira presiza atu hadiʼa hahalok sira-neʼe, maibé la dehan katak tanba razaun sira-neʼe mak Maromak husik sira sai dadur ba Babilónia Boot. Realidade mak iha tempu Funu Mundiál Primeiru, sira komprende ona katak sira tenke sai husi relijiaun falsu no tempu atu haketak an iha dalan neʼebé kompletu mós besik ona.—Lc 12:47, 48. w16.11 5:9

Tanbasá mak apóstolu Paulo fó avizu ba ema kose-mina atu labele “halo tuir buat isin nian”? No tanbasá mak avizu neʼe mós importante ba ema kristaun hotu ohin loron, maski ita-nia esperansa mak atu hela iha lalehan ka iha rai? Tanba se ita la kuidadu, ita-nia hakarak isin nian bele sai buat neʼebé importante liu iha ita-nia moris. Porezemplu, bainhira apóstolu Paulo hakerek karta ba fiar-naʼin sira iha Roma, nia dehan katak sira sai ona “atan ba sira-nia hakarak rasik”. Paulo nia liafuan neʼe karik koʼalia kona-ba hakarak seksuál nian, ka kona-ba han, hemu, ka buat seluk neʼebé sai fali buat importante liu ba sira-nia moris. (Rom 16:17, 18; Flp 3:18, 19; Jud 4, 8, 12) No iha mós irmaun ida iha kongregasaun Korinto neʼebé “moris hamutuk fali ho ninia aman nia feen”. (1 Kor 5:1) Ema kristaun sira iha neʼebá, presiza duni rona ba Paulo nia avizu atu labele “hanoin buat isin nian”. (Rom 8:5, 6) Ohin loron mós, importante atu halo tuir avizu neʼe. w16.12 2:5, 8, 9

Koʼalia nakloke ba ema neʼebé ita bele tau fiar, hanesan ita-nia kaben, belun diʼak, ka katuas kongregasaun, bele ajuda ita tahan hasoru laran-taridu. Karik sira bele ajuda ita atu komprende diʼak liután kona-ba ita-nia situasaun. No Eskritura mós dehan: “Planu sira sei la sai loos kuandu ema la koʼalia ba malu, maibé buat hotu sei laʼo ho diʼak kuandu ema barak fó ideia.” (Prov 15:22) Reuniaun sira mós bele ajuda ita atu la sente laran-taridu demais. Iha semana ida-idak ita gasta tempu hamutuk ho irmaun-irmán sira neʼebé hanoin ita no sira hakarak tebes atu fó laran-manas ba ita. (Ebr 10:24, 25) “Fó laran-manas ba malu” liuhusi dalan hanesan neʼe bele hametin ita no halo fasil ba ita atu tahan hasoru ita-nia laran-taridu.—Rom 1:12. w16.12 3:17, 18

Bainhira ita hasoru problema saúde nian ka susar seluk neʼebé ita la bele kontrola, ita tenke entrega ita-nia laran-susar hotu ba Jeová. (1 Ped 5:6, 7) Ita mós tenke hakaʼas an atu tuir reuniaun sira no aproveita buat seluk neʼebé Maromak nia organizasaun fó ba ita. (Ebr 10:24, 25) Oinsá ho inan-aman sira neʼebé oan lakohi tan atu serbí Jeová? Sira bele aprende husi profeta Samuel nia ezemplu. Samuel iha oan-mane boot naʼin-rua, maibé nia laiha kbiit atu obriga sira hatudu laran-metin ba Jeová. (1 Sam 8:1-3) Nia entrega deʼit susar neʼe ba Jeová. Nia halo buat neʼebé nia bele halo hodi kontinua hatudu laran-metin ba Jeová no halo buat neʼebé Jeová simu. (Prov 27:11) Ohin loron, inan-aman balu mós hasoru situasaun hanesan neʼe. Maibé sira fiar katak Jeová sempre hein hodi simu fali ema neʼebé arrepende an. (Lc 15:20) Buat neʼebé inan-aman bele halo mak hatudu nafatin laran-metin ba Jeová hodi hein katak sira-nia ezemplu diʼak bele book sira-nia oan atu fila fali ba Jeová. w17.01 1:15, 16

Ema neʼebé haraik an haree ema seluk boot liu nia. Nia rekoñese katak nia iha limitadu, no nia simu sala neʼebé nia halo. Nia prontu atu rona ba ema seluk nia sujestaun no aprende husi ema seluk. Jeová gosta tebes ema neʼebé haraik an. Bíblia mós hatudu katak ema neʼebé haraik an hatene ninia an, nia hatene katak iha buat balu nia la iha kbiit atu halo, ka la iha direitu atu halo. Hahalok neʼe ajuda nia atu hatudu respeitu ba ema seluk no trata sira iha dalan neʼebé diʼak. Se ita la kuidadu, ita bele iha hanoin ka hatudu hahalok foti-an. Oinsá? Karik ita komesa sente katak ita importante liu ema seluk tanba ita ka ita-nia belun diʼak kaer priviléjiu iha kongregasaun. (Rom 12:16) Ka ita komesa atu dada atensaun demais ba ita-nia an. (1 Tim 2:9, 10) Ka karik ita komesa manda ema seluk atu halo buat ruma ka bandu sira atu labele halo buat ruma.—1 Kor 4:6. w17.01 3:6-8

Ohin loron, serbisu haklaken kontinua laʼo ba oin no Jeová nia organizasaun mós aproveita didiʼak teknolojia modernu hodi hatoʼo mensajen husi Bíblia. Maibé dala ruma sira neʼebé idade ona sente susar atu aprende dalan foun hodi halo buat ruma. (Lc 5:39) No mós, baibain fasil ba ema neʼebé idade ona atu sai fraku no la iha tan forsa. Tan neʼe diʼak ba sira neʼebé idade ona atu prepara sira neʼebé seidauk idade oinsá bele kaer responsabilidade iha Jeová nia organizasaun. (Sal 71:18) La fasil ba sira neʼebé idade ona atu fahe sira-nia knaar ba sira neʼebé seidauk idade. Dala ruma irmaun sira bele sente triste bainhira hanoin katak sira sei lakon knaar neʼebé sira gosta tebes atu halo ka serbisu bele sai runguranga. Ka karik sira sente la iha tempu atu fó treinu ba ema seluk. Maibé ba sira neʼebé seidauk idade mós presiza pasiénsia se sira seidauk hetan knaar ruma. w17.01 5:3, 4

Jesus moris mai nuʼudar ema perfeitu hanesan Adão nia moris. (João 1:14) Maibé Jesus la hanesan ho Adão. Jesus moris tuir Jeová nia ukun-fuan hotu nuʼudar ema perfeitu. Maski Jesus hasoru terus neʼebé makaʼas tebes, nia nunka halo buat ida atu kontra Jeová nia ukun-fuan. Jesus mak ema perfeitu, nia laran-metin tebes no halo tuir Maromak. (1 Tim 2:6) Jesus mate ba ita, no ninia sakrifísiu loke dalan ba ema hotu, mane, feto, no labarik atu hetan moris rohan-laek. (Mt 20:28) Jesus nia sakrifísiu mak xave importante neʼebé loke dalan ba Maromak nia hakarak atu sai loos.—2 Kor 1:19, 20. w17.02 1:15, 16

Imajina toʼok se ita liu husi estrada ida husi rai-okos neʼebé nakukun tebes. Karik ita hanoin, ita sei haree fali naroman iha oin ka lae? Dala ruma ita bele hasoru problema neʼebé susar tebes ba ita atu tahan. Jesus mós sente ona hanesan neʼe. Bainhira ema kastigu nia iha ai-riin terus leten, ema hamoe no haterus nia. Karik ba Jesus neʼe mak tempu neʼebé nakukun tebes iha ninia moris. Maibé Jesus tahan buat sira-neʼe hotu. (Ebr 12:3) Jesus haree liu ba rezultadu husi ninia laran-metin ba Jeová, tanba liuhusi ninia tahan, nia bele halo santu Maromak nia naran no apoia Jeová nia direitu atu ukun. Jesus hatene katak terus neʼebé nia hasoru temporáriu deʼit, maibé kolen neʼebé nia sei simu iha lalehan sei hela ba nafatin. Ohin loron ita bele hasoru susar no terus neʼebé todan, maibé hanoin-hetan katak buat sira-neʼe ba temporáriu deʼit. w16.04 2:10

Ohin loron, ema barak la sente moe bainhira sira halo sala, tan neʼe sira la komprende tansá mak ita presiza Jesus nia sakrifísiu. Sira seidauk hatene sala mak saida, oinsá mak sala lori susar, no ema presiza halo saida deʼit hodi bele livre husi sala. Maibé kuandu sira komprende didiʼak ona sala mak saida, sira sente agradese tebes ba Jeová nia laran-diʼak neʼebé boot hodi haruka ninia Oan-Mane mai mundu atu halo ita livre husi sala no mate. (1 João 4:9, 10) Kristu nia sakrifísiu mak evidénsia boot liu hotu neʼebé hatudu katak Jeová hadomi tebes ita no ida-neʼe hatudu mós nia iha laran-diʼak neʼebé boot tebes ba ita. Hodi hatene katak liuhusi tau fiar ba Jesus nia sakrifísiu mak Jeová sei fó perdua ba ita-nia sala no ita mós bele iha konxiénsia neʼebé moos, neʼe halo ita sente laran-kmaan tebes, loos ka lae? (Ebr 9:14) Neʼe mak liafuan neʼebé diʼak duni atu fahe ba ema seluk! w16.07 4:6, 7

Jeová fó garantia katak, se ita tau fiar ba Jesus nia sakrifísiu, nia sei “hamoos tiha” ita-nia sala. Nia sei fó perdua ba ita-nia sala hotu. (Após 3:19-21) Jesus nia sakrifísiu mak loke dalan hodi Jeová bele foti ema balu atu sai nia oan iha lalehan. Sira mak ema kose-mina. (Rom 8:15-17) Ba “bibi seluk”, Jeová konvida sira atu sai parte ida ba ninia família iha rai. Bainhira sira sai fali perfeitu, sira sei hetan koko ba dala ikus. Se sira mak laran-metin nafatin ba Jeová iha tempu neʼebá, nia mós sei haree sira nuʼudar ninia oan. (Rom 8:20, 21; Apok 20:7-9) Jeová sei hadomi ninia oan hotu ba nafatin. Bensaun husi Jesus nia sakrifísiu mós sei hela ba nafatin. Jeová fó ona prezente furak neʼe, no la iha ema ida mak bele hadau prezente neʼe husi ita. w17.02 2:15, 16

Bainhira Jeová dada ita sai ninia belun, nia hatene ita-nia fraku hotu no nia hatene katak dala ruma ita bele halo sala. Maibé nia hakarak nafatin atu ita sai ninia belun. Jeová hadomi tebes ita, tan neʼe mak nia fó ninia Oan-Mane nia moris nuʼudar prezente folin-boot ida ba ita. Nia halo nuneʼe hodi nia bele uza Jesus nia sakrifísiu neʼe atu kasu ita-nia sala. (João 3:16) Tan neʼe mak bainhira ita halo sala ruma, ita bele husu Jeová atu fó perdua ba ita-nia sala, no liuhusi Jesus nia sakrifísiu, ita bele fiar katak Jeová sei perdua ita hodi ita sai nafatin ninia belun maski ita sala-naʼin nafatin.—1 Tim 1:15. w16.05 4:6, 7