Fevereiru

Oinsá mak hahalok atu tahan bele fó treinu ita? Ida neʼe ajuda ita atu “bele sai kompletu no sai diʼak iha buat hotu, hodi la kuran buat ida.” (Tgo 1:4) Susar no terus neʼebé ita hasoru bele hatudu sai ita-nia fraku no hahalok neʼebé ita presiza atu hadiʼa. Bainhira ita tahan hasoru susar no terus sira-neʼe, ita mós aprende oinsá atu hadiʼa ita-nia hahalok sira, no neʼe bele halo ita sai pasiénsia, hatudu agradese, no iha domin liután. Hahalok atu tahan bele treinu ita sai ema kristaun neʼebé diʼak. Tan neʼe mak bainhira ita hasoru susar no terus ruma, ita lakohi rende an ka halo buat neʼebé kontra Jeová nia ukun-fuan hodi hapara susar no terus sira-neʼe. Porezemplu, se ita mak luta hela hasoru hanoin neʼebé foʼer, halo orasaun ba Jeová atu husu ajuda hodi ita la bele monu ba tentasaun. Se ema ida husi ita-nia família mak kontra ita, keta halo tuir deʼit sira. Kaer metin nafatin ba Jeová hodi adora nia. Tenke hanoin-hetan katak: Atu Jeová simu ita, ita tenke tahan.—Rom 5:3-5; Tgo 1:12. w16.04 2:15, 16

Baibain ema gosta gaba sira-nia rasa, suku, kultura, sidade, ka nasaun. Maibé, Jeová nunka iha hanoin katak ema ida ka grupu husi ema ruma diʼak liu fali seluk, ba nia ita hotu hanesan deʼit. Diʼak tanba nia kria ema ida-idak la hanesan, hodi nuneʼe ita bele haksolok ho kultura neʼebé la hanesan. Jeová nunka hakarak ita atu husik ita-nia kultura, maibé nia mós lakohi ita atu hanoin katak ita mak diʼak liu fali ema seluk. (Rom 10:12) Gaba an liu kona-ba ita-nia nasaun mak nasionalizmu nia hun. Se ita mak iha hanoin hanesan neʼe, karik neʼe bele halo susar ba ita atu mantein neutrál. Buat hanesan neʼe akontese ona ba ema balu iha apóstolu sira-nia tempu. Irmaun-irmán balu diskrimina malu tan deʼit sira mai husi rai neʼebé la hanesan. (Após 6:1) Oinsá mak ita bele buka-hatene ita rasik iha problema hanesan neʼe ka laiha? Porezemplu, se iha irmaun ka irmán ida neʼebé husi rai seluk fó sujestaun ida ba ita, no ita hanoin kedas hanesan neʼe, ‘Iha neʼe ami hatene liu imi’, depois, ita lakohi simu ninia sujestaun neʼe. Se nuneʼe, hanoin fali kona-ba konsellu importante iha eskritura ba ohin. w16.04 4:12, 13

Jesus uluk haklaken “liafuan diʼak kona-ba Maromak nia Ukun”, no nia mós hakarak ninia dixípulu sira halo hanesan neʼe. Ohin loron, sé mak haklaken hela mensajen neʼe ba ema hotu? (Mt 28:19) Testemuña ba Jeová deʼit! Padre misionáriu ida hatete ba Testemuña ida katak nia bá ona rai barak, no iha rai ida-idak nia sempre husu ba Testemuña mensajen saida mak sira haklaken ba ema. Padre neʼe hatete: “Sira hotu beik-teen tebes tanba sira hotu fó resposta ida deʼit: ‘Liafuan diʼak kona-ba Maromak nia Ukun.’” Tuir loloos ita laʼós beik, maibé tanba ita iha unidade nuʼudar kristaun neʼebé loos. (1 Kor 1:10) No tanba mensajen neʼe mak iha ita-nia Livru Haklaken ita fó títulu Livru Haklaken—Fó sai Maromak nia Ukun. Livru neʼe tradús ona ba língua 254 no kada edisaun ita halo maizumenus hamutuk 59.000.000. Livru neʼe sai hanesan livru neʼebé fahe barak liu iha mundu tomak! w16.05 2:6

Haree toʼok ezemplu ida oinsá mak ita bele uza dalan neʼebé Jeová hanoin atu halo desizaun neʼebé matenek. Porezemplu, karik ita hakarak atu serbí nuʼudar pioneiru, no atu kumpre ita-nia planu, karik ita mós komesa moris iha dalan neʼebé simples. Maibé ita duvida katak ita bele kontente ka lae atu moris ho osan no sasán uitoan deʼit. Tuir loloos, Bíblia la fó mandamentu katak ema hotu tenkesér sai pioneiru. Haklaken-naʼin baibain mós Jeová simu atu adora nia. Maibé Jesus hatete katak ema neʼebé halo sakrifísiu ba Maromak nia Ukun sei hetan bensaun barak husi Maromak. (Lc 18:29, 30) Bíblia mós hatete katak se ita mak hakaʼas an hodi hahiʼi Jeová, neʼe sei halo Jeová no ita-nia an kontente. (Sal 119:108) Halo orasaun no hanoin didiʼak kona-ba eskritura sira-neʼe bele ajuda ita atu halo desizaun neʼebé diʼak ba ita-nia situasaun no Jeová mós sei fó bensaun ba ita. w16.05 3:13

Tuir loloos, informasaun neʼebé hakerek ba joven sira mós bele kona ita neʼebé laʼós joven. Tanba ita hotu presiza defende ita-nia fiar, kontrola ita-nia hirus, tahan hasoru tentasaun husi kolega, no hasees an husi atividade halimar nian neʼebé ladiʼak no ransu neʼebé ladiʼak. Tan neʼe, maski informasaun sira-neʼe hakerek liuliu atu ajuda joven sira, maibé informasaun neʼe bazeia ba prinsípiu sira husi Bíblia neʼebé ita hotu presiza atu halo tuir. Ita-nia livru sira mós ajuda joven atu hametin sira-nia relasaun ho Jeová. Maibé neʼe mós bele ajuda ema boot sira.—Ecle 12:13. w16.05 5:15, 16

‘Jeová ita-nia Maromak mak Jeová mesak ida deʼit’. Liafuan sira-neʼe importante tebes ba ema Izraél tanba neʼe fó kbiit ba sira atu hasoru susar sira neʼebé sira sei hasoru bainhira tama ba rai promete nian. Liafuan sira-neʼe mós sei fó forsa ba ita atu tahan hasoru terus boot neʼebé besik ona no kontribui ba dame no unidade iha mundu foun. Tan neʼe, mai ita kontinua adora Jeová mesak deʼit no serbí nia ho laran tomak, neon tomak, no kbiit tomak, no mós hakaʼas an atu kaer metin ba ita-nia dame no unidade ho irmaun-irmán sira. Se ita mak kontinua halo buat sira-neʼe, Jesus sei hakotu katak ita mak bibi-malae no ita mós sei haree ninia liafuan tuirmai neʼe sai loos: “Mai, imi neʼebé haʼu-nia Aman fó bensaun, mai simu Ukun neʼebé prepara ona ba imi husi mundu hahú.”—Mt 25:34. w16.06 3:2, 20

Se ita mak iha hahalok foti-an, bainhira ita halo sala, hahalok neʼe bele halo ita sai rai-mean neʼebé toos hodi buka deʼit razaun atu defende ita-nia an. Uluk, iha ona irmaun ka irmán ida hakanek Ita ka lae? Ita lakon ona priviléjiu ruma ka lae? Iha tempu neʼebá, Ita halo saida? Ita hatudu hahalok foti-an iha tempu neʼebá ka lae? Ka Ita hanoin liu kona-ba hadame malu ho Ita-nia maluk no laran-metin nafatin ba Jeová? (Sal 119:165; Kol 3:13) Se ema ida halo sala, no subar beibeik ninia sala, karik neʼe bele halo susar ba nia atu simu konsellu husi Bíblia. Se nuneʼe, fasil ba nia atu monu ba sala seluk. (Ecle 8:11) Irmaun ida neʼebé uluk iha toman atu haree beibeik pornografia, ikusmai nia dehan: “Haʼu mós komesa iha hahalok muramura kona-ba katuas kongregasaun sira.” Ninia toman neʼe estraga duni ninia relasaun diʼak ho Jeová. Maibé ikusmai ema seluk kaer toman ninia hahalok neʼe no katuas sira ajuda fali nia. Ita hatene katak ita hotu ema sala-naʼin. Maibé se ita mak haree katak ita komesa hatudu hahalok muramura ba sira neʼebé fó konsellu ita, ka buka razaun atu defende ita-nia sala duké husu Jeová atu fó perdua ba ita no ajuda ita, neʼe hatudu katak karik ita-nia laran sai toos daudaun ona. w16.06 2:5, 6

Jesus hatene katak ninia rona-naʼin sira hanoin barak kona-ba saida mak sira sei han, hemu, no hatais. Entaun, Jesus hakarak ajuda sira atu komprende tansá mak sira labele hanoin resin kona-ba buat sira-neʼe. Nia hatene katak se sira mak hanoin demais kona-ba buat naran deʼit, neʼe bele halo sira haluha kona-ba buat neʼebé importante liu iha sira-nia moris. Jesus hanoin tebes ninia dixípulu sira, tan neʼe mak nia fó avizu dala haat ba sira kona-ba perigu neʼe iha ninia diskursu iha Foho. (Mt 6:27, 28, 31, 34) Jesus hatene katak “iha loron ikus sira”, ita sei moris iha tempu neʼebé susar tebes. (2 Tim 3:1) Tempu neʼe sei lori susar kona-ba atu hetan serbisu, sasán sei sai karun, ema barak sei sai kiak, no hahán latoʼo. Maibé Jesus mós hatene katak ema nia “moris iha folin-boot liu fali ai-han no isin iha folin-boot liu fali hatais”. w16.07 1:8, 9

Ita laiha kbiit atu halo tuir Jeová ho perfeitu, tan neʼe ita la serve atu simu ninia laran-diʼak. No Liurai Salomão mós hatete: “La iha ema loos iha rai neʼebé mak sempre halo buat diʼak no nunka halo sala.” (Ecle 7:20) Apóstolu Paulo mós dehan: “Ema hotu halo sala ona no la bele hetan Maromak nia glória,” no “sala nia kolen mak mate”. (Rom 3:23; 6:23a) Maibé, tanba Jeová hadomi tebes ema mak nia haruka “ninia Oan-Mane mesak” hodi mate ba ita. Ida-neʼe mak dalan boot liu hotu neʼebé nia hatudu ninia laran-diʼak neʼebé boot ba ita. (João 3:16) Hodi nuneʼe mak apóstolu Paulo dehan katak Jesus “agora hetan ona koroa glória no hahiʼi nian tanba nia hetan terus toʼo mate, atu nuneʼe liuhusi Maromak nia laran-diʼak neʼebé boot, nia bele koko mate ba ema hotu”. (Ebr 2:9) Loos duni, “prezente neʼebé Maromak fó mak moris rohan-laek liuhusi Kristu Jesus ita Naʼi”.—Rom 6:23b. w16.07 3:3, 4

Kaben mak parte ida husi ema nia moris. Maibé kaben nia hun mai husi neʼebé, no tanbasá mosu arranju neʼe? Buka-hatene resposta sira-neʼe bele ajuda ita atu iha hanoin neʼebé loos kona-ba kaben no ninia bensaun sira. Bainhira Maromak kria tiha Adão, nia haruka Adão atu fó naran ba animál sira. Adão haree katak animál hotu iha pár, maibé “mane neʼe rasik la iha ajuda-naʼin ida nuʼudar ninia pár”. Tan neʼe Maromak halo nia toba-dukur, no foti ruin knosen ida husi nia hodi halo sai feto ida. Tuirmai Jeová lori feto neʼe ba Adão hodi sai ninia feen. (Gên 2:20-24) Ida-neʼe mak kaben primeiru, Jeová rasik mak halo arranju neʼe. Tinan barak liutiha, Jesus repete fali Jeová nia liafuan hodi dehan: “Mane ida sei husik ninia inan no aman no nia sei hela ho nia feen no sira naʼin-rua sei sai isin ida deʼit.” (Mt 19:4, 5) Tanba Maromak uza Adão nia ruin knosen hodi halo feto ida ba nia, ita bele fiar katak Adão no Eva hatene katak tuir loloos sira naʼin-rua besik tebes ba malu. Jeová nunka hakarak feen ho laʼen atu soe malu no nia hakarak ema atu moris ho kaben ida deʼit toʼo mate. w16.08 1:1, 2

Baibain Jesus mós koʼalia ho ema ida-idak. Ezemplu ida mak Jesus koʼalia ho feto ida neʼebé mai atu kuru bee husi bee-posu ida besik sidade Sikar. (João 4:5-30) Nia mós koʼalia ba kobradór impostu naran Mateus Levi no konvida nia atu sai ninia dixípulu. Mateus simu Jesus nia konvite hodi tuir nia no ikusmai Mateus konvida Jesus ho ema seluk ba ninia uma atu han hamutuk. Iha tempu neʼebá Jesus mós koʼalia ba ema seluk tan. (Mt 9:9; Lc 5:27-39) Iha tempu seluk Jesus mós koʼalia didiʼak ba Natanael, maski Natanael koʼalia hatún ema Nazaré. Maibé tanba Jesus koʼalia iha dalan neʼebé diʼak no mamar ba Natanael, ikusmai nia troka ninia hanoin kona-ba Jesus, ema husi Nazaré. Neʼe halo Natanael hakarak aprende liután husi Jesus. (João 1:46-51) Tan neʼe mak bainhira ita koʼalia ho ema iha dalan neʼebé diʼak no mamar, karik ema mós sei hakarak rona kona-ba buat neʼebé ita koʼalia. Se ita mak hanorin estudante Bíblia atu koʼalia iha dalan hanesan neʼe, sira mós sei sente gosta atu haklaken. w16.08 4:7-9

Se problema boot kaben nian mak dada ba tempu kleur, neʼe bele halo kaben-naʼin haketak malu ka soe malu. Kuandu hasoru problema boot, kaben-naʼin balu hanoin katak dalan diʼak liu atu rezolve problema mak haketak malu deʼit. Maibé neʼe sei kria problema liután. Jesus hatete katak desizaun atu haketak malu mak desizaun neʼebé sériu. Tanba bainhira Jesus repete tiha Maromak nia liafuan kona-ba moris kaben nian, tuirmai nia hatutan dehan: “Buat neʼebé Maromak tau hamutuk, ema keta haketak.” (Mt 19:3-6; Gên 2:24) Jeová nia hakarak mak atu feen-laʼen moris hamutuk toʼo mate. (1 Kor 7:39) Ita hotu presiza hanoin-hetan katak ita sei hatán ba Jeová ba ita-nia hahalok sira. Hatene ida-neʼe bele ajuda kaben-naʼin atu rezolve kedas problema hodi problema neʼe la sai boot liután. w16.08 2:10, 11

Ita tenke matan-moris iha tempu hotu. Tanbasá? Tanba karik iha tempu neʼebé ita seidauk prepara didiʼak ka bainhira ita fraku hela mak ita-nia inimigu sira sei ataka ita. Liafuan sira-neʼe fó laran-manas ba ita katak se ita mak kontinua luta, ita bele manán! Maibé, se ita mak la matan-moris ona no lakohi luta ona, Satanás, ninia mundu, no ita-nia fraku sira mak sei sai forsa liu fali ita. Tan neʼe, hiʼit nafatin ita-nia liman hodi Satanás la halo taʼuk ita! (1 Ped 5:9) Hanoin nafatin kona-ba tansá mak ita hakarak luta, neʼe mós bele ajuda ita atu manán. Ita-nia razaun atu luta mak tanba ita hakarak halo buat neʼebé Maromak simu no atu hetan ninia bensaun. Eskritura iha Ebreu 11:6 hatete: “Ema neʼebé hakbesik ba Maromak tenke fiar katak Maromak iha, no fiar mós katak Maromak sei fó kolen ba sira neʼebé buka nia ho laran.” Liafuan “buka nia ho laran” signifika katak ita tenke hakaʼas an tebes atu bele halo buat neʼebé Maromak simu.—Após 15:17. w16.09 2:4, 5

Bíblia mak matadalan neʼebé diʼak atu ajuda ita halo desizaun matenek neʼebé sei lori glória ba Maromak. Maski nuneʼe, ita rasik iha nafatin liberdade atu hili roupa neʼebé ita gosta atu hatais. Ema ida-idak gosta hatais roupa ho modelu neʼebé la hanesan. Maibé buat neʼebé importante mak atu iha hatais neʼebé kabeer, moos, la dada atensaun, tuir situasaun, no la kontra ema nia kultura. La fasil atu buka roupa neʼebé loos no respeitu. Loja barak faʼan deʼit modelu sira neʼebé ema barak gosta. Tan neʼe mak karik presiza tempu barak atu buka-hetan saia, vestidu, no bluza neʼebé diʼak, ka kazaku, no kalsa naruk neʼebé la aperta liu. Maibé ita-nia irmaun-irmán sira sei hafolin ita-nia hakaʼas-an hodi hatais iha dalan neʼebé furak no respeitu. Hodi hatene katak ita fó glória ba Maromak sei halo ita sente kontente liu se kompara ho sakrifísiu neʼebé ita halo atu la hatais roupa neʼebé ita gosta. w16.09 3:15, 16

Se ita uza ai-knanoik hodi hanorin oan, neʼe bele ajuda sira komprende liu. Ai-knanoik neʼebé diʼak bele hametin oan nia fiar katak buat neʼebé Bíblia hatete mak loos. Porezemplu, hanoin toʼok kona-ba eskritura ba ohin. Diʼak atu ajuda oan uza sira-nia kbiit atu hanoin hodi komprende kona-ba eskritura neʼe duké hatete deʼit ba sira katak neʼe mai husi Jeová. Ita bele esplika katak iha Job nia tempu, ema seidauk inventa teleskópiu ka aviaun atu saʼe ba fulan, tan neʼe susar ba ema iha tempu neʼebá atu fiar katak planeta mundu bele namlele iha fatin mamuk ida. Depois oan sira bele uza bola ka fatuk ida atu prova katak buat ida neʼebé todan la bele duni atu namlele saʼe iha fatin mamuk ida. Hanorin iha dalan hanesan neʼe bele ajuda oan hodi haree katak Jeová mak haruka ema hakerek informasaun neʼe iha tempu neʼebé ema seidauk hatene kona-ba planeta nia liʼur.—Neem 9:6. w16.09 5:9, 12

Hatene deʼit kona-ba Jeová nia planu ba futuru la dehan katak iha ona fiar. Tanba ema neʼebé iha fiar, nia sei moris tuir dalan neʼebé Jeová no Jesus hakarak nia atu moris, no nia mós sei ajuda fali ema seluk atu hatene kona-ba Jeová no Jesus. Ita tenkesér iha fiar no hametin fiar neʼe se ita hakarak atu moris ba nafatin iha Maromak nia mundu foun. Fiar hanesan ho ai-horis. Ita tenkesér rega beibeik hodi ai neʼe bele moris no sai boot. Selae, ai neʼe bele sai namlaek no mate. Hanesan neʼe mós ho fiar, ita tenke halo fiar neʼe buras nafatin hodi nia bele sai boot liután.—Tito 2:2; 2 Tes 1:3; Lc 22:32; Ebr 3:12. w16.10 4:4, 5

Bainhira ema Babilónia lori Daniel ho ninia belun sira ba rai-Babilónia, ema koko atu obriga sira hodi simu rai neʼe nia kultura no relijiaun. Oinsá? Ema hanorin sira atu “koʼalia ema Kaldeia nia língua” no fó ema Babilónia nia naran ba sira. (Dan 1:3-7) Sira fó naran ida ba Daniel neʼebé iha ligasaun ho Bel, maromak boot liu iha Babilónia. Karik Liurai Nabukodonosor halo nuneʼe atu halo Daniel fiar katak ema Babilónia nia maromak mak forsa liu fali Daniel nia Maromak Jeová. (Dan 4:8) Maski ema haruka Daniel atu han liurai nia hahán gostu, maibé nia “deside iha ninia laran” katak nia sei la han hahán neʼebé kontra Maromak nia ukun-fuan. (Dan 1:8) Oinsá mak Daniel bele kaer metin ba ninia relasaun ho Jeová iha ema nia rai? Tanba nia estuda beibeik livru sagradu sira iha ninia língua rasik. (Dan 9:2) Tan neʼe mak maski nia hela iha rai-Babilónia ba tinan 70, ema hatene nafatin ninia naran ebreu nian.—Dan 5:13. w16.10 2:7, 8

Hahú husi tinan 1919, Jesus uza “atan laran-metin no matenek” atu ajuda ita komprende kona-ba Bíblia no halo tuir ninia matadalan. (Mt 24:45-47) Loos duni, halo tuir matadalan sira husi Bíblia bele ajuda kongregasaun atu moos, iha dame no unidade. Tan neʼe, husu ba Ita-nia an, ‘Haʼu hatudu laran-metin ba Jesus hodi halo tuir matadalan husi atan laran-metin ka lae?’ Maromak nia Liafuan mós esplika kona-ba ninia organizasaun parte lalehan nian. Porezemplu, iha profeta Ezequiel nia vizaun, nia haree Maromak Jeová lori kuda-karreta ida neʼebé muda an lalais tuir ninia hakarak. Kuda-karreta neʼe reprezenta ninia organizasaun parte lalehan nian. (Eze 1:4-28) Lakleur tan Jesus ho anju sira sei halakon mundu aat neʼe. Jeová sei uza ninia organizasaun atu halo ninia naran sai santu no sei la iha tan ema atu kritika dalan neʼebé Jeová ukun. w16.11 3:9, 10

Hanesan Jesus nia dixípulu iha apóstolu sira-nia tempu, ita mós halibur hamutuk hodi fó laran-manas ba malu. (1 Kor 14:31) Jeová nia atan sira neʼebé serbí nia ba tempu kleur ona mós presiza atu hetan laran-manas. Porezemplu, hanoin kona-ba Josué. Jeová hili nia atu lori ema Izraél hodi tama ba rai neʼebé Nia promete ona. No Jeová haruka Moisés atu fó laran-manas ba Josué maski Josué serbí Nia ba tinan barak ona. Jeová dehan: “Hili Josué no fó laran-manas ba nia no hametin nia, tanba nia mak ida neʼebé sei hakur mota neʼe iha povu nia oin no nia mak sei lori sira atu foti rai neʼebé ó sei haree.” (Deut 3:27, 28) Josué presiza duni atu hetan laran-manas tanba tuirmai nia sei kaer responsabilidade boot hodi lori ema Izraél halo funu barak no pelumenus lakon dala ida. (Jos 7:1-9) Hanesan neʼe mós ohin loron, ita presiza fó laran-manas ba katuas kongregasaun no katuas área nian tanba sira hakaʼas an atu tau matan ba Maromak nia bibi.—1 Tes 5:12, 13. w16.11 1:12, 13

Estudante Bíblia sira hatene katak latoʼo atu fó-hatene deʼit ba família, kolega, no membru husi igreja sira katak sira la apoia tan relijiaun falsu. Sira mós hakarak fó-hatene ba mundu tomak katak Babilónia Boot mak hanesan feto-aat ida! Tan neʼe mak entre fulan-Dezembru tinan 1917 toʼo tinan 1918 nia hahú, Estudante Bíblia neʼebé uitoan deʼit fahe tratu hamutuk 10.000.000 ho títulu “The Fall of Babylon” (Babilónia monu). Tratu neʼe koʼalia nakloke kona-ba igreja kristaun sira, no neʼe halo igreja nia ulun-naʼin sira hirus tebes, maibé Estudante Bíblia sira la taʼuk. Sira kontinua haklaken tanba sira hakarak “halo tuir Maromak nuʼudar ukun-naʼin duké halo tuir ema”. (Após 5:29) Neʼe hatudu saida mai ita? Ida-neʼe hatudu ho klaru katak durante tempu Funu Mundiál Primeiru, Estudante Bíblia sira la husik tan Babilónia Boot atu halo sira dadur, maibé sira hakaʼas an hodi sai husi relijiaun falsu. No sira mós ajuda ema seluk atu sai husi nia. w16.11 5:2, 4

Ema balu hanoin katak Paulo halo komparasaun kona-ba ema kristaun no ema neʼebé laʼós kristaun. Maibé Paulo nia karta hakerek atu fó ba ema kristaun, sira neʼebé “bolu nuʼudar santu”. (Rom 1:7) Tan neʼe mak ema neʼebé “halo tuir buat isin nian” no ema neʼebé “halo tuir espíritu” refere ba ema kristaun sira. Se nuneʼe, Paulo koʼalia saida bainhira nia temi kona-ba ema neʼebé “halo tuir buat isin nian” iha Roma 8:4-13? Ita bele lee Roma 7:5 hodi buka-hatene resposta. Paulo dehan: “Basá kuandu ita moris tuir isin nia hakarak, Ukun-Fuan hatudu sai sala iha ita-nia isin.” Husi eskritura neʼe, Paulo esplika katak ema neʼebé “moris tuir isin nia hakarak” mak sira neʼebé hanoin deʼit no halo tuir deʼit ‘sala neʼebé iha sira-nia isin’, no sira halo buat naran deʼit tuir sira-nia hakarak. w16.12 2:5, 7

Dala ruma ema sente laran-taridu kona-ba sala neʼebé sira halo iha tempu uluk. Dala ruma Liurai David mós sente ninia ‘sala sira barak toʼo halo nia mout’. Nia dehan: “Haʼu-nia laran-susar halo haʼu halerik ho lian makaʼas.” (Sal 38:3, 4, 8, 18) Bainhira iha situasaun hanesan neʼe, David halo buat ida neʼebé matenek. Nia tau fiar ba Jeová nia laran-sadiʼa no nia fiar katak Jeová fó perdua ba nia. (Sal 32:2, 3, 5) Problema ohin loron nian mós bele halo ita laran-taridu. Porezemplu, bainhira David hakerek Salmo 55, nia taʼuk hela ema atu oho nia. (Sal 55:2-5) Maski nuneʼe, nia nunka husik ninia laran-taridu atu halakon ninia fiar ba Jeová. Nia husu beibeik Jeová atu ajuda nia, no nia mós hatene katak importante atu halo buat ruma kona-ba ninia situasaun neʼe. (2 Sam 15:30-34) Ita bele aprende lisaun ida husi David. Duké husik laran-taridu halo Ita mout, diʼak atu hakaʼas an hodi rezolve Ita-nia problema, no tau fiar ba Jeová katak nia sei ajuda Ita. w16.12 3:14, 15

David simu Jeová nia ajuda liuhusi profeta Natan. David mós halo orasaun hodi fó sai ninia sala ba Jeová atu hatudu katak nia hakarak tebes atu hadiʼa fali ninia relasaun diʼak ho Jeová. (Sal 51:1-17) Duké husik ninia laran fó sala ba nia, nia hadiʼa ninia hahalok sira atu la monu fali ba sala neʼebé uluk nia halo. Ikusmai David mate, maibé Jeová hanoin-hetan nafatin katak nia mak ema neʼebé laran-metin. (Ebr 11:32-34) Ita bele aprende saida husi David nia ezemplu? Se ita mak monu ba sala neʼebé boot, ita tenke arrepende an ho laran hodi fó sai ita-nia sala ba Jeová no husu nia atu fó perdua ba ita. (1 João 1:9) Ita mós presiza buka ajuda husi katuas sira tanba sira bele ajuda ita atu hadiʼa fali ita-nia relasaun ho Jeová. (Tgo 5:14-16) Se ita husik Jeová atu ajuda ita, neʼe hatudu katak ita tau fiar ba ninia promesa atu fó perdua ba ita. Ita mós presiza hadiʼa ita-nia hahalok hodi la monu fali ba sala no kontinua serbí Jeová ba nafatin.—Ebr 12:12, 13. w17.01 1:13, 14

Saida mak hahalok foti-an? Foti-an mós iha arti halo buat neʼebé ita la iha direitu ka podér atu halo, karik tanba ita la iha pasiénsia. Tanba ita la perfeitu, dala ruma ita hotu hatudu hahalok neʼe. Maibé ita aprende husi Liurai Saul nia ezemplu katak, se ita mak iha toman atu hatudu beibeik hahalok neʼe, Jeová sei la kontente ho ita. Salmo 119:21 hatete katak Jeová sei “korrije ema foti-an sira”. Tanbasá? Primeiru, se ita halo buat neʼebé ita la iha direitu atu halo, neʼe la hatudu respeitu ba Jeová nuʼudar ita-nia Maromak no Ukun-Naʼin. Segundu, neʼe bele hamosu problema ho ema seluk. (Prov 13:10) No terseiru, se ema hatene katak ita halo ona buat neʼebé ita la iha direitu atu halo, neʼe sei halo moe ita rasik. (Lc 14:8, 9) Tan neʼe mak Jeová hakarak ita atu hatudu haraik-an. w17.01 3:4, 5

Nuʼudar sala-naʼin, Adão la iha tan kbiit atu haleno Maromak nia hahalok furak sira iha dalan neʼebé perfeitu. Nia halo lakon duni futuru neʼebé furak, laʼós ba ninia an deʼit, maibé mós ba ninia oan no bei-oan hotu. Buat neʼebé nia bele fó ba ninia oan mak moris neʼebé la perfeitu, sala, no mate. (Rom 5:12) Adão nia sala hanetik ninia oan no bei-oan atu la bele moris ba nafatin. Sira la bele iha tan oan ka bei-oan neʼebé perfeitu. Komesa husi tempu neʼebé Diabu Satanás lohi Adão no Eva hodi kontra Jeová, nia mós kontinua nafatin lohi ema seluk toʼo ohin loron. (João 8:44) Jeová sei hadomi nafatin ema. Maski Adão no Eva kontra Jeová, nia hakarak nafatin atu iha relasaun diʼak ho ema. Nia lakohi haree sira mate. (2 Ped 3:9) Tan neʼe mak bainhira Adão no Eva kontra Jeová, nia halo kedas arranju atu ema bele iha fali relasaun neʼebé diʼak ho nia.—João 3:16. w17.02 1:12-14

Halo tuir Jeová nia ezemplu hodi hanoin diʼak kona-ba ema seluk. Duké buka oin ka sempre manda ema atu halo buat ruma, diʼak atu husu ema seluk nia sujestaun no simu ema seluk nia ideia sira. Ita mós hakarak haksolok bainhira ita haree irmaun ka irmán simu knaar foun espesiál ruma. No ita hakarak fó-agradese ba Jeová tanba nia husik ita hotu atu serbí nia. (1 Ped 5:9) Ita bele buka-hatene oinsá Jeová sente no hanoin liuhusi Bíblia nia prinsípiu sira. Bainhira ita estuda, halo orasaun, no uza buat neʼebé ita aprende, neʼe bele halo ita-nia konxiénsia metin liután. (1 Tim 1:5) Ita mós aprende atu hanoin uluk ema seluk. Se ita mak halo buat sira-neʼe, Jeová promete katak nia sei ‘halo kompletu ita-nia treinu’, inklui mós ajuda ita atu sai haraik-an liután.—1 Ped 5:10. w17.01 4:17, 18

Ita tenke hatudu respeitu ba ita-nia irmaun-irmán sira. Liuliu ba sira neʼebé dirije ita, hanesan katuas kongregasaun, katuas área, irmaun sira husi Grupu Koordenadór ba Sukursál, no irmaun sira husi Grupu Administradór. Sira hotu serbisu atu tau matan ba Jeová nia povu, no Bíblia bolu sira nuʼudar “prezente”. (Éf 4:8) Tan neʼe mak, maski sira mai husi rai neʼebé la hanesan, edukasaun la hanesan, riku ka kiak, ita hakarak hatudu respeitu ba sira. Kona-ba neʼe, ita bele aprende ezemplu diʼak husi ema kristaun iha apóstolu sira-nia tempu. Sira hatudu respeitu neʼebé kleʼan ba irmaun sira neʼebé dirije Maromak nia povu, no ita mós hakarak halo nuneʼe. Maibé ita tenke kuidadu atu la haree irmaun sira-neʼe hanesan anju bainhira ita hamutuk ho sira. Ita hatudu duni respeitu ba irmaun sira-neʼe tanba sira-nia serbisu makaʼas no haraik-an.—2 Kor 1:24; Apok 19:10. w17.03 1:13

Herodes Agripa I neʼebé ukun iha rai Judea, nia hahalok la hanesan duni ho Jesus. Loron ida iha enkontru espesiál ida, nia hatais unuk liurai nian neʼebé furak no karun tebes. Bainhira povu haree no rona nia koʼalia, sira haklalak hodi dehan: “Neʼe maromak ida nia lian, laʼós ema nian!” Herodes gosta tebes atu simu glória sira-neʼe. Maibé “iha tempu neʼe kedas, Jeová nia anju fó moras ba nia, tanba nia la fó glória ba Maromak, no ular kiʼik han nia no nia mate.” (Após 12:21-23) Sin, Herodes laʼós ulun neʼebé Jeová hili, maibé iha evidénsia barak neʼebé hatudu katak Maromak mak hili Jesus, no Jesus sempre fó glória ba Jeová, Ulun neʼebé Aas Liu Hotu. Jeová hakarak Jesus laʼós atu sai ulun ba tempu badak deʼit. Bainhira Jesus hetan tiha moris-hiʼas, nia hatete ba ninia dixípulu: “Kbiit tomak iha lalehan no rai fó tiha ona mai haʼu.” Nia hatutan hodi dehan: “No haree! Haʼu sei hamutuk nafatin ho imi toʼo mundu nia rohan.”—Mt 28:18-20. w17.02 3:20, 21