Janeiru

Iha tempu neʼebé feto-joven ida nia aman manán no fila husi funu, nia halai ho kontente bá hasoru ninia apá. Nia kanta no dansa ho haksolok hodi simu nia. Maibé bainhira ninia apá haree nia, ninia apá halo buat ida neʼebé halo nia sai bilán. Ninia apá lees nia rasik nia roupa hodi hakilar: “Ai pá, haʼu-nia oan-feto! Ó halo haʼu-nia fuan rahun.” Tuirmai nia esplika katak nia halo ona promete ida ba Jeová neʼebé sei troka ninia oan-feto nia moris tomak. Maibé, ninia oan-feto hatán kedas liafuan sira neʼebé fó laran-manas tebes ba ninia apá hodi ninia apá bele kaer metin ninia promete ba Jeová. Ninia oan-feto nia liafuan sira hatudu katak nia tau fiar duni ba Jeová, nia fiar katak buat naran deʼit neʼebé Jeová husu ba nia atu halo sempre buat neʼebé diʼak. (Juíz 11:34-37) Bainhira ninia apá haree ninia fiar, ninia apá sente orgullu tebes tanba hatene katak buat neʼebé ninia oan-feto halo mós halo Jeová kontente. Jefté ho ninia oan-feto tau fiar tomak ba Jeová no ba Jeová nia dalan sira. Maski susar, sira tau fiar nafatin ba Jeová, tanba sira hatene katak halo sakrifísiu ba Maromak mak folin liu fali buat seluk. w16.04 1:1, 2

Se kolega ka ema husi família ida mak koʼalia liafuan neʼebé halo ita laran-tun, ka karik ita hasoru hela terus husi moras neʼebé todan, ka karik ita triste hela tanba ema ida foin mate, hanoin kona-ba Job nia ezemplu bele fó kmaan fali mai ita. (Jó 1:18, 19; 2:7, 9; 19:1-3) Job la hatene tanba razaun saida mak derrepente deʼit nia hasoru susar no terus barak tebes iha ninia moris, maibé nia nunka lakon esperansa. Saida mak ajuda nia hodi tahan? Razaun importante liu mak tanba nia hadomi no hamtaʼuk Jeová. (Jó 1:1) Job nia hakarak mak, iha situasaun diʼak ka aat, nia hakarak deʼit atu halo buat neʼebé Jeová gosta. Jeová mós ajuda Job. Nia ajuda Job hodi haree kona-ba ninia forsa liuhusi buat furak sira neʼebé nia kria. No ida-neʼe halo Job fiar liután katak Jeová sei hapara ninia susar no terus neʼebé nia hasoru daudauk iha tempu neʼebé loos. (Jó 42:1, 2) No ikusmai ida-neʼe mak akontese duni. “Jeová halakon Job nia terus no fó fali rikusoin ba nia. Jeová fó ba nia dala rua barak liu fali buat neʼebé uluk nia iha.” No Job iha moris neʼebé naruk no haksolok.—Jó 42:10, 17. w16.04 2:11, 13

Ita hatudu “matan-moris” liuhusi hanoin uluk kona-ba perigu sira, no “laran-moos” hodi kaer metin ba ita-nia pozisaun neutrál. Ita tenkesér kuidadu se ema komesa koʼalia kona-ba buat polítiku nian. Porezemplu, bainhira ita haklaken hela ba ema, kuidadu atu la gaba ka krítika kona-ba partidu polítiku nia ideia ka kona-ba ulun-naʼin ida. Duké koʼalia kona-ba saida mak ema bele halo atu rezolve problema sira, diʼak liu hatudu eskritura ba sira atu haree katak Maromak nia Ukun deʼit mak bele rezolve problema sira-neʼe ba nafatin. Se ema mak komesa diskute kona-ba tópiku sensitivu, hanesan kona-ba ema omoseksuál sira neʼebé hakarak kaben ka kona-ba abortu, diʼak atu uza Maromak nia Liafuan hodi esplika ba sira kona-ba Maromak nia morál no esplika ba sira oinsá mak ita bele moris tuir morál sira-neʼe. Se ema hatete katak lei ruma presiza troka ka hasai, ita la bele fó ita-nia opiniaun, no ita mós la bele obriga ema neʼe atu troka ninia hanoin. w16.04 4:8, 9

Jesus hakarak ita atu hanorin ema atu sai ninia dixípulu, fó batizmu ba sira, no hanorin sira. Maibé buat primeiru ita tenke halo mak bá buka ema. Matenek-naʼin ida kona-ba Bíblia hatete katak: “Besik ka dook, fiar-naʼin ida-idak nia knaar mak ‘bá’.” (Mt 10:7; Lc 10:3) Jesus nia hakarak mak atu ninia dixípulu ida-idak haklaken ketaketak ka nia hakarak sira haklaken nuʼudar organizasaun ida? Susar ba ema ida atu haklaken toʼo mundu tomak, hodi nuneʼe mak dixípulu sira presiza organiza hamutuk atu sai grupu ida hodi haklaken. Tan neʼe, bainhira Jesus bolu ninia dixípulu sira, nia dehan ba sira atu sai “peskadór ba ema”. (Mt 4:18-22) Peskadór neʼebé Jesus temi, neʼe laʼós ema neʼebé tuur mesamesak ho ninia kail, ho ninia iska, hein atu hakail ikan. Iha neʼe Jesus koʼalia kona-ba peska ikan ho rede. Peska ho rede presiza forsa, organiza didiʼak, no presiza ema barak atu serbisu hamutuk.—Lc 5:1-11. w16.05 2:3, 4

Atu hatene no komprende dalan neʼebé Jeová hanoin, ita tenke lee no estuda Bíblia beibeik, no bainhira ita halo ida-neʼe, husu ba ita-nia an: ‘Haʼu aprende saida kona-ba Jeová husi neʼe? Tanbasá mak Jeová hakarak halo nuneʼe?’ Diʼak mós atu halo tuir David nia ezemplu hodi husu Jeová ajuda ita koñese diʼak liután kona-ba nia. David dehan: “Oh Jeová, fó-hatene haʼu Ita-nia dalan sira; hanorin haʼu atu laʼo iha Ita-nia dalan sira. Halo haʼu laʼo iha Ita-nia dalan lia-loos nian no hanorin haʼu, tanba Ita mak Maromak neʼebé salva haʼu. Iha tempu hotu haʼu tau esperansa ba Ita.” (Sal 25:4, 5) Bainhira ita aprende buat ruma kona-ba Jeová, diʼak atu hanoin kona-ba iha situasaun saida mak ita bele uza informasaun sira-neʼe. Hanesan família laran, serbisu fatin, eskola, ka iha serbisu haklaken. Se ita mak hanoin beibeik kona-ba situasaun saida mak ita bele uza informasaun sira-neʼe, neʼe sei halo fasil ba ita atu hatene oinsá mak Jeová hakarak ita atu uza informasaun sira-neʼe. w16.05 3:9, 11

Jeová fó lista kona-ba kritériu ba katuas sira, neʼe hatudu katak nia hakarak mane sira neʼebé tau matan ba kongregasaun tenkesér iha morál neʼebé aas. (1 Tim 3:2-7) Jeová hakarak sira atu hatudu ezemplu neʼebé diʼak, no sira sei hatán ba Jeová tuir dalan neʼebé sira trata ema ida-idak iha kongregasaun. Ba Jeová, kongregasaun iha folin boot tebes, tanba Bíblia hatete katak nia sosa kongregasaun, “ho ninia Oan rasik nia raan”. (Após 20:28) Jeová hakarak ita atu sente seguru iha katuas sira-nia liman. (Isa 32:1, 2) Tan neʼe mak bainhira ita lee kona-ba kritériu ba katuas sira, neʼe fó-hanoin ita katak Jeová hakarak tebes atu tau matan ita. Maibé ema hotu mós bele aprende buat ruma husi kritériu sira-neʼe. Porezemplu, Jeová hakarak ema hotu atu haraik an no iha hanoin neʼebé loos, laʼós deʼit katuas sira. (Flp 4:5; 1 Ped 4:7) Loos duni, bainhira ita haree katuas sira hatudu ezemplu neʼebé diʼak, ita mós “bele banati-tuir sira-nia fiar”.—1 Ped 5:3; Ebr 13:7. w16.05 5:8-10

Atu proteje ita-nia laran la bele sai toos, ita tenke sees husi hahalok hanesan foti-an, toman atu halo sala, no fiar-laek, tanba se ita la kuidadu, hahalok sira-neʼe bele haburas hahalok kontra nian. (Dan 5:1, 20; Ebr 3:13, 18, 19) Ezemplu ida mak kona-ba Liurai Uzias husi rai-Judá. Foufoun, Uzias halo tuir no iha relasaun neʼebé diʼak ho Maromak. Maibé “bainhira nia hetan ona kbiit, ninia laran sai foti-an tebes”. Nia sai foti-an toʼo nia halo buat sira neʼebé só amlulik sira deʼit mak bele halo, neʼe mak sunu insensu iha templu laran. Bainhira amlulik sira hatete ba nia katak nia halo ona buat neʼebé sala, nia sai hirus tebes ho sira. Ho ida-neʼe, Jeová hamoe liurai foti-an neʼe hodi halo nia hetan moras-lepra toʼo nia mate. (2 Crôn 26:3-5, 16-21; Prov 16:18) Hahalok foti-an bele halo ita hanoin katak ita diʼak liu fali ema seluk no neʼe bele halo ita lakohi atu simu konsellu sira husi Bíblia.—Rom 12:3; Prov 29:1. w16.06 2:3, 4

Ita sente oinsá kona-ba irmaun-irmán sira neʼebé kultura la hanesan ho Ita? Karik sira-nia língua, hahalok, hatais, no hahán la hanesan ho Ita-nian. Ita sees husi sira hodi ransu deʼit ho ema neʼebé hanesan ho Ita ka lae? Oinsá se katuas sira husi Ita-nia área mak idade kiʼik liu Ita ka sira mai husi rasa ka kultura neʼebé la hanesan ho Ita-nian, Ita sente oinsá kona-ba sira? Se ita mak la kuidadu, ita bele husik buat sira-neʼe atu estraga ita-nia unidade. Oinsá mak ita bele hasees an husi problema sira-neʼe? Haree toʼok konsellu neʼebé apóstolu Paulo fó ba ema kristaun iha Éfeso, sidade neʼebé riku no mós iha ema mai husi rai oioin. (Éf 4:1-3) Paulo temi hahalok diʼak sira iha ninia karta neʼe, hahalok sira-neʼe mak haraik-an, laran-maus, pasiénsia, no domin. Hahalok sira-neʼe hanesan uma nia riin neʼebé tonka hela uma hodi la bele monu. w16.06 3:17, 18

Satanás hakarak ita atu sai atan ba Rikusoin duké serbí Jeová. (Mt 6:24) Maibé ema neʼebé uza sira-nia forsa hodi buka deʼit sasán barak, sira-nia moris sei sai mamuk no la kontente. Aat liután mak ema hanesan neʼe bele lakon ninia fiar ba Jeová no ninia Ukun. (1 Tim 6:9, 10; Apok 3:17) Tan neʼe mak Jesus hatete katak “hakarak oioin” hanesan ho ai-tarak neʼebé bele hanetik fini atu moris no fó fuan. (Mc 4:14, 18, 19) Ohin loron, Satanás nia mundu mós atu toʼo ona ninia rohan. Tan neʼe, agora laʼós tempu atu buka sasán barak liután ba ita-nia an. No ita mós tenkesér hatene katak ita la bele lori sasán neʼebé ita iha ohin loron, atu moris liu tempu terus boot nian, maski sasán sira-neʼe folin-boot tebes.—Prov 11:4; Mt 24:21, 22. w16.07 1:5, 6

Iha dadeer ida, toʼos-naʼin bá merkadu atu aluga ema serbisu iha ninia toʼos-uvas. Koʼalia tiha folin, ema sira-neʼe mós konkorda atu serbisu ba nia. Maibé tanba nia presiza tan ema barak atu serbisu, iha loron neʼe, nia fila bá-mai husi merkadu atu buka tan ema. Ba sira, nia mós oferese saláriu neʼebé sira kontente atu simu. Toʼo tiha kalan, nia bolu serbisu-naʼin hotu hamutuk atu selu sira. Nia laran-luak tebes tanba nia selu sira hanesan hotu maski balu foin serbisu deʼit ba oras ida. Maibé, sira neʼebé serbisu ona ba loron tomak komesa muramura. Toʼos-naʼin hatán fali ba sira: ‘Imi konkorda ona ho saláriu neʼe loos ka lae? Haʼu iha direitu atu halo buat neʼebé haʼu hakarak ho haʼu-nia rikusoin, loos ka lae? Ka imi laran-moras tanba haʼu hatudu laran-diʼak ka?’ (Mt 20:1-15) Jesus nia ai-knanoik fó-hanoin ita kona-ba Jeová nia hahalok furak ida neʼebé temi beibeik iha Bíblia, neʼe mak ninia hahalok “laran-diʼak neʼebé boot”.—2 Kor 6:1. w16.07 3:1, 2

Importante tebes ba ita atu haklaken liafuan diʼak tanba mundu nia rohan besik ona atu mai! (Mc 13:10) Jeová hatudu duni ninia laran-diʼak neʼebé boot liuhusi liafuan diʼak. Ita tenke hanoin-hetan katak ita-nia objetivu ba haklaken mak atu fó glória ba Jeová. Ita presiza fó-hatene ba ema seluk katak tanba Jeová hatudu ninia laran-diʼak neʼebé boot mak ita sei hetan bensaun oioin iha mundu foun. Bainhira haklaken, ita bele esplika ba ema katak, kuandu Kristu ukun ona mundu tomak, ema sei hetan bensaun barak husi Jesus nia sakrifísiu no neineik-neineik ita sei sai perfeitu fali. Bíblia hatete: “Kriasaun neʼe rasik sei sai livre husi atan ba isin neʼebé dodok, no hetan liberdade neʼebé furak nuʼudar Maromak nia oan sira.” (Rom 8:21) Só liuhusi Jeová nia laran-diʼak neʼebé boot liu hotu mak bele kumpre buat sira-neʼe. w16.07 4:17-19

Kona-ba oinsá feen-laʼen hatudu sira-nia domin no sentimentu ba malu, Bíblia la halo lei kona-ba saida mak sira bele ka labele halo. Maibé eskritura hatudu duni katak importante atu hatudu sentimentu ba malu. (Cân 1:2; 2:6) Feen-laʼen tenkesér trata malu iha dalan neʼebé mamar. Se ita mak iha domin neʼebé metin ba Maromak no ba ita-nia maluk, ita sei la husik ema ka buat ida atu fó ameasa ba moris kaben nian. Ema balu tanba iha toman haree beibeik pornografia, neʼe halo fraku ka estraga sira-nia moris kaben nian. Ita tenkesér hakribi hakarak atu haree pornografia ka hakarak seksuál naran deʼit iha liʼur. Ita mós tenke kuidadu atu la halo ema seluk hanoin sala katak ita oin-moris ba ema neʼebé laʼós ita-nia kaben, tanba neʼe laʼós hahalok domin nian. Se ita mak hanoin hela iha ita-nia neon katak Maromak hatene ita-nia hanoin no hahalok sira, neʼe bele ajuda ita atu halo tuir nia no laran-metin ba ita-nia kaben.—Mt 5:27, 28; Ebr 4:13. w16.08 2:7-9

Matenek loloos bele ajuda ema kristaun atu “laʼo ho loloos iha Jeová nia oin toʼo halo kontente nia iha dalan neʼebé kompletu”. Halo hanesan neʼe bele ajuda sira atu kontinua “fó fuan iha serbisu diʼak oioin”, liuliu iha serbisu haklaken. (Kol 1:10) Ema neʼebé adora Jeová tenkesér estuda beibeik ninia Liafuan hodi bele serbí nia ho didiʼak. Ita tenke ajuda estudante Bíblia atu komprende didiʼak kona-ba neʼe. Nuneʼe ita rasik tenkesér hafolin uluk estuda mesak. Tuir loloos, se ita mak iha toman atu lee beibeik Bíblia no hanoin kleʼan kona-ba buat neʼebé ita lee, neʼe sei ajuda ita-nia moris no haklaken. Porezemplu, bainhira ita bá haklaken no ema ida husu pergunta difisil ba ita, ita bele uza Bíblia atu hatán ba ninia pergunta neʼe. Bainhira ita konta ba ema seluk kona-ba buat neʼebé ita aprende, no oinsá mak informasaun sira-neʼe ajuda tebes ita, neʼe mós sei anima fali sira atu estuda liután kona-ba Bíblia hodi sira mós bele hetan benefísiu husi eskritura sira. w16.08 4:3, 4

Importante tebes atu kontinua luta hasoru mundu nia hanoin no hahalok aat sira, inklui mós hahalok sala-foʼer, fuma, lanu, no droga. Ita mós tenke kontinua luta makaʼas hasoru ita rasik nia fraku no sentimentu laran-tun. (2 Kor 10:3-6; Kol 3:5-9) Ita bele luta manán hasoru inimigu forte sira-neʼe ka lae? Bele, maibé tenke luta ho forsa makaʼas! Tan neʼe mak apóstolu Paulo kompara ninia an hanesan ho ema neʼebé luta iha bokse. Nia dehan: “Haʼu tuku laʼós hanesan tuku anin deʼit.” (1 Kor 9:26) Hanesan neʼe mós ho ita. Ita tenke luta makaʼas hasoru ita-nia inimigu sira hanesan luta iha bokse. Liuhusi Bíblia, Jeová sei ajuda no fó treinu ba ita oinsá atu luta. Nia mós ajuda ita liuhusi ita-nia livru, reuniaun, no reuniaun boot sira. Ita presiza aproveita didiʼak ajuda sira-neʼe. w16.09 2:2, 3

Jesus hatudu duni ezemplu diʼak ba ita hodi tau uluk Maromak no ema seluk nia hakarak duké buka uluk ninia diʼak. Tan neʼe, ita lakohi hili roupa neʼebé bele hanetik ema atu rona ba mensajen neʼebé ita haklaken ba sira. (Rom 15:2) Inan-aman iha responsabilidade atu hanorin oan kona-ba halo tuir Bíblia nia prinsípiu. Tan neʼe sira hakarak haree didiʼak kona-ba sira-nia hatais no hadiʼa an hodi sira no sira-nia ona bele halo Maromak nia laran kontente. (Prov 22:6; 27:11) Oinsá mak inan-aman bele hanorin oan atu hatudu respeitu ba Maromak no ninia matadalan sira? Liuhusi sira-nia ezemplu. Sira mós presiza hanorin oan kona-ba oinsá no iha neʼebé mak bele buka roupa neʼebé hatudu respeitu. Labele husik oan sira atu hili roupa tuir sira-nia hakarak deʼit, maibé importante tebes atu ajuda sira hili roupa neʼebé fó glória ba Maromak. w16.09 3:13, 14

Ema gosta rona ba Jesus tanba sira bele haree katak nia hadomi Jeová, hatene didiʼak eskritura sira, no nia iha domin ba ema. (Lc 24:32; João 7:46) Nuneʼe mós, kuandu oan sira haree katak inan-aman hadomi Jeová, neʼe sei ajuda sira atu hadomi Jeová. (Deut 6:5-8; Lc 6:45) Tan neʼe, inan-aman sira, estuda beibeik Bíblia ho didiʼak bá, lee ita-nia livru sira no buka-hatene kona-ba buat sira neʼebé Jeová kria. (Mt 6:26, 28) Se ita mak hatene diʼak liután kona-ba Jeová, ita mós bele hanorin fali oan sira. Se ita mak aprende buat foun ida kona-ba Jeová, fahe kedas ba oan sira iha tempu naran deʼit, lalika hein toʼo prepara reuniaun hamutuk ka tempu halaʼo adorasaun família nian mak foin koʼalia. w16.09 5:6, 7

Se ita la komprende Maromak nia Liafuan iha língua foun ida, neʼe bele lori perigu ba ita-nia relasaun ho Jeová. Bainhira Neemias bá Jeruzalein, nia haree katak ema judeu nia oan barak la hatene koʼalia lia-ebraiku. No tanba labarik sira-neʼe la bele komprende Maromak nia Liafuan, neʼe halo fraku sira-nia relasaun ho Jeová. (Neem 8:2, 8) Ohin loron inan-aman balu mós haree katak, tanba serbí iha kongregasaun neʼebé koʼalia língua seluk, neineik-neineik oan sira-nia relasaun ho Jeová mós sai fraku. Tanbasá? Bainhira ita lee iha língua seluk, neʼe ladún book ita-nia laran no sentimentu se kompara ho lee iha ita-nia língua rasik. No mós tanba susar atu komprende malu iha língua foun, neʼe bele halo ita kole no bele lori mós perigu ba ita-nia relasaun ho Jeová. Tan neʼe mak, maski ita hakarak tebes atu serbí iha kongregasaun neʼebé koʼalia língua seluk, maibé ita mós presiza tau matan didiʼak ba ita-nia relasaun ho Jeová.—Mt 4:4. w16.10 2:4-6

Fiar mak hahalok neʼebé folin-boot tebes. Laʼós ema hotu iha fiar. (2 Tes 3:2) Maibé Jeová fó fiar ba ninia atan ida-idak neʼebé adora nia. (Rom 12:3; Gal 5:22) Ita agradese tebes tanba Jeová fó fiar ba ita. Liuhusi fiar ba Jesus Kristu mak Jeová fó perdua ba ita-nia sala. No neʼe mós loke dalan ba ema atu bele iha relasaun neʼebé diʼak ho Jeová ba nafatin. (João 6:44, 65; Rom 6:23) Jeová hatudu laran-diʼak tebes ba ita, tanba maski ita hotu sala-naʼin no merese atu mate, maibé Jeová haree katak ita iha kbiit atu halo buat neʼebé diʼak. (Sal 103:10) Tan neʼe nia ajuda ita atu aprende liafuan diʼak kona-ba Jesus nia sakrifísiu. Hodi tau fiar ba Jesus nia sakrifísiu no tuir Jesus, ita iha esperansa atu moris ba nafatin iha futuru.—1 João 4:9, 10. w16.10 4:1, 2

Iha apóstolu Paulo nia karta sira, nia sempre koʼalia diʼak kona-ba irmaun-irmán sira. Nia halo viajen beibeik ho sira balu ba tinan barak ona no nia mós koñese sira ho diʼak, maibé nia la hakerek kona-ba sira-nia fraku, nia hakerek liafuan gaba deʼit kona-ba sira. Porezemplu, nia hatete katak Timóteo mak ‘ida neʼebé nia hadomi no oan neʼebé laran-metin iha Naʼi’, no Paulo tau fiar ba Timóteo katak nia sei tau matan ba maluk fiar-naʼin sira ho laran. (1 Kor 4:17; Flp 2:19, 20) Paulo mós gaba Tito ba kongregasaun iha Korinto hodi dehan: “Nia mak haʼu-nia maluk serbisu-naʼin no ami halo serbisu hamutuk ba imi-nia diʼak.” (2 Kor 8:23) Ita bele fiar Paulo nia liafuan sira-neʼe fó laran-manas tebes ba Timóteo no Tito tanba sira hatene Paulo hanoin tebes sira. Apóstolu Paulo ho Barnabé hakaʼas an hodi fó laran-manas ba maluk fiar-naʼin sira maski neʼe bele lori perigu ba sira-nia moris. Porezemplu, sira hatene katak ema iha sidade Listra hakarak oho sira, maibé sira bá nafatin sidade neʼe hodi fó laran-manas ba dixípulu foun atu ajuda sira laran-metin nafatin ba Jeová. (Após 14:19-22) Iha Éfeso, maski Paulo mós hasoru perigu husi ema-lubun neʼebé hirus, maibé nia fó laran-manas ba dixípulu sira iha neʼebá.—Após 20:1. w16.11 1:10, 11

Jeová mak hanorin no dirije ninia organizasaun parte rai nian. Oinsá? Nia hili Kristu nuʼudar “ulun ba kongregasaun”, no Kristu hili “atan laran-metin no matenek” atu hanorin no tau matan ba Maromak nia povu. (Mt 24:45-47; Éf 5:23) Atan neʼe hafolin tebes Bíblia hanesan grupu administradór iha apóstolu sira-nia tempu, tanba neʼe mak Maromak nia Liafuan. (1 Tes 2:13) Bíblia fó matadalan ba ita atu tuir beibeik reuniaun no simu hanorin ida deʼit. (Ebr 10:24, 25) Bíblia fó laran-manas ba ita atu “kontinua buka uluknanain Maromak nia Ukun”. No mós haruka ita atu haklaken husi uma ba uma, iha fatin públiku, no iha dalan neʼebé la formál. (Mt 6:33; 28:19, 20; Após 5:42; 17:17; 20:20) Maromak nia Liafuan fó matadalan ba katuas sira oinsá atu tau matan ba kongregasaun hodi moos nafatin. (1 Kor 5:1-5, 13; 1 Tim 5:19-21) Jeová mós hakarak ita atu iha isin, hanoin, no hahalok neʼebé moos.—2 Kor 7:1. w16.11 3:7, 8

Tinan balun antes Funu Mundiál Primeiru akontese, Charles Taze Russell no Estudante Bíblia seluk haree katak igreja kristaun sira la hanorin lia-loos husi Bíblia, tan neʼe sira lakohi iha ligasaun ho relijiaun falsu sira-neʼe. No iha tinan 1879, livru Zion’s Watch Tower koʼalia nakloke hodi dehan katak igreja neʼebé hatete sira mak Kristu nia noiva neʼebé laran-metin maibé fó fali apoiu ba governu, tuir loloos sira hola parte iha Babilónia Boot, no Bíblia bolu sira nuʼudar feto-aat. (Apok 17:1, 2) Ema neʼebé laran-metin ba Maromak hatene katak se sira kontinua fó apoiu ba relijiaun falsu, Maromak sei la haraik bensaun ba sira. Tan neʼe ema barak hakerek karta ba igreja hodi rezigna an. w16.11 5:2, 3

Bainhira atu komemora Jesus nia mate, karik ita lee Roma 8:15-17. Eskritura sira-neʼe esplika oinsá mak ema kose-mina hatene katak sira iha esperansa atu moris iha lalehan. Maromak nia espíritu santu mak fó sasin iha sira-nia laran. Roma kapítulu 8 koʼalia liuliu kona-ba ema kose-mina sira. Sira simu “espíritu santu” nuʼudar oan-hakiak no hein namanas atu “sai livre husi [sira-nia] isin”. (Rom 8:23) Iha futuru, sira sei sai Maromak nia oan sira iha lalehan. Liuhusi Jesus nia sakrifísiu, Jeová fó ona perdua ba sira-nia sala. Jeová haree sira nuʼudar ema loos hodi sira bele sai ninia oan. (Rom 3:23-26; 4:25; 8:30) Maibé Roma kapítulu 8 mós importante ba ema neʼebé iha esperansa atu moris iha rai, tanba Maromak mós bele haree sira nuʼudar ema loos. Sira mós bele aprende buat barak husi Roma kapítulu 8. w16.12 2:1-3

Jesus dehan: “Keta hanoin barak.” Liafuan neʼe katak sá? Tuir loloos, Jesus nia liafuan la dehan katak ema neʼebé serbí Jeová sei nunka hanoin barak. Maibé Jesus hakarak ajuda ninia dixípulu sira atu komprende katak hanoin beibeik ka hanoin demais la bele ajuda atu rezolve problema. Ita hasoru susar loroloron, tan neʼe mak ita la bele aumenta tan susar ba ita-nia an hodi hanoin kona-ba buat neʼebé liu ona ka kona-ba problema sira iha futuru. Dala ruma ita mós bele hanoin demais kona-ba problema sira iha futuru. Maibé ita la presiza hanoin barak kona-ba buat neʼebé seidauk akontese. Tanbasá? Tanba dala barak buat neʼebé ita taʼuk, la akontese tuir buat neʼebé ita hanoin. No la haluha katak la iha situasaun ida mak bele halo susar ba Jeová. Ita bele fiar katak Maromak sei fó bensaun ba ninia atan neʼebé laran-metin ba nia no ajuda sira atu la hanoin barak kona-ba tempu uluk, tempu agora, no kona-ba futuru. w16.12 3:13, 16

Iha tempu Jeová hili Saul atu sai liurai, Saul mak ema neʼebé haraik an tebes. (1 Sam 9:1, 2, 21; 10:20-24) Maibé bainhira nia sai ona liurai, nia foti-an tebes. Iha tempu ida, ema Filístia rihun ba rihun mai atu ataka ema Izraél. No profeta Samuel fó-hatene ba Saul katak nia mak sei mai atu hasaʼe sakrifísiu ba Jeová. Maibé antes Samuel toʼo mai, Saul la iha tan pasiénsia atu hein no hasaʼe uluk sakrifísiu ba Jeová tanba ema Izraél barak sai taʼuk no husik ona nia. Saul halo buat neʼebé nia la iha direitu atu halo, no Jeová la kontente tebes ho nia. (1 Sam 13:5-9) Bainhira Samuel toʼo mai, nia fó konsellu makaʼas ba Saul tanba la halo tuir Jeová. Maibé Saul la sente katak nia halo ona buat neʼebé sala. Nia buka razaun oioin no duun ema seluk. (1 Sam 13:10-14) Komesa husi tempu neʼebá, Saul halo buat barak ho foti-an. Tan neʼe Jeová lakohi tan nia atu sai liurai. (1 Sam 15:22, 23) Maski foufoun Saul nia moris diʼak, maibé ikusmai sai aat tebes.—1 Sam 31:1-6. w17.01 3:1, 2

David mak ema neʼebé laran-metin no Jeová hadomi tebes nia. Maski nuneʼe, nia monu ba sala boot hodi halo sala-foʼer ho Batseba. (2 Sam 11:1-21) David la bele halai sees husi sala nia konsekuénsia. (2 Sam 12:10-12, 14) Buat neʼebé nia presiza halo mak fiar. Nia tenke fiar katak, se nia mak arrepende an husi laran, Jeová sei fó perdua nia no ajuda nia atu tahan hasoru konsekuénsia husi ninia hahalok sira. Ita hotu la perfeitu, ita hotu halo sala. Balu sala kiʼik no balu boot. No dala ruma ita mós tenke simu deʼit konsekuénsia husi ita-nia hahalok sira. (Gal 6:7) Maibé ita bele tau fiar ba Maromak nia liafuan. Nia promete katak, se ita mak arrepende an ho laran, nia sei fó perdua ba ita no ajuda ita atu tahan hasoru konsekuénsia husi ita-nia sala, maski sala neʼe ita rasik mak halo.—Isa 1:18, 19; Após 3:19. w17.01 1:10-12

Haraik-an bele ajuda ita atu halo desizaun neʼebé diʼak maski ita la hatene ka la bele kontrola buat hotu atu sai loos. Porezemplu, karik ita hanoin hela atu serbí Jeová tempu-tomak. Maibé oinsá se ita moras? Oinsá se ita-nia inan-aman moras no presiza ajuda? Sé mak sei tau matan ba ita bainhira ita-nia idade aumenta? Maski ita koko dalan oioin atu buka-hatene, ita la bele hetan resposta ba pergunta sira-neʼe. Maibé se ita tau fiar ba Jeová, neʼe sei ajuda ita atu simu katak ita iha limitadu. Diʼak atu halo riset, husu ema seluk nia sujestaun, no importante liu mak atu halo orasaun. Tuirmai ita presiza husik Jeová nia espíritu santu atu dirije ita. (Ecle 11:4-6) Jeová bele fó bensaun ba ita-nia desizaun sira, ka nia bele ajuda ita atu troka ita-nia planu sira.—Prov 16:3, 9. w17.01 4:14

Adão no Eva presiza halo desizaun rasik atu halo tuir Jeová ka rona ba samea nia liafuan. Triste tebes tanba sira foti desizaun atu kontra Jeová. (Gên 3:6-13) Bainhira Adão no Eva kontra Maromak, sira sai nuʼudar ema neʼebé la perfeitu tan. Laʼós neʼe deʼit, sira mós sai Maromak nia inimigu. Jeová nia “matan mak santu liu atu hateke ba buat neʼebé aat”, tan neʼe nia odi hahalok aat sira neʼebé Adão no Eva halo. (Hab 1:13) Se Jeová mak husik deʼit no la halo buat ida ba Adão no Eva nia sala, neʼe bele estraga Jeová nia kriatura sira-nia dame no unidade. Neʼe mós bele halo anju no ema seluk la tau fiar tan ba Maromak nia liafuan sira. Maibé Jeová sempre kaer metin ba ninia prinsípiu sira no nia nunka halo buat neʼebé kontra fali nia rasik nia lei. (Sal 119:142) Tan neʼe, maski Adão no Eva iha liberdade, maibé neʼe la dehan katak sira bele sees husi konsekuénsia kona-ba sala neʼebé sira halo. Toʼo ikus sira tenke mate no fila fali ba rai-rahun neʼebé Jeová uza hodi kria sira.—Gên 3:19. w17.02 1:8, 10, 11

Husi tempu neʼebé Jesus hahú halaʼo serbisu haklaken toʼo nia mate iha ai-riin terus nian, nia sempre halo tuir buat neʼebé eskritura hatete. Maski iha tempu neʼebé nia atu mate ona, nia sei temi profesia balu kona-ba Mesias. (Mt 27:46; Lc 23:46) Maibé ulun-naʼin relijiaun sira iha tempu neʼebá la hanesan duni ho Jesus. Se Maromak nia Liafuan hatete buat ruma neʼebé kontra sira-nia lisan, sira lakohi halo tuir eskritura. Tan neʼe mak Jesus temi fali Jeová nia Liafuan husi profeta Isaías kona-ba sira: “Povu neʼe respeitu haʼu ho ibun-tutun deʼit, maibé sira-nia laran dook husi haʼu. Sira-nia adorasaun ba haʼu saugati deʼit, tanba sira hanorin ema nia ukun-fuan nuʼudar Maromak nian.” (Mt 15:7-9) Jesus sempre uza Maromak nia Liafuan bainhira hanorin ema. Iha tempu neʼebé ulun-naʼin relijiaun sira koko nia, nia la uza ninia matenek ka esperiénsia moris nian hodi hatán, maibé nia sadere deʼit ba eskritura sira.—Mt 22:33-40. w17.02 3:18, 19

Nuʼudar Testemuña ba Jeová, ita hakarak hakaʼas an atu hatudu respeitu ba ema sira husi governu. Rai ida-idak nia kostume la hanesan, tan neʼe ita presiza halo tuir lei husi rai ida-idak. Maibé, se sira mak husu ita atu halo buat ruma neʼebé kontra Jeová nia ukun-fuan, ita la bele halo, tanba ita hakarak halo tuir no respeitu Jeová liu fali ema. (1 Ped 2:13-16) Ita bele aprende husi Jeová nia atan sira iha tempu uluk oinsá atu hatudu respeitu ba ema sira husi governu. Ezemplu ida mak kona-ba José no Maria. Iha tempu neʼebé governu Roma halaʼo sensus atu hatene ema naʼin-hira mak moris iha Roma nia ukun, José no Maria fila ba Jeruzalein atu rejistu sira-nia naran, maski Maria besik ona atu tuur ahi. (Lc 2:1-5) Apóstolu Paulo mak ezemplu ida tan neʼebé hatudu respeitu ba ukun-naʼin sira. Bainhira ema duun katak nia halo ona buat neʼebé kontra lei, nia defende ninia an no hatudu respeitu ba Liurai Herodes Agripa no Festo, governadór Roma ba provínsia Judeia.—Após 25:1-12; 26:1-3. w17.03 1:9, 10

Tanba ema Izraél la halo tuir Jeová, Jeová la proteje tan sira husi sira-nia inimigu. (Juíz 2:1-3, 11-15; Sal 106:40-43) Karik neʼe halo susar tebes ba ema seluk neʼebé hadomi Jeová hodi bele laran-metin ba Jeová durante tinan susar sira-neʼe. Maibé Bíblia hatete katak, maski nuneʼe, sei iha ema neʼebé laran-metin nafatin ba Jeová, ema hanesan Jefté, Elcana, Ana, no Samuel. Sira kontinua hakaʼas an hodi halo buat neʼebé halo Jeová kontente. (1 Sam 1:20-28; 2:26) Iha ita-nia tempu, ema barak mós iha hanoin no hahalok hanesan ema Kanaán sira. Iha sira-nia moris, sira-nia hanoin mak kona-ba seks, violénsia, no osan deʼit. Maibé Jeová fó avizu neʼebé klaru ba ita, tanba nia hakarak atu proteje ita hanesan nia proteje ema Izraél husi hahalok aat sira. Ema Izraél nia ezemplu mak avizu diʼak ida ba ita, loos ka lae? (1 Kor 10:6-10) Ita tenke halakon duni ema Kanaán nia hanoin husi ita-nia moris. (Rom 12:2) Ita hakaʼas an daudauk atu halo nuneʼe ka lae? w16.04 1:4-6

Jeová fó konsellu neʼebé diʼak liu hotu liuhusi ninia Liafuan. Tan neʼe mak importante atu halo riset no halo orasaun atu husu matadalan husi nia. Nia sei ajuda ita haburas hahalok diʼak hodi ita bele halo desizaun tuir ninia hakarak. Tan neʼe antes atu halo desizaun importante balu, husu ba Ita-nia an: ‘Haʼu-nia desizaun hatudu sai haʼu-nia domin ba Jeová ka lae? Haʼu-nia desizaun sei lori dame no ksolok ba haʼu-nia família ka lae? No haʼu-nia desizaun hatudu sai katak haʼu mak ema neʼebé iha pasiénsia no laran-diʼak ka lae?’ Jeová nunka obriga ita atu hadomi ka serbí nia. Nia respeitu ita-nia responsabilidade no direitu atu hili hodi serbí nia ka la serbí nia. (Jos 24:15; Ecle 5:4) Maibé buat neʼebé nia hakarak ita atu halo mak kumpre desizaun neʼebé ita halo ona tuir ninia Liafuan. Se ita mak tau fiar ba Jeová nia matadalan no prinsípiu sira, neʼe sei ajuda ita atu la sai ema neʼebé namlele, maibé ita bele tau fiar ba ita-nia desizaun neʼebé ita halo ho matenek.—Tgo 1:5-8; 4:8. w17.03 2:17, 18