Juñu

Ba Jefté, nia iha oan ida deʼit, no ninia oan-feto mesak neʼe mak ninia esperansa atu iha bei-oan hodi lori ninia naran no sai liman-rohan ba futuru. (Juíz 11:34) Maski nuneʼe mós, Jefté hatete: “Haʼu loke ona haʼu-nia ibun ba Jeová, no haʼu la bele dada fali.” (Juíz 11:35) Jeová simu Jefté nia sakrifísiu no fó bensaun ba nia. Ita mós sei hatudu laran-metin hanesan Jefté nian ka lae? Bainhira ita dedika ita-nia moris ba Jeová, ita jura ba nia katak buat naran deʼit neʼebé nia husu ita atu halo, ita sei halo ba nia. Ita hatene katak atu kumpre ita-nia promete neʼe la fasil. Karik dala ruma ita simu knaar ida neʼebé ita la gosta atu halo, ita sei halo saida? Se ita mak simu deʼit hodi halo tuir Jeová ho laran, neʼe hatudu katak ita kaer metin duni ba ita-nia promete. Maski sakrifísiu neʼebé ita fó sente todan tebes, maibé Jeová sei fó bensaun boot liu fali ita-nia sakrifísiu neʼe.—Mal 3:10. w16.04 1:11, 14, 15

Jesus tau matan ba kongregasaun sira liuhusi espíritu santu. Ita presiza duni espíritu santu hodi bele hasees an husi tentasaun, no atu bele haklaken ho aten-brani. Espíritu santu mós bele ajuda ita atu halo desizaun neʼebé matenek. Tan neʼe mak ita tenke hakaʼas an atu tuir reuniaun sira hodi bele simu ajuda husi Maromak nia espíritu santu. Baibain iha ita-nia reuniaun sira ita koʼalia dala barak kona-ba Bíblia nia profesia sira neʼebé sai loos ona. Ida-neʼe ajuda ita tau fiar liután katak Jeová nia promesa hotu kona-ba futuru sei sai loos. Ita hetan laran-manas laʼós liuhusi diskursu sira deʼit. Bainhira irmaun-irmán sira fó komentáriu no kanta knananuk ho laran mós fó anima tebes ita. (1 Kor 14:26) Iha tempu neʼebé ita koʼalia ho ita-nia irmaun-irmán sira antes reuniaun no bainhira reuniaun remata tiha, neʼe halo ita sente ita iha interese ba malu no halo ita-nia neon sai fresku.—1 Kor 16:17, 18. w16.04 3:6, 7

Jesus hatete katak ninia dixípulu sira sei haklaken liafuan diʼak kona-ba Maromak nia Ukun “iha mundu tomak”. Sira sei bá “nasaun hotu” atu ajuda ema sai Jesus nia dixípulu. (Mt 24:14) Neʼe dehan katak serbisu haklaken sei habelar toʼo mundu tomak. Ita la iha duvida katak Testemuña ba Jeová mak kumpre daudaun serbisu haklaken neʼebé Jesus fó-hatene nanis. Oinsá mak ita hatene? Se ita kompara igreja kristaun hotu iha rai-Estadus Unidus iha padre maizumenus hamutuk naʼin–600.000, maibé Testemuña ba Jeová iha ema naʼin–1.200.000 mak haklaken iha neʼebá. Iha mundu tomak, igreja Katólika Roma iha padre maizumenus naʼin–400.000, maibé Testemuña ba Jeová, iha ema naʼin–8.000.000 mak haklaken hela liafuan diʼak iha rai 240. Husi neʼe ita bele haree katak Testemuña ba Jeová mak haklaken daudauk iha mundu tomak hodi fó glória no hahiʼi ba Jeová!—Sal 34:1; 51:15. w16.05 2:13, 14

Ita bele haree katak, tanba ema hakarak moris livre husi Maromak, neʼe kria hahalok foti-an, hanoin an deʼit, no kontra malu. Hahalok sira-neʼe hamosu konflitu oioin no ema mós la hanoin malu bainhira atu halo desizaun ruma. (Gên 3:1-5) Iha Jesus nia diskursu, nia hanorin ninia dixípulu katak maski sira mak lakon mós, sira presiza atu buka dame hodi la bele hamosu konflitu. Nia hatete ba sira atu hatudu laran-diʼak ba malu, buka dame ba malu, halakon sentimentu neʼebé halo sira hirus, rezolve problema ho lalais, no sira mós tenke hadomi sira-nia inimigu.—Mt 5:5, 9, 22, 25, 44. w16.05 1:4, 5

Antes batizmu, ita hotu presiza kumpre Bíblia nia kritériu sira no halo mudansa ba ita-nia hahalok. Hetan tiha batizmu, ita mós kontinua halo mudansa hodi bele hakbesik liután ba Maromak no Jesus. (Éf 5:1, 2; 1 Ped 2:21) Porezemplu, karik ita iha hela hahalok hanesan muramura, gosip, koʼalia liafuan neʼebé hakanek ema nia laran, taʼuk ba ema, ka fraku seluk tan. Karik ita koko ona ba tinan barak atu troka hahalok sira-neʼe, maibé ita repete nafatin hahalok sira-neʼe. Hanoin-hetan katak ita sei sala-naʼin nafatin. (Kol 3:9, 10) Tan neʼe maski ita hetan batizmu ba tinan barak ona mós ita sei halo sala nafatin. Dala ruma ita bele iha hakarak ka sentimentu neʼebé sala, ka karik ita bele sente susar atu kontrola ita-nia hahalok ruma. No karik ita mós presiza luta ba tinan barak hasoru fraku sira-neʼe.—Tgo 3:2. w16.05 4:3-5

Karik ita rona ona ema koʼalia hanesan neʼe: ‘Agora iha oan ona mak haʼu foin komprende katak dixiplina neʼebé uluk inan-aman fó, iha folin-boot tebes ba haʼu.’ Loos duni, bainhira ita sai boot mak ita foin hafolin dixiplina, tanba dixiplina mak hahalok domin ida ba ita. (Ebr 12:5, 11) Jeová hadomi tebes ita hanesan ninia oan, tan neʼe mak nia fó dixiplina ka hadiʼa ita-nia hahalok ho pasiénsia. Nia halo nuneʼe tanba nia hakarak ita atu sai matenek no kontente hodi hadomi fali nia hanesan ita-nia Aman. (Prov 23:15) Nia la gosta atu haree ita terus, no nia mós la gosta haree ita mate husi sala neʼebé ita simu husi Adão. (Éf 2:2, 3) Antes ita koñese Jeová, karik ita iha hahalok barak neʼebé Jeová la gosta. Maibé Jeová ajuda ita hadiʼa hahalok sira-neʼe no agora ita iha fali hahalok neʼebé furak tebes.—Isa 11:6-8; Kol 3:9, 10. w16.06 1:7, 8

Labarik barak iha hahalok haraik-an no gosta atu aprende buat foun. (Mt 18:1-3) Tan neʼe mak diʼak ba inan-aman atu ajuda oan aprende kona-ba lia-loos no rai lia-loos iha sira-nia neon no laran bainhira sira sei kiʼik. (2 Tim 3:14, 15) Maibé atu hetan susesu, inan-aman rasik tenke rai uluk lia-loos iha sira-nia laran no moris tuir lia-loos iha moris loroloron nian. Tanba, se inan-aman mak halo hanesan neʼe, oan sira mós bele sente rasik saida mak moris tuir lia-loos, laʼós rona deʼit. Nuneʼe mós bainhira inan-aman atu fó dixiplina ba sira, sira bele sente katak inan-aman halo hanesan neʼe tanba sira hadomi oan no Jeová mós hadomi sira. Se ita mak haraik-an no sempre halo tuir Jeová, ita mós sei sai hanesan ema neʼebé iha folin-boot tebes ba nia hanesan Daniel. (Dan 10:11, 19) Jeová mós sei kontinua atu uza ninia Liafuan, espíritu santu, no kongregasaun hodi forma ita. w16.06 2:14, 17

Jeová gosta tebes David tanba nia iha hahalok furak. (1 Sam 13:13, 14) Maibé ikusmai David halo sala ho Batseba no Batseba sai isin-rua. Iha tempu neʼebá Batseba nia laʼen Urias bá funu hela. No David haruka Urias atu fila uma ba tempu uitoan. David halo hanesan neʼe tanba nia hakarak Urias atu toba ho Batseba hodi ema seluk bele hanoin katak labarik nia aman mak Urias. Maibé Urias lakohi fila ba ninia uma. Tan neʼe David halo fali arranju seluk hodi oho Urias iha funu. Tanba David nia sala sira-neʼe, neʼe lori terus ba David no ninia uma-laran. (2 Sam 12:9-12) Maibé ikusmai Jeová hatudu laran-sadiʼa no fó perdua ba David. Jeová hatene katak husi laran David mak ema neʼebé iha laran-metin ba nia. (1 Reis 9:4) Se ita mak moris iha tempu neʼebá, ita sente oinsá kona-ba buat neʼebé David halo? Ita sei para deʼit atu la serbí tan Jeová ka lae? w16.06 4:7

Nuʼudar Testemuña ba Jeová, ita fó duni atensaun ba Jesus nia avizu neʼe. Ita hatene katak ita hela daudauk iha loron ikus sira no “terus boot” besik ona atu hahú. (Dan 12:4; Mt 24:21) Ita haree sinál neʼebé Jesus hatete akontese daudauk hanesan funu, krime, violénsia, relijiaun lohi ema, moras aat, rai-nakdoko, no iha fatin barak rai-hamlaha. Ita mós haree Jeová nia povu haklaken daudauk ninia mensajen kona-ba ninia Ukun iha mundu tomak. (Mt 24:7, 11, 12, 14; Lc 21:11) Ita hein duni ho laran-manas ba tempu neʼebé Jesus atu mai no halo ninia Aman nia promesa hotu sai loos. (Mc 13:26, 27) Maibé, susar atu hatene bainhira loos mak terus boot atu hahú. w16.07 2:2-4

Tanba Jeová nia laran-diʼak neʼebé boot mak ita bele halo orasaun ba nia. Ita bele halo orasaun ba Jeová liuhusi Jesus iha tempu naran deʼit. Apóstolu Paulo dehan: “Ita bele koʼalia ho aten-brani no hakbesik ba Maromak ho fiar-metin, tanba ita tau fiar ba Kristu.” (Éf 3:12) Loos duni, tanba Jeová nia laran-diʼak neʼebé boot mak ita iha priviléjiu atu bele koʼalia ba nia iha tempu naran deʼit. Apóstolu Paulo fó laran-manas ba ita atu halo orasaun ba Jeová iha tempu naran deʼit “atu nuneʼe ita bele simu laran-sadiʼa no hetan ajuda iha tempu neʼebé loos liuhusi Maromak nia laran-diʼak neʼebé boot”. (Ebr 4:16b) Iha tempu neʼebé terus no susar koko ita-nia moris, ita bele husu makaʼas ba Jeová atu ajuda ita. Tuir loloos Jeová la presiza atu rona ba ita-nia orasaun, maibé tanba nia iha laran-sadiʼa, nia hatán ita-nia orasaun. Dala barak nia uza irmaun-irmán mak atu fó ajuda ba ita, “atu nuneʼe ita bele sai aten-brani liu no dehan: ‘Jeová mak haʼu-nia ajuda-naʼin; haʼu sei nunka taʼuk. Saida mak ema bele halo ba haʼu?’”—Ebr 13:6. w16.07 3:12, 13

Noé no ninia oan-mane naʼin-tolu, ida-idak iha feen ida deʼit, maibé kuandu rai-nabeen liutiha, ema komesa iha feen barak. Iha tempu neʼebá, ema barak haree hahalok sala-foʼer hanesan buat baibain, dala ruma sai mós hanesan kostume ida ba sira-nia relijiaun. Bainhira Abraão no Sara muda ba rai-Kanaán, rai neʼe nakonu ho hahalok la morál no ema laiha respeitu ba moris kaben nian. Tan neʼe Jeová deside atu halakon sidade Sodoma no Gomorra tanba ema iha sidade sira-neʼe halo no simu hahalok sala-foʼer neʼebé aat tebes. Maibé Abraão la hanesan neʼe. Nia mak família nia ulun neʼebé diʼak, no Sara mós hatudu ezemplu neʼebé diʼak hodi hatudu respeitu ba ninia laʼen nuʼudar ulun. (1 Ped 3:3-5) Abraão hakaʼas an hodi buka feto neʼebé adora Jeová atu kaben ho ninia oan Isaac, no Isaac mós halo hanesan neʼe ba ninia oan Jacob. No ikusmai Jacob nia oan sira sai nuʼudar beiʼala ba suku 12 husi Izraél. w16.08 1:10

Liafuan sira-neʼe sai loos daudauk iha loron ikus sira-neʼe. Iha tinan 2015, ita bele haree Jeová nia povu naʼin–8.220.105 mak haklaken ona iha mundu tomak. Kona-ba neʼe, Maromak hatete: “Haʼu Jeová rasik mak sei halo ida-neʼe ho lalais tuir ninia tempu.” Nuʼudar tempu laʼo daudauk, ita mós iha serbisu barak atu halo. Ita hakaʼas an hodi haklaken no hanorin ema kona-ba Bíblia ka lae? Irmaun-irmán barak mak serbí hela nuʼudar pioneiru regulár ka pioneiru estra. Balu muda ona ba rai seluk atu ajuda iha serbisu haklaken, no balu tan hola parte iha serbisu konstrusaun. Husi neʼe ita bele haree duni katak sei iha serbisu barak “iha Naʼi” atu halo, ba irmaun no mós irmán sira.—1 Kor 15:58. w16.08 3:1, 2

Bainhira ema Izraél sai livre ona husi rai-Ejitu, lakleur ema Ámalek ataka sira. Moisés haruka Josué mak lori ema Izraél ba funu. Tuirmai Moisés lori Aarão no Hur ba foho tutun ida atu bele haree funu neʼe. Moisés uza planu ida atu ajuda ema Izraél manán hasoru ema Ámalek. Nia kaer ho liman rua ai-tonka neʼebé uluk Maromak fó ba nia no hiʼit saʼe ba leten. Bainhira nia hiʼit saʼe, Jeová fó forsa ba ema Izraél. Maibé, iha tempu neʼebé Moisés komesa hatún nia liman tanba kole, ema Ámalek mak atu manán fali funu neʼe. Bainhira Aarão no Hur haree ida-neʼe, sira halo buat ida hodi fó ajuda lalais ba Moisés. Sira “foti fatuk ida ba [Moisés] atu tuur no nia tuur iha leten. Tuirmai Aarão no Hur foti ninia liman husi sorin ida-idak atu nuneʼe ninia liman hiʼit saʼe nafatin toʼo loro-matan monu”. Ikusmai tanba Maromak nia liman neʼebé forte mak ema Izraél manán funu neʼe.—Êx 17:8-13. w16.09 1:5-7

Apóstolu Paulo rasik komprende katak la fasil atu luta hasoru hakarak neʼebé sala no hasoru ita-nia fraku. Maibé nia fiar katak, se nia halo orasaun hodi sadere ba Jeová no tau fiar ba Jesus nia sakrifísiu, nia bele manán hasoru luta neʼe. Oinsá ho ita? Ita mós bele luta manán hasoru ita-nia fraku sira ka lae? Bele. Se ita banati-tuir Paulo nia ezemplu hodi sadere deʼit ba Jeová, laʼós ita-nia kbiit, no tau fiar ba Jesus nia sakrifísiu, ita bele manán duni. Dala ruma Maromak hakarak ita atu hatudu oinsá ita sente kona-ba problema ruma. Porezemplu, bainhira ita ka ema ruma iha ita-nia família moras todan ka hasoru hela situasaun la justu ruma, ita sei halo saida? Se ita mak tau fiar tomak ba Jeová, ita sei husu makaʼas ba nia atu fó kbiit mai ita hodi bele laran-metin, la lakon ksolok no iha nafatin relasaun neʼebé metin ho nia. (Flp 4:13) Ezemplu husi ema kristaun sira husi tempu uluk no ohin loron hatudu katak orasaun bele ajuda duni hametin ita no fó kbiit ba ita atu kontinua tahan. w16.09 2:14, 15

Liutiha tempu balu, iha buat ida akontese iha kongregasaun. Ema judeu neʼebé koʼalia lia-gregu muramura no dehan katak sira-nia feto-faluk la hetan hahán. Tan neʼe apóstolu sira hili mane naʼin-hitu atu tau matan ba problema neʼe. Apóstolu sira hili mane sira neʼebé ho naran gregu, karik neʼe tanba atu halo fasil liu ba feto-faluk sira hodi simu ajuda. (Após 6:2-6) Dala ruma ita-nia kultura mós bele book ita-nia hanoin. (Rom 12:2) Karik ita rona viziñu, kolega serbisu, ka kolega eskola koʼalia buat neʼebé hatún ema husi rai seluk, suku, ka rasa seluk. Ita mós iha hanoin hanesan sira ka lae? No bainhira ema ida hatún ita-nia nasaun ka kultura, ita halo saida? w16.10 1:7, 8

“Liuhusi fiar mak ita hatene” katak iha Kriadór ida maski matan la haree. (Ebr 11:3, 27) Ema neʼebé fiar uza mós sira-nia neon, laʼós liuhusi buat neʼebé sira haree ka rona deʼit. Atu ajuda ita fiar ba Kriadór, ita-nia organizasaun fó sai ona informasaun barak. (Porezemplu, vídeo Keajaiban Ciptaan Menyingkapkan Kemuliaan Allah, broxura sira Moris Hotu Mosu Mesak Deʼit ka lae?, no Asal Mula Kehidupan—Lima Pertanyaan yang Patut Direnungkan, no livru Apakah Ada Pencipta yang Mempedulikan Anda?) Baibain husi ita-nia livru Matan-moris bá! ita bele haree entrevista neʼebé halo ho sientista no ema balu, sira esplika tanbasá mak ikusmai sira mós fiar ba Maromak. Iha mós série ida ho títulu “Maromak mak kria ka lae?”. Husi série neʼe esplika kona-ba kriasaun sira halo iha dalan neʼebé úniku tebes, no sientista barak mós koko atu inventa sasán ruma tuir modelu husi kriasaun sira-neʼe. w16.09 4:4, 5

Ema fiar-naʼin sira neʼebé temi iha Ebreu kapítulu 11, mate hotu ona, maibé Jeová sei halo sira moris hiʼas fali. Sira sei la bá lalehan tanba iha tempu neʼebé sira mate, “bei-oan” neʼe ka Jesus Kristu seidauk loke dalan ba ema atu bele moris hiʼas ba lalehan. (Gal 3:16) Tan neʼe, ema sira-neʼe sei hetan moris-hiʼas atu moris iha paraízu furak iha rai ba nafatin. (Sal 37:11; Isa 26:19; Os 13:14) Ebreu 11:13 koʼalia kona-ba fiar-naʼin sira iha tempu antigu hodi dehan: “Ema sira-neʼe hotu mate iha fiar; no maski sira la haree promesa sira-neʼe sai loos, maibé sira haree neʼe husi dook no haksolok ho promesa sira-neʼe.” Husi ema sira-neʼe, ida mak Abraão. Jesus dehan: “Abraão haksolok tebes ho esperansa atu haree haʼu-nia loron.” (João 8:56) Sara, Isaac, Jacob, no ema seluk tan mós hein atu haree tempu neʼebé Maromak nia Governu sei ukun iha futuru.—Ebr 11:8-11. w16.10 3:4, 5

Liuhusi espíritu santu mak Jeová ajuda ita atu komprende kona-ba lia-loos no haburas ita-nia fiar. (Lc 10:21) Neʼe duni, ita tenke fó agradese beibeik ba Jeová, tanba nia fó oportunidade ba ita atu iha relasaun neʼebé diʼak no hakbesik ba nia liuhusi Jesus, “Ida neʼebé halo kompletu ita-nia fiar no ita-nia Naʼi-Ulun ba fiar”. (Ebr 12:2) Ita presiza halo orasaun no estuda beibeik Bíblia hodi hametin liután ita-nia fiar. (1 Ped 2:2) Ita presiza hatudu nafatin katak ita iha fiar ba Jeová nia promesa sira liuhusi ita-nia hahalok. Porezemplu, tenke haklaken beibeik kona-ba Maromak nia Ukun no ajuda ema sai Jesus nia dixípulu. Ita tenke halo beibeik “buat neʼebé diʼak ba ema hotu, maibé liuliu ba ita-nia maluk fiar-naʼin”. (Gal 6:10) Ita mós tenkesér hakaʼas an atu “hasai tiha ema tuan nian hamutuk ho ninia hahalok sira”.—Kol 3:5, 8-10. w16.10 4:11, 12

Jeová mak organiza buat hotu iha lalehan no rai iha dalan neʼebé kmanek tebes. Entaun, ita mós bele fiar katak nia hakarak ema neʼebé adora nia atu organiza an ho didiʼak. Tan neʼe mak nia fó Bíblia mai ita atu hanorin ita no fó matadalan kona-ba oinsá ita bele adora nia. Bainhira ita moris tuir matadalan sira neʼebé nia fó liuhusi Bíblia no ninia organizasaun, neʼe sei lori ksolok no kontente ba ita-nia moris. Jeová fó ba ema Izraél Moisés nia Ukun-Fuan hodi ajuda sira organiza an iha dalan neʼebé diʼak. Porezemplu, Ukun-Fuan neʼe fó matadalan ba feto sira neʼebé simu “knaar atu serbí iha fatin atu tama ba tenda reuniaun nian”. (Êx 38:8) Ikusmai, Liurai David mós organiza serbisu ida-idak fó ba amlulik no ema levita sira atu halo iha templu. (1 Crôn 23:1-6; 24:1-3) Kongregasaun iha apóstolu sira-nia tempu mós organiza ho didiʼak. Iha tempu neʼebá, apóstolu sira forma grupu kiʼik ida naran grupu administradór. Foufoun apóstolu sira deʼit mak serbí iha grupu neʼe. Grupu neʼe mak fó matadalan ba kongregasaun hotu iha tempu neʼebá. (Após 6:1-6) Jeová mós uza espíritu santu hodi hakerek karta balu atu fó konsellu ka matadalan ba kongregasaun sira.—1 Tim 3:1-13; Tito 1:5-9. w16.11 2:3, 6, 8, 9

Iha tinan 607 molok Kristu, Liurai Nabukodonosor II lori tropa boot husi Babilónia hodi ataka sidade Jeruzalein. Kona-ba tempu neʼe, Bíblia hatete katak Nabukodonosor “oho sira-nia mane joven sira ho surik iha sira-nia fatin santu; nia la sente kasian ba mane joven sira no feto-virjen, katuas-ferik no ema neʼebé fraku. . . . Nia sunu Maromak loos nia uma, harahun Jeruzalein nia moru, sunu ninia uma aas hotu ho ahi, no harahun buat hotu neʼebé folin-boot”. (2 Crôn 36:17, 19) Tuir loloos Jeruzalein naksobu laʼós buat neʼebé akontese derrepente deʼit, tanba Maromak haruka ninia profeta sira fó-hatene nanis tinan barak ona ba ema judeu sira katak, se sira la rona no la halo tuir beibeik Maromak nia Ukun-Fuan, ema Babilónia sei mai ataka sira. No katak ema barak sei mate ho surik, sira neʼebé la mate, sei sai dadur iha Babilónia iha sira-nia moris tomak. w16.11 4:1, 2

Liuhusi Adão mak sala no mate hadaʼet ba ema hotu iha mundu neʼe. Tan neʼe mak Bíblia dehan katak “liuhusi ema ida nia sala mak mate ukun nuʼudar liurai”. Maibé Jeová hatudu laran-diʼak neʼebé boot hodi loke dalan atu salva ema hotu “liuhusi ema ida, Jesus Kristu”. (Rom 5:12, 15, 17) No “liuhusi ema ida deʼit [Jesus] neʼebé halo tuir, Maromak sei haree ema barak nuʼudar ema loos”. Sin, Jeová nia laran-diʼak neʼebé boot “lori moris rohan-laek liuhusi ita Naʼi Jesus Kristu”. (Rom 5:19, 21) Tuir loloos, Maromak Jeová la presiza fó ninia Oan-Mane nia moris ba ita. Maibé tanba ninia laran-diʼak neʼebé boot mak nia hakarak salva ita husi sala no mate. Ita hotu la serve atu simu buat neʼebé Jeová no Jesus halo ba ita. Tan neʼe mak ita agradese tebes ba sira tanba loke dalan hodi fó perdua ba ita-nia sala no bele iha esperansa atu moris ba nafatin! Mai ita hatudu ita-nia agradese ba Maromak liuhusi dalan neʼebé ita halaʼo ita-nia moris. w16.12 1:1, 6, 7

Importante tebes atu buka-hatene didiʼak kona-ba ita-nia moris. Tanbasá? Tanba apóstolu Paulo dehan: “Hanoin buat isin nian lori ba mate.” (Rom 8:6) Ninia liafuan neʼe katak sá? Neʼe katak se ita mak “halo tuir buat isin nian”, neʼe bele estraga ita-nia relasaun diʼak ho Jeová no ita mós bele lakon ita-nia moris iha futuru. Maibé ita bele troka dalan neʼebé ita moris. Hanoin-hetan mane iha tempu uluk neʼebé kongregasaun Korinto hasai tanba nia halo hahalok la morál? Bainhira nia hetan tiha dixiplina, nia mós troka ninia moris. Nia la moris tan atu halo tuir hakarak isin nian no ikusmai nia serbí Jeová iha dalan neʼebé moos. (2 Kor 2:6-8) Se mane neʼe bele troka ninia moris, ita mós bele troka, liuliu se ita seidauk halo buat neʼebé aat hanesan mane neʼe halo. Paulo nia avizu kona-ba saida mak bele akontese ba ema neʼebé “hanoin buat isin nian”, book duni ema kristaun sira ohin loron atu halo mudansa ba sira-nia moris. w16.12 2:5, 12, 13

Bainhira ita entrega ita-nia laran-susar ba Jeová, nia sei hametin ita, neʼe halo ita-nia laran sente kmaan tebes, loos ka lae? Ita bele tau fiar tomak katak “Maromak bele halo barak liu fali buat hotu neʼebé ita husu no hanoin”. (Éf 3:20) Jeová sei fó ajuda ba ita, laʼós uitoan ka barak, maibé barak liután. Ita presiza tau fiar tomak ba Jeová no halo tuir ninia matadalan se ita hakarak atu simu kolen. Moisés hatete ba nasaun Izraél: “Jeová sei haraik duni bensaun ba imi iha rai neʼebé Jeová, imi-nia Maromak, sei fó ba imi atu foti nuʼudar imi-nia liman-rohan, maibé nia sei haraik bensaun neʼe só deʼit se imi rona ba Jeová, imi-nia Maromak nia lian no halo tuir ho didiʼak ninia mandamentu hotu neʼebé haʼu hatoʼo ba imi ohin. Tanba Jeová, imi-nia Maromak, sei haraik bensaun ba imi hanesan nia promete ona ba imi.” (Deut 15:4-6) Ita fiar ho laran tomak ka lae katak, se Ita mak serbí Jeová ho laran, nia sei fó bensaun ba Ita? Ita la iha duvida kona-ba neʼe, loos ka lae? w16.12 4:8, 9

Jeová halo desizaun neʼe tanba razaun ida, nia hakarak kumpre ninia promete neʼebé nia halo ho ninia belun Abraão. (Gên 22:15-18) Jeová sempre uza ninia liberdade iha dalan neʼebé domin no la todan ba sorin. Ita bele haree kona-ba neʼe husi dalan neʼebé nia fó dixiplina ba ema Izraél iha tempu neʼebé sira kontra nia. Bainhira ema Izraél arrepende an ho laran kona-ba sira-nia sala, Jeová hatudu domin no laran-sadiʼa ba sira. Nia dehan: “Haʼu sei kura sira, no sira sei la hatudu fali hahalok la laran-metin, haʼu sei hadomi sira ho haʼu-nia hakarak rasik.” (Os 14:4) Jeová hatudu ezemplu neʼebé diʼak tebes ba ita oinsá atu uza liberdade hodi ajuda ema seluk! Bainhira Jeová kria anju no ema, nia kria sira ho liberdade atu hili. Ninia kriatura primeiru mak Jesus. Jeová kria Jesus tuir ninia ilas no fó liberdade ba nia. (Kol 1:15) Antes tun mai rai, Jesus hili atu hatudu laran-metin ba Maromak hodi la tuir Satanás atu kontra Jeová. w17.01 2:3, 4

Dala ruma mudansa balu bele mai husi situasaun moris nian. Porezemplu, karik ita iha ona tempu atu halo serbisu liután, ka ita-nia situasaun la husik atu halo serbisu liután ba Jeová. Maibé maski ita mak ema neʼebé joven ka idade, saúde diʼak ka ladiʼak, Jeová hatene oinsá atu uza ita hodi serbí nia tuir ita-nia kbiit. Nia nunka husu ita atu halo buat neʼebé ita la iha kbiit atu halo. No nia kontente tebes atu haree ita hakaʼas an hodi serbí nia. Jesus simu knaar sira neʼebé Jeová fó ba nia ho haksolok, no ita mós bele haksolok hanesan Jesus. (Prov 8:30, 31) Ema neʼebé haraik an kontente ho priviléjiu no knaar neʼebé nia iha. Nia la hanoin demais kona-ba buat neʼebé ema seluk halo. Maibé nia haksolok ho knaar neʼebé nia simu iha Maromak nia organizasaun. Nia haree knaar sira-neʼe mai husi Jeová. Ema neʼebé haraik an respeitu ema seluk no apoia sira ho haksolok. Nia rekoñese katak Jeová mós fó knaar ba ema sira-neʼe.—Rom 12:10. w17.01 3:13, 14

Dala ruma irmaun sira neʼebé seidauk idade hetan knaar atu tau matan ba serbisu neʼebé irmaun idade sira halo. Diʼak ba irmaun neʼebé seidauk idade atu aprende husi sira neʼebé idade ona. Timóteo nia idade kiʼik liu apóstolu Paulo, maibé sira serbisu hamutuk ba tinan barak. Iha Paulo nia karta neʼebé nia hakerek ba ema Korinto dehan: “Haʼu haruka Timóteo ba imi, tanba nia mak ida neʼebé haʼu hadomi no oan neʼebé laran-metin iha Naʼi; no nia sei halo imi hatene haʼu-nia dalan sira kona-ba Kristu Jesus.” (1 Kor 4:17) Husi neʼe ita bele haree katak Paulo no Timóteo serbisu hamutuk ho didiʼak no apoia malu. Paulo uza tempu atu hanorin Timóteo ninia “dalan sira”, no Timóteo mós aprende ho didiʼak. Paulo gosta tebes Timóteo no tau fiar katak Timóteo sei tau matan didiʼak ba irmaun-irmán sira iha Korinto. Katuas kongregasaun ohin loron bele halo tuir apóstolu Paulo nia ezemplu bainhira sira fó treinu ba irmaun seluk oinsá atu tau matan ba kongregasaun. w17.01 5:13, 14

Jeová mak moris nia hun, tan neʼe mak bainhira nia fó moris-hiʼas ba ema mate, nia sei sai sira-nia Aman. (Sal 36:9) Neʼe liga duni ho liafuan iha Jesus nia orasaun neʼebé dehan: “Ami Aman iha lalehan.” (Mt 6:9) Jeová fó knaar importante ba Jesus atu fó moris-hiʼas ba ema, tan neʼe Jesus dehan: “Haʼu mak moris-hiʼas no moris. (João 6:40, 44; 11:25) Jesus mós hatete: “Ema naran deʼit neʼebé halo Maromak nia hakarak, nia mak haʼu-nia alin, feton, no inan.” (Mc 3:35) Jeová ninia hakarak mak “ema-lubun boot neʼebé la bele sura, neʼebé mai husi nasaun, suku, povu no lian hotu” atu serbí nia. Ema sira-neʼe tau fiar ba Jesus nia sakrifísiu no hakarak atu halo tuir Jeová. Sira mós fó hahiʼi ba Jeová hodi dehan: “Salvasaun mai husi ita-nia Maromak neʼebé tuur iha kadunan, no husi Bibi-Oan.”—Apok 7:9, 10. w17.02 2:10, 11

Atu hanorin lia-loos husi Bíblia ba ema neʼebé koʼalia língua oioin, asosiasaun Zion’s Watch Tower Tract Society hetan rejistu iha tinan 1884, no Charles Taze Russell mak sai prezidente. Irmaun Russell estuda Bíblia ho badinas no nia mós aten-brani tebes hodi fó-hatene ba ema seluk katak igreja nia doutrina sira kona-ba Trindade no klamar, la mai husi Bíblia. Nia aprende husi Bíblia katak Kristu sei mai fali, maibé laʼós ho isin no raan, no “tempu nasaun sira-nian” sei ramata iha tinan 1914. (Lc 21:24) Irmaun Russell uza ninia tempu, forsa, no osan hodi hanorin ema seluk kona-ba lia-loos sira-neʼe. Ita bele haree ho klaru katak Jeová no Jesus mak uza irmaun Russell iha tempu neʼebá. Irmaun Russell la buka atu sai naran boot. Iha tinan 1896 nia hatete katak nia no irmaun sira neʼebé dirije Maromak nia povu lakohi ema seluk atu fó glória ba sira ka uza títulu espesiál atu bolu sira. No sira mós lakohi grupu sira atu hanaran tuir sira-nia naran. Ikusmai nia dehan: “Ida-neʼe laʼós ema nia serbisu.” w17.02 4:8, 9

Ita hotu presiza halo desizaun oioin iha ita-nia moris. Desizaun balu sériu, balu lae. Maski nuneʼe, desizaun barak neʼebé ita halo bele fó impaktu boot ba ita-nia moris. Se ita mak halo desizaun neʼebé diʼak, ita sei la hasoru problema barak no ita-nia moris sei sai hakmatek liu. Maibé, se ita mak halo desizaun neʼebé sala, neʼe bele lori susar no problema oioin ba ita-nia moris. Saida mak bele ajuda ita atu halo desizaun neʼebé matenek? Ita tenke hatudu fiar ba Maromak, ita tenke fiar katak nia hakarak ajuda ita no nia sei fó matenek ba ita atu halo desizaun neʼebé diʼak. Ita mós presiza tau fiar ba matadalan sira husi ninia Liafuan. (Tgo 1:5-8) Nuʼudar ita hakbesik ba Jeová no hadomi liután ninia Liafuan, neʼe sei ajuda ita atu fiar katak Jeová hatene liu buat neʼebé mak diʼak ba ita. Tan neʼe ita hakarak buka uluk matadalan husi Maromak nia Liafuan antes halo desizaun ruma. w17.03 2:2, 3

Jeosafát sadere ba Jeová hanesan ninia aman Asa halo bainhira inimigu nia tropa boot mai funu hasoru Judá. (2 Crôn 20:2-4) Iha tempu neʼebá Jeosafát sai taʼuk, tan neʼe nia buka ajuda husi Jeová. Iha ninia orasaun, nia rekoñese katak nia la iha kbiit atu manán inimigu sira-neʼe. Nia mós hatete katak nia no ninia povu la hatene atu halo saida iha tempu neʼebá. Maski nuneʼe, nia la iha duvida katak Jeová sei ajuda sira, hanesan nia temi iha eskritura ba ohin. Hanesan Jeosafát, dala ruma ita hasoru susar balu neʼebé halo ita la hatene atu halo saida ho problema neʼe, no karik ita mós bele sai taʼuk. (2 Kor 4:8, 9) Maibé, saida mak Jeosafát halo? Nia halo orasaun iha ema barak nia oin hodi hatete ba Jeová katak sira sente fraku tebes iha tempu neʼebá. (2 Crôn 20:5) Diʼak ba família nia ulun atu halo tuir Jeosafát nia ezemplu. Husu Jeová atu ajuda Ita no Ita-nia família tahan hasoru problema neʼebé Ita hasoru daudauk no husu nia atu fó matadalan ba Ita. Keta sente moe atu halo orasaun hanesan neʼe iha família nia oin. Tanba neʼe bele ajuda sira hatene katak Ita tau duni fiar ba Jeová. Jeová fó duni ajuda ba Jeosafát no nia mós sei fó ajuda ba Ita. w17.03 3:12, 13