Jullu

Jefté nia oan feto husik hotu hakarak neʼebé baibain ba ema atu bele iha laʼen no oan hodi serbí Jeová. Oinsá mak ita bele banati-tuir ninia ezemplu neʼe? Ohin loron, iha joven kristaun feto no mane barak mak husik sira-nia oportunidade atu kaben ka atu iha oan hodi serbí Jeová liután. Sira neʼebé idade boot ona mós halo sakrifísiu ba sira-nia tempu neʼebé sira uza atu halimar ho sira-nia oan ka bei-oan. Sira fó fali tempu no forsa sira-neʼe hodi serbí Jeová. Balu halo serbisu konstrusaun ba Jeová nia organizasaun, balu tuir Eskola ba Haklaken-Naʼin Tempu-Tomak, no balu muda ba serbí iha fatin neʼebé presiza haklaken-naʼin. Balu tan halo planu hodi bele aumenta sira-nia haklaken. Ba Jeová, nia sei nunka haluha kona-ba sakrifísiu sira neʼebé irmaun-irmán sira fó ho laran-haksolok no domin. (Ebr 6:10-12) Oinsá ho ita? Ita bele halo sakrifísiu hanesan neʼe hodi bele serbí Jeová liután ka lae? w16.04 1:16, 17

Jesus kompara ninia an hanesan bibi-atan no ninia eskolante mak bibi-luhan ida. Hanoin toʼok se bibi rua iha foho tutun, rua seluk iha foho leet, no ida tan iha fatin seluk, ita bele bolu bibi lima neʼe bibi-lubun ida deʼit ka lae? Lae, tanba bibi sira hamutuk no tuir hela sira-nia bibi-atan mak ita bele bolu lubun ida. Hanesan neʼe mós ho ita, ita labele sees husi ita-nia irmaun-irmán sira hodi falta reuniaun. Ita presiza halibur hamutuk nafatin atu sai “luhan ida” no tuir “bibi-atan ida deʼit.” Ita-nia reuniaun mós ajuda ita sai ida deʼit hanesan família ida. (Sal 133:1) Iha irmaun-irmán balu, sira-nia família rasik hakribi sira. Maibé Jesus promete ba sira katak nia sei fó família ida ba sira hodi hadomi no tau matan ba sira. (Mc 10:29, 30) Se ita mak tuir beibeik reuniaun, ita mós sai hanesan inan, aman, maun, no biin-alin ba sira. Bainhira ita hanoin kona-ba neʼe, neʼe halo ita hakarak hakaʼas an liután atu tuir reuniaun sira, loos ka lae? w16.04 3:9, 10

Se ita mak la buka dame ho ema seluk, ita-nia orasaun, haklaken, tuir reuniaun, no buat seluk neʼebé ita halo atu adora Jeová sei sai saugati deʼit. Maromak sei la simu ita sai ninia belun se ita la fó perdua ba ema nia fraku sira. (Lc 11:4; Éf 4:32) Jeová hakarak ninia atan hotu atu hatudu hahalok fó perdua no iha relasaun neʼebé diʼak ho ema seluk. Tan neʼe diʼak atu hanoin kona-ba pergunta sira-neʼe: ‘Haʼu fó perdua ba irmaun-irmán sira ho laran ka lae? Haʼu gosta hamutuk ho sira ka lae?’ Se ita sente katak ita sei presiza hadiʼa buat hirak-neʼe, halo orasaun ba Jeová atu husu ajuda hodi ita bele halo mudansa. Ita-nia Aman Maromak iha lalehan gosta rona no hatán ba orasaun haraik an hanesan neʼe.—1 João 5:14, 15. w16.05 1:6, 7

Ita presiza haklaken toʼo bainhira? Jesus hatete katak serbisu haklaken sei halaʼo toʼo mundu nia rohan toʼo mai. Testemuña ba Jeová bele halaʼo serbisu haklaken toʼo ohin loron, neʼe hatudu duni katak ita iha Jeová nia espíritu santu. (Após 1:8; 1 Ped 4:14) Ema balu husi relijiaun seluk hatete katak sira mós iha Maromak nia espíritu santu, maibé sira bele halo serbisu hanesan Testemuña ba Jeová sira halo iha loron ikus sira-neʼe ka lae? Balun tan koko atu haklaken hanesan ita, maibé ikusmai laiha susesu. Balu konsege duni bá haklaken, maibé tahan ba tempu badak deʼit. Balu tan koko haklaken husi uma ba uma, maibé sira la haklaken kona-ba Maromak nia Ukun. Ida-neʼe hatudu katak laʼós sira mak halaʼo serbisu haklaken neʼebé Jesus halo. w16.05 2:13, 16

Apóstolu Paulo dehan: “Tan neʼe, imi tenke husik tiha hahalok tuan nian, katak imi-nia moris uluk nian, tanba hahalok tuan neʼe sai aat ba beibeik liuhusi imi-nia hakarak aat neʼebé lohi imi. No imi tenke kontinua hafoun imi-nia dalan atu hanoin, no imi tenke tau hahalok foun nuʼudar imi-nia hatais, katak hahalok foun neʼebé Maromak kria tuir ninia hakarak; no hahalok neʼe mak loos no laran-metin.” (Éf 4:22-24) Liafuan “kontinua hafoun” signifika katak atu hadiʼa hahalok, presiza hakaʼas an no prosesu neʼebé naruk. Liafuan sira-neʼe fó anima ita tanba atu hadiʼa hahalok, neʼe la haree ba ita serbí Jeová kleur ona ka foin serbí nia. Bíblia bele duni ajuda ita atu kontinua hadiʼa ita-nia hahalok. w16.05 4:8, 9

Ohin loron, Jeová uza paraízu espirituál nian hodi hadiʼa hela ita-nia hahalok sira. (Isa 64:8) Neʼe mak kondisaun neʼebé úniku tebes iha Maromak nia povu nia leet, tanba iha paraízu neʼe ita sente seguru no hakmatek maski mundu neʼe aat tebes. Maibé importante liu mak agora ita hatene ona Jeová no ita mós sente nia hadomi ita hanesan aman ida. (Tgo 4:8) Iha mundu foun, ita sei hetan bensaun barak liután husi paraízu espirituál neʼe. No iha tempu neʼebá, Maromak nia governu sei ukun mundu tomak hodi sai paraízu. Ita sei sai haksolok tebes tanba Jeová sei kontinua atu hadiʼa ita-nia hahalok no hanorin ita. (Isa 11:9) Jeová mós sei halo ita-nia neon no isin sai perfeitu fali hodi ita bele komprende didiʼak no halo tuir ninia matadalan sira iha dalan neʼebé perfeitu. Tan neʼe, mai ita kontinua husik Jeová atu hadiʼa ita-nia hahalok sira, no mai ita hatudu ba Jeová katak ita hafolin duni dalan neʼebé nia ajuda ita ho domin. w16.06 1:8, 9

Liafuan sira-neʼe mai husi Moisés ba nasaun Izraél iha ninia diskursu ikus iha tinan 1473 molok Kristu. Diskursu neʼe nia hatoʼo husi rai-tetuk iha Moab iha tempu neʼebé nasaun Izraél prontu atu hakur Mota Jordaun hodi tama ba rai promete. (Deut 6:1) Moisés lori ema Izraél ba tinan 40 ona, no nia hakarak sira atu iha aten-brani hodi tahan hasoru susar neʼebé sira sei hasoru iha futuru. Sira presiza tau fiar no laran-metin ba Maromak Jeová. Tan neʼe mak liafuan ikus sira husi Moisés fó laran-manas tebes ba sira. Bainhira Moisés temi tiha Ukun-Fuan Sanulu no ukun-fuan seluk husi Jeová ba sira, nia fó-hanoin tan ba sira ho liafuan neʼebé hakerek iha Deuteronômio 6:4, 5. Ema Izraél hatene ka lae, katak Maromak Jeová mak “Jeová mesak ida deʼit”? Hatene duni! Tanba sira-nia beiʼala adora Maromak mesak ida deʼit. w16.06 3:2, 3

Jesus temi liafuan sira neʼe kuandu nia moris iha rai. Maibé ita bele fiar katak agora Jesus hatene ona, tanba nia mak sei lori funu neʼe hasoru Satanás nia mundu iha Armajedón. (Apok 19:11-16) Ba ita, ita seidauk hatene sá loron ka tempu atu loron ikus nia rohan sei toʼo mai. Tan neʼe mak importante tebes atu matan-moris nafatin. Jeová marka diʼak tiha ona bainhira loos mak terus boot sei hahú, no loron ida-idak neʼebé liu daudauk, neʼe lori ita besik liután ba tempu terus boot nian. Ba Jeová, loron neʼe “sei la tarde!” (Hab 2:1-3) Oinsá mak ita hatene? Buat sira neʼebé Jeová fó-hatene nanis sempre sai loos tuir oras! Jeová mós promete katak nia sei salva ita husi terus boot atu lori ita tama ba mundu foun, no ita bele fiar katak Jeová sei kumpre duni ninia promesa neʼe. Maibé, se ita hakarak atu moris iha mundu foun, ita tenkesér matan-moris nafatin. w16.07 2:4-6

Pedro hatete katak maski ema hotu halai husik Jesus, nia sei la halo hanesan neʼe. (Mc 14:27-31, 50) Maibé iha tempu neʼebé ema kaer Jesus, ninia apóstolu hotu halai husik nia, inklui mós Pedro. Tuirmai Pedro mós nega Jesus ba dala tolu. (Mc 14:53, 54, 66-72) Maibé ikusmai Pedro sente triste no arrepende an tebes ba buat neʼebé nia halo. Tan neʼe Jeová fó perdua ba nia no kontinua uza nia nuʼudar apóstolu ida. Se ita mak apóstolu ida iha tempu neʼebá no ita haree buat sira neʼebé apóstolu Pedro halo, ita sei kontinua tau fiar ba Jeová ka lae? Ohin loron ita fiar nafatin katak Jeová laran-sadiʼa no nia fó daudaun oportunidade ba ema neʼebé halo sala atu arrepende an? Maibé dala ruma iha duni ema neʼebé halo sala no lakohi arrepende an. Ita tau fiar ba Jeová ka lae katak nia hatene situasaun no nia mós sei halo buat ruma iha tempu neʼebé loos? Porezemplu, karik nia sei hasai ema neʼe husi kongregasaun se presiza. Ita fiar ka lae katak Jeová sempre halo buat neʼebé loos no justu? w16.06 4:8, 9

Bensaun ida neʼebé mai husi Jeová mak bainhira ita sente laran-tun, nia fó kmaan ba ita. (Sal 51:17) Iha tempu neʼebé ema fó terus ba kristaun sira iha Tesalónika, apóstolu Paulo hakerek liafuan neʼebé temi iha eskritura ba ohin. Hodi hatene katak Jeová tau matan ba ita ho domin, neʼe halo ita sente kmaan tebes, loos ka lae? Tuir loloos nuʼudar ema sala-naʼin, ita laiha esperansa. (Sal 49:7, 8) Maibé Jeová fó esperansa furak ida ba ita. Esperansa neʼe mak saida? Jesus hatete: “Haʼu-nia Aman hakarak katak ema hotu neʼebé haree Oan-Mane no hatudu fiar ba nia tenke hetan moris rohan-laek.” (João 6:40) Loos duni, dalan neʼebé Jeová hatudu ninia laran-diʼak neʼebé boot mak fó esperansa ba ita atu bele moris ba nafatin. Tan neʼe mak apóstolu Paulo hatete: “Maromak hatudu sai ona ninia laran-diʼak neʼebé boot, hodi lori salvasaun ba ema oioin.”—Tito 2:11. w16.07 3:14, 15

Ohin loron, Jeová nia povu la simu hahalok la laran-metin. Ezemplu ida mak kona-ba kaben-naʼin neʼebé hetan ona batizmu halo sala-foʼer ho ema seluk no soe ninia kaben hodi kaben fali ho ema neʼe. Se nia mak la hatudu arrepende an, kongregasaun sei hasai nia hodi proteje kongregasaun atu moos no santu nafatin. (1 Kor 5:11-13) Nia presiza ‘hatudu liuhusi ninia hahalok katak nia hakribi sala’ antes kongregasaun simu fali nia. (Lc 3:8; 2 Kor 2:5-10) La iha ukun-fuan neʼebé hatudu katak tenkesér liutiha tempu hira mak bele simu fali ema neʼe. Karik bele liutiha tinan ida ka liu atu haree ema neʼe arrepende an duni husi laran, depois mak kongregasaun bele simu fali nia. Maibé, maski kongregasaun simu fali nia mós nia tenkesér hatán ba Maromak “iha Maromak nia kadeira tesi-lia nian nia oin” atu haree katak ninia arrepende an mai husi laran ka laʼós.—Rom 14:10-12. w16.08 1:12, 13

Liafuan gregu neʼebé tradús ba “hakarak” mak hanesan ema neʼebé hakaʼas an hodi lolo ninia liman atu foti buat ida, karik tanba buat neʼe dook husi nia. Apóstolu Paulo uza liafuan neʼe hodi hatudu katak atu laʼo ba oin iha lia-loos, presiza duni hakaʼas an. Ezemplu ida mak kona-ba irmaun neʼebé hanoin daudauk atu kumpre kritériu hodi sai atan ba kongregasaun. Haree tiha kritériu sira, nia rekoñese katak nia presiza hakaʼas an liután atu haburas hahalok diʼak sira. Bainhira nia sai ona atan ba kongregasaun, nia mós kontinua hakaʼas an atu kumpre kritériu hodi sai katuas ba kongregasaun. Nuneʼe mós ba irmaun-irmán sira neʼebé hakarak atu serbí nuʼudar pioneiru, serbí iha Betel, ka voluntáriu atu ajuda harii Reuniaun-Fatin, sira mós presiza hakaʼas an hodi bele kumpre sira-nia planu sira. w16.08 3:3, 4

Bainhira Neemias bá Jeruzalein, nia haree inimigu sira fó ameasa ba ema judeu, hodi nuneʼe, sira para husi serbisu atu harii fali Jeruzalein nia moru. Tan neʼe la iha buat ida mak atu proteje sidade Jeruzalein no neʼe halo ema judeu sira laran-tun. Maibé neʼe halo Neemias sente liman laiha forsa no laran-tun ka lae? Lae! Neemias iha ona toman hanesan Jeová nia atan sira seluk hanesan Moisés no Asa, atu sadere ba Jeová liuhusi orasaun. (Êx 17:8-13; 2 Crôn 14:8-13) Iha situasaun neʼe Neemias halo orasaun ba Jeová, no Jeová hatán ba ninia orasaun. Jeová uza ninia “kbiit boot” ho “liman neʼebé forte” hodi hametin fali ema judeu sira. (Neem 2:17-20; 6:9) Ita fiar katak Jeová mós halo hanesan neʼe ohin loron hodi hametin ninia atan ka lae? w16.09 1:9

Jornál ida iha lia-olandés hatete katak bainhira igreja nia ulun-naʼin sira halaʼo enkontru, “ita bele haree sira hatais hanesan iha uma, liuliu tanba loron neʼe manas”. Maibé jornál neʼe hatete katak, bainhira Testemuña ba Jeová sira bá tuir reuniaun boot, sira-nia hatais la hanesan neʼe. Loos duni, baibain ema gaba duni dalan neʼebé Testemuña ba Jeová hatais. Apóstolu Paulo hatete katak ema kristaun neʼebé adora Maromak tenkesér “hatais ho loloos, ho respeitu”. (1 Tim 2:9, 10) Maski iha eskritura neʼe apóstolu Paulo koʼalia kona-ba feto nia hatais, maibé matadalan neʼe mós kona-ba mane kristaun nia hatais. Importante ba ita atu hatais iha dalan neʼebé loos, no Maromak haree dalan neʼebé ita hatais mós importante. (Gên 3:21) Hodi nuneʼe mak Jeová, Ukun-Naʼin Boot Liu Hotu iha lalehan no rai, fó matadalan neʼebé klaru ba ninia atan liuhusi Bíblia kona-ba dalan neʼebé nia hakarak sira atu hatais. Tan neʼe bainhira atu hili roupa, ita hanoin kona-ba Jeová, Ukun-Naʼin Boot Liu Hotu, simu ka lae. w16.09 3:1, 2

Ema balu gosta estuda kona-ba profesia sira husi Bíblia. Balu tan gosta uza buat neʼebé istória-naʼin, sientista, ka arkeólogu hatete hodi kompara ho istória sira husi Bíblia. Ezemplu ida mak kona-ba profesia husi Gênesis 3:15. Profesia neʼe, no mós profesia barak tan husi Bíblia ajuda ita komprende oinsá Maromak nia Ukun sei hatudu sai katak só dalan neʼebé Maromak ukun deʼit mak diʼak liu hotu, no oinsá mak Ukun neʼe sei halakon terus hotu. Iha dalan saida mak ita bele estuda Gênesis 3:15? Ita bele halo lista ida kona-ba eskritura seluk neʼebé esplika oinsá Gênesis 3:15 sei sai loos. Tuirmai hakerek kona-ba bainhira mak ema hakerek profesia ida-idak no forma tuir tinan. Se ita halo nuneʼe, ita sei hakfodak hodi haree katak Bíblia nia hakerek-naʼin sira moris iha tempu neʼebé la hanesan, maibé sira ida-idak fó sai informasaun ruma hodi ajuda ita komprende liután Gênesis 3:15. Dalan neʼe bele ajuda ita fiar katak Jeová nia espíritu santu mak dirije sira hodi hakerek informasaun sira-neʼe. w16.09 4:8

Uluk, apóstolu Pedro mós iha hahalok diskriminasaun hasoru ema husi rasa seluk. Maibé neineik-neineik, nia aprende oinsá bele halakon sentimentu neʼe husi ninia laran. (Após 10:28, 34, 35; Gal 2:11-14) Hanesan neʼe mós ho ita. Se ita mak sente hahalok diskriminasaun ka foti-an kona-ba ita-nia rasa foin atu komesa iha ita-nia laran, tenkesér hakaʼas an hodi fokit sai kedas hahalok neʼe. (1 Ped 1:22) Saida mak bele ajuda ita? Diʼak atu hanoin-hetan katak, maski ita mai husi rai neʼebé la hanesan, maibé ita hotu mak ema sala-naʼin no la merese atu hetan salvasaun. (Rom 3:9, 10, 21-24) Tan neʼe ita labele hanoin katak ita mak diʼak liu fali ema seluk. Ita tenke iha hanoin hanesan apóstolu Paulo. Nia fó-hanoin ba maluk fiar-naʼin sira katak sira “laʼós tan nuʼudar ema husi rai seluk, maibé . . . parte husi Maromak nia umakain”. (Éf 2:19) Loos duni, ita hotu presiza hakaʼas an atu bele halakon hahalok diskriminasaun hodi bele “tau fali ema foun”.—Kol 3:10, 11. w16.10 1:9

Ohin loron, Jeová fó Bíblia neʼebé kompletu ba ita atu ajuda ita hodi iha fiar neʼebé metin. Liuhusi Bíblia Jeová hanorin ita oinsá atu halaʼo moris neʼebé kontente. Tan neʼe mak ita presiza lee Maromak nia Liafuan loroloron, no halo tuir ninia matadalan sira. (Sal 1:1-3; Após 17:11) Jeová mós fó ita “ai-han iha tempu loloos” liuhusi “atan laran-metin no matenek”. (Mt 24:45) Ita tenke halo tuir fiar-naʼin husi tempu antigu hodi lee no medita beibeik kona-ba Maromak nia promesa sira. Halo nuneʼe bele ajuda ita atu laran-metin ba Jeová, no tau esperansa ba tempu neʼebé Maromak nia Governu sei ukun mundu tomak. (Ebr 11:1) Halo orasaun mós bele ajuda ita atu iha fiar neʼebé metin. Fiar-naʼin husi tempu antigu halo orasaun beibeik ba Maromak no bainhira nia hatán sira-nia orasaun, neʼe hametin liután sira-nia fiar.—Neem 1:4, 11; Sal 34:4, 15, 17; Dan 9:19-21. w16.10 3:7, 8

Jesus hatete katak “iha Moisés nia Ukun-Fuan, mandamentu ida-neʼebé boot liu” mak hadomi Maromak. (Mt 22:35-40) Fiar no domin mak hahalok neʼebé importante tebes, tan neʼe mak dala barak eskritura sira temi hahalok rua neʼe hamutuk. Porezemplu, apóstolu Paulo fó laran-manas ba maluk sira atu ‘tau fiar no domin nuʼudar hatais funu nian atu proteje sira-nia hirus-matan’. (1 Tes 5:8) Apóstolu João hatete katak: “Ita iha fiar ba [Maromak nia] Oan Jesus Kristu nia naran no . . . hadomi malu.” (1 João 3:23) Maibé apóstolu Paulo mós dehan: “Buat tolu neʼebé hela mak fiar, esperansa, no domin; maibé ida neʼebé boot liu mak domin.” (1 Kor 13:13) Tanbasá mak Paulo hatete hanesan neʼe? Tanba iha futuru, ita la presiza tan atu iha fiar ba Maromak nia promesa kona-ba mundu foun, tanba promesa sira-neʼe sai loos ona. Ita sei simu buat furak hotu neʼebé Jeová atu fó ba ita iha mundu foun. Maibé iha tempu neʼebá ita sei presiza nafatin atu haburas domin ba Jeová no ba ita-nia maluk sira. w16.10 4:15-17

Iha apóstolu sira-nia tempu, irmaun sira neʼebé vizita kongregasaun fó sai ba kongregasaun sira kona-ba “ukun-fuan neʼebé apóstolu no katuas sira deside ona iha Jeruzalein”. (Após 16:4) Bainhira kongregasaun sira halo tuir ukun-fuan sira-neʼe, “kongregasaun sira-nia fiar kontinua sai metin liután no loron ba loron fiar-naʼin sira aumenta ba beibeik”. Ohin loron, saida mak ita tenke halo kuandu ita simu matadalan husi Jeová nia organizasaun? Bíblia hatete katak ita hotu tenkesér halo tuir no hakruʼuk an ba irmaun sira neʼebé dirije ita. (Deut 30:16; Ebr 13:7, 17) Ema neʼebé laran-metin ba Jeová, sira nunka hatudu hahalok kontra, no sira mós nunka muramura kona-ba matadalan neʼebé sira simu. Ita lakohi sai hanesan Diótrefes iha apóstolu sira-nia tempu neʼebé la hatudu respeitu ba irmaun sira neʼebé dirije Jeová nia povu. (3 João 9, 10) Se ita mak halo tuir matadalan neʼebé ita simu, neʼe bele ajuda kongregasaun atu iha dame no unidade nafatin. Tan neʼe husu ba ita-nia an: ‘Haʼu ajuda irmaun-irmán sira atu hatudu laran-metin ba Jeová ka lae? Haʼu simu no halo tuir kedas matadalan husi irmaun sira neʼebé dirije ita ka lae?’ w16.11 2:10, 11

Nuʼudar dadur, ema Judeu sira neʼebé halo tuir Jeová nia matadalan halaʼo moris hanesan ema baibain iha rai-Babilónia. Ema Babilónia fó liberdade ba sira atu halaʼo moris loroloron nian no laʼo livre iha rai neʼe. Iha tempu neʼebá, sidade Babilónia mak fatin sentru atu halaʼo negósiu. Husi dokumentu antigu sira neʼebé ema hetan hatete katak iha Babilónia, ema judeu barak aprende oinsá atu halaʼo negósiu no balu sai badain neʼebé matenek. Ema judeu balu mós sai riku iha rai neʼe. Moris nuʼudar dadur iha rai-Babilónia la hanesan duni ho moris nuʼudar atan iha rai-Ejitu iha tinan atus ba atus liubá. (Êx 2:23-25) Maibe ema Izraél sei iha oportunidade ka lae atu bele adora Jeová iha dalan neʼebé nia simu? Iha tempu neʼebá karik ema sente neʼe la bele, tanba ema Babilónia nia toman mak nunka husik sira-nia dadur livre. Maibé Jeová promete nanis ona katak ninia povu sei sai livre, no ikusmai ida-neʼe mak akontese duni. Maromak nia promesa sira sempre sai loos!—Isa 55:11. w16.11 4:3, 5

Iha tempu neʼebá, ema kristaun sira sei moris hela iha rai, entaun tanbasá mak Paulo dehan, “ita mate ba sala”? Atu esplika ba sira, Paulo uza Jesus nia ezemplu hodi hatudu ba sira katak sira-nia moris troka ona. Nia dehan katak bainhira Jesus mate, nia hetan moris-hiʼas ba lalehan nuʼudar espíritu neʼebé la bele mate tan. Hodi nuneʼe mak “mate la iha tan kbiit atu ukun nia”. Hanesan neʼe mós ho sira. Bainhira sira hetan kose-mina, sira-nia moris uluk nian mate ona. Sira la husik tan sira-nia hakarak isin nian atu kontrola sira. Komesa husi tempu neʼebé sira hetan kose-mina, sira hakarak hakaʼas an atu moris iha dalan neʼebé halo Maromak kontente. Sira “hanesan mate ona kona-ba sala”, maibé “moris atu halo Maromak nia hakarak liuhusi Kristu Jesus”.—Rom 6:9, 11. w16.12 1:9, 10

“Hanoin buat espíritu nian” la dehan katak ita-nia hanoin loroloron nian tenkesér kona-ba Bíblia deʼit, ka ita tenkesér koʼalia deʼit kona-ba Jeová no ita-nia esperansa ba futuru. Hanoin toʼok kona-ba apóstolu Paulo no ema kristaun iha apóstolu sira-nia tempu, sira mós halaʼo moris hanesan ema baibain. Sira han hahán gostu, hemu, kaben, harii umakain, no serbisu atu tau matan ba sira-nia an. (Mc 6:3; 1 Tes 2:9) Maski nuneʼe, apóstolu Paulo no ema kristaun seluk iha ninia tempu la husik atividade sira-neʼe atu domina sira-nia moris. Bainhira eskritura temi tiha katak Paulo serbisu atu halo tenda, tuirmai eskritura sira hatete katak nia tau uluk haklaken no hanorin ema kona-ba Maromak nia Liafuan iha ninia moris tomak. (Após 18:2-4; 20:20, 21, 34, 35) Paulo fó laran-manas ba ema kristaun iha Roma atu moris tuir nia, no ita mós presiza banati-tuir ninia ezemplu diʼak neʼe.—Rom 15:15, 16. w16.12 2:5, 15, 16

Ita bele fiar katak Jeová hafolin tebes ita-nia hakaʼas an hodi serbí nia. Nia komprende ita-nia sentimentu kona-ba la fiar-an ka bainhira ita sente katak buat neʼebé ita halo la iha folin. Nia hanoin tebes bainhira ita laran-taridu kona-ba serbisu ka oinsá atu tau matan ba ita-nia família. No nia mós komprende katak ita la bele halo tan buat barak hanesan ita halo uluk tanba moras ka depresaun. Maibé ita bele fiar ho laran tomak katak Jeová hafolin tebes ita-nia laran-metin maski ita hasoru daudauk problema oioin. (Ebr 6:10, 11) Ita mós presiza hanoin-hetan katak Jeová mak “Maromak neʼebé rona ba orasaun”. Tan neʼe bainhira ita halo orasaun, nia sei rona ita. (Sal 65:2) Ita-nia “Aman neʼebé laran-sadiʼa no Maromak neʼebé fó kmaan ba ema iha situasaun hotu” sei fó apoiu oioin ba ita hodi ita bele hakbesik nafatin ba nia. Dala ruma nia uza ita-nia irmaun-irmán sira atu halo nuneʼe. (2 Kor 1:3) Jeová kontente tebes bainhira ita hatudu laran-diʼak ba ema seluk. (Mt 6:3, 4) No nia promete katak nia sei selu fali ita-nia laran-diʼak neʼe. w16.12 4:13, 14

Bainhira Jesus moris iha rai, nia hili atu la monu ba Satanás nia tentasaun sira. (Mt 4:10) Tuirmai iha kalan antes nia mate, nia hatete ba ninia Aman katak nia hakarak halo tuir deʼit ninia Aman nia hakarak. Nia dehan: “Aman, se Ita hakarak, hasai tiha kopu neʼe husi haʼu. Maski nuneʼe, laʼós tuir haʼu-nia hakarak, maibé tuir Ita-nia hakarak.” (Lc 22:42) Ita bele ka lae atu banati-tuir Jesus nia ezemplu hodi uza ita-nia liberdade atu fó glória ba Jeová no halo tuir ninia hakarak? Bele, tanba ita mós kria tuir Maromak nia ilas. (Gên 1:26) Maibé, ita-nia liberdade iha limitadu, la hanesan Jeová nia liberdade neʼebé laiha rohan. Bíblia esplika katak Jeová mak ida-neʼebé fó limitadu ba ita-nia liberdade no nia hakarak ita atu halo tuir limitadu sira-neʼe. Porezemplu, iha família laran, feen tenkesér hakruʼuk ba ninia laʼen no oan halo tuir sira-nia inan-aman.—Éf 5:22; 6:1. w17.01 2:4, 5

Ita moris daudauk iha tempu neʼebé úniku. Jeová nia organizasaun parte rai nian mós laʼo ba oin daudauk. Tan neʼe ita bele fiar katak sei iha tan mudansa barak iha futuru. Mudansa balu bele kona ita rasik nia moris no dala ruma la fasil atu simu mudansa sira-neʼe. Buat neʼebé bele ajuda ita mak hatudu haraik-an nafatin no tau fokus nafatin ba Maromak nia serbisu duké hanoin liu kona-ba ita-nia an. Halo hanesan neʼe sei ajuda ita atu iha unidade nafatin. Tan neʼe mak apóstolu Paulo hakerek karta ba ema kristaun iha Roma hodi dehan: “Hanesan isin-lolon iha parte barak, no parte ida-idak iha knaar neʼebé la hanesan; entaun, maski ita barak, maibé ita isin-lolon ida deʼit ho Kristu.” (Rom 12:4, 5) Jeová nia povu hakarak fó apoia ba ninia Ukun no halo tuir ninia hakarak. Irmaun sira neʼebé idade ona bele fó treinu ba sira neʼebé seidauk idade. No irmaun idade kiʼik sira bele halaʼo responsabilidade barak liután iha dalan neʼebé hatudu haraik-an no respeitu. Irmaun hotu agradese tebes ba apoiu neʼebé sira simu husi sira-nia feen bainhira situasaun ruma troka. Irmán sira-neʼe bele banati-tuir Prisila nia ezemplu neʼebé nia hatudu hodi apoia ninia laʼen Ákuila ho laran-metin.—Após 18:2. w17.01 5:15, 16

Bainhira Jeová fó knaar ba Jideaun atu salva ema Izraél husi ema Midian, nia hatete: “Haʼu-nia umakain mak kiʼik liu iha Manase, no haʼu mak ema neʼebé la importante liu iha haʼu-nia aman nia umakain.” (Juíz 6:15) Maski nuneʼe, Jideaun tau fiar ba Jeová hodi simu deʼit knaar neʼe. Tuirmai nia buka-hatene saida mak Jeová hakarak nia atu halo no nia halo orasaun husu Jeová fó matadalan ba nia. (Juíz 6:36-40) Jideaun mak ema neʼebé forte no aten-brani, maibé nia mós matenek no kuidadu an. (Juíz 6:11, 27) Ikusmai povu hakarak foti nia atu sai sira-nia ukun-naʼin, maibé nia la simu. Bainhira nia halaʼo tiha knaar neʼebé Jeová hakarak nia atu halo, nia kontente hodi fila fali ba uma. (Juíz 8:22, 23, 29) Se ema ida simu knaar foun ka hakarak halo buat barak liután iha kongregasaun, neʼe la hatudu katak nia la haraik an. Bíblia fó laran-manas ba Jeová nia atan atu serbí irmaun-irmán sira no laʼo ba oin liután iha lia-loos. (1 Tim 4:13-15) Maibé, ita tenke simu knaar foun mak bele laʼo ba oin ka lae? Lae. Ita hotu bele laʼo ba oin atu hadiʼa ita-nia hahalok no uza kbiit neʼebé Jeová fó atu serbí nia no ema seluk diʼak liután. w17.01 3:15, 16

Jeová halo sakrifísiu boot hodi fó Jesus nia moris. (1 Ped 1:19) Nia hafolin tebes ita toʼo nia bele husik ninia Oan-Mane mesak hodi mate ba ita. Neʼe hanesan Jesus troka fali Adão nia fatin nuʼudar ita-nia aman. (1 Kor 15:45) Jesus nia sakrifísiu fó oportunidade ba ita atu hetan moris rohan-laek, no mós bele sai fali parte ba Maromak nia família iha aban-bainrua. Liuhusi Jesus nia sakrifísiu mak ita bele sai fali ema perfeitu no Jeová mós bele simu fali ita ba ninia família hodi la kontra nia rasik nia prinsípiu sira. Hanoin toʼok iha futuru ema hotu neʼebé laran-metin ba Jeová sei sai perfeitu fali, neʼe furak tebes, loos ka lae? Toʼo ikusmai, kriatura hotu iha lalehan no rai sei sai família ida deʼit. Ita hotu sei sai fali Maromak nia oan. (Rom 8:21) Ita-nia agradese ba Jesus nia sakrifísiu tenkesér book ita atu fó sai ba ema seluk kona-ba prezente folin-boot neʼe. w17.02 1:17, 19

Livru Haklaken 15 Jullu 2013 esplika katak “atan laran-metin no matenek” mak irmaun kose-mina grupu kiʼik ida neʼebé bolu nuʼudar Grupu Administradór. Kada semana, irmaun hotu husi Grupu Administradór halaʼo enkontru atu halo desizaun neʼebé importante nuʼudar grupu ida. Halibur hamutuk iha dalan hanesan neʼe bele ajuda sira koʼalia beibeik ba malu no hametin nafatin sira-nia unidade. (Prov 20:18) La iha irmaun ida husi Grupu Administradór mak boot liu fali irmaun seluk, tan neʼe kada tinan sira troka malu atu dirije enkontru. (1 Ped 5:1) Komisaun neen neʼebé Grupu Administradór tau matan mós halo tuir dalan neʼe. Hodi nuneʼe mak la iha irmaun ida husi Grupu Administradór sente katak nia mak ulun-naʼin ba irmaun sira seluk. Sira hotu mós Naʼi nia atan. Sira ida-idak mós presiza ai-han espirituál no halo tuir atan laran-metin nia matadalan sira. Maromak la leno Grupu Administradór no sira mós laʼós ema perfeitu, tan neʼe sira bele sala bainhira atu esplika kona-ba Bíblia ka dalan neʼebé sira dirije Jeová nia organizasaun. w17.02 4:10-12

Dalan neʼebé ita bele hatudu agradese ba Jesus nia sakrifísiu mak liuhusi dedika ita-nia moris ba Jeová no hetan batizmu. Liuhusi batizmu ita hatudu katak ita iha fiar ba Jesus nia sakrifísiu no katak “ita mak Jeová nian”. (Rom 14:8) Buat hotu neʼebé Jeová halo tanba domin, no nia hakarak ita hotu atu banati-tuir nia no hatudu domin ba malu. (1 João 4:8-11) Se ita mak hatudu domin ba ema, neʼe hatudu katak ita hakarak sai “oan husi [ita-nia] Aman iha lalehan”. (Mt 5:43-48) Maromak nia mandamentu rua neʼebé boot liu hotu mak, primeiru atu hadomi Jeová, no segundu, atu hadomi ema seluk. (Mt 22:37-40) Ita hatudu ita-nia domin ba ema liuhusi hanorin sira kona-ba Maromak nia Ukun. Se ita mak halo tuir Jeová nia mandamentu atu hadomi ema seluk, liuliu ita-nia irmaun-irmán sira, ita-nia domin ba nia mós sei sai “kompletu”.—1 João 4:12, 20. w17.02 2:13, 14

Karik ita hanoin neʼe desizaun neʼebé fasil, tanba serbí Jeová sempre diʼak liu hotu. Ema neʼebé matenek nunka hakarak hili atu serbí maromak falsu. Maibé iha tempu neʼebá, ema Izraél la hatene desizaun saida mak loos. Bíblia hatete katak ema Izraél sira ‘laran-rua kona-ba sira-nia desizaun’, tan neʼe Elias fó laran-manas ba sira atu hili hodi adora Maromak neʼebé loos, Jeová. Tanbasá mak susar ba ema Izraél atu halo desizaun neʼebé matenek? Primeiru, tanba sira lakon sira-nia fiar ba Jeová, no lakohi rona ba nia. Se sira mak uza didiʼak sira-nia tempu atu aprende kona-ba Jeová no ninia matenek, neʼe sei ajuda sira atu halo desizaun ho matenek. Maibé sira la halo nuneʼe. (Sal 25:12) Segundu, ema Izraél husik ema husi nasaun seluk book sira-nia hanoin, no mós halo desizaun ba sira. Ikusmai, neʼe halo ema Izraél halo tuir sira no adora maromak neʼebé falsu. Neʼe mak buat neʼebé Jeová fó avizu nanis ona sei akontese.—Êx 23:2. w17.03 2:6, 7

Iha dalan saida mak ita bele banati-tuir Ezekias nia ezemplu? Karik iha buat balu neʼebé hanetik ita atu hametin ita-nia relasaun ho Jeová ka buat ruma preokupa hela ita hodi ita la bele tau fokus atu adora Jeová. Porezemplu, ema barak ohin loron fó atensaun demais ba artista no ema seluk tan neʼebé sira la koñese toʼo adora fali ema sira-neʼe. Karik sira gasta tempu barak hodi lee kona-ba ema sira-neʼe no haree sira-nia foto iha sítiu belun nian ka buat seluk liuhusi internét. Tuir loloos, ita balu gosta uza buat sira-neʼe atu koʼalia ho ita-nia família ka belun diʼak sira. Maibé ita mós bele soe tempu barak liuhusi sítiu belun. Se ema seluk mak gosta haree foto neʼebé ita tau ka liafuan neʼebé ita tau iha internét, dala ruma neʼe bele halo ita sai foti-an. Ka se ita mak hatene katak ema la gosta tan atu tuir ita iha sítiu belun, karik neʼe bele halo ita sai hirus. Husu ba Ita-nia an: ‘Haʼu hasees an husi adora ema ka lae?x Haʼu kuidadu atu la gasta tempu barak hodi halo buat neʼebé la importante ka lae?’—Éf 5:15,16. w17.03 3:14, 17