Agostu

Juíz Jideaun ho ninia soldadu duni tuir sira-nia inimigu, ema Midian ho sira neʼebé apoia ema Midian, ba kalan tomak. Sira duni inimigu sira toʼo kilómetru 32 hanesan neʼe. Jideaun ho ninia soldadu sira kontinua duni sira toʼo halakon hotu inimigu sira-neʼe. Sira hatene katak sira tenke toman inimigu sira-neʼe no la bele rende an! (Juíz 7:22; 8:4, 10, 28) Ohin loron, ita mós luta hela iha funu neʼebé todan no kole tebes. Ita-nia inimigu sira mak Satanás, ninia mundu, no ita rasik. Ita balu luta ba tinan barak ona hasoru inimigu sira-neʼe, no ho Jeová nia ajuda ita manán duni sira. Maibé ita seidauk manán funu neʼe. Dala ruma ita bele sai kole atu funu hasoru inimigu sira-neʼe, ka ita bele sente kole atu hein ba mundu aat neʼe nia rohan atu toʼo mai. Tan neʼe Jesus fó avizu nanis ba ita neʼebé moris iha loron ikus sira katak ita sei hasoru susar makaʼas no ema mós sei fó terus boot ba ita. Maibé Jesus hatete katak se ita mak tahan, ita sei manán.—Lc 21:19. w16.04 2:1, 2

Iha reuniaun sira ita estuda Bíblia no ita aprende husi Jeová kona-ba oinsá ita bele halaʼo ita-nia moris. (Isa 30:20, 21) Bainhira ema neʼebé seidauk adora Jeová tuir ita-nia reuniaun, sira mós bele rekoñese katak Maromak iha duni iha ita-nia leet. (1 Kor 14:23-25) Loos duni, liuhusi espíritu santu mak Jeová dirije ita-nia reuniaun sira no informasaun sira neʼebé ita aprende husi reuniaun mai duni husi nia. Tan neʼe mak bainhira ita tuir reuniaun sira, neʼe hanesan ita rona ba Jeová koʼalia ba ita, ita bele sente duni katak nia hadomi ita, no neʼe halo ita hakbesik ba nia. Jesus dehan: “Iha fatin naran deʼit neʼebé ema naʼin-rua ka tolu halibur hamutuk hodi haʼu-nia naran, haʼu mós iha sira-nia leet.” (Mt 18:20) Bíblia mós hatete katak nuʼudar kongregasaun nia ulun, Kristu “laʼo” iha kongregasaun sira-nia leet. (Apok 1:20–2:1) Husi neʼe ita bele aprende katak Jeová no Jesus laran-manas tebes atu hametin ita liuhusi reuniaun sira. Tuir ita-nia hanoin Jeová sente oinsá bainhira nia haree ita hakarak tebes atu hakbesik ba nia no ninia Oan-Mane? w16.04 3:13, 14

Irmán ida haree irmaun naʼin-rua mai no nia hasé sira. Maibé husi irmaun sira-neʼe, ida sente katak dalan neʼebé irmán neʼe hasé sira la hatudu respeitu. Bainhira irmaun naʼin-rua neʼe mesamesak, irmaun neʼe koʼalia kritika makaʼas kona-ba irmán neʼe. Maibé, irmaun ida seluk koʼalia fó-hanoin katak irmán neʼe serbí Jeová ho laran-metin ba tinan 40 ona maski nia hasoru susar oioin. Nia sente katak buat neʼebé irmán neʼe halo, laʼós ho neon. Rona tiha hanesan neʼe, irmaun neʼebé sente laran-kanek hatete, “Ita koʼalia loos”. Tuirmai, nia hili hodi haluha deʼit buat neʼebé akontese. Ita bele aprende saida husi esperiénsia neʼe? Se ema ida mak hakanek ita, neʼe fila fali ba ita mak atu fó ka la fó perdua ba ema neʼe. Maibé ema neʼebé iha domin, nia sei fó perdua. (Prov 10:12; 1 Ped 4:8) Ba Jeová, ema neʼebé haluha deʼit ema seluk nia sala mak buat neʼebé furak tebes ba nia. (Prov 19:11) Tan neʼe, loron seluk mak iha ema ida koʼalia ka halo buat neʼebé hakanek ita, husu ba ita-nia an, ‘Haʼu bele haluha tiha deʼit ka lae? Haʼu tenke hanoin beibeik kona-ba problema neʼe ka lae?’ w16.05 1:8, 9

Sé loos mak haklaken hela liafuan diʼak kona-ba Maromak nia Ukun ohin loron? Testemuña ba Jeová! Tanbasá mak ita hatete nuneʼe? Tanba só Testemuña ba Jeová deʼit mak haklaken mensajen neʼebé loos kona-ba Maromak nia Ukun. Só ita deʼit haklaken iha dalan neʼebé loos, tanba ita bá buka ema hodi haklaken ba sira. No tanba domin ba Jeová no domin ba ema mak ita hakarak haklaken, neʼe hatudu katak ita haklaken ho motivu neʼebé loos. Ita mós haklaken iha fatin naran deʼit ba ema husi nasaun hotu no ho língua oioin. Ita sei kontinua atu haklaken toʼo mundu nia rohan toʼo mai. Ita gaba duni serbisu haklaken neʼebé Maromak nia povu halaʼo daudauk iha loron ikus sira-neʼe. Maibé oinsá mak ita bele kumpre buat hotu neʼe? Apóstolu Paulo nia liafuan iha eskritura ba ohin mak hatán pergunta neʼe. Ita husu katak Jeová kontinua fó forsa mai ita hodi ita bele hakaʼas an nafatin atu haklaken liafuan diʼak.—2 Tim 4:5. w16.05 2:17, 18

Se ita hili atu halo tuir Maromak no hakaʼas an halo ninia hakarak, neʼe hatudu katak ita hadomi no hakarak halo nia kontente. Satanás hatete katak Jeová laiha direitu atu ukun, tan neʼe mak bainhira ita halo tuir Jeová, ita hatudu katak ita hakarak Jeová atu sai ita-nia Ukun-naʼin. Ita mós bele fiar katak ita-nia Aman neʼebé domin hafolin tebes ita-nia hakaʼas an atu halo tuir nia. (Jó 2:3-5; Prov  27:11) Maibé, se Jeová mak ajuda hela deʼit ita atu halo fasil ba ita hodi luta hasoru ita-nia fraku, ita-nia laran-metin ba nia la sai buat neʼebé iha folin. Tan neʼe mak Jeová hakarak ita rasik atu hakaʼas an hodi hadiʼa ita-nia hahalok sira. (2 Ped 1:5-7; Kol 3:12) Jeová mós hakarak ita atu hakaʼas an hodi kontrola ita-nia hanoin no sentimentu sira. (Rom 8:5) Bainhira ita hakaʼas an atu troka ita-nia hahalok no ita hetan rezultadu neʼebé diʼak husi ita-nia hakaʼas-an sira, neʼe halo ita sente kontente tebes. w16.05 4:12, 13

Jeová mak hanesan badain sanan-rai neʼebé matenek tebes. Nia komprende ita ida-idak. Nia hatene ita-nia fraku, no nia kumu ita hanesan rai-mean tuir ita-nia situasaun ida-idak. (Sal 103:10-14) Ita bele hatene oinsá Jeová sente kona-ba ita liuhusi Jesus. Hanoin fali kona-ba oinsá Jesus sente bainhira ninia apóstolu sira hatudu sira-nia fraku hodi haksesuk malu kona-ba pozisaun. Se ita mak iha neʼebá, ita sente oinsá kona-ba apóstolu sira-nia hahalok? Karik ita bele sente katak sira mak ema neʼebé ulun-toos. Maibé Jesus la sente hanesan neʼe kona-ba sira. Jesus hatene katak se nia mak fó konsellu iha dalan neʼebé diʼak no ho pasiénsia ba sira, no se sira mak halo tuir ninia haraik-an, sira-nia hahalok neʼe bele kumu sai hahalok neʼebé diʼak. (Mc 9:33-37; 10:37, 41-45; Lc 22:24-27) Bainhira Jesus hetan tiha moris-hiʼas, apóstolu sira-neʼe simu espíritu santu husi Maromak, no sira la hanoin tan kona-ba sé mak boot liu. Maibé sira fó atensaun liu kona-ba halo serbisu neʼebé Jesus fó ona ba sira atu halo.—Após 5:42. w16.06 1:10

La iha Maromak loos seluk tan só deʼit Jeová, no la iha maromak ida mak hanesan nia. (2 Sam 7:22) Tan neʼe Moisés nia liafuan sira hanesan atu fó-hanoin ba ema Izraél katak sira tenke adora Jeová mesak deʼit. Sira labele moris tuir ema husi rai seluk neʼebé adora maromak falsu no maromak-feto oioin. Ema sira-neʼe fiar katak sira-nia maromak bele kontrola natureza ida-idak. Porezemplu, ema Ejitu adora maromak loro-matan Ra, maromak-feto kalohan Nut, maromak mundu Geb, maromak Mota Nilo naran Hapi, no sira mós adora animál oioin nuʼudar buat santu. Iha tempu Jeová fó malisan sanulu ba rai-Ejitu, nia hatudu katak nia mak boot liu maromak falsu sira-neʼe hotu. Ema Kanaán nia maromak boot liu mak Baal, no sira fiar katak moris mai husi maromak falsu neʼe. Sira mós fiar katak Baal mak maromak kalohan, udan, no anin-boot nian. Ema iha fatin oioin fiar katak Baal mak bele proteje sira. (Núm 25:3) Maibé ema Izraél presiza hanoin-hetan katak sira-nia Maromak, “Maromak neʼebé loos” mak “Jeová mesak ida deʼit”.—Deut 4:35, 39. w16.06 3:4, 5

Jesus nia ezemplu mak diʼak tebes kona-ba laran-metin ba Jeová no ba ninia povu. Tuir loloos ita iha razaun barak atu hatudu ita-nia laran-metin neʼe, tanba se ita haree iha mundu tomak, ita bele haree katak Jeová mak dirije hela ninia povu sira. Porezemplu, Jeová mak ajuda daudaun ninia povu atu bele haklaken iha mundu tomak, no ninia povu mesak deʼit mak bele halaʼo serbisu neʼe. Ninia povu mós iha unidade no ksolok tanba Jeová mak hanorin daudaun sira. Tan neʼe mak Jeová hatete: “Haree bá! Haʼu-nia atan sira sei haklalak ho haksolok tanba kontente iha laran.” (Isa 65:14) Ema iha Satanás nia mundu halerik no laiha esperansa kona-ba sira-nia futuru. Maibé nuʼudar Jeová nia povu, ita iha ksolok neʼebé kleʼan tanba Jeová mak dirije ita no ajuda ita. Ita tenkesér iha nafatin laran-metin ba Jeová no halo tuir nafatin ninia arranju sira. w16.06 4:10-12

Ita bele aprende lisaun ida husi tempu antigu kona-ba guarda nia knaar importante atu hein sidade. Iha tempu neʼebá, sidade sira, hanesan Jeruzalein, iha moru aas neʼebé haleʼu sidade sira-neʼe. Moru neʼe atu proteje sira husi inimigu nia ataka. Iha moru leten, baibain iha guarda, no guarda sira-neʼe bele haree rai no sidade tomak. Iha mós guarda seluk neʼebé hein iha sidade nia portaun. Guarda sira-neʼe tenkesér matan-moris kalan no loron. Se sira mak haree iha inimigu mai, sira tenkesér fó avizu ba povu iha sidade laran. (Isa 62:6) Ba guarda sira, sira hatene katak importante tebes atu matan-moris no haree didiʼak saida mak akontese. Selae, neʼe bele lori mate ba ema iha sidade neʼe. (Eze 33:6) Istória-naʼin Josefo hatete katak soldadu Roma bele tama sidade Jeruzalein iha tinan 70 tanba guarda balu neʼebé hein sidade neʼe toba hela. Tan neʼe soldadu Roma sira halai tama no sunu templu, no harahun hotu sidade Jeruzalein. Neʼe mós ramata ona terus boot neʼebé ema judeu sira hasoru daudauk iha tempu neʼebá. w16.07 2:2, 7, 8

Ita hetan bensaun barak tanba Jeová nia laran-diʼak neʼebé boot, maibé neʼe la dehan katak ita bele uza sala ninia laran-diʼak neʼe hodi halo fali sala. Iha apóstolu sira-nia tempu, iha ema kristaun balu mak koko atu “uza sala Maromak nia laran-diʼak hodi halo hahalok neʼebé la iha moe”. (Jud 4) Ema sira-neʼe hanoin katak sira bele halo sala deʼit no depois mak husu Jeová atu fó perdua. Aat liután mak sira mós koko atu dada ema seluk hodi halo sala hamutuk ho sira. Hanesan neʼe mós ohin loron, ema neʼebé halo buat sira-neʼe “la hatudu respeitu ba Maromak nia espíritu neʼebé nia uza atu fó laran-diʼak neʼebé boot”. (Ebr 10:29) Ohin loron, Satanás mós bosok ona ema kristaun balu hodi hanoin katak sira bele halo sala deʼit tanba Jeová sei fó perdua ba sira. Jeová fó duni perdua ba ema neʼebé arrepende an, maibé nia mós hakarak ita atu luta makaʼas hasoru ita-nia hakarak aat sira. w16.07 3:16, 17

Kaben-naʼin ida bele hili atu fó perdua ba ninia kaben neʼebé halo sala-foʼer, hanesan profeta Oséias halo ba ninia feen Gomer neʼebé moris foʼer. No bainhira ema Izraél arrepende an, Jeová mós fó perdua ba sira. (Os 3:1-5) Maibé, se ema ida mak hatene katak ninia kaben halo ona sala-foʼer ho ema seluk no simu fali nia atu halaʼo relasaun seksuál ho nia, neʼe hatudu katak nia fó ona perdua ba ninia kaben neʼebé halo sala-foʼer, no neʼe la fó tan razaun husi eskritura atu soe malu. Temi tiha ona liafuan iha eskritura ba ohin, tuirmai Jesus mós temi kona-ba “sira neʼebé simu prezente” nuʼudar ema neʼebé hakarak moris klosan. Nia dehan: “Ema neʼebé hakarak moris hanesan neʼe, halo nuneʼe bá.” (Mt 19:10-12) Ema barak hili atu la kaben hodi sira bele tau fokus atu serbí Jeová. Ema sira-neʼe serve duni atu ita gaba sira. w16.08 1:15, 16

Joven sira bele halo buat barak atu serbí Jeová tanba sira iha forsa no saúde neʼebé diʼak. (Prov 20:29) Irmaun joven balu serbisu iha Betel hodi ajuda print, halo livru no Bíblia sira. Iha mós irmaun-irmán joven barak neʼebé serbisu harii ka hadiʼa Reuniaun-Fatin sira. Bainhira dezastre mosu, joven sira sempre bá hamutuk ho irmaun-irmán neʼebé iha ona esperiénsia atu fó ajuda. No ita haree iha joven barak mak aprende língua foun hodi bá haklaken iha fatin neʼebé ema koʼalia língua sira-neʼe. Ema neʼebé hakerek salmu dehan: “Sira neʼebé buka Jeová sei la falta buat diʼak ida.” (Sal 34:10) Loos duni, bainhira ita serbí Jeová ho laran tomak, ita mós sei sente kontente tebes tanba ita hatene katak ita halo ona buat neʼebé Jeová gosta. No nia mós promete ba ita katak nia sei tau matan ba ita. w16.08 3:5, 8

Jeová hakarak no iha kbiit atu hametin ita liuhusi ninia espíritu santu. (1 Crôn 29:12) Importante tebes ba ita atu husu Maromak nia espíritu santu hodi bele luta hasoru Satanás ho ninia mundu aat neʼe. (Sal 18:39; 1 Kor 10:13) Ita agradese tanba bele hetan ajuda husi Bíblia. No ita mós aprende buat barak husi ita-nia livru neʼebé ita simu fulan-fulan. Eskritura husi Zacarias 8:9, 13 mak liafuan sira neʼebé hatoʼo iha tempu neʼebé harii hela templu iha Jeruzalein, no liafuan sira-neʼe bele duni ajuda ita ohin loron. Jeová mós hametin ita liuhusi matadalan neʼebé ita simu husi reuniaun, reuniaun boot, no eskola Bíblia sira. Treinu sira-neʼe fó laran-manas ba ita, ajuda ita atu halo planu espirituál, no oinsá atu kaer ita-nia responsabilidade ho didiʼak nuʼudar ema kristaun. (Sal 119:32) Ita aproveita didiʼak ajuda sira-neʼe hodi hetan forsa husi Jeová ka lae? w16.09 1:10, 11

Moisés nia Ukun-Fuan fó sai katak Jeová hakribi tebes atu haree mane hatais feto nia roupa no feto hatais mane nia roupa. Ohin loron Jeová mós sente hanesan kona-ba ema neʼebé hatais iha dalan neʼe. (Deut 22:5) Husi ukun-fuan neʼe ita bele haree katak Jeová la gosta mane atu hatais haree hanesan feto, no feto hatais haree hanesan mane, no nia mós la gosta haree dalan hatais neʼebé halo susar ba ema atu haree neʼe mane ka neʼe feto. Maromak nia Liafuan iha prinsípiu barak neʼebé bele ajuda ita atu foti desizaun diʼak kona-ba hatais. Maski ita hela iha rai ka klima neʼebé la hanesan, ka kultura la hanesan, ita bele nafatin uza prinsípiu sira-neʼe. Ita la presiza atu hakerek lista naruk kona-ba saida mak bele ka labele atu hatais, halo tuir deʼit prinsípiu husi eskritura sira bele ajuda ita atu hili roupa neʼebé ita gosta. w16.09 3:3, 4

Bíblia nia hakerek-naʼin sira mós koʼalia nakloke, sira nunka taʼuk atu fó sai informasaun tuir realidade. Iha tempu antigu, ema seluk sempre hakerek deʼit liafuan diʼak kona-ba sira-nia nasaun ka ukun-naʼin sira. Maibé Jeová nia profeta sira la hanesan neʼe. Sira hakerek duni buat diʼak, maibé sira mós hakerek kona-ba hahalok aat sira neʼebé ema Izraél no liurai sira hatudu. (2 Crôn 16:9, 10; 24:18-22) Sira mós la taka kona-ba sira rasik nia sala no Jeová nia atan sira seluk nia sala. (2 Sam 12:1-14) Tanba ema halo tuir Bíblia nia matadalan, sira bele haree duni rezultadu neʼebé diʼak, no neʼe hametin liután sira-nia fiar katak Bíblia mai duni husi Maromak. (Sal 19:7-11) Bíblia ajuda ona ema barak hodi haree katak buat neʼebé uluk sira fiar, tuir loloos sala. (Sal 115:3-8) Bíblia ajuda ema atu sadere ba Jeová, no Bíblia mós promete katak ita-nia futuru sei sai diʼak liután. Ema balu neʼebé fiar ba evolusaun, sira halo natureza sai hanesan maromak ida ba sira. Balu tan fiar katak ema iha kbiit atu lori mudansa neʼebé diʼak ba futuru, maibé realidade mak, se ita haree ba buat hotu neʼebé ema halo, la iha ema ida mak bele rezolve problema sira husi mundu neʼe.—Sal 146:3, 4. w16.09 4:10, 11

Buat neʼebé Boas halo hatudu katak nia hanoin duni Rute nia situasaun nuʼudar ema estranjeiru ida. Nia konvida Rute atu tuir ninia serbisu-naʼin feto sira hodi mane sira la bele book nia. Nia mós fó atensaun ba Rute hanesan ninia serbisu-naʼin rasik hodi fó ai-han no bee ba Rute. Boas hatudu respeitu ba nia nuʼudar ema estranjeiru ida no fó laran-manas ba nia. (Rute 2:8-10, 13, 14) Boas hatudu laran-diʼak ba Rute laʼós tan deʼit Rute iha domin neʼebé kleʼan ba ninia banin-feto Noemi, maibé mós tanba Rute sai ona ema neʼebé adora Jeová no hakarak buka protesaun husi Nia. Tuir loloos Boas nia laran-diʼak haleno duni Jeová nia domin neʼebé laran-metin. (Rute 2:12, 20; Prov 19:17) Hanesan neʼe mós ohin loron, se ita mak hatudu laran-diʼak ba “ema hotu”, inklui mós ema estranjeiru, karik ita bele ajuda sira atu simu lia-loos no sira rasik mós bele sente katak Jeová hadomi tebes sira.—1 Tim 2:3, 4. w16.10 1:10-12

Ohin loron, ita mós bele halo orasaun ba Jeová no ita fiar katak nia sei hatán ita-nia orasaun. Bainhira Jeová hatán duni ita-nia orasaun iha tempu neʼebé loos, neʼe hametin liután ita-nia fiar. (1 João 5:14, 15) No tanba fiar mak hahalok ida neʼebé mai husi espíritu santu, tan neʼe diʼak atu husu beibeik Maromak nia espíritu santu hodi ita bele iha fiar boot liután. (Lc 11:9, 13) Bainhira halo orasaun, ita lakohi husu deʼit Jeová hodi fó buat neʼebé ita presiza. Ita mós tenke fó agradese no hahiʼi nia kona-ba buat furak oioin neʼebé nia kria ba ita. (Sal 40:5) Ita presiza halo orasaun kona-ba irmaun-irmán sira iha mundu tomak. Porezemplu, ita presiza hanoin kona-ba “sira neʼebé iha dadur laran”, no mós sira neʼebé dirije ita. Se ita mak haree Jeová hatán ba ita-nia orasaun sira-neʼe, neʼe sei halo ita fiar liután no hakbesik ba nia.—Ebr 13:3, 7. w16.10 3:8, 9

Ohin loron, Jeová nia povu iha mundu tomak tau fiar no fó apoiu ba ninia Ukun. Sira iha domin ba malu no sira husik Maromak nia espíritu santu mak dirije dalan neʼebé sira moris. (Gal 5:22, 23) Tan neʼe mak maski ita iha irmaun-irmán naʼin juta ualu resin iha mundu tomak, ita bele iha dame no unidade nafatin. Neʼe hatudu duni fiar ho domin nia kbiit! Se la liuhusi Maromak nia ajuda, ita la bele iha unidade, tan neʼe mak nia merese simu ita-nia hahiʼi. (Isa 55:13) Jeová sei kontinua atu ajuda ema barak tan atu iha fiar ba nia toʼo mundu tomak nakonu ho ema neʼebé perfeitu, laran-loos, no kontente. Neʼe duni, mai ita kontinua hatudu fiar ba Jeová nia promesa hotu! w16.10 4:18, 19

Ita presiza halo tuir Bíblia nia matadalan sira neʼebé ita simu husi katuas sira. Iha apóstolu sira-nia tempu, iha ema balu ‘la laʼo tuir dalan neʼebé loos, sira envolve an iha problema neʼebé laʼós sira-nian’. Katuas kongregasaun koko atu ajuda, maibé sira lakohi troka. Tan neʼe, apóstolu Paulo fó-hatene ba kongregasaun oinsá atu trata ema neʼe, nia dehan: “Tau marka ba ema neʼe, no keta ransu tan ho nia.” Paulo fó konsellu ba sira atu la ransu tan ho ema neʼe, maibé la bele trata nia hanesan inimigu. (2 Tes 3:11-15) Ohin loron, katuas sira mós koko atu ajuda ema neʼebé la halo tuir Maromak nia matadalan, hanesan namora ho ema neʼebé la adora Jeová. (1 Kor 7:39) Se ema neʼe lakohi troka ninia hahalok, karik katuas sei hatoʼo diskursu ida atu fó avizu ba kongregasaun katak hahalok hanesan neʼe bele halo foʼer kongregasaun nia naran. Se Ita mak rona diskursu hanesan neʼe, Ita sei halo saida? Se Ita hatene diskursu neʼe koʼalia kona-ba sé, Ita sei kuidadu kona-ba ransu ho ema neʼe, loos ka lae? Bainhira Ita halo tuir Bíblia nia konsellu, neʼe bele ajuda ema neʼe atu haree katak ninia hahalok sei estraga ninia an, estraga ninia relasaun diʼak ho Jeová, no karik bele book nia atu troka ninia hahalok. w16.11 2:13

Iha loron Pentekostes tinan 33, ema rihun ba rihun neʼebé sai kristaun hetan kose-mina husi espíritu santu hodi sai ‘suku neʼebé Maromak hili ona, no amlulik sira neʼebé serbí nuʼudar liurai, nasaun santu ida, no povu neʼebé nia hili ba nia an rasik’. (1 Ped 2:9, 10) Apóstolu sira tau matan didiʼak ba Maromak nia kongregasaun. Maibé bainhira apóstolu sira mate hotu, ema balu husi kongregasaun laran hahú hanorin doutrina falsu oioin no sira mós hakarak dada dixípulu seluk atu tuir sira. Sira gosta uza filozofia husi Aristóteles no Plato hodi hanorin, duké hanorin Maromak nia Liafuan. (2 Tes 2:6-8) Mane sira-neʼe barak mak iha knaar atu tau matan ba kongregasaun. No maski Jesus fó-hatene nanis ona katak sira hotu tenkesér sai hanesan maun-alin deʼit, maibé neineik-neineik sira komesa forma pozisaun iha kongregasaun atu sai ulun-naʼin.—Mt 23:8. w16.11 4:8

Antes sai ema kristaun neʼebé loos, karik ita halo ona buat barak neʼebé sala maibé ita la hatene katak Jeová hakribi hahalok sira-neʼe. Ita-nia moris uluk nian mak hanesan “atan ba buat la moos no kontra lei”, moris nuʼudar “atan ba sala”. (Rom 6:19, 20) Maibé bainhira ita aprende tiha lia-loos husi Bíblia, ita troka ita-nia moris, dedika ita-nia an ba Jeová, no hetan batizmu. Ita “sai livre ona husi sala” hodi “sai atan ba Maromak no halo buat neʼebé loos”. (Rom 6:17, 18) Maski ita “sai livre ona husi sala”, ita bele hili atu husik hanoin no hakarak neʼebé sala hodi kontrola ita, ka ita mak kontrola fali hahalok sira-neʼe. Husu ba ita-nia an: ‘Haʼu husik deʼit hakarak aat atu sai buras toʼo haʼu halo buat neʼebé sala ka lae? Ka haʼu halakon kedas hakarak aat sira-neʼe?’ Se ita mak agradese tebes ba Maromak Jeová nia laran-diʼak neʼebé boot, ita sei hakaʼas an atu halo nia kontente. w16.12 1:11, 12

Ita agradese tebes ba Jeová tanba nia fó dame neʼe ba ita. Hodi nuneʼe mak ita bele iha dame ho ita-nia família no irmaun-irmán sira iha kongregasaun. Maibé tanba ita ema sala-naʼin, dala ruma problema bele mosu entre ita ho irmaun-irmán sira. Se ida-neʼe mak akontese, diʼak atu halo tuir Jesus nia konsellu, nia dehan: “Halo dame . . . ho ó-nia maun-alin.” (Mt 5:24) Fasil liu atu halo dame ho ita-nia irmaun ka irmán se ita hanoin-hetan katak sira mós adora Maromak Jeová, “ida neʼebé fó dame”. (Rom 15:33; 16:20) “Hanoin buat espíritu nian” mós bele halo ita iha dame ho Jeová. Profeta Isaías dehan: “Ita [Jeová] sei proteje sira neʼebé sadere ba Ita ho laran tomak; Ita sei fó dame nafatin ba sira, tanba sira tau fiar ba Ita deʼit.”—Isa 26:3; Rom 5:1. w16.12 2:5, 18, 19

Jeová fó daudauk bensaun ba ninia povu iha Satanás nia mundu aat neʼe. Nia fó koñesimentu no dame neʼebé boot mai ita nuʼudar ninia povu. (Isa 54:13) Jesus promete katak Jeová sei fó kolen ba ita ohin loron atu hetan família boot ida neʼebé iha domin, neʼe mak ita-nia irmaun no irmán sira iha mundu tomak. (Mc 10:29, 30) No mós sira neʼebé buka Maromak ho laran tomak sei hetan kolen atu iha dame iha laran, kontente, no ksolok. (Flp 4:5-7) Ita bele fiar katak bainhira ita “halo tiha Maromak nia hakarak, [ita sei] simu buat neʼebé nia promesa ona”. (Ebr 10:35, 36) Tan neʼe, mai ita kontinua hametin ita-nia fiar no halo buat hotu ho laran tomak ba Jeová. Ita bele fiar metin katak Jeová sei fó kolen ba ita!—Kol 3:23, 24. w16.12 4:17, 20

Tanbasá mak ita bele dehan katak liberdade neʼebé iha limitadu mak liberdade neʼebé loos? Tanba neʼe bele proteje ita. Porezemplu, karik ita hili atu lori karreta ba sidade dook ida. Maibé hanoin toʼok iha dalan atu bá sidade neʼe la iha lei tránzitu, ema hotu iha liberdade atu lori karreta tuir sira-nia hakarak no bele tun ka saʼe. Ita sente seguru ka lae atu uza estrada neʼe? Lae. Tan neʼe, liberdade neʼebé loos presiza iha limitadu tanba neʼe bele lori bensaun ba ita. Porezemplu, hanoin to’ok kona-ba Adão. Nia hili hodi han ai-fuan neʼebé Maromak bandu nia labele han, ho ida-neʼe nia hatudu katak nia lakohi simu limitadu neʼebé Jeová fó ba nia. Tanba Adão uza sala ninia liberdade neʼe mak lori ona terus iha tinan rihun ba rihun ba ema. (Rom 5:12) Hanoin kona-ba konsekuénsia husi Adão nia desizaun bele book ita atu uza ita-nia liberdade iha dalan neʼebé loos no simu limitadu neʼebé Jeová fó ona ba ita. w17.01 2:6, 8

Bainhira ita atu simu knaar foun, halo orasaun kona-ba neʼe no haree didiʼak se ita bele kumpre knaar neʼe ka lae. Ita sei hanoin uluk kona-ba ita iha tempu no forsa atu halo buat importante seluk ka lae. Se ita mak haraik an, karik ita sei foti desizaun atu la simu deʼit. Jeová hakarak ita laʼo hamutuk ho nia “ho haraik-an”. (Miq 6:8) Tan neʼe, bainhira ita simu knaar foun ida, ita presiza buka matadalan husi Jeová no husu nia atu ajuda ita hanesan Jideaun halo. Ita presiza hanoin didiʼak kona-ba saida mak Jeová hatete ba ita liuhusi Bíblia no ninia organizasaun. Ita tenkesér hanoin-hetan katak laʼós ho ita-nia kbiit no matenek mak ita bele kumpre ita-nia knaar sira, maibé tanba Jeová mak ajuda ita ho haraik-an. (Sal 18:35) Ema neʼebé haraik an sei la hanoin nia an diʼak liu fali buat neʼebé loos. w17.01 3:17, 18

Jesus hatene katak ema seluk sei kontinua atu halo ninia serbisu. Maibé nia mós hatene katak ninia dixípulu sira mak ema la perfeitu. Maski nuneʼe, nia fiar katak sira sei haklaken liafuan diʼak ba fatin barak liu fali buat neʼebé nia halo. (João 14:12) Tan neʼe nia treinu sira didiʼak hodi sira bele haklaken iha rai oioin. (Kol 1:23) Bainhira Jesus mate tiha, Jeová fó moris-hiʼas ba nia no fó tan serbisu barak ba nia atu halo no mós halo “nia sai aas liu fali governu hotu, ukun-naʼin hotu, kbiit hotu, naʼi hotu”. (Éf 1:19-21) Se ita mak mate ho laran-metin antes Armajedón, ita sei hetan fali moris-hiʼas no halo serbisu importante barak iha mundu foun. Maibé ohin loron ita hotu mós bele halaʼo knaar importante atu haklaken no ajuda ema sai Jesus nia dixípulu. Tan neʼe, maski ita mak ema neʼebé idade ona ka seidauk idade, ita hotu bele kontinua atu “sai badinas nafatin iha Naʼi nia serbisu.” w17.01 5:17, 18

Jesus nia sakrifísiu sosa ona ita ba nafatin. (Ebr 9:24-26) Adão lori ita ba mate, maibé Jesus nia sakrifísiu sei lori ita ba moris neʼebé laiha rohan. Jesus nia sakrifísiu bele halo ita livre husi Satanás nia mundu aat neʼe no husi taʼuk kona-ba mate. (Ebr 2:14, 15) Ita bele tau fiar katak Maromak nia promesa hotu sei sai loos. Hanesan ita hatene katak lei natureza sira neʼebé Jeová halo nunka troka, nuneʼe mós ho nia, nia nunka troka. Nia sei la halo ita-nia fiar ba nia sai saugati deʼit. Jeová fó mai ita moris, maibé laʼós neʼe deʼit, nia mós fó ninia domin. Tan neʼe Bíblia dehan: “Ita hatene ona no fiar katak Maromak hadomi ita. Maromak mak domin.” (1 João 4:16) Jeová nia promesa hotu sempre sai loos. Lakleur tan mundu sei sai paraízu neʼebé furak. Ema hotu neʼebé moris iha tempu neʼebá sei banati-tuir Jeová no hadomi malu. Ikusmai, ninia atan hotu iha lalehan no rai sei hatete: “Ita-nia Maromak neʼebé iha matenek no kbiit tenke simu hahiʼi no glória, no kriatura hotu tenke fó hahiʼi ba nia no hatudu agradese nafatin ba nia. Amen.”—Apok 7:12. w17.02 2:16, 17

The Watchtower (Livru Haklaken) 1 Juñu 1973 husu pergunta ida kona-ba “ema neʼebé sei iha toman atu fuma bele kumpre kritériu hodi hetan batizmu ka lae?” The Watchtower uza prinsípiu husi Bíblia mak hatán ba pergunta neʼe. Livru neʼe esplika katak ema neʼe la kumpre kritériu no uza eskritura sira hodi esplika tanbasá mak ema neʼebé lakohi husik ninia toman atu fuma tenkesér hasai husi kongregasaun. (1 Kor 5:7) Livru neʼe esplika tan katak morál aas neʼe laʼós mai husi ema, maibé “mai husi Maromak. Nia mak fó sai ninia hanoin liuhusi ninia Liafuan”. Livru ida kona-ba relijiaun sira iha Estadus Unidus hatete: “Ulun-naʼin relijiaun kristaun sira sempre halo mudansa ba sira-nia hanorin atu tuir buat neʼebé sira-nia membru no ema iha komunidade fiar no hanoin.” La iha organizasaun relijiaun ida mak halo tuir Maromak nia Liafuan hotu hanesan Jeová nia organizasaun, maski neʼe susar ba ema balu atu halo tuir. w17.02 4:15

Irmaun katuas sira mak hanesan bibi-atan neʼebé haraik-an tebes. Sira lakohi ema haree sira hanesan artista. Tan neʼe mak sira la hanesan ho ulun-naʼin relijiaun ohin loron ka husi Jesus nia tempu. Kona-ba ulun-naʼin relijiaun sira, Jesus dehan: “Sira buka tuur-fatin neʼebé importante liu, no iha sinagoga laran, sira gosta atu tuur iha oin. Sira hakarak atu ema kumprimenta sira iha merkadu.” (Mt 23:6, 7) Maibé katuas kristaun sira la hanesan neʼe. Sira halo tuir duni Jesus nia liafuan neʼebé hatete: “Keta husik ema bolu imi mestre, tanba imi-nia Mestre ida deʼit, no imi hotu mak maun-alin. Liután neʼe, keta bolu ema ida iha rai nuʼudar aman, tanba imi-nia Aman ida deʼit, neʼebé iha lalehan. Nuneʼe mós keta husik ema bolu imi ulun-naʼin, tanba imi-nia Ulun-Naʼin ida deʼit, Kristu. Maibé, ida neʼebé boot liu iha imi-nia leet tenke sai imi-nia atan.” (Mt 23:8-11) Tan neʼe mak irmaun-irmán sira hadomi no hatudu respeitu neʼebé kleʼan ba katuas kongregasaun iha mundu tomak, tanba katuas sira-neʼe haraik an no halo tuir Jesus nia liafuan. w17.03 1:14, 15

Se ita mak hakarak halo desizaun neʼebé matenek, ita tenkesér uza Maromak nia Liafuan. Ita la bele husik ema seluk mak atu halo desizaun ba ita. Ita tenke aprende saida mak Maromak gosta no depois, ita rasik foti desizaun atu halo tuir nia. Ita presiza kuidadu atu la husik ema seluk dada ka obriga ita hodi halo desizaun neʼebé ladiʼak. (Prov 1:10, 15) Ita ida-idak tenke halo desizaun tuir ita-nia konxiénsia neʼebé hetan ona treinu husi Bíblia. Maibé, se ita mak husik ema seluk atu foti desizaun ba ita, neʼe katak ita hili atu tuir deʼit ema, no neʼe bele lori ita ba perigu. Apóstolu Paulo fó avizu ba irmaun-irmán sira husi Galásia atu la husik ema seluk halo desizaun ba sira. (Gal 4:17) Neʼe tanba irmaun balu koko atu halo desizaun ba ema seluk iha kongregasaun Galásia. Sira hakarak irmaun-irmán sira atu tuir sira duké tuir apóstolu sira. w17.03 2:8-10

Josias hakaʼas an hodi halo buat neʼebé Jeová simu. Se Ita mak joven, Ita bele halo tuir Josias nia ezemplu hodi aprende liután kona-ba Jeová. Karik Josias aprende husi ninia avó-mane Liurai Manase neʼebé arrepende an katak Jeová sempre prontu atu fó perdua. Ita mós bele aprende husi irmaun-irmán idade sira husi Ita-nia kongregasaun ka husi Ita-nia família rasik. Sira bele konta ba Ita kona-ba buat diʼak barak neʼebé Jeová halo ona ba sira. No mós, bainhira Josias lee tiha Jeová nia Ukun-Fuan, neʼe book ninia laran atu halo buat neʼebé Jeová simu no nia halo kedas mudansa. Liuhusi lee Bíblia mós bele book Ita atu halo tuir Jeová. Halo nuneʼe bele hametin Ita-nia relasaun ho Jeová no Ita sei sai kontente liután. Ikusmai, neʼe sei book Ita atu fó-hatene ema seluk kona-ba Jeová. (2 Crôn 34:18, 19) Bainhira Ita estuda Bíblia, karik Ita mós sei haree iha dalan seluk tan atu hadiʼa Ita-nia serbisu ba Jeová. Se nuneʼe, hakaʼas an atu halo mudansa hanesan buat neʼebé Josias halo. w17.03 3:18, 19