Setembru

Iha Bíblia, liafuan tahan laʼós katak ita aguenta deʼit bainhira hasoru susar ka terus ruma. Maibé tahan inklui mós dalan neʼebé ita sente ka hanoin kona-ba susar no terus neʼe. Hahalok tahan bele ajuda ema atu iha brani, laran-metin, no pasiénsia. Livru ida esplika katak tahan mak hahalok neʼebé ajuda ita atu iha esperansa no la rende an bainhira hasoru hela susar ruma. Hahalok neʼe ajuda ita atu hamriik metin maski susar neʼebé ita hasoru todan tebes. Hahalok tahan ajuda ita atu manán fali susar neʼebé ita hasoru no neʼe halo ita fokus fali ba ita-nia planu duké hanoin kona-ba ita-nia terus. Domin mak book ita atu tahan. (1 Kor 13:4, 7) Domin ba Jeová mak book ita atu tahan hasoru buat naran deʼit neʼebé Jeová husik ita atu hasoru. (Lc 22:41, 42) Domin book ita atu tahan hasoru irmaun-irmán sira-nia fraku. (1 Ped 4:8) Domin ba ita-nia kaben mak ajuda ita atu tahan hasoru “susar” neʼebé kaben-naʼin sira hasoru no ajuda hametin moris kaben nian.—1 Kor 7:28. w16.04 2:3, 4

Governu Roma no ulun-naʼin relijiaun husi ema judeu fó terus makaʼas ba ema kristaun sira iha tempu uluk, maibé sira nunka para atu halibur hamutuk. Ba sira, la fasil duni atu tuir reuniaun, maibé sira hakaʼas an nafatin hodi tuir reuniaun sira-neʼe. Ohin loron, Jeová nia atan sira mós sente agradese ba ita-nia reuniaun sira. George Gangas, irmaun neʼebé serbí nuʼudar membru ida ba Grupu Administradór ba tinan 22 liu hatete: “Ba haʼu, halibur hamutuk ho irmaun-irmán sira mak buat neʼebé solok tebes no neʼe mak fatin atu hetan laran-manas.” Nia hatutan tan: “Haʼu-nia sentimentu no hakarak loloos husi laran mak atu tuir reuniaun sira.” Ita mós sente hanesan neʼe ka lae kona-ba halibur hamutuk hodi adora Jeová? Se nuneʼe, maski susar mós hakaʼas an nafatin atu halibur hamutuk ho irmaun-irmán sira hodi tuir beibeik reuniaun. Hatudu ba Jeová katak ita mós sente hanesan Liurai David neʼebé hatete: “Oh Jeová, haʼu gosta tebes uma neʼebé Ita hela bá.”—Sal 26:8. w16.04 3:16-18

Se ita mak hatete ka halo buat ruma neʼebé hakanek irmaun ka irmán nia laran, ita tenke halo saida? Bá koʼalia ho didiʼak ho ema neʼe. Ita-nia planu mak atu buka dame ho irmaun ka irmán neʼe, no rekoñese katak ita mak sala, laʼós atu duun katak nia mak sala. Tanba importante tebes ba ita atu iha dame ho ita-nia irmaun-irmán sira. Hanoin toʼok ezemplu ida kona-ba Abraão ho ninia sobriñu Lot. Sira naʼin-rua hakiak animál barak, no sira-nia bibi-atan diskute malu tanba rai kloot liu ba animál sira. Tanba Abraão hakarak rezolve problema ho dame, nia fó oportunidade ba Lot atu hili uluk fatin neʼebé diʼak ba Lot. (Gên 13:1, 2, 5-9) Abraão mak ezemplu neʼebé diʼak tebes! Nia buka uluk dame, laʼós buka diʼak ba ninia an deʼit. Ninia laran-luak neʼe halo nia lakon ka lae? Lae, tanba iha tempu problema ho Lot rezolve tiha, Jeová haraik bensaun boot ba nia. (Gên 13:14-17) Husi neʼe ita bele aprende saida? Ita aprende katak bainhira Jeová nia atan rezolve sira-nia problema ho domin, maski neʼe bele halo sira lakon buat ruma, maibé Jeová sei fó bensaun ba sira. w16.05 1:11, 12

Liuhusi Bíblia, Maromak Jeová fó ninia ukun-fuan balu mai ita atu halo tuir. Porezemplu, nia hatete katak ita labele adora estátua, labele naʼok, labele lanu, ka labele halo hahalok la morál. (1 Kor 6:9, 10) No ninia Oan-Mane Jesus mós fó mandamentu ba ninia eskolante sira atu halo tuir, nia dehan: “Hanorin ema husi nasaun hotu atu sai haʼu-nia dixípulu, fó batizmu ba sira hodi Aman, Oan no espíritu santu nia naran. Hanorin sira atu halo tuir buat hotu neʼebé haʼu haruka ba imi. No haree! Haʼu sei hamutuk nafatin ho imi toʼo mundu nia rohan.” (Mt 28:19, 20) Buat hotu neʼebé Jeová no Jesus haruka ita atu halo sempre ba ita rasik nia diʼak. Halo tuir Jeová nia ukun-fuan bele ajuda ita tau matan ba ita-nia an, ita-nia família, ita-nia saúde, no iha moris neʼebé kontente. Maibé importante liu mak, se ita halo tuir Jeová nia mandamentu, inklui mós haklaken, neʼe sei halo nia kontente no sei lori bensaun barak ba ita. w16.05 3:1

Atu buka-hatene Maromak nia hakarak, ita tenke lee Bíblia loroloron, no hanoin didiʼak kona-ba buat neʼebé ita lee. Halo orasaun ba Jeová atu husu ninia espíritu santu. (Lc 11:13; Gal 5:22, 23) Hodi nuneʼe, ita bele hatene saida mak Jeová gosta no neʼe mós bele ajuda ita atu komprende dalan neʼebé Jeová hanoin. Ikusmai, buat neʼebé ita halo, hanoin, no koʼalia, sei halo Jeová kontente, no ita mós hatene oinsá atu kontrola ita-nia fraku sira. Maibé buat neʼebé ita presiza halo husi agora mak kontinua luta hasoru fraku sira-neʼe. (Prov 4:23) Atu bele banati-tuir Jeová nia hahalok, presiza tempu. Tan neʼe mak se ita sente katak susar ba ita atu troka kedas hahalok neʼebé ita la gosta, ita tenke pasiénsia. Karik buat neʼebé ita presiza halo uluk mak obriga ita-nia an atu halo tuir buat neʼebé Bíblia hatete. Se ita mak hanoin ka halo beibeik buat neʼebé tuir Jeová nia hakarak, neʼe sei halo fasil ba ita atu hanoin tuir dalan neʼebé Jeová hanoin hodi halo buat neʼebé loos.—Sal 37:31; Prov 23:12; Gal 5:16, 17. w16.05 4:14, 16

Ohin loron, Jeová uza ninia Liafuan, espíritu santu, no kongregasaun kristaun hodi hadiʼa ita-nia hahalok. Oinsá mak Bíblia bele ajuda ita? Ita presiza lee no hanoin kleʼan no husu Jeová ajuda ita atu uza informasaun neʼebé ita lee iha ita-nia moris. Liurai David hatete: “Haʼu hanoin-hetan Ita bainhira haʼu iha haʼu-nia kama leten, haʼu hanoin kleʼan kona-ba Ita durante kalan-boot.” (Sal 63:6) Nia mós dehan: “Haʼu sei hahiʼi Jeová, ida neʼebé fó ona konsellu ba haʼu. Durante kalan mós haʼu-nia hanoin sira korrije haʼu.” (Sal 16:7) David hanoin kleʼan kona-ba Jeová nia konsellu no nia husik konsellu sira-neʼe hodi hadiʼa ninia hanoin no sentimentu. Dala ruma konsellu sira-neʼe makaʼas, maibé nia simu nafatin. (2 Sam 12:1-13) David hatudu duni ezemplu neʼebé diʼak ba ita kona-ba haraik-an no hodi halo tuir Jeová. Tan neʼe, husu ba ita-nia an: ‘Bainhira haʼu lee Bíblia, haʼu medita kona-ba buat neʼebé haʼu lee, no haʼu husik konsellu husi Maromak atu troka haʼu-nia hanoin no sentimentu ka lae? Haʼu bele halo liután neʼe ka lae?’—Sal 1:3. w16.06 1:11

Ita tenke komprende katak ita hotu ema sala-naʼin no halo sala beibeik. Tan neʼe dala ruma irmaun-irmán sira mós sei koʼalia ka halo sala. Ladiʼak mós ba ita atu hanoin beibeik kona-ba buat sala neʼebé ita-nia maluk sira halo, selae, karik neʼe bele halo ita serbí Jeová la ho ksolok tan. Perigu liután mak neʼe bele halo ita-nia fiar sai fraku, no ikusmai karik ita sei husik Jeová nia organizasaun. Se ida-neʼe mak akontese ba ita, ita sei lakon ita-nia priviléjiu hodi serbí Jeová no lakon mós ita-nia esperansa atu moris iha mundu foun. Atu bele iha nafatin ksolok no esperansa kona-ba futuru, ita tenke hanoin nafatin kona-ba Bíblia nia promesa neʼe: “Haree bá! Haʼu sei kria lalehan foun no rai foun, no ema sei la hanoin-hetan tan buat uluk nian, no buat sira-neʼe sei la hela nafatin iha ema nia laran.” (Isa 65:17; 2 Ped 3:13) Tan neʼe, diʼak atu la husik ema seluk nia sala hodi hanetik ita atu simu Jeová nia bensaun iha futuru. w16.06 4:13, 14

Liafuan Jeová mesak “ida” deʼit fó-hanoin katak ninia planu no buat neʼebé nia halo sempre sai loos. Jeová laʼós Maromak neʼebé runguranga. Nia mak Maromak neʼebé laran-metin, la muda, laran ida deʼit, no nunka bosok. Porezemplu, nia promete ba Abraão katak Abraão nia bei-oan sei simu rai promete nian, no Jeová halo milagre oioin hodi halo ninia promesa neʼe sai loos. Maski tinan 430 liutiha mós Jeová nunka troka ninia promesa ba Abraão atu sai loos. (Gên 12:1, 2, 7; Êx 12:40, 41) Tinan atus ba atus liutiha, bainhira Jeová bolu ema Izraél atu sai ninia testemuña, Jeová hatete ba sira: “Haʼu hanesan ba nafatin. La iha Maromak ida seluk antes haʼu, no la iha Maromak seluk depois haʼu.” Jeová mós fó-hatene ba sira katak ninia planu sira sei nunka troka, nia dehan: “Haʼu hanesan deʼit ba nafatin.” (Isa 43:10, 13; 44:6; 48:12) Ba ema Izraél, atu bele serbí Jeová mak priviléjiu boot ida ba sira tanba Jeová mak Maromak neʼebé laran-metin no nia nunka troka. Neʼe mós ita-nia priviléjiu atu bele serbí Jeová!—Mal 3:6; Tgo 1:17. w16.06 3:6, 7

Ohin loron, nasaun barak uza soldadu no teknolojia foun hodi hein sira-nia fronteira. Sira halo seguransa hodi ema la bele fó ameasa ba sira-nia rai. Maibé sira la hatene katak iha governu ida neʼebé forte tebes iha lalehan. Lakleur tan ninia Liurai Jesus Kristu sei halo funu boot ida hasoru ema nia governu hotu iha rai. (Isa 9:6, 7; 56:10; Dan 2:44) Ita hotu hein ho namanas no hakarak prepara didiʼak ba loron neʼe. Tan neʼe, ita tenke fó atensaun ba Bíblia nia profesia sira no kontinua serbí Jeová ho laran-metin. (Sal 130:6) Ita besik ona mundu neʼe nia rohan, no neʼe sei halo difisil liu ba ita atu bele matan-moris nafatin. Triste tebes se ita mak la matan-moris tan! w16.07 2:2, 9, 10

Paulo hatene katak nia la serve atu Maromak hatudu laran-sadiʼa ba nia, tanba uluk nia fó ona terus ba ema kristaun barak. Bainhira nia hakerek karta ba Timóteo, nia dehan: “Haʼu agradese tebes ba Kristu Jesus ita Naʼi, ida neʼebé fó kbiit mai haʼu, tanba nia haree haʼu nuʼudar ema neʼebé laran-metin hodi fó knaar mai haʼu atu halo ninia serbisu.” (1 Tim 1:12-14) Paulo koʼalia kona-ba serbisu saida? Nia hatete ba katuas kongregasaun iha Éfeso dehan: “Haʼu la haree haʼu-nia moris nuʼudar buat neʼebé iha folin; haʼu hanoin deʼit atubele halai toʼo rohan no halo hotu serbisu neʼebé haʼu simu husi Naʼi Jesus, hodi fó sasin ho loloos kona-ba liafuan diʼak husi Maromak nia laran-diʼak neʼebé boot.” (Após 20:24) Apóstolu Paulo haklaken ho badinas no nia mak ezemplu neʼebé diʼak tebes ba ita ohin loron. Nia hatudu duni katak Maromak hatudu ninia laran-diʼak neʼebé boot ba nia laʼós saugati deʼit. w16.07 4:1-3

Maski dala ruma Jeová husik ita hein atu hetan priviléjiu ruma husi kongregasaun, maibé ita bele fiar katak Jeová sempre apoia ninia atan. Ezemplu ida mak kona-ba Abraão. Jeová promete ba nia atu iha oan-mane ida, maibé nia tenke iha fiar no hein ho pasiénsia, tanba liutiha tinan barak mak Isaac foin moris. Maski nuneʼe, Abraão nunka sente laran-tun ka lakon ninia fiar ba Jeová nia promesa. (Gên 15:3, 4; 21:5; Ebr 6:12-15) La fasil duni atu hein. (Prov 13:12) Maibé se ita mak hanoin beibeik kona-ba ita-nia situasaun no tanbasá mak ita-nia hakarak seidauk sai loos, neʼe bele halo ita laran-tun. Diʼak liu atu uza ita-nia tempu atu hadiʼa ita-nia hahalok sira hodi bele kumpre kritériu atu serbí iha kongregasaun. Hodi lee Bíblia no medita kona-ba buat neʼebé ita lee bele ajuda ita atu iha matenek, hanoin iha dalan neʼebé matenek, no halo desizaun ho matenek. Iha moris loroloron nian, ita mós bele uza informasaun neʼe atu halo desizaun neʼebé Jeová gosta. Hanesan desizaun kona-ba osan, oinsá bele sai belun neʼebé diʼak, atividade halimar nian, no oinsá atu hili roupa ka hafurak an iha dalan neʼebé diʼak. w16.08 3:9-11

Jeová ajuda ninia povu manán hasoru ema Ámalek no ema Etiópia. Nia fó forsa ba Neemias ho ema judeu seluk hodi harii fali Jeruzalein nia moru toʼo hotu. Jeová mós sei fó forsa ba ita atu kontinua haklaken maski dala ruma ita sente neon-susar ka tanba ema kontra ita. (1 Ped 5:10) Maibé neʼe la dehan katak Jeová sei halo milagre atu halakon problema sira neʼebé ita hasoru, ita mak tenke hakaʼas an. Ita tenke lee Bíblia loroloron, prepara didiʼak no tuir reuniaun sira, halaʼo beibeik estuda mesak no adorasaun família nian, no kontinua sadere ba Jeová liuhusi halo orasaun. Ita labele husik buat seluk hanetik ita atu hetan forsa no laran-manas husi Jeová. Se ita mak sente katak ita komesa husik tun ona ita-nia liman hodi la halo atividade sira-neʼe ida, husu Maromak atu ajuda ita. Ita sei haree duni katak espíritu santu sei ‘halo ita iha forsa, hodi fó ba ita hakarak no kbiit atu halo buat neʼebé monu loos ba nia laran’. w16.09 1:12

Apóstolu Paulo hatete katak diʼak liu la kaben. Maibé nia mós temi liafuan iha eskritura ba ohin. Paulo hatutan tan: “Se sira la bele kontrola an, sira bele kaben, tanba diʼak liu atu kaben duké sai lakan ho hakarak seksuál nian.” Kaben bele ajuda duni ema ida atu kontrola ninia hakarak seksuál neʼebé makaʼas hodi nia la halo masturbasaun ka halo sala-foʼer. Importante mós ba ema neʼebé hakarak kaben atu haree nia idade toʼo ona ka seidauk, tanba apóstolu Paulo dehan: “Se ema ruma liu ona tempu foin-saʼe nian no nia hanoin katak nia la bele kontrola ninia hakarak seksuál nian, entaun ida-neʼe mak nia tenke halo: nia bele kaben se neʼe mak ninia hakarak; nia la halo sala ida.” (1 Kor 7:9, 36; 1 Tim 4:1-3) Maibé ema ida la bele kaben se razaun ba nia atu kaben mak tan deʼit nia iha hakarak seksuál makaʼas neʼebé baibain akontese ba joven barak nia moris. Karik nia seidauk bele atu kaer responsabilidade moris kaben nian. w16.08 1:17

Liuhusi ita-nia hatais, ema bele koñese ita mak sé. (1 Sam 16:7) Tan neʼe mak, nuʼudar Jeová nia atan, ita la naran foti roupa ida neʼebé ita gosta atu hatais no hanoin neʼe diʼak ona. Hatene kona-ba Bíblia nia prinsípiu sira tenkesér book ita atu la uza roupa neʼebé aperta demais, hatudu isin, ka dada ema nia atensaun iha dalan seksuál. Ita-nia hatais lakohi halo ema neʼebé haree ita sente moe no la hatene atu hateke ba neʼebé. Se ita mak hadiʼa an ho didiʼak no hatais roupa neʼebé kabeer, moos, no diʼak, karik neʼe sei halo ema seluk respeitu ita no bele dada sira ba adorasaun neʼebé loos, halo sira respeitu liu Jeová nia organizasaun, no bele halo sira hakarak rona kona-ba mensajen neʼebé ita hatoʼo ba sira. w16.09 3:5, 6

Ema balu neʼebé hatete katak sira fiar evolusaun, sira mós fiar katak Maromak iha. Sira fiar katak Maromak uza evolusaun hodi kria fali buat seluk. Ema seluk tan fiar katak evolusaun mak loos tanba eskola sira hanorin kona-ba neʼe. No balu tan la fiar ona Maromak tanba relijiaun nia hahalok sira. Tan neʼe diʼak atu husu uluk ema fiar saida no tanbasá mak sira hakarak fiar nuneʼe. Tuirmai rona didiʼak sira-nia razaun. Se ita halo nuneʼe, karik ema neʼe mós hakarak koʼalia liután ho ita. Se ema ida hatete katak la matenek atu fiar Maromak, ho respeitu bele husu nia esplika ninia hanoin kona-ba moris mai husi neʼebé. Tuirmai esplika ba nia katak, se moris mak mai husi evolusaun, entaun sélula primeiru tenkesér iha kbiit hodi bele fó tutan fali moris. Sientista ida hatete: “Ema hakfodak tebes hodi hatene katak sélula ida deʼit mós komplikadu tebes.” w16.09 4:12, 13

Karik apóstolu Paulo hanoin kona-ba ema hanesan Nabot no Zacarias. Ema tuda sira toʼo mate tan deʼit sira hakarak halo tuir Jeová. (1 Reis 21:3, 15; 2 Crôn 24:20, 21) Daniel ema soe ba leaun nia kuak, no ninia belun sira ema soe ba ahi laran. Sira brani atu fó an ba mate duké husik sira-nia laran-metin ba Jeová. Sira hatudu duni fiar neʼebé metin katak Jeová sei fó ninia espíritu santu ba sira hodi ajuda sira tahan hasoru terus sira-neʼe. (Ebr 11:33, 34; Dan 3:16-18, 20, 28; 6:13, 16, 21-23) Profeta balu hanesan Mikaias, no Jeremias, “simu terus tanba ema hamoe sira . . . no hatama iha dadur”. Seluk tan hanesan Elias, “laʼo bá-mai iha rai-fuik no iha foho sira no iha fatuk-kuak no rai-kuak sira”. Sira hotu tahan hasoru terus tanba sira ‘laran-metin katak sira-nia esperansa sei sai loos’.—Ebr 11:1, 36-38; 1 Reis 18:13; 22:24-27; Jer 20:1, 2; 28:10, 11; 32:2. w16.10 3:10, 11

Ita bele hatudu laran-diʼak ba ema estranjeiru hodi simu sira didiʼak iha ita-nia reuniaun sira. Baibain ema neʼebé foin muda ba rai ida, sira sente moe no ladún ransu ho ema seluk. No dala ruma tanba kultura ka laiha pozisaun aas iha komunidade, karik sira bele sente katak ema seluk diʼak liu fali sira. Tan neʼe, diʼak ba ita atu hasé uluk sira no simu sira ho laran. Se ita mak iha aplikasi JW Language iha ita-nia língua, bele uza neʼe atu hasé ema estranjeiru iha sira-nia língua rasik. (Flp 2:4) Karik foufoun ita bele sente moe atu koʼalia ho ema husi rai seluk. Maibé se ita fó koñese ita-nia an no koʼalia ho sira, karik ita sei hakfodak hodi hatene katak iha buat barak kona-ba sira mak hanesan ho ita-nian. Diʼak atu hanoin-hetan katak kultura ida-idak iha ninia diʼak no fraku. w16.10 1:13, 14

Ita ida-idak tenke halo tuir Bíblia nia matadalan hodi ajuda kongregasaun atu bele moos nafatin. Porezemplu, haree toʼok buat neʼebé akontese iha kongregasaun Korinto. Apóstolu Paulo ajuda ona ema barak atu simu lia-loos no nia hadomi tebes sira. (1 Kor 1:1, 2) Maibé nia triste tanba ema ida husi kongregasaun neʼe halo hahalok sala-foʼer no irmaun sira husik deʼit. Paulo fó konsellu ba katuas sira atu “entrega mane hanesan neʼe ba Satanás”. Neʼe katak katuas sira tenke hasai ema neʼe husi kongregasaun. (1 Kor 5:5-7, 12) Ohin loron, se ema ida halo sala boot no lakohi hakribi sala, karik katuas sira sei foti desizaun atu hasai ema neʼe husi kongregasaun. Se nuneʼe, ita halo tuir Bíblia nia matadalan kona-ba oinsá atu trata ema neʼe ka lae? Se ita halo tuir matadalan husi Bíblia, neʼe sei ajuda kongregasaun atu moos nafatin. No karik bele ajuda ema neʼe atu hatene katak nia presiza hakribi ninia sala no husu Jeová atu fó perdua ba nia. w16.11 2:14

Bainhira ita fó laran-manas ba ema, neʼe ajuda tebes sira. Rubén hatete: “Haʼu luta hasoru haʼu-nia sentimentu neʼebé halo haʼu sente la iha folin ba tinan barak ona. Maibé loron ida, haʼu haklaken hela ho irmaun katuas ida, no nia haree katak haʼu sente ladún kontente iha tempu neʼebá. Haʼu koʼalia sai haʼu-nia sentimentu ba nia no nia rona didiʼak ba haʼu. Tuirmai nia hatete ba haʼu katak haʼu halo ona buat barak neʼebé diʼak tebes. Nia mós fó-hanoin haʼu kona-ba Jesus nia liafuan katak ita ida-idak folin-boot liu fali manu-liin barak. Ikusmai haʼu sempre hanoin-hetan eskritura neʼe, no eskritura neʼe book tebes haʼu-nia laran. Irmaun katuas neʼe nia liafuan sira halo haʼu sente diʼak tebes kona-ba haʼu-nia moris.” (Mt 10:31) Bíblia hatete katak ita presiza fó laran-manas beibeik ba malu. Bainhira apóstolu Paulo hakerek karta ba ema kristaun ebreu, nia dehan: “Kontinua fó laran-manas ba malu loron-loron, . . . atu nuneʼe imi-nia laran la sai toos tanba sala nia kbiit atu lohi.” (Ebr 3:13) Bainhira ema ida fó laran-manas ba ita, neʼe halo ita-nia laran sente kmaan tebes. Hanoin-hetan razaun neʼe ajuda ita atu komprende katak importante atu fó fali laran-manas ba ema seluk. w16.11 1:2, 3

Iha tinan 313 liutiha Kristu, Liurai Constantino neʼebé ukun Roma, halo grupu kristaun hodi sai relijiaun legál. Constantino halaʼo enkontru boot ida iha sidade Niseia ho relijiaun nia ulun-naʼin sira. Depois enkontru neʼe liu tiha, Constantino duni sai amlulik ida naran Ário atu moris nuʼudar dadur tanba nia lakohi fiar katak Jesus mak Maromak. Tuirmai, iha Liurai Teodósio nia tempu (tinan 379-395), Igreja Katólika sai nuʼudar relijiaun ofisiál iha rai sira neʼebé Roma ukun. Istória-naʼin barak hatete katak iha Liurai Teodósio nia tempu ema jentiu barak husi Roma sai nuʼudar ema “kristaun”. Maibé tuir loloos, ema kristaun mak husik ona lia-loos no simu fali hanorin falsu hodi sai parte ba Babilónia Boot. Maski nuneʼe, sei iha ema kristaun kose-mina balu neʼebé laran-metin nafatin ba Maromak. Sira mak fini diʼak hanesan Jesus dehan, no sira hakaʼas an nafatin atu adora Maromak.—Mt 13:24, 25, 37-39. w16.11 4:8, 9

Ohin loron, Satanás “laʼo bá-mai hanesan leaun ida neʼebé hasai lian makaʼas no buka atu han ema ruma”. (1 Ped 5:8; Apok 12:17) Tan neʼe mak ita-nia moris nakonu ho susar. Husi tempu uluk kedas Jeová nia atan sira hasoru ona susar hanesan neʼe. Porezemplu, Bíblia hatete katak dala ruma Liurai David sente laran-taridu. (Sal 13:2) No apóstolu Paulo “hanoin barak tanba kongregasaun hotu”. (2 Kor 11:28) Maibé, saida mak ita bele halo bainhira ita sente laran-taridu? Ita-nia Aman iha lalehan neʼebé nakonu ho domin ajuda ona ninia atan sira iha tempu uluk hodi sai husi laran-susar, ohin loron nia mós hakarak ajuda ita. Maibé oinsá? Iha dalan haat neʼebé bele ajuda ita. (1) Halo orasaun, (2) lee no medita kona-ba Maromak nia Liafuan, (3) husik Jeová nia espíritu santu ajuda ita, no (4) koʼalia ba ema neʼebé ita bele tau fiar. w16.12 3:1, 2

Iha apóstolu sira-nia tempu, ema balu husi kongregasaun Korinto uluk moris nuʼudar naʼok-teen, omoseksuál, halo sala-foʼer ho kaben-naʼin, adora estátua, lanu-teen no halo hahalok aat seluk hanesan neʼe. Maibé bainhira sira hatene ona no hadomi Jeová, sira troka sira-nia moris. Sira sente moe kona-ba buat sira neʼebé uluk sira halo. (Rom 6:21; 1 Kor 6:9-11) Ema kristaun iha Roma mós presiza halo mudansa ba sira-nia moris. Paulo hatete ba sira: “Keta kontinua fó imi-nia liman-ain ba sala nuʼudar kroʼat atu halo hahalok la loos. Maibé fó imi-nia an ba Maromak nuʼudar ema sira neʼebé moris ona husi mate, no mós fó imi-nia liman-ain ba Maromak nuʼudar kroʼat atu halo hahalok loos.” (Rom 6:13) Paulo tau fiar ba sira katak sira bele halo buat neʼebé loos no kontinua atu simu Maromak nia laran-diʼak neʼebé boot. w16.12 1:13

Jeová kria ema ho kbiit furak oioin. Nia fó ita kbiit atu hanoin hodi ajuda ita rezolve problema no halo planu ba ita-nia futuru. (Prov 2:11) Nia fó kbiit ba ita hodi bele kumpre ita-nia planu sira. (Flp 2:13) Nia mós fó ita konxiénsia, kbiit neʼe ajuda ita atu hatene saida mak loos no sala. Liuhusi konxiénsia mak ita bele hasees an husi hahalok sala sira no mós ajuda ita atu hadiʼa ita-nia hahalok. (Rom 2:15) Liuhusi Bíblia, Jeová husu beibeik ita atu uza ho didiʼak ita-nia kbiit. Porezemplu, Eskritura Lia-Ebraiku sira dehan: “Ema badinas nia planu sira sei hetan susesu duni,” no “buat naran deʼit neʼebé ó-nia liman bele halo, halo ida-neʼe bá ho ó-nia forsa tomak”. (Prov 21:5; Ecle 9:10) Husi Eskritura Lia-Gregu nian dehan: “Kuandu ita iha oportunidade, mai ita halo buat neʼebé diʼak ba ema hotu”; no “hodi tuir prezente neʼebé ema ida-idak simu, uza ida-neʼe atu serbí malu”. (Gal 6:10; 1 Ped 4:10) Loos duni, Jeová hakarak ita atu hakaʼas an hodi halo buat neʼebé diʼak ba ita-nia an no ba ema seluk. w17.01 1:1, 2

Adão no Eva hadaʼet sala no mate ba ema hotu. Maski nuneʼe, ita sei iha direitu atu uza ita-nia liberdade. Ezemplu ida mak kona-ba tempu neʼebé Jeová hili nasaun Izraél. Jeová fó sira liberdade atu simu ka la simu hodi sai povu espesiál ida ba nia. (Êx 19:3-6) Nasaun Izraél hili atu halo saida? Sira simu hodi sai Maromak nia povu no uza sira-nia liberdade iha dalan neʼebé Jeová hakarak. Sira hatete: “Buat hotu neʼebé Jeová koʼalia ona, ami prontu atu halo tuir.” (Êx 19:8) Maibé triste mak, ikusmai sira hili hodi la halo tuir sira-nia promesa ba Jeová. Neʼe sai avizu importante ida ba ita. Tan neʼe, mai ita uza didiʼak ita-nia liberdade no hakbesik nafatin ba Jeová no halo tuir ninia ukun-fuan sira. w17.01 2:9

Liurai Jeroboam harii altár ida ba adorasaun falsu iha sidade Betel. Tan neʼe Jeová haruka profeta ida husi rai-Judá bá atu fó avizu makaʼas ba nia. Profeta neʼe mak ema neʼebé haraik an, no nia halo tuir Jeová hodi hatoʼo Jeová nia mensajen neʼe. Liurai hirus tebes ba profeta, maibé Jeová proteje nia. (1 Reis 13:1-10) Antes atu bá, Jeová fó ona mandamentu ida ba profeta atu labele han ka hemu buat ruma iha rai-Izraél no nia tenkesér uza fali dalan seluk atu fila ba uma. Maibé iha tempu profeta neʼe fila husi Izraél, iha katuas ida bosok nia katak nia mós simu mensajen ida husi Jeová. Katuas neʼe konvida profeta bá ninia uma atu han no hemu. Profeta neʼe bá duni hodi la halo tuir buat neʼebé Jeová hatete ba nia. Jeová la kontente ho profeta neʼe. Bainhira nia fila, leaun ida ataka no oho nia iha dalan. (1 Reis 13:11-24) Bíblia la esplika tanbasá mak profeta rona ba katuas neʼe. Maibé buat neʼebé ita hatene mak profeta neʼe la kontinua tan atu laʼo hamutuk Jeová ho haraik-an. w17.01 4:1-3

Eskritura primeiru husi Bíblia hakerek ho liafuan badak deʼit maibé iha signifika kleʼan neʼebé dehan: “Horiuluk kedas Maromak kria lalehan no rai.” (Gên 1:1) Husi buat sira neʼebé Maromak kria, ita hatene uitoan deʼit. Ezemplu balu mak kona-ba naroman, gravitasaun no espasu nia luan. Iha mós buat barak mak ita seidauk haree iha universu neʼe. (Ecle 3:11) Maski nuneʼe, Jeová fó sai ona ba ita ninia hakarak kona-ba ema no rai. Nia kria ema tuir ninia ilas no hakarak sira atu moris ba nafatin iha rai. (Gên 1:26) Sira sei moris nuʼudar ninia oan no nia sei sai nuʼudar sira-nia Aman. Iha Gênesis kapítulu tolu esplika katak iha problema ida mosu neʼebé hanetik hela Jeová nia hakarak atu sai loos. (Gên 3:1-7) Maibé ba Jeová, neʼe laʼós problema neʼebé susar, tanba la iha buat ida mak bele hapara nia. (Isa 46:10; 55:11) Tan neʼe ita bele fiar katak Jeová nia hakarak ba ema no rai sei sai loos tuir ninia tempu. w17.02 1:1, 2

Ema seluk bele haree ka lae katak Maromak nia espíritu santu mak hamutuk ho Moisés? Bele. Tanba Jeová nia espíritu santu mak fó kbiit ba Moisés atu halo milagre no fó sai Jeová nia naran ba Faraun, liurai Ejitu neʼebé iha podér boot tebes. (Êx 7:1-3) No mós espíritu santu mak ajuda Moisés hatudu hahalok domin no pasiénsia nuʼudar ulun. Neʼe hatudu ho momoos katak Jeová mak hili Moisés hodi sai ulun ba Ninia povu. Jeová fó ninia espíritu santu ba sesé deʼit atu dirije ninia povu? Bíblia temi ema balu, porezemplu, Josué nakonu ho matenek neʼebé mai husi espíritu santu. (Deut 34:9) “Jeová nia espíritu tun ba Jideaun.” (Juíz 6:34) No “Jeová nia espíritu komesa fó kbiit ba David.” (1 Sam 16:13) Ema sira-neʼe sadere deʼit ba Jeová nia espíritu santu hodi ajuda sira halo buat neʼebé sira rasik la iha kbiit atu halo.—Jos 11:16, 17; Juíz 7:7, 22; 1 Sam 17:37, 50. w17.02 3:3-5

Ita bele aprende ezemplu neʼebé diʼak husi apóstolu Paulo. Nia rekoñese katak ninia maluk sira iha direitu atu halo desizaun rasik, no nia hatudu respeitu ba sira-nia direitu neʼe. Ohin loron, katuas kongregasaun bele halo tuir Paulo nia ezemplu bainhira atu fó konsellu kona-ba desizaun pesoál. Diʼak ba katuas sira atu fahe deʼit informasaun husi Maromak nia Liafuan ho irmaun-irmán sira. Maibé sira presiza kuidadu atu la halo desizaun ba sira, tanba irmaun-irmán sira mak tenke simu konsekuénsia husi sira rasik nia desizaun neʼe. Hanoin-hetan pontu importante neʼe: Ita bele ajuda ema seluk hodi komprende oinsá atu uza Bíblia nia konsellu iha situasaun ida-idak, maibé sira rasik mak iha direitu no responsabilidade atu halo desizaun. Se sira rasik mak halo desizaun neʼebé matenek, neʼe sei ajuda sira. Tan neʼe mak ita la bele halo desizaun ba ita-nia irmaun-irmán sira. w17.03 2:11

Grupu Administradór hatudu duni katak sira iha fiar neʼebé boot liuhusi haklaken ho badinas Bíblia nia mensajen ba ema hotu. Ita apoia daudauk irmaun sira-neʼe atu halo serbisu importante neʼe ka lae? Se ita mak halo tuir, ita sei sente haksolok bainhira ita rona Jesus hatete ba ita: “Tanba imi halo ida-neʼe ba haʼu-nia alin kiʼik sira-neʼe ida, imi halo neʼe mai haʼu.” (Mt 25:34-40) Bainhira Jesus fila fali ba lalehan, nia nunka husik hela ninia dixípulu sira. (Mt 28:20) Nia hatene katak bainhira nia iha rai, espíritu santu, anju sira, no Maromak nia Liafuan mak ajuda nia. Tan neʼe Jesus mós fó ajuda neʼebé hanesan ba atan laran-metin ohin loron. Grupu Administradór sempre “laʼo tuir Bibi-Oan [Jesus] ba fatin naran deʼit neʼebé nia bá”. (Apok 14:4) Tan neʼe mak bainhira ita halo tuir matadalan husi Grupu Administradór, ita mós laʼo tuir ita-nia Ulun-Naʼin Jesus. Lakleur tan Jesus sei lori ita ba moris neʼebé laiha rohan. (Apok 7:14-17) No la iha ulun-naʼin ida husi ema mak bele halo promesa hanesan neʼe! w17.02 4:17-19

Ita tenke sadere ba Jeová iha situasaun hotu, laʼós ba ita rasik nia hanoin. Maski problema boot ka kiʼik, ita tenke buka ajuda husi Jeová. Diʼak atu husu ba ita-nia an: ‘Dala ruma haʼu sadere ba haʼu-nia an hodi koko atu rezolve problema tuir dalan neʼebé haʼu hanoin mak diʼak liu hotu ka lae? Ka haʼu sempre buka uluk matadalan husi Bíblia, depois mak uza informasaun sira-neʼe atu rezolve haʼu-nia problema sira?’ Porezemplu, karik Ita-nia família halo susar ba Ita atu bele tuir reuniaun ka reuniaun boot sira. Ita sei buka ajuda husi Jeová atu hatene saida mak Ita bele halo iha situasaun neʼe ka lae? Ka oinsá se Ita buka serbisu kleur ona, no ikusmai hetan duni serbisu ida. Ita sei fó-hatene uluk ba patraun neʼe katak Ita tenke tuir reuniaun semana-semana ka lae? Maski problema naran deʼit neʼebé ita hasoru, importante atu hanoin-hetan liafuan husi ema neʼebé hakerek salmu neʼebé temi iha eskritura ba ohin. w17.03 4:6