Outubru

Jeová mak Maromak neʼebé “fó kmaan mai ita no hametin ita atu tahan”. (Rom 15:5) Nia mesak deʼit mak komprende liu hotu kona-ba ita-nia problema, situasaun, sentimentu, no moris. Tan neʼe mak nia hatene saida mak bele ajuda ita atu tahan. Oinsá mak Maromak hatán ba ita-nia orasaun hodi fó kbiit ba ita atu tahan? Kuandu ita husu Jeová atu ajuda ita tahan hasoru susar ruma, nia sei ‘hatudu dalan ba ita atu sai’. (1 Kor 10:13) Dala ruma nia bele hasai tiha problema neʼe husi ita. Maibé dala barak liu nia hatudu deʼit dalan ba ita ‘atu nuneʼe imi bele tahan’. Jeová fó duni kbiit ba ita hodi ita “bele tahan buat hotu ho pasiénsia no ksolok”. (Kol 1:11) No tanba Jeová mós hatene katak ita iha limitadu, tan neʼe nia nunka sei husik situasaun ida sai grave toʼo ita husik ita-nia laran-metin ba nia. w16.04 2:5, 6

Maromak nia Liafuan haruka ita atu halo tuir ema nia governu, maibé Bíblia mós hatete katak ita tenke halo tuir Maromak duké halo tuir ema. (Após 5:29; Tito 3:1) Liafuan sira-neʼe kontra malu ka lae? Lae. Jesus uza prinsípiu ida hodi ajuda ita atu hatene sé mak ita tenke halo tuir. Hanesan ho buat neʼebé Jesus hatete iha eskritura ohin nian. “Fó ba Liurai Roma buat neʼebé Liurai Roma nian” mak bainhira ita halo tuir governu nia lei sira, hatudu respeitu ba governu nia elementu sira, no selu taxa. (Rom 13:7) Maibé, se governu mak haruka ita atu halo buat neʼebé kontra Maromak, ho respeitu ita sei la halo tuir. Ita la mete ba buat polítiku no nafatin neutrál. (Isa 2:4) Tuir loloos Jeová mak husik ema nia governu atu ukun, tan neʼe mak ita la bele kontra sira. Maibé ita mós lakohi envolve an iha atividade patriotizmu ka nasionalizmu sira. (Rom 13:1, 2) Ita la koko atu troka governu, vota, ka sai kandidatu ba partidu polítiku ruma. w16.04 4:1, 2

Baibain maluk fiar-naʼin sira bele no tenkesér rezolve sira-nia problema mesamesak deʼit. Maibé iha situasaun balu Jesus hatete katak karik ema balu husi kongregasaun mós presiza envolve iha laran. (Mt 18:15-17) Sala neʼebé Jesus temi iha eskritura neʼe laʼós koʼalia kona-ba problema neʼebé kiʼik. Ita hatene ida-neʼe tanba Jesus dehan katak, se irmaun ida, sasin-na’in seluk, no mós katuas sira koʼalia ona ho ema neʼe, maibé nia lakohi hakribi ninia sala, ema neʼe sai ona hanesan “ema husi nasaun seluk no ema kobradór impostu nian”. Ohin loron, neʼe dehan katak hasai husi kongregasaun. Sala neʼe mak hanesan hamatak ema ka konta aat ema hodi hafoʼer ema nia naran. w16.05 1:14

Bíblia la fó ukun-fuan kona-ba buat hotu neʼebé ita halo iha ita-nia moris. Porezemplu, Bíblia la halo ukun-fuan katak ita tenke hatais roupa saida mak diʼak ba ita. Ida-neʼe hatudu katak Jeová iha matenek, tanbasá? Tanba iha mundu, ema ida-idak iha hatais neʼebé la hanesan husi rai ida ho rai seluk, no modelu kona-ba hatais mós troka beibeik tinan ba tinan. Se Bíblia mak fó ukun-fuan ida-idak kona-ba hatais neʼe diʼak ka ladiʼak, karik Bíblia mós bele liu prazu lalais deʼit. Bíblia mós la fó ukun-fuan ida-idak kona-ba serbisu ka atividade halimar saida mak diʼak ka ita tenke halo saida hodi bele iha saúde neʼebé diʼak. Se ita hasoru situasaun neʼebé Bíblia la fó ukun-fuan, oinsá mak ita bele halo desizaun neʼebé diʼak? Duké hanoin kedas kona-ba ita rasik nia hakarak, diʼak atu hanoin buat hotu kona-ba situasaun neʼe no oinsá mak desizaun neʼebé ita foti bele halo Jeová kontente. Se ita hanoin hanesan neʼe, Jeová sei ajuda ita no mós fó bensaun ba ita.—Sal 37:5. w16.05 3:2, 6

Karik ita ida-idak gosta parte neʼebé la hanesan husi Bíblia. Balu gosta lee evanjellu sira tanba ita bele aprende kona-ba Jeová nia hahalok furak neʼebé Jesus hatudu. (João 14:9) Balu seluk gosta lee kona-ba profesia sira, hanesan lee livru Apokalipse neʼebé koʼalia kona-ba buat neʼebé atu “mosu lakleur tan”. (Apok 1:1) Balu tan gosta lee Salmo no Provérbios tanba Salmo fó kmaan sira no Provérbios fó matadalan neʼebé kapás. Tan neʼe mak ita hatete katak Bíblia mak livru ba ema hotu, loos ka lae? Tanba ita gosta Bíblia, ita mós gosta ita-nia livru sira, tanba livru sira-neʼe bazeia hotu ba Bíblia. Livru, broxura, revista, no buat sira seluk neʼebé ita iha, sira hotu mai husi Jeová. Ajuda sira-neʼe Jeová fó mai ita atu ita bele besik nafatin ba nia no “iha fiar neʼebé metin”.—Tito 2:2. w16.05 5:1-3

Espíritu santu bele ajuda ita iha dalan oioin. Porezemplu, espíritu santu bele ajuda ita atu iha Jesus nia hahalok sira, tanba hahalok sira-neʼe mai husi Maromak nia espíritu santu. Hahalok ida husi espíritu santu mak domin. Ita hadomi Maromak no hakarak halo tuir nia no husik nia hadiʼa ita-nia moris tanba ita hatene katak ninia mandamentu sira diʼak ba ita. Espíritu santu mós bele fó kbiit ba ita atu sees husi mundu nia hahalok no hanoin sira. (Éf 2:2) Bainhira apóstolu Paulo sei joven, nia halo tuir hahalok husi ema judeu sira-nia ulun-naʼin relijiaun neʼebé foti-an tebes. Maibé espíritu santu ajuda nia troka ninia hahalok sira-neʼe. Nia hatete: “Tanba iha buat hotu haʼu hetan forsa liuhusi nia neʼebé fó kbiit mai haʼu.” (Flp 4:13) Tan neʼe mak ita presiza husu beibeik espíritu santu, no Jeová sei hatán ba ita-nia orasaun sira-neʼe.—Sal 10:17. w16.06 1:12

Jeová mak ita-nia Maromak neʼebé mesak ida deʼit, tan neʼe ita tenke adora nia mesak ida deʼit. Ita la bele adora tan maromak seluk ka uza hanorin ka dalan neʼebé sala atu adora Jeová. Ita la bele iha hanoin katak, husi maromak hotu Jeová mós maromak ida no ninia forsa mak boot liu sira. Lae, tanba Jeová mak Maromak loos ida deʼit. Nia mesak deʼit mak ita tenke adora. Se ita adora Jeová mesak deʼit, ita tenke tau uluk nia iha ita-nia moris, ita labele husik buat seluk atu fahe ita-nia adorasaun ba nia. Neʼe bele kona buat saida deʼit? Iha Ukun-Fuan Sanulu, Jeová fó-hatene ho momoos katak ninia povu labele adora maromak seluk no mós labele fó adorasaun ba buat seluk. (Deut 5:6-10) Ohin loron, ema bele fó adorasaun ba buat oioin, karik la ho neon sira adora hela buat sira-neʼe. Maibé tanba Jeová nunka troka, ninia mandamentu sira mós nunka troka.—Mc 12:29. w16.06 3:10, 12

Bainhira Pedro husu ba Jesus katak diʼak ka lae atu fó perdua “toʼo dala hitu”, Jesus hatán: “Haʼu hatete ba ó, laʼós toʼo dala hitu, maibé toʼo dala hitunulu-resin-hitu.” Jesus nia liafuan hanorin ita katak ita tenke prontu atu fó perdua ba ema seluk. (Mt 6:15; 18:21, 22) Tanba ita hotu sala-naʼin, karik ita mós bele hakanek ema seluk. Se ita mak hatene katak ita hakanek duni ema seluk, diʼak atu halo tuir Bíblia nia konsellu sira. Husu ema neʼe atu fó perdua ba ita, no hakaʼas an atu hadame malu fali ho nia. (Mt 5:23, 24) Bainhira ema fó perdua ba ita-nia sala, neʼe halo ita sente kontente. Tan neʼe diʼak mós atu fó perdua ba ema seluk. (1 Kor 13:5; Kol 3:13) Se ita mak fó perdua ba ema seluk, Jeová mós sei fó perdua ba ita. Neʼe duni, se iha ema ruma mak hakanek ita, diʼak atu halo tuir ita-nia Aman Jeová nia ezemplu hodi hatudu laran-sadiʼa ba sira hanesan Jeová hatudu ona mai ita.—Sal 103:12-14. w16.06 4:15, 17

Iha loron ikus sira-neʼe, Jeová nia povu simu knaar atu haklaken “liafuan diʼak kona-ba Maromak nia Ukun iha mundu tomak nuʼudar sasin ba nasaun hotu”. (Mt 24:14) Mensajen neʼebé ita haklaken mós “liafuan diʼak husi Maromak nia laran-diʼak neʼebé boot” tanba bensaun hotu neʼebé ita simu husi Maromak nia Ukun mai husi Jeová nia laran-diʼak. (Após 20:24; Éf 1:3) Apóstolu Paulo hatudu ninia agradese ba Jeová nia laran-diʼak hodi haklaken ho badinas. Ita mós banati-tuir ninia ezemplu ka lae? (Rom 1:14, 15) Tanba Maromak Jeová nia laran-diʼak neʼebé boot, nia fó ona bensaun barak ba ita ema sala-naʼin sira. No tanba ita simu ona buat diʼak sira-neʼe, ita mós iha responsabilidade atu hanorin fali ema seluk. Hodi nuneʼe sira bele hatene oinsá mak Jeová hatudu ninia domin no oinsá mak sira bele simu bensaun sira-neʼe. w16.07 4:4, 5

Antes Jesus mate, nia fó-hanoin dala tolu ba ninia dixípulu katak Diabu mak “ukun-naʼin mundu neʼe nian”. (João 12:31; 14:30; 16:11) Diabu uza relijiaun falsu hodi lohi ona ema barak. Tan neʼe mak ohin loron ema barak la fó atensaun tan ba Bíblia nia profesia sira neʼebé hatudu ho momoos katak mundu nia rohan besik toʼo ona. (Sof 1:14) Ita bele haree ho momoos katak Satanás taka duni ema nia neon, tan neʼe mak bainhira ita koko atu esplika katak mundu neʼe nia rohan besik ona no Kristu ukun daudauk ona, ema barak lakohi rona. Keta husik ema nia atitude hanesan neʼe atu halo ita laran-tun hodi la matan-moris tan. Ita hatene katak importante tebes atu matan-moris nafatin. w16.07 2:11, 12

Bainhira noivu haree ninia noiva bonita laʼo mosu mai iha sira-nia loron kazamentu nian, ksolok mak domina sira-nia sentimentu tomak. Jeová nuʼudar moris kaben nia hun, nia mós hakarak kaben-naʼin sira atu iha moris kaben neʼebé ksolok no susesu, tan neʼe mak nia fó matadalan liuhusi Bíblia ba sira. (Prov 18:22) Maibé Bíblia mós fó-hatene ita katak bainhira ema naʼin-rua la perfeitu kaben, sira sei hasoru problema balu, ka “susar iha sira-nia isin”. (1 Kor 7:28) Oinsá mak bele hamenus problema sira-neʼe? No oinsá mak bele iha moris kaben neʼebé susesu? Bíblia hatete katak importante tebes atu hatudu hahalok domin oioin iha moris kaben nian. Porezemplu, feen-laʼen presiza hatudu domin romántiku ba malu (lia-gregu, eros), domin ba família (storgé), no hadomi malu hanesan belun diʼak (filia). Maibé atu bele iha moris kaben neʼebé susesu, sira presiza hatudu domin tuir Bíblia nia prinsípiu (agape). w16.08 2:1, 2

Timóteo haklaken ona ba tinan barak, entaun tanbasá mak nia presiza laʼo ba oin nafatin? Tanba ema no ema nia situasaun bele troka, tan neʼe mak se Timóteo la tau matan didiʼak nafatin ba dalan neʼebé nia hanorin, karik ema sei la rona ba nia. Ita mós tenkesér halo nuneʼe ohin loron. Iha fatin balu, baibain ita la hasoru uma-naʼin bainhira ita haklaken husi uma ba uma. Iha fatin balu tan ema hela iha uma neʼebé portaun xave metin, no ita la bele hasoru ema sira-neʼe. Se ida-neʼe mak ita-nia situasaun, karik bele uza fali dalan seluk atu haklaken ba ema sira-neʼe. Haklaken iha fatin públiku mak dalan diʼak ida atu habelar liafuan diʼak ba ema. Irmaun-irmán barak gosta haklaken iha fatin hanesan terminál komboiu, terminál bís, merkadu, no jardín. w16.08 3:14-16

Jeová fó ba ita família boot ida iha mundu tomak hodi fó kmaan ba ita. (Ebr 12:12, 13) Neʼe mak dalan neʼebé irmaun-irmán sira apoia malu iha apóstolu sira-nia tempu. Ohin loron mós hanesan. Saida mak ita bele halo? Hanoin-hetan Aarão no Hur ajuda hodi hametin Moisés nia liman durante ema Izraél funu hasoru ema Ámalek. (Êx 17:8-13) Ita mós bele buka dalan atu apoia no fó ajuda ba ema seluk, hanesan irmaun-irmán sira neʼebé hasoru hela susar tanba idade, problema ho saúde, família fó terus, sente mesamesak, ka tanba ema neʼebé sira hadomi mate. Ita mós bele hametin ita-nia joven sira tanba sira hasoru beibeik tentasaun atu halo buat neʼebé sala ka atu sai ema susesu iha Satanás nia mundu. (1 Tes 3:1-3; 5:11, 14) Koko atu hatene diʼak liután ema seluk iha ita-nia kongregasaun, iha serbisu haklaken, bainhira han hamutuk, ka iha tempu koʼalia ho ema seluk liuhusi telefone. w16.09 1:13, 14

Dalan neʼebé ita hatais fó impaktu ba Maromak santu nia naran, ba irmaun-irmán sira, no ba ema iha haklaken-fatin. Tan neʼe mak ita tenke hatais iha dalan neʼebé halo ema fó glória ba Jeová no ba ita-nia mensajen. (Rom 13:8-10) Neʼe importante tebes liuliu se ita bá tuir reuniaun ka bá haklaken. Ita tenke hatais iha dalan neʼebé loos se ita dehan katak ita mak ema neʼebé adora Maromak. (1 Tim 2:10) Roupa balu diʼak atu uza ba fatin ida, maibé iha fatin seluk karik ladiʼak atu hatais. Tan neʼe mak ita tenke hanoin kona-ba ema nia kultura hodi la uza roupa neʼebé bele halo ema sidi. Bainhira bá tuir reuniaun boot, ita tenke hatais roupa neʼebé loos no respeitu. Ita lakohi hatais tuir modelu mundu nian neʼebé dada atensaun liu. Hodi nuneʼe, ita la sente an atu fó sai katak ita mak Testemuña ba Jeová, no neʼe mós sei fó oportunidade ba ita hodi sempre prontu atu fó sasin ba ema seluk. w16.09 3:7, 8

Paulo esplika uma deʼit presiza ema atu harii, sá tan ho kriasaun neʼebé komplikadu tebes, presiza duni matenek-naʼin ida atu halo. Ita mós bele uza dalan neʼe atu esplika ba ema neʼebé ladún fiar Bíblia. Ulukliu, husu nia fiar saida no koko atu buka-hatene tópiku saida mak nia gosta. (Prov 18:13) Se nia gosta siénsia, bele fó ezemplu balu neʼebé hatudu katak bainhira Bíblia koʼalia kona-ba siénsia, informasaun sira-neʼe sempre hanesan ho buat neʼebé sientista sira hatete. Se nia gosta istória, bele hatudu oinsá Bíblia nia profesia fó-hatene nanis kona-ba akontesimentu ruma iha ema nia istória. Karik ema seluk sei rona se ita hatudu oinsá Bíblia nia matadalan bele ajuda ema nia moris, hanesan matadalan iha Jesus nia diskursu neʼebé nia hatoʼo husi foho ida. Ita-nia hakarak mak laʼós atu diskute malu ho ema. Ita hakarak sira gosta koʼalia ho ita no aprende kona-ba Bíblia. Atu halo nuneʼe, husu pergunta sira ho respeitu, depois rona didiʼak ba buat neʼebé sira koʼalia. Bainhira ita koʼalia kona-ba ita-nia fiar, halo ida-neʼe ho laran-maus no respeitu, liuliu bainhira koʼalia ho ema neʼebé idade boot liu ita. Se ita halo buat sira-neʼe, sira mós sei respeitu ita. w16.09 4:14-16

Saida mak ita bele halo atu ajuda ema neʼebé mai husi rai seluk sente ita-nia kongregasaun mak hanesan família ida? Husu ba ita-nia an, ‘Se haʼu mak iha ema nia rai, haʼu hakarak ema seluk trata haʼu oinsá?’ (Mt 7:12) Hatudu pasiénsia ba sira neʼebé halo daudauk mudansa atu moris iha rai seluk. Foufoun karik ita la komprende tansá mak sira hanoin ka halo buat ruma. Maibé duké hanoin katak sira tenke moris tuir ita-nia kultura, diʼak liu simu malu tanba neʼe mak dalan neʼebé sira moris. Se ita mak gasta tempu balu atu buka-hatene kona-ba sira-nia rai ka kultura, karik neʼe sei halo fasil ba ita atu hatene liután sira. Karik ita bele halo riset kona-ba neʼe durante tempu halaʼo adorasaun família nian. Dalan seluk atu koñese liu sira mak konvida sira atu mai han iha uma. Jeová “loke ona odamatan ba nasaun sira atu sai fiar-naʼin”, tan neʼe ita mós hakarak husik ita-nia odamatan nakloke ba “ita-nia maluk fiar-naʼin” sira.—Após 14:27; Gal 6:10; Jó 31:32. w16.10 1:15, 16

Jesus Kristu tahan hasoru terus neʼebé boot liu hotu hodi laran-metin ba Jeová. Saida mak ajuda nia hodi bele tahan? Apóstolu Paulo dehan: “Tanba ksolok neʼebé tau ona iha nia oin, nia tahan iha ai-riin terus nian hodi la sente moe, no tuur ona iha Maromak nia kadunan nia sorin loos.” (Ebr 12:2) Tuirmai apóstolu Paulo fó laran-manas ba ema kristaun atu “hanoin didiʼak” kona-ba Jesus nia ezemplu bainhira hetan terus ruma. Iha tempu neʼebá, ema kristaun barak mós hanesan Jesus, sira mate tan deʼit hakarak hatudu laran-metin ba Jeová, ema ida husi sira mak naran Ántipas. (Apok 2:13) Ema kristaun sira-neʼe simu ona “moris-hiʼas neʼebé diʼak liu” fali fiar-naʼin sira iha tempu antigu nian tanba sira moris-hiʼas ona ba lalehan. (Ebr 11:35) Bainhira Maromak nia Ukun harii tiha iha tinan 1914, lakleur ema kristaun kose-mina neʼebé mate ho laran-metin hetan mós moris-hiʼas ba lalehan atu ukun hamutuk ho Jesus.—Apok 20:4. w16.10 3:12

Inan-aman balu la fó laran-manas ba oan tanba bainhira sira rasik sei kiʼik, sira-nia inan-aman mós nunka fó laran-manas ba sira. Ema barak muramura iha serbisu-fatin tanba ema nunka fó laran-manas kona-ba sira-nia serbisu. Ita bele fó laran-manas ba ema liuhusi gaba sira kona-ba buat diʼak neʼebé sira halo. Ita mós bele fó laran-manas ba ema seluk hodi fó-hatene ba sira katak sira iha hahalok furak no fó kmaan ba sira neʼebé sente ladún kontente ka laran-tun. (1 Tes 5:14) Ita sempre hamutuk ho ita-nia irmaun-irmán sira, tan neʼe ita iha oportunidade barak atu fó laran-manas ba sira. (Ecle 4:9, 10) Husu ba Ita-nia an: ‘Haʼu fó-hatene ba ema seluk katak haʼu hafolin no hadomi sira ka lae? Haʼu halo beibeik nuneʼe ka lae?’ Hanoin kona-ba liafuan sira husi eskritura neʼe: “Liafuan neʼebé koʼalia iha tempu loloos mak furak tebetebes!”—Prov 15:23. w16.11 1:3-5

Maromak fó-hatene nanis ona, saida mak sei akontese ba ninia povu, nia dehan: “Haʼu sei tau sira hamutuk ho unidade, hanesan bibi-malae iha luhan laran.” (Miq 2:12) Jeová mós fó-hatene nanis katak ninia povu sei aprende lia-loos husi eskritura sira hodi serbí nia ho unidade. Nia dehan: “Haʼu sei troka povu sira-nia língua ho língua neʼebé moos, atu nuneʼe sira hotu bele bolu Jeová nia naran, atu adora nia ho unidade.” (Sof 3:9) Ita agradese duni tanba bele adora Jeová ho unidade! Bainhira ema kristaun iha apóstolu sira-nia tempu halo tuir matadalan husi Maromak nia Liafuan, neʼe ajuda kongregasaun sira atu moos, iha dame no unidade. (1 Kor 1:10; Éf 4:11-13; 1 Ped 3:8) Hanesan neʼe mós ohin loron, tanba Jeová nia povu iha unidade no organiza an didiʼak mak ita bele haklaken liafuan diʼak iha mundu tomak. w16.11 2:16, 18

Ba tinan atus balu liutiha husi tempu neʼebé Jesus mate, ema barak sei hatene lee Bíblia iha lia-gregu ka lia-latín. Tan neʼe sira bele kompara hanorin husi Bíblia ho doutrina husi igreja. Bainhira ema balu haree katak igreja hanorin doutrina neʼebé falsu, sira lakohi simu hanorin sira-neʼe. Maibé perigu tebes ba sira atu fó sai sira-nia hanoin ba ema seluk, tanba ema bele oho sira iha tempu neʼebá. Nuʼudar tempu liu daudauk, ema ladún koʼalia ona lia-gregu ka lia-latín, no igreja nia ulun-naʼin sira mós bandu ema labele tradús Bíblia hodi ema baibain labele lee. Ema neʼebé la konkorda ho igreja nia doutrina bele simu kastigu. Ema kose-mina neʼebé laran-metin ba Maromak presiza halibur an subasubar, no balu la iha oportunidade atu halo hanesan neʼe. Ema kose-mina sira la bele organiza an ho livre hodi adora Maromak, tanba Babilónia Boot mak kontrola hela sira. w16.11 4:8, 10, 11

Ita labele halo ho neon sala boot neʼebé ema balu iha Korinto halo. Ita labele kontinua halo sala sira-neʼe hodi hanoin katak tanba Maromak nia laran-diʼak neʼebé boot, entaun nia sei fó perdua ba ita. Maibé oinsá kona-ba sala sira neʼebé ema balu hanoin ladún todan? Ita mós hakarak hakaʼas an atu halo tuir Jeová hodi la halo sala sira-neʼe ka lae? (Rom 6:14, 17) Hanoin toʼok kona-ba apóstolu Paulo. Nia dehan: “Haʼu mak isin nian, no faʼan ona hodi sai atan ba sala. Haʼu la hatene saida mak haʼu halo. Basá buat neʼebé haʼu hakarak, haʼu la halo; maibé buat neʼebé haʼu odi, haʼu halo.” (Rom 7:14, 15) Maski Paulo la halo buat sira neʼebé temi iha 1 Korinto 6:9-11, maibé nia rekoñese katak nia sala-naʼin nafatin. Nia hakarak Jeová simu nia, tan neʼe mak nia luta makaʼas hasoru hahalok aat sira. (Rom 7:21-23) Mai ita banati-tuir ninia ezemplu no hakaʼas an atu halo tuir Jeová ho laran. w16.12 1:15, 16

Bainhira ita hasoru daudauk laran-taridu, ita-nia Aman lalehan neʼebé nakonu ho domin hakarak ita fó sai ita-nia sentimentu ba nia. Bainhira ita hakaʼas an ona atu rezolve problema ida, diʼak liu halo orasaun duké hanoin demais kona-ba problema neʼe. (Sal 94:18, 19) Filipe 4:6, 7 hatudu katak, se ita halo orasaun beibeik ho laran ba Jeová, nia sei hatán ba ita-nia orasaun. Oinsá? Nia bele ajuda ita atu sente kalma hodi ita la bele iha hanoin negativu ka sentimentu laran-tun. Maromak Jeová sei ajuda ita atu sente dame iha ita-nia laran neʼebé liu fali ita-nia kbiit. Jeová ajuda ona irmaun-irmán barak no nia mós bele ajuda ita. Loos duni, “Maromak nia dame” bele ajuda ita tahan hasoru susar naran deʼit! Ita bele tau fiar tomak ba Jeová nia liafuan tuirmai neʼe: “Keta laran-taridu tanba haʼu mak imi-nia Maromak. Haʼu sei hametin imi, sin, haʼu sei ajuda imi.”—Isa 41:10. w16.12 3:3, 4

Moisés fila kotuk ba Ejitu nia rikusoin sira no “nia hili atu hetan terus hamutuk ho Maromak nia povu duké hetan ksolok ba tempu uitoan iha sala laran”. (Ebr 11:25, 26) Mai ita banati-tuir sira husi tempu uluk neʼebé laran-metin, hanesan Moisés no uza didiʼak liberdade neʼebé Maromak fó hodi halo tuir ninia hakarak sira. Karik ita sente diʼak liu atu husik ema seluk mak halo desizaun ba ita, maibé se ita halo nuneʼe, ita sei nunka hatene liberdade bele lori bensaun boot saida. Bensaun neʼe hakerek iha Deuteronômio 30:19, 20. Versíkulu 19 esplika kona-ba saida mak Maromak hakarak ema Izraél atu hili. Versíkulu 20 hatete katak Jeová fó oportunidade furak ida ba sira atu hatudu sira-nia domin ba nia. Ita mós bele hili atu adora Jeová. Ita mós iha oportunidade furak atu uza ita-nia liberdade atu fó glória ba Jeová no hatudu ita-nia domin ba nia. w17.01 2:10, 11

Jeová hakarak ita uza ho didiʼak kbiit sira neʼebé nia fó mai ita. Tanbasá? Tanba nia hadomi ita no nia hatene katak se ita uza kbiit sira-neʼe, sei lori ksolok ba ita-nia moris. Maski Jeová hakarak ita uza ita-nia kbiit, maibé nia mós hatene katak ita iha limitadu. Porezemplu, ita la bele halakon sala no mate, ka ita la bele kontrola ema seluk nia moris tanba ema ida-idak iha sira rasik nia liberdade. (1 Reis 8:46) No maski ita iha matenek ka hetan esperiénsia barak, maibé se kompara ho Jeová nia matenek no esperiénsia, ita mak hanesan labarik deʼit. (Isa 55:9) Ita tenkesér sadere ba Jeová atu dirije ita iha tempu hotu no tau fiar katak nia sei apoia ita no ajuda ita halo buat neʼebé ita rasik laiha kbiit atu halo. Maibé, Jeová hakarak nafatin ita atu hanoin kona-ba saida mak ita bele halo atu rezolve problema ruma no fó ajuda ba ema seluk. Ita presiza “tau fiar ba Jeová no halo buat neʼebé diʼak”, no “hatudu hahalok laran-metin”. w17.01 1:2-4

Maski neʼe mak priviléjiu boot ida, maibé Barzilai hatete katak diʼak liu fatin neʼe fó fali ba Kimham, karik neʼe mak ninia oan. (2 Sam 19:31-37) Tanbasá mak Barzilai halo desizaun hanesan neʼe? Neʼe tanba nia lakohi simu responsabilidade ka tanba nia hakarak moris hakmatek deʼit ka lae? Lae. Tanba nia mak ema neʼebé haraik an. Nia rekoñese katak ninia situasaun la hanesan ho uluk no ninia kbiit limitadu ona. (Gal 6:4, 5) Ita mós tenkesér haraik an hanesan Barzilai. Duké hanoin liu kona-ba ita rasik nia diʼak ka kompara ita-nia an ho ema seluk, diʼak liu hakaʼas an atu serbí Jeová tuir ita-nia kbiit. Halo hanesan neʼe importante liu fali simu knaar espesiál ka sai naran boot. (Gal 5:26) Se ita mak haraik an, ita hakarak serbisu hamutuk ho irmaun-irmán sira atu fó glória ba Jeová no ajuda ema seluk.—1 Kor 10:31. w17.01 4:5, 6

Jeová mak Kriadór neʼebé iha kbiit no forsa boot tebes. Buat hotu neʼebé nia kria mak diʼak tebes. (Jer 10:12) Jeová halo ukun-fuan oioin ba ninia kriasaun ida-idak. Nia halo ukun-fuan natureza nian, no nia mós halo ukun-fuan morál nian hodi buat hotu iha lalehan no rai bele laʼo ho diʼak. (Sal 19:7-9) Buat hotu iha lalehan no rai iha sira-nia fatin no knaar ida-idak. Porezemplu, gravitasaun ajuda atu halo atmosfera besik nafatin ho mundu, no ajuda atu kontrola mós tasi no laloran sira. Se la iha gravitasaun, buat hotu la bele moris iha mundu. Kriasaun hotu, inklui mós ema, bele moris no book an iha mundu tanba Jeová halo ukun-fuan natureza sira-neʼe. Buat sira-neʼe hatudu katak Jeová iha hakarak ida mak nia kria ema no rai. Entaun, bainhira haklaken ba ema, ita bele ajuda sira atu hatene Kriadór ba lalehan no rai neʼe.—Apok 4:11. w17.02 1:4, 5

Bíblia dehan katak anju neʼebé serbí nuʼudar “ulun-naʼin ba Jeová nia tropa” mak ajuda Josué manán funu hasoru ema Kanaán sira. (Jos 5:13-15; 6:2, 21) No iha tempu neʼebé Liurai Ezekias dirije Maromak nia povu, ema Asíria nia tropa lubun boot ida mai atu harahun Jeruzalein. Iha kalan ida deʼit “Jeová nia anju sai bá hodi oho ema naʼin–185.000”. (2 Reis 19:35) Anju sira perfeitu, maibé ema neʼebé sira ajuda, lae. Porezemplu, dala ida Moisés halo buat neʼebé la fó glória ba Jeová. (Núm 20:12) Bainhira ema Gibeon hakarak halo aliansa ho Josué, Josué simu deʼit antes nia buka matadalan husi Jeová. (Jos 9:14, 15) No ba tempu uitoan, Ezekias mós sai foti-an. (2 Crôn 32:25, 26) Maski ema sira-neʼe la perfeitu, maibé Jeová hakarak ema Izraél atu rona ba sira nuʼudar ulun. Ema Izraél sira hatene katak Jeová mak uza ninia anju hodi fó ajuda ba ema sira-neʼe. Loos duni, Jeová mak dirije ninia povu. w17.02 3:7-9

Iha dalan saida mak ita hatudu respeitu ba ema? Ita respeitu ema hodi hamtaʼuk sira no hanoin diʼak kona-ba sira. Ita hatudu respeitu neʼebé kleʼan ba ema neʼebé iha knaar ka pozisaun importante, ka sira neʼebé hatudu hahalok ruma neʼebé merese atu simu respeitu kleʼan. Entaun, sé mak merese atu simu respeitu no hahiʼi, no tanbasá? Apokalipse 5:13 hatete katak “Ida neʼebé tuur iha kadunan” no “Bibi-Oan” mak merese atu simu hahiʼi. “Ida neʼebé tuur iha kadunan” refere ba Jeová. Iha Apokalipse kapítulu 4 fó-hatene razaun ida tanbasá mak Jeová, “Ida neʼebé moris ba nafatin”, merese atu simu hahiʼi. Kriatura sira iha lalehan dehan: “Jeová, ami-nia Maromak, Ita-Boot merese simu glória, hahiʼi no kbiit, tanba Ita kria ona buat hotu, no tanba Ita-nia hakarak mak buat hotu iha no kria tiha.”—Apok 4:9-11. w17.03 1:1, 2

Ohin loron, ema barak halo desizaun tuir deʼit sira-nia laran, no neʼe perigu tebes. Ita hotu la perfeitu, tan neʼe Bíblia fó avizu ba ita atu la halo desizaun tuir ita-nia laran ka sentimentu. Tanba Bíblia dehan katak “laran mak makerek liu fali buat hotu-hotu no perigu liu”. (Jer 17:9) Husi Bíblia, ita bele haree ezemplu barak kona-ba ema sira neʼebé halo desizaun tuir sira-nia laran no ikusmai lori rezultadu neʼebé ladiʼak ba sira. (Jer 3:17; 13:10; 1 Reis 11:9) Entaun, saida mak bele akontese se ita halo desizaun tuir deʼit ita-nia laran no husik ita-nia sentimentu kontrola ita-nia hanoin no hahalok sira? Porezemplu, saida mak bele akontese se ema ida halo desizaun bainhira nia nervozu hela? (Prov 14:17; 29:22) Oinsá ho ema neʼebé laran-tun, nia bele halo desizaun ho hanoin neʼebé loos ka lae? (Núm 32:6-12; Prov 24:10) Tan neʼe, bainhira atu halo desizaun importante ruma, keta husik ita-nia sentimentu kontrola ita-nia desizaun sira. w17.03 2:12, 13

Ita hotu la perfeitu no halo sala. Maibé ita agradese tebes ba Jeová tanba nia uza Jesus nia sakrifísiu atu fó perdua ba ita-nia sala. Tan neʼe, se ita mak haraik an no arrepende an, ita bele husu perdua husi nia. Ita bele fiar katak Jeová sei la haree ita “tuir ita-nia sala”. (Sal 103:10) Maski nuneʼe, ita tenke “serbí nia ho laran tomak”. (1 Crôn 28:9) Ema neʼebé serbí Jeová “ho laran tomak” hadomi tebes nia no hakarak adora nia ba nafatin. Bainhira Bíblia temi kona-ba ema nia “laran”, baibain neʼe koʼalia kona-ba nia mak ema oinsá loos, inklui ninia hakarak, hanoin, hahalok, matenek, no planu hotu. Maski ita ema la perfeitu, ita bele adora Jeová ho laran tomak. Ita serbí nia tanba neʼe mak ita-nia hakarak, laʼós tan deʼit responsabilidade ka tanba neʼe mak ita-nia toman deʼit.—2 Crôn 19:9. w17.03 3:1, 3

Se ema gaba ita kona-ba knaar importante neʼebé ita kumpre, ita sei halo saida? Buat neʼebé ita halo iha tempu neʼebá bele hatudu sai ita-nia laran. Porezemplu, karik irmaun ida hakaʼas an hodi prepara ninia diskursu no ema barak gaba ninia diskursu neʼe. Irmaun neʼe sei halo saida? Ita tenkesér hanoin-hetan Jesus nia liafuan neʼe: “Kuandu imi halo tiha ona imi-nia knaar hotu, dehan nuneʼe bá: ‘Ami atan folin-laek. Serbisu neʼebé ami halo mak ami-nia knaar deʼit.’” (Lc 17:10) Hanoin-hetan katak bainhira Ezekias sai foti-an, nia haluha kedas oinsá Jeová fó ajuda ba nia. (2  Crôn 32:24-27, 31) Tan neʼe, se ema ruma gaba ita kona-ba diskursu neʼebé ita hatoʼo, saida mak bele ajuda ita atu bele haraik-an nafatin? Ita tenke hanoin nafatin saida mak Jeová halo ona hodi ajuda ita. Diʼak atu koʼalia kona-ba Jeová no oinsá mak nia ajuda ninia povu. w17.03 4:12-14