Dezembru

Apóstolu Pedro hakerek karta hodi fó anima ba maluk fiar naʼin sira neʼebé hasoru susar no terus husi Satanás. Ezemplu husi “sira neʼebé tahan terus” bele duni ajuda ita atu hamriik metin no sira-nia ezemplu hatudu mai ita katak ita mós bele manán no ita-nia laran-metin laʼós saugati deʼit. (Tgo 5:11) Ema fó daudaun terus ka kontra makaʼas ita ka lae? Ka ita mak katuas kongregasaun ka katuas área nian neʼebé sente katak ita leba hela responsabilidade neʼebé todan tebes ba ita? Se ita-nia situasaun mak hanesan neʼe, diʼak atu hanoin kona-ba apóstolu Paulo nia ezemplu. Ema fó terus makaʼas tebes ba nia, no nia mós sempre hanoin kona-ba kongregasaun sira. (2 Kor 11:23-29) Maski nuneʼe, apóstolu Paulo nunka rende an, no ninia ezemplu neʼe fó duni laran-manas ba ema seluk. (2 Kor 1:6) Tan neʼe mak diʼak atu hanoin-hetan katak bainhira ita tahan hasoru susar no terus ruma, ita-nia ezemplu mós bele fó laran-manas ba ema seluk. w16.04 2:11, 14

Jesus fó-hatene nanis katak iha loron ikus sira, liafuan diʼak kona-ba Maromak nia Ukun sei habelar ba mundu tomak. (Mt 24:14) Ema rekoñese katak Testemuña ba Jeová mak halaʼo daudauk serbisu neʼe iha mundu tomak. Balu gosta mensajen neʼebé ita hatoʼo ba sira, balu lae. Maski sira neʼebé la gosta ita-nia mensajen, maibé sira respeitu ita kona-ba serbisu neʼebé ita halo daudaun. Relijiaun barak hatete katak sira haklaken daudauk Jesus nia mensajen. Maibé sira-nia haklaken mak liuhusi misa deʼit, televizaun, internét, ka karik sira hatete deʼit ba ema oinsá mak sira aprende kona-ba Jesus. Ema balu sente katak halo serbisu atu ajuda ema seluk mós hanesan haklaken ba ema, serbisu hanesan sai doutór, enfermeiru, ka mestre. Maibé, bainhira Jesus temi haklaken, nia koʼalia kona-ba serbisu sira-neʼe ka lae? w16.05 2:1, 2

Komesa husi tinan 1914, ema nia governu sai ona hanesan inimigu ba Maromak nia Ukun, no lakleur tan Maromak nia Ukun sei halakon hotu ema nia governu sira. (Sal 2:2, 9) Maromak husik ema nia governu atu ukun tanba sira bele kontrola situasaun hodi iha dame no hakmatek. Ida-neʼe ajuda tebes ita atu haklaken Maromak nia mensajen. (Rom 13:3, 4) Maromak mós hakarak ita atu halo orasaun kona-ba sira hodi desizaun neʼebé sira halo bele apoia ita adora Jeová ho hakmatek. (1 Tim 2:1, 2) Apóstolu Paulo hatete katak se ema ruma trata ita la ho justisa, ita mós bele husu governu sira-nia ajuda. Maski Bíblia dehan katak Satanás mak kontrola governu hotu iha mundu neʼe, maibé Bíblia la dehan katak nia mak kontrola ema ida-idak iha governu sira-neʼe. (Lc 4:5, 6) Tan neʼe ita la bele koʼalia katak ema husi governu neʼe Diabu mak kontrola. Bíblia anima ita katak bainhira hasoru ema husi “governu no ukun-naʼin sira” ita la bele “koʼalia aat kona-ba ema ida”.—Tito 3:1, 2. w16.04 4:5, 6

Maibé oinsá mak ita bele hatene saida mak Jeová gosta se la iha ukun-fuan kona-ba situasaun ruma? Loos duni, maski la iha ukun-fuan, ita presiza buka-hatene nafatin ka komprende saida mak Jeová hakarak ita atu halo iha situasaun neʼe. Oinsá mak ita bele halo nuneʼe? Ita presiza halo orasaun ba nia no halo tuir matadalan neʼebé nia fó liuhusi espíritu santu. Mai ita haree toʼok ezemplu ruma husi Jesus, oinsá mak nia hatene saida mak ninia Aman hakarak nia atu halo. Bainhira nia atu halo milagre hodi fó-han ba ema-lubun, nia halo orasaun uluk, no neʼe akontese dala rua iha Bíblia. (Mt 14:17-20; 15:34-37) Maibé iha tempu neʼebé Diabu tenta nia iha rai-fuik maran atu halo fatuk sai fali paun, Jesus la halo tuir Diabu. (Mt 4:2-4) Jesus komprende ninia Aman nia hanoin. Nia hatene katak ninia Aman lakohi nia atu uza espíritu santu hodi halo buat ruma ba nia rasik nia hakarak. Nia iha fiar tomak ba ninia Aman katak ninia Aman sei hatudu dalan ba nia no fó hahán ba nia. w16.05 3:7, 8

Eskritura balu hakerek duni ba ema ka grupu espesífiku ruma. Tan neʼe antes ita atu lee Bíblia, halo orasaun ba Jeová atu loke ita-nia neon hodi ita bele komprende kona-ba informasaun neʼebé nia hakarak ita atu aprende. (Esd 7:10; Tgo 1:5) Bainhira ita lee Bíblia, husu ba ita-nia an pergunta sira tuirmai neʼe: ‘Haʼu aprende saida kona-ba Jeová? Oinsá mak haʼu bele uza informasaun neʼe iha haʼu-nia moris? Oinsá mak haʼu bele uza informasaun neʼe atu ajuda ema seluk?’ Se ita mak hanoin kona-ba pergunta sira-neʼe iha tempu ita lee Bíblia, neʼe sei ajuda ita aprende buat barak liután husi Bíblia. Porezemplu, Bíblia koʼalia kona-ba kritériu atu sai katuas iha kongregasaun. (1 Tim 3:2-7) Se ita laʼós katuas ba kongregasaun, karik ita bele hanoin katak lee informasaun sira-neʼe laiha folin ba ita rasik nia moris. Maibé se ita uza pergunta tolu iha leten bainhira lee eskritura sira-neʼe, ita bele haree katak informasaun sira-neʼe iha folin boot tebes ba ita. w16.05 5:7, 8

Bainhira ema Babilónia kaer ema judeu ba toʼo sira-nia rai, ema judeu sira bele haree iha sidade neʼe nakonu ho estátua oioin no ema mós adora anju aat sira. Maibé, ema judeu sira neʼebé iha laran-metin hanesan Daniel ho ninia belun naʼin-tolu, sira la husik ema Babilónia atu troka sira-nia moris. (Dan 1:6, 8, 12; 3:16-18) Daniel ho ninia belun naʼin-tolu simu deʼit Jeová nuʼudar sira-nia Badain Sanan-Rai nian no deside atu kontinua adora deʼit Jeová. Kuaze iha Daniel nia moris tomak, ema Babilónia neʼebé ho hahalok ladiʼak sira-neʼe mak haleʼu nia, maibé Maromak nia anju hatete katak Daniel mak “ema neʼebé iha folin-boot tebes”. (Dan 10:11, 19) Iha tempu antigu, badain sanan-rai bele halo rai-mean atu sai buat naran deʼit tuir ninia hakarak. Ohin loron, ema neʼebé adora Jeová rekoñese katak nia mak Ukun-Naʼin neʼebé boot liu hotu no nia mak iha kbiit atu troka ema no nasaun sira. (Jer 18:6) Maromak mós iha direitu atu troka ita ida-idak, maibé nia nunka obriga ita. Nia hakarak ita atu halo tuir nia ho laran. w16.06 2:1, 2

Satanás nia hakarak mak atu lohi ita hodi fiar katak, atu moris kontente, ita tenkesér iha sasán barak. Tan neʼe nia uza ninia mundu atu dada ita-nia atensaun no nia uza materializmu hodi hamosu ita-nia “hakarak aat matan nian”. (1 João 2:15-17; Gên 3:6; Prov 27:20) Mundu neʼe sempre promove sasán foun no tenta makaʼas ita atu hola sasán sira-neʼe. Dala ruma, neʼe akontese ona ba ita ka lae, ita hola sasán ida tan deʼit sasán neʼe haree jeitu ka tanba ita haree sasán neʼe husi iklan deʼit? Maibé ikusmai ita hola tiha mak ita foin hatene katak ita la presiza sasán neʼe. Se ita mak hola beibeik sasán neʼebé ita la presiza, neʼe bele halo komplikadu ita-nia moris. Ita bele preokupa ho sasán sira-neʼe toʼo la iha tan tempu atu halaʼo atividade espirituál nian, hanesan estuda Bíblia, prepara ka tuir reuniaun, no haklaken. Diʼak atu hanoin-hetan apóstolu João nia liafuan neʼe: “Mundu neʼe no ninia hakarak liu daudaun.” w16.07 1:3, 4

Kongregasaun iha apóstolu sira-nia tempu iha ema judeu, gregu, Roma, no husi rai seluk tan. Sira iha moris, kultura, no hakarak neʼebé la hanesan. Tan neʼe, susar ba sira atu soe hahalok uluk nian hodi simu fali dalan adorasaun neʼebé foun. Neʼe duni, apóstolu Paulo presiza fó-hanoin ba sira katak ema kristaun iha Maromak ida deʼit, neʼe mak Jeová. Oinsá ho kongregasaun ohin loron? Profeta Isaías fó-hatene nanis katak “iha loron ikus sira” ema husi nasaun oioin sei halibur hamutuk atu adora Jeová. Sira sei hatete: “[Jeová] sei hanorin ita kona-ba ninia dalan sira, no ita sei laʼo iha ninia dalan sira.” (Isa 2:2, 3) Ita kontente tebes hodi haree katak profesia neʼe akontese daudaun iha ita-nia tempu! Iha kongregasaun sira, ita iha irmaun-irmán neʼebé mai husi rai oioin, koʼalia língua oioin, no iha kultura neʼebé la hanesan. Maski nuneʼe, ita hotu adora Maromak Jeová ho laran ida deʼit. w16.06 3:15, 16

Ita bele fiar katak Jeová prepara ona buat furak barak ba ema kose-mina sira iha lalehan bainhira sira tuur atu ukun hamutuk iha Kristu nia kadunan iha futuru. (Lc 22:28-30; Flp 3:20, 21; 1 João 3:2) Sira sei forma “Jeruzalein foun”, neʼebé mós bolu nuʼudar Kristu nia noiva. (Apok 3:12; 17:14; 21:2, 9, 10) Sira mós sei hamutuk ho Jesus atu “kura nasaun sira”, no ajuda ema sira-neʼe atu livre husi sala no mate hodi lori ema sira-neʼe sai perfeitu fali. (Apok 22:1, 2, 17) Laran-diʼak boot tebes neʼebé Jeová sei hatudu iha tempu neʼebá mak fó moris-hiʼas ba ema sira “iha rate” laran. (Jó 14:13-15; João 5:28, 29) Sesé deʼit mak sei hetan moris-hiʼas? Neʼe mak ema laran-metin sira neʼebé mate antes Jesus mate, no mós ema husi “bibi seluk” neʼebé mate ho laran-metin iha loron ikus sira-neʼe. Ema hotu sira-neʼe sei moris fali atu serbí Jeová ba nafatin.—João 10:16. w16.07 4:13-15

Saida mak bele ajuda ita atu matan-moris nafatin hodi prepara an ba Jeová nia loron? Ita presiza iha hakarak forte atu halo buat neʼebé loos. Maibé neʼe deʼit seidauk toʼo. Loron hirak antes Jesus mate, nia fó-hatene ba ninia dixípulu sira atu halo orasaun beibeik hodi husu Jeová nia ajuda. (Lc 21:36) Tan neʼe, atu bele matan-moris nafatin iha loron ikus sira-neʼe, ita mós tenke halo orasaun beibeik. (1 Ped 4:7) Jesus hatete katak mundu nia rohan sei toʼo mai “iha oras neʼebé [ita] la hanoin nia atu mai”. (Mt 24:44) Tan neʼe ita tenkesér prontu iha tempu hotu. Agora laʼós tempu atu husik Satanás nia mundu lohi ita katak moris tuir mundu nia hahalok bele lori haksolok. Neʼe laʼós realidade maibé mehi deʼit. Liuhusi Bíblia, Jeová no Jesus fó-hatene ona ba ita kona-ba saida mak sei akontese iha futuru no oinsá mak ita bele matan-moris nafatin ohin loron. Tan neʼe ita tenke fó atensaun ba Bíblia nia profesia, no oinsá mak profesia sira sai loos daudauk. Ita mós tenkesér hakbesik liután ba Jeová no tau uluk ninia Ukun iha ita-nia moris. Se ita halo nuneʼe, bainhira mundu nia rohan toʼo mai, ita prontu ona. (Apok 22:20) Ita-nia moris depende duni ba ita-nia matan-moris! w16.07 2:15-17

Se feen-laʼen mak “kontinua hatudu pasiénsia ba malu no fó perdua ba malu ho laran tomak”, neʼe bele ajuda sira atu hametin moris kaben nian. Tanba feen-laʼen la perfeitu, sira sei halo sala. Maibé neʼe mak oportunidade neʼebé diʼak hodi aprende atu la repete fali sala neʼebé sira halo, atu fó perdua ba malu no atu hatudu domin agape ba malu “iha dalan neʼebé kompletu”. (Kol 3:14) Eskritura mós dehan katak, “domin mak pasiénsia no laran-diʼak. . . . Domin la hanoin fali buat aat neʼebé nia simu”. (1 Kor 13:4, 5) Se feen-laʼen mak komprende malu sala, la diʼak atu husik deʼit toʼo aban, sira tenkesér hakaʼas an kedas atu rezolve problema neʼe. (Éf 4:26, 27) Atu koʼalia “Deskulpa, haʼu hakanek Ita”, neʼe presiza haraik-an no aten-brani, maibé halo hanesan neʼe bele ajuda atu rezolve problema no hakbesik feen-laʼen ba malu. w16.08 2:6

Jesus nia knaar importante liu mak atu haklaken kona-ba Maromak nia Ukun. Maibé nia mós gasta tempu hodi fó treinu ba ninia dixípulu oinsá atu hanorin no tau matan ba Maromak nia povu. (Mt 10:5-7) Maski Filipe haklaken ho badinas, maibé nia mós gasta tempu hodi fó treinu ba ninia oan-feto naʼin-haat kona-ba oinsá atu haklaken. (Após 21:8, 9) Ohin loron ita mós presiza fó treinu ba ema seluk. Tanbasá? Iha mundu tomak, ema neʼebé foin simu lia-loos aumenta liután. Ema sira-neʼe seidauk hetan batizmu no presiza duni atu hetan treinu. Ita tenkesér ajuda sira atu komprende tansá mak diʼak atu lee no estuda Bíblia mesak. Ita presiza fó treinu ba sira oinsá atu haklaken no hanorin lia-loos ba ema seluk. Irmaun sira neʼebé foin hetan batizmu presiza duni hetan treinu hodi sira bele kumpre kritériu atu serbí nuʼudar atan ba kongregasaun no katuas iha futuru. Ita hotu bele ajuda ema foun sira-neʼe atu laʼo ba oin iha lia-loos liuhusi “hanorin neʼebé diʼak”. w16.08 4:1, 2

Serbisu hamutuk ho ita-nia irmaun-irmán sira bele hametin unidade. Serbisu hamutuk mós bele hametin ita-nia relasaun no haburas ita-nia fiar kona-ba bensaun sira neʼebé ita sei simu liuhusi Jeová nia Ukun iha futuru. Bainhira ita hametin ema seluk, ita ajuda sira atu bele tahan hasoru situasaun susar iha sira-nia moris no atu iha fiar neʼebé metin kona-ba esperansa sira iha futuru. (Isa 35:4) Ajuda ema seluk mós bele hametin ita rasik no ajuda ita atu hanoin nafatin kona-ba ita-nia futuru. Haree ona oinsá Jeová ajuda no proteje ninia atan sira iha tempu uluk, ajuda duni ita haburas ita-nia fiar no sadere ba Jeová. Tan neʼe mak bainhira ita hasoru susar no problema ruma, ‘keta husik tun ita-nia liman’! (Sof 3:16) Maibé lolo liman ba Jeová liuhusi orasaun, no husik ninia liman neʼebé forte atu hametin ita no lori ita ba bensaun husi ninia Ukun iha futuru.—Sal 73:23, 24. w16.09 1:16-18

Bainhira ita atu hili saida mak atu hatais, ita hatene katak buat hotu iha ninia tempu. Dala ruma, roupa neʼebé ita hili sei troka depende ba klima no situasaun iha ita-nia rai. Maibé ita hatene katak Maromak nia hanoin kona-ba dalan neʼebé ita hatais nunka troka. (Mal 3:6) Liuliu iha tempu manas, la fasil atu hili roupa neʼebé loos no respeitu. Maibé ita-nia irmaun-irmán sira hafolin ita-nia hakaʼas-an atu la uza roupa neʼebé aperta demais ka longar liu toʼo hatudu isin. (Jó 31:1) Roupa neʼebé ita uza bainhira hariis tasi ka pixina mós tenkesér hatudu respeitu. (Prov 11:2, 20) Maski ema barak iha mundu neʼe uza roupa neʼebé hatudu isin bainhira halimar iha tasi, maibé tanba ita adora Jeová, ita tenke fó atensaun ba ita-nia hatais atu bele fó glória ba Jeová, Maromak santu nia naran. w16.09 3:11, 12

Jesus husu beibeik ninia dixípulu sira kona-ba sira fiar saida. Banati-tuir ninia ezemplu neʼe. Bainhira ita koʼalia halimar ka halo hela buat ruma hamutuk ho oan, husu kona-ba sira-nia hanoin no husik sira konta kona-ba sira-nia sentimentu. Se ita-nia oan mak seidauk iha fiar kona-ba buat neʼebé Bíblia hanorin, labele hirus, pasiénsia ho sira. Ajuda sira atu hanoin. Se ita-nia oan mak husu pergunta ruma ba ita, neʼe hatudu katak sira hakarak hatene, tanba bainhira Jesus foin tinan 12 nia mós husu pergunta barak. (Lc 2:46) Buka-hatene oan sira-nia hanoin no sentimentu. Keta hanoin katak, tanba sira bá haklaken no tuir reuniaun sira, entaun sira iha ona fiar. Buka-hatene toʼok sira sente oinsá kona-ba Jeová, no sira fiar Bíblia ka lae. Hakaʼas an hodi buka-hatene saida mak halo susar ba sira atu hatudu laran-metin ba Jeová. Halo orasaun hamutuk ho sira ka halo orasaun kona-ba sira bainhira ita mesamesak. Koʼalia beibeik kona-ba Jeová bainhira ita hamutuk ho sira. w16.09 5:3-5

Ohin loron, Testemuña ba Jeová rihun ba rihun hola parte hodi kumpre daudauk Bíblia nia profesia ida kona-ba haklaken “ba nasaun hotu, suku hotu, lian hotu no povu hotu”. (Apok 14:6) Ita aprende daudauk língua foun ka lae? Ema balu serbí nuʼudar misionáriu ka muda atu serbí iha rai neʼebé presiza liután haklaken-naʼin. Balun tuir reuniaun neʼebé koʼalia língua seluk iha sira-nia rai rasik. Maromak nia povu hotu tenkesér tau uluk sira rasik nia relasaun diʼak ho Jeová no família nian. Dala ruma tanba ita iha buat barak atu halo, neʼe halo susar ba ita atu halaʼo estuda mesak ho didiʼak. Maibé sira neʼebé serbí iha kongregasaun neʼebé koʼalia língua seluk, sira mós hasoru susar seluk tan. Sira neʼebé hakarak serbí iha kongregasaun neʼebé koʼalia língua seluk laʼós deʼit presiza atu aprende língua foun, maibé sira mós presiza kontinua estuda buat neʼebé kleʼan husi Maromak nia Liafuan.—1 Kor 2:10. w16.10 2:1-3

Ohin loron, iha irmaun-irmán barak neʼebé nafatin serbí Jeová ho haksolok maski ema fó terus ba sira. Iha rai-Eritreia, Singapura, no Koreia Súl, ita iha irmaun-irmán atus ba atus neʼebé ema hatama ba komarka tanba sira lakohi hola parte iha funu hodi halo tuir Jesus nia liafuan. Maski Jeová nia povu barak nunka hetan terus makaʼas, maibé sira barak mak moris iha kiak laran, hasoru ona dezastre naturais, ka krize polítiku nian. Seluk tan moris tuir Abraão, Isaac, Jacob, no Moisés nia ezemplu hodi la buka naran boot ka buka rikusoin atu bele serbí Jeová ho laran. Saida mak ajuda irmaun-irmán sira hodi serbí Jeová ho haksolok? Sira-nia domin ba Jeová no fiar-metin ba ninia promesa sira. Sira fiar katak Jeová sei fó kolen ba ninia atan hotu atu iha moris rohan-laek iha mundu foun neʼebé nakonu ho justisa.—Sal 37:5, 7, 9, 29. w16.10 3:15, 16

Bainhira profeta Jeremias sai taʼuk no laran-tun, Jeová fó anima hodi hametin fali nia. (Jer 1:6-10) Jeová mós haruka anju ida atu hametin profeta Daniel neʼebé idade liu ona. Anju neʼe bolu nia “mane neʼebé folin-boot tebes”! (Dan 10:8, 11, 18, 19) Ita mós bele banati-tuir Jeová nia ezemplu hodi fó laran-manas ba irmaun-irmán sira, inklui pioneiru no sira neʼebé idade ona ka lae? Maski Jeová no Jesus hamutuk iha lalehan ba tinan barak tebes, maibé bainhira Jesus tun mai rai, Jeová hatene katak nia presiza atu fó nafatin laran-manas ba ninia Oan-Mane doben neʼe. Jeová koʼalia husi lalehan dala rua ba Jesus iha tempu neʼebé la hanesan hodi dehan: “Neʼe mak haʼu-nia Oan-Mane neʼebé haʼu hadomi, ida neʼebé halo haʼu-nia laran kontente.” (Mt 3:17; 17:5) Ita bele fiar katak Jesus sente kmaan tebes hodi rona ninia Aman hatete ba nia katak Nia hadomi nia no sente orgullu tebes ba nia. Ikusmai, iha kalan antes Jesus mate, nia sente laran-susar tebes, no Jeová haruka anju ida mak tun ba atu hametin no fó laran-manas ba Jesus.—Lc 22:43. w16.11 1:7, 8

La fasil atu kontrola ita-nia sentimentu. Se ema ida hakanek ita-nia laran ka trata ita iha dalan neʼebé la diʼak tanba ita-nia kultura, rasa, ka tanba ita-nia oin ka isin, ita bele sente laran-tun ka hirus, liuliu se ema neʼe mak irmaun ka irmán ida. Tan neʼe mak diʼak atu halo tuir Bíblia nia matadalan hodi kontrola ita-nia sentimentu hodi la sai hirus lalais. (Prov 16:32) Bíblia hakarak ita atu fó perdua ba ema. Jesus hatete katak, se ita mak la fó perdua ba ema, Jeová mós sei la fó perdua ba ita. (Mt 6:14, 15) Oinsá ho Ita? Ita presiza hakaʼas an liután atu hatudu pasiénsia no fó perdua ba ema ho laran ka lae? Se ita la kontrola ita-nia emosaun, karik neʼe bele halo ita rai hirus no ikusmai halo ita odi ema neʼe, ka bele mós book ema balu iha kongregasaun atu halo tuir ita.—Lev 19:17, 18. w16.11 3:4-6

Toʼo tiha tinan 1870, tanba hakarak atu hatene lia-loos husi Bíblia, Charles Taze Russell ho ema balu hahú estuda kleʼan kona-ba Bíblia. Foufoun irmaun Russell hakarak buka-hatene relijiaun ida neʼebé mak hanorin lia-loos. Nia uza Bíblia hodi halo komparasaun ba hanorin husi relijiaun kristaun oioin, no mós husi relijiaun neʼebé laʼós kristaun. Nia haree katak la iha relijiaun ida husi sira mak halo tuir ho loloos hanorin sira husi Bíblia. Iha tempu ida, irmaun Russell hasoru ulun-naʼin husi igreja balu iha ninia área. Nia hanoin katak sira hakarak simu lia-loos neʼebé nia no ninia grupu hetan husi Bíblia hodi hanorin fali ba igreja sira. Maibé la iha ulun-naʼin ida husi igreja sira mak interese kona-ba neʼe. Ikusmai Estudante Bíblia sira rekoñese katak sira la bele adora Maromak hamutuk ho ema husi relijiaun falsu sira. w16.11 4:14

Ita-nia agradese ba Maromak nia laran-diʼak neʼebé boot book ita atu hasees an husi sala boot sira hanesan sala-foʼer, lanu no sala sira seluk neʼebé ema Korinto halo. (1 Kor 6:9-11) Ita hakaʼas an atu la halo buat naran deʼit neʼebé Jeová la gosta. Porezemplu, ita laʼós deʼit atu hasees an husi sala-foʼer maibé ita mós sei la halo atividade halimar nian neʼebé la morál. Ita sei la hemu-lanu, maibé ita mós sei la hemu barak toʼo besik atu sai lanu. Presiza duni hakaʼas an atu luta hasoru buat aat sira-neʼe, maibé ita bele manán duni. Ita-nia hakarak mak atu hasees an husi sala hotu, boot no kiʼik. Maski ita hotu sala-naʼin, ita hakaʼas an atu halo hanesan apóstolu Paulo. Nia hatete: “Keta husik sala ukun nafatin imi nuʼudar liurai iha imi-nia isin neʼebé sei mate, hodi halo tuir isin nia hakarak sira.”—Rom 6:12; 7:18-20. w16.12 1:16, 19-21

Jesus promete katak ita-nia Aman iha lalehan sei fó espíritu santu ba ita se ita husu ba Nia. (Lc 11:10-13) Oinsá mak espíritu santu bele ajuda ita? Espíritu santu mak Maromak nia forsa, no forsa neʼe bele ajuda ita atu haburas hahalok diʼak hanesan Maromak nian. (Kol 3:10) Hahalok sira-neʼe sei hametin liután ita-nia relasaun ho ema seluk, no mós ajuda ita atu hasees an husi situasaun neʼebé bele halo ita laran-taridu. Ita presiza haraik-an atu bele tau fiar ba “Maromak kbiit-naʼin” no atu ‘entrega ita-nia laran-susar hotu ba nia’. (1 Ped 5:6, 7) Se ita mak haraik-an, Jeová sei apoia no tau matan ba ita. Bainhira ita rekoñese katak ita-nia kbiit iha limitadu, ita sei la sadere ba ita-nia an. Ita sei aprende atu sadere ba Maromak no neʼe bele hamenus ita-nia laran-taridu.—Miq 6:8. w16.12 3:7, 12

Noé haklaken ho laran-metin kona-ba Jeová nia avizu. Ita bele fiar katak serbisu neʼe ajuda nia atu iha fiar neʼebé metin. Noé mós halo buat seluk tan, neʼe mak halo tuir Jeová nia matadalan hodi harii ró boot ida. (Ebr 11:7) Ita hakarak hanesan Noé atu halo nafatin “Naʼi nia serbisu” ho badinas. (1 Kor 15:58) Porezemplu, karik ita bele ajuda iha serbisu konstrusaun, tau matan didiʼak ba fatin adorasaun sira, halo serbisu voluntáriu atu ajuda iha reuniaun boot, ka ajuda serbisu iha sukursál ka iha eskritóriu tradusaun. Maibé importante liu mak atu badinas nafatin haklaken hodi hametin ita-nia esperansa kona-ba futuru. Loos duni, bainhira ita koʼalia ba ema, neʼe hametin liután ita-nia esperansa. Esperansa neʼe mak ajuda ita atu halai toʼo rohan.—1 Kor 9:24. w17.01 1:8, 9

Ita tenkesér respeitu ema seluk nia liberdade atu halo sira rasik nia desizaun. Tanbasá? Tanba ema ida-idak iha direitu atu hili no ema ida-idak sempre halo desizaun neʼebé la hanesan. Neʼe mós inklui desizaun kona-ba hahalok no adorasaun. Ema ida-idak iha responsabilidade kona-ba desizaun neʼebé sira halo, tan neʼe ita hakarak hatudu respeitu kona-ba dalan neʼebé ema uza sira-nia liberdade. Maski desizaun ruma kona-ba buat neʼebé kiʼik mós ita presiza hatudu respeitu ba irmaun-irmán sira-nia liberdade. (1 Kor 10:32, 33) Jeová fó ona ba ita direitu atu hili nuʼudar prezente neʼebé furak no neʼe mak liberdade neʼebé loos. (2 Kor 3:17) Ita hafolin prezente neʼe tanba liuhusi neʼe mak ita bele halo desizaun neʼebé hatudu katak ita hadomi Jeová. Tan neʼe, mai ita kontinua halo desizaun neʼebé sei lori glória ba Jeová no hatudu respeitu ba ema seluk nia direitu atu uza prezente furak neʼe. w17.01 2:15, 17, 18

Ita lakohi dada ema nia atensaun, maibé koko atu iha hahalok “laran-maus no laran-diʼak”. (1 Ped 3:3, 4; Jer 9:23, 24) Ita-nia sentimentu kona-ba ita-nia an sei hatudu sai liuhusi ita-nia koʼalia no hahalok. Porezemplu, karik ita koʼalia gaba an uitoan atu ema hatene katak ita mak ema neʼebé espesiál tanba ita-nia pozisaun, tanba ita hatene segredu ruma ka tanba ita belun diʼak ho irmaun ida neʼebé kaer responsabilidade importante. Ka karik ita koko atu halo ema fiar katak ita halo ona buat importante ruma ho ita-nia kbiit rasik, maibé tuir loloos ema seluk mós ajuda ona ita. Se hanesan neʼe, diʼak atu hanoin kona-ba Jesus nia ezemplu. Tuir loloos nia bele dada ema seluk nia atensaun ba ninia matenek. Maibé nia sempre temi liafuan sira husi eskritura. Nia lakohi ema seluk atu fó hahiʼi ba nia. Nia hakarak glória hotu fó deʼit ba Jeová. w17.01 4:12

Tuir loloos mandamentu neʼe la susar ba Adão no Eva atu komprende ka halo tuir tanba iha jardín Eden sei iha ai-han gostu oioin neʼebé sira bele han. Diabu Satanás uza samea ida lohi Eva hodi kontra Jeová. (Gên 3:1-5; Apok 12:9) Tanba Jeová hatete ba Adão no Eva katak laʼós ai-fuan husi ai-hun hotu iha jardín Eden mak sira bele han, tan neʼe Satanás uza Jeová nia mandamentu neʼe hodi hamosu duvida katak Jeová lakohi fó buat neʼebé diʼak ba sira. Buat neʼebé nia koʼalia mak hanesan liafuan sira-neʼe: ‘Imi la iha liberdade atu halo buat neʼebé imi gosta halo ka?’ Tuirmai nia lohi Eva hodi dehan: “Tuir loloos, imi sei la mate.” Depois Satanás bosok nia atu la presiza rona ba Maromak, nia dehan: “Maromak hatene katak iha loron neʼebé imi han ai-fuan neʼe, imi-nia matan sei nakloke.” Satanás nia liafuan neʼe hanesan hatete katak Jeová lakohi sira han ai-fuan neʼe tanba ai-fuan neʼe bele fó matenek espesiál ida ba sira. Ikusliu nia halo promesa falsu ba sira hodi dehan: “Imi sei sai hanesan Maromak hodi hatene buat diʼak no aat.” w17.02 1:8, 9

Isaías fó sai katak profeta neʼe sei sai “ulun-naʼin no ukun-naʼin”. (Isa 55:4) No Daniel hakerek kona-ba Mesias, neʼebé sei sai “Ulun-Naʼin”. (Dan 9:25) Ikusmai Jesus Kristu fó sai katak nia rasik mak “Ulun-Naʼin” ba Maromak nia povu. (Mt 23:10) Jesus nia dixípulu sira halo tuir nia tanba sira fiar katak Jeová mak hili Jesus. (João 6:68, 69) Saida mak ajuda sira? Iha tempu neʼebé Jesus hetan batizmu, João Batista haree “lalehan nakloke, no espíritu santu hanesan manu-pombu ida tun ba nia leten”. (Mc 1:10-12) Bainhira Jesus halaʼo Maromak nia serbisu iha rai, espíritu santu mak fó kbiit ba nia atu hanorin no halo milagre oioin. (Após 10:38) Espíritu santu mós ajuda Jesus atu hatudu hahalok furak sira hanesan domin, ksolok, no fiar neʼebé metin. (João 15:9; Ebr 12:2) La iha ulun-naʼin ida mak hetan apoiu husi espíritu santu hanesan Jesus. Ida-neʼe hatudu ho momoos katak Jeová mak hili Jesus nuʼudar Ulun. w17.02 3:15, 16

Apóstolu sira hahú dirije kongregasaun kristaun iha Pentekostes, tinan 33. Bíblia hatete katak “Pedro hamriik hamutuk ho sira naʼin sanulu-resin-ida” no hanorin kona-ba salvasaun ba ema-lubun boot. (Após 2:14, 15) Husi ema-lubun neʼe, balu sai ema kristaun. Tuirmai ema kristaun sira-neʼe “ho laran-manas kontinua aprende husi apóstolu sira”. (Após 2:42) Apóstolu sira mós iha responsabilidade atu tau matan ba osan iha kongregasaun laran. (Após 4:34, 35) Sira hanorin Maromak nia povu no halo orasaun kona-ba sira hodi dehan: “Ami sei fó ami-nia forsa no tempu atu halo orasaun no atu halo serbisu ba Maromak nia liafuan.” (Após 6:4) No sira mós haruka ema kristaun neʼebé iha esperiénsia bá haklaken iha fatin neʼebé seidauk haklaken. (Após 8:14, 15) Ikusmai, katuas kongregasaun neʼebé hetan kose-mina serbisu hamutuk ho apóstolu sira hodi dirije kongregasaun. Sira sai nuʼudar grupu administradór no fó matadalan ba kongregasaun hotu.—Após 15:2. w17.02 4:4

Satanás nia mundu book ema barak atu hatudu hahalok hanesan ninian, tan neʼe mak ema barak fó hahiʼi ba ema seluk hanesan adora fali ema sira-neʼe. Sira halo tuir dalan neʼebé polítiku-naʼin, ulun-naʼin relijiaun, atleta, no artista sira-nia hatais, jeitu, no hahalok. Ema kristaun neʼebé loos hatene katak sala atu fó hahiʼi ba ema iha dalan hanesan neʼe. Bainhira iha rai, Jesus deʼit mak hatudu ezemplu neʼebé perfeitu ba ita atu halo tuir. (1 Ped 2:21) Ita presiza hanoin-hetan katak “ema hotu halo sala ona no la bele hetan Maromak nia glória”. (Rom 3:23) Se ita mak hatudu respeitu liu ba ema toʼo fó hahiʼi ba sira, neʼe halo Jeová la kontente. Tan neʼe, ita la bele adora ema. w17.03 1:6-8

Oinsá mak ita bele hatene se ita fó ita-nia laran tomak ba Jeová ka lae? Ita bele husu ba ita-nia an: ‘Maski susar mós, haʼu hakarak halo tuir Jeová ka lae? Haʼu hakaʼas an atu proteje Jeová nia kongregasaun hodi moos nafatin ka lae?’ Porezemplu, se ema neʼebé besik ita monu ba sala no nia la arrepende an, depois presiza hasai husi kongregasaun, ita sei hakaʼas an atu la ransu tan ho nia ka lae? Ita-nia laran sei book Ita atu halo saida? Dala ruma ita mós bele sente hanesan Asa tanba ema hotu la gosta ita. Karik Ita-nia kolega eskola ka profesora sira goza Ita tan deʼit Ita mak Testemuña ba Jeová. Ka iha serbisu-fatin kolega sira hanoin katak Ita beik tanba Ita hakarak foti feriadu atu bá tuir reuniaun boot sira, ka tanba Ita lakohi aumenta oras serbisu atu manán osan barak. Iha situasaun sira-neʼe, diʼak atu halo tuir Asa nia ezemplu hodi halo orasaun ba Maromak. (2 Crôn 14:11) Hatudu aten-brani, no kontinua halo buat neʼebé loos. Hanoin-hetan katak se Maromak mak fó forsa ba Asa, nia mós sei fó forsa ba Ita. w17.03 3:6-8

Bíblia hatete katak bainhira atu halo desizaun neʼebé importante, ita la bele ansi. Ita tenkesér hanoin didiʼak uluk kona-ba buat hotu hodi ita bele halo desizaun neʼebé matenek. (1 Tes 5:21) Família nia ulun tenke halo riset didiʼak husi eskritura ka livru sira antes atu foti desizaun ruma. Diʼak mós atu rona ba família nia hanoin ka sujestaun balu. Hanoin-hetan katak Bíblia dehan Maromak husu ba Abraão atu rona ba ninia feen. (Gên 21:9-12) Katuas kongregasaun mós tenkesér uza tempu atu halo riset ho didiʼak. Se sira hetan informasaun foun neʼebé hatudu katak sira presiza troka desizaun balu neʼebé sira halo ona, labele sente moe atu halo mudansa sira-neʼe. Katuas neʼebé la ulun-toos no haraik-an sempre halo mudansa kona-ba sira-nia hanoin no desizaun. No diʼak mós ba ita hotu atu halo tuir sira-nia ezemplu. Halo hanesan neʼe bele ajuda kongregasaun atu iha dame no unidade.—Após 6:1-4. w17.03 2:16