Janeiru

Ita moris daudaun iha tempu neʼebé loron ikus sira-neʼe besik ona atu ramata. Ita haree ema aat mós sai barak liután. Sira “sai buras hanesan duʼut”. (Sal 92:7) Tan neʼe mak ita la hakfodak haree ema barak lakohi halo tuir Jeová nia morál sira. Paulo hatete ba ema kristaun sira: “Sai hanesan labarik kiʼik kona-ba hahalok aat”, maibé “sai boot ho imi-nia kbiit atu hatene”. (1 Kor 14:20) Oinsá mak ita bele halo nuneʼe? Ita bele hetan resposta iha eskritura ba ohin: “Ema sira neʼebé buka Jeová bele komprende buat hotu.” Neʼe katak sira hatene buat importante hotu neʼebé Jeová gosta sira atu halo. Provérbios 2:7, 9, mós hatete katak Jeová “rai hela matenek ba ema neʼebé laran-loos”. Tan neʼe sira bele “komprende buat neʼebé loos, justisa no la todan ba sorin, no . . . kona-ba buat diʼak hotu”. Noé, Daniel, no Job iha duni matenek hanesan neʼe. (Eze 14:14) Maromak nia povu ohin loron mós iha matenek neʼe. Oinsá ho Ita rasik? Ita “komprende buat hotu” kona-ba oinsá atu halo kontente Jeová ka lae? Xave mak atu iha koñesimentu neʼebé loos kona-ba Jeová. w18.02 p. 8 par. 1-3

Ita hatene katak ita la bele obriga oan ka estudante Bíblia atu hetan batizmu. Jeová lakohi obriga ema atu serbí nia. (1 João 4:8) Tan neʼe mak bainhira ita hanorin ema, ita tenke ajuda sira atu komprende katak importante tebes atu haburas relasaun besik ho Jeová. Hodi nuneʼe, se estudante Bíblia rasik hafolin lia-loos neʼebé nia aprende kona-ba Maromak, ninia hakarak rasik sei book nia atu moris tuir dalan neʼebé ema kristaun loos moris no hetan batizmu. (2 Kor 5:14, 15) Atu hetan batizmu la haree ba idade. Ema ida-idak la hanesan, balu laʼo ba oin iha lia-loos lalais liu fali ema seluk. Loron neʼebé ema ida atu hetan batizmu mak loron neʼebé kontente tebes. Maibé neʼe mós tempu neʼebé atu hanoin didiʼak kona-ba dedikasaun no batizmu envolve saida deʼit. Moris nuʼudar ema kristaun neʼebé loos presiza hakaʼas an, tanba Jesus nia dixípulu “la moris tan ba sira-nia an rasik, maibé moris ba ida neʼebé mate ba sira no neʼebé moris hiʼas ona”.—2 Kor 5:15; Mt 16:24. w18.03 p. 6-7 par. 14-17

Dala ruma Ita mós duvida atu hatudu laran-diʼak hodi simu ema ka lae? Se nuneʼe, karik Ita lakon ona oportunidade hodi sente tempu furak no hetan belun neʼebé ba nafatin. Hatudu laran-diʼak ba ema mak dalan neʼebé diʼak liu hotu atu la sente mesamesak. Maibé saida mak bele hanetik ema atu hatudu laran-diʼak ba malu? Karik tanba razaun balu. Razaun ida mak Jeová nia povu iha buat barak neʼebé sira presiza halo. Balu sente katak sira-nia tempu ka forsa latoʼo atu simu malu. Se Ita mak sente nuneʼe, karik Ita presiza halo mudansa balu ba Ita-nia tempu. Tanba Bíblia hakarak ita atu hatudu laran-diʼak ba malu. Hatudu laran-diʼak mak hahalok neʼebé furak. Maibé atu bele hatudu laran-diʼak, karik Ita presiza hamenus tempu neʼebé Ita uza ba buat neʼebé ladún importante. w18.03 p. 16 par. 13-14

Husi ema hotu neʼebé moris iha mundu neʼe, Jesus mak ezemplu neʼebé diʼak liu hotu kona-ba moris tuir espíritu santu. Durante nia halaʼo serbisu haklaken no moris iha rai, nia hakarak banati-tuir deʼit ninia Aman Jeová. Ninia hanoin, sentimentu, no hahalok hotu halo tuir deʼit Maromak nia hakarak no morál sira. (João 8:29; 14:9; 15:10) Porezemplu, kompara toʼok profeta Isaías hatete saida kona-ba Jeová nia sentimentu laran-sadiʼa ho Jesus nia sentimentu neʼebé hakerek iha Evanjellu Marcos. (Isa 63:9; Mc 6:34) Ita mós banati-tuir Jesus hodi sempre prontu atu hatudu hahalok hanoin ema no fó ajuda ba ema seluk ka lae? Ita mós halo tuir Jesus hodi tau fokus ba haklaken no hanorin lia-loos ba ema ka lae? Ema neʼebé moris tuir espíritu santu hanoin ema seluk no koko atu ajuda sira. w18.02 p. 21 par. 12

Susar tebes atu haboot oan iha mundu ohin loron. (2 Tim 3:1-5) Iha tempu neʼebé oan sira moris mai, sira la hatene saida mak loos no sala, no sira-nia konxiénsia seidauk hetan treinu. Tan neʼe sira presiza dixiplina hodi treinu sira-nia konxiénsia. (Rom 2:14, 15) Matenek-naʼin ida kona-ba Bíblia esplika katak liafuan gregu neʼebé tradús “dixiplina” bele mós signifika “labarik nia dezenvolvimentu”, ka haboot oan atu sai ema maduru neʼebé hatene kaer responsabilidade. Se inan-aman dixiplina oan ho domin, oan mós sei sente seguru. Sira bele aprende katak liberdade iha limitadu no buat hotu neʼebé sira halo iha moris sei lori konsekuénsia ida-idak. Tan neʼe mak importante tebes ba inan-aman atu sadere ba Jeová nia matenek atu ajuda sira haboot oan. Ema iha ideia oioin kona-ba oinsá atu haboot oan depende ba fatin neʼebé ema hela bá, no ideia sira mós troka beibeik. Maibé inan-aman neʼebé rona ba Maromak la presiza siʼik kona-ba saida mak sira tenke halo ka sadere ba ema nia matenek ka hanoin. w18.03 p. 30 par. 8-9

Nu’udar foin-sa’e ne’ebé hetan ona batizmu, Ita rasik mak iha responsabilidade atu hametin relasaun diʼak ho Jeová, maski ita hela hamutuk ho inan-aman. Tanbasá diʼak atu hanoin-hetan kona-ba neʼe? Tanba agora Ita sai ona joven, Ita hasoru fali sentimentu ka problema neʼebé foun. Feto joven ida dehan: “Baibain se labarik ida la han dose halo tinan nian iha eskola, nia la arrepende an katak nia mak Testemuña ida. Maibé bainhira toʼo ona tinan neʼebé hakarak seksuál nian komesa sai makaʼas, nia rasik mak presiza iha fiar neʼebé metin katak halo tuir Jeová nia ukun-fuan sira sempre lori rezultadu neʼebé diʼak ba nia.” Ema boot neʼebé hetan batizmu mós sei hasoru koko ba sira-nia fiar iha dalan neʼebé sira nunka hanoin. Koko neʼebé sira hasoru karik bele mai husi moris kaben, saúde, ka serbisu. Maski idade kiʼik ka boot, ita hotu sei hasoru koko oioin kona-ba ita-nia laran-metin ba Jeová.—Tgo 1:12-14. w17.12 p. 24 par. 4-5

Ladún iha ema barak neʼebé hetan ona koko hanesan David. Maski nuneʼe, Maromak nia belun neʼe nunka rai hirus iha ninia laran. Nia dehan: “Husik tiha hirus no soe tiha laran-nakali; keta sai laran-nakali no halo hahalok aat.” (Sal 37:8) Razaun importante liu hotu ba ita atu “husik tiha” hirus mak tanba ita hakarak halo tuir Jeová nia ezemplu. Jeová “la fó kastigu ba ita tuir ita-nia sala” maibé nia fó perdua ba ita. (Sal 103:10) Iha mós razaun balu tansá ita hakarak husik tiha hirus. Porezemplu, hirus bele halo tensaun sai aas no moras pulmaun. Hirus bele estraga aten no pánkreas, no hamosu problema ho estómagu. No mós bainhira ita sai hirus, dala barak ita la bele hanoin iha dalan neʼebé loos. Karik ita bele koʼalia ka halo buat ruma neʼebé hakanek ema, no neʼe bele halo ita sente laran-triste ba tempu naruk. Neʼe duni, diʼak atu sai kalma. Bíblia hatete: “Laran neʼebé kalma fó moris ba isin.” (Prov 14:30) Entaun, saida mak ita bele halo se ema ruma hakanek ita-nia sentimentu, no oinsá mak ita bele hadame fali ho ita-nia irmaun-irmán sira? Ita bele halo tuir Bíblia nia konsellu. w18.01 p. 10 par. 14-15

Iha eskritura neʼe, David laʼós koʼalia kona-ba ninia an katak nia sei nunka mate ka nia sei nunka tama ba Rate. Tanba Maromak nia Liafuan hatete ho momoos katak David sai katuas no ikusmai mate no “ema hakoi nia iha David nia Sidade”. (1 Reis 2:1, 10) Se nuneʼe, eskritura neʼe koʼalia kona-ba sé? Pedro esplika kona-ba sé mak kumpre Salmo 16:10. Liutiha semana balu husi tempu neʼebé Jesus mate no hetan fali moris-hiʼas, Pedro koʼalia ba ema rihun ba rihun husi ema judeu no ema husi nasaun seluk neʼebé simu ema judeu nia hanorin. (Após 2:29-32) Pedro fó-hanoin ba sira katak David mate no hakoi tiha ona. No nia hatutan katak David “haree nanis ona no koʼalia kona-ba Kristu nia moris-hiʼas”. Bíblia la hatete katak iha ema kontra buat neʼebé Pedro koʼalia. Pedro temi fali David nia liafuan neʼebé hakerek iha Salmo 110:1 hodi apoia ninia liafuan sira. (Após 2:33-36) Dalan neʼebé Pedro esplika ajuda duni ema-lubun neʼe hodi tau fiar katak Jesus mak “Naʼi no Kristu”. Ema barak rekoñese katak Salmo 16:10 kumpre duni ba Jesus bainhira nia moris fali husi mate. w17.12 p. 10 par. 10-12

Grupu Administradór hatudu laran-metin no matenek iha dalan neʼebé sira uza kontribuisaun. (Mt 24:45) Sira halo orasaun hodi foti desizaun neʼebé matenek, no sira halo planu oinsá atu uza osan sira ho kuidadu. (Lc 14:28) Iha apóstolu sira-nia tempu, apóstolu Paulo halibur osan hamutuk hodi fó ajuda ba irmaun-irmán sira iha Judeia. Nia husu ema sira neʼebé lori osan neʼe atu “tau matan didiʼak ba buat hotu ho laran-moos, laʼós deʼit iha Jeová nia oin, maibé mós iha ema nia oin”. (2 Kor 8:18-21) Ohin loron, ita-nia organizasaun halo tuir Esdras ho Paulo nia ezemplu hodi uza kontribuisaun sira ho kuidadu tebes. (Esd 8:24-33) Foin daudauk neʼe ita haree iha projetu foun oioin. Tan neʼe, ita-nia organizasaun mós buka dalan oioin atu rai osan no halo simples serbisu sira, atu nuneʼe organizasaun bele uza didiʼak kontribuisaun sira neʼebé ita fó. w18.01 p. 20 par. 12-13

Hahalok domin no laran-diʼak bele ajuda ita atu fó perdua ba malu. Se ita sente katak ema seluk koʼalia ka halo buat ruma neʼebé hakanek ita, diʼak atu hanoin fali tempu neʼebé ita koʼalia ka halo buat ruma neʼebé hakanek ema seluk no oinsá sira fó perdua ba ita. Ita agradese tebes ba domin no laran-diʼak neʼebé sira hatudu mai ita, loos ka lae? (Ecle 7:21, 22) Ita agradese tanba Kristu nia domin mak halo ema neʼebé adora Jeová hodi iha unidade. Ita hotu hadomi Maromak neʼebé hanesan, haklaken mensajen neʼebé hanesan, no hasoru problema barak neʼebé hanesan. Se ita mak hatudu laran-diʼak, domin no fó perdua ba malu, kongregasaun sei sai metin liután no ita mós bele tau fokus ba ita-nia kolen. Laran-moras bele hanetik ita atu manán ita-nia kolen. Ezemplu balu husi Bíblia hatudu katak laran-moras perigu tebes. Porezemplu, Caim nia laran-moras mak halo nia oho Abel. Tanba Kora, Datan, no Abiram laran-moras mak halo sira kontra Moisés. No tanba Liurai Saul nia laran-moras mak halo nia koko atu oho David. w17.11 p. 27 par. 9-10

Se katuas sira mak hola parte iha grupu tesi-lia nian, sira tenkesér kuidadu tebes atu haree didiʼak ema neʼebé monu ba sala boot hatudu duni arrepende an ka lae. Neʼe laʼós buat neʼebé fasil. Arrepende an envolve sala-naʼin nia haree kona-ba buat neʼebé nia halo ona no ninia laran sente oinsá kona-ba ninia sala. (Apok 3:3) Ema neʼebé halo sala tenke arrepende an atu bele hetan perdua. Katuas sira la hanesan ho Jeová no Jesus neʼebé bele haree ema nia laran. Entaun, se Ita mak katuas ida, oinsá mak Ita bele hatene ema ida arrepende duni husi laran ka lae? Primeiru, halo orasaun atu iha matenek no kbiit atu hatene. (1 Reis 3:9) Segundu, uza Maromak nia Liafuan no livru sira husi atan laran-metin atu ajuda Ita tetu kona-ba ema neʼe hatudu “triste tuir mundu” ka nia arrepende an husi laran hodi “triste tuir Maromak”. (2 Kor 7:10, 11) Haree didiʼak Bíblia esplika oinsá kona-ba ema neʼebé arrepende an no la arrepende an, no analiza didiʼak kona-ba nia sente oinsá, hanoin oinsá, no iha hahalok saida. w17.11 p. 17 par. 16-17

Ohin loron, livru, filme, no programa oioin husi televizaun halo ema sente katak oan la halo tuir inan-aman mak buat neʼebé baibain deʼit. Maibé realidade mak hahalok kontra halo fraku família, no neʼe bele fó impaktu aat ba komunidade. Ema hotu hatene kona-ba realidade neʼe husi tempu uluk kedas. Porezemplu, iha tempu Grésia antigu, se ema ida mak baku inan-aman, ema neʼe sei lakon ninia direitu nuʼudar sidadaun. No tuir ema Roma nia lei, baku aman mak sala neʼebé todan hanesan oho ema. Eskritura Lia-Ebraiku no Lia-Gregu fó mandamentu ba oan atu hatudu respeitu ba inan-aman. (Êx 20:12; Éf 6:1-3) Saida mak bele ajuda oan atu halo tuir inan-aman maski ema seluk la hatudu hahalok sira-neʼe? Se oan hanoin kona-ba buat hotu neʼebé inan-aman halo ona ba sira, neʼe sei book sira atu hatudu agradese no halo tuir inan-aman. Oan sira mós presiza hatene katak Maromak, ita hotu nia Aman, hakarak sira atu halo tuir sira-nia inan-aman. Se oan mak koʼalia diʼak kona-ba sira-nia inan-aman, neʼe bele ajuda sira-nia kolega atu hatudu respeitu liután ba sira rasik nia inan-aman. w18.01 p. 29 par. 8-9

Ohin loron, ema kristaun neʼebé monu ba sala boot presiza buka ajuda husi katuas sira hodi sira bele ajuda nia atu iha fali relasaun diʼak ho Jeová. Tanbasá mak importante atu halo nuneʼe? Tanba, primeiru, Jeová mak arranja katuas sira atu tau matan ba kazu kona-ba sala neʼebé boot. (Tgo 5:14-16) Segundu, katuas sira bele ajuda ema neʼebé arrepende an atu Maromak simu fali nia no atu la halo fali sala neʼebé hanesan. (Gal 6:1; Ebr 12:11) Terseiru, katuas sira simu ona knaar no treinu atu ajuda ema neʼebé arrepende an atu la lori tan sala nia todan no la fó sala tan ba sira-nia an kona-ba sala neʼebé nia halo. Jeová bolu katuas sira-neʼe hanesan “subar-fatin husi anin”. (Isa 32:2) Arranju neʼe mak dalan ida neʼebé Maromak hatudu ninia laran-sadiʼa ba ita. Maromak nia atan barak sente duni katak, koʼalia ba katuas no simu sira-nia ajuda, fó kmaan tebes ba sira. w17.11 p. 10 par. 8-9

Maski la fasil atu halo tuir, maibé ita tenke hasees an atu la ransu ho família neʼebé hasai ona husi kongregasaun, maski liu deʼit husi telefone, haruka mensajen, hakerek karta, e-mail, ka ligasaun liuhusi média sosiál. Keta lakon esperansa! Domin “tau esperansa iha buat hotu”, tan neʼe ita hein katak loron ida ita-nia família neʼebé husik ona Jeová sei fila fali ba nia. (1 Kor 13:7) Se Ita haree katak ita-nia família komesa hadiʼa ona ninia hahalok, Ita bele halo orasaun ba nia atu nia bele hetan forsa husi Bíblia no simu fali Jeová nia konvite neʼebé hatete: “Fila fali ba haʼu”. (Isa 44:22) Jesus hatete katak ita tenke hadomi nia liu fali hadomi ema. No Jesus mós tau fiar ba ninia dixípulu katak sira sei hatudu aten-brani atu laran-metin ba nia maski família kontra sira. Tan neʼe, se Ita-nia família mak kontra Ita tan deʼit Ita hakarak laʼo tuir Jesus, sadere ba Jeová. Husu nia ajuda Ita atu bele tahan ho susesu. (Isa 41:10, 13) Haksolok bá hodi hatene katak Jeová no Jesus kontente tebes ho Ita no sira sei fó kolen ba Ita-nia laran-metin. w17.10 p. 16 par. 19-21

Bainhira ita haree ema terus tanba moras no idade, ita hanoin tebes sira. Ita hakarak tebes atu haree loron ida problema sira-neʼe sei lakon, tan neʼe ita halo orasaun atu Maromak nia Ukun toʼo mai. Maibé agora daudauk, ita presiza hakaʼas an atu fó ajuda ba sira neʼebé moras no idade. Hanoin toʼok kona-ba ezemplu neʼe. Loron ida, ferik neʼebé terus husi moras Alzheimer halo foʼer ninia roupa. Bainhira nia koko atu hamoos, ema dere ninia odamatan. Testemuña naʼin-rua neʼebé vizita beibeik nia mak mai. Irmán naʼin-rua neʼe husu atu ajuda nia. Ferik neʼe dehan: “Haʼu moe maibé haʼu presiza imi-nia ajuda.” Irmán sira ajuda nia hamoos, depois sira halo buat ruma hodi nia hemu no tuur dada lia ho ferik neʼe. Ferik nia oan-mane mak hakerek-naʼin ida, nia agradese ba irmán sira-nia hahalok no nia hatete katak Testemuña sira “halo tuir duni buat neʼebé sira haklaken ba ema”. Hahalok laran-sadiʼa no laran-diʼak mós book Ita atu hakaʼas an hodi ajuda ema hanesan neʼe ka lae?—Flp 2:3, 4. w17.09 p. 9 par. 5; p. 12 par. 14

Ita tenke halo buat hotu ho domin no diʼak ba ema seluk maski la iha ema ida mak hatene kona-ba buat neʼebé ita halo. (Mt 6:1-4) Ita mos tenke hatudu respeitu ba ema seluk. (Rom 12:10) Jesus hatudu respeitu ba ninia apóstolu sira bainhira nia fase sira-nia ain. (João 13:3-5, 12-15) Ita tenke hakaʼas an atu sai haraik-an hanesan Jesus hodi serbí ema seluk. Jesus nia apóstolu sira la komprende kona-ba buat neʼebé Jesus halo ba sira toʼo sira simu espíritu santu. (João 13:7) Ita bele hatudu respeitu ba ema seluk hodi la hanoin katak ita diʼak liu fali ema seluk tanba ita iha edukasaun, rikusoin, ka knaar espesiál. (Rom 12:3) Ita la laran-moras ba ema seluk bainhira ema gaba sira, maibé haksolok ho sira maski ita sente katak ita mós merese atu simu gaba. w17.10 p. 9 par. 9-10

Haklaken-naʼin barak sente katak uza beibeik Maromak nia Liafuan book tebes ema neʼebé sira haklaken bá. Porezemplu, irmaun ida bá vizita katuas ida neʼebé lee beibeik ita-nia revista ba tinan barak ona. Loron ida, irmaun neʼe deside atu lee eskritura ida ba nia duké fó deʼit Livru Haklaken foun ba nia. Nia lee 2 Korinto 1:3, 4 neʼebé dehan: “Aman neʼebé laran-sadiʼa no Maromak neʼebé fó kmaan ba ema iha situasaun hotu . . . fó kmaan ba ita iha ita-nia susar hotu.” Liafuan sira husi eskritura book tebes katuas neʼe toʼo nia husu irmaun atu lee dala ida tan ba nia. Tuirmai mane neʼe hatete katak, tuir loloos nia ho ninia feen buka daudauk atu hetan kmaan. Tanba eskritura neʼe, nia mós hakarak hatene liután kona-ba Bíblia. Sin, uza Maromak nia Liafuan iha ita-nia serbisu haklaken iha kbiit boot tebes!—Após 19:20. w17.09 p. 26 par. 9-10

Karik liafuan sira neʼebé Satanás koʼalia hodi kontra Jeová halo kriatura sira iha lalehan sente hakfodak no hirus. Maibé Jeová kalma nafatin. Nia la hirus lalais no nia hatudu nafatin hahalok justisa iha dalan neʼebé nia rezolve problema kona-ba Satanás nia kontra. (Êx 34:6; Job 2:2-6) Tanbasá nia halo nuneʼe? Jeová husik tempu liu tanba nia lakohi ema ida atu lakon maibé “hakarak ema hotu atu hakribi sala”. (2 Ped 3:9) Jeová nia ezemplu hanorin ita katak ita presiza hanoin didiʼak antes koʼalia no la halo buat ruma ho ansi. Tan neʼe, bainhira Ita atu halo desizaun importante ruma, diʼak atu hanoin uluk lai. Halo orasaun atu husu matenek hodi bele koʼalia ka halo buat neʼebé loos. (Sal 141:3) Se ita mak nervozu ka hirus, ita bele lakon kontrola an. Tan neʼe mak ema barak arrepende kona-ba buat neʼebé sira koʼalia ka halo tanba la hanoin didiʼak uluk!—Prov 14:29; 15:28; 19:2. w17.09 p. 4 par. 6-7

Koroa neʼe halo Josué atu sai Amlulik Boot no liurai ka lae? Lae, tanba Josué la mai husi David nia umakain, tan neʼe nia la iha direitu atu sai liurai. Tuir loloos nia simu koroa neʼe atu reprezenta buat neʼebé amlulik no liurai rohan-laek sei halo iha futuru, ninia naran mak Dikin. Bíblia esplika katak Dikin neʼe mak Jesus Kristu. (Isa 11:1; Mt 2:23) Jesus mak kaer pozisaun rua nuʼudar Liurai no Amlulik Boot. Nia mak dirije Jeová nia tropa anju sira no serbisu makaʼas hodi proteje Maromak nia povu iha mundu aat neʼe. (Jer 23:5, 6) Lakleur tan Jesus sei halakon nasaun hotu atu apoia Maromak nia ukun no hodi proteje ninia povu. (Apok 17:12-14; 19:11, 14, 15) Maibé antes loron neʼe toʼo mai, Jesus, ka Dikin sei iha serbisu importante ida atu halo. w17.10 p. 28-29 par. 12-14

Ita sei halo saida se Ita haree katak Ita-nia roupa foʼer no dois tebes? Ita sei hasai kedas loos ka lae? Hanesan neʼe mós se ita hatene katak ita halo daudauk buat neʼebé Jeová odi, ita tenke halo kedas mudansa. Kona-ba hahalok neʼebé sala, Paulo dehan: “Imi tenke soe tiha buat sira-neʼe hotu.” Hahalok sala ida ne’ebé Paulo temi mak sala-foʼer. (Kol 3:5-9) Tuir lia orijinál husi Bíblia, liafuan “sala-foʼer” mós inklui relasaun seksuál entre ema neʼebé seidauk kaben no omoseksuál. Kona-ba neʼe, Paulo hatete katak ema kristaun tenkesér “hamate” tiha sira-nia “hakarak isin nian” hanesan sala-foʼer. Neʼe dehan katak ita presiza hakaʼas an atu soe tiha hakarak neʼebé sala. Maski la fasil atu halo nuneʼe, maibé ita bele hetan susesu! w17.08 p. 18 par. 5-6

Profeta Miquéias mós presiza tahan hasoru situasaun susar hanesan ita ohin loron. Nia moris iha Liurai Akabe nia ukun. Akabe mak liurai neʼebé aat tebes. Tan neʼe mak iha tempu neʼebá, rai tomak nakonu ho korrupsaun. Situasaun sai aat tebes toʼo Bíblia hatete katak ema hotu “prontu atu halo buat neʼebé aat”. (Miq 7:1-3) Miquéias rekoñese katak nia la iha kbiit atu troka situasaun neʼe. Se ita mak iha fiar hanesan Miquéias, ita sei kontente atu hein ho laran ba Jeová. Ita-nia situasaun la hanesan ho dadur neʼebé hein deʼit iha kadeia toʼo simu kastigu mate, tanba situasaun mak obriga nia atu hein no nia lakohi haree ba loron kastigu neʼe atu toʼo mai. Ita-nia situasaun la hanesan neʼe! Ita kontente hein ho laran ba Jeová tanba ita hatene katak iha tempu neʼebé nia deside ona, nia sei kumpre ninia promesa atu fó moris rohan-laek ba ita! Tan neʼe mak ita hakarak “tahan buat hotu ho pasiénsia no ksolok”. (Kol 1:11, 12) Maibé nuʼudar ita hein, ita la bele muramura kona-ba tansá mak Jeová seidauk halo buat ruma. Se ita halo nuneʼe, Jeová sei la kontente ho ita.—Kol 3:12. w17.08 p. 4 par. 6-7

Oinsá mak ita bele simu ajuda husi Jeová? Ita presiza iha relasaun neʼebé metin ho nia, no atu bele iha relasaun neʼebé diʼak ho nia, ita presiza hatudu laran-maus. (Sof 2:3) Ema neʼebé laran-maus hein ba Jeová mak atu lori justisa no halakon susar no terus hotu. Jeová simu ema hanesan neʼe. Maibé Jeová sei “soe tun ema aat ba rai”. (Sal 147:6b) Ita lakohi Maromak atu halo nuneʼe ba ita maibé hakarak nia atu hatudu domin neʼebé laran-metin. Tan neʼe mak ita tenke odi buat neʼebé nia odi. (Sal 97:10) Porezemplu, ita tenke hakribi sala-foʼer seksuál nian. Neʼe katak ita tenke hasees an husi buat hotu neʼebé bele book ita atu halo hahalok aat sira-neʼe, inklui mós pornografia. (Sal 119:37; Mt 5:28) Maski presiza luta makaʼas hasoru buat sira-neʼe, maibé ita-nia hakaʼas-an la sai saugati deʼit tanba Jeová sei fó bensaun ba ita. Ita la iha kbiit atu luta mesak deʼit. Ita presiza sadere ba Jeová. Ita presiza duni atu halo orasaun beibeik ba Jeová hodi husu ninia ajuda. w17.07 p. 19-20 par. 11-13

Ita bele uza sasán neʼebé ita iha atu fó apoiu ba ema seluk iha serbisu haklaken. Hodi nuneʼe, maski ita la bele serbí Jeová tempu-tomak ka muda ba fatin neʼebé presiza liután haklaken-naʼin, ita fó ajuda daudauk ba ema seluk. Iha rai sira neʼebé kiak tebes no ema barak hakarak hatene kona-ba lia-loos. Maibé liuhusi kontribuisaun neʼebé ita fó hodi apoiu serbisu haklaken mak ikusmai ema iha fatin sira-neʼe bele hetan ita-nia livru. Porezemplu, iha rai hanesan Kongu, Madagaskar, no Ruanda, ema faʼan Bíblia karun tebes. Dala ruma, ema presiza rai saláriu husi semana ida ka fulan ida nian mak foin bele sosa Bíblia ida. Ba tinan barak ita-nia irmaun sira presiza tetu didiʼak atu uza sira-nia osan hodi hola hahán ba família ka hodi hola Bíblia ida. Maibé agora tanba liuhusi kontribuisaun, ‘buat neʼebé ita iha resin bele taka sira-nia kuran’. Liuhusi arranju neʼe mak Jeová nia organizasaun tradús no fahe Bíblia ba ema ida-idak iha família laran no mós ba estudante Bíblia sira hodi la husu osan.—2 Kor 8:13-15. w17.07 p. 9 par. 11

Husi buat neʼebé akontese ba Job ita bele aprende katak susar no terus neʼebé akontese iha ita-nia moris la hatudu katak Jeová hirus ho ita. Loloos neʼe fó oportunidade ba ita atu apoia Jeová nia direitu atu ukun. Se ita mak tahan ho laran-metin, ita sei halo Jeová kontente no hametin ita-nia esperansa kona-ba futuru. (Rom 5:3-5) Livru Job hatudu katak “Jeová laran-diʼak tebes ho domin no laran-sadiʼa”. (Tgo 5:11) Se ita mak apoia Jeová nia direitu atu ukun, nia sei fó kolen ba ita. Hodi hatene kona-ba neʼe sei ajuda ita atu “tahan buat hotu ho pasiénsia no ksolok”. (Kol 1:11) La fasil atu tau fokus ba Jeová nia direitu atu ukun bainhira ita hasoru daudauk problema. Tan neʼe mak importante tebes atu hanoin beibeik kona-ba Jeová nia direitu atu ukun iha tempu neʼebé ita hasoru problema naran deʼit. w17.06 p. 26 par. 15-16

Ohin loron, ema barak sente katak sira tenkesér iha roupa, telefone, komputadór ka sasán seluk neʼebé modernu liu hotu. Dalan neʼebé sira moris mak sempre buka kona-ba sasán ho osan deʼit. Tan neʼe, ita ida-idak tenke buka-hatene didiʼak ita mós iha hakarak hanesan neʼe ka lae. Husu ba Ita-nia an: ‘Haʼu uza tempu barak atu hanoin kona-ba karreta ka roupa modernu duké atu prepara ba reuniaun sira ka lae? Haʼu preokupa liu ho moris loroloron nian toʼo ladún iha tempu atu halo orasaun ka lee Bíblia ka lae?’ Se ita mak la kuidadu, domin ba sasán bele sai importante liu fali domin ba Kristu. Diʼak atu hanoin-hetan Jesus nia liafuan iha eskritura ba ohin. Jesus hatete katak “ema ida la bele sai atan ba naʼi-ulun rua”. Tuirmai nia dehan tan: “Imi la bele sai atan ba Maromak no ba Rikusoin.” Ita la bele fó ba Jeová buat neʼebé diʼak liu hotu no iha tempu neʼebé hanesan buka mós sasán. (Mt 6:24) Ita hotu la perfeitu, tan neʼe ita tenke luta beibeik hasoru isin nia hakarak, inklui mós domin ba osan no sasán.—Éf 2:3. w17.05 p. 25-26 par. 15-16

Ita la perfeitu, tan neʼe ita fraku hanesan sanan-rai. Maibé mensajen neʼebé ita haklaken ba ema mak hanesan rikusoin furak tanba mensajen neʼe bele lori moris rohan-laek ba ita no mós ba sira neʼebé rona ita. Apóstolu Paulo hakaʼas an tebes hodi hanorin Maromak nia Ukun ba ema seluk. (Rom 1:14, 15; 2 Tim 4:2) Ninia domin ba liafuan diʼak ajuda nia atu haklaken nafatin maski ema fó terus makaʼas ba nia. (1 Tes 2:2) Oinsá mak ita bele banati-tuir Paulo nia ezemplu kona-ba hadomi serbisu haklaken? Dalan ida neʼebé Paulo hatudu katak nia hadomi serbisu haklaken mak hodi uza oportunidade hotu atu haklaken ba ema. Hanesan Paulo ho ema kristaun seluk iha ninia tempu, ita mós hakarak haklaken liafuan diʼak ba ema husi uma ba uma, iha fatin públiku, no iha fatin naran deʼit bainhira hasoru ema. (Após 5:42; 20:20) Ita buka dalan oioin atu haklaken ba ema hotu. Karik ita bele foti pioneiru estra ka pioneiru regulár. Ka ita bele aprende língua seluk, muda ba fatin seluk iha ita rasik nia rai, ka muda ba nasaun seluk.—Após 16:9, 10. w17.06 p. 10-11 par. 8-9

Buat aat barak neʼebé akontese daudaun iha mundu neʼe la mai husi ema ida-idak, maibé barak liu mai husi organizasaun sira. Organizasaun relijiaun sira lohi ona ema barak. Hanesan, koʼalia lia-bosok kona-ba Maromak, sira hatete katak ita la bele tau fiar ba Bíblia, no sira koʼalia bosok kona-ba mundu no ema nia futuru. Governu sira neʼebé nakonu ho korrupsaun provoka nasaun sira atu halo funu, hamosu violénsia entre rasa, hanehan ema kiak no sira neʼebé la iha kbiit. Governu sira-neʼe sai riku ba daudaun tanba hatudu hahalok todan ba sorin no halo korrupsaun. Organizasaun seluk tan neʼebé buka diʼak deʼit mós estraga daudaun ambiente, rai nia rikusoin, no aproveita ema seluk atu sai riku. Maibé Bíblia mós hatete katak, iha tempu terus boot nia rohan, Maromak sei halakon governu hotu no organizasaun sira neʼebé la fó apoiu ba Maromak nia Ukun.—Jer 25:31-33. w17.04 p. 11 par. 7-8

Jeová, ida neʼebé “buka-hatene didiʼak ema nia laran” bele haree loloos ita mak ema hanesan saida. Tan neʼe nia hatudu laran-sadiʼa ba Akabe. (Prov 17:3) Bainhira Nabot nia família no belun sira rona katak Akabe mate ona mak Akabe nia família sei hetan kastigu, karik neʼe koko tebes sira-nia fiar ba Maromak. Maibé hahalok haraik-an mak bele proteje sira atu iha fiar nafatin. Tanbasá? Tanba se sira mak hatudu haraik-an, neʼe sei ajuda sira atu kontinua adora Jeová hodi fiar katak Jeová nunka hatudu hahalok neʼebé la justisa. (Deut 32:3, 4) Iha mundu foun, Nabot nia família sei simu bensaun hodi haree fali Nabot ho ninia oan sira hetan moris-hiʼas. Neʼe sei sai justisa neʼebé loos ba Nabot ho ninia oan sira. (Job 14:14, 15; João 5:28, 29) Ema neʼebé haraik-an fiar katak “Maromak loos sei tesi lia ba ema nia hahalok hotu, inklui mós hahalok sira neʼebé halo subasubar, atu deside se hahalok neʼe mak diʼak ka aat”. (Ecle 12:14) Jeová haree ba buat hotu neʼebé ita la haree atu tesi lia ba ema. Tan neʼe, hahalok haraik-an bele proteje ita atu la lakon fiar ba Jeová. w17.04 p. 24 par. 8-9

Tanba situasaun iha mundu ohin loron, ita nia irmaun-irmán sira sai refujiadu. Ida neʼe mós bele lori susar tanba sira presiza aprende buat barak iha tempu badak deʼit. Sira tenke aprende língua foun, kostume foun, no lei foun kona-ba eskola, fó dixiplina ba oan no selu impostu. Tan neʼe, ita tenke hatudu pasiénsia no respeitu ba irmaun-irmán sira neʼebé hasoru daudauk susar sira-neʼe. (Flp 2:3, 4) Dala ruma ema-boot sira husi governu halo susar ba ita-nia irmaun-irmán refujiadu sira atu ransu ho kongregasaun. Organizasaun balu husi governu fó ameasa ba irmaun-irmán sira-neʼe atu la fó tan ajuda ba sira se sira la halo tuir. Porezemplu, karik sira sei hatete ba irmaun-irmán refujiadu sira katak, sira la bele hela iha rai neʼe se sira lakohi simu serbisu neʼebé sei hanetik sira atu tuir ita-nia reuniaun. Balu simu deʼit serbisu sira-neʼe tanba sira taʼuk no sente la iha kbiit. Tan neʼe importante tebes atu bá hasoru kedas ita-nia irmaun-irmán neʼebé refujiadu bainhira sira foin toʼo iha ita-nia rai. Sira presiza haree katak ita hanoin tebes sira. Se ita mak hatudu laran-diʼak hanesan neʼe hodi ajuda sira, neʼe bele hametin sira-nia fiar.—Prov 12:25. w17.05 p. 5 par. 9-10

Bainhira Jesus iha rai, nia koʼalia kona-ba sinál balu neʼebé hatudu katak “mundu neʼe atu hotu”. Sinál ida mak kona-ba, “ema barak nia domin sei sai malirin.” (Mt 24:3) Jesus nia liafuan neʼe foufoun aplika ba ema judeu sira iha apóstolu sira-nia tempu. Sira hatete katak sira mak Maromak nia povu, maibé sira husik sira-nia domin ba Maromak sai malirin. Maski nuneʼe, ema kristaun barak la hatudu hahalok hanesan neʼe. Sira haklaken “liafuan diʼak kona-ba . . . Kristu” ho badinas no hatudu domin ba Maromak, ba maluk fiar-naʼin, no mós ba ema seluk neʼebé seidauk hatene kona-ba lia-loos. (Após 2:44-47; 5:42) Maibé triste mak, ema kristaun balu husik duni sira-nia domin sai malirin. Oinsá mak ita hatene? Jesus hatete ba ema kristaun sira neʼebé hela iha Éfeso: “Ó husik ona ó-nia domin uluk nian.” (Apok 2:4) Karik ema kristaun iha Éfeso husik ema seluk nia hahalok neʼebé buka diʼak deʼit ba sira-nia an mak halo sira-nia domin sai malirin.—Éf 2:2, 3. w17.05 p. 17 par. 1-3

Jefte mak ulun-naʼin no asuwaʼin neʼebé aten-brani. Ana mak feto haraik-an ida neʼebé tau matan didiʼak ba ninia umakain. Sira rua adora Jeová, maibé iha mós buat seluk neʼebé halo sira naʼin-rua hanesan. Neʼe mak saida? Jefte no Ana halo juramentu ida ba Jeová, no ho laran-metin sira rua kumpre sira ida-idak nia juramentu. Ohin loron, mane no feto kristaun neʼebé hakarak halo juramentu ba Jeová bele aprende husi Jefte no Ana nia ezemplu diʼak. Bainhira Bíblia koʼalia kona-ba liafuan juramentu, baibain neʼe koʼalia kona-ba promesa espesiál neʼebé ema halo ba Maromak. Porezemplu, ema neʼe promete ba Jeová katak nia sei halo buat ruma, fó prezente ruma, halo knaar ruma, ka sees husi buat ruma. Ema halo juramentu ho ninia hakarak rasik, ema seluk la obriga nia. Maski nuneʼe, juramentu neʼebé ema halo, Jeová haree ida-neʼe nuʼudar buat neʼebé sériu no nia hakarak ema neʼe atu kumpre ninia promesa neʼe.—Gên 14:22, 23; Ebr 6:16, 17. w17.04 p. 3 par. 1-2