Fevereiru

Noé la hatene oinsá atu halo ró. Nia presiza sadere ba Jeová, no eskritura hatete katak nia halo “nuneʼe duni” hanesan buat neʼebé Jeová hatete ba nia. Neʼe lori rezultadu saida? Arka neʼe salva Noé ho ninia família nia moris! Noé mós sai aman neʼebé susesu. Tanbasá? Tanba nia tau fiar ba Maromak nia matenek. Noé hanorin didiʼak ninia oan no hatudu ezemplu diʼak ba sira maski susar tebes atu halo nuneʼe iha tempu antes Rai-Nabeen. (Gên 6:5) Oinsá mak inan-aman bele halo tuir Noé nia ezemplu? Rona ba Jeová. Buka matadalan husi Jeová atu hanorin Ita-nia oan liuhusi ninia Liafuan no organizasaun. Maibé, maski inan-aman hakaʼas an ona, karik oan bele husik nafatin Jeová. Se nuneʼe, inan-aman neʼebé hakaʼas an ona bele iha konxiénsia neʼebé moos no keta lakon esperansa katak loron ida sira-nia oan sei fila fali ba Jeová. w18.03 p. 30 par. 10-11

Karik Ita hakarak hatudu laran-diʼak hodi simu ema maibé Ita sente susar. Karik tanba Ita sente moe ka taʼuk se bainaka sira sente baruk. Karik tanba Ita la iha osan barak no Ita sente katak Ita la iha kbiit hanesan irmaun-irmán seluk atu hatudu laran-diʼak ba malu. Uma neʼebé jeitu mós laʼós buat neʼebé importante. Importante mak Ita-nia uma moos, la runguranga no katak Ita simu ema ho diʼak. Lalika preokupa demais, tanba buat neʼebé importante liu mak hatudu domin ba ita-nia bainaka sira. Importante atu hatudu katak ita hakarak koñese bainaka sira diʼak liután. (Flp 2:4) Ema barak gosta koʼalia kona-ba esperiénsia moris nian, no dala ruma, dalan ida deʼit ita bele buka-hatene sira-nia esperiénsia mak tempu neʼebé ita hamutuk ho sira. Katuas kongregasaun ida hatete: “Konvida irmaun-irmán sira mai uma ajuda haʼu atu hatene sira no fó tempu ba haʼu atu koñese sira diʼak liután, liuliu kona-ba oinsá sira hetan lia-loos.” Sin, se Ita mak hatudu katak Ita hakarak koñese Ita-nia bainaka sira diʼak liután, ema hotu sei sente haksolok tebes. w18.03 p. 17 par. 15-17

Inan-aman presiza ajuda oan atu halo desizaun matenek oioin. Se sira mak haruka oan demora hodi la bele hetan batizmu lalais, tan deʼit razaun neʼebé kiʼik, neʼe bele lori perigu ba oan nia relasaun ho Jeová. (Tgo 4:17) Antes oan atu hetan batizmu, inan-aman neʼebé matenek hakarak hatene didiʼak se sira-nia oan prontu duni ona ka lae atu sai Kristu nia dixípulu. Katuas área balu haree katak, iha joven barak neʼebé besik tinan 20 toʼo tinan 23 seidauk hetan batizmu, maski sira aprende no hatene lia-loos husi kiʼik kedas. Baibain joven sira-neʼe tuir reuniaun, bá haklaken, no haree sira-nia an nuʼudar Testemuña ba Jeová. Maski nuneʼe, sira seidauk dedika an ba Jeová no hetan batizmu. Iha situasaun balu, neʼe tanba inan-aman mak sente katak oan sira seidauk prontu atu hetan batizmu. w18.03 p. 8 par. 1-2

Se ita hakarak sai hanesan Kristu, ita presiza aprende dalan neʼebé nia hanoin no ninia hahalok sira. Jesus tau fokus ba ninia relasaun diʼak ho Jeová liu fali buat hotu. Se ita mak hanesan Jesus, ita mós sei haleno Jeová nia hahalok sira. Tan neʼe mak importante tebes atu hanoin tuir Jesus. Oinsá mak ita bele hanoin tuir Jesus? Ninia dixípulu sira haree nia halo milagre, rona nia hanorin ema-lubun, haree oinsá nia trata ema oioin ho diʼak, no oinsá nia sempre halo buat neʼebé tuir Jeová nia hanoin. (Após 10:39) Ohin loron, maski ita la bele haree Jesus, maibé ita bele lee kona-ba Jesus nia hahalok oioin husi Evanjellu sira hodi aprende didiʼak kona-ba nia. Se ita lee Evanjellu Mateus, Marcos, Lucas, no João, ita aprende duni dalan neʼebé Jesus hanoin. Neʼe bele ajuda ita atu “laʼo tuir ninia ain-fatin ho didiʼak” hodi ita bele iha “hanoin neʼebé hanesan Kristu nian”.—1 Ped 2:21; 4:1. w18.02 p. 22 par. 15-16

Komesa husi Adão ho Eva nia tempu, ema sempre aprende kona-ba Jeová liuhusi dalan tolu, neʼe mak: liuhusi kriasaun, liuhusi Maromak nia atan sira seluk neʼebé laran-metin, no hodi haree rasik bensaun neʼebé sira simu tanba halo tuir Jeová. (Isa 48:18) Liuhusi kriasaun, Noé bele haree evidénsia barak katak Maromak iha duni no nia mós bele aprende kona-ba Maromak nia hahalok furak sira hanesan “ninia kbiit neʼebé iha ba nafatin no ninia pozisaun nuʼudar Maromak”. (Rom 1:20) Rezultadu mak, Noé laʼós hatene deʼit katak Maromak iha, maibé nia mós iha fiar neʼebé metin ba Maromak. Noé rona kona-ba Jeová husi neʼebé? Karik husi ninia família sira. Ema sira-neʼe inklui ninia aman Lamek, fiar-naʼin ida neʼebé moris antes Adão mate. Iha mós Noé nia avó Metusalém no Metusalém nia avó Jaret neʼebé mate bainhira Noé tinan 366. (Lc 3:36, 37) Karik buat sira neʼebé Noé aprende book tebes ninia laran, no koñesimentu sira-neʼe book nia hodi serbí Jeová.—Gên 6:9. w18.02 p. 9 par. 4-5

Se ita-nia irmaun, irmán ka família ida mak koʼalia ka halo buat ruma hakanek ita, karik neʼe bele halo ita sai hirus. Oinsá se ita la bele haluha buat neʼebé akontese ba ita? Diʼak ka lae atu rai hirus, karik toʼo tinan barak? Ita sei halo tuir Bíblia nia konsellu atu rezolve lalais problema neʼebé mosu ka lae? Se ita mak husik tempu liu ba beibeik hodi la koʼalia ba ema neʼe, ita sei sente susar liu atu hadame malu fali ho ema neʼe. Ita bele halo saida hodi hadame malu fali? Primeiru, halo orasaun ba Jeová. Husu nia atu ajuda Ita bainhira hamutuk ho irmaun neʼe atu bele koʼalia ba malu iha dalan neʼebé diʼak. Hanoin-hetan katak Ita-nia irmaun neʼe mós Jeová nia belun. (Sal 25:14) Jeová sempre trata ninia belun ho laran-diʼak, no nia mós hakarak ita atu halo buat neʼebé hanesan. (Prov 15:23; Mt 7:12; Kol 4:6) Segundu, hanoin didiʼak kona-ba saida mak Ita atu koʼalia ba Ita-nia irmaun neʼe. Keta hanoin katak nia mak hakarak hakanek Ita ho neon. Karik problema neʼe mosu tanba hanoin sala deʼit ka tanba Ita mak la komprende nia. Hatudu haraik-an hodi rekoñese katak Ita mós iha sala. w18.01 p. 10 par. 15-16

Jeová nia atan la hanesan ho ema barak husi mundu neʼe tanba sira hadomi malu husi laran. Sira sempre hatudu domin ba malu husi tempu uluk kedas. Jesus hatete katak hadomi malu mak mandamentu segundu neʼebé importante liu hotu husi Moisés nia Ukun-Fuan. Mandamentu primeiru mak hadomi Maromak. (Mt 22:38, 39) Jesus mós hatete katak ema sei hatene kristaun neʼebé loos liuhusi domin neʼebé sira hatudu ba malu. (João 13:35) Ema kristaun mós hadomi sira-nia inimigu. (Mt 5:43, 44) Jesus hatudu duni domin ba ema. Nia laʼo husi sidade ida ba sidade seluk hodi haklaken liafuan diʼak kona-ba Maromak nia Ukun. Nia kura ema neʼebé matan-delek, aleijadu, moras-lepra, no tilun-diuk. Nia fó moris-hiʼas ba ema. (Lc 7:22) Jesus fó ninia moris ba sira. Jesus haleno ninia Aman nia domin iha dalan neʼebé perfeitu. Testemuña ba Jeová halo tuir duni Jesus nia ezemplu hodi hatudu domin ba ema seluk iha mundu tomak. w18.01 p. 29-30 par. 11-12

Karik Ita hetan ona batizmu iha tempu foin-sa’e. Maibe, Ita la hatene susar saida deʼit mak Ita sei hasoru iha futuru. Atu ajuda Ita laran-metin, hanoin-hetan katak, bainhira Ita dedika Ita-nia an ba Jeová, Ita promete ba Ukun-Naʼin Aas Liu Hotu atu serbí nia deʼit maski Ita-nia kolega ka inan-aman hili atu husik nia. (Sal 27:10) Diʼak atu sempre husu Jeová hodi ajuda Ita kaer metin ba Ita-nia promesa neʼe. (Flp 4:11, 12) Jeová hakarak Ita atu sai ninia belun. Maibé Ita presiza hakaʼas an atu bele iha relasaun neʼebé metin nafatin ho nia no atu hetan salvasaun ba Ita-nia an. Filipe 2:12 hatete: “Kontinua hakaʼas an atu hetan imi-nia salvasaun ho taʼuk no nakdedar.” Ita presiza hanoin didiʼak kona-ba oinsá Ita bele hakbesik nafatin ba Jeová no laran-metin ba nia maski hasoru problema naran deʼit. Ita presiza kuidadu atu la fiar an demais, tanba Maromak nia atan balu neʼebé serbí nia tinan barak ona mós bele husik nia. w17.12 p. 24 par. 4, 6-7

Jeová fó dignidade no oportunidade ba ita hodi apoia ninia serbisu neʼebé boot tebes. Nia fó garantia atu fó bensaun ba ita hodi apoia ninia serbisu. (Mal 3:10) Jeová halo promete ba ita katak, se ita mak fó ho laran-luak, ita-nia moris mós sei sai kontente. (Prov 11:24, 25) Jeová mós dehan katak ita sei hetan ksolok bainhira ita fó, tanba “kontente liu atu fó duké simu”. (Após 20:35) Liuhusi buat neʼebé ita koʼalia no halo, ita bele hanorin ita-nia oan no ema foun sira katak, sira mós bele fó kontribuisaun ba serbisu neʼe no simu bensaun oioin. Buat hotu neʼebé ita iha mai husi Jeová. Bainhira ita fó fali ba nia, ita hatudu katak ita hadomi nia no hafolin buat hotu neʼebé nia halo ba ita. Bainhira ema Izraél sira fó kontribuisaun hodi harii Jeová nia templu, sira “haksolok atu fó sakrifísiu husi laran, tanba sira fó sakrifísiu sira-neʼe ho laran tomak ba Jeová”. (1 Crôn 29:9) Mai ita mós kontinua hetan ksolok hodi fó fali ba Jeová husi buat sira neʼebé nia fó ba ita. w18.01 p. 21 par. 18-19

Liutiha tempu balu husi tempu neʼebé Kristu “toʼo ona mai” mak moris-hiʼas ba lalehan komesa hahú. Kristu nia alin sira neʼebé sei moris hela iha rai iha tempu terus boot nian sei “lori saʼe tiha iha kalohan laran”. (1 Tes 4:13-17; Mt 24:31) Bainhira sira mate, sira “hotu sei nakfila an kedas, no neʼe lalais liu fali ho piska matan. Ida-neʼe sei mosu durante trombeta ikus nia lian”. (1 Kor 15:51, 52) Ohin loron, ema kristaun barak neʼebé laran-metin la iha esperansa atu ukun hamutuk ho Kristu iha lalehan. Sira hein namanas atu haree “Jeová nia loron” toʼo mai bainhira Jeová halakon mundu aat neʼe. La iha ema ida mak hatene ho loloos bainhira mak loron neʼe toʼo mai, maibé iha evidénsia barak neʼebé hatudu katak loron neʼe besik ona. (1 Tes 5:1-3) Bainhira Maromak nia mundu foun toʼo mai, sei akontese moris-hiʼas oin ida tan. Iha tempu neʼebá, ema mate sei hetan fali moris-hiʼas atu moris iha rai no sira-nia esperansa mak atu sai perfeitu fali no nunka haree tan mate. w17.12 p. 11 par. 15; p. 12 par. 18-19

Se ita mak hakaʼas an atu hatudu domin no laran-diʼak, ita sei la sai laran-moras ba ema. Maromak nia Liafuan dehan: “Domin mak pasiénsia no laran-diʼak. Domin la laran-moras.” (1 Kor 13:4) Se ita lakohi atu iha hahalok laran-moras, ita presiza iha hanoin hanesan Jeová nian. Ita presiza haree ita-nia irmaun-irmán nuʼudar parte oioin husi isin-lolon ida deʼit, neʼe mak kongregasaun. Bíblia dehan: “Se parte ida simu glória, parte hotu mós haksolok hamutuk ho nia.” (1 Kor 12:16-18, 26) Se ita-nia maluk ida mak simu bensaun ruma, ita haksolok hamutuk ho nia, laʼós laran-moras ba nia. Hanoin kona-ba ezemplu diʼak husi Liurai Saul nia oan Jónatas. Nia la sai laran-moras ba David bainhira David mak hetan knaar atu sai liurai, laʼós nia. Duké sai laran-moras, Jónatas fó fali laran-manas no apoia David. (1 Sam 23:16-18) Ita bele sai laran-diʼak no iha domin hanesan Jónatas ka lae? w17.11 p. 27 par. 10-11

Jeová rai Moisés nia Ukun-Fuan iha Bíblia. Tanba nia hakarak ita komprende no halo tuir “buat neʼebé importante”, ka prinsípiu husi Ukun-Fuan neʼe. (Mt 23:23) Iha Moisés nia Ukun-Fuan bele hetan “matenek no lia-loos simples kona-ba Maromak”. Ukun-Fuan neʼe hanorin ita kona-ba Jeová no ninia prinsípiu sira. (Rom 2:20) Porezemplu, sidade protesaun hanorin katuas sira oinsá atu “tesi-lia ho loloos tuir justisa”, no mós hanorin ita hotu oinsá atu hatudu “domin neʼebé laran-metin no hatudu laran-sadiʼa ba malu”. (Zac 7:9) Maski ita la presiza atu halo tuir tan Moisés nia Ukun-Fuan, maibé Jeová nunka troka. Ba nia, hahalok justisa no laran-sadiʼa importante nafatin. Ita iha priviléjiu atu adora Maromak hanesan neʼe. Mai ita banati-tuir ninia hahalok furak sira no buka protesaun husi nia! w17.11 p. 13-14 par. 2-3; p. 17 par. 18-19

Irmaun sira neʼebé hatoʼo diskursu tenke hanoin katak eskritura sira mak importante liu iha diskursu hotu. (João 7:16) Tan neʼe mak tenkesér kuidadu bainhira hatoʼo diskursu, ita lakohi uza demais esperiénsia ka ai-knanoik sira hodi ema la fó atensaun ba Bíblia. No ita mós presiza hanoin-hetan katak lee deʼit eskritura la dehan katak ita hanorin. Tanba se Ita mak lee eskritura barak liu, susar ba ema atu hanoin-hetan eskritura hotu. Tan neʼe hili eskritura sira ho didiʼak. La bele lee lalais, esplika didiʼak, fó ezemplu balu, no hatudu oinsá atu uza eskritura sira-neʼe nuʼudar matadalan iha ita-nia moris. (Neem 8:8) Koko atu komprende didiʼak oinsá mak nota diskursu neʼe liga ho eskritura sira. No importante liu mak halo orasaun atu husu ajuda husi Jeová hodi bele fó sai pontu furak sira husi ninia Liafuan.—Esd 7:10. w17.09 p. 26 par. 11-12

Tinan 537 molok Kristu mak tempu neʼebé haksolok tebes ba Jeová nia povu. Ema Babilónia kaer sira ba tinan 70, maibé agora sira sai livre ona! Sira kontente tebes atu fila fali ba Jeruzalein hodi harii fali templu hodi bele adora Jeová iha neʼebá. Tinan ida liutiha, ema Izraél konsege tau fali templu nia fundasaun. Tinan 16 liutiha, Jeová nia templu seidauk ramata. Maromak nia povu presiza fó-hanoin atu fila fali ba Jeová no la bele hanoin kona-ba sira-nia an deʼit. Tan neʼe iha tinan 520 molok Kristu, Jeová haruka ninia profeta Zacarias hodi ajuda povu atu hanoin-hetan fali tanbasá mak Jeová halo sira livre husi Babilónia. Zacarias nia naran signifika “Jeová hanoin-hetan”. Maski ema Izraél sira haluha ona buat neʼebé Jeová halo ba sira, maibé Jeová hanoin-hetan nafatin kona-ba ninia povu. (Zac 1:3, 4) Jeová promete atu ajuda sira harii fali adorasaun neʼebé loos. Maibé Jeová mós fó avizu ba sira katak sira tenke fó buat neʼebé diʼak liu hotu hodi Jeová simu sira-nia adorasaun. w17.10 p. 21-22 par. 2-3

Matenek-naʼin sira neʼebé estuda kona-ba saúde mentál hatete katak, hatudu laran-sadiʼa no laran-diʼak bele ajuda ita-nia saúde no iha relasaun diʼak ho ema seluk. Se Ita fó ajuda ba ema neʼebé hasoru daudauk terus, Ita sei sente kontente liután, pozitivu, la sente mesamesak, no la hanoin negativu. Sin, hatudu laran-sadiʼa no laran-diʼak mak diʼak duni ba Ita. Bainhira ita fó ajuda ba ema tanba domin, ita sente iha konxiénsia neʼebé diʼak tanba ita hatene katak ita halo daudauk buat neʼebé Jeová gosta ita atu halo. Hahalok laran-sadiʼa no laran-diʼak bele ajuda ita atu sai nuʼudar inan-aman, feen ka laʼen, no belun neʼebé diʼak liután. No mós, baibain ema sei fó fali ajuda ba ema neʼebé hatudu laran-sadiʼa no laran-diʼak iha tempu neʼebé nia presiza ajuda. (Mt 5:7; Lc 6:38) Hatudu laran-sadiʼa no laran-diʼak mak hahalok neʼebé diʼak ba ita, maibé importante liu mak neʼe hatudu katak ita hakarak banati-tuir Jeová no lori glória ba nia. Nia mak domin, laran-sadiʼa no laran-diʼak nia Hun.—Prov 14:31. w17.09 p. 12 par. 16-17

Nuʼudar Liurai no Amlulik, Jesus mós simu knaar atu “harii Jeová nia templu”. Jesus nia serbisu harii neʼe inklui mós halo Maromak nia povu sai livre husi relijiaun falsu, ka Babilónia Boot nia liman iha tinan 1919. Iha tempu neʼebá nia harii fali kongregasaun kristaun no foti “atan laran-metin no matenek”. Irmaun sira neʼebé sei ukun hamutuk ho Kristu mak serbí iha grupu neʼe no sira mak tau matan ba serbisu importante neʼebé halaʼo daudauk iha Jeová nia templu espirituál parte rai nian. (Mt 24:45) Jesus mós hamoos daudauk Maromak Jeová nia povu no ajuda sira atu bele adora Jeová iha dalan neʼebé moos. (Mal 3:1-3) Jesus hamutuk ho ema naʼin-144.000 neʼebé serbí nuʼudar liurai no amlulik sei ukun ba tinan rihun ida. Iha tempu neʼebé sira ukun, sira sei ajuda ema neʼebé laran-metin atu sai perfeitu fali. Bainhira sira halaʼo kompletu ona sira-nia serbisu neʼe, ema neʼebé moris iha rai mak ema neʼebé adora deʼit Jeová. Ikusmai adorasaun neʼebé loos sei harii duni iha mundu tomak! w17.10 p. 29 par. 15-16

Ema neʼebé oho ema seluk la ho neon tenkesér halai ba sidade protesaun neʼebé besik liu nia atu bele hetan perdua. (Jos 20:4) Ninia moris depende ba nia atu halai ba sidade neʼe no hela iha neʼebá toʼo amlulik boot mate. Halo nuneʼe mak sakrifísiu boot tebes ba nia, tanba nia tenke husik hela ninia serbisu, uma, no la iha tan liberdade atu bá fatin seluk. Maibé halo sakrifísiu sira-neʼe importante ba ninia moris. Ohin loron, ema neʼebé arrepende an mós tenke halo buat balu atu Maromak fó perdua ba nia. Nia tenke husik tiha ninia hahalok sala neʼe, inklui hasees an husi sala kiʼik neʼebé lori nia ba sala boot. Tan neʼe, se ita hakaʼas an atu la halo tan sala, ita hatudu ba Jeová katak ita hanoin tebes kona-ba ita-nia situasaun no ita hatene katak Maromak la hatudu ninia laran-sadiʼa automátika deʼit.—2 Kor 7:10, 11. w17.11 p. 10-11 par. 10-11

Jeová hakarak ita atu la bele karak ba ita-nia irmaun-irmán sira. (1 João 3:17) Maibé ita tenke hatudu laran-diʼak ho motivu neʼebé loos. Husu ba ita-nia an: ‘Haʼu konvida deʼit haʼu-nia belun diʼak, sira neʼebé iha pozisaun importante iha kongregasaun ka sira neʼebé bele halo fali buat ruma ba haʼu ka lae? Ka haʼu konvida irmaun-irmán hotu neʼebé haʼu ladún koñese no sira neʼebé la iha kbiit atu halo fali buat ruma ba haʼu?’ (Lc 14:12-14) Hanoin toʼok kona-ba situasaun sira tuirmai neʼe: Oinsá se irmaun ida presiza ajuda tanba nia halo ona desizaun neʼebé la matenek? Ka oinsá se ita konvida ema ida ba ita-nia uma maibé nia nunka fó-agradese ba ita? Iha situasaun hanesan neʼe diʼak atu halo tuir konsellu neʼebé hatudu iha eskritura ba ohin. Se ita mak hatudu laran-diʼak ho motivu neʼebé loos, neʼe sei lori ksolok ba ita.—Após 20:35. w17.10 p. 9 par. 12

Potifar nia feen gosta tebes José tanba nia mak “mane neʼebé isin kapás no bonitu”, no Potifar nia feen koko ona dala barak atu tenta nia. Maibé José la monu ba tentasaun. Bainhira Potifar nia feen kaer metin José nia roupa, José halai husi nia. Ita aprende saida husi José nia ezemplu? Se ita mak hetan tentasaun atu kontra Maromak nia ukun-fuan, ita presiza hakaʼas an atu la monu ba tentasaun neʼe. (Prov 1:10) Iha ema barak neʼebé, uluk antes sai Testemuña, sira luta makaʼas kona-ba hemu barak liu, han demais, fuma, uza droga, hahalok foʼer seksuál nian, ka buat seluk tan. Karik bainhira sira hetan ona batizmu mós sira sei luta nafatin hasoru tentasaun sira-neʼe. Se Ita mak hasoru situasaun hanesan neʼe, diʼak atu hanoin-hetan katak monu ba tentasaun bele estraga Ita-nia relasaun ho Jeová. Diʼak atu haree uluk situasaun saida deʼit mak bele lori Ita ba tentasaun no hasees an husi situasaun sira-neʼe. (Sal 26:4, 5; Prov 22:3) Se Ita mak hasoru situasaun neʼebé sei lori tentasaun, husu Jeová atu fó matenek no ajuda Ita atu kontrola an hodi la monu ba tentasaun neʼe. w17.09 p. 4-5 par. 8-9

Dalan ida atu halo belun ho Jeová mak hodi la envolve demais ho sistema ekonomia iha mundu neʼe maibé uza ita-nia situasaun moris nian atu buka “rikusoin neʼebé loos”. Neʼe mak buat neʼebé Abraão halo. Nia halo tuir Jeová hodi husik sidade Ur neʼebé riku tebes no hela deʼit iha tenda tanba nia hakarak tebes atu sai Jeová nia belun. (Ebr 11:8-10) Nia sempre tau fiar ba Maromak duké tau fiar ba sasán sira. (Gên 14:22, 23) Jesus hakarak ema atu hatudu fiar hanesan neʼe. Loron ida, nia hatete ba mane joven ida neʼebé riku: “Se ó hakarak atu sai kompletu iha ó-nia serbisu ba Maromak, bá no faʼan ó-nia rikusoin sira no fó ba ema kiak, no ó sei hetan rikusoin iha lalehan, no mai tuir haʼu.” (Mt 19:21) Maski joven neʼe la hatudu fiar hanesan Abraão, maibé iha ema seluk neʼebé tau fiar ba Maromak. w17.07 p. 10 par. 12

Tinan 430 liutiha husi tempu neʼebé Abraão hakur Mota Eufrates mak ninia bei-oan sira foin sai nuʼudar nasaun hodi okupa rai neʼe. (Êx 12:40-42; Gal 3:17) Abraão hakarak hein tanba nia hatene katak Jeová sei kumpre ninia promesa sira. Nia iha fiar ba Jeová. (Ebr 11:8-12) Abraão kontente atu hein maski nia la konsege haree Maromak nia promesa hotu sai loos toʼo nia mate. Maibé hanoin toʼok Abraão nia ksolok bainhira nia hetan fali moris-hiʼas iha rai. Nia sei hakfodak hodi lee kona-ba nia rasik ho ninia família nia istória neʼebé hakerek iha Bíblia. Hanoin toʼok ninia ksolok hodi hatene katak Jeová halo ninia planu kona-ba Mesias sai loos liuhusi nia! Ita bele fiar Abraão sei sente katak nia la hein ho saugati deʼit. w17.08 p. 6 par. 10-11

Tuir Bíblia, “hahalok la moos” laʼós koʼalia kona-ba sala-foʼer deʼit. Neʼe bele refere ba hahalok hanesan fuma ka konta istória foʼer. (2 Kor 7:1; Éf 5:3, 4) Neʼe mós bele refere ba buat foʼer neʼebé ema halo subasubar hanesan, lee livru sira neʼebé hamosu hakarak seksuál ka haree pornografia. Buat sira-neʼe bele book ema atu halo hahalok la moos hanesan masturbasaun. Ema neʼebé iha toman atu haree beibeik pornografia hamosu “hakarak seksuál neʼebé foʼer” no bele halo ninia an sai atan ba hahalok seksuál. Peskizadór sira hatete katak ema neʼebé toman haree pornografia mak atu hanesan ho ema neʼebé toman uza tua ka droga. Tan neʼe, ita la hakfodak katak, toman atu haree beibeik pornografia bele lori rezultadu neʼebé ladiʼak, hanesan sente la iha folin, la bele halo serbisu ho didiʼak, família la kontente, soe-malu, no bele mós oho an. w17.08 p. 19 par. 8-9

Bainhira ema Izraél sira fila fali ba Jeruzalein, ema neʼebé hakerek salmo hanoin kona-ba oinsá Jeová fó ajuda ba sira hodi temi liafuan sira iha leten. Tanba Jeová dehan katak nia sei hametin sidade nia portaun sira, neʼe halo ema neʼebé hakerek salmo sente seguru. Neʼe fó fiar ba nia katak Jeová sei proteje ninia povu. Karik ita sente laran-taridu tanba ita hasoru hela problema oioin, maibé Jeová bele fó matenek ba ita atu tahan. Ema neʼebé hakerek salmo hatete katak Maromak “haruka ninia mandamentu ba rai; ninia liafuan hanesan atan neʼebé halai lalais”. Nia mós temi kona-ba jelu-rahun ho udan jelu-fatuk no nia husu: “Sé mak bele tahan malirin neʼe?” Tuirmai nia dehan katak Jeová “fó sai ninia liafuan, no jelu nabeen tiha”. (Sal 147:15-18) Ita-nia Maromak neʼebé hatene buat hotu, bele halo buat hotu, bele kontrola udan jelu-fatuk no jelu-rahun, nia mós bele ajuda Ita atu luta manán hasoru problema naran deʼit. w17.07 p. 20 par. 14-15

Jeová nia ukun mak diʼak liu hotu no nia merese duni atu hetan apoiu husi ita. Tanbasá? Tanba Jeová nia hakarak mak buat hotu iha no kria tiha. Tan neʼe nia deʼit mak iha direitu atu ukun kriatura hotu iha lalehan no rai. Satanás nunka kria buat ida. Tan neʼe nia la iha direitu atu ukun lalehan no rai. Hodi nuneʼe mak bainhira nia, Adão ho Eva kontra Jeová nia direitu atu ukun, sira hatudu katak sira iha hahalok neʼebé foti-an. (Jer 10:23) Maski sira iha liberdade, maibé neʼe fó direitu ba sira atu kontra Jeová nia ukun ka lae? Lae, tanba liberdade fó direitu ba kriatura sira atu hili no halo desizaun, maibé la fó direitu ba sira atu kontra hasoru Kriadór Jeová. Tan neʼe mak kontra hasoru Maromak hatudu katak sira uza sala sira-nia liberdade. Nuʼudar ema, ita presiza duni Jeová nia ukun no matadalan. w17.06 p. 27-28 par. 2-4

Se ita mak hafolin tebes serbisu haklaken, ita mós sei halo hanesan apóstolu Paulo hodi kontinua haklaken maski ema fó terus ba ita. (Após 14:19-22) Porezemplu, durante tinan 1930 toʼo 1944, ema fó terus makaʼas ba ita-nia irmaun-irmán sira iha rai-Estadus Unidus. Maibé sira kontinua haklaken nafatin. Bainhira ema husi governu koko atu bandu sira, sira lori kazu neʼe ba tribunál no sira manán kazu barak. Iha 1943, irmaun Knorr temi kazu ida neʼebé ita manán husi Tribunál Aas Liu Hotu iha Estadus Unidus. Loos duni, tanba ita-nia domin ba serbisu haklaken mak ita sei nunka husik terus neʼebé ema fó ba ita atu hapara ita hodi haklaken. Se ita mak hafolin ita-nia serbisu haklaken, ita sei la hanoin deʼit kona-ba oras hira mak ita hakerek iha relatóriu. Ita hakarak duni “fó sasin ho loloos kona-ba liafuan diʼak”.—2 Tim 4:5. w17.06 p. 11-12 par. 11-12

Domin ba Maromak ajuda ita atu halo tuir ninia mandamentu, tahan terus, no odi buat neʼebé aat. (Sal 97:10) Maibé Satanás ho ninia mundu sempre koko atu halo fraku no halakon ita-nia domin ba Maromak. Ema iha mundu neʼe iha hanoin neʼebé laloos kona-ba domin. Ema barak “hadomi deʼit sira-nia an” duké hatudu domin ba Maromak. (2 Tim 3:2) Sira hanoin liu kona-ba “hakarak aat isin nian no hakarak aat matan nian no foti-an kona-ba rikusoin”. (1 João 2:16) Apóstolu Paulo fó avizu kona-ba saida mak sei akontese se ita mak tau uluk ita-nia hakarak. Nia dehan: “Hanoin buat isin nian lori ba mate.” Tanbasá? Tanba ema sira neʼebé halo hanesan neʼe sei sai Maromak nia inimigu. (Rom 8:6, 7) Ema neʼebé uza sira-nia moris hodi buka deʼit osan ka buka hakarak seksuál nian, ikusmai sei la sai kontente no haterus sira-nia an.—1 Kor 6:18; 1 Tim 6:9, 10. w17.05 p. 18 par. 5-6

Irmaun-irmán refujiadu sira mós hatene katak sira la bele manda ema seluk atu fó sasán ba sira, sira tenke hatudu agradese ba ajuda neʼebé sira simu. Irmaun-irmán refujiadu sira-nia hahalok hanesan neʼe halo ema neʼebé ajuda sira mós sente kontente tebes. Maibé refujiadu sira tenke rekoñese katak ikusmai sira mak presiza tau matan ba sira-nia an rasik. Se sira mak hein deʼit ba ema seluk nia ajuda, neʼe bele hatún sira-nia dignidade no estraga sira-nia relasaun diʼak ho irmaun-irmán seluk. (2 Tes 3:7-9) Maski nuneʼe, refujiadu sira presiza nafatin ita hotu nia ajuda. Ita la presiza uza osan barak atu fó ajuda refujiadu sira. Buat neʼebé sira presiza liu mak ita-nia tempu no domin. Porezemplu, karik ita bele ajuda sira oinsá atu uza transportasaun públiku ka iha neʼebé atu hola hahán diʼak neʼebé baratu. Karik ita mós bele ajuda sira oinsá atu hetan ekipamentu ruma hanesan mákina suku roupa hodi sira bele uza atu buka osan. Importante liu mak ajuda sira atu sai parte ida ba kongregasaun. Se bele, tula sira ba reuniaun. Ita mós bele esplika ba sira kona-ba dalan atu haklaken ba ema iha fatin foun neʼe, no haklaken hamutuk ho sira. w17.05 p. 5 par. 11-12

Ema barak hanoin demais kona-ba sira-nia hakarak no saida mak sira gosta toʼo sira sente kusta atu iha hanoin neʼebé loos kona-ba sasán. (1 Kor 2:14) Tanba sira la iha hanoin neʼebé loos, karik neʼe halo susar ba sira atu hatene saida mak loos no saida mak sala. (Ebr 5:11-14) Tan neʼe, sira-nia hakarak atu buka sasán sai makaʼas liután. No se sira hetan ona sasán balu, sira sei hakarak sasán barak liután. (Ecle 5:10) Maibé ita bele halo buat ida atu luta hasoru hakarak neʼe. Lee beibeik Maromak nia Liafuan bele hametin ita-nia hakarak atu halakon domin ba sasán. Jesus hanoin kleʼan kona-ba Jeová nia matenek mak ajuda nia hodi hakribi Diabu nia tentasaun sira. (Mt 4:8-10) Hanesan neʼe mós ohin loron, se ita lakohi monu ba materializmu nia lasu, ita presiza uza Jeová nia matenek iha ita-nia moris. Halo nuneʼe bele hatudu ba Jesus katak ita hadomi nia liu fali sasán hotu. w17.05 p. 26 par. 17