Marsu

Iha ema balu iha Ita-nia kongregasaun neʼebé halo Ita hirus ka lae? Se Ita la koko atu hadiʼa Ita-nia sentimentu kona-ba ema neʼe, situasaun sei nunka troka. Karik Ita lakohi konvida ema ruma ba Ita-nia uma tanba Ita la gosta ninia hahalok ruma. Bíblia hatete Ita bele hadiʼa Ita-nia relasaun ho ema seluk, maski ho inimigu sira, liuhusi hatudu laran-diʼak ba malu. (Prov 25:21, 22) Konvida ema ba Ita-nia uma bele halakon sentimentu ladiʼak kona-ba ema neʼe no haburas dame ho nia. Karik neʼe sei ajuda Ita atu tau fokus ba ninia hahalok diʼak neʼebé book Jeová hodi dada ema neʼe ba nia. (João 6:44) Se Ita husik domin book Ita hodi konvida ema ruma, neʼe bele hahú kria relasaun neʼebé diʼak ba malu. Oinsá mak Ita bele hatene Ita-nia motivu atu halo nuneʼe mak tanba domin? Dalan ida mak hodi halo tuir konsellu husi ita-nia eskritura ba ohin. Ita tenke buka-hatene iha dalan saida deʼit mak ita-nia irmaun-irmán sira boot liu ita. Karik ita bele aprende husi sira-nia fiar, hahalok tahan, ka hahalok furak seluk tan. Hanoin kona-ba sira-nia hahalok diʼak bele hametin ita-nia domin ba sira no halo fasil mós ba ita atu hatudu laran-diʼak ba malu. w18.03 p. 17 par. 18-19

Buat neʼebé koko tebes inan-aman nia laran-metin ba Jeová mak bainhira oan ida hasai husi kongregasaun. Porezemplu, irmán ida nia oan-feto hasai husi kongregasaun no oan-feto neʼe muda sai husi uma. Irmán neʼe dehan: “Haʼu buka dalan oioin husi ita-nia livru sira hodi fó razaun ba haʼu atu bele gasta tempu hamutuk ho haʼu-nia oan-feto no bei-oan.” Maibé irmán neʼe nia laʼen ajuda nia hodi komprende katak sira la iha ona responsabilidade ba sira-nia oan-feto no sira presiza hatudu laran-metin ba Jeová. Tinan balu liutiha, kongregasaun simu fali sira-nia oan-feto. Inan ne’e dehan: “Nia hatudu respeitu tebes ba ami tanba nia hatene katak ami halo tuir Maromak.” Se Ita-nia oan ida hasai husi kongregasaun, Ita sei ‘tau fiar ba Jeová ho Ita-nia laran tomak’ ka lae? Ita sei hatudu ba Jeová katak Ita sei la ‘sadere ba Ita-nia matenek rasik’ ka lae? (Prov 3:5, 6) Tan neʼe inan-aman sira, kontinua tau fiar ba Jeová nia dixiplina no matadalan maski la fasil atu halo nuneʼe. Sin, apoia Jeová nia dixiplina no la bele kontra. w18.03 p. 31 par. 12-13

Bíblia la hatete ema presiza toʼo tinan hira mak foin bele hetan batizmu. Iha Mateus 28:19 Jesus fó mandamentu atu ‘hanorin ema atu sai ninia dixípulu’. Neʼe signifika katak hanorin ema ho objetivu ida atu ajuda nia sai estudante ka dixípulu ida. Dixípulu mak ema neʼebé aprende no komprende kona-ba Jesus nia hanorin no hakarak halo tuir nia. Tan neʼe mak, inan-aman presiza hanorin oan husi bebé kedas ho objetivu ida atu ajuda oan dedika an ba Jeová no atu sai Kristu nia dixípulu. Maski ita hatene katak bebé seidauk kumpre kritériu atu hetan batizmu, maibé Bíblia hatudu katak oan neʼebé sei kiʼik mós bele komprende no gosta lia-loos husi Bíblia. Porezemplu, Timóteo mak dixípulu ida neʼebé foti desizaun hodi serbí Jeová bainhira nia sei joven. Timóteo iha fiar neʼebé metin tebes. (2 Tim 1:5; 3:14, 15) Bainhira Timóteo maizumenus tinan 20, nia kumpre kritériu hodi simu knaar espesiál oioin iha kongregasaun.—Após 16:1-3. w18.03 p. 9 par. 4-5

Bainhira ita komesa serbí Jeová, ita halo mudansa oioin ba ita-nia moris. Hetan tiha batizmu, ita mós presiza halo beibeik mudansa sira. Tanba ita la perfeitu, ita presiza duni halo beibeik mudansa ba ita-nia an. (Flp 3:12, 13) Maski ita joven ka idade, husu ba ita-nia an: ‘Haʼu rasik sente iha mudansa ka lae kona-ba laʼo ba oin nuʼudar ema espirituál? Haʼu-nia hahalok sira komesa hanesan Kristu nian ka lae? Haʼu-nia hahalok no jeitu iha reuniaun sira hatudu saida kona-ba haʼu? Tópiku sira neʼebé haʼu koʼalia ba ema hatudu saida kona-ba haʼu-nia hakarak sira? Haʼu-nia toman atu estuda, hatais no hadiʼa an, no dalan neʼebé haʼu simu konsellu hatudu saida kona-ba haʼu? Haʼu halo saida bainhira hetan tentasaun atu halo buat neʼebé sala? Haʼu sai maduru ona iha lia-loos ka lae?’ (Éf 4:13) Pergunta sira hanesan neʼe bele ajuda ita atu hatene ita laʼo ba oin nuʼudar ema espirituál ka lae. w18.02 p. 24 par. 4-5

Ita moris daudaun iha tempu neʼebé úniku tebes iha ema nia istória. Tuir buat neʼebé Bíblia fó sai nanis, ohin loron Jeová halibur daudaun ema-lubun ida “husi nasaun, suku, povu no lian hotu”. Ema sira-neʼe sai “nasaun neʼebé forte”, sira-nia númeru mak hamutuk millaun ualu liu no sira haksolok hodi “halo serbisu santu ba [Maromak] loron no kalan”. (Apok 7:9, 15; Isa 60:22) Iha ema nia istória, neʼe mak tempu neʼebé úniku tanba iha ema barak tebes hadomi Maromak no hadomi ema seluk liu fali tempu uluk. Maibé Bíblia mós fó-hatene nanis katak, iha ita-nia tempu, ema neʼebé la hadomi Maromak sei hatudu domin neʼebé hanoin an deʼit. Apóstolu Paulo hatete katak, iha loron ikus sira, “ema sei hadomi deʼit sira-nia an, hadomi osan”, no “hadomi deʼit ksolok duké hadomi Maromak”. (2 Tim 3:1-4) Bainhira ema buka sira rasik nia hakarak, neʼe book ema atu hatudu hahalok la hanoin ema seluk, no lori susar ba ema iha mundu neʼe. Sin, domin hanesan neʼe laʼós domin kristaun nian. w18.01 p. 22 par. 1-2

Koñesimentu neʼebé loos ajuda Noé haburas fiar no matenek, no proteje nia husi susar sira, liuliu proteje ninia relasaun diʼak ho Jeová. Porezemplu, tanba Noé “laʼo ho Maromak loos”, neʼe ajuda nia atu la ransu ho ema neʼebé lakohi adora Jeová. Iha tempu neʼebá, ema gaba anju aat sira neʼebé nakfila an ba ema, tanba sira iha forsa no karik sira mós koko atu adora anju sira-neʼe. Maibé Noé la monu ba anju aat sira-nia lohi. (Gên 6:1-4, 9) Noé mós hatene katak Jeová hakarak ema mak atu iha oan hodi halo nakonu mundu. (Gên 1:27, 28) Tan neʼe mak bainhira anju aat sira hola feto no iha oan, Noé hatene katak neʼe sala. Ikusmai, neʼe sai duni realidade tanba anju aat sira-nia oan sai boot liu no forsa liu fali ema baibain. Tan neʼe Jeová hatete ba Noé katak nia sei lori bee atu halakon ema aat hotu. Noé hatudu fiar ba Jeová nia avizu neʼe, tan neʼe nia harii arka hodi salva ninia an ho ninia família nia moris.—Ebr 11:7. w18.02 p. 9 par. 8

Se Ita mak monu ba sala neʼebé sériu, Jeová prontu atu fó perdua ba Ita. Nia hakarak ajuda Ita hadiʼa Ita-nia relasaun ho nia. Maibé Ita presiza simu ajuda neʼebé nia fó liuhusi katuas sira. (Prov 24:16; Tgo 5:13-15) Tan neʼe keta demora. Ita-nia futuru depende ba neʼe. Oinsá se Ita fó sala nafatin ba Ita-nia an maski Ita-nia sala hetan ona perdua, Ita bele halo saida? Dala ruma apóstolu Paulo sente laran-kraik kona-ba sala neʼebé uluk nia halo. Nia dehan: “Basá haʼu kiʼik liu fali apóstolu sira seluk, no haʼu la merese atu bolu nuʼudar apóstolu ida, tanba haʼu fó-terus ba Maromak nia kongregasaun.” (1 Kor 15:9) Jeová hatene katak Paulo laʼós ema perfeitu. Maibé nia simu no hatudu nafatin laran-diʼak ba Paulo hodi fó knaar espesiál ba nia. Jeová hakarak Paulo hanoin-hetan kona-ba neʼe. Se Ita mak arrepende an duni kona-ba sala neʼebé uluk Ita halo, no fó sai ona Ita-nia sala ba Jeová, no se presiza, koʼalia ba katuas sira, Ita bele fiar katak Jeová sei hatudu laran-sadiʼa ba Ita. Fiar bá katak Jeová fó ona perdua ba Ita-nia sala, no simu ninia perdua neʼe!—Isa 55:6, 7. w18.01 p. 11 par. 17-18

Atu sai Jeová nia belun, ita presiza rona ba nia no koʼalia ho nia. Dalan importante liu atu rona ba Jeová mak liuhusi estuda Bíblia. Neʼe inklui lee no hanoin kleʼan kona-ba ninia Liafuan no ita-nia livru sira. Estuda Bíblia la hanesan ho ezame neʼebé ita dekór deʼit informasaun sira. Maibé estuda Bíblia mak hanesan ho halo aventura hodi buka buat foun oioin kona-ba Jeová. Halo nuneʼe bele ajuda Ita hakbesik ba nia no nia mós sei hakbesik ba Ita. Jeová nia organizasaun halo ona buat barak neʼebé Ita bele uza ba Ita-nia programa estuda mesak. Porezemplu, iha ita-nia sítiu jw.org ita bele hetan matadalan atu estuda husi “Tuir Loloos, Saida mak Bíblia Hanorin?”—Sal 119:105. w17.12 p. 24-25 par. 8-9

Oinsá mak neʼe bele akontese? Bíblia dehan: “Mundu tomak sei hatene kona-ba Jeová.” Tanba animál la bele aprende kona-ba Jeová, neʼe hatudu katak profesia neʼe kona-ba oinsá ema sei troka sira-nia hahalok neʼebé hanesan animál. (Isa 11:6, 7) Irmaun-irmán barak uluk siʼak hanesan asu-lobu, maibé agora sira iha dame. Ita bele lee kona-ba sira-nia esperiénsia husi série “Bíblia troka ema nia moris” neʼebé hetan husi jw.org. Tuir loloos Jeová nia atan balu uluk mós siʼak maibé agora sira ‘tau hahalok foun nuʼudar sira-nia hatais, katak hahalok foun neʼebé Maromak kria tuir ninia hakarak; no hahalok neʼe mak loos no laran-metin’. (Éf 4:23, 24) Bainhira ema aprende kona-ba Maromak, sira rekoñese katak sira presiza halo tuir ninia matadalan. Neʼe ajuda sira troka sira-nia fiar, hanoin, no dalan neʼebé sira halo buat ruma. Maski la fasil atu troka, maibé Maromak nia espíritu santu sei ajuda sira se sira hakarak duni atu halo kontente nia. w18.01 p. 31 par. 15-16

Sira neʼebé moris-hiʼas ba lalehan, Bíblia hatete: “Ida-idak tuituir malu.” Tan neʼe ita bele fiar katak moris-hiʼas iha rai mós sei tuituir malu ka organiza iha dalan neʼebé diʼak. Maibé karik ita bele husu: Sira neʼebé foin mate mak sei hetan moris-hiʼas uluk bainhira Kristu nia Ukun ba Tinan Rihun Ida foin hahú, no ema neʼebé koñese sira mak sei simu fali sira ka lae? Ka Maromak nia atan sira neʼebé laran-metin husi tempu antigu mak sei moris-hiʼas uluk, tanba sira iha matenek atu ajuda organiza Maromak nia povu iha mundu foun? Saida mak sei akontese ba ema sira neʼebé nunka serbí Jeová? Bainhira mak sira atu hetan moris-hiʼas no iha neʼebé? Pergunta barak bele mosu. Maibé ita la presiza hanoin barak kona-ba buat sira-neʼe. Diʼak liu hein deʼit. Ita bele fiar katak Jeová sei kumpre buat sira-neʼe. Antes loron neʼe toʼo mai, ita tenke hametin ita-nia fiar ba Jeová. Liuhusi Jesus, Jeová promete katak ema mate sira iha hela ninia memória no sei moris fila fali.—João 5:28, 29; 11:23. w17.12 p. 12 par. 20-21

Ita la duvida katak halo tuir Paulo nia konsellu neʼe bele ajuda Ita-nia família. Jeová fó matadalan ba laʼen sira: “Kontinua hadomi imi-nia feen no keta sai hirus makaʼas ba sira.” Laʼen neʼebé iha domin hatudu respeitu ba ninia feen. Oinsá? Nia rona ba ninia feen nia hanoin no fó-hatene katak nia hafolin feen nia opiniaun sira. (1 Ped 3:7) Maski nia la bele halo tuir buat hotu neʼebé ninia feen hakarak, maibé rona ba ninia feen bele ajuda nia halo desizaun neʼebé diʼak. (Prov 15:22) Laʼen neʼebé iha domin la obriga feen atu hatudu respeitu ba nia, maibé liuhusi ninia hahalok diʼak mak book ninia feen atu hatudu respeitu ba nia. Se laʼen ida mak hadomi ninia feen ho oan sira, neʼe sei halo sira kontente atu serbí Jeová no manán kolen iha futuru. w17.11 p. 28 par. 12; p. 29 par. 15

Apóstolu Paulo hakerek karta ba ema kristaun sira iha Koloso maizumenus iha tinan 60-61, bainhira nia hetan daudaun kastigu iha Roma. Nia esplika ba sira tansá importante atu “komprende buat neʼebé mai husi espíritu santu”. (Kol 1:9) Paulo dehan: “Haʼu koʼalia ida-neʼe atu ema ida labele lohi imi ho liafuan midar oioin. Kuidadu bá atu ema ida la kaer imi ho lasu liuhusi ema nia matenek no hanorin bosok neʼebé la iha folin. Buat sira-neʼe tuir deʼit ema nia lisan no tuir dalan mundu neʼe nian, laʼós tuir Kristu.” (Kol 2:4, 8) Tuirmai Paulo esplika tanbasá ideia barak neʼebé ema gosta mak sala no tanbasá ema barak gosta ideia sira-neʼe. Porezemplu, ideia balu bele halo ema sente katak sira mak matenek ka diʼak liu fali ema seluk. Tan neʼe mak Paulo hakerek karta atu ajuda irmaun-irmán sira hasees an husi mundu nia hanoin no hahalok sira.—Kol 2:16, 17, 23. w17.11 p. 20 par. 1

Ema kristaun ida presiza halo saida hodi Maromak hatudu nafatin laran-sadiʼa ba nia? Nia presiza husik tiha buat hotu neʼebé bele halo nia monu ba sala, maski nia gosta tebes buat sira-neʼe. (Mt 18:9) Porezemplu, se Ita-nia kolega sira book Ita atu halo buat neʼebé Jeová la simu, Ita prontu ka lae atu la ransu tan ho ema sira-neʼe? Se Ita sente susar atu kontrola Ita-nia an kona-ba hemu tua, Ita prontu ka lae atu hasees an husi situasaun neʼebé bele tenta Ita atu hemu demais? Se Ita sente difisil atu kontrola hakarak seksuál nian, Ita prontu ka lae atu la haree filme, loke sítiu, ka la halo buat naran deʼit neʼebé bele hamosu hanoin foʼer? Presiza hanoin-hetan katak, sakrifísiu hotu neʼebé ita halo tanba hakarak halo tuir Jeová nia ukun-fuan sira sempre lori rezultadu diʼak ba ita. La iha sentimentu seluk mak aat liu fali hodi sente katak Jeová husik ona ita. No la iha buat seluk mak bele halo ita sente diʼak liu fali hodi hatene katak Jeová hatudu “domin ho laran-metin neʼebé iha ba nafatin” ba ita.—Isa 54:7, 8. w17.11 p. 11 par. 12

Iha Zacarias 5:4 hatete katak malisan “sei tama ba naʼok-teen sira-nia uma” no malisan neʼe “sei hela iha uma sira-neʼe nia laran no han tiha uma sira-neʼe”. Jeová sei tesi-lia ba ninia povu nia hahalok sala sira. Maski ema neʼebé naʼok bele subar husi polísia, patraun, katuas kongregasaun, ka inan-aman, maibé nia la bele subar husi Jeová. Maromak Jeová fó garantia katak nia sei kaer toman hahalok naʼok naran deʼit. (Ebr 4:13) Ita haksolok tebes bele moris hamutuk ho ema sira neʼebé hakaʼas an atu “hatudu laran-moos iha buat hotu”! (Ebr 13:18) Hahalok naʼok hotu Jeová la simu. Halo tuir Jeová nia morál sira hodi la hafoʼer ninia naran mak priviléjiu ba ita. Se ita mak moris tuir Jeová nia hakarak, ita sei la hetan tesi-lia husi Jeová hanesan nia sei lori ba ema sira neʼebé la halo tuir nia. w17.10 p. 22-23 par. 6-7

Importante tebes atu iha dame ho ita-nia irmaun-irmán sira. Maski ita sente katak ema seluk komprende sala ita ka trata ita iha dalan neʼebé la justisa, ita tenkesér hakaʼas an atu buka nafatin dame. (Rom 12:17, 18) Se ita mak hakanek ema ruma nia sentimentu, diʼak atu husu deskulpa. Maibé ita tenke halo ho laran. Dame mós importante iha moris kaben nian. Ladiʼak ba feen-laʼen atu hatudu katak sira hadomi malu iha ema nia oin, maibé iha uma sira lakohi koʼalia ba malu, hasai liafuan hodi hakanek malu, ka hatudu hahalok violénsia ba malu. Ita mos tenke fó perdua ho laran. Se ema ruma hakanek ita-nia sentimentu, fó perdua ba nia no haluha deʼit. Ita tenke halo nuneʼe maski ema hakanek ita la ho neon. Se ita mak fó perdua ho laran, ita sei la hanoin beibeik kona-ba buat neʼebé ema halo ba ita. Tanba “domin la hanoin fali buat aat neʼebé nia simu”. (1 Kor 13:4, 5) Tuir loloos, se ita mak rai odi, neʼe bele estraga ita-nia relasaun diʼak ho irmaun-irmán sira no mós ho Jeová.—Mt 6:14, 15. w17.10 p. 10 par. 14-15

Ema judeu sira sente oinsá kona-ba Zacarias nia mensajen iha tempu neʼebá? Jeová promete ona katak nia sei ajuda no proteje sira hodi sira bele harii templu neʼe toʼo ramata. Jeová nia promesa neʼe fó esperansa ba sira. Maibé karik sira sei duvida nafatin kona-ba oinsá mak ema uitoan deʼit bele halaʼo serbisu neʼe. Tan neʼe Zacarias hatete ba sira katak iha buat ida bele halakon sira-nia taʼuk no duvida. Jeová dehan katak, laʼós Heldai, Tobias, no Jedaias deʼit mak sei ajuda, ema seluk mós sei “mai hodi hola parte atu harii Jeová nia templu”. Ema judeu sira fiar katak Jeová mak fó apoiu ba sira-nia serbisu. Ho aten-brani sira fila fali hodi harii templu maski liurai Pérsia bandu atu labele halo serbisu neʼe. Bandu neʼe sai hanesan foho boot ida ba sira-nia dalan, maibé lakleur Jeová hasai tiha foho neʼe. Ikusmai templu neʼe ramata duni iha tinan 515 molok Kristu. (Esd 6:22; Zac 4:6, 7) Maibé Jeová nia liafuan mós koʼalia kona-ba buat boot liu neʼebé sei akontese iha ita-nia tempu. w17.10 p. 29 par. 17

Salomão simu knaar espesiál. Jeová hili nia atu tau matan hodi harii templu ida iha Jeruzalein. Neʼe mak projetu neʼebé importante tebes iha tempu neʼebá. Templu neʼe sei sai fatin neʼebé “kmanek liu hotu” no ema hotu sei haree ninia furak. Importante liu mak, templu neʼe sei sai “Maromak loos Jeová nia uma”. (1 Crôn 22:1, 5, 9-11) Liurai David fiar katak Maromak sei fó apoiu ba Salomão. Maibé Salomão mak “joven deʼit no la iha esperiénsia”. Nia aten-brani atu simu knaar neʼe ka lae? Ninia idade no la iha esperiénsia bele hanetik nia ka lae? Atu bele halaʼo knaar neʼe ho susesu, Salomão presiza tebes aten-brani no bá atu halo serbisu neʼe. Se Salomão mak la hatudu aten-brani, sentimentu taʼuk sei hanetik nia atu hahú harii templu. No neʼe aat liu fali simu tiha knaar neʼe maibé la halo toʼo ramata. Hanesan neʼe mós ho ita, ita presiza ajuda husi Jeová atu bele aten-brani hodi halo serbisu neʼebé nia fó mai ita. w17.09 p. 28 par. 1-2; p. 29 par. 4-5

Imajina toʼok Ita-nia moris sei sai oinsá se Ita la iha Bíblia? Ita sei la hetan matadalan neʼebé diʼak ba Ita-nia moris, loos ka lae? Ita sei la hatene lia-loos kona-ba Maromak, moris, ka kona-ba futuru. No mós Ita sei la hatene Jeová halo ona saida ba ninia povu iha tempu antigu. Maibé ita agradese tanba ita la moris iha nakukun laran. Jeová fó ona ninia Liafuan Bíblia mai ita. Nia promete katak ninia mensajen sira husi Bíblia sei hela ba nafatin. Iha 1 Pedro 1:24, 25, apóstolu Pedro temi liafuan balu husi Isaías 40:8. Fraze “Maromak nia liafuan” neʼebé temi iha versíkulu neʼe refere ba Maromak nia mensajen hotu neʼebé nia fó sai. Maski nuneʼe, fraze neʼe mós bele refere ba Bíblia neʼebé ita iha daudauk. Iha tinan atus ba atus nia laran, maski susar no ema fó terus, sira neʼebé hadomi Maromak hakaʼas an nafatin hodi tradús Bíblia atu ema hotu bele lee. Jeová hakarak ema hotu bele “hetan salvasaun no hatene didiʼak kona-ba lia-loos”.—1 Tim 2:3, 4. w17.09 p. 18 par. 1-2

Ohin loron, joven barak mós hasoru tentasaun neʼebé atu hanesan José hasoru. (Gên 39:7) Ezemplu ida mak kona-ba irmán joven ida naran Kim. Ninia kolega eskola sira gosta konta kona-ba saida mak sira halo iha findesemana. Sira halo ona relasaun seksuál ho ema seluk no sira gaba an kona-ba hahalok sira-neʼe. Maibé Kim la halo buat sira-neʼe, tan neʼe dala ruma nia sente mesamesak no ninia kolega sira sente Kim mak ema neʼebé beik tanba nia lakohi namora. Maibé Kim halo desizaun neʼebé matenek, tanba nia hatene katak tempu joven mak tempu neʼebé bele hetan tentasaun makaʼas atu halo relasaun seksuál. (2 Tim 2:22) Kolega sira sempre husu se nia virjen hela ka lae. Maibé neʼe fó oportunidade ba Kim atu esplika tanbasá nia lakohi halo relasaun seksuál ho ema seluk. Ita orgullu tebes ba ita-nia joven sira neʼebé kaer metin ba morál neʼebé loos atu la halo hahalok sala-foʼer seksuál nian, no Jeová mós sente orgullu tebes kona-ba sira! w17.09 p. 4 par. 8; p. 5 par. 10

Ema balu sai hirus lalais no hasai liafuan aat neʼebé hakanek ema seluk. Hahalok hanesan neʼe bele lori susar ba família tomak. Bíblia fó avizu ba ita atu la bele sai hirus, koʼalia liafuan aat ba ema, no hakilar malu. (Éf 4:31) Baibain, hahalok sira-neʼe bele hamosu violénsia. Ohin loron, ema barak iha mundu neʼe hanoin katak hirus no violénsia mak hahalok neʼebé baibain deʼit. Maibé, tuir loloos hahalok sira-neʼe la hatudu respeitu ba ita-nia Kriadór. Tan neʼe mak irmaun-irmán barak halo mudansa hodi tau fali hahalok neʼebé foun. (Kol 3:8-10) Hahalok tuan seluk mak kona-ba bosok. Porezemplu, ema barak bosok atu lalika selu impostu ka atu la simu responsabilidade kona-ba sala neʼebé sira halo. Maibé Jeová mak “Maromak lia-loos nian”. (Sal 31:5) Nia hakarak ema hotu neʼebé adora nia tenkesér “koʼalia lia-loos”, laʼós bosok. (Éf 4:25; Kol 3:9) Tan neʼe mak ita tenke koʼalia ho loloos maski neʼe lori moe boot ka susar.—Prov 6:16-19. w17.08 p. 18 par. 3, 5; p. 20 par. 12-13; p. 21 par. 15

Ohin loron, Jeová dirije ita liuhusi ninia Liafuan Bíblia. Ema neʼebé hakerek salmo dehan katak Jeová nia liafuan “halai lalais” atu fó ajuda ba ita. Maromak dirije ita iha dalan neʼebé loos no iha tempu neʼebé loos. Hanoin toʼok kona-ba ajuda sira neʼebé Ita hetan husi Bíblia, livru sira husi “atan laran-metin no matenek”, JW Broadcasting, jw.org, katuas kongregasaun, no irmaun-irmán sira. (Mt 24:45) Ita rasik haree ona iha Ita-nia moris oinsá Jeová lalais fó matadalan ba Ita ka lae? Ema neʼebé hakerek salmo hatene katak, husi nasaun hotu iha mundu, Jeová hili deʼit nasaun Izraél antigu hodi sai ninia povu. Sira mak nasaun neʼebé simu ona Maromak nia “liafuan” ho “ukun-fuan no desizaun” sira. (Sal 147:19, 20) Ohin loron, ita iha priviléjiu boot atu lori Maromak nia naran. Ita agradese tebes tanba ita hatene nia, ita iha ninia Liafuan atu dirije ita, no bele iha relasaun neʼebé besik ho nia. Hanesan ho ema neʼebé hakerek Salmo 147, Ita mós iha razaun barak atu “fó hahiʼi ba Jah!” no anima ema seluk atu fó hahiʼi ba nia. w17.07 p. 20 par 15-16; p. 21 par. 18

Jesus nia dixípulu hotu hakaʼas an tebes atu halo tuir Paulo nia konsellu neʼebé temi iha leten, inklui mós irmaun-irmán millaun ida liu neʼebé serbí tempu-tomak. Sira hasees an atu la monu ba promosaun sira neʼebé mundu neʼe uza atu tenta ema. Sira hanoin-hetan Bíblia nia prinsípiu neʼebé dehan: “Ema neʼebé empresta sei sai atan ba ida neʼebé fó-empresta.” (Prov 22:7) Satanás hakarak ita atu uza ita-nia tempu no forsa hotu ba sistema ekonomia nian. Ema balu debe osan barak hodi hola uma, hola karreta, bá eskola boot, ka halaʼo kazamentu neʼebé gasta osan barak tebes. Se ita mak la kuidadu, ita bele monu ba debe boot neʼebé presiza tinan barak atu selu. Ita bele hatudu matenek hodi halaʼo moris neʼebé simples, la monu ba debe, no la uza osan arbiru. Neʼe bele ajuda ita atu serbí Maromak ho livre duké sai atan ba mundu neʼe nia sistema ekonomia nian.—1 Tim 6:10. w17.07 p. 10 par. 13

Jeová iha direitu atu ukun ba buat hotu. Nia uza ninia podér iha dalan neʼebé justu liu hotu. Jeová dehan: “Haʼu mak Jeová, Ida neʼebé hatudu domin neʼebé laran-metin, justisa, no hahalok loos iha rai, tanba haʼu haksolok ho buat hirak-neʼe.” (Jer 9:24) Jeová la presiza uza ema nia lei atu ajuda nia halo buat neʼebé loos, tanba nia mak hahalok loos nia hun. No nia halo ukun-fuan ba ema bazeia husi ninia justisa neʼebé loos. Ema neʼebé hakerek salmu dehan: “Hahalok loos no justisa mak hun ba [ninia] kadunan.” Tan neʼe mak ukun-fuan, prinsípiu, ka desizaun naran deʼit neʼebé mai husi Jeová sempre loos. (Sal 89:14) Satanás hatete katak Jeová laʼós Ukun-Naʼin neʼebé justu, maibé Satanás rasik deʼit nunka lori justisa ba mundu neʼe. w17.06 p. 28 par. 5

Jeová mak lia-loos nia Hun. (Sal 31:5) No tanba nia mak Aman neʼebé laran-diʼak, nia hakarak fahe lia-loos sira-neʼe ba ita. Ita aprende ona lia-loos barak liuhusi lee ninia Liafuan, lee ita-nia livru sira no tuir reuniaun boot no mós reuniaun semana-semana nian. Lia-loos neʼebé ita halibur hamutuk mak Jesus bolu nuʼudar “buat foun no buat tuan” neʼebé ita rai hela nuʼudar rikusoin. (Mt 13:52) Se ita mak buka lia-loos sira-neʼe hanesan buka rikusoin neʼebé subar hela, Jeová sei ajuda ita atu halibur tan rikusoin lia-loos nian. (Prov 2:4-7) Oinsá mak ita bele halo nuneʼe? Ita presiza estuda beibeik Bíblia ho ita-nia livru sira no halo riset didiʼak. Halo nuneʼe bele ajuda ita atu buka-hetan lia-loos “foun” neʼebé uluk ita seidauk hatene. (Jos 1:8, 9; Sal 1:2, 3) Loos duni, ita tenkesér hakaʼas an atu kontinua buka lia-loos barak liután, laʼós kontente ona tanba ita hetan lia-loos ida deʼit. w17.06 p. 12 par. 13-14

Irmaun klosan ida husu pergunta ba katuas kongregasaun neʼebé kaben ona kona-ba 1 Korinto 7:28 neʼebé hatete katak ema neʼebé kaben “sei hetan susar iha sira-nia isin”. Nia husu: “‘Susar’ neʼe mak saida, no oinsá mak haʼu bele hasoru susar neʼe bainhira haʼu kaben?” Antes irmaun katuas hatán ninia pergunta, nia hatete ba irmaun klosan neʼe katak apóstolu Paulo hakerek tan buat ida iha ninia karta, Paulo dehan katak Jeová mak “Maromak neʼebé fó kmaan ba ema iha situasaun hotu, nia fó kmaan ba ita iha ita-nia susar hotu”. (2 Kor 1:3, 4) Ita hatene katak Aman Jeová hadomi ita, no nia fó kmaan bainhira ita hasoru susar ruma. Karik Ita sei hanoin-hetan tempu neʼebé Jeová fó apoiu no matadalan ba Ita liuhusi ninia Liafuan. Ita bele fiar katak Jeová sempre fó buat neʼebé diʼak liu hotu ba ita hanesan buat neʼebé nia halo ona ba ninia atan sira iha tempu antigu.—Jer 29:11. w17.06 p. 4 par. 1-2

Ita-nia irmaun-irmán refujiadu sira-nia presiza laʼós kona-ba ai-han no roupa deʼit, sira mós presiza rona kona-ba liafuan neʼebé bele fó kmaan ba sira husi ema no husi eskritura. (Mt 4:4) Katuas sira bele ajuda buka ita-nia livru sira kona-ba Bíblia iha sira-nia língua ka ajuda buka irmaun-irmán sira neʼebé koʼalia sira-nia lian. Ajuda hanesan neʼe importante tebes tanba bainhira refujiadu sira halai, sira husik buat barak. Sira husik sira-nia família, komunidade, no kongregasaun. Sira presiza sente katak Jeová no irmaun-irmán sira hadomi nafatin sira. Selae, sira bele buka fali ajuda husi ema seluk neʼebé mai husi sira-nia rai maibé la adora Jeová. (1 Kor 15:33) Se ita mak ajuda sira atu sai parte ida ba kongregasaun, tuir loloos ita serbisu hamutuk ho Jeová atu proteje “ema estranjeiru” sira. Bainhira ema neʼebé fó terus ukun daudauk, neʼe hanetik refujiadu sira atu bele fila fali ba sira-nia rai. Refujiadu balu lakohi duni atu fila ba sira-nia rai tanba uluk ema fó terus ba sira. Tan neʼe, husu ba ita-nia an, ‘Se haʼu mak hasoru situasaun hanesan neʼe, haʼu hakarak ema seluk atu halo saida ba haʼu?’—Mt 7:12. w17.05 p. 6 par. 15-16

Tanba ita moris daudauk iha Satanás nia mundu aat neʼe, iha buat barak mak bele halo ita laran-tun. (1 João 5:19) Maibé se ita mak sai laran-tun demais, neʼe bele halo fraku ita-nia fiar no halo ita-nia domin sai malirin. Porezemplu, karik ita hasoru problema balu kona-ba idade, saúde, ka ekonomia. Ka karik ita sente triste tanba ita la bele kumpre knaar ruma ho didiʼak tuir ita-nia hakarak. Karik ita sai laran-tun tanba buat balu la sai loos tuir ita-nia hanoin. Maski problema saida deʼit mak ita hasoru, ita sei nunka fiar katak Jeová husik ona ita. Hanoin kona-ba liafuan furak husi Salmo 136:23: “Nia hanoin-hetan ita bainhira ema hamoe ita, tanba ninia domin neʼebé laran-metin iha ba nafatin.” Sin, ita bele fiar katak Jeová rona ba ita-nia “harohan atu husu ajuda” no nia sei hatán ba orasaun sira-neʼe.—Sal 116:1; 136:24-26. w17.05 p. 18 par. 8

Eskritura iha Galásia 2:11-14, hatudu katak Pedro taʼuk ba ema. (Prov 29:25) Nia hatene Jeová nia haree kona-ba ema jentiu sira. Maski nuneʼe, nia taʼuk ema kristaun judeu sira husi Jeruzalein neʼebé hetan ona sirkunsizaun sei hanoin oinsá kona-ba nia se sira hatene katak nia ransu ho ema kristaun jentiu. Iha Antiokia, apóstolu Paulo hatete ba Pedro katak nia laran-makerek. Tanbasá? Tanba Paulo rasik rona oinsá Pedro defende ema jentiu. (Após 15:12; Gal 2:13) Pedro simu Paulo nia konsellu ho haraik-an. Eskritura la hatete katak Pedro lakon ninia knaar ruma. Maibé, ikusmai espíritu santu leno Pedro hakerek karta rua neʼebé sai parte ida ba Bíblia. Kongregasaun nia ulun Jesus, kontinua uza Pedro. (Éf 1:22) Tuir loloos neʼe fó oportunidade ba irmaun-irmán sira iha kongregasaun atu banati-tuir Jesus no ninia Aman hodi fó perdua ba Pedro, ema neʼebé la perfeitu. Diʼak se la iha ema ida mak sidi kona-ba Pedro nia sala. w17.04 p. 27 par. 16-18

Jeová halakon ema hotu husi área neʼe tomak hodi hapara buat aat neʼebé akontese daudaun iha tempu neʼebá. Maibé nia mós “hatudu ezemplu kona-ba buat neʼebé sei mosu ba ema aat sira” ohin loron. Iha futuru Jeová sei halakon atividade neʼebé la morál iha mundu aat neʼe hanesan uluk nia halo ona iha Lot nia tempu. Saida mak sei troka fali atividade aat sira-neʼe? Iha mundu foun, ita sei halo atividade barak neʼebé lori haksolok. Porezemplu, ita sei halo mundu neʼe sai paraízu no harii ita-nia uma rasik no ajuda harii uma ba ita-nia família no belun sira. Ita mós sei simu fali ema rihun ba rihun neʼebé hetan moris-hiʼas no hanorin sira kona-ba Jeová no kona-ba buat hotu neʼebé Jeová halo ona ba ema. (Isa 65:21, 22; Após 24:15) Iha tempu neʼebá, ita sei iha atividade barak atu halo neʼebé lori haksolok ba ita no lori hahiʼi ba Jeová! w17.04 p. 12 par. 11-12

Kuandu halo promesa neʼe, karik Jefte hatene katak ninia oan-feto bele sai husi uma atu hasoru nia. Maski nia hatene ka la hatene, ita bele fiar katak la fasil duni ba Jefte no ninia oan atu kumpre juramentu neʼe. Bainhira Jefte haree ninia oan, nia sente laran-triste. Ninia oan-feto “tanis tanba nia sei nunka kaben”. Jefte nia jerasaun la bele hatutan ona, tanba nia la iha oan-mane, no agora ninia oan-feto mesak mós sei nunka kaben no atu iha oan. Maibé Jefte no ninia oan hatene katak sira-nia sentimentu rasik laʼós buat neʼebé importante liu. Jefte hatete: “Haʼu loke ona haʼu-nia ibun ba Jeová, no haʼu la bele dada fali.” Ninia oan-feto hatete: “Halo ba haʼu tuir buat neʼebé Ita promete ona.” (Juíz 11:35-39) Jefte no ninia oan-feto mak ema neʼebé laran-metin tebes ba Jeová. Sira nunka hanoin atu la kumpre promesa ida ba Jeová, maski susar ba sira atu halo ida-neʼe.—Deut 23:21, 23; Sal 15:4. w17.04 p. 4 par. 5-6

José sai vítima ba hahalok neʼebé la justisa. Foufoun, ninia maun sira faʼan nia hodi sai atan bainhira nia maizumenus tinan 17. Tuirmai, ema duun-matak katak nia atu estraga ninia patraun nia feen no ema hatama nia ba komarka. (Gên 39:11-20; Sal 105:17, 18) Maski José mak laran-metin ba Maromak, haree hanesan nia simu fali kastigu duké hetan bensaun. Maibé liutiha tinan 13, situasaun troka. José sai husi komarka no nia hetan pozisaun nuʼudar ema segundu iha rai-Ejitu tomak. (Gên 41:14, 37-43; Após 7:9, 10) José hola ba lia ka lae kona-ba hahalok la justisa neʼebé nia hasoru? Nia iha hanoin katak Maromak Jeová mak husik nia ka lae? Lae. Entaun saida mak ajuda José hodi hein ho pasiénsia? Ninia fiar ba Jeová. Nia rekoñese katak Jeová mak iha kbiit atu kontrola buat hotu. Ita bele hatene ida-neʼe liuhusi buat neʼebé nia koʼalia ba ninia maun sira, nia dehan: “Maski uluk imi hakarak atu halo aat ba haʼu, maibé Maromak troka fali ida-neʼe hodi sai buat diʼak no salva ema barak nia moris, hanesan nia halo agora daudaun.” (Gên 50:19, 20) José hatene katak hodi hein ba Jeová, neʼe sei la sai saugati deʼit. w17.08 p. 4 par. 6; p. 6 par. 12-13