Abríl

Serbisu neʼebé katuas sira halo lori benefísiu saida ba ita? Ita bele halo tuir sira-nia fiar no ezemplu diʼak, no ita mós bele halo tuir konsellu neʼebé sira fó liuhusi Bíblia. (Ebr 13:7, 17) Katuas sira hadomi ita no hakarak ita atu hakbesik ba Maromak. Se sira haree ita falta reuniaun ka lakon ita-nia ksolok, sira sei koko atu fó ajuda lalais ba ita. Sira hakarak rona ba ita no fó laran-manas no konsellu husi Bíblia ba ita. Ita haree ajuda neʼebé sira fó hatudu sai Jeová nia domin ba Ita ka lae? Presiza hatene katak dala ruma la fasil ba katuas sira atu fó konsellu ba ita. Entaun, oinsá mak Ita bele halo fasil ba katuas sira atu fó konsellu Ita? Hatudu haraik-an, keta taka dalan ba sira hodi koʼalia ho Ita, no simu ho laran. Haree ajuda neʼebé sira fó mak evidénsia ida husi Maromak nia domin. Halo nuneʼe sei lori benefísiu ba Ita no mós fó ksolok ba katuas sira atu halaʼo sira-nia knaar. w18.03 p. 31 par. 15-16

Labarik ida-idak la hanesan. Balu sai maduru lalais liu fali labarik seluk. Balu komprende lia-loos, halo desizaun ho matenek, no hakarak hetan batizmu maski sira idade kiʼik. Maibé, balu karik seidauk prontu atu hetan batizmu no presiza hein toʼo sira tinan boot tan uitoan. Duké obriga oan atu hetan batizmu, inan-aman neʼebé matenek ajuda oan laʼo ba oin tuir sira-nia kbiit. Inan-aman sira kontente bainhira oan halo tuir liafuan iha eskritura ba ohin. Maibé inan-aman tenke hanoin-hetan beibeik katak sira-nia objetivu mak atu ajuda oan sai Kristu nia dixípulu. Ho objetivu ida-neʼe, sira tenke husu ba sira-nia an, ‘Haʼu-nia oan nia koñesimentu toʼo ona ka lae atu dedika an ba Maromak no hetan batizmu?’ w18.03 p. 9 par. 6

Se ita mak hatán ona ba ema neʼebé konvida ita, la diʼak atu kansela se la iha razaun neʼebé loos. Karik ema neʼebé konvida ita prepara ona buat barak hodi hein ita, tan neʼe se ita kansela, buat hotu neʼebé nia prepara sei sai estraga deʼit. (Mt 5:37) Ema balu kansela tanba sira hetan fali konvite neʼebé diʼak liu. Hahalok hanesan neʼe hatudu domin no respeitu ka lae? Tuir loloos ita tenkesér agradese ba buat neʼebé ema halo ba ita. (Lc 10:7) Se ita presiza duni atu kansela, diʼak atu fó-hatene kedas ba ema neʼebé konvida ita, tanba halo nuneʼe hatudu domin no hanoin ema. Importante mós atu hatudu respeitu ba rai ida-idak nia kostume. Iha kultura balu, ema neʼebé la hetan konvite mós bele vizita. Maibé iha kultura seluk, diʼak atu halo arranju uluk antes vizita ema ruma. Iha kultura balu, bainhira uma-naʼin konvida bainaka ruma, la diʼak ba bainaka sira atu simu kedas konvite neʼe ba dala primeiru ka dala segundu. Maibé iha kultura seluk, se ema la simu kedas konvite ida, neʼe la hatudu respeitu. Ita tenke hakaʼas an atu halo buat neʼebé lori ksolok ba ema neʼebé konvida ita. w18.03 p. 18 par. 20-21

Iha deʼit koñesimentu husi Bíblia seidauk toʼo atu sai ema neʼebé espirituál. (1 Reis 4:29, 30; 11:4-6) Entaun, ita presiza halo saida tan? Kontinua laʼo ba oin iha lia-loos. (Kol 2:6, 7) Dalan importante ida mak hodi estuda livru “Hela Nafatin iha Maromak nia Domin”. Livru neʼe bele ajuda Ita atu hatene oinsá hodi uza Bíblia nia prinsípiu sira iha Ita-nia moris. Se Ita estuda ona livru neʼe, sei iha livru seluk tan neʼebé Ita bele uza hodi ajuda Ita hamriik metin iha lia-loos. (Kol 1:23) Ita mós presiza medita kona-ba informasaun neʼebé ita lee no husu Jeová ajuda ita oinsá bele uza informasaun sira-neʼe. Bainhira ita estuda no medita, ita-nia objetivu mak atu haburas hakarak hodi halo buat neʼebé Jeová simu no halo tuir ninia ukun-fuan sira. (Sal 40:8; 119:97) Ita mós presiza hakribi buat hotu neʼebé bele hanetik ita atu laʼo ba oin iha lia-loos.—Tito 2:11, 12. w18.02 p. 24-25 par. 7-9

Atu ita bele haburas fiar hanesan Noé mak hodi estuda didiʼak Maromak nia Liafuan, aprende ho laran, no uza koñesimentu neʼebé ita hetan hodi halo mudansa ba ita-nia hahalok no halo desizaun neʼebé diʼak. (1 Ped 1:13-15) Fiar no matenek husi Maromak sei proteje ita atu la monu ba Satanás nia lasu no hasees an husi mundu nia hanoin. (2 Kor 2:11) Ema barak iha mundu neʼe gosta violénsia no hahalok la morál, tan neʼe sira fokus liu ba hakarak isin nian. (1 João 2:15, 16) Sira lakohi hatene kona-ba sinál oioin neʼebé hatudu katak, lakleur tan Maromak nia loron boot sei toʼo mai. Se ita-nia fiar mak la metin, karik ita mós sei hatudu hahalok hanesan sira. Bainhira Jesus halo komparasaun kona-ba ita-nia tempu ho Noé nia tempu, nia la koʼalia deʼit kona-ba violénsia ka hahalok la morál, nia mós fó avizu kona-ba perigu oioin neʼebé bele hanetik ita atu serbí Jeová. (Mt 24:36-39) Husu ba Ita-nia an: ‘Haʼu-nia moris hatudu katak haʼu hatene duni Jeová ho loloos ka lae? Haʼu-nia fiar book haʼu atu moris tuir Maromak nia morál no hanorin fali ema seluk ka lae?’ Ita-nia resposta ba pergunta sira-neʼe sei ajuda Ita atu hatene Ita mós laʼo ho Maromak neʼebé loos hanesan Noé ka lae.—Gên. 6:9. w18.02 p. 9-10 par. 8-10

Ita hatene katak ita la bele hasees an husi ema hotu neʼebé hatudu hahalok ne’ebé Maromak la simu. Karik ita presiza serbisu hamutuk ho sira, eskola hamutuk ho sira, ka hela hamutuk ho sira. Maibé ita la presiza hanoin ka hatudu hahalok hanesan sira-nian. Saida mak bele ajuda ita? Ita bele hametin ita-nia relasaun diʼak ho Jeová liuhusi estuda Bíblia no hili ema neʼebé hadomi nia atu sai ita-nia belun. Ita mós hakarak ajuda ema seluk atu hatene kona-ba Jeová. Buka oportunidade hodi haklaken, no husu Jeová ajuda Ita atu koʼalia liafuan tuir tempu neʼebé loos. Ita presiza fó-hatene ba ema seluk katak Ita mak Testemuña ba Jeová, atu nuneʼe, Ita-nia hahalok diʼak lori glória ba Jeová, laʼós ba ita-nia an. Jeová hanorin ona ita atu “la simu hahalok neʼebé la tuir ninia hakarak, no atu la simu hakarak mundu nian, maibé atu moris ho hanoin neʼebé loos no hahalok loos no serbí Maromak ho laran-metin iha mundu ohin neʼe nian.” (Tito 2:11-14) Se ita mak halo tuir Jeová no halo buat neʼebé nia hakarak ita atu halo, ema seluk mós sei haree kona-ba neʼe. Karik ema balu sei hatete: “Ami hakarak bá hamutuk ho imi, tanba ami rona ona katak Maromak hamutuk ho imi.”—Zac 8:23. w18.01 p. 31 par. 17-18

Sala ka lae atu hadomi ita-nia an? Lae. Ita presiza hadomi ita-nia an no neʼe mak buat neʼebé baibain, tanba Jeová mak kria ita hanesan neʼe. Jesus dehan: “Ó tenke hadomi ó-nia maluk hanesan ó-nia an rasik.” (Mc 12:31) Tuir loloos, ita la bele hadomi ema seluk se ita la hadomi ita-nia an. Bíblia mós hatete: “Laʼen sira tenke hadomi sira-nia feen nuʼudar sira-nia isin rasik. Ema neʼebé hadomi nia feen hadomi nia an rasik, tanba la iha mane ida neʼebé odi ninia isin rasik; maibé nia fó han no hafolin ida-neʼe.” (Éf 5:28, 29) Tan neʼe la sala atu hadomi ita-nia an. Maibé domin neʼebé temi iha 2 Timóteo 3:2 mak domin neʼebé hanoin an deʼit. Se ema ida mak hadomi demais ninia an, neʼe bele halo nia hanoin deʼit kona-ba nia an rasik. (Rom 12:3) Nia la hanoin tan kona-ba ema seluk. Se buat ruma sala, nia la simu ninia sala, maibé fó sala deʼit ba ema seluk. Ema hanesan neʼe nunka iha ksolok neʼebé loos. w18.01 p. 23 par. 4-5

Ita rona ba Jeová liuhusi estuda Bíblia, no bainhira ita halo orasaun, ita koʼalia ba nia. Ita la bele haree orasaun hanesan toman deʼit ka buat neʼebé atu lori sorte ba Ita-nia moris. Orasaun mak dalan atu koʼalia ba ita-nia Kriadór. Jeová hakarak rona Ita koʼalia ba nia. (Flp 4:6) Tan neʼe mak bainhira Ita sente laran-taridu kona-ba buat ruma, Bíblia hatete atu ‘entrega Ita-nia laran-susar hotu ba Jeová’. (Sal 55:22) Irmaun-irmán rihun ba rihun bele fó prova ba Ita katak halo orasaun ajuda duni sira. Halo orasaun mós bele ajuda Ita! Ita la halo orasaun tan deʼit ita hakarak hetan ajuda husi Jeová. Dala ruma ita preokupa liu kona-ba ita-nia problema sira toʼo ita la haree tan bensaun sira neʼebé ita simu. Tan neʼe koko atu halo buat tuirmai neʼe: Iha loron ida-idak, koko hanoin kona-ba bensaun tolu neʼebé Ita simu, depois fó agradese ba Jeová kona-ba bensaun sira-neʼe. w17.12 p. 25 par. 10-11

Tinan-tinan, estudante Bíblia rihun ba rihun dedika sira-nia an ba Jeová no hetan batizmu. Barak mak mane no feto joven neʼebé moris mai inan-aman iha ona lia-loos no sira hili duni moris neʼebé diʼak liu hotu. (Sal 1:1-3) Se Ita mak inan-aman kristaun ida, karik Ita mós hein ba loron neʼebé atu haree Ita-nia oan hetan batizmu. (Kompara 3 João 4.) Nuʼudar inan-aman, Ita hakarak Ita-nia oan atu hatene kona-ba livru santu neʼebé ohin loron inklui Eskritura Lia-Ebraiku no Eskritura Lia-Gregu. Labarik neʼebé sei kiʼik mós bele aprende kona-ba ema ka akontesimentu neʼebé hakerek iha Bíblia. Inan-aman sira bele uza livru, broxura, no vídeo oioin neʼebé Jeová nia organizasaun halo hodi ajuda sira-nia oan. Loos duni, koñesimentu kona-ba Bíblia mak xave importante ida atu ajuda oan haburas relasaun neʼebé metin ho Jeová. w17.12 p. 18 par. 1; p. 19 par. 4

Oinsá se Ita mak irmán neʼebé laʼen la serbí Jeová? Ita sei halo saida se Ita-nia laʼen trata Ita iha dalan neʼebé ladiʼak? Karik Ita bele sai hirus no istori ho nia, maibé halo nuneʼe bele troka situasaun ka lae? Maski Ita mak manán bainhira istori malu, maibé neʼe bele halo nia hakarak atu serbí Jeová ka lae? Karik lae. Maibé se Ita hatudu respeitu ba nia nuʼudar família nia ulun, neʼe bele ajuda Ita-nia família atu sai hakmatek no lori glória ba Jeová. Karik Ita-nia ezemplu diʼak bele book Ita-nia laʼen hakarak atu serbí Jeová, se nuneʼe imi naʼin-rua sei manán kolen iha futuru. (1 Ped 3:1, 2) Oinsá se Ita mak irmaun neʼebé feen la serbí Jeová? Ita bele halo saida se Ita-nia feen la hatudu respeitu ba Ita? Se Ita mak sempre hakilar hodi hatudu katak Ita mak boot iha família, neʼe sei halo nia respeitu Ita ka lae? Lae. Maromak hakarak Ita atu sai laʼen neʼebé iha domin hanesan Jesus. Jesus sempre hatudu pasiénsia no domin nuʼudar ulun ba kongregasaun. (Lc 9:46-48) Se Ita mak banati-tuir Jesus, neineik-neineik karik Ita-nia feen mós sei hakarak atu serbí Jeová. w17.11 p. 28-29 par. 13-14

Ema neʼebé tuir mundu nia hanoin la rekoñese Jeová nia prinsípiu sira, no se ita la kuidadu, neineik-neineik sira-nia ideia bele halo fraku ita-nia fiar. Ohin loron, ita la bele subar husi ideia sira-neʼe, tanba televizaun, internét, serbisu, ka eskola sempre fó sai mundu nia hanoin. Ema iha rai barak hanoin katak la presiza fiar ba Maromak atu sai ema neʼebé diʼak. Sira koʼalia nuneʼe tanba sira nunka hanoin didiʼak kona-ba Maromak iha duni ka lae. Karik sira kontente ho sira-nia liberdade atu moris tuir sira-nia hakarak deʼit. (Sal 10:4) Ema seluk hanoin katak, se sira mak dehan, “Haʼu la presiza Maromak atu bele iha morál neʼebé diʼak”, neʼe halo sira sente hanesan ema neʼebé matenek. Loos ka lae hodi fiar katak la iha Kriadór? Ema balu sai konfuzaun tanba sira uza siénsia atu buka resposta ba pergunta neʼe. Maibé tuir realidade, resposta mak simples deʼit. Hanoin toʼok, uma ida bele mosu derrepente deʼit ka lae? Lae. Presiza ema ida atu harii uma neʼe. w17.11 p. 20-21 par. 2-4

Tanbasá mak importante ba ita atu tuir Memoriál? Ita hatene katak dalan ida atu adora Jeová mak liuhusi tuir reuniaun sira. Ita bele fiar katak Jeová no Jesus hatene ema ida-idak nia hakaʼas-an hodi tuir reuniaun importante liu hotu neʼe tinan-tinan. Ita hakarak hatudu ba Jeová no Jesus katak, se ita-nia saúde ka situasaun la hanetik ita, ita sei hakaʼas an ho kbiit tomak atu tuir Memoriál. Liuhusi ita-nia hakaʼas-an, ita hatudu ba Jeová katak reuniaun hotu importante tebes ba ita, no neʼe sei fó razaun ida tan ba Jeová atu “hanoin-hetan” ita no hakerek ita-nia naran iha “livru moris nian”. Livru neʼe sei hakerek deʼit ema sira-nia naran neʼebé Jeová hakarak fó moris rohan-laek. (Apok 20:15) Semana balu antes Memoriál, diʼak atu uza tempu balu hodi halo orasaun no hanoin didiʼak kona-ba ita-nia relasaun ho Jeová metin ka lae.—2 Kor 13:5. w18.01 p. 13 par. 4-5

Bainhira ema tama ba sidade protesaun, nia seguru ona, tanba Jeová hatete katak: “Sidade sira-neʼe sei sai nuʼudar fatin protesaun nian.” (Jos 20:2, 3) Jeová la husu atu halaʼo tesi-lia dala ida tan ba ema neʼe kona-ba kazu neʼebé hanesan. Vítima nia família mós la bele tama ba sidade neʼe atu oho ema neʼe. Bainhira nia iha ona sidade laran, nia hetan ona protesaun husi Jeová. Sidade protesaun laʼós hanesan komarka, tanba ema neʼe bele halo serbisu, fó ajuda ba ema seluk, no serbí Jeová ho hakmatek. Sin, ema neʼe bele moris ho kontente! Maromak nia povu balu bele fó sala nafatin ba sira-nia an kona-ba sala boot neʼebé sira halo maski sira arrepende an ona. Balu bele sente katak Jeová sei nunka haluha kona-ba sala neʼebé sira halo. Se Ita mak sente nuneʼe, fiar bá katak, bainhira Jeová fó perdua, nia la hanoin tan kona-ba Ita-nia sala sira. Tan neʼe Ita la presiza fó sala tan ba Ita-nia an. w17.11 p. 9 par. 6; p. 11 par. 13-14

Dalan ida atu haburas unidade mak hodi hanoin didiʼak kona-ba paun no tua-uvas signifika saida. Diʼak atu hanoin kona-ba neʼe antes Memoriál, no liuliu iha kalan atu halaʼo Memoriál. (1 Kor 11:23-25) Paun fermentu laek reprezenta Jesus nia isin perfeitu neʼebé nia hasaʼe nuʼudar sakrifísiu. Tua-uvas reprezenta Jesus nia raan. Ita presiza hanoin-hetan katak Jesus nia sakrifísiu mai husi hahalok domin neʼebé boot liu hotu, neʼe mak domin husi Jeová hodi fó ninia Oan ba ita, no domin husi Jesus hodi fó ninia moris ho hakarak rasik ba ita. Bainhira ita hanoin didiʼak kona-ba Jeová no Jesus nia domin, neʼe sei book ita atu hadomi fali sira. Liuhusi domin neʼebé ita hotu hatudu ba Jeová sei hametin duni ita-nia unidade. w18.01 p. 15 par. 11

Jeová hadomi tebes ema. Nia hafolin tebes ita toʼo uza ninia Oan-Mane nia raan atu fó moris rohan-laek ba ita. (João 3:16) Se Jeová mak la kumpre ninia promesa kona-ba ita-nia futuru, neʼe hatudu katak Satanás ho sira neʼebé kontra Jeová mak loos. Satanás hatete katak Jeová mak bosok-teen ida neʼebé nunka fó buat diʼak ba ema, no Nia ukun la ho justisa. Sira neʼebé kontra Jeová goza nia kona-ba nia promesa hodi dehan: “Nia promete katak nia sei mai fali, maibé nia iha neʼebé? Husi ita-nia beiʼala sira-nia tempu, buat hotu kontinua hanesan deʼit husi tempu neʼebé Maromak kria mundu.” (2 Ped 3:3, 4) Tan neʼe, dalan neʼebé Jeová prova katak nia iha direitu atu ukun tenkesér inklui mós salva ema sira neʼebé laran-metin ba nia. (Isa 55:10, 11) Jeová nia ukun nakonu ho domin, tan neʼe ita bele fiar katak nia sempre hadomi no hafolin ninia atan sira neʼebé laran-metin.—Êx 34:6. w17.06 p. 23 par. 7

Husi tempu neʼebé Jeová promete atu fó nia Oan-Mane nia sakrifísiu hanesan temi iha Gênesis 3:15, nia hatene katak ninia arranju neʼe sei sai susesu. Ikusmai, liutiha tinan 4.000, Jeová fó duni nia Oan-Mane mesak nia moris sai hanesan sakrifísiu ba ema. (João 3:16) Ita agradese tebes ba Jeová nia domin neʼe! Ita ema la perfeitu bele hatudu domin neʼebé la hanoin an deʼit ka lae? Bele. Jeová kria ita tuir nia ilas. Porezemplu, Abel la hanoin an deʼit hodi hatudu domin liuhusi fó buat neʼebé diʼak liu hotu ba Jeová. (Gên 4:3, 4) Noé mós hatudu domin neʼebé la hanoin an deʼit hodi haklaken Maromak nia mensajen ba tinan barak maski ema la rona ba nia. (2 Ped 2:5) No Abraão mós hatudu katak nia iha domin ba Maromak liu fali buat hotu tanba nia prontu atu hasaʼe nia oan doben Isaac nuʼudar sakrifísiu. (Tgo 2:21) Ita mós hakarak hatudu domin hanesan ema laran-metin sira-neʼe maski la fasil atu halo nuneʼe. w17.10 p. 7-8 par. 3-4

Liuhusi Jesus nuʼudar ita-nia Amlulik Boot, ita iha razaun barak atu fiar katak, “ita bele simu laran-sadiʼa no hetan ajuda iha tempu neʼebé loos liuhusi Maromak nia laran-diʼak neʼebé boot”. (Ebr 4:16) Tan neʼe ita presiza tau fiar ba Jesus nia sakrifísiu atu bele hetan protesaun husi Jeová. Tenkesér fiar katak Jesus mós fó sakrifísiu neʼe ba Ita rasik. (Gal 2:20, 21) Ita tenke fiar katak, tanba Jesus nia sakrifísiu neʼe mak Jeová fó perdua ba Ita-nia sala sira. Ita tenke iha fiar katak Jesus nia sakrifísiu mak fó esperansa ba Ita atu moris ba nafatin. Jesus nia sakrifísiu mak Jeová nia prezente ba Ita! Bainhira Jeová fó ona perdua ba ita-nia sala, ita la presiza taʼuk tan katak Jeová sei keʼe sai fali ita-nia sala sira ka fó kastigu ba ita kona-ba sala sira-neʼe. (Sal 103:8-12) Sin, ita bele tau fiar tomak ba Jeová nia perdua. w17.11 p. 11-12 par. 14-17

Iha tempu neʼebé Jesus halaʼo Naʼi nia Han Kalan primeiru, nia halo orasaun espesiál ida. Nia halo orasaun kona-ba unidade furak entre nia ho ninia Aman. Nia mós halo orasaun hodi ninia dixípulu sira bele iha unidade neʼebé hanesan. Jeová hatán duni ba ninia Oan doben nia orasaun neʼe. Memoriál hatudu ho klaru katak Testemuña ba Jeová iha unidade. Ema rihun ba rihun fiar katak Jeová mak haruka duni ninia Oan-Mane. Iha fatin balu, ema nunka rona kona-ba ema husi rasa oioin halibur hamutuk atu tuir reuniaun relijiaun nian no ema balu hakribi reuniaun sira hanesan neʼe. Maibé Jeová no Jesus la sente hanesan neʼe, ba sira unidade iha tempu Memoriál mak buat neʼebé furak tebes! Nuʼudar Jeová nia povu, ita la hakfodak kona-ba unidade neʼebé ita iha daudaun. Jeová fó-hatene nanis ona katak neʼe sei akontese.—Eze 37:15-17; Zac 8:23. w18.01 p. 14 par. 7-9

“Badain sira” mak ulun-naʼin judeu sira neʼebé lakohi simu Mesias. Sira laʼós deʼit la rona Jesus ka la simu nia nuʼudar Kristu, maibé sira ho ema judeu barak hakribi tebes Jesus toʼo husu Pilatos hodi oho Jesus. (Lc 23:18-23) Sin, sira mós iha responsabilidade ba Jesus nia mate. Se ema lakohi simu no oho Jesus, oinsá mak nia bele sai “fatuk neʼebé importante liu”? Jesus tenkesér moris fali husi mate atu kumpre liafuan neʼe. Apóstolu Pedro koʼalia kona-ba “Jesus Kristu husi Nazaré . . . neʼebé imi hedi ona maibé Maromak halo nia moris fali husi mate”. (Após 3:15; 4:5-11; 1 Ped 2:5-7) Bainhira Jesus hetan ona moris-hiʼas, nia mesak deʼit mak simu pozisaun neʼebé “la iha naran seluk iha lalehan nia okos neʼebé Maromak hili tiha ona atu salva ita”.—Após 4:12; Éf 1:20. w17.12 p. 9-10 par. 6-9

Bainhira Jesus koʼalia kona-ba tempu terus boot neʼebé besik ona atu mai, nia dehan: “Sira sei haree Oan-Mane husi ema, no nia sei mai iha kalohan iha lalehan ho kbiit no ho glória boot. No [Jesus] sei haruka ninia anju sira, no ho lian trombeta nian neʼebé boot, sira sei halibur ema neʼebé Maromak hili ona.” (Mt 24:29-31) Tempu atu “halibur ema neʼebé Maromak hili ona” refere ba tempu neʼebé Kristu nia alin restu sira neʼebé sei moris iha rai sei simu sira-nia kolen atu saʼe ba lalehan. Ida-neʼe sei akontese bainhira terus boot hahú ona maibé antes funu Armajedón komesa. Iha funu neʼe, Jesus hamutuk ho ema naʼin-144.000 sei funu hasoru liurai hotu iha rai no manán sira. (Apok 17:12-14) Memoriál ikus neʼebé ita sei tuir mak ida neʼebé antes Jesus “mai fali” atu halibur ninia alin sira ba lalehan. w18.01 p. 16 par. 15

Jesus “moris ba nafatin” iha lalehan. (Apok 1:5, 18; Rom 6:9; Kol 1:18; 1 Ped 3:18) Nia halo promete ba ninia apóstolu laran-metin sira katak sira mós sei ukun hamutuk ho nia iha lalehan. (Lc 22:28-30) Paulo hatete katak “Kristu moris hiʼas ona husi mate, nia mak hanesan ai-fuan primeiru husi ema hotu neʼebé mate”. Nia dehan tan katak sira seluk sei hetan moris-hiʼas atu saʼe ba lalehan. Nia dehan: “Ida-idak tuituir malu: Kristu mak hanesan ai-fuan primeiru, depois neʼe mak sira neʼebé Kristu nian durante tempu neʼebé nia toʼo ona mai.” (1 Kor 15:20, 23) Tempu neʼebé Kristu “toʼo ona mai” komesa husi 1914. Ita sei moris hela iha tempu neʼe, no mundu aat nia rohan besik loos ona. w17.12 p. 10 par. 11; p. 11 par. 14-16

Ita-nia Aman laran-diʼak mós lakon ona ema balu neʼebé nia hadomi iha mate, hanesan ninia atan Abraão, Isaac, Jacob, Moisés, no Liurai David. (Núm 12:6-8; Mt 22:31, 32; Após 13:22) Bíblia hatete katak Jeová hein namanas atu fó moris-hiʼas fali ba ema laran-metin sira-neʼe. (Job 14:14, 15) Iha tempu neʼebá, sira sei hetan ksolok neʼebé boot no iha saúde neʼebé perfeitu. Jeová mós lakon ona ninia Oan-Mane iha mate. Bíblia hatete katak Jesus mak ida neʼebé Maromak “gosta tebes husi loron ba loron”. (Prov 8:22, 30) Ita la bele komprende kona-ba Jeová nia sentimentu bainhira nia haree ninia Oan-Mane mate iha dalan neʼebé terus tebes. (João 5:20; 10:17) Ita bele fiar ho laran tomak katak Jeová sei ajuda ita. Tan neʼe mak ita bele halo orasaun ba nia iha tempu naran deʼit atu fó sai ita-nia sentimentu triste kona-ba ema neʼebé ita hadomi mate. Hodi hatene katak Jeová komprende kona-ba ita-nia sentimentu no nia sei fó ajuda ba ita, neʼe fó kmaan tebes ba ita!—2 Kor 1:3, 4. w17.07 p. 13 par. 3-5

Ohin loron, iha ema naʼin millaun ualu liu mak sira-nia laran book sira atu uza “sasán neʼebé folin-boot” hanesan sira-nia tempu, forsa, no sasán sira atu apoia harii Jeová nia templu espirituál. (Prov 3:9) Sin, Jeová nunka haluha kona-ba serbisu neʼebé ita halo no domin neʼebé ita hatudu ba nia. Iha loron ikus sira-neʼe Jeová nia povu halo ona serbisu importante barak. Ida-neʼe hatudu duni katak Jeová mak haraik bensaun no Kristu mak dirije Maromak nia povu. Ita haksolok tebes hodi bele sai parte ba organizasaun ida neʼebé metin, seguru, no dura ba nafatin Tan neʼe, hafolin nafatin Ita-nia parte iha Jeová nia povu nia leet no ‘rona ba Jeová, ita-nia Maromak, nia lian’. (Zac 6:15) Hodi halo nuneʼe mak ita-nia Liurai no Amlulik Boot bele proteje Ita. Hakaʼas an atu kontinua fó apoiu ba adorasaun neʼebé loos, no Jeová sei fó protesaun ba Ita toʼo mundu aat neʼe ramata, no ba nafatin! w17.10 p. 30 par. 18-19

Lakleur, Satanás nia sistema polítiku, relijiaun, no ekonomia sei lakon hotu. Profeta Ezequiel no Sofonias fó-hatene nanis katak osan-mean ho osan-mutin neʼebé sempre sai hanesan sasán importante ba sistema ekonomia nian sei sai folin-laek iha futuru. (Eze 7:19; Sof 1:18) Hanoin toʼok se aban-bainrua ita sai ona ferik no katuas, no ita haree katak, uluk ita uza ita-nia moris tomak hodi buka deʼit rikusoin mundu aat neʼe nian duké buka rikusoin neʼebé loos, ita sei sente oinsá? Karik neʼe sei halo ita sente hanesan ema ida neʼebé serbisu iha ninia moris tomak hodi buka deʼit osan, maibé ikusmai nia foin hatene katak tuir loloos osan sira-neʼe osan falsu. (Prov 18:11) Sin, sasán husi mundu neʼe aban-bainrua sei lakon. Tan neʼe, uza didiʼak sasán neʼebé ita iha hodi halo belun ho Jeová no Jesus. Buat neʼebé ita halo ba Jeová ho ninia Ukun sei lori ksolok neʼebé loos ba ita. w17.07 p. 11 par. 16

Ema balu neʼebé monu ba sala boot koko atu taka sira-nia sala. Karik sira halo nuneʼe tanba sira sente moe ka tanba lakohi halo ema seluk laran-tun. (Prov 28:13) Maibé taka sala mak hahalok neʼebé la iha domin tanba bele estraga ema neʼebé halo sala no mós ema seluk. Oinsá? Karik neʼe bele hanetik Jeová atu haraik ninia espíritu santu ba kongregasaun, no kongregasaun mós sei la iha dame. (Éf 4:30) Tan neʼe, se ema ida mak monu ba sala boot, domin neʼebé loos sei book nia atu koʼalia ba katuas kongregasaun sira hodi husu ajuda. (Tgo 5:14, 15) Domin mak hahalok neʼebé importante liu hotu. (1 Kor 13:13) Domin hatudu sai sé mak Jesus nia dixípulu neʼebé loos, no sé mak halo tuir Jeová, domin nia Hun. Apóstolu Paulo hatete katak se nia mak la iha domin, nia la folin buat ida. (1 Kor 13:2) Tan neʼe, mai ita hotu kontinua hatudu domin, laʼós ho “liafuan” deʼit, maibé ho “hahalok no lia-loos”.—1 João 3:18. w17.10 p. 11 par. 17-18

José hatudu aten-brani bainhira Potifar nia feen tenta nia atu halo sala-foʼer seksuál. Karik nia hatene ona katak se nia la halo tuir, neʼe sei lori perigu ba ninia moris. Maibé duké halo tuir deʼit, nia hatudu aten-brani hodi halai kedas husi Potifar nia feen. (Gên 39:10, 12) Rahab mak ezemplu ida tan kona-ba hatudu aten-brani. Bainhira espiaun husi Izraél bá ninia uma iha Jerikó, ho aten-brani nia subar mane naʼin-rua neʼe no ajuda sira halai sai husi sidade. (Jos 2:4, 5, 9, 12-16) Bainhira ema saduseu koko atu hapara sira, apóstolu sira neʼebé laran-metin no haree ona oinsá Jesus hatudu aten-brani, sira la taʼuk no kontinua hanorin kona-ba Jesus. (Após 5:17, 18, 27-29) José, Rahab, Jesus, no apóstolu sira hakarak halo buat neʼebé loos. Sira hatudu aten-brani laʼós tanba sira fiar ba sira-nia kbiit, maibé tanba sira sadere ba Jeová. Nuneʼe mós se ita presiza aten-brani, ita tenke sadere ba Jeová, laʼós ba ita-nia an.—2 Tim 1:7. w17.09 p. 29 par. 6-9

Ho ita-nia forsa rasik ita la iha kbiit atu hasai tiha hahalok tuan sira. Ema balu presiza luta maka’as hodi bele troka sira-nia moris uluk nian. Buat neʼebé ajuda sira mak forsa husi Maromak nia Liafuan no espíritu santu. (Lc 11:13; Ebr 4:12) Atu hetan forsa neʼe, ita tenke lee Bíblia loron-loron, hanoin kleʼan kona-ba eskritura sira, no halo beibeik orasaun atu husu matenek no kbiit hodi uza matadalan neʼebé ita aprende. (Jos 1:8; Sal 119:97; 1 Tes 5:17) Ita mós bele hetan ajuda husi Maromak nia Liafuan no espíritu santu liuhusi prepara no tuir reuniaun sira. (Ebr 10:24, 25) Ita hakarak duni atu aproveita ajuda hotu neʼebé Jeová nia organizasaun fó mai ita hanesan ita-nia livru sira, JW Broadcasting, JW Library, no jw.org. (Lc 12:42) Tan neʼe mak ema kristaun tenkesér hasai tiha hahalok tuan nian no la bele tau fali hodi Jeová simu ita. Maibé iha buat ida tan neʼebé ita presiza halo. Ita presiza tau fali hahalok foun.—Kol 3:10. w17.08 p. 21 par. 16-17

Liurai David hasoru hahalok la justisa barak. Bainhira nia sei joven, Jeová hili nia atu sai liurai ba nasaun Izraél. Maski atu sai liurai ba ninia suku deʼit mós David presiza hein ba tinan 15. (2 Sam 2:3, 4) Iha tempu neʼebé nia hein, nia tenke halai subar husi Liurai Saul tanba Saul hakarak oho nia. Tan neʼe mak David la iha uma iha tempu neʼebá no nia tenke hela deʼit iha ema nia rai ka hela iha fatuk-kuak iha rai-fuik sira. Ikusmai Saul mate iha funu. Maibé David presiza hein tan ba tinan hitu liu atu bele sai liurai ba nasaun Izraél tomak. (2 Sam 5:4, 5) Tanbasá mak David hakarak hein ho laran? David hatene katak Jeová hadomi nia no Jeová sei nunka husik nia. Nia mós hanoin kona-ba tempu uluk oinsá Jeová ajuda ona nia no nia hein ba tempu neʼebé Jeová sei halakon ninia terus hotu. (Sal 13:6) Sin, David mós fiar katak hodi hein ba Jeová, neʼe sei la sai saugati deʼit. w17.08 p. 6-7 par. 14-15

Nuʼudar tempu liu daudauk, língua mós iha mudansa. Karik iha tempu uluk ema komprende liafuan no fraze ruma nia signifika la hanesan ona ho ohin loron. Hanesan neʼe mós kona-ba língua antigu sira. Lia-ebraiku ho lia-gregu neʼebé ema koʼalia ohin loron, la hanesan ona ho lia-ebraiku no lia-gregu neʼebé ema uza hodi hakerek Bíblia iha tempu uluk. Ema barak la komprende ona língua antigu iha Bíblia orijinál, tan neʼe sira presiza tradús fali língua sira-neʼe. Ema balu hanoin katak, sira presiza aprende lia-ebraiku no lia-gregu antigu atu sira bele komprende didiʼak kona-ba Bíblia, maibé realidade mak neʼe la ajuda sira. Ita agradese tanba ohin loron ema tradús ona Bíblia kompletu ka la kompletu ba língua 3.200 liu. Neʼe mak Jeová nia hakarak atu ema husi “nasaun hotu, suku hotu, lian hotu” bele komprende kona-ba ninia Liafuan. (Apok 14:6) Ita bele fiar katak neʼe halo ita sente besik liután ba Maromak neʼebé iha domin no la todan ba sorin. w17.09 p. 19 par. 4

Se karik Ita-nia família ruma hasai husi kongregasaun, Ita presiza kontrola Ita-nia sentimentu atu la buka razaun hodi kontaktu sira. Se Ita hanoin-hetan katak Ita halo tuir daudauk Jeová nia ezemplu no halo tuir ninia mandamentu, neʼe bele halo fasil ba Ita atu kontrola an. Ita bele aprende husi Liurai David nia ezemplu. Bainhira Saul no Simei provoka nia, nia la sai hirus ka uza forsa hasoru sira. (1 Sam 26:9-11; 2 Sam 16:5-10) Maibé neʼe la dehan katak David sempre kontrola an. Ita hatene katak nia halo sala ho Batseba no nia sai hirus atu halo aat ba Nabal neʼebé hatudu hahalok karak-teen. (1 Sam 25:10-13; 2 Sam 11:2-4) Ita bele aprende lisaun importante husi David. Primeiru, liuliu ba irmaun sira neʼebé tau matan ba Maromak nia povu tenkesér kontrola an atu la uza sala sira-nia podér. Segundu, ita la bele fiar an demais hodi hanoin katak ita sei nunka monu ba tentasaun.—1 Kor 10:12. w17.09 p. 5-6 par. 12-13