Maiu

Dixiplina bele halo ita sente hanesan tudik mak sona fuan, maibé hakribi Maromak nia dixiplina sei lori rezultadu neʼebé halo ita sente fuan rahun tebes. (Ebr 12:11) Porezemplu, hanoin toʼok kona-ba buat neʼebé Caim halo. Caim odi tebes Abel toʼo hakarak oho nia. Tan neʼe Maromak koʼalia ba Caim: “Tanbasá mak ó sai hirus tebes no oin triste? Se ó halo fali buat neʼebé diʼak, haʼu sei simu ó, loos ka lae? Maibé se ó la fila hodi halo buat diʼak, sala mak hein hela iha odamatan atu ataka, no hakarak tebes atu domina ó; no ó bele luta hasoru hodi manán nia ka lae?” (Gên 4:6, 7) Caim lakohi rona. Nia hakribi Jeová nia dixiplina, oho ninia alin, no moris ho konsekuénsia aat husi ninia desizaun iha ninia moris tomak. (Gên 4:11, 12) Se Caim rona ba Maromak, nia la presiza halaʼo moris neʼebé lori terus ba nia. Jeová lakohi ita atu moris ho konsekuénsia aat neʼebé tuir loloos ita bele sees. (Isa 48:17, 18) Tan neʼe, mai ita “rona ba dixiplina atu [ita] bele sai matenek”.—Prov 8:33. w18.03 p. 32 par. 18-20

Oinsá mak Daniel hatene kona-ba Jeová? Ita bele fiar katak Daniel nia inan-aman mak hanorin nia hodi hadomi Jeová no Jeová nia Liafuan. Daniel hatudu domin neʼe iha ninia moris tomak, toʼo nia katuas mós nia estuda nafatin eskritura sira. Daniel hatene didiʼak kona-ba Jeová. Nia mós hatene kona-ba dalan neʼebé Jeová tau matan ba ema Izraél, no Daniel hatudu sai ninia koñesimentu neʼe liuhusi orasaun neʼebé nia temi iha Daniel 9:3-19. Diʼak atu uza tempu uitoan hodi lee no hanoin didiʼak kona-ba liafuan sira husi orasaun neʼe. La fasil ba ema judeu sira neʼebé laran-metin ba Jeová atu moris iha ema jentiu nia sidade, Babilónia. Porezemplu, Jeová hatete ba ema judeu sira: “Buka dame iha sidade neʼebé haʼu haruka imi bá nuʼudar dadur.” (Jer 29:7) Maibé iha tempu neʼebé hanesan nia hakarak sira atu adora nia mesak deʼit ho laran tomak. (Êx 34:14) Oinsá mak Daniel bele halo tuir Jeová nia mandamentu sira-neʼe? Matenek husi Maromak ajuda Daniel hodi hatene katak nia tenke halo tuir uluk Jeová, depois mak hakruʼuk ba ema nia ukun. Jesus mós hanorin prinsípiu neʼebé hanesan.—Lc 20:25. w18.02 p. 10 par. 11-12

Ita hasoru daudaun susar ruma kona-ba moras, ekonomia, ka ema fó terus ka lae? Dala ruma Ita sente susar atu iha nafatin ksolok hodi serbí Jeová ka lae? Se Ita mak sente nuneʼe, hanoin kona-ba Noé, Daniel, no Job nia moris bele lori kmaan ba Ita. Sira mós ema la perfeitu no hasoru ona susar neʼebé ita hasoru daudaun ohin loron. Dala ruma, sira hasoru situasaun neʼebé besik halakon sira-nia moris. Maibé sira laran-metin ba Jeová, no Jeová haree sira nuʼudar ezemplu neʼebé diʼak tebes kona-ba fiar no halo tuir. (Eze 14:12-14) Ezequiel hakerek liafuan sira iha eskritura ba ohin iha Babilónia iha tinan 612 molok Kristu. (Eze 1:1; 8:1) Iha tempu neʼebá, Jeruzalein besik ona atu naksobu iha tinan 607. Iha neʼebá, iha ema uitoan deʼit mak laran-metin hanesan Noé, Daniel no Job neʼebé halo tuir Jeová no ikusmai sira hetan salvasaun. (Eze 9:1-5) Hanesan neʼe mós ohin loron, ema neʼebé hatudu hahalok loos hanesan Noé, Daniel, no Job mak sei hetan salvasaun husi mundu aat neʼe nia rohan.—Apok 7:9, 14. w18.02 p. 3-4 par. 1-3

Se Ita mak joven ida, husu ba Ita-nia an: ‘Haʼu tuir reuniaun sira no bá haklaken tan deʼit inan-aman mak haruka ka lae? Ka haʼu rasik iha relasaun neʼebé metin ho Jeová?’ Ita hotu, maski joven ka idade, tenkesér iha planu espirituál sira. Planu sira-neʼe bele ajuda ita atu sai ema neʼebé espirituál liután. (Ecle 12:13) Bainhira ita hatene ona katak ita presiza halo mudansa ruma, halo kedas mudansa sira-neʼe. Neʼe importante tebes, tanba neʼe bele lori mate ka moris ba ita. (Rom 8:6-8) Jeová hakarak ita atu sai ema maduru iha lia-loos, laʼós atu sai perfeitu. No nia fó ninia espíritu santu hodi ajuda ita. Maski nuneʼe, ita rasik presiza hakaʼas an. Maski estuda Bíblia mak buat neʼebé furak tebes, maibé ita la bele lee Bíblia hanesan lee halimar livru novela deʼit, ita presiza hakaʼas an atu buka pontu murak husi eskritura sira neʼebé bele ajuda ita-nia moris. w18.02 p. 25 par. 10-11

Koñesimentu bele ajuda oan atu dedika an ba Maromak. Maibé neʼe la dehan katak oan presiza hatene buat hotu husi Bíblia foin bele dedika ninia an no hetan batizmu. Tanba Jesus nia dixípulu hotu kontinua aprende maski hetan ona batizmu. (Kol 1:9, 10) Entaun, ema ida presiza hatene kona-ba saida deʼit atu hetan batizmu? Esperiénsia husi família ida iha apóstolu sira-nia tempu bele ajuda inan-aman ohin loron. (Após 16:25-33) Iha tinan 50, bainhira Paulo halo hela ninia viajen segundu nuʼudar misionáriu, nia bá sidade Filipe. Ema iha sidade neʼe duun nia ho Silas, no kaer sira hodi hatama ba komarka. Iha kalan, rai-nakdoko makaʼas no odamatan iha sela hotu nakloke. Guarda hanoin katak dadur hotu halai ona, tan neʼe nia deside atu oho an. Maibé Paulo hapara nia. Liutiha neʼe, Paulo no Silas hanorin guarda ho ninia família lia-loos kona-ba Jesus. Sira tau fiar ba buat neʼebé sira aprende kona-ba Jesus no sira rekoñese katak sira tenke halo tuir Jesus. Tan neʼe sira hetan kedas batizmu. w18.03 p. 10 par. 7-8

Jeová mak Maromak kontente nian, no ninia povu mós ema neʼebé kontente. Jeová nia povu sente kontente tanba sira fó ba ema seluk, la hanesan ho ema neʼebé hadomi demais sira-nia an no hanoin deʼit atu hetan diʼak husi ema seluk. (Após 20:35; 2 Tim 3:2) Oinsá mak ita bele hatene katak ita hadomi ita-nia an liu fali hadomi Maromak? Hanoin didiʼak konsellu husi Bíblia neʼebé dehan: “Keta halo buat ida hodi buka atu manán deʼit ka foti an, maibé ho haraik an hodi haree ema seluk boot liu imi.” (Flp 2:3, 4) Karik bele husu ba ita-nia an: ‘Haʼu halo tuir konsellu neʼe ka lae? Haʼu buka dalan atu fó ajuda ba maluk seluk iha kongregasaun no iha serbisu haklaken ka lae?’ Dala ruma la fasil atu fó ita-nia tempu no forsa ba ema seluk. Tan neʼe ita presiza hakaʼas an no halo sakrifísiu hodi husik buat ruma neʼebé ita gosta halo. Maibé hodi hatene katak Ukun-Naʼin Boot Liu Hotu iha lalehan no rai kontente ho ita, neʼe halo ita sente haksolok tebes! w18.01 p. 23 par. 6-7

Oinsá mak ita bele halo nuneʼe? Husu ba ita-nia an: ‘Haʼu fiar duni ka lae katak neʼe mak organizasaun neʼebé Jeová uza hodi halaʼo ninia hakarak? Haʼu hakaʼas an hodi haklaken no hanorin Bíblia ba ema seluk ka lae? Haʼu-nia moris hatudu duni ka lae katak haʼu fiar ita moris daudaun iha loron ikus sira no lakleur tan Satanás nia ukun sei ramata? Haʼu-nia fiar ba Jeová no Jesus sei metin hanesan bainhira haʼu foin serbí Jeová ka lae?’ (Mt 24:14; 2 Tim 3:1; Ebr 3:14) Hanoin kona-ba pergunta hanesan neʼe bele ajuda ita atu “kontinua haree didiʼak” ita ema oinsá. Dalan ida atu prepara ba Memoriál mak hodi lee no medita kona-ba informasaun sira neʼebé esplika tanbasá Memoriál importante tebes. (João 3:16; 17:3) Dalan ida deʼit atu bele hetan moris rohan-laek mak hodi hatene Jeová no tau fiar ba ninia Oan-Mane Jesus. Atu prepara ba Memoriál, diʼak atu estuda informasaun neʼebé ajuda ita atu hakbesik liután ba Jeová no Jesus. w18.01 p. 13 par. 5-6

Bainhira Ita lee Bíblia ho ita-nia livru sira, no tuir reuniaun, Ita bele aprende husi ema seluk nia ezemplu kona-ba oinsá Maromak ajuda sira hodi laran-metin ba nia. Maibé nuʼudar Ita-nia relasaun ho Jeová sai metin ba daudaun, Ita rasik tenke haree oinsá mak Jeová ajuda Ita. Iha dalan saida mak Ita rasik koko ona katak Jeová mak diʼak? Ita hotu haree ona dalan neʼebé Jeová hatudu ninia diʼak ba ita. Nia konvida ona ita ida-idak atu hakbesik ba nia no ba ninia Oan-Mane. Ka Ita hanoin, ‘Jeová dada duni haʼu-nia inan-aman maibé haʼu tuir deʼit’? Presiza hanoin-hetan katak, iha tempu Ita dedika an ba Jeová no hetan batizmu, tuir loloos Ita hatudu katak Ita rasik mós haburas ona relasaun ho nia, tanba Bíblia hatete katak se ema ida mak hadomi Maromak, Maromak koñese ema neʼe. (1 Kor 8:3) Ita tenke hafolin priviléjiu neʼebé Ita ida-idak simu husi Jeová iha ninia organizasaun. w17.12 p. 26 par. 12-13

Liafuan “dixiplina” halo ema barak hanoin kedas kona-ba kastigu, maibé dixiplina envolve buat barak. Bíblia hatete katak dixiplina diʼak ba ita, no dala ruma eskritura temi liafuan neʼe hamutuk ho koñesimentu, matenek, domin, no moris. (Prov 1:2-7; 4:11-13) Neʼe tanba bainhira Maromak fó dixiplina, neʼe hatudu katak nia hadomi ita no hakarak ita atu moris ba nafatin. (Ebr 12:6) Maski dala ruma dixiplina neʼebé Maromak fó inklui kastigu, maibé kastigu neʼe la todan liu ka estraga ita. Tuir loloos signifika importante liu hotu husi liafuan “dixiplina” envolve edukasaun, hanesan edukasaun neʼebé inan-aman fó ba oan. Nuʼudar ema kristaun, ita mós parte ida husi Maromak nia umakain. (1 Tim 3:15) Ita-nia Aman Jeová iha direitu atu halo lei kona-ba saida mak loos no saida mak sala, no se ita la halo tuir, nia sei fó dixiplina ho domin ba ita. No mós, se buat neʼebé ita halo mak lori konsekuénsia ruma neʼebé ladiʼak, Jeová nia dixiplina bele ajuda ita atu hanoin-hetan katak importante duni atu halo tuir nia.—Gal 6:7. w18.03 p. 23 par. 1; p. 24 par. 3

Oinsá se Ita mak joven ida no Ita sente katak Ita-nia inan-aman la komprende Ita ka sira hakaʼas demais Ita? Karik neʼe bele halo Ita hirus tebes toʼo Ita hanoin atu la serbí tan Jeová. Maibé se Ita mak husik Jeová, Ita sei hatene katak la iha ema ida iha mundu neʼe mak hadomi Ita hanesan Ita-nia inan-aman ka maluk sira iha kongregasaun. Hanoin toʼok: Se Ita-nia inan-aman la korrije Ita, oinsá mak Ita hatene katak sira hadomi Ita? (Ebr 12:8) Sira laʼós ema neʼebé perfeitu, tan neʼe dalan neʼebé sira fó dixiplina bele halo Ita sai hirus. Maibé keta hanoin deʼit kona-ba neʼe. Koko atu komprende razaun tanbasá mak sira hakarak korrije Ita. Sai kalma nafatin no keta sai hirus. Hakaʼas an atu sai ema neʼebé maduru hodi simu konsellu no halo tuir konsellu neʼe maski dalan neʼebé inan-aman fó, Ita ladún gosta.—Prov 1:8. w17.11 p. 29 par. 16-17

Karik Ita haree ona joven barak neʼebé hetan batizmu, maibé ikusmai duvida fali kona-ba moris tuir Maromak nia morál sira. Balu mós husik ona lia-loos. Tan neʼe, karik Ita bele hanoin barak se Ita-nia oan komesa serbí Jeová, ikusmai sira-nia domin ba lia-loos bele sai malirin fali ka lae. Oinsá mak Ita bele ajuda Ita-nia oan atu iha nafatin domin neʼebé metin no “sai boot hodi hetan salvasaun”? (1 Ped 2:2) Ita bele aprende buat barak husi karta neʼebé Paulo hakerek ba Timóteo hodi dehan: “Kontinua halo tuir buat neʼebé ó aprende ona no buat neʼebé ema ajuda ó atu fiar, hodi hanoin-hetan sé mak hanorin ó buat sira-neʼe no mós katak husi kiʼik kedas ó hatene ona buat neʼebé hakerek iha livru santu [Eskritura Lia-Ebraiku], neʼebé fó matenek ba ó hodi hetan salvasaun liuhusi fiar iha Kristu Jesus.” (2 Tim 3:14, 15) Husi Paulo nia liafuan sira, nia dehan katak Timóteo (1) hatene ona buat neʼebé hakerek iha livru santu, (2) fiar metin buat neʼebé nia aprende, no (3) hetan ona matenek hodi hetan salvasaun liuhusi fiar iha Kristu Jesus. w17.12 p. 18-19 par. 2-3

Relijiaun barak hanorin kona-ba infernu, obriga ema fó osan, ka envolve ho polítiku sira. Tan neʼe mak iha ema barak neʼebé hatete katak, sira la iha relijiaun mós sira kontente ho sira-nia moris! Tuir loloos, se ita la tuir relijiaun neʼebé falsu, ita bele sai kontente duni. Maibé se ema ida mak la sai belun ho Jeová, “Maromak neʼebé kontente”, nia sei nunka bele iha ksolok neʼebé loos. (1 Tim 1:11) Buat hotu neʼebé Jeová halo lori diʼak ba ema. Tan neʼe mak nuʼudar ninia atan, ita mós iha ksolok tanba ita buka dalan oioin atu fó ajuda ba ema seluk. (Após 20:35) Porezemplu, hanoin toʼok oinsá mak adorasaun neʼebé loos bele ajuda família atu sai kontente. Adorasaun neʼebé loos hanorin ita atu respeitu no laran-metin ba ita-nia kaben, haboot oan atu iha morál neʼebé diʼak, no hadomi ema hotu iha ita-nia família. Adorasaun neʼebé loos ajuda Jeová nia povu atu iha unidade iha kongregasaun no hatudu domin ba irmaun-irmán sira. w17.11 p. 21 par. 6-7

Ohin loron, Maromak nia atan barak sente laran-kraik no estrese hanesan Paulo, tanbasá? Tanba maski ita hotu hakarak Jeová simu ita, maibé ita moris mai iha sala no la perfeitu. Tan neʼe ita bele sente laran-kraik bainhira ita halo buat neʼebé Jeová la simu. Ema kristaun balu neʼebé monu ba sala boot sente katak Jeová sei nunka fó perdua ba sira. Eskritura sira fó fiar ba ita katak, se ita mak buka protesaun husi Jeová, nia sei fó perdua ba ita. (Sal 34:22) Bainhira Paulo temi tiha katak nia sente “kasian loos” tanba nia la iha kbiit atu halo tuir Jeová iha dalan neʼebé kompletu, tuirmai nia dehan: “Obrigadu ba Maromak liuhusi Jesus Kristu ita Naʼi!” (Rom 7:25) Paulo nia liafuan katak sá? Maski Paulo luta daudaun hasoru hakarak neʼebé sala no halo ona sala iha tempu uluk, maibé nia arrepende an ona. Tan neʼe nia fiar katak Jeová fó ona perdua ba nia bazeia ba Jesus nia sakrifísiu. Jesus sosa ona ita liuhusi ninia sakrifísiu neʼe, tan neʼe ita bele iha konxiénsia neʼebé moos no laran neʼebé hakmatek. (Ebr 9:13, 14) Jesus nuʼudar ita-nia Amlulik Boot, “nia bele fó salvasaun neʼebé kompletu ba ema sira neʼebé hakbesik ba Maromak liuhusi nia, basá nia moris nafatin hodi harohan ba sira”.—Ebr 7:24, 25. w17.11 p. 8 par. 1-2; p. 12 par. 15

Oinsá mak ita bele kumpre ita-nia juramentu ba Jeová? Ita hetan koko “loron ba loron”. Ita hatudu katak ita iha relasaun neʼebé metin ho Jeová liuhusi dalan neʼebé ita tahan hasoru koko sira-neʼe. (Sal 61:8) Porezemplu, se ema ruma iha serbisu fatin ka eskola hatudu oin-moris ba Ita, Ita sei halo saida? Ita sei hatudu katak Ita hakarak halo tuir Jeová no la fó atensaun ba ema neʼe ka lae? (Prov 23:26) Oinsá se iha Ita-nia família Ita mesak deʼit mak adora Jeová, Ita husu Jeová ajuda Ita atu kontinua hatudu hahalok neʼebé diʼak ka lae? Ita fó-agradese ba Jeová loroloron ka lae kona-ba ninia domin no matadalan sira? Ita buka tempu atu lee Bíblia loroloron ka lae? Bainhira ita dedika ita-nia moris ba Jeová, tuir loloos ita promete ba nia atu halo buat sira-neʼe hotu. Se ita mak halo tuir nia hodi fó buat neʼebé diʼak liu hotu ba nia, ita hatudu ba Jeová katak ita hadomi nia no ita mak ninian. Ita-nia adorasaun mak parte husi ita-nia moris. w17.10 p. 23-24 par. 11-12

Ema naran boot ida neʼebé hakerek liafuan ba múzika sira hatete: “Liafuan book ita-nia hanoin. Múzika book ita-nia sentimentu. Maibé knananuk book ita-nia hanoin no mós sentimentu.” Ita-nia knananuk sira fó glória no fó sai ita-nia domin ba ita-nia Aman Jeová iha lalehan. Ita-nia knananuk sira halo ita hakbesik liután ba Jeová. Tan neʼe, ita bele komprende tanbasá mak kanta mesak ka kanta hamutuk ho irmaun-irmán sira importante tebes ba adorasaun neʼebé moos. Entaun Ita sente oinsá kona-ba hasaʼe lian atu kanta iha kongregasaun? Ita sente moe ka lae? Iha rai balu, mane sira sente moe bainhira kanta iha ema barak nia oin. Sentimentu hanesan neʼe bele fó impaktu ladiʼak ba kongregasaun tomak, liuliu se katuas kongregasaun sira moe atu kanta, ka sira preokupa atu halo buat seluk iha tempu kanta. (Sal 30:12) Kanta mak parte ida husi ita-nia adorasaun ba Jeová. Tan neʼe ita lakohi atu laʼo sees iha tempu kanta knananuk sira, ka toʼo tarde no fila sedu durante kongregasaun kanta hamutuk. w17.11 p. 3 par. 1-3

Ita hotu hakarak iha dame no hakarak hasees an husi laran-taridu. Tan neʼe mak ita agradese tebes ba Jeová hodi fó ninia dame ba ita. (Flp 4:6, 7) Bainhira ita dedika ita-nia an ba Jeová, ita mós iha “dame ho Maromak”. Neʼe katak ita iha relasaun neʼebé diʼak ho nia. (Rom 5:1) Maibé tempu seidauk toʼo ba Maromak atu lori dame ba mundu tomak. Ita hela daudauk iha loron ikus sira, tan neʼe iha problema barak neʼebé hamosu laran-taridu. No ema barak hatudu hahalok violénsia. (2 Tim 3:1-4) Ita mós presiza luta hasoru Satanás ho ninia hanorin falsu oioin. (2 Kor 10:4, 5) Maibé buat neʼebé halo ita laran-taridu liu mak bainhira ita-nia família neʼebé la adora Jeová kontra ita. Família balu goza ita kona-ba ita-nia fiar, duun katak ita sobu família, ka ameasa atu nega ita se ita la troka ita-nia fiar. w17.10 p. 12 par. 1-2

Língua nia mudansa mós fó impaktu ba Bíblia nia tradusaun sira. Karik tradusaun neʼebé uluk fasil ba ema atu komprende iha tempu neʼebá, ohin loron ema ladún komprende ona. Ezemplu ida mak kona-ba tradusaun King James Version lia-inglés neʼebé fó sai iha tinan 1611. Iha tempu neʼebá, ema barak gosta tebes tradusaun neʼe. Liafuan sira neʼebé uza iha tradusaun neʼe mós fó impaktu ba lia-inglés iha tempu neʼebá. Bainhira tradusaun King James Version foin sai, liafuan inglés neʼebé uza iha tradusaun neʼe rona modernu tebes iha tempu neʼebá. Maibé nuʼudar tempu liu daudauk, liafuan balu komesa sai antigu, no ohin loron susar ba ema atu komprende. Hanesan neʼe mós ho tradusaun oioin iha língua seluk. Tan neʼe mak ita agradese tebes hodi iha Bíblia Sagrada Tradusaun Mundu Foun neʼebé uza liafuan ohin loron nian. Tradusaun neʼe tradús ona Bíblia kompletu ka la kompletu ba língua 150 liu. Ida-neʼe hatudu katak kuaze ema hotu iha mundu tomak bele lee tradusaun neʼe iha sira rasik nia língua. Liafuan sira neʼebé uza iha tradusaun neʼe mak modernu no klaru hodi fasil atu book ema nia laran. w17.09 p. 19 par. 5-6

Joven sira mak presiza halo rasik desizaun importante sira. Sira presiza aten-brani atu halo desizaun neʼebé matenek kona-ba hili kolega, atividade halimar nian, oinsá atu iha morál neʼebé moos nafatin, no bainhira mak sira atu hetan batizmu. Sira presiza aten-brani tanba halo desizaun sira-neʼe kontra hasoru Satanás nia hakarak, ida neʼebé sempre koʼalia aat Maromak. Desizaun importante ida neʼebé joven sira presiza halo mak kona-ba halo planu. Iha rai balu, ema hakaʼas beibeik joven sira atu tau fokus ba eskola boot no atu buka serbisu neʼebé manán osan barak. Iha rai seluk tan situasaun ekonomia ladún diʼak, tan neʼe joven sira sente katak sira-nia fokus mak atu buka serbisu hodi ajuda sira-nia família. Jeová sei fó bensaun ba joven sira neʼebé hatudu aten-brani hodi halo planu iha Jeová nia serbisu no tau uluk ninia Ukun iha sira-nia moris. Nia sei fó ajuda hodi joven sira bele tau matan ba sira-nia família nia presiza. Iha apóstolu sira-nia tempu, mane joven Timóteo tau fokus deʼit hodi serbí Maromak Jeová. Ita mós bele halo nuneʼe.—Flp 2:19-22. w17.09 p. 29-30 par. 10-12

Estuda beibeik Bíblia ho badinas bele ajuda ita atu haburas hahalok kontrola an. Ezemplu barak husi Bíblia kona-ba kontrola an bele lori rezultadu diʼak no la kontrola an bele lori susar ba ita. Jeová rai informasaun sira-neʼe iha Bíblia tanba bele ajuda ita. (Rom 15:4) Diʼak ba ita atu lee, estuda no hanoin didiʼak kona-ba ezemplu sira-neʼe. Koko atu buka-hatene oinsá mak Ita bele uza ezemplu sira-neʼe ba Ita rasik ka ba família nia moris. Husu Jeová ajuda Ita atu halo tuir konsellu sira husi Bíblia. Se Ita haree katak Ita falta kontrola an, keta husik deʼit, halo orasaun no hakaʼas an atu haree oinsá mak Ita bele hadiʼa hahalok neʼe. (Tgo 1:5) Uza ita-nia livru sira atu halo riset hodi buka matadalan neʼebé bele ajuda Ita. w17.09 p. 6 par. 15-16

Liafuan neʼebé eskritura temi kona-ba “hahalok foun” no “ema foun”, refere ba hahalok sira neʼebé “Maromak kria tuir ninia hakarak”. (Éf 4:24) Maibé ita bele tau hahalok foun neʼe ka lae? Bele. Jeová kria ema tuir ninia ilas, tan neʼe ita bele halo tuir ninia hahalok furak sira. (Gên 1:26, 27; Éf 5:1) Apóstolu Paulo esplika katak hahalok la fihir ema mak hahalok importante ida husi hahalok foun. Nia dehan: “La iha ema gregu ka ema judeu, ema neʼebé hetan sirkunsizaun ka la hetan sirkunsizaun, ema husi rai seluk ka ema husi Seta, atan ka ema livre.” Iha kongregasaun, ema la bele iha hanoin katak nia mak diʼak liu ema seluk tanba ninia rasa, nasaun, ka pozisaun iha komunidade. Tanbasá? Tanba nuʼudar Kristu nia dixípulu, ita hotu “sai ida deʼit”. (Kol 3:11; Gal 3:28) Se ita mak tau hahalok husi ema foun, ita sei hatudu respeitu ba ema maski sira mai husi rasa ka kultura neʼebé la hanesan.—Rom 2:11. w17.08 p. 22 par. 1, 3; p. 23 par. 4

Jeová nunka husu ita atu halo buat ruma neʼebé nia rasik lakohi halo. Nia mós hatudu ezemplu neʼebé diʼak kona-ba hein ho laran. (2 Ped 3:9) Porezemplu, tinan rihun ba rihun liubá iha jardín Eden, Satanás duun katak Jeová la iha hahalok justisa. Jeová “hein ho pasiénsia” ba tempu neʼebé nia sei hamoos fali ninia naran santu. Bainhira tempu neʼe toʼo mai, neʼe sei sai bensaun boot ida ba ema hotu neʼebé “hein nafatin ba nia”. (Isa 30:18) Jesus mós hein ho laran. Bainhira nia moris iha rai, nia hatudu laran-metin toʼo mate. Iha tinan 33, nia entrega folin husi ninia sakrifísiu ba Jeová iha lalehan. Maibé nia presiza hein toʼo 1914 mak foin bele ukun nuʼudar liurai. (Após 2:33-35; Ebr 10:12, 13) Jesus mós presiza hein toʼo ninia Ukun ba Tinan Rihun Ida ramata mak foin halakon ninia inimigu hotu. (1 Kor 15:25) Maibé neʼe sei la sai saugati deʼit. w17.08 p. 7 par. 16-17

Susi hatete: “Ami sente laran moras tebes kona-ba ami-nia oan-mane nia mate besik ba tinan ida.” Irmaun ida tan neʼebé ninia feen mate derrepente hatete katak nia sente triste tebes toʼo ninia “isin hotu moras”. Triste tebes tanba ema barak esperiénsia ona sentimentu hanesan neʼe. Irmaun-irmán barak ohin loron nunka hanoin katak ema neʼebé sira hadomi sei mate antes Armajedón toʼo mai. Karik Ita mós lakon ona ema neʼebé Ita hadomi iha mate, ka karik Ita koñese ema balu neʼebé triste hela tanba ema ruma mate. Dala ruma Ita bele hanoin, ‘Saida mak bele ajuda ema neʼebé triste hela kona-ba sira-nia família ka belun neʼebé mate?’ Ema balu hatete katak, tempu mak bele kura laran-kanek. Maibé realidade hanesan neʼe duni ka lae? Feto-faluk ida dehan, “Haʼu sente katak, tuir loloos dalan neʼebé ema uza didiʼak ninia tempu mak sei halo nia sente diʼak fali.” Kanek iha isin presiza duni tempu no tau matan ho kuidadu mak bele sai diʼak fali. Hanesan neʼe mós ho kanek iha laran, presiza duni tempu no tau matan ho domin mak bele sente diʼak fali. w17.07 p. 12-13 par. 1-3

Jeová hakarak Ita atu halo planu hanesan saida? Nia kria ita hodi bele hetan ksolok liuhusi aprende kona-ba nia no serbí nia. (Sal 128:1; Mt 5:3) Animál nia moris mak han, hemu, no hahoris oan deʼit. Maibé Jeová hakarak Ita atu moris ho kontente liuhusi halo planu neʼebé diʼak ba Ita-nia moris. Ita-nia Kriadór mak ‘Maromak domin nian’, no “Maromak neʼebé kontente”, ida neʼebé kria ita “tuir ninia ilas”. (2 Kor 13:11; 1 Tim 1:11; Gên 1:27) Se Ita mak banati-tuir Ita-nia Maromak neʼebé domin, Ita sei hetan haksolok. Bíblia dehan: “Kontente liu atu fó duké simu.” (Após 20:35) Realidade mak hanesan neʼe duni, loos ka lae? Tan neʼe mak Jeová hakarak Ita atu hanoin kona-ba hatudu domin ba ema seluk no ba Maromak bainhira halo planu sira.—Mt 22:36-39. w17.07 p. 23 par. 3

Maromak hatudu dignidade no respeitu ba ita. Nia tau matan ba ita diʼak liu fali ita rasik tau matan ba ita-nia an. Jeová hadomi ninia atan hotu nuʼudar grupu. Maibé nia mós iha interese ba ema ida-idak. Hanoin toʼok buat neʼebé akontese iha tempu antigu. Maizumenus ba tinan atus tolu nia laran, Jeová uza juis sira mak dirije ninia nasaun no halo sira manán funu hasoru inimigu sira. Iha tempu sira-neʼe Jeová mós tau matan ba ema ida-idak. Ezemplu ida mak kona-ba feto ida naran Rute, nia laʼós ema Izraél, maibé nia husik buat barak hodi serbí Jeová. Tan neʼe Jeová fó bensaun ba nia hodi hetan laʼen ida no mós oan-mane ida. Laʼós neʼe deʼit, ninia oan-mane neʼe ikusmai sai liña jerasaun ba Mesias. Jeová mós rai Rute nia istória sira iha livru ida husi Bíblia neʼebé uza Rute nia naran rasik. Hanoin toʼok Rute sei sente oinsá bainhira nia hetan fali moris-hiʼas no haree buat sira-neʼe hotu?—Rute 4:13; Mt 1:5, 16. w17.06 p. 28-29 par. 8-9

Iha 1970, irmaun ida naran Peter komesa serbí iha Betel Bretaña ho idade 19. Nia haklaken hela husi uma ba uma no nia hasoru mane ida neʼebé hasarahun boot, maizumenus tinan 50. Nia husu se mane neʼe hakarak aprende Bíblia. Afinál mane neʼe mak ema judeu nia rabbi ida no mane neʼe hakfodak tanba nia haree Peter neʼebé joven hela hakarak hanorin fali nia kona-ba Bíblia. Tan neʼe nia husu pergunta ida ba Peter hodi koko Peter: “Se nuneʼe haʼu-nia oan, livru Daniel hakerek ho língua saida?” Peter hatán: “Parte balu hakerek ho lia-aramaiku.” Peter konta fali hodi dehan: “Rabbi neʼe hakfodak tanba haʼu hatene resposta ba ninia pergunta, maibé haʼu hakfodak liután ho haʼu-nia an! Oinsá mak haʼu hatene resposta neʼe? Bainhira haʼu fila fali ba uma, haʼu buka fali Livru Haklaken ho Matan-moris bá! husi fulan balu liubá, no haʼu buka-hetan informasaun ida neʼebé esplika katak livru Daniel hakerek iha lia-aramaiku.” (Dan 2:4) Loos duni, espíritu santu bele ajuda ita atu hanoin-hetan fali informasaun neʼebé ita lee ona.—Lc 12:11, 12; 21:13-15. w17.06 p. 13 par. 17

Hanoin to’ok kona-ba feen-laʼen nia sentimentu bainhira sira hatene katak feen sai isin-rua. Karik sira sai kontente tebes, maibé baibain neʼe mós halo sira komesa hanoin kona-ba buat barak. Karik sira bele hanoin kona-ba feen no bebé nia saúde durante feen isin-rua no mós bainhira bebé moris mai. Sira mós hatene katak sira presiza osan barak. Bainhira bebé moris ona, sira mós presiza halo mudansa barak ba sira-nia moris. Karik inan presiza gasta tempu barak atu tau matan ba bebé neʼe. Karik feen ho laʼen neʼe la iha tan tempu barak hanesan uluk. Aman nia responsabilidade mós sei aumenta liután. Nia tenke tau matan ba ninia feen ho bebé nia presiza. Kaben-naʼin balu hasoru susar seluk tan. Sira hakarak tebes atu iha oan, maibé sira la bele iha oan. Situasaun hanesan neʼe bele halo feen sai laran-tun. w17.06 p. 4 par. 1; p. 5 par. 5-6

Nuʼudar ema kristaun, ita hadomi lia-loos. No lia-loos mai husi Maromak nia Liafuan. Iha Jesus nia orasaun ba ninia Aman nia dehan: “Ita-nia liafuan mak lia-loos.” (João 17:17) Ita tenkesér hatene Bíblia hakerek saida deʼit hodi ita bele iha domin ba lia-loos husi Bíblia. (Kol 1:10) Maibé hatene deʼit seidauk toʼo. Mai ita haree toʼok saida mak Salmo 119 hatete ita presiza halo. (Sal 119:97-100) Iha moris loroloron nian, ita tenke hanoin kleʼan beibeik kona-ba saida mak ita lee husi Bíblia. Bainhira ita hanoin kleʼan kona-ba oinsá mak lia-loos husi Bíblia bele ajuda ita-nia moris, neʼe sei halo ita hadomi liután lia-loos sira-neʼe. Livru sira neʼebé bazeia ba Bíblia husi Maromak nia organizasaun mak hanesan ai-han neʼebé gostu. Se ita mak han ai-han neʼebé ita gosta, karik ita sei la ansi, maibé nata didiʼak. Hanesan neʼe mós bainhira estuda, ita la bele ansi. Uza tempu atu estuda didiʼak sei halo ita gosta liután “liafuan furak” sira husi lia-loos, no neʼe sei halo fasil liu ba ita atu hanoin-hetan buat neʼebé ita lee no oinsá atu uza informasaun sira-neʼe hodi ajuda ema seluk.—Ecle 12:10. w17.05 p. 19 par. 11-12

Ita hakarak ajuda ema neʼebé hasoru daudauk terus, inklui mós ema neʼebé la adora Jeová. (Lc 10:33-37) Dalan diʼak liu hotu atu ajuda ema mak hanorin lia-loos ba sira. Irmaun katuas ida neʼebé haklaken dala barak ona ba ema refujiadu hatete katak, diʼak atu fó-hatene kedas ba sira katak ita mak Testemuña ba Jeová. Importante mós atu fó-hatene ba sira katak ita-nia objetivu mak atu ajuda sira komprende kona-ba esperansa furak neʼebé temi iha Bíblia duké fó sasán ba sira. Se ita hatudu domin kristaun ba “ema estranjeiru”, neʼe sei lori rezultadu neʼebé diʼak. (Sal 146:9) Irmán ida hatete katak ninia família halai tanba ema fó terus iha rai-Eritreia. Ninia oan naʼin-haat presiza laʼo liu rai-maran ba loron ualu. Ikusmai sira toʼo iha rai-Sudaun, maibé sira hotu kole tebes. Irmán neʼe dehan: “Irmaun sira iha neʼebá haree sira hanesan família, sira fó hahán ba sira, roupa, hela-fatin, no osan atu saʼe karreta. Sé mak hakarak simu estranjeiru ba sira-nia uma tan deʼit sira adora Maromak neʼebé hanesan? Só Testemuña ba Jeová deʼit!”—João 13:35. w17.05 p. 7 par. 17, 19-20

Tinan barak liubá, iha mane naʼin-tolu bá hasoru Job, Maromak nia atan neʼebé laran-metin. Mane ida naran Elifaz husi Teman, nia husu pergunta ida ba Job: “Ema ida iha folin ba Maromak ka lae? Ema neʼebé matenek bele halo buat diʼak ba Nia ka lae? Maromak Kbiit Boot Liu Hotu sente haksolok ho ó-nia hahalok loos ka? Nia hetan buat diʼak ruma tanba ó moris ho laran-metin ka?” (Job 22:1-3) Ba Elifaz, resposta ba pergunta sira-neʼe mak “lae”. Mane ida tan naran Bildad, ema Suá ida, nia hatete katak la fasil atu sai ema neʼebé loos iha Maromak nia haree. (Job 25:4) Elifaz no Bildad koko atu halo Job sente katak ninia hakaʼas-an hodi serbí Jeová mak saugati deʼit. Sira hakarak halo Job fiar katak, ba Maromak, ema mak hanesan kukulai ka ular-oan deʼit. (Job 4:19; 25:6) Jeová hatete ba Elifaz, Bildad, no Zofar katak sira koʼalia buat neʼebé falsu. Tuirmai nia fó sai katak nia haksolok tebes ho Job no bolu nia nuʼudar “haʼu-nia atan”. (Job 42:7) Tan neʼe mak ita bele fiar katak maski la perfeitu, ita “iha folin ba Maromak”. w17.04 p. 28 par. 1-2

Susar atu imajina moris sei sai oinsá tanba ita toman ona ho kondisaun aat husi mundu neʼe toʼo ita la sente tan katak buat aat sira-neʼe lori daudaun susar ba ita-nia moris. Ita bele halo komparasaun ho ema neʼebé hela besik iha terminál, karik nia rona beibeik karreta nia lian sira toʼo ikusmai nia sai toman tiha ho lian sira-neʼe. Hanesan neʼe mós ho ema neʼebé hela besik lixu-fatin, karik nia mós sai toman ona ho iis sira toʼo ikusmai la sente tan buat ida. Maibé bainhira Jeová halakon tiha kondisaun aat sira mak ita foin sente kmaan iha ita-nia moris! Saida mak sei troka buat aat sira neʼebé lori susar ba ita ohin loron? Haree to’ok Biblia nia promete iha eskritura ba ohin. Ita-nia laran sente kmaan duni hodi hatene katak neʼe mak Jeová nia hakarak ba ita-nia moris! Maski ita hela daudaun iha tempu susar ohin loron, ita tenke hakaʼas an atu hakbesik nafatin ba Jeová no ninia organizasaun. Ita-nia esperansa kona-ba futuru mak buat neʼebé folin-boot tebes, tan neʼe mak ita tenkesér hanoin kleʼan kona-ba esperansa, hametin ita-nia fiar ba esperansa neʼe, no fahe esperansa neʼe ho ema seluk. (1 Tim 4:15, 16; 1 Ped 3:15) Se ita mak halo nuneʼe, bainhira mundu aat nia rohan toʼo mai, ita sei hetan moris no haksolok ba nafatin! w17.04 p. 13 par. 16-17

Fasil atu rekoñese katak ema la perfeitu, maibé se ita rasik mak hasoru situasaun neʼebé ema hakanek ita, ita sei halo saida? Ita sei haleno Jeová nia justisa ka lae? Porezemplu, Ita sei halo saida se Ita rona irmaun katuas ida koʼalia liafuan neʼebé hatudu katak nia fihir ema? Ita sei sidi ka lae, se irmaun katuas ida koʼalia la hanoin uluk hodi hakanek Ita-nia sentimentu? Ita sei hein ho pasiénsia ba kongregasaun nia ulun Jesus, duké hanoin kedas katak irmaun neʼe la serve atu sai katuas ka lae? Ita sei hanoin liu irmaun neʼe serbí Jeová ho laran-metin ba tinan barak ona duké haree deʼit ba ninia sala ka lae? Se irmaun ida mak halo sala hasoru Ita maibé kontinua serbí nuʼudar katuas ka nia simu tan knaar seluk, Ita sei sente kontente ba nia ka lae? Se Ita mak fó perdua ho laran, Ita hatudu duni katak Ita haleno Jeová nia hahalok justisa.—Mt 6:14, 15. w17.04 p. 27 par. 18