Juñu

Jeová korrije, hanorin, no fó treinu ba ita tanba nia hadomi ita. Nia hakarak ita hakbesik nafatin ba nia no iha moris neʼebé rohan-laek. Dixiplina laʼós envolve fó konsellu ka korrije deʼit, dala ruma envolve buat seluk tan. Se ema ida monu ba sala neʼebé sériu tebes, karik ema neʼe bele lakon priviléjiu ruma iha kongregasaun. Maski nuneʼe, dixiplina neʼebé nia simu hatudu sai Maromak nia domin ba nia. Porezemplu, karik dixiplina neʼe bele ajuda nia atu haree katak importante tebes atu uza tempu barak liután hodi estuda Bíblia, medita, no halo orasaun. Halo buat sira-neʼe bele ajuda hametin ninia relasaun ho Jeová. (Sal 19:7) Liutiha tempu balu, karik nia sei hetan fali priviléjiu ka knaar neʼebé nia lakon. Maski ema ida tenkesér hasai husi kongregasaun, neʼe hatudu sai Jeová nia domin tanba neʼe atu proteje kongregasaun husi hahalok neʼebé aat. (1 Kor 5:6, 7, 11) Maromak sempre fó dixiplina iha dalan neʼebé justu, tan neʼe ema neʼebé hasai husi kongregasaun bele haree katak sala neʼebé nia halo sériu tebes no neʼe bele book nia atu arrepende an.—Após 3:19. w18.03 p. 24 par. 5-6

Guarda ne’e la hatene kona-ba Maromak nia Liafuan. Tan neʼe mak atu sai ema kristaun, nia presiza aprende lia-loos báziku husi Bíblia, komprende kona-ba saida mak Jeová hakarak ninia atan sira atu halo, no tenke halo tuir Jesus nia hanorin sira. Buat sira neʼebé nia aprende iha tempu badak nia laran ajuda duni nia hodi hakarak hetan batizmu. (Após 16:25-33) Maski nuneʼe, nia presiza aprende tan buat barak bainhira hetan tiha batizmu. Se nuneʼe, bainhira Ita-nia oan hatete ba Ita katak nia hakarak hetan batizmu tanba nia hadomi Jeová no hakarak halo tuir nia, Ita bele halo saida? Karik Ita bele husik nia koʼalia ho katuas kongregasaun sira hodi sira bele foti desizaun kona-ba nia kumpre kritériu ona ka lae atu hetan batizmu. Hanesan ema kristaun hotu neʼebé hetan ona batizmu, Ita-nia oan presiza aprende tan buat barak kona-ba Jeová iha ninia moris tomak, no ba nafatin.—Rom 11:33, 34. w18.03 p. 10 par. 8-9

Se ita hakaʼas an atu sai ema maduru iha lia-loos, espíritu santu sei ajuda ita atu halo mudansa ba ita-nia hanoin. Neineik-neineik ita mós sei hanoin iha dalan neʼebé Kristu hanoin. Espíritu santu bele ajuda ita atu halakon hakarak neʼebé sala no haburas fali hahalok sira neʼebé Maromak simu. Iha Kristu nia hanoin bele ajuda ita-nia hahalok iha serbisu fatin ka eskola, ita-nia koʼalia, no desizaun neʼebé ita halo loron-loron. Ita-nia desizaun sira bele hatudu sai ita hakaʼas an atu banati-tuir Kristu ka lae. Nuʼudar ema espirituál, ita lakohi husik buat ida atu estraga ita-nia relasaun diʼak ho Jeová. Se ita mak hetan tentasaun ruma atu halo buat neʼebé sala, iha Kristu nia hanoin bele ajuda ita atu hasees an husi tentasaun neʼe. Antes halo desizaun ruma, diʼak atu husu ba ita-nia an: ‘Bíblia nia prinsípiu saida deʼit mak bele ajuda haʼu? Se Kristu mak hasoru situasaun neʼe, nia sei halo saida? Desizaun hanesan saida mak Jeová gosta?’ w18.02 p. 25 par. 12; p. 26 par. 14

Toʼo tiha Enoc nia tempu, (Noé nia aman nia avó) ema komesa sai aat ona. Sira koʼalia “buat aat” kona-ba Jeová. (Jud 14, 15) Komesa husi tempu neʼebá, ema nia hahalok violénsia neineik-neineik sai barak. No iha Noé nia tempu, mundu tomak sai “nakonu ho violénsia”. Anju aat sira tun mai rai, nakfila an ba ema hodi kaben ho feto iha rai. No sira-nia oan mós iha hahalok neʼebé aat no halo violénsia. (Gên 6:2-4, 11, 12) Maibé ema seluk bele haree katak Noé la hanesan. Bíblia hatete katak “Nia moris ho hahalok loos iha ninia jerasaun nia leet. Noé laʼo ho Maromak loos.” (Gên 6:9) Eskritura sira-neʼe hatudu saida mai ita kona-ba Noé? Primeiru, hanoin toʼok Noé presiza serbí Jeová ho laran-metin ba tinan hira mak Rai-Nabeen akontese? Noé la tahan deʼit ba tinan 70 ka 80 iha mundu neʼebé aat, maibé besik tinan 600! (Gên 7:11) Segundu, iha tempu neʼebá, Noé la iha kongregasaun hodi ajuda no fó kmaan ba nia atu tahan hanesan ohin loron. Karik ninia maun-alin no feton sira mós la apoia nia. w18.02 p. 4 par. 4-5

Ema neʼebé hadomi osan nunka sente katak sira kontente ho buat neʼebé sira iha ona. Sira sempre hakarak liután no uza moris tomak hodi buka tan sasán sira-neʼe. Tan neʼe sira “fó kanek oioin ba sira-nia an”. (1 Tim 6:9, 10; Ecle 5:10) Ita hotu presiza osan, no osan bele proteje ita. (Ecle 7:12) Maibé, se ema ida mak iha osan natoon deʼit ba ninia presiza, nia bele sente kontente ka lae? Bele! (Ecle 5:12) Jake nia oan-mane Agur dehan: “Labele husik haʼu sai kiak ka sai riku. Husik haʼu han deʼit ai-han neʼebé haʼu presiza.” Ita bele komprende tansá nia lakohi sai kiak demais. Nia hatete katak selae, neʼe bele book nia atu naʼok, no naʼok sei hafoʼer Maromak nia naran. Maibé tanbasá mak nia lakohi sai riku? Nia dehan: “Atu nuneʼe haʼu la sai bosu loos toʼo nega Ita no dehan: ‘Sé mak Jeová?’” (Prov 30:8, 9) Jesus dehan: “Ema ida la bele sai atan ba naʼi-ulun rua, tanba nia sei odi ida no hadomi ida seluk, ka sei apoia ida no hakribi ida seluk. Imi la bele sai atan ba Maromak no ba Rikusoin.”—Mt 6:24. w18.01 p. 24 par. 9-11

Ita haburas unidade liuhusi fó perdua ba ema seluk. Neʼe mak dalan neʼebé ita hatudu agradese ba Jeová neʼebé uza Kristu nia sakrifísiu hodi fó perdua ba ita rasik nia sala sira. Jesus uza ai-knanoik ida neʼebé hakerek iha Mateus 18:23-34 hodi hatudu katak importante tebes atu fó perdua ba ema seluk. Husu ba ita-nia an: ‘Haʼu hakarak halo tuir Jesus nia hanorin neʼe ka lae? Haʼu komprende no hatudu pasiénsia ba irmaun-irmán sira ka lae? Haʼu prontu atu fó perdua ba ema neʼebé hakanek haʼu ka lae?’ Maski sala balu sériu no susar tebes ba ita ema sala-naʼin atu fó perdua, maibé Jesus nia ai-knanoik hanorin ita kona-ba saida mak Jeová hakarak ita atu halo. Jesus hatudu ho klaru katak, Jeová sei la perdua ita se ita lakohi fó perdua ba ema seluk neʼebé arrepende an husi laran. Neʼe mak buat neʼebé sériu tebes atu hanoin didiʼak. Atu proteje no kaer metin ba ita-nia unidade neʼebé furak, ita presiza fó perdua ba ema seluk hanesan buat neʼebé Jesus hanorin. w18.01 p. 15 par. 12

Maski Daniel nia toman atu halo orasaun ba Jeová sei lori perigu ba ninia moris, nia la subar hodi la halo ema hanoin katak nia taʼuk atu adora Jeová. Jeová fó bensaun ba Daniel tanba nia aten-brani no laran-metin. Jeová halo milagre hodi salva nia husi leaun sira. Rezultadu husi neʼe mak, ema husi rai hotu neʼebé governu Média no Pérsia ukun hatene kona-ba Jeová! (Dan 6:25-27) Oinsá mak ita bele haburas fiar hanesan Daniel? Xave atu iha fiar neʼebé metin mak hodi komprende didiʼak Maromak nia Liafuan, laʼós lee liu deʼit. (Mt 13:23) Ita hakarak hatene Jeová hanoin ka sente oinsá kona-ba buat ruma. Tan neʼe ita presiza hanoin kleʼan kona-ba informasaun neʼebé ita lee. Importante mós atu halo orasaun, liuliu kuandu ita hasoru susar ruma. Se ita mak halo orasaun ho fiar atu husu matenek no forsa, Jeová sei fó ho laran-luak ba ita.—Tgo 1:5. w18.02 p. 10-11 par. 13-15

Maski Ita mak joven ida ne’ebé hetan batizmu ona, Ita bele haree Jeová nia diʼak bainhira nia fó aten-brani ba Ita hodi esplika Ita-nia fiar ba ema seluk iha serbisu haklaken ka iha eskola. Dala ruma la fasil atu haklaken ba Ita-nia kolega eskola. Karik Ita taʼuk sira sei koʼalia saida. Liuliu atu esplika Ita-nia fiar iha ema barak nia oin, karik neʼe sei halo Ita sente taʼuk liután. Saida mak bele ajuda Ita? Hanoin kona-ba tanbasá mak Ita fiar ba buat neʼebé Ita fiar daudaun. Ita bele uza matadalan atu estuda, neʼebé hetan husi jw.org. Atividade sira-neʼe bele ajuda Ita hanoin kona-ba Ita-nia fiar, tanbasá mak Ita fiar ba neʼe, no oinsá mak Ita bele esplika Ita-nia fiar ba ema seluk. Se Ita mak fiar loloos no prepara ho didiʼak ona, neʼe sei book Ita atu haklaken kona-ba Jeová.—Jer 20:8, 9. w17.12 p. 26 par. 12, 14-15

Latoʼo atu hanorin deʼit ba oan kona-ba ema no akontesimentu neʼebé hakerek iha Bíblia. Timóteo mós fiar katak buat neʼebé nia aprende mak loos. Timóteo hatene Eskritura Lia-Ebraiku husi kiʼik kedas. Ikusmai nia fiar metin katak Jesus mak Mesias tanba evidénsia neʼebé nia haree. Oinsá mak Ita bele ajuda Ita-nia oan atu fiar metin buat neʼebé sira aprende, hanesan Timóteo? Primeiru, hatudu pasiénsia. Presiza tempu naruk atu haburas fiar neʼebé metin. Laʼós tanba Ita iha ona fiar, Ita-nia oan mós sei iha fiar hanesan Ita. Oan ida-idak presiza uza sira-nia “kbiit atu hanoin” hodi haburas fiar kona-ba Bíblia. (Rom 12:1) Nuʼudar inan-aman, iha buat barak neʼebé Ita bele halo atu ajuda oan hametin sira-nia fiar, liuliu iha tempu neʼebé sira iha pergunta ruma. w17.12 p. 19 par. 3, 5-6

Marta mak Jesus nia belun no dixípulu ida. Nia laran-triste hela tanba ninia alin-mane Lázaro foin mate. Saida mak bele fó konsola ba nia? Jesus promete ba nia: “Ó-nia alin sei moris fali.” (João 11:20-23) Martha fiar katak moris-hiʼas sei akontese iha futuru. Maibé tuirmai Jesus halo milagre ida iha loron neʼe kedas. Nia halo Lázaro moris fali. Ita hatene katak, ohin loron Jesus ka ninia Aman sei la halo milagre atu fó moris-hiʼas ba ema. Maibé Ita iha fiar hanesan Marta ka lae katak iha futuru ema neʼebé Ita hadomi sei moris fali? Karik Ita lakon ona Ita-nia laʼen ka feen, inan, aman, avó, ka oan iha mate. Ita hein namanas atu hakoʼak, koʼalia, no hamnasa fali ho ema sira-neʼe. Ita bele sente kontente hanesan Marta tanba Ita iha razaun atu dehan, ‘Haʼu hatene ema neʼebé haʼu hadomi sei moris fali iha tempu moris-hiʼas.’ Tan neʼe, diʼak ba ema kristaun ida-idak atu hanoin kona-ba razaun sira tansá ita bele fiar nuneʼe. w17.12 p. 3 par. 1-2

Jesus hadomi tebes Moisés nia Ukun-Fuan, tanba Ukun-Fuan neʼe mai husi ninia Aman Jeová neʼebé nia hadomi. Eskritura ba ohin hatudu sai Jesus nia domin kleʼan ba Maromak nia Ukun-Fuan. Liuhusi Jesus nia liafuan no hahalok, nia hatudu katak Maromak nia Ukun-Fuan mak perfeitu, lori rezultadu diʼak, no liafuan hotu husi Ukun-Fuan neʼe sei sai loos. (Mt 5:17-19) Ita bele fiar katak Jesus sente triste tebes bainhira nia haree ema eskriba no farizeu uza sala ninia Aman nia Ukun-Fuan! Nia hatete ba sira: “Imi fó parte sanulu husi ortelaun no endru no mós komiñu.” Sira gosta tebes halo tuir Ukun-Fuan kona-ba buat kiʼik-kiʼik sira. Entaun, problema mak saida? Jesus esplika: “Maibé imi la halo tuir buat neʼebé importante iha Ukun-Fuan, hanesan hahalok loos, laran-sadiʼa no laran-metin.” (Mt 23:23) Ema farizeu sira nunka hanoin kona-ba Ukun-Fuan nia objetivu mak saida, no sira hanoin katak sira mak diʼak liu fali ema seluk. Maibé Jesus hatene ho loloos Ukun-Fuan nia objetivu no ukun-fuan ida-idak fó sai hahalok saida kona-ba Jeová. w17.11 p. 13 par. 1-2

Mundu nia hanoin mak: “La sala atu halo relasaun seksual ho ema ne’ebé la’ós ita-nia kaben.” Karik ema bele husu: “Tanbasá imi-nia moris la livre? Goza moris bá.” Maibé Maromak nia Liafuan bandu halo sala-foʼer seksuál. (1 Tes 4:4-8) Jeová iha direitu atu halo lei tanba nia mak kria ita. Nia dehan katak mane no feto neʼebé kaben ona mak bele halo relasaun seksuál. Jeová halo lei sira-neʼe tanba nia hadomi ita. Ita hatene katak, se ita halo tuir lei sira-neʼe, ita-nia moris sei kontente liu. Bainhira ema hotu iha família halo tuir Maromak nia lei sira, família neʼe nakonu ho domin, respeitu, no sente seguru. Maromak sei fó kastigu ba sira neʼebé hatene ninia lei maibé la halo tuir ho neon. (Ebr 13:4) Bíblia hanorin ita oinsá atu hasees an husi sala-foʼer seksuál. Dalan importante ida mak kontrola ita-nia matan. (Mt 5:28, 29) Tan neʼe ita tenke hasees an husi pornografia no múzika kona-ba hahalok seksuál sira.—Éf 5:3-5. w17.11 p. 22 par. 9-10

Jeová nia atan sira sempre uza múzika hodi hahiʼi nia ba tinan barak ona. Se ita haree fali ba tempu neʼebé ema Izraél sei laran-metin ba Jeová, sira sempre uza múzika iha sira-nia adorasaun. Porezemplu, bainhira David organiza ema nia knaar iha templu, nia organiza ema levita naʼin–4.000 hodi hahiʼi Jeová ho múzika. Ema naʼin-288 husi sira mak ema neʼebé “simu ona treinu atu kanta ba Jeová. Sira hotu matenek atu kanta”. (1 Crôn 23:5; 25:7) Bainhira dedika templu, sira mós uza múzika no kanta knananuk. Bíblia dehan: “Amlulik sira huu trombeta no kantadór sira fó hahiʼi no fó-agradese ba Jeová ho lian ida deʼit. Bainhira sira huu trombeta, baku simbala, no toka instrumentu múzika nian seluk nuʼudar sira fó hahiʼi ba Jeová, . . . Maromak neʼebé loos, nia glória nakonu iha uma neʼe.” Ida-neʼe hametin tebes ema Izraél sira-nia fiar bainhira sira tuir programa neʼe!—2 Crôn 5:13, 14; 7:6. w17.11 p. 4 par. 4-5

Jesus hatene katak laʼós ema hotu hakarak simu ninia hanorin. Nia mós hatene katak ema balu sei kontra ninia dixípulu sira no tan neʼe sira presiza aten-brani. Jesus nia hakarak mak atu hanorin ema lia-loos kona-ba Maromak, laʼós atu sobu família. (João 18:37) Maibé Jesus hakarak ninia dixípulu sira hatene katak la fasil atu laʼo tuir nia, liuliu se ita-nia belun diʼak ka família lakohi simu lia-loos. Sira tahan duni bainhira sira-nia família goza ka nega sira, tanba sira hakarak Jesus simu sira. Maibé sira hetan bensaun barak liu fali buat neʼebé sira lakon. (Mc 10:29, 30) Maski ita-nia família kontra tanba ita adora Jeová, ita hadomi nafatin sira. Maibé ita presiza hanoin-hetan katak, ita hadomi Maromak no Kristu liu fali ema hotu. (Mt 10:37) Ita mós presiza kuidadu tanba Satanás bele uza ita-nia domin ba família atu halo ita la hatudu laran-metin ba Jeová. w17.10 p. 13 par. 3-6

Vizaun neʼe halo ita tau fiar ba Jeová katak nia lakohi iha hahalok aat iha ninia povu nia leet. Se Jeová haree hahalok aat ruma, nia sei halo buat ruma ho lalais atu halakon hahalok neʼe. (1 Kor 5:13) Neʼe mak buat neʼebé anju hatudu sai hodi taka kedas fatin sukat neʼe ho matan neʼebé todan. Zacarias ho ema judeu sira neʼebé uluk hela ona iha neʼebá koko makaʼas hodi kontra ema jentiu nia hahalok aat sira-neʼe. Tan neʼe, vizaun neʼe halo ita tau fiar katak Jeová sei proteje adorasaun ba nia atu moos nafatin. Vizaun neʼe mós fó-hanoin ba ema judeu sira katak, sira mós iha responsabilidade atu proteje sira-nia adorasaun ba Jeová atu moos nafatin. Hahalok aat la bele iha Maromak nia povu nia leet. Ohin loron, Jeová lori ona ita ba ninia organizasaun neʼebé moos, no ita sente iha domin no hetan protesaun iha fatin neʼe. Tan neʼe ita ida-idak iha responsabilidade atu proteje organizasaun neʼe atu moos nafatin. Sin, keta husik hahalok aat iha Jeová nia povu nia leet. w17.10 p. 24 par. 14-15; p. 25 par. 17-18

Ema judeu, ka ema Izraél mak hakerek livru 39 primeiru husi Bíblia. Sira mak ema primeiru neʼebé Maromak hatoʼo ninia liafuan santu sira. (Rom 3:1, 2) Lia orijinál neʼebé sira uza hodi hakerek livru sira-neʼe mak lia-ebraiku no lia-aramaiku. Maibé tama ba tinan 200 molok Kristu, ema judeu barak la komprende ona lia-ebraiku. Tanbasá? Tanba bainhira Alexandre Boot komesa okupa rai barak iha mundu, rai sira-neʼe mós komesa uza fali lia-gregu. Tan neʼe ema barak koʼalia deʼit lia-gregu duké koʼalia sira rasik nia língua. (Dan 8:5-7, 20, 21) Ida-neʼe mós akontese ba ema judeu sira, tan neʼe ikusmai susar ba sira atu komprende Bíblia iha lia-ebraiku. Oinsá atu rezolve problema neʼe? Ema tradús ona Bíblia husi lingua ebraiku ba língua gregu, maizumenus tinan 250 antes Jesus moris. Tradusaun neʼe mak naran Septuajinta Lia-Gregu nian. Neʼe mak tradusaun primeiru neʼebé tradús Eskritura Lia-Ebraiku tomak. w17.09 p. 20 par. 7-9

Ita-nia patraun husu beibeik Ita atu aumenta oras serbisu iha loron neʼebé Ita halo planu atu halaʼo adorasaun família, haklaken, ka tuir reuniaun. Ita presiza hatudu aten-brani atu la halo tuir patraun nia hakarak hodi hatudu ezemplu neʼebé diʼak ba Ita-nia oan. Ita mós presiza aten-brani atu ajuda oan halo planu no kumpre planu sira-neʼe iha Maromak nia serbisu. Porezemplu, karik inan-aman balu taʼuk atu fó laran-manas ba sira-nia oan hodi foti serbisu pioneiru, serbí iha fatin neʼebé presiza liután haklaken-naʼin, serbí iha Betel, ka fó ajuda iha serbisu konstrusaun atu harii Reuniaun-Fatin no fatin ba reuniaun boot sira. Karik sira taʼuk katak, se sira sai ferik-katuas, sira-nia oan la bele tau matan ba sira. Maibé inan-aman neʼebé matenek hatudu aten-brani no fiar katak Jeová sei kumpre ninia promesa sira. (Sal 37:25) Inan-aman neʼebé hatudu aten-brani iha dalan sira-neʼe no sadere ba Jeová sei ajuda mós sira-nia oan atu halo tuir sira.—1 Sam 1:27, 28; 2 Tim 3:14, 15. w17.09 p. 30 par. 14-15

Oinsá mak inan-aman bele ajuda sira-nia oan atu haburas hahalok kontrola an? Inan-aman hatene katak oan moris mai laʼós iha kedas hahalok kontrola an. Tan neʼe sira presiza hanorin sira-nia oan kona-ba hahalok neʼe liuhusi sira-nia ezemplu. (Éf 6:4) Se Ita haree Ita-nia oan sira falta kontrola an, diʼak atu haree fali ba Ita rasik nia ezemplu. Ita bele hatudu ezemplu diʼak ba sira liuhusi haklaken beibeik, tuir reuniaun sira, no halaʼo adorasaun família nian. No se Ita presiza hatete “labele” ba Ita-nia oan atu la halo buat ruma, keta taʼuk atu halo nuneʼe. Jeová mós halo lei ba Adão no Eva, no lei sira-neʼe bele ajuda sira aprende oinsá atu hatudu respeitu ba Jeová nia podér. Nuneʼe mós se inan-aman fó dixiplina ba oan no hatudu ezemplu diʼak ba sira, neʼe bele hanorin sira kona-ba kontrola an. Hadomi Jeová nia lei sira no hatudu respeitu ba ninia morál neʼebé aas mak buat neʼebé folin boot tebes atu hanorin ba Ita-nia oan.—Prov 1:5, 7, 8. w17.09 p. 7 par. 17

Antes Satanás nia mundu ramata, ita sei hasoru susar no terus oioin. Porezemplu, la hetan serbisu, moras todan, ema fó terus, dezastre naturais, lakon ita-nia sasán tanba hahalok krime ruma, ka susar seluk tan. Ita tenke hatudu hahalok hanoin malu atu bele ajuda ema seluk iha tempu susar sira. Hahalok hanoin malu bele book ita atu trata ema seluk ho laran-diʼak. (Éf 4:32) Hahalok sira-neʼe mós husi hahalok foun, no bele ajuda ita atu banati-tuir Maromak hodi fó kmaan ba ema seluk. (2 Kor 1:3, 4) Oinsá mak ita bele hatudu laran-diʼak liután ba ema sira iha ita-nia kongregasaun neʼebé mai husi rai seluk ka kbiit-laek? Ita hakarak simu sira, sai belun ho sira, no ajuda sira atu haree katak kongregasaun hafolin sira. (1 Kor 12:22) Testemuña barak mos hanoin tebes kona-ba ema neʼebé muda mai sira-nia rai no sira koko atu aprende sira-nia língua. (1 Kor 9:23) Sira-nia hakaʼas-an lori rezultadu barak neʼebé diʼak. w17.08 p. 23-24 par. 7-9

Jeová hakarak ita atu hatudu pasiénsia hodi hein ho laran. Saida mak bele ajuda ita atu halo nuneʼe? Ita presiza halo orasaun husu Maromak fó ninia espíritu santu. Tenke hanoin-hetan katak pasiénsia mak hahalok neʼebé mai husi Maromak nia espíritu santu. (Éf 3:16; 6:18; 1 Tes 5:17-19) Tan neʼe husu beibeik ba Jeová atu ajuda Ita hodi tahan ho pasiénsia! Hanoin mós buat neʼebé ajuda Abraão, José, no David hodi hein ho pasiénsia ba Jeová nia promesa sira atu sai loos. Sira tau fiar ba Jeová. Sira la hanoin kona-ba sira-nia an deʼit ka kona-ba saida mak sira hakarak. Se ita hanoin kona-ba bensaun neʼebé sira simu, neʼe mós bele fó laran-manas ba ita atu hatudu hahalok pasiénsia. Tan neʼe mak maski ita hasoru daudauk terus, ita hakarak “hein ho pasiénsia”. Karik dala ruma ita bele husu, “Oh Jeová, toʼo bainhira?” (Isa 6:11) Liuhusi Maromak nia espíritu santu nia ajuda, ita mós bele halo tuir profeta Jeremias hodi temi liafuan iha eskritura ba ohin. w17.08 p. 7 par. 18-20

Bainhira Jesus sei kiʼik, nia mós uza ninia tempu hodi halimar. Hanesan Bíblia hatete katak iha “tempu atu hamnasa” no iha “tempu atu dansa”. (Ecle 3:4) Jesus mós hakbesik ba Jeová liuhusi estuda eskritura sira. Bainhira nia tinan 12, mestre sira iha templu hakfodak tebes hodi haree kona-ba “ninia matenek no ninia resposta sira”. (Lc 2:42, 46, 47) Bainhira Jesus sai boot, nia halo buat hotu neʼebé Maromak hakarak nia atu halo no neʼe lori ksolok ba nia. Porezemplu, nia halo tuir Maromak nia hakarak hodi “haklaken liafuan diʼak ba kiak sira” no “halo ema matan-delek sira haree fali”. (Lc 4:18) Nia gosta tebes hanorin ema seluk kona-ba ninia Aman iha lalehan. (Lc 10:21) Loron ida, Jesus koʼalia tiha ba feto ida kona-ba adorasaun neʼebé loos, nia hatete ba ninia dixípulu sira: “Haʼu-nia ai-han mak halo tuir Ida neʼebé haruka haʼu mai nia hakarak no atu halo hotu ninia serbisu.” (João 4:31-34) Jesus nia moris kontente tanba nia hatudu domin ba Maromak no ba ema seluk. Se Ita mak halo hanesan neʼe, Ita mós sei sai kontente. w17.07 p. 23 par. 4-5

Bainhira Jesus iha rai, nia haleno ninia Aman liuhusi ninia liafuan no hahalok. (João 5:19) Jeová haruka Jesus mai rai atu fó kmaan ba “ema neʼebé laran-kanek” ho “ema hotu neʼebé triste”. (Isa 61:1, 2; Lc 4:17-21) Ema hatene duni katak Jesus komprende kona-ba sira-nia terus no nia hakarak tebes atu ajuda sira. (Ebr 2:17) Jesus nunka troka, tanba Bíblia hatete: “Jesus Kristu sei hanesan deʼit husi uluk, agora, no ba nafatin.” (Ebr 13:8) Nia simu naran nuʼudar “Ulun-Naʼin Moris nian” tanba liuhusi nia mak ita bele hetan moris ba nafatin. Jesus rasik mós komprende ema nia triste bainhira ema neʼebé sira hadomi mate no nia “bele sai nuʼudar ajuda-naʼin ba sira neʼebé hetan koko”. (Após 3:15; Ebr 2:10, 18) Jesus sente triste nafatin bainhira haree ema hetan terus. Nia komprende sira-nia laran-susar, no nia bele fó kmaan ba sira “iha tempu neʼebé loos”.—Ebr 4:15, 16. w17.07 p. 13 par. 6-7; p. 14 par. 10

Importante tebes atu hafolin rikusoin espirituál sira ne’ebé Jeová fó ona mai ita. Maibé ita tenkesér kuidadu atu la husik Satanás ho ninia mundu neʼe atu halo fraku ita-nia domin ba rikusoin sira-neʼe. Ita la bele husik ema nia promete kona-ba fó serbisu neʼebé manán osan boot lohi ita, ka mehi atu iha moris neʼebé diʼak liu, ka sai foti-an kona-ba rikusoin. Apóstolu João fó-hanoin ita katak buat sira-neʼe lakleur tan sei lakon ba nafatin. (1 João 2:15-17) Tan neʼe mak ita tenke hafolin beibeik ita-nia rikusoin espirituál sira no proteje didiʼak rikusoin sira-neʼe. Keta husik buat ida atu halo fraku ita-nia domin ba Maromak nia Ukun. Haklaken nafatin ho badinas, no keta husik ita-nia domin ba serbisu haklaken atu sai malirin. Kontinua buka nafatin lia-loos sira husi Bíblia. Se ita mak halo nuneʼe, ita sei halibur “rikusoin iha lalehan neʼebé nunka lakon, iha neʼebé naʼok-teen la besik ka ular sira la han”.—Lc 12:33. w17.06 p. 13 par. 19-20

Jeová nunka ukun iha dalan neʼebé siʼak. Kriatura sira neʼebé halo tuir nia sempre sente livre no haksolok. (2 Kor 3:17) David dehan: “Dignidade no kmanek mak iha ninia oin; kbiit no ksolok mak iha ninia hela-fatin.” (1 Crôn 16:7, 27) Hanesan neʼe mós ho ema neʼebé hakerek salmu naran Etan hatete: “Ksolok ba povu neʼebé hahiʼi Ita ho lian kontente nian. Oh Jeová, sira laʼo iha naroman neʼebé sai husi Ita-nia oin. Loron tomak sira haksolok tanba Ita-nia naran, no sira hetan hahiʼi tanba Ita-nia hahalok loos.” (Sal 89:15, 16) Se ita mak hanoin kleʼan liután kona-ba Jeová nia hahalok diʼak, neʼe sei hametin liután ita-nia fiar katak dalan neʼebé Jeová ukun mak diʼak liu hotu. Jeová mak kria ita, tan neʼe nia hatene saida mak bele halo ita kontente. Ho laran-diʼak nia fó buat oioin ba ita. Buat naran deʼit neʼebé nia husu ita atu halo sempre lori diʼak ba ita, maski ita presiza halo sakrifísiu oioin atu halo tuir nia.—Isa 48:17. w17.06 p. 29 par. 10-11

Iha irmán ida neʼebé hela iha rai-Inglaterra ne’ebé hakarak tebes atu iha oan. Maibé bainhira nia hatene katak nia liu ona tempu atu iha oan, nia sai laran-tun tebes. Tan neʼe nia ho ninia laʼen deside atu foti oan ida hodi hakiak. Maibé dala ruma nia sente triste nafatin. Nia dehan: “Haʼu hatene, hakiak ema nia oan la hanesan duni ho iha oan rasik.” Bíblia hatete katak “hodi sai inan mak feto sira proteje sira-nia an”. (1 Tim 2:15) Maibé neʼe la dehan katak tanba feto ida iha oan, nia sei hetan moris rohan-laek. Entaun, eskritura neʼe koʼalia kona-ba saida? Inan ida uza tempu barak tebes atu tau matan ba ninia oan no ba uma. Preokupa ho buat sira-neʼe ajuda nia atu la konta ema nia vida ka mete ema seluk nia problema.—1 Tim 5:13. w17.06 p. 5-6 par. 6-8

Husi Eliú nia liafuan, nia hatete katak ita-nia hakaʼas-an atu serbí Jeová la iha folin ka lae? Lae. Tanba Jeová la korrije Eliú hanesan nia korrije mane naʼin-tolu seluk. Eliú esplika katak Jeová la depende ba ita atu adora nia, tanba nia la falta buat ida. Nia la presiza ita atu halo buat ruma ba nia hodi nia bele sai riku liu ka forsa liu. Tuir loloos, hahalok diʼak ka kbiit sira neʼebé ita iha mai hotu husi Maromak, no nia gosta haree oinsá ita uza kbiit sira-neʼe. Bainhira ita halo buat ruma ho domin ba maluk fiar-naʼin, Jeová haree ita-nia hahalok sira-neʼe hanesan halo ba nia rasik. Eskritura iha Provérbios 19:17 dehan: “Ema neʼebé hatudu laran-diʼak ba ema kiak fó-empresta ba Jeová, no Nia sei selu fali buat neʼebé ema neʼe halo.” Husi neʼe ita bele haree katak Jeová hatene kona-ba buat diʼak hotu neʼebé ita halo ba ema seluk. Maski Jeová mak Kriadór ba lalehan no rai, maibé hahalok diʼak sira neʼebé ita hatudu ba ema, Jeová haree hanesan fó-empresta ba nia no nia sei selu fali ho bensaun oioin. Ninia Oan-Mane Jesus mós hatete nuneʼe.—Lc 14:13, 14. w17.04 p. 29 par. 3-4

Saida tan mak bele ajuda ita hadomi liután lia-loos husi Bíblia? Ita presiza tuir beibeik reuniaun sira, tanba iha neʼebá mak Jeová hanorin ita. Dalan importante ida neʼebé Jeová hanorin ita mak liuhusi Estudu Livru Haklaken semana-semana. Se ita hakarak hetan benefísiu husi estudu neʼe, ita presiza prepara uluk. Porezemplu, ita bele loke eskritura hotu neʼebé hakerek iha parágrafu sira. Ohin loron, ita bele lee ka hetan Livru Haklaken neʼe liuhusi sasán eletróniku sira. Livru neʼe agora fó sai ona iha língua oioin neʼebé bele hetan husi sítiu jw.org no aplikasaun JW Library. Sasán eletróniku balu husik ita atu bele loke lalais eskritura sira neʼebé hakerek iha parágrafu laran. Maski ita bele uza dalan oioin atu estuda lisaun sira husi Livru Haklaken, maibé se ita mak lee didiʼak eskritura sira no hanoin didiʼak kona-ba eskritura sira-neʼe, ita-nia domin ba lia-loos husi Bíblia sei aumenta liután. w17.05 p. 20 par. 14

Depois batizmu, ita hakarak kontinua moris tuir ita-nia dedikasaun hodi fò ita-nia adorasaun ba Maromak ho laran-metin. Bainhira ita halo juramentu dedikasaun nian ba Jeová, ita la bele dada fali. Ema neʼebé baruk ona atu serbí Jeová ka baruk ona atu moris nuʼudar ema kristaun la bele dehan katak tuir loloos, nia la dedika an ba Jeová no katak ninia batizmu la vale. Se ema neʼebé dedika an ona ba Jeová halo sala boot ruma, nia tenkesér hatán ba Jeová no ba kongregasaun. Ita lakohi sai hanesan ema neʼebé Jesus dehan: “Ó husik ona ó-nia domin uluk nian.” Maibé ita hakarak Jesus koʼalia hanesan neʼe ba ita: “Haʼu hatene ó-nia hahalok sira, ó-nia domin, ó-nia fiar, ó-nia serbisu ba Maromak no ó tahan ona susar oioin, no haʼu hatene katak ó-nia hahalok ikus nian diʼak liu fali uluk nian.” (Apok 2:4, 19) Ita hakarak halo Jeová kontente hodi moris tuir ita-nia juramentu dedikasaun nian. w17.04 p. 6-7 par. 12-13

“Juis ba raiklaran tomak sei la halo buat neʼebé sala, loos ka lae?” (Gên 18:25) Abraão husu pergunta hanesan neʼe laʼós tanba nia iha duvida, maibé tanba nia iha fiar tomak katak Jeová sei tesi lia ba sidade Sodoma no Gomorra ho justisa neʼebé loos. Nia fiar katak Jeová sei nunka atu halakon “ema laran-loos hamutuk ho ema aat”. Abraão bele fiar katak Jeová sempre halo buat neʼebé loos tanba Jeová mak hatudu ezemplu diʼak liu hotu kona-ba justisa no hahalok loos. Iha Eskritura Lia-Ebraiku, liafuan rua neʼe dala barak mosu hamutuk, neʼe tanba “justisa” no “hahalok loos” iha signifika neʼebé hanesan. Neʼe duni, tanba Jeová mak hun ba hahalok rua neʼe, nia sempre tesi lia ho loloos kona-ba buat hotu. Bíblia dehan: “Nia hadomi hahalok loos no justisa.”—Sal 33:5. w17.04 p. 18 par. 1-2

Inan-aman, Ita-nia ezemplu mak buat neʼebé importante tebes atu ajuda oan haburas relasaun diʼak ho Jeová hodi hetan moris rohan-laek. Se oan sira mak haree Ita “buka uluknanain Maromak nia Ukun”, sira mós sei aprende oinsá atu sadere ba Jeová kona-ba presiza loroloron nian. (Mt 6:33, 34) Tan neʼe, hakaʼas an atu tau uluk Jeová iha Ita-nia moris, duké buka beibeik sasán. Moris ho buat neʼebé Ita presiza deʼit no keta debe. Buka atu halo Jeová kontente, neʼe mak “rikusoin iha lalehan”, duké buka osan ka buka glória husi ema. (Mc 10:21, 22; João 12:43) Labele preokupa liu ho Ita-nia an toʼo la iha tempu ba oan sira. Fó-hatene ba sira katak Ita kontente tebes ho sira-nia desizaun atu tau uluk Jeová duké buka naran boot ka buka osan ba sira-nia an ka ba Ita. Keta iha hanoin neʼebé sala katak oan mak tenke buka moris neʼebé diʼak ba inan-aman. Tenke hanoin-hetan katak, “oan sira la rai rikusoin ba sira-nia inan-aman, maibé inan-aman mak rai ba oan sira”.—2 Kor 12:14. w17.05 p. 8-9 par. 3-4