Jullu

Sebna “tau matan ba liurai nia uma”, no nia iha podér boot. (Isa 22:15) Maibé Sebna sai foti-an no hakarak halo ema seluk haree katak nia mak ema neʼebé importante tebes. (Isa 22:16-18) Tanba Sebna koko atu buka glória ba ninia an, Maromak fó fali ninia knaar ba ema ida naran Eliakim. (Isa 22:19-21) Ida-neʼe akontese iha tempu neʼebé Liurai Senaquerib husi Asíria halo planu atu ataka Jeruzalein. Ikusmai, Senaquerib haruka ema-boot sira ho tropa lubun boot bá atu halo taʼuk ema judeu sira no haruka Liurai Ezekias rende an. (2 Reis 18:17-25) Ezekias haruka Eliakim ho ema naʼin-rua tan hodi bá hasoru ema-boot sira-neʼe. Husi ema naʼin-rua neʼe, ida mak Sebna, neʼebé serbí fali nuʼudar sekretáriu. Nia simu fali pozisaun neʼebé ladún importante. Neʼe hatudu katak, karik Sebna sai haraik-an no la sente laran-kanek ka rai hirus. w18.03 p. 24-25 par. 7-8, 10

Se ita mak sente katak ita-nia moris fokus liu ba rikusoin ka buka ksolok, keta rende an. Husu beibeik Jeová atu fó espíritu santu ajuda ita hodi tau fokus fali ba buat neʼebé loos. (Lc 11:13) Hanoin kona-ba apóstolu Pedro. Dala ruma nia mós la hanoin tuir Kristu nia hanoin. (Mt 16:22, 23; Lc 22:34, 54-62; Gal 2:11-14) Maski nuneʼe, nia nunka rende an, no Jeová ajuda duni nia. Neineik-neineik Pedro aprende oinsá atu hanoin tuir Kristu nia hanoin. Ita mós bele halo nuneʼe. Ikusmai Pedro temi hahalok balu neʼebé bele ajuda ita ohin loron. (2 Ped 1:5-8) Ita presiza haburas hahalok kontrola an, tahan, domin ba irmaun-irmán sira, no hahalok furak seluk tan. Loron ida-idak bele husu ba Ita-nia an: ‘Ohin haʼu presiza hadiʼa hahalok saida hodi sai ema maduru liután iha lia-loos?’ w18.02 p. 25-26 par. 12-13

Job komprende kona-ba prinsípiu sira husi Jeová. Nia hatene ho loloos kona-ba Jeová, no koñesimentu neʼe book nia hodi halo buat neʼebé loos. Porezemplu, Job hatene katak nia la bele hadomi Jeová se nia trata aat ema seluk. (Job 6:14) Nia la hanoin katak nia mak diʼak liu fali ema seluk. Maski ema riku ka kiak, nia trata sira hotu ho diʼak hanesan ninia família rasik. Nia dehan: “Maromak neʼebé halo haʼu iha haʼu-nia inan nia oan-fatin, nia mós halo sira, loos ka lae?” (Job 31:13-22) Job nunka husik ninia rikusoin ka podér halo nia sai foti-an hodi hanoin katak nia importante liu ema seluk. Ohin loron ema barak iha mundu neʼebé riku no iha podér la hatudu hahalok hanesan Job. Job nunka husik buat ida, inklui mós rikusoin atu sai importante liu fali Jeová. Nia hatene katak halo nuneʼe hanesan “nega ona Maromak loos iha lalehan”. (Job 31:24-28) Nia haree moris kaben nian nuʼudar arranju sagradu entre feto ida ho mane ida. Nia mós halo aliansa ho ninia matan atu la hateke ba feto seluk ho hanoin neʼebé la moos.—Job 31:1. w18.02 p. 11 par. 16, 18; p. 12 par. 19

Noé la sente katak sai ema neʼebé diʼak toʼo ona ba nia. Ho aten-brani nia sai “haklaken-naʼin kona-ba buat loos” hodi fó sai ba ema seluk katak nia tau fiar ba Jeová. (2 Ped 2:5) Apóstolu Paulo koʼalia kona-ba Noé hodi dehan: “Liuhusi fiar neʼe, nia hatudu katak mundu neʼe aat.” (Ebr 11:7) Ita bele fiar katak ema seluk goza no ameasa Noé ho hahalok violénsia. Maibé nia la “taʼuk ba ema”. (Prov 29:25) Nia hatudu aten-brani neʼebé mai husi Jeová, hanesan Jeová fó ba ninia atan sira seluk. Noé serbí ona Jeová ba tinan 500 liu antes Jeová haruka nia atu halo arka, ka ró boot ida, hodi salva animál no ema balu husi Rai-Nabeen. (Gên 5:32; 6:14) Ba Noé, karik projetu neʼe susar tebes. Nia hatene katak ema sei goza liután no fó susar barak ba nia. Maibé Noé tau fiar no halo tuir Jeová. “Nia halo nuneʼe duni”.—Gên 6:22. w18.02 p. 4 par. 4, 6-7

Dalan importante atu haburas unidade mak banati-tuir Jeová hodi hatudu domin. (1 João 4:8) Ladiʼak atu hanoin, “Maski haʼu tenke hadomi irmaun-irmán sira, maibé haʼu la presiza gosta sira.” Se ita mak hanoin hanesan neʼe, ita la halo tuir Paulo nia konsellu hodi “tahan malu iha domin”. (Éf 4:2) Paulo nia liafuan la hatete deʼit katak ita tenkesér “tahan malu” maibé tenke halo ho “domin”. Iha ema oioin iha ita-nia kongregasaun, no Jeová dada ema hotu ba nia. (João 6:44) Jeová dada ema tanba nia hadomi ema sira-neʼe. Se Jeová hadomi ita-nia irmaun-irmán sira, ita neʼe sé hodi hanoin katak ita-nia irmaun-irmán sira la merese ita-nia domin? Ita tenke hakaʼas an atu hatudu domin ba sira tanba Jeová hakarak ita atu halo nuneʼe.—1 João 4:20, 21. w18.01 p. 16 par. 14

Inan-aman balu sente katak diʼak liu husik sira-nia oan hetan uluk edukasaun diʼak ka serbisu diʼak depois mak foin hetan batizmu. Karik inan-aman sira-neʼe iha motivu neʼebé diʼak ba oan, maibé sira tenke husu ba sira-nia an: ‘Halo hanesan neʼe bele lori duni susesu ba oan nia moris ka lae? Bíblia hanorin ita atu halo hanesan neʼe ka lae? Importante atu hanoin-hetan katak mundu neʼe no buat sira iha mundu neʼe kontra Jeová nia hanoin no hakarak. (Tgo 4:7, 8; 1 João 2:15-17; 5:19) Relasaun diʼak ho Jeová mak protesaun neʼebé diʼak liu hotu atu kontra hasoru Satanás, mundu neʼe, no mundu nia hanoin aat sira. Se inan-aman mak tau uluk edukasaun ka serbisu, karik oan bele hanoin katak buat sira iha mundu neʼe mak importante liu fali sira-nia relasaun diʼak ho Jeová. Hanoin hanesan neʼe perigu. Se Ita mak hadomi Ita-nia oan, Ita hakarak husik mundu neʼe atu hanorin Ita-nia oan oinsá bele hetan susesu no ksolok ka lae? Dalan ida deʼit atu hetan susesu no ksolok neʼebé loos mak hodi tau uluk Jeová iha ita-nia moris.—Sal 1:2, 3. w18.03 p. 10 par. 10-11

Jeová nia atan barak hakaʼas an atu halaʼo moris neʼebé simples. Sira sente katak moris simples halo sira kontente liu no iha tempu barak liután atu serbí Jeová. Porezemplu, Jack faʼan tiha ninia uma neʼebé boot ho ninia bisnis hodi nia bele pioneiru hamutuk ninia feen. Uluk nia sempre fila uma la kontente tanba problema husi serbisu. Nia dehan: “Haʼu-nia feen neʼebé serbí nuʼudar pioneiru sempre iha ksolok. Nia sempre hatete, ‘Haʼu-nia patraun mak diʼak liu hotu!’ Agora haʼu mós foti pioneiru, no ami naʼin-rua serbisu ba Patraun ida deʼit, Jeová.” Oinsá mak ita bele hatene ita-nia hanoin kona-ba osan? Ita presiza nakloke no husu ba ita-nia an: ‘Dalan neʼebé haʼu moris hatudu katak haʼu fiar duni ba buat neʼebé Bíblia hatete kona-ba osan ka lae? Buat importante liu hotu ba haʼu mak atu buka osan ka lae? Haʼu hanoin kona-ba sasán liu fali haʼu-nia relasaun ho Jeová no ninia povu ka lae? Haʼu fiar duni katak Jeová sei tau matan ba haʼu-nia presiza ka lae?’ Ita bele fiar katak Jeová nunka husik ema neʼebé tau fiar ba nia! w18.01 p. 24-25 par. 12-13

Atu hetan ita rasik nia salvasaun mak responsabilidade neʼebé sériu tebes. Ita presiza lee no hanoin kleʼan kona-ba Maromak nia Liafuan, halo orasaun ba Jeová, no hanoin didiʼak kona-ba dalan oioin neʼebé nia ajuda ona ita. Halo buat sira-neʼe bele ajuda Ita atu fiar liután katak Jeová mak Ita-nia Belun. Neʼe sei book Ita atu koʼalia ba ema seluk kona-ba Ita-nia fiar. (Sal 73:28) Jesus dehan: “Se ema ruma hakarak tuir haʼu, nia tenke nega ninia an rasik no lori ninia ai-riin terus nian no kontinua laʼo tuir haʼu.” (Mt 16:24) Sin, atu laʼo tuir Jesus, ema kristaun ida-idak tenke dedika ninia an ba Jeová no hetan batizmu. Neʼe loke dalan ba ita atu hetan bensaun oioin ohin loron no lori moris rohan-laek ba ita iha Maromak nia mundu foun. Tan neʼe hakaʼas an nafatin atu hetan Ita-nia salvasaun! w17.12 p. 27 par. 18-19

Se inan-aman mak hanorin ho pasiénsia, neineik-neineik oan sei komprende kona-ba fiar nia “luan, naruk, aas no kleʼan”. (Éf 3:18) Ita bele hanorin oan tuir sira-nia idade no kbiit. Se sira-nia fiar komesa sai metin kona-ba buat neʼebé sira aprende, neʼe sei halo fasil ba sira atu defende sira-nia fiar iha ema seluk nia oin, inklui mós kolega eskola sira. (1 Ped 3:15) Porezemplu, Ita-nia oan bele uza Bíblia atu esplika kona-ba saida mak akontese ba ema mate ka lae? Nia bele simu Bíblia nia esplikasaun sira ka lae? Diʼak atu hanoin-hetan katak, Ita presiza hatudu pasiénsia hodi ajuda oan tau fiar ba Maromak nia Liafuan, no halo hanesan neʼe iha folin-boot tebes. (Deut 6:6, 7) Ita rasik nia ezemplu mós importante atu ajuda oan haburas fiar. Stephanie neʼebé iha oan-feto naʼin-tolu hatete: “Haʼu sempre husu ba haʼu-nia an, ‘Haʼu koʼalia ba haʼu-nia oan sira ka lae kona-ba tansá haʼu fiar duni katak Jeová iha, katak nia iha domin, no ninia dalan sira sempre loos?’ Se haʼu mak la iha fiar neʼebé metin, oinsá mak haʼu-nia oan sira bele fiar?” w17.12 p. 20 par. 8-10

Tanbasá mak Marta fiar nia alin-mane sei moris fali? Tanba nia hatene kona-ba moris-hiʼas neʼebé akontese ona iha tempu uluk. Karik nia aprende kona-ba neʼe iha uma ka husi sinagoga bainhira nia sei kiʼik. Bíblia mós temi kona-ba moris-hiʼas tolu neʼebé akontese ona. Hanoin toʼok kona-ba moris-hiʼas primeiru neʼebé akontese durante tempu neʼebé Maromak fó kbiit ba Elias atu halo milagre sira. Iha rai-Fenísia, iha sidade ida naran Sarepta. Iha sidade neʼe iha feto-faluk kiak ida neʼebé simu profeta Elias ho laran-diʼak. Jeová halo milagre ida hodi feto-faluk neʼe nia trigu no mina nunka uza toʼo hotu, hodi aguenta nia ho ninia oan-mane nia moris. (1 Reis 17:8-16) Maibé ninia oan-mane sai moras no ikusmai mate. Tuirmai, Elias mai hodi fó ajuda ba nia. Elias halo orasaun ba Jeová, hodi dehan: “Maromak, favór ida, husik labarik neʼe nia moris fila fali ba nia.” Maromak rona duni ba Elias hodi halo labarik neʼe moris fali. Neʼe mak moris-hiʼas primeiru neʼebé temi iha Bíblia. (1 Reis 17:17-24) Ita fiar katak Marta aprende ona kona-ba akontesimentu furak neʼe. w17.12 p. 3 par. 1; p. 4 par. 3, 5-6

Ema bele book ita atu uza ita-nia tempu no forsa ba serbisu iha mundu neʼe, liuliu serbisu neʼebé bele halo ita sai naran boot, iha pozisaun, ka riku. Tanba ema barak iha hanoin katak iha serbisu boot mak dalan importante ida atu moris ho kontente, se ita la kuidadu ita mós bele komesa hanoin hanesan sira. Serbisu neʼebé halo Ita iha pozisaun ka naran boot, bele halo Ita moris ho kontente duni ka lae? Lae. Hanoin toʼok kona-ba Satanás. Nia hakarak iha pozisaun no naran boot, no nia hetan duni buat rua neʼe. Maibé nia sai hirus, laʼós kontente. (Mt 4:8, 9; Apok 12:12) Se kompara ho ita, ita sente kontente tebes bainhira ajuda ema seluk aprende kona-ba Maromak no ninia promesa furak sira iha futuru. La iha serbisu ida husi mundu neʼe mak bele fó ksolok hanesan neʼe ba ita. No mós, ema neʼebé hakarak hetan serbisu boot iha mundu neʼe, sira sempre buka atu manán, hatún malu, no laran-moras ba malu. Ikusmai sira-nia moris sente mamuk nafatin. Tan neʼe Bíblia dehan, sira hanesan “duni tuir anin”.—Ecle 4:4. w17.11 p. 22-23 par. 11-13

Toʼo tiha Jesus nia tempu, múzika mós sei importante nafatin ba adorasaun neʼebé loos. Porezemplu, iha kalan ida neʼebé importante liu hotu ba ema nia moris, kalan neʼebé Jesus halaʼo Naʼi nia Han-Kalan hamutuk ho ninia dixípulu sira, sira kanta knananuk hahiʼi nian ba Jeová. Ema kristaun iha apóstolu sira-nia tempu hatudu ezemplu neʼebé diʼak kona-ba fó hahiʼi ba Maromak liuhusi knananuk. Maski sira halibur deʼit iha uma, maibé sira kanta nafatin ho laran-manas ba Jeová. Tan neʼe apóstolu Paulo hatete ba ninia irmaun-irmán kristaun sira hodi dehan: “Kontinua hanorin no fó laran-manas ba malu ho salmu no hahiʼi ba Maromak, no kanta knananuk adorasaun nian ho agradese, kanta ba Jeová iha imi-nia laran.” (Kol 3:16) Knananuk sira husi ita-nia livru kanta nian mós parte husi “ai-han iha tempu loloos” neʼebé “atan laran-metin no matenek” fó ba ita. Tan neʼe, diʼak atu “kanta knananuk adorasaun nian ho agradese”.—Mt 24:45. w17.11 p. 4 par. 7-8

Jeová halo arranju atu halo fasil ba ema hodi halai ba sidade protesaun sira. Nia haruka ema Izraél hili sidade neen, tolu iha Mota Jordaun nia sorin ida no tolu tan iha sorin seluk. Tanbasá? Neʼe hodi halo fasil ba ema neʼebé halai atu toʼo lalais iha sidade protesaun. (Núm 35:12-14) Sira tenke tau matan didiʼak ba estrada neʼebé lori ema ba sidade sira neʼe. (Deut 19:3) Livru judeu ida hatete katak, ema mós monta sinál iha estrada sira hodi halo fasil ba ema atu halai ba sidade sira-neʼe. Tanba iha ona sidade sira-neʼe iha Izraél mak, se ema Izraél oho ema ida la ho neon, nia la presiza halai ba nasaun seluk hodi hetan protesaun, tanba neʼe bele halo nia ikusmai adora fali maromak falsu. Hanoin toʼok: Jeová fó mandamentu katak, tenkesér fó kastigu-mate ba ema neʼebé oho ema seluk ho neon. Maibé nia mós halo arranju ba ema neʼebé oho ema seluk la ho neon atu bele hetan protesaun no laran-sadiʼa. Matenek-naʼin ida kona-ba Bíblia hatete: “Buat hotu arranja ho klaru, simples, no fasil atu halo tuir.” Sin, Jeová laʼós juis neʼebé la hatene hanoin ema, neʼebé sempre buka dalan atu fó kastigu deʼit ba ninia atan. Maibé nia mak “Maromak neʼebé riku ho laran-sadiʼa”.—Éf 2:4. w17.11 p. 14 par. 4-5

Surat-tahan lulun ida semo daudauk, feto ida tuur iha fatin sukat nia laran, no feto naʼin-rua semo iha anin ho liras hanesan manu-segoña nia liras. Neʼe mak buat balu neʼebé Zacarias haree iha ninia vizaun. (Zac 5:1, 7-9) Tanbasá mak Jeová fó vizaun sira-neʼe ba nia profeta atu haree? Zacarias nia vizaun ba dala neen no ba dala hitu fó sai avizu sériu ba sira neʼebé halo hahalok aat. Jeová sei la husik hahalok aat atu hela ba nafatin. Nuʼudar ninia atan, ita tenke odi hahalok aat. Vizaun sira-neʼe mós halo ita tau fiar katak, se ita mak hakaʼas an atu halo buat neʼebé Jeová gosta, nia sei la fó malisan ba ita, maibé nia sei proteje no haraik bensaun mai ita. Maski la fasil atu iha hahalok neʼebé moos iha mundu aat neʼe, maibé ho Jeová nia ajuda ita bele hetan susesu! w17.10 p. 21 par. 1; p. 25 par. 19

Irmán sira neʼebé seidauk kaben iha oportunidade barak atu hatudu aten-brani no serbí Jeová. Sira bele foti pioneiru, muda ba fatin neʼebé presiza liután haklaken-naʼin, serbisu iha konstrusaun, no tuir Eskola ba Haklaken-Naʼin Tempu-Tomak. Balu mós hetan konvite hodi tuir Eskola Gilead. Ita hadomi ita-nia irmán sira neʼebé idade ona, no ita agradese bele iha irmán sira-neʼe iha ita-nia kongregasaun. Maski balu karik la iha ona kbiit, maibé sira bele hatudu nafatin aten-brani no halo serbisu. Porezemplu, bainhira katuas husu irmán neʼebé idade ona atu koʼalia ba irmán neʼebé idade kiʼik kona-ba hatais iha dalan neʼebé diʼak, irmán neʼe presiza hatudu aten-brani. Maski nia la siʼak kona-ba dalan irmán neʼe hatais, maibé nia koʼalia iha dalan neʼebé diʼak atu ajuda irmán ida seluk hodi hanoin katak ninia hatais bele halo ema seluk sidi. (1 Tim 2:9, 10) Bainhira irmán idade sira hatudu domin iha dalan hanesan neʼe, sira sei hametin liután ema iha kongregasaun. w17.09 p. 31-32 par. 17-18

Maski ulun-naʼin barak neʼebé iha kbiit koko ona atu hanetik ema hodi lee Bíblia, maibé sira neʼebé taʼuk ba Maromak hakaʼas an nafatin hodi halo Bíblia ba ema seluk atu lee. Ezemplu ida mak kona-ba John Wycliffe. Nia hela iha rai-Inglaterra maizumenus tinan 600 liubá. Nia konkorda katak importante duni atu ema bele lee Bíblia. Iha ninia tempu, ema barak husi Inglaterra nunka lee Bíblia iha sira rasik nia língua. Iha tinan 1382, John Wycliffe no ema balu tan tradús Bíblia ba lia-inglés. Iha ema grupu ida naran Lollard gosta tebes Bíblia husi tradusaun Wycliffe. Sira laʼo ain husi knua ida ba knua seluk iha Inglaterra hodi lee Bíblia ba ema no fó parte balu husi Bíblia neʼebé sira hakerek deʼit ho liman ba ema. Tinan atus balu tuirmai, ema iha rai-Europa no rai seluk tan komesa tradús Bíblia ba língua oioin no print hodi povu kiʼik bele lee. w17.09 p. 20-21 par. 10-12

Kaben-naʼin balu hakarak tebes atu iha oan, maibé sira la bele iha oan. Situasaun hanesan neʼe bele halo feen sai laran-tun. (Prov 13:12) Iha tempu antigu, importante tebes ba feto sira atu kaben no iha oan. Bainhira Jacob nia feen Rakel haree ninia biin iha oan maibé nia lae, neʼe halo nia laran-tun tebes. (Gên 30:1, 2) Susar ida tan neʼebé kaben-naʼin sira hasoru mak se sira-nia feen ka laʼen mate. Karik sira hanoin buat hanesan neʼe sei nunka akontese, maibé ema barak hasoru ona susar neʼe. Ema kristaun sira fiar metin ba Bíblia nia promesa kona-ba moris-hiʼas, no esperansa neʼe fó kmaan duni ba sira. (João 5:28, 29) Liuhusi ninia Liafuan, Jeová halo promesa barak neʼebé halo ita sente kmaan iha tempu ita hasoru susar sira. w17.06 p. 4 par. 1; p. 5 par. 6; p. 6 par. 9

Iha tempu neʼebé Maromak fó sai ninia an ba Moisés, nia fó sai kona-ba ninia naran no hahalok sira. Hahalok primeiru neʼebé Jeová fó sai mak kona-ba ninia laran-sadiʼa no laran-diʼak. (Êx 34:5-7) Tanbasá mak Jeová la fó sai uluk kona-ba ninia forsa ka matenek? Tanba iha tempu neʼebá, Moisés hakarak hatene katak Jeová sei fó duni apoiu ba nia ka lae. Tan neʼe mak Jeová fó sai hahalok sira neʼebé hatudu katak nia hakarak tebes atu fó ajuda ba ninia atan sira. (Êx 33:13) Maski ita moris mai iha ona hahalok sira-neʼe, maibé tanba la perfeitu, ita sempre hanoin ita-nia an uluk. Dala ruma karik la fasil ba ita atu halo desizaun kona-ba ajuda uluk ema seluk ka tau fokus deʼit ba ita-nia an. Se nuneʼe, saida mak bele ajuda ita atu hanoin uluk ema seluk? Primeiru, hanoin kona-ba oinsá mak Jeová no ema seluk hatudu hahalok laran-sadiʼa no laran-diʼak. Segundu, hanoin kona-ba oinsá mak ita bele banati-tuir Maromak nia hahalok laran-sadiʼa no laran-diʼak no tanbasá mak halo nuneʼe diʼak ba ita. w17.09 p. 8 par. 1; p. 9 par. 3

Ita hakarak tau hahalok foun atu fó glória ba Jeová, laʼós atu ema gaba ita. Tenke hanoin-hetan katak maski anju neʼebé perfeitu mós bele sai foti-an hodi monu ba sala. (Kompara Ezequiel 28:17.) Ita la perfeitu, tan neʼe susar liu ba ita atu hasees an husi hahalok foti-an. Maski nuneʼe, ita bele tau hahalok haraik-an nuʼudar ita-nia hatais. Saida mak bele ajuda ita atu halo nuneʼe? Lee Bíblia loron-loron no hanoin kleʼan bele ajuda ita atu haraik-an nafatin. (Deut 17:18-20) Liuliu ita hakarak hanoin kleʼan kona-ba buat neʼebé Jesus hanorin no ninia ezemplu furak kona-ba haraik-an. (Mt 20:28) Jesus haraik-an tebes toʼo nia hakarak fase ninia apóstolu sira-nia ain. (João 13:12-17) Buat seluk neʼebé bele ajuda ita mak halo orasaun ba Jeová atu husu espíritu santu. Jeová nia espíritu bele ajuda ita atu luta hasoru ita-nia hanoin neʼebé halo ita sente katak ita mak diʼak liu fali ema seluk.—Gal 6:3, 4. w17.08 p. 25 par. 11-12

Dala ruma ita sente katak ita husu ona Maromak atu ajuda ita foti desizaun no ita husik ona espíritu santu hodi dirije ita. Maibé ikusmai ita hasoru fali susar oioin ka presiza halo fali mudansa barak ba ita-nia moris. (Ecle 9:11) Saida mak bele ajuda ita atu iha “Maromak nia dame” duké sai “laran-taridu”? Husi Paulo nia liafuan neʼebé nia hakerek ba irmaun-irmán sira iha Filipe hatudu katak, se ita mak hanoin barak kona-ba problema ida, halo orasaun bele ajuda ita. Tan neʼe bainhira ita sai laran-taridu, diʼak atu halo deʼit orasaun. (1 Ped 5:6, 7) Kuandu ita halo orasaun ba Jeová, ita tenke fiar metin katak nia hanoin ita. Hatoʼo beibeik agradese ba Jeová kona-ba bensaun neʼebé ita hetan. No keta haluha katak Jeová bele “halo barak liu fali buat hotu neʼebé ita husu no hanoin”.—Éf 3:20. w17.08 p. 9 par. 4, 6; p. 10 par. 10

Irmaun-irmán barak komesa pioneiru husi tempu joven, no neʼe halo sira kontente. Se ita mak joven ida, Ita bele koʼalia ba sira kona-ba Ita-nia planu. Karik irmaun-irmán sira-neʼe sei hatete ba Ita katak pioneiru mak edukasaun neʼebé sei ajuda Ita iha Ita-nia moris tomak. Jesus aprende buat barak husi ninia Aman bainhira nia iha lalehan. Iha tempu neʼebé nia halaʼo serbisu haklaken iha rai, nia mós kontinua aprende. Nia hetan duni ksolok husi haklaken ba ema no hatudu laran-metin iha tempu susar sira. (Isa 50:4; Ebr 5:8; 12:2) Jesus haruka ita bá ‘hanorin ema atu sai ninia dixípulu’. (Mt 28:19, 20) Se Ita mak halo planu atu halaʼo serbisu neʼe iha Ita-nia moris tomak, neʼe sei halo Ita atu iha moris neʼebé kontente tanba Ita fó glória ba Maromak. Hanesan mós ho serbisu seluk, Ita presiza tempu uitoan atu bele sai matenek. w17.07 p. 23 par. 6-7

Ita bele hetan kmaan husi ita-nia Aman Jeová neʼebé laran-diʼak. (2 Kor 1:3, 4) Ema neʼebé triste tanba ema neʼebé sira hadomi mate mós bele hetan kmaan husi kongregasaun. (1 Tes 5:11) Oinsá mak Ita bele hametin no fó kmaan ba sira neʼebé “laran-triste”? (Prov 17:22) Tenke hanoin-hetan katak iha “tempu atu nonook no tempu atu koʼalia”. (Ecle 3:7) Feto-faluk ida naran Dalene hatete katak sira neʼebé laran-triste hakarak fó sai buat neʼebé iha sira-nia hanoin no sentimentu. Tan neʼe, buat neʼebé importante tebes ba ita atu halo mak rona didiʼak bainhira sira koʼalia. Junia nia maun ida oho an no Junia dehan: “Maski ita la komprende ho loloos sentimentu husi ema neʼebé triste kona-ba ema mate, maibé importante atu hatudu katak ita hakarak atu hatene nia sente oinsá.” Ita presiza hanoin-hetan katak ema ida-idak nia sentimentu la hanesan no dalan neʼebé ita sente triste kona-ba ema ruma mate mós la hanesan. w17.07 p. 13 par. 3; p. 14 par. 11-13

Ema barak ohin loron hanoin katak osan mak buat neʼebé importante liu ba sira. Osan mak buat neʼebé sira sempre hanoin beibeik. Sira uza tempu barak hodi buka osan liután ka rai osan sira-neʼe. Ba ema seluk tan, buat importante liu ba sira mak sira-nia família, saúde, ka oinsá mak atu kumpre planu sira iha sira-nia moris. Tuir loloos iha buat ida mak importante liu fali buat sira-neʼe, neʼebé kona ema hotu. Neʼe mak kona-ba Maromak Jeová nia direitu atu ukun. Importante tebes atu hanoin beibeik kona-ba neʼe. Tanbasá? Tanba se ita la kuidadu, ita bele sai preokupa liu ho moris loroloron nian ka hanoin demais kona-ba ita-nia problema toʼo haluha katak Jeová nia direitu atu ukun mak importante tebes. Maibé se ita mak fó apoiu ba Jeová nia direitu atu ukun, neʼe bele halo fasil ba ita atu tahan hasoru problema loroloron nian, no mós halo ita hakbesik liután ba Jeová. w17.06 p. 22 par. 1-2

Jeová sempre uza ninia podér iha dalan neʼebé domin. Família nia ulun no katuas sira neʼebé hakruʼuk ba Jeová nia direitu atu ukun hakarak banati-tuir Jeová hodi la siʼak ka kontrola ema seluk. Apóstolu Paulo hakaʼas an hodi halo tuir duni Maromak no ninia Oan-Mane. Nia nunka hamoe ema ka obriga ema atu halo buat ruma. Maibé ho laran-diʼak, nia fó laran-manas ba ema seluk atu halo buat neʼebé loos. (Rom 12:1; Éf 4:1; Flm 8-10) Neʼe mak dalan neʼebé Jeová trata ema ida-idak. Tan neʼe ita mós hakarak trata ema seluk iha dalan neʼebé domin hodi hatudu katak ita apoia Jeová nia direitu atu ukun. Ita mós fó apoiu ba Jeová nia ukun liuhusi serbisu hamutuk ho sira neʼebé Jeová uza atu reprezenta nia. Maski dala ruma ita la komprende ka la konkorda ho desizaun ruma neʼebé sira foti, maibé ita hakarak fó apoiu nafatin ba sira. Ida-neʼe la hanesan duni ho ema iha mundu neʼe nia hanoin, maibé neʼe mak dalan neʼebé ita hakruʼuk ba Jeová nuʼudar ita-nia Ukun-Naʼin.—Éf 5:22, 23; 6:1-3; Ebr 13:17. w17.06 p. 30 par. 14-15

Irmaun-irmán sira neʼebé sente laran-tun, depresaun, ka hasoru daudauk problema seluk presiza ita atu fó atensaun no fó kmaan ba sira. (Prov 12:25; Kol 4:11) Ita bele hatudu ita-nia domin ba “ita-nia maluk fiar-naʼin” liuhusi ita-nia liafuan no ajuda. (Gal 6:10) Bíblia hatete katak iha “loron ikus sira”, ema barak husi mundu aat neʼe sei hanoin an deʼit no karak-teen. (2 Tim 3:1, 2) Nuʼudar ema kristaun, ita presiza hakaʼas an atu haburas ita-nia domin ba Jeová, ba ninia Liafuan, no ba maluk fiar-naʼin. Tanba ita la perfeitu, dala ruma bele mosu problema kiʼik ho irmaun-irmán sira. Maibé tanba ita iha domin ba malu, ita hakarak rezolve kedas problema sira-neʼe iha dalan neʼebé diʼak. (Éf 4:32; Kol 3:14) Mai ita kontinua hatudu domin neʼebé metin ba Jeová, ba ninia Liafuan, no ba irmaun-irmán sira. w17.05 p. 21 par. 17-18

Mundu neʼe iha duni hahalok barak neʼebé la justisa. Maibé oinsá se ita haree ka hasoru hahalok ruma neʼebé tuir ita-nia hanoin hanesan la justisa iha kongregasaun, neʼe sei koko tebes ita-nia fiar, loos ka lae? Se neʼe mak akontese ba Ita, Ita sei halo saida? Ita sei husik hahalok sira-neʼe halo Ita sidi ka lae? Ita hotu la perfeitu no halo sala, tan neʼe dala ruma ita bele hatudu hahalok neʼebé la justisa ba malu iha kongregasaun. Maski buat hanesan neʼe ladún akontese, maibé ema kristaun neʼebé laran-metin la hakfodak ka sidi se iha duni buat neʼebé la justisa akontese. Jeová fó ona matadalan diʼak husi Bíblia hodi ajuda ita atu laran-metin nafatin ba nia se karik iha irmaun ka irmán balu hatudu hahalok la justisa ba ita.—Sal 55:12-14. w17.04 p. 19 par. 4-5

Se Ita-nia kaben la serbí Jeová, neʼe sei lori estrese no laran-taridu liután ba Ita-nia moris kaben nian. Jeová hatete katak ita la bele haketak ka soe malu ho ita-nia kaben tan deʼit nia la serbí Jeová. (1 Kor 7:12-16) Maski Ita-nia laʼen la serbí Jeová, Ita presiza respeitu nafatin nia nuʼudar família nia ulun. No se Ita-nia feen la serbí Jeová, Ita presiza hadomi no tau matan didiʼak ba nia. (Éf 5:22, 23, 28, 29) Ita presiza halo saida se Ita-nia kaben koko atu kontrola Ita-nia liberdade kona-ba adorasaun? Porezemplu, irmán ida nia laʼen hatete ba nia katak nia bele bá haklaken iha loron balu deʼit iha semana nia laran. Se Ita mak iha situasaun hanesan neʼe, husu ba Ita-nia an: ‘Haʼu-nia laʼen hapara haʼu atu la bele adora tan Jeová ka lae? Se laʼós, bele ka lae haʼu halo tuir nia?’ Se Ita mak la ulun-toos, Ita bele hamenus problema barak iha Ita-nia moris kaben nian.—Flp 4:5. w17.10 p. 13 par. 7-8

Bíblia fó-hatene nanis katak, ema “husi nasaun oioin neʼebé koʼalia língua oioin” sei laʼo nadodon ba Jeová nia organizasaun. (Zac 8:23) Maibé, se oan mak la komprende Ita-nia língua rasik, neʼe sei halo susar ba Ita atu hanorin lia-loos ba sira. Oan sira mak Ita-nia estudante Bíblia neʼebé importante liu hotu, no ajuda sira “hatene didiʼak” kona-ba Jeová mak bele lori moris rohan-laek ba sira. (João 17:3) Ita tenkesér koʼalia beibeik kona-ba lia-loos hodi oan sira mós bele aprende kona-ba Jeová. (Deut 6:6, 7) Oan sira baibain aprende língua neʼebé ema uza iha rai ida-idak liuhusi eskola ka husi ema seluk. Maibé Ita presiza uza Ita rasik nia língua hodi koʼalia beibeik ho sira atu sira bele aprende Ita-nia língua rasik. Se sira hatene Ita-nia língua, neʼe sei halo fasil ba sira atu koʼalia ho Ita no fó-hatene Ita kona-ba sira-nia sentimentu. No mós, se sira mak hatene koʼalia língua seluk, neʼe sei ajuda aumenta sira-nia kbiit atu hanoin no ajuda mós sira atu komprende kona-ba ema seluk nia hanoin. w17.05 p. 9 par. 5-6

Jabin nia tropa iha kuda-karreta funu nian 900 ho roda neʼebé iha surik, maibé ema Izraél la iha armas funu nian atu funu hasoru sira ka atu proteje sira-nia an. (Juíz 4:1-3, 13; 5:6-8) Maibé Jeová fó mandamentu ba Barake neʼebé temi iha leten. Tuirmai Barake lori ema sira-neʼe bá funu hasoru inimigu sira iha fatin ida naran Taanak. (Juíz 4:14-16) Jeová fó apoiu ba ema Izraél sira ka lae? Sin. Derrepente udan no anin-boot, no fatin neʼebé sira atu halo funu sai nakonu ho tahu. Barake duni Sísera nia tropa sira ba kilómetru 24, toʼo fatin ida naran Haroset. Iha dalan atu bá fatin neʼe, Sísera nia kuda-karreta funu nian mout iha tahu. Nia tun no halai ba Zaananim, karik besik Kedes. Nia bá subar iha feto ida naran Jael nia tenda. Sísera kole tebes no toba dukur tiha. Bainhira nia toba hela, Jael, ho aten-brani oho nia. (Juíz 4:17-21) Jeová halo ema Izraél sira manán funu hasoru sira-nia inimigu! w17.04 p. 29-30 par. 6-8

Armajedón liutiha, sei iha organizasaun ruma iha mundu neʼe ka lae? Bíblia dehan: “Tuir ninia promesa, ita hein lalehan foun no rai foun, no iha neʼebá sei iha nafatin hahalok loos.” (2 Ped 3:13) Lalehan uluk nian mak governu sira neʼebé nakonu ho korrupsaun, no rai uluk nian mak governu sira-neʼe nia povu. Bainhira sira hotu lakon ona, saida mak sei troka fali sira? “Lalehan foun no rai foun.” Lalehan foun mak governu foun, ka Maromak nia Ukun neʼebé Jesus Kristu no ema naʼin-144.000 mak sei ukun hamutuk. Rai foun mak povu sira neʼebé moris iha Maromak nia governu neʼe. Jesus ho sira neʼebé ukun hamutuk ho nia sei haleno Jeová nia hahalok iha dalan neʼebé perfeitu hodi hatudu katak Jeová mak Maromak neʼebé laʼós runguranga nian. (1 Kor 14:33) Tan neʼe mak ita bele fiar katak rai foun sei organiza iha dalan neʼebé diʼak. Iha tempu neʼebá, mane laran-diʼak deʼit mak sei tau matan ba buat hotu, tanba sira sei simu matadalan husi Kristu no husi ema naʼin-144.000. (Sal 45:16) Hanoin toʼok iha tempu neʼebá, mundu tomak iha organizasaun ida deʼit neʼebé iha unidade no nunka halo korrupsaun, no organizasaun hotu ohin loron neʼebé nakonu ho korrupsaun la iha tan ona! w17.04 p. 11 par. 8-9

Moris kaben mak buat neʼebé sagradu. Jeová haree juramentu neʼe nuʼudar buat neʼebé sériu tebes. Bainhira noivu no noiva halo juramentu ba malu iha Jeová nia oin, no mós iha ema seluk nia oin, baibain sira promete atu hadomi, hafolin no respeitu malu durante sira naʼin-rua moris hela iha mundu hodi tuir Maromak nia arranju kaben nian. No karik ema balu uza liafuan seluk, maibé sira mós halo juramentu ida iha Maromak nia oin. Bainhira sira halo tiha juramentu sira-neʼe, sira naʼin-rua sai feen no laʼen no sira-nia relasaun neʼe tenkesér toʼo mate. (1 Kor 7:39) Jesus hatete: “Buat neʼebé Maromak tau hamutuk, ema keta haketak.” Tan neʼe mak ema neʼebé hanoin hela atu kaben, la bele hanoin katak sira bele soe malu se problema ruma mosu iha sira-nia moris kaben nian. (Mc 10:9) Ema hotu sala-naʼin no la iha ema naʼin-rua neʼebé halaʼo moris kaben nian neʼebé perfeitu. Tan neʼe mak Bíblia dehan katak ema hotu neʼebé kaben sei “hetan susar iha sira-nia isin”.—1 Kor 7:28. w17.04 p. 7 par. 14-15