Agostu

Se ita hakarak sai mestre neʼebé diʼak, primeiru tenkesér sai uluk alunu neʼebé diʼak. (1 Tim 4:15, 16) Hanesan neʼe mós ho ema sira neʼebé simu responsabilidade husi Jeová atu fó dixiplina ba ema seluk, tenkesér hatudu haraik-an hodi halo tuir beibeik matadalan sira husi Jeová. Se ema seluk haree katak Ita mak ema neʼebé haraik-an, sira sei hatudu respeitu ba Ita no neʼe halo fasil ba sira atu simu sujestaun ka konsellu husi Ita. Ita bele aprende husi Jesus nia ezemplu. Jesus sempre halo tuir ninia Aman maski susar tebes atu halo nuneʼe. Nia fó-hanoin ba ema neʼebé rona nia katak ninia hanorin no matenek mai husi ninia Aman. (João 5:19, 30) Tanba Jesus haraik-an no sempre halo tuir buat neʼebé ninia Aman hakarak nia atu halo, neʼe ajuda nia sai mestre neʼebé laran-diʼak tebes. Ema neʼebé laran-maus gosta tebes hamutuk ho Jesus. (Mt 11:29) Jesus nia liafuan diʼak sira anima tebes ema neʼebé hasoru laran-susar no sente kbiit-laek. (Mt 12:20) Tuir loloos nia bele sai hirus ba ninia apóstolu sira tanba sira diskute beibeik kona-ba sé mak boot liu iha sira-nia leet, maibé Jesus korrije sira iha dalan neʼebé diʼak no domin.—Mc 9:33-37; Lc 22:24-27. w18.03 p. 26 par. 15-16

Pedro kompara batizmu hanesan harii arka iha Noé nia tempu. Arka mak sai hanesan evidénsia ba ema seluk katak Noé halo duni Maromak nia hakarak ho laran tomak. Noé halo serbisu neʼebé Jeová fó ba nia toʼo ramata. Tanba Noé nia fiar mak Jeová salva nia ho ninia família husi Rai-Nabeen. Bainhira ema haree arka, sira hatene kedas katak Noé hatudu fiar ba Maromak. Hanesan neʼe mós bainhira ema haree ita hetan batizmu, sira hatene kedas katak ita dedika ona ita-nia moris ba Maromak tanba ita hatudu fiar ba Kristu. Hanesan Noé, ema neʼebé hetan batizmu mós halo serbisu neʼebé Maromak fó ba sira atu halo. Jeová mós sei salva ema laran-metin neʼebé hetan ona batizmu bainhira nia halakon mundu aat neʼe, hanesan nia salva Noé husi Rai-Nabeen. (Mc 13:10; Apok 7:9, 10) Sin, importante tebes atu dedika ita-nia moris ba Jeová no hetan batizmu. Se ema ida mak demora beibeik atu hetan batizmu, karik nia bele lakon ninia oportunidade atu moris ba nafatin. w18.03 p. 4 par. 3-4

Inan-aman balu hanoin, se sira-nia oan seidauk hetan batizmu, kongregasaun lalika hasai sira. Maibé tanbasá mak hanoin hanesan neʼe sala? (Tgo 1:22) Ita bele komprende inan-aman balu lakohi husik sira-nia oan atu hetan batizmu tanba oan seidauk prontu atu dedika ninia moris ba Jeová. Maibé se inan-aman hanoin katak, se oan seidauk hetan batizmu, nia lalika hatán ba Jeová kona-ba ninia hahalok sira, neʼe hanoin neʼebé sala. Tanbasá? Tanba bainhira oan ida hatene ona saida mak loos no sala, nia tenke hatán ba Jeová. (Tgo 4:17) Inan-aman neʼebé matenek lakohi hanetik oan atu hetan batizmu. Maski oan nia idade sei kiʼik, inan-aman hakarak hanorin nia liuhusi ezemplu no liafuan atu hadomi buat neʼebé loos tuir Jeová nia hanoin no odi buat neʼebé sala. (Lc 6:40) Oan nia domin ba Jeová sei proteje nia atu la monu ba sala neʼebé sériu, tanba domin neʼe sei book nia atu halo buat neʼebé loos tuir Jeová nia haree.—Isa 35:8. w18.03 p. 11 par. 12-13

Rai-Nabeen liu tiha, Noé tau uluk nafatin Jeová iha ninia moris ba tinan 350 tan. (Gên 9:28) Noé hatudu ezemplu neʼebé diʼak duni kona-ba fiar no halo tuir! Ita bele banati-tuir Noé nia fiar no hahalok halo tuir, hodi kaer metin ba Jeová nia hahalok loos, la sai parte ba Satanás nia mundu, no tau uluk Jeová iha ita-nia moris. (Mt 6:33; João 15:19) Ita hatene katak, moris hanesan neʼe sei halo mundu odi ita. Porezemplu, tanba ita hakarak kaer metin ba Maromak nia ukun-fuan kona-ba arranju kaben nian no mós morál, neʼe sei halo ema koʼalia aat ita liuhusi média. (Mal 3:17, 18) Maibé hanesan Noé, ita la taʼuk ba ema. Ita taʼuk ba Jeová, neʼe katak ita hatudu respeitu neʼebé kleʼan ba nia no lakohi halo nia sai triste kona-ba ita. Ita hatene katak nia mesak deʼit mak bele fó moris neʼebé rohan-laek ba ita. (Lc 12:4, 5) Maibé, husu ba Ita-nia an: ‘Maski ema goza ka kritika, haʼu halo nafatin buat neʼebé loos tuir Maromak nia haree ka lae? Haʼu iha fiar ba Jeová atu tau matan ba haʼu-nia família maski susar atu buka moris ka lae?’ Se Ita mak tau fiar no halo tuir Jeová hanesan Noé, Ita bele fiar katak Jeová sei tau matan ba Ita.—Flp 4:6, 7. w18.02 p. 4 par. 4, 8; p. 5 par. 9-10

Mundu nia hahalok mak sempre hanoin an deʼit. Paulo hatete katak neʼe mak “hahalok no hanoin sira neʼebé agora book an iha ema kontradór sira-nia laran”. (Éf 2:2) Hahalok sira-neʼe book ona ema barak hodi halo tuir deʼit ema. Sira halo deʼit buat neʼebé sira hanoin mak loos no la hafolin Maromak nia morál. Baibain ema neʼebé moris tuir hakarak isin nian hanoin deʼit kona-ba rikusoin, no sira hanoin katak, pozisaun, osan, ka sira-nia direitu importante liu buat hotu. Ema neʼebé moris tuir hakarak isin nian iha toman atu halo buat neʼebé Bíblia bolu “isin nia hahalok sira”. (Gal 5:19-21) Hahalok seluk tan husi ema neʼebé moris tuir hakarak isin nian mak: sobu unidade, soran ema atu kontra malu, todan ba sorin, lori malu ba tribunál, la hatudu respeitu ba arranju ulun nian, no buka han no hemu deʼit. Bainhira hasoru tentasaun ruma, sira monu lalais deʼit ba sala.—Prov 7:21, 22. w18.02 p. 19 par. 3-5

La sala atu iha hanoin neʼebé loos kona-ba buka ksolok. Ema balu iha hanoin katak, ita la bele uza tempu atu halimar, maibé neʼe laʼós buat neʼebé Jeová hakarak ba ita. Bíblia fó laran-manas ba ninia atan sira neʼebé laran-metin ba nia hodi dehan: “Bá, han ó-nia ai-han ho haksolok, no hemu ó-nia tua-uvas ho laran-kontente.” (Ecle 9:7) Eskritura iha 2 Timóteo 3:4 koʼalia kona-ba sira neʼebé hadomi ksolok toʼo Maromak la importante tan ba sira-nia moris. Haree didiʼak eskritura neʼe la hatete katak ema sei hadomi ksolok liu fali Maromak. Liafuan “liu fali” bele hatudu katak sira sei iha domin uitoan ba Maromak, maibé eskritura neʼe uza liafuan, “duké hadomi Maromak”. Matenek-naʼin ida dehan katak eskritura neʼe “laʼós hatete katak ema sira-neʼe mós hadomi nafatin Maromak. Lae, sira la iha ona domin ba Maromak”. Ida-neʼe sai avizu neʼebé sériu ba ema sira neʼebé hadomi ksolok. Bíblia hatete katak “ksolok moris nian” mak “hanehan” ema sira-neʼe.—Lc 8:14. w18.01 p. 25 par. 14-15

Jeová mak Maromak neʼebé laran-diʼak tebes. Buat hotu neʼebé ita iha mai husi nia. Buat hotu neʼebé iha folin-boot iha mundu neʼe Jeová nian, no nia uza buat sira-neʼe hodi sustenta kriasaun nia moris. (Sal 104:13-15; Ageu 2:8) Porezemplu, durante ema Izraél hela iha rai-fuik maran ba tinan 40, Jeová fó maná no bee hodi tau matan ba sira. (Êx 16:35) Tan neʼe nasaun Izraél la falta buat ida. (Neem 9:20, 21) Iha tempu seluk, Jeová fó kbiit ba Eliseu hodi halo feto-faluk ida nia mina nunka uza toʼo hotu. Liuhusi milagre neʼe, nia bele selu ninia debe no bele tau matan ba ninia an ho ninia oan-mane nia moris. (2 Reis 4:1-7) Iha tempu uluk, Jeová mós fó kbiit ba Jesus hodi halo milagre kona-ba hahán no osan iha tempu neʼebé presiza. (Mt 15:35-38; 17:27) Jeová bele uza buat naran deʼit atu tau matan ba ninia kriasaun sira. Maski nuneʼe, Jeová konvida ninia atan atu fó buat neʼebé sira iha hodi fó apoiu ba serbisu neʼebé halaʼo iha ninia organizasaun.—Êx 36:3-7. w18.01 p. 17 par. 1-3

Maromak nia atan balu iha tempu uluk mós sente la bele tahan ona ho problema sira. (Jó 7:7) Saida mak ajuda sira tahan? Sira sadere ba Jeová nia forsa. Bíblia hatete katak Maromak “fó kbiit ba ema neʼebé kole”. (Isa 40:29) Maibé triste mak, Maromak nia atan balu ohin loron sente katak dalan neʼebé diʼak liu atu tahan ho problema sira mak para atu serbí Jeová ba tempu balu. Sira sente katak serbí Jeová lori todan ba sira duké lori bensaun. Tan neʼe, sira la lee ona Bíblia, la tuir ona reuniaun sira, no la haklaken ona. Tuir loloos, Satanás nia hakarak mak atu haree ita la halo tan buat sira-neʼe. Diabu lakohi haree ita iha kbiit. Nia hatene katak se ita mak preokupa ho atividade adorasaun nian, neʼe sei halo ita sai forte liután. Tan neʼe, se Ita mak sente kole, keta sees husi Jeová. Hakbesik nafatin ba nia. Bíblia hatete: “Nia sei halo imi hamriik metin, nia sei halo imi iha kbiit.”—1 Ped 5:10; Tgo 4:8. w18.01 p. 7-8 par. 2-3

Moris-hiʼas segundu neʼebé temi iha Bíblia mak moris-hiʼas neʼebé profeta Eliseu halo. Iha feto Izraél ida neʼebé la iha oan no nia hela iha sidade Sunem. Tanba nia simu profeta Eliseu ho laran-diʼak, Jeová fó bensaun ba nia ho ninia laʼen neʼebé idade ona hodi iha oan-mane ida. Maibé tinan balu liutiha, labarik neʼe mate. Hanoin toʼok inan neʼe nia laran-triste. Nia sente triste tebes toʼo nia laʼo kilómetru 30 hodi bá Eliseu iha Foho Karmel. Eliseu haruka uluk ninia asistente Geazi ba Sunem atu halo labarik neʼe moris fali. Maibé Geazi la bele fó fali labarik nia moris ba nia. Ikusmai inan neʼebé laran-triste toʼo mai hamutuk ho Eliseu. (2 Reis 4:8-31) Eliseu tama ba uma neʼebé sira latan labarik nia mate-isin no Eliseu halo orasaun. Jeová hatán duni ba Eliseu nia orasaun no halo milagre ba labarik neʼe hodi moris fali. Bainhira ninia inan haree ninia oan-mane moris fali, nia sai kontente tebes! (2 Reis 4:32-37) Jeová fó moris-hiʼas ba labarik-mane iha Sunem hodi hatudu katak nia iha duni kbiit atu halo ema mate moris fali. w17.12 p. 4-5 par. 7-8

Matenek mak sinál neʼebé hatudu sai ema neʼe maduru. Ema neʼebé maduru iha lia-loos haree husi ninia hamtaʼuk ba Jeová no hakarak halo tuir nia, laʼós husi ninia idade. (Sal 111:10) Joven sira neʼebé maduru iha lia-loos la husik sira-nia hakarak rasik ka joven seluk atu book sira halo desizaun. (Éf 4:14) Sira uza sira-nia “kbiit atu hanoin” neʼebé hetan ona treinu hodi tetu saida mak diʼak no saida mak aat. (Ebr 5:14) Tan neʼe sira bele halo desizaun neʼebé matenek. Iha matenek hanesan neʼe bele salva moris. (Prov 24:14) Tan ne’e, importante tebes ba oan atu hatene katak Ita hafolin Bíblia nia hanorin. Ita presiza hatudu ba sira liuhusi Ita-nia liafuan no hahalok katak Ita koko duni atu moris tuir Bíblia nia matadalan sira.—Rom 2:21-23. w17.12 p. 20-21 par. 12-13

Hanoin katak ema bele rezolve sira-nia problema rasik, halo ema barak gosta ideia neʼe. Tanbasá? Tanba se ideia neʼe mak loos, ema la presiza tan halo tuir Maromak nia matadalan, no ema bele halo buat naran deʼit tuir sira-nia hakarak rasik. Karik Ita rona ona ema hatete katak agora problema sira hanesan funu, krime, moras, no kiak ladún barak ona. Relatóriu ida hatete: “Razaun ida tanbasá ema komesa moris diʼak mak tanba ema hatene ona oinsá atu halo mundu neʼe sai fatin neʼebé hakmatek.” Se Ita mak rona mundu nia ideia ruma neʼebé bele lori perigu ba Ita-nia fiar, halo riset kona-ba Bíblia hatete saida. Koʼalia ba irmaun ka irmán neʼebé maduru. Hanoin kona-ba tansá mak ema barak gosta ideia neʼe, tanbasá mak ideia neʼe laloos, no oinsá mak Ita bele hasees an husi hanoin hanesan neʼe. Ita bele proteje ita-nia an husi mundu nia hanoin hodi halo tuir buat neʼebé Paulo hatete iha eskritura ba ohin. w17.11 p. 24 par. 14, 17

Tanbasá ema farizeu sira lakohi atu hatudu laran-sadiʼa ba ema seluk? Bíblia dehan katak ema farizeu “haree ema seluk folin-laek”, no sira hanoin katak sira la presiza hatudu laran-sadiʼa ba ema seluk. (Lc 18:9-14) Banati-tuir Jeová bá, no keta halo tuir ema farizeu sira. Hatudu laran-sadiʼa no hanoin ema seluk. (Kol 3:13) Halo fasil ba ema seluk atu hetan Ita-nia perdua. (Lc 17:3, 4) Husu ba Ita-nia an: ‘Haʼu fasil atu fó perdua lalais, maski ema seluk hakanek haʼu dala barak ka lae? Haʼu prontu ka lae atu buka dame ho ema neʼebé hakanek haʼu?’ Ita tenke haraik-an atu bele fó perdua. Ema farizeu lakohi fó perdua tanba sira hanoin katak sira diʼak liu fali ema seluk. Maibé nuʼudar ema kristaun, ita tenke hatudu haraik-an hodi “haree ema seluk boot liu” ita no fó perdua ba sira ho laran. (Flp 2:3) Bele husu ba ita-nia an, ‘Haʼu halo tuir Jeová no hatudu haraik-an ka lae?’ Se ita mak haraik-an, neʼe halo fasil ba ema seluk atu husu perdua husi ita no fasil mós ba ita atu fó perdua ba sira. Tan neʼe, lalais atu hatudu laran-sadiʼa no neineik atu sai laran-kanek.—Ecle 7:8, 9. w17.11 p. 14-15 par. 6-8

Saida deʼit mak bele halo Ita moe atu kanta? Karik iha Ita-nia família ka kultura Ita la iha toman atu kanta. Ka karik bainhira Ita rona kantadór profisionál sira kanta iha rádiu ka televizaun, no se Ita kompara ho Ita-nia lian, Ita sai moe ka laran-kraik. Maibé ita hotu iha responsabilidade atu kanta knananuk hahiʼi nian ba Jeová. Tan neʼe bainhira atu kanta, foti saʼe Ita-nia livru kanta, foti Ita-nia ulun, no kanta ho laran-manas! (Esd 3:11) Ohin loron, Reuniaun-Fatin barak iha televizaun neʼebé hatudu liafuan husi ita-nia livru kanta, neʼe bele ajuda ita atu hasaʼe ita-nia lian. No iha eskola ida neʼebé katuas kongregasaun sira tuir, agora programa mós inklui kanta hahiʼi ba Jeová. Ida-neʼe atu hatudu katak importante tebes ba katuas sira atu hatudu ezemplu uluk kona-ba kanta iha reuniaun sira. Ema barak taʼuk atu kanta ho lian makaʼas tanba sira hanoin sira-nia lian ladún diʼak. Maibé hanoin toʼok kona-ba neʼe. “Ita hotu halo sala dala barak” ho ita-nia liafuan sira, maibé neʼe la hapara ita atu koʼalia. (Tgo 3:2) Tan neʼe, keta husik ita-nia lian neʼebé ladún diʼak atu hapara ita hodi kanta knananuk hahiʼi nian ba Jeová. w17.11 p. 5 par. 9-10

Bainhira Zacarias nia vizaun ba dala hitu ramata ona, profeta neʼe hanoin kona-ba buat barak. Jeová fó garantia katak nia sei husu ema laran-aat sira atu hatán ba hahalok aat sira neʼebé sira halo. Ita bele fiar katak Jeová nia promesa neʼe hametin tebes Zacarias. Maibé iha tempu neʼebá, situasaun seidauk troka tanba ema barak sei halo nafatin hahalok aat no laran la moos. Jeová nia templu iha Jeruzalein mós seidauk ramata. Tanbasá mak ema judeu sira husik lalais serbisu importante neʼebé Jeová fó ba sira atu halo? Sira-nia objetivu atu fila ba Jeruzalein mak atu buka moris neʼebé diʼak liu ka lae? Jeová hatene duni katak ninia povu presiza kbiit no aten-brani. Tan neʼe, liuhusi vizaun ikus neʼebé Zacarias haree, Jeová fó fiar ba ema judeu katak nia hadomi sira no hafolin tebes sira-nia hakaʼas-an atu serbí nia. Nia promete ba sira katak, se sira fila fali ba serbisu, nia sei proteje sira. Kona-ba harii fali templu, Jeová halo promete neʼebé temi iha eskritura ba ohin. w17.10 p. 26 par. 1; p. 27 par. 5

Irmaun sira neʼebé hakarak atu serbí nuʼudar atan ba kongregasaun ka katuas, neʼe lori bensaun ba kongregasaun. (1 Tim 3:1) Maibé karik balu dada an husi knaar sira-neʼe. Karik irmaun ida uluk halo sala ruma no agora nia sente katak nia la merese atu serbí fali nuʼudar atan ka katuas. Irmaun ida bele sente katak nia la iha kbiit atu serbí ona. Se Ita mak sente hanesan neʼe, Jeová bele ajuda Ita atu sai aten-brani. (Flp 4:13) Hanoin kona-ba Moisés nia ezemplu. Nia mós sente katak nia la iha kbiit atu halo buat neʼebé Maromak hakarak nia atu halo. (Êx 3:11) Maibé Jeová ajuda nia sai aten-brani hodi halo buat neʼebé nia presiza halo. Oinsá mak irmaun neʼebé hetan ona batizmu bele sai aten-brani hanesan neʼe? Nia bele halo orasaun husu Jeová nia ajuda no lee Bíblia loroloron. Nia bele hanoin kleʼan kona-ba ezemplu husi ema sira iha Bíblia neʼebé hatudu aten-brani. Ho haraik-an nia bele husu irmaun katuas sira fó treinu ba nia no fó ninia an atu ajuda kongregasaun. w17.09 p. 32 par. 19

Maromak mak leno ema hodi hakerek Bíblia. Maibé ida-neʼe la dehan katak nia mós leno ema hodi tradús Septuajinta, King James Version, no tradusaun seluk tan. Maski nuneʼe, haree fali oinsá ema balu tradús Bíblia, ita bele fiar duni katak, hanesan buat neʼebé Jeová promete ona, ninia Liafuan sei hela ba nafatin. Ida-neʼe hametin liután ita-nia fiar katak buat hotu neʼebé Jeová promete ona mós sei sai loos. (Jos 23:14) Bainhira ita haree oinsá Jeová proteje ninia Liafuan hodi la lakon, ita-nia fiar no domin ba nia sai metin liután. Tanbasá mak Jeová hakarak proteje Bíblia no fó Bíblia ba ita? Tanba nia hadomi ita no hakarak hanorin ita atu lori buat neʼebé diʼak ba ita. (Isa 48:17, 18) Neʼe book ita atu hadomi no halo tuir nia.—1 João 4:19; 5:3. w17.09 p. 21-22 par. 13-14

Se Ita-nia kaben la serbí Jeová, susar tebes atu hanorin ita-nia oan atu halo tuir matadalan neʼe. Sai ezemplu diʼak ba Ita-nia oan hodi hatudu respeitu ba Ita-nia kaben. Hanoin kona-ba Ita-nia kaben nia hahalok diʼak sira no fó-hatene ba nia katak Ita agradese tebes ba buat diʼak sira neʼebé nia halo. Keta koʼalia buat negativu kona-ba Ita-nia kaben iha oan sira-nia oin. Esplika ba oan sira katak, ema ida-idak mak tenke hili atu serbí ka la serbí Jeová. Se Ita treinu Ita-nia oan atu hatudu respeitu, karik sira-nia ezemplu diʼak bele book Ita-nia kaben atu aprende kona-ba Jeová. Karik laʼen balu mós bandu sira-nia feen atu la bele hanorin Bíblia ba oan ka lori oan ba reuniaun Kristaun sira. Maski hanesan neʼe, feen bele hakaʼas an nafatin atu hanorin oan kona-ba lia-loos. (Após 16:1; 2 Tim 3:14, 15) Maski feen presiza respeitu laʼen nia desizaun, nia bele uza oportunidade seluk atu koʼalia ninia fiar ba oan sira. Hodi nuneʼe oan sira bele aprende kona-ba Jeová no morál sira husi Bíblia.—Após 4:19, 20. w17.10 p. 13-14 par. 9-10

Jeová kria ema tuir ninia ilas, no tanba nia mak Maromak neʼebé laran-sadiʼa no laran-diʼak, ema hotu, inklui mós sira neʼebé la hatene Maromak, iha kbiit atu hatudu hahalok laran-sadiʼa no laran-diʼak ba ema seluk. (Gên 1:27) Ita bele hetan ezemplu barak husi Bíblia kona-ba ema neʼebé hatudu hahalok sira-neʼe. Porezemplu, bainhira Liurai Salomão halaʼo tesi-lia ba feto naʼin-rua kona-ba sé mak inan neʼebé loos ba bebé ida, nia haruka ema atu tesi bebé hodi fahe ba rua atu koko feto sira-neʼe nia laran. Bebé nia inan neʼebé loos hanoin tebes bebé neʼe no nia husu ba liurai atu fó deʼit bebé neʼe ba feto ida seluk. (1 Reis 3:23-27) Ezemplu ida tan mak kona-ba Faraun nia oan-feto iha tempu neʼebé nia hetan bebé Moisés iha mota. Nia haree katak bebé neʼe mak ema ebreu no tuir loloos tenkesér oho tiha. Maibé tanba “nia hanoin loos bebé neʼe”, nia deside atu hakiak bebé neʼe nuʼudar ninia oan rasik.—Êx 2:5, 6. w17.09 p. 9 par. 2-3

Jeová hakarak ita hatudu haraik-an, no hahalok neʼe bele lori bensaun barak. (Prov 22:4) Se ita mak haraik-an, kongregasaun sei sai hakmatek no unidade. No Jeová mós sei hatudu ninia laran-diʼak neʼebé boot ba ita. Apóstolu Pedro hatete: “Imi hotu tenke hatudu haraik-an ba malu, tanba Maromak la simu ema neʼebé foti-an, maibé nia hatudu ninia laran-diʼak neʼebé boot ba ema neʼebé haraik-an.” (1 Ped 5:5) Ohin loron, ema hanoin katak, se ita hatudu laran-maus no pasiénsia, neʼe katak ita ema fraku. Maibé neʼe la loos. Tanba hahalok furak sira-neʼe mai husi Jeová, Ida-neʼebé forsa liu hotu iha lalehan no rai. Nia hatudu ezemplu neʼebé diʼak liu hotu kona-ba laran-maus no pasiénsia. Porezemplu, hanoin toʼok kona-ba Jeová nia pasiénsia bainhira nia uza anju hodi hatán ba Abraão no Lot nia pergunta sira. (Gên 18:22-33; 19:18-21) Hanoin mós kona-ba Jeová nia pasiénsia hodi tahan nasaun Izraél nia hahalok kontra ba tinan 1.500 liu.—Eze 33:11. w17.08 p. 25 par. 13-14

Halo orasaun no tuirmai ita sei hetan Maromak nia dame. Maibe eskritura neʼe mòs temi liafuan Maromak nia dame “aas liu ema nia hanoin hotu”. Neʼe katak sá? Bíblia balu uza liafuan “aas liu fali ita-nia mehi hotu” ka “diʼak liu fali ema nia planu hotu”. Tan neʼe Paulo nia liafuan hatudu katak “Maromak nia dame” furak liu fali buat hotu neʼebé ita hanoin. Dala ruma ita la hatene dalan atu rezolve problema sira, maibé Jeová hatene, no nia bele uza dalan neʼebé ita nunka hanoin. (2 Ped 2:9) Oinsá mak ita bele iha “Maromak nia dame” maski hasoru daudauk problema sira? Ita presiza hametin nafatin ita-nia relasaun diʼak ho Jeová. Liuhusi Jesus Kristu nia sakrifísiu mak loke dalan ba ita atu iha relasaun neʼebé diʼak ho Jeová. Jesus nia sakrifísiu mak arranju furak ida husi Jeová. Tanba liuhusi sakrifísiu neʼe mak Jeová bele fó perdua ba ita-nia sala sira, no hodi ita bele iha konxiénsia neʼebé moos no hodi hakbesik ba nia.—João 14:6; Tgo 4:8; 1 Ped 3:21. w17.08 p. 10 par. 7; p. 12 par. 15

Ita presiza hanoin-hetan katak ema ida-idak nia sentimentu la hanesan no dalan neʼebé ita sente triste kona-ba ema ruma mate mós la hanesan. Dala ruma susar atu esplika ho loloos ita-nia laran-moras. Maski dala ruma ema ida esplika duni ninia sentimentu, maibé sei susar nafatin ba ema seluk atu komprende. Dala ruma susar mós atu hatene saida mak ita bele koʼalia ba ema neʼebé triste hela bainhira ema ruma mate. Maibé dala ruma buat neʼebé bele ajuda tebes mak “tanis ho sira neʼebé tanis”. (Rom 12:15) Se Ita sente susar atu koʼalia liafuan balu hodi fó kmaan ba ema ida iha ninia oin, karik diʼak liu se ita haruka e-mail, mensajen, ka karta. Karik Ita bele hakerek eskritura ida neʼebé sei lori kmaan ba ema neʼe, temi hahalok diʼak ida husi ema neʼebé mate, ka fahe memória ksolok ida neʼebé Ita hafolin. No Ita-nia orasaun mós bele ajuda irmaun-irmán sira neʼebé triste kona-ba ema ruma mate. Ita bele halo orasaun ba sira ka bele mós halo orasaun hamutuk ho sira. w17.07 p. 14-16 par. 13-16

Dala ruma moris kaben nian la tuir buat neʼebé sira hakarak. Karik sira bele hasoru problema boot kona-ba moris kaben nian. Hanoin kona-ba oinsá Jeová trata nasaun Izraél iha tempu uluk. Jeová bolu ninia an nuʼudar nasaun Izraél nia laʼen. (Isa 54:5; 62:4) Dala barak nasaun neʼe halo Jeová laran-tun. Sira-nia relasaun ho Jeová mak hanesan moris kaben nian neʼebé hasoru susar. Maibé Jeová sempre hatudu pasiénsia ba sira. Nia fó perdua beibeik ba sira no kumpre ninia promesa ba sira. (Sal 106:43-45) Kaben-naʼin kristaun sira neʼebé hadomi Jeová hakarak halo tuir nia. Maski problema mosu iha sira-nia moris kaben nian, maibé sira la buka dalan atu hakotu relasaun ho sira-nia kaben. Sira hatene katak Jeová haree juramentu kaben nian mak hanesan buat neʼebé sériu no ninia hakarak mak feen ho laʼen hela hamutuk ba nafatin. Bíblia temi razaun ida deʼit hodi feen-laʼen bele soe malu no kaben fali ho ema seluk, neʼe mak halo sala seksuál ho ema seluk. (Mt 19:5, 9) Se ema kristaun mak hakaʼas an atu hadiʼa sira-nia moris kaben nian, neʼe hatudu katak sira apoia Jeová nia direitu atu ukun. w17.06 p. 31 par. 17-18

Diabu Satanás hamosu duvida ida kona-ba Jeová nia direitu atu ukun. Nia hakarak ema atu hanoin katak Jeová mak Ukun-Naʼin neʼebé ladiʼak no katak Jeová nunka iha hakarak neʼebé diʼak ba ema. Nia hakarak ema fiar katak, se ema mak ukun rasik sira-nia an, sira sei sai kontente liu. (Gên 3:1-4) Nia mós hatete katak la iha ema ida mak laran-metin tebes ba Maromak, no nia dehan katak se ema mak hasoru susar iha sira-nia moris, ema sei la hakruʼuk tan ba Jeová nuʼudar sira-nia Ukun-Naʼin. (Job 2:4, 5) Tanba Diabu hamosu duvida neʼe mak Jeová husik tempu atu prova katak ema nia moris neʼebé sees husi Maromak nia ukun sei la hetan susesu, no lori deʼit susar ba ema hotu. Tuir loloos, Jeová hatene katak liafuan sira neʼebé Diabu koʼalia mak lia-bosok no la tuir evidénsia. Se nuneʼe, tanbasá mak Jeová la deside atu rezolve kedas problema neʼe, maibé sei husik Satanás koko atu prova ninia liafuan sira? Tanba duvida neʼebé Diabu hamosu, kona mós kriatura hotu iha lalehan no rai. (Sal 83:18) Komesa husi tempu neʼebé ema primeiru Adão ho Eva kontra Jeová nia ukun, kriatura barak mós hili hodi kontra Jeová nia direitu atu ukun. Karik neʼe bele halo kriatura balu hanoin katak, buat neʼebé Diabu koʼalia, loos duni. w17.06 p. 22-23 par. 3-4

Halo serbisu atu hanorin ema seluk sai Jesus nia dixípulu mak edukasaun diʼak ba Ita. Porezemplu, Ita bele aprende toman atu kaer didiʼak Ita-nia serbisu, oinsá atu koʼalia ho ema iha dalan neʼebé diʼak, no oinsá atu sai fiar an no matenek atu hasoru situasaun ruma. (Prov 21:5; 2 Tim 2:24) Maibé serbisu neʼe liuliu lori ksolok ba Ita tanba Ita bele aprende oinsá atu defende Ita-nia fiar hodi uza eskritura sira. Ita mós bele aprende oinsá atu serbisu hamutuk ho Jeová. (1 Kor 3:9) Maski iha Ita-nia haklaken fatin iha ema uitoan deʼit mak hakarak estuda Bíblia, maibé Ita bele hetan ksolok nafatin iha serbisu atu hanorin ema sai Jesus nia dixípulu. Tanba Ita serbisu hamutuk ho kongregasaun tomak atu buka ema neʼebé hakarak estuda. Tan neʼe, maski irmaun ka irmán ida deʼit mak hetan ema neʼebé ikusmai hakarak sai Jesus nia dixípulu, ita hotu kontente hamutuk tanba ita hotu hola parte hodi buka lesuk ema neʼe. Porezemplu, pioneiru ida naran Brandon serbí ona ba tinan sia iha fatin haklaken neʼebé iha ema uitoan deʼit mak hakarak estuda. Nia dehan: “Maski haʼu nunka hetan ema neʼebé laʼo ba oin toʼo batizmu iha fatin neʼe, maibé irmaun-irmán seluk hetan. Haʼu kontente tebes hodi bele halo planu atu serbí tempu-tomak hodi hanorin ema seluk sai Jesus nia dixípulu.”—Ecle 11:6. w17.07 p. 23 par. 7; p. 24 par. 9-10

Ana hakarak tebes atu iha oan, maibé la bele iha oan. Elcana nia feen seluk, Penina, iha oan barak. (1 Sam 1:4-7) Aat liután mak “tinan-tinan”, Penina goza Ana kona-ba neʼe. Neʼe halo Ana sente laran-kanek tebes. Saida mak nia halo atu sente kmaan? Nia “halo orasaun ba tempu kleur iha Jeová nia oin”. (1 Sam 1:12) Ana hatene katak Jeová sei fó oan-mane ida ba nia, ka selae, Jeová sei fó kmaan ba nia iha dalan seluk. Tanba ita hotu ema sala-naʼin no moris iha Satanás nia mundu, ita sei kontinua hasoru susar oioin. (1 João 5:19) Maibé Jeová sei ajuda ita. Ita bele halo orasaun ba “Maromak neʼebé fó kmaan ba ema iha situasaun hotu”. (2 Kor 1:3) Neʼe mak buat neʼebé Ana halo. Nia fó-hatene ba Jeová saida mak nia sente iha laran, no husu makaʼas Jeová atu ajuda nia. Hanesan neʼe mós, bainhira ita hasoru hela susar, diʼak atu laʼós deʼit temi ita-nia problema ba Jeová. Ita presiza husu makaʼas nia atu ajuda ita no fó-hatene nia ita-nia sentimentu iha laran.—Flp 4:6, 7. w17.06 p. 6 par. 10-11

Jesus neʼebé hetan ona moris-hi’as, hatene katak ninia dixípulu sira la hetan ikan ida, tan ne’e nia dehan ba sira: “‘Soe imi-nia rede iha ró nia sorin loos no imi sei hetan ikan.’ Ho ida-neʼe sira soe sira-nia rede, no sira la bele dada sai tanba ikan barak tebes.” (João 21:1-6) Jesus fó matabixu ikan ho paun ba ninia dixípulu sira atu han. Hotu tiha, nia husu ba Simão Pedro pergunta neʼebé temi iha eskritura ba ohin. Jesus hatene katak Pedro gosta tebes kail ikan. Karik Jesus husu pergunta hanesan neʼe ba Pedro atu haree toʼok se Pedro hadomi Jesus ho Jesus nia hanorin, ka nia hadomi liu kail ikan. Pedro hatán ba Jesus: “Ita hatene katak haʼu hadomi Ita.” (João 21:15) Iha loron neʼe, Pedro aprende buat ruma. Nia aprende katak ninia domin ba Kristu tenkesér importante liu fali buat seluk. Husi tempu neʼebá, Pedro hatudu ho hahalok katak nia hadomi duni Kristu. Nia badinas hodi haklaken, no kaer knaar importante iha apóstolu sira-nia tempu. w17.05 p. 22 par. 1-2

Apóstolu Paulo tau fiar ba Jeová no neʼe ajuda nia hodi tahan hasoru susar sira. Bainhira nia monu ba susar ruma, nia hatudu nafatin fiar ba Jeová. Nia sadere deʼit ba ‘Maromak neʼebé fó kmaan ba ema iha situasaun hotu, ida neʼebé fó kmaan ba ita iha ita-nia susar hotu’. (2 Kor 1:3, 4) Tanbasá mak orasaun bele ajuda ita hakbesik ba Maromak? Tanba bainhira ita halo orasaun, ita koʼalia ho Jeová. Halo nuneʼe ajuda ita atu iha relasaun neʼebé diʼak ho nia. (Sal 86:3; 1 Tes 5:17; Rom 12:12) Bainhira ita fó sai ita-nia hanoin no sentimentu ba ita-nia Aman iha lalehan, neʼe halo ita hakbesik liu ba nia. (Sal 65:2) No mós bainhira ita haree oinsá Jeová hatán ba ita-nia orasaun, neʼe haburas liután ita-nia domin ba nia. Ita la iha duvida katak “Jeová besik ba sira hotu neʼebé bolu nia”. (Sal 145:18) Ita-nia fiar ba Jeová nia domin no apoiu sei ajuda ita atu tahan hasoru problema naran deʼit ohin loron no iha futuru. w17.05 p. 19 par. 9-10

Ita sei halo saida se Ita la komprende irmaun katuas sira-nia desizaun ruma ka Ita la konkorda ho desizaun neʼe? Situasaun ruma bele koko ita-nia fiar ba Jeová no dalan neʼebé nia organiza kongregasaun ohin loron. Oinsá mak hahalok haraik-an bele proteje ita se ita hasoru situasaun sira-neʼe? Mai ita koʼalia kona-ba dalan rua. Primeiru, ita sei rekoñese katak ita la hatene buat hotu kona-ba situasaun ruma. Maski ita sente katak ita hatene, maibé só Jeová deʼit mak bele hatene kona-ba ema nia laran. Se ita komprende didiʼak kona-ba neʼe, ita sei rekoñese katak ita iha duni limitadu no ita presiza atu hadiʼa ita-nia hanoin. Segundu, se ita haree ka hasoru situasaun neʼebé la justisa, haraik-an bele ajuda ita atu halo tuir nafatin Jeová no hein ho pasiénsia ba nia atu hadiʼa situasaun neʼe. Bíblia dehan: “Ema sira neʼebé hamtaʼuk Maromak loos, ikusmai sei hetan buat diʼak”, maibé ba ema aat, sira ‘sei la hetan buat diʼak, no sira mós la bele hanaruk sira-nia moris’. (Ecle 8:12, 13) Se ita mak hatudu nafatin haraik-an, neʼe sei ajuda ita no mós ema seluk neʼebé envolve iha situasaun neʼe.—1 Ped 5:5. w17.04 p. 25-26 par. 10-11

Situasaun neʼebé José hasoru mak la justisa duni. Nia mós esplika ho klaru katak nia nunka halo sala neʼebé ema duun ba nia. Tan neʼe mak nia husu ba xefe neʼebé toma konta ba liurai nia hemu atu temi kona-ba nia ba Faraun. Tuir loloos José nia planu mak saida? Nia dehan: “Hodi haʼu bele sai livre husi fatin neʼe.” Tanbasá mak José la nonook deʼit kona-ba ninia situasaun neʼe? Tanba nia hatene katak nia mak vítima ida ba hahalok neʼebé la justisa. Tan neʼe mak nia esplika ninia situasaun ba xefe neʼe hodi hein katak xefe bele ajuda nia. Maibé ita haree didiʼak ba eskritura sira ka lae katak, José nunka konta ba ema seluk, maski ba Faraun, katak ninia maun-alin sira mak naʼok nia? Hodi nuneʼe mak bainhira ninia maun-alin sira bá rai-Ejitu hodi halo dame ho nia, Faraun simu deʼit sira no konvida sira atu hela iha Ejitu no goza buat diʼak liu hotu iha rai neʼe.—Gên 45:16-20. w17.04 p. 20-21 par. 12-13

Razaun ida neʼebé hatudu katak Jeová iha direitu atu ukun mak, tanba nia iha koñesimentu no matenek kona-ba oinsá atu tau matan ba lalehan no rai. Ezemplu ida mak kona-ba oinsá nia fó kbiit ba ninia Oan-Mane atu kura moras oioin neʼebé ema nia doutór la bele kura. (Mt 4:23, 24; Mc 5:25-29) Maski ba ita neʼe mak milagre ida, maibé ba Jeová neʼe laʼós milagre. Tanba nia komprende kona-ba ema nia isin-lolon hotu no nia bele hadiʼa fali parte neʼebé aat ona. Nia mós bele halo ema neʼebé mate moris fali, no nia bele hapara dezastre sira hodi la bele akontese. Mundu neʼebé Satanás ukun daudauk la bele lori dame ba nasaun ida ka dame entre nasaun sira. Só liuhusi Jeová nia matenek deʼit mak bele lori dame ba mundu tomak. (Isa 2:3, 4; 54:13) Tan neʼe mak apóstolu Paulo hatete liafuan ne’ebé hakerek iha eskritura ba ohin. w17.06 p. 28 par. 6-7

Iha mundu ohin loron, ema barak la haree moris kaben nian nuʼudar buat neʼebé sagradu. Sira hanoin la sala atu soe malu bainhira sira-nia moris kaben nian mosu problema ruma. Maibé ema kristaun sira la hanoin hanesan neʼe. (1 Kor 7:27) Sira hatene katak sira halo ona juramentu iha Maromak nia oin. Tan neʼe, se sira hakotu sira-nia juramentu, neʼe hanesan sira koʼalia bosok ba Maromak, no ita hatene katak Maromak odi bosok-teen sira. (Lev 19:12; Prov 6:16-19) Maromak mós odi soe-malu neʼebé halo ho laran-makerek. (Mal 2:13-16) Jesus hanorin katak, tuir Bíblia, iha razaun ida deʼit atu kaben-naʼin bele soe malu. Neʼe mak se sira ida halo sala-foʼer, no ida neʼebé la halo sala lakohi fó perdua ba ninia kaben. (Mt 19:9; Ebr 13:4) Se nuneʼe, oinsá ho haketak-malu? Bíblia mós fó matadalan neʼebé klaru kona-ba ida-neʼe. (1 Kor 7:10, 11) La iha razaun husi Bíblia atu feen-laʼen haketak malu. Maibé dala ruma iha situasaun balu neʼebé ema kristaun ida sente katak nia tenkesér haketak malu ho ninia kaben. Porezemplu, karik nia sente katak se nia hela nafatin ho ninia kaben neʼebé halo violénsia makaʼas ba nia, ka ninia kaben neʼebé kontra makaʼas lia-loos, neʼe sei lori perigu boot ba ninia moris ka ninia relasaun ho Jeová. w17.04 p. 7 par. 14-16