Setembru

Hanorin oan atu hadomi Jeová mak priviléjiu boot tebes ba inan-aman. (Sal 127:3) Iha Izraél antigu nia tempu, oan sira moris mai dedika ona ba Jeová. Maibé ita-nia oan la hanesan neʼe. Tan neʼe mak se inan-aman hadomi Jeová no lia-loos, neʼe la dehan katak oan mós sei halo tuir sira. Husi loron neʼebé oan moris, inan-aman tenke halo ona planu oinsá atu ajuda oan hodi sai Jesus nia dixípulu, dedika an ba Jeová no hetan batizmu. La iha buat seluk mak importante liu fali ida-neʼe. Tanba liuhusi ema nia dedikasaun, batizmu, no laran-metin hodi serbí Jeová mak sei fó oportunidade ba ema neʼe atu hetan salvasaun iha tempu terus boot akontese. (Mt 24:13) Ba inan-aman sira neʼebé haree sira-nia oan dedika an no hetan batizmu hodi sai Jeová nia atan, sira sei sente kontente no haksolok tebes. w18.03 p. 12 par. 16-17

Bainhira katuas sira fó dixiplina husi Bíblia ba ema seluk, maski iha família laran ka iha kongregasaun laran, sira presiza banati-tuir Jesus nia ezemplu. Halo hanesan neʼe hatudu katak sira hakarak halo tuir matadalan husi Maromak no ninia Oan-Mane. Se ita simu dixiplina husi Maromak no banati-tuir dalan neʼebé Jeová no Jesus fó dixiplina ba ema, ita sei hetan bensaun barak tebes! Ita-nia família no kongregasaun sei sente hakmatek, no ema hotu sei sente domin, iha folin, no seguru. Neʼe mak ezemplu balu deʼit kona-ba dame no ksolok neʼebé ita sei hetan iha futuru. (Sal 72:7) Loos duni, dixiplina husi Jeová hanorin ita atu moris hamutuk ba nafatin nuʼudar família neʼebé iha dame no unidade iha Maromak nia umakain. (Isa 11:9) Se ita hanoin beibeik kona-ba neʼe, ita sei haree katak dixiplina mak dalan furak neʼebé Maromak hatudu ninia domin mai ita. w18.03 p. 26 par. 15; p. 27 par. 17, 19

Ema buka João Batista atu hetan batizmu, neʼe hatudu katak sira arrepende ho laran kona-ba sira-nia sala tanba sira la halo tuir Moisés nia Ukun-Fuan. (Mt 3:1-6) Maibé batizmu importante liu hotu neʼebé João Batista halo mak fó batizmu ba Jesus, Maromak nia Oan-Mane neʼebé perfeitu. (Mt 3:13-17) Jesus nunka halo sala, tan neʼe nia la presiza arrepende sala. (1 Ped 2:22) Entaun, tanbasá mak Jesus presiza hetan batizmu? Neʼe hodi hatudu katak nia prontu ona atu uza ninia moris hodi halo Maromak nia hakarak. (Ebr 10:7) Bainhira Jesus halaʼo serbisu haklaken iha rai, ninia dixípulu sira mós fó batizmu ba ema. (João 3:22; 4:1, 2) Ema sira-neʼe hetan batizmu tanba sira mós arrepende kona-ba sira-nia sala hodi la halo tuir Moisés nia Ukun-Fuan. Maibé bainhira Jesus mate no hetan tiha moris-hiʼas, ema sira neʼebé hakarak tuir Kristu presiza hetan batizmu tanba razaun seluk. w18.03 p. 5 par. 6-7

Ema neʼebé espirituál hafolin ninia relasaun diʼak ho Maromak. Nia “banati-tuir Maromak” no hakaʼas an atu husik espíritu santu dirije nia. (Éf 5:1) Nia koko atu komprende Jeová nia hanoin no haleno Jeová nia hanoin iha moris loron-loron nian. Ba nia, Maromak iha duni. Nia la hanesan ho ema neʼebé moris tuir hakarak isin nian, ema espirituál sempre hakaʼas an atu halo tuir Jeová nia morál sira. (Sal 119:33; 143:10) Nia la halo buat neʼebé tuir “isin nia hakarak” maibé hakaʼas an atu hatudu “hahalok sira neʼebé mai husi espíritu santu”.—Gal 5:22, 23. w18.02 p. 19 par. 3, 6

Ema lori Daniel nuʼudar dadur ba Babilónia, sidade neʼebé nakonu ho maromak falsu oioin no mós espiritizmu. Ema husi rai neʼe hatún ema judeu no goza sira-nia Maromak, Jeová. (Sal 137:1, 3) Ita bele fiar katak hahalok hanesan neʼe hakanek tebes Daniel no ema judeu sira seluk neʼebé hadomi Jeová! Sira tenke han liurai nia hahán sira, inklui hahán balu neʼebé Jeová bandu ninia povu atu la bele han. Maski nuneʼe, Daniel “la hafoʼer ninia an ho liurai nia hahán diʼak sira”. (Dan 1:5-8, 14-17) Daniel hasoru susar ida tan neʼebé foufoun haree hanesan kiʼik deʼit. Nia mak ema neʼebé matenek, tan neʼe liurai fó knaar espesiál ida ba nia. (Dan 1:19, 20) Maski nuneʼe Daniel nunka sai foti-an ka sente katak ninia hanoin mak sempre loos. Nia hatudu nafatin haraik-an no hatene katak nia iha limitadu. Nia sempre hatete katak tanba Jeová mak nia hetan susesu. (Dan 2:30) Maski iha tempu neʼebá Daniel sei joven, maibé Jeová temi nia hamutuk ho Noé no Job nuʼudar ezemplu neʼebé diʼak ba ita atu banati-tuir. (Eze 14:14) Jeová tau fiar tebes ba Daniel! Tanbasá? Tanba Daniel hatudu laran-metin no halo tuir Jeová iha ninia moris tomak. w18.02 p. 5 par. 11-12

Jesus hatudu ezemplu ba ita kona-ba saida mak hanoin neʼebé loos kona-ba buka ksolok. Nia tuir “festa kaben nian” no mós “festa boot”. (João 2:1-10) Iha festa kazamentu neʼe, tua latoʼo ba bainaka sira, tan neʼe Jesus halo milagre hodi halo bee nakfila ba tua. Maski nuneʼe, Jesus la hanoin katak ksolok mak buat neʼebé importante liu hotu iha ninia moris. Nia tau uluk Jeová no hakaʼas an atu ajuda ema seluk. Ho hakarak rasik, nia fó ninia an hodi mate iha ai-riin terus nian hodi bele salva ema. Tan neʼe nia hatete ba sira neʼebé hakarak tuir nia: “Kontente ba imi kuandu ema koʼalia aat imi no fó-terus ba imi no koʼalia lia-bosok oioin neʼebé aat hasoru imi tanba haʼu. Haksoit bá ho haksolok, tanba imi-nia kolen boot tebes iha lalehan.” (Mt 5:11, 12) Tanba ita hadomi Jeová no hakarak halo nia kontente, ita presiza hasees an, laʼós deʼit husi buat neʼebé ita hatene ho momoos katak sala, maibé kona mós buat neʼebé ita hanoin karik Jeová la gosta.—Mt 22:37, 38. w18.01 p. 26 par. 16-18

Ita fó ba Jeová tanba ita hadomi no hakarak hatudu agradese ba nia. Ita-nia laran sente haksolok duni bainhira ita hanoin kona-ba buat hotu neʼebé Jeová halo ona ba ita. Liurai David dehan katak buat hotu neʼebé ita iha mai husi Jeová no buat saida deʼit neʼebé ita fó ba Jeová, tuir loloos Jeová mak fó ba ita. (1 Crôn 29:11-14) Diʼak ba ita atu hatudu laran-luak hodi fó, laʼós atu simu deʼit. Hanoin toʼok oan neʼebé simu osan husi inan-aman atu rai no nia uza osan balu hodi hola fali prezente ba ninia inan-aman. Ninia inan-aman sente oinsá kona-ba ninia prezente neʼe? Ka hanoin toʼok pioneiru joven neʼebé hela ho inan-aman no nia fó osan balu ba sira atu ajuda selu aluga ka hola hahán. Maski ninia inan-aman la husu nia atu halo nuneʼe, maibé sira simu buat neʼebé oan neʼe fó. Tanbasá? Tanba neʼe mak dalan ida husi sira-nia oan atu hatudu agradese ba buat hotu neʼebé sira halo ba nia. Hanesan neʼe mós, Jeová hatene katak diʼak ba ita se ita fó buat neʼebé folin-boot ba nia. w18.01 p. 18 par. 4, 6

Latoʼo atu hatete deʼit ba oan sira saida mak loos no saida mak sala. Ita presiza ajuda sira atu hanoin didiʼak kona-ba pergunta hanesan tuirmai neʼe: ‘Tanbasá mak Bíblia bandu atu halo tuir hakarak isin nian? Oinsá mak haʼu bele fiar katak halo tuir morál husi Bíblia sempre diʼak ba haʼu?’ (Isa 48:17, 18) Se Ita-nia oan hakarak atu hetan batizmu, ajuda nia hodi hanoin didiʼak katak, hetan tiha batizmu nia sei simu responsabilidade sira. Nia sente oinsá kona-ba neʼe? Nia sei hetan benefísiu saida deʼit hodi kaer didiʼak responsabilidade sira-neʼe? Tanbasá la fasil atu kumpre responsabilidade sira-neʼe? Tanbasá mak responsabilidade sira-neʼe sei lori benefísiu barak liu fali susar? (Mc 10:29, 30) Importante tebes ba oan atu hanoin didiʼak kona-ba buat sira-neʼe antes hetan batizmu. Ajuda nia atu hanoin didiʼak buat sira-neʼe, hodi nuneʼe bele ajuda nia fiar katak moris tuir Bíblia nia morál sempre lori diʼak ba nia. w17.12 p. 21 par. 14-15

Iha irmaun-irmán barak hasoru daudaun moras neʼebé todan. Balu idade boot ona maibé presiza tau matan fali ba família neʼebé idade liu sira. Balu tan hasoru susar kona-ba tau matan ba família nia presiza. No ita mós hatene katak, irmaun-irmán balu laʼós hasoru problema ida, maibé rua ka tolu dala ida deʼit. Se Jeová interese kona-ba buat maten hanesan fitun sira, hanoin toʼok nia sente oinsá kona-ba Ita? Ita serbí nia laʼós tanba obriga an, maibé tanba hadomi nia. (Sal 19:1, 3, 14) Ita-nia Aman domin nian hatene buat hotu kona-ba Ita. Bíblia dehan katak “fuuk-lahan iha imi-nia ulun mós nia sura hotu”. (Mt 10:30) Jeová hakarak ita hatene katak, “ema neʼebé moris ho hahalok loos, Jeová hatene buat hotu neʼebé sira hasoru”. (Sal 37:18) Sin, Jeová hatene problema hotu neʼebé Ita hasoru daudaun, no nia bele fó forsa ba Ita atu tahan problema neʼe hotu. w18.01 p. 7 par. 1; p. 8 par. 4

Kuandu Pedro halo Tabita moris fali husi mate, neʼe halo “ema barak tau fiar ba Naʼi”. Sira haklaken ba ema seluk kona-ba Jesus no mós fó sai kona-ba Jeová nia kbiit hodi halo ema mate moris-hiʼas fali. (Após 9:36-42) Iha akontesimentu ida tan neʼebé ema barak haree ho matan. Loron ida apóstolu Paulo hatoʼo diskursu iha reuniaun ida neʼebé halaʼo iha kuartu ida iha andár leten. Reuniaun neʼe halaʼo iha sidade Tróade, agora iha rai-Turkia nia parte norte. Paulo koʼalia toʼo kalan-boot. Iha joven ida naran Éutiko mós tuir reuniaun neʼe no nia tuur iha janela. Maibé nia sai matan-dukur no monu husi andár tolu. Karik doutór Lucas mak ema primeiru neʼebé halai atu bá haree Éutiko. Maibé nia haree katak mane joven neʼe laʼós kanek todan ka dezmaia deʼit, nia mate ona! Paulo mós tun husi andár. Nia hakoʼak Éutiko nia mate-isin no tuirmai nia hatete buat neʼebé halo ema hotu hakfodak, nia dehan: “Nia moris fali.” Ema sira neʼebé haree milagre neʼe sente “haksolok tebes tanba nia moris fali ona”.—Após 20:7-12. w17.12 p. 5 par. 10-11

Ema hatene duni oinsá atu rezolve problema sira iha mundu neʼe ka lae? Sira la rezolve problema kona-ba funu. Oinsá ho krime? Krime ruma aumenta tan, hanesan krime neʼebé ema halo liuhusi komputadór, violénsia doméstika, terrorizmu, no korrupsaun. No moras neʼebé oho ema aumenta ba beibeik. Ohin loron, ema neʼebé hanoin an deʼit mak kontrola organizasaun ekonomia no polítiku sira. Sira la bele halakon funu, krime, moras, no kiak. Maromak nia Ukun deʼit mak iha kbiit atu halo buat sira-neʼe. Haree toʼok saida mak Jeová sei halo ba ema. Ninia Ukun sei halakon problema nia hun neʼebé hamosu funu, hanesan hahalok hanoin an, korrupsaun, patriotizmu, relijiaun falsu, no Satanás. (Sal 46:9) Maromak nia Ukun mak sei halakon krime. Ohin loron mós Maromak nia Ukun hanorin daudaun ema rihun ba rihun atu hadomi no tau fiar ba malu. La iha governu ida mak bele halo nuneʼe. (Isa 11:9) Lakleur tan Jeová sei halakon moras no halo ema hotu atu iha saúde neʼebé perfeitu. (Isa 35:5, 6) Nia sei halakon kiak no fó oportunidade ba ema hotu atu moris ho kontente no iha relasaun neʼebé besik ho nia.—Sal 72:12, 13. w17.11 p. 24 par. 14-16

Razaun importante ida husi arranju kona-ba sidade protesaun mak atu proteje ema Izraél sira hodi la simu sala kona-ba raan. Jeová hafolin tebes moris, no nia odi ema neʼebé oho ema seluk ho neon. (Prov 6:16, 17) Nuʼudar Maromak neʼebé justisa no santu, nia mós la taka matan ba ema neʼebé oho ema seluk la ho neon. Ema eskriba no farizeu sira la hanesan ho Jeová, tanba sira la hafolin ema seluk nia moris. Jesus hatete ba sira: “Imi halakon tiha oportunidade ba ema atu hatene kona-ba Maromak; imi rasik la tama, no imi mós hanetik sira neʼebé hakarak tama!” (Lc 11:52) Jesus nia liafuan katak sá? Tuir loloos ema eskriba no farizeu sira iha responsabilidade atu hanorin ema seluk no ajuda sira atu hetan moris rohan-laek. Maibé sira hanetik fali ema atu tuir Jesus, “Ulun-Naʼin Moris nian”. (Após 3:15) Iha dalan hanesan neʼe mak sira lori ema mate ba nafatin. Ema eskriba no farizeu mak ema neʼebé foti an no hanoin an deʼit. Sira nunka hanoin kona-ba ema seluk nia moris. Sira mak ema laran-aat no la iha duni domin! w17.11 p. 15 par. 9-10

Bainhira ita foin estuda ho Testemuña ba Jeová, karik ita seidauk fó-hatene família. Maibé kuandu ita-nia fiar aumenta liután, ita sente presiza fó-hatene ba sira katak ita hakarak atu serbí Jeová. Se Ita-nia laran-metin ba Jeová hamosu problema entre Ita ho Ita-nia família, haka’as-an atu komprende sira-nia sentimentu. Ita kontente tebes tanba hatene ona lia-loos. Maibé ita-nia família bele hanoin katak ema lohi ita ka ita tuir relijiaun falsu. Karik sira hanoin katak ita la hadomi sira tanba la selebra ona loron-boot hamutuk ho sira. Karik sira mós sente taʼuk katak Maromak sei fó kastigu ba ita bainhira ita mate. Ita presiza hakaʼas an atu buka-hatene sira-nia hanoin no rona didiʼak bainhira sira koʼalia hodi ita bele hatene tanbasá sira iha sentimentu hanesan neʼe ba ita. (Prov 20:5) Apóstolu Paulo koko duni atu komprende kona-ba “ema oioin” hodi nia bele hanorin lia-loos ba sira. Se ita mak koko atu komprende kona-ba ita-nia família, karik neʼe bele ajuda ita hatene oinsá atu hanorin lia-loos ba sira.—1 Kor 9:19-23. w17.10 p. 15 par. 11-12

Karik ita taʼuk kanta tanba ita la hatene oinsá atu kanta. Maibé iha buat simples balu ita bele halo atu ajuda ita hodi kanta. Ita bele aprende atu kanta ho lian makaʼas liuhusi dalan Ita dada iis. Hanesan forsa husi eletrisidade neʼebé halo ampolas lakan, Ita-nia iis mós bele fó forsa ba Ita atu koʼalia ka kanta. Ita tenkesér kanta makaʼas hanesan bainhira Ita koʼalia, ka bele makaʼas liu mós diʼak. Tuir loloos, Bíblia mós dala ruma haruka ema neʼebé adora Jeová atu “haklalak ho haksolok” bainhira kanta hahiʼi ba Jeová. (Sal 33:1-3) Koko halo buat balu tuirmai neʼe: Hili knananuk balu husi livru kanta neʼebé Ita gosta liu. Lee liafuan sira ho lian makaʼas no fiar an. Tuirmai, uza lian neʼebé hanesan no tahan Ita-nia iis hodi temi liafuan hotu iha fraze ida, dala ida deʼit. Depois, kanta fraze neʼe ho lian neʼebé hanesan. (Isa 24:14) Halo nuneʼe bele ajuda Ita-nia lian atu sai makaʼas liután, no keta sente taʼuk ka moe atu kanta ho lian makaʼas! w17.11 p. 5-6 par. 11-13

Durante ema judeu sira laʼo ba tempu naruk husi Babilónia ba Jeruzalein, sira iha tempu barak atu hanoin no koʼalia kona-ba sira-nia futuru iha Jeruzalein. Ita bele fiar katak ferik-katuas sira konta ona ba sira kona-ba iha tempu uluk Jeruzalein ho Jeová nia templu mak fatin neʼebé furak tebes. (Esd 3:12) Se Ita mak laʼo hamutuk ho sira, Ita sente oinsá bainhira Ita foin haree Jeruzalein ba dala primeiru? Karik Ita sei sente triste hodi haree uma barak neʼebé aat ona nakonu ho duʼut no sidade nia moru sira aat hotu, portaun no riin aas hotu lakon ona. Karik neʼe bele halo Ita kompara fali ho Babilónia nia moru boot neʼebé forte tebes. Maibé ema judeu sira la sai laran-tun, tanbasá? Tanba durante sira halo viajen mai Jeruzalein, sira haree ona oinsá Jeová mak ajuda no proteje sira. Bainhira sira toʼo iha Jeruzalein, sira harii kedas altár ida iha templu nia fatin no hahú hasaʼe sakrifísiu ba Jeová loroloron.—Esd 3:1, 2. w17.10 p. 26-27 par. 2-3

Ita bele fiar katak Salomão hatene saida loos mak aten-brani husi ninia aman David. David hatudu aten-brani hodi luta hasoru jigante Golias neʼebé forte no halo ema taʼuk. Liuhusi Maromak nia ajuda, David oho Golias ho fatuk kiʼik ida. (1 Sam 17:45, 49, 50) Tan neʼe, David mak ema neʼebé diʼak liu atu fó laran-manas ba Salomão atu sai aten-brani hodi harii templu. Jeová sei hamutuk ho nia toʼo nia ramata harii templu neʼe. Ita bele fiar katak Salomão hanoin kleʼan kona-ba liafuan sira-neʼe, no nia la husik ninia idade no la iha esperiénsia atu hanetik nia hodi halaʼo serbisu neʼe. Nia hatudu aten-brani tebes no liuhusi Jeová nia ajuda, nia harii duni templu neʼebé kmanek iha tinan hitu ho balu nia laran. Jeová ajuda ona Salomão no nia mós bele ajuda ita hatudu aten-brani hodi kumpre ita-nia serbisu iha família, no mós iha kongregasaun. (Isa 41:10, 13) Se ita mak hatudu aten-brani hodi serbí Jeová, ita bele fiar katak nia sei fó bensaun ba ita ohin loron no iha futuru. w17.09 p. 28 par. 3; p. 29 par. 4; p. 32 par. 20-21

Jeová nia povu fiar duni katak Maromak nia liafuan, ka ninia mensajen mak “moris no iha kbiit boot”. Ita haree ona oinsá Bíblia troka ita no ema seluk nia moris. Antes sai Testemuña, ema balu iha toman atu naʼok, uza droga, ka moris iha dalan neʼebé la morál. Balu tan iha naran boot no riku, maibé sira sente mamuk iha sira-nia moris. (Ecle 2:3-11) Loos duni, ema sira neʼebé uluk la iha esperansa, ohin loron hetan ona esperansa. Ita lee beibeik esperiénsia barak kona-ba neʼe husi série iha Livru Haklaken, “Bíblia troka ema nia moris.” No husi esperiénsia sira-neʼe ita mós haree katak, maski sai ona Testemuña, ema tenkesér hametin nafatin sira-nia relasaun diʼak ho Jeová liuhusi Bíblia nia ajuda. w17.09 p. 23 par. 1

Jeová komprende kona-ba Lot nia situasaun moris nian no ita mós bele fiar katak nia komprende kona-ba ita-nia susar hotu neʼebé ita hasoru daudauk. (Isa 63:7-9; Tgo 5:11; 2 Ped 2:9) Jeová mós hanorin ninia povu oinsá atu hatudu hahalok laran-sadiʼa no laran-diʼak. Hanoin toʼok ukun-fuan ida neʼebé nia fó ba ema Izraél. Ukun-fuan neʼe dehan katak, se ema ida debe osan, ema neʼebé fó empresta bele rai ema neʼe nia unuk atu sai nuʼudar garantia katak nia sei selu fali ninia debe sira. (Êx 22:26, 27) Maibé osan nia naʼin tenke fó fali unuk neʼe ba ninia naʼin antes loro-matan monu atu ema neʼe la sai malirin iha kalan. Se ema ruma la hatudu hahalok laran-sadiʼa no laran-diʼak, karik nia sei la fó fali unuk neʼe, maibé Jeová hanorin ninia povu atu hatudu hahalok sira-neʼe. Prinsípiu husi ukun-fuan neʼe hanorin saida ba ita? Se maluk fiar-naʼin ida presiza ajuda, tenkesér fó ajuda ba nia. Se ita mak iha kbiit atu fó ajuda ba irmaun ka irmán ida neʼebé hetan daudauk susar, ita hakarak fó ajuda ba nia.—Kol 3:12; Tgo 2:15, 16; 1 João 3:17. w17.09 p. 9 par. 4-5

Jesus husu ninia Aman atu fó perdua ba ema sira neʼebé atu oho nia. Maski iha tempu neʼebé Jesus sente laran-susar ka ema baku nia, nia hatudu nafatin laran-maus no pasiénsia. (1 Ped 2:21-23) Apóstolu Paulo temi kona-ba dalan ida neʼebé ita bele hatudu laran-maus no pasiénsia, nia dehan: “Kontinua hatudu pasiénsia ba malu no fó perdua ba malu ho laran tomak maski ema halo buat ruma hasoru imi. Nuʼudar Jeová fó perdua ba imi ho laran tomak, imi mós tenke halo nuneʼe.” (Kol 3:13) Ita presiza laran-maus no pasiénsia atu bele fó perdua ba ema seluk. Halo nuneʼe bele haburas no hametin unidade iha kongregasaun. Jeová hakarak ita hatudu laran-maus no pasiénsia ba ema seluk. Hahalok sira-neʼe importante tebes se ita hakarak moris iha mundu foun. (Mt 5:5; Tgo 1:21) Se ita mak hatudu laran-maus no pasiénsia, neʼe sei fó glória ba Jeová no ajuda ema seluk mós atu hatudu hahalok sira-neʼe.—Gal 6:1; 2 Tim 2:24, 25. w17.08 p. 25-26 par. 15-17

Husi Bíblia, ita bele haree ezemplu barak kona-ba Jeová halo buat neʼebé ita nunka hanoin. Porezemplu, iha tempu neʼebé Ezekias ukun rai-Judá, Liurai Senaquerib husi rai-Asíria mai ataka Judá no hadau sidade hotu, só Jeruzalein deʼit mak seidauk. (2 Reis 18:1-3, 13) Ikusmai Senaquerib mai atu ataka Jeruzalein. Liurai Ezekias halo saida? Primeiru, nia halo orasaun ba Jeová atu husu ajuda no nia bá buka matadalan husi profeta Isaías. (2 Reis 19:5, 15-20) Tuirmai, Ezekias selu nafatin buat neʼebé Senaquerib husu hodi hatudu katak nia la ulun-toos. (2 Reis 18:14, 15) Ikus, Ezekias halo preparasaun hodi sidade Jeruzalein bele tahan ba tempu kleur husi inimigu nia ataka. (2 Crôn 32:2-4) Ikusmai saida mak akontese? Iha kalan ida Jeová haruka ninia anju ida oho Senaquerib nia soldadu hamutuk ema naʼin-185.000. Ezekias nunka hanoin kona-ba rezultadu neʼe!—2 Reis 19:35. w17.08 p. 10 par. 7; p. 11 par. 12

Ita presiza halo preparasaun saida deʼit atu bele serbí tempu-tomak? Ita presiza haburas hahalok diʼak atu bele serbí Jeová iha dalan neʼebé diʼak. Estuda beibeik Maromak nia Liafuan, hanoin kleʼan kona-ba eskritura sira, no bainhira tuir reuniaun sira, hakaʼas an atu hatoʼo komentáriu neʼebé hatudu sai Ita-nia fiar. Uza tempu neʼebé Ita eskola hela atu hadiʼa dalan neʼebé Ita koʼalia ba ema kona-ba liafuan diʼak husi Bíblia. Aprende oinsá atu hatudu interese ba ema hodi husu ema nia hanoin ho matenek no rona didiʼak ba sira-nia resposta. No Ita mós bele fó ajuda iha kongregasaun hanesan ajuda hamoos no hadiʼa Reuniaun-Fatin. Jeová kontente tebes atu bele uza ema neʼebé haraik-an no fó ajuda ho laran. (Sal 110:3; Após 6:1-3) Apóstolu Paulo konvida Timóteo hodi serbí nuʼudar misionáriu tanba “maluk fiar-naʼin sira . . . koʼalia diʼak kona-ba nia”.—Após 16:1-5. w17.07 p. 23 par. 7; p. 26 par. 14

Se ema ka anju sira mak iha nafatin duvida kona-ba Jeová nia direitu atu ukun, neʼe bele hamosu nafatin problema entre nasaun, rasa, suku, família ka entre ema ida-idak. Moris sei nunka bele iha dame no unidade. Maibé kuandu Jeová fó ona prova katak nia mak iha direitu atu ukun, kriatura hotu sei hakruʼuk ba ninia ukun neʼebé furak liu hotu. Iha tempu neʼebá, dame sei domina lalehan no rai! (Éf 1:9, 10) Iha futuru, kriatura hotu sei haree katak Maromak mak iha direitu atu ukun, no Satanás ho ema nia ukun neʼebé la iha susesu sei lakon ba nafatin. Maromak nia Ukun liuhusi Mesias sei susesu ba nafatin. Toʼo ona tempu neʼebá, ema laran-metin sira fó ona prova katak sira apoia Maromak nia Ukun. (Isa 45:24) Ita hotu hakarak sai parte ida ba ema sira-neʼe, loos ka lae? Se nuneʼe, ita presiza komprende tanbasá mak Maromak nia direitu atu ukun importante tebes ba ita. w17.06 p. 23 par. 4-5

Tempu ba ema ida-idak neʼebé sente triste bainhira ema ida mate la hanesan. Bainhira ema mate, foufoun belun no família barak mai atu fó konsola. Liutiha tempu balu, ema hotu fila fali ba sira-nia atividade, maibé ema neʼebé kona susar sei presiza nafatin atu hetan kmaan. Tan neʼe ita tenkesér sai prontu atu ajuda nia. Sin, durante tempu neʼebé ema triste hela, ita presiza fó konsola ba sira. (1 Tes 3:7) Ita presiza hatene katak buat balu bele halo ema derrepente sente triste kona-ba ema neʼebé nia hadomi mate. Porezemplu, karik tanba aniversáriu, múzika, foto, atividade, ka morin ruma, lian, ka klima bele halo nia hanoin fali ema neʼebé mate. No bainhira ema ida nia kaben mate, dala primeiru nia tuir reuniaun boot ka Memoriál mesak, neʼe bele halo nia sente triste tebes. Presiza hanoin-hetan katak laʼós iha tempu espesiál deʼit mak atu fó konsola ba sira neʼebé triste hela. w17.07 p. 16 par. 17-19

Bainhira ita fó ajuda ba ema, baibain neʼe halo ita haluha ita rasik nia problema sira. Porezemplu, iha irmán barak neʼebé seidauk kaben ka kaben ona rekoñese katak, bainhira sira haklaken ba ema seluk kona-ba Maromak nia Ukun, sira serbisu hamutuk ho Jeová no halo tuir ninia hakarak. Neʼe lori ksolok ba sira. Loos duni, ita hotu bele hatudu domin ba ema seluk liuhusi haklaken ba sira. No se ita mak halo buat diʼak ba ita-nia irmaun-irmán, ita sei hakbesik liután ba sira. Apóstolu Paulo hatudu ezemplu neʼebé diʼak kona-ba neʼe. Ninia hahalok diʼak sira neʼebé nia hatudu ba ema seluk “hanesan inan neʼebé fó-susu no tau matan didiʼak ba nia oan”. Nia mós fó kmaan no laran-manas ba irmaun-irmán sira “hanesan aman ida halo ba ninia oan”. (1 Tes 2:7, 11, 12) Irmaun-irmán joven sira neʼebé aprende ona oinsá atu hadomi Jeová bele fó kmaan fali no laran-manas ba sira-nia família. Oinsá? Hodi hatudu respeitu ba sira-nia inan-aman no fó ajuda ba sira. No mós se oan mak laran-metin ba Jeová, neʼe sei fó laran-manas ba ema hotu iha família laran. w17.06 p. 7 par. 13-14; p. 8 par. 17

Maski iha ema rihun ba rihun mak moris hela iha kiak laran, maibé ema balu iha osan barak tebes toʼo bele tau matan ba sira-nia oan no bei-oan sira. Jesus hatene katak Maromak nia Ukun deʼit mak bele troka sistema ekonomia husi mundu neʼe. Bíblia hatudu katak “kontratu-naʼin sira” mak reprezenta sistema ekonomia nian, no sira hamutuk ho sistema polítiku no sistema relijiaun falsu hotu mai husi Satanás nia mundu. (Apok 18:3) Maski Maromak nia povu bele haketak an husi polítiku no relijiaun falsu, maibé barak mak la bele hasees an husi sistema ekonomia husi Satanás nia mundu neʼe. Ema kristaun presiza iha hanoin neʼebé loos kona-ba sistema ekonomia. Karik bele husu ba ita-nia an: ‘Oinsá mak haʼu bele hatudu katak haʼu laran-metin ba Maromak liuhusi dalan neʼebé haʼu uza sasán sira husi mundu neʼe? Oinsá mak haʼu bele hamenus haʼu-nia tempu atu la envolve demais iha sistema ekonomia nian? Ezemplu saida deʼit mak hatudu katak Maromak nia povu ohin loron tau fiar tomak ba nia?’ w17.07 p. 7-8 par. 1-3

Jesus hatene katak moris iha mundu aat neʼe sei lori estrese, laran-taridu, no susar seluk tan. Iha Jesus nia ai-knanoik ida kona-ba toʼos-naʼin, nia hatete katak ema balu sei simu “liafuan kona-ba Maromak nia Ukun” no foufoun sira sai badinas. Maibé ikusmai, “hanoin resin kona-ba moris iha mundu neʼe, no rikusoin nia lasu” sei “hanehan liafuan” hodi ema sira-neʼe la badinas tan hanesan uluk. (Mt 13:19-22; Mc 4:19) Se ita mak la kuidadu, hanoin barak kona-ba moris bele hanetik ita-nia serbisu ba Jeová. Ita bele tau uluk haklaken iha ita-nia moris hodi hatudu katak ita hadomi Kristu. Saida mak bele ajuda ita atu kontinua halo nuneʼe? Husu ba ita-nia an: ‘Haʼu-nia ksolok mai husi serbí Jeová ka husi atividade seluk?’ w17.05 p. 23 par. 3-4

Bainhira Ita sai “ema estranjeiru” iha fatin neʼebé Testemuña sira la hatene koʼalia Ita-nia língua, Ita presiza ransu deʼit ho kongregasaun neʼebé uza sira-nia língua. (Sal 146:9) Maibé se iha kongregasaun besik neʼebé uza Ita-nia língua rasik, família nia ulun mak presiza foti desizaun kona-ba atu tuir reuniaun iha língua saida. Maibé antes atu foti desizaun, nia presiza hanoin didiʼak uluk no halo orasaun. Nia mós presiza koʼalia hamutuk ho ninia feen no oan sira. (1 Kor 11:3) Maski tuir reuniaun ba oras balu latoʼo atu ajuda oan komprende lia-loos husi Bíblia, maibé ita hatene katak reuniaun sira importante duni. No se oan tuir reuniaun iha língua neʼebé sira komprende, sira sei aprende buat barak liután duké tuir reuniaun iha língua neʼebé sira la komprende. Karik sira sei aprende barak liu fali tuir buat neʼebé inan-aman hanoin.—1 Kor 14:11. w17.05 p. 10 par. 10-11

Diʼak atu husu ba ita-nia an: ‘Hau uza buat hotu neʼebé haʼu iha atu serbí Jeová ka lae? Haʼu hanoin hela kona-ba atu muda ba sidade ka rai seluk hodi bele hetan osan barak atu iha moris neʼebé diʼak liu ka lae? Se nuneʼe, haʼu halo orasaun ba Jeová kona-ba oinsá mak haʼu-nia desizaun neʼe bele kona mós haʼu-nia família no kongregasaun ka lae?’ Jeová hafolin ita hodi fó oportunidade ba ita atu apoia ninia direitu atu ukun. Hahú husi Adão no Eva nia tempu, Diabu koko makaʼas atu dada ema hodi apoia nia kontra Jeová. Maibé se ita mak apoia Jeová nia ukun, ita hatudu ba Satanás katak ita hakarak tuir Jeová. Ita-nia fiar no laran-metin sei book ita atu fó ita-nia an hodi halo Jeová nia serbisu, no neʼe halo Jeová kontente tebes. (Prov 23:15, 16) Jeová sei uza ita-nia apoiu no laran-metin hodi fó resposta ba Satanás nia liafuan goza. (Prov 27:11) Laran-metin ba Jeová mak buat folin-boot neʼebé ita bele fó ba nia no neʼe lori ksolok boot tebes ba nia. w17.04 p. 32 par. 15-16

Moisés nia Ukun-Fuan hatete katak, se ema ida promete ka jura buat ruma ba Jeová, “nia labele kontra ninia liafuan neʼe. Nia tenke kumpre buat hotu neʼebé nia jura ona atu halo”. (Núm 30:2) Maromak mós leno Salomão atu hakerek liafuan sira iha eskritura ba ohin. Jesus mós hatudu katak juramentu mak buat neʼebé sériu. Nia hatete: “Ema iha tempu uluk dehan: ‘Ó labele jura se ó la halo tuir, maibé ó tenke kumpre ó-nia promete ba Jeová.’ (Mt 5:33) Husi eskritura sira-neʼe ita bele haree katak halo juramentu ba Jeová mak buat neʼebé sériu tebes. Tanba neʼe envolve ita rasik nia relasaun ho Jeová. David hatete: “Sé mak bele saʼe ba Jeová nia foho? No sé mak bele hamriik iha ninia fatin santu? Neʼe mak ema neʼebé . . . la jura falsu hodi Haʼu-nia [Jeová nia] moris, no la jura hodi bosok.”—Sal 24:3, 4. w17.04 p. 4 par. 3-4

Se ita sente katak ita hasoru daudaun situasaun la justisa ruma iha kongregasaun, importante tebes atu la koʼalia aat irmaun ka irmán ba ema seluk kona-ba situasaun neʼebé akontese ba ita. Kuandu iha duni irmaun ka irmán ida halo sala neʼebé boot hasoru ita, ita tenkesér fó sai ba katuas sira no husu sira-nia ajuda. (Lev 5:1) Maibé dala barak, se sala neʼebé irmaun ka irmán ida halo hasoru ita laʼós sala neʼebé boot, diʼak atu buka deʼit dame no lalika fó sai ba ema ida, inklui mós katuas sira. (Mt 5:23, 24; 18:15) Tan neʼe diʼak atu uza Bíblia nia prinsípiu bainhira hasoru situasaun hanesan neʼe hodi ita bele laran-metin nafatin ba Jeová. Dala ruma, karik ita sente ita mak vítima ba hahalok la justisa balu, maibé ikusmai mak ita foin hatene katak, loloos ita mak komprende sala kona-ba neʼe. Iha situasaun hanesan neʼe ita sei sente agradese tebes tanba ita seidauk koʼalia sai liafuan ladiʼak ruma kona-ba ita-nia irmaun ka irmán hodi halo situasaun neʼe sai aat liután. Presiza hanoin-hetan katak, maski ita mak loos ka sala, koʼalia liafuan neʼebé hakanek ema la bele ajuda atu hadiʼa situasaun neʼe. Tan neʼe, se ita hatudu laran-metin ba Jeová no ba irmaun-irmán sira, ita sei kuidadu atu la koʼalia aat kona-ba ema seluk. w17.04 p. 21 par. 14