Outubru

Jeová mak matenek nia hun, no nia la karak atu fahe ninia matenek ba ema seluk. Dalan ida atu hetan matenek husi Maromak mak simu ninia dixiplina. Matenek neʼe bele proteje ita atu la halo buat neʼebé sala no ajuda ita hakbesik nafatin ba Jeová. (Prov 2:10-12) No ita mós bele hetan esperansa furak atu moris ba nafatin iha futuru. (Jud 21) Tanba ita la perfeitu ka tanba ita-nia kultura, dala ruma neʼe bele halo susar ba ita atu simu dixiplina ka iha hanoin neʼebé loos kona-ba dixiplina. Maibé se ita mak esperiénsia rasik rezultadu diʼak husi Maromak nia dixiplina, ita bele haree katak Maromak hadomi duni ita. Eskritura iha Provérbios 3:11, 12 hatete: “Haʼu-nia oan, keta fila kotuk ba Jeová nia dixiplina, . . . tanba Jeová korrije sira neʼebé nia hadomi.” Sin, ita bele fiar katak Jeová hakarak buat neʼebé diʼak liu hotu ba ita. (Ebr 12:5-11) Maromak komprende tebes kona-ba ita, tan neʼe nia sempre fó dixiplina neʼebé natoon no tuir buat neʼebé ita presiza. w18.03 p. 28 par. 1-2

Apóstolu Pedro hakerek liafuan neʼebé temi iha leten ba irmaun-irmán sira neʼebé mai husi fatin oioin. Sira hasoru daudaun terus makaʼas husi ema. Saida mak bele ajuda ema kristaun sira iha tempu neʼebá atu tahan liu tempu susar sira-neʼe? (1 Ped 1:1; 4:4, 7, 12) Tuir loloos Pedro hakarak irmaun-irmán sira atu hatudu laran-diʼak “ba malu”, maski sira hatene malu didiʼak ona no sempre halo atividade ruma hamutuk. Oinsá mak hatudu laran-diʼak ba malu bele ajuda sira? Neʼe bele halo sira hakbesik malu liután. Oinsá ho Ita? Ita sei hanoin-hetan tempu furak neʼebé Ita sente bainhira ema ida konvida Ita ba ninia uma ka lae? Bainhira Ita konvida ema ida ba Ita-nia uma, neʼe halo Ita hakbesik liután ba malu. Dalan ida atu koñese liután ita-nia irmaun-irmán sira mak simu no hatudu laran-diʼak ba sira. Ema kristaun sira iha Pedro nia tempu presiza hakbesik liután ba malu tanba problema aumenta barak iha tempu neʼebá. Iha “loron ikus sira-neʼe” ita mós presiza halo hanesan.—2 Tim 3:1. w18.03 p. 14-15 par. 1-3

Jesus hatete katak ema neʼebé moris tuir espíritu santu sei iha moris neʼebé kontente. Eskritura iha Roma 8:6 esplika katak ema neʼebé moris tuir espíritu santu sei hetan benefísiu ba ninia moris. Eskritura neʼe dehan: “Hodi hanoin buat isin nian lori ba mate, maibé hodi hanoin buat espíritu nian lori ba moris no dame.” Neʼe duni, se ita moris tuir espíritu santu, ita sei iha dame ho Maromak, moris hakmatek, no iha esperansa atu moris ba nafatin iha futuru. Maibé, ita moris daudaun iha mundu neʼebé perigu. Ema barak moris tuir hakarak isin nian. Tan neʼe, ita presiza hakaʼas an atu moris tuir espíritu santu no proteje ita-nia hanoin. Se ita mak la kaer metin ba Jeová nia hanoin, mundu neʼe sei dada ita atu tuir mundu nia hanoin no hahalok sira. Dixípulu Judas hatete katak, ema sira-neʼe moris deʼit tuir isin nia hakarak toʼo la iha tan Maromak nia espíritu.—Jud 18, 19. w18.02 p. 19 par. 5, 7; p. 20 par. 8

Iha doutór no enfermeiru barak serbisu iha fatin neʼebé sira presiza tau matan ba ema ho moras neʼebé bele hadaʼet. Sira tau matan ba pasiente sira-neʼe tanba sira hakarak ajuda pasiente sira. Maski nuneʼe, sira presiza proteje sira-nia an atu la kona fali moras husi pasiente sira. Testemuña ba Jeová mós iha situasaun neʼebé atu hanesan. Ita barak hela no serbisu hamutuk ho ema neʼebé iha hanoin no hahalok neʼebé Maromak la gosta. Dala ruma neʼe lori susar ba ita. Iha loron ikus sira-neʼe, ema neʼebé la hadomi Maromak lakohi halo tuir ninia matadalan kona-ba saida mak loos no sala. Bainhira apóstolu Paulo hakerek karta ba Timóteo, nia koʼalia kona-ba hahalok aat oioin. (2 Tim 3:1-5) Maski ita la gosta hahalok sira-neʼe, maibé se la kuidadu, ema nia hahalok, dalan neʼebé sira hanoin no koʼalia bele kona fali ita. (Prov 13:20) Tan neʼe proteje ita-nia an atu ema neʼebé ita hanorin kona-ba Jeová, sira-nia hahalok la kona fali ita. w18.01 p. 27 par. 1-2

Iha tinan 33, bainhira Jesus hetan tiha moris-hiʼas, lakleur nia koʼalia ba ema naʼin-500 liu, mane, feto, no karik iha mós labarik sira. Karik iha tempu neʼe mak Jesus temi liafuan iha leten. (1 Kor 15:6) Jesus fó mandamentu ba ninia dixípulu sira atu ajuda ema seluk sai ninia dixípulu. Ema neʼebé hakarak sai ninia dixípulu tenkesér hetan batizmu. (Mt 11:29, 30) Atu serbí Maromak iha dalan neʼebé nia simu, ema presiza rekoñese katak Maromak uza daudaun Jesus hodi kumpre ninia hakarak sira. Tuirmai mak ema bele hetan batizmu. Batizmu iha dalan hanesan neʼe deʼit mak Maromak simu. Bíblia temi ezemplu barak neʼebé hatudu katak Jesus nia dixípulu sira iha tempu uluk hatene duni katak importante tebes atu hetan batizmu. Sira nunka hanoin katak sira bele hein no depois mak hetan batizmu.—Após 2:41; 9:18; 16:14, 15, 32, 33. w18.03 p. 5 par. 8

Mundu ohin loron nakonu ho hahalok la morál no adorasaun falsu. Babilónia Boot, ka relijiaun falsu hotu neʼebé Bíblia bolu nuʼudar “hela-fatin ba anju aat sira” mak domina daudaun ema barak nia moris. (Apok 18:2) Ita moris iha mundu neʼe hanesan ema estranjeiru deʼit, tan neʼe ita la hanesan ho ema barak iha mundu neʼe, no tanba razaun neʼe karik sira sei goza ita. (Mc 13:13) Maibé ita hakarak hanesan Daniel hodi hakbesik ba ita-nia Maromak Jeová. Se ita mak haraik-an, tau fiar ba Jeová, no halo tuir nia, nia mós sei haree ita nuʼudar ema neʼebé folin-boot ba nia. (Ageu 2:7) Inan-aman bele aprende lisaun importante husi Daniel nia inan-aman. Bainhira Daniel sei kiʼik no hela iha Judá, ema barak iha hahalok aat. Maibé Daniel nia domin ba Jeová sai buras. Ita bele fiar katak ninia inan-aman mak hanorin nia kona-ba Jeová. (Prov 22:6) Sira fó naran Daniel ba nia neʼebé signifika “Maromak mak haʼu-nia Juis”, ida-neʼe hatudu katak ninia inan-aman hadomi tebes Jeová. (Dan 1:6) Tan neʼe inan-aman sira, hatudu pasiénsia hodi hanorin oan kona-ba Jeová. Keta rende an. (Éf 6:4) Halo orasaun hamutuk ho sira no temi sira iha imi-nia orasaun rasik. Hakaʼas an hanorin sira atu halo tuir Jeová nia matadalan sira neʼebé loos, no Jeová sei fó bensaun barak ba imi.—Sal 37:5. w18.02 p. 5 par. 12; p. 6 par. 14-15

Razaun ita fó ba Jeová tanba neʼe mak dalan ida atu adora nia. Iha apóstolu João nia vizaun, nia rona Jeová nia kriatura espíritu sira iha lalehan hatete: “Jeová, ami-nia Maromak, Ita-Boot merese simu glória, hahiʼi no kbiit, tanba Ita kria ona buat hotu, no tanba Ita-nia hakarak mak buat hotu iha no kria tiha.” (Apok 4:11) Jeová merese duni simu glória no hahiʼi, tan neʼe ita hakarak fó buat neʼebé diʼak liu hotu ba nia. Jeová fó mandamentu ba nasaun Izraél liuhusi Moisés atu halaʼo festa adorasaun tinan ida dala tolu. Ema Izraél sira sei lori buat balu ba festa sira-neʼe tanba neʼe mak parte ida ba sira-nia adorasaun. Sira la bele “hamriik iha Jeová nia oin ho liman-mamuk”. (Deut 16:16) Ohin loron, fó ba Jeová husi laran mak parte importante ida husi ita-nia adorasaun. Liuhusi dalan neʼe ita hatudu katak ita hafolin no apoia serbisu neʼebé halaʼo iha Jeová nia organizasaun. w18.01 p. 18 par. 4-5

Jesus hatutan hodi dehan: “Sai haʼu-nia dixípulu. . . . Basá sai haʼu-nia dixípulu laʼós buat neʼebé susar, no buat neʼebé haʼu husu imi atu lori la todan.” (Mt 11:29, 30) Neʼe loos duni! Dala ruma ita sente kole tebes bainhira atu bá reuniaun ka bá haklaken. Maibé halo tiha buat sira-neʼe, ita sente oinsá? Ita sente fresku no iha fali forsa atu hasoru ita-nia problema sira. Loos duni, sai Jesus nia dixípulu laʼós buat neʼebé susar! Hanoin toʼok ezemplu kona-ba irmán ida. Nia iha moras depresaun, sempre kona ulun-moras makaʼas no iha mós moras ida neʼebé halo nia kole beibeik. Dala ruma susar tebes ba nia atu tuir reuniaun sira. Maibé loron ida, nia hakaʼas an tebes atu tuir reuniaun. Nia hatete: “Diskursu iha loron neʼe mak kona-ba laran-kraik. Haʼu tanis tanba informasaun iha diskursu neʼe hatudu katak Jeová komprende no hanoin tebes haʼu. Diskursu neʼe fó-hanoin fali haʼu katak haʼu presiza duni tuir reuniaun sira.” Irmán neʼe kontente tebes tanba nia hakaʼas an atu tuir reuniaun neʼe! w18.01 p. 8 par. 6-7

Ita bele halo saida se Ita-nia oan komesa iha duvida bainhira hetan tiha batizmu? Porezemplu, karik Ita-nia oan komesa gosta sasán husi mundu neʼe no nia komesa duvida katak halo tuir Bíblia nia prinsípiu mak moris neʼebé diʼak liu hotu. (Sal 73:1, 3, 12, 13) Se ida-neʼe akontese, koko atu la haksesuk ho Ita-nia oan kona-ba ninia duvida sira, maski oan neʼe sei kiʼik ka joven ona. Hakaʼas an atu ajuda nia hatene katak Ita hadomi nia no hakarak ajuda nia. Halo hanesan neʼe bele ajuda nia atu kontinua serbí Jeová, duké hadook an liután. Joven neʼebé hetan ona batizmu dedika ona ninia an ba Jeová. Nia promete ona atu serbí Jeová no hadomi nia liu fali buat hotu. (Mc 12:30) Jeová haree promesa hanesan neʼe sériu tebes, no ita mós tenke sente hanesan neʼe.—Ecle 5:4, 5. w17.12 p. 22 par. 16-17

Hanesan Marta, Maromak nia atan sira hatene ema mate sei moris-hiʼas fali iha futuru. Hanoin toʼok buat neʼebé Jeová husu Abraão atu halo ba ninia oan-mane mesak Isaac. Jeová dehan: “Favór ida, lori ó-nia oan-mane, ó-nia oan-mane mesak neʼebé ó hadomi tebes, Isaac, . . . no hasaʼe nia nuʼudar sakrifísiu sunu nian.” (Gên 22:2) Hanoin toʼok Abraão sente oinsá bainhira nia rona Jeová nia mandamentu neʼe? Tanba Jeová promete nanis ona katak liuhusi Abraão nia jerasaun mak nasaun hotu sei hetan bensaun. (Gên 13:14-16; 18:18; Rom 4:17, 18) No Jeová mós hatete katak bensaun sira-neʼe sei mai “liuhusi Isaac”. (Gên 21:12) Maibé oinsá mak buat sira-neʼe atu sai loos se Abraão hasaʼe ninia oan-mane nuʼudar sakrifísiu? Espíritu santu leno Paulo hodi esplika katak Abraão iha fiar ba Maromak atu halo Isaac moris fila fali. (Ebr 11:17-19) Abraão la hatene bainhira loos mak ninia oan-mane atu hetan fali moris-hiʼas. Maski nuneʼe, nia tau fiar katak Jeová sei fó fali moris ba Isaac. w17.12 p. 6 par. 12-14

Hanesan apóstolu Paulo, ita mós tenke hafolin moris hanesan Jeová. Nia hakarak ema hotu atu arrepende an, hodi nuneʼe sira bele hetan moris. (2 Ped 3:9) Ita presiza hatudu domin ba ema hodi banati-tuir Jeová. Laran-sadiʼa bele book ita atu haklaken ho badinas no lori ksolok ba ita. Jeová nia haree kona-ba moris, mós kona dalan neʼebé ita halo seguru buat hotu. Ita tenke kuidadu kona-ba lori karreta no halo serbisu, inklui mós bainhira ita harii, tau matan, ka bá ita-nia fatin adorasaun nian. Keta tau tempu ka osan importante liu fali ema, seguransa no saúde. Ita-nia Maromak sempre halo buat hotu ho loloos, no ita hakarak banati-tuir nia. Liuliu ba katuas kongregasaun sira atu kuidadu kona-ba sira rasik no ema seluk nia seguransa. (Prov 22:3) Se katuas ida fó-hanoin Ita kona-ba matadalan ba seguransa ruma, halo tuir nia. (Gal 6:1) Haree moris tuir Jeová nia haree hodi ita “la simu sala kona-ba raan”.—Deut 19:10. w17.11 p. 16 par. 11-12

Kristu nia alin sira iha esperansa neʼebé furak tebes. Apóstolu Paulo hatete katak sira sei simu kolen husi Maromak atu moris iha lalehan. (Flp 3:14) Sira sei ukun hamutuk ho Jesus Kristu no serbisu hamutuk ho nia atu ajuda ema sai perfeitu fali. (Apok 20:6) Neʼe mak esperansa neʼebé furak duni! Bibi seluk mós sei simu sira-nia kolen. Sira sei moris ba nafatin iha paraízu, no esperansa neʼe sei lori ksolok neʼebé loos ba sira! (2 Ped 3:13) Paulo hakarak ajuda ninia maluk sira atu hatudu laran-metin hodi bele hetan sira-nia kolen, no nia dehan ba sira: “Kontinua hanoin kona-ba buat leten nian.” (Kol 3:2) Sira presiza tau fokus ba sira-nia esperansa atu bá lalehan. (Kol 1:4, 5) Loos duni, hanoin beibeik kona-ba bensaun sira husi Jeová bele ajuda ita hotu atu tau fokus ba ita-nia kolen.—1 Kor 9:24. w17.11 p. 25 par. 1-2

Knananuk barak husi livru knananuk foun hakerek iha dalan hanesan ita halo orasaun. Knananuk sira-neʼe bele ajuda Ita fó sai Ita-nia sentimentu ba Jeová. Knananuk seluk tan bele fó laran-manas ba ita atu “hatudu domin no hahalok diʼak”. (Ebr 10:24) Ita hakarak atu hatene didiʼak kona-ba knananuk sira-nia melodia, ritmu, no liafuan sira. Dalan ida atu ajuda ita mak hodi rona ba knananuk sira neʼebé hetan husi jw.org. Se Ita mak treinu beibeik atu kanta knananuk sira-neʼe iha uma, Ita bele aprende oinsá atu kanta ho fiar an no sentimentu. Diʼak atu hanoin-hetan beibeik katak kanta mak parte importante ida husi ita-nia adorasaun. Liuhusi kanta ita bele hatudu ba Jeová katak ita hadomi nia no agradese ba buat hotu neʼebé nia halo ba ita. (Isa 12:5) Se Ita kanta ho laran, neʼe bele fó laran-manas ba ema seluk atu halo tuir Ita. Sin, ema hotu iha kongregasaun, maski idade boot, kiʼik, ka foun iha lia-loos, bele adora Jeová iha dalan neʼe. Tan neʼe keta sente moe atu kanta husi laran. Sin, kanta ho haksolok bá! w17.11 p. 7 par. 18-19

Ohin loron, refujiadu barak mak mai husi rai neʼebé governu hanetik ita-nia serbisu haklaken. No iha refujiadu rihun ba rihun nunka rona kona-ba ita-nia haklaken. Maibé ita agradese ba irmaun-irmán sira-nia haklaken ho badinas mak ema sira-neʼe rona daudauk “liafuan kona-ba Maromak nia Ukun”. (Mt 13:19, 23) Refujiadu barak neʼebé hasoru susar hanesan “naha todan”, sira hetan daudauk kmaan husi ita-nia reuniaun no sira rekoñese katak, ‘Maromak iha duni ita-nia leet’. (Mt 11:28-30; 1 Kor 14:25) Bainhira ita haklaken ba ema refujiadu, ita presiza hatudu matenek no matan-moris. (Mt 10:16; Prov 22:3) Ita presiza rona ho pasiénsia ba sira, maibé kuidadu atu la koʼalia kona-ba polítiku. Ita tenkesér halo tuir matadalan husi ita-nia sukursál no mós halo tuir autoridade hodi la tau ita-nia an ka ema seluk iha perigu. Tanba refujiadu sira mai husi rai oioin, tan neʼe ita presiza buka-hatene no hatudu respeitu ba sira ida-idak nia relijiaun no kultura. Porezemplu, iha nasaun balu feto sira tenkesér hatais ho respeitu tebes. Tan neʼe bainhira ita haklaken ba sira, diʼak atu hatais iha dalan neʼebé la halo sira sidi. w17.05 p. 7 par. 17-18

Ita bele husu Jeová haraik espíritu santu atu ajuda ita hodi hatudu laran-maus no laran-diʼak ba ita-nia família ne’ebé laʼós fiar-naʼin. Ita labele diskute ho sira kona-ba sira-nia fiar neʼebé laloos. Se ita sente kanek tanba sira-nia liafuan ka hahalok, diʼak atu banati-tuir apóstolu sira-nia ezemplu. Paulo hatete: “Kuandu ema koʼalia aat ami, ami husu bensaun ba sira; kuandu ema fó-terus ba ami, ami tahan ho pasiénsia; kuandu ema koʼalia bosok kona-ba ami, ami hatán ho laran-maus.” (1 Kor 4:12, 13) Tanbasá mak importante? Maski liuhusi koʼalia ho laran-maus bele ajuda ita atu iha nafatin dame ho ita-nia família sira, maibé hahalok diʼak sei lori rezultadu diʼak liután. (1 Ped 3:1, 2, 16) Liuhusi Ita-nia ezemplu, hatudu ba Ita-nia família katak Testemuña ba Jeová halaʼo moris kaben nian neʼebé kontente, sira tau matan didiʼak ba sira-nia oan, iha moris neʼebé folin no tuir morál neʼebé diʼak. Maski ita-nia família la simu lia-loos, ita haksolok nafatin tanba ita hatene katak ita-nia hahalok diʼak halo Jeová kontente. w17.10 p. 15 par. 13-14

Ita la hakfodak atu haree ema barak neʼebé aprende lia-loos halo mudansa ba sira-nia moris. Irmaun-irmán sira iha apóstolu sira-nia tempu neʼebé iha esperansa atu ukun iha lalehan mós halo mudansa hanesan neʼe. (1 Kor 6:9-11) Bainhira apóstolu Paulo temi tiha ema sira neʼebé sei la simu Maromak nia Ukun nuʼudar liman-rohan, nia hatutan hodi dehan: “Imi balu mós uluk halo hanesan neʼe.” Maromak nia Liafuan no espíritu santu mak ajuda ema sira-neʼe hodi halo mudansa. Maibé, maski sai ona ema kristaun, balu monu ba sala. Porezemplu, Bíblia temi katak iha apóstolu sira-nia tempu iha irmaun ida neʼebé tenkesér hasai husi kongregasaun. Maibé ikusmai nia halo mudansa hodi kongregasaun simu fali nia. (1 Kor 5:1-5; 2 Kor 2:5-8) Hodi haree katak ita-nia irmaun-irmán barak halo mudansa ba sira-nia moris liuhusi Bíblia nia kbiit, neʼe fó kmaan tebes ba ita. Tan neʼe ita hakarak uza didiʼak ninia Liafuan neʼe. w17.09 p. 23-24 par. 2-3

Jeová mak domin nia Hun. (1 João 4:7) Domin importante liu hotu mak domin neʼebé bazeia ba prinsípiu husi Bíblia. Bíblia iha lia-gregu bolu domin neʼe agape. Domin neʼe inklui hatudu sentimentu hanoin ema. Maibé laʼós liuhusi sentimentu deʼit, domin neʼe mós book ita atu halo buat diʼak ba ema seluk hodi la hanoin an deʼit. Domin neʼe lori ksolok ba ita no halo ita-nia moris iha folin. Jeová hatudu domin nanis antes nia kria Adão no Eva. Oinsá? Nia kria buat hotu iha mundu neʼe atu ema bele moris. Laʼós neʼe deʼit, nia mós kria mundu neʼe atu sai ema nia hela-fatin hodi ema bele goza moris. Jeová kria buat sira-neʼe laʼós ba nia an, maibé ba ita. Bainhira nia kria buat hotu kompletu ona iha mundu neʼe mak nia foin kria ema no fó ba ema esperansa atu moris ba nafatin iha Paraízu. w17.10 p. 7 par. 1-2

Tuirmai Tiago hatutan hodi dehan: “Se imi kontinua todan ba sorin, imi halo sala.” (Tgo 2:9) Se ita mak iha domin ba ema seluk, ita sei la halo diskriminasaun ba ema kona-ba ninia edukasaun, rasa, kiak ka riku. Ita la bele hatudu hahalok la fihir ema iha liʼur deʼit, maibé tenkesér mai husi laran. Domin sempre “pasiénsia no laran-diʼak” no mós “la foti-an”. (1 Kor 13:4) Ita presiza iha pasiénsia, laran-diʼak, no haraik-an hodi bele kontinua haklaken liafuan diʼak ba ema seluk. (Mt 28:19) Hahalok sira-neʼe mós bele ajuda ita atu iha relasaun neʼebé diʼak ho irmaun-irmán sira hotu iha ita-nia kongregasaun. Se ita hotu mak hatudu domin hanesan neʼe, ita-nia kongregasaun sei iha unidade no neʼe sei fó glória ba Jeová. Bainhira ema seluk haree unidade neʼe, neʼe sei dada sira ba lia-loos. Tan neʼe bainhira Bíblia koʼalia tiha kona-ba hahalok foun, eskritura ramata ho liafuan tuirmai neʼe: “Iha buat sira-neʼe hotu nia leten, tau domin nuʼudar imi-nia hatais, tanba domin mak kesi ita hamutuk iha dalan neʼebé kompletu.”—Kol 3:14. w17.08 p. 26 par. 18-19

Ita mós tenke hatudu laran-sadiʼa no laran-diʼak ba ema neʼebé seidauk hatene Jeová, sira neʼebé sei iha tempu atu arrepende an hodi sai Jeová nia belun. Jeová lakohi haree ema ida lakon ninia moris iha loron tesi-lia nian. (2 Ped 3:9) Tan neʼe, antes loron neʼe toʼo mai, ita hakarak hakaʼas an atu fó sai Jeová nia avizu ba ema hotu no koko atu ajuda ema hotu atu simu Maromak nia laran-sadiʼa no laran-diʼak. Jesus mós hatudu ezemplu neʼebé diʼak tebes kona-ba hahalok laran-sadiʼa no laran-diʼak. Bainhira nia haree ema-lubun, nia hanoin tebes sira tanba nia haree katak “ema hanehan no la tau matan ba sira, no sira hanesan bibi neʼebé bibi-atan la iha”. Tuirmai nia halo saida? “Nia hahú hanorin sira buat barak.” (Mt 9:36; Mc 6:34) Ema farizeu la hatudu laran-sadiʼa no laran-diʼak tanba sira lakohi fó ajuda ba povu. (Mt 12:9-14; 23:4; João 7:49) Ita iha hakarak atu fó ajuda ba ema no hanorin sira kona-ba Jeová, hanesan buat neʼebé Jesus halo ka lae? w17.09 p. 10 par. 6, 9

Hanoin toʼok buat neʼebé akontese ba José. Bainhira iha komarka laran iha rai-Ejitu, nia nunka hanoin katak loron ida nia sei sai ema neʼebé ho pozisaun segundu iha rai-Ejitu ka Jeová sei uza nia atu salva ninia família rasik husi rai-hamlaha. (Gên 40:15; 41:39-43; 50:20) Ita bele fiar katak José nunka hanoin buat neʼebé Jeová halo hodi ajuda nia. Sara ho ninia idade neʼebé boot tebes, nia espera katak Jeová sei halo nia atu bele hahoris oan-mane ida ka lae? Lae. Tuur-ahi ba Isaac mak buat neʼebé Sara nunka hanoin sei akontese. (Gên 21:1-3, 6, 7) Ita la hein katak Jeová sei halo milagre atu hasai hotu ita-nia problema sira iha mundu aat neʼe. No ita mós la iha direitu atu husu Jeová halo milagre iha ita-nia moris. Maski nuneʼe, ita hatene katak Jeová halo ona buat furak oioin iha tempu uluk hodi ajuda ninia atan sira, no Jeová nunka troka. (Isa 43:10-12) Hatene ida-neʼe halo ita tau fiar ba Jeová. Ita bele fiar katak Jeová sei fó kbiit ba ita atu halo ninia hakarak. (2 Kor 4:7-9) Sin, Jeová bele ajuda ita maski iha situasaun neʼebé susar, naran katak ita laran-metin nafatin ba nia. w17.08 p. 11 par. 13-14

Serbí Jeová tempu-tomak bele ajuda Ita atu sai ema kristaun neʼebé maduru tanba Ita serbisu hamutuk ho irmaun-irmán seluk neʼebé serbí tempu-tomak. No ema barak mós sente katak serbí Jeová tempu-tomak durante joven, ikusmai ajuda sira iha moris kaben nian. Dala barak, sira neʼebé pioneiru antes kaben, kaben tiha, sira mós kontinua pioneiru ho sira-nia kaben. (Rom 16:3, 4) Halo planu envolve mós Ita-nia laran. Eskritura iha Salmo 20:4 hatete: “Ami hein katak [Jeová] sei fó buat neʼebé Ita hakarak no halo Ita-nia planu hotu sai susesu.” Bainhira halo planu kona-ba Ita-nia futuru, hanoin didiʼak saida loos mak Ita hakarak halo iha Ita-nia moris. Hanoin mós kona-ba Jeová kumpre daudauk saida iha ita-nia tempu, no saida mak Ita bele halo atu hola parte iha ninia serbisu neʼe. Tuirmai halo planu iha Ita-nia moris atu halo buat neʼebé Jeová simu. Se Ita uza Ita-nia moris hodi serbí Jeová ho laran tomak, neʼe sei lori haksolok tebes tanba Ita fó glória ba nia. Sin, “haksolok tebes bá tanba Jeová, no nia sei fó ba ó buat neʼebé ó-nia laran hakarak”.—Sal 37:4. w17.07 p. 26 par. 15-18

Bainhira ema ida halo buat neʼebé diʼak, baibain ita gaba nia. Sá tan ho Maromak Jeová, ita hakarak gaba hodi fó hahiʼi ba nia! Ita hahiʼi nia kona-ba ninia forsa boot neʼebé ita haree husi ninia kriasaun. Ita mós hahiʼi nia kona-ba ninia domin neʼebé nia hatudu mai ita liuhusi ninia Oan-Mane mesak nia sakrifísiu. Ema neʼebé hakerek Salmo 147 hakarak tebes atu fó hahiʼi ba Jeová. Nia mós fó laran-manas ba ema seluk atu fó hahiʼi ba Maromak hamutuk ho nia. (Sal 147:7, 12) Ita la hatene sé mak hakerek Salmo 147. Maibé karik ema neʼe moris iha tempu neʼebé Jeová halo ema Izraél sira livre husi Babilónia hodi fila fali ba Jeruzalein. (Sal 147:2) Ema neʼebé hakerek salmo neʼe hahiʼi Jeová tanba Jeová nia povu iha oportunidade atu adora fali Jeová iha sira-nia rai rasik. Tanba razaun saida mak Ita “fó hahiʼi ba Jah!”?—Sal 147:1. w17.07 p. 17 par. 1-3

Jesus hatene katak la fasil ba ninia dixípulu sira atu tau matan sira-nia an iha mundu aat neʼe. Bíblia hatudu ho klaru katak, sistema ekonomia ohin loron neʼebé ema uza atu sai riku laʼós parte husi Maromak nia planu. Ita hatene ida-neʼe tanba iha jardín Eden, Jeová fó deʼit buat hotu ba Adão no Eva liu fali sira-nia presiza. (Gên 2:15, 16) No iha tempu neʼebé Maromak haraik ninia espíritu santu ba ema sira neʼebé nia hili, “la iha ida mak dehan katak sasán neʼebé sira iha mak sira-nian, maibé sira fahe buat hotu ba malu”. (Após 4:32) Profeta Isaías fó-hatene nanis katak, loron ida ema hotu la presiza selu buat ida atu goza sasán hotu neʼebé mai husi mundu neʼe. (Isa 25:6-9; 65:21, 22) Maibé antes tempu neʼe toʼo mai, Jesus nia dixípulu sira presiza “hatudu matenek”. Sira presiza uza didiʼak sasán sira iha mundu neʼe atu tau matan ba sira-nia an maibé halo nafatin buat neʼebé Maromak simu.—Lc 16:8. w17.07 p. 8 par. 4-6

Iha livru Job neʼebé hakerek iha tempu neʼebé livru barak husi Bíblia seidauk iha, Satanás hatete katak se Job mak hetan terus makaʼas, nia sei fila kotuk ba Maromak. Satanás mós husu Maromak atu fó terus ba Job. Jeová sei la halo nuneʼe, maibé nia husik Satanás mak atu koko Job. Lakleur, Job lakon hotu ninia atan no sasán sira. Tuirmai Job nia oan naʼin-sanulu mós mate. Satanás halo akontesimentu neʼe haree hanesan mai husi Maromak. (Job 1:13-19) Depois, Satanás halo Job sai moras makaʼas neʼebé lori terus boot ba nia. (Job 2:7) Aat liután mak Job nia feen no belun falsu naʼin-tolu koʼalia liafuan neʼebé hakanek no halo nia laran-tun. (Job 2:9; 3:11; 16:2) Buat neʼebé Satanás hatete loos ka lae? Lae. Tanba maski Job hasoru terus makaʼas, nia nunka fila kotuk ba Jeová.—Job 27:5. w17.06 p. 24 par. 9-10

Ohin loron, Jeová hakarak família nia ulun atu tau matan ba família, no sira tenke hakaʼas an atu kaer didiʼak sira-nia responsabilidade neʼe. Maibé, tanba moris iha loron ikus sira-neʼe, serbisu bele halo ita hanoin resin. Baibain, ema mak barak liu fali serbisu. Tan neʼe, ema sempre hadau malu atu hetan serbisu. Ema barak sente katak sira presiza serbisu tan ba oras barak, maski baibain saláriu uitoan deʼit. Kompañia sira koko atu halo sasán barak, maibé uza serbisu-naʼin uitoan deʼit. Tan neʼe serbisu-naʼin bele sai estrese, kole, no moras. Ema barak halo tuir deʼit patraun nia hakarak tanba taʼuk atu lakon sira-nia serbisu. Nuʼudar ema kristaun, ita tenkesér hatudu laran-metin liu ba Jeová, duké buat seluk, inklui mós ita-nia patraun. (Lc 10:27) Serbisu mak dalan atu tau matan ba ita-nia presiza no atu apoia serbisu haklaken. Maibé se ita la kuidadu, serbisu bele hanetik ita-nia adorasaun. w17.05 p. 23 par. 5-7

Dala ruma ema balu husu ita-nia ajuda atu hanorin sira-nia oan kona-ba Jeová. Se inan ka aman ida husu ita atu estuda ho ninia oan, diʼak atu hanoin-hetan katak ita la bele halaʼo fali inan-aman nia knaar. (Éf 6:1-4) Dala ruma, karik ita presiza estuda ho oan neʼebé inan-aman la iha lia-loos. Se ita mak estuda ho ema seluk nia oan, matenek atu estuda bainhira inan-aman iha uma ka bainhira Testemuña maduru ida iha uma, ka selae, estuda iha fatin públiku, hodi nuneʼe ita la halo ema seluk iha hanoin neʼebé sala kona-ba ita. Ita-nia hakarak mak atu hein ba loron ida inan-aman mak hanorin fali sira-nia oan kona-ba Jeová. w17.06 p. 8 par. 15-16

Se oan mak sente katak inan-aman nia toman atu moris la hanesan ho ninian, nia sei lakohi aprende inan-aman nia língua no relijiaun. Inan-aman tenke hanoin liu kona-ba oan nia presiza duké hanoin kona-ba saida mak sira rasik hakarak. (1 Kor 10:24) Aman ida naran Samuel dehan: “Haʼu ho haʼu-nia feen haree didiʼak ba ami-nia oan sira kona-ba língua saida mak ajuda sira atu laʼo ba oin iha lia-loos, no ami halo orasaun hodi husu matenek kona-ba neʼe. Ami haree duni oan sira ladún hetan benefísiu husi reuniaun neʼebé uza ami-nia língua rasik, tan neʼe ami halo desizaun hodi muda fali ba kongregasaun neʼebé uza língua husi rai neʼe. Ami tuir beibeik reuniaun no haklaken hamutuk ho oan sira. Ami mós konvida irmaun-irmán sira husi kongregasaun atu han no pasiar hamutuk. Buat hotu neʼe ajuda duni ami-nia oan sira hodi koñese didiʼak irmaun-irmán sira no mós Jeová. Sira bele sente katak Jeová laʼós deʼit Maromak, maibé mós sira-nia Aman no Belun. Ami sente neʼe mak buat neʼebé importante liu duké sira aprende ami-nia língua.” w17.05 p. 10 par. 11-13

Lakleur tan ema hotu neʼebé hela iha mundu sei simu Jeová nia ukun, no ita hein namanas ba tempu furak neʼe! Ita hakarak duni atu kanta knananuk neʼebé Débora no Barake kanta: “Husik Ita-nia inimigu hotu lakon mohu, oh Jeová, maibé halo sira neʼebé hadomi Ita sai hanesan loro-matan neʼebé saʼe no fó naroman boot.” (Juíz 5:31) Neʼe sei akontese iha tempu neʼebé Jeová halakon Satanás nia mundu aat neʼe. Bainhira funu Armajedón hahú, Jeová sei la presiza ita atu fó ita-nia an nuʼudar voluntáriu hodi halakon ninia inimigu. Maibé, ita sei “hamriik iha fatin” no “haree Jeová nia salvasaun”. (2 Crôn 20:17) Entaun agora daudaun, ita iha oportunidade furak atu fó apoiu ba Jeová nia direitu atu ukun ho aten-brani no laran-manas. Débora no Barake hasaʼe sira-nia knananuk manán nian hodi hahiʼi Jeová, laʼós ema. Sira kanta: “Fó hahiʼi ba Jeová! Tanba . . . povu neʼe prontu atu sai nuʼudar voluntáriu hodi bá funu.” (Juíz 5:1, 2) Hanesan neʼe mós ohin loron, se ita mak fó ita-nia an hodi serbí Jeová, neʼe sei fó laran-manas ba ema seluk atu “hahiʼi Jeová!” w17.04 p. 32 par. 17-18

Maski José hasoru terus husi hahalok la justisa ba tinan 13, maibé nia nafatin hanoin tuir Jeová nia hanoin. (Gên 45:5-8) Nia nunka fó-sala ba Jeová kona-ba ninia situasaun. Maski nia la bele haluha hahalok la justisa neʼebé nia hasoru, maibé nia la rai odi. Buat neʼebé importante liu hotu mak nia nunka husik ema seluk nia hahalok la perfeitu haketak nia husi Jeová. José hatudu laran-metin ba Jeová no ikusmai nia haree Jeová hadiʼa duni ninia situasaun neʼebé la justisa no Jeová fó bensaun ba nia no ninia família. Ita mós tenke hafolin no kaer metin ita-nia relasaun diʼak ho Jeová. Ita la bele husik irmaun-irmán sira-nia hahalok la perfeitu haketak ita husi Maromak neʼebé ita hadomi no adora. (Rom 8:38, 39) Neʼe duni, se ita mak hasoru situasaun la justisa ruma iha kongregasaun, diʼak atu banati-tuir José hodi hakbesik liután ba Jeová. Hakaʼas an atu hanoin tuir Jeová nia hanoin. Se ita mak hakaʼas an ona hodi uza Bíblia nia prinsípiu atu rezolve problema ruma, entrega problema neʼe ba Jeová nia liman. Ita bele fiar katak Jeová sei hadiʼa situasaun neʼe tuir ninia tempu no dalan neʼebé loos. w17.04 p. 20 par. 12; p. 22 par. 15-16

Ana halo tuir ninia promesa neʼe. Nia lori Samuel ba Amlulik Boot Eli iha tabernákulu iha Silo hodi hatete: “Uluk haʼu halo orasaun kona-ba labarik-mane neʼe, no Jeová fó mai haʼu buat neʼebé haʼu husu ona ba nia. Entaun agora, haʼu entrega nia ba Jeová. Haʼu entrega ona labarik-mane neʼe ba Jeová durante ninia moris tomak.” (1 Sam 1:24-28) Husi loron neʼe ba oin, Samuel hela iha tabernákulu. Bíblia hatete katak “labarik Samuel kontinua sai boot iha Jeová nia oin”. (1 Sam 2:21) Ita bele fiar katak la fasil ba Ana atu kumpre ninia promesa. Nia hadomi tebes Samuel maibé agora nia la bele hamutuk ho nia oan loroloron. Nia la bele ona halimar ho nia, hakoʼak nia no haree nia sai boot. Maibé ba Ana, juramentu neʼebé nia halo mak buat neʼebé sériu duni. Atu kumpre ninia promesa ba Maromak, nia prontu atu halo sakrifísiu boot neʼe.—1 Sam 2:1, 2; Sal 61:1, 5, 8. w17.04 p. 5 par. 7-8

Apóstolu Paulo dehan katak “iha loron ikus sira sei mosu problema barak neʼebé susar atu tahan”. No nia hatutan hodi dehan: “Ema aat no bosok-teen sira sei laʼo husi aat ba aat liután.” (2 Tim 3:2-5, 13) Ita mós konkorda ho liafuan sira-neʼe ka lae? Ita barak mak sai ona vítima ba ema aat sira neʼebé uza violénsia hodi halo taʼuk ita, kriminozu sira no ema neʼebé halo diskriminasaun. Ema balu la subar atu halo hahalok aat sira-neʼe. Balu tan finje deʼit atu ajuda ema, maibé iha laran sira iha hanoin neʼebé aat. Maski ita balun seidauk sai vítima ba hahalok krime sira-neʼe, maibé bainhira ita rona kona-ba ema uza dalan aat hodi trata labarik, ema idade, ka ema sira neʼebé la iha kbiit atu defende an, neʼe halo ita sente triste tebes, loos ka lae? Ema aat sira hatudu duni hahalok hanesan animál ka anju aat sira-nian. (Tgo 3:15) Maibé liafuan diʼak mak Bíblia fó esperansa furak ba ita. w17.04 p. 10 par. 4