Novembru

Se ita mak dixiplina an, ita bele kontrola ita-nia hahalok no dalan neʼebé ita hanoin. Ita la moris mai iha ona dixiplina an, ita tenke aprende hahalok neʼe. Bainhira inan-aman hatudu pasiénsia hodi fó treinu beibeik ba oan liuhusi “dixiplina no matadalan neʼebé tuir Jeová nia hakarak”, oan mós bele aprende oinsá atu haburas hahalok dixiplina an no matenek. (Éf 6:4) Hanesan neʼe mós kona-ba ema boot sira neʼebé foin aprende kona-ba Jeová. Maski sira hatene ona uitoan kona-ba dixiplina an, maibé sira seidauk maduru iha lia-loos. Tan neʼe, bainhira sira komesa “tau hahalok foun” no hakaʼas an atu sai hanesan Kristu, sira sei sai maduru liután. (Éf 4:23, 24) Dixiplina an ajuda ita atu halo nuneʼe. w18.03 p. 29 par. 3-4

Jeová no ninia organizasaun konvida ita hodi tuir reuniaun sira. Ita hakarak ema hotu sente katak ita simu sira, liuliu ema foun. (Rom 15:7) Ita la bele haree deʼit ba ema nia jeitu ka hatais, tanba sira mós Jeová nia bainaka, tan neʼe ita presiza simu sira ho diʼak. (Tgo 2:1-4) Se ita haree ema ida mai no tuur mesak, karik bele konvida nia tuur hamutuk ho Ita, loos ka lae? Nia sei agradese tebes se Ita esplika ba nia kona-ba reuniaun ka ajuda nia loke eskritura sira. Neʼe mak dalan neʼebé diʼak tebes hodi “haburas toman atu hatudu laran-diʼak”. Dala ruma katuas área, reprezentante husi sukursál, ka irmaun sira mai husi kongregasaun seluk atu hatoʼo diskursu iha ita-nia kongregasaun. Ita bele uza oportunidade ida-neʼe hodi hatudu laran-diʼak ba irmaun sira-neʼe. (3 João 5-8) Dalan ida atu bele halo nuneʼe mak konvida sira ba ita-nia uma hodi han hamutuk. w18.03 p. 15 par. 5, 7

Hanoin to’ok ezemplu ida kona-ba ema judeu ida naran Saul. Maski ema judeu nuʼudar nasaun tomak moris mai dedika an ona ba Jeová, maibé Jeová la simu ona sira tanba la halo tuir nia. Saul fiar an katak ema judeu sira adora nafatin Maromak iha dalan neʼebé loos, tan neʼe nia fó terus ba ema kristaun. Maibé loron ida, Jesus neʼebé hetan ona moris-hiʼas, ida-neʼebé Saul hanoin katak sei mate hela, koʼalia rasik husi lalehan ba Saul. Saul halo saida? Nia simu kedas ajuda husi Kristu nia dixípulu ida naran Ananias. Bíblia dehan: “Tuirmai nia hamriik no hetan batizmu.” (Após 9:17, 18; Gal 1:14) Ikusmai ema hotu koñese nia mak naran apóstolu Paulo. Husi neʼe ita bele haree katak, bainhira Saul komprende ona katak Maromak mak uza daudaun Jesus hodi kumpre ninia hakarak sira, Saul hetan kedas batizmu. (Após 22:12-16) Ohin loron mós hanesan kona-ba estudante Bíblia sira, maski joven ka idade. w18.03 p. 5-6 par. 9-11

Jacob nia moris hasoru susar barak. Porezemplu, ninia maun rasik Esaú hakarak oho nia. Ninia banin-mane lohi beibeik nia. Maski nuneʼe, Jacob fiar metin nafatin kona-ba promesa neʼebé Jeová halo ba Abraão. Jacob hatene katak Jeová sei uza ninia família atu kumpre Jeová nia planu furak sira, tan neʼe Jacob tau matan didiʼak ba ninia família. (Gên 28:10-15) Jacob nunka husik ema seluk nia hanoin no hahalok tuir isin nian hodi halo nia haluha kona-ba Jeová nia promesa sira. (1 Kor 2:14-16) Porezemplu, bainhira Jacob sente perigu husi Esaú nia ameasa, nia husu makaʼas ba Jeová atu salva nia no nia halo orasaun hodi dehan: “Ita rasik dehan: ‘Haʼu sei haraik duni buat diʼak ba ó, no haʼu sei halo ó-nia bei-oan sai barak hanesan rai-henek iha tasi.’” (Gên 32:6-12) Jacob iha fiar neʼebé metin ba Jeová nia promesa sira no nia hatudu fiar neʼe liuhusi dalan neʼebé nia halaʼo ninia moris. w18.02 p. 20 par. 9-10

Job hasoru mudansa boot iha ninia moris. Foufoun nia mak “ema neʼebé naran-boot liu fali ema hotu iha rai-Leste”. (Job 1:3) Nia riku tebes, ema barak koñese nia no respeitu nia. (Job 29:7-16) Maski nuneʼe, Job nunka hanoin katak nia mak diʼak liu ema seluk ka nia la presiza Maromak. Ita hatene kona-ba neʼe tanba Jeová bolu nia nuʼudar “haʼu-nia atan”. Satanás ataka Job fila-fila no halo Job hanoin katak ataka sira-neʼe mai husi Maromak. (Job 1:13-21) Tuirmai Job nia belun falsu naʼin-tolu mai no koʼalia buat neʼebé hakanek tebes Job nia laran. Sira dehan ba Job katak nia merese tanba nia ema aat no tan neʼe Maromak fó kastigu ba nia. (Job 2:11; 22:1, 5-10) Maski nuneʼe, Job hatudu nafatin laran-metin ba Jeová. Bainhira situasaun susar neʼe liu tiha, Jeová fó fali buat hotu dala rua ba Job no mós fó nia moris tan ba tinan 140. (Tgo 5:11) Durante tempu sira-neʼe, Job kontinua serbí Jeová ho laran tomak. w18.02 p. 6 par. 16; p. 7 par. 18

Ema neʼebé iha hahalok sira-neʼe baibain hanoin katak sira diʼak liu ema seluk. Sira-nia hakarak mak atu ema gaba sira. Matenek-naʼin ida hatete katak ema hanesan neʼe, iha ninia laran nia sente hanesan maromak ida no nia adora ninia an. Ema balu hatete katak, foti-an mak hahalok aat tebes toʼo ema sira neʼebé foti an mós la gosta haree ema seluk hatudu hahalok neʼe. Jeová odi hahalok foti-an. No Bíblia hatete katak nia hakribi “matan neʼebé foti an”. (Prov 6:16, 17) Hahalok foti-an haketak ema husi Maromak. (Sal 10:4) Foti-an mak hahalok neʼebé mai husi Diabu. (1 Tim 3:6) Triste mak Jeová nia atan balu neʼebé fiar-metin ba nia mós monu ona ba hahalok foti-an. Porezemplu, Liurai Uzias husi Judá hatudu laran-metin ba tinan barak ona. Maibé Bíblia hatete katak: “Bainhira nia forte ona, nia sai foti an kedas no neʼe lori susar ba nia. Nia la hatudu laran-metin ba Jeová, ninia Maromak.” Nia tama ba Jeová nia templu no sunu insensu, knaar neʼebé nia la iha direitu atu halo. Ezemplu ida tan mak kona-ba Liurai Ezekias neʼebé laran-metin ba Jeová, ba tempu uitoan nia mós monu ba hahalok foti-an.—2 Crôn 26:16; 32:25, 26. w18.01 p. 28 par. 4-5

Ita haree husi Bíblia katak Jeová nia povu fó kontribuisaun hodi apoia ninia serbisu. Dala ruma sira fó kontribuisaun hodi ajuda projetu espesiál balu. (Êx 35:5; 2 Reis 12:4, 5; 1 Crôn 29:5-9) Iha apóstolu sira-nia tempu, irmaun-irmán sira rona katak rai-hamlaha akontese iha Judeia no irmaun-irmán sira iha fatin neʼe presiza ajuda. Tan neʼe irmaun-irmán “deside katak sira ida-idak sei fó ajuda tuir sira-nia kbiit, no haruka neʼe ba maun-alin sira neʼebé hela iha Judeia”. (Após 11:27-30) Kontribuisaun iha tempu uluk mai husi buat oioin. Iha apóstolu sira-nia tempu, ema kristaun balu faʼan sasán neʼebé sira iha, hanesan toʼos ka uma, no lori osan neʼebé sira hetan ba apóstolu sira. Depois apóstolu sira uza fali osan sira-neʼe hodi fó ajuda ba irmaun-irmán sira neʼebé presiza ajuda. (Após 4:34, 35) Ema kristaun balu tau ketak osan hodi sira bele fó beibeik kontribuisaun atu apoia Jeová nia serbisu. Tan neʼe, ema hotu, maski kiak ka riku, bele fó buat ruma nuʼudar kontribuisaun.—Lc 21:1-4. w18.01 p. 18 par. 7; p. 19 par. 9

Diʼak atu rekoñese katak, maski ita iha matenek oioin, maibé ita iha limitadu atu bele halo buat hotu ho ita-nia forsa rasik. Apóstolu Paulo mós iha matenek atu halo buat barak, maibé ninia kbiit latoʼo atu kumpre buat hotu neʼebé nia hakarak atu halo. Bainhira nia fó sai ninia sentimentu ba Jeová, Jeová hatete ba nia: “Haʼu-nia kbiit sai kompletu iha ó-nia fraku.” Paulo komprende buat neʼebé Jeová hatete ba nia. Tan neʼe nia dehan: “Kuandu haʼu fraku, haʼu iha kbiit.” (2 Kor 12:7-10) Paulo nia liafuan katak sá? Paulo hatene duni katak nia iha limitadu kona-ba ninia kbiit rasik no nia presiza ajuda husi Maromak. Espíritu santu mak bele fó forsa ba nia iha tempu neʼebé nia sente fraku no atu kumpre knaar neʼebé nia la bele halo ho ninia kbiit rasik. Ohin loron mós hanesan. Se Jeová fó espíritu santu ba ita, ita sei sai forsa tebes! w18.01 p. 9 par. 8-9

Kuandu Ita-nia oan husu atu hetan batizmu, lee no estuda buat sira neʼebé Jeová nia organizasaun halo ba inan-aman. Tuirmai, buka tempu neʼebé diʼak no koʼalia didiʼak ba Ita-nia oan katak, nia rasik nia desizaun hodi dedika an ba Jeová no hetan batizmu mak buat neʼebé sériu tebes, maibé nia sei hetan bensaun barak. Nuʼudar inan-aman, Ita iha priviléjiu no responsabilidade neʼebé importante atu haboot oan ho “dixiplina no matadalan neʼebé tuir Jeová nia hakarak”. (Éf 6:4) Ita tenke hanorin oan kona-ba saida mak Bíblia hatete no ajuda oan atu tau fiar ba buat neʼebé sira aprende. Bainhira sira sai metin iha fiar, neʼe sei book sira atu dedika an ba Jeová no serbí nia ho laran tomak. Sin, liuhusi Jeová nia Liafuan, ninia espíritu santu, no Ita-nia hakaʼas-an, Ita bele ajuda Ita-nia oan atu sai matenek “hodi hetan salvasaun”. w17.12 p. 22 par. 17, 19

Daniel besik tinan 100 no besik ona atu mate, karik nia hanoin kona-ba saida mak sei akontese ba nia. Daniel sei hetan moris-hiʼas fali ka lae? Sin. Iha livru Daniel, Maromak promete ba nia: “Kona-ba ó, tahan bá toʼo rohan. Ó sei deskansa.” Daniel neʼebé idade ona hatene katak ema neʼebé mate hanesan deskansa no sira “la iha serbisu ka planu ka koñesimentu ka matenek iha rate”, fatin neʼebé lakleur nia mós atu bá. (Ecle 9:10) Maibé neʼe la dehan katak Daniel nia moris ramata ona. Jeová fó esperansa furak ida ba nia kona-ba futuru. Jeová nia anju hatete ba profeta Daniel liafuan ne’ebé temi iha eskritura ba ohin. Daniel la hatene bainhira loos mak ida-neʼe sei akontese ba nia. Nia hatene deʼit katak nia sei mate no deskansa. Maibé bainhira Daniel rona liafuan kona-ba, “Ó sei hamriik atu simu ó-nia parte”, nia komprende katak nia sei hetan moris-hiʼas iha futuru. No Daniel tenke hein ba tempu neʼebé kleur tebes mak nia foin bele hetan moris-hiʼas, neʼe mak “iha loron sira-neʼe nia rohan”. w17.12 p. 7 par. 17-18

Jeová fó mandamentu ba ema Izraél nia katuas sira atu halo tuir ninia justisa. Primeiru, katuas sira tenkesér buka-hatene uluk kona-ba faktu hotu. Tuirmai, sira tenke haree didiʼak ema neʼe nia motivu hodi oho ema seluk, ninia atitude, no hahalok sira husi tempu uluk, atu deside bele hatudu laran-sadiʼa ba nia ka lae. Katuas sira tenke buka-hatene ema neʼe rai odi ba vítima mak hodi oho nia ka lae. (Núm 35:20-24) Se iha sasin balu, tenkesér iha sasin naʼin-rua hodi bele deside kona-ba ema neʼe. Bainhira katuas sira buka-hatene ona kona-ba saida mak akontese, tuirmai sira tenke haree kona-ba ema neʼe rasik, laʼós deʼit kona-ba buat neʼebé nia halo. Katuas sira presiza kbiit atu komprende hodi la haree deʼit kona-ba buat neʼebé akontese, maibé haree mós tanbasá mak ida-neʼe akontese. Importante liu mak sira presiza Jeová nia espíritu santu atu ajuda sira banati-tuir ninia laran-sadiʼa, justisa no kbiit atu komprende.—Êx 34:6, 7. w17.11 p. 16 par. 13-14

Bainhira ita foin estuda Bíblia, ita aprende lia-loos furak oioin. Bainhira ita foin estuda, ita aprende katak Jeová mak ita-nia Kriadór no nia iha planu ida ba ema, no katak nia haruka ninia Oan-Mane mai iha rai hodi mate ba ita atu kasu ita husi sala no mate. Ita mós aprende katak Maromak nia Ukun sei halakon susar no terus hodi ita bele moris ba nafatin iha rai ho dame no haksolok. (João 3:16; Apok 4:11; 21:3, 4) Dala ruma esplikasaun kona-ba profesia sira husi Bíblia ka eskritura ruma neʼebé uluk ita aprende hetan mudansa atu sai klaru liután. Bainhira neʼe akontese, diʼak atu uza tempu hodi estuda no medita didiʼak kona-ba mudansa sira-neʼe. (Após 17:11) Ita-nia hakarak laʼós atu hatene deʼit kona-ba saida mak la hanesan entre esplikasaun foun ho esplikasaun tuan, maibé ita mós presiza fó atensaun didiʼak ba informasaun hotu kona-ba esplikasaun foun neʼe. Estuda iha dalan hanesan neʼe sei ajuda ita atu halibur lia-loos seluk tan husi Bíblia. w17.06 p. 12-13 par. 15-16

Ita presiza kuidadu tebes liuliu iha situasaun neʼebé bele halo ita kontra Jeová nia morál sira. Porezemplu, diʼak ba ema neʼebé namora atu halo lei ba sira-nia an husi tempu neʼebé sira hahú namora, kona-ba kaer, reʼi malu, no mesamesak. (Prov 22:3) Situasaun perigu seluk tan mak bainhira ema ida dook husi uma ba tempu kleur hodi halo serbisu ruma ka bainhira feto ho mane ida serbisu hamutuk. (Prov 2:10-12, 16) Ita mós presiza kuidadu iha tempu neʼebé ita sente triste ka sente mesamesak. No dala ruma ita bele sai triste tebes toʼo ita simu ema naran deʼit atu fó konsola ita. Neʼe perigu tebes. Se ita mak iha situasaun hanesan neʼe, buka ajuda husi Jeová no husi ita-nia irmaun ka irmán sira.—Sal 34:18; Prov 13:20. w17.11 p. 26 par. 4-5

Ba Jeová, bainhira ema oho ema seluk ho neon, neʼe mak buat neʼebé sériu tebes. Se ema Izraél ida mak oho ema ho neon, vítima nia família mane neʼebé besik sei oho fali ema neʼe. (Núm 35:19) Hodi nuneʼe, ema neʼe selu fali nia rasik nia moris ba vítima neʼebé la halo sala. Se sira la oho kedas ema neʼebé oho ema seluk, neʼe sei hafoʼer rai neʼebé Jeová promete, ka halo rai neʼe la santu ona. Jeová fó mandamentu ba sira: “Imi labele hafoʼer rai neʼe neʼebé imi hela bá, tanba [fakar ema nia] raan mak hafoʼer rai neʼe.” (Núm 35:33, 34) Maibé oinsá ho ema Izraél neʼebé oho ema la ho neon? Maski asidente mak halo ema ida mate, maibé ema neʼe sala nafatin tanba oho ona ema neʼebé la halo sala. (Gên 9:5) Iha situasaun hanesan neʼe, Jeová dehan katak bele hatudu laran-sadiʼa ba ema neʼe. Nia bele halai husi vítima nia família no bá hela iha sidade protesaun nian. Maibé nia tenke hela iha sidade protesaun toʼo amlulik boot mate atu nia bele hetan protesaun.—Núm 35:15, 28. w17.11 p. 9 par. 3-5

Irmán ida husi Austrália halo nuneʼe. Nia banin-mane neʼebé hela ketak kontra makaʼas lia-loos toʼo dala ruma sai hirus tebes. Entaun antes atu telefone nia, irmán ho ninia laʼen sempre husu Jeová ajuda sira atu la hatán iha dalan neʼebé hirus. No sira mós sempre hanoin uluk kona-ba tempu hira mak sira hakarak gasta atu koʼalia ho nia hodi sira-nia koʼalia la tama ba relijiaun no hamosu diskute malu. Se diskute malu akontese, karik Ita bele fó sala ba Ita-nia an liuliu se Ita hadomi sira no lakohi halo sira hirus. Tan ne’e Ita-nia laran-metin ba Jeová tenkesér makaʼas liu fali Ita-nia domin ba família. Se Ita-nia família mak hatene kona-ba neʼe, karik sira sei komprende katak serbí Jeová importante duni ba Ita. Ita la bele obriga ema atu simu lia-loos. Maibé Ita bele ajuda sira hodi haree katak moris tuir Jeová nia dalan lori duni rezultadu neʼebé diʼak ba Ita-nia moris. No tuir loloos, Jeová mós fó oportunidade ba sira atu hili hodi serbí nia, hanesan nia fó ba ita.—Isa 48:17, 18. w17.10 p. 15 par. 15-16

Temi deʼit ho liafuan katak “Haʼu hadomi ó” seidauk toʼo. Ita tenke hatudu mós ho hahalok. Porezemplu, se irmaun ka irmán ruma falta hahán ka roupa atu hatais, latoʼo atu koʼalia deʼit liafuan kmaan ba sira. (Tgo 2:15, 16) Hanesan neʼe mós kona-ba haklaken, tanba ita hadomi Jeová no ita-nia maluk, latoʼo atu halo deʼit orasaun hodi husu Maromak haruka ema barak liután atu haklaken ho ita, maibé ita rasik tenke hakaʼas an hodi haklaken ho badinas. (Mt 9:38) Apóstolu João hatete katak ita tenke hadomi ho “hahalok no lia-loos”. Tan neʼe, ita tenke hatudu domin ho “laran-moos” ka “domin neʼebé la laran-makerek”. (Rom 12:9; 2 Kor 6:6) Dala ruma ema bele finje hatudu domin. Maibé domin hanesan neʼe, loos no mai husi laran ka lae? Ninia motivu mak saida? Tuir loloos domin neʼebé laran-makerek la bele bolu nuʼudar domin, tanba domin hanesan neʼe falsu no la folin buat ida. w17.10 p. 8 par. 5-6

Ita presiza lee beibeik Bíblia hodi Maromak nia Liafuan bele ajuda ita. Ita tenke hakaʼas an atu lee loroloron. Ita-nia moris preokupa tebes, maibé ita la bele husik buat ida, inklui mós ita-nia responsabilidade seluk atu hanetik ita hodi lee Bíblia. (Éf 5:15, 16) Karik ita bele buka tempu iha dadeer-saan, loron, ka kalan. Ita konkorda duni ho ema neʼebé hakerek salmu, nia dehan: “Oh haʼu hadomi tebes Ita-nia ukun-fuan! Haʼu hanoin kleʼan kona-ba neʼe loron tomak.” (Sal 119:97) Maibé lee deʼit Bíblia latoʼo. Ita presiza hanoin kleʼan kona-ba buat neʼebé ita lee. (Sal 1:1-3) Hodi halo nuneʼe mak ita bele hatene oinsá atu uza Bíblia nia matadalan iha ita-nia moris. Tan neʼe, maski ita lee eskritura sira liuhusi sasán eletróniku ka husi Bíblia, ita-nia objetivu mak atu husik Maromak nia Liafuan book ita atu halo mudansa ruma. w17.09 p. 24 par. 4-5

Laʼós iha situasaun hotu ita tenkesér hatudu laran-sadiʼa no laran-diʼak. Porezemplu, Liurai Saul la oho Agag, liurai husi ema Ámalek sira neʼebé odi Maromak nia povu, karik tanba nia hanoin katak nia hatudu hahalok laran-sadiʼa no laran-diʼak ba liurai neʼe. Maibé Jeová hatete ona ba nia katak nia tenkesér oho hotu ema Ámalek. Tanba Saul la halo tuir Jeová, Jeová lakohi tan nia atu sai liurai. (1 Sam 15:3, 9, 15) Jeová mak Juis neʼebé hatudu laran-loos. Nia bele haree ema nia laran, no nia hatene tanbasá mak la presiza hatudu laran-sadiʼa no laran-diʼak iha situasaun ruma. (Lam 2:17; Eze 5:11) Lakleur tan Jeová sei halaʼo tesi-lia ba ema hotu neʼebé lakohi halo tuir nia. (2 Tes 1:6-10) Iha tempu neʼebá Jeová sei la hatudu tan laran-sadiʼa no laran-diʼak ba ema aat sira. Maibé nia sei halakon sira atu hatudu katak nia laran-sadiʼa no laran-diʼak ba ema laran-loos hodi salva sira. Ita hatene katak, ita la iha direitu atu tesi-lia ba sé mak sei moris ka mate. Ita-nia knaar mak atu hakaʼas an agora hodi ajuda ema seluk. w17.09 p. 11 par. 10-12

Kontrola an mak hahalok neʼebé mai husi Maromak. Maromak Jeová bele hatudu hahalok neʼe iha dalan neʼebé perfeitu, maibé ita la iha kbiit atu halo nuneʼe tanba ita la perfeitu. Sin, problema barak neʼebé mosu ohin loron mai husi ema nia hahalok la kontrola an. Hahalok la kontrola an bele halo ema demora atu halo buat neʼebé importante ka la fó atensaun ba serbisu ka eskola. No tanba hahalok la kontrola an mak halo ema hasai liafuan aat, hemu-lanu, halo violénsia, soe-malu, debe osan, haburas toman aat, tama komarka, trauma, hetan moras husi sala-foʼer, no sai isin-rua la ho hakarak. (Sal 34:11-14) Ita bele haree katak, nuʼudar tempu liu daudauk, hahalok la kontrola an sai aat liután. Ita la hakfodak kona-ba neʼe tanba Maromak nia Liafuan fó-hatene nanis ona katak, hahalok “la kontrola an” mós sinál ida neʼebé hatudu katak ita hela daudauk “iha loron ikus sira”.—2 Tim 3:1-3. w17.09 p. 3 par. 1-2

Bainhira ita iha “Maromak nia dame”, ita la presiza hanoin barak tan, ita-nia laran no neon bele sai hakmatek. Ita hatene katak Jeová hanoin ita no nia hakarak ita atu manán hasoru susar sira. (1 Ped 5:10) Hodi hatene kona-ba neʼe bele proteje ita atu la sai laran-taridu ka laran-tun. Lakleur tan ema hotu sei hasoru terus neʼebé boot tebes. (Mt 24:21, 22) Ita seidauk hatene saida mak sei akontese ba ita iha tempu neʼebá. Maibé ita la presiza hanoin barak demais kona-ba tempu neʼe. Maski ita la hatene buat hotu neʼebé Jeová sei halo, maibé ita hatene didiʼak kona-ba nia. Ita hatene saida mak nia halo ona ba ninia atan sira neʼebé laran-metin iha tempu uluk. Ita hatene katak maski buat naran deʼit neʼebé akontese, maibé la iha buat ida mak bele hanetik Jeová atu kumpre ninia hakarak. No karik nia sei halo buat ruma iha dalan neʼebé ita nunka hanoin! Tan neʼe, buat naran deʼit neʼebé Jeová halo ba ita ohin loron, ita bele sente “Maromak nia dame neʼebé aas liu ema nia hanoin hotu”. w17.08 p. 12 par. 16-17

“Toʼo bainhira?” Neʼe mak pergunta neʼebé profeta Isaías no Habacuc husu. (Isa 6:11; Hab 1:2) No bainhira ema sira neʼebé fiar-laek hobur Jesus Kristu, nia husu: “Tempu hira tan?” (Mt 17:17) Ohin loron, karik ita mós husu pergunta hanesan neʼe. Karik tanba hasoru situasaun la justisa ruma. Ka tanba ita moras ka idade aumenta. Ka karik estrese neʼebé ita hasoru tanba moris ho “problema barak neʼebé susar atu tahan”. (2 Tim 3:1) Ka karik tanba ema nia hahalok ladiʼak neʼebé halo ita sente kole no laran-tun. Maski iha razaun oioin neʼebé book ita atu husu pergunta neʼe, maibé diʼak atu hatene katak Jeová la hirus bainhira ninia atan sira husu pergunta hanesan neʼe. Saida mak bele ajuda ita bainhira ita hasoru situasaun neʼebé susar atu tahan? Dixípulu Tiago hatán ho liafuan iha eskritura ba ohin. w17.08 p. 3 par. 1-3

Jesus hakarak ninia dixípulu sira atu habelun Jeová no Jesus. Dalan ida atu hatudu laran-metin liuhusi sasán neʼebé ita iha mak hodi fó kontribuisaun ba serbisu haklaken iha mundu tomak neʼebé Jesus fó-hatene nanis. (Mt 24:14) Labarik-feto ida husi Índia rai beibeik osan iha kofre. Nia lakohi uza osan neʼe atu hola brinkedu. Bainhira nia rai osan sira-neʼe toʼo nakonu, nia fó hotu osan neʼe atu uza ba serbisu haklaken. Ezemplu ida tan mak kona-ba irmaun ida husi Índia neʼebé kuda nuu. Nia fó nuu fuan balu ba eskritóriu tradusaun Malayalam. Tanba nia hanoin se eskritóriu presiza hola beibeik nuu, diʼak liu fó kontribuisaun nuu ba irmaun sira duké fó osan. Neʼe “hatudu matenek” duni! Hanesan neʼe mós ho irmaun sira iha rai-Grésia, sira fó beibeik kontribuisaun mina azeite, keiju, no ai-han seluk tan ba família Betel. w17.07 p. 8 par. 7-8

Nuʼudar dadur iha Babilónia, ema judeu sira la iha vontade atu kanta. Sira presiza atu hetan fali kmaan. Maibé Jeová fó duni ajuda ba sira hanesan ninia Liafuan fó-hatene nanis ona. Oinsá? Bainhira Liurai Ciro husi rai-Pérsia manán tiha sidade Babilónia, nia hatete katak: “Nia [Jeová] haruka haʼu atu harii uma ida ba nia iha Jeruzalein.” Ciro mós hatete ba ema Izraél sira: “Imi hotu neʼebé nuʼudar ninia povu, haʼu hein katak Jeová imi-nia Maromak sei hamutuk ho imi, no imi tenke saʼe bá Jeruzalein.” (2 Crôn 36:23) Liafuan sira-neʼe fó kmaan tebes ba ema Izraél neʼebé iha hela Babilónia! Jeová fó kmaan ba nasaun Izraél no mós ba ema Izraél ida-idak. Ohin loron, Jeová mós fó kmaan ba ita iha dalan neʼebé hanesan. Maromak “kura ema neʼebé laran-kanek; nia falun sira-nia kanek”. (Sal 147:3) Bainhira ita moras ka laran-tun, ita bele fiar katak Jeová sei tau matan ba ita. Nia hakarak tebes atu fó kmaan no kura ita-nia laran-kanek. (Sal 34:18; Isa 57:15) Nia fó matenek no forsa ba ita atu ita bele tahan hasoru problema naran deʼit.—Tgo 1:5. w17.07 p. 18 par. 4-5

Jeová mak riku liu hotu, buat hotu iha lalehan no rai mak ninian. (1 Crôn 29:11, 12) Maski nuneʼe, Jeová la karak, nia hatudu laran-diʼak tebes ba kriatura hotu. Ita agradese tebes tanba Jeová fahe rikusoin barak ho ita! Rikusoin sira-neʼe mak hanesan saida? Neʼe mak hanesan (1) Maromak nia Ukun, (2) serbisu haklaken, no (3) lia-loos neʼebé mai husi ninia Liafuan. Maibé se ita la kuidadu, neineik-neineik ita bele haluha katak rikusoin sira-neʼe iha folin boot tebes. Tan neʼe ita presiza fó-hanoin beibeik ba ita-nia an atu hafolin no hadomi liután buat sira-neʼe. Ita barak halo ona mudansa oioin ba ita-nia moris tan deʼit atu sai sidadaun ba Maromak nia Ukun. (Rom 12:2) Maski nuneʼe, presiza luta nafatin. Atu hametin ita-nia domin ba Maromak nia Ukun, ita tenke kuidadu atu la husik buat hanesan sasán ka hakarak aat seksuál nian halo fraku ita-nia domin.—Prov 4:23; Mt 5:27-29. w17.06 p. 9 par. 1; p. 10 par. 7

Jeová la esplika ba Job tanbasá mak nia hetan terus, maibé ajuda deʼit nia atu komprende katak nia kiʼik tebes se kompara ho Maromak. Jeová hanorin Job katak iha buat ida mak importante liu fali Job nia problema sira. (Job 38:18-20) Jeová nia liafuan sira ajuda Job hodi hadiʼa ninia hanoin. Jeová la iha sentimentu ka lae hodi fó konsellu ba Job maski Job hasoru ona terus oioin? Lae, Job rasik mós la sente nuneʼe. Job komprende no hafolin Jeová nia konsellu. Nia dehan: “Haʼu dada fali haʼu-nia liafuan, no haʼu arrepende an hodi tuur iha rai-rahun no ahi-kadesan laran.” (Job 42:1-6) Bainhira Job rona ba Jeová nia konsellu no hadiʼa ninia hanoin, Jeová fó-hatene ba ema seluk katak nia kontente tebes ho Job nia laran-metin.—Job 42:7, 8. w17.06 p. 25 par. 11-12

Oinsá mak ita bele hatene katak ita iha hanoin neʼebé loos kona-ba serbisu? Husu ba ita-nia an: ‘Haʼu sente laran-manas no kontente kona-ba serbisu manán osan maibé sente ladún hafolin ka sente baruk kona-ba serbí Jeová ka lae?’ Hanoin didiʼak kona-ba pergunta hanesan neʼe bele ajuda ita haree fali saida mak ita gosta liu atu halo. Jesus hanorin ita kona-ba saida mak tenkesér importante liu iha ita-nia moris. Loron ida, nia bá vizita biin-alin naʼin-rua, Maria no Marta. Marta prepara kedas hahán ba Jesus, maibé Maria tuur besik Jesus hodi rona ba Jesus nia hanorin. Tan neʼe, Marta ibun-ibun tansá Maria la ajuda nia. Jesus hatete ba Marta liafuan sira neʼebé temi iha eskritura ba ohin. (Lc 10:38-42) Husi neʼe ita bele aprende lisaun importante ida husi Jesus. Se ita lakohi husik serbisu ruma atu hanetik ita hodi hatudu domin ba Kristu, ita tenkesér “hili buat neʼebé diʼak”. Neʼe katak ita sei tau uluk ita-nia relasaun ho Jeová iha ita-nia moris. w17.05 p. 24 par. 9-10

Jeová fó responsabilidade ba inan-aman mak atu hanorin lia-loos ba sira-nia oan. Nia la fó responsabilidade neʼe ba avó ka ema seluk. (Prov 31:10, 27, 28) Ba inan-aman sira neʼebé la hatene koʼalia língua husi rai neʼebé sira hela, karik sira presiza ajuda husi ema seluk atu oan sira bele laʼo ba oin iha lia-loos. Bainhira husu ajuda, laʼós katak sira koko atu fó fali sira-nia responsabilidade ba ema seluk mak atu haboot sira-nia oan. Maibé inan-aman bele aproveita ajuda sira-neʼe atu “fó dixiplina no matadalan neʼebé tuir Jeová nia hakarak” hodi haboot sira-nia oan. (Éf 6:4) Porezemplu, karik inan-aman bele husu sujestaun ba katuas kongregasaun sira kona-ba oinsá atu halaʼo adorasaun família no oinsá atu buka belun neʼebé diʼak ba sira-nia oan. Karik dala ruma inan-aman bele konvida família seluk atu tuir sira-nia adorasaun família nian hodi ajuda sira-nia oan. No mós, joven sira bele aprende husi ema seluk bainhira sira haklaken ka halo buat balu hamutuk ho irmaun-irmán sira.—Prov 27:17. w17.05 p. 11-12 par. 17-18

Bainhira Jeová nia anju fó avizu ba José katak Liurai Herodes hakarak oho Jesus, nia lori Maria no Jesus halai ba rai-Ejitu no hela iha neʼebá nuʼudar refujiadu toʼo Herodes mate. (Mt 2:14, 19-21) Iha tempu ida, tanba ema fó terus, Jesus nia dixípulu sira presiza halai “namkari ba área Judeia no Samaria nian”. (Após 8:1) Jesus hatene katak iha futuru ninia dixípulu sira sei halai husi uma, tan neʼe nia dehan ba sira: “Kuandu ema fó-terus ba imi iha sidade ida, halai ba sidade seluk.” (Mt 10:23) Ohin loron ida ne’e mós akontese ba Testemuña ba Jeová rihun ba rihun. Barak mak lakon ona sira-nia família no lakon sasán hotu. Ema sira neʼebé halai ka moris iha kampu refujiadu, sira hasoru perigu oioin. Maski ema lanu, joga, naʼok, no moris ho hahalok la morál, maibé Testemuña sira sempre fó-hanoin ba sira-nia an katak loron ida sira sei sai husi kampu refujiadu, hanesan ema Izraél sira sai husi rai-fuik maran. Fó hanoin beibeik ba sira-nia an hanesan neʼe ajuda sira atu iha hanoin neʼebé pozitivu.—2 Kor 4:18. w17.05 p. 3-4 par. 2-5

Tanba ita moris daudaun iha mundu aat neʼe, ita hatene katak ita sei hasoru situasaun la justisa balu. Karik loron ida, Ita ka ema seluk neʼebé Ita koñese sei hasoru situasaun ruma neʼebé haree hanesan la justisa iha kongregasaun. Keta husik buat hanesan neʼe halo Ita sidi. Ita hakarak laran-metin nafatin ba Jeová, halo orasaun husu ninia ajuda, no sadere ba nia. Hanoin-hetan katak, tanba la perfeitu, karik ita bele komprende sala kona-ba situasaun ruma, no karik ita la hatene loloos kona-ba buat hotu. Keta koʼalia sai liafuan neʼebé ladiʼak, tanba neʼe hanesan aumenta mina ba ahi. Ikusliu, hatudu laran-metin no hein ho pasiénsia ba Jeová duké koko hadiʼa problema neʼe ho ita-nia kbiit rasik. Ita sei halo Jeová kontente no nia sei fó bensaun ba ita. Ita bele fiar katak Jeová, “Juis ba raiklaran tomak” sempre halo buat neʼebé loos, nia sempre hatudu justisa.—Gên 18:25; Deut 32:4. w17.04 p. 22 par. 17

Saida mak sei akontese ba ema sira neʼebé lakohi troka no fó nafatin sira-nia apoiu ba mundu aat neʼe toʼo tempu terus boot mosu mai? Jeová promete ona katak nia sei halakon ema aat hotu husi mundu neʼe. (Sal 37:10) Ohin loron, ema barak halo hahalok aat subasubar, no dala barak ema la bele kaer-toman sira no sira la hetan kastigu ba sira-nia hahalok. (Job 21:7, 9) Maibé Bíblia fó-hanoin mai ita katak: “Maromak nia matan haree ba ema nia hahalok sira, no Nia haree ema nia hakat hotu. La iha fatin nakukun ka lalatak metan ba ema sira neʼebé halo sala atubele subar an.” (Job 34:21, 22) Ema la bele subar husi Jeová. Nia bele haree buat hotu neʼebé ema aat sira halo daudaun. Funu Armajedón liutiha, ita sei la haree tan ema aat iha mundu neʼe, tanba sira hotu sei lakon ba nafatin.—Sal 37:12-15. w17.04 p. 10 par. 5