Dezembru

Iha tempu antigu, baibain ema han hamutuk ho bainaka sira neʼebé vizita hodi hatudu katak sira hakarak sai belun diʼak no iha dame. (Gên 18:1-8; Juíz 13:15; Lc 24:28-30) Ita presiza hatudu laran-diʼak liuliu ba sé? Ba irmaun-irmán sira husi ita-nia kongregasaun. Mundu neʼe sai aat ba beibeik, ita presiza apoiu husi irmaun-irmán sira no laran-metin ba malu. Katuas área no dala ruma irmaun-irmán sira neʼebé tuir eskola Bíblia sira ka voluntáriu ba konstrusaun mós presiza hela-fatin. No bainhira dezastre naturais akontese, irmaun-irmán sira neʼebé lakon sira-nia uma presiza fatin atu hela toʼo harii fali sira-nia uma. Ita la bele iha hanoin katak, sira neʼebé iha uma boot deʼit mak bele fó ajuda. Karik sira hatudu laran-diʼak hanesan neʼe dala barak ona iha tempu uluk. Ita rasik bele fó fatin ba ema seluk atu hela ka lae, maski Ita iha deʼit uma neʼebé kiʼik? w18.03 p. 15 par. 6, 9

Saida mak bele ajuda ema neʼebé monu atu “hamriik fali”? Laʼós liuhusi ninia forsa rasik, maibé liuhusi espíritu santu. (Flp 4:13) Hahalok sira neʼebé mai husi espíritu santu inklui mós kontrola an, hahalok neʼe iha ligasaun metin ho dixiplina an. Orasaun, estuda Bíblia, no medita mós importante atu halo. Maibé oinsá se Ita sente susar tebes atu estuda Bíblia ka Ita la gosta estuda Bíblia? Keta sente triste. Se Ita husik Jeová ajuda Ita, nia sei ajuda ita atu “haburas hakarak” hodi estuda ninia Liafuan. (1 Ped 2:2) Husu Jeová ajuda Ita atu dixiplina an hodi Ita bele buka tempu atu estuda Bíblia. Foufoun, karik Ita bele uza minutu balu deʼit hodi estuda. Halo hanesan neʼe neineik-neineik sei sai fasil no halo Ita gosta atu estuda. Medita kona-ba Jeová nia hahalok furak iha tempu neʼebé nonook bele halo Ita gosta liután atu estuda.—1 Tim 4:15. w18.03 p. 29 par. 5-6

Antes estudante Bíblia atu hetan batizmu, sira tenke aprende lia-loos kona-ba Maromak, Maromak nia hakarak ba ema no rai, no Maromak halo ona saida atu salva ema. (1 Tim 2:3-6) Tuirmai sira presiza haburas fiar hodi bele ajuda sira halo tuir Maromak nia ukun-fuan sira no hodi la halo tan buat neʼebé Maromak odi. (Após 3:19) Halo hanesan neʼe importante tebes tanba Jeová sei la simu dedikasaun husi ema neʼebé kontinua halo buat neʼebé nia odi. (1 Kor 6:9, 10) Maibé iha buat seluk tan. Ema neʼebé hakarak dedika sira-nia moris ba Jeová tenke tuir reuniaun sira, haklaken beibeik, no hanorin lia-loos ba ema. Ema hotu neʼebé hakarak tuir Kristu tenkesér kumpre kritériu neʼe. (Após 1:8) Estudante Bíblia presiza halo uluk buat sira-neʼe, tuirmai mak sira bele dedika sira-nia moris ba Jeová iha sira rasik nia orasaun no hetan batizmu. w18.03 p. 6 par. 12

Jeová hili Maria hodi sai Jesus nia inan tanba nia mak ema neʼebé espirituál tebes. Ita bele haree husi liafuan sira neʼebé nia koʼalia sai ba Zacarias no Isabel bainhira nia bá vizita sira. (Lc 1:46-55) Maria nia liafuan sira hatudu katak nia gosta tebes Maromak nia Liafuan no nia hatene didiʼak kona-ba Eskritura Lia-Ebraiku. (Gên 30:13; 1 Sam 2:1-10; Mal 3:12) No maski nia kaben ona ho José, sira hein toʼo Jesus moris tiha mak foin halaʼo relasaun seksuál nian. Sira haree knaar neʼebé sira simu husi Maromak importante liu fali sira-nia hakarak rasik. (Mt 1:25) Maria mós fó atensaun didiʼak kona-ba buat hotu neʼebé akontese iha Jesus nia moris no nia rai iha ninia laran liafuan hotu neʼebé Jesus hanorin. Nia hakarak tebes atu hatene Maromak nia promesa sira kona-ba Mesias. Maria nia ezemplu ajuda duni ita atu tau uluk Maromak nia hakarak iha ita-nia moris, loos ka lae? w18.02 p. 21 par. 11

Oinsá mak ita bele banati-tuir Job nia fiar no hahalok halo tuir? Ita hakarak tau uluk Jeová iha ita-nia moris maski ita hasoru daudaun situasaun saida deʼit. Ita hakarak tau fiar tomak ba nia no halo tuir nia ho laran neʼebé kompletu. Tuir loloos, ohin loron ita iha razaun barak liu Job atu halo nuneʼe. Hanoin toʼok kona-ba neʼe: Ohin loron ita hatene ona buat barak kona-ba Satanás ho ninia dalan sira. (2 Kor 2:11) Ita iha Bíblia, liuliu livru Job hodi hatene tanbasá mak Jeová husik terus. No husi Daniel nia profesia ita hatene katak Maromak nia Ukun mak governu neʼebé tebes no Jesus Kristu mak liurai iha governu neʼe. (Dan 7:13, 14) Ita mós hatene katak lakleur tan governu neʼe sei ukun mundu tomak no halakon terus hotu. Job nia esperiénsia mós hanorin ita kona-ba hatudu hahalok hanoin ema liuliu bainhira ita-nia irmaun ka irmán sira hetan susar. Karik sira mós bele koʼalia arbiru hanesan Job. (Ecle 7:7) Duké hanoin aat kona-ba sira, diʼak atu komprende sira-nia situasaun no hatudu laran-diʼak ba sira. Se ita halo nuneʼe, ita sei sai hanesan ita-nia Aman Jeová neʼebé iha domin no laran-sadiʼa.—Sal 103:8. w18.02 p. 6 par. 16; p. 7 par. 19-20

Ema balu sai foti-an tanba iha oin kapás, famozu, iha talentu kona-ba múzika, forsa, ka ema seluk gosta tebes sira. David iha buat sira-neʼe hotu, maibé nia hatudu haraik-an iha ninia moris tomak. Porezemplu, bainhira David oho tiha Golias, Liurai Saul hatete ba David katak nia bele kaben ho Saul nia oan-feto. Maibé David dehan: “Haʼu neʼe sé . . . , mak haʼu bele sai liurai nia mane-foun?” (1 Sam 18:18) Hanesan David, Jeová nia atan sira ohin loron mós koko atu hatudu haraik-an. Maski Jeová mak Maromak neʼebé Aas Liu Hotu, nia haraik-an no neʼe book tebes ita-nia laran. Ita hakarak duni atu halo tuir liafuan tuirmai neʼe: “Tau hahalok domin ho laran-sadiʼa nuʼudar imi-nia hatais hamutuk ho laran-diʼak, haraik-an, laran-maus, no pasiénsia.” (Kol 3:12) Ita mós hatene katak domin “la gaba an, la foti-an”. (1 Kor 13:4) Ita-nia haraik-an bele book ema seluk atu buka-hatene kona-ba Jeová. w18.01 p. 28 par. 6-7

Dala ruma ita fó kontribuisaun atu apoia projetu espesiál ruma. (Após 4:34, 35; 1 Kor 16:2) Porezemplu, karik Ita-nia kongregasaun halo daudaun planu atu harii Reuniaun-Fatin foun. Ka karik presiza fó ajuda ho ita-nia osan atu halaʼo reuniaun boot sira. Karik Ita-nia irmaun-irmán sira iha fatin seluk hetan dezastre naturais no presiza ajuda. Ita-nia kontribuisaun mós fó ajuda ba misionáriu, pioneiru tempu-tomak, katuas área, no sira neʼebé serbisu iha sede-jerál no sukursál. Ita hotu bele fó buat ruma hodi apoia serbisu neʼebé Jeová nia organizasaun halo daudaun iha loron ikus sira-neʼe. Kontribuisaun barak, ema seluk la hatene sé mak fó. Bainhira ita tau osan iha kaixa kontribuisaun iha Reuniaun-Fatin ka fó kontribuisaun online liuhusi jw.org, ita la fó-hatene ba ema seluk ita fó osan hira. Maibé oinsá se Ita sente katak kontribuisaun neʼebé Ita fó kiʼik tebes no la iha folin? Realidade mak, kontribuisaun barak neʼebé Jeová nia organizasaun simu, barak liu mak mai husi prezente neʼebé kiʼik, no kontribuisaun neʼebé boot ladún barak. w18.01 p. 19 par. 10-11

Ema kristaun presiza hetan batizmu, no neʼe mak hakat importante hodi bele hetan salvasaun no moris ba nafatin. (Mt 28:19, 20) Liuhusi batizmu, Ita promete atu hadomi Jeová no tau ninia hakarak uluk iha Ita-nia moris. Ita sei nunka sente sala atu husik Jeová mak dirije Ita-nia moris. Hanoin toʼok, ema neʼebé la adora Jeová, sira moris iha Satanás nia ukun. Diabu la iha interese ba sira ka ba Ita. Ninia hakarak mak atu haree Ita lakon Ita-nia esperansa moris rohan-laek no nia kontente atu haree Ita apoia nia hodi kontra Jeová. Hanoin kona-ba bensaun saida deʼit mak Ita simu ona husi Jeová hodi dedika Ita-nia an ba nia no hetan batizmu. Ita fó ona Ita-nia moris ba Jeová, tan neʼe ho fiar an Ita bele hatete: “Jeová iha haʼu-nia sorin; haʼu sei nunka taʼuk. Saida mak ema bele halo ba haʼu?” (Sal 118:6) Sin, la iha buat seluk mak bele halo Ita sente kontente liu hodi hatene katak Ita apoia Jeová no nia simu Ita. w17.12 p. 23-24 par. 1-3

Problema mosu tanba ita hotu la perfeitu. Dala ruma ema nia liafuan ka hahalok bele halo ita sente hirus, ka ema sai hirus tanba ita. Problema hanesan neʼe bele koko ita. Maibé neʼe fó oportunidade ba ita atu hatudu laran-metin ba Jeová. Oinsá? Neʼe bele ajuda ita atu serbisu hamutuk ho ita-nia irmaun-irmán sira. Maski sira la perfeitu, Jeová hadomi nafatin sira, no ita mós tenkesér hadomi sira. Liuhusi José nia moris ita bele haree katak Jeová la hasees ita husi koko sira. Bainhira José sei joven, ninia maun sira laran-moras ba nia. Sira faʼan nia hodi sai atan, no ema lori nia ba rai-Ejitu. (Gên 37:28) Jeová haree buat hotu neʼebé akontese ba José no ita bele fiar katak Jeová sente laran-kanek tebes kona-ba ninia belun José nia terus no dalan neʼebé ema trata nia. Maski nuneʼe, Jeová la hapara buat neʼebé akontese ba José. Ikusmai, bainhira ema hatama José ba komarka tanba duun katak nia koko atu estraga Potifar nia feen, Jeová mós la salva José husi buat neʼebé akontese ba nia. Maibé Jeová husik ona nia ka lae? Lae. Bíblia dehan: “Jeová hamutuk ho José no Jeová halo José nia serbisu sai susesu.”—Gên 39:21-23. w18.01 9-10 par. 12-14

Hanorin importante saida deʼit mak imi-nia relijiaun hanorin? Karik Ita sei hatán katak Ita fiar Jeová mak Kriadór no nia mak moris nia Hun. Karik Ita mós sei dehan katak Ita fiar ba Jesus Kristu, ida-neʼebé fó ninia moris ba ema. Karik Ita mós sei koʼalia tan kona-ba mundu paraízu iha futuru neʼebé Maromak nia povu sei moris ba nafatin. Maibé Ita sei temi kona-ba moris-hiʼas nuʼudar fiar ida neʼebé Ita hafolin tebes ka lae? Ita iha razaun barak atu inklui moris-hiʼas nuʼudar hanorin importante ida iha ita-nia fiar, maski ita-nia hakarak mak atu moris liu terus boot hodi moris ba nafatin iha rai. Moris-hiʼas importante tebes. Se Jesus mak nunka hetan moris-hiʼas, nia la bele ukun nuʼudar Liurai iha lalehan, no ita-nia haklaken sei sai saugati deʼit. (1 Kor 15:12-19) Ita hatene katak Jesus hetan ona moris-hiʼas no ita iha fiar neʼebé metin nafatin katak Maromak bele fó moris-hiʼas ba ema neʼebé mate ona.—Mc 12:18; Após 4:2, 3; 17:32; 23:6-8. w17.12 p. 8 par. 1-2

Ema farizeu nunka hatudu laran-sadiʼa bainhira tesi-lia ba ema. Sira haree deʼit kona-ba ema neʼe halo ona sala saida duké haree kona-ba ema neʼe. Porezemplu, bainhira ema farizeu balu haree Jesus han iha Mateus nia uma, sira husu ba Jesus nia dixípulu sira: “Tansá mak imi-nia mestre han hamutuk ho ema kobradór impostu nian no sala-naʼin sira?” Jesus hatán: “Ema neʼebé isin-diʼak la presiza doutór, maibé ema moras mak presiza. Tan neʼe, imi laʼo bá no buka-hatene liafuan sira-neʼe katak sá: ‘Haʼu hakarak laran-sadiʼa, laʼós imi-nia prezente.’ Tanba haʼu mai laʼós atu bolu ema loos sira, maibé atu bolu ema sala-naʼin.” (Mt 9:9-13) Jesus nia hahalok neʼe atu defende deʼit ema sira-neʼe nia sala ka lae? Lae. Nia hakarak sira atu arrepende an. No arrepende an mak mensajen importante ida iha Jesus nia haklaken. (Mt 4:17) Jesus hatene katak ema balu “husi kobradór impostu no sala-naʼin sira” hakarak troka. Sira mai iha Mateus nia uma laʼós atu han deʼit. Sira mai tanba sira hakarak tuir Jesus. (Mc 2:15) Triste tanba husi ema farizeu sira, barak mak la haree ema hanesan Jesus haree. w17.11 p. 13 par. 2; p. 16 par. 15

Atu sai parte ida ba kongregasaun mak bensaun boot ba ita. Ita estuda Maromak nia Liafuan hamutuk iha reuniaun no fó apoiu ba malu. Halo nuneʼe ajuda ita tau fokus ba ita-nia kolen. Maibé dala ruma tanba komprende malu sala bele hamosu problema entre ita ho ita-nia irmaun-irmán sira. Se ita mak la rezolve problema sira, neʼe bele halo ita rai odi ba malu. (1 Ped 3:8, 9) Keta husik hahalok rai odi atu hanetik ita manán ita-nia kolen. Paulo esplika ba ema Koloso: “Nuʼudar ema neʼebé Maromak hili ona, santu no neʼebé nia hadomi, tau hahalok domin ho laran-sadiʼa nuʼudar imi-nia hatais hamutuk ho laran-diʼak, haraik-an, laran-maus, no pasiénsia. Kontinua hatudu pasiénsia ba malu no fó perdua ba malu ho laran tomak maski ema halo buat ruma hasoru imi. Nuʼudar Jeová fó perdua ba imi ho laran tomak, imi mós tenke halo nuneʼe.”—Kol 3:12, 13. w17.11 p. 27 par. 7-8

Se ema Izraél oho ema ida la ho neon, nia tenke halai ba sidade protesaun no “fó sai ninia kazu” ba katuas sira iha sidade nia portaun. Katuas sira tenke simu nia. Liutiha tempu balu sira sei haruka fali ema neʼe ba katuas sira iha sidade neʼebé nia oho ema atu halaʼo tesi-lia. (Núm 35:24, 25) Se katuas sira foti desizaun katak mate neʼe akontese tanba asidente deʼit, sira sei haruka fali ema neʼe ba sidade protesaun. Tanbasá mak ema neʼe presiza koʼalia ba katuas sira? Atu katuas sira bele proteje kongregasaun Izraél moos nafatin no mós ajuda ema neʼebé oho ema seluk la ho neon atu hetan Jeová nia laran-sadiʼa. Matenek-naʼin ida kona-ba Bíblia hatete katak, se ema neʼe la halai ba katuas sira, ema bele oho nia, tanba nia la halo tuir buat neʼebé Maromak haruka nia atu halo. Se nia mak la halai ba sidade protesaun ida, família besik husi vítima iha liberdade atu oho fali nia. w17.11 p. 9 par. 6-7

Jeová uza nafatin ninia anju sira atu proteje no hametin ninia povu. (Mal 3:6; Ebr 1:7) Husi tinan 1919, iha tempu neʼebé Jeová nia povu sai livre husi Babilónia Boot, adorasaun neʼebé loos sai buras ba beibeik no habelar ba fatin oioin maski hetan kontra makaʼas husi inimigu sira. (Apok 18:4) Inimigu sira la hetan susesu tanba anju sira mak proteje hela Jeová nia organizasaun. Tan neʼe ita la presiza taʼuk katak, relijiaun falsu sei domina tan Jeová nia povu. (Sal 34:7) Ita bele fiar katak Maromak nia atan iha mundu tomak sei kontinua laʼo ba oin iha dalan espirituál. Tanba ita iha Jeová nia tropa hamutuk ho ita. Iha tempu terus boot, Jeová nia anju sira sei proteje Jeová nia povu no halakon ema hotu neʼebé kontra Jeová nia ukun.—2 Tes 1:7, 8. w17.10 p. 28 par. 10-11

Se ema ida husi família mak hasai husi kongregasaun ka nia hili atu lakohi serbí tan Jeová, neʼe bele halo susar tebes ba ita. Dala ruma neʼe bele halo Ita laran-kanek tebes toʼo Ita sente hanesan ema ida sona Ita ho surik. Saida mak bele ajuda Ita tahan hasoru laran-kanek neʼe? Importante atu fokus nafatin atu serbí Jeová. Se Ita mak hasoru situasaun neʼe, presiza hametin liután Ita-nia fiar. Lee beibeik Bíblia, prepara no tuir reuniaun sira, haklaken nafatin, no halo orasaun husu Jeová fó forsa ba Ita atu bele tahan. (Jud 21) Oinsá se Ita halo ona buat hotu neʼe maibé laran-kanek nafatin? Keta rende an! Fokus nafatin atu serbí Jeová. Tanba tempu balu liu tiha, halo beibeik buat hanesan neʼe bele ajuda Ita hatene oinsá atu kontrola Ita-nia hanoin no sentimentu. Neʼe mak buat neʼebé akontese ba ema neʼebé hakerek Salmo 73. Iha tempu ida susar tebes ba nia atu kontrola ninia hanoin no sentimentu. Maibé adora nafatin Jeová ajuda nia hodi iha hanoin neʼebé loos. (Sal 73:16, 17) Hanesan neʼe mós kona-ba Ita. w17.10 p. 16 par. 17-18

Bainhira Satanás koʼalia ba Eva iha jardín Eden, liafuan neʼebé nia hatoʼo rona hanesan nia hakarak buat neʼebé diʼak ba Eva. Maibé nia hahalok hatudu sai oin-seluk. (Gên 3:4, 5) Iha tempu David ukun nuʼudar liurai, nia iha belun ida naran Aitofel. Maibé tanba nia buka diʼak ba nia an, nia trai David. Nia hahalok hatudu sai katak nia laʼós belun neʼebé loos. (2 Sam 15:31) Ohin loron, ema soe-fiar no ema seluk tan koko atu sobu kongregasaun nia unidade liuhusi “liafuan midar no liafuan gaba nian”. (Rom 16:17, 18) Sira finje katak sira hanoin ema seluk, maibé tuir loloos sira atu buka diʼak deʼit ba sira-nia an. Domin falsu mak hahalok neʼebé lori moe boot tanba ema uza domin neʼe atu lohi ema seluk. Karik ita bele lohi ema, maibé ita la bele lohi Jeová. Jesus hatete katak sira neʼebé iha hahalok laran-makerek sei hetan “kastigu todan”. (Mt 24:51) Entaun husu ba ita-nia an, ‘Haʼu hadomi husi laran ka lae, ka haʼu hadomi tanba atu buka diʼak no atu lohi ema deʼit?’ w17.10 p. 8 par. 6-8

Bainhira ita lee eskritura ba ema, neʼe hanesan ita husik Jeová mak koʼalia ba ema neʼe. Kuandu ita hili didiʼak eskritura ida hodi lee ba ema, neʼe iha kbiit liu fali ita rasik nia liafuan sira. (1 Tes 2:13) Bainhira bá haklaken, Ita mós koko atu lee beibeik Bíblia ba ema ka lae? Maibé, lee deʼit eskritura seidauk toʼo. Tanba ema barak ohin loron, hanesan mós iha apóstolu sira-nia tempu, la komprende kona-ba Bíblia. Tan neʼe, bainhira ita lee eskritura ruma, ita la bele hanoin kedas katak uma-naʼin komprende ona. Ita presiza ajuda nia komprende hodi lee fali liafuan ka fraze importante husi versíkulu neʼebé ita lee no depois esplika eskritura neʼe katak sá. Halo hanesan neʼe bele ajuda hodi Maromak nia Liafuan book ema nia laran no neon.—Lc 24:32. w17.09 p. 25 par. 7-8

Jeová hakarak ema kristaun hotu atu hatudu laran-sadiʼa no laran-diʼak ba sira-nia maluk no irmaun-irmán sira. (João 13:34, 35) Signifika ida husi liafuan laran-sadiʼa no laran-diʼak mak “terus hamutuk”. Ema neʼebé hatudu laran-sadiʼa no laran-diʼak koko atu fó ajuda ba sira neʼebé hasoru daudauk terus. Tan neʼe mak ita tenke buka oportunidade atu ajuda ema seluk. Bainhira ita haree ema seluk terus tanba dezastre ruma, ita hakarak atu hatudu laran-sadiʼa no laran-diʼak ba sira. Ema barak hatene Jeová nia povu sempre fó ajuda ba ema seluk iha tempu hanesan neʼe. (1 Ped 2:17) Porezemplu, irmán ida husi rai-Japaun, nia hela iha fatin ida neʼebé hetan estraga makaʼas husi tsunami bainhira rai-nakdoko iha tinan 2011. Nia dehan katak bainhira nia haree irmaun-irmán husi fatin oioin iha Japaun no mós husi rai seluk mai hodi ajuda hadiʼa fali uma ho Reuniaun-Fatin sira, neʼe “fó kmaan no book tebes” nia. Nia hatutan hodi dehan: “Esperiénsia neʼe ajuda haʼu hodi hatene katak Jeová hanoin ita, maluk Testemuña sira hanoin malu no irmaun-irmán barak iha mundu tomak mós halo orasaun ba ami.” w17.09 p. 11 par. 12-13

Tanbasá mak ita presiza kontrola an? Tanba razaun importante rua. Primeiru, ema neʼebé bele kontrola sira-nia sentimentu no emosaun, baibain ladún hasoru problema barak. No mós fasil ba sira atu iha relasaun diʼak ho ema seluk, hasees an husi hirus, laran-taridu, ka depresaun. Segundu, kontrola an bele ajuda ita atu la monu ba tentasaun ka hanoin neʼebé sala hodi bele iha nafatin relasaun neʼebé diʼak ho Maromak. Adão no Eva halo sala tanba sira la hatudu hahalok kontrola an. (Gên 3:6) Ohin loron, ema barak mós hasoru daudauk problema boot tanba falta hahalok kontrola an. Jeová komprende katak susar ba ita atu hatudu hahalok kontrola an tanba ita la perfeitu. Maibé nia hakarak ajuda ita atu kontrola ita-nia hakarak sira neʼebé sala.—1 Reis 8:46-50. w17.09 p. 3-4 par. 3-4

Iha tempu uluk iha Áfrika Súl, ema neʼebé kór la hanesan la bele halibur hamutuk iha nasaun neʼe. Maibé iha loron-domingu 18 Dezembru 2011, Testemuña naʼin-78.000 liu halibur iha estádiu boot ida iha sidade Joanezburgu atu halaʼo programa espesiál. Sira mai husi Áfrika Súl nia suku oioin no nasaun viziñu sira. Manager ida husi estádiu neʼe dehan: “Neʼe mak dala primeiru haʼu haree ema lubun neʼebé hatudu hahalok diʼak iha estádiu neʼe. Imi hotu hatais kabeer. No imi hamoos estádiu neʼe ho didiʼak. Maibé úniku liu mak imi mai husi rasa oioin.” Sin, ema neʼebé laʼós Testemuña mós bele haree katak ita-nia organizasaun la hanesan ho organizasaun seluk. (1 Ped 5:9) Tanbasá mak ita la hanesan ho ema seluk? Tanba ita “hasai tiha ema tuan nian” no “tau fali ema foun”. Neʼe katak ita hakaʼas an atu halo mudansa ba ita-nia hahalok neʼebé Jeová la gosta liuhusi Bíblia no espíritu santu nia ajuda.—Kol 3:9. w17.08 p. 17-18 par. 2-3

Bíblia hatudu katak hahalok pasiénsia mai husi Maromak nia espíritu santu. Tan neʼe mak se la liuhusi Maromak nia ajuda, difisil ba ita ema la perfeitu atu hatudu pasiénsia iha situasaun neʼebé susar. Pasiénsia mak prezente ida husi Maromak, no ita bele hatudu ita-nia domin ba Jeová no ba ema seluk liuhusi hatudu pasiénsia. Se ita mak la iha pasiénsia, neʼe sei halo fraku ita-nia domin ba ema seluk. (1 Kor 13:4; Gal 5:22) Pasiénsia envolve saida deʼit? Pasiénsia envolve tahan iha situasaun neʼebé susar no hatudu nafatin hahalok diʼak. (Kol 1:11; Tgo 1:3, 4) Pasiénsia mós bele ajuda ita hatudu laran-metin ba Jeová maski hasoru daudauk problema oioin. Pasiénsia bele ajuda ita atu la selu aat ba ema. Bíblia hatete katak ita tenke iha pasiénsia atu hein. Tuir Tiago 5:7, 8, pasiénsia mak hahalok neʼebé importante tebes. w17.08 p. 4 par. 4

Joven sira, karik imi konkorda katak, antes atu halo viajen, diʼak atu planu uluk, loos ka lae? Moris mak hanesan viajen ida. Tempu atu halo planu ba Ita-nia moris mak bainhira Ita sei joven. Maibé la fasil atu halo planu sira-neʼe. Se Ita mak iha sentimentu hanesan neʼe, hanoin-hetan buat neʼebé Jeová hatete iha eskritura ba ohin. Jeová hakarak Ita atu halo planu ho matenek kona-ba Ita-nia futuru. (Ecle 12:1; Mt 6:20) Nia hakarak Ita kontente. Husi Jeová nia kriasaun sira neʼebé Ita haree, rona, no han, hatudu sai kona-ba ninia hakarak neʼe. Nia mós tau matan ba ita iha dalan oioin. Nia fó matadalan no hanorin ita kona-ba dalan neʼebé diʼak liu hotu atu moris. Tan neʼe mak bainhira ema lakohi simu ninia matadalan neʼebé matenek, neʼe halo nia la kontente. Nia dehan ba sira: “Imi hili buat neʼebé halo haʼu la kontente. . . . Haree bá! Haʼu-nia atan sira sei haksolok, maibé imi sei moe. Haree bá! Haʼu-nia atan sira sei haklalak ho haksolok tanba laran-kontente.” (Isa 65:12-14) Se ita mak halo desizaun neʼebé matenek iha ita-nia moris, ita fó glória ba Jeová.—Prov 27:11. w17.07 p. 22 par. 1-2

Maromak neʼebé hatene fitun ida-idak mós hatene kona-ba Ita. Nia sempre hatene Ita iha fatin neʼebé, Ita sente oinsá, no Ita presiza saida! Jeová hatene Ita hasoru daudauk problema saida, no nia iha forsa atu ajuda Ita. (Sal 147:5) Karik Ita sente katak situasaun neʼebé Ita hasoru daudauk mak susar tebes no Ita la bele tahan ho situasaun neʼe. Maromak hatene ita-nia kbiit toʼo iha neʼebé, no “nia hanoin-hetan katak ita mak rai-rahun”. (Sal 103:14) Ita la perfeitu, tan neʼe mak ita sempre halo sala neʼebé hanesan, no neʼe bele halo ita laran-tun. Dala ruma ita arrepende tebes kona-ba liafuan sira neʼebé ita hasai, ita-nia hakarak neʼebé aat, ka laran-moras ba ema seluk. Maski Jeová la iha fraku hanesan neʼe, maibé nia komprende tebes kona-ba ita-nia sentimentu. (Isa 40:28) Ita rasik sente ona oinsá Jeová uza ninia forsa neʼebé boot hodi ajuda Ita tahan hasoru koko ruma ka lae?—Isa 41:10, 13. w17.07 p. 18 par. 6-8

Irmaun ida husi rai-Seilaun iha uma ida no nia uza ninia uma neʼe hodi halaʼo reuniaun, reuniaun boot, no husik irmaun-irmán neʼebé serbí Jeová tempu-tomak atu hela iha neʼebá. Irmaun neʼe halo sakrifísiu boot, no neʼe ajuda tebes haklaken-naʼin sira iha fatin neʼe tanba sira ladún iha osan. Dala ruma, iha rai neʼebé la iha liberdade atu halaʼo serbisu haklaken, irmaun-irmán sira uza sira rasik nia uma atu sai hanesan Reuniaun-Fatin. Ida-neʼe ajuda pioneiru no ema seluk atu tuir reuniaun tanba la presiza hasai osan barak atu aluga fatin seluk. Irmán ida seluk fó beibeik kontribuisaun osan hodi ajuda serbisu haklaken. Nia hatete katak iha tinan hirak nia laran ninia hahalok barak mós troka. Nia dehan: “Haʼu sente tanba haʼu hatudu beibeik laran-luak, neʼe halo haʼu-nia sentimentu kona-ba ema seluk mós troka. Haʼu sente haʼu lalais atu fó perdua ba ema, iha pasiénsia liu, no fasil atu tahan ema nia fraku no simu konsellu.” w17.07 p. 9 par. 9-10

Maski ikusmai karik Job buka-hatene duni kona-ba tanbasá mak nia hetan terus sira-neʼe, maibé karik nia sei iha duvida nafatin kona-ba tanbasá mak Jeová husik nia hetan terus barak. Iha situasaun hanesan neʼe, ita bele fiar katak Jeová nia konsellu kontinua ajuda Job maski ninia terus sira ramata ona. Tanbasá? Tanba se Job mak iha duni duvida hanesan neʼe, nia bele hanoin-hetan kona-ba liafuan sira neʼebé Jeová koʼalia ba nia hodi hetan kmaan no ajuda nia atu iha fali hanoin neʼebé loos. (Sal 94:19) Medita kona-ba buat neʼebé akontese ba Job bele ajuda ita hadiʼa ita-nia hanoin no fó kmaan ba ita. Jeová rai liafuan sira neʼebé hakerek iha livru Job “hodi hanorin ita no fó ita esperansa, basá Eskritura sira-neʼe ajuda ita atu tahan no fó kmaan mai ita”. (Rom 15:4) Livru Job hanorin ita katak ita labele hanoin liu kona-ba ita rasik nia problema toʼo haluha tiha kona-ba Jeová nia direitu atu ukun. Ita hakarak halo hanesan Job atu apoia Jeová nia direitu atu ukun liuhusi hatudu laran-metin ba Jeová maski hasoru susar iha ita-nia moris. w17.06 p. 24 par. 9; p. 25 par. 13-14

Jesus hatene katak importante tebes ba ninia dixípulu sira atu deskansa. Porezemplu, bainhira sira haklaken tiha ho badinas, Jesus hatete ba sira liafuan neʼebé temi iha leten. Halo atividade halimar nian mós dalan ida atu deskansa. Maibé ita tenke kuidadu atu la husik atividade sira-neʼe sai buat neʼebé importante liu iha ita-nia moris. Iha apóstolu sira-nia tempu, ema barak iha hanoin hanesan neʼe: “Mai ita han no hemu, tanba aban ita sei mate”. (1 Kor 15:32) Ema barak ohin loron mós iha hanoin hanesan neʼe. Saida mak bele ajuda ita atu iha hanoin neʼebé loos kona-ba atividade sira-neʼe? Karik ita bele hakerek, semana ida ita uza oras hira atu halaʼo atividade adorasaun nian. Tuirmai hakerek fali oras hira mak ita uza iha semana neʼe ba atividade halimar nian hanesan desportu, haree televizaun, ka halimar vídeo games. Haree toʼok ita presiza halo mudansa tan ka lae?—Éf 5:15, 16. w17.05 p. 24-25 par. 11-13

Jesus konta ai-knanoik kona-ba mane ida neʼebé buka-hetan fatuk-murak ida neʼebé iha folin boot liu fali fatuk-murak sira seluk. Mane neʼe hakarak tebes fatuk-murak neʼe toʼo nia faʼan hotu ninia sasán hodi sosa fatuk-murak neʼe. Husi neʼe ita bele haree katak fatuk-murak neʼe iha folin boot duni ba mane neʼe! Maromak nia Ukun mak hanesan fatuk-murak folin-boot neʼe. Se ita mak hadomi Maromak nia Ukun hanesan mane neʼe hafolin fatuk-murak, ita sei husik buat hotu atu bele sai sidadaun ba Maromak nia Ukun ba nafatin. (Mc 10:28-30) Zakeus fali, nia sai riku liuhusi hamatak ema nia osan. (Lc 19:1-9) Maibé loron ida, nia rona Jesus koʼalia kona-ba Maromak nia Ukun. Nia gosta tebes buat neʼebé nia rona toʼo nia hakarak troka ninia moris. Nia dehan: “Naʼi, haʼu sei fahe haʼu-nia rikusoin ba rua hodi fó ida ba ema kiak sira, no buat naran deʼit neʼebé haʼu foti husi ema hodi hamatak sira, haʼu sei fó fali dala haat liu fali buat neʼebé haʼu foti.” Zakeus fó fali osan neʼebé nia foti husi ema no nia la kaan tan ba buat sira-neʼe. w17.06 p. 10 par. 3-5

Diʼak ba irmaun-irmán sira neʼebé inan-aman husu atu ajuda sira-nia oan hodi fó beibeik laran-manas ba oan atu hatudu respeitu ba inan-aman. Sira presiza koʼalia beibeik buat neʼebé pozitivu kona-ba oan sira-nia inan-aman no kuidadu atu la kaer fali inan-aman nia responsabilidade atu haboot inan-aman sira-nia oan. No mós, sira neʼebé fó ajuda tenke kuidadu atu la hatudu hahalok ruma neʼebé halo ema balu husi kongregasaun ka ema seluk hanoin katak neʼe mak hahalok la morál. (1 Ped 2:12) Maski inan-aman bele husu irmaun-irmán seluk nia ajuda, maibé responsabilidade atu hanorin lia-loos ba oan mak sira-nian nafatin. Sira presiza kontrola beibeik kona-ba ajuda neʼebé ema seluk fó ba sira-nia oan. Inan-aman, halo orasaun atu husu ajuda husi Jeová, no hakaʼas an nafatin. (2 Crôn 15:7) Hanoin uluk kona-ba oan nia relasaun ho Jeová duké hanoin kona-ba Ita-nia hakarak. Hakaʼas an halo buat hotu atu ajuda oan laʼo ba oin iha lia-loos. Tenke iha fiar katak Ita-nia oan sei sai Jeová nia atan ida. w17.05 p. 12 par. 19-20

Ema naʼin-rua duun mane ida katak nia halo krime boot. Liafuan husi ema naʼin-rua neʼe tuir loloos lia-bosok. Maibé mane neʼe hetan kastigu-mate. Hanoin toʼok ema seluk neʼebé iha hahalok justisa, sira sei sente oinsá bainhira sira haree ema tuda toʼo mate mane neʼe ho ninia oan sira neʼebé la sala! Ida-neʼe akontese ba Jeová nia atan laran-metin ida naran Nabot iha tempu Liurai Akabe ukun rai-Izraél. (1 Reis 21:11-13; 2 Reis 9:26) Liurai Akabe husu ba Nabot atu hola Nabot nia toʼos-uvas, ka selae, fó toʼos-uvas neʼebé diʼak liu atu troka fali ho Nabot nian. Maibé Nabot lakohi. Tanbasá? Nabot hatene katak, atu faʼan família nia liman-rohan ba nafatin mak hahalok neʼebé kontra Jeová nia ukun-fuan. (Lev 25:23; Núm 36:7) Husi neʼe ita haree katak Nabot halo tuir Jeová. w17.04 p. 23 par. 1; p. 24 par. 4

Sé mak sei hela iha mundu neʼe bainhira ema aat sira lakon hotu ona? Jeová dehan: “Ema laran-maus sei simu rai nuʼudar sira-nian, no sira sei hetan ksolok boot tanba iha dame barak.” Jeová promete tan hodi dehan: “Ema laran-loos sira sei simu rai nuʼudar sira-nian, no sira sei hela iha laran ba nafatin.” (Sal 37:11, 29) “Ema laran-maus” no “ema laran-loos” mak sé? Ema laran-maus mak ema haraik-an neʼebé simu Jeová nia hanorin no matadalan. Ema laran-loos mak sira neʼebé gosta halo buat neʼebé Jeová simu. Maski ohin loron ema aat mak barak liu fali ema laran-loos, maibé iha mundu foun, ema laran-maus no ema laran-loos deʼit mak sei hela iha neʼebá, no sira sei halo mundu tomak sai fali paraízu! w17.04 p. 10-11 par. 5-6

Ita tenke husik “Maromak nia domin” book ita atu hatudu domin ba ita-nia irmaun-irmán sira, liuliu bainhira sira hasoru susar no terus. (1 João 3:17, 18) Bainhira rai-hamlaha iha apóstolu sira-nia tempu, kongregasaun mak arranja ai-han ba ema kristaun iha Judeia hodi ajuda sira. (Após 11:28, 29) Apóstolu Paulo no Pedro mós fó laran-manas ba ema kristaun atu hatudu laran-luak ba malu. (Rom 12:13; 1 Ped 4:9) Se ita hatudu laran-diʼak ba irmaun-irmán sira neʼebé mai vizita ita husi rai seluk, sá tan ho sira neʼebé moris iha perigu laran ka sira neʼebé ema fó terus tanba sira-nia fiar! Foin daudauk iha rai-Ukránia parte leste, Testemuña ba Jeová atus ba atus presiza halai tanba funu no ema fó terus sira. Triste tebes tanba balu lakon sira-nia moris. Maibé irmaun-irmán sira iha rai-Ukránia nia parte seluk no iha rai-Rúsia simu ita-nia irmaun-irmán sira neʼebé konsege halai. No tanba irmaun-irmán sira husi Ukránia no Rúsia kaer metin ba sira-nia pozisaun neutrál hodi la mete ba buat polítiku nian, sira kontinua deʼit “haklaken liafuan diʼak” ho badinas.—João 15:19; Após 8:4. w17.05 p. 4 par. 6-7