Janeiru

Bainhira Moisés mak membru ida iha família liurai nian iha rai-Ejitu, nia la hatudu laran-maus. Tuir loloos, nia sai hirus lalais toʼo nia oho mane ida neʼebé nia sente katak halo hahalok la justu. Moisés sente katak Jeová sei apoia ninia hahalok neʼe. Jeová uza tinan 40 atu ajuda Moisés komprende katak hahalok aten-brani deʼit la toʼo, maibé nia presiza laran-maus atu dirije ema Izraél. Atu sai laran-maus, nia mós tenke sai haraik an, halo tuir, no hatudu laran-diʼak. Nia aprende no sai ulun-naʼin neʼebé diʼak. (Éx 2:11, 12; Após 7:21-30, 36) Ohin loron, família nia ulun no katuas kongregasaun sira tenke banati-tuir Moisés. Bainhira ema la hatudu respeitu, keta sente an lalais. Ho haraik an rekoñese ita-nia sala. (Ecle 7:9, 20) Halo tuir Jeová nia matadalan kona-ba oinsá rezolve problema ruma. Sempre hatán ho laran-diʼak. (Prov 15:1) Hodi halo nuneʼe, família nia ulun no katuas sira bele halo Jeová kontente, haburas dame, no hatudu ezemplu kona-ba oinsá sai ema laran-maus. w19.02 p. 8 par. 1; p. 10 par. 9-10

Haree toʼok razaun ida tanbasá Jesus hanoin tebes ema. Nia haree katak ema sira-neʼe “hanesan bibi neʼebé bibi-atan la iha”. Karik Jesus haree katak ema balu kiak no serbisu makaʼas atu tau matan ba família. Karik ema seluk sente triste tanba ema neʼebé sira hadomi mate. Se nuneʼe, Jesus komprende sira-nia situasaun. Nia mós hasoru ona problema sira-neʼe balu. Jesus hanoin ema, no neʼe book nia atu fó kmaan ba sira. (Isa 61:1, 2) Saida mak ita aprende husi Jesus nia ezemplu? Hanesan iha Jesus nia tempu, ema barak ohin loron mós “hanesan bibi neʼebé bibi-atan la iha”. Sira hasoru problema barak. Ita iha liafuan diʼak kona-ba Maromak nia Ukun neʼebé sira presiza. (Apok 14:6) Entaun ita banati-tuir ita-nia Mestre no ita haklaken liafuan diʼak tanba ita “hanoin ema kiʼik no ema kiak”. (Sal 72:13) Ita hanoin tebes ema, no hakarak ajuda sira. w19.03 p. 21-22 par. 6-7

Ita iha razaun barak atu hadomi Jeová. Nia fó buat diʼak ba ita loroloron no mós hanorin ita lia-loos kona-ba ninia an no ninia hakarak. (João 8:31, 32) Nia fó ona kongregasaun Kristaun ba ita atu dirije no apoia ita. Nia ajuda ita atu tahan ita-nia problema sira agora, no nia fó ita esperansa atu hetan moris perfeitu ba nafatin iha futuru. (Apok 21:3, 4) Bainhira ita medita kona-ba buat barak neʼebé Jeová halo ona hodi hatudu ninia domin ba ita, ita sei hadomi nia liután. No bainhira ita hadomi Jeová, ita sei hamtaʼuk nia no lakohi halo buat neʼebé hakanek ninia laran. Bainhira Ita kontinua hanoin kona-ba benefísiu neʼebé Ita hetan husi Jeová nia prinsípiu, Ita-nia domin ba nia no ninia prinsípiu sira sei sai boot liután. Ita sei la monu ba Satanás nia lasu sira hodi la serbí Jeová. Hanoin toʼok kona-ba Ita-nia moris tinan rihun ida husi agora. Ita sei hanoin fali Ita-nia desizaun atu hetan batizmu nuʼudar desizaun neʼebé diʼak liu hotu! w19.03 p. 6 par. 14; p. 7 par. 19

Família tomak sei hetan benefísiu bainhira ema ida-idak iha família laran hatudu agradese. Bainhira kaben-naʼin sira hatudu agradese ba malu, sira sei sai besik liután. Sira mós sei sente fasil liu atu perdua malu. Laʼen neʼebé hatudu agradese ba ninia feen sei haree buat diʼak neʼebé ninia feen hatete no halo, no mós “hamriik no gaba nia”. (Prov 31:28) No feen neʼebé matenek fó-hatene ninia laʼen kona-ba buat espesífiku neʼebé nia hafolin husi ninia laʼen. Inan-aman sira, oinsá mak Ita bele hanorin Ita-nia oan atu hatudu agradese? Hanoin-hetan katak sira sei halo tuir buat neʼebé Ita hatete no halo. Tan neʼe hatudu ezemplu diʼak hodi dehan obrigadu bainhira sira halo buat ruma ba Ita. Liután neʼe, hanorin Ita-nia oan atu hatoʼo obrigadu bainhira ema halo buat ruma ba sira. Ajuda sira komprende katak hatudu agradese tenke mai husi laran no katak sira-nia liafuan bele lori buat diʼak barak. w19.02 p. 17 par. 14-15

Liafuan sira-neʼe hatudu katak Job hakarak atu hatudu nafatin integridade. Nia lakohi rende an ba Satanás nia lia-bosok; ita mós bele halo hanesan. Oinsá mak Ita mós envolve iha lia neʼebé Satanás hasaʼe kona-ba Job? Satanás mós duun ita ida-idak. Tuir loloos, Satanás dehan katak Ita ladún hadomi Jeová, Ita sei para serbí nia hodi bele salva Ita-nia moris, no Ita sei la kaer metin ba Ita-nia integridade. (Job 2:4, 5; Apok 12:10) Ida-neʼe hakanek Ita-nia laran, loos ka lae? Maibé, hanoin toʼok kona-ba neʼe: Jeová konfia Ita hodi fó Ita oportunidade furak ida. Jeová husik Satanás koko Ita-nia integridade. Jeová iha konfiansa katak Ita bele kaer metin ba Ita-nia integridade no hola parte atu hatudu katak Satanás mak bosok-teen. Maromak promete atu ajuda Ita hatudu integridade. (Ebr 13:6) Ita iha priviléjiu boot tanba Ukun-Naʼin Boot Liu konfia Ita! Ita komprende ona tanbasá mak integridade importante ka lae? Neʼe ajuda ita atu hatudu katak Satanás mak bosok-teen no ita tane aas ita-nia Aman nia naran no apoia ninia dalan atu ukun. w19.02 p. 5 par. 9-10

Jesus fó sai ba apóstolu sira kona-ba terus neʼebé sira sei hasoru. Tuirmai, nia anima sira atu halo tuir ninia ezemplu, nia haruka sira atu “aten-brani bá!” (João 16:1-4a, 33) Tinan barak liutiha, Jesus nia dixípulu sira nafatin banati-tuir ninia ezemplu kona-ba la hanoin an deʼit no hatudu aten-brani. Sira prontu atu apoia malu iha susar laran, maski neʼe lori terus ba sira. (Ebr 10:33, 34) Ohin loron ita mós banati-tuir Jesus nia ezemplu hodi hatudu aten-brani. Porezemplu, ita presiza aten-brani atu ajuda ita-nia irmaun-irmán sira neʼebé ema fó-terus tanba sira-nia fiar. Dala ruma, ema hatama ita-nia irmaun-irmán sira ba komarka maski sira la sala. Bainhira ida-neʼe akontese, ita tenke hakaʼas an hodi ajuda sira, inklui koʼalia hodi defende sira. (Flp 1:14; Ebr 13:19) Dalan seluk atu hatudu aten-brani mak hodi kontinua “haklaken ho aten-brani”. (Após 14:3) Hanesan Jesus, ita hakaʼas an atu haklaken mensajen kona-ba Maromak nia Ukun maski ema kontra no fó-terus ba ita. w19.01 p. 22-23 par. 8-9

Saida deʼit mak bele ajuda ita atu fó komentáriu neʼebé anima ema seluk iha reuniaun sira? Buat neʼebé importante liu mak prepara ba reuniaun ida-idak. Kuandu Ita halo planu nanis no prepara didiʼak, Ita sei fiar an atu fó komentáriu. (Prov 21:5) Prepara didiʼak ba reuniaun envolve saida deʼit? Sempre halo orasaun uluk antes estuda hodi husu Jeová haraik ninia espíritu santu ba ita. (Lc 11:13; 1 João 5:14) Tuirmai uza minutu balu hodi hanoin didiʼak kona-ba lisaun nia títulu, subtítulu sira, dezeñu sira, no kaixa sira. Bainhira estuda parágrafu ida-idak, hakaʼas an atu lee eskritura hotu. Hanoin kleʼan kona-ba informasaun, no tau atensaun ba pontu sira neʼebé ita hakarak atu fó komentáriu. Kuandu Ita prepara didiʼak, Ita sei hetan benefísiu no fasil liu ba Ita atu fó komentáriu.—2 Kor 9:6. w19.01 p. 9 par. 6; p. 11-12 par. 13-15

Jeová uza espíritu santu hodi book Habakuk atu hakerek nia problema sira, atu nuneʼe ita bele aprende lisaun importante husi livru Habakuk. Lisaun importante mak Jeová lakohi ita sente taʼuk atu fó sai ita-nia problema ka dúvida ba nia. Tuir loloos nia konvida ita atu halo orasaun atu fakar sai ita-nia laran ba nia. (Sal 50:15; 62:8) Habakuk hakbesik ba ninia Belun no Aman, Jeová, neʼebé nia tau fiar. Habakuk la estrese deʼit kona-ba ninia situasaun no koko atu hadiʼa rasik. Nia halo orasaun ba Jeová kona-ba ninia sentimentu no problema sira. Neʼe mak ezemplu neʼebé diʼak ba ita. Jeová mak Maromak neʼebé rona ba orasaun, nia konvida ita atu hatudu ita-nia fiar ba nia liuhusi halo orasaun no fó sai buat neʼebé iha ita-nia laran. (Sal 65:2) Se ita halo nuneʼe, ita bele haree oinsá Jeová hatán ita-nia orasaun sira. Ita sei sente kmaan husi ninia liman neʼebé hakoʼak ita liuhusi ninia matadalan. (Sal 73:23, 24) Nia sei ajuda ita hatene oinsá nia haree ita-nia situasaun maski ita hasoru daudaun susar ruma. Orasaun mak dalan neʼebé diʼak tebes atu hatudu katak ita tau fiar ba Jeová. w18.11 p. 13 par. 2; p. 14 par. 5-6

David la buka deʼit belun husi ema neʼebé idade hanesan. Hanoin-hetan David nia belun diʼak ida nia naran? Karik Ita hanoin kona-ba Jonatan. Bíblia konta kona-ba David ho Jonatan nia relasaun diʼak nuʼudar belun. Maibé tuir loloos, Jonatan boot liu David maizumenus tinan 30. Entaun, tanbasá mak sira bele sai belun diʼak? Neʼe tanba sira rua iha fiar neʼebé metin ba Maromak. Sira mós respeitu malu, no hafolin hahalok diʼak, hanesan aten-brani neʼebé sira ida-idak hatudu bainhira halo funu hasoru Maromak nia inimigu sira. (1 Sam 13:3; 14:13; 17:48-50; 18:1) Hanesan David ho Jonatan, ita mós bele hetan “ksolok boot” bainhira ita sai belun ho ema neʼebé hadomi Jeová no tau fiar ba nia. Irmán ida naran Kiera, neʼebé serbí Jeová tinan barak ona, hatete: “Haʼu habelun ona ho ema barak husi mundu tomak, husi situasaun moris no kultura neʼebé la hanesan.” Se Ita mós halo nuneʼe, Ita bele hatene ho loloos oinsá mak Bíblia no espíritu santu ajuda ita atu iha unidade. w18.12 p. 26 par. 11-13

Liafuan “sala seksuál”, neʼe inklui adultériu, prostituisaun, relasaun seksuál entre ema neʼebé seidauk kaben, hahalok omoseksuál, no relasaun seksuál entre ema no animál. Porezemplu, se mane kaben-naʼin ida halo sala seksuál, ninia feen bele deside se nia sei soe ninia laʼen ka lae. Jesus la dehan katak se ema ida halo sala seksuál (porneia), ninia kaben neʼebé la halo sala tenkesér soe malu ho nia. Porezemplu, feen ida bele hili atu kontinua moris ho ninia laʼen maski laʼen neʼe halo ona sala seksuál. Tanbasá? Karik feen neʼe hadomi nafatin ninia laʼen. Karik nia prontu atu perdua ninia laʼen no hakarak hadiʼa fali sira-nia moris kaben nian. No mós se feen neʼe halo divórsiu no la kaben fali, neʼe mós sei lori susar oioin ba nia. Porezemplu, oinsá kona-ba ninia presiza loroloron nian no mós seksuál nian? Nia sei sente mesamesak ka lae? Oinsá ho oan sira? (1 Kor 7:14) Klaru katak bainhira ema neʼebé la halo sala deside atu halo divórsiu, nia sei hasoru susar oioin. w18.12 p. 12 par. 10-11

Jeová odi hahalok la loos. (Isa 61:8) Jeová hatene katak tanba la perfeitu, dala ruma la fasil ba ita atu halo buat neʼebé loos. Maski nuneʼe, nia hakarak ita atu iha ninia hanoin no odi buat neʼebé aat. Se ita medita tansá Jeová odi buat neʼebé aat, neʼe sei ajuda ita atu halo Jeová nia hanoin sai ita-nian no hetan kbiit atu hasees an husi hahalok sala hotu. Kuandu ita aprende atu odi buat neʼebé aat, neʼe sei ajuda ita atu hatene katak hahalok balu sala maski Bíblia la temi. Porezemplu, iha dansa oin ida neʼebé la morál naran “Lap dancing” no agora dansa neʼe sai ona buat neʼebé baibain deʼit iha mundu. Ema balu sente katak dansa neʼe laʼós atu halo relasaun seksuál, entaun sira hanoin katak dansa neʼe la sala. Maibé Jeová sente hanesan neʼe ka lae? Hanoin-hetan katak Jeová odi buat hotu neʼebé aat. Tan neʼe, mai ita hasees an husi hahalok sala hotu hodi aprende atu haburas kontrola an no odi buat neʼebé Jeová odi.​—Rom 12:9. w18.11 p. 25 par. 11-12

Apóstolu Paulo fiar katak Jeová nia promesa mak importante tebes toʼo temi ida-neʼe dala tolu iha ninia karta sira. (Rom 1:17; Gal 3:11; Ebr 10:38) Ita bele fiar katak, problema saida deʼit neʼebé ita hasoru, naran katak ita hatudu laran-metin ba Jeová, ita sei haree ninia promesa sira sai loos. Jeová hakarak ita atu tau fokus ba ita-nia esperansa kona-ba futuru. Livru Habakuk hanorin lisaun importante tebes ba ita neʼebé moris iha loron ikus sira-neʼe. Jeová promete atu fó moris rohan-laek ba ema laran-loos neʼebé tau fiar ba nia. Tan neʼe, mai ita kontinua hametin ita-nia fiar ba Maromak maski ita hasoru daudaun susar no problema oioin. Buat neʼebé Jeová koʼalia ba Habakuk hatudu katak nia sei apoia no salva ita. Jeová hatudu laran-diʼak hodi husu ita atu tau fiar ba nia no hein ho pasiénsia ba tempu neʼebé nia deside ona atu lori ninia Ukun hodi ukun mundu tomak. Iha tempu neʼebá mundu sei sai nakonu ho ema neʼebé kontente no dame, ema neʼebé adora Jeová.​—Mt 5:5; Ebr 10:36-39. w18.11 p. 16 par. 15-17

Iha Jesus nia tempu, iha ema balu neʼebé foufoun simu lia-loos, maibé ikusmai la kontinua laʼo tan iha lia-loos. Porezemplu, depois Jesus halo milagre hodi fó hahán ba ema-lubun, ema-lubun neʼe laʼo tuir nia toʼo Tasi Galileia nia sorin seluk. Maibé tuirmai Jesus koʼalia liafuan neʼebé halo sira hakfodak tebes hodi dehan: “Se imi la han Oan-Mane husi Ema nia isin no la hemu ninia raan, imi sei la hetan moris.” Duké husu Jesus atu esplika buat neʼebé nia koʼalia, sira dehan: “Liafuan sira-neʼe todan tebes. Sé mak bele rona ida-neʼe?” Tan neʼe, “dixípulu barak fila fali ba buat neʼebé uluk sira halo no la laʼo tuir tan nia”. (João 6:53-66) Triste mós tanba ohin loron ema balu la kaer metin ona ba lia-loos. Ema balu sidi tanba irmaun neʼebé kaer responsabilidade koʼalia ka halo buat ruma neʼebé la kona sira-nia laran. Ema seluk la kontente tanba sira simu konsellu husi Bíblia ka tanba sira hirus malu ho ema ruma iha kongregasaun. w18.11 p. 9 par. 3-5

Se Maromak nia organizasaun halo mudansa ruma neʼebé ita la komprende tanbasá, diʼak atu hanoin kona-ba dalan neʼebé Kristu dirije Maromak nia povu iha tempu uluk. Maski iha Josué ka apóstolu sira-nia tempu, Kristu sempre fó matadalan neʼebé matenek hodi proteje Maromak nia povu, hametin sira-nia fiar, no ajuda sira atu iha unidade. (Ebr 13:8) Ohin loron, “atan laran-metin no matenek” sempre fó matadalan ba ita iha tempu neʼebé loos. (Mt 24:45) Bainhira ita haree dalan neʼebé Kristu dirije ita, ita bele haree duni katak nia hakarak ajuda ita atu iha fiar neʼebé metin. Kristu mós ajuda ita atu tau fokus nafatin ba serbisu haklaken neʼebé importante tebes.​—Mc 13:10. w18.10 p. 25 par. 13-16

Ita bele haree ezemplu neʼebé kapás kona-ba kontrola an bainhira ema provoka ita iha 2 Samuel 16:5-13. Simei mak ema ida husi Liurai Saul nia família. Nia trata aat no ataka David ho David nia atan sira. Maski David iha kbiit atu hapara situasaun neʼe, maibé nia hatudu hahalok tahan. Oinsá mak David bele hatudu nafatin hahalok kontrola an? David hakerek terseiru Salmo bainhira ninia oan Absalão koko atu oho nia. Durante tempu neʼe mak Simei ataka David, maibé David sai kalma nafatin. David hetan kbiit husi neʼebé? Salmo 3:4 fó sai David nia liafuan hodi dehan: “Haʼu sei bolu Jeová ho lian makaʼas, no nia sei hatán haʼu.” Se ema trata ita iha dalan neʼebé aat, ita mós presiza halo orasaun hanesan ho David. Hodi nuneʼe Jeová haraik espíritu santu ba ita hodi ajuda ita atu tahan. Ita bele hanoin kona-ba situasaun ruma neʼebé Ita presiza kontrola an ka atu fó perdua ba ema neʼebé trata aat Ita ka lae? Ita fiar katak Jeová hatene kona-ba Ita-nia terus no nia sei ajuda no fó bensaun ba Ita ka lae? w18.09 p. 6-7 par. 16-17

Bainhira haklaken, ita presiza hatudu beibeik laran-diʼak no respeitu ba ema iha ita-nia haklaken-fatin. Atu halo nuneʼe, ita presiza hatene didiʼak sira. Hanoin-hetan katak kuandu ita haklaken husi uma ba uma, ema bele hakfodak tanba sira la konvida ita. Tan neʼe importante atu vizita ema iha tempu neʼebé sira hakarak koʼalia ho ita. (Mt 7:12) Porezemplu, ema iha Ita-nia haklaken-fatin sempre hadeer tarde iha findesemana ka lae? Se nuneʼe, karik diʼak atu hahú haklaken iha dalan, haklaken públiku, ka halo vizita fali ba ema neʼebé Ita hatene katak hakarak koʼalia ho ita. Ema barak okupadu, tan neʼe diʼak atu vizita sira lalais deʼit, liuliu se ita foin hasoru ema neʼe. (1 Kor 9:20-23) Kuandu ema haree katak ita komprende sira-nia situasaun, karik loron seluk sira sei hakarak koʼalia ho ita. Kuandu ita hatudu hahalok sira neʼebé mai husi Maromak nia espíritu, ita sei sai “Maromak nia maluk serbisu-naʼin”. Karik Jeová mós sei uza ita atu ajuda ema aprende kona-ba lia-loos.​—1 Kor 3:6, 7. w18.09 p. 32 par. 15-17

Oinsá mak hatudu hahalok laran-maus bele ajuda Ita atu sai kontente? Antes aprende kona-ba lia-loos, ema barak la hatudu respeitu ba ema seluk no gosta hamosu problema. Maibé, kuandu aprende tiha lia-loos, sira troka hodi sai fali “ema foun”. Agora sira hatudu fali “hahalok domin ho laran-sadiʼa nuʼudar [sira-nia] hatais hamutuk ho laran-diʼak, haraik-an, laran-maus, no pasiénsia”. (Kol 3:9-12) Rezultadu mak sira moris ho kontente no iha dame, no mós iha relasaun neʼebé diʼak ho ema seluk. No Maromak nia Liafuan mós promete katak sira sei “simu rai nuʼudar liman-rohan”. (Sal 37:8-10, 29) Iha dalan saida deʼit mak sira neʼebé laran-maus “simu rai nuʼudar liman-rohan”? Ema kose-mina sira sei simu rai nuʼudar liman-rohan kuandu sira ukun rai neʼe nuʼudar amlulik no liurai. (Apok 20:6) Ema millaun ba millaun neʼebé la iha esperansa atu bá lalehan sei simu rai nuʼudar liman-rohan kuandu sira hetan oportunidade atu moris ba nafatin iha rai. Sira sei sai perfeitu, iha dame no kontente. w18.09 p. 19 par. 8-9

Jeová hatudu ezemplu neʼebé diʼak liu hotu kona-ba neʼe. (Gên 18:32; Jos 10:14) Porezemplu, lee toʼok buat neʼebé temi iha Êxodo 32:11-14. Maski Jeová la presiza rona ba Moisés nia opiniaun, maibé Jeová husik Moisés atu fó sai ninia sentimentu. Ita sei lakohi rona ho pasiénsia ba ema neʼebé uluk halo sala, no halo tuir ninia sujestaun, loos ka lae? Maibé, Jeová halo nuneʼe duni, nia rona ho pasiénsia ba ema hotu nia orasaun neʼebé hatudu fiar ba nia. Husu ba Ita-nia an: ‘Se Jeová hatudu haraik-an hodi rona ba ema hanesan Abraão, Rakel, Moisés, Josué, Manoá, Elias, no Ezekias, oinsá mak haʼu bele banati-tuir ninia ezemplu? Haʼu bele hatudu respeitu liután ba irmaun-irmán sira hotu hodi rona sira-nia sujestaun no halo tuir sira-nia sujestaun neʼebé diʼak ka lae? Iha ema balu husi kongregasaun ka família neʼebé presiza haʼu-nia atensaun ka lae? Haʼu bele halo saida kona-ba neʼe?’​—Gên 30:6; Juíz 13:9; 1 Reis 17:22; 2 Crôn 30:20. w18.09 p. 6 par. 14-15

Se ema seluk mak hanoin an deʼit, dala ruma susar ba ita atu kontinua hatudu hahalok laran-luak. Maibé Jesus fó-hanoin ba ita katak, mandamentu rua neʼebé boot liu mak atu hadomi Jeová ho laran, moris, neon, no forsa tomak no atu hadomi ema seluk hanesan ita-nia an rasik. (Mc 12:28-31) Ema neʼebé hadomi Jeová hakarak banati-tuir nia. Jeová no Jesus laran-luak tebes, no sira hakarak ita atu halo tuir sira-nia ezemplu, tanba neʼe bele halo ita kontente husi laran. Se ita mak hakaʼas an atu hatudu laran-luak liuhusi buat neʼebé ita halo ba Maromak no ema, ita sei fó glória ba Jeová no mós lori benefísiu ba ita-nia an no ema seluk. Karik Ita hakaʼas an daudaun atu hatudu laran-luak no ajuda ema seluk, liuliu Ita-nia irmaun-irmán sira. (Gal 6:10) Se Ita mak kontinua atu halo buat sira-neʼe, ema sei agradese no hadomi Ita, no Ita sei hetan ksolok. w18.08 p. 22 par. 19-20

Ba Jeová, ema husi rasa, nasionalidade, suku, ka língua la importante, nia simu ema hotu, naran katak ema hamtaʼuk nia no halo buat neʼebé loos. (Gal 3:26-28; Apok 7:9, 10) Karik Ita hatene ona kona-ba neʼe. Maibé oinsá se Ita sai boot iha nasaun ka família neʼebé ema sempre halo diskriminasaun ba ema seluk? Maski karik Ita hanoin Ita nunka iha hahalok todan ba sorin, maibé oinsá ho Ita-nia laran, Ita iha sentimentu uitoan kona-ba diskriminasaun ka lae? Maski Pedro ajuda tiha ema seluk hodi haree katak Maromak la todan ba sorin, nia sei hatudu nafatin hahalok diskriminasaun ba ema seluk. (Gal 2:11-14) Entaun, oinsá mak ita la tesi lia tan ema seluk tuir deʼit buat neʼebé matan haree? Ita presiza uza Maromak nia Liafuan atu analiza didiʼak ita-nia an se ita iha sentimentu ka hanoin kona-ba diskriminasaun ka lae. (Sal 119:105) Karik ita mós bele husu ita-nia belun diʼak atu fó-hatene se ita iha hahalok diskriminasaun ruma ka lae, tanba ita la hatene ita rasik iha hahalok neʼe ka lae. (Gal 2:11, 14) Dala ruma ita sai toman ona ho hahalok neʼe toʼo la sente katak ita iha duni hahalok diskriminasaun. w18.08 p. 9 par. 5-6

Husu ba Ita-nia an: ‘Ema seluk bele haree ka lae katak haʼu hatudu laran-metin ba Jeová? Haʼu buka oportunidade ka lae atu fó-hatene ema seluk katak haʼu mak Testemuña ba Jeová?’ Imajina toʼok Jeová nia laran triste se ita moe atu fó-hatene ba ema seluk katak ita mak ninian. (Sal 119:46; Mc 8:38) Triste mak Testemuña balu banati-tuir espíritu mundu neʼe nian, tan neʼe ema la bele haree saida mak la hanesan entre ema neʼebé adora Jeová ho sira neʼebé lae. (1 Kor 2:12) “Espíritu mundu neʼe nian” halo ema tau fokus liu ba sira rasik nia hakarak. (Éf 2:3) Porezemplu, maski ita simu konsellu dala barak kona-ba hatais, ema balu hatais nafatin iha dalan neʼebé la hatudu respeitu. Sira hatais roupa neʼebé aperta no hatudu isin, no aat liután mak sira mós hatais hanesan neʼe iha reuniaun sira. Balu tesi no halo sira-nia fuuk tuir modelu mundu nian ka atu dada atensaun deʼit ba sira-nia an. (1 Tim 2:9, 10) Rezultadu husi neʼe mak, karik susar ba ema seluk atu hatene katak sira mak Testemuña ba Jeová.​—Tgo 4:4. w18.07 p. 24-25 par. 11-12

Ita hotu mak maun-alin tanba ita hotu mak Adão nia oan. (Após 17:26) Maibé Jesus mós esplika katak ninia dixípulu sira mak hanesan maun-alin no feton tanba sira hotu rekoñese Jeová nuʼudar sira-nia aman iha lalehan. (Mt 12:50) No sira sai ona parte ba Maromak nia família neʼebé iha unidade tanba sira-nia domin no fiar. Tan neʼe mak apóstolu sira bolu ema kristaun sira hotu mak sira-nia maun-alin iha karta neʼebé sira haruka ba kongregasaun sira. (Rom 1:13; 1 João 3:13) Depois esplika tiha katak ita tenke haree malu nuʼudar maun-alin sira, Jesus fó-hanoin tan sira katak sira presiza haraik an. (Mt 23:11, 12) Apóstolu sira-nia hahalok foti-an mak halo sira la iha unidade. Iha Jesus nia tempu, ema hatudu hahalok foti-an no gosta gaba kona-ba sira-nia rasa. Ema judeu sira dehan katak sira mak diʼak liu fali ema seluk tanba sira mai husi Abraão nia jerasaun. Maibé João Batista hatete ba sira: “Maromak iha kbiit atu halo fatuk sira-neʼe sai Abraão nia oan.”​—Lc 3:8. w18.06 p. 9-10 par. 8-9

Se buat ida ka ema ruma halo ita sai hirus beibeik, ita hanoin uluk antes koʼalia ka lae? Ita kontrola ita-nia sentimentu ka lae? (Prov 10:19; Mt 5:22) Bainhira ema seluk provoka ita, ita presiza aprende oinsá atu “husik ida-neʼe ba Maromak nia hirus”, ka fó fatin ba Jeová mak atu sai hirus. (Rom 12:17-21) Neʼe katak sá? Duké sai hirus, diʼak atu hein ho pasiénsia ba Jeová mak atu halo buat ruma kona-ba ita-nia problema iha tempu neʼebé loos ba nia. Se ita mak vinga an duké hein ba Jeová, ita sei la hatudu respeitu ba nia. Ita halo tuir didiʼak matadalan foun sira neʼebé Jeová fó ba ita ka lae? Ita tenke prontu atu halo tuir matadalan foun neʼebé Jeová fó liuhusi ninia organizasaun duké halo tuir deʼit buat neʼebé ita halo husi tempu uluk. (Ebr 13:17) No ita mós tenke kuidadu atu la “halo liu fali buat neʼebé hakerek tiha ona”. (1 Kor 4:6) Se ita mak halo tuir didiʼak Jeová nia matadalan sira, ita hateke nafatin ba nia. w18.07 p. 15-16 par. 17-18

Baibain, ukun-fuan sira aplika liuliu ba situasaun neʼebé espesífiku, maibé prinsípiu bele aplika iha situasaun barak. Tan neʼe, nuʼudar ita laʼo ba oin hodi sai ema kristaun neʼebé maduru, ita sei hafolin liután prinsípiu sira. Porezemplu, labarik ida la komprende tanbasá perigu atu habelun ho ema neʼebé ladiʼak. Tan neʼe, ninia inan-aman fó ukun-fuan ba nia atu proteje nia. (1 Kor 15:33) Maibé nuʼudar labarik neʼe sai boot, nia aprende oinsá atu uza Bíblia nia prinsípiu sira. Neʼe sei ajuda nia atu hili rasik ema neʼebé diʼak atu sai ninia belun. (1 Kor 13:11; 14:20) Bainhira ita uza Bíblia nia prinsípiu sira, ita-nia konxiénsia hetan treinu liután no bele dirije ita iha dalan neʼebé loos. Ita bele komprende ho diʼak liután saida mak Maromak hakarak ita atu halo iha situasaun ida-idak. Ita iha buat hotu neʼebé ita presiza hodi foti desizaun neʼebé halo Jeová kontente. Iha Bíblia, iha ukun-fuan no prinsípiu sira neʼebé ajuda ita “sai kompletu hodi prontu atu halo serbisu diʼak hotu”.​—2 Tim 3:16, 17. w18.06 p. 19 par. 14; p. 20 par. 16-17

Jesus nia istória hatudu katak ema Samaria neʼe bele hanorin ema judeu sira kona-ba oinsá ita tenke hadomi ema hotu. (Lc 10:25-37) Antes Jesus saʼe ba lalehan, nia haruka ninia dixípulu sira atu haklaken iha “Judeia tomak no iha Samaria, no toʼo rai nia rohan”. (Após 1:8) Atu halo ida-neʼe, Jesus nia dixípulu sira tenke halakon tiha hahalok foti-an no diskriminasaun. Jesus sempre koʼalia kona-ba ema estranjeiru sira-nia hahalok diʼak, no ida-neʼe prepara ninia dixípulu sira atu haklaken ba nasaun hotu. Porezemplu, nia gaba kapitaun tropa ida neʼebé husi nasaun seluk tanba ninia fiar neʼebé metin. (Mt 8:5-10) Iha ninia hela-fatin iha Nazaré, Jesus esplika oinsá Jeová ajuda ona ema husi nasaun seluk hanesan feto Fenísia neʼebé faluk husi Sarepta no ema Síria neʼebé moras-lepra naran Naaman. (Lc 4:25-27) No Jesus laʼós haklaken deʼit ba feto Samaria, maibé nia mós hela iha sidade neʼe ba loron rua tanba ema barak interese kona-ba mensajen neʼebé nia hatoʼo.​—João 4:21-24, 40. w18.06 p. 10 par. 10-11

Apóstolu Paulo kompara ema kristaun hanesan soldadu. Ita halo daudauk funu, no ita-nia inimigu iha duni! Ita-nia funu laʼós hasoru ema, maibé hasoru Satanás ho anju aat sira. Sira mak funu-naʼin neʼebé matenek. Karik ita sente ita la bele manán funu neʼe, liuliu se ita mak joven. Maibé joven bele funu manán hasoru inimigu ho forsa boot sira-neʼe ka lae? Bele tanba iha joven balu neʼebé manán daudauk. Oinsá? Tanba sira hetan forsa husi Jeová. Sira “tau hatais funu nian hotu husi Maromak” hanesan soldadu hodi prepara an ba funu. (Éf 6:10-12) Bainhira Paulo halo komparasaun neʼe, karik nia hanoin kona-ba hatais funu nian ka ekipamentu funu nian neʼebé soldadu Roma sira uza.​—Após 28:16. w18.05 p. 27 par. 1-2

Razaun importante liu tanbasá ita haklaken mak atu fó glória ba Jeová no halo santu ninia naran. (João 15:1, 8) Maromak nia naran santu ona. La iha buat seluk tan mak ita bele halo atu halo naran neʼe sai santu liu. Entaun, iha dalan saida mak ita-nia haklaken bele halo santu Maromak nia naran? Profeta Isaías hatete: “Jeová neʼebé ukun tropa lalehan nian mak Ida neʼebé imi tenke hafolin nuʼudar santu.” (Isa 8:13) Se ita hafolin ka hatudu respeitu ba Jeová nia naran liu fali naran sira seluk no ajuda ema seluk atu komprende katak naran neʼe santu, tuir loloos ita halo santu daudauk Jeová nia naran. Porezemplu, hodi hanorin ema kona-ba Jeová nia hahalok furak no hakarak sira, tuir loloos ita defende daudauk Jeová nia naran atu hatudu katak Satanás mak bosok-teen. (Gên 3:1-5) Ita mós halo santu Maromak nia naran bainhira ita ajuda ema atu hatene katak Jeová mak merese atu “simu glória, hahiʼi no kbiit”.​—Apok 4:11. w18.05 p. 18 par. 3-4

Razaun importante liu hotu atu halo planu espirituál mak atu hatudu agradese ba Jeová nia domin no ba buat hotu neʼebé nia fó ba ita. Hanoin toʼok Jeová fó ona saida ba Ita: moris, fiar, Bíblia, kongregasaun, no esperansa atu moris ba nafatin iha Paraízu. Bainhira Ita halo planu espirituál, Ita hatudu ba Jeová katak Ita agradese tebes ba buat hotu neʼe no neʼe halo Ita hakbesik liután ba nia. Bainhira ita halo planu espirituál no hakaʼas an atu kumpre planu sira-neʼe, tuir loloos ita halo daudaun serbisu diʼak ba Jeová, no neʼe halo Ita hakbesik liután ba nia. Apóstolu Paulo hatete: “Maromak nunka hatudu hahalok aat hodi haluha imi-nia serbisu no imi-nia domin neʼebé imi hatudu ba ninia naran.” (Ebr 6:10) Keta hanoin katak Ita tinan seidauk toʼo atu bele halo planu espirituál. Oinsá ho Ita? Ita bele hanoin kona-ba planu ruma neʼebé Ita bele halo ka lae, no hakaʼas an hodi kumpre planu neʼe?​—Flp 1:10, 11. w18.04 p. 26 par. 5-6

Iha apóstolu sira-nia tempu, ema kristaun sira hela iha Roma nia ukun, no ema sira iha tempu neʼebá orgullu tebes kona-ba sira-nia lei, sistema justisa, no liberdade. Maski Roma mak governu neʼebé forsa boot tebes, maibé serbisu barak neʼebé todan, sira uza atan mak halo. Iha tempu balu durante Roma nia ukun, maizumenus ema porsentu 30 mak atan. Ita bele fiar katak, tópiku importante neʼebé ema baibain no mós ema kristaun sira sempre koʼalia mak kona-ba atan no liberdade. Apóstolu Paulo koʼalia dala barak kona-ba liberdade. Maibé nia nunka koko atu rezolve problema sira iha mundu neʼe, hanesan ema barak iha tempu neʼebá koko atu halo. Nia no ninia maluk kristaun sira koko makaʼas hodi hanorin deʼit liafuan diʼak kona-ba Maromak nia Ukun no ajuda ema atu komprende oinsá mak Jesus Kristu nia sakrifísiu iha folin boot tebes. w18.04 p. 8 par. 1-2

Iha kalan antes Jesus mate, nia hatete ba apóstolu Pedro liafuan sira neʼebé hakerek iha leten. Pedro sai duni hanesan kongregasaun nia riin iha tempu uluk. (Gal 2:9) Buat neʼebé nia halo ho aten-brani komesa husi Pentekostes hametin tebes irmaun-irmán sira. Serbí tiha ba tinan barak nia hakerek karta ba irmaun-irmán sira hodi dehan: “Haʼu hakerek ba imi ho liafuan balu, atu fó laran-manas ba imi no atu fó sasin ho loloos katak Maromak hatudu duni ba imi ninia laran-diʼak neʼebé boot. Kaer metin ba laran-diʼak neʼe.” (1 Ped 5:12) Pedro nia karta sira hametin duni ema kristaun sira iha ninia tempu. No karta sira-neʼe mós hametin daudauk ita hodi hein nafatin atu haree Jeová nia promesa sira sai loos.​—2 Ped 3:13. w18.04 p. 17-18 par. 12-13

Atu moris tuir sira rasik nia hakarak, neʼe mak liberdade neʼebé ema hotu hakarak hetan. Tanba hakarak neʼe mak ema halo protesta kona-ba liberdade, no dala ruma mós kontra hodi halo revolusaun. Maibé halo buat sira-neʼe fó duni liberdade ba sira ka lae? Lae. Tanba baibain ninia konsekuénsia mak terus no mate. Liurai Salomão nia liafuan neʼebé hakerek iha Eclesiastes 8:9 fó prova duni ba lia-loos neʼe: “Ema mak domina ema seluk, no neʼe lori deʼit susar.” Iha eskritura ba ohin, Tiago fó sai saida mak ita presiza halo atu bele hetan ksolok no kontente. Ukun-fuan neʼebé kompletu mai husi Jeová no nia hatene liu hotu kona-ba saida mak bele halo ita kontente no haksolok iha dalan neʼebé loos. Nia fó liberdade neʼebé loos ba Adão no Eva no mós buat seluk tan hodi halo sira moris ho kontente. w18.04 p. 3 par. 1-3