Fevereiru

Jesus hatudu laran-sadiʼa neʼebé boot ba ema. Ema bele sente ninia domin ba sira no neʼe book sira atu rona ba liafuan diʼak kona-ba Maromak nia Ukun. Bainhira ita haburas liután hahalok laran-sadiʼa ba ema, ita sei hatene oinsá atu ajuda ema iha dalan diʼak liu bainhira ita haklaken. Saida mak bele ajuda ita atu hanoin ema bainhira ita haklaken? Bainhira ita hasoru ema iha serbisu haklaken, ita hakarak tau ita-nia an iha sira-nia situasaun no halo ba sira hanesan ita hakarak sira halo ba ita. (Mt 7:12) Hanoin ema ida-idak nia presiza. Labele uza tópiku hanesan deʼit ba ema hotu neʼebé ita hasoru iha serbisu haklaken. Maibé, ita tenke hanoin kona-ba ema ida-idak nia situasaun no hanoin. Diʼak atu husu pergunta ho respeitu hodi koñese ema neʼe. (Prov 20:5) Bainhira ita husu pergunta, neʼe hanesan ita husik sira atu fó sai tanbasá sira presiza liafuan diʼak. Tuirmai, ita bele hatudu katak ita hanoin sira no fó ajuda tuir sira-nia presiza, hanesan Jesus halo.​—Kompara ho 1 Korinto 9:19-23. w19.03 p. 20 par. 2; p. 22 par. 8-9

Adão ho Eva hatudu katak sira la hafolin buat diʼak hotu neʼebé Jeová halo ona ba sira. Ita hotu iha oportunidade atu hatudu katak ita la hanesan ho sira, no ita hafolin buat hotu neʼebé Jeová halo ona ba ita. Hodi hetan batizmu, ita hatudu katak ita fiar Jeová mak iha direitu atu deside saida mak loos no sala. Ita hatudu katak ita hadomi ita-nia Aman no tau fiar ba nia. Depois Ita hetan tiha batizmu Ita presiza halo tuir Jeová nia hakarak loroloron, laʼós Ita-nia hakarak rasik. Ema rihun ba rihun halaʼo moris hanesan neʼe. Ita bele sai hanesan sira se Ita kontinua aumenta Ita-nia koñesimentu kona-ba Maromak nia Liafuan Bíblia, halibur hamutuk beibeik ho Ita-nia irmaun-irmán sira, no ho badinas haklaken kona-ba Ita-nia Aman domin nian. (Ebr 10:24, 25) Bainhira Ita presiza halo desizaun, rona ba konsellu neʼebé Jeová fó liuhusi ninia Liafuan no ninia organizasaun. (Isa 30:21) Hodi halo nuneʼe, Ita sei hetan susesu iha buat hotu neʼebé Ita halo.​—Prov 16:20. w19.03 p. 7 par. 17-18

Jeová fó ita ai-han espirituál neʼebé barak. Porezemplu, ita simu hanorin neʼebé ajuda ita liuhusi ita-nia reuniaun, livru, no sítiu sira. Karik ita rona ona diskursu ida, lee informasaun, ka haree Broadcasting ida no hanoin: ‘Haʼu presiza duni ida-neʼe.’ Entaun oinsá mak ita bele hatudu agradese ba Jeová? (Kol 3:15) Dalan ida mak hodi hatoʼo beibeik agradese ba nia liuhusi orasaun tanba prezente diʼak sira-neʼe. Ita mós hatudu agradese ba Jeová bainhira ita hamoos ita-nia Reuniaun-Fatin. Ita presiza hola parte beibeik atu hamoos no tau matan ba ita-nia Reuniaun-Fatin, no ema neʼebé uza ekipamentu eletróniku sira iha kongregasaun presiza uza ho kuidadu. Bainhira ita tau matan didiʼak ba Reuniaun-Fatin, neʼe sei dura ba tempu kleur no la presiza hadiʼa buat barak. Hodi halo nuneʼe, ita bele uza didiʼak osan neʼebé iha hodi harii no hadiʼa Reuniaun-Fatin seluk iha mundu tomak. w19.02 p. 18 par. 17-18

Job uza tempu atu medita kona-ba Jeová nia kriasaun furak. (Job 26:7, 8) Nia hafolin liután Jeová bainhira nia hanoin kona-ba mundu, lalehan, kalohan, no rai-tarutu, maibé nia rekoñese katak nia seidauk hatene buat hotu kona-ba kriasaun. Nia mós hafolin Jeová nia liafuan sira no hatete: “Haʼu hafolin ninia liafuan sira.” (Job 23:12) Job admira buat hotu neʼebé Jeová halo no hatudu respeitu kleʼan ba Jeová, neʼe book nia atu hadomi no halo kontente ninia Aman. Tan neʼe, Job hakarak liután atu hatudu integridade. Ita mós presiza halo hanesan Job. Ita hatene buat barak liu kona-ba kriasaun duké ema iha Job nia tempu. No ita mós iha Bíblia kompletu neʼebé bele ajuda ita atu hatene Jeová. Buat hotu neʼebé ita aprende bele halo ita hafolin liután Jeová. Bainhira ita hafolin no respeitu Jeová nia hakarak, neʼe sei book ita atu hadomi, halo tuir no hametin hakarak atu kaer metin ba ita-nia integridade.​—Job 28:28. w19.02 p. 5 par. 12

Ba tempu kleur, ukun-naʼin sira kontra Jeová nia povu. Karik sira duun ita kona-ba krime oioin, maibé loloos problema nia hun mak tanba ita hili atu “halo tuir Maromak nuʼudar ukun-naʼin duké halo tuir ema”. (Após 5:29) Karik ema goza ita, hatama ita ba komarka, ka baku ita. Maibé ho Jeová nia ajuda, ita sei la selu aat fali no nafatin kalma bainhira hetan koko. Hanoin toʼok ezemplu husi mane Ebreu naʼin-tolu neʼebé sai dadur. Sira mak Hananias, Misael, no Azarias. Ho kalma, sira esplika ba liurai tanbasá mak sira lakohi adora estátua neʼebé nia halo. Sira prontu atu simu konsekuénsia naran deʼit neʼebé Jeová husik atu akontese. (Dan 3:1, 8-28) Bainhira ita hetan koko kona-ba ita-nia laran-metin, oinsá mak ita bele banati-tuir mane Ebreu naʼin-tolu? Ita hatudu haraik an hodi fiar katak Jeová sei tau matan ba ita. (Sal 118:7) Ita hatán ho kalma no respeitu ba ema neʼebé duun ita. (1 Ped 3:15) No ita lakohi duni halo buat neʼebé estraga ita-nia relasaun ho ita-nia Aman neʼebé hadomi ita. w19.02 p. 10-11 par. 11-13

Ita bele sai aten-brani liután hodi hanoin kona-ba esperansa neʼebé ita hetan tanba Kristu nia sakrifísiu. (João 3:16; Éf 1:7) Durante semana balu antes Memoriál, ita iha oportunidade espesiál atu aumenta ita-nia agradese ba Jesus nia sakrifísiu. Durante tempu neʼe, tuir programa atu lee Bíblia ba Memoriál no medita kona-ba akontesimentu sira antes Jesus nia mate. Hodi halo ida-neʼe, kuandu ita halibur hamutuk hodi komemora Naʼi nia Han-Kalan, ita sei hafolin liután tanbasá tua-uvas no paun neʼebé uza iha Memoriál no Jesus nia sakrifísiu mak importante. Bainhira ita hafolin buat neʼebé Jesus no Jeová halo ona ba ita no komprende oinsá ida-neʼe lori benefísiu mai ita no ita-nia família, ita-nia esperansa sai metin liután, no neʼe motiva ita atu tahan toʼo rohan ho aten-brani. (Ebr 12:3) Ita agradese tebes tanba Jesus kontinua hatudu hahalok sira-neʼe nuʼudar ita-nia Amlulik Boot iha lalehan, neʼebé harohan ba ita-nia diʼak! (Ebr 7:24, 25) Ita tenke laran-metin hodi komemora Jesus nia mate tuir ninia mandamentu hodi hatudu katak ita hafolin ida-neʼe.​—Lc 22:19, 20. w19.01 p. 22 par. 8; p. 23-24 par. 10-11

Jeová fó ba ita ida-idak priviléjiu atu hahiʼi nia. Ita-nia komentáriu sira iha reuniaun mak parte husi ita-nia “sakrifísiu hahiʼi nian”, no só ita rasik deʼit mak bele fó sakrifísiu neʼe. (Ebr 13:15) Jeová haruka ita ida-idak atu fó sakrifísiu ka komentáriu neʼebé hanesan ka lae? Lae duni! Ita presiza haree reuniaun sira hanesan han hamutuk ho belun diʼak sira. Imajina toʼok kolega balu iha kongregasaun arranja festa kiʼik ida, no sira husu ita atu prepara hahán ruma neʼebé simples. Saida mak ita sei halo? Karik ita sei sente laran-taridu uitoan, maski nuneʼe ita sei hakaʼas an atu prepara ai-han ruma neʼebé ema hotu sei gosta. Jeová mak hanesan festa-naʼin, nia prepara meza neʼebé nakonu ho ai-han espirituál iha reuniaun sira. (Sal 23:5; Mt 24:45) No nia sente kontente bainhira ita lori prezente simples ida, tuir ita-nia kbiit. Tan neʼe, mai ita prepara didiʼak no fó komentáriu tuir ita-nia kbiit. Hodi halo nuneʼe, Ita laʼós deʼit han iha Jeová nia meza, maibé Ita mós lori prezente ida atu fahe ba kongregasaun. w19.01 p. 8 par. 3; p. 13 par. 20

Iha Bíblia nia tempu, dala barak adorasaun falsu inklui hahalok seksuál. (Os 4:13, 14) Iha tempu neʼebá, ema barak gosta adorasaun falsu tanba sira bele halo tuir sira-nia hakarak isin nian. Maibé adorasaun hanesan neʼe halo sira kontente ka lae? Lae duni! David hatete: “Ema sira neʼebé buka atu serbí maromak sira seluk sei hetan susar barak.” Sira mós hasaʼe sira-nia oan nuʼudar sakrifísiu ba maromak falsu sira! (Isa 57:5) Jeová hakribi hahalok aat neʼe. (Jer 7:31) Ohin loron, relijiaun falsu barak simu sala seksuál, inklui mós hahalok omoseksuál. Neʼe bele halo ema sente livre, maibé realidade mak sira “hetan susar barak”. (1 Kor 6:18, 19) Ita mós haree ida-neʼe ka lae? Tan neʼe, joven sira, rona ba Ita-nia Aman iha lalehan. Fiar metin bá katak halo tuir Maromak sei lori diʼak ba Ita. Hanoin didiʼak kona-ba konsekuénsia husi hahalok neʼebé la tuir morál. Maski hahalok sala bele halo Ita kontente ba tempu uitoan, neʼe sei lori duni susar boot ba Ita.​—Gal 6:8. w18.12 p. 27-28 par. 16-18

Se ema Kristaun ida nia kaben halo sala seksuál, ema Kristaun neʼebé la halo sala presiza foti desizaun. Jesus hatete katak ida neʼebé la halo sala iha razaun atu halo divórsiu no kaben fali ho ema seluk. (Mt 19:9) Maibé ema Kristaun neʼe mós bele deside atu fó perdua ba ninia kaben. Oseias simu fali Gomer, no bainhira Gomer fila fali ona, Oseias haruka nia atu labele halo tan relasaun seksuál ho mane seluk, no Oseias mós “la halo relasaun seksuál” ho Gomer ba tempu balu. (Os 3:1-3) Maibé ikusmai, Oseias halo fali relasaun ho ninia feen. Neʼe hatudu oinsá mak Maromak prontu atu simu fali no tau matan nafatin ba ninia povu. (Os 1:11; 3:4, 5) Ida-neʼe hanorin saida mai ita kona-ba moris kaben nian ohin loron? Se ema neʼebé la sala halo fali relasaun seksuál ho ninia kaben neʼebé la laran-metin, neʼe hatudu katak nia fó perdua ona. (1 Kor 7:3, 5) Tan neʼe, bainhira simu malu tiha, la iha tan razaun neʼebé loos atu halo divórsiu. Feen-laʼen neʼe tenke hakaʼas an atu iha hanoin hanesan ho Maromak kona-ba moris kaben nian. w18.12 p. 13 par. 13

Kuandu estuda mesak, diʼak atu hanoin oinsá Jeová nia haree kona-ba situasaun oioin neʼebé karik ita sei hasoru iha futuru. Hodi nuneʼe, ita sei la hakfodak se ita hasoru situasaun neʼebé ita presiza foti kedas desizaun. Bainhira Potifar nia feen koko atu tenta José, José hasees an kedas. Klaru katak José medita nanis oinsá Jeová nia haree kona-ba moris kaben nian. (Gén 39:8, 9) José hatete ba Potifar nia feen: “Oinsá mak haʼu bele halo hahalok aat tebes neʼe no halo sala hasoru Maromak?” Ida-neʼe hatudu katak José iha Maromak nia hanoin. Oinsá ho ita? Ita sei halo saida se kolega serbisu hatudu oin moris ba Ita? Ka oinsá se ema ida haruka mensajen ka foto seksuál ba Ita liuhusi telemovel? Se ita mak aprende ona no halo Jeová nia hanoin sai ita-nian kona-ba buat sira-neʼe no foti desizaun nanis, neʼe sei halo fasil ba ita atu laran-metin. w18.11 p. 25 par. 13-14

Matenek-naʼin balu hatete katak liafuan neʼe signifika: “Haʼu sei haksoit ho haksolok tanba Naʼi; haʼu sei dansa hadulas tanba haksolok ho Maromak.” Neʼe hanorin lisaun importante tebes ba ita. Jeová halo promesa furak oioin ba ita kona-ba futuru, nia mós fó fiar ba ita katak lakleur nia sei kumpre promesa sira-neʼe. Lisaun importante neʼebé ita aprende husi livru Habakuk mak atu tau fiar ba Jeová. (Hab 2:4) Ita presiza hametin ita-nia relasaun ho Jeová atu bele kontinua tau fiar ba nia. Tan neʼe ita tenke (1) Halo orasaun beibeik ba Jeová no fó sai ita-nia problema hotu ba nia. (2) Rona no halo tuir buat neʼebé Jeová hatete ba ita liuhusi ninia Liafuan no organizasaun. (3) Hatudu laran-metin no hein ho pasiénsia ba Jeová. Habakuk halo nuneʼe. Maski foufoun nia sente estrese kuandu nia foin koʼalia ba Jeová, maibé ikusmai nia sente kmaan fali no kontente. Se ita halo tuir Habakuk, ita mós sei hetan kmaan husi Jeová, ita-nia Aman iha lalehan. Neʼe mak kmaan neʼebé boot liu hotu iha mundu nakukun neʼe. w18.11 p. 17 par. 18-19

Razaun ida tan ita bele fiar katak Jeová hadomi ita mak tanba nia “hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar iha nia sei la lakon maibé hetan moris rohan-laek”. (João 3:16) Jesus nia sakrifísiu fó prova katak Jesus mós hadomi ita, no ninia domin neʼe hametin ita. Bíblia hatete katak susar ka terus labele haketak ita husi Kristu nia domin. (Rom 8:35, 38, 39) Dala ruma problema oioin bele halo ita sente kole tebes iha dalan fíziku no emosaun toʼo ita la iha tan ksolok atu serbí Jeová. Maibé hodi hanoin kona-ba Kristu nia domin neʼebé kleʼan ba ita, neʼe bele fó forsa ba ita atu tahan. (2 Kor 5:14) Jesus nia domin fó kbiit no motivasaun ba ita atu la rende an maski ita hasoru problema oioin hanesan, dezastre, ema fó-terus, laran-kraik, ka laran-taridu. w18.09 p. 14 par. 8-9

Atu kontinua laʼo iha lia-loos, ita presiza simu no halo tuir buat hotu neʼebé Jeová hatete. Ita tenke halo lia-loos sai buat neʼebé importante liu hotu iha ita-nia moris no halo tuir Bíblia nia prinsípiu sira. Hanesan David hakarak tebes atu kontinua laʼo iha lia-loos ho laran-metin, ita mós tenke halo nuneʼe. Se lae, ita bele hanoin fali kona-ba buat neʼebé ita husik ona no karik buka fali buat sira-neʼe balu. Maibé ita hatene katak ita labele hili lia-loos saida husi Bíblia mak ita hakarak simu ka la simu. Ita tenke laʼo tuir “lia-loos hotu”. (João 16:13) Ita presiza uza tempu didiʼak atu neineik-neineik la laʼo sees husi lia-loos. Tanba se ita la kuidadu, ita bele soe tempu barak ba atividade hanesan halimar, pasatempu, uza internét, ka haree televizaun. Maski la sala atu halo buat sira-neʼe, maibé neʼe bele halo ita lakon tempu atu estuda mesak no serbí Jeová. w18.11 p. 10 par. 7-8

Dala ruma ita hasoru mudansa neʼebé akontese derrepente no bele halo ita sente laran-taridu no estrese. (Prov 12:25) Se ita sente susar atu simu mudansa sira-neʼe, saida mak bele ajuda ita atu sai kalma nafatin? (Sal 131:1-3) Iha situasaun susar naran deʼit neʼebé ita hasoru, ita bele iha “Maromak nia dame” neʼebé bele proteje ita-nia “kbiit atu hanoin” no halo ita kalma nafatin. (Flp 4:6, 7) Bainhira ita sente laran-taridu ka estrese, se ita halo orasaun, “Maromak nia dame” bele fó forsa ba ita atu kontinua serbí Jeová no la rende an. Maromak nia espíritu bele halo ita sente kalma no mós ajuda ita atu hetan eskritura neʼebé sei ajuda ita tau uluk buat neʼebé importante liu iha ita-nia moris.​—João 14:26, 27. w18.10 p. 27 par. 2; p. 28 par. 5, 8

Buat saida mak estraga ona ema barak nia moris? Neʼe mak lia-bosok. Bosok mak liafuan neʼebé ema koʼalia maski nia hatene katak neʼe la loos hodi lohi ema seluk. Lia-bosok primeiru mai husi sé? Diabu. Jesus hanaran nia “lia-bosok nia aman”. (João 8:44) Horibainhira mak Diabu koʼalia lia-bosok primeiru? Neʼe akontese iha tinan rihun ba rihun liubá iha jardín Eden. Jeová kria Paraízu neʼebé furak tebes ba Adão no Eva atu hela. Jeová hatete ba sira katak, se sira han husi “ai-hun koñesimentu kona-ba buat diʼak no aat”, sira sei mate. Satanás hatene kona-ba Maromak nia mandamentu neʼe. Maski nuneʼe, nia uza samea ida hodi hatete ba Eva: “Tuir loloos, imi sei la mate.” Neʼe mak lia-bosok primeiru neʼebé Satanás fó sai. Tuirmai, Satanás hatutan: “Tanba Maromak hatene katak iha loron neʼebé imi han ai-fuan neʼe, imi-nia matan sei nakloke no imi sei sai hanesan Maromak hodi hatene buat diʼak no aat.”​—Gên 2:15-17; 3:1-5. w18.10 p. 6 par. 1-2

Atu iha laran moos, ita presiza iha hanoin no hakarak neʼebé moos. Ida-neʼe importante tebes se ita hakarak Jeová simu ita-nia adorasaun. (2 Kor 4:2; 1 Tim 1:5) Oinsá mak ema neʼebé laran moos bele “haree Maromak”, tanba Jeová dehan “ema neʼebé haree haʼu-nia oin sei la kontinua moris”? (Êx 33:20) Liafuan gregu neʼebé tradús nuʼudar “haree” bele iha signifika katak atu imajina, komprende ka hatene. Tan neʼe, “haree Maromak” signifika katak koñese didiʼak no hafolin ninia hahalok. (Éf 1:18) Ita mós bele “haree Maromak” hodi hanoin kona-ba dalan oioin neʼebé nia ajuda ita. (Job 42:5) Ita mós bele “haree” ka tau fokus ba buat furak oioin neʼebé Jeová promete ona ba sira neʼebé laran moos no serbí nia ho laran-metin. w18.09 p. 20 par. 13, 15-16

Halo buat neʼebé ita hatene mak loos sei lori bensaun oioin. Maski matenek mai husi koñesimentu, maibé matenek envolve desizaun neʼebé ita halo, duké hatene deʼit kona-ba faktu sira. Nehek sira mós hatudu matenek hodi rai hahán neʼebé sira presiza iha tempu bailoro. (Prov 30:24, 25) Kristu, ida-neʼebé bolu nuʼudar “matenek Maromak nian” sempre halo buat neʼebé halo ninia Aman kontente. (1 Kor 1:24; João 8:29) Maromak sei fó bensaun ba ita se ita hatudu nafatin haraik-an no hatudu matenek hodi halo buat neʼebé ita hatene mak loos. (Mt 7:21-23) Tan neʼe, hakaʼas an nafatin atu halo kongregasaun sai fatin neʼebé ita bele serbí Jeová ho haraik-an. Presiza tempu no pasiénsia atu aplika buat neʼebé ita hatene mak loos. Maibé hodi halo nuneʼe ita hatudu katak ita haraik-an, no hahalok haraik-an sei halo ita kontente agora no ba nafatin. w18.09 p. 7 par. 18

Bainhira Jeová kria tiha ema, nia hakarak sira atu sai ninia maluk serbisu-naʼin. Maski agora ema la perfeitu ona, maibé sira neʼebé laran-metin sei bele serbisu hamutuk ho Jeová loron-loron. Porezemplu, bainhira ita haklaken no ajuda ema sai Jesus nia dixípulu, tuir loloos ita sai daudauk “Maromak nia maluk serbisu-naʼin”. (1 Kor 3:5-9) Ita iha duni priviléjiu neʼebé furak tanba Kriadór neʼebé boot liu hotu hili ita hodi halo serbisu neʼebé importante tebes! Maski nuneʼe, haklaken laʼós dalan ida deʼit atu bele serbisu hamutuk ho Jeová. Dalan seluk tan mak fó ajuda ba ita-nia família no ema seluk iha kongregasaun, hatudu hahalok laran-diʼak, ajuda ho projetu sira neʼebé Jeová nia organizasaun halo iha mundu tomak, no aumenta serbisu ba Jeová. (Kol 3:23) Maibé, importante atu la kompara ita-nia an ho ema seluk kona-ba serbisu neʼebé ita halo ba Jeová. Diʼak atu hanoin-hetan katak ita ida-idak nia idade, saúde, situasaun, no abilidade la hanesan. w18.08 p. 23 par. 1-2

Jeová fó kmaan ba Habakuk katak nia sei fó resposta ba Habakuk nia pergunta sira. Lakleur tan, Jeová sei fó kmaan ba Habakuk. Buat neʼebé Jeová halo hanesan atu hatete ba profeta neʼe: “Pasiénsia deʼit no tau fiar mai haʼu. Haʼu sei hatán ó-nia orasaun sira, maski haree hanesan kleur uitoan.” Jeová fó-hanoin ba Habakuk katak nia deside ona iha tempu saida mak nia sei halo ninia promesa sira sai loos. Tan neʼe nia husu Habakuk atu kontinua hein. Profeta neʼe bele tau fiar duni ba Jeová. Hein ho pasiénsia ba Jeová no rona didiʼak ba buat neʼebé nia hatete mai ita bele hametin ita-nia fiar no ajuda ita atu sente neon hakmatek maski hasoru daudaun susar sira. Jesus anima ita atu la fokus liu ba “oras no tempu” neʼebé Jeová seidauk fó sai ba ita. (Após 1:7) Ita presiza tau fiar katak Jeová hatene tempu neʼebé diʼak atu halo buat ruma. Tan neʼe, keta rende an. Maibé hatudu haraik an, fiar, no pasiénsia. Uza didiʼak ita-nia tempu atu serbí Jeová ho laran tomak.​—Mc 13:35-37; Gal 6:9. w18.11 p. 16 par. 13-14

Apóstolu Pedro sai boot iha komunidade neʼebé ema haree ema jentiu sira hanesan la moos. Maibé iha buat balu foin akontese neʼebé halo nia troka ninia hanoin. Porezemplu, nia hetan vizaun ida husi Maromak. (Após 10:9-16) Hanesan Pedro, ita presiza buka-hatene didiʼak ita-nia an no husu ajuda hodi haree ita iha nafatin hahalok diskriminasaun iha ita-nia laran ka lae. Ita presiza halo saida tan? Se ita mak ‘loke luan ita-nia laran’, ita bele troka hahalok diskriminasaun ho domin. (2 Kor 6:11-13) Ita-nia toman atu ransu ho ema mak oinsá? Ita-nia toman mak atu ransu deʼit ho ema neʼebé mai husi Ita-nia rasa, nasionalidade, suku, ka língua ka lae? Se nuneʼe, koko atu ransu ho ema seluk tan. Ita bele konvida irmaun no irmán sira neʼebé mai husi rasa seluk atu haklaken hamutuk. Ka Ita bele konvida sira bá uma atu han ka ransu hamutuk. (Após 16:14, 15) Neineik-neineik Ita-nia laran sei enxe nakonu ho domin toʼo la iha tan fatin ba hahalok diskriminasaun. w18.08 p. 9 par. 3, 6; p. 10 par. 7

Iha buat seluk tan neʼebé Testemuña balu halo neʼebé hatudu mundu nia hahalok. Porezemplu, iha festa, sira balu dansa no hatudu sira-nia an la hanesan ema kristaun neʼebé loos. Balu tan tau sira-nia foto no tau komentáriu iha média sosiál neʼebé hatudu hakarak isin nian. Tan neʼe, sira bele lori influénsia aat ba irmaun-irmán seluk neʼebé hakaʼas an hela atu la sai hanesan mundu neʼe. (1 Ped 2:11, 12) Mundu neʼe sempre halo buat oioin atu book ita hodi tau fokus ba “hakarak aat isin nian no hakarak aat matan nian no foti-an kona-ba rikusoin”. (1 João 2:16) Maibé ita mak Jeová nian, tan neʼe ita la hanesan. Ita “la simu hahalok neʼebé la tuir ninia hakarak, no atu la simu hakarak mundu nian, maibé atu moris ho hanoin neʼebé loos no hahalok loos no serbí Maromak ho laran-metin iha mundu ohin neʼe nian”. (Tito 2:12) Dalan neʼebé ita halaʼo moris, inklui koʼalia, han, hemu, hatais, no serbisu, tenkesér halo fasil ba ema atu hatene kedas katak ita mak Jeová nian. w18.07 p. 25 par. 13-14

Se ita mak hateke beibeik ba Jeová, ita sei la husik buat ida atu estraga ita-nia relasaun diʼak ho Jeová, ka la sai hirus tanba sala neʼebé ema seluk halo. Maski ita hotu presiza hakaʼas an no halo tuir Jeová atu bele hetan salvasaun, maibé ida-neʼe importante liuliu ba sira neʼebé kaer responsabilidade iha Maromak nia organizasaun, hanesan Moisés. (Flp 2:12) Sin, se ita mak hetan responsabilidade barak, Jeová mós hakarak ita atu hatudu ezemplu neʼebé diʼak iha buat hotu. (Lc 12:48) Se ita mak hadomi tebes Jeová, la iha buat ida mak bele halo ita sidi ka haketak ita husi ninia domin. (Sal 119:165; Rom 8:37-39) Ita hela daudauk iha tempu neʼebé susar, tan neʼe importante tebes atu hateke beibeik ba Jeová “neʼebé tuur iha kadunan iha lalehan” atu hatene saida mak nia hakarak ita atu halo. (Sal 123:1) Ita la bele husik buat neʼebé ema seluk halo atu estraga ita-nia relasaun diʼak ho Jeová. w18.07 p. 16 par. 19-20

Ita kontente tebes hodi haree Jeová nia atan sira halo sira-nia naroman nabilan. Iha tinan 2017, Jeová nia povu halaʼo estudu Bíblia hamutuk 10.000.000 liu! No ema millaun ba millaun asiste Memoriál hodi aprende kona-ba oinsá Jeová fó Jesus nia moris nuʼudar prezente boot ba ita. (1 João 4:9) Iha mundu tomak Testemuña ba Jeová koʼalia língua neʼebé la hanesan, maibé ida-neʼe la hanetik ita atu fó hahiʼi ba Jeová nuʼudar família ida neʼebé iha unidade. (Apok 7:9) Maski ita koʼalia língua neʼebé la hanesan ka mai husi fatin oioin, ita hotu bele “sai nabilan hodi lori naroman iha mundu”. (Flp 2:15) Ita-nia serbisu haklaken, ita-nia unidade, no dalan neʼebé ita matan-moris nafatin lori glória ba Jeová. w18.06 p. 21 par. 1-3

Apóstolu sira kontinua dehan ba Jesus atu han lai, maibé Jesus kontente liu atu koʼalia ba feto neʼe duké han. Maromak nia hakarak mak atu Jesus haklaken, no ba Jesus, haklaken mak hanesan hahán ba nia, maski haklaken ba feto Samaria ida. (João 4:32-34) Tiago no João la komprende kona-ba lisaun importante neʼe. Bainhira dixípulu sira laʼo hamutuk Jesus hodi bá Samaria, sira buka fatin deskansa iha knua Samaria nian. Maibé ema Samaria lakohi atu sira toba kalan iha fatin neʼe. Neʼe halo Tiago no João sai hirus loos no husu atu haruka ahi tun husi lalehan no harahun tiha sidade neʼe. Jesus siʼak sira. (Lc 9:51-56) Karik Tiago no João la hirus hanesan neʼe kuandu ida-neʼe mak akontese iha sira-nia área Galileia. Karik sira hirus tanba sira iha hahalok diskriminasaun. Lakleur, bainhira João haklaken ba ema Samaria no ema barak mak rona ba nia, karik neʼe halo nia moe ba ninia hahalok antes neʼe.​—Após 8:14, 25. w18.06 p. 10-11 par. 12-13

Se ita mak kesi metin ita-nia an ho lia-loos husi Bíblia, neʼe sei book ita atu moris tuir lia-loos no sempre koʼalia buat neʼebé loos. Tanbasá mak ita lakohi bosok? Tanba lia-bosok mak Satanás nia armas ida neʼebé perigu tebes. Lia-bosok bele estraga ninia naʼin no mós ema seluk neʼebé fiar ba lia-bosok neʼe. (João 8:44) Tan neʼe, maski ita la perfeitu, ita hakarak hakaʼas an atu nunka bosok. (Éf 4:25) Neʼe la fasil. Abigail neʼebé tinan 18 hatete: “Dala ruma ita sente ladiʼak atu koʼalia buat neʼebé loos, liuliu se bosok bele ajuda ita atu sees husi situasaun susar.” Entaun, tanbasá koʼalia buat neʼebé loos? Victoria neʼebé tinan 23 hatete: “Se Ita la bosok no defende Ita-nia fiar, karik ema sei haterus Ita. Maibé ita sempre hetan benefísiu neʼebé diʼak, hanesan Ita sai aten-brani liután, Ita sente besik liu ba Jeová, no ema seluk neʼebé hadomi Ita tau fiar ba Ita.” Ita haree ka lae tanbasá importante atu sempre kesi “sintu lia-loos nian”? w18.05 p. 28 par. 3, 5

Tanba mundu neʼe sai aat ba daudaun, ita presiza matan-moris liután. Ita hatene katak mundu aat neʼe nia rohan sei mai tuir tempu neʼebé Jeová hili tiha ona. (Mt 24:42-44) Maibé antes tempu neʼe toʼo, ita presiza pasiénsia no fokus ba ita-nia futuru. Lee Bíblia loron-loron no halo orasaun beibeik ba Jeová. (1 Ped 4:7) Aprende husi irmaun-irmán sira neʼebé serbí Jeová ba tinan barak. Halo Ita-nia moris nakonu ho atividade adorasaun nian no uza tempu hamutuk Ita-nia irmaun-irmán sira. Neʼe sei lori kontente ba Ita no Ita sei sente katak tempu liu lalais. (Éf 5:16) Maski ita halo sala barak, Jeová simu ita-nia adorasaun. Atu ajuda ita, nia fó ita “ema nuʼudar prezente”, neʼe mak katuas kongregasaun sira. (Éf 4:8, 11, 12) Se katuas sira vizita atu koʼalia ho Ita, aproveita tempu neʼe hodi aprende husi sira-nia matenek no konsellu. w18.06 p. 24-25 par. 15-18

Jesus hatete ba ninia dixípulu sira katak sira tenke ‘hela nafatin iha ninia domin’. Tanbasá? Tanba nia hatene katak ninia dixípulu sira presiza tahan hodi kontinua moris nuʼudar kristaun neʼebé loos. Iha João 15:4-10, Jesus uza liafuan “hela nafatin” ba dala barak hodi ajuda ninia dixípulu sira komprende katak sira presiza duni atu tahan. Ita bele halo saida hodi hatudu katak ita hakarak hela nafatin iha Kristu nia domin no atu nia simu ita? Liuhusi halo tuir nia mandamentu sira. Jesus husu ita atu halo deʼit buat neʼebé uluk nia mós halo. Nia dehan: “Haʼu mós halo tuir Aman nia ukun-fuan, no hela nafatin iha nia domin.” (João 15:10) Jesus hatudu duni ezemplu neʼebé diʼak ba ita. (João 13:15) Jesus nia mandamentu sira mai husi ninia Aman, tan neʼe mak bainhira ita halo tuir Jesus nia mandamentu hodi haklaken, ita mós hatudu katak ita hadomi Jeová. (Mt 17:5; João 8:28) Se ita hatudu ba Jeová no Jesus katak ita hadomi sira, sira-nia domin mós sei hela nafatin ho ita. w18.05 p. 18 par. 5-7

Ita presiza halo desizaun oioin iha tempu joven nian. Ita presiza halo desizaun kona-ba edukasaun, serbisu, no buat seluk tan. Se Ita mak hatene Ita iha planu saida, neʼe fasil ba Ita atu halo desizaun neʼebé matenek. Se Ita mak halo planu sedu, Ita mós bele hetan susesu lalais ho Ita-nia planu neʼe. Ita gaba tebes ita-nia irmaun-irmán joven rihun ba rihun iha mundu tomak neʼebé laʼo ba oin ho diʼak. Sira tau sira-nia relasaun ho Jeová no planu espirituál sai buat neʼebé importante liu hotu iha sira-nia moris. Joven sira-neʼe iha moris neʼebé kontente, no iha tempu neʼebé hanesan, sira mós aprende oinsá atu halo tuir Jeová nia matadalan kona-ba buat hotu, inklui mós moris família nian. Salomão hatete: “Tau fiar ba Jeová ho ó-nia laran tomak.” Nia hatutan hodi dehan: “Hanoin didiʼak kona-ba nia iha ó-nia dalan hotu, no nia sei halo loos ó-nia dalan sira.” (Prov 3:5, 6) Joven sira, Jeová hadomi tebes imi! Imi iha folin-boot tebes ba nia, no nia sei proteje, dirije, no fó bensaun ba imi. w18.04 p. 26 par. 7; p. 27 par. 9

Apóstolu João sai hanesan riin ida ba kongregasaun iha tempu uluk. Nia hakerek Evanjellu neʼebé furak tebes kona-ba Jesus nia serbisu haklaken. Tinan atus ba atus ona ninia Evanjellu neʼe fó kmaan ba ema kristaun sira no sei fó nafatin kmaan ba ita toʼo ohin loron. Porezemplu, husi João nia Evanjellu deʼit mak hakerek Jesus nia liafuan neʼebé Jesus hatete katak domin mak identifika ninia dixípulu neʼebé loos. (João 13:35) Karta tolu seluk neʼebé João hakerek mós fó sai lia-loos furak oioin. Kuandu ita sente triste tanba halo sala ruma, bainhira lee katak Jesus nia sakrifísiu “hamoos ita-nia sala hotu”, neʼe fó kmaan tebes ba ita. (1 João 1:7) Se ita-nia laran fó sala beibeik ba ita kona-ba sala ruma, liafuan neʼebé hatete katak “Maromak mak boot liu fali ita-nia laran” hametin fali ita. (1 João 3:20) João deʼit mak Bíblia nia hakerek-naʼin neʼebé hatete katak “Maromak mak domin”. (1 João 4:8, 16) João nia karta segundu no terseiru gaba ema kristaun sira neʼebé “kontinua laʼo iha lia-loos”.​—2 João 4; 3 João 3, 4. w18.04 p. 18 par. 14-15