Marsu

Bainhira ita lee eskritura sira iha Gênesis kapítulu 1 no 2, ita bele haree katak Adão no Eva goza duni liberdade neʼebé ema barak buka daudauk ohin loron. Sira iha buat hotu, sira la presiza taʼuk ba buat ida, no sira nunka hasoru hahalok la justisa. Sira la preokupa kona-ba hahán, serbisu, saúde, ka mate. (Gên 1:27-29; 2:8, 9, 15) Maibé, importante atu hanoin-hetan katak Maromak Jeová deʼit mak iha liberdade neʼebé la iha rohan no la iha limitadu. Tanbasá? Tanba nia mak kria buat hotu no nia mak Ukun-Naʼin aas liu hotu iha lalehan no rai. (1 Tim 1:17; Apok 4:11) Maibé liberdade husi kriatura hotu iha lalehan no rai iha limitadu. Maromak Jeová hakarak ita hatene katak nia deʼit mak iha direitu atu determina limitadu saida mak justu, presiza, no la todan demais. Husi uluk kedas Jeová tau ona limitadu sira-neʼe ba ninia kriasaun hotu. w18.04 p. 4 par. 4, 6

Moris iha mundu agora, ita bele tahan tanba Jeová nia ajuda. (2 Kor 4:7, 8) Maibé hanoin kona-ba ema sira neʼebé la iha relasaun diʼak ho Jeová. Karik susar tebes ba sira atu moris iha mundu neʼe tanba la hetan ajuda husi Jeová. Hanesan Jesus, ita hanoin tebes ema, no neʼe book ita atu “lori liafuan diʼak kona-ba buat neʼebé diʼak liu” ba sira. Tan neʼe hatudu pasiénsia ba ema neʼebé ita hanorin. Hanoin-hetan katak karik sira la hatene kona-ba lia-loos balu husi Bíblia neʼebé ita hatene ho didiʼak. Ema balu gosta tebes buat neʼebé sira fiar. Karik sira sente katak sira-nia relijiaun lori unidade ba sira-nia família, kultura, no komunidade. Se ita hakarak ema atu husik sira-nia fiar “tuan” neʼebé sira hafolin, ita presiza ajuda sira atu hafolin lia-loos “foun”, katak Bíblia nia hanorin sira neʼebé sira la hatene bainhira ita komesa estuda ho sira. Ho ida-neʼe, sira bele prontu atu husik sira-nia fiar uluk nian. Ita presiza tempu atu ajuda ema halo mudansa.​—Rom 12:2. w19.03 p. 22 par. 10; p. 23-24 par. 12-13

Jeová nia ezemplu kona-ba fó sai domin no anima, fó-hanoin ita atu buka mós oportunidade atu anima ema seluk. (João 5:20) Ita sai buras hanesan ai ida bainhira ema neʼebé ita hadomi hatudu domin no gaba ita. Nuneʼe mós, ita-nia irmaun-irmán no família presiza domin no anima. Bainhira ita gaba sira, ita hametin sira-nia fiar no ajuda sira atu serbí Jeová ho laran-metin. Importante loos atu inan-aman anima sira-nia oan. Bainhira inan-aman gaba sira-nia oan husi laran no hatudu domin ba sira, neʼe sei ajuda oan atu sai buras hanesan ai ida. Hodi dehan, “Ó . . . halo haʼu-nia laran kontente”, hatudu Jeová nia konfiansa katak Jesus sei kumpre ninia Aman nia hakarak. Tan neʼe ita mós bele iha konfiansa katak Jesus sei kumpre Jeová nia promesa hotu. (2 Kor 1:20) Bainhira ita hanoin kona-ba Jesus nia ezemplu, ita sei hametin ita-nia hakarak atu aprende husi nia no laʼo tuir ninia ain-fatin.​—1 Ped 2:21. w19.03 p. 8 par. 3; p. 9 par. 5-6

Bainhira ita simu prezente folin boot husi ema ida, ita fó agradese tebes ba ema neʼe. Maibé ema Izraél la hatudu agradese hanesan neʼe ba liberdade neʼebé Jeová fó ba sira. Jeová foin lori sira sai livre husi Ejitu fulan balu deʼit, sira komesa kaan fali hahán no hemu husi rai-Ejitu nian. Sira ibun-ibun kona-ba ai-han maná neʼebé Jeová fó ba sira. Sira mós hakarak fila fali ba Ejitu! Ba sira, ‘ikan, pepinu, pateka, liis-tahan, liis-mean, no liis-mutin’ mak importante liu fali liberdade neʼebé Jeová fó ba sira atu adora nia. Tan neʼe mak Jeová sai hirus tebes ho sira. (Núm 11:5, 6, 10; 14:3, 4) Neʼe hanorin lisaun importante ida ba ita. Apóstolu Paulo fó avizu ba ema kristaun hotu atu la sai ema neʼebé la hatene fó agradese kona-ba liberdade neʼebé Jeová fó ba ita liuhusi ninia Oan-Mane Jesus Kristu.​—2 Kor 6:1. w18.04 p. 9-10 par. 6-7

Ita hotu hakarak ema hadomi no hatudu justisa ba ita. Se ita la hetan domin no justisa beibeik, karik neʼe sei halo ita sente folin-laek no lakon esperansa. Jeová hatene katak ita hakarak tebes hetan domin no justisa. (Sal 33:5) Bainhira ita estuda didiʼak Ukun-Fuan neʼebé Jeová fó ba nasaun Izraél liuhusi Moisés, ita bele fiar katak ita-nia Maromak hadomi tebes ita no hakarak ema hatudu justisa ba ita. Bainhira ita estuda Moisés nia Ukun-Fuan, ita sei aprende kona-ba sentimentu husi Jeová, Maromak domin nian. (Rom 13:8-10) Ita bele nota katak Moisés nia Ukun-Fuan bazeia ba domin tanba domin mak book Jeová atu halo buat hotu. (1 João 4:8) Jeová halo ukun-fuan hotu bazeia ba mandamentu rua, neʼe mak hadomi Maromak no hadomi Ita-nia maluk. (Lev 19:18; Deut 6:5; Mt 22:36-40) Ukun-fuan 600 resin neʼebé bolu nuʼudar Moisés nia Ukun-Fuan hanorin ita kona-ba Jeová nia domin. w19.02 p. 20-21 par. 1-4

Job kuidadu kona-ba ninia hahalok ho feto sira. (Job 31:1) Job hatene katak la diʼak atu hatudu sentimentu romántiku ba feto neʼebé laʼós ninia feen. Ohin loron, ita moris iha mundu neʼebé nakonu ho tentasaun seksuál. Hanesan Job, ita lakohi hatudu sentimentu romántiku ba ema neʼebé laʼós ita-nia kaben ka lae? Ita mós lakohi haree pornografia ka lae? (Mt 5:28) Se ita kontrola an loroloron, ita sei hametin ita-nia hakarak atu nafatin hatudu integridade. Job mós halo tuir Jeová nia hanoin kona-ba rikusoin. Job hatene katak se nia tau fiar ba rikusoin, nia sei halo sala boot neʼebé merese atu hetan kastigu. (Job 31:24, 25, 28) Ohin loron, ita moris iha mundu neʼebé buka deʼit rikusoin. Bíblia anima ita atu iha hanoin neʼebé loos kona-ba rikusoin, se ita halo nuneʼe ita sei hametin ita-nia hakarak atu hatudu integridade.​—Prov 30:8, 9; Mt 6:19, 20. w19.02 p. 6-7 par. 13-14

Jesus haleno ho perfeitu Jeová nia domin ba ita iha buat hotu neʼebé nia halo. (1 João 4:8-10) Tuir loloos, Jesus nia domin mak book nia atu fó ninia moris ba ita. Maski ita mak ema kose-mina ka “bibi-malae seluk”, ita hetan benefísiu husi domin neʼebé Jeová no ninia Oan-Mane hatudu ona mai ita liuhusi Jesus nia sakrifísiu. (João 10:16; 1 João 2:2) Hanoin mós kona-ba buat neʼebé uza iha Naʼi nia Han-Kalan. Neʼe hatudu Jesus nia domin no hanoin ninia dixípulu sira. Tanbasá? Jesus hatudu domin ba ninia dixípulu kose-mina sira liuhusi hahú komemorasaun neʼebé simples atu sira halo tuir, laʼós serimónia neʼebé komplikadu. Husi tempu neʼebá, Jesus nia dixípulu kose-mina sira presiza komemora Memoriál tinan-tinan maski hasoru situasaun oioin, inklui tama komarka. (Apok 2:10) Sira bele halo tuir Jesus nia mandamentu neʼe ka lae? Sin, bele duni! Husi apóstolu sira-nia tempu toʼo ohin loron, ema Kristaun loos hakaʼas an atu komemora Jesus nia mate. w19.01 p. 24 par. 13-15

Ho Jeová nia ajuda, ita sai livre husi relijiaun falsu, no mós husi hanorin no istória falsu oioin neʼebé taka ema nia neon. Ita mós hein ba futuru neʼebé ita sei hetan “liberdade neʼebé furak nuʼudar Maromak nia oan sira”. (Rom 8:21) Ohin loron mós ita bele goza uitoan liberdade furak neʼe kuandu ita halo tuir Kristu nia hanorin. (João 8:31) Iha dalan hanesan neʼe ita sei “hatene lia-loos”, laʼós deʼit hodi aprende, maibé moris tuir! Iha mundu tuan neʼe, ema goza moris ba tempu uitoan deʼit. Ita hotu la hatene saida mak sei akontese aban. (Tgo 4:13, 14) Tan neʼe, diʼak liu ita laʼo iha dalan neʼebé lori ita ba “moris neʼebé loloos”, ka moris rohan-laek iha mundu foun. (1 Tim 6:19) Jeová la obriga ema ida atu serbí nia. Ita ida-idak mak tenke foti desizaun. Hakaʼas an bá atu halo Jeová nuʼudar Ita-nia “parte” hodi hakbesik liután ba nia. (Sal 16:5) Hafolin “buat diʼak” hotu neʼebé nia fó ba Ita. (Sal 103:5) Fiar metin bá katak Jeová sei halo Ita haksolok no kontente ba nafatin!​—Sal 16:11. w18.12 p. 28 par. 19, 21

Ema Kristaun hotu presiza hakaʼas an atu hafolin moris kaben nian hodi tuir Jeová no Jesus nia hanoin. Maibé ema balu dala ruma la halo nuneʼe, tanba ita hotu la perfeitu. (Rom 7:18-23) Tan neʼe, ita la hakfodak katak ema Kristaun balu iha apóstolu sira-nia tempu iha problema kona-ba moris kaben nian. Apóstolu Paulo hakerek: “Feen labele haketak an husi ninia laʼen.” Maibé, ema balu halo nuneʼe duni. (1 Kor 7:10) Paulo la esplika situasaun saida deʼit mak halo feen-laʼen haketak malu. Maibé ita hatene problema neʼe laʼós tanba laʼen halo sala seksuál. Tanba se razaun mak sala seksuál, feen bele halo divórsiu no kaben fali ho mane seluk. Paulo hatete katak feen neʼebé haketak an husi ninia laʼen tenke “mesak nafatin ka hadame malu fali ho ninia laʼen”. Tuir Maromak nia haree, feen-laʼen neʼe nafatin kaben-naʼin. Paulo hatete, se problema mak laʼós sala seksuál, sira presiza hakaʼas an atu hadiʼa problema no hadame malu fali. Sira bele husu ajuda husi katuas sira. w18.12 p. 13 par. 14-15

Ohin loron, Maromak hakarak ita atu sai ninia belun no hakaʼas an atu haklaken liafuan diʼak. (Mt 28:19, 20; Tgo 4:8) Maibé, karik ema balu ho hanoin neʼebé diʼak koko anima ita atu la halo buat sira-neʼe. Porezemplu, oinsá se Ita-nia patraun fó serbisu diʼak neʼebé manán osan boot, maibé serbisu neʼe sei hanetik Ita-nia atividade espirituál nian? Ka se Ita eskola hela no hetan oportunidade atu muda sai husi uma atu hetan edukasaun estra. Se ida-neʼe akontese, ita foin mak halo orasaun, halo riset, no koʼalia ba ema seluk, atu foti desizaun ka lae? Diʼak liu aprende oinsá Jeová hanoin kona-ba buat sira-neʼe agora no hakaʼas an atu iha hanoin hanesan Jeová. Se Ita halo nuneʼe, kuandu situasaun hanesan neʼe mosu, karik Ita sei la sente katak buat sira-neʼe sai hanesan tentasaun ba Ita. Ita sei hatene atu halo saida tanba Ita deside nanis ona atu tau fokus hodi serbí Jeová. w18.11 p. 27 par. 18

Salomão sai nuʼudar liurai iha Izraél kuandu nia sei joven. Bainhira nia komesa ukun nuʼudar liurai, Jeová mosu ba nia iha mehi no hatete: “Husu bá, saida mak ó hakarak haʼu atu fó ba ó.” Salomão hatán: “Haʼu joven deʼit no la iha esperiénsia. . . . Entaun favór ida, fó ba Ita-nia atan laran neʼebé prontu atu halo tuir Ita hodi bele tesi-lia ba Ita-nia povu.” (1 Reis 3:5-10) Ho haraik an, Salomão husu ba Jeová atu fó ba nia “laran neʼebé prontu atu halo tuir”. Tan neʼe mak Jeová hadomi Salomão! (2 Sam 12:24) Maromak sente kontente tebes ho Salomão nia resposta, tan neʼe nia fó ba Salomão “laran neʼebé matenek no kbiit atu komprende”. (1 Reis 3:12) Durante tempu neʼebé Salomão hatudu laran-metin ba Maromak, nia simu bensaun barak husi Maromak. Nia simu priviléjiu atu harii templu “atu fó glória ba Izraél nia Maromak Jeová nia naran”. (1 Reis 8:20) Nia sai naran-boot tanba matenek neʼebé Maromak fó ba nia. No liafuan sira neʼebé nia koʼalia hakerek iha livru tolu iha Bíblia. Livru ida mak Provérbios. w19.01 p. 14 par. 1-2

Ema balu lakohi ema ida atu influénsia sira-nia hanoin. Sira dehan: “Haʼu bele hanoin rasik.” Karik sira koʼalia hanesan neʼe atu hatudu katak sira hakarak halo desizaun rasik no sira iha direitu atu halo nuneʼe. Sira lakohi ema seluk atu kontrola sira ka troka sira atu sai hanesan ema seluk. Maski ita hanoin hanesan Jeová, neʼe la dehan katak ita lakon ona ita-nia liberdade atu fó sai opiniaun sira. 2 Korinto 3:17 hatete: “Iha fatin neʼebé iha Jeová nia espíritu, iha mós liberdade iha neʼebá.” Jeová fó liberdade ba ita atu haburas hahalok oioin. Ita bele hili rasik buat neʼebé tuir ita-nia hakarak no gosta atu halo. Neʼe mak dalan neʼebé Jeová kria ita. Maibé neʼe la hatudu katak ita iha liberdade neʼebé la iha limite. (1 Ped 2:16) Bainhira ita presiza hatene saida mak loos ka sala, Jeová hakarak ita uza ninia Liafuan atu dirije ita. w18.11 p. 19 par. 5-6

Se ita hakarak kontinua laʼo iha lia-loos, ita labele husik rikusoin atu sai buat neʼebé importante liu iha ita-nia moris. Bainhira ita aprende lia-loos, ita rekoñese katak serbí Jeová mak importante liu fali rikusoin, no ita kontente atu halo sakrifísiu hodi bele laʼo iha lia-loos. Maibé tempu balu liutiha, karik ita haree ema seluk sosa sasán eletróniku neʼebé foun liu ka sai riku. Karik ita komesa sente katak ita falta sasán sira-neʼe. Se ita sente la kontente ona ho buat neʼebé ita iha daudaun, karik ita sei komesa fokus liu atu buka rikusoin duké serbí Jeová. Ida-neʼe halo ita hanoin fali buat neʼebé akontese ba Demas. Nia “hadomi mundu neʼe” toʼo husik tiha ninia knaar atu serbí hamutuk ho apóstolu Paulo. Karik Demas hadomi rikusoin liu fali hadomi Maromak. Ka karik nia baruk ona atu halo sakrifísiu hodi bele serbí hamutuk ho Paulo. Neʼe hanorin lisaun saida mai ita? Karik iha tempu uluk ita hadomi tebes rikusoin. Se ita la kuidadu, domin neʼe bele mosu fali no sai makaʼas toʼo halakon ita-nia domin ba lia-loos. w18.11 p. 10 par. 9

Satanás nia lia-bosok aat tebes, tanba nia hatene katak se Eva fiar ba nia hodi han ai-fuan neʼe, Eva sei mate. Adão no Eva la halo tuir Jeová nia mandamentu no ikusmai mate. (Gên 3:6; 5:5) Laʼós neʼe deʼit, tanba Adão nia sala mak “mate habelar ba ema hotu”. Mate sai duni hanesan liurai no ‘ukun mós sira neʼebé la halo sala hanesan sala neʼebé Adão halo’. (Rom 5:12, 14) Tan neʼe mak ita hotu sai la perfeitu no lakon moris rohan-laek neʼebé Maromak fó ba ema. Duké moris ba nafatin, ohin loron ema moris deʼit toʼo “tinan 70, ka se ema ida iha forsa, ninia tinan bele toʼo 80” neʼebé “nakonu ho susar no triste”. (Sal 90:10) Buat sira-neʼe mosu tan deʼit Satanás nia lia-bosok. Jesus esplika kona-ba Satanás iha João 8:44 hodi dehan: “Nia la hamriik metin iha lia-loos, tanba lia-loos la iha nia.” Satanás la troka. Nia nafatin “lohi mundu tomak” liuhusi ninia lia-bosok oioin. (Apok 12:9) Maibé ita lakohi husik Satanás lohi ita. w18.10 p. 6-7 par. 1-4

Ema neʼebé buka uluk dame sei sai kontente. Dixípulu Tiago hakerek: “Sira neʼebé buka atu nafatin iha relasaun diʼak ho ema seluk, sira haburas dame no tuirmai sira sei fó fuan hahalok loos nian.” (Tgo 3:18) Kuandu Ita iha problema ho ema ruma iha kongregasaun ka família, husu Jeová ajuda Ita atu buka dame. Se Ita halo nuneʼe, Jeová sei haraik ninia espíritu santu atu ajuda Ita hatudu hahalok neʼebé diʼak, no Ita sei sai kontente liután. Jesus hatete katak importante tebes atu buka uluk dame. Nia dehan: “Neʼe duni, se ó lori daudaun ó-nia prezente ba altár no ó hanoin-hetan katak ó-nia maun-alin iha buat ruma hasoru ó, husik lai ó-nia prezente iha altár oin, no bá hodi halo dame uluklai ho ó-nia maun-alin. Tuirmai, kuandu ó fila fali, fó ó-nia prezente neʼe.”​—Mt 5:23, 24. w18.09 p. 21 par. 17

Iha Jesus nia kalan ikus hamutuk ho ninia dixípulu sira, nia temi domin maizumenus ba dala 30. Nia hatete ba ninia dixípulu katak sira presiza “hadomi malu”. (João 15:12, 17) Ema sei rekoñese katak sira mak Kristu nia dixípulu liuhusi domin neʼebé sira hatudu ba malu. (João 13:35) Domin neʼebé Jesus temi laʼós kona-ba sentimentu deʼit, maibé domin neʼebé kleʼan tebes toʼo ema ida bele fó ninia moris ba ema seluk. Jesus dehan: “La iha ema ida iha domin boot liu fali ema neʼebé fó nia moris ba ninia belun sira. Imi mak haʼu-nia belun sira se imi halo buat neʼebé haʼu haruka imi atu halo.” (João 15:13, 14) Ohin loron, Jeová nia povu hatudu domin neʼebé loos no iha unidade, tan neʼe ema rekoñese katak sira mak Maromak nia povu. (1 João 3:10, 11) Jeová nia atan iha mundu tomak hatudu domin neʼebé kleʼan ba malu maski sira mai husi nasaun, suku, língua ka kultura neʼebé la hanesan. w18.09 p. 12 par. 1-2

Jeová hakarak ita atu tau matan ba ita-nia família. Porezemplu, karik Ita tenke serbisu atu tau matan ba família nia presiza. Inan barak presiza hela iha uma atu tau matan ba oan sira. No se ita-nia inan-aman la bele tau matan ona ba sira-nia an, karik ita presiza tau matan fali ba sira. Neʼe mak ita-nia responsabilidade sira. Se Ita mak iha responsabilidade atu tau matan ba família, karik Ita la iha oportunidade barak atu halo serbisu liután ba Jeová tuir Ita-nia hakarak. Maibé keta sai laran-triste! Ita halo Jeová kontente kuandu ita tau matan ba Ita-nia família. (1 Kor 10:31) Se Ita la iha responsabilidade urjente atu tau matan ba família, Ita bele fó ajuda ba irmaun-irmán neʼebé moras ka idade ona, ka sira neʼebé presiza ajuda seluk ka lae? Ka bele fó ajuda ba ema neʼebé tau matan ba sira ka lae? Se Ita mak halo buat sira-neʼe, karik Ita serbisu hamutuk daudauk ho Jeová hodi hatán ba ema seluk nia orasaun.​—1 Kor 10:24. w18.08 p. 24 par. 3, 5

Hanoin toʼok ezemplu kona-ba José. Jacob hadomi nia liu fali oan sira seluk, no neʼe halo ninia maun sira laran-moras ba nia. Bainhira nia tinan 17, sira faʼan nia hodi sai atan. (Gên 37:2-4, 23-28) Nia moris ho terus iha rai-Ejitu maizumenus ba tinan 13. Primeiru nia sai atan no depois tama komarka. Nia moris dook husi ninia aman neʼebé hadomi tebes nia. Tuir loloos ninia situasaun bele halo nia sente lakon esperansa no rai-hirus, maibé nia la halo nuneʼe. Saida mak ajuda nia? Bainhira José hasoru daudauk terus iha komarka, ita fiar katak nia tau fokus kona-ba oinsá Jeová ajuda ona nia. (Gên 39:21; Sal 105:17-19) Karik nia mós hanoin kona-ba mehi neʼebé Jeová fó ba nia bainhira nia sei joven no neʼe fó konfiansa ba nia katak Jeová hamutuk ho nia. (Gên 37:5-11) Karik nia halo orasaun beibeik no fó sai ba Jeová buat hotu iha ninia laran. (Sal 145:18) Hodi hatán ba José nia orasaun, Jeová halo nia fiar katak Jeová sei “hamutuk ho nia” iha ninia terus hotu. w18.10 p. 28 par. 3-4

Ema nia riku ka kiak bele influénsia dalan neʼebé ita haree sira. Maibé, oinsá mak ema nia riku ka kiak bele influénsia dalan neʼebé ita haree sira? Espíritu santu leno Salomão hodi fó sai realidade neʼebé triste kona-ba ema, hanesan temi iha eskritura ba ohin. Eskritura neʼe hanorin saida mai ita? Se ita la kuidadu, ita bele hili atu sai kolega deʼit ho irmaun-irmán sira neʼebé riku no lakohi habelun ho ema neʼebé kiak. Tanbasá mak perigu tebes atu fihir ema tuir deʼit sasán neʼebé sira iha? Tanba hahalok neʼe bele sobu kongregasaun nia unidade. Neʼe mak buat neʼebé akontese ba kongregasaun balu iha apóstolu sira-nia tempu, no Tiago tenke fó avizu ba kongregasaun sira-neʼe. (Tgo 2:1-4) Ita la bele husik hahalok neʼe atu fahe kongregasaun nia unidade ohin loron no hasees an atu la tesi lia kona-ba ema seluk tuir deʼit buat neʼebé matan haree. w18.08 p. 10 par. 8-10

Ita hatudu katak ita hafolin ita-nia relasaun espesiál ho Jeová liuhusi hahalok neʼebé ita hatudu ba irmaun no irmán sira. Sira mós Jeová nian, hanesan ita. Se ita hanoin-hetan beibeik kona-ba neʼe, ita sei hatudu hahalok diʼak no domin ba sira. (1 Tes 5:15) Tanbasá mak importante atu halo nuneʼe? Jesus hatete ba ninia dixípulu sira: “Ho ida-neʼe mak ema hotu sei hatene katak imi haʼu-nia dixípulu sira, se imi iha domin ba malu.” (João 13:35) Malaquias hatete katak Jeová “see tilun didiʼak no rona” kona-ba oinsá ninia povu koʼalia ba malu no haree malu. (Mal 3:16) Jeová “hatene sira neʼebé ninian”. (2 Tim 2:19) Nia hatene kona-ba buat hotu neʼebé ita halo no koʼalia. (Ebr 4:13) Se ita mak hatudu laran-aat ba ita-nia irmaun-irmán sira, Jeová hatene. No ita mós hatene katak Jeová haree bainhira ita simu ema ho laran-diʼak, fó ho laran-luak, perdua malu, no hatudu laran-diʼak ba malu.​—Ebr 13:16. w18.07 p. 26 par. 15, 17

Kaer metin ba Jeová mak desizaun neʼebé matenek. La iha kriatura ida mak forsa liu, matenek liu, ka iha domin boot liu fali nia. Tan neʼe, ita hakarak laran-metin no apoia nia ba nafatin. (Sal 96:4-6) Maibé iha ema balu neʼebé adora nia la halo hanesan neʼe. Hanoin toʼok kona-ba Caim. Nia adora Jeová no nunka adora maromak falsu. Maski nuneʼe Jeová la simu ninia adorasaun. Tanbasá? Tanba Jeová bele haree Caim nia laran iha hakarak neʼebé aat. (1 João 3:12) Tan neʼe Jeová fó avizu ba nia: “Se ó halo fali buat neʼebé diʼak, haʼu sei simu ó, loos ka lae? Maibé se ó la fila hodi halo buat diʼak, sala mak hein hela iha odamatan atu ataka, no hakarak tebes atu domina ó. Ó bele luta hasoru hodi manán nia ka lae?” (Gên 4:6, 7) Jeová hatete ho klaru ba Caim katak, se nia arrepende no hili hodi apoia Jeová, Jeová mós sei apoia nia. Maibé Caim lakohi rona ba Jeová. w18.07 p. 17 par. 1, 3; p. 18 par. 4

Dalan importante ida neʼebé ita bele halo ita-nia naroman nabilan mak hodi haklaken no hanorin ema atu sai Jesus nia dixípulu sira. (Mt 28:19, 20) Ita fó glória ba Jeová, laʼós liuhusi haklaken deʼit, maibé liu mós husi ita-nia hahalok. Ema sempre haree ita bainhira ita haklaken. Sira hanoin diʼak kona-ba ita no ita-nia Maromak bainhira ita hasé sira ho oin-midar no laran-diʼak. Jesus hatete ba ninia dixípulu sira: “Kuandu imi tama iha uma ida, kumprimenta ema iha uma neʼe.” (Mt 10:12) Iha fatin neʼebé Jesus haklaken, ema iha kostume atu konvida ema neʼebé sira la koñese tama sira-nia uma. Iha fatin barak ohin loron, ema balu la iha kostume atu halo hanesan neʼe. Bainhira ema haree ema oin-foun mai sira-nia uma, baibain sira sente taʼuk ka la gosta. Maibé se ita mak hatudu laran-diʼak, karik neʼe bele halo sira sente diʼak. Bainhira Ita uza karrosa haklaken iha fatin públiku, karik Ita mós haree ona katak ema hakbesik Ita no foti livru sira tanba Ita hatudu oin-midar no hasé sira ho laran-diʼak. w18.06 p. 22 par. 4-5

Apóstolu Pedro iha toman atu ransu deʼit ho ema judeu sira. Maibé bainhira Maromak fó sai katak ema kristaun sira labele fihir ema, Pedro haklaken ba Cornélio, soldadu Roma ida. (Após 10:28, 35) Depois neʼe, Pedro mós ransu no han hamutuk ho ema kristaun neʼebé laʼós ema judeu. Maibé tinan barak liutiha, iha sidade Antiokia, Pedro lakohi tan han hamutuk ho ema kristaun seluk neʼebé laʼós ema judeu. (Gal 2:11-14) Paulo korrije Pedro, no Pedro simu ida-neʼe. Oinsá ita hatene? Tanba bainhira Pedro hakerek ninia karta primeiru ba ema kristaun judeu no ema kristaun sira neʼebé laʼós judeu iha Ásia Menór, nia temi katak importante tebes atu hatudu domin ba maluk fiar-naʼin hotu. (1 Ped 1:1; 2:17) Ita haree katak apóstolu sira aprende husi Jesus nia ezemplu atu hatudu domin ba “ema oioin”. (João 12:32; 1 Tim 4:10) Maski presiza tempu, sira troka duni sira-nia haree kona-ba ema seluk. Tanba ema kristaun sira tau hahalok husi “ema foun,” sira aprende atu haree ema hotu mak hanesan deʼit, tuir Maromak nia haree.​—Kol 3:10, 11. w18.06 p. 11 par. 15-16

Besi neʼebé soldadu Roma uza hodi taka hirus-matan dala ruma iha tahan ida-idak neʼebé silu tuir ninia hirus-matan. Soldadu presiza fó atensaun beibeik hodi besi sira-neʼe metin nafatin atu besi neʼe proteje ninia fuan no orgaun seluk. Jeová nia morál neʼebé loos mak hanesan besi hirus-matan nian neʼebé bele proteje ita-nia “laran”. (Prov 4:23) Soldadu nunka hakarak troka besi neʼe ho besi neʼebé fraku. Hanesan neʼe mós, ita sei nunka hakarak troka Jeová nia morál neʼebé loos ho ita rasik nia hanoin kona-ba saida mak loos. Neʼe tanba ita-nia matenek latoʼo atu proteje ita-nia laran. (Prov 3:5, 6) Tan neʼe mak ita tenke fó atensaun beibeik ba besi hirus-matan nian hodi proteje nafatin ita-nia laran. Se ita mak hadomi liután lia-loos husi Maromak nia Liafuan, neʼe sei halo fasil ba ita atu lori besi neʼebé taka ita-nia hirus-matan ho hahalok neʼebé loos ka Jeová nia morál sira.​—Sal 111:7, 8; 1 João 5:3. w18.05 p. 28 par. 3-4, 6-7

Maski Moisés hatudu ona nia mak ulun-naʼin neʼebé la hanoin an deʼit, maibé povu muramura. Sira muramura kona-ba la iha bee no mós kona-ba Moisés hodi fó sala ba nia. (Núm 20:1-5, 9-11) Moisés sai hirus tebes no lakon ninia hahalok laran-maus. Maski Jeová haruka Moisés atu koʼalia ba fatuk neʼe, maibé nia koʼalia fali ba povu neʼe ho hirus no dehan katak nia sei halo milagre. Tuirmai, nia baku fatuk neʼe ba dala rua no bee barak suli sai. Moisés halo sala boot tanba nia sai foti an no hirus. (Sal 106:32, 33) Maromak la husik Moisés tama ba Rai Promete tanba nia lakon ninia hahalok laran-maus ba tempu uitoan. (Núm 20:12) Ita bele aprende lisaun importante husi akontesimentu neʼe. Primeiru, ita tenke hakaʼas an beibeik atu mantein ita-nia hahalok laran-maus. Se lae, hahalok foti an bele mosu fali no halo ita koʼalia no hatudu hahalok beik. Segundu, bainhira ita estrese, susar ba ita atu hatudu nafatin hahalok laran-maus, tan neʼe ita tenke hakaʼas an nafatin, maski ita sente estrese. w19.02 p. 12-13 par. 19-21

Haklaken mak buat neʼebé todan ka lae? Lae. Bainhira Jesus koʼalia tiha ai-knanoik kona-ba uvas-hun, nia hatete katak ita bele hetan ninia ksolok liuhusi haklaken. (João 15:11) Oinsá? Iha Jesus nia ai-knanoik, nia kompara ninia an hanesan uvas-hun no ninia dixípulu sira hanesan sanak sira. (João 15:5) Sanak neʼebé moris hela iha uvas-hun deʼit mak bele hetan bee no rai nia bokur. Hanesan neʼe mós se ita hamutuk nafatin ho Jesus no laʼo tuir ninia ain-fatin mak bele haksolok hanesan nia. Ksolok neʼe mai husi halo tuir Maromak nia hakarak. (João 4:34; 17:13; 1 Ped 2:21) Hanne pioneiru ona ba tinan 40 liu no nia dehan: “Ksolok neʼebé haʼu hetan beibeik husi serbisu haklaken book haʼu atu kontinua halo Jeová nia serbisu.” Ksolok fó forsa ba ita atu kontinua haklaken maski ema barak lakohi rona ba ita.​—Mt 5:10-12. w18.05 p. 17 par. 2; p. 20 par. 14

Apóstolu Paulo hatudu ezemplu neʼebé diʼak tebes kona-ba fó kmaan ba irmaun-irmán sira. Espíritu santu dirije nia hodi haklaken ba ema gregu, Roma, no seluk tan neʼebé adora maromak oioin. (Gal 2:7-9) Paulo halo viajen ba fatin neʼebé ohin loron hanaran Turkia, no mós Grésia no Itália. Nia haklaken ba ema neʼebé laʼós judeu, no nia harii kongregasaun barak. La fasil ba ema kristaun foun sira tanba ema husi sira rasik nia rai fó terus ba sira, tan neʼe sira presiza tebes atu hetan laran-manas. (1 Tes 2:14) Maizumenus iha tinan 50, Paulo hakerek karta ida neʼebé anima tebes kongregasaun foun iha Tesalónika. Nia dehan: “Ami sempre fó obrigadu ba Maromak kuandu ami temi kona-ba imi hotu iha ami-nia orasaun, basá iha ita-nia Aman Maromak nia oin ami nunka haluha serbisu neʼebé imi halo ho fiar no domin, no oinsá imi tahan susar.” (1 Tes 1:2, 3) Nia mós husu sira atu hametin malu. Nia dehan: “Kontinua fó aten-brani ba malu no hametin malu.”​—1 Tes 5:11. w18.04 p. 19 par. 16-17

Se Ita tau fokus atu halo buat neʼebé Jeová gosta, Ita mós hakarak fó-hatene ba ema seluk kona-ba nia. Tan neʼe mak serbisu haklaken urjente no buat neʼebé importante tebes iha ita-nia moris. Ita bele halo planu atu haklaken liután ka lae? Ita bele foti pioneiru ka lae? Maibé oinsá se Ita ladún gosta haklaken? No oinsá mak Ita bele hadiʼa dalan neʼebé Ita esplika Ita-nia fiar ba ema seluk? Ita bele halo buat rua tuirmai neʼe: Prepara didiʼak, no keta rende an atu fó-hatene ema seluk kona-ba Jeová. Karik Ita sei hakfodak katak Ita gosta duni haklaken ba ema. Karik Ita bele prepara resposta ba pergunta sira neʼebé baibain Ita-nia kolega eskola husu, hanesan, “Tuir Ita-nia hanoin, Maromak iha interese kona-ba ita-nia terus ka lae?” Iha informasaun balu husi ita-nia sítiu jw.org neʼebé bele ajuda Ita atu hatán ba pergunta neʼe. Ita bele hetan atividade ida ho títulu “Maromak hanoin ita-nia terus ka lae?” Atividade neʼe bele ajuda Ita oinsá atu prepara Ita rasik nia resposta sira. w18.04 p. 27 par. 10-11

Maski Adão no Eva goza liberdade oioin, maibé sira-nia liberdade mós iha limitadu. Moris mai sira hatene katak sira la bele hakat liu limitadu sira-neʼe. Porezemplu, sira hatene katak, atu bele moris, hakarak ka lakohi sira tenke dada iis, han, no toba. Maibé neʼe hatudu katak sira la iha liberdade ka lae? Lae. Jeová planu tiha ona katak halo buat sira-neʼe bele lori kontente no ksolok ba Adão no Eva. (Sal 104:14, 15; Ecle 3:12, 13) Jeová fó mandamentu espesífiku ba Adão no Eva. Nia haruka sira atu iha oan, halo nakonu mundu ho sira-nia oan no bei-oan, no tau matan ba mundu. Mandamentu neʼe halakon sira-nia liberdade ka lae? Lae! Halo tuir mandamentu neʼe loke dalan ba sira atu halo mundu tomak sai paraízu, hodi sira bele hela ba nafatin hamutuk ho sira-nia oan no bei-oan neʼebé perfeitu. Neʼe mak Maromak nia hakarak. (Sal 127:3; Isa 45:18) Se Adão no Eva mak halo tuir Jeová, sira sei hetan ksolok iha sira-nia moris kaben no família ba nafatin. w18.04 p. 4-5 par. 7-8

Ita hatudu pasiénsia ba ema iha serbisu haklaken hodi la obriga sira atu komprende ka simu lia-loos husi Bíblia neʼebé sira foin rona. Porezemplu, hanoin kona-ba oinsá mak ita bele ajuda ema komprende kona-ba esperansa atu moris ba nafatin iha mundu paraízu. Ema barak fiar katak ema mate labele moris fali ka ema diʼak sei bá lalehan. Irmaun ida konta kona-ba dalan diʼak neʼebé nia uza. Primeiru, nia lee Génesis 1:28. Tuirmai, nia husu uma-naʼin kona-ba Maromak hakarak ema atu moris iha neʼebé no iha situasaun saida. Ema barak hatán: “Iha rai, iha situasaun neʼebé diʼak.” Tuirmai, irmaun neʼe lee Isaias 55:11 no husu sira se Maromak nia hakarak troka ona ka lae. Dala barak uma-naʼin hatán lae. Ikusmai, irmaun neʼe lee Salmo 37:10, 11 no husu kona-ba ema nia futuru mak saida. Hodi uza Bíblia iha dalan neʼe, nia ajuda ona ema barak atu komprende katak Maromak hakarak ema diʼak atu moris ba nafatin iha Paraízu. w19.03 p. 24 par. 14-15; p. 25 par. 19

Jeová hatudu ho klaru katak nia hakarak ita atu rona ba ninia Oan-Mane no halo tuir. Jesus hanorin ninia dixípulu sira oinsá atu haklaken liafuan diʼak, no nia fó-hanoin sira beibeik atu matan-moris nafatin. (Mt 24:42; 28:19, 20) Nia mós anima sira atu hakaʼas an makaʼas no la rende an. (Lc 13:24) Jesus dehan katak ninia dixípulu sira presiza hatudu domin ba malu, iha unidade, no halo tuir ninia mandamentu sira. (João 15:10, 12, 13) Konsellu neʼe mós diʼak ba ita ohin loron. Jesus hatete: “Ema hotu neʼebé halo tuir lia-loos rona haʼu-nia lian.” (João 18:37) Ita hatudu ita rona ba ninia lian bainhira ita “kontinua hatudu pasiénsia ba malu no prontu atu fó perdua ba malu ho laran tomak”. (Kol 3:13; Lc 17:3, 4) Ita mós hatudu ita rona ba ninia lian bainhira ita haklaken liafuan diʼak ho laran-manas “iha tempu neʼebé diʼak no iha tempu neʼebé susar”.​—2 Tim 4:2. w19.03 p. 10 par. 9-10