Abríl

Oinsá ho ita? Ita hanoin hanesan Jeová ka hanesan ema iha mundu? Ita hakaʼas an atu halo buat neʼebé Maromak simu. Maibé oinsá ho ita-nia hanoin? Ita troka ita-nia hanoin no atitude hodi sai hanesan Jeová nian ka lae? Presiza hakaʼas an atu bele halo nuneʼe. Maibé, fasil atu hanoin tuir ema iha mundu, tanba mundu nia hanoin mak haleʼu daudaun ita. (Éf 2:2) No mós ema iha mundu dala barak hanoin an deʼit, no neʼe bele sai tentasaun ba ita atu hanoin hanesan sira. Sin, la fasil atu hanoin hanesan Jeová, maibé fasil atu hanoin tuir ema iha mundu. Se ita mak husik mundu atu influénsia ita-nia hanoin, ita mós sei hanoin an deʼit no hakarak halo desizaun rasik kona-ba saida mak loos no sala. (Mc 7:21, 22) Tan neʼe mak importante atu haburas hanoin “tuir Maromak nian” laʼós “tuir ema nian”. w18.11 p. 18 par. 1; p. 19 par. 3-4

Ita bele fiar katak bainhira Jeová koʼalia husi lalehan hodi fó sai katak nia hadomi Jesus, ida neʼe hametin tebes Jesus. Jeová halo nuneʼe ba dala tolu. Dala primeiru mak iha tempu neʼebé Jesus hetan batizmu iha Mota Jordaun, Jeová hatete liafuan sira iha leten. Tuir Bíblia, karik João Batista no Jesus deʼit mak rona bainhira Jeová fó sai liafuan sira-neʼe. Tuirmai, tinan ida antes Jesus mate, ninia apóstolu naʼin-tolu rona bainhira Jeová koʼalia kona-ba Jesus: “Neʼe mak haʼu-nia Oan-Mane, ida neʼebé haʼu hadomi, no neʼebé halo haʼu kontente, rona nia bá.” (Mt 17:5) Dala ikus mak iha loron balu antes Jesus mate, Jeová koʼalia dala ida tan husi lalehan ba ninia Oan-Mane. (João 12:28) Jesus hatene ema sei duun katak nia koʼalia aat hasoru Maromak no nia sei mate ho terus. Maski nuneʼe, nia halo orasaun ba ninia Aman, dehan: “Halo tuir Ita-nia hakarak bá, laʼós haʼu-nian.” (Mt 26:39, 42) “Nia tahan iha ai-riin terus nian hodi la sente moe”, tanba nia hakarak deʼit ninia Aman mak hatene no simu nia, laʼós mundu neʼe.—Ebr 12:2. w18.07 p. 10 par. 15-16

Jesus hatudu aten-brani neʼebé boot bainhira nia halo tiha Naʼi nia Han-Kalan. Oinsá? Jesus prontu atu halo tuir ninia Aman nia hakarak, maski nia hatene katak ema sei fó kastigu-mate ba nia tanba duun nia koʼalia aat Maromak. (Mt 26:65, 66) Jesus nafatin hatudu laran-metin neʼebé perfeitu. Nia kontinua fó glória ba ninia Aman nia naran, tane aas Maromak nia direitu atu ukun, no loke dalan ba ema sira neʼebé arrepende an atu hetan moris rohan-laek. Iha tempu hanesan, Jesus prepara ninia dixípulu sira ba buat neʼebé lakleur tan sira sei hasoru. Jesus mós hatudu aten-brani hodi la tau fokus ba ninia laran-susar, maibé tau fokus atu ajuda ninia apóstolu sira neʼebé laran-metin. Han-kalan simples neʼebé nia halo depois nia haruka tiha Judas sai, fó-hanoin ba ema sira neʼebé sei sai ninia dixípulu neʼebé hetan kose-mina kona-ba benefísiu husi Jesus nia sakrifísiu no mós husi hola parte iha aliansa foun.—1 Kor 10:16, 17. w19.01 p. 22 par. 7-8

Jesus nia Aman hatán husi lalehan dehan: “Haʼu fó glória tiha ona no haʼu sei fó glória tan.” Jesus sente laran-susar tanba responsabilidade boot neʼebé nia tenke lori hodi laran-metin nafatin ba Jeová. Jesus hatene katak nia sei hetan terus makaʼas no sei mate iha dalan neʼebé aat. (Mt 26:38) Buat neʼebé importante liu ba Jesus mak atu fó glória ba ninia Aman nia naran. Ema duun Jesus koʼalia aat Maromak, no nia hanoin barak katak ninia mate bele hafoʼer Maromak nia naran. Hanesan Jesus, karik ita mós hanoin barak kona-ba ema neʼebé hafoʼer Jeová nia naran. Karik ita sai vítima ba hahalok la justisa hanesan Jesus. Ka karik ita sai laran-susar tanba istória falsu neʼebé ita-nia inimigu habelar. Karik ita hanoin kona-ba oinsá istória sira-neʼe hafoʼer Jeová nia naran. Iha situasaun hanesan neʼe, Jeová nia liafuan mak fó kmaan duni ba ita. Jeová sei kontinua fó glória ba ninia naran.—Sal 94:22, 23; Isa 65:17. w19.03 p. 11-12 par. 14-16

Jesus nia dixípulu sira hakfodak bainhira rona Jesus hatete katak lakleur tan nia sei hasoru terus no mate. Dixípulu sira hanoin katak Jesus mak sei harii fali Izraél nia ukun. Tan neʼe apóstolu Pedro dehan: “Naʼi, hatudu laran-sadiʼa ba Ita-nia an. Susar sira-neʼe sei la kona Ita.” Maibé Jesus hatán: “Sees tiha husi haʼu, Satanás! Ó hanesan fatuk sidi nian ba haʼu tanba ó-nia hanoin la tuir Maromak nian, maibé tuir ema nian.” (Mt 16:22, 23; Após 1:6) Jesus nia liafuan hatudu ho klaru katak, Jeová nia hanoin la hanesan duni ho mundu nia hanoin neʼebé Satanás kontrola daudaun. (1 João 5:19) Pedro anima Jesus atu hanoin an deʼit hanesan ema barak iha mundu neʼe. Maibé Jesus hatene Jeová nia hanoin la hanesan. Jesus nia resposta hatudu ho klaru katak nia simu deʼit Jeová nia hanoin no lakohi simu mundu nia hanoin sira. w18.11 p. 18 par. 1-2

Imajina toʼok saida mak Jeová haree bainhira ema rihun ba rihun iha mundu tomak halibur hamutuk atu komemora Naʼi nia Han-Kalan. Nia la haree deʼit ba ema-lubun boot, maibé nia haree ema ida-idak neʼebé tuir komemorasaun neʼe. Porezemplu, nia haree ema sira neʼebé tinan-tinan tuir komemorasaun neʼe ho laran-metin. Entre sira iha mós ema balu neʼebé mai maski ema kontra sira makaʼas. Ema balu fali la tuir beibeik reuniaun sira seluk, maibé sira tuir Memoriál tanba sira haree katak neʼe mak buat neʼebé importante. Jeová mós haree ema sira neʼebé tuir Memoriál ba dala primeiru, tanba karik sira hakarak hatene kona-ba reuniaun neʼe. Jeová kontente atu haree ema barak tuir Memoriál. (Lc 22:19) Maibé, nia hanoin liu kona-ba razaun tanbasá sira tuir komemorasaun neʼe. Buat neʼebé importante ba Jeová mak sira-nia motivu. Ita hakarak tebes atu simu hanorin husi Jeová no ninia organizasaun ka lae?—Isa 30:20; João 6:45. w19.01 p. 26 par. 1-3

Jesus prontu atu mate ba ninia dixípulu sira. Nia mós tau uluk sira-nia diʼak duké ninian rasik iha ninia moris loroloron nian. Porezemplu, nia hasoru ninia dixípulu sira maski nia isin-kole ka neon-susar. (Lc 22:39-46) Nia tau fokus ba buat neʼebé nia bele halo ba ema seluk, laʼós ba buat neʼebé nia bele hetan husi sira. (Mt 20:28) Ita mak ema Kristaun loos neʼebé sai família boot ida, no ita kontente atu uza tempu barak hodi konvida ema foun atu hamutuk ho ita. Maibé, ita hakarak liu mak atu ajuda “ita-nia maluk fiar-naʼin” neʼebé para ona atu tuir reuniaun sira no haklaken. (Gal 6:10) Ita hatudu domin hodi anima sira tuir reuniaun, liuliu Memoriál. Hanesan Jeová no Jesus, ita kontente tebes bainhira sira fila fali ba Jeová.​—Mt 18:14. w19.01 p. 29 par. 12, 14; p. 30 par. 15

Bainhira Jesus hahú Memoriál hodi komemora ninia mate, nia uza paun no tua-uvas neʼebé iha ona husi festa Páskua. Jesus hatete ba ninia apóstolu sira katak buat simples rua neʼe mak reprezenta ninia isin no raan neʼebé perfeitu, neʼebé sei hasaʼe nuʼudar sakrifísiu ba sira-nia diʼak. Apóstolu sira-neʼe karik la hakfodak ho arranju simples husi komemorasaun importante neʼe. Tanbasá? Fulan balu antes neʼe, bainhira Jesus vizita ninia belun diʼak Lázaro, Marta, no Maria, Jesus hanorin sira. Marta iha neʼebá, maibé nia okupadu hodi prepara ai-han barak ba bainaka importante neʼe. Bainhira Jesus haree ida-neʼe, nia ho laran-diʼak korrije Marta hodi ajuda nia atu haree katak la presiza ai-han barak. (Lc 10:40-42) Bainhira hela oras balu deʼit atu Jesus fó nia moris nuʼudar sakrifísiu, nia aplika ninia konsellu rasik hodi halo Naʼi nia Han-Kalan neʼebé simples. w19.01 p. 20-21 par. 3-4

Jesus simu glória husi Jeová iha dalan neʼebé nia nunka hanoin. Jeová fó moris-hiʼas ba nia hodi “foti nia ba pozisaun neʼebé aas liu”. Jeová mós fó ba Jesus moris nuʼudar kriatura espíritu neʼebé sei nunka mate. (Flp 2:9; 1 Tim 6:16) Jeová fó kolen neʼebé furak tebes ba Jesus tanba Jesus nia laran-metin! Saida mak bele ajuda ita atu sai ema neʼebé Jeová simu, hodi la buka susesu no naran-boot husi mundu neʼe? Ita presiza hanoin-hetan katak Jeová sempre hatene ninia atan neʼebé laran-metin, no dala barak nia fó kolen ba sira iha dalan neʼebé sira nunka hanoin. Ita la hatene bensaun furak saida mak Jeová sei fó ba ita iha futuru. Maibé, ohin loron, mai ita tahan hasoru problema no susar oioin iha mundu aat neʼe, no la haluha katak mundu neʼe sei lakon. (1 João 2:17) Ita-nia Aman Jeová neʼebé nakonu ho domin sei nunka haluha kona-ba ita-nia serbisu no domin neʼebé ita hatudu ba ninia naran, tanba nia “nunka hatudu hahalok aat”.—Ebr 6:10. w18.07 p. 11 par. 17-18

Jesus hanoin barak kona-ba unidade bainhira han-kalan ikus hamutuk ho ninia apóstolu sira. Bainhira nia halo orasaun hamutuk ho sira, nia temi kona-ba ninia hakarak atu ninia dixípulu sira bele sai ida deʼit, hanesan nia ho nia Aman ida deʼit. Kuandu ninia dixípulu sira iha unidade, neʼe sei sai prova katak Jeová mak haruka duni Jesus mai iha rai. Ema sei haree sé mak Jesus nia dixípulu loloos kuandu sira hatudu domin ba malu, no domin bele halo sira iha unidade. (João 13:34, 35) Ita bele komprende tanbasá Jesus koʼalia barak kona-ba unidade iha kalan neʼe. Nia haree katak ninia apóstolu sira ladún iha unidade. Porezemplu, apóstolu sira sempre haksesuk malu kona-ba “sé mak boot liu entre sira”. (Lc 22:24-27; Mc 9:33, 34) Iha loron ida, Tiago no João husu ba Jesus atu fó ba sira fatin neʼebé importante besik Jesus iha Ukun lalehan nian.​—Mc 10:35-40. w18.06 p. 8 par. 1-2

Jeová hakarak kaben-naʼin sira atu haburas sira-nia domin neʼebé bele dura nafatin. (Mt 19:3-6) Sala seksuál ka adultériu mak hahalok ida neʼebé aat tebes. Tan neʼe mak ukun-fuan númeru hitu husi Ukun-Fuan Sanulu bandu atu labele halo sala seksuál. (Deut 5:18) Neʼe mak sala “hasoru Maromak” no hahalok aat tebes neʼebé ema ida hatudu ba ninia kaben. (Gén 39:7-9) Vítima husi kaben neʼebé halo sala seksuál bele sente laran-kanek ba tinan barak. Jeová mós hanoin tebes oan sira-nia diʼak. Jeová haruka inan-aman sira atu tau matan ba oan sira-nia presiza isin nian no espirituál nian. Inan-aman tenke uza oportunidade hotu atu ajuda sira-nia oan komprende no hafolin Jeová nia Ukun-Fuan no hadomi nia. (Deut 6:6-9; 7:13) Inan-aman labele trata aat sira-nia oan, maibé tenke hafolin sira nuʼudar liman-rohan no prezente husi Jeová.​—Sal 127:3. w19.02 p. 21 par. 5, 7

Job kaer metin ba integridade hodi tau fokus ba ninia esperansa katak Maromak sei fó kolen ba nia. Nia fiar katak Maromak hafolin ninia integridade. Maski hasoru susar, maibé Job iha konfiansa katak Jeová sei fó kolen ba nia, no neʼe ajuda nia atu kaer metin ba ninia integridade. Jeová kontente tebes ho Job nia integridade, tan neʼe Jeová fó kolen barak ba Job maski nia la perfeitu! (Job 42:12-17; Tgo 5:11) Job mós sei hetan kolen neʼebé diʼak liu iha futuru. Maromak la troka. (Mal 3:6) Se ita hanoin-hetan katak Jeová sei fó kolen ba ita, neʼe sei ajuda ita kaer metin ita-nia integridade no hametin ita-nia fiar ba futuru neʼebé kapás. (1 Tes 5:8, 9) Dala ruma, karik ita sente katak ita deʼit mak hatudu integridade, maibé ita nunka mesak. Ita hamutuk ho ema rihun ba rihun iha mundu tomak neʼebé kaer metin ba integridade. Ita mós parte husi fiar-naʼin sira iha tempu uluk neʼebé kaer metin ba integridade, maski ema koko atu oho sira.​—Ebr 11:36-38; 12:1. w19.02 p. 7 par. 15-16

Nuʼudar tempu Memoriál liu ona, diʼak atu husu ita-nia an pergunta sira tuirmai: ‘Oinsá mak haʼu bele banati-tuir Jesus kona-ba hatudu domin? Haʼu hanoin uluk kona-ba haʼu-nia maluk fiar-naʼin sira-nia diʼak ka haʼu-nian rasik? Haʼu hakarak irmaun-irmán sira atu halo buat barak liu fali sira-nia kbiit ka haʼu komprende sira-nia situasaun?’ Diʼak atu ita sempre banati-tuir Jesus no “hanoin malu”. Lakleur tan ita la presiza komemora Memoriál kona-ba Jesus nia mate. Bainhira Jesus “mai fali” durante terus boot, nia sei halibur restu husi “ema neʼebé Maromak hili ona” ba lalehan, no ita sei la komemora tan Memoriál. (1 Kor 11:26; Mt 24:31) Maski iha futuru ita la komemora tan Memoriál, maibé ita bele fiar katak Jeová nia povu sei hanoin-hetan komemorasaun simples neʼe nuʼudar símbolu kona-ba hahalok haraik an, aten-brani no domin boot husi Jesus. w19.01 p. 25 par. 17-19

Mai ita haree oinsá kondisaun iha ita-nia laran mak importante liu. Mai ita kompara neʼe ho ita-nia saúde fíziku. Primeiru, atu ita-nia isin nia kondisaun bele diʼak nafatin, ita presiza han ai-han neʼebé diʼak ba saúde, no halo ezersísiu beibeik. Nuneʼe mós atu nafatin iha kondisaun espirituál neʼebé diʼak, ita presiza han beibeik ai-han espirituál, no ita mós presiza hatudu fiar ba Jeová. Ita hatudu fiar liuhusi aplika buat neʼebé ita aprende no fó sai ita-nia fiar ba ema seluk. (Rom 10:8-10; Tgo 2:26) Segundu, se ita haree deʼit ba ita-nia fíziku, karik ita hanoin katak ita iha saúde diʼak, maibé tuir loloos ita iha moras ruma iha laran. Nuneʼe mós karik ita hanoin katak ita iha ona fiar neʼebé metin tanba atividade espirituál neʼebé ita halo, maibé karik hakarak neʼebé sala sai buras daudaun iha ita-nia laran. (1 Kor 10:12; Tgo 1:14, 15) Ita presiza hanoin-hetan katak Satanás hakarak dada ita atu tuir ninia hanoin. w19.01 p. 15 par. 4-5

Diʼak atu husu ba ita-nia an: ‘Haʼu halo buat neʼebé hanesan ema Samaria neʼe halo ka lae? (Lc 10:30-35) Kuandu ema ruma hetan susar, haʼu bele ajuda sira ka lae? Porezemplu, haʼu fó ajuda ba ema neʼebé idade iha kongregasaun, irmaun-irmán neʼebé faluk, no oan sira neʼebé inan-aman la serbí Jeová ka lae? Haʼu buka dalan atu “fó laran-manas ba sira neʼebé laran-tun” ka lae?’ (1 Tes 5:14; Tgo 1:27) Hatudu laran-sadiʼa mak dalan ida atu fó ba ema seluk, no neʼe sei lori kontente mai ita. No razaun ida tan mak tanba ita hatene ita halo kontente Jeová. (Após 20:35; Ebr 13:16) Kona-ba ema neʼebé hatudu laran-sadiʼa, Liurai David dehan: “Jeová sei proteje nia hodi nia bele kontinua moris. Ema sei fó sai katak nia mak ema neʼebé kontente iha rai.” (Sal 41:1, 2) Kuandu ita hatudu laran-sadiʼa no hanoin ema seluk, ita mós sei simu laran-sadiʼa husi Jeová no sai kontente ba nafatin.​—Tgo 2:13. w18.09 p. 19-20 par. 11-12

Irmán ida neʼebé laran-metin naran Yoshiko rona informasaun neʼebé ladiʼak. Doutora neʼebé tau matan ba nia hatete katak nia sei moris ba fulan balu deʼit. Saida mak irmán Yoshiko halo? Nia hanoin kedas ninia eskritura favoritu, neʼe mak eskritura ba ohin nian. Tuirmai, ho kalma nia hatete ba doutór katak nia la taʼuk, tanba Jeová kaer metin ninia liman. Liafuan sira husi eskritura neʼe ajuda nia atu tau fiar tomak ba Jeová. Eskritura neʼe mós bele ajuda ita atu sente kalma nafatin bainhira hasoru susar sira. Foufoun, Jeová haruka Isaias hakerek liafuan sira-neʼe atu fó kmaan ba ema Judeu neʼebé ikusmai sei sai dadur iha rai-Babilónia. Maibé, Jeová hakarak atu liafuan sira-neʼe laʼós deʼit ajuda ema Judeu, maibé ajuda mós ninia atan sira hotu toʼo ohin loron. (Isa 40:8; Rom 15:4) Ohin loron, ita moris iha tempu neʼebé mosu “problema barak neʼebé susar atu tahan” no liafuan sira neʼebé temi iha livru Isaias bele fó kmaan mai ita.​—2 Tim 3:1. w19.01 p. 2 par. 1-2

Feen-laʼen sira neʼebé haketak malu hanesan neʼe, sira naʼin-rua nafatin kaben-naʼin, no maski la moris hamutuk, sira sei hasoru susar oioin. Apóstolu Paulo fó razaun tuirmai neʼe ba kaben-naʼin sira atu nafatin moris hamutuk, katak: “Laʼen neʼebé laʼós fiar-naʼin sai santu iha Maromak nia oin tanba ninia feen, no feen neʼebé laʼós fiar-naʼin sai santu iha Maromak nia oin tanba ninia laʼen neʼebé fiar-naʼin. Se lae karik, imi-nia oan sira sei sai la moos, maibé agora sira santu ona.” (1 Kor 7:14) Ema Kristaun barak deside atu moris hamutuk ho ninia kaben neʼebé la serbí Jeová maski iha situasaun neʼebé susar tebes. No se sira-nia kaben ikusmai sai Testemuña ba Jeová, sira bele sente kontente tanba sira-nia hakaʼas an la saugati. (1 Kor 7:16; 1 Ped 3:1, 2) Kongregasaun Kristaun iha mundu tomak nakonu ho ema neʼebé halaʼo moris kaben nian ho susesu. Ita rasik nia kongregasaun mós iha kaben-naʼin neʼebé moris kontente, tanba laʼen hadomi feen no feen hatudu respeitu ba laʼen. Sira hotu hatudu katak moris kaben nian mak folin-boot duni.​—Ebr 13:4. w18.12 p. 14 par. 18-19

Liafuan “Eden” signifika “Haksolok”, no jardín neʼe mak fatin neʼebé lori haksolok duni. Fatin neʼe kapás tebes, iha ai-han barak, no ema bele moris ho dame hamutuk ho animál sira. (Gén 1:29-31) Parádesos mak liafuan Gregu neʼebé tradús husi liafuan Ebraiku “jardín”. Iha livru ida (Cyclopaedia by M’Clintock and Strong) hatete katak, kuandu ema Gregu rona liafuan parádesos, sira sei imajina kedas kona-ba jardín neʼebé luan no furak, neʼebé la iha buat ida mak lori perigu. Fatin neʼe iha ai-hun barak neʼebé fó fuan oioin, no iha mós mota neʼebé moos, no bibi sira han duʼut matak. Neʼe hatudu katak jardín Eden mak paraízu duni. (Kompara Génesis 2:15, 16.) Maromak Jeová tau Adão ho Eva iha Paraízu. Maibé sira lakon sira-nia priviléjiu atu hela iha Paraízu, nuneʼe mós ho sira-nia oan no bei-oan sira. (Gén 3:23, 24) Maski ema la hela tan iha Paraízu neʼe, ita bele fiar katak jardín furak neʼe sei iha toʼo Rai-Nabeen iha Noé nia tempu. w18.12 p. 3-4 par. 3-5

Inan-aman hakaʼas an atu hanorin oan kona-ba morál neʼebé diʼak. Se oan sira hili atu moris tuir morál neʼebé inan-aman hanorin ba sira, karik sira sei halo desizaun neʼebé diʼak no hasees an husi problema no susar oioin. Hanesan inan-aman neʼebé diʼak, Jeová mós hakarak ninia oan sira atu iha moris neʼebé diʼak liu hotu. (Isa 48:18) Tan neʼe mak nia hanorin prinsípiu báziku ba ita kona-ba morál no ita-nia hahalok ba ema seluk. Nia konvida ita atu haburas ninia hanoin no moris tuir ninia morál sira. Neʼe la halakon ita-nia liberdade. Maibé ajuda ita atu haburas ita-nia kbiit atu hanoin. (Sal 92:5; Prov 2:1-5; Isa 55:9) Hodi halo nuneʼe ita bele halo desizaun neʼebé lori kontente ba ita. (Sal 1:2, 3) Sin, iha Jeová nia hanoin lori benefísiu oioin ba ita. w18.11 p. 19-20 par. 7-8

Atu kontinua laʼo iha lia-loos, ita labele husik ema neʼebé la serbí Jeová atu influénsia ita. Bainhira ita aprende lia-loos, ita-nia relasaun diʼak ho ita-nia kolega no família neʼebé la serbí Jeová mós troka. Karik sira balu respeita ita-nia fiar, maibé karik balu kontra. Karik ita-nia família, kolega serbisu, no kolega eskola koko atu dada ita tuir selebrasaun ruma. Saida mak bele ajuda ita atu la halo tuir kostume no selebrasaun loron-boot neʼebé Jeová la simu? Ita presiza hanoin beibeik kona-ba tanbasá mak Jeová la simu selebrasaun sira-neʼe. Buka informasaun husi ita-nia publikasaun sira hodi hatene kona-ba selebrasaun sira-nia hun. Kuandu ita hanoin didiʼak razaun sira husi Bíblia kona-ba tanbasá ita la selebra loron-boot ruma, neʼe bele ajuda ita atu hatene katak ita laʼo daudaun iha dalan neʼebé “halo Naʼi kontente”. (Éf 5:10) Se ita tau fiar ba Jeová no ninia Liafuan, ita sei la taʼuk kona-ba ema seluk sente oinsá.​—Prov 29:25. w18.11 p. 11 par. 10, 12

Se ita-nia moris troka derrepente, karik ita sei sai laran-taridu tebes toʼo hanoin deʼit kona-ba ita-nia problema sira. José mós bele sai hanesan neʼe, maibé nia halo buat ruma iha ninia situasaun neʼe hodi Jeová bele haraik bensaun. Maski nia hetan kastigu iha komarka, nia hakaʼas an hodi halo buat hotu neʼebé xefe boot ba komarka fó ba nia atu halo hanesan bainhira nia serbisu ba Potifar. (Gên 39:21, 22) Hanesan José, karik ita bele monu ba situasaun neʼebé ita la bele kontrola. Maibé se ita hatudu pasiénsia no halo buat neʼebé ita bele halo, Jeová sei haraik bensaun ba ita. (Sal 37:5) Maski iha tempu neʼebé ita la hatene atu halo saida ka sente laran-taridu, ita la presiza sente la iha dalan atu sai ka lakon esperansa. (2 Kor 4:8) Jeová sei hamutuk ho ita, liuliu se ita tau fokus nafatin ba ita-nia serbisu haklaken. w18.10 p. 29 par. 11, 13

Ita sente oinsá se ema neʼebé Ita koñese no respeitu haluha Ita-nia naran, ka aat liután mak nia la koñese ona Ita? Neʼe bele halo Ita laran-kanek tebes, loos ka lae? Tanbasá? Tanba ita hotu hakarak ema seluk simu ita. Laʼós neʼe deʼit, ita mós hakarak ema seluk hatene ita mak ema hanesan saida no ita kumpre ona saida deʼit. (Núm 11:16; Jó 31:6) Maibé tanba ita la perfeitu, se ita la kuidadu, ita-nia hanoin bele sai kleʼuk kona-ba oinsá ema tenke hafolin ita. Satanás nia mundu bele book ita atu haburas hakarak hodi sai famozu ka sai ema neʼebé importante. Se ita komesa haburas hakarak sira-neʼe, ita sei la fó tan hahiʼi neʼebé Aman Jeová merese atu simu.​—Apok 4:11. w18.07 p. 7 par. 1-2

Ita la hakfodak hodi hatene katak Satanás ho anju aat sira mak book ema neʼebé kaer podér atu “koʼalia bosok”. (1 Tim 4:1, 2) Ulun-naʼin relijiaun sira neʼebé koʼalia lia-bosok mak aat tebes. Tanbasá? Tanba se ema mak fiar ba sira-nia hanorin falsu no halo buat neʼebé Maromak odi, ema neʼe bele lakon oportunidade atu moris ba nafatin. (Os 4:9) Jesus hatene katak ulun-naʼin relijiaun sira iha ninia tempu lohi ema, tan neʼe ho aten-brani nia hatete ba sira: “Susar ba imi eskriba no farizeu, imi ema laran-makerek! Imi hakur tasi no laʼo liu rai-maran atu halo ema foun ida tuir imi-nia fiar, no kuandu nia fiar ona, imi halo nia sai Gehena nia oan.” Neʼe hatudu katak ema neʼe sei lakon ba nafatin. (Mt 23:15) Jesus hatete katak ulun-naʼin relijiaun falsu sira-neʼe hanesan deʼit ho sira-nia aman “ohodór” Diabu.​—João 8:44. w18.10 p. 7 par. 5-6

Jesus nia liafuan katak sá? Nia hatutan tan: “Haksoit bá ho haksolok, tanba imi-nia kolen boot tebes iha lalehan, basá iha dalan hanesan neʼe mós sira fó-terus ba profeta sira neʼebé uluk liu imi.” (Mt 5:12) Kuandu ema baku tiha apóstolu sira no haruka sira atu la bele haklaken, “sira sai husi Sinédriu nia oin no sira haksolok”. Sira haksolok laʼós tanba hetan baku, maibé tanba “Maromak husik ema atu hamoe sira tanba Jesus nia naran”. (Após 5:41) Ohin loron, Jeová nia povu mós tahan ho haksolok kuandu ema fó-terus ba sira tanba Jesus nia naran. (Tgo 1:2-4) Hanesan apóstolu sira, se ita hetan susar ka ema fó-terus, ita la sente haksolok. Maibé se ita hatudu laran-metin ba Jeová, nia sei fó aten-brani ba ita atu ita bele tahan. Kuandu Jeová, “Maromak neʼebé kontente” simu ita, ita bele sente kontente maski ema fó-terus ka família kontra.​—1 Tim 1:11. w18.09 p. 21 par. 18-20

Tanba hasoru daudauk “problema barak”, ema barak sente atu rende an deʼit. (2 Tim 3:1-5) Tinan-tinan, hamutuk ema naʼin-800.000 resin mak hakotu sira rasik nia moris, neʼe katak kada segundu 40, ema ida mate. Ita sente triste hodi haree ita-nia irmaun-irmán balu mós sente hanesan neʼe no ikusmai oho-an. Ohin loron, ita-nia irmaun-irmán barak hasoru daudauk situasaun estrese oioin no ita presiza hametin sira liuhusi domin. Balu ema goza no fó-terus ba sira. Balu presiza tahan tanba ema trata no koʼalia aat sira iha serbisu-fatin. Balu kole tebes tanba sira tenke serbisu ba oras barak ka halo serbisu neʼebé lori estrese ba sira. Balu tan hasoru problema boot iha família laran, karik tanba sira-nia kaben neʼebé la adora Jeová kritika beibeik sira. Tanba estrese no problema oioin, neʼe halo ema barak iha kongregasaun sente kole tebes iha dalan fíziku no emosaun. w18.09 p. 13 par. 3, 5

Inan-aman serbisu hamutuk ho Jeová liuhusi ajuda oan atu halo planu espirituál. Inan-aman barak halo nuneʼe. Rezultadu mak, ikusmai sira-nia oan deside atu serbí Jeová tempu-tomak toʼo fatin sira neʼebé dook. Balu sai misionáriu, balu pioneiru iha fatin neʼebé presiza haklaken-naʼin liután, no balu tan serbí iha Betel. Inan-aman balu la bele gasta tempu ho oan tanba oan sira serbí iha fatin seluk. Maski nuneʼe, sira fó laran-manas ba sira-nia oan atu kontinua halaʼo sira-nia knaar. Tanbasá? Tanba sira kontente atu haree sira-nia oan tau uluk Jeová iha sira-nia moris. Inan-aman barak sente hanesan Ana neʼebé hatete katak nia fó-empresta ninia oan Samuel ba Jeová. Sira sente katak serbisu hamutuk ho Jeová iha dalan neʼe mak priviléjiu neʼebé boot tebes.—1 Sam 1:28. w18.08 p. 24 par. 4

Jesus la hatete katak sira sei nunka tama. Nia mós hatete: “Kontente ba imi neʼebé kiak, tanba Maromak nia Ukun mak imi-nian.” (Lc 6:20) Maibé neʼe la dehan katak ema kiak hotu sei rona ba Jesus no halo tuir ninia hanorin. Iha ema barak neʼebé kiak mós lakohi tuir Jesus. Realidade mak, ita la bele tesi lia kona-ba ema nia relasaun ho Jeová liuhusi sasán neʼebé nia iha ka la iha. Iha Jeová nia povu nia leet, ema balu riku no ema balu kiak. Maibé sira hotu hadomi Jeová no serbí nia ho laran tomak. Eskritura fó konsellu ba sira neʼebé riku atu “la tau fiar ba sira-nia riku, maibé tau fiar ba Maromak”. (1 Tim 6:17-19) Maromak nia Liafuan mós fó avizu ba Jeová nia atan hotu neʼebé riku no kiak katak, perigu tebes atu hadomi osan. (1 Tim 6:9, 10) Se ita mak iha hanoin neʼebé hanesan Jeová kona-ba ita-nia irmaun-irmán sira, ita sei la tesi lia kona-ba sira tuir deʼit buat neʼebé sira iha ka la iha. w18.08 p. 10-11 par. 11-12

Ita hakarak hatudu ba Jeová katak ita agradese tebes tanba ita mak ninia povu. Ita hatene katak, bainhira ita dedika ita-nia moris ba nia, neʼe mak desizaun matenek liu hotu neʼebé ita halo. Tan neʼe, ita hakaʼas an atu sees husi buat neʼebé Jeová odi. No ita mós hatudu domin no respeitu ba irmaun-irmán sira tanba sira mós Jeová nian. (Rom 12:10) Bíblia promete katak: “Jeová sei la husik hela ninia povu.” (Sal 94:14) Neʼe garantia ida. Maski saida deʼit mak akontese, Jeová sei hamutuk ho ita. Se ita mate karik, nia sei la haluha ita. (Rom 8:38, 39) “Ita moris ka mate, ita mak Jeová nian.” (Rom 14:8) Ita hein namanas ba tempu neʼebé Jeová sei fó moris-hiʼas ba ninia belun sira neʼebé laran-metin ba nia. (Mt 22:32) Agora daudauk ita mós goza hela prezente furak oioin neʼebé Jeová fó ba ita. Hanesan Bíblia dehan: “Ksolok ba nasaun neʼebé adora Jeová nuʼudar ninia Maromak, povu neʼebé Nia hili ona atu sai Ninian.”​—Sal 33:12. w18.07 p. 26 par. 18-19

Ema balu sente katak buat balu iha moris hanesan edukasaun ka serbisu mak ema ida-idak nia desizaun, tan neʼe sira iha liberdade atu hili tuir sira rasik nia hakarak, naran katak neʼe la kontra sira-nia konxiénsia. Karik sira bele hanoin: “Tansá mak ema seluk nia laran tenke tesi lia kona-ba haʼu-nia liberdade?” (1 Kor 10:29) Maski ita iha liberdade atu halo desizaun rasik kona-ba buat sira-neʼe, maibé ita tenke hanoin-hetan katak ita-nia liberdade iha limitadu no desizaun hotu neʼebé ita halo sei lori konsekuénsia. Tan neʼe mak Paulo hatete liafuan iha eskritura ba ohin. Hodi nuneʼe mak, maski ita iha liberdade atu halo ita rasik nia desizaun, ita tenke hanoin kona-ba buat seluk neʼebé mak importante liu fali ita-nia hakarak. w18.04 p. 10 par. 10

Ohin loron, ema kristaun ida mós bele sai hanesan Caim hodi hanoin katak nia adora Jeová, maibé iha tempu neʼebé hanesan, halo buat neʼebé Jeová odi. (Jud 11) Karik nia badinas haklaken no tuir reuniaun sira. Maibé iha tempu neʼebé hanesan, nia hanoin beibeik kona-ba buat neʼebé la morál, hanoin neʼebé kaan-teen, ka rai odi ba maluk kristaun seluk iha ninia laran. (1 João 2:15-17; 3:15) Iha hanoin hanesan neʼe bele lori ba hahalok aat. Karik ema seluk la hatene ita iha hanoin saida ka halo saida, maibé Jeová hatene. Jeová hatene se ita apoia nia ho laran tomak ka lae. (Jer 17:9, 10) Bainhira ita halo sala, Jeová la hanoin atu husik kedas ita. Se ita komesa laʼo daudaun ba dalan neʼebé perigu, Jeová husu ba ita: “Fila fali mai haʼu.” Jeová hatene katak ita luta daudaun hasoru ita-nia fraku sira. Maibé nia hakarak ita hakribi buat neʼebé aat. (Isa 55:7) Se ita mak halo tuir nia, nia promete ba ita katak nia sei ajuda ita no fó forsa ba ita atu “bele luta hasoru hodi manán” hakarak neʼebé sala.​—Gên 4:7. w18.07 p. 18 par. 5-6