Maiu

Foin daudaun, ema barak halai husi sira-nia rai no agora moris nuʼudar refujiadu iha rai seluk. Ita bele aprende oinsá atu hasé ema iha sira-nia língua. Ita mós bele aprende fraze balu neʼebé bele book sira atu hakarak koʼalia ho Ita. Depois, Ita bele hatudu vídeo no livru iha sira-nia língua neʼebé hetan iha jw.org. Jeová fó ba ita buat neʼebé ita presiza atu hetan rezultadu diʼak bainhira ita haklaken. Porezemplu, buat neʼebé ita aprende iha reuniaun Moris Kristaun no Haklaken, ajuda ita atu fiar an hodi halo vizita fali no estuda Bíblia ho ema. Inan-aman sira bele hanorin sira-nia oan oinsá atu hatoʼo komentáriu ho sira-nia liafuan rasik. Labarik sira-nia resposta neʼebé simples no husi laran book ona ema balu atu simu lia-loos.​—1 Kor 14:25. w18.06 p. 22-23 par. 7-9

Diʼak atu hanoin-hetan katak uluk ita hotu mak dook tebes husi Maromak. (Éf 2:12) Maibé ho domin Jeová dada ita. (Os 11:4; João 6:44) No Kristu mós simu ita. Nia loke dalan atu ita bele sai parte husi Maromak nia família. Maski ita ema sala-naʼin, maibé Jesus simu nafatin ita, tan neʼe ita labele hanoin atu la simu ema seluk! Tanba ita besik liu ba mundu aat neʼe nia rohan, ema sei hatudu liután diskriminasaun, odi no hahalok sira neʼebé haketak ema. (Gal 5:19-21; 2 Tim 3:13) Maibé nuʼudar Jeová nia povu, ita buka “matenek husi lalehan,” neʼebé sei ajuda ita atu la fihir ema no haburas dame. (Tgo 3:17, 18) Ita kontente habelun ho ema husi rai oioin, simu toman neʼebé sira iha, no karik aprende mós sira-nia língua. Bainhira ita halo ida-neʼe, ita-nia dame “sei sai hanesan mota ida” no hahalok loos “sei sai hanesan tasi nia laloran.”—Isa 48:17, 18. w18.06 p. 12 par. 18-19

Se sapatu laiha, soldadu Roma la bele bá halo funu. Sapatu sira-neʼe halo husi animál nia kulit ho dalas tolu, tan neʼe forte tebes. Sapatu sira-neʼe mamar, tan neʼe soldadu sira bele laʼo ho diʼak no la monu. Soldadu Roma sira hatais sapatu neʼebé ajuda sira hodi halo funu, sapatu simbóliku neʼebé ita hatais ajuda ita “atu haklaken liafuan diʼak dame nian”. (Isa 52:7; Rom 10:15) Maski nuneʼe, ita presiza aten-brani atu bele haklaken. Bo neʼebé tinan 20 hatete: “Uluk haʼu taʼuk atu haklaken ba kolega eskola sira. Karik tanba haʼu sente moe. Se haʼu hanoin fali, haʼu la hatene tanbasá haʼu presiza moe. Ohin loron haʼu gosta haklaken ba ema neʼebé tinan hanesan haʼu.” Joven barak sente katak, se sira prepara nanis, sira sei la sente taʼuk atu haklaken. w18.05 p. 29 par. 9-11

Jesus hatete ba apóstolu sira: “Haʼu fó haʼu-nia dame ba imi.” (João 14:27) Oinsá mak Jesus nia dame bele ajuda ita atu kontinua haklaken? Se ita mak kontinua haklaken, ita bele sente dame tanba ita hatene katak ita halo daudauk Jeová no Jesus kontente. No dame neʼe mak fó forsa ba ita atu tahan iha serbisu haklaken. (Sal 149:4; Rom 5:3, 4; Kol 3:15) Bainhira Jesus hatete tiha ba apóstolu sira katak nia hakarak sira atu iha ksolok, nia esplika ba sira tanbasá importante atu hatudu domin neʼebé la hanoin an deʼit. (João 15:11-13) Tuirmai nia dehan: “Haʼu bolu imi belun sira.” Sai Jesus nia belun mak prezente neʼebé furak duni! Maibé oinsá mak apóstolu sira bele sai Jesus nia belun ba nafatin? Jesus esplika hodi dehan: “Kontinua fó fuan.” (João 15:14-16) Maizumenus tinan rua antes neʼe Jesus hatete ba apóstolu sira: “Bá hodi haklaken katak Ukun lalehan nian besik ona.” (Mt 10:7) Tan neʼe mak iha kalan antes Jesus mate nia anima sira atu tahan hodi kontinua haklaken.—Mt 24:13; Mc 3:14. w18.05 p. 20-21 par. 15-16

Joven sira, halo desizaun hodi uza Ita-nia moris atu serbí Jeová no halo planu espirituál sira. Iha joven barak neʼebé idade hanesan ho Ita hakarak uza sira-nia tempu atu goza moris deʼit. Karik sira mós sei konvida Ita atu halo tuir sira. Sedu ka tarde, Ita presiza hatudu ba sira katak importante tebes ba Ita atu kumpre Ita-nia planu sira. Keta husik ema seluk atu halo Ita haluha tiha Ita-nia planu sira. Entaun Ita bele halo saida se ema ruma hakaʼas Ita atu halo tuir buat neʼebé sira halo? Hasees an husi situasaun sira neʼebé bele book Ita atu halo tuir ema. (Prov 22:3) Hanoin kona-ba konsekuénsia husi halo buat neʼebé sala. Haraik-an hodi buka sujestaun diʼak husi ema seluk. Rona ba buat neʼebé Ita-nia inan-aman no mós irmaun-irmán sira neʼebé iha ona esperiénsia barak hatete ba Ita. (1 Ped 5:5, 6) Ita hatudu haraik-an hodi rona ba sujestaun sira neʼebé diʼak ka lae? w18.04 p. 28-29 par. 14-16

Iha Jesus nia lia-menon ba kongregasaun balu iha Ázia Menór, nia hatudu agradese ba serbisu neʼebé ninia dixípulu sira halo. Porezemplu, nia komesa ninia lia-menon ba kongregasaun iha Tiatira, hodi dehan: “Haʼu hatene ó-nia hahalok sira, ó-nia domin, ó-nia fiar, ó-nia serbisu ba Maromak no ó tahan susar oioin, no haʼu hatene katak ó-nia hahalok ikus diʼak liu fali uluk nian”. (Apok 2:19) Jesus la temi deʼit kona-ba serbisu barak neʼebé sira halo ona maibé nia mós gaba sira tanba sira-nia hahalok neʼebé motiva sira atu hatudu hahalok diʼak. Maski Jesus presiza fó konsellu ba ema balu iha Tiatira, nia nafatin komesa no remata ninia lia-menon ho liafuan anima. (Apok 2:27, 28) Hanoin toʼok kona-ba podér neʼebé Jesus iha nuʼudar kongregasaun hotu nia ulun. Nia la presiza fó obrigadu ba ita tanba serbisu neʼebé ita halo ba nia. Maski nuneʼe, nia hatudu agradese. Jesus hatudu duni ezemplu diʼak ba katuas kongregasaun sira! w19.02 p. 16 par. 10

Iha apóstolu sira-nia tempu, Jeová uza grupu administradór hodi fó laran-manas ba ema kristaun hotu, inklui mós sira neʼebé dirije kongregasaun sira. Sira haruka membru naʼin-rua husi grupu administradór, Pedro no João, hodi halo orasaun ba ema kristaun foun sira-neʼe hodi espíritu santu tun ba sira. (Após 8:5, 14-17) Filipe no mós irmaun-irmán foun sira-neʼe sente kmaan tebes bainhira simu apoiu husi grupu administradór! Ohin loron, Grupu Administradór husi Testemuña ba Jeová mós fó laran-manas ba ema Betel, pioneiru tempu-tomak, no ita hotu. Hanesan ema kristaun sira iha tempu uluk, ita mós sente haksolok bainhira simu liafuan sira husi Grupu Administradór. No mós iha tinan 2015 Grupu Administradór fó sai broxura ida ho títulu Kembalilah kepada Yehuwa atu anima sira neʼebé husik lia-loos hodi fila fali mai. w18.04 p. 19 par. 18-20

Ema balu hanoin katak, se sira mak iha liberdade neʼebé la iha limitadu, neʼe diʼak tebes. Maibé realidade hanesan neʼe duni ka lae? Hanoin toʼok mundu sei sai oinsá se ema hotu iha liberdade neʼebé la iha rohan? Livru ida (The World Book Encyclopedia) hatete katak, iha komunidade ida-idak iha lei oioin neʼebé komplikadu tebes tanba maski lei sira-neʼe atu fó protesaun ba ema, maibé iha tempu neʼebé hanesan fó mós limitadu ba ema nia liberdade. Tan neʼe mak ita haree ema halo lei oioin, no iha advogadu no juis rihun ba rihun neʼebé presiza esplika no implementa lei sira-neʼe. Jesus nia liafuan hatudu katak, se ita hakarak hetan liberdade neʼebé loos, ita presiza halo buat rua. Primeiru, ita presiza simu lia-loos neʼebé Jesus hanorin. Segundu, ita presiza sai ninia dixípulu. Halo buat sira-neʼe bele fó liberdade neʼebé loos ba ita. Maibé livre husi saida? Jesus dehan: “Ema neʼebé halo sala, nia atan ba sala.” Nia hatutan: “Se Oan halo imi livre, imi sei sai livre duni.”​—João 8:34, 36. w18.04 p. 6-7 par. 13-14

Ita kontente hodi ransu ho ema neʼebé hanoin ita-nia sentimentu no ita-nia diʼak. Sira koko atu tau sira-nia an iha ita-nia situasaun hodi komprende saida mak ita hanoin no sente. Sira hatene ona saida mak ita presiza no oferese ajuda ba ita, dala ruma antes ita husu. Ita hafolin tebes ema hanesan neʼe tanba sira hatudu hahalok “hanoin malu”. Nuʼudar ema Kristaun, ita hotu hakarak hatudu katak ita hanoin malu. Maibé, la fasil atu halo nuneʼe. Tanbasá? Razaun ida mak ita la perfeitu. (Rom 3:23) Baibain ita hanoin an deʼit. Tan neʼe ita presiza hakaʼas an. No mós, ita balu sente susar atu hanoin ema seluk tanba dalan neʼebé ema haboot ita ka ita-nia pasadu. Razaun seluk mak karik ita hetan influénsia husi ema seluk nia hahalok. Iha loron ikus sira-neʼe, ema barak la hanoin ema seluk nia sentimentu. Sira “hadomi deʼit sira-nia an”. (2 Tim 3:1, 2) Maibé, se ita banati-tuir Maromak Jeová no ninia Oan-Mane Jesus Kristu, ita sei haburas liután hahalok hanoin malu. w19.03 p. 14 par. 1-3

Ukun-fuan ikus husi Ukun-Fuan Sanulu bandu ema atu labele kaan, ka haburas hakarak neʼebé sala kona-ba buat neʼebé ema seluk nian. (Deut 5:21; Rom 7:7) Jeová fó ukun-fuan neʼe atu hanorin lisaun importante ida. Nia hakarak ninia povu proteje sira-nia laran, katak sira-nia hanoin no sentimentu. Nia hatene katak hahalok aat komesa husi hanoin no sentimentu neʼebé aat. Porezemplu, Liurai David mak ema diʼak, maibé iha tempu ida nia monu ba lasu neʼe. Nia kaan mane seluk nia feen. Hakarak neʼe lori nia ba sala. (Tgo 1:14, 15) David halo sala seksuál, lohi feto neʼe nia laʼen, no tuirmai haruka ema oho nia. (2 Sam 11:2-4; 12:7-11) Jeová la haree deʼit ba ema husi liʼur maibé nia haree ita ema oinsá loos iha laran. (1 Sam 16:7) Ita labele subar ita-nia hanoin, sentimentu no hahalok husi nia. Nia gosta haree buat diʼak husi ita. No nia hakarak ita atu buka-hatene no kontrola hanoin sala antes neʼe hamosu hahalok sala.​—2 Krón 16:9; Mt 5:27-30. w19.02 p. 21 par. 9; p. 22 par. 11

Bíblia dehan katak Moisés mak “ema neʼebé laran-maus liu fali ema seluk hotu iha mundu tomak”. (Núm 12:3) Neʼe katak nia fraku, taʼuk halo desizaun, no taʼuk bainhira ema kontra nia ka lae? Karik ema balu hanoin katak ema laran-maus mak hanesan neʼe. Maibé neʼe la loos. Moisés mak Maromak nia atan neʼebé forte, la taʼuk halo desizaun, no aten-brani. Ho Jeová nia ajuda, Moisés hasoru ukun-naʼin kbiit boot iha rai-Ejitu, lori ema maizumenus naʼin-3.000.000 hodi laʼo liu rai-fuik, no ajuda nasaun Izraél atu manán sira-nia inimigu. Ita la hasoru susar neʼebé hanesan Moisés, maibé loroloron iha situasaun ka ema neʼebé halo susar mai ita atu hatudu laran-maus. Maski nuneʼe, ita iha razaun diʼak atu haburas hahalok neʼe. Jeová promete katak “ema laran-maus sei simu rai nuʼudar sira-nian”. (Sal 37:11) Ita bele dehan katak ita mak ema laran-maus ka lae? Ema seluk mós dehan katak ita laran-maus ka lae? w19.02 p. 8 par. 1-2

Jeová fó ba ita ema buat espesiál ida, neʼe mak konxiénsia. Oinsá mak ita hatene katak Adão no Eva iha konxiénsia? Tanba bainhira sira halo tiha sala, sira subar husi Maromak. Neʼe hatudu katak sira-nia konxiénsia fó sinál ba sira. Ita-nia konxiénsia mak kbiit iha laran neʼebé fó-hatene ita katak ita halo buat neʼebé loos ka sala, no konxiénsia neʼe bele dirije ita iha ita-nia moris. Ema neʼebé ninia konxiénsia seidauk hetan treinu mak hanesan ró neʼebé ninia kompas aat ona. Anin-boot no tasi nia korrente bele halo ró neʼe halai ba fatin sala. Maibé se kompas laʼo diʼak, kapitaun bele lori ró neʼe ba dalan neʼebé loos. Hanesan neʼe mós, se ita treinu ita-nia konxiénsia, ita mós bele laʼo iha dalan neʼebé loos. Se ita-nia konxiénsia la hetan treinu, konxiénsia neʼe sei la fó avizu neʼebé ita presiza atu sees husi sala. (1 Tim 4:1, 2) Karik ita-nia konxiénsia sei halo ita fiar katak “buat aat mak diʼak”. w18.06 p. 16 par. 1-3

Ita tenke rekoñese no la simu mundu nia ideia sira neʼebé fó sai iha dalan neʼebé subasubar. Porezemplu, notísias balu fó sai informasaun neʼebé apoia opiniaun polítika nian. Balu tan fó sai ideia neʼebé apoia mundu nia planu sira no buat seluk tan neʼebé mundu halo ona. Filme no livru balu fó apoiu ba hanoin neʼebé “tau uluk ita-nia an” ka “tau uluk família” no sira book ema atu hanoin katak halo buat sira-neʼe la sala. Maibé ideia sira-neʼe halo ema haluha Bíblia nia hanorin katak, se ita no ita-nia família hadomi Jeová liu buat hotu, ita sei hetan kontente neʼebé loos. (Mt 22:36-39) La sala atu hili atividade halimar nian neʼebé diʼak. Maibé diʼak atu husu ba ita-nia an: ‘Haʼu rekoñese mundu nia ideia sira neʼebé fó sai subasubar ka lae? Haʼu proteje daudaun haʼu-nia oan no haʼu-nia an atu la haree programa balu husi televizaun ka la lee livru balu ka lae? Bainhira haʼu-nia oan hetan influénsia husi mundu haʼu ajuda nia atu iha hanoin hanesan Jeová ka lae?’ w18.11 p. 22 par. 18-19

Jeová hatudu ida-neʼe hodi fó atensaun tomak ba ita no hadomi ita. Jeová mós fó sai ninia sentimentu no domin ba ita, liuhusi liafuan sira tuirmai neʼe: “Haʼu haree ó hanesan buat folin-boot, ó hetan ona glória, no haʼu hadomi ona ó.” (Isa 43:4) Jeová laran-metin ba ita no la iha buat ida mak bele hapara Jeová atu hatudu domin ba ninia atan sira. (Isa 54:10) Jeová la promete katak nia sei halakon problema sira neʼebé halo ita-nia moris susar, maibé nia sei la husik “mota sira” katak problema sira halo ita mout. No Jeová sei la husik “ahi nia lakan” katak terus oioin, lori buat aat neʼebé permanente. Nia fó garantia katak nia sei hamutuk ho ita hodi ajuda ita atu “laʼo liu” problema sira-neʼe. Saida mak Jeová sei halo? Nia sei ajuda ita sai kalma atu nuneʼe ita bele laran-metin nafatin ba nia iha situasaun oioin inklui mós mate. (Isa 41:13; 43:2) Bainhira ita tau fiar ba Maromak nia promesa katak nia sei hamutuk ho ita, ita mós sei sai aten-brani no sai forte atu tahan problema sira. w19.01 p. 3 par. 4-6

Se ita mak joven ida, karik mestre sira no ema seluk anima Ita atu bá eskola boot no hetan serbisu diʼak atu manán osan boot. Maibé Jeová fó matadalan neʼebé la hanesan ho ema nian. Klaru katak nia hakarak Ita atu estuda ho badinas iha eskola atu nuneʼe aban-bainrua Ita bele tau matan ba ita-nia an. (Kol 3:23) Maibé Jeová mós hatene katak agora mak tempu ba Ita atu foti desizaun importante neʼebé sei kona Ita-nia futuru. Tan neʼe, nia fó matadalan oioin neʼebé ajuda Ita halaʼo Ita-nia moris hodi tuir ninia hakarak iha loron ikus sira. (Mt 24:14) Jeová hatene buat hotu no saida mak sei akontese iha futuru. Nia mós hatene ho loloos katak lakleur tan mundu aat neʼe sei remata. (Isa 46:10; Mt 24:3, 36) Jeová mós hatene didiʼak kona-ba Ita. Nia hatene saida deʼit mak halo Ita kontente no saida deʼit mak lori susar ba Ita. Dala ruma ema fó konsellu neʼebé Ita hanoin diʼak, maibé se neʼe la tuir Maromak nia Liafuan, tuir loloos konsellu neʼe la diʼak. w18.12 p. 19 par. 1-2

Iha tempu neʼebá, “ema laran-maus sei simu rai nuʼudar sira-nian, no sira sei hetan ksolok boot ho dame neʼebé barak”. David mós fó-hatene nanis: “Ema laran-loos sira sei simu rai nuʼudar sira-nian, no sira sei moris ba nafatin iha rai.” (Sal 37:11, 29; 2 Sam 23:2) Tuir Ita-nia hanoin, oinsá mak promesa sira-neʼe ajuda ema neʼebé halo tuir Maromak iha tempu neʼebá? Promesa sira-neʼe ajuda sira atu hein ba tempu neʼebé ema laran-loos deʼit mak hela iha mundu, no mundu neʼe sei sai fali paraízu hanesan jardín Eden. Ikusmai, ema Izraél maioria neʼebé dehan katak sira serbí Jeová, sira fila kotuk ba Jeová no husik tiha adorasaun neʼebé loos. Tan neʼe, Maromak husik ema Babilónia atu manán ninia povu, estraga sira-nia rai, no lori sira barak nuʼudar dadur. (2 Krón 36:15-21; Jer 4:22-27) Maibé Maromak nia profeta sira fó-hatene nanis katak liutiha tinan 70, ninia povu sei fila fali ba sira-nia rai, no profesia sira-neʼe sai loos. Maibé profesia sira-neʼe mós kona ita ohin loron, katak paraízu iha mundu neʼe iha futuru. w18.12 p. 4-5 par. 9-10

Mundu iha ideia barak neʼebé kontra Bíblia nia hanorin. Maibé iha ideia balu husi mundu neʼebé diʼak ba ita ohin loron ka lae? Jesus hatete: “Ema hatudu sai ninia matenek liuhusi ninia hahalok loos.” (Mt 11:19) Maski mundu nia teknolojia laʼo ba oin, maibé labele rezolve problema oioin neʼebé hanetik ema atu hetan kontente, hanesan funu, diskriminasaun, no krime. Oinsá mundu nia hanoin kona-ba sala seksuál? Ema barak rekoñese katak sala seksuál sobu família, lori moras, no problema aat seluk tan. Oinsá kona-ba Jeová nia hanoin? Ema Kristaun neʼebé halo tuir Jeová nia hanoin halaʼo moris família neʼebé kontente liu, iha saúde neʼebé diʼak liu, no iha dame ho irmaun-irmán sira iha mundu tomak. (Isa 2:4; Após 10:34, 35; 1 Kor 6:9-11) Ida-neʼe hatudu ho klaru katak Jeová nia hanoin mak diʼak liu fali mundu nian. w18.11 p. 20 par. 8-10

Maski ita hakarak hakaʼas an atu iha relasaun neʼebé diʼak ho ita-nia família no hatudu laran-diʼak ba sira, ita tenke kuidadu atu la kontra Jeová nia morál sira tan deʼit atu halo kontente família. Ita tenkesér iha relasaun besik deʼit ho ema neʼebé hadomi Jeová. Ema hotu neʼebé laʼo iha lia-loos tenkesér santu. (Isa 35:8; 1 Ped 1:14-16) Bainhira foin aprende lia-loos, ita hotu halo mudansa ba ita-nia moris atu bele halo tuir morál sira husi Bíblia. Balu presiza halo mudansa neʼebé boot. Maibé ita tenke kuidadu atu la troka fali ita-nia moris neʼebé moos ho hahalok foʼer husi mundu neʼe. Saida mak bele ajuda ita atu la monu ba hahalok la morál husi mundu neʼe? Hanoin kona-ba folin neʼebé Jeová selu hodi sosa ita. Nia fó ninia Oan-Mane Jesus Kristu nia moris neʼebé folin-boot. (1 Ped 1:18, 19) Ita presiza hanoin kleʼan katak Jesus nia sakrifísiu folin-boot tebes, hodi nuneʼe bele ajuda ita atu moos nafatin iha Jeová nia oin. w18.11 p. 11 par. 10-11

Ema barak neʼebé serbí tempu-tomak hatete katak tau fokus iha serbisu haklaken ajuda sira atu kontente nafatin no iha hanoin pozitivu maski situasaun troka. Sira-nia esperiénsia hatudu katak, se ita hakaʼas an halo buat ruma iha situasaun neʼebé troka no tau fiar tomak ba Jeová, neʼe bele ajuda ita atu sai kalma nafatin. Ikusmai ita sei haree katak mudansa neʼebé ita halo hodi tuir situasaun foun hametin duni ita-nia relasaun ho Jeová. Ita-nia moris bele troka derrepente. Karik ita simu fali knaar foun, problema ho saúde, ka presiza tau matan ba ita-nia família. Maski buat saida deʼit mak akontese, tau fiar nafatin katak Jeová sei tau matan ba Ita no nia sei ajuda Ita iha tempu neʼebé loos. (Ebr 4:16; 1 Ped 5:6, 7) Tan neʼe, hakaʼas an atu halo buat ruma iha situasaun neʼebé troka. Halo orasaun ba Ita-nia Aman Jeová, no aprende oinsá atu sadere ba nia. Halo nuneʼe bele ajuda Ita atu sempre sai kalma no iha dame neʼebé mai husi Jeová maski ita-nia situasaun moris nian troka. w18.10 p. 30 par. 17; p. 31 par. 19, 22

Liuhusi Bíblia ita bele aprende oinsá Jeová hatudu katak nia hanoin ninia atan sira-nia sentimentu. Porezemplu, hanoin oinsá Jeová hatudu laran-diʼak hodi ajuda Samuel neʼebé sei kiʼik atu hatoʼo mensajen tesi-lia nian ba Amlulik Boot Eli neʼebé temi iha 1 Samuel 3:1-18. Jeová nia Ukun-Fuan fó mandamentu ba oan sira atu hatudu respeitu ba ema neʼebé idade, liuliu ba xefe. (Êx 22:28; Lev 19:32) Tan neʼe, karik susar ba Samuel neʼebé sei kiʼik atu hadeer iha dadeer no ho aten-brani hatoʼo Maromak nia mensajen tesi-lia nian ba Eli. Bíblia hatete katak Samuel “taʼuk atu konta vizaun neʼe ba Eli”. Maibé, Jeová halo Eli hatene katak Nia mak bolu Samuel. Tan neʼe, Eli haruka Samuel atu fó sai buat hotu no la subar “liafuan ida.” Samuel halo tuir Eli no “konta buat hotu ba Eli”, no nia mensajen neʼe hanesan ho mensajen neʼebé uluk mós fó sai ona ba Eli. (1 Sam 2:27-36) Istória neʼe hanorin ita katak Jeová mak matenek no hanoin kona-ba ema nia sentimentu. w18.09 p. 23 par. 2; p. 24 par. 4-5

Ohin loron, ema barak koʼalia lia-bosok. Hakerek-naʼin ida (Y. Bhattacharjee) hakerek artigu ida ho títulu “Tanbasá ita bosok”, nia hatete katak “bosok sai ona parte ida ba ema nia moris”. Baibain ema uza lia-bosok atu proteje sira-nia an, karik atu taka sala ka krime neʼebé sira halo. Sira mós koʼalia lia-bosok hodi manán osan ka hetan benefísiu seluk ba sira-nia an. Artigu neʼe mós hatete katak ema balu sente la iha problema atu koʼalia lia-bosok ba “ema oin-foun, kolega serbisu, belun, ka ema neʼebé sira hadomi”. Lia-bosok sira-neʼe lori rezultadu saida? Ema la tau fiar ona ba malu no estraga relasaun diʼak ba malu. David halo orasaun ba Jeová hodi dehan: “Ita hadomi lia-loos neʼebé Ita haree iha ema nia fuan-laran.” (Sal 51:6) David hatene katak koʼalia buat neʼebé loloos mai husi ita-nia laran. Tan neʼe, ema kristaun neʼebé loos tenke “koʼalia loloos ba malu” iha tempu hotu.​—Zac 8:16. w18.10 p. 7 par. 4; p. 8 par. 9-10; p. 10 par. 19

Karik ema Izraél hamutuk naʼin-millaun tolu resin, sai husi rai-Ejitu iha tinan 1513 molok Kristu. Iha sira-nia leet, iha labarik, ferik-katuas no karik iha ema balu neʼebé moras ka aleijadu. Atu bele lori ema-lubun boot hanesan neʼe sai husi rai-Ejitu, presiza iha Ulun-Naʼin neʼebé komprende ema seluk nia sentimentu no hatudu domin. Liuhusi Moisés, Jeová sai Ulun-Naʼin hanesan neʼe. Tan neʼe, kuandu ema Izraél atu sai husi sira-nia moris-fatin iha rai-Ejitu, sira sente seguru. (Sal 78:52) Iha dalan saida deʼit mak Jeová ajuda ninia povu sente seguru? Jeová organiza sira “hanesan tropa” hodi lori sira sai husi rai-Ejitu iha dalan neʼebé la runguranga. (Êx 13:18) Hodi haree katak buat hotu organiza ho didiʼak, sira bele fiar katak sira-nia Maromak kontrola situasaun hotu. Jeová mós uza “kalohan durante loron” no “naroman husi ahi” iha kalan atu fó-hanoin ba sira katak nia hamutuk ho sira hodi dirije no proteje sira.​—Sal 78:14. w18.09 p. 26 par. 11-12

Iha tempu uluk, Maromak nia atan balu neʼebé laran-metin hasoru problema oioin neʼebé halo sira sente hakarak mate deʼit. Porezemplu, tanba terus oioin neʼebé Job hasoru, nia hatete: “Haʼu odi haʼu-nia moris, haʼu lakohi moris tan.” (Job 7:16) Jonas sente laran-kraik tebes toʼo nia dehan: “Agora oh Jeová, favór ida, hasai tiha haʼu-nia moris, tanba diʼak liu haʼu mate deʼit duké moris.” (Jonas 4:3) Profeta Elias sente nia hasoru daudauk situasaun neʼebé susar tebes no nia hatete: “Oh Jeová, toʼo ona! Agora hasai deʼit haʼu-nia moris.” (1 Reis 19:4) Maski nuneʼe, Jeová nafatin hadomi tebes sira no hakarak sira atu moris. Nia la fó sala ba sira tanba sira sente hanesan neʼe, maibé nia ajuda sira hodi halakon sira-nia hakarak atu mate no hametin sira liuhusi domin, atu nuneʼe sira bele kontinua serbí nia ho laran-metin. w18.09 p. 13 par. 4

Maromak nia maluk serbisu-naʼin sempre simu ema seluk ho laran-diʼak. Iha Bíblia, liafuan gregu neʼebé tradús nuʼudar “laran-diʼak” signifika “hadomi ema estranjeiru sira”. (Ebr 13:2; nota) Bíblia iha ezemplu barak neʼebé hanorin ita oinsá bele hatudu laran-diʼak ba ema seluk. (Gên 18:1-5) Kuandu ita iha oportunidade, ita bele no tenkesér fó ajuda ba ema seluk, maski ema sira-neʼe “ita-nia maluk fiar-naʼin” ka laʼós. (Gal 6:10) Ita bele serbisu hamutuk ho Jeová atu hatudu laran-diʼak hodi simu ninia atan sira neʼebé serbí tempu-tomak ka lae? (3 João 5, 8) Neʼe mak oportunidade neʼebé diʼak tebes ba ita atu “fó laran-manas ba malu liuhusi ita-nia fiar”. (Rom 1:11, 12) Maromak nia Liafuan fó laran-manas ba mane sira iha kongregasaun atu serbisu hamutuk ho Jeová hodi serbí nuʼudar atan ba kongregasaun no katuas. (1 Tim 3:1, 8, 9; 1 Ped 5:2, 3) Irmaun sira neʼebé hetan knaar neʼe hakarak buka dalan atu fó ajuda ba ema seluk no mós ajuda sira iha dalan espirituál nian. (Após 6:1-4) Irmaun sira neʼebé fó ajuda iha dalan oioin iha kongregasaun hatete katak sira haksolok tebes atu bele fó ajuda. w18.08 p. 24 par. 6-7; p. 25 par. 10

Maski Timóteo iha podér balu neʼebé boot liu irmaun idade sira-neʼe, maibé nia tenke hatudu laran-diʼak no respeitu ba sira. Maibé, oinsá se ema neʼebé idade liu ita halo sala ho neon ka habelar buat neʼebé Jeová la gosta? Jeová sei la taka matan ba ema neʼebé halo sala ho neon, maski ema neʼe idade ka iha pozisaun. Haree toʼok prinsípiu husi Isaías 65:20 neʼebé hatete: “Ema neʼebé halo sala sei mate tanba hetan malisan, maski ho idade tinan atus ida.” Iha vizaun neʼebé Ezequiel haree mós fó sai prinsípiu neʼebé hanesan. (Eze 9:5-7) Buat neʼebé importante liu hotu mak atu hatudu respeitu ba Jeová, Naʼi husi Horiuluk Kedas. (Dan 7:9, 10, 13, 14) Se ita mak hatudu respeitu ba Jeová, ita sei la taʼuk atu korrije ema neʼebé halo sala, maski nia idade boot ka kiʼik.—Gal 6:1. w18.08 p. 11 par. 13-14

Ita hotu presiza hatene oinsá atu hili didiʼak informasaun no uza informasaun sira-neʼe hodi halo konkluzaun neʼebé loos. (Prov 3:21-23; 8:4, 5) Se lae, fasil ba Satanás no ninia mundu atu halo kleʼuk ita-nia hanoin. (Éf 5:6; Kol 2:8) Tan neʼe, atu halo konkluzaun neʼebé loos, ita presiza iha faktu oioin. Ohin loron ita bele asesu informasaun oioin liuhusi internét, televizaun, no média seluk. Ita mós simu e-mail, mensajen, no istória oioin husi kolega sira. Dala ruma ita sente informasaun sira-neʼe mai la hotu deʼit. Tan neʼe ita presiza kuidadu. Dala ruma ita-nia kolega sira la iha hanoin neʼebé aat, maibé iha ema seluk neʼebé halo ho neon hodi habelar informasaun laloos ka la tuir faktu. w18.08 p. 3 par. 1, 3

Bainhira tempu toʼo ona ba Maromak nia Oan-Mane atu moris nuʼudar ema, Jeová hili Maria, feto joven neʼebé haraik-an hodi sai Jesus nia inan. Maria hela iha sidade ida naran Nazaré, fatin neʼe dook husi Jeruzalein no dook husi templu neʼebé furak. (Lc 1:26-33) Husi buat neʼebé Maria fó sai ba ninia família ida naran Isabel, ita bele haree katak Maria iha relasaun neʼebé diʼak ho Jeová. (Lc 1:46-55) Sin, Jeová sempre fó atensaun ba Maria tanba nia hatudu laran-metin ba Jeová, no Jeová fó bensaun ba nia iha dalan neʼebé nia nunka hanoin. Iha tempu neʼebé Jesus moris, Jeová la fó sai ba ema-boot ka naʼi-ulun sira iha Jeruzalein ka Belein kona-ba Jesus nia moris. Maibé nia haruka anju sira mosu ba bibi-atan sira neʼebé haraik-an, sira neʼebé hein daudauk bibi iha sidade Belein nia liʼur. (Lc 2:8-14) Tuirmai bibi-atan sira-neʼe bá vizita bebé neʼebé foin moris mai. (Lc 2:15-17) Karik Maria no José hakfodak tebes hodi haree dalan neʼebé Jesus simu hahiʼi. w18.07 p. 9 par. 11-12

Tanbasá mak Jeová sai hirus hasoru Salomão? Bíblia dehan: “Tanba Salomão hadook nia laran husi Jeová.” Tuir loloos Jeová koko ona atu ajuda Salomão. Jeová “mosu ba nia dala rua ona no fó avizu ona ba nia kona-ba ida-neʼe, katak nia labele serbí maromak sira seluk. Maibé nia la halo tuir buat neʼebé Jeová hatete ba nia”. Rezultadu mak Jeová husik nia no la apoia tan nia. Ikusmai, nasaun Izraél fahe ba rua no husi tempu neʼebá, Salomão nia oan no bei-oan sira la ukun Izraél nuʼudar nasaun tomak ida. Sira hasoru problema boot oioin durante tinan atus ba atus. (1 Reis 11:9-13) Se ita hili ema neʼebé la hatene Jeová ka la hafolin Maromak nia morál atu sai ita-nia belun, karik sira bele estraga ita-nia hanoin no lori perigu ba ita-nia relasaun diʼak ho Jeová. Ema sira-neʼe bele mai husi kongregasaun maibé la iha relasaun neʼebé metin ho Jeová. Karik mós bele husi família, viziñu, kolega serbisu, ka kolega eskola neʼebé la adora Jeová. Se ita gasta tempu beibeik ho ema neʼebé la moris tuir Jeová nia morál, neineik-neineik sira bele halo ita lakon ita-nia relasaun diʼak ho Jeová. w18.07 p. 19 par. 9-10

Satanás uza filme no programa iha televizaun atu fó sai istória neʼebé habelar ninia hanoin. Nia hatene katak istória sira laʼós deʼit halo ita sente kontente maibé mós bele book ita-nia hanoin, sentimentu no hahalok. Jesus mós konta istória sira bainhira nia hanorin ema. Porezemplu, ai-knanoik kona-ba ema Samaria neʼebé laran-diʼak, no oan-mane neʼebé sai husi uma no gasta rikusoin sira. (Mt 13:34; Lc 10:29-37; 15:11-32) Maibé, ema neʼebé hetan ona influénsia husi Satanás nia hanoin bele uza istória atu estraga ita-nia hanoin. Ita presiza tetu ho didiʼak kona-ba filme no programa neʼebé ita haree. Laʼós filme no programa hotu mak estraga ita-nia hanoin, iha balu neʼebé hanorin ita no halo ita sente kontente. Maibé ita presiza kuidadu. Kuandu atu hili filme ka programa ruma, husu ba Ita-nia an: ‘Filme ka programa neʼe hanorin haʼu katak la sala atu halo tuir deʼit hakarak isin nian ka lae?’ (Gal 5:19-21; Éf 2:1-3) Saida mak Ita tenke halo se Ita haree katak programa ida apoia Satanás nia hanoin? Hadook an husi ida-neʼe hanesan Ita hadook an husi ema neʼebé iha moras neʼebé bele hadaʼet. w19.01 p. 15-16 par. 6-7

Hanesan kapasete bele proteje soldadu nia kakutak, ita-nia “esperansa salvasaun nian” mós bele proteje ita-nia neon no kbiit atu hanoin. (1 Tes 5:8; Prov 3:21) Oinsá mak Satanás bele lasu ita atu hasai tiha kapasete neʼe? Hanoin toʼok saida mak nia koko atu halo ba Jesus. Satanás hatene katak Jesus sei sai liurai ba ema hotu. Maibé, Jesus tenkesér hetan uluk terus no mate. Tuirmai Jesus tenkesér hein toʼo Jeová nia tempu mak nia foin bele sai Liurai. Tan neʼe, Satanás promete ba Jesus katak, se Jesus adora nia dala ida deʼit, Jesus bele sai kedas liurai ba mundu tomak. (Lc 4:5-7) Satanás mós hatene katak Jeová promete ona mai ita atu fó buat furak oioin iha mundu foun. Maibé ita presiza hein atu haree promesa neʼe sai realidade, no agora daudauk tenke hasoru problema barak. Tan neʼe, Satanás oferese oportunidade ba ita atu moris diʼak agora. Nia hakarak ita atu tau uluk ita rasik nia diʼak tuirmai mak Maromak nia Ukun.​—Mt 6:31-33. w18.05 p. 30-31 par. 15-17

Jeová hakarak Ita atu haksolok iha tempu joven nian. Atu hetan ksolok mak tau fokus nafatin ba Ita-nia planu espirituál sira no halo tuir Jeová nia matadalan bainhira halo planu no foti desizaun sira. Se Ita halo nuneʼe sedu iha Ita-nia moris, Ita mós sei hetan esperiénsia sedu iha ita-nia moris kona-ba dalan neʼebé Jeová dirije, proteje, no fó bensaun ba Ita. Hanoin kona-ba konsellu diʼak hotu neʼebé nia fó ba Ita liuhusi ninia Liafuan, no halo tuir matadalan tuirmai neʼe: “Entaun, hanoin-hetan ó-nia Kriadór Boot durante ó-nia tempu joven.” (Ecle 12:1) Ita gaba tebes joven sira iha kongregasaun tanba sira tau fokus nafatin hodi serbí Jeová. Sira halo planu espirituál oioin no haree serbisu haklaken nuʼudar buat neʼebé importante tebes iha sira-nia moris. No sira mós la husik mundu neʼe halo sira haluha tiha sira-nia planu sira. Joven sira, imi bele fiar katak imi-nia hakaʼas-an sei la sai saugati deʼit. Imi-nia irmaun-irmán sira hadomi tebes imi no apoia imi. Tan neʼe “entrega ó-nia serbisu hotu ba Jeová nia liman, no ó-nia planu sira sei laʼo ho diʼak”. w18.04 p. 29 par. 17, 19