Juñu

Jesus nia promesa neʼe hametin tebes apóstolu sira. Tuir loloos iha tempu neʼebá, apóstolu sira la hatene katak lakleur tan Jesus sei mate. Maski Jesus sei mate, maibé neʼe la dehan katak sira la hetan ona ajuda. Jeová prontu atu hatán ba sira-nia orasaun no ajuda sira iha serbisu haklaken. No Jeová halo hanesan neʼe duni. Jesus mate tiha lakleur, apóstolu sira husu ba Jeová atu fó aten-brani ba sira, no Jeová hatán duni sira-nia orasaun. (Após 4:29, 31) Ohin loron mós hanesan. Se ita tahan hodi kontinua haklaken, ita sai Jesus nia belun ba nafatin. Ita bele fiar katak Jeová prontu atu hatán ba ita-nia orasaun no ajuda ita bainhira hasoru susar ruma kona-ba haklaken. (Flp 4:13) Ita agradese tebes ba Jeová tanba nia hatán ita-nia orasaun no ita bele sai Jesus nia belun. Prezente sira neʼebé Jeová fó, hametin duni ita atu kontinua fó fuan.​—Tgo 1:17. w18.05 p. 21 par. 17-18

Karik irmaun-irmán sira-neʼe hanoin tanbasá mak Paulo hakarak sira fó laran-manas ba malu liután iha tempu neʼebá. Razaun mak tanba latoʼo tinan lima deʼit sira haree katak Jeová nia loron atu tesi-lia ba Jeruzalein besik duni atu mosu ona. Sira rekoñese katak sira presiza halai sai husi sidade neʼe hanesan Jesus fó-hatene nanis ona. (Lc 21:20-22; Após 2:19, 20) Jeová nia loron neʼe toʼo duni iha tinan 70 bainhira ema Roma harahun Jeruzalein. Ita ohin loron mós iha situasaun neʼebé hanesan. Jeová nia loron neʼebé “boot no kmanek liu” besik ona atu mai. (Joel 2:11) Profeta Sofonias nia liafuan sira mós kona ita ohin loron. Nia dehan: “Jeová nia loron boot besik ona! Neʼe besik ona no sei mai lalais loos!” (Sof 1:14) Tanba razaun neʼe mak ita tenke “hanoin malu hodi ajuda malu atu hatudu domin no hahalok diʼak”. (Ebr 10:24) Ita tenke fó atensaun liután ba ita-nia irmaun-irmán sira hodi bele fó laran-manas ba sira iha tempu neʼebé sira presiza. w18.04 p. 20 par. 1-2

Jeová fó laran-manas tebes ba Josué antes Jeová nia povu tama ba rai neʼebé Maromak promete. Jeová mós fó kmaan no aten-brani ba ninia povu nuʼudar grupu. Porezemplu, Jeová hatene katak ema judeu sira presiza hetan kmaan bainhira ema lori sira ba dadur iha Babilónia, no Jeová fó sai profesia ida neʼebé lori kmaan ba sira hodi dehan: “Keta taʼuk tanba haʼu hamutuk ho ó. Keta laran-taridu tanba haʼu mak ó-nia Maromak. Haʼu sei hametin ó, sin, haʼu sei ajuda ó, haʼu sei kaer metin duni ó ho haʼu-nia liman-loos justisa nian.” (Isa 41:10) Jeová mós fó kmaan iha dalan neʼebé hanesan ba ema kristaun sira iha apóstolu nia tempu no mós ba ita ohin loron. (2 Kor 1:3, 4) Jeová mós fó laran-manas ba ninia Oan-Mane. Bainhira Jesus hetan tiha batizmu, Jesus rona lian ida husi lalehan neʼebé dehan: “Neʼe mak haʼu-nia Oan-Mane neʼebé haʼu hadomi, ida neʼebé halo haʼu-nia laran kontente.” (Mt 3:17) Karik liafuan sira-neʼe hametin tebes Jesus durante nia halaʼo serbisu haklaken iha rai, loos ka lae? w18.04 p. 16 par. 3-5

Ema balu hatete katak Jeová la fó liberdade ba Adão atu halo buat neʼebé nia hakarak halo. Maibé ema sira-neʼe la komprende katak, liberdade ka direitu atu hili hodi halo buat ruma la hanesan ho direitu atu determina saida mak diʼak no saida mak aat. Adão no Eva iha liberdade atu hili hodi halo tuir Maromak ka la halo tuir. Maibé Jeová deʼit mak iha direitu atu determina saida mak diʼak no saida mak aat. “Ai-hun koñesimentu kona-ba buat diʼak no aat” neʼebé Maromak tau iha jardín Eden reprezenta Maromak nia direitu neʼe. (Gên 2:9) Jeová fó mandamentu ba Adão no Eva atu la bele han husi ai neʼe hodi hanorin sira katak, sira tenkesér halo tuir Jeová atu bele goza liberdade neʼebé loos. Triste tanba Adão no Eva hili atu la halo tuir Jeová. Desizaun neʼebé Adão no Eva halo fó liberdade liután ba sira hanesan Satanás hatete ka lae? Adão no Eva nunka hetan liberdade liután hodi koko atu determina rasik saida mak diʼak no saida mak aat. Maibé sira halakon fali liberdade loos neʼebé Jeová fó ona ba sira. w18.04 p. 5-6 par. 9-12

Jeová hanoin ninia atan sira neʼebé hetan terus no mós halo buat ruma hodi ajuda sira. Porezemplu, bainhira ema Izraél hetan terus nuʼudar atan iha rai-Ejitu, Jeová komprende sira-nia terus no neʼe book nia atu ajuda sira. Jeová dehan ba Moisés: “Haʼu haree duni haʼu-nia povu nia terus . . . , no haʼu rona ona sira-nia halerik . . . Haʼu hatene didiʼak kona-ba terus neʼebé sira hasoru. Haʼu sei tun bá neʼebá hodi salva sira husi ema Ejitu nia liman.” (Éx 3:7, 8) Tanba Jeová hanoin ninia povu, nia halo sira livre husi atan. Tinan barak liutiha, iha Rai neʼebé Maromak Promete, inimigu ataka ema Izraél. Saida mak Jeová halo? Nia “hanoin tebes sira bainhira sira halerik kona-ba terus neʼebé sira hetan husi ema neʼebé hanehan sira no husi ema neʼebé halo aat tebes ba sira”. Dala ida tan, ninia sentimentu neʼe book nia atu ajuda ninia povu. Nia haruka juís sira atu salva ema Izraél husi sira-nia inimigu.—Juís 2:16, 18. w19.03 p. 15 par. 4-5

Ukun-fuan rua primeiru husi Ukun-Fuan Sanulu haruka ema Izraél atu adora Jeová mesak deʼit no fó avizu kona-ba labele adora estátua. (Éx 20:3-6) Ukun-fuan sira-neʼe laʼós ba Jeová nia diʼak, maibé lori benefísiu ba ninia povu. Bainhira sira adora maromak husi nasaun seluk, sira hetan terus. Maibé Jeová haraik bensaun ba ninia povu bainhira sira laran-metin ba nia no hatudu justisa. (1 Reis 10:4-9) Labele fó sala ba Jeová bainhira ninia atan sira la halo tuir ninia prinsípiu no lori susar ba ninia povu. Maibé, Jeová hadomi ita no hatene bainhira ema la hatudu justisa ba ita. Nia hatene didiʼak ita-nia terus no hanoin ita liu fali inan ida hanoin ninia bebé. Maski karik nia la hadiʼa kedas situasaun aat neʼe, maibé iha tempu neʼebé loos nia sei tesi-lia ba ema aat sira neʼebé la arrepende an hodi trata aat ema seluk. w19.02 p. 22-23 par. 13-15

Iha semana balu antes Memoriál, baibain ita-nia reuniaun sira tau fokus ba Jesus nia ezemplu no haraik an neʼebé nia hatudu hodi fó ninia moris nuʼudar sakrifísiu. Neʼe book ita atu banati-tuir ninia hahalok haraik an no halo tuir Jeová nia hakarak, maski iha tempu neʼebé susar. Ita hanoin kona-ba Jesus nia aten-brani durante loron balu antes nia mate. Nia hatene katak lakleur tan ninia inimigu sira sei hamoe, baku, no fó kastigu-mate ba nia. (Mt 20:17-19) Maski nuneʼe, nia prontu atu mate. Bainhira tempu toʼo ona, nia koʼalia ba ninia apóstolu sira neʼebé laran-metin, neʼebé hamutuk ho nia iha Getsémani, hodi dehan: “Hamriik ona. Mai ita bá. Haree bá! Traidór mai ona.” (Mt 26:36, 46) No bainhira ema-lubun neʼebé lori armas mai kaer nia, nia hakat ba oin, fó koñese ninia an, no haruka soldadu sira atu husik ninia apóstolu sira bá. (João 18:3-8) Jesus hatudu ezemplu diʼak kona-ba aten-brani! Ohin loron, ema Kristaun kose-mina sira no bibi seluk hakaʼas an atu banati-tuir Jesus hodi hatudu aten-brani. w19.01 p. 27-28 par. 7-8

Hanesan pintór uza kór furak oioin hodi halo dezeñu ida, ita mós tenke hatudu hahalok furak oioin atu sai ema laran-maus. Hahalok sira-neʼe balu mak haraik an, halo tuir, laran-diʼak, no aten-brani. Ema haraik an sei halo tuir Maromak nia hakarak. Maromak nia hakarak ida mak ita tenke hatudu laran-diʼak. (Gal 5:22) Satanás sai hirus bainhira ita halo Maromak nia hakarak. Tan neʼe maski ita haraik an no laran-diʼak, ema barak iha Satanás nia mundu neʼe odi ita. (João 15:18, 19) Entaun, ita presiza aten-brani atu kontra Satanás. Ema laran-maus la hanesan duni ho ema foti an, la kontrola hirus, no la halo tuir Jeová. Satanás mak hanesan neʼe duni. Tan neʼe mak nia odi ema laran-maus! Sira hatudu katak nia aat tebes liuhusi sira-nia hahalok diʼak. Sira mós hatudu katak Satanás bosok-teen. Tanbasá? Tanba buat naran deʼit neʼebé nia hatete no halo, labele hanetik ema laran-maus atu serbí Jeová!—Job 2:3-5. w19.02 p. 8-9 par. 3-5

Jeová hatene katak ema hotu neʼebé hela iha rai-Babilónia sei sai taʼuk. Média-Pérsia nia tropa neʼebé forsa boot sei ataka rai-Babilónia. Jeová sei uza tropa neʼe atu halo ninia povu livre. (Isa 41:2-4) Kuandu ema Babilónia no povu husi nasaun seluk haree katak sira-nia inimigu besik daudaun ona, sira koko atu aten-brani nafatin hodi hatete ba malu: “Sai forte bá.” Sira mós halo estátua barak liután, no hein katak estátua sira-neʼe bele proteje sira. (Isa 41:5-7) Maibé iha tempu neʼebé hanesan, Jeová halo kalma ema Judeu sira-neʼe hodi hatete: “Oh Izraél, ó mak haʼu-nia atan [ó la hanesan ho ó-nia viziñu] . . . Keta laran-taridu, tanba haʼu mak ó-nia Maromak.” (Isa 41:8-10) Jeová hatete: “Haʼu mak ó-nia Maromak.” Jeová uza liafuan sira-neʼe atu ninia atan sira neʼebé laran-metin bele hatene katak nia la haluha sira, no katak sira mak nafatin ninia povu. Nia hatete ba sira: “Haʼu sei lori imi . . . no salva imi.” Ita bele fiar katak liafuan sira-neʼe hametin duni ema Judeu sira.​—Isa 46:3, 4. w19.01 p. 4 par. 8

Marcos 1:9-11 konta akontesimentu primeiru husi akontesimentu tolu neʼebé Jeová koʼalia husi lalehan. Jeová dehan: “Ó mak haʼu-nia Oan-Mane neʼebé haʼu hadomi, neʼebé halo haʼu-nia laran kontente.” Ita bele fiar katak bainhira Jesus rona ninia Aman fó sai liafuan sira-neʼe hodi hatudu ninia domin no apoia, neʼe book tebes Jesus nia laran! Jeová nia liafuan fó sai pontu importante tolu kona-ba Jesus. Primeiru, Jesus mak ninia Oan-Mane. Segundu, Jeová hadomi ninia Oan-Mane. Terseiru, Jeová kontente ho ninia Oan-Mane. Hodi dehan, “Ó mak haʼu-nia Oan-Mane”, Jeová hatudu katak ninia Oan-Mane Jesus neʼebé nia hadomi, hahú ona relasaun foun ida ho Nia. Antes Jesus mai iha rai, nia mak Maromak nia Oan-Mane neʼebé Maromak kria ho isin espíritu. Maibé, bainhira nia hetan batizmu, Maromak hili nia liuhusi espíritu santu no sai Maromak nia Oan-Mane iha dalan foun. Agora Maromak fó nia esperansa atu fila fali ba lalehan hodi sai nuʼudar Liurai no Amlulik Boot. (Lc 1:31-33; Ebr 1:8, 9; 2:17) Tan neʼe bainhira Jesus hetan batizmu, ninia Aman iha razaun hodi dehan: “Ó mak haʼu-nia Oan-Mane.”​—Lc 3:22. w19.03 p. 8 par. 3-4

Husi tempu uluk kedas, konsellu aat tama ona iha mundu. Neʼe mak tempu neʼebé Satanás fó konsellu aat ba ema primeiru. Satanás hatete ba Eva katak nia ho Adão bele moris kontente liután se sira moris tuir sira-nia hakarak rasik. (Gén 3:1-6) Satanás buka deʼit ninia hakarak rasik. Nia hakarak Adão ho Eva no sira-nia oan sira atu adora no halo tuir nia duké adora Maromak Jeová. Maibé Jeová mak fó buat diʼak hotu neʼebé sira iha. Nia fó sira pár atu kompleta malu, hela-fatin neʼebé furak, no isin perfeitu neʼebé bele moris ba nafatin. Triste mak Adão ho Eva la halo tuir Maromak, no hakotu sira-nia relasaun diʼak ho nia. Ikusmai, sira tenke simu konsekuénsia. Hanesan ho ai-funan neʼebé tesi tiha no namlaek, Adão ho Eva mós neineik-neineik sai ferik-katuas no mate. Adão no Eva nia oan sira mós hetan susar neʼebé hanesan. (Rom 5:12) Maski nuneʼe, ema barak nafatin la halo tuir Maromak, no sira moris tuir sira-nia hakarak rasik. (Éf 2:1-3) Rezultadu neʼe hatudu ho klaru katak liafuan husi eskritura ba ohin mak loos. w18.12 p. 20 par. 3-4

Apóstolu Paulo mak ema neʼebé matenek tebes, hetan edukasaun diʼak, no hatene koʼalia lian Ebraiku no Gregu. (Após 5:34; 21:37, 39; 22:2, 3) Maibé nia la tuir mundu nia matenek. Nia foti desizaun tuir Maromak nia Liafuan. (Após 17:2; 1 Kor 2:6, 7) Rezultadu mak nia hetan susesu iha serbisu haklaken no hein namanas atu simu kolen rohan-laek nian. (2 Tim 4:8) Maromak nia hanoin diʼak liu mundu nian. Moris tuir Maromak nia hanoin sei lori kontente no susesu neʼebé boot liu hotu. Maibé Jeová la obriga ita atu hanoin hanesan nia. “Atan laran-metin no matenek” la kontrola ita-nia hanoin, katuas sira mós lae. (Mt 24:45; 2 Kor 1:24) Ema Kristaun ida-idak iha responsabilidade atu troka ninia hanoin tuir Maromak nia hanoin. w18.11 p. 20-21 par. 12-13

Liuhusi profeta Isaias, Maromak fó-hatene nanis katak bainhira ninia povu fila fali ba sira-nia rai, sira sei moris ho dame, no la iha ema ida mak sai taʼuk ba animál no ema aat sira. Ema hotu moris ho seguru. (Isa 11:6-9; 35:5-10; 51:3) Isaias mós fó-hatene nanis katak “mundu tomak sei nakonu ho koñesimentu kona-ba Jeová”, laʼós iha rai-Izraél deʼit. Isaias fó-hatene nanis dala ida tan katak ema Izraél neʼebé fila husi rai-Babilónia sei la hetan ameasa husi animál no ema aat sira. Nia hatete katak sira-nia rai sei fó ai-han barak tanba sei iha bee barak hanesan jardín Eden. (Gén 2:10-14; Jer 31:12) Maibé profesia neʼe sai loos iha tempu neʼebá deʼit ka lae? Tuir loloos, profesia neʼe mós dehan katak matan-delek, tilun-diuk no ain-aat sira sei hetan kura, maibé ema Izraél sira neʼebé fila fali ba sira-nia rai la hetan isin-diʼak. Neʼe katak profesia neʼe sei sai loos iha futuru. w18.12 p. 5 par. 11-12

Ita hakarak kontinua laʼo iha lia-loos ba nafatin. Saida mak bele ajuda hametin liután ita-nia hakarak atu laʼo nafatin iha lia-loos? Kontinua estuda Bíblia no medita kona-ba buat sira neʼebé Ita aprende. Buka beibeik tempu atu halo buat sira-neʼe. Se Ita estuda beibeik, Ita sei hafolin liután lia-loos no hametin ita-nia hakarak atu nunka husik lia-loos neʼe. Provérbios 23:23 dehan katak ita presiza “sosa lia-loos” no mós sosa “matenek, dixiplina no kbiit atu komprende”. Koñesimentu deʼit seidauk toʼo. Ita tenke aplika lia-loos iha ita-nia moris. Kbiit atu komprende bele ajuda ita atu haree katak Jeová nia liafuan hotu liga malu. Matenek book ita atu halo buat ruma tuir koñesimentu neʼebé ita hetan. Dala ruma lia-loos mós fó dixiplina ba ita hodi hatudu katak ita presiza halo mudansa. Ita labele demora atu halo tuir matadalan hanesan neʼe, tanba Bíblia hatete katak dixiplina hanesan neʼe folin-boot liu fali osan-mutin.​—Prov 8:10. w18.11 p. 9 par. 3; p. 11 par. 13-14

Saida mak folin-boot liu hotu iha Ita-nia moris? Nuʼudar Jeová nia povu, buat neʼebé folin-boot liu hotu mak ita-nia relasaun ho Jeová. Ita sei nunka hakarak troka fali ho buat seluk. Ita mós hafolin lia-loos husi Bíblia, tanba lia-loos mak ajuda ita atu sai Jeová nia belun. (Kol 1:9, 10) Jeová mak ita-nia Mestre Boot neʼebé hanorin lia-loos oioin husi ninia Liafuan, Bíblia. Nia hanorin ita katak ninia naran importante tebes no mós kona-ba ninia hahalok furak sira. Nia fó-hatene ita katak nia hadomi tebes ita toʼo fó ninia Oan-Mane ba ita. Jeová hanorin ita kona-ba Mesias nia Ukun no esperansa atu moris iha mundu foun Paraízu. Jeová hanorin ita oinsá atu halaʼo moris. Ita haree lia-loos sira-neʼe hanesan rikusoin tanba lia-loos sira-neʼe ajuda ita atu hakbesik ba ita-nia Kriadór no halaʼo moris neʼebé iha folin. w18.11 p. 3 par. 1-2

Ema sira neʼebé bosok labele subar buat ida husi Jeová. Bíblia hatete katak “buat hotu nakloke iha [Jeová nia] matan”. (Ebr 4:13) Iha ezemplu ida, mak kona-ba Ananias no Safira. Sira koko atu lohi apóstolu sira. Sira faʼan tiha rai balu no fó deʼit osan balu ba apóstolu sira. Ananias no Safira hakarak buka oin iha kongregasaun, tan neʼe sira hatete ba apóstolu sira katak sira fó ona osan hotu ba apóstolu sira. Maibé Jeová bele haree katak sira bosok, no nia fó kastigu ba sira. (Após 5:1-10) Jeová sente oinsá kona-ba ema neʼebé bosok? Ema hotu neʼebé laran-aat hodi koʼalia bosok no lakohi arrepende an sei tama ba “tasi ahi nian neʼebé lakan makaʼas” hamutuk ho Satanás. Ida-neʼe signifika katak sira sei lakon ba nafatin. (Apok 20:10; 21:8; Sal 5:6) Ita hatene katak Jeová “la koʼalia bosok hanesan ema” no nia “nunka bosok”. (Núm 23:19; Ebr 6:18) “Jeová odi . . . nanál neʼebé bosok”. (Prov 6:16, 17) Se ita hakarak halo kontente nia, ita tenke koʼalia loloos. w18.10 p. 8 par. 10-13

Oinsá se Ita-nia patraun husu Ita atu fó osan hodi halo selebrasaun ruma neʼebé iha ligasaun ho relijiaun falsu? Ita sei halo saida? Duké hein toʼo situasaun hanesan neʼe mosu, diʼak liu hanoin didiʼak agora kona-ba Jeová nia hanoin. Tuirmai, kuandu situasaun hanesan neʼe mosu, fasil ba ita atu halo no koʼalia buat neʼebé loos. Medita kona-ba Jeová nia hanoin mós bele ajuda ita atu hatudu nafatin laran-metin ba Jeová kuandu situasaun emerjénsia médiku mosu. Ita hatene katak ita sei la simu transfuzaun raan tomak ka parte haat husi raan tomak neʼe. (Após 15:28, 29) Maibé iha tratamentu médiku balu neʼebé iha ligasaun ho raan no ema Kristaun ida-idak presiza halo desizaun rasik neʼebé bazeia ba prinsípiu sira husi Bíblia. Bainhira mak tempu diʼak atu foti desizaun sira? Diʼak atu hein toʼo ita tama ospitál, moras, no situasaun obriga mak foin halo desizaun ho ansi ka lae? Lae. Agora mak tempu diʼak atu halo riset, prenxe dokumentu médiku neʼebé esplika Ita-nia desizaun, no koʼalia ho Ita-nia doutór. w18.11 p. 24 par. 5; p. 26 par. 15-16

Jeová mak bibi-atan neʼebé tau matan didiʼak ba ninia povu, no proteje didiʼak sira husi inimigu sira. Ida-neʼe hametin ita-nia fiar no fó kmaan ba ita tanba lakleur tan mundu neʼe nia rohan sei toʼo mai. Jeová sei kontinua tau matan ba ninia povu durante terus boot neʼebé besik ona atu hahú. (Apok 7:9, 10) Tan neʼe, maski joven ka idade, saúde diʼak ka aleijadu, Maromak nia povu sei la hakfodak ka sai taʼuk durante tempu terus boot. Sira sei hatudu aten-brani no hanoin-hetan Jesus nia liafuan neʼebé dehan: “Hamriik loos bá no foti imi-nia ulun, tanba imi-nia salvasaun mai besik daudaun ona.” (Lc 21:28) Maski sira hetan ataka husi Gog ka nasaun sira husi mundu tomak neʼebé iha forsa, Maromak nia povu tau fiar nafatin katak Jeová sei proteje sira. (Eze 38:2, 14-16) Tanbasá mak sira bele iha fiar metin ba nia? Tanba sira hatene katak Jeová nunka troka. Nia sei hatudu nafatin katak nia mak Salvadór neʼebé iha domin no hanoin sira.—Isa 26:20. w18.09 p. 26-27 par. 15-16

Ema Izraél sira sente kontente tebes bainhira Jeová hatete liafuan sira iha leten. Ita mós bele fiar metin katak ita ida-idak iha folin-boot tebes ba Jeová. Bíblia promete hodi dehan: “Hanesan asuwaʼin ida, nia sei salva ó. Nia sei haksolok tebes kona-ba ó.” (Sof 3:16, 17) Maski ita hasoru problema saida deʼit Jeová promete katak nia sei hametin no fó kmaan ba ita. Jeová dehan: “Imi sei sai hanesan labarik ida neʼebé ninia inan koʼus no fó-susu no nia tuur halimar iha ninia inan nia hitin. Hanesan inan ida fó kmaan ba nia oan, nuneʼe mós haʼu sei kontinua fó kmaan ba imi.” (Isa 66:12, 13) Bebé ida sente seguru tebes bainhira ninia inan koʼus ka halimar ho nia. Jeová uza komparasaun neʼe hodi hatudu sai ninia domin neʼebé kleʼan ba sira neʼebé adora nia. Fiar bá katak Ita iha folin-boot tebes ba Jeová!​—Jer 31:3. w18.09 p. 13-14 par. 6-7

Iha tempu uluk, ema Izraél sira iha oportunidade barak atu halo serbisu voluntáriu. (Êx 36:2; Neem 11:2) Ohin loron, Ita mós iha oportunidade oioin atu fó ho voluntáriu kona-ba Ita-nia tempu, sasán, no matenek hodi ajuda irmaun-irmán sira. Halo nuneʼe lori ksolok neʼebé boot no Ita mós sei hetan bensaun oioin husi Jeová. Baibain, sira neʼebé halo serbisu voluntáriu iha projetu ruma hetan belun foun barak. Irmán Margie serbisu iha projetu konstrusaun Reuniaun-Fatin ba tinan 18. Durante projetu sira-neʼe, nia gasta tempu ho irmán sira neʼebé idade kiʼik liu nia no ajuda hodi fó treinu ba sira. Nia dehan katak, halo projetu sira-neʼe fó oportunidade furak ba ema sira neʼebé serbisu voluntáriu atu fó laran-manas ba malu. (Rom 1:12) No bainhira nia hasoru problema ruma iha ninia moris, ninia belun sira husi projetu sira-neʼe ajuda tebes nia. Ita halo ona serbisu voluntáriu iha projetu konstrusaun ruma ka lae? w18.08 p. 25 par. 9, 11

Bainhira Paulo hakerek karta neʼe, karik Timóteo sei tinan 30, maibé Paulo fó responsabilidade importante balu ba nia atu tau matan. Neʼe hanorin saida mai ita? Ita la bele tesi lia kona-ba irmaun sira neʼebé idade kiʼik liu ita tuir sira-nia idade. Porezemplu, Jesus kumpre buat barak tebes iha rai antes nia toʼo tinan 33! Iha kultura balu, ema ladún hatudu respeitu ba mane sira neʼebé idade kiʼik liu sira. Tan neʼe mak katuas kongregasaun balu sente seidauk bele atu rekomenda irmaun neʼebé sei joven atu serbí nuʼudar atan ba kongregasaun ka katuas, maski irmaun neʼe kumpre ona kritériu sira. Maibé Bíblia nunka hatete katak irmaun ida tenke toʼo tinan hira mak foin bele serbí nuʼudar atan ba kongregasaun ka katuas.​—1 Tim 3:1-10, 12, 13; Tito 1:5-9. w18.08 p. 11-12 par. 15-16

Ita presiza iha faktu neʼebé loos atu halo desizaun neʼebé diʼak. Tan neʼe ita presiza kuidadu tebes atu hili buat neʼebé ita hakarak lee. (Flp 4:8, 9) Ita lakohi estraga tempu hodi lee notísias husi sítiu neʼebé ita la bele fiar, ka lee e-mail no mensajen sira neʼebé habelar deʼit lia-anin. Importante liu atu hasees an husi sítiu neʼebé ema soe-fiar sira uza hodi fó sai sira-nia ideia. Sira-nia hakarak mak atu halo fraku Maromak nia povu nia fiar no halo kleʼuk lia-loos. Informasaun neʼebé laloos halo ita foti desizaun neʼebé sala. Keta hanoin katak informasaun falsu sira la iha kbiit atu estraga Ita. Hanoin toʼok saida mak akontese iha Moisés nia tempu bainhira espiaun naʼin-12 bá hafuhu rai neʼebé Maromak promete. Espiaun naʼin-10 lori fali informasaun neʼebé negativu. (Núm 13:25-33) Sira inventa lia oioin neʼebé halo Jeová nia povu taʼuk no laran-kraik. (Núm 14:1-4, 6-10) Duké buka-hatene didiʼak faktu sira no tau fiar ba Jeová, povu sira fiar deʼit informasaun neʼebé falsu. w18.08 p. 4 par. 4-5

Ema barak iha hahalok diʼak oioin, no sira neʼebé la adora Jeová karik laʼós sempre halo buat neʼebé aat. Karik ita koñese ema balu hanesan neʼe. Maibé Ita hanoin katak sira mak ransu neʼebé diʼak ka lae? Oinsá mak ransu ho sira bele fó impaktu ba Ita-nia relasaun diʼak ho Jeová? Sira ajuda Ita atu hakbesik liután ba Jeová ka lae? Ba sira, saida mak importante liu ba moris? Sira sempre koʼalia kona-ba saida deʼit? Sira sempre koʼalia kona-ba roupa, osan, sasán eletróniku, atividade halimar nian, no buka rikusoin ka lae? Sira kritika beibeik ema seluk ka lae? Sira gosta konta istória kómiku neʼebé foʼer ka lae? Jesus fó avizu hodi dehan: “Buat neʼebé sai husi ema nia ibun mai husi laran.” (Mt 12:34) Se Ita haree katak ema neʼebé Ita gasta tempu hamutuk estraga daudauk Ita-nia relasaun diʼak ho Jeová, halo kedas desizaun atu la gasta tan tempu barak ho sira. No se presiza, para atu la ransu tan ho sira.​—Prov 13:20. w18.07 p. 19 par. 11

Kuandu Moisés tinan 80, Jeová fó knaar ba nia atu lori nasaun Izraél sai husi rai-Ejitu. (Êx 3:10) Dala barak, Moisés buka razaun atu la simu knaar neʼe. Maibé Jeová hatudu nafatin pasiénsia no mós fó kbiit ba Moisés atu halo milagre. (Êx 4:2-9, 21) Jeová bele uza ninia forsa atu halo taʼuk Moisés hodi obriga nia atu halo tuir. Maibé Jeová hatudu pasiénsia no laran-diʼak, nia ajuda Moisés neʼebé haraik-an atu hatene katak nia sei hamutuk ho Moisés. Neʼe lori rezultadu diʼak ka lae? Sin. Ikusmai Moisés sai ulun-naʼin neʼebé diʼak tebes no nia hakaʼas an atu hatudu laran-diʼak no hanoin ema seluk nia sentimentu hanesan Jeová hatudu ba nia. Se Ita kaer podér ruma, importante tebes atu banati-tuir Jeová kona-ba hanoin ema seluk nia sentimentu, hatudu laran-diʼak no pasiénsia ba Ita-nia feen, oan no ema seluk iha kongregasaun. (Kol 3:19-21; 1 Ped 5:1-3) Se Ita hakaʼas an atu banati-tuir Jeová no Jesus Kristu, Ita sei halo fasil ba ema seluk atu hakbesik no koʼalia ba Ita, no Ita sei lori kmaan ba sira.​—Mt 11:28, 29. w18.09 p. 24-25 par. 7-10

Ita bele lori kmaan ba ita-nia maluk sira se ita hatudu laran-diʼak. Neʼe bele halo kongregasaun atu iha unidade liután. Oinsá ho Ita rasik? Ita bele koko atu koñese liután ita-nia irmaun-irmán sira ka lae? (2 Kor 6:11-13) Ita bele hakaʼas an liután atu halo ita-nia naroman nabilan iha ita-nia bairru rasik ka lae? Ita-nia laran-diʼak bele book ita-nia viziñu sira hakarak aprende kona-ba Jeová. Husu ba Ita-nia an: ‘Haʼu-nia viziñu sira hanoin oinsá kona-ba haʼu? Haʼu-nia uma moos no kabeer, hodi halo haʼu-nia bairru haree diʼak liután ka lae? Haʼu mak ema neʼebé ajuda haʼu-nia viziñu sira ka lae?’ Husu ba Testemuña seluk oinsá sira-nia laran-diʼak no ezemplu diʼak book ona sira-nia família, viziñu, kolega serbisu ka kolega eskola.​—Éf 5:9. w18.06 p. 24 par. 13-14

Liafuan sira-neʼe aplika ba ema neʼebé oho dixípulu Estevão. (Após 6:8, 12; 7:54-60) Iha ema nia istória, ema barak neʼebé dehan katak sira fiar ba Maromak, halo hahalok aat tebes hanesan oho ema, no hatete katak sira halo ida-neʼe ba Maromak. Maibé tuir loloos, buat neʼebé sira halo kontra Maromak nia ukun-fuan sira. (Êx 20:13) Loos duni, sira-nia konxiénsia la dirije sira atu laʼo iha dalan neʼebé loos. Se nuneʼe, saida mak ita bele halo atu ita-nia konxiénsia laʼo diʼak nafatin? Ukun-fuan no prinsípiu sira husi Bíblia mak “diʼak atu hanorin, atu hatudu sai buat neʼebé sala, atu hadiʼa buat hotu, no atu fó dixiplina tuir Maromak nia matadalan neʼebé loos”. (2 Tim 3:16) Ita presiza estuda Bíblia beibeik, hanoin kleʼan kona-ba buat neʼebé ita lee, no halo tuir buat neʼebé ita aprende. Hodi nuneʼe, ita sei sai matenek liu oinsá atu hanoin tuir Jeová nia hanoin. Rezultadu mak, ita-nia konxiénsia sei dirije ita iha dalan neʼebé loos. w18.06 p. 16-17 par. 3-4

Soldadu Roma sira kaer surik neʼebé naruk ho sentímetru 50. Soldadu sira matenek tebes kona-ba uza surik neʼe tanba loron-loron sira treinu oinsá atu kaer surik. Apóstolu Paulo kompara Maromak nia Liafuan hanesan surik ida. Jeová fó ona surik neʼe mai ita. Maibé ita presiza aprende uza surik neʼe ho matenek hodi defende ita-nia fiar ka hadiʼa dalan neʼebé ita hanoin. (2 Kor 10:4, 5; 2 Tim 2:15) Ita la presiza taʼuk ba Satanás no anju aat sira. Maski sira iha forsa boot, maibé sira la forsa boot liu fali Jeová. Sira mós sei la moris ba nafatin. Durante Kristu nia Ukun ba Tinan Rihun Ida, Jesus sei sulan sira hodi sira la bele halo aat ba ema ida, no ikusmai sei harahun sira. (Apok 20:1-3, 7-10) Ita hatene ita-nia inimigu, ninia lasu, no ninia planu. Ho Jeová nia ajuda, ita bele hamriik metin hodi kontra nia! w18.05 p. 30 par. 15; p. 31 par. 19-21

Adão hatene samea la bele koʼalia. Tan neʼe bainhira samea ida koʼalia ba Eva, karik Adão hanoin kedas katak espíritu ida mak koʼalia ba Eva. (Gên 3:1-6) Adão no Eva la hatene espíritu neʼe mak sé. Maski nuneʼe, Adão hili atu apoia nia no kontra ninia Aman iha lalehan neʼebé hadomi nia. (1 Tim 2:14) Iha tempu neʼe kedas Jeová komesa fó sai informasaun kona-ba inimigu laran-aat neʼebé bosok Adão no Eva no promete katak ikusmai nia sei halakon inimigu neʼe. Maibé Jeová mós fó avizu katak, antes espíritu neʼe halakon tiha, espíritu neʼe sei kontra hasoru kriatura hotu neʼebé hatudu domin ba Maromak. (Gên 3:15) Kona-ba anju neʼebé kontra Jeová, Jeová nunka fó sai ninia naran. Liutiha tinan 2.500 husi buat neʼebé akontese iha Eden mak Jeová foin fó sai informasaun kona-ba anju neʼe.​—Jó 1:6. w18.05 p. 22 par. 1-2

Ita sente ona laran-kraik tanba ema iha Ita-nia haklaken-fatin lakohi rona ba mensajen kona-ba Maromak nia Ukun ka lae? Se nuneʼe, Ita sei komprende kona-ba Paulo nia sentimentu. Nia haklaken maizumenus ba tinan 30, no nia ajuda ona ema barak hodi sai Jesus nia dixípulu. (Após 14:21; 2 Kor 3:2, 3) Maski nuneʼe, nia la konsege ajuda ema judeu barak atu sai ema kristaun. Sira barak lakohi rona ba Paulo no balu fó terus ba nia. (Após 14:19; 17:1, 4, 5, 13) Ema sira-neʼe nia hahalok ladiʼak halo Paulo sente oinsá? Nia dehan: “Haʼu laran-susar tebes no hanoin barak iha haʼu-nia laran.” (Rom 9:1-3) Tanbasá mak Paulo sente nuneʼe? Tanba nia gosta tebes haklaken no nia hadomi ema. Paulo hanoin tebes ema judeu sira no nia sente triste bainhira sira lakohi simu Maromak nia laran-sadiʼa. Ita mós hanesan Paulo, ita haklaken ba ema tanba ita hanoin sira no hakarak ajuda sira.​—Mt 22:39; 1 Kor 11:1. w18.05 p. 13 par. 4-5

Paulo hatete katak, maski sira neʼebé iha responsabilidade atu fó laran-manas ba ema seluk, sira rasik mós presiza hetan laran-manas. Nia hakerek karta ba irmaun-irmán sira iha Roma hodi dehan: “Haʼu hakarak tebes atu haree imi, atu haʼu bele fahe liafuan ruma neʼebé sei ajuda imi atu hametin imi-nia relasaun ho Maromak; ka, atu nuneʼe ita bele fó laran-manas ba malu liuhusi ita-nia fiar, imi-nia fiar no mós haʼu-nian.” (Rom 1:11, 12) Sin, apóstolu Paulo rasik mós dala ruma presiza hetan laran-manas. (Rom 15:30-32) Ohin loron, ita bele fó laran-manas ba sira neʼebé serbí Jeová tempu-tomak. Ita mós bele fó laran-manas ba irmaun-irmán barak neʼebé hili atu la kaben tanba sira hakarak halo tuir Jeová no kaben deʼit “iha Naʼi”. (1 Kor 7:39) No mós sira neʼebé moras ka ema fó terus mós presiza atu hetan kmaan.​—2 Tes 1:3-5. w18.04 p. 21 par. 3-5