Jullu

Ohin loron iha “problema barak neʼebé susar atu tahan”. (2 Tim 3:1) Moris sei sai susar liután antes Jeová halakon mundu aat neʼe hodi lori dame ba mundu tomak. Tan neʼe husu ba ita-nia an, ‘Haʼu-nia matan hateke ba sé atu fó matadalan no ajuda ba haʼu?’ Iha tempu uluk, hakerek-naʼin ida husi Bíblia hatete katak, importante tebes atu hateke ba Jeová bainhira ita presiza ajuda. (Sal 123:1-4) Nia esplika katak, dalan neʼebé ita hateke ba Jeová mak hanesan atan ida hein ba ninia naʼi. Oinsá? Baibain, atan ida hein ka sadere ba ninia naʼi atu fó hahán ba nia no proteje nia. Maibé nia mós tenke buka-hatene beibeik husi ninia naʼi kona-ba saida mak ninia naʼi hakarak nia atu halo, no nia tenke halo tuir ninia naʼi nia hakarak. Hanesan neʼe mós, ita presiza estuda beibeik Maromak nia Liafuan atu buka-hatene Jeová hakarak ita atu halo saida, tuirmai halo tuir ninia hakarak sira. Neʼe mak dalan ida deʼit hodi Jeová bele ajuda ita. w18.07 p. 12 par. 1-2

Jesus koʼalia kona-ba sai livre husi atan ba sala, kondisaun atan neʼebé aat tebes ba ema hotu. Ita sai atan ba sala iha dalan saida? Sala mak book ita atu halo buat aat. (João 8:34) Sala mós bele hanetik ita atu halo buat neʼebé loos ka la halo ho laran tomak. Rezultadu husi neʼe mak hanoin barak, laran-kanek, terus, no ikusmai mate. (Rom 6:23) Toʼo tiha tempu neʼebé sala lakon loloos ona mak ita bele hetan fali liberdade loloos neʼebé Adão no Eva halakon iha tempu uluk. Jesus nia liafuan neʼebé dehan, “se imi sempre halo tuir haʼu-nia liafuan” neʼe hatudu katak, se ita hakarak Jesus halo ita sai livre, ita presiza halo buat balu. (João 8:31) Buat saida deʼit? Ema kristaun neʼebé dedika an ona, tenke nega sira-nia an no hili atu simu limitadu neʼebé Jesus fó sai ba ninia dixípulu sira. (Mt 16:24) Jesus promete ona katak, ninia sakrifísiu sei lori ita ba liberdade neʼebé loos iha futuru. w18.04 p. 7 par. 14-16

Jeová hatudu nia hanoin ninia povu nia sentimentu maski dala ruma sira-nia hanoin la loos. Hanoin toʼok kona-ba Jonas. Maromak haruka profeta neʼe atu haklaken mensajen tesi-lia nian kontra Nínive. Bainhira sira arrepende an, Maromak deside atu husik sira moris. Maibé, Jonas la kontente ho desizaun neʼe. Nia “sai hirus makaʼas” tanba ninia profesia la sai loos. Maibé Jeová hatudu pasiénsia ba Jonas no ajuda nia atu hadiʼa ninia hanoin. (Jonas 3:10–4:11) Liutiha tempu balu, Jonas komprende saida mak Jeová hanorin ba nia, no Jeová uza nia atu hakerek istória neʼe hodi fó benefísiu ba ita. (Rom 15:4) Dalan neʼebé Jeová tau matan ba ninia povu halo ita fiar katak nia hanoin ninia atan sira. Nia hatene ita ida-idak nia susar no terus. Nia komprende ita-nia hanoin, emosaun, no fraku hotu. No “nia sei nunka husik [ita] atu hetan tentasaun neʼebé liu fali [ita-nia] kbiit”. (1 Kor 10:13) Promesa neʼe fó duni kmaan ba ita! w19.03 p. 16 par. 6-7

Tuir Moisés nia Ukun-Fuan, katuas sira iha responsabilidade atu tesi-lia ba problema espirituál no mós haksesuk malu ka krime ruma. Hanoin toʼok kona-ba ezemplu balu. Se ema Izraél ida oho ema ida, nia labele hetan kedas kastigu-mate. Katuas sira husi ninia sidade tenke buka-hatene situasaun antes deside se ema neʼe merese atu hetan kastigu-mate. (Deut 19:2-7, 11-13) Katuas sira mós tenke tesi-lia ba buat oioin iha moris loroloron nian, hanesan rezolve problema kona-ba ema nia sasán ka rezolve problema kaben nian. (Éx 21:35; Deut 22:13-19) Bainhira katuas sira hatudu justisa no ema Izraél halo tuir Ukun-Fuan, ema hotu hetan benefísiu, no nasaun neʼe lori glória ba Jeová. (Lev 20:7, 8; Isa 48:17, 18) Husi neʼe ita bele haree katak Jeová interese ba situasaun oioin iha ita-nia moris. Nia hakarak ita atu hatudu justisa no domin ba ema. No nia haree buat neʼebé ita koʼalia no halo, maski bainhira ita mesak iha ita-nia uma. w19.02 p. 23 par. 16-18

Bainhira ita estrese, susar atu hatudu nafatin laran-maus. Karik ita koʼalia liafuan neʼebé la diʼak no trata aat ema. Se ita sente estrese, hanoin kona-ba Jesus nia ezemplu. Durante fulan ikus sira husi ninia moris iha rai, Jesus hetan estrese boot. Nia hatene katak nia sei hetan terus makaʼas no kastigu-mate. (João 3:14, 15; Gal 3:13) Fulan balu antes nia mate, nia hatete katak nia laran-susar. (Lc 12:50) No loron balu antes nia mate, nia hatete: “Haʼu sente laran-susar tebes.” Ninia liafuan iha orasaun neʼebé fó sai ninia sentimentu hatudu katak nia haraik an no halo tuir Maromak. (João 12:27, 28) Bainhira tempu toʼo, Jesus ho aten-brani entrega nia an ba inimigu neʼebé sei fó kastigu-mate ba nia iha dalan neʼebé sei haterus no hamoe nia. Maski Jesus estrese no hasoru susar boot, nia ho laran-maus halo tuir Maromak nia hakarak. Jesus hatudu ezemplu diʼak liu hotu kona-ba hatudu laran-maus bainhira estrese!​—Isa 53:10. w19.02 p. 11 par. 14-15

Bainhira hasoru susar, karik ita presiza aten-brani atu tuir beibeik reuniaun sira. Irmaun-irmán balu tuir reuniaun maski sira sente triste, laran-kraik, ka iha problema saúde. Ema balu ho aten-brani tuir reuniaun sira maski sira-nia família ka governu kontra makaʼas. Hanoin toʼok kona-ba oinsá mak ita-nia ezemplu bele book ita-nia irmaun-irmán sira neʼebé iha komarka tanba sira-nia fiar. (Ebr 13:3) Bainhira sira rona katak ita kontinua serbí Jeová maski hasoru terus, neʼe hametin sira atu kontinua hatudu fiar, aten-brani, no laran-metin. Kuandu Paulo tama komarka iha Roma, nia sente haksolok bainhira rona katak ninia maluk fiar-naʼin sira serbí Maromak ho laran-metin. (Flp 1:3-5, 12-14) Lakleur depois Paulo sai livre ka antes nia sai livre, nia hakerek karta ba ema Ebreu sira. Iha karta neʼe nia anima ema Kristaun laran-metin sira atu labele haluha atu tuir reuniaun sira.​—Ebr 10:25. w19.01 p. 28 par. 9

Satanás hakarak ita atu kontra Maromak nia matadalan no haburas hahalok hanoin an deʼit hanesan nia. Ita moris iha mundu neʼebé nakonu ho ema neʼebé simu ona influénsia husi Satanás no nia hakarak ita atu ransu ho sira atu nuneʼe sira bele “estraga” ita-nia hanoin no hahalok. (1 Kor 15:33) Satanás mós koko atu estraga ita-nia laran hodi halo ita tau fiar ba ema nia matenek duké Jeová nia hanoin. (Kol 2:8) Hanoin toʼok kona-ba ideia ida neʼebé Satanás habelar. Satanás hakarak ema hanoin katak sai riku mak buat neʼebé importante liu iha moris. Ema neʼebé hanoin hanesan neʼe karik bele sai riku ka karik lae. Maibé hanoin neʼe perigu tanba sira fokus demais atu iha osan barak, sira halo sakrifísiu oioin hanesan sira-nia saúde, família, no mós sira-nia relasaun diʼak ho Jeová atu bele kumpre sira-nia hakarak. (1 Tim 6:10) Ita sente agradese tanba ita-nia Aman iha lalehan ajuda ita atu iha hanoin neʼebé loos kona-ba osan.​—Ecle 7:12; Lc 12:15. w19.01 p. 15 par. 6; p. 17 par. 9

Antes Jesus mai toʼo rai no hatudu ezemplu kona-ba oinsá atu fó kmaan no aten-brani, Jeová nia atan sira iha tempu antigu hatene ona katak sira presiza duni atu fó kmaan no aten-brani ba ema seluk. Ezemplu ida mak kona-ba Ezekias. Bainhira ema Asíria sira atu ataka Jeruzalein, nia halibur xefe tropa no povu hotu hodi hametin sira, no ninia liafuan halo sira hotu aten-brani. (2 Crôn 32:6-8) Maski Job rasik presiza hetan kmaan, nia mak hanorin fali ema seluk oinsá atu fó kmaan. Nia hatete ba ema sira neʼebé mai atu fó kmaan ba nia katak, se nia mak koko atu fó kmaan ba sira, nia sei koʼalia buat neʼebé mak sei hametin no halo sira sente diʼak, laʼós atu halo sira sente kanek. (Jó 16:1-5) Maibé ikusmai Job hetan duni kmaan husi Eliú no husi Jeová rasik.​—Jó 33:24, 25; 36:1, 11; 42:7, 10. w18.04 p. 16 par. 6; p. 17 par. 8-9

Isaias esplika ona kona-ba oinsá Jeová hametin ninia povu hodi hatete: “Jeová . . . sei mai ho kbiit, nia sei ukun ho ninia liman.” (Isa 40:10) Baibain Bíblia uza liafuan “liman” atu koʼalia kona-ba kbiit. Entaun, liafuan Jeová “sei ukun ho ninia liman” fó-hanoin ita katak nia mak Liurai neʼebé iha kbiit boot. Iha tempu antigu nia uza ninia forsa atu apoia no defende ninia atan sira, no ohin loron nia mós kontinua hametin no proteje sira neʼebé tau fiar ba nia. (Deut 1:30, 31; Isa 43:10) Jeová kaer metin ninia promesa “haʼu sei hametin ó”, maibé liuliu bainhira inimigu fó-terus ita. Ohin loron, iha rai balu, ita-nia inimigu koko makaʼas atu hapara ita-nia serbisu haklaken ka bandu ita-nia organizasaun. Maski nuneʼe, ita la sai laran-taridu demais ho sira-nia ataka. Jeová fó garantia katak nia sei halo ita nakonu ho forsa no fiar an. Nia promete katak “armas naran deʼit neʼebé ema halo hodi kontra ó sei la hetan susesu”.​—Isa 54:17. w19.01 p. 5-6 par. 12-13

Animál nunka hanoin katak sira presiza hatene Maromak no hetan Ninia matadalan. Maibé ita presiza. (Mt 4:4) Bainhira ita rona ba Maromak, ita sai matenek, aumenta kbiit atu komprende, no hetan haksolok. Maromak fó Bíblia mai ita no uza “atan laran-metin no matenek” atu fó ai-han espirituál neʼebé ajuda ita atu hametin ita-nia fiar. (Mt 24:45) Ita kontente ho ai-han espirituál oioin neʼebé furak tebes! (Isa 65:13, 14) Ai-han espirituál bele halo ita matenek no aumenta ita-nia kbiit atu hanoin, no buat sira-neʼe sei proteje ita iha dalan oioin. (Prov 2:10-14) Porezemplu, se ita iha matenek no kbiit atu hanoin, ita bele hatene kedas lia-bosok, hanesan Maromak la iha, ka osan no sasán mak halo ema moris kontente. Ita mós bele rekoñese hakarak neʼebé la loos no sees husi toman aat sira neʼebé lori susar. Tan neʼe, hakaʼas an bá atu buka matenek husi Maromak no aumenta ita-nia kbiit atu hanoin. w18.12 p. 20 par. 6-7

Ai-hun balu moris ba tinan rihun ba rihun. Atu bele moris naruk hanesan neʼe, ema presiza iha saúde neʼebé diʼak tebes. No se sira bele moris ho dame iha fatin neʼebé furak hanesan Isaias fó-hatene nanis, neʼe hanesan moris iha paraízu! No profesia neʼe sei sai loos! Hanoin toʼok, promesa sira neʼebé ajuda ita atu fiar ba paraízu iha futuru. Mundu tomak sei sai nakonu ho ema neʼebé simu bensaun husi Maromak. Sei la iha ema ida mak taʼuk ba animál no ema aat sira. Ema matan-delek, tilun-diuk no ain-aat sei hetan isin-diʼak. Ema sei harii sira-nia uma rasik no han ai-han husi sira-nia toʼos rasik. Sira sei moris naruk liu fali ai-hun sira. Sin, Bíblia fó evidénsia katak paraízu hanesan neʼe sei iha duni. Maibé ema balu karik hatete katak profesia sira-neʼe laʼós kona-ba paraízu iha mundu. Ita iha razaun diʼak saida atu hein ba paraízu iha mundu neʼe? Jesus fó ona razaun diʼak mai ita.​—Lc 23:43. w18.12 p. 5 par. 13-15

Ita-nia neon laʼós buat neʼebé maten no bele troka beibeik. Dala barak ita-nia neon troka tanba ita hili atu hanoin beibeik buat ruma. Tan neʼe, se ita medita kona-ba Jeová nia hanoin, ita bele haree rasik katak Jeová nia hanoin sempre loos. Ikusmai ita sei hakarak atu iha hanoin hanesan Jeová nian. Maibé atu hafoun ita-nia neon tuir Jeová nia hanoin, ita tenke hasees an atu la “halo tuir mundu ohin neʼe”. Ita tenke para husi haree, lee, no rona ideia sira neʼebé kontra Maromak nia hanoin. Atu komprende tanbasá halo nuneʼe importante, mai ita kompara ida-neʼe hanesan ai-han. Ema neʼebé hakarak iha saúde neʼebé diʼak, karik deside atu han ai-han neʼebé diʼak. Maibé se nia mós han beibeik hahán neʼebé dodok ona, ninia hakaʼas an atu iha saúde diʼak sei sai saugati deʼit. Hanesan neʼe mós se ita hanoin kona-ba mundu nia ideia sira, ita-nia hakaʼas-an atu aprende Jeová nia hanoin sei sai saugati deʼit. w18.11 p. 21 par. 14-15

Ita tenke koko makaʼas atu aplika lia-loos iha Ita-nia moris loroloron nian. Bíblia kompara lia-loos hanesan soldadu nia sintu. Iha tempu uluk, soldadu nia sintu proteje ninia knotak no kabun. Maibé ninia sintu tenkesér kesi-metin. Se sintu mak longar, neʼe labele proteje nia. Oinsá mak lia-loos bele proteje ita hanesan sintu? Se ita kesi-metin lia-loos hanesan sintu ida, neʼe sei proteje ita husi hanoin neʼebé sala no ajuda ita atu halo desizaun ho matenek. Kuandu ita hasoru problema ruma neʼebé sériu ka hetan tentasaun atu halo buat neʼebé sala, lia-loos husi Bíblia sei hametin liután ita-nia hakarak atu halo buat neʼebé loos. Soldadu ida sei nunka husik hela ninia sintu kuandu nia atu bá funu, nuneʼe mós ita sei nunka husik lia-loos. Ita tenke aplika lia-loos husi Bíblia iha moris loroloron nian. w18.11 p. 12 par. 15

Ita presiza hakaʼas an atu aprende lia-loos husi Bíblia. Ita presiza halo sakrifísiu ruma hodi hetan lia-loos neʼe. No kuandu ita “sosa lia-loos”, ka aprende lia-loos, ita tenke kuidadu atu la “faʼan fali”, ka husik lia-loos neʼe. Maski buat ruma gratuitu, maibé la dehan katak la presiza halo sakrifísiu. Liafuan “sosa” iha lian Ebraiku neʼebé temi iha Provérbios 23:23 bele mós signifika “hetan”. Liafuan rua neʼe hatudu katak, ema ida presiza hakaʼas an ka halo sakrifísiu ruma atu hetan buat neʼebé folin-boot ba nia. Karik ita bele halo komparasaun ida kona-ba sosa lia-loos neʼebé la presiza selu. Iha merkadu ema fó sai katak sira fó hudi gratuitu deʼit. Maski nuneʼe, hudi sira-neʼe mosu derrepente deʼit iha ita-nia meza leten ka lae? Lae. Ita presiza bá merkadu no foti hudi sira-neʼe. Maski gratuitu, ita presiza hakaʼas an atu hetan hudi sira-neʼe. Hanesan neʼe mós, ita la presiza selu osan hodi sosa lia-loos, maibé ita tenke hakaʼas an atu hetan lia-loos neʼe. w18.11 p. 4 par. 4-5

Jesus konvida ona Pedro, Tiago, no João atu akompaña nia ba foho aas ida. Iha neʼebá, sira haree vizaun furak ida. Jesus nia oin sai naroman no ninia roupa sai nabilan loos. Iha ema naʼin-rua, neʼebé reprezenta Moisés no Elias, komesa koʼalia ba Jesus kona-ba ninia mate no moris-hiʼas. (Lc 9:29-32) Tuirmai, kalohan nabilan ida taka sira, no sira rona Maromak nia lian husi kalohan! Vizaun neʼe fó sai nanis kona-ba glória no kbiit neʼebé Jesus sei simu iha futuru nuʼudar Liurai ba Maromak nia Ukun. Ita bele fiar katak vizaun neʼe anima no hametin Kristu atu sai prontu hodi tahan susar no mate. Vizaun neʼe mós hametin dixípulu sira-nia fiar atu bele tahan hasoru susar no halo serbisu barak. Maizumenus tinan 30 depois neʼe, apóstolu Pedro temi vizaun kona-ba Jesus nakfila an, neʼe hatudu katak nia sei hanoin-hetan vizaun neʼe.​—2 Ped 1:16-18. w19.03 p. 10 par. 7-8

Dalan ida neʼebé halo ema kristaun loos la hanesan ho ema husi relijiaun falsu sira mak saida? Ita “koʼalia loloos”. (Zac 8:16, 17) Ita sempre koʼalia loloos ba ema oin-foun, kolega serbisu, belun, no ema neʼebé ita hadomi. Se Ita mak joven, karik Ita hakarak Ita-nia kolega sira simu Ita. Maibé Ita lakohi hakarak neʼe mak book Ita atu halaʼo moris ho oin-rua. Iha Ita-nia família no kongregasaun, Ita finje hatudu katak Ita iha morál neʼebé santu, maibé bainhira Ita uza média sosiál ka hamutuk ho ema neʼebé la adora Jeová, Ita hatudu fali hahalok oin-seluk. Ita bosok ba Ita-nia inan-aman, irmaun-irmán sira, no Jeová. (Sal 26:4, 5) Jeová hatene bainhira ita hatete katak ita respeitu nia maibé halo buat neʼebé nia odi. (Mc 7:6) Diʼak atu halo tuir buat neʼebé temi iha eskritura: “Keta laran-moras ba ema sala-naʼin sira, maibé hamtaʼuk Jeová iha tempu hotu.”​—Prov 23:17. w18.10 p. 9 par. 14-15

Maromak nia povu mak família espirituál ida neʼebé hatudu domin. (1 João 4:21) Dala ruma sira halo sakrifísiu neʼebé boot ba sira-nia irmaun-irmán sira, maibé dala barak liu sira hatudu domin liuhusi buat kiʼik neʼebé sira halo. Porezemplu, karik sira koʼalia buat neʼebé diʼak ba sira-nia irmaun-irmán sira ka haree sira iha dalan neʼebé diʼak. Kuandu ita hanoin ema seluk nia sentimentu, ita “banati-tuir Maromak nuʼudar ninia oan doben sira”. (Éf 5:1) Jesus banati-tuir ninia Aman iha dalan neʼebé perfeitu. Nia sempre hatudu laran-diʼak ba ema seluk. Nia dehan: “Mai besik haʼu, imi hotu neʼebé kole tan serbisu makaʼas no neʼebé lori naha todan. Haʼu sei fó kmaan ba imi.” (Mt 11:28, 29) Se ita banati-tuir Jesus hodi “hanoin ema kiʼik sira”, ita sei halo kontente Jeová, no ita mós sei sai kontente. (Sal 41:1) Tan neʼe mai ita hatudu domin hodi kontinua hanoin ema seluk nia sentimentu hanesan ita-nia família, irmaun-irmán sira, no ema neʼebé ita hasoru iha haklaken-fatin. w18.09 p. 28 par. 1-2

Ita mós bele serbisu hamutuk ho Jeová liuhusi fó ajuda ba irmaun-irmán sira neʼebé hetan dezastre. Porezemplu, ita bele fó osan nuʼudar kontribuisaun. (João 13:34, 35; Após 11:27-30) Dalan seluk atu apoia mak ajuda hamoos ka hadiʼa buat neʼebé aat iha fatin dezastre sira. Irmán Gabriela husi Polónia, bainhira bee saʼe, ninia uma hetan estragu no nia kontente hodi haree irmaun-irmán sira husi kongregasaun oioin mai atu fó ajuda ba nia. Kuandu hanoin fali kona-ba esperiénsia neʼe nia dehan: “Haʼu la preokupa ho buat sira neʼebé haʼu lakon, buat sira-neʼe sasán deʼit. Tuir loloos haʼu hetan fali buat neʼebé furak. Esperiénsia neʼe fó-hanoin mai haʼu katak, bele sai parte ida ba kongregasaun mak priviléjiu neʼebé úniku tebes no mós lori ksolok ba ita.” Ema barak neʼebé hetan ajuda tanba dezastre mosu mós sente hanesan neʼe. No ema neʼebé serbisu hamutuk ho Jeová hodi fó ajuda iha tempu dezastre mós sente haksolok tebes.​—Após 20:35; 2 Kor 9:6, 7. w18.08 p. 26 par. 12

Se ita hakarak proteje ita-nia laran ho susesu, ita tenke buka-hatene uluk perigu sira no halo buat ruma kedas atu proteje ita-nia an. Liafuan neʼebé tradús nuʼudar “proteje” halo ita hanoin kona-ba serbisu neʼebé baibain guarda sira halo. Iha Liurai Salomão nia tempu, baibain guarda hamriik iha sidade nia moru leten no fó avizu bainhira sira haree perigu ruma hakbesik daudaun. Hodi imajina ida-neʼe bele ajuda ita hatene saida mak ita presiza halo hodi hapara Satanás atu la estraga ita-nia hanoin. Iha tempu antigu, guarda sira serbisu hamutuk ho mane sira neʼebé hein portaun. (2 Sam 18:24-26) Sira proteje sidade hodi taka metin portaun sira bainhira inimigu mai besik. (Neem 7:1-3) Ita-nia konxiénsia neʼebé hetan treinu husi Bíblia bele sai hanesan guarda ba ita no fó avizu ba ita bainhira Satanás koko atu ataka ita-nia laran. Nia halo nuneʼe bainhira nia koko atu influénsia ita-nia hanoin, sentimentu, motivu ka hakarak. Kuandu ita-nia konxiénsia fó avizu ba ita, ita presiza rona no taka kedas portaun, neʼe katak hasees an husi perigu neʼe. w19.01 p. 17 par. 10-11

Katuas sira la bele tesi lia kona-ba irmaun neʼebé idade kiʼik liu sira, tuir sira rasik nia hanoin ka kultura, maibé sira tenke uza Maromak nia Liafuan bainhira atu rekomenda irmaun ruma. (2 Tim 3:16, 17) Se irmaun katuas sira la halo tuir Bíblia nia matadalan atu foti atan ba kongregasaun ka katuas, sira bele hanetik irmaun sira neʼebé kumpre ona kritériu atu serbí iha kongregasaun. Iha rai ida, iha atan ba kongregasaun neʼebé kaer responsabilidade ho didiʼak, no katuas sira konkorda katak nia kumpre duni kritériu sira husi Bíblia atu sai katuas kongregasaun. Maibé katuas balu dehan katak, irmaun neʼe haree sei joven liu atu sai katuas, tan neʼe sira la rekomenda nia. Triste tebes irmaun neʼe la sai katuas tan deʼit nia haree sei joven. Karik iha rai barak, irmaun sira iha hanoin hanesan neʼe. Importante tebes ba ita atu sadere ba Bíblia, duké sadere ba ita rasik nia hanoin. Neʼe mak dalan ida deʼit atu halo tuir Jesus no la tesi lia ba ema tuir buat neʼebé ita haree.​—João 7:24. w18.08 p. 12 par. 16-17

Iha perigu ida kona-ba haruka e-mail ka mensajen ruma antes hanoin uluk. Iha rai balu, ita la iha liberdade atu halaʼo ita-nia atividade, ka hetan bandu. Karik ita-nia inimigu iha rai sira-neʼe uza informasaun falsu ho neon atu halo taʼuk ita ka halo ita deskonfia malu. Neʼe mak buat neʼebé akontese iha Uniaun Soviétika iha tempu uluk. Polísia intelijénsia husi Komité Seguransa ba Estadu Soviétika habelar lia-anin katak irmaun balu neʼebé kaer responsabilidade sai ona traidór ba Jeová nia povu. Triste tebes tanba irmaun-irmán balu fiar ba informasaun falsu neʼe no husik Jeová nia organizasaun. Barak ikusmai fila fali, maibé balu nunka fila. Sira husik informasaun falsu sira-neʼe halakon sira-nia fiar. (1 Tim 1:19) Oinsá mak ita bele hasees an atu buat hanesan neʼe la akontese ba ita? Keta habelar informasaun negativu ka informasaun neʼebé la iha faktu. La bele fiar deʼit ba buat sira neʼebé Ita rona. Buka-hatene didiʼak faktu sira. w18.08 p. 4 par. 8

Iha manuskritu lian Gregu antigu liu ladún uza pontuasaun. Ida-neʼe halo ita hanoin: Jesus dehan, “Haʼu hatete loloos ba ó, ohin ó sei hamutuk ho haʼu iha Paraízu”? Ka nia dehan, “Haʼu hatete loloos ba ó ohin, ó sei hamutuk ho haʼu iha Paraízu”? Hanoin-hetan liafuan neʼebé Jesus koʼalia ba ninia dixípulu sira kona-ba ninia mate. Nia dehan: “Oan-Mane husi Ema sei hela iha rai laran ba loron tolu no kalan tolu.” (Mt 12:40; 16:21; 17:22, 23; Mc 10:34; Após 10:39, 40) Entaun, Jesus la bá Paraízu iha loron neʼebé nia ho kriminozu neʼe mate. Bíblia hatete katak Jesus “iha rate laran”, no liutiha loron tolu, Maromak fó moris-hiʼas ba nia. (Após 2:31, 32; nota) Bainhira Jesus koʼalia kona-ba Paraízu ba kriminozu neʼebé besik atu mate, kriminozu neʼe la hatene katak Jesus halo ona aliansa ho ninia apóstolu sira atu ukun hamutuk ho nia iha lalehan. (Lc 22:29) Kriminozu neʼe mós seidauk hetan batizmu. (João 3:3-6, 12) Entaun, Jesus nia promesa ba kriminozu neʼe refere ba paraízu iha mundu, neʼebé sei akontese iha futuru. w18.12 p. 6 par. 17-18, 20-21

Ema Izraél sira troka lalais deʼit hodi komesa adora fali karau-oan osan-mean. Maski sira kontra daudauk Jeová nia mandamentu, maibé sira bosok sira-nia an hodi hanoin katak sira apoia nafatin Jeová, toʼo Aarão mós dehan katak adora karau-oan neʼe mak “festa ba Jeová”! Jeová halo saida? Nia hatete ba Moisés katak povu sira “halo ona hahalok neʼebé foʼer” no husik ona dalan neʼebé nia “haruka atu laʼo tuir”. Jeová sai hirus tebes toʼo nia hanoin atu halakon nasaun tomak neʼe. (Êx 32:5-10) Maibé Jeová deside atu la halakon ema Izraél sira. (Êx 32:14) Maski Aarão mak halo karau-oan osan-mean, maibé nia arrepende an no hili atu apoia Jeová hamutuk ho ema Levi sira. Tuirmai, ema rihun ba rihun neʼebé adora karau-oan osan-mean lakon sira-nia moris, no sira neʼebé apoia Jeová hetan salvasaun, no Maromak promete atu fó bensaun ba sira.​—Êx 32:26-29. w18.07 p. 20-21 par. 13-16

Importante liu atu sé mak hatene no simu ita? Ema barak hakarak ema seluk hatene sira liuhusi edukasaun, negósiu, sai artista ka atleta. Maibé Paulo esplika: “Agora imi hatene ona Maromak, ka haʼu bele dehan katak Maromak hatene ona imi, entaun oinsá mak imi fila hodi sai atan fali ba buat neʼebé fraku no buat neʼebé la iha folin iha mundu neʼe?” (Gal 4:9) Sin, se Maromak, Ukun-Naʼin Boot liu Hotu iha lalehan no rai hatene ita, neʼe mak priviléjiu neʼebé furak tebes. Bainhira Jeová hatene ita, neʼe katak nia hadomi ita, no nia hakarak sai ita-nia belun. Tuir loloos Jeová kria ita hodi bele sai ninia belun, neʼe mak razaun neʼebé ita hotu moris.​—Ecle 12:13, 14. w18.07 p. 7-8 par. 3-4

Atu Jeová nia ukun-fuan sira bele ajuda ita, ita presiza hadomi no respeitu ukun-fuan sira-neʼe. (Amós 5:15) Maibé oinsá mak ita bele halo ida-neʼe? Xave mak, ita presiza aprende oinsá atu haree buat hotu tuir Jeová nia haree. Porezemplu, hanoin toʼok, ba semana balu ona, ita la bele dukur iha kalan. Doutór haruka ita atu han hahán neʼebé diʼak, ezersísiu liután, no halo mudansa seluk tan iha ita-nia moris. Ita halo tuir ninia konsellu neʼe, no lakleur, ita haree rezultadu neʼebé diʼak. Ita sei sente agradese tebes ba doutór tanba hodi halo tuir ninia matadalan, ita sente diʼak liután iha ita-nia moris. Hanesan neʼe mós, ita-nia Kriadór fó mai ita ukun-fuan sira atu proteje ita husi konsekuénsia aat tanba sala, no atu ita bele iha moris neʼebé diʼak. Porezemplu, Bíblia hanorin katak ita labele bosok, naʼok, halo sala seksuál, halo violénsia no espiritizmu. (Prov 6:16-19; Apok 21:8) Bainhira ita haree rasik benefísiu husi halo tuir Jeová, ita sei hadomi liután nia no ninia ukun-fuan sira. w18.06 p. 17 par. 5-6

Pilatos husu hanesan neʼe tanba karik taʼuk Jesus sei halo ema barak fila no kontra fali governu Roma. Maibé Jesus hatán: “Haʼu-nia ukun laʼós parte husi mundu neʼe.” (João 18:36) Jesus lakohi envolve an iha buat polítiku nian, tanba ninia Ukun mak iha lalehan. Nia hatete katak buat neʼebé nia halo iha mundu neʼe mak atu “fó sasin kona-ba lia-loos.” (João 18:37) Jesus komprende saida mak ninia knaar. Se ita mós komprende kona-ba ita-nia knaar, ita sei la apoia buat polítiku naran deʼit, maski neʼe mak iha ita-nia laran deʼit. Neʼe la fasil. Katuas área ida hatete katak ema iha ninia área mak fanátiku liu kona-ba polítiku. Sira mak ema neʼebé nasionalizmu tebes no sira iha ideia katak sira-nia moris sei sai diʼak liu se sira-nia ema mak ukun sira. Nia dehan: “Maibé diʼak tebes tanba irmaun irmán sira nafatin proteje sira-nia unidade hodi tau fokus ba serbisu haklaken kona-ba Maromak nia Ukun. Sira hein ba Maromak atu rezolve situasaun neʼebé la iha justisa no problema seluk neʼebé sira hasoru.” w18.06 p. 4-5 par. 6-7

Husi Eskritura Lia-Ebraiku nian, Primeiru Crônicas, Jó, no Zacarias deʼit mak temi kona-ba Satanás. “Satanás”, signifika “Kontradór”. Tanbasá mak antes Mesias mosu mai, Bíblia ladún fó sai informasaun barak kona-ba inimigu neʼe? Eskritura Lia-Ebraiku nia objetivu mak atu ajuda ema buka-hatene Mesias hodi tuir nia, tan neʼe eskritura sira-neʼe ladún fó sai informasaun barak kona-ba Satanás no saida mak Satanás halo. (Lc 24:44; Gal 3:24) Bainhira Mesias mosu tiha mak Jeová uza Mesias no ninia dixípulu sira hodi fó sai informasaun barak kona-ba Satanás no kona-ba anju sira neʼebé tuir Satanás. Jeová halo hanesan neʼe tanba nia sei uza Jesus no ema sira neʼebé ukun hamutuk ho Jesus atu harahun Satanás ho sira neʼebé tuir Satanás. (Rom 16:20; Apok 17:14; 20:10) Keta haluha, katak Diabu nia forsa iha limite. Ita hetan protesaun husi Jeová, Jesus, no anju laran-metin sira. Ho sira-nia ajuda, ita bele kontra hasoru ita-nia inimigu. w18.05 p. 22-23 par. 2-4

Jeová simu deʼit ninia atan neʼebé fó fuan. (Mt 13:23; 21:43) Tan neʼe, iha Jesus nia ai-knanoik neʼebé temi iha João 15:1-5, fó fuan la koʼalia kona-ba ajuda ema foun sai ninia dixípulu. (Mt 28:19) Tanba selae, Testemuña laran-metin neʼebé seidauk ajuda ema ida atu sai Jesus nia dixípulu mak hanesan ai-sanak neʼebé la fó fuan. Maibé neʼe la loos. Tanbasá? Tanba ita la bele obriga ema atu sai Jesus nia dixípulu. No Jeová mak domin, nia nunka husu ita atu halo buat neʼebé ita la iha kbiit atu halo. Nia husu ita atu halo deʼit buat neʼebé ita bele halo. (Deut 30:11-14) Se nuneʼe, fó fuan signifika saida? Neʼe mak kona-ba serbisu neʼebé ita hotu iha kbiit atu halo. Serbisu saida mak neʼe? Neʼe mak haklaken liafuan diʼak kona-ba Maromak nia Ukun.​—Mt 24:14. w18.05 p. 14 par. 8-9

Ohin loron, iha ulun-naʼin relijiaun barak iha mundu neʼe. Dala ruma ema bolu sira pastór, amlulik, ka títulu seluk tan. Sira hanesan ema farizeu neʼebé la hanorin lia-loos husi Maromak nia Liafuan maibé “troka lia-loos kona-ba Maromak ho lia-bosok”. (Rom 1:18, 25) Lia-bosok balu neʼebé sira hanorin mak hanesan infernu, klamar, reenkarnasaun, no katak Maromak simu ema omoseksuál sira-nia hahalok no omoseksuál sira bele kaben ba malu. Polítiku-naʼin sira mós koʼalia lia-bosok hodi lohi ema. Lakleur tan sira sei fó sai lia-bosok ida neʼebé aat liu hotu hodi dehan katak sira lori ona “dame no hakmatek” ba mundu neʼe. Maibé tuirmai “terus sei mosu ba sira derrepente deʼit”. Tan neʼe la bele fiar ba polítiku-naʼin sira-neʼe neʼebé fó sai katak mundu nia situasaun komesa sai diʼak. Realidade mak ita “hatene ho didiʼak katak Jeová nia loron sei mai hanesan naʼok-teen iha kalan”.​—1 Tes 5:1-4. w18.10 p. 7-8 par. 6-8

Jesus Kristu fó kmaan ba ita liuhusi “ulun-naʼin sira”, neʼe mak katuas kongregasaun husi Kristu nia alin sira no mós husi bibi seluk. Katuas sira-neʼe laʼós atu “domina” ita-nia fiar, maibé sai “maluk serbisu-naʼin” ba ita-nia ksolok. Sira hakarak ajuda ita atu iha kontente no kontinua laran-metin. (Isa 32:1, 2; 2 Kor 1:24) Katuas sira bele banati-tuir apóstolu Paulo neʼebé sempre koko atu fó kmaan no laran-manas ba ema seluk. Nia hakerek karta ba ema kristaun sira iha Tesalónika neʼebé hetan terus husi ema hodi dehan: “Ami hanoin tebes imi, no ami kontente atu fahe ba imi laʼós deʼit liafuan diʼak kona-ba Maromak, maibé mós fó ami-nia moris hodi ajuda imi, tanba ami hadomi imi tebetebes.” (1 Tes 2:8) Katuas sira-nia liafuan bele hametin duni ema seluk. Maibé liafuan deʼit toʼo ona ka lae? Tan neʼe Paulo hatete ba katuas sira iha Éfeso, liafuan iha eskritura ba ohin. w18.04 p. 21-22 par. 6-8

Paulo hatete katak se ita hakarak hetan liberdade neʼe, ita tenke fila fali ba Jeová. Neʼe signifika katak ita tenke iha relasaun neʼebé diʼak ho Jeová. (2 Kor 3:16) Iha rai-fuik, ema Izraél sira tuir deʼit ema nia hanoin, laʼós Jeová nia hanoin. Neʼe hanesan sira lori hena taka tiha sira-nia neon no laran. Sira hakarak uza liberdade neʼebé sira foin hetan hodi halo tuir deʼit sira-nia hakarak rasik. (Ebr 3:8-10) Liberdade neʼebé Jeová nia espíritu lori mai iha folin boot liu fali sai livre husi moris nuʼudar atan. Espíritu neʼe lori liberdade barak liu fali liberdade neʼebé ema bele fó. Espíritu neʼe bele halo ita livre husi atan ba sala no mate, no mós husi relijiaun falsu ho ninia doutrina sira. (Rom 6:23; 8:2) Liberdade hanesan neʼe mak furak duni! Maski ema neʼebé sai atan ka iha komarka mós bele hetan liberdade neʼe.​—Gên 39:20-23. w18.04 p. 9 par. 3-5