Agostu

Reuniaun sira fó-hanoin beibeik ita kona-ba buat neʼebé Jeová no Jesus halo ona mai ita. Ita koko atu banati-tuir Jesus liuhusi dalan neʼebé ita halaʼo ita-nia moris tanba ita agradese tebes. (2 Kor 5:14, 15) Liután neʼe, ita-nia laran book ita atu hahiʼi Jeová tanba nia fó Jesus nia sakrifísiu. Dalan ida atu hahiʼi nia mak hodi hatoʼo komentáriu husi laran iha ita-nia reuniaun sira. Ita bele hatudu domin boot ba Jeová no ninia Oan-Mane hodi prontu atu halo sakrifísiu ba sira. Dala barak, ita halo nuneʼe hodi bele tuir ita-nia reuniaun sira. Kongregasaun barak halo reuniaun ida iha loron baileet, tempu neʼebé ema barak foin sai serbisu no karik sente kole. No reuniaun seluk halo iha findesemana, tempu neʼebé ema baibain deskansa. Jeová haree ka lae bainhira ita tuir reuniaun maski ita kole? Nia haree duni! Tuir loloos, se ita kole maibé ita hakaʼas an atu tuir reuniaun, Jeová sei hafolin liután domin neʼebé ita hatudu ba nia.​—Mc 12:41-44. w19.01 p. 29 par. 12-13

Jesus rasik hasoru problema balu neʼebé ema hasoru. Porezemplu, Jesus sai boot iha família neʼebé kiak. Jesus aprende atu halo serbisu makaʼas hamutuk ho ninia aman hakiak José. (Mt 13:55; Mc 6:3) No mós karik José mate antes Jesus hahú ninia serbisu haklaken. Entaun karik Jesus sente triste tanba lakon ema neʼebé nia hadomi. No Jesus mós hatene oinsá moris iha família neʼebé iha fiar la hanesan. (João 7:5) Situasaun sira-neʼe no situasaun seluk karik ajuda Jesus atu komprende ema nia susar no sentimentu. Jesus hatudu katak nia hanoin ema liuliu bainhira nia halo milagre. Jesus halo milagre laʼós deʼit tanba nia iha responsabilidade. Maibé tanba nia “hanoin tebes” ema neʼebé hetan susar. (Mt 20:29-34; Mc 1:40-42) Jesus hanoin ema no hakarak ajuda sira.​—Mc 7:32-35; Lc 7:12-15. w19.03 p. 16 par. 10-11

Iha Jesus nia kalan ikus iha rai, hanoin toʼok kona-ba estrese neʼebé Jesus sente. Nia bele hatudu nafatin laran-metin toʼo mate ka lae? Ema rihun ba rihun nia moris iha ninia liman. (Rom 5:18, 19) Importante liu mak, neʼe envolve mós ninia Aman nia naran. (Job 2:4) No durante han-kalan ikus ho ninia belun sira, katak apóstolu sira, sira komesa “haksesuk malu makaʼas kona-ba sé mak boot liu entre sira”. Maski nuneʼe, nia la sai hirus maibé nia hatán ho kalma. Ho laran-diʼak Jesus esplika fali kona-ba hahalok neʼebé sira tenke haburas. Tuirmai nia gaba ninia belun sira tanba sira apoia nafatin nia ho laran-metin. (Lc 22:24-28; João 13:1-5, 12-15) Ita bele duni banati-tuir Jesus no hatudu nafatin laran-maus maski ita estrese, se ita hanoin-hetan katak ita hotu koʼalia no halo buat neʼebé halo ema seluk hirus. (Prov 12:18; Tgo 3:2, 5) No koko atu gaba ema seluk kona-ba sira-nia hahalok diʼak.​—Éf 4:29. w19.02 p. 11-12 par. 16-17

Moisés nia Ukun-Fuan hanetik ema atu la duun matak ema seluk kona-ba krime ida. Baibain se ema ida duun ema ruma, nia iha direitu atu hatene sé mak duun nia. (Deut 19:16-19; 25:1) No antes deside katak nia halo sala, tenke iha evidénsia husi sasin naʼin-rua. (Deut 17:6; 19:15) Oinsá se ema Izraél ida halo krime neʼebé iha sasin naʼin-ida deʼit? Ema neʼe labele hanoin katak nia sei la hetan kastigu. Jeová haree buat neʼebé nia halo. Sin, Jeová hatudu ezemplu perfeitu; nia nunka hatudu hahalok la justu. Nia fó kolen ba sira neʼebé halo tuir ninia prinsípiu, maibé nia fó kastigu ba sira neʼebé uza sala sira-nia podér. (2 Sam 22:21-23; Eze 9:9, 10) Ema balu karik halo hahalok aat no haree hanesan la hetan kastigu, maibé bainhira Jeová deside katak tempu toʼo ona, nia sei tesi-lia duni ba sira. (Prov 28:13) No se sira la arrepende an, sira sei hatene katak “monu ba Maromak neʼebé moris nia liman mak buat neʼebé halo ema taʼuk”.​—Ebr 10:30, 31. w19.02 p. 23-24 par. 20-21

Moisés hateke duni ba Jeová hodi buka matadalan. Bíblia hatete katak “nia kontinua hamriik metin hanesan haree Ida neʼebé matan la haree”. (Ebr 11:24-27) Ema Izraél sai husi Ejitu latoʼo fulan rua, problema sériu ida mosu antes sira toʼo iha Foho Sinai. Povu komesa muramura tanba bee la iha. Sira muramura hasoru Moisés no hirus tebes hasoru nia toʼo “Moisés husu ba Jeová: ‘Saida mak haʼu tenke halo ba povu sira-neʼe? Lakleur tan sira sei tuda mate haʼu!’” (Êx 17:4) Jeová fó matadalan klaru ba Moisés. Nia haruka Moisés lori ninia ai-tonka hodi baku fatuk iha Horeb. Bíblia dehan: “Moisés halo nuneʼe duni iha Izraél nia katuas sira-nia oin.” Tuirmai, bee sai husi fatuk no povu sira hemu bee neʼe. Problema rezolve ona.​—Êx 17:5, 6. w18.07 p. 13 par. 4-5

Jeová hametin ita ho domin liuhusi ita-nia kongregasaun. Ita bele hatudu katak ita hadomi Jeová hodi hatudu fali domin ba irmaun-irmán sira. Ita presiza hakaʼas an atu ajuda irmaun-irmán sira hatene katak Jeová hafolin no hadomi tebes sira. (1 João 4:19-21) Apóstolu Paulo dehan: “Kontinua fó aten-brani ba malu no hametin malu, hanesan imi halo daudaun ona.” (1 Tes 5:11) Katuas kongregasaun no ita hotu bele banati-tuir Jeová no Jesus atu fó kmaan ba ita-nia irmaun-irmán sira. (Rom 15:1, 2) Ema balu iha kongregasaun neʼebé hasoru daudauk moras depresaun ka laran-taridu presiza buka ajuda husi doutór no hemu ai-moruk. (Lc 5:31) Maski katuas no ema seluk iha kongregasaun rekoñese katak sira laʼós doutór, maibé dalan neʼebé sira bele fó kmaan no ajuda irmaun-irmán sira-neʼe mak importante tebes. Ema hotu iha kongregasaun bele “fó laran-manas ba sira neʼebé laran-tun, apoia sira neʼebé fraku, hatudu pasiénsia ba ema hotu”.​—1 Tes 5:14. w18.09 p. 14-15 par. 10-11

Ita bele hametin ita-nia fiar ba Jeová hodi koñese nia diʼak liután. Dalan ida deʼit atu koñese didiʼak Jeová mak hodi lee Bíblia no hanoin kleʼan kona-ba buat neʼebé ita lee. Iha Bíblia, ita bele lee kona-ba oinsá Jeová proteje ninia povu iha tempu antigu. Ida-neʼe sei ajuda ita fiar katak nia sei tau matan ita. Hanoin toʼok liafuan furak sira neʼebé Isaias uza atu esplika oinsá Jeová proteje ita. Nia kompara Jeová nuʼudar bibi-atan ida no Jeová nia atan sira nuʼudar bibi-oan. Isaias esplika kona-ba Jeová: “Nia sei halibur bibi-oan sira ho ninia liman, no nia sei koʼus sira iha ninia hirus-matan.” (Isa 40:11) Kuandu ita rasik sente Jeová nia liman neʼebé forte hakoʼak ita, ita sente seguru no kalma. Atu ajuda ita kalma nafatin maski hasoru problema oioin neʼebé ita sei hasoru, hanoin kleʼan kona-ba liafuan sira iha eskritura ba ohin. Ida-neʼe sei hametin ita bainhira ita hasoru susar oioin. w19.01 p. 7 par. 17-18

Ita iha ka lae, planu espirituál ruma neʼebé Ita hakaʼas an atu kumpre? Karik Ita hakaʼas an atu lee Bíblia loron-loron, ka aumenta Ita-nia matenek atu fó komentáriu no hanorin. Ita sente oinsá bainhira Ita-nia matenek aumenta, ka bainhira ema seluk gaba Ita? Ita sente kontente duni! Tanbasá? Tanba Ita halo tuir Jeová nia hakarak, hanesan ho Jesus. (Prov 27:11) Kuandu ita tau fokus hodi halo tuir Jeová nia hakarak, ida-neʼe sei halo ita kontente tanba neʼe nunka sai saugati deʼit. Apóstolu Paulo dehan: “Laran-metin bá, no hamriik metin bá, no sai badinas nafatin iha Naʼi nia serbisu, tanba imi hatene katak serbisu neʼebé imi halo ba Naʼi sei la sai saugati deʼit.” (1 Kor 15:58) Maibé ema neʼebé buka rikusoin ka naran-boot iha mundu neʼe, sira sei la kontente maski sira hetan susesu.​—Lc 9:25. w18.12 p. 22 par. 12-13

David koʼalia kona-ba tempu neʼebé ema hotu iha mundu sei halo tuir Maromak nia matadalan neʼebé loos. (2 Ped 3:13) Profesia iha Isaias 65:22 hatete: “Haʼu-nia povu nia moris sei sai naruk hanesan ai-hun ida.” Neʼe katak ema sei moris ba tinan rihun ba rihun iha mundu foun. Tuir Apokalipse 21:1-4, Maromak sei haraik bensaun oioin ba ema, no bensaun ida mak “mate sei la iha tan”. Adão ho Eva lakon ona priviléjiu atu moris ba nafatin iha Paraízu, maibé loron ida ita sei hetan fali. Maromak promete atu fó bensaun ba ema iha mundu. David hatete katak ema neʼebé laran-maus no laran-loos sei moris ba nafatin iha mundu neʼe. (Sal 37:11) Profesia iha livru Isaias ajuda ita atu hein ba tempu neʼebé ita sei moris kontente iha paraízu furak iha mundu neʼe. (Isa 11:6-9; 35:5-10; 65:21-23) Bainhira? Neʼe sei akontese bainhira Jesus nia promesa ba kriminozu neʼe sai loos. (Lc 23:43) Ita bele moris iha Paraízu neʼe. w18.12 p. 7 par. 22-23

Ita bele hasees an husi mundu nia ideia hotu ka lae? Labele, tanba ita moris iha mundu neʼe, ita haree ka rona nafatin ideia balu husi mundu neʼe. (1 Kor 5:9, 10) Iha serbisu haklaken ita rona beibeik ema fó sai ideia no fiar neʼebé sala. Maibé, maski ita labele hasees an husi ideia sala sira-neʼe hotu, ita la presiza hanoin beibeik ka simu ideia sira-neʼe. Hanesan Jesus, ita lakohi duni atu simu hanoin sira neʼebé Satanás hakarak ita atu iha. No ita mós bele proteje ita-nia an hodi la gasta tempu atu hanoin beibeik kona-ba mundu nia hanoin. Porezemplu, ita tenke kuidadu kona-ba hili belun. Bíblia fó avizu katak, se ita sai belun ho ema neʼebé la adora Jeová, sira-nia hanoin neineik-neineik sei kona ita. (Prov 13:20; 1 Kor 15:12, 32, 33) No mós ita tenke hasees an atu la haree programa sira neʼebé apoia evolusaun, violénsia, ka sala seksuál. Ita lakohi estraga ita-nia neon ho ideia sira neʼebé “kontra koñesimentu kona-ba Maromak”.​—2 Kor 10:5. w18.11 p. 21 par. 16-17

Oinsá mak ita bele hametin liután ita-nia hakarak atu laʼo iha lia-loos? Dalan ida mak hakaʼas an atu hanorin lia-loos husi Bíblia ba ema seluk. Hodi halo nuneʼe ita kaer metin ba ita-nia surik espirituál, neʼe katak ita kaer metin ba “Maromak nia liafuan”. (Éf 6:17) Ita hotu hakarak sai mestre Bíblia neʼebé diʼak liután atu “uza ho loloos liafuan lia-loos nian”. (2 Tim 2:15) Se ita uza Bíblia hodi ajuda ema seluk sosa lia-loos no husik hanorin falsu, ita sei sai hametin Maromak nia liafuan iha ita-nia laran. Hodi nuneʼe, ita sei hametin liután ita-nia hakarak atu kontinua laʼo iha lia-loos. Lia-loos mak prezente neʼebé folin-boot tebes husi Jeová. Lia-loos ajuda ita atu iha relasaun neʼebé besik ho Jeová, ita-nia Aman lalehan nian. La iha buat seluk mak folin-boot liu fali lia-loos. Jeová hanorin ona buat barak mai ita, maibé neʼe foin hahú deʼit. Jeová promete katak nia sei hanorin ita ba nafatin. Tan neʼe, hadomi lia-loos hanesan pérola neʼebé folin-boot. Kontinua “sosa lia-loos no keta faʼan fali”.​—Prov 23:23. w18.11 p. 8 par. 2; p. 12 par. 15-17

Ita bele fiar katak, antes Rai-Nabeen toʼo mai, Noé nia haklaken inklui mós fó avizu kona-ba Jeová atu halakon ema aat hotu. Tanba Jesus dehan: “Iha loron sira neʼebá antes rai-nabeen, ema han no hemu, mane no feto sira kaben, toʼo loron neʼebé Noé tama ba ró laran. No sira lakohi rona toʼo rai-nabeen mosu no halakon sira hotu, nuneʼe mós sei mosu iha tempu neʼebé Oan-Mane husi ema toʼo ona mai.” (Mt 24:38, 39) Maski ema lakohi rona, Noé halo tuir nafatin Jeová ho laran-metin hodi haklaken mensajen avizu nian ba ema. Ohin loron, ita haklaken mensajen kona-ba Maromak nia Ukun ba ema hodi fó oportunidade ba sira atu aprende kona-ba Jeová nia hakarak ba futuru. Hanesan Jeová, ita mós hakarak tebes ema atu fó atensaun ba mensajen neʼe hodi “kontinua moris”. (Eze 18:23) Iha tempu ita haklaken husi uma ba uma no iha fatin públiku, ita fó daudauk avizu ba ema katak Maromak nia Ukun sei mai no halakon mundu aat neʼe.​—Eze 3:18, 19; Dan 2:44; Apok 14:6, 7. w18.05 p. 19 par. 8-9

Ita tenke halo saida se serbisu haklaken hetan bandu iha Ita-nia rai no autoridade sira buka informasaun husi Ita kona-ba irmaun-irmán sira? Ita tenkesér fó sai buat hotu ba sira ka lae? Jesus halo saida bainhira governadór Roma husu pergunta ba nia? Jesus halo tuir prinsípiu husi Bíblia neʼebé hatete katak iha “tempu atu nonook no tempu atu koʼalia”, no dala ruma nia nonook deʼit. (Ecle 3:1, 7; Mt 27:11-14) Se ita mak monu ba situasaun hanesan neʼe, ita presiza kuidadu no uza matenek, atu nuneʼe ita la lori perigu ba irmaun-irmán sira. (Prov 10:19; 11:12) Ita sei halo saida se Ita-nia kolega diʼak ka família ida halo sala neʼebé sériu no Ita hatene kona-ba neʼe? “Koʼalia lia-loos.” Ita iha responsabilidade atu fó sai informasaun hotu ho loloos ba katuas sira, labele troka informasaun sira-neʼe. Katuas sira iha direitu atu hatene informasaun hotu, atu nuneʼe sira bele buka dalan neʼebé diʼak liu hotu hodi ajuda ema neʼe hadiʼa ninia relasaun ho Jeová.​—Tgo 5:14, 15. w18.10 p. 10 par. 17-18

Oinsá mak ita bele hametin malu ho domin? Dalan ida mak hodi rona ho pasiénsia. (Tgo 1:19) Ita hatudu domin hodi rona didiʼak ba irmaun ka irmán. Husu pergunta ho laran-diʼak hodi koko komprende sira-nia sentimentu. Sira bele haree husi Ita-nia oin se Ita hanoin sira ka lae. Se sira hakarak koʼalia sai sira-nia sentimentu, rona ho pasiénsia no keta korta sira-nia liafuan. Se Ita mak rona ho pasiénsia, Ita sei komprende liután sira-nia sentimentu no neʼe sei book sira atu tau konfiansa ba Ita. Se Ita halo nuneʼe, fasil ba sira atu rona ba Ita-nia hakaʼas-an hodi ajuda sira. Se Ita hanoin tebes ema seluk, neʼe bele fó kmaan tebes ba sira. w18.09 p. 14 par. 10; p. 15 par. 13

Presiza tempu atu aprende kona-ba Maromak nia Ukun, lee Bíblia no livru sira, estuda Bíblia ho Testemuña ba Jeová, prepara ba reuniaun, no tuir reuniaun sira. Atu bele halo buat sira-neʼe ita presiza ‘sosa tempu’ ka uza didiʼak ita-nia tempu hodi hamenus atividade neʼebé ladún importante. (Éf 5:15, 16, nota) Presiza tempu hira atu bele aprende hanorin báziku husi Bíblia? Ba ema ida-idak la hanesan. Ita bele kontinua aprende ba nafatin kona-ba Jeová nia matenek, ninia dalan, no buat hotu neʼebé nia halo. (Rom 11:33) Edisaun primeiru husi Watch Tower kompara lia-loos hanesan “ai-funan kiʼik ida” hodi dehan: “Keta kontente ho ai-funan lia-loos ida deʼit. Se ita presiza ai-funan lia-loos ida deʼit, Maromak mós la presiza hanorin lia-loos barak mai ita. Kontinua buka ai-funan lia-loos.” Maski ita bele moris ba nafatin, ita sei iha buat barak atu aprende kona-ba Jeová. Maibé agora daudaun, importante atu uza didiʼak tempu neʼebé ita iha atu aprende lia-loos sira husi Bíblia. w18.11 p. 5 par. 7

Laʼen sira tenke hanoin no komprende sira-nia feen. (1 Ped 3:7) Laʼen neʼebé komprende ninia feen la hanoin katak nia diʼak liu ninia feen, maski nia iha buat barak mak la hanesan ninia feen. (Gên 2:18) Nia mós presiza hanoin feen nia sentimentu no hatudu dignidade no respeitu. Laʼen neʼebé hanoin ninia feen nia sentimentu nunka hatudu oin-moris ka hatudu interese neʼebé sala ba feto seluk. Nia mós la halo hanesan neʼe liuhusi média sosiál ka internét. (Job 31:1) Nia hatudu laran-metin ba ninia feen tanba nia hadomi ninia feen, hadomi Jeová no odi buat neʼebé aat.​—Sal 19:14; 97:10. w18.09 p. 29 par. 3-4

Tanbasá la fasil atu aplika buat neʼebé ita aprende husi Maromak nia Liafuan? Razaun ida mak tanba ita presiza haraik-an atu halo buat neʼebé loos. Iha “loron ikus” sira-neʼe, la fasil atu hatudu hahalok haraik-an tanba ema barak iha mundu neʼe “hadomi deʼit sira-nia an, hadomi osan, gaba an, loko an” no “la kontrola an”. (2 Tim 3:1-3) Nuʼudar Maromak nia atan, ita hatene katak hahalok sira-neʼe ladiʼak, maibé ita haree ema neʼebé hatudu hahalok sira-neʼe iha moris neʼebé susesu, karik neʼe bele halo ita laran-moras. (Sal 37:1; 73:3) Karik ita bele hanoin: ‘Tau uluk ema seluk nia interese lori benefísiu saida mai haʼu? Se haʼu hatudu haraik-an, ema sei respeitu haʼu ka lae?’ Se ita mak husik mundu nia toman atu hanoin an deʼit kona ita, neʼe bele estraga ita-nia relasaun diʼak ho irmaun-irmán sira no halo susar ba ema seluk atu rekoñese katak ita mak ema kristaun neʼebé loos. Maibé se ita mak estuda didiʼak no banati-tuir ezemplu sira husi Bíblia, neʼe sei lori rezultadu neʼebé diʼak. w18.09 p. 3 par. 1

Antes Jeová kria buat hotu-hotu, nia mesak deʼit. Maski nuneʼe, nia la hanoin deʼit ninia an. Nia deside atu kria kriatura seluk iha lalehan no rai hodi sira mós bele goza moris. Sin, Jeová nuʼudar “Maromak neʼebé kontente”, gosta atu fahe buat neʼebé diʼak. (1 Tim 1:11; Tgo 1:17) Jeová hanorin ita oinsá atu hatudu laran-luak tanba nia mós hakarak ita atu sai kontente. (Rom 1:20) Maromak kria ema tuir ninia ilas. (Gên 1:27) Neʼe katak Jeová kria ita ho hahalok sira neʼebé nia iha. Tan neʼe, atu hetan ksolok neʼebé loos no bensaun husi Jeová, ita presiza halo tuir ninia ezemplu hodi hatudu interese no laran-luak ba ema seluk. (Flp 2:3, 4; Tgo 1:5) Tanbasá? Tanba neʼe mak dalan neʼebé Jeová kria ita. Maski ita la perfeitu, ita bele banati-tuir Jeová hodi hatudu hahalok laran-luak. Jeová hakarak ita banati-tuir nia, tan neʼe nia haksolok atu haree ita hatudu laran-luak.​—Éf 5:1. w18.08 p. 18 par. 1-2; p. 19 par. 4

Kristu nia dixípulu sira hatudu katak sira rona Jesus hodi tau atensaun ba ninia liafuan no mós halo tuir. Sira la husik “hanoin resin kona-ba moris neʼe” dada sira-nia atensaun. (Lc 21:34) Sira sente katak importante tebes atu halo tuir Jesus nia mandamentu maski hasoru susar. Maski hasoru susar sira-neʼe hotu, ita-nia irmaun sira nafatin laran-metin ba Jeová. Dalan seluk tan oinsá ita rona ba Jesus mak hodi apoia sira neʼebé nia hili atu dirije ita. (Ebr 13:7, 17) Foin lalais neʼe Maromak nia organizasaun halo ona mudansa barak, inklui uza ekipamentu no métodu foun iha serbisu haklaken, dalan foun atu halaʼo reuniaun loron baileet, dalan foun atu harii, hadiʼa, no tau matan ba Reuniaun-Fatin. Ita agradese tebes ba matadalan neʼebé sira fó ba ita ho domin! Ita bele fiar katak Jeová sei haraik bensaun ba ita-nia hakaʼas an hodi halo tuir matadalan husi ninia organizasaun. w19.03 p. 10-11 par. 11-12

Ita la bele tau fiar ba istória neʼebé ladún loos. Mai ita haree buat neʼebé akontese ba ema Izraél sira iha Josué nia tempu neʼebé hela iha Mota Jordaun nia sorin oeste. (Jos 22:9-34) Sira rona informasaun katak ema Izraél sira iha sorin leste harii altár boot ida. Informasaun neʼe loos, maibé la kompletu. Neʼe halo ema Izraél iha parte oeste hanoin katak sira-nia maun-alin husi parte leste halo ona buat neʼebé kontra Jeová. (Jos 22:10-12) Maibé antes ataka, sira haruka ema balu buka-hatene faktu loloos husi ema Izraél sira iha parte leste. Ema sira-neʼe hetan informasaun saida? Afinál sira harii altár neʼe laʼós atu hasaʼe sakrifísiu ba maromak falsu sira, maibé atu sai monumentu deʼit hodi ema hotu bele hatene katak sira adora Jeová. Hanoin toʼok ema Izraél sira iha mota parte oeste nia ksolok hodi la halo funu hasoru sira-nia maun-alin, maibé uza tempu hodi buka-hatene didiʼak faktu sira! w18.08 p. 5 par. 9-10

Hanesan Paulo hatete katak, maski ema neʼebé adora Jeová mós bele envolve iha hahalok neʼebé sala. Karik sira mós bele hanoin katak Jeová sei simu nafatin sira. Maibé laʼós tan deʼit ema ida hakarak sai Jeová nia belun ka hanoin katak nia laran-metin ba Jeová, hatudu katak Jeová simu nia. (1 Kor 10:1-5) Bainhira ema Izraél sira sente Moisés demora hodi la tun husi Sinai, sira laran-taridu tebes. Karik ohin loron ema kristaun mós bele sente laran-taridu hodi haree katak mundu aat nia rohan tarde atu mai. Karik ita bele komesa hanoin katak mundu foun neʼebé Jeová promete sei dook ka karik laʼós tebes, tan neʼe ita komesa hanoin atu moris tuir ita-nia hakarak duké moris tuir Jeová nia hakarak. Se ita la kuidadu, ita bele hadook an husi Jeová no halo buat neʼebé ita nunka hanoin atu halo. w18.07 p. 21 par. 17-18

Ita bele hetan bensaun hanesan neʼe bainhira Jeová hatene didiʼak kona-ba ita. Maibé ita presiza halo saida hodi Jeová bele hatene didiʼak? Ita tenke hadomi nia no dedika ita-nia moris ba nia. (1 Kor 8:3) Maibé ita presiza proteje ita-nia relasaun espesiál ho ita-nia Aman lalehan nian. Hanesan ema kristaun iha Galásia, ita mós tenke hasees an hodi la sai atan ba “buat neʼebé fraku no buat neʼebé la iha folin”, inklui mós la buka susesu no naran-boot iha mundu neʼe. (Gal 4:9) Ema kristaun sira iha Galásia hatene ona kona-ba Maromak, no Maromak mós hatene sira. Maibé Paulo hatete katak irmaun-irmán sira-neʼe fila fali ba buat neʼebé folin-laek. Paulo nia liafuan hanesan atu husu sira: ‘Imi hadook an ona husi buat neʼebé beik no folin-laek maibé tanbasá mak imi fila fali hodi sai atan ba buat sira-neʼe?’ w18.07 p. 8 par. 5-6

Ita la presiza kontra Maromak nia ukun-fuan no hetan konsekuénsia aat mak foin ita aprende saida mak loos no sala. Tanbasá? Tanba ita bele aprende husi ema iha tempu uluk nia sala. Ezemplu sira-neʼe ita bele hetan iha Bíblia laran. Ita simu hanorin neʼebé diʼak liu husi Maromak, hanesan bainhira ita lee no medita kona-ba Bíblia nia istória sira. Porezemplu, hanoin kona-ba oinsá David sente laran-moras tebes bainhira nia la halo tuir Jeová hodi halo sala seksuál ho Batseba. (2 Sam 12:7-14) Bainhira Ita lee istória neʼe, husu ba Ita-nia an: ‘Saida mak David bele halo nanis atu hasees an husi problema neʼe? Se haʼu mak hasoru situasaun hanesan neʼe, haʼu sei halo saida? Haʼu sei halai husi situasaun neʼe hanesan José, ka monu ba sala hanesan David?’ (Gên 39:11-15) Se ita hanoin didiʼak kona-ba konsekuénsia aat husi sala, neʼe sei ajuda ita atu odi liután buat neʼebé aat.​—Amós 5:15. w18.06 p. 17 par. 5, 7

Bainhira ema haree situasaun neʼebé la iha justisa mak haleʼu sira, baibain neʼe sei book sira atu envolve an liután iha polítiku. Iha Jesus nia tempu, selu impostu mak sai nuʼudar problema polítiku ida neʼebé book ema atu sai todan ba sorin. Sira tenke selu impostu neʼebé boot ba sira-nia sasán, rai no uma. No mós ema neʼebé kobra impostu halo korrupsaun, tan neʼe halo problema sai boot liután. Kobradór impostu balu selu ba governu atu bele hetan pozisaun diʼak, no depois sira aproveita sira-nia pozisaun neʼe atu manán osan barak. Zakeus, xefe ba kobradór impostu iha Jerikó, bele sai riku tanba obriga povu atu selu impostu neʼebé boot. (Lc 19:2, 8) Jesus nia inimigu sira koko obriga Jesus atu todan ba sorin kona-ba problema selu impostu. Sira husu nia, tenkesér selu impostu ba Liurai Roma ka lae, osan denáriu ida neʼebé ema judeu hotu tenke selu. (Mt 22:16-18) Ema judeu sira la gosta lei neʼe tanba neʼe hatudu katak governu Roma mak kontrola hela sira. w18.06 p. 5-6 par. 8-10

Rezultadu husi ema neʼebé hili hodi apoia Satanás sempre lori rezultadu neʼebé aat. (Jó 21:7-17; Gal 6:8) Tanbasá diʼak ba ita atu hatene katak Satanás mak kontrola daudauk mundu neʼe? Neʼe ajuda ita atu bele iha hanoin neʼebé loos kona-ba governu sira no book ita atu haklaken liafuan diʼak. Ita hatene katak Jeová hakarak ita hatudu respeitu ba governu sira. (1 Ped 2:17) Nia hakarak ita halo tuir governu nia lei sira, naran katak lei sira-neʼe la kontra Maromak nia matadalan. (Rom 13:1-4) Maibé ita mós hatene katak ita tenkesér neutrál no la bele apoia partidu polítiku ka naʼi-ulun ruma. (João 17:15, 16; 18:36) Satanás koko makaʼas atu subar Jeová nia naran no hafoʼer naran neʼe, tan neʼe ita hakarak hakaʼas an atu hanorin lia-loos kona-ba Maromak ba ema seluk. Ita sente orgullu tebes hodi lori Jeová nia naran no uza naran neʼe. Sin, domin ba Maromak iha folin-boot liu fali domin ba osan ka sasán.​—Isa 43:10; 1 Tim 6:6-10. w18.05 p. 24 par. 8-9

Bainhira problema mosu entre kaben-naʼin, sira bele haketak malu ka lae? Bíblia la fó sai razaun oioin neʼebé kaben-naʼin bele haketak malu. Paulo hakerek: “Se feto ida iha laʼen neʼebé laʼós fiar-naʼin, no ninia laʼen kontente atu nafatin moris ho nia, nia labele husik ninia laʼen.” (1 Kor 7:12, 13) Neʼe aplika mós ba ita-nia tempu. Maibé dala ruma “laʼen neʼebé laʼós fiar-naʼin” hatudu katak nia la “kontente atu nafatin moris” ho ninia feen. Porezemplu, nia halo violénsia makaʼas iha uma laran toʼo ninia feen sente ninia moris iha perigu laran, ka laʼen lakohi tau matan ba feen no oan sira, ka hanetik makaʼas feen atu serbí Maromak ho laran-metin. Iha situasaun hanesan neʼe, maski laʼen neʼe hatete nia hakarak hamutuk nafatin, maibé liuhusi ninia hahalok, nia hatudu katak nia la “kontente atu nafatin moris” hamutuk. Entaun, feen neʼe bele deside katak nia presiza haketak malu. Maibé feen Kristaun seluk neʼebé mós iha situasaun hanesan neʼe, karik sira deside atu tahan no hakaʼas an atu hadiʼa sira-nia problema. w18.12 p. 13 par. 14, 16; p. 14 par. 17

Husi Jesus nia ai-knanoik kona-ba toʼos-naʼin neʼebé temi iha Lucas 8:5-8, 11-15, Jesus esplika katak fini mak “Maromak nia liafuan”, ka mensajen kona-ba Maromak nia Ukun. Rai signifika ema nia laran. Fini neʼe monu ba rai diʼak, iha abut, sai buras, no “fó fuan dala atus ida”. Trigu-musan neʼe moris no sai buras ba beibeik toʼo nia prontu ona atu fó fuan. Hanesan iha Jesus nia ai-knanoik, trigu-kain laʼós atu fó fuan ba trigu-kain, maibé fó fuan ba trigu-musan, hanesan neʼe mós ho ita, ita laʼós fó fuan atu halo dixípulu foun, maibé musan foun. Iha dalan saida mak ita fó fuan ba musan foun? Tempu ida-idak neʼebé ita fó sai mensajen kona-ba Maromak nia Ukun, neʼe hanesan ita kari fali musan neʼebé uluk kuda iha ita-nia laran. (Lc 6:45; 8:1) Tan neʼe, bainhira ita la para hodi haklaken mensajen kona-ba Maromak nia Ukun, neʼe hatudu katak ita kontinua tahan no fó fuan. w18.05 p. 14 par. 10-11

Paulo ‘kontente tebes atu fó buat hotu no fó ninia an rasik’ ba irmaun-irmán sira. (2 Kor 12:15) Hanesan neʼe mós katuas sira tenke fó laran-manas no kmaan ba ema seluk, laʼós liuhusi liafuan deʼit, maibé mós liuhusi buat neʼebé sira halo. Halo nuneʼe hatudu katak sira hanoin duni ita. (1 Kor 14:3) Dala ruma katuas sira presiza fó konsellu atu hametin irmaun-irmán sira. Katuas sira bele aprende ezemplu sira husi Bíblia oinsá atu fó konsellu iha dalan neʼebé la halo ema sente laran-kraik. Jesus hatudu ezemplu neʼebé diʼak tebes kona-ba fó konsellu bainhira nia hetan moris-hiʼas. Nia haruka mensajen ba kongregasaun sira iha Ásia Menór. Nia hatoʼo konsellu balu neʼebé makaʼas ba kongregasaun sira iha Éfeso, Pérgamo, no Tiatira. Maibé antes nia fó konsellu, nia gaba sira kona-ba buat diʼak hotu neʼebé sira halo daudauk. (Apok 2:1-5, 12, 13, 18, 19) Katuas sira koko makaʼas atu banati-tuir Kristu iha dalan neʼebé nia fó konsellu. w18.04 p. 22 par. 8-9

Inan-aman sira, Ita hakaʼas an tebes atu proteje Ita-nia oan husi moras. Ita halo nuneʼe hodi mantein uma moos, no soe buat hotu neʼebé bele halo Ita no Ita-nia oan hetan moras. Iha dalan neʼebé hanesan, Ita mós tenke proteje Ita-nia oan husi filme, programa televizaun, games eletróniku no sítiu sira neʼebé bele book oan sira atu iha Satanás nia hanoin. Jeová entrega ona responsabilidade ba Ita atu ajuda oan sira sai Jeová nia belun. (Prov 1:8) Tan neʼe keta taʼuk atu halo lei iha família laran neʼebé bazeia ba Bíblia nia prinsípiu. Fó-hatene Ita-nia oan sira neʼebé kiʼik kona-ba buat neʼebé sira bele haree no labele haree, no esplika razaun atu sira bele komprende Ita-nia desizaun. (Mt 5:37) Bainhira Ita-nia oan sai boot ba daudaun, treinu sira-nia kbiit atu bele hatene buat neʼebé aat no diʼak tuir Jeová nia haree. (Ebr 5:14) Hanoin-hetan, Ita-nia oan sira sei aprende buat barak liuhusi Ita-nia hahalok.​—Deut 6:6, 7; Rom 2:21. w19.01 p. 16 par. 8

Maski Ita-nia idade mak sei kiʼik, Ita bele hakaʼas an hodi habelun ho ferik-katuas sira. Husu sira saida mak ajuda sira hodi serbí Jeová ba tinan barak. Irmaun-irmán sira-neʼe bele hanorin Ita lisaun importante barak. Halo nuneʼe sei fó laran-manas ba sira no mós ba Ita! No ita hotu, maski kiʼik ka boot, ita bele simu bainaka sira neʼebé mai tuir reuniaun. Se Ita mak hetan knaar atu dirije grupu haklaken, Ita bele ajuda irmaun-irmán idade sira atu halo sira-nia naroman nabilan nafatin. Halo arranju hodi sira bele haklaken iha fatin neʼebé diʼak ba sira, no hodi sira bele haklaken hamutuk joven neʼebé bele ajuda sira. Irmaun-irmán sira neʼebé idade ona no saúde ladiʼak dala ruma sente laran-kraik tanba sira la bele haklaken barak hanesan uluk. Maibé sira bele sente kontente se Ita hatudu katak Ita hanoin no komprende sira-nia sentimentu. Ita-nia laran-diʼak bele anima ema hotu atu haklaken ho laran-manas, maski sira idade kiʼik ka boot, no maski sira iha lia-loos kleur ona ka lae.​—Lev 19:32. w18.06 p. 23 par. 10-12

Ita la bele haluha katak Jeová halo ita livre ona husi atan ba sala no mate. Jesus nia sakrifísiu loke dalan ba ita atu bele serbí Maromak ho konxiénsia neʼebé moos, no neʼe halo ita hetan ksolok neʼebé loos. (Sal 40:8) Ita tenkesér hatoʼo ita-nia agradese ba Jeová maibé ita mós tenkesér kuidadu atu la uza sala ita-nia liberdade. Porezemplu, apóstolu Pedro fó avizu ba ita katak ita la bele uza ita-nia liberdade sai razaun atu halo fali buat neʼebé sala. Avizu neʼe halo ita hanoin fali kona-ba buat neʼebé akontese ba ema Izraél sira iha rai-fuik, loos ka lae? Ohin loron, ita mós presiza tebes avizu neʼe. Satanás no ninia mundu oferese buat furak oioin kona-ba hatais, han, hemu, no atividade halimar nian. Komérsiu sempre uza ema bonitu-bonita atu lohi ita hola sasán neʼebé ita la presiza. Fasil tebes atu monu ba mundu nia lasu hodi uza ita-nia liberdade iha dalan neʼebé sala. w18.04 p. 10 par. 7-8